كاتب الموضوع :
شمـــ انثى ـــوخ
المنتدى :
ارشيف خاص بالقصص غير المكتمله
رد: رواية رجيتك ياهم لاعاد تزيد اوجاعي/ بقلمي
البارت الثاني
بعد اسبوعين
صباح الخميس
9:00
على الافطار كان موجود ابو ريان وريان وراكان ... كان الافطار متنوع فيه من كل الاصناف ... اخذت لي قطعة خبز وانا القي نظري عليهم ... ابو ريان كان يتناول فطوره بهدوء وهو يناظرالجريده ... وراكان كان يناظرجواله اللي كان يرن بنغمة الرسائل وهو يبتسم مع كل رساله ... شكله تجيه نكت مع ذا الصبح ... التفتت لريان اللي كان جنبي كان يناظر لي وهو مبتسم وقرب مني وهمس
ريان بهمس = هم دايم كذا على الفطور لاتستغرب
ورجع ياكل ، لفيت اناظرهم مره ثانيه ، كل واحد في عالمه نزلت نظري لصحني ، وانا افكر .. هل اهلي افتقدوني .. انا لي اكثر من اسبوع مفقود
.. اكيد بحسوا بغيابي .. يكمن يدورا علي .. بس ليه الى الان ما خبروا الشرطه عني .. وسرحت في حالي ..وماوعيت الى على يد تاشر قدام وجهي .. لفيت لصاحبها اللي كان ريان
ريان = في شنو تفكر؟
انا = ولاشي
ريان وهو ياشر على صحني بعيونه = طيب كمل فطورك
هزيت راسي بمعنى طيب .. واكمت فطوري بهدوء
************************************************** *******************
بعد الفطور جلست اسولف انا وابو ريان عن مواضيع مختلفه ... وريان وراكان راحو مدري وين ... بعدها قمت بروح الغرفه عشان اتغسل و اروح لصلاة الظهر... دخلت الغرفه ليقتها مرتبه شكله الخدامه جات ورتبتها ... دخلت الحمام وتروشت .. خرجت من الحمام و المنشفه فوق راسي انشف فيها شعري و افكر .. يوم السبت بدور لي وظيفه لازم اتوظف ... مو حلو اجلس كذا اكل وشرب ومسكن ببلاش .. ريان واهله مو ملزومين بي
= ياهووو وين سارح ؟ اشفيك اليوم كله سرحان
رفعت راسي ... كان ريان جالس فوق السرير ويناظرني ... جلست جنبه على السرير
انا = ريان لمتى بجلس فاقد ذاكرتي ؟
ريان بتنهيده= لما الله يفرجها انت اصبر
انا = انا لازم اشتغل
ريان = ليه ؟
انا = لمتى بجلس استنى هالذاكره ترجع ، بدورلي وظيفه استفيد منها
ريان = طيب كيف بتتوظف وانت ما عندك هويه ؟
صح !! كيف نسيت على اي اساس بتوظف لا هويه ولا شهاده
انا = لاحول ولا قوة إلا بالله
ريان وهو يربت على كتفي = انت خلك متفائل هذا اهم شي لصحتك والله بيفرجها
انا = ان شاء الله
ريان = طيب خلني اربط لك يدك
وقام اخذ الربطه اللي كانت فوق التسريحه ورجع جلس جنبي و ربطها لي .. بعد ما خلص
ريان = كذا تمام
انا = ايه ، مشكور
ريان وهو يقوم = يلا انا رايح لما ياذن بكون استناك في السياره عشان نروح المسجد
ولما وصل عند الباب رجع لف علي
ريان = اووه نسيتني ليه جيت عندك، كنت بقولك عمي وعياله جايين العصر
هزيت راسي بمعنى طيب .. خرج .. انسدحت انتظر الاذان .. لما اذن توضيت و غيرت ملابسي وخرجت .. لقيت ريان ينتظرني في السياره توجهت له وركبت السياره .. ورحنا للمسجد
العصر
انا وابو ريان وريان كنا نشرب الشاي في الحديقه
شوي انفتح باب الحديقه ودخلت سياره عائليه بيضاء ووقفت في مواقف السيارات
ونزلت منها حرمتين ودخلن داخل ونزل رجال كبير بس يبين انه اصغر من ابو ريان وجاء لعندنا
الرجال = السلام عليكم
نحنا = وعليكم السلام
سلم على ابو ريان بعدين جاء ريان وحب راس الرجال .. قمت وحبيت على راس الرجال مثل ريان
وجلسنا .. كان ابو ريان والرجال ياخذون الاحوال من بعض بعدين قال
