[الــــجــــــزء الــثـــامـــــــــــــــــن]..

يـــوم الـســبـــت...
(12/4)


في الصباح دخلت هنادي المطبخ عشان تعمل لنفسها فطور لقت أمها جالسه مع أختها الصغيره تهاني اللي عمرها 7سنوات..
كنوده: صباح الخير..
"ماردت عليها أمها وهي تصب الحليب لأختها الصغيره"..

"كنوده وهي تجلس": يمه صبي لي حليب..
أم فواز: أنتي صبي لنفسك.. ليه مشلوله عاجــزه تخدمين نفسك..!!
"كنوده وهي تمسك الأبريق بعصبيه": ليتني مشلوله أقل شيء ألقى اهتمام منك..
أم فواز: إنتي ماتتركين طولة اللسان هذي_ قـويـه مدري ماطالعه عليه..
"كنوده وهي تضحك بإستهزاء": على هالعائله الشريفه المحترمه ماطلعت برا.. أخلاقي هي تربيتكم..
أم فواز: قصدك على أبوك و عمامك راعيين الأخلاق والسمعه الشينه عندهم..
كنوده: أبعرف ليه معصبه من الصبح !..
أم فواز: معصبه على أبوك اللي من طلع من السجن وهالبيت مقلوب فوق تحت.. لاهو اللي يصرف عليكم مثل العالم والناس ولاهو اللي قاعد بالسجن عشان نعيش على مساعدة الجمعيه الخيريه..
كنوده: طيب أنا وش دخلني تهاوشيني هذا أبوي بشقته فوق روحي كلميه وخانقيه..
"دخل فواز المطبخ وهو ينشف وجهه بالمنشفه": وش عندكم صراخ على هالصبح؟
أم فواز: تعال يافواز أفطر قبل تروح للدوام..
فواز: مابي يمه أنا مستعجل مابي أتأخر على الدوام أخاف يفصلوني وأتورط مثل ياسر ..
أم فواز: ياسر مالقى وظيفه للحين؟
فواز: أبوه يدور له واسطه عشان يوظفه بشركه نظام عقود وبراتب حلو..
أم فواز: هذا الأبو السنع مو أبوك طاح حظه بس لاهي بتجارته...!!!!!!
"كنوده وهي قايمه": فواز وصلني بطريقك للمستشفى عندي موعد..
فواز: أقولك مستعجل أبي أروح للدوام ماتفهمين..
كنوده: بس بس خلاص أروح بليموزين أحسن ..
فواز: تروحين لحالـــك..؟
"صرخت كنوده": ماتبيني اروح لحالي تعال معاي..
فواز: صحي فايز يروح معك..
أم فواز: فايز سهران مانام إلا الصبح خله يرتاح.. بعدين هي تعرف تدبر حالها بالمستشفى مهي أول مره تروح يعني اللي عمره 12سنه بيصير محرم لها؟!!
"فواز بملل": أووووه دبري حالك أنا أبي ألبس وأمشي..
كنوده: قول كذا من الأول مسوي نفسك خايف علي؟

[ دخلت كنوده غرفتها ولبست عباتها وأخذت شنطتها وأتصلت على سايق الليموزين الهندي اللي متعوده إنه يوصلها لمشاويرها وبأقل من خمس دقائق وصل لعند الباب.. ركبت معه وراحت لمستشفى(......) وكل تفكيرها بنفسها وظروف أهلها.. بداية بعلاقتها المتوتره مع إمها.. ونهاية بأبوها وسمعته السيئه قدام الناس مرورآ بأخوانها وأخواتها اللي أنظلموا بسبب الظروف الصعبه اللي أثرت بنفسياتهم بس ماأثرت على أخلاقهم والدليل أخوها فواز اللي الكل يحبه ويشهد له بأخلاقه وأحترامه للناس..بأستثنـــاءآ (هــي) اللي ماحد يعرف أسرارها و(جنونها وتمردها) غير سحايب...!!!!


£;;£;;£;;£;;£;;£;;£;;£;;£;;£;;£;;£;;£;;£


₪ وين انـت يـاصوت الغــلا عني ابطيـــت..
في غيبتك مشغـول؟!
وإلا تغلـــى!!

