كاتب الموضوع :
همس الليالي
المنتدى :
القصص المكتمله
"*" الجزء الخامس عشر "*"
احمد .. احمد ....احمد رد علي .. دخيييلك رد علي .. انزين تحرك .. ارفع راسك ... لا اتم منزلنه جيه ..
كان نواف خااايف.. مب بس خايف.. كان من كثر خوفه على احمد يصارخ عليه.. ويعدل راسه بيد ويسوق بايده الثانيه.. بس احمد.. لا حياة لمن تنادي ..كان منزل راسه ودموعه تجري جنها سيل من المطر ...
وصل نواف المستشفى صوب الطواري ونزل من السيارة جنه مينون وسار يزقر حد عشان يساعده ...
^ بعد مرور نص ساعه ^
كان تيلفون احمد محطوط في مخباه بس نواف شله وتم ماسكنه في ايده.. وام احمد تتصل وهو ما يرد عليها ولا حوالين التيلفون اصلا .. لانه عقله كان داخل عند ربيعه .. وصديق عمره احمد..نواف كان ساند راسه على الطوفه ويدعي الله انه يقوم احمد بالسلامه ....
طلع الدكتور من احمد وعلامات الاستفهام على ويهه ..
نواف ركض على الدكتور..
نواف:doctor please tell me what’s wrong with ahmed?
الدكتور(بكل برود) : mmm we really don’t know what happened to him !!
نواف(وهو يصارخ ): look u will find out what’s wrong or I will kill u .. u hear me ?? I will kill u ..
ودخل نواف على احمد..اما الدكتور فتم واقف في مكانه منصدم من كلام نواف وقال حق السيستر اللي وياه ...:I think he is crazy
دخل نواف على احمد
نواف ودموعه في عيونه : شو بلاك يا احمد ؟ شو اللي سوى بك جيه يا بوشهاب ؟؟؟
شوي ولا دخل عيسى اللي كان ياي يركض من عند امه وماصدق الخبر يوم خبره نواف ..
عيسى: نواف ؟؟؟ شو بلاه احمد ؟؟؟ شو استوى به ؟؟؟
نواف: علمي علمك .. حتى الدكاترة ما يعرفون شو فيه ..
عيسى وسار عند احمد : احمد .. احمد ياخي رد عليه ولا تسوي جيه فينا ؟؟
نواف (وهو منزل راسه ): لا تحاول يا عيسى ..... ما بيرد عليك ...
عيسى(وهو يطالع احمد ): شو ما بيرد علي .. لا بيرد هو ريال وبيرد علي صح يا بوشهاب ؟؟
نواف( وهو طالع من الغرفه ): لاحول ولا قوة الا بالله .....
وتم تيلفون احمد يرن واخر شي رد عليه نواف ..
ام احمد (وهي معصبه ): الووه .. احمدوووه ؟ ليش ما ترد علي ؟؟
نواف وهو يبين من صوته انه في شي : خالوه انا مب احمد .. انا نواف ..
ام احمد قلبها نغزها وحست ان شي مستوي حق ولدها :نواف؟؟؟ عيل وينه احمد ؟؟
نواف سكت وماعرف شو يرد عليها ....
ام احمد: نوااااااف .. ولدي وينه ؟؟؟شو مستوي به ؟؟؟انتو وين الحين ؟؟
نواف: خالوه هدي اعصابج وانا الحين ياينج ..
ام احمد: وين بتيي؟ انا ابى ولدي وينه ولدي ؟؟؟؟
نواف: احمد في المستشفى..
ام احمد: هو قايلي ماعليه دوام هاليومين ؟؟؟وينه احمد ؟؟
نواف تم ساكت وماعرف شو يقولها ...
نواف: خالوه احمد ما يقدر يرمسج الحين ..
ام احمد حست ان ولدها فيه شي من صوت نواف:نواف.. شو فيه ولدي .. شو فيه احمد ؟؟؟
نواف: ............
ام احمد وهي خلاص فقدت السيطرة على نفسها : نواف دخيلك خبرني شو فيه ولدي ؟؟؟
نواف: خالوه ..احمد شوي تعب ويبته المستشفى ..