ابو ريان = ابو محمد هذا عبد الله اللي قتلك عنه
ابو محمد وهو يلف علي = هلا والله عبد الله اخبارك ؟
انا = الحمد لله ،اخبارك انت ياعم ؟
ابو محمد = الحمد الله ، اصبر ياولدي كله شي باجره وانا ابوك
انا = ان شاء الله
والتفت على ابو ريان وجلسوا يسولفون عن الاسهم و البورصات ، وانا وريان نتسمع لهم
قرب ريان من اذني وهمس لي = هاشيابه مايملون من سوالف الاسهم و البورصات
ضحكت عليه شكله دايم يتكلمو فيها
ريان وهو يتحلطم = وبعدين وينهم ذولا ؟
انا = من ؟
ريان = محمد واحمد ، دايم يجو بس اليوم مدري عنهم ليه ماجاو
يستهبل ذا وش عرفني فيهم عشان يسال ... طنشته و قمت
ريان = وين ؟
انا = بغير ملابسي وبرجع
رحت الغرفه وغيرت الثوب ولبست بنطلون وقميص بازرار من قدام عشان يكون سهل في فسخه بسبب يدي ... الله يوفقه ريان ما قصر معي جايب لي ثياب و بدل ... رجعت الحديقه مالقيت احد فيها شكلهم دخلو المجلس ... جيت بدخل بس لمحت احد في وسط الحديقه عند النافور واقف .. دققت النظر
هذا محمد ولد عمهم ... كان يكلم تلفون ... دخلت المجلس وجيت بجلس جنب ريان وانصدمت ... ها كيف !! توني شايفه برا كيف جاء هنا
ريان = وش فيك مفجوع
انتبهت لنفسي
انا = ولا شي (ولفيت ل محمد ) هلا محمد
وسلمت عليه
انا = محمد انت قبل شوي كنت برا
محمد = لا ، ليه ؟
انا = توني شايفك برا
ريان = محمد من لما جاء وهو جنبي ، بسم الله لايكون شايف جني
انا = بسم الله الرحمن الرحيم
ريان = ايه ما قلت لك ترى بيتنا مسكون ، فانتبه
فقع محمد ضحك ، استغربت وش فيه ذا ، ضربه ريان بيده
اعوذ بالله من الشيطان الرجيم
ريان = بعض الاحيان بالليل اسمع في غرفتي طق مو بصاحي
واغاني
زاد محمد بضحك ... بسم الله وش فيه ذا.. الناس تتعوذ من الجن مو تضحك ... الحمد لله و الشكر ... فجأه سمعت صوت من خلفي
= السلام عليكم
التفتت وانصدمت ، رجعت لفيت لمحمد وريان لقيتهم فاقعين ضحك رجعت لفيت لشاب
كان طبق الاصل عن محمد
الشاب = وش فيكم كنكم شايفين مهرج ، ترى رد السلام واجب
انا = وعليكم السلام
محمد وريان ما قدروا يردوا السلام من كثر الضحك
جلس جنبي وقال= الحمد لله ، وش فيكم تضحكون ، قولولي خلوني اضحك معاكم
ريان وهو يمسك ضحكته = هذا الله يسلمك عبد الله لما ... وقاله السالفة
الشاب = اها ( و لف لي وقال ) انت ما تعرفني ، انا احمد توأم محمد
انا = هلا والله
ريان موجه كلامه لمحمد = كان صورته عشان يشوف شكله وهو مفجوع
ودخل مره ثانيه في نوبة الضحك.. بعد ما وقف عن الضحك
انا برفعت حاجب = خلصت
هز راسه بمعنى ايه وهو ماسك الضحكه
لفيت على احمد = ولد عمكم هذا دايم كذا
احمد = ايه ولسه ما شفت شي
ريان يقاطعه = احمدوه لاتشوه صورتي
احمد مكمل = مزاجي بقوه ،ايام مو طايق احد وايام كله يضحك بدون سبب
محمد = ايه شكله عنده حاله نفسيه
ريان = محمد انت معي ولا ضدي
محمد = اكيد مع اخوي
ريان بدهشه = شنو ، شكلك مطبق المثل انا واخوي على ولد عمي
محمد = بدون شك
ريان = خااااااين
و جلسنا انا واحمد نضحك على مناقرات ريان ومحمد ... باين ان احمد اهدا من محمد
اذن المغرب قمنا كلنا للمسجد وصلينا و اللي كان يأمنا هو محمد
بعد الصلاه ونحنا راجعين بسياره مع ان المسجد مو بعيد بس ريان اصر نركب سياره عشان رجلي رغم اني احس اقدر امشي عليها فتره طويله .. بس ايش تسوي لو كنت تمشي مع دكتورك
ريان = احمد بكره التفحيط الساعه كم
احمد = ست المغرب
انا مستغرب = تفحيط!!