غالــي علي في ذمتي لــو تغليـت..
عييت اطبق "من تغلــى تخلــــــى"!! ₪

"ميار وهي ماسكه جوال عذاري": وش راح تردين عليه (تغلـى وإلا مشغــول)..؟؟
"ضحكت عذاري ضحكه هستيريه وعجزت توقف ضحك"..
ميار: وش فيك أنا قلت شيء يضحك..سألت سؤال بـــس..!
عذاري: ميار حبيبتي هذا سؤال تسألينه؟ أكيد ماراح أرد عالمسج ابي أتغلى عليه عشان أعرف قيمتي عنده..
ميار: أهاه فهمت يعني غيابك وأنقطاعك عنه هو تغلــي..
عذاري: بالـضـبـــــــط...
ميار: أنا اللي أحسه من علاقتكم أنه مجنوووون فيك.. وقصة حبكم بتكمل السنه الثانيه وهو إلى الآن ماتقدم لك مع إنه أنسان مكون نفسه ومو ناقصه شيء..
"عذاري وهي تلعب بخصلات شعرها الأسود الكثيف":
مــا أدري.. بس إنا لما أكلمه ما أجيب طاري الزواج عشان مايشوف نفسه علي ويقول إني قاطه نفسي عليه حفاظآ على كرامتي.. بس إني مطيره عقله بأسلوبي وعارفه إنه يموت عالتراب اللي أمشي عليه ومع ذلك (أخــــــاف يتزوج غيري ويتركني) لأن أهله يطرون له الزواج..
ميار: وكيف عرفتي...؟
عذاري: من أمي.. دايم أسأل عن أهله بس بطريقه غير مباشره عشان ماتشك فيني.. إنتي تدرين إنه يقرب لنا من طرف أمي بس من بعيد.. وتقول إن أهله يبغونه يتزوج من بنت عمه بس هو رافض الزواج من القرايب..
ميار: ليــــه...؟
عذاري: من لما فسخ خطبته من بنت خالته_أخذ موقف من زواج القرايب..
"ميار بتعجب": نفسي أعرف ليه فسخ خطبته...؟ مين السبب هو وإلا هي...؟
عذاري: مدري ولا سألته ولاأبي أعرف_أهم شي أنا وهو بس_ وقلعتها خطيبته!!!
"ميار وهي تشتكي":أوووووه مالت على حظي وحبي الجامد لا أشوفه ولا أكلمه ولا شي..
عذاري: إنتي تطيرين الفرص منك بعدين تشتكين.. أمس لما رجع من السفر نام بعد صلاة الجمعه.. ولما صحى المغرب جلس مع عماتي وخواته يتقهوى ويسولف معهم.. قلت لك تعالي أجلسي معنا رفضتي "وهي تقلدها" أستحـــي..!!
ميار: والله صدق أستحي إنتي جلستي معه عادي لأنك ماتتغطين عنه وهو يعاملك مثل أخته.. أما أنا لا أسمحي لي ماتعودت أجلس مع رجال غير أخواني..
عذاري: خلاص هذي فرصه وطارت.. اليوم بالليل راح يودينا للمطعم أنا وإنتي وخواته.. إذا ترفضين تروحين مو بس أزعل عليك!! راح أحطك بأول طيارة رايحه للرياض وأسفرك.. فاهمـــه..
"ميار وهي تضحك": أكيد أروح معكم..
عذاري: خلاص قومي ندخل داخل لفراشنـا وننـــام.. أنا ذبحني البرد من القعده هنا في الحوش..
ميار: بالعكس أنا مستمتعه بالأجواء هذي اللي أموووت فيها (برد وغيوم وضحك وسوالف) والأحلى إنك معي..
عذاري: بس الأشين إن الدجاجات لولو ومرام أستسلموا وناموا بعد صلاة الفجر وظلينا بس أنا وإنتي..
حتى (لــزيــز) نايم بعد؟؟!
"صرخت ميار وهي تضربها": ياخايسـه بتعذبين قلبـي بطاريه وعلى هالجو الحلو!!

(ضحكت عذاري وهي تغني أغنية "خذني معك" لفضل ويارا)...


/,,/,,/,,/,,/,,/,,/,,/,,/,,/,,/,,/,,/,,/,,/

أطـلالـي مـلـت وقـوفـــــــــــــــي

(أم الــــظــــفــــايـــــــــــر)...




[الـــجـــزء الـــعـــاشــــــــــــــــــــــــــر]..

يــوم الأثـنــيـن...
(12/13)

[الـــجــــــــ الحـادي عشـر ــــــــــــــزء]....



يـــوم الـخـمـيــس...
(1/1/....142هـ)



®[كـذا بسهـولـة تـروح لـواحـد ثـانـي..
قدام قلـبـي وعـيـني.. إيـدك بـإيـده..
كـذا بسهـولـة تسويهــا و
تنـسـانـي..
طـيـب .. وأنــا !!,, والـهـوى وأغلـى مواعـيـده...؟
الـلـه يجـازيـك .. تقهـرنـي وتجفـانـي
ذوقـتـنـي عـبـره ودمـعـه .. وتنهـيـده..
مـا فيني أمشي طريق الـحـب وحـدانـي
وأعـيـد مــوال ذبـحـنـي
بـتـنـكـيـده..
كـنـت أنـت.. ليتك تـعـرف وش كنت يالجـانـي...؟!
كـنـت الـغـلا والـحـلا في سـعـده وعـيـده
كـنـت الغريب الحبـيـب القـاصـي الـدانـي
الـلـي تلـويـت في قـربـه قبل جـيـده..
على شـانـك اللي يخـصـك صـار من شـانـي
واللي نـقـص من غـلاك.. بـعـمـري أزيـده
مـبـروك من قلـبـي.. ومـبـروك بلسـانـي
مـبـروك والـلـه يهـنـي سعـيـد بسعـيـده..]®
"درر وهي تسكر دفتر الصراحه": حلو إنك جبتي الدفتر معك ياسميه كنت راح أنفجر لو ما كتبت اللي بخاطري..
سميه: أنا قلت أسويها مفاجأه تحسبآ لأي خبر طاريء يوصلنا..
"ميريام وهي مبتسمه": وتـــزوج علـــي يـا درر.. خلاااااااص راح وراحت أيامـه.. إبدأي رحلة البحث عن بديل وكالعاده (حب من طرف واحد)..!!
ميار: وش ردة فعلك أمس بالليل لما سمعتي أخوك سلطان يبشر أمك بأن علي خطب بنت عمه؟
درر: بصـــراحه شعور لايوصف.. دخلت غرفتي وأنا ميته ضحك على طيحة حظي مو معقول اللي يصير بحياتي (من أحب واحد يتزوج ويتركني)..
سحايب: ما عرفتي وش تفاصيل زواجه وكيف أختارها وكم عمرها,, حلوه وإلا شينه..!
درر: أنتظر الأخبار من مندوبتي طفطف.. بعد شوي تجي وتجيب الأخبار معها لأنها تبي تسأل وتستفسر..
"ميار بضيق": ياخوفي أرجع للبيت وألقى أمي تبشرني بزواج يزيـــد..؟
ميريام: يخرب بيتكم شوهتوا سمعة شلة (خلك إيزي ياعزيزي) ولا وحده فيكم حظها حلـو ..
درر: من زينك ياثلجـــه يعني إنتي اللي مكشخه شلتنا؟ بارده ومطنشه على طول الخط..
"أبتسمت سميه": الله لا يغير علينا وإنشاءالله تظل أيامنا كلها حلـــوه وإيـــزي..

(دخلت الخدامه الغرفه ونادت درر عشان لطيفه تبغاها عالتليفون)..

