كاتب الموضوع :
همس الليالي
المنتدى :
القصص المكتمله
________________________________________
عقب يومين
كانت نورة توها متسبحه ونازلة تحت ولافه شعرها بفوطه ..عبدالله وخالد كانو يالسين يلعبون بلاي ستيشن ومحتشرين كعادتهم .. خالد وعيسى من اول ما ياو من دبي وابوهم معطييهم اجازة اسبوع الشي اللي خلاهم يستغربون ومايفهمون شوهي المناسبه من هالاجازة المفاجئة لانه في الايام الاخيرة قام يكرفهم كراف .. بس قبلو هالاجازة لانهم يبون يريحون شوي ويرجعون حتى لو اسبوع واحد لحياتهم الجديمه اللي اشتاقو لها بشكل فظيييع ..
يت نورة ويلست وياخالد وعبدالله ..
عبدالله طالعها وهو يبى يتحرش بس نورة قالت له بدون ما تصد عليه: رجاءا مابى تفوير دم ..
عبدالله وهو يدعي البراءة: هههههههه شو بلاج انتي ؟
خالد: هالويك اند بتسيرين دبي؟
نورة :هيييه ان شاءالله..
خالد: انزين ترى بنسير رباعه ويا قوم عموه شيخه ..
نورة عقدت حياتها: ليش امايا بتيي ؟
عبدالله قال وجنه يتظارب:شو يعني ما تبين امايا اتيي ؟هاه ؟
نورة حليلها على ويهها وقالت وهي تدافع عن عمرها بكل هدوء: لاااااا والله ..اباها اتيي .. بس شو قصدك يعني ؟
خالد: يعني يمكن انا اللي اوصلهم وبيركبون وياي ..هذا اذا سعيد مايا من دبي ..بس اذا يا هم بيروحون وياه ..
نورة: اهاااااااا ...
عبدالله وهو يبى يعصبها: طاعو ارتاحت يوم قلتها انك ما بتوصلهم اذا ابويا يا ..لهدرجه ماتبين امايا اتيي وياج ؟؟ هيه تبين الفكاك انتي !!
نورة عصبت: جب انت ..انا الشخص الوحيد اللي ماباه ايي انت ويا هالويه ..
عبدالله وهو يمثل انه معصب: جب يجبج ..لا تجببيبيييييييييين ..
خالد انفعل وقال :حووووه ..بس انت وياها ..
نورة وعبدالله سكتو وكل واحد عطا ظهره للثاني ..
خالد :يهال انتو ؟؟؟ كل واحد شطوله وشعرضه .. لا والاخت بتعرس عقب كمن اسبوع ويالسه تتظارب جييه !!
نورة:..............
عبدالله:هي اللي بدت ..
نورة بطلت عيونها وشهقت: انا ؟؟؟؟؟؟؟؟؟؟
خالد: عبوووووود ..بس..
عبدالله ماقدر يتحمل اكثر: هههههههههههه
نورة كفخت عبدالله على ظهره باقوى ما عندها وقامت عنهم وقالت وهي سايرة فوق : مها بتيي وياي دبي ..وهالسبال ما يركب ويانا ..
خالد ضحكته شقت ويهه من اول ماسمع هالخبر وصد يلعب وهو هيمان ..
عبدالله طل في ويهه وقال وهو لاوي بوزه:مشكله اللي يعشق ويقص على عمره بهالخريط واخرتها مايستوي شي ..
خالد لف على عبدالله وهو مفول ..
خالد:عنلاااااتك يالهرم ..شو هالرمسه بعد ؟
عبدالله وخاف من خالد :ههههه ماشي ماشي..بلاك انت جييه من اقل شي وشبيت جنك ضو ..
خالد: شوف الرسمه اللي قلتها بعدين قولي ليش اشب جني ضو ..
عبدالله :انزين والله صدق..
خالد وهو ماسك اعصابه: صدق شو؟
عبدالله:يعني انت ناوي تخطب مها؟
خالد قال بكل جديه في لهجة صوته: هب ناوي ..خلاص مقرر ..
عبدالله: انزين يمكن البنت اييها نصيبها وتروح ..انت نسيت انك بعدك تدرس وباقيليلك 5 سنين مادري كم !!!
خالد: انشالله بتصبر ليين ما ايي ..وبعدين هي تبى تكمل دراستها وليين هي ما تخلص انا بكون مخلص وياينها ..
عبدالله :والله ما دريبكم انتو الاثنين ..بس والله يا خالد اعرف اني بفرح لك واايد اذا استوى اللي في بالك ..
خالد:مشكوور بو حمييد .. بس ولو الرمسه اللي قلتها مساعه مالها داعي والله ..
عبدالله وتلوم في خالد: سوري بو وليد ..
خالد: اووه اتطورت العزبه ..قمنا نقول سوري ههههههه
عبدالله فج حلجه وهو متذكر:اووه ... يالله قم خل نسير..
خالد بطل عيونه: وين نسير؟
عبدالله قام وسكر التلفزيون واللعبه: العزبه ..قم قم يالله ..
خالد تم يالس في مكانه وهو يشوف عبدالله اللي ارتبش مرة وحده ومستغرب من تصرفاته وعقبها بشوي قام ولحقه برى عشان يسيرون العزبه ..
وفي الحوش تلاقو ويا عيسى اللي كان توه ياي من الجامعه ..
عيسىوهو مبطل عيونه: توني ياي اسلم على يدووه واخبرك بالمرة ..
خالد وهو مستغرب: شو ؟؟
عيسى:ابويا يبانا نحن الاثنين ..
خالد فجاه هز تيلفونه ويوم طلعه من مخباه حصل مسج من ابوه "خالد بوي تعال البيت ..اباك ضروري "
خالد يوم قرا المسج رفع نظره لعيسى وقال وهو عاقد حياته: خير؟؟
عيسى هز جتوفه بانه مايعرف ليش وقال وهو مستعيل: انا توني واصللي هالمسج وكنت قريب من هنيه وقلت بسلم على يدووه وبسير له ...
خالد توتر وخاف ان ابوه يكون صاير وياه شي عشان جيه قال حق عبدالله انه يتصرف ويسير العزبه ويا أي حد وهو بيسير عند ابوه ..عبدالله طبعا سوى له عرس بس في الاخير رضى بالامر الواقع وشل سويج النيسان المكسر وسار به العزبه بروحه..
خالد على طول طار صوب بيتهم وسبق عيسى عشان الفضول والخوف على ابوه جاتلنه ..
دخل خالد وحصل ابوه يالس يعدل غترته في منظرة الصاله وكانت ريحة عطره واصله ليين الباب ..
خالد عقد حياته وقال :السلام عليكم ابويا ..
محمد التفت على خالد وابتسم ورد يعدل غترته وقال: وعلييكم السلام ..تعال خالد..
خالد استغرب اكثر وقال حق ابوه بصوت هادي: شو ابويا ..ساير عرس ؟
محمد يوم لاحظ توتر خالد قال: ههههههه لا ..أي عرس هذا اللي بيسوونه الساعه 5 العصر؟
خالد ابتسم بغباء وبجهل وقال:لا مادري..بس اشوفك كااشخ ومتعدل ..قلت يمكن يعني !!!
محمد سار ويلس على الكنبه وقال: لا لا ..هب ساير عرس ..(وشاف محمد ساعته ورد قال حق خالد ) يالله تعال...
خالد استغرب وقال حق ابوه بخوف: وين ايي؟؟
محمد لبس نعاله وطلع من الصاله بكل هدوء ورد قال حق خالد: تعال وياي ..
خالد سار ولحق ابوه بخطوات بطيئه تملأها الخوف والريبه ..
في الحوش كان عيسى توه ياي ونازل من سيارته ..ويوم شاف شكل ابوه بطل حلجه .. اول مرة ابوه يتكشخ جييه من يوم وفاة امه .. شوبلاه ؟؟ شو صاير؟؟ شو مسوي بابويا جييه ؟؟ وليش كل هالكشخه ؟؟ ساير عرس ؟؟ لالا عرس في هالعصر؟! ماظني ...