ام احمد حست انها بتموت : تعب؟ نواف .. شو استوى به ؟؟
نواف: خالوه الله يخليج هدي شوي مب زين على صحتج والحين انا بيي,،
وسكر نواف من عندها ...
عيسى: نواف انت ايلس هنيه عند احمد وانا بسير بييب خالوه ..
نواف: انزين بس شوي شوي في الطريج ..
اما ام احمد فكانت ماسكة السماعه وتصارخ باعلى صوتها: ولدي .. لحقوا على ولدي .. لحقي على ولدي يا وعد ..
وعد كانت يالسه في غرفتها وسمعت صوت امها وهي تصارخ من تحت وبسرعة البرق قامت وسارت عندها امها ..
وعد وهي خايفه: اميييي؟ شو بلاج ؟؟ شو فيج جيه تصارخين ؟؟ شو صاير ؟؟
ام احمد وهي تصيح وتصارخ ): ولدي يا وعد .. ولدي .. ولدي احمد ..
وعد (وزاد خوفها اكثر واكثر ):احممممد ؟ شو فييييه ؟؟
ام احمد: احمد في المستشفى يا وعد ...طايح مريض ... تعبااان ..
وعد حست عمرها ان بيغمى عليها بس تماسكت وتمت تهدي في امها.. ليين ما يا نواف وتم يدق هرن ومحد طلع له فنزل نواف وتم يدق الباب ..
وعد وهي تصارخ : مويااااا .. يا مويا .. سيري بطلي الباب.. بس يامي انشالله احمد بيكون بخير ..
وسارت البشكارة تبطل الباب ..
نواف: وين خالوه ام احمد ؟؟
مويا : ماما في داخل .. طيح ارض .. كلو صيح ..
نواف طنشها ودخل بسرعه في الصاله وكانت وعد ويا امها وقف نواف في مكانه وكان ميت من الخوف عن ام احمد لا يستوي فيها شي.. وقف وهو يشوف ام احمد حاطه ايدها على راسها وتصارخ وتصيح وتردد اسم ولدها الوحيد ووعد يالسه وتهدي فيها ..
نواف ما استوعب وجود وعد الا عقب فترة: هوود هوود ...
وعد اول ما رفعت راسها التقت عيونها المليانه دموع بعيون نواف الخايف ..وربعت وعد فوق تييب شيلتها وعبايتها عشان يسيرون عند احمد.. وفي الطريج يابت شيلة امها وعبايتها ..
ام احمد: وين ولدي ؟؟ وينه .. شو استوى به .. احمد .. احمد ..
نواف وهو يحاول يهدي ام احمد : بس يا خالووه .. احمد مافيه الا العافيه لا تسوين بعمرج جيه ..
وعد وهي نازله من فوق وكانت متغشيه : امايا .. خذي عباتج ..
ووداهم نواف المستشفى وطول الطريج كانت وعد تحاول تهدي امها بس ما كانت قادره ..
نواف (وخانقتنه العبره ): خالوه الله يخليج قطعتي قلبي بس لا تسوين جيه ..صلي على النبي.. احمد مافيه الا كل الخير ..
ام احمد: نواف الله يخليك يبلي ولدي .. ودني عنده ابى اشوفه ..
نواف: انشالله انشالله الحين بوديج ..
ويوم وصلوا المستشفى نزلت وعد وامها دخلت تركض صوب الريسبشن وتسال عن ولدها ..اما وعد فتمت واقف عند الباب مب قادره تمسك عمرها.. وتعرف انها اذا دخلت وشافت احمد بيستوي فيها شي.. وتمت واقفه برى ويا نواف وعيسى ..
# في بيت العم ناصر #
ام سيف: فديتج يا ام طارق اللي تطلبونه نحن بنفذه لكم ..بس انتو امرو..
ام طارق: تسلمين مايامر عليج عدو .. بس انتو بعدكم ما شفتوا امنه وهي بعدها ماشافت المعرس ..
منى(وهي تبطل شنطتها ): عمووه هاي صورة خليفه .. عشان تشوفه امنه ..
ام طارق : ماشالله عليه حليييو وغاوي .. الله يحفظه لج يا ام سيف ..