ريان = ايه ماقلت لك ، احمد نجم التفحيط كل جمعه الشباب يلتمو في مكان معين
يشوفوا تفحيطه ، وازيدك من الشعر بيت مسمينه كاسبر
لفيت لاحمد = عن جد
احمد = ايه ، بكره تعال مع ريان وشوف بنفسك
انا = ان شاء الله
احمد = ريان وين اخوك مختفي
ريان = مدري
احمد = بتصل عليه اشوفه
طلع جواله من جيبه واتصل
احمد = السلام عليكم ... وينك يابو شباب مختفي ....وين... اها طيب... مع السلامه
وقفل جواله
احمد = يقول كان عنده مشوار مهم والحين هو في البيت
وصلنا البيت .. نزلنا من السياره و دخلنا المجلس لقينا راكان جالس ، جلسنا معاه
ومضى الوقت في السوالف
بعد العشا
راح الكل و بقيت انا وريان وبوريان
بوريان = اجل انااستأذن بروح انام
ريان = بدري يوبا اقعد معنا
بوريان = وين بدري الله يهديك الساعه 12 وانا مني راعي سهر مثلكم ياشباب
ريان = هههه على راحتك تصبح على خير
وقام حب على راسه
وانا سويت مثله
بعد ماراح بوريان
انا = وين اختفى راكان
ريان= راح مع احمد يجهزو السياره لبكره
انا= اها
بديت احس بنوم بس مستحي اقوم واترك ريان لوحده .. وفجأه حسيت بيد على كتفي
لفيت وجهي لريان
ريان ويده على كتفي = عبدالله فيك شي
انا= لا ليش ؟!!
ريان=لي ساعة اناديك ماترد تعبان فيك شي
انا = لا لا مافيني شي بس سرحت شوي
ريان = والله باين ان فيك نوم شكل ماحد راعي سهر غيري
انا = لا لا وين النوم بدري عليه
ريان = ههههه اقول لاترقع باين انك تبغى تنام قم قم يابوشباب
وانا اقوم = اجل انا استأذن تصبح على خير
ريان = وانت من اهله
ماصدقت وصلت الغرفه رميت نفسي على السرير ونمت
************************************************** ***************
في مكان اخر
الرياض
ريم *
مر شهر واسبوعين ويومين على وفاة شهد الله يرحمها ... من لما خبرت ابوها عن وفاتها وهو مقفل تلفونه ... حتى العزاء ماحضره .... وهذي المره المليون اللي احاول اتصل عليه
= ان الرقم الذي تتصل به خارج نطاق التغطيه
اوووف قفلت الاتصال ورميت الجوال على السرير ورميت نفسي وراه على السرير..
دائما فواز مايهتم في بنته بس ما توقعت انه توصل فيه انه ما يحضر عزاء بنته الوحيده .. مسكينه ياشهد لا ام ولا اب رغم ان ابوك عايش بس عمره ما حسسك بوجوده .. قاومتي مرضك رغم صغر سنك .. بس في النهايه غلبك .. الله يرحمك
سمعت احد يدق الباب
انا = تفضل
دخلت الخدامه
الخدامه = بابا ياسر تحت
انا = قولي له شوي وجاية
الخدامة = اوك
خرجت وقفلت الباب.. عمي ياسر هو الوحيد اللي يسال عني .. ابوي لاهي مع سفراته .. وامي مع خرجاتها هي وصاحباتها .. وفواز من لما ماتت زوجته وهو مسافر الشرقيه .. وانا دايم اجلس مع شهد في البيت .. بس بعد موت شهد صرت لوحدي وعمي ياسر كل يوم يجي يزورني .. بدلت و نزلت تحت .. رحت للمطبخ وطلبت من الخدامة تسوي عصير و تجيبه للمجلس .. دخلت المجلس عند عمي و سلمت عليه وبعد ما اخذنا الاخبار من بعض
عمي ياسر = ها كلمتي فواز ، كل ما اتصل عليه يقول مغلق
انا = لا ، حتى انا اتصل يقول مغلق
عمي ياسر = لاحول ولا قوة الا بالله ، الله يهديك يافواز عزاء بنتك ولا حضرته ما كنت مهتم فيها في حياتها على الاقل تتهتم بعد موتها وتحضر عزاها
انا = عمي انا خايفه ان فواز صار له شي ، لما خبرته عن وفاة شهد على طول قفل اخاف انه صار شي له ومنعه انه يجي
عمي ياسر = لا تخافين اكيد لاهي مع ربعه ولا همه في احد ، خساره فيه شهد حرمها منه وهو حي ( ووقف) يلا انا رايح ، لو رد عليك فواز قوليله يتصل علي
انا = اوك ، بس عمي ما بتتعشى معاي
عمي ياسر = لا مره ثانيه ان شاء الله ، انا اليوم معزوم عند واحد من الربع