قطع تفكير عيسى صوت ابوه وهو يزقره من بعيد : عيسى...تعاااال ..
عيسى يا صوب ابوه بسرعه وقال: هلا ابويا ..
محمد:يالله اركب ..
ركب محمد سيارته وتريا عياله اللي واقفين ومصطنين ..مبطليين حلوجهم وعيونهم ومستغربين من اللي يالس يسويه ابوهم ..
محمد طلع راسه من بابه المفتوح وقال: بلاكم واقفيين جييه ؟ههههه تعالو يالله ركبو..
عيسى التفت على اخوه واللي كان لون ويهه مخطوف ..وعقبها سار ركب وركب وراه اخوه ..
عيسى: ابويا ..وين بنسير؟؟
محمد كان يسوق وهو مبتسم : بنسير بيتنا اليديد ..
خالد بطل عيونه: أي بييييييت ؟؟
عيسى: بيت يديد ؟!!وشو بلاه بيتنا ؟؟
محمد: ههههههه يوم بنوصل هناك ..بتفهمون كلللل شي ...
&-_. في دبي ._- &
فهد كان توه ياي من الشغل واول ما يا دخل بيته عشان يريح شوي وعقبها يسير ويقعد ويا امه وابوه اللي كانو يالسين في الحديقه ومايد يلعب حوالينهم شوي وشوي يقعد مثل الملاك ويرسم ..
ميرة كانت في استقبال فهد وكانت توها يايه من حجرتهم وشعرها مبلل ..
فهد ابتسم وقال: السلام عليكم ..
ميرة: وعليكم السلام .. عنك حبيبي ..
وشلت عن فهد غترته وعقاله ..
فهد: شو توج متسبحه ؟
ميرة ابتسمت وهزت راسها بالايجاب وشكلها كانت تبى تقول شي حق فهد بس غيرت رايها وحست ان الوقت مب مناسب الحين ..
فهد: انزين غناتي انا بدخل اتسبح الحين بعد ..
ميرة: ازهب لك الغدا ؟؟
فهد قال بفرح : شو طبختي اليوم ؟
ميرة قالت وهي قافطه: هييه ..
فهد :هممم شو سويتيلي ؟
ميرة:اممم ..مجبوس دياي ..
فهد ابتسم وقال: تسلم ايدج حبيبتي .. بس تعالي ..انتي مخبرتني من قبل انج ماتعرفين تطبخين !!
ميرة قــفط ويهها زياده وقالت: امم خذيت الوصفه من عند امك وتعلمت ..
فهد:بروحج ؟
ميرة:يعني ممم مرتين بس اتصلت في عموه ..
فهد: هههههههه فدييتج والله ..
ميرة سارت تزهب الغدا حق فهد اما فهد فشل بعمره وبعده يضحك وهو ميت من الوناسه في داخله .. اول ما دخل فهد غرفته حصل كالعاده ثيابه النظيفه وفوطته محطوطه على السرير ومرتبتنهن ميرة عشان اول ما ايي يتسبح على طول ولا يتعب عمره ويقعد يطلع ..
فهد ابتسم وقال في خاطره" سنع وتعلمته عشاني وطبخ وطبختلي وراحه ومريحتني .. الحمدلله لك يارب على هالنعمه .. الحمدلله .. "
عقب ما تسبح فهد طلع وحصل الغدا اللي واصله ريحته لين اخر البيت جاهز ويلس ياكل هو وميرة اللي تعودت انها تتغدا وياه في وقت متاخر ,, في البدايه ميرة كانت خايفه ان فهد ما يعيبه طبخها بس بالعكس فهد استاانس وتخبل على طباخها وطلب منها انها تتعلم اكثر واكثر عشان تطبخ له دووم وهالشي بالتالي فرح ميرة وااايد ..
عقب ما تغدو طلعو هم الاثنين ويلسوا ويا بوفهد وحرمته وتم فهد يغلس على مايد كعادته يوم يرسم ..
مايد بعصبيه: اوووووه..فهد ..ترى والله ان يت جواهر البيت بخبرها عليك ..
فهد: هههههه امييييي خوفتني..
مايد وطفر منه : والله ما ارسمك ..برسم بس ميرة والبيبي اللي في بطنها ..
فهد بطل عيونه وقال: أي بيبي ؟؟؟
ميرة هنيه قــفطت وتمت تضحك ..
ام فهد: شو أي بيبي بعد ..الياهل اللي في بطنها ..
فهد بطل عيونه اكثر واكثر وصد على ميرة وقال :ميرة ..هالرمسه صح ؟؟
ميرة خافت من فهد وسكتت وطالعت عمتها ..
ام فهد: وابويا عليك يا فهد ..بلاك بتاكل حرمتك ..شوي شوي عليها ..
فهد :ميرة ردي علي..
ميرة نزلت راسها وقالت بصوت واطي: هيه ..
فهد بطل عيونه بفرح وضحكته شقت ويهه وقال بصوت عالي : حلــــــــــــــفي؟
ميرة ضحكت : والله ..
فهد نقز وقال: فديييييتج ..لا لا مب مصدق ..انا بستوي ابو ..مب مصدق ..
وسار فهد وهجم على مايد وتم يبوس فيه لين ما قال بس ..
بو فهد: ههههه بلاه ولدج يا وديمة استخف ..
ام فهد: ههههه فديته مستانس ..
ياهم فهد ويلس عدال ميرة وقال: ليش ما خبرتيني ؟؟ وكيف عرفتي ؟؟ واصلا متى عرفتي ؟؟
ميرة: ههههه شوي شوي علي ... اممم اول شي كنت بخبرك من شوي بس ماعطتيني فرصه ..ثاني شي انا سايره المستشفى من يومين ويا عموه واليوم طلعت نتايجي وخبروني اني حامل في الشهر الثاالث ..
فهد طالعها وهو ميت من الفرح وقال: في الثالث.. الله عقب 6 شهور بستوي ابو يعني ؟؟ بييني ياهل وبيقولي بابا ؟؟
ميرة: ههههه هيه ..انشالله ..
تم فهد مرتبش ومستااانس عليهم وكلهم يضحكون عليه لانه صدق تخبل يوم سمع هالخبر.. كان يتمنى انه يصير ابو ..وميرة حققت له هالشي .بالنسبه لفهد اصبحت ميرة اهم مافي حياته ..لدرجة انه مابقدر يرفض لها أي طلب او انه يزعلها ..وهالشي مفرح ميرة من صوب ثاني لانها حست بتغيير كبير في حياتها .. من قبل كانت هي اللي تطلب من الكل انهم يحبونها وانهم يحترمونها ويسمعون لها غصبن عنهم وبطرق غريبه بس الحين من يوم ما اصطلبت عرفت كيف المعامله الحسنه تكون وكيف الحب يكون لانه ايي بدون ما يدق أي باب وبدون استأذان ..يدخل على الحياه كانه شعله مضيئه اللي يحافظ عليها بتم له كنعمه في حياته وبتنور حياته واللي يهملها ومايعرف قدره يتنجلب ضده وما بيعرف كيف يتصرف وياها ...
&-_ . في العين._-&
امنه كانت يالسه ويا ريلها وام ريلها ويسولفون مع بعض ..تطرقو لعدة مواضيع وكانت ام سيف ناوية تتطرق لموضوع مهم..
خليفه: خير يامي ..
امنه علامات الخوف بانت على ويهها وشكلها عرفت ام سيف تبى ترمس عن شو و نشت تبى تسير عنهم:انا بسير فوق ..
ام سيف يرتها من ايدها: لا لا يلسي يا بنتي ..
امنه ابتسمت غصبن عنها رغم الخوف: بسير اكل دواي عموه..
خليفه بطل عيونه: اووه صح ..يالله يالله جدامي اشوف ..
امنه: هههههه انشالله سايرة ..
ويوم سارت امنه فوق صد خليفه لامه وقال :امايا خير ..شو مستوي ؟
ام سيف : امم والله ماعرف كيف ابدى الموضوع وياك ..