ام سيف تشققت يوم مدحوا ولدها : دام انه غاوي عيل نبى نشوف عروسته الغاويه اللي اخترناها حقه ..
ام طارق : امنه الحين بتنزل ..
^في غرفة امنه ^
كانت امنه واقف ومجابله طرف المرايا المكسورة وتصيح من خاطرها وهي تسحي شعرها.. كانت لابسه تنورة وقميص مب لين هناك بس عشان ما تعّيب ام خليفه وماتاخذها حق ولدها ..وانفتح عليها الباب بكل قوة خلتها تنقز في مكانها ..
طارق: اموون .. يالله سيري غسلي ويهج ونزلي ..
امنه : ........
طارق: انا ارمسج ؟؟؟
امنه:انشالله ..
وسارت امنه وسوت اللي قالها عليه طارق ونزلت تحت ..طارق عرف ان امنه حلفت انها ما تنزل بس هو هددها وقالها انه ما بينزل عند الريايل الا يوم يشوفها بعينه تنزل تحت وان ما نزلت يا ويلها منه ..
اول ما نزلت كانت منزله راسها ومب رايمه تحط عينها في عين اعز ربيعاتها لطيفه.. اللي كانت تتجنبها وتتجنب مكالماتها وماترد عليها .. ولطيفه عرفت شو السبب بعدين ..
ام سيف: هلا بحرمة ولدي هلا ..
امنه كانت ساكته ولا نطقت بحرف واحد ..
لطيفه :شحالج امنه ؟
امنه وبصوت واطي: الحمدلله ..وانتي؟
لطيفه (وهي مبتسمه ): انا بخير وعافيه ..
ام سيف : ماشالله ..ماشالله عليج يا امنه .. غاديه حلوة اليوم ؟؟ لا لا صدق اني احسنت في اختياري حق ولدي ..
امنه كانت ساكته ومبتسمه وتقول في بالها " والله لاوريج انج احسنتي اختياري حق ولدج ..بس صبري علي شوي "
منى وهي تطالع مها بكل اعجاب ومطنشه امنه : ومها بعد ماشالله عليها طالعه تجنن ..
مها استحت وتم ويهها احمر ..
ام سيف: هههه هيه والله صدقج يا منى .. والله لو انج اصغر عن يوسف جان يوزتج ياه ..
ام طارق: عاد بيكون لنا الشرف ان ماخذين اثنين من عيالج يام سيف ..
ام سيف: الله يسلمج يا ام طارق .. عيل الريايل بيتفقون متى الملجه وكل شي ؟؟
ام طارق: هيه هم اتفقوا انها تكون الخميس الياي يعني عقب عرس طارق بكم يوم .. ولا تنسون انكم معزووومين على العرس ..
ام سيف: عيل بتكون الفرحه فرحتييين .. مبرووك يا ام طارق .. مبروك حبيبتي امنه ..
امنه ومن ورى خاطرها : الله يبارك في عمرج عموه ..
ام طارق: الله يبارك في عمرج يام سيف .. وعقبال ما نفرح في منى ولطيفه ..
ام سيف: امين ويا مها يارب ..
# في المستشفى#
وصلت ام احمد ودخلت عند ولدها رغم تعليمات الدكتور اليديده اللي منع الزيارة عن احمد عقب ما تدهورت حالته وصار في غيبوبه وكان سببها مجهول بالنسبه حق الدكاترة ..
عيسى ونواف كانوا واقفين ومنزلين روسهم ويدعوون الله انه يشفي احمد ويقومه بالسلامه.. اما وعد فكانت واقفه و تعرف ان اخوها الوحيد داخل ومدد على سرير الموت.. اخوها احمد اللي كان ماشي اطيب منه.. اخوها احمد اللي كانت تحبه وتتمنى الموت على انها تشوفه بهاحالها اللي هو فيها.. مب عارفه شو تسوي.. تصيح؟ تصرخ؟ لا لا "انا بمسك عمري" بس للاسف خانتها دموعها وانفجرت من الصياح.. صياح من القلب.. نواف وعيسى كانو واقفين وفجأه سمعوا صوت صياح.. كانت وعد.. نواف ماقدر يمسك عمره وطلع من المستشفى وسار وقف برى لانه ما تحمل منظر وعد وهي تصيح.. اما عيسى تم مرتبك وخايف مب عارف شو يسوي ..