درر: عن أذنكم بنات ثواني وراجعه خذوا راحتكم البيت بيتكم..
ميار: لا تطولين ترى أنا بعد ساعه أرجع للبيت..
"درر وهي واقفه عند الباب": بدري أجلسي ساعتين زياده..
ميار: ما أقدر لو إن صلاح اللي بياخذني عـــادي يخليني أجلس على راحتي بس المشكله فيصل اللي جابني هنا ونفسه بطرف خشمه وسمح لي أجلس ساعه بس ولازم أطيع أوامره...
"طلعت درر وألتفتت سحايب على كنوده وهي تهمس": غريبه ساكته وهاديه وين الجنون..
"كنوده وهي تشرب العصير": بعد شوي يطلع بس خلينا نتحلى بالأول..

(دخلت سناء الغرفه وسلمت على البنات وهي لابسه جلابيه وشايله بنتها رهف)..

ميريام: كيف حالك سناء..؟
"سناء وهي جالسه وتتلفت عالبنات": بخير أنتم تعرفوني..؟
ميريام: أنتي زوجة سلطان أخو درر..
سناء: صح أنا.. ما عرفتوني بأسمائكم..؟
"ميريام وهي تأشر على البنات وحده وحده": ميار.. سميه..سحايب..كنوده "تداركت نفسها" أأأقصد هنــادي وأنا ميريام..
"سناء بذهول وهي تأشر على كنوده": هذي لها أسمين! وش معناه أسم كنوده..؟
"أبتسمت ميريام": لا أسمها هنادي.. بس وهي صغيره أهلها يدلعونها (هنوده) ومع النطق الكثير صاروا يقولون لها(كنوده) وراح عليها الأسم هذا..
"سناء وهي عاقده حواجبها وتناظر كنوده": وأهلها يوم الله قدرهم ودلعوها ما خلوا أسمها على حاله بدل ما يقلبونه ويحرجونها قدام الـنـاس..!
"سكتت وهي مبتسمه ورجعت كملت": الحين بنتي ندلعها (رهوفه) ومع النطق الكثير نصير نناديها (رحوفه) ويروح عليها الأسم هذا ويتعلق فيها (قالتها وهي تضحك)...

"ألتفتوا البنات على كنوده يشوفون ردة فعلها وكانت كنوده تطالع سناء وهي معصبـــه.. وسحايب غمزت بعينها لكنوده وهمست لها": تكفين طنشيـها ولا تحطين عقلك بعقلها تراها بزر و......
"قاطعتها كنوده وهي تناظر سناء وتتكلم بصوت عالي": إنتي كم عمرك؟
سناء: عشريـــن سنه.. ليه تسألين؟
"كنوده بإستهزاء": عمرك عشرين بس؟ ومتزوجه وعندك طفله؟
سناء: نصيبــي أنا تزوجت وعمري 18 سنه.. خطبني سلطان و وافقوا أهلي وعجبني وعجبته وتزوجنا..
"إلتفتت ميار على سحايب وهي تلعب بشعرها تحطه على وجهها وتضحك على أسلوب سناء.. وسحايب حاطه يـدها على فمها وتكتم ضحكتها.."
"كنوده وهي تسترخي بجلستها": ويوم الله قدر أهلك وفرحوا فيك وزوجوك! ما أنتظروا ثلاث سنوات لما تكبرين وتصيرين حرمــه سنعه وناضجـه..!!!
"ميريام وهي تكح وتبتسم عشان تلطف الأجواء": كنوده تقصد إنك لو أنتظرتي بعد زواجك ثلاث سنوات أستانستي بحياتك بعدين فكرتي تجيبين أطفــال......
"تقاطعها كنوده وهي تتكلم بصوت حاد": ماجبت طاري الأطفال ياميريام لاتألفين كلام من عقلك_ أنا قصدي واضـــح..
"ألتفتت على سناء" إنتي أهلك بعقلهم لما زوجوك وإنتي بــزر؟
"شهقت سناء وهي فاتحه عيونها عالآخر وتأشر على نفسها": أنــا بـــزر؟
"سحايب وهي تضرب كنوده بكوعها وتصر على أسنانها": فضحتينـــا إنتي تغلطين عالحرمه في بيتها عيييييب عليك أسكتي ولا تفشلينا؟
"كنوده مسويه نفسها بريئه": هي اللي بدت بالغلط..
"قامت سناء وهي شايله بنتها ومعصبه": الشرهه مو عليك..الشرهه على درر اللي مصادقه بنت مثلك..!!!
"طلعت سناء ودخلت درر وهي مصدومه وتناظر البنات بذهول وهم يضحكون بشكل هستيري": وش جاب سناء عندكم..؟
كنوده: وين أخوك سلطان بالله عليك ناديه أبتفاهم معه؟
"درر وهي واقفه وحاطه يدينها على خصرها ومتضايقه": أكيد طلعت خبالها وسوالفها الغبيه عشان تفشلني وتحرجني قدامكم؟
كنوده: سناء كذا شخصيتها من تزوجها سلطان؟ وإلا تجيها حالات دفاشه مستعصيه؟
"ضحكت ميار وهي تصفق": حلوه هذي مستعصيه ..!!ههههههههههههههههههههههه
"درر وهي تجلس": ومن القراوه داخله عليكم بجلابيـه هذا بدل ما تكشخ لأنها أول مره تقابلكم؟..
سميه: يمكن دخلت الغرفه بالغلط وما تعرف إننا موجودين..
"درر بقهر": لأ تدري.. المفروض إنها تروح لأهلها اليوم وأنا قلت لسلطان إن صديقاتي راح يجوني وما أبيها تكون موجوده وهو متفهم لدفاشة زوجته!!!
"سحايب وهي تمسح دموعها من الضحك": مكياجي خرب من كثر الضحك..
"ميار وهي ماسكه دفتر الصراحه وتهوي على وجهها من الضحك": خلاص طنشيها من كل عقلك معصبه بسببها؟
ميريام: وينها لطيفه ماراح تجي..؟
درر: لأ تقول مافيه أحد يجيـبها وعطتني أخبار عرس علي بالتفصيل..
"ميريام بحماس": وش قالت لك عنه؟
درر: طلع الأخ عـلـي خاطب أحلى بنات عمه.. من جمالها ماينادونها إلا (السندريـــلا).. وأهله من سنـه تقريبآ حاجزينها له وهو مبسوط وعاجبه إختيار أهله والملكه الأسبوع الجاي.. وراح يبدأ يجهز شقته من اليوم وحدد موعد الزواج بأول الصيف...!!
ميريام: أوف أوف هذا مره مستعجل عالعرس.. وش سالفتـه؟
ميار: عشان ما تطير منه السندريـــلا!!!
سحايب: درر وش فيك تسولفين عن زواجه عادي وكأنك مو زعلانه.. إنتي مستوعبه أن علي طـــااااار خلاص وتزوج وحده غيرك..؟
"درر وهي تحاول تبتسم": ليه أزعل بالعكس راح أدور على غيره.. أنا قلت لكم من قبل عن وجهة نظري بمسألة الحب من طرف واحد..
سميه: وقصايدك فيه الكثيـره اللي دفتر الصراحه..؟
"درر وهي منزله راسها للأرض": عادي تظل ذكـرى حلوه أحتفـظ فيها..
ميار: والصدفه اللي صارت بالعرس؟ والكبكات حقته اللي لقيتيها بمجلس الرجال..؟
سحايب: والطاقيه واللفه حرف(A) اللي تلبسينها بأيام الإمتحانات؟ وأغانيك اللي تغنينها دايم وتذكرك فيه؟
سميه: معقوله كل هالذكريات هذي وما حزت بخاطرك باللحظه اللي سمعتي فيها إنه راح يتزوج..؟
ميار: بس الحلو بزواجه إننا راح نرتاح من أغنية درر المشهوره (ياعلــي صحت انا بالصوت الرفيع)...
ميريام: بنات وش فيكم مكبرين الموضوع.. قلب درر متعود على الصدمات.. أنتظروا أسبوع راح تنسى علي وتحصل لها على حب جديد وكالعاده من طرف واحد..