خليفه عقد حياته وقال: امايا ..شي في خاطرج علي ولا على امنه ؟
ام سيف: لا لا يا وليدي ..امنه من عقب ما سوت العمليه وهي صايرة تعاملني شرات امها واحسن بعد وماشفت منها الا كل الخير ..
خليفه: الحمدلله ..عيل شو السالفه يامي ؟
ام سيف: انتو صارلكم معرسين اكثر من 5 شهور ..و ...
خليفه:وشو يامايا ؟
ام سيف: وامنه ما حملت ..
خليفه انخطف لون ويهه وحاول يمسك اعصابه وقال حق امه :انزين وهالشي يزعلج يامايا ؟
ام سيف: اكييد بيزعلني ..اني ماشوف عيال ولدي خليفه ..وبعدين يامك هالشي بيزعل أي ام ولدها معرس وهو بصحته وبعافيته ..
خليفه: يعني شو قصدج يامايا ..ان امنه فيها عيب مثلا ؟
ام سيف: انا اقول تسيرون تسوون فحوصات ..احسن عشان تتاكدون ..
خليفه قال وهو منفعل: أي فحوصات يامي الله يهداااج؟؟ مالها داعي ..
ام سيف: لا لها داعي..خلنا نشوف شو بلاكم..وليش ما يبتو عيال لين الحين ..
خليفه وهو يحاول يفهم امه: امايا ..انا وامنه مانبى عيال الحين ..وبعدييين اذا الله راد بيستوي اللي في بالج ..بس هب الحين ..
ام سيف انفعلت وعصب: وليش ماتبوون عيال الحين ؟
خليفه :امنه ما بتقدر على الحمال وهي بعدها تعبانه جيييه ..توها ماطاف على العمليه الا 3 شهور وشوي وانا اشوف ان هي بعدها محتاجه ترتاح زياده ..
ام سيف: لا لا بسها راحه ..وابويا عليكم انا ..الناس كلت ويهي وهي تسال اذا حرمة خليفه حملت ولا لا ..
خليفه: والناس شو يخصهم فينا ؟؟يقولون اللي يبونه من اليوم ليين باجر ..
ام سيف:ياولدي الرمسه ما اتيي عليها هي ..اتيي عليك انت وهذا اللي يقهرني ويحرق قلبي ..
خليفه: يقولون الللي يبونه من اليوم لييين باجر ..ماهمتني رمستهم في شي..
ام سيف تكدرت ونزلت راسها ..
خليفه باس راسها وقال وهو يحاول يراضيها :انشالله يامايا بتسمعين خبر حملها قريب ..لا تحاتيين ..بس صبري عليها شوي ..
ام سيف: اللي تشووفه ياولدي ..اللي تشوووفه ..
خليفه ابتسم: هب اللي اشوفه يامايا ..اللي الله يشوف فيه الخير لنا ..نحن راضين به ..
ام سيف: الله يحفظك لي يا ولدي ..
خليفه: ويحفظج لي ..يالله عاد مسحي دموعج هاي ..مابى اشوف دموعج الغاليه تنزل ..
ام سيف ابتسمت غصبن عنها وقالت:انشالله يا ولدي..
في الجانب الثاني محمد كان توه واصل عند مبني يديد وفخم ..يعني اللي يشوفه بيقول هذا مكانه هب في العين ..يا بوظبي او دبي ..بس في العين يكون مبني فخم وحلو جييه ..لا...
نزل محمد من سيارته وعياله بعدهم يالسن في السيارة وهب فااااااهمين شو السالفه ..
محمد وهو ياشر عليهم :يالله تعالو ..
خالد: شو السالفه ؟؟
عيسى :والله مادري علمي علمك ...يالله ننزل ونشوف وين بيوديينا..
خالد:ليكون مستاجر لنا شقه هنيه ؟؟
عيسى: هههههههه الحين من بيتنا العووود بييبنا لشقه ؟؟ لا لا ماظن..تعال يالله ننزل ..
نزلو عيسى وخالد وهم منبهريين بفخامة المبنى ..
محمد كان واقف عند الباب وقال لهم وضحكته شاقه ويهه : سمو بالرحمن ودخلو..
عيسى وخالد تمو مبطلين حلوجهم وهم هب فاهمين شو السالفه وطالعو بعض باستغراب وردو طالعو ابوهم ..
محمد:ههههه يالله ..بلاكم تطالعون بعض جيه ؟؟ دخلو شركتكم اليديده يالله ..
عيسى بطل حلجه وقال:شركتنا؟
خالد قال بتصطيل: أي شركه ؟
محمد:هههههههه شو أي شركه ؟..يالله دخلو ..
دخلو خالد وعيسى وهم مبطلين حلوجهم..
عيسى: أي شركه يا ابويا ..الشركه مب هنييييييه ..
محمد: لا هنيه ..هاي هي شركتنا اليديده ..
خالد تم يحوط في المكان وهو بعده ما نطق بولاكلمه وماعلق على اللي قاله ابوه..
محمد: هاه شباب.. شورايكم ؟
عيسى وهو منبهر: والله المكان ماااعليه كلااام ..بصراحه عجييب ماشالله ..
محمد ابتسم ابتسامة رضى وقال حق خالد: وانت يا بو وليد ؟
خالد قال وهو بعده مبطل حلجه : الحين هاي شركتك ..ابويا انت ترمس جد ؟
محمد: ههههه اولا هاي هب شركتي روحي ..هاي شركتكم انت واخوك ..
عيسى يتدخل: ابويا هاي شركتك انت ..ونحن مالنا شي فيها ..نحن بس مجرد موظفين عندك..
محمد: شو هالرمسه يا عيسى ؟ بفضل الله وبمجهودكم استوت شركتكم..وتراها عقب ما تغفي عيني بتصير حقكم ..هذا حلالكم يا عيالي..
خالد وعيسى ماعرفو كيف يردون على ابوهم غير انهم سارو وباسو راسه ..
خالد: الله يطول بعمرك يا ابويا ..
محمد ابتسم وقال حق خالد بمكر: بعدك ناوي على العرس ؟
خالد بطل عيونه وقال: كيف؟
محمد: ههههه ..شوفو انا قررت اني اقسم البيت 3 اقسام ..
عيسى عقد حياته: ليش؟
محمد:قسم حقك يا عيسى وقسم حق خالد وقسم حقي ..
خالد قال باحتجاج: ليييييييش؟
محمد: تراكم خلاص كبرتو وبتعرسون ..ما ايووز بعد تعيشون انتو وحريمكم وياي في بيت واحد..
عيسى: ومنو قال ما ايووز يا ابويا ..نحن نبى نعيش وياك ..
محمد:ياعيسى اننا اباكم تستقروون وتعيشون على راحتكم ومابى حد يكون مثجل عليكم ..خلاص انا اشالله باجر اييب مقاااول زيين يعرفه عمك فيصل وبنتفق على كل شي ..
________________________________________
#في بيت بومحمد#
ام محمد يالسه ويا بنتها شيخه وحريم عيالها شوق وفاطمه..
شيخه: بلاها مريم غاديه عود جييه ؟
فاطمه: وديتها المستشفى امس عشان اكشف عليها وقالي الدكتور البنية طبيعيه ومابلاها شي ..
ام محمد :وييين طبيعيه وهي جييه متيبسه ؟
فاطمه: ههههه عموه هو يقول ان طبيعة جسمها جييه ومع الوقت بتتغير..
ام محمد: هيييه ..انزين شوق انتي شو بغيتينا انا وشيخه مساعه ؟
شوق ارتبكت وطالعت عمتها بنظرة انها ما تروم ترمس جدام فاطمه ..
ام محمد: ليكون عن موضوع محمد ؟؟
فاطمه تدخلت: بلاه محمد ؟؟
ام محمد:يامج محمد بعده صغير وانا ودي اشوفه مستانس في حياته ..
فاطمه وحاولت انها تفهم قصد عمتها بس مارامت...
ام محمد وهي تكمل : وانا خاطري اخطب له ..