عيسى (ودموعه في عيونه ): اختي ..انشالله احمد بيقوم بالسلامه .. لا تسوين بعمرج جيه ..
وعد(وهي تصيح ): احمد خلاص .. راااح مناا ..
عيسى: لا لا لاتقولين جيه .. خلي ايمانج بالله قوي وانشالله بيرجع نفس قبل واحسن .. بس انتي ادعيله ..
وعد: ونعم بالله ..ياااالله تشفيييه وترجعه لنا نفس قبل ..
ودخلت وعد داخل عند امها اللي كانت ماسكه راس ولدها ودموعها تنزل عليه ....
ام احمد(وهي تصيح بحرقه ): وعد .. هذا مب احمد .. هذا مب ولدي .. ولدي يرد عليه يوم ازقره .. هذا مب ولدي ..احمد .. امي احمد .. فديتك حبيبي رد علي ...شوفي .. مب ولدي ..يبووولي ولدي ..
وعد وهي لاويه على امها وتصيح : بس ياميييي الله يخلييييج بس ... انتي لازم ترتاحين الحين ..
ام احمد : انا ما برتاح الا يوم اشوف ولدي احمد راد لي ... وينه ؟؟؟ وين ولدي ؟؟
وعد تمت تصيح ومب عارفه شو ترد على امها اللي مب قادره تصدق اللي استوى في ولدها..
+بعد يومين +
كان موعد عرس طارق ..وطارق كان طاير من الفرح لانه خلاص بيصير مع نوال للابد عقب كم ساعه ..اما امنه ومها فكانو سايرين الصالون عشان يتجهزون حق العرس.. وام طارق في البي مرتبشه وحالتها حاله ..
اما في بيت بومحمد ..نورة كانت لابسه فستان لونه ياي على بحري.. ومتعدله وطالعه تجنن.. بس كانت متظايجه ومتكدره وصدرها ظايج وهي مب عارفه شو السبب.. كانت تتصل في وعد وتيلفونها مغلق.. وتقول في خاطرها اكيد بعدها زعلانه مني.. بس غريبه حتى تيلفون بيتهم محد يرد عليه؟؟.. نورة كانت صدق متلومه في وعد وحست بالذنب يوم اتهمتها ظلم ..وكانت متلومه اكثر واكثر في احمد اللي ماعطته حتى فرصه عشان يفسر لها اللي صاير .....
دخلت عليها شيخه ..
شيخه: فديتج والله يا نواري .. طالعه تهبلين ..عاد استعدي حق اللي بييون يخطبونج اليوم ..
نورة وهي مبتسمه : امايا عاد ..
شيخه: وييي فديت اللي يستحي ههههههه هاه حبيبتي خلصتي؟
نورة: هيه ..بس .
شيخه: نواري ؟؟ شو بلاج متظايجه ؟؟
نورة: مالي خاطر اسير والله .. بس بسير عشان خاطر نوال ..
شيخه: ليش؟
نورة: مادري احس بظيجه بصدري وقلبي يعورني ...
ودخل عليها عبدالله بكل دفاشه: فديت قلبج انا ..
نورة: الله شو هالكشخه؟؟ شو ناوي ترزف وتيول اليوم ؟
عبدالله: لا برزف ولا بيول .. بسير ويا نواف عند ربيعه مريض ..
نورة سكتت وحست انه عبدالله يرمس عن احمد بس حاولت تسوي عمري مب مهتمه: فديت نواف والله ولهت عليه من يومين ما شفته ..
عبدالله: هيه هو كان يالس عند ربيعه .. يقول انه واايد تعبان ..
شيخه: ليش ليكون نواف ما بيي العرس ؟؟
عبدالله: لا بيحضر عشان خاطر طارق وبعدين بنسير رباعه وياه انا وخالد وعيسى ..
شيخه: انزين يالله نواري لبسي عباتج لان سعيد بيوصلنا ..
نورة: انشالله ...