انا = طيب على الاقل اشرب العصير الحين الخدامه بتجيبه
عمي ياسر = لا مستعجل ، يلا مع السلامه
رحت مع عمي للباب وودعته .. طلعت لغرفتي وحاولت اتصل بفواز بس مافي فايده .. مسكت لابتوبي ودخلت المنتدى اللي اشرف عليه .. هو تسليتي الوحيده
************************************************** ****************
الخبر
عبد الله *
صباح الجمعه
10:00
ونحنا على الفطور سالني ابو ريان
ابو ريان = سمعت انك تبي تتوظف
لفيت وجهي لريان لانه هو الوحيد اللي قلت له.. لقيته يناظر صحنه ومبتسم
رجعت لفيت لعمي ابو ريان
انا = ايه ودي بس انت عارف الوضع لا هويه ولا اثبات ماحد بيوظفني
ابو ريان = خلاص وش رايك تتوظف عندي بشركه
انا مو مصدق = كيف
ابو ريان = نحنا نحتاج موظف في الشركه
انا = بس ياعمي انا ما عندي اي اثبات ولا شهاده وخبره
ابو ريان = انا مراعي ظروفك لاجل كذا بتغاضا على هذا الموضوع و بخلي واحد يعلمك الشغل
انا = مشكور يا عمي ما تقصر
ابو ريان = ما يحتاج تشكرني انت مثل اولادي ، خلاص من بكره تيجي معاي الشركه ويبدأ دوامك (وكمل بمزح ) لو تأخرة بكره بينخصم من راتبك انا ما احب اللعب في الشغل
انا = ان شاء الله
بعدها خرجنا ورحنا لصلاة الجمعه
المغرب
الساعه 5:30
في العزيزيه
الجماهير كانت مجتمعه تنتظر احمد (كاسبر ) يجي يفحط .. كنت واقف مع ريان ..
محمد رفض يجي لانه بنظره ان اللي يسويه احمد غلط .. وراكان مع احمد معزز له ( لكل مفحط معزز يكون مساعد في كل شي )
على الساعه 6 تماما جاء احمد بسياره كامري عنابيه وكان جنبه راكان .. بدا التفحيط وتعالت اصوات التصفير و التشجيع .. كان احمد مبدع جدا يسوي حركات خطيره ..
وقفت سيارة احمد جنبنا انا وريان .. ونزل منها احمد وراكان وهم متلثمين بغترهم.. قرب منا واحد من اللي كانو واقفين يناظرون وكان متلثم
المتلثم = احلى ياكاسبر، وش ذي عكسيه و حركات من زمان ما سويتها
احمد = اليوم غير عشان عبد الله (وهو ياشر علي ) ضيف اليوم (لف علي ) تركب
انا = لا اشوف من بعيد احسن
بصراحه خفت .. عليه حركات وسرعه جنونيه
احمد = كيفك (لف على راكان ) يلا خلنا ناخذ شوط اخير
ركبوا السياره وكملوا تفحيط .. خلص التفحيط وبدا الناس تتفرق .. كانت سيارت احمد بعيده عنا.. رحنا انا وريان لعنده.. كان الشاب المتلثم متكأ على دريشة السياره من جهة السائق ويكلم احمد
احمد = عزوز الاطارات تبي تغير كلها اوك
الشاب المتلثم عزوز = طيب في شي ثاني
احمد = لا بس
عزوز = خلاص بمر عليك بكره باخذ السياره اوديها الورشه
احمد = اتفقنا
ركب عزوز سيارته وراح .. نزل احمد من سيارته
احمد = وش رايك عبد الله
انا = عليك حركات جنونيه
احمد = اعشق الجنون
ريان = يالمجنون خفف السرعه كم مره اقولك
احمد = لا تخاف انا كاسبر بعدين مابصير الا المكتوب يلا عن اذنكم مع السلامه
تبادل هو راكان الاماكن ومشو .. ركبنا انا وريان السياره ومشينا
************************************************** ****************
+++
فتح عيونه ببطىء التفت يمين ويسار .. يحاول يستوعب هو وين .. جلس يناظر المكان باستغراب .. المكان كان بنسبه له غريب بس يحس انه يعرفه .. سمع صوت احد عنده بالغرفة .. التفت يمين شاف حرمه بس ما قدر يميز ملامحها .. حس انه يعرفها زين .. وده يقوم يحضنها مشتاق لها. .. بس كان يحس بخوف داخله مايعرف سببه سألها بتردد
= مين انتي ؟
ردت عليه = ليش ضيعت الامانة...ليش ضيعت الامانة ...ليش ضيعت الامانة ...ليش ضيعت الامانة
+++
قمت من النوم مفجوع .. انفاسي تعلى وتهبط وكاني جاري لاميال .. بسم الله حلم غريب .. التفتت لجهة الساعه الي جنبي على الكومدينه .. كانت الساعه 3:30