فاطمه بطلت عيونها وقالت: شوووه ؟؟
نزلت كلمات ام محمد مثل الصاعقه على فاطمه .. مريم ما مرت على وفاتها سنة وهم يفكرون انهم يبدلون مكانها بوحده ثانيه ؟؟؟ ليييييييش؟
شيخه وشوق متفهمات لوضع فاطمه بس ام محمد حليلها على نياتها وما كانت تقصد انها تضايق فاطمه بهالشي..
فاطمه قالت وهي ضايجه: محمد طلب هالشي؟
شيخه تدخلت: لا ماطلب ..بس امايا تفكر ويعني هالشي هب اكييد ..
فاطمه سكتت وهي هب عايبنها الوضع بس سكتت وشوبتقول حق ام مسكينه ودها تشوف كل عيالها مستانسين وسعيدين في حياتهم ..
عقب ماتكهرب الجو شوي ردن شوق وشيخه يسولفن ويغيرن الموضوع وردت فاطمه تسولف عادي وياهن بس من داخل كانت بعدها متظايجه من فكرة عرس محمد ..
شيخه: امايا سعيد حصل لنا بيت في دبي ..
ام محمد تكدر خاطرها وقالت: بعده سعيد معزم انكم تسيرون وياه ؟
شيخه: شو نسوي بعد يامايا لازم نسير وياه ..
ام محمد والعبرة خانقتها: نواف طلع ونورة بتلحقه والحين انتي بعد بتسيرين عني ؟
شوق تدخلت:افا عليييج يا عموه ..ونحن وين سرنا؟؟
ام محمد:البيت فظى علي يا شوق ..
شوق ابتسمت وقالت: ليش فيصل ما قالج؟
ام محمد: قالي شو ؟؟
شيخه: ترى فيصل بيي وبيسكن هنيه وياج ..
ام محمد حست بفرحه وقالت: من صدقكم ؟
شوق: هييه ..ولا شو ما تبينا يا عموه ؟؟
ام محمد ضربت شوق على جتفها بمزح وقالت:شو هالرمسه بعد يا شوق؟ اذا البيت ما شلكم انا بحطكم في عيوني ..
شوق: فدييت عيونج عمووه ..
فاطمه قالت واونها تغار: لحظة لحظة ..وانا وين سرت .. عموه انا احتج ..
ام محمد: ههههه شو بلاج يا فاطمه؟؟
فاطمه:اشمعنى شوق اتيي وتسكن عندج وانا لا ؟ مالي خص انا بيي بعد ..
ام محمد: حياااااج الله يا بنتي هههههه ..انتو اتييون وتيلسون هنيه بدون ما تستاذنون ترى هذا بيتكم...بس انا ما بغيت شيخه تفارقني تعودت عليها يامج..
شيخه :فديتج يامايا انا هب سايرة اخر الدنيا ..الا دبي وبعدين انشالله كل اسبوع وبنكون عندج ..
وشوي ولا سمعو صوت عيال شيخه وبنات شوق وهم يالسين يصيحون ويتظاربون..
شيخه بطلت عيونها: مب جنه هذا صوت عليا ؟؟
شوق: لا والله هذا صوت بنتي خلود !!!!
فاطمه شهقت وهي تاشر عليهم تحت الدري: جتلو بعض ...
ام محمد:قومن قومن لحقن على عيالكن ..
شوق وشيخه قامن يترابعن صوب عيالهن ويفججونهم عن بعض ..وهاي ماكانت اول مرة يسووون فيها جييه ..يعني متعودييين عليهم..ام محمد تمت تطالع الجو اللي حواليها وعبرتها حنقتنها ...مب متخيله ان عقب كم شهر بيهدى البيت وبيصير صامت ومافيه حركة ..مابيسنمع فيه صوت نورة وهي تتظارب ويا عبدالله ..ما بتنسمع فيه صرخات اليهال وهم يضحكون ويلعبون ..نواف..نورة..شيخه ..كلهم انسحبوا واحد ورى الثاني من هالبيت اللي كان لامنهم كلهم على بعض والحين تفرقو ..بس شو بتسوي ام محمد ..هاي هي سنة الحياه ومالها أي اعتراض على اللي الله كاتبنه يصير..
عقب مرور اسبوع واحد ..بقى اسبوعين بس على عرس نورة واحمد ..والكل مشتل وياها ..هي اصلا شايله البيت فوق راسها من حشرتها وربشتها ..خالد اوفى بوعده ووداها دبي بس حليله كان يوديها كل 3 ايام لانه مابقى الا شوي على عرسها وكانت لازم تتابع كل شي يستوي ويا فستانها ..مها سارت وياهم مرة وحده وتابت عقبها ما تسير وياهم لان نورة ماسكتت طول الدرب وهي تنغز فيهم هم الاثنين مع ان شيخه كانت سايرة وياهن بس نورة ما سكتت وهالشي كان مطفر بمها وبخالد اللي كان شوي وبيفر نورة من دريشة السيارة ...
#في بيت بو محمد#
ام محمد:نوراري فديتج متى بتسيرين بتشوفين قسمج ؟؟
نورة كانت مشغوله ويالسه تتفحص بطايق عرسها ..
عبدالله دز نورة :اييييه انتي ..يدووه ترمسج ..
نورة وانتبهت: هلا امي ..
ام محمد:متى بتسيرين تشوفين قسمج ؟
نورة عقدت حياتها وحكت راسها: أي قسم ؟؟
عبدالله: انتي الظاهر انج خرفتي ..شو أي قسم بعد ؟؟
ام محمد:وابويا علييج يا نورة ..قسمج ..بيتج انتي واحمد ..
نورة قــفط ويهها وقالت: ههههه امي مادري..
ام محمد:تبينا نسير اليوم العصر؟
نورة فكرت اول شي ويوم جلبتها في راسها عرفت ان احمد بيكون مدوام العصر ..
نورة: انزيين ..خلاص العصر انشالله بنروح ..بس عقب ما نرجع من هناك بمر على المول ..
ام محمد وهي ناشه عنهم:انشالله يابنتي ..
عبدالله تدخل: انتي ابى اعرف ما تشبعين من هالمول ؟ طايحه فيه 24 ساعه !!
نورة بطلت عيونها: طااااااعو الجذب بس انتو ...مايسوى علي اني سرته هاذيج المرة وياك الا وذليتني ..
عبدالله: الحين انا الجذاب ولا انتي يالمخرفه ؟ نسيتي ..نسيتي انج امس سايرتنه ؟
نورة عقدت حياتها وهي تتذكر وقالت: ماذكر..
عبدالله وفيه الضحكه:لا فركي هالمخ المخرف واتذكري عدل ..
نورة حاولت تتذكر عدل بس ماقدرت وقالت بياس: والله ماذكر..عبوود متى سرت ؟
عبدالله :ههههههه ..
نورة عصبت على عبدالله ودرت انه يتمصخر عليها :سبااااااااال ..انت ما اتوب الا تنضرب على هالويه ..
عبدالله:ترومين انتي بس ..
نورة نشت صوبه بنظرات شيطانيه عشان تضربه وهو تم يربع ومي من الضحك وهي تلاحقه في البيت لييين مافقدت الامل ومارامت تمسكه ..
على الساعه 5 العصر تلبست نورة وشلتها ام محمد وودتها بيت ام احمد عشان تشوف قسمها.. اول مادخلن شافن وعد يالسه ببيجامه وكانت توها طالعه من غرفتها اللي نقلوها لها تحت لان القسم اللي فوق كللله خلوه حق احمد بس وهي نزلوها تحت في غرفة الضيوف لين ما يجهز قسمه ..
وعد اول ماشافتهن بطلت عيونها وردت اندست مرة ثانيه في الغرفه ..
دخلن ام محمد ونورة وسلمن على ام احمد اللي تمت تهلي وترحب ابهم ..
ام احمد:يا مرحبا السااع ..والله منور بيتنا ..
ام محمد: منور باهله يام احمد ..
نورة: عمووه..عيل وينها نورة ؟
ام احمد:وينها هاي وعد ..يا وعععععد ...وعـــــد ..