وكانت شيخه توها نازله من فوق ولقت محمد واقف يسولف ويا امه ..
شيخه : هاه بوعيسى متى رديت من عندها؟
محمد انصعق من سؤال شيخه : شووه ؟من عند منو؟؟
شيخه وهي تستفزه: هيييه مب انت كنت وياها اول امس؟؟
محمد وبدى يعصب وهو يحاول يدور جذبه محترمه : انتي شو بلاج؟؟ شو تقولييين ؟؟ الظاهر انج كبرتي وخرفتي ..
شيخه (تمت ساكته وفجاه انفجرت نفس البركان): الحين انا اللي كبرت وخرفت؟ الله يسامحك يا محمد.. على الاقل كبرت وما صغرت عقلي وسويت حركات اليهال اللي انت تسويها ؟.؟؟ عنبو شو سوت لك مريم عشان تسير وتسوي جيه هاااه ؟
ام محمد: شيخه .. شو مستوي ؟؟؟
محمد: سكتي بنتج هاي لا ...
شيخه: لا شو؟ يا محمد اصحى واوعى.. انت لا تتحسبني نفس نواف؟ ولا تتحسبني بخاف منك وبسكت.. الغلط غلط وانت غلطت ...
محمد عصب وتم يصارخ على شيخه : اييه انتي احترمي نفسج .. مابقى الا اشكالج واشكال فصّوووول يرمسون بعد ..
وكان سعيد ريل شيخه نازل من فوق ..
سعيد وهو مستغرب: محمد؟؟ شيخه ؟؟ شو هالصراخ كله ؟؟ عمووه شو صاير؟؟
ام محمد(وهي ما تدري شو السالفه ): والله علمي علمك يا بوعبدالله ..
سعيد: محمد ؟؟ شو بلاك جيه تصرخ ؟؟
محمد: سكت حرمتك واقبضها وعلمها كيف ترمس اخوها العود باحترام ..
سعيد وهو معصب: محمد؟ احترم نفسك.. هاي اختك قبل لا تكون حرمتي ..وانا ماخذها وهي مربايه وكامله.. انت اللي يبالك حد يربيك ..
محمد :طاعو منو يرمس ... اييه انت الحين بس عشان صرت تاجر ومعروف رفعت خشمك علي والله لأكسر خشمك الحين ...
وشوي ولا فيصل وحرمته وبناته داخلين من باب الصاله ..فيصل يوم شاف محمد كان وده انه يكسر ويهه.. اما محمد فتظاهر انه مستعيل ويبى يسير العرس بسرعه بس هو اصلا كان خايف من فيصل انه يسوي فيه نفس ماسوى فيه من قبل ..
فيصل: هذا شعنده يالس يصارخ جيه جنه خبله ؟؟
سعيد: طااايح سب في شيخه ...مايشوف عمره ,,,
ام محمد: بس .. بس ..صلو على النبي يا عيال ....
شيخه: صدقها امي يا سعيد ..يالله نحن ورانا عرس وما بيي محمد وبيخرب علينا فرحتنا ..
فيصل: يالله امايا ..يالله سعيد ..انت اسبقنا ويا شيخه وانا بوصل امي ..
سعيد: انشالله ..
:-:-:-:-:-:-:-:-:-:
مر عرس طارق بسلام مع ان امنه اللي متروس قلبها حقد وكراهيه حق بنت عمها نورة حاولت انها تبين انها هي الافضل وماتت من القهر يوم ام سيف تمت تسال عن نورة وتمدحها من جمالها.. ومرت الايام والاسابيع وملج خليفه على امنه.. بس خليفه كان بعده مب شايف امنه لان امنه عاندت وماطاعت تطلع مع تهديد اخوها حقها بس ماطاعت ..اما نواف وعيسى وخالد فما تركو احمد بروحه وكانو كل يوم يروحون يزورونه ويتطمنون عليه بس مرات كانو مايقدرون يشوفونه لان خواته حمده ووعد وامه موجودين داخل ..
#في بيت بومحمد#
نورة: اففففف ياربي.. شو بلاها هالبنت ما ترد علي.. حتى ايميلاتي ما ترد عليها.. مم اكيد هم في بوظبي عند حمده..بس فحص الجامعه باجر اكييد بيردون اليوم ..