الفجر قمت من الفراش متوجه للحمام .. غسلت وجهي وانا احاول اطرد الحلم من راسي .. سمعت صوت الاذان .. توضيت وخرجت متوجه للمسجد
************************************************** *******************
السبت
في المكتب
اليوم اول يوم لي في الدوام .. قاعد انا وفهد زميلي في المكتب .. على الكمبيوتر يعلمني طريقة العمل
على الساعه 12 انتهى دوامي الصباحي خرجت من الشركه وركبت تكسي .. وتوجهت لاحدى المطاعم اتغدى .. ابو ريان امس بعد ما رجعت من التفحيط عطاني راتبي مقدم بسبب ظروفي .. رحت وشتريت كم بدله للعمل واشريت جوال من الجوالات القديمه ( ابو كشاف ) ماعندي فلوس للعب ناوي اجمع كم فلس عشان استاجر بيت مو حلوه اطول عندهم .. سجلت فيه رقم ريان وابوه بس .. وانا اتغدا دق علي ريان
انا = الو
ريان = السلام عليكم
انا = وعليكم السلام
ريان = اخبارك ؟
انا = تمام
ريان = اخبارك مع الشغل عجبك ؟
انا = ايه ،الحمد لله فهد ما قصر علمني كل شي
ريان = وينك الحين لان اكيد انتهى الدوام الصباحي
انا = في المطعم اتغدا
ريان = اها ، بس حبيت اسال عنك
انا = مشكور
ريان = مع السلامه
انا = مع السلامه
بعد ما خلصت الغداء توجهت للبيت ارتاح لان الساعة 3:00 العصر تبدأ الفتره المسائية .. ولازال عقلي مشغول في الحلم الغريب
************************************************** *******************
* متعب
وصاني عمي ابو محمد اجيب اوراق تخص الشركه من بيته لانه نساها .. وقفت جنب السياره استنى الخدامه تجيب الاوراق .. رفعت راسي لفوق اتامل القصر .. لمحت بنت واقفه على بلكونه وتناظر فيني .. نزلت نظري بسرعه اكيد هاذي هي .. شكلها مره بتورطني مع عمي ابو محمد .. جابت الخدامه الاوراق .. ركبت السياره خارج من هذا القصر .. انا لازم الاقي حل مع هذي البنت .. كيف بكون موقفي لو ابو محمد عرف بتصرفات بنته .. لاحول ولا قوة الا بالله .. الله يهديها ويبعدها عني ..عطيت ابو محمد اوراقه وتوجهت لمكتبي وانا افكر كيف اتصرف مع هذي المراهقه
الظهر 12:00
انتهت الفتره الصباحيه .. وتوجهت للبيت ارتاح .. دخلت البيت وسمعت اصوات اخواتي
وضحى = يابنت هاتي اللي اخذتيه
جازي = حلي عني ما اخذت شي منك
وضحى = ياسرووق هاتي لا اعلم عليك تعوبي
دخلت الصاله على كلمتها الاخيره
انا = تعوبي في عينك اصغر عيالك انا ، رجال طول و عرض وتقوليلي تعوبي
وضحى = اخيرا جيت تعااال شوف اختك السرووق سارقة اغراض من غرفتي
جازي = لاااا والله ما سرقت حاجه لا تصدقها
وضحى = اجل ايش كنتي تسوين في غرفتي
جازي = مالك شغل
وضحى = ايه لانك سارقه ، يلا طلعي بسرعه
جازي = ماني مطلعتن شي ، لاني ما اخذت شي
وضحى بصوت عالي = كذاااابة ياسرووق ، طلعي يلاااااا
وهجمت على جازي ..وبدأت المعركة
عديت بداخلي من الواحد للعشرة عشان ما اعصب .. بس ما قدرت انا واحد دمي حار
انا بصراخ = بس انتي وهي ، ما كانكم شايفيني تتهاوشون قدامي كانكن ورعان
وقفو هواش وكل وحده بعدت عن الثانيه
وضحى = بس
انا بعصبيه = ولا كلمه ياوضحى هذي اختس الكبيره لازم تحترمينها مو تتضاربي وياها ، انتي ماعندك احترام لاحد ، لو شفتس مره ثانيه ياوضوح تضربي اختس ما تلومي الا نفسس هبالس هذا خليه فاااهمه (هزت راسها بمعنى ايه ) يلااا كل وحده على غرفتها ، ولا اسمع حس وحده
راحت كل وحده على غرفتها .. جلست وانا راسي مصدع .. هواشاتهم ما توقف .. يخلين الواحد غصب يعصب
دخلت امي علي الصاله .. وجلست جنبي
امي = ما يخلين احد يرتاح ، كل يوم هواش ، مدري متى يعقلن
انا = الله يهديهن ، مصيرهن يعقلن ويتركن خبالهن ، خليس منهن ولا تاخذين همهن