وعد طلعت من غرفتها وشكله مرتبك من ام محمد اللي قامت تستحي منها وايد في الاونه الاخيره لان ام محمد تمدح فيها وعقب ما سملت عليهن ..
ام حمد:وعد امي ..ودي نورة فوق خلها تشوف بيتها..
وعد:يالله نواري..
ويوم طلعن فوق وقبل لا تدخل نورة قالت لها وعد: غمضي عيونج ..
نورة طالعتها بنص عين: حلفي بس انتي ؟
وعد: والله هههههه يالله غمضي..
نورة: وعدوو عن الحركات الغبيه ..يالله يالله بطلي الباب ..
وعد بعناد: هب مبطلتنه الا اذا غمضتي عيونج ..
نورة: ههههه اوقي مام ..
وغمضت نورة عيونها ..اول مابطلت وعد الباب شمت نورة ريحة الصبغ اللي تصدع الراس وعلى طول بطلت عيونها..
وعد قالت: خسسسسسسسسفه ..ليش بطليتها ..
نورة: هههههه بلاج انتي ؟؟
وعد:كنت ابى اوديج اول شي غرفة النوم لانها كلها ذوقي ..
نورة وهي منبهره بجمال وروعة البيت: اللـــــــــه ..(وصدت على وعد) انا بسكن هنيه ؟
وعد بحقد: لا انا .. هيه انتي عيل منو ..
نورة: هههههه ويو مسكييييينه الله يعيين عيسوه شو بيخبص لج ..
وعد وهي تتكلم بخقه وتدافع عن عيسى: ويي مالت علييج وعلى ريلج..الحين هالاثاث العاادي عايبنج ..وهالديكور المفلع ماخذ عقلج ؟؟ باجر بتشوفين الشيخ عيسى شو بيسوي ..
نورة وهي تسكتها: انزين انزين ههههه ..
وتمت نورة تطالع كل قطعة اثاث في بيتها ..
نورة وهي مبتسمه وتقول بصوت واطي: فدييت احمد والله ..
وعد طلت في ويهها: نعم ياختي ؟
نورة: شووه ؟قلت فديييت احمد ..
وعد :لو سمحتي لا تتفدين اخويا ..اغار..
نورة: طاعو هاي بس انتو هههههه حبيبتي خلاص اخوج صار ريلي ..
وعد وهي تتصرف نفس اليهال: انزين حتى انا عندي ريل ..
نورة: ههههه الله يخلييه لج ..المهم وعد خبريني هو متى لحق يسوي كل هذا؟ خبري فيه ان دوامه طويل وما يلحق ..
وعد:لا حبيبتي احمد ما يطوفه شي..من خلص شغله ارتاح شوي وقام عقبها وجابل العمال ..
نورة عفست ويهها: حلييله يعني تعب وااايد ..
وعد:هيه والله ..الا قولي هلك وايد ..
نورة: ولا والاخ يقولي مب مشغول ..واذا فاضيه بيي بيتكم الحين ..
وعد: هههههه..
نورة: انزين خبريني ..انتي شخبار عيسوه وياج ؟
وعد: اممم يجنن ..
نورة: هههههه ادري ان احلى عنج مافي داعي تقولين ..طالع على عمته ..
وعد لوت بوزها: ولا ايي صوبج ..شو ياب القمر حق البقرة ؟؟
احمد:بعععععد تغلطين على حرمتي و في بيتها !!
نورة شهقت ويوم صدت لقت احمد واقف وحاط ايده على خصره وكان لابس لبس الدوام وحاط البالطو على ايده وشكله تعبان من الخاطر ..
احمد ابتسم بتعب ودخل: اححم اول حاجه سلامو عليكو ..
وعد+نورة: وعليكم السلام والرحمه ..
احمد قرب من نورة وقال: اييه هوا المدام جايه النهارده ومشرفانا في البيت ؟
نورة ووعد تناقعن من الضحك على لهجة احمد اللي تضحك ..
احمد : وعد سيري امايا تباج ..
وعد بطلت عيونها وردت رصصتهن وطالعت احمد بمكر: اساليب المرواغه هاي ودرها ..
احمد: اذهبي الآن ..
وعد:لا اريد ..
احمد: قلت لكي اذهبي لا ايرج من شعرك ..
وعد واونها عصبت: تبا لك يا مسيلمه ..
احمد بطل عيونه: ويحك ..ماهذا!! والله لافلعنك بالنعال ..انزلي هيا ..امايا تريدك ..
وعد: والله لو امايا تعرف عن مخططك المفلع هذا ..سوف تنحرك يا مسود الوجه..
(طبعا نورة ميته من الضحك على المسلسل التاريخي اللي يالسه يستوي جدامها)
احمد بطل عيونه ورجع لطبيعته: انا مسود الويه يالعنز ؟
نورة: ههههههه بس بس خلاص سكتو ..سكتو ... انا بنزل الحين ..
احمد :وين وين ..ماشي ..
نورة بطلت عيونها: شو ماشي؟
احمد طالعها بنظرة خبث: هوا دخول الحمام زي خروجه ؟؟ لأه ده بعدك ..
نورة: ههههههه احمد عاد .. خلاص..والله صدق لازم اسير..وبعدين انت شو اللي يابك من دوامك ؟
احمد:ايوه ايوه قولي انج هب يايه عشاني ..
نورة: انزين انا يايه اشوف البيت وبروح ..
احمد واونه برطم ..
نورة طلت في ويهه: اونك زعلت ..
احمد صد عنها: هيه انزين ..
وعد طفرت من هذيلا الاثنين: والله انكم طفره ..انزل عند امايا وعموه ابرك لي من مجابلكم ..
اول ما طلعت وعد صد احمد على نورة وقالها وضحكته شاقه ويهه: واخيرا فارجت ..
نورة بطلت عيونها: ههههه حرام عليك ..
احمد:شحالج غناتي ؟
نورة :الحمدلله بخيير ..شحالك انت ؟
احمد: ههههه ادريبج الحين تقولين في خاطرج تو الناس ..بس انا يوم شفتج صرت بخيير..
نورة: ههههه لا والله ما قلت ولاشي ..
احمد: تولهت عليج يالدبه ..
نورة بمستحى: انا اكثر..
احمد :اممم شو رايج في البيت ؟؟
نورة : اممم ..
احمد قاطعها: لا تجامليييييين ..
نورة: انزين ..بصراحه ..ذوقك ..
احمد قطاعها مرة ثانيه وقال: خايس..ادري..
نورة بطلت عيونها: شوووه ؟؟ منو قال؟
احمد :انا اقول ..
نورة: يا سلام ..يعني انا ذوقي خايس ؟؟
احمد بطل حلجه : منو قال؟
نورة: تراك انت اللي تقول...صدق انك دب..
احمد: هههههه انا ما قصدت عنج ..
نورة واونها عصبت: جب ..
احمد : والله قصدت عن الاثاث..
نورة: تراك قلتها ذوقك خايس ..وترى ذوقي من ذوقك ..وانا وياك واحد ..يعني سبيت عمرك ..سبيتني ..
احمد سكت وطالعها بحنان وقال وهو مبتسم :والله احبج ..
نورة حست ان خدودها احترقن من المستحى وسارت تبى تطلع من الباب ..
احمد:وين بتسيرين ..
نورة: لازم اروح الحين ..
احمد: يالله عاد عن الدلع ..شفتي المطبخ ؟
نورة: هيه ..
احمد :شفتي الغرف والمكتب؟
نورة: اها ..
احمد وهو مب مصدقها: لا لا ماشفتيهن عدل..تعالي انا براويج ياهن ..
نورة بطلت عيونها: والله اني شفتهن ..
احمد ما سمع لها وسارت وبطل بيبان كل الغرف وزقرها عشان تشوفهن عدل على قولته وفي نص جولته طبت عليهم وعد وخربت عليهم وقالت ان نورة لازم تروح لان ام محمد مستعيله وتبى تودي نورة المول عشان عقبها تردالبيت بسرعه لان روحها عندها اشغال تبى تخلصها..
بدا العد التنازلي ونورة تعد الايام ...اسبوع ...4 ايام ..يومييين ... اليوووووم ..