(رفعت درر رأسها وعيونها تدمع.. صرخوا البنات وألتموا حولها وهم يحاولون يسكتونها ويهدون من زعلها)..

سميه: تبكين عشانه ياغبيه والله إنه ما يستاهل دموعك..
سحايب: خلاص يادرر_ هذا وهو مادرى عنك تسوين بحالك كذا كيف لو كان خطيبك وفسختوا الخطبه..!!
كنوده: الظاهر إن خبال سناء أثر على عقلك.. تبكين عشان رجـــال؟
ميار: بكره أجي وأبكي على صدرك وأقولك لزيز طـــار مني.. ونقعد نبكي أنا وإنتي سوا على حبنا الفاشـــل..
"درر وهي تناظرهم من بين الدموع": أنا ما أبكي عليه راح ألاقي غيره_أنا أبكي على حظي المايل ليه لما أحب واحد يتزوج ويتركني..!!
"ميار وهي تحط يدها على كتف درر": وش تسوين عاد هذا حظك وإحنا مو أحسن منك..
"ميريام وهي تمسك خدود درر": فكي هالضيقه خلاص إيـــزي.. إحنا جايين نحتفل مو عشان نبكي ونحزن..؟

(قامت ميريام وشغلت المسجل على أغنية(قوه قوه) لماجد المهندس_ وقاموا سحايب وكنوده يرقصون ودرر تمسح دموعها وتصفق وميريام تصفر لهم وميار واقفه وتلفح بشعرها.. كانت الأجواء روعه واللي خلاها أروع لما جلست سحايب تغني أغنية محمد عبده(مهما يقولون) وكان صوتها يجنن والشله يرددون معها الأغنيه"...

*[مهمـا يقـولـون مهمــا صار مهمــا تـــم..
أنت البدايــات وآخر ساحل ومينــا..
في هـرجـة النـاس للعـذال لاتهتـم..
لـو هــم يحسـون فينا ماحكو فينـا..
منا الوفــا ياوفــي الــروح يتعـلـم..
وكل التعابيـر تبحـر من شواطينـــا..
أهـــواااااك ماهــي مواويــل بها أترنــم..
ترى المواويــل هي اللي تبكيــنـا..
حبيب عمري حياة القلــب خــل الهــم..
تقســى الليالي ولـكــن ماتقسينــا..
وأن كان جدد جدايد حبنــا أقـدم.. ولاعــاش راس على الدنيـا يبكينـــاااااا..]*
"سميه وهي تصفق": وااااو رووووعــــــه...
"درر وهي مبتسمه": آآآآهـ ياسحايب ذكرتيني بأغانينا أنا وطفطف بالإجازه..
ميار: إنتي ما عندك إلا أغنيه واحده (ياعلـــي)..
درر: لأ أغنيتي هذي ماأغنيها بالبر لأن طفطف تعصب علي..
ميار: حتى لطيفه طفشت من أغنيتك..
"ضحكت درر": أتذكر بالبر كنا قاعدين أنا وطفطف وأسماء,, وشابين النار برا مخيمنا وأخذنا نص مواعين المطبخ عشان نغني ونطبل عليها..
وكان وقتها الماطور حق المخيم اللي بجنبنا طافـي خربان وهذولا الناس يقربون لنا مره و أغـنـيـــاء..
ميريام: أغنياء ويخيمون ليه؟ هذا بدل ما يسافرون برا وإلا ياخذون شاليه..
درر: هم بــدو وبحياتهم ماطلعوا من الرياض.. المهم إحنا قاعدين من جهة هذا المخيم سوالف وضحك ووقتها كانوا اللي بالمخيم محتاسين لأن عندهم عشاء والماطور حقهم طافي(مشكلـه).. وكل شوي تمر من جنبنا سياره كشخه إلا هـمـر إلا ‏BMW‏ إلا لكــزس.. وحنا فاتحات عيوننا عالآخر,, بغض النظر عن فخامة السيارات كانوا الشباب اللي فيها حلويييييين تحسون جمالهم على قد فلوسهم (قالتها وهي تضحك)..
"ميار بحمــاس": صارت أكشنات؟؟
"درر وهي تآخذ نفس عميق وتتنهد": آآآه أنا وطفطف متنــا على السيارات!! وكل ما شفنا سياره نقعد نصاااارخ.. طفطف من الحماس فتحت شعرها وترقص وأنا أغني لها وأسوم خربتها وقعدت تطبل.. إذا قربت لنا سياره سكتنا وإذا راحت كملنـا..
"كنوده وهي مستانسه": تدرين لو إني معكم ألحق السياره وأتعلق فيها!!
"أنفجروا البنات بالضحك.. وكملت كنوده وهي تضحك": عاد أنا لما أشوف شباب حلوين تضيع علومــي.. أقول درر وين بيتهم أبروح أخطب لنفسي منهم,, وإلا أقولك أروح أخطب لك إنتي بدل علي اللي تزوج وخلاك..
"ضحكت درر": هههههههههههههههههه طفطف حيل أعجبوها ولما رجعنا للبيت ضاق خلقها وكان ودها إن الكشته تطول شوي عشان تضبط حالها عند أهلهم.. وأنا من غبائي كنت وقتها غاضه البصر على بالي أحترام ووفاء لـ<علي>...

