صباح الخير .....تسلم ايدك ميشو على البارت الحلو والاحداث الحلوة بس ماكشفتي لنا شي من صندوق الاسرار وخصوصا سر سند والظبي ليش الكل متكتم عليه لهالدرجة يفشل لدرجة انو حتى شيبانهم مايعرفون انو في وحدة اسمها الظبي تقرب لهم ننتظر ونشوف هالسر الي خلى الظبي تحقد على الفارس لدرجة حتى حفيدتها شربتها الحقد والقلب الاسود على عيلتها واهلها الي من دمها

لطاموه وطارق وبتال والعنود

لطاموه الي سواه من تصرفات الحين اكيد شي وقح مثله ومع ذلك جاي الحين ومتحدي كل رجال العيلة ويناظر بكل قوة لاخوان العنود كأنهم هم الي غلطو في الماضي مو هو وماهمه لو الكل عرف سواياه بس شراح يستفيد من هالشي لابيقدر يتزوج العنود ولا يحلم احد بيوقف معاه الا اذا ناوي على شر وجاي ينفذه جيته وملاحقه للعنود مو من فراغ وبعدين هي فترة والكل بيرجع بيته ويمكن العنود ماترجع للمزرعة ابد ماادري شالي يدور براسه

اما طارق غلطان ومليون بالمية البنت مو نصيبه ليش يحطها براسه حتى لو ابوها مايبغيها لاحد من عيال اخوه الزواج قسمة ونصيب وبعدين سؤال العنود كم عمر ها الحين الا طارق خاطبها قبل ثمان سنين شهالعنود الي ماخلت احد الا طيحته شكلها ماكانت تجلس ببيتهم ابد ماظل واحد الا شافها وحط عينه عليها من يومها بزر لطاموه وعبيد تحرشو فيها وحطوها ببالهم وطويرق وبتال

ترى الجمال الخارجي مو سر السعادة الزوجية ولا بيجيب الاستقرار وحدة مثل العنود ماتنفع تكون لازوجة ولا ام حتى لانها وحدة مغرورة ماعندها احترام ولا تقدير لاي رجال من ابتدت الرواية تستفز الكل اذا ماصاؤرو خرفان تحت طوعها هذا نايف ماحد ضيع عمره وطفولته الا هي بسبب حقدها وتفكيرها وغرورها


وبعدين الي يلوم بتال لحاله ليش منعمين عن العنود الي تتحمل نص المسؤلية بالطلاق ماشفنا منها ولا شي يدل على مبادرتها للحفاظ على بيتها وزوجها هي كانت عارفة ليش بتال اخذ عنها فكرة مو زينة لو ماعرفت بسوايا مناروه الخسيسة بنعذرها مثل ماعذرناها بسلافة سمر لكنها عارفة وتعمدت تسكت
وحتى علاقتها بمتعب اذا اخوانها مايعرفون كيف بولد عمها الي ماتربى معاهم ولا يعرف عنهم شي ليش يعلم الغيب ولا حاط له جواسيس يعني بالعقل ليش ماتنظر لاغلاطها الي متى بتظل تجني على غيرها وتحط اللوم عليهم حتى عيالها ماراح يكونو احسن من اخوانها اهم شي الي براسها هو الي يمشي

الحين هي اختارت كبريائها على سعادة وراحة عيالها تبغيهم يتربو مثلها تماما بس هي الظبي كانت عندها تحشي راسها عيالها من لهم مافكرت بالنقص الي بتعيشهم فيه وابوها عايش على الدنيا مايستحقون منها التضحية علشانهم مااكتفت ولا تعلمت من بعد راكان ولومه لاهمال ا هله له مو بعده بسبب هالشي ليش ماحطت ببالها انو عيالها بمجرد يوصلو سن معين بيعيفوها وبيلوموها على انانيتها

مثل مابتال غلط وتسرع بالحكم عليها هي بعد ماحركت ساكن علشان توضح الامور ولا تبغي اصلا تعيش تحت جناح رجال يمنعها من الدجة والروحة على كيفها تبغي تقعد على حالها والرجال تلاحقها وشكل الوضع عاجبها