نورة كانت يالسه وترمس عمرها عقب ما عيزت وهي تدق حق وعد ومحد يرد عليها لا تيلفونها ولا تيلفون البيت..بس ما ياست وقالت بحاول مرة اخيره ...
وعد(بصوت حزين ): الوو ..
نورة(وماعرفت وعد): وعد ؟؟؟
وعد: مرحبا نواااري ..شحالج ؟
نورة: انا بخير .. ممم انتي شحالج ؟؟
وعد:بخير دامج بخير ..نواري انتي بعدج زعلا..
وقبل لا تكمل وعد كلامها ..
نورة:وعد اص ولا كلمه انزين وسمعيني ليين ما اخلص كلامي ...
وعد انصدمت وسكتت وقالت في خاطرها : وييييل اككيييد حاطه علي وبتفرغ حرة احمد فيني..
نورة: وعد انا اسفه .. سامحيني الله يخليييج .. والله اني متلومه فيج وفي اخو..
وسكتت نورة قبل لا تكمل جملتها اللي طلعت لا ارادريا ..
وعد وهي منصدمه: نواري انتي متلومه في احمد ؟؟
نورة(وهي تحاول تغطي على عمرها ) :لا منو قالج ؟؟ المهم وعد بليز سامحيني ..
وعد(مشتها حق نورة لانها تعرف شو اللي في قلب نورة): نواري فديتج انا مسامحتنج ..واصلا انا مازعلت عليج عشان اسامحج ..
نورة(وحست براحه شوي ): صدق؟؟
وعد: هييه ..
نورة: وعد ..
وعد: هلا نواري شو بلاج ؟؟
نورة: والله اني حاسه بظييجه فظيعه مادري شو سببها .. وقلبي قابضني ..
وعد تمت ساكته وتقول في خاطرها : اكييد حاسه باحمد .. بس ماتبى تعترف ..
نورة: وعد انتي دريتي ان الريايل بييون يخطبون رسمي باجر ؟؟
وعد : يخطبون منو ؟؟ ليكوون فه...
نورة(بكل ظييج ): هييه فهد ..وعد انا مادري شو اللي خلاني اوافق ..مادري..يمكن كنت معصبه من اللي استوى وتسرعت وواففقت ..بس ممادري يا وعد ...مادري ..
وتمت نورة تصيح ووعد ماقدرت تمسك عمرها هي الثانيه: خلني انا استاهل ..خلاص وعد ترى والله ما بنسكت لين السنه اليايه ..
وعد تمت تضحك على نورة وهي تصيح في نفس الوقت:هههه نواري عاد .. والله انج ما تستاهلين الا كل الخير ..
نورة(وهي تحاول تلطف الجو): وياويهج تعالي انتو وينكم في بوظبي؟ ليييش ما تردوون على تيلفون بيتكم؟ وانتي شحقه غالقة تيلفونج؟
وعد سكتت وماعرفت شو ترد ..
نورة: وعد ؟؟؟وينج ؟؟
وعد: هاه .. لا انا هنيه ..
نورة:وين هنيه ...
وعد(وماقدرت تخبي على نورة): انا في المستشفى ..
نورة وهي خايفه : خير عسى ماشر .. شو مستوي ؟؟
وعد وبدى صوتها يتغير : احمد .....
نورة (وهي تصارخ ): احمد ؟؟ شو بلاه احمد ؟؟؟
وعد(وهي تصيح ):طايح مريض ومحد يعرف شو فيه ...
نورة تمت صاخه ..حست ان قلبها مات.. حست انها جسد بلا روح.. حست ان الدنيا انهارت جدام عينها ومب قادره تسوي شي ..
وعد: نواري.. نورة ...
نورة وفجاه تمت تصارخ وتصيح في نفس الوقت : كله مني.. انا السبب .. انا السبب يا وعد ..
وعد :نواري لا مب انتي .. هذا قدر الله .. والله كاتبنه انه يصير حق احمد ..
نورة: لالالا كله مني كله منييي...
وعد: نورة دخيلج اهدي شوي .. هدي شوي ..