اليوم هو اليوم اللي بطلع فيه من هالبيت وبسير بيتي اليديد ..ببدا حياتي اليديده ويا احمد ..ياما حلمت وتمنيت هاليوم .. والحمدلله الله حقق اللي كنت اتمناه ..
عقب صلاة الفير وعقب ما دعت نورة ان الله يوفقها في حياتها اليديده اللي بتبداها مع احمد في هاليوم نزلت نورة تحت وهي مب قادرة ترقد لانها كانت راقده من عقب صلاة العشا ..عشان جييه كانت خلاص طفحانه رقاااد ..
اول مانزلت نورة كانت الصاله هاااااديه وفااضيه ..سارت وبطلت التلفزيون وحطت السعوديه وتمت تطالع صلاة الفير وهي تفكر في اشياء وايد ..
ماكانت قادره تستوعب انها اليوم خلاص بتطلع من عند ام محمد وشيخه ..كيف بتعيش حياتها بدونهن ؟ وكيف بتتاقلم ويا احمد .."صح احب احمد وهو يحبني بس كيف بقدر اعيش وياه ؟ ما اتخيل اني خلاص ما بتم في بيت واحد ويا امايا ..ويااختي وامي شيخه .. امي اللي ربتني واعتبرتني شرات بنتها .."
وهنييه بدت دموع نورة تنزل ...
"وحرمة ابويا الطيبه .. اللي حبتني شرات باجي عيالها ...كيف بترك كل هذيلا وبروح عنهم ؟ عبود .. والله بشتاق له هالسبال ..خالد وعيسى مابقدر اشوفهم كل يوم ...نواف اخويا ..ما بترياه كل اسبوع عشان ايلس اسولف واضحك وياه .."
قرار نورة اكيييد كان صعب عليها يوم وافقت على احمد ..يعني بتودر كل هالناس عشانه..بس هي استخارت ربها .. والله كاتب لها هالشي ..يعني ما بتقدر تعترض على اللي الله كتبه عشانها ..بس في نفس الوقت كانت من داخل حزييينه وااايد على فراق اهلها ..صح انها ما بتبعد وايد عنهم ..بس هي ما تعودت مووولية على هالشي..انها تكون بعيده عن نظر شيخه .. وماتسمع دعوة حلوة من ام محمد يوم تحتاج لها ..ماتعودت انها تنش الصبح وما تشوف عبدالله على الريوق ويطفر بها وتتظارب وياه ...بس هذي هي سنة الحياه ..الوحده يوم بتيي بتعرس تطلع من بيت اهلها تحس انها بتفارق روحها وبتخليها عندهم ..وبتعيش جسد بلا روح ..هذا كان شعور نورة اللي تحس به واللي معذبها من يوم ما حست ان عرسها بدى يقرب .. والحين في يوم عرسها ماقدرت تتحمل هالعذاب اكثر عن جييه ..
طلعت ام محمد من غرفتها ويوم شافت نورة يالسه في الصاله روحها ويالسه تشاهق من صياحها بطلت عيونها وماتت من الخوف..
ام محمد بخوف: نواري...شو بلاااااااج ؟
يوم صدت نورة وشافت ام محمد واقفه ربعت ولوت عليها وانفجرت من الصياح ..
ام محمد وهي تمسح على راس نورة: نواري شو بلاج فديتج ؟؟ شو مستوي ؟
نورة:مابى اروح عنكم ...مابى يامي ..
ام محمد :هههه خل عنج هالدلع يانورة..هاذى نصيبج يا بنتي ومصيرج بتطلعين وبتسيرين بيت ريلج ..
نورة: امي مابى اودركم ..هب قادره والله .. ام محمد سكتت وماعرفت شو ترد على نورة وبس اكتفت بانها تمسح على راسها وتهديها ليين ما سكتت عن الصياح ..
ام محمد شافت ويه نورة المحمر وقالت لها : سيري رقدي فديييتج ..وراج مية شغله اليوم ..
نورة قالت وهي تمسح ويهها: مافيني رقاد يامي ..
ام محمد: وابوي.. شو بعد مافيج رقاد ..يالله سيري وحاولي ترقدين عشان باجر لا تتعبين ..
نورة سكتت شوي وعقبها ردت تقول: انشالله ...
سارت نورة غرفته وقبل لا تبطل الباب سارت وبطلت باب غرفة عبدالله وحصلت نصه على الشبريه ونصه برى وراقد في سابع نومة.. شكله قام صلى ورد رقد ونسى يتلحف..تمت تضحك على شكله ودموعها تطيح في نفس الوقت ..سارت ولحفته عدل وطلعت من عنده وهي تحاول تقبض عمرها عن تنفجر وتسوي مناحه وتوعيه بعد ..
سارت غرفتها ويلست اول شي على شبريتها تمسح الدموع من على ويهها وعقبها لفتت نظرها شنطتين بعدهم ما ودتهن بيتها لان الباقياات ودوهن بالامس بيتها وبس بقن هالثنتين ..
سارت نورة صوبهن وبطلتهن وتمت تعابل فيهن عشان تقضي وتشغل وقتها لان النوم ماقارب عيونها ..كان خاطرها تدق حق احمد وترمسه بس هي ما رمسته من اسبوعين قبل العرس وسوت نفس حركة نواف وسارة ..احمد كان عادي عنده الوضع لانه مصبر عمره ..اسبوعين وعقبها نورة بتصير حقه للابد ..ليش العصبيه والزعل ؟ بس نورة كانت تحس انها فكرة غبيه بس ماتقدر تقول" لا " حق شيخه وام محمد اللي يلسن على راسها عشان لا ترمس احمد قبل العرس بكم اسبوع ....
عقب ساعه ماحست نورة بعمرها وانسدحت على ارضية غرفتها وحطت ايدها تحت خدها وتمت تفكر ليين ما غالبها النعاس ورقدت ...
على الساعه 2 الظهر حست نورة بحشرة واللي طالع واللي راد من غرفتها .. بطلت عيونها بشوي شوي وشافت سارة ومها واقفين فوق راسها ومحتارين شو يسوون ويا الصالون لان مها نست تحجز حق جواهر وميرة حرمة فهد ..
سارة طالعت نورة وهي تنش وقالت وهي مبتسمه: صباااااح الخيييير..
نورة نشت وابتسمت بشكل يضحك وهي تفرك عيونها وتلم شعرها وسلمت على سارة ,,
نورة بفرح: صباح النور... هاه متى وصلتو ؟
سارة: تونا اليوم الصبح ..
نورة:ليش الحين شو ؟ الساعه كم ؟ (وبطلت عيونها) 2 الظهر ؟ ليش محد وعاني؟
مها: هههههه حاولنا فيج انا وسارة ان نوعيج ونخليج ترقدين على الشبريه بس انتي ما طعتي تنشين ..
نورة ارتبشت مرة وحده وتدودهت وحست انها بتدوخ وبتطيح من طولها ..
سارة وهي تحاول تهديها: نواري فديتج ..يلسي يلسي..
نورة: وين ايلس ؟لازم اتسبح الحين ..
تمت نورة تطلع ملابسها من الكبت بشكل غريب ويضحك ومها وسارة مبطلات حلوجهن ومستغربات من ارتباشها المفاجىء ..
المهم ان عقبها نزلن سارة ومها وشافن الدوشه اللي تحت ..عيال شيخه يراكضون ويلعبون ومسووين حركه في البيت ..شيخه وام محمد يرابعون ومايلسن في مكان واحد ..مع ان العرس بيسوونه في قاعه بس هم كانو محتشرين لان ام محمد اصرت ان تودي البشاكير وهم اللي يقهون الحريم ...
عقب هالحشرة والصريخ حطو الغدا وتغدو بسرعه بسرعه ..الريايل يلسوا على راحتهم اما الحريم وبالذات البنات اللي كانن بيروحون الصالون كلن بسرعه بسرعه ..