امي = آآآمين ، ياولدي كان وجهك كذا ، تعبان
انا = مصدع شوي ، باخذلي بندول بيتحسن
امي = طيب تبيني انشبلك الغدا
انا = لا بروح انام الحين ولما اصحى بتغدا (وقفت ) يلا عن اذنس .. وخلي وضحى تجيبلي البندول
حبيت راسها وتوجهت غرفتي .. وانا اسمعها تدعيلي .. دخلت غرفتي وانسدحت على السرير بدون ما اغير .. غمضت عيوني .. افكر في بنت ابو محمد ..متى تعقل وتبطل حركات مراهقين .. اندق الباب
انا = تفضل
دخلت وضحى ومعاها كاسة الماء و البندول .. حطت الماء و البندول على الكوميدينه اللي جنبي وتوجهت لباب بتخرج
انا = وضوح تعالي
رفعت راسها لي مستغربه ..جلست واشرتلها على مكان جنبي .. جات وجلست جنبي وهي ساكته .. اكيد زعلانه مني بعد ما هاوشتها
انا = زعلانه
هزت راسها بمعني ايه
انا = اسف ، انتي اللي حديتيني اني اصارخ عليك ، هذي اختك الكبيره مفروض مهما صار بينك انتي وهي ماتضربيها ولا ترفعي صوتك عليها صح ؟
وضحى = بس هي دخلت غرفتي وجلست تنبش باغراضي
انا = حتى ولو تفاهمي معاها مو تضربيها كانها اصغر عيالك ، لا عاد تعيديها مفهوم
وضحى = ان شاء الله
انا = الحين قوليلي ليه ما رحتي اليوم المدرسه ؟
وضحى = متفقين انا وصاحباتي نغيب اليوم مافي دراسه اليوم اغلب المدرسات عليهم دوره تدريبيه ما راح ناخذ شيء
انا = اها ، طيب يلا روحي اعتذري من اختك
وضحى = طيب
وخرجت .. اخذت حبت البندول وشربت بعدها المويا .. وقمت اغير بعدها .. انسدحت على السرير اخذ لي قيلوله
*********************************
جامعة الدمام
الظهر
الساعة 1:00
راكان *
خلصت المحاضرة وتوجهت للكفترية .. اول ما دخلت لفت انتباهي صوت صراخ .. لفيت لمصدر الصوت لقيت شلتي مجتمعه على احدى الطاولات وهي سبب الازعاج
.. شكلهم سحبوا على محضراتهم .. توجهت لهم وانا مبتسم انتبهو لي وانا اقرب منهم
مازن = وصل مخقق البنات
انا بابتسامه = Hi everybody (اهلا جميعا )
خالد = هلا والله حياك اقلط
انا = Thanks ( رميت كتبي على الطاوله وجلست )
خالد = رويكن كم مره اقولك خل عنك العنقليزي تراه كـ
انا مقاطعه = خالد Do not start your lecture (لا تبدأ محاظرتك )
تعالت اصوات ضحك الشباب لان هذا السيناريوا دايم يتكرر كل ما جلسنا انا وخالد
.. خالد ما يحب الانجليزي لانه تعقد منه لما كان في الثانويه
خالد = مدامك عارف وش بقول لاعاد تتكلم عنقليزي
انا = اوك ولا يهمك بترك العنقليزي على قولتك بس انت سكر حنجرتك الذهبيه ولا عاد تغرد
منصور موجه الكلام لي = خلصت محاضراتك
انا = ايه وانتم اكيد ساحبين
مازن = ايه ، انا ومنصور عندنا محاضرة لدكتور فيصل مالنا خلق لها فسحبنا عليها
انا = احسن لكم ، هذا الانسان دمه ثقيل ما ادانيه ابدا
خالد = يعني لو مالكم خلق للمحاضره تقوموا تسحبوا عليها
لفينا كلنا له بنص عين
انا = مين اللي دايم يسحب على المحاضرات ويخلينا نسحب زيه
خالد بضحكه = عشان مرتين صرتوا تقولو دايم ، بعدين انا اختربت منكم ولا كنت وش حليلي
مازن = ايه باين
ارتفع صوت نغمة جوالي (اغنيه اجنبيه ) .. مديت رجلي عشان اطلعه من جيب البنطلون .. ناظرت الشاشه ( شذى يتصل بك )
انا = اوف هذي النشبه وش تبي
خالد = اكيد هذي وحده من خوياتك
انا = ايه
منصور = مين
انا = شذى
منصور بضحكه = هههه اجل الله يعينك
اشرتلهم بيدي يسكتوا ورديت
انا = هلا قلبي
شذى = هلا حبيبي ، اخبارك
انا = اذا قلبي بخير انا بخير
شذى = لا قلبك بخير من لما سمع صوتك
انا بهيام = يسلملي قلبي
ضحك خالد بصوت عالي .. نطوا مازن ومنصور يسكروا فمه بيداتهم وهم ماسكين الضحكه
لفيت وجهي عنهم
شذى = ايش هذا الصوت ، احد عندك
انا = ايه ، انا في الجامعه