(دخلت الخدامه للغرفه وقالت لدرر إن فيه رجال برا ينتظر أخته)..

ميار: أكيد أخوي فيصل..
"درر وهي طالعه": أنتظري أبي أنادي أخوي راكان وأسأله عن السياره..
"ألتفتت كنوده على سحايب": يمكن ياسر جاء ياخذنا قومي بسرعه آخاف يعصب ويمشي ويخلينا..
سحايب: لأ ياسر ماراح يجي يآخذنا إلا عالساعه 12..
كنوده: لما جابنا كان كاشخ ومتعطر وين بيروح؟
سحايب: بندر عازمه على العشاء بمطعم هو وأخوك فواز..
كنوده: الشاعر بندر شخصيآ عازم فواز أخوي؟ ياااااي يابختهم بيجلسون مع الشاعر على طاوله وحده..
سحايب: والله إنك ماخذه مقلب بالشاعر بندر تراه بالتلفزيون شي وبالواقع شي ثاني..
"درر وهي داخله الغرفه": مـيــار أخوك اللي ينتظرك برا..
"ميار وهي قايمه تلبس عباتها": بنـــات أستانسوا عني ok‏ والله كان ودي أطول بالسهره معكم بس مو بيدي..
ميريام: ماعليه ميور نجتمع بيوم ثاني وتعوضين عن هذا اليوم..

"سلمت ميار عالبنات وطلعت بسرعه عشان تلحق على أخوها فيصل.. وجلسوا البنات يكملون سوالفهم وضحكهم"


€..€..€..€..€..€..€..€..€..€..€..€

وفـــي الــسـوق كانوا لجين وراويه يجهزون للملكة واللي تحددت الأسبوع الجاي..

راويه: الحين إنتي أشتريتي الفستان وش ناقصك بعد؟
لجين: باقي الجزمه وأبي أشتري أكسسوارات للشعر.. بعدين تعالي خلينا ندخل المحل هذا عشان أشتري لك فستان وإلا نسيتي نفسك..؟
راويه: لأ أنا مابي أشتري راح ألبس بدله ناعمه أحسن..
لجين: راويه حبيبتي مايصير كذا إنتي لازم يطلع شكلك حلو بالحفله أقل شي قدام عمامي وخوالي وإلا تبينهم ينقدون عليك؟
راويه: مايهمني رأيهم فيني وبعدين أنا ثانويه عامه ومو متحمله الثوب اللي علي عشان أتحمل تفاهات الناس..
لجين: راويه وش فيك؟ شكلك متضايقه ومو طايقه أحد.. على فكره أنا ملاحظه عليك من أمس وإنتي متملله حتى قدام الناس اللي بيخطبون مانتي قادره تخفين ضيقتك والسبب الدراسه..؟
راويه: ...........
لجين: قلت لك اليوم روحي لصديقاتك وأستانسي معهم ورفضتي عشان ما تنشغلين عن الدراسه..
راويه: ...........
لجين: المشكله إنك عنيده وبصعوبه تقتنعين.. الحين خلينا نتسوق وبس نرجع للبيت نتفاهم,, أبشوف وش آخرتها مع دراستك..


§,,§,,§,,§,,§,,§,,§,,§,,§,,§,,§,,


رجعوا سحايب وكنوده من بيت درر مع ياسر وفواز بالسياره.. ولما نزلوا فواز عطى كنوده مفتاح البيت عشان ترجع لأن أمه وأخوانه ناموا ببيت خالـــه وما بقى غير كنوده بالبيت,, وجلس فواز عند ياسر بالديوانيـــه يلعبون (بلاي ستيشن)....
دخلت سحايب غرفتها ولما بدلت ملابسها راحت للصاله عشان تجلس عالــTV وسمعت صوت كنوده تناديها من الشباك بصوت عـــااااااالـــــــــي...

"سحايب بخاطرها": الله يهديك ياكنوه تدرين إن اللي في البيت نايمين ليه الإزعاج؟ بس عناد فيك ماراح أرد..

"علا صوت كنوده وصارت تنادي ياسر وفواز وتصارخ بشكل هستيــــــري..
سحايب إنشغل بالها وراحت للشباك_فتحت فمها بتنادي كنوده لكنها أنصدمت لما سمعت كنوده تقول; حــــــراااااااااامــــــي!!!!!

راحت سحايب تركض للديوانيه.. فتحت الباب بقوه وهي خايفه لقت ياسر جالس بجنب الـTV‏ يعدل الأسلاك..!!
سحايب: ألحق على كنوده تقول.......
"يقاطعها ياسر بإنفعال": أنقلعي داااااخـــل فواز بدورة المياه روحي قبل مايجي...
"تكلمت سحايب بصوت أشبه بالصراخ": أقولك كنوده في بيتهم حـــراااااااامـــــي.. حـــرااااااامــــــي روح ألحق عليها إنت وفواز..

"فواز كان واقف عند الباب وسمع كلام سحايب وراح يركض لباب الشارع وهو ينادي ياسر..
فــز ياسر من مكانه ولحق فواز... ثواني ورجع وهو ماسك عصا خشب طويله وعريضه..
دخل البيت وفتح باب السيب اللي تحت الدرج وصعد على الطوفه بيلحق بفواز اللي صعد على الطوفه من جهه ثانيه بالبيت عشان يحاصرون الحرامي بدون مايحس فيهم.. فتشوا بكل البيت عن الحرامي بس مالقوا إلا (جزمه) بجنب البراد الخربان اللي بآخر الحوش وباين إن الحرامي دخل البيت وطلع عن طريق البراد...