جواهر وصلت اول ما خلصن الحريم غدا وطبعا اول شي سلمت على اختها سارة اللي ماشافتها من شهر ويلست تاخذ علومها وسوالفها ويوم سالت عن العروس قالولها انها تتسبح والعصر بيودونها القاعه وهناك بيوونها مالات الميك اب والشعر وبيعدلنها ..
عقبها انطلقن البنات وسارن الصالون عشان يخلصون بسرعه لانهن كانن وايد ..مها واختها امنه وحرمة اخوهن نوال وسارة وجواهر وميرة وعقبها ياووهن لطيفه ومنى ولحقتهن وعد ..كلهن كانن حاجزات في صالون واحد ماعدا شيخه وشوق وفاطمه اللي حجزن في صالون ثاني عشان لا يتزاحمن وايد..
عبدالله وخالد ما قرو كل شوي وطرشتهم شيخه ولا ام محمد يسيرون اييبون شي ..عيسى وطارق وفهد توزعو عشان اييبون البنات والحريم من الصالون لان الباقيين كانو مشغولين ..
على الساعه 5 ودو نورة القاعه واللي كانت فيها غرفة للعروس وكانن هناك مالات الصالون .. طبعا كانت مسويه وياهن بروفة من قبل على كل شي عشان جييه كانن عارفات شغلهن عدل وما تلعوزن ويا نورة ...نورة كانت تتصرف بتلقائيه وبشكل طبيعي وااايد ..يعني كانت خايفه ومتوترة شوي بس تمنت ان هالخوف وهالتوتر ما يزيد عليها على بداية مراسم العرس...
احمد كان مخطط اول ما يخلص العرس يشلها ويروحون مطار دبي ومناك على طول السفر يعني بيقضون اول ليلة لهم مع بعض وهم برى ..اول شي احمد احتار وين يودييها وعقب تفكييير ومشاورات ويا وعد وشو هي نوعية الاماكن اللي تحبها نورة قرر انه يودييها جزيرة في جنوب ايطاليا ..وهالجزيرة تتمتع بجمال طبيعي هااااادي ومافيها أي صدعه وحشره ..وطبعا كل هذا كان مفاجاه حق نورة .........
ازدحمت القاعه بالحريم ... ام احمد وبناتها وام محمد وشيخه واقفين في الاستقبال ويا جواهر وسارة ..الفرقة اللي كانو يايبينها تاخرت في الوصول وما وصلت الا عقب ساعة ونص من ابتداء العرس..الشي اللي خلى شيخه تعصب من خاطرها لانها متقفه وياهن على وقت محدد وهم تاخرن ..
وعد كانت كل شوي تتصل في نورة وتتطمن عليها ...واخر مرة دقت لها ..
نورة: صبري بعدها ما خلصت الميك ..
وعد شهقت: عنبو ..من كم ساعه وهي تحط لج ..
نورة وهي ترمس عن مالت الصالون بس تشفر: ياختي بطييء شو نسوي بعد ؟
وعد :ههههه بلاج خرفتي ؟
نورة :جب جب مب فاهمه شو السالفه واونه خرفتي ..مستويتلي عبود الثاني ...
وعد: خسسسسسسسسفه ...انزين يالله باي ..
نورة: ليييييييش؟
وعد: شو ليش بعد ؟ بسير اسلم على الحريم ..
نورة: اوكي ..اقولج دقيتي حق احمد مساعه ؟
وعد: تيلفونه مغلق..
نورة بظيييج : اففففففف..
وعد: شو افف بعد ؟ خلاص عقب كم ساعه يتكونين وياه ..شو تبين به الحين ؟
نورة: يالسباله انا احاتيه ..تيلفونه مغلق مادري شو صاير وياه ..
وعد: ههههه لا تحاااتين هاذو يالس يرزف ومستااااااانس ...
نورة بطلت حلجها: وانتي شدراج يوم ان تيلفونه مغلق؟
وعد: احم ...عيسااني خبرني ...
نورة وهي تعيب على صوت وعد:عيساااني اون ..
وعد: نوروه قسم بالله بييج الغرفه وبكفخج اذا ما سكتي ..
نورة: هههههههه انزين عموه ..
وعد: عنبو انتي عروس ؟؟ والله اني شاكه انج انتي العروس !!
نورة: هههههه ليش؟
وعد:عااااااادي حلوة الحياه عندج ولاجنج العروس اللي المفروض تحاتي وتصيح ..
نورة: وليش احاتي واصيح وانا مستانسه وفرحانه ..شو قالولج اسمي وعد ؟
وعد: هاهاي ياعمري انتي ...حبيبتي كل العرايس يسوون جييه ..الا انتي مادري من وين انتي!
نورة: هههههههه ا نزين بغيت اتخبرج ..سلامي يت ؟
وعد: لا بعدها ..بس شفت امها وقالت انها بتيي عقب شوي وياخواتها ..اقولج الحين صدق باي تراج وايد تهذربين ..
نورة: ههههه انزين فمان الله ..
سكرت نورة عن وعد اللس سارت ويلست ويا قوم مها وامنه وهي تعلق وتضحك على نورة وكلهن استغربن لانهن توقعن انها تسويلهم مناحه بس الحمدلله انها كاانت كووول وهاديه وتسولف وتضحكبس هم مايدروون عن الاعاصير والعواصف اللي كانت تستوي داخلها والرعب اللي بيجتلها بس هي تبين لهم العكس..
جواهر كانت تسير لها من فترة لين فترة وتطمن عليها بعد ..وكانت قاهرتنها مالت الصالون البطييئه اللي تشتغل على اقل من مهلها ..بس شغلها ماشالله كان روعة ..يعني مكيجت نورة مكياج رهييييب خلاها تتغير 180 درجة وغير شكلها ..
يا الوقت اللي لازم تتدخل فيه نورة وغنت لها الفرقة زفة راشد الماجد..
كللللهم كانو مبطلين حلوجهم ومبهوورين بجمال نورة اللي برز في يوم عرسها ..محد كاان يتوقع انها بتطلع جييه في يوم عرسها ...نورة صح ان ويهها طفولي وفيها جمال بريء بس كانت ظاهره صدق وحده يتناسب عمرها مع شكلها ..لان اللي يشوفها قبل بيتحرى انها اصغر عن عمرها ...
يلست نورة على الكوشه ويتها سارة عشان تعدل فستانها ..
نورة عفت ويهها مرة وحده يوم ققربت منها سارة وتيمعت دموعها في عيونها..
سارة وهي عاقده حياتها: نواري..بلاج؟؟
نورة:مابى ..
سارة بطلت عيونها: شو اللي ما تبينه ؟
نورة: ردووني البيت ..
سارة: ههههههه صدق انج حركات يالله كل الناس يطالعونج ...طالعه قمر ماشاله عليييج ..
نورة: انشالله طالعه قطوة ..بس ابى اسير البيت ..الحين ..
سارة:خل عنج ..وهدي اعصابج ههههه ..
وسارت عنها سارة وهي تحس انها بتنفجر من الصياح جدااااام الكل ...
عقبها ينها ام احمد وام محمد يسلمون عليها وتصورن وياها ويوم يا دور البنات انهن يسلمن ويتصورن ويا نورة انقسمن لمجموعات ..اول مجموعه كانن مها وامنه بنات عمها ..
نورة:عيل وينها نوال ما يت وياكن ؟
مها: هاذي يالسه هناك على الطاولة..
امنه: حليلها هب رايمه تتحرك ...
نورة ابتسمت بالغصب وهي فيها الصيحه: الله يقومها بالسلامه ..(وتنهدت بالقو)
امنه ومها استغربن وطالعن بعض ..
امنه:شو بلاج ؟ خايفه ؟؟!!
نورة: لا ..ابى اسير البيت ..
مها بطلت عيونها: ليش؟
نورة: بس جيه ...بايخ العرس..
امنه ضربت نورة على ايده بالخفيف:حد يقول عن عرسه بايخ ..سباله ..
مها: هيه والله انج سباله ..
نورة وعفست ويهها: والله انه بايخ ..وشكلي بايخ ..والوع بالجبد ..شو تبين بعد اكثر عن جيه؟
مها: ابى ازقر لج عبود عشان يادبج ..