شذى = اوه لايكون اخرتك عن محضراتك
انا = اسحب عليها عشان قلبي ، كم شذى عندي انا
شذى بدلع = وحده
انا = وما مجنني غير هذي الوحده
شذى = طيب لو طلبت منك شذى قلبك طلب تنفذه
انا = اكيد هي تامر مو تطلب
قرب من اذني منصور وهمس
منصور بهمس = ياعيني (بعدين غمز )
بعدته بيدي
انا = ها امري
شذى = ابي صوره لك
انا = ولا يهمك دقايق وهي عندك
شذى = اوك انا الحين عندي محاظره باي حبيبي
انا = بايات ياروحي
قفلت منها وناولت منصور الجوال
انا = صورني
مازن = ليه
انا = طلبت صوره
منصور = مو توك راسل لها قبل يومين صوره
انا = ايه بس تبي صوره ثانيه ( واعتدلت في جلستي ) صورني كاني مو داري
خالد = يا حبيبي ما يزبطها الا ساهر
لفيت عليه
انا = انت اسكت بس
ورجعت اعتدلت
انا = يلا منصور صور
اخذ لي منصور صوره
منصور وهو يمد لي الجوال = ها وش رايك
اخذت منه الجوال اشوف الصوره .. طلعت حلوه
انا = ايه تمام ( واعطيت الجوال لمازن ) ولا ايش رايك مازن
اخذ مازن الجوال وهو يبتسم
مازن = حرام عليك ركون تبي البنت تذوب
انا = وهذا المطلوب
اخذت الجوال منه وارسلت الصوره وبعدين فتحت على صندوق الوارد ادور رساله لقيت رساله امس راسلها لسوسن .. ارسلتها لشذى
خالد بجديه = راكان متى ناوي تبطل حركاتك
انا = مو ناوي ابد لا تحاول هذي تسليتي اللي مستحيل اتركها (وقفت وشلت كتبي من الطاولة و لفيت على الشباب) يلا شباب انا استاذن
وقف معي منصور
منصور = حتى انا ماشي مع السلامة
حركت يدي مودع خالد و مازن .. ومشينا انا ومنصور للباركنق .. وقفني منصور
منصور = راكان كلام خالد صح لازم توقف هــ
انا مقاطعه ورافع يدي بمعنى اسكت = منصور بليز اسكت لا تبدأ لي محاضرات خالد
هذي لعبتي وانا حر فيها
منصور = كيفك ، بس تذكر انت عندك خوات
مشيت وتركته وقفت عند سيارتي وطلعت المفتاح من جيبي وفتحت السياره .. حسيت احد وراي لفيت .. كان منصور واقف وهو مبتسم .. وش فيه
انا = whats app (ما الامر)
منصور = ولاشي بس جيت اودعك
انا = اها ، ما تترك حركاتك
منصور = لا ، بعدين اشوفك جبت سيارتك
انا = ايه جبتها امس من الورشه ، ريان شكله بيحرم يخليني استخدم سيارته
منصور = ليه
انا بضحكه = تخيل يوم الثلاثاء ، ما صحيت بدري وكان بتفوتني محاضرت الدكتور نايف
منصور = كنت بتروح وطي
انا = ايه ، فما كان قدامي الا اقطع الاشارات
منصور = الله يعين اخوك على جنونك
ضحكت وفتحت السياره وركبت ورميت كتبي في الخلف لفيت على منصور
انا = see you later
منصور وهو يهز راسه باسف = مع السلامه
سكرت الباب وحركت السياره مغادر الجامعه
************************************
في مكان اخر من الجامعه
* إلياس
سحبت على المحاضرة الاخيرة مالي خلق لها وتوجهت للباركنق .. لما قربت من سيارتي رفعت نظارتي الشمسية فوق راسي بدهشه ..
ايش هذا من كسرها ! كان قزاز السيارة من جهة السائق مكسور .. التفتت ادور اذا كان في احد شاف اللي كسرها ....
ما كان في احد في الباركنق .. درت حول السيارة اشوف اذا كان في شيء غير القزاز مكسور .. ما كان في شيء .. كل شيء سليم
رجعت لمكان القزاز المكسور فتحت الباب .. ابي اشوف اذا كان في شيء انسرق مع ان السيارة ما كان فيها شيء يستحق السرقة ..
انتبهت ان في صندوق صغير محطوط فوق مقعد السائق .. من وين جاء .. رميت كتبي على المقعد اللي جنب السائق
وشلت الصندوق باستغراب وفتحته .. رصاصه ! لقيت فيها رصاصه .. شلتها وقلبتها بيدي بخوف مين ممكن حطها
رجعت الرصاصة في الصندوق وانتبهت ان فيه ورقه .. اخذتها وفتحتها بترقب كان مكتوب فيها اربع كلمات بس .. خفت اكيد هذا هم ما في غيرهم .. ..