ياسر: ليــه ماتخلون لمبات الحوش شغاله على طول حتى لو البيت مافيه أحد..؟
فواز: ماأدري بس أكيد أمي هي اللي طفت اللمبات قبل تطلع وإنت تدري إن زوجة أبوي عند أهلها والبيت فاضي لكـــن ما حسبنا حساب لهالشيء إنه بيصير..
ياسر: المفروض ما تترك أختك لحالها بالبيت وإنت تدري إنها مريضه_ روح شوفها لا يكون صارلها شي..
فواز: صحيح ذكرتني بكنوده أبروح داخل أشوفها..

"دخل فواز البيت ونادى كنوده وفتح كل الغرف وهو يناديها ولا لقاها.. بالأخير فتح باب الحمام لقاه مقفل وعرف إنها داخلــه.. ضرب الباب وحاول يفتحه لكنه عجز.. خــاف عليها وصار يضرب الباب بقوه وهو يناديها ما ردت ولا فتحت.. جن جنونه وصار يضرب الباب بجسمه يحاول يفتحه وعجز.. سمع قفل الباب يفتح وتم يناظر ويترقب وهو متوتر.. فتحت كنوده وهي بحالــه يرثــى لها من التعب طاحت عالأرض وأغمـــى عليها"...........


*''*"*''*"*''*"*''*"*"*"*"*"*"*

يـــوم الجـمـعـه...
(1/2)


فـــي الصبـــاح..
كانت أم يزيد تكلم أختها أم ميــار.. ولما خلصت من المكالمه جلست مع عيالها بالصاله وهم من عاداتهم يجتمعون بعد صلاة الجمعه..

مرام: يمه شخبار خالتي وميار..
أم يزيد: بخير وتسلم عليكم ..
"يزيد وهو ماسك فنجان القهوه": والله أشتقت للقعده مع خالتي _شكلي راح أسافر للرياض عن قريب,,منها أشوف خالتي ومنها أقعد مع أصدقائي وأنبسط معهم..
"أم يزيد وهي تتكلم بجديه": ومنها تتعود على أهل الرياض وتآخذ عليهم لأن عروستك راح تكون من بنات الرياض..
"رفع يزيد حاجبه بتعجب وكملت أم يزيد": أنا نويت أخطب لك وحده من بنات خوالك..
"نطق يزيد بثقل": قصدك عذاري؟
أم يزيد: لأ.. قصدي مـيــار!!!!
"عدل يزيد جلسته وهو فاتح عيونه عالآخر": اييييييش ميااااااااااار..!!!!
أم يزيد: وش فيك أخترعت أنا قلت شي غلط..؟
"يزيد وهو مازال مستغرب": لأ.. بس إنتي قلتي مياااااار..

(مرام ولولوه وبدر فتحوا أفواههم وتفاجأوا مثل يزيد وظلوا يتابعون النقاش)..

أم يزيد: إيييييييه مياااااااار بنت حلوه وعاقله ومتربيه أحسن تربيه وفوق هذا بنت خالتك.......
"يقاطعها يزيد بإستياء": بسسسسس صغييييييره!!!!
أم يزيد: الحين 18سنه صغيره! بالعكس عمرها زين للزواج..
"يزيد بشك": يمه مو كأنك قلبتي الموضوع جـــد..
"أم يزيد بإنفعال": ليه شايفني أمزح؟ اللي يسمعك يقول كل سوالفي مزح بمزح استح على وجهك أنا أمك..
"قام يزيد بسرعه وحب راسها وجلس بجنبها على ركبه": محشومه يالغاليه والله ماكنت أقصد كذا بس أنا بصراحه متفاجئ آخر بنت توقعتك تكلميني عنها ميار بنت خالتي...
أم يزيد: لأني من زمان ماشفتها وجلست معها بس بزيارتها الأخيره لنا شفت إنها كثير تناسبك.. واسأل خواتك إذا تبي تعرف شي عنها وأسأل صديقتها عذاري بنت خالك طلال هي أقرب وحده لها..
مرام: ميار تجنن خجوله وهاديه وحساسه ورقيقه..
"يزيد وهو عاقد حواجبه": بس إنتي خلاص لاتحكين عن البنت ترى مايصلح..
أم يزيد: يزيد وش فيك؟ خل أختك تكلمك عن عروستك..
"سكت يزيد وصد عن مرام وهو متضايق"..
لولوه: أحس ميار مهما تمزح وتضحك وتلعب وتفرح تظل بعيونها لمعة حزن فضيييييييعه.. يظل خاطرها مكسور وكأن حياتها ناقصها شي وتكتمل..
"صفر بدر بصوت عااااااالي": أحلـــى ياعلم النفس حركااااااات من محفظك هذا الكلام..؟
"طنشته لولوه وهي تناظر أمها": عذاري دايم تقول لنا كذا وفعلآ إحنا حاسين بمشاعرها ونراقب حركاتها من أول يوم لوصولها للشرقيه..
مرام: أنفصال أبوها وأمها أثر على نفسيتها كثير وشي طبيعي إنها تكون شخصيتها كذا..
بدر: هييييه أنتم صرتوا محللات نفسيات!!
"لولوه وهي تكمل": لأ وفوق هذا أبوها حكر مره ولا يهتم فيها بس الحلو إن أخوانها كثير طيبين معها..
أم يزيد: بس أخوها صلاح اللي طيب معها وإلا الثاني فيصلوه لأ_أختي صيته دايم تشتكي منه تقول يزعل ميار ويخانقها بدون سبب..
لولوه: الظاهر يغار منها لأن أعمارهم قريبه لبعض..
"بدر بإستهزاء": ماشاءالله أمداكي تستنتجين الأسباب لأ وغيره بعد يعني شلون؟ وده يصير بنت زيها..؟
"لولوه بملل": وععععع أسكت بس,, قل خيرآ أو أصمت..
بدر: يعني أخو يخانق أخته صارت غيره بفهمك يامحللة علم النفس؟