على الاقل بتال اعترف بغلطته وندم ويحاول يصلح غلطه لكن العنود ماشفناها حتى بينها وبين نفسها ندم او حزنت على حال عيالها مرة عندها ومرة عند ابوهم مو بس راكان الي عانى من بعد اهله وانشغالهم عنه حتى زياد وين كانو امه وابوه عنه في الوقت الي الابو كان مفرغ نفسه للعنود وحاط اسراره عندها لو فعلا سطام كان عادل بين عياله كان احتواهم وسمع شكواهم وقربهم منه مو هو والظبي ناسو الكل وتفرغو للعنود وفوق هذا الاخت جاية تلوم اخوانها ترى الدنيا دواره بكرة عيالها بيكون لهم نفس الموقف وهي بيظل غرورها مايسمح لها تبرر لاحد واصلا ماعندها مبررات والضحية عيالها

وبعدين بأي وجه حق تدخل الاسطبل وتاخذ الكاسر منه بدون اذن ولا سؤال شهالوقاحة الي فيها وتتهم بتال انو يتحرش فيها والله الرجال شاريه مو سارقة من عندها علشان تقول فرسها ماعاد لها ولا تملكه تروح تتفاهم مع جدها سعد مو تسرجه وتركبه ونلوم بتال الي مايدري انو بيوم كان لها وكان فعل ماضي الرجال هدفه واضح وشريف واذا تبغي الستر ترجع له وتقطع عنها ملاحق الرجاجيل لها

هي مو طفلة صغيرة الى متى بتعيش بدون زوج يعني راكان تزوج واذا تعدلت الاحوال بيعيش حياته وزياد ونايف بيلحقوه وسارة بيجيها نصيبها وهي وعيالها مين لهم بتظل رامية حملها على نايف ومتعب وغيره اذا هي قادرة على عيالها وهم صغار اذا كبرو بتزيد احتياجاتهم والابو مامنه غنى وزوج الام مهما كان طيب مايغني عن الابو الحقيقي

يعني لو طارق رجع اهان نفسه وماشال العنود من راسه حتى وهي متزوجه غيره هو الي جايب الهم لنفسه يتزوج ويخاف ربه ويعيش حياته ربي ماكتبها له ولو قطع عمره وربي ماكتبها له مابياخذها فكيف وعندها طفلين حرام يعيشو مشتتين

بتال مو صايع ولا هو داشر ولا سكير علشان ترفض انها ترجع له اذا على الغيرة كل الرجال حتى اخوانها حتى طارق نفسه بيغار لو بيوم تزوجها وزارت اهلها وشاف بتال الي كان زوجها وابو عيالها يسلم عليها الي مايغار ماهو رجال ولا يستحق هالاسم
واذا على جرأة بتال وملاحقه للعنود هو اهون من غيره كل عيال وبنات العيلة لهم حركات من هالنوع نوالوه مو سعت لسعود وحلفت الا تجيب راسه وتخليه يتزوجها وشجونو وغيرهم

الشي الي لفتني مين الي سطام كان حاطه براسه للعنود هل هو سند لو كان هو فامن الاول ماكان له امل لانو سند اختار وحدة ماتستاهله وماادري على ايش حبها ومافيها شي مميز الا هي اقل من غيرها بكل شي والعنود تدري انو ابوها يبغي لها واحد من عيال عمها وتدري مين هو لذلك عايفة بتال من الاول ومابادرت تحافظ على بيتها

انا اقول رجوع العنود لبتال لصالحها ولصالح هالطفلين استر لها ولسمعتها ومافي انسان خالي من العيوب وهي نفسها عيوبها اكثر من غيرها لاتعتقد تعلق الرجال وملاحقهم لها لانها مميزة عن غيرها ولا انها احسن من غيرها

مااستبعد عليك ياميشو تذبحي بتال علشان يتزوجها طارق في النهاية تخلي لطاموه يذبحه وبكذا تبعدي الاثنين عنها انا اشوف زواج طارق منها ظلم لانها ماتستاهله هو ماتزوج وهي عندها عيال اثنين وغير كذا مااعتقد اهلهم بيرضو يتربو عيالهم بعيد عنهم وبترجع مأساتها هي تكررها مع عيالها وبتحشي راسهم انو اهلهم مايحبوهم وماسألو عنهم وبتربي الظبي الصغيرة على نفس اطباعها الكريهة