نورة: كيف اهدى ؟؟ كيف اهدىىى وانا السبب في مرض احمد ؟؟؟ كيف اهدىى؟
وعد: نورة الله يخليج لا تخليني اندم اني قتلج ... خلاص اهدي ...
نورة وبصوت واطي : في أي مستشفى ؟
وعد: الامارات ..
في صباح اليوم الثاني الساعه 8 نورة كانت يالسه في الصاله من الساعه 5 ..لا لا مب ناشه من النوم ولا شي.. اصلا هي مارقدت ولاهدالها بال وكانت طول الليل يالسه ودمعتها الحارة تنزل على خدها ..
نزلت شيخه من فوق وشافت نورة متلبسه ويالسه ..
شيخه وهي مبطله عيونها: نورة ؟؟ بسم الله عليج .. شو يالسه تسوين هنيه ؟؟
نورة(وهي تسوي عمرها عادي بس ويهها كان متغير ): اماايا شو نسيتي اليوم فحص الجامعه .. ابى اوراقي وجيه عشان اسير ..
شيخه: بتسيرين روحج؟
نورة: هييه ..باخذ وياي جانيت انزين ؟؟
شيخه:انزين ..وين الريووق؟؟
نورة: امايا انا اتريقت .. يالله ابى الصور ...
شيخه: شووو بلاج مستعيله ؟؟
نورة: انا مواعده وعد ولازم اشوفها قبل الفحص...ولهت عليها ..
شيخه:انزين صبري بسير اييبلج صورج وهالاشياء..بس لا تتاخرين ..
نورة: انشالله يامايا..
وفي طريق المستشفى ..
نورة: اقولك محي سير مستشفى الامارات ..
محي:امارات ؟؟ لا انتا يقول يريد جيمي ..
نورة: افف انت سير اول شي الامارات وخلاص ..
محي: انشالله..
واول ما وصلت المستشفى نزلت نورة وهي ميته من الخوف عن يكون نواف ولا عيسى داخل .. بس ردت السيارة ودقت حق عيسى وسوت عمرها تسال عن مريم .. ودرت انه راقد هو ونواف وخالد ..
ودخلت من الباب الرئيسي وكانت تتنافض من الخوف ..لانها اول مرة بحياتها تسوي جيه.. سارت الريسبشن وسالت عن رقم الغرفه وعطوها الرقم ..
جانيت:who is Ahmed?
نورة(وهي خايفه): افف يا جانيت ..اذا بتيلسين تسالين سيري السيارة ..
جانيت: ok I will go when u finish call mohie..
نورة(وهي تبى الفكه من جانيت): انزين يالله سيري ..
نورة ساتر صوب غرفة احمد وهي تمشي بخطوات مهزوزة.. تحس عمرها بتطيح من طولها ومب عارفه هي نفسها شو يالسه تسوي ... شو سايره تسوي عند احمد؟؟..دقت الباب ومحد رد عليها ويوم بطلت الباب بشوي شوي لقت وعد يالسه على الكرسي وراقده..ويوم فتحت الباب كامل شافته.. شافت احمد وهو طايح وحاله حال الميت .مغمض عيونه ولا يتحرك ولا حركه.. وتمنت انها ما دخلت عليه.. شافته بحال ما يتمنى يشوفها عدوه.. احمد ممدد على السرير ومسكر عيونه وساكت.. صااخ.. ماله حس..نورة تمت تتجدم خطوة خطوة وبدون ما تقصد طلعت صوت قوم وعد من رقادها .
وعد وهي منصدمه : منوووو ؟؟
نورة كانت متغشيه ويوم شلت غشوتها كان ويهها مستوي احمر وعيونها تذرف دموع : انا .. نورة ..
وعد سارت ولوت على نورة وتمت تصيح..
نورة: وعد:: شو قالولكم ؟؟ شو بلاه ؟؟؟
وعد: يقولون غيبوبه ...ومايعرفون متى بيقوم ..
نورة: كيف جيه ؟؟ كيف مايعرفون شو فيه ؟؟؟ حرام عليهم .. ليش ما يتحركون يسووون أي شي .؟؟
وعد: كل ما نسالهم يقولون ما نعرف .. لدرجة ان اخوج نواف كان بيسفره برى بس الدكتور قاله ماشي فايده ...