"أشرت مرام ليزيد على لولوه وبدر بس يزيد كان ســـارح ومو منتبه يفكر بكلام خواته وحس إن كل كلمه عنها أثرت فيه وتعاطف معها كثيييييير وتذكر حساسيتها وتأثرها بأي كلمه وموقف يصير لها (لما تعثرت قدامه عالدرج وطاحت عالأرض ماشافها ولا سمع حسها بعد هذا الموقف لما كان بالرياض- ولما بكت في المطعم لسبب عادي لأنها أشتاقت لصديقاتها- وسكوتها وهدوئها وخجلها بحضرتــه) تذكر كل شي إلا..... العصفــــــور ....!!!
قام عشان يزور واحد من أصدقائه ولما ركب سيارته فتح جواله وأرسل مسج لــــــ ... خالتــه.."


§+§+§+§+§+§+§+§+§+§+§+§+§+


[طرالي قلبك الغالـــي..
طرالي ياعساك بخيـــر..
طريت وقلت ابسال عنك واشوف الغالي واخبـــاره..
كتبت الحرف بأحساسي
لأنك في خفوقي غيــر..
عساك بخير ومستانس
وفالك بالسعد زادي]..

"ميار وهي تمسك الجوال بقهر وتتحلطم": أوووووووف كأنه شـــايب حتى رسايل زي الناس مايعرف يرسل "وهي تقرأ بإستهزاء" فالك بالسعد زادي...
"سكتت ثواني وهي تتنهد" آسفـــه حبيبـــي قسيت عليك بتفكيري بس لا تلومني أنا ودي يكون ذوقك أحلى من كذا بالمسجات؟ أووووه أنا وش قاعده أخربط.. إذا هو مادرى عن هوى داري شي طبيعي ما يرسل لأمي (أحبك وأموت فيك) أحس فشيله.... صح فشيله بس أتوقع إذا صار يحبني بيكون شعوره تجاهي بالمسجات غييييير..
أأأأي مسجات؟ أنا مابي أقرأ إلا كلمه واحده هي اللي أنتظرها سنيـــن ومابي غيرها..

"رمت ميار الجوال عالطاوله وقامت لقفص العصافير وهي مبتسمه وتغني........ (أنا مابدي تألي كلام,., يدوب ألبي حنين وغـــرام,., بيكفيني.. ألي بحبـــك.. هيدي الكلمه بتأتلني...)

دخلت أم ميار الصاله وطلبت من ميار تجيب المكنسه الكهربائيه من بيت أخوها صلاح لأن مكنستهم خربانه..

"ميار وهي طالعه": يمه ترى لزيز أرسل لك رساله بالجوال..
أم ميار: مييييين؟
"وقفت ميار وألتفتت على أمها وهي تكتم ضحكتها": يزيد ولد خالتي..
أم ميار: ياحليله يزيد والله إني أعز هالأنسان وأشتاق لشوفته والقعده معك..
"ميار بخاطرها": مو أكثر منـــي!!!
أم ميار: يالله بنتي روحي جيبي المكنسه وأقري لي رسالة يزيد...


¥-¥-¥-¥-¥-¥-¥-¥-¥-¥-¥-¥-¥-¥


وفـــي المستشفى وتحديدآ في الجناح الموجود فيه كنوده كانت سحايب شايله صينية الحــلا وواقفه تتلفت وتناظر تحت الستاير تدور على سرير كنوده.. طاحت عينها على الكعب اللي كانت لابسته كنوده لما زارت بيت درر وعرفت إن هذا سريرها.. فتحت سحايب الستاره ودخلت لقت كنوده منسدحه وسرحانه تناظر السقف..

"سحايب وهي تحط الحلا عالطاوله": سلامـــات كنوده..
"قامت كنوده وحضنت سحايب وهي مستانسه": الله يسلمك ياحياتي وش هالمفاجأه الحلوه..
"سحايب وهي تجلس عالسرير بجنب كنوده": خوفتيني عليك ما صدقت خبر متى يطلع الصبح وأجي عندك خوفني ياسر لما قال أسعفناها أنا وفواز يماااااه جن جنوني..
"كنوده وهي تكتم ضحكتها": ياسر هو اللي جابك هنا..؟
سحايب: إيه وقالي نص ساعه ويرجع ياخذني...
"أنفجرت كنوده بالضحك وتحاول تسكت وتخفض صوتها بس عجزت لدرجه إن اللي في الجناح سكتوا فجأه لما سمعوا ضحكها"..