رجعت الورقة داخل الصندوق وسكرته.. ابعدت القزاز المنتثر على المقعد ودخلت السيارة وانا افكر ..
لازم اخبر فواز يحذر .. رصاصه يعني وصلت للقتل .. حطيت الصندوق في الدرج وطلعت جوالي بتصل عليه اشوفه رجع ولا لا .. ..
رغم ان لي شهر واسبوعين وانا اتصل عليه وهو مقفل جواله .. اخر مره شفته قالي انه بيروح الرياض بيشوف بنته .. فتحت قائمة الاسماء
ادور على رقمه .. وصلت الى ( اخو دنيا ) هذا الانسان اعزه كثير وقف معي وقت ما ابوي تخلى عني .. ضغطت على الزر الاخضر
ورفعت الجوال لاذني انتظر رد
= ان الرقم الذي تريد الاتصال به مغلق
قفلت الجوال وانا مستغرب .. ايش فيه مقفل جواله كل ذي المدة لا يكون صار شيء لبنته .. الله يستر .. رجعت الجوال في جيبي
وحركت السيارة خارج من الباركنق .. متوجه لشقته بشوف يمكن رجع .. وصلت لمواقف السيارات حق العمارة .. سيارته ماهي موجوده
شكله لسه ما رجع .. خرجت من المواقف وتوجهت للبيت
************************************************** *******************
في المستشفى
ريان *
قفلت من عبدالله .. وتنهدت حالته صعبه لا ذاكره ولا اهل يوقفوا معاه .. الله يعينه يبي له وقت عشان يستعيد ذاكرته.. رجعت بذاكرتي ليوم الحادث اول يوم اشوفه فيه
+++
خرجت من البيت مستعجل لاني تاخرت على دوامي .. وصلت عند الاشارة ووقفت لأنها كانت حمرا .. اوووف على كذا بتاخر اكثر .. لفيت على جهة الشباك اللي جنبي و اللي كان يطل على الشارع الثاني .. وانا مدكي عليه اناظر الناس .. لفت انتباهي سيارة التكسي اللي وقفت بسرعة .. وخرج منها شاب مستعجل .. هه شكل الناس متاخره زيي .. قطع الشاب الشارع وهو يركض .. مجنون الاشارة الثانية مفتوحه .. وهو في نص الشارع مو منتبه لسيارة اللي جايه .. تعالى صوت البوري للسياره القادمه .. التفت الشاب لها اخيرا ولكن بعد فوات الاوان .. صدمة فيه السياره .. ارتفع الشاب من قوة الصدمة وثم سقط على الارض مره ثانيه .. فتحت باب السياره وخرجت منها اركض لشاب .. وصلت عنده لقيته غارق في دمه .. خرج صاحب السياره اللي صدم الشاب .. وعلى وجهه علامات الخوف .. وجاء يبي يحرك الشاب
انا = لااااا ، لا تحركه
ابتعد الرجال وهو يناظر فيني بخوف .. كملت اوضح له
انا = لازم مايتحرك يمكن يكون عنده كسور وانت لما تحركه تزيد الامر سوء
نزلت على الارض عند الشاب ومسكت يده اتفقد نبضه .. لازال حي
لفيت على الناس المتجمهره حولنا وصرخت
انا بصراخ = احد يتصل بالاسعاف بسرعه الرجال حي
اتصلو بالاسعاف .. وصل الاسعاف بعد ربع ساعه واخذوه للمستشفى اللي انا اشتغل فيها لانها الاقرب
+++
دخل في غيبوبه وصرت دايم اسال عنه .. خاصه بعد ما عرفت ان ما لقوا اي اثبات معاه ولا جاء احد يسال عنه .. تعاطفت معاه كثير .. وبعد مرور اسبوع صحى من الغيبوبه وحولوه لقسمي .. لانه طلع فاقد الذاكره بسبب الضربه القويه اللي تلقاها في راسه .. سمعت انه لازم يطلع لان المستشفى تحتاج الاسره للمرضى الاخرين .. حسيت ان من واجبي اساعده وخاصه اني دكتوره .. فتصلت اخبر ابوي اني بجيب مريضي للبيت .. ما عارض بلعكس شجع الفكرة.. خبرت عبدالله (هذا الاسم انا اخترته له) انه يسكن عندي .. ما قدر يرفض لأنه ما عنده خيار ثاني .. صحيت من سرحاني على صوت الممرضة السعودية هناء تدخل الغرفة
الممرضه هناء = دكتور ادخل المريض
انا = ايه دخليه
انتهى البارت
|
03-03-13, 03:33 PM
جديد مواضيع قسم ارشيف خاص بالقصص غير المكتمله
العرض العادي