نورة: ههههه الحين شو ذكرج فييه ؟
مها: تخيلي قبل لا ندخل القاعه كان واقف عند الباب..
نورة بطلت عيونها: عبوود ؟
امنه: هيه اونه عاد هو اللي اشرف على الترتيب ونحن مصدقين وحالتنا حاله وشوي ولا نشوف شيخه وعموه داخل ..
مها:لا ويالس يتخقق علي ..انا اللي نظمت القاعه وانا اللي سويت ..
نورة: هههههه حركات عليه عبود ..
عقب ماهدت نورة شوي وسولفن وضحكن وياها مها وامنه يا دور قوم جواهر وسارة اللي خلوها تتخبل من صدق..عاد ثنتيناتهن معرسات ويلست يضحكن على شكلها وهم يتذكرون اشكالهن يوم العرس..
وعقبها يا الوقت اللي يدخل فيه احمد ..نورة كانت تبى تجتله ولا يدخل وهو يبى يدخل غصب..
دخل احمد ويا كل اخوان نورة وحتى عبدالله وخالد وعيسى دخلو وياهم ..
نورة كانت طول الوقت منزله راسها وحتى في التصوير المصورة تقولها رفعي راسج وهي لا حياة لمن تنادي ..
عقبها طلعو الريايل وفي الطريج خالد شاف مها واقفه عدال ام محمد ووقف اونه بيكلم يدته ومناك يبى يشوف مها وهي متكشخه ..
ام محمد: فدييتك والله يا ولدي.. عقبالك يارب ...
خالد:ااامين يدوه ..
ام محمد: وييه طالع شيخه تبهدلت ويا عليا وعمر..خلني اعاونها..
وسارت ام محمد وتم خالد واقف ويا مها وبسرعه بسرعه قالها وهو متشقق: محلللوة اليوم ..
مها احترق ويهها وشردت وسارت يلست عند قوم امنه وهي تشوف خالد اللي مابعد عيينه عنها ليين ما طلع من القاعه ...اما عيسى فسوى فلم هندي ويا وعد ..خذ وردة من على الكوشه وعطاها حقها قبل لا يطلع هو الثاني ..يالله كل واحد مشتغل من صوب ويشوف قلبه وين ويتبعه ...
احمد ونورة يلسو شوي على الكوشه طبعا لين ما يتصورون وما الى ذلك ..
احمد وهو طاير من الفرحه: مبروووك يالدبه ..
نورة :اص ولا كلمة ..
احمد انصفق ويهه:خيبه ..ليش؟
نورة كانت تبتسم بس تتكلم بعصبيه: انا شو قايلتلك من 3 اسابيع ؟
احمد: متى ؟
نورة: يوم اخر مرة رمستك فيها ؟
احمد:شو ؟
نورة: احمد والله بالباقه على عينك ..ما قلتلك لا تدخل يوم العرس؟
احمد: هههههه هب على كيفج ..
نورة: لا والله على كيفي..
احمد: ليش ما تبيني ادخل ؟؟
نورة: بس جييه كيفي...
احمد قال وضحكته شاقه ويهه: فدييت الدبه اللي تغار ...تشوووفين كل هذيلا اللي يالسات ؟ مايسووون ذرة من التراب اللي تمشين عليه ..والله انتي عندي بالدنيا كلها ...
نورة احترقن خدودها ومشتها هالمرة حق احمد مع ان كان ودها انها تكفخه على ويهه عشان يسمع كلامها مرة ثانيه وما يعاند ..
عقب ربع ساعه طلعو احمد ونورة بس نورة قبل لا تطلع رجعت الغرفه اللي كانو يعدلونها فيها مرة ثانيه وغيرت ملابسها لانها ما تقدر تيلس في السيارة بفستانها ..
اول ما ركبو السيارة وقبل لا يتحركون ياو خالد وعبدالله عند السيارة ..
عبدالله : هاه على وين العزم انشالله ؟
احمد: ههههههه مالكم خص ..
عبدالله وهو يكلم خالد: طاعو هذا بس انت!! ماخذ خالتي ومركبها وياه في السيارة واونه مالكم خص ...
نورة: ههههه ..(ومرة وحده قالت وعبرتها خاقتنها) عبود والله بشتاقلك ..
احمد صد عليها وقال واونه يغار: اهلا اهلا ..من اول يوم وعبود بشتاقلك ..لا بعد ما تبين تقولين شي حق خالد ؟
كلهم نقعو من الضحك على ويه نورة اللي صدق قــفط ..
احمد: هههه يالله شباب لازم نمشي الحين ورانا درب..
عبدالله بلقافه:نواري قولي الصدق وين بتسيرون ؟
نورة: والله مادري..علمي علمك ..
خالد:جان ما يجتلها بس !!
احمد بطل عيونه : تهبيييييي ...
خالد + عبدالله: هههههههههه ..
خالد : حط بالك عليها يا بوشهاب..مانوصيك ..
عبدالله:نواري اذا ضايقج ولا زعلج ..سويلي رنه وحده وبكون عندج وباخذ لج حقج ..
نورة: هههههه انشالله ..
احمد بطل عيونه: طاعو هاي ..انشالله بعد ..يالله يالله اتحرك احسن لي ..
عبدالله: هههههه لا الا سوالف يا بوشهاب..بس صدق خل بالك منها تراها الغاليه ...
احمد لف على نورة وقال:بحطها في عيوني ..
خالد: لو سمحتو لاتيلسون تسوون افلام رومانسية جادمي..تراني اغار ..يالله سيرو ..
احمد + نورة: ههههه ..
احمد: نتريا موافقتك نحن ..يالله ماشين ..فداعت الله ..
خالد: ههههه الله وياكم ..
عبدالله: الله يحفظكم ...
ومشو احمد ونورة وعبدالله وخالد بعدهم يسولوفن ويعلقون على نورة واحمد ..
احمد كانت كلمة طاير من الفرحه ماتعبر عن شعوره في هاليوم وفي هاللحظة بالذات ..اللحظه اللي نورة يالسه فيها عداله ..وخلاص ..بتكون شريطة حياته ..بتشاركه حياته في الحلوة والمرة ..وانشالله ماشي يغير عليهم ...
اما نورة فكان شعورها مب اقل عن شعور احمد بس كان ممزوج بالخوف عن ابتعادها عن اهلها وعدم تاقلمها انها تعيش ويا احمد ..بس عاهدت نفسها انها تحاول تتكيف ويا الوضع ..
احمد وهو مبتسم: الحلو سرحان وين ؟؟
نورة التفت حواليها وقالت وهي حاطه ايدها على خصرها: ادريبك ليش يايبني هنيه ..عشان تغازل اللي سايرة واللي راده ..
احمد بطل عيونه: وينهم ؟ محد هنيه غيرنا ..عن الجذب..
نورة: الحين بيوون ...
احمد :ههههههههههههه بجتلج تدرين ولا لا ؟؟
نورة: لا ..
نورة ابتعدت شوي عن احمد اما احمد فما كان منه الا وبدى يربع ورى نورة ..وتم احمد يلاحق نورة وهي تربع ليين ما دخلت البحر وتمت ترش احمد بالماي وهو ناقع من الضحك على شكلها وشيلتها اللي تخيست كلها بالماي........
مر اسبوع من وصولهم لهالجزيرة الساحرة ..اللي سحرت نورة بجمالها وخذت عقلها ..احمد عود نورة كل يوم عقب ما يصلون الفير اييبها عند الشاطيء ويتمشون مع بعض ويسولفون ويضحكون ..بالنسبة لهم ..كانت احلى ايام عاشوها بحياتهم ..نورة حاسه بطعم السعاده ويا احمد اللي كان طاير بها من الفرح ومب عارف شو يسوي بس عاهد عمره على انه يعيش نورة بسعااده وما يخلي يوم يمر عليها الا وهي تحس بطعم ومعنى هالكلمه وياه ...
النهـــــــاية
^The EnD^
|
13-03-10, 10:32 AM
جديد مواضيع قسم القصص المكتمله
العرض العادي