"سحايب وهي تحط يدها على فم كنوده": أصصصصص فضحكتينا يامجنونه أسكتي..
"مسكت كنوده المخده وحطتها على وجهها وهي مازالت تضحك.. سحبت سحايب المخده وهي معصبه": أبعرف وش يضحكك علمينـــي؟
"كنوده وهي تمسح دموعها من الضحك": فواز وياســـر..
"سحايب بفضول": وش فيهم ليه تضحكين عليهم..؟
كنوده: اليوم الصبح جاء فواز يزورني ومعه ياسر.. ووقفوا عند (الرسبشن) يسألون عن رقم الجناح اللي أنا فيه.. قال فواز للفلبينيه; لو سمحتي هنادي عوض وين..؟ وياسر واقف بجنبه وكاشخ ومشخص وماسك السبحه بسم الله عليه..
"سحايب بنفاذ صبر": إييييه وبعدين..؟
"كنوده وهي تحاول تمنع الضحكه": قالت له الفلبينيه; أنـــادي(هنادي) مـااااااااااا......تــت...
فواز ما أستوعب ورجع يسمعها الأسم عدل;هنادي عوض.. قالت له الفلبينيه بتأكيد; ماااااااتت..!! (بس ماقالت له أنادي عشان مايغلطها).. ياخبثها هالفلبينيه ما قالت لهم بأســـى وحزن عشان يستوعبون هالأغبياء.. فواز أنصـــدم ووجهه قام يوزع ألوان وهو يقول لياسر: أختي مــاتت.. وياسر حط السبحه بجيبته وسحب يد فواز وقاله; تعال تعال معي بسرعه خلنا ندور بالثلاجات..!!
"ضحكت سحايب وهي تصفق وتعلق على ياسر": هههههههههههههه أهب ياخوي مستعجل على موتك..
"كملت كنوده وهي تضحك": عصب فواز ومد يده وسحب الدفتر وهو يدور الأسم بس ما فهم شي كله إنجليزي.. صرخ بوجه الفلبينيه وقعد يشتمها ويسبها (يعني متأثر بوفاة أختي) لما جاء ممرض سعودي وفهموه القصه وهو قام ودلهم عالجناح.. طلع تشابه أسماء بين أسمي وأسم وحده ثانيه ههههههههههههههههههههههههه
سحايب: أما شو تحفه ياسر وفواز يصلحون لطاش ماطاش يمثلون دور عليان وسعيدان..
"كنوده وهي مبتسمه وتأشر بيدها": لألأ يصلحون باتمان على بطولتهم أمس!!
سحايب: صدق ما قلتي لي وش قصة الحرامي اللي دخل بيتكم؟
"كنوده وهي تستهبل": مثل أي حرامي يدخل بيت فاضي مافيه أحد..
سحايب: جد كنوده كيف عرفتي إن البيت فيه حرامي سمعتي طق وإلا صوت وإلا شفتيه؟
كنوده: لو شايفته كان مالقيتيني قدامك عايشه ومامت!! والله أنجلط وأموت لو شفت ظله..بس الحمدلله ولا حتى لمحته..
سحايب: اجل كيف؟
كنوده: دخلت البيت وشغلت لمبة الصاله ودخلت المطبخ عشان أشرب ماء.. شوي سمعت صوت عند (شباك المطبخ) وطنشت قلت أكيد شي طاح عالشباك.. عطيت وجهي للباب أبطلع وإلااااااا أسمع صوت الشباك(ينفتح ببـــطء)..أنا على طوووووول دخلت الحمام وأنادي وأصارخ وأصيح..وأكيد إنه بعد ما سمع صراخي هرب..
سحايب: طيب ليه مادخلتي الغرفه وأتصلتي عشان يلحقون يمسكونه ياسر وفواز..
كنوده: لا ياحبيبتي عشان يقعد يفتح شباك اي غرفه أدخلها وقلت الحمام أضمن لي لأن شباكه مرتفع وينفتح من فوق ..
"سحايب وهي سرحانه وتفكر": يمكن يكون ضابط مباحث يدور على أبوك....???
كنوده: بسم الله على فهمك والله ما أخبر تحركات المباحث غبيه لهالدرجه مثل تفكيرك ينططون على البيوت بالليل يدورون عالمجرم.. بعدين ياشااااااطره شوفيهم حولك في الشارع وإنتي داخله وطالعه من البيت..؟
سحايب: ما أنتبهت لشي غريب حول بيتنا؟
كنوده: ولا سمعتي؟
"سحايب بتعجب": أسمع إيش.. قصدك صوت الدوريه..؟
"ضربت كنوده يدها براسها": لأ ياخبلــه.. قصدي عـــن تحركات المباحث..!!!!
"سحايب وهي تطيح بحضن كنوده": تكفيييييييين علميني شلون؟
"كنوده بهمس": أبوك وياسر ما يشتكون من شاب طايش يركب سياره سوداء وشكله مره رايح فيها حايس ويوميـــآ يفحط بالحاره حولنا وحوالينا..؟
سحايب: ماقد سمعتهم...
كنوده: ولا أستغربوا من كثرة مساحين السيارات اللي نصبح عليهم....؟وعمال النظافه....؟ وسيارة الآيسكريم اللي صار ما ينقطع حضورها مع أختفاء أبوي وأكثر من يشتري منها فايز وتهاني....؟ وكل هذا قدام بيتنا.. وش تفسيره..؟
سحايب: إنتي فتحتي عيوني وأذاني على آشياء ماكنت منتبه لها..
كنود: أستغفر الله العظيم فتـنـت على أبوي ياربي لاتعاقبني..
"سحايب بشك": يمكن يكون أبــــــوك هو الحرامــي...؟ وإلا ليه المباحث تراقب بيتكم أكيد عشان يمسكون أبوك لو رجع للبيت..
"سكتت ثواني وهي تتذكر" أمس ياسر وفواز لقوا جزمه طايحه بنجب البراد الخربان اللي حاطينه أهلك بآخر الحوش.. يمكن تكون جزمة أبوك؟ لو شفتيها راح تعرفيها...؟
"كنوده وهي تكتم ضحكتها": أنا ما أشوف وجه أبوي عشان أعرف شكل جزمته.. وبعدين لو عرفت إنها له لازم يجي ونقيسها على رجله زي (سندريلا) إذا هي مقاسه معناها هو الحرامي هههههههههههههههههههههههههههههههههههههههههههه
سحايب: يابييييييخك.. إلا بسألك متى راح تطلعين؟
كنوده: يمكن بالليل الساعه عشره..
"سحايب وهي تناظرها بنص عين": الساعه عشره وإلا ثمانيه وساعتين زياده مع مصعـــب؟؟؟
كنوده: لأ هالمره صدق الساعه عشر وفواز بياخذني وأصلآ مصعب معتكف بمكه..
"سحايب وهي ترفع حاجبها بإستهزاء": مممممم كويس معتكف يتعبد لربه.. ووووبس يرجع يتطمن على زوجته وعياله بعدين يرجع يتطمن عليك ياحبيبة قلبه صح..!!

"تضايقت كنوده من أسلوب سحايب بس ماتدري وش ترد وتقول لأن سحايب معها حــق في تناقض شخصيته وأخلاقه وبنفس الوقت تعودت على موال النصائح والتحذيرات من سحايب بس مع ذلك مهي قادره تمنع نفسها عنه لكن بحدود المكالمات والسياره بس لااااااا غيـــر"...


>>>>>>>>>>>><<<<<<<<<<<<<<<