نورة وهي تمسح دموعها : نواف يدري؟؟؟ ليش ما خبرني؟؟؟
وعد: نحن قلنا حق نواف ما يخبر حد .. وهو اصلا قالنا لا تخبرون حد ..
نورة تمت واقفه عدال وعد وتشوف احمد وهي تصييييح من خاطرها وتحس ان روحها بتطلع منها..كانت تصيح وتقول في خاطرها " فديتك يا احمد.. يعلني كنت مكانك ..ليتني اقدر اسوي أي شي.. أي شي.. بعطيك روحي.. بعطيك قلبي ..بس اخلييك تقوم من مكانك هذا وترجع نفس قبل"
وعد: تصدقين يا نورة انه يسمعنا ؟؟؟
نورة : صدق؟؟؟ وما يرمس؟
وعد وهي منزله راسها : ما نطق ولا حرف ..
نورة وقالت بدون ما تحس: اقدر ارمسه ؟؟
وعد استانست وحست ان نورة بدت تحس في احمد .. ماتدري ان نورة حاسه فيه من زمان بس ماتبى تبين شعورها ..
وعد: اكييد اكيييد ...
وهي رايحه صوب الباب: انزين انا بسير اييب ماي وهالسوالف ..
نورة وهي مبطله عيونها : وبتخليني هنيه بروحي ؟؟؟
وعد: انا بسير الاهليه هنيه قريب من المستشفى ..
نورة: لا لا وعد دخيلج اخاف حد ايي .. امج ولا حمده ولا ..
وعد: لا تخافين امي توها من شوي مروحه البيت ويا حمده .. انزين سمعي انا بوقف على الباب وما بخلي حد يدخل ...
نورة وافقت وهي صدق خايفه ... بس كانت محتاجه انها ترمس احمد وتقوله شو اللي في خاطرها دام انه يسمعها ..
تمت نورة واقفه وتطالع احمد.. تطالع احمد اللي حبها وخلى حبه في قلبه ..احمد اللي كانت ترتاح له وماتخلي شي في خاطرها ما تقوله حقه ..احمد اللي تموت من الضحك عليه يوم يتم ينكت وياها.. احمد الللي كان ينسيها احزانها ويرجع لها ابتسامتها ,,
نورة وهي خانقتها العبرة : احمد.. دخيييلك سامحني.. انا اسفه ..ادري انت مالك ذنب.. بس انا مادري شو استوى بي يوم قلت اسمي.. حسيت اني ميته ..واول شي يا على بالي انك ناوي تسوي فيني مثل ما سوى فيني فهد..كنت صدق خايفه من هالشي ..وما قصدت ابد اني اجرحك ولا ازعلك مني ..
وتمت ساكته شوي وبدت دموعها تطيح على فراش احمد ...
نورة: دخيييلك احمد.. اذا تسمعني قول أي كلمه.. حرك ايدك.. سو أي شي.. بس قولي انك بتستوي بخير وبترجع نفس قبل واحسن ..
احمد ماظهر عليه ولا شي ...وهالشي زاد اصرار نورة لى انها تخليه يسمعها ويستجيب لها ..
نورة لفت وجابلت اليدار وتمت تصيح من قلبها وتقول: احمد كنت لي الدوا الشافي.. انت كنت الوحيد اللي يسمعني ويتحملني ويتحمل خبالي.. انت الوحيد اللي حسيته غير عن كل العالم ...
وقالت بدون ما تحس: والله احبك .. والله اني احبك يا احمد ..دخيييلك ..قووم .. رد علي ....
ويوم لفت عليه تمت مبطله عيونها ومب مصدقه اللي تشوفه.. لدرجة انها تمت واقفه في مكانها من الصدمه اللي خلت ابتسامتها الطفوليه ترجع حق ويهها اللي كانت مخيستنه دموعها ..
ياترى شو شافت نورة ؟؟ شافت احمد باي حال؟؟ وشو بتكون ردة فعلها ؟؟؟
|
24-09-06, 08:48 AM
جديد مواضيع قسم القصص المكتمله
العرض العادي