متعبوه

وهذا الغبي جاي بضيافة الناس وماخذ راحته ويتويقح مهما كان المكان مكان بتال والفرس لبتال عيب عليه الي قاعد يسويه والله طاح من عيني واحد بمنصبه ومهنته المفروض يكون راكد وله هيبة مو يتصرف بغباء وقلة احترام لاصحاب المكان الي جاي عندهم مافرق عن لطاموه بشي ماخذ راحته بمزرعة الناس الي فيها بناتهم ومحارمهم اذا هالشي عنده عادي بعيلته غيره مو مثله ........وانا اشوف بتال احسن منه يعني مافي وجه مقارنة يغتر ويرفع خشمه


شجونوه وياسر

نهاية اثنين ان شاء الله زواج اجباري وطرد من العيلة وبدون عرس بيكونو منبوذين اما شجونوه بتتزوج واحد عايفها بعد ماشبع منها ومن خويتها الي مليون بالمية ماتقربت منها الا هدفها ياسر اما سميوه لو تموت هي وياسر مازوجوهم العيلة ولا قبلو فيها يعني كل الي سوته ان شاء الله بيرجع بشكوى لاهلها عنها ونهايتها الزواج من شايب يحبسها ببيته عقاب لكل داشرة مثلها برايي افضل عقاب للثلاثة مايصير يتعاقب واحد واثنين يتزوجو ويطلعو منها يمكن يكونو عبرة لامثالهم


سمروه وغرام

غرام نضج عقلها عن قبل وصار عناد مايناسبها اتمنى من اهل طارق يخطبوها له وعناد لو قال يبغيها وفكر يسوي حركة سعودوه تطلع ماتطابق التحاليل غير رفض غرام له وسند بيوقف معاها والجد ماله حق يتدخل

اما سمروه ماينفع معاها الا هالطريقة الكل يعطيها بوجهها لانها مو راضية تترك انانيتها ودلعها وتحس بالمسؤلية لو شوي راكان في ايش وهي مو مقدرة يعني لو ظروفه عدلة بيهملها تنتظر شوي عليه وتسانده بشدته اذا ربي سهلها اكيد الراحة بتشملها معاه


في انتظارك ياعسل

ورده😍♥قلتي كل اللي بخاطري بتعليقك 😍
من جد اخيراً لقيت متابعه فاهمه حياه عنود وبتال مثل ما انا فسرتها
شكراااً وبانتظار البارت يا ميشووو😍

,,










بسم الله الرحمن الرحيم ..

السلام عليكم ورحمة الله وبركاته ..

الحمد لله والصلاة والسلام على رسول الله ..

توكلنا على الله .. لا اله الا الله محمد رسول الله ..





البارت 37 ..






ليه وطيت عن خيل السروج
ليه مديت عقب القراح الهماج

لا تجمل لي الغلطات والعوج عوج
يضحك احجاج او ينعقد لي حجاج

اصبر اشوي وش علمك تهوج وتموج
ميت القلب مثلك مايعرف الهياج

ماتعودت اجامل معتلين البروج
الزم العلم قبل يصير هرجك سماج

المشاعر تحي مثل المعاصير هوج
ونت مالك على هوج الرياح احتجاج

جيت وقلوب حسادي تميل وتروج
لا صفى جوهم ساعه قفاه العجاح

ابتسم لك وهمي فوج يقفاه فوج
من يحبك لزوم ايصر مثلك هجاج

بس قلي ونا غلطان لك ومحجوج
وين يلقون لجروح النواعس علاج

القمر غاب وانت اطفيت نور السروج
قلت يكفيك نور الوجه الاصبح سراج

كن بين الضلوع العوج صفقات موج
يوم فاض الغلا والشوق والقلب هاج

ضيقة الصدر لو بين المحاني تلوج
كل ضيقة لها عند الكريم انفراج

ماهو الغيض سبت كل ابو هالهروج
بس مالي على بعض السوالف مزاج




المبدع ..
متعب عبدالله التركي المطيري







قبال الفلة ..




نورة تنهدت / يا زين هواء ربي زيناه ..
ام مطلق وام عبد العزيز وام سطام وام عزام جالسين جنب بعض جهة جدار البيت ..
البنات متجمعين حولين بعض ومتلفلفين عن البرد .. العنود / بس بارد الجو على الصغار ..
نورة بضحكة / اقول يا العنود .. انتي صبية وعيشي حياتك .. والصغار ارميهم على هالعجوز ..
" وهي تاشر على الجوهرة " .. الجوهرة طالعه من الفله وهي لفة شال اسود عريض على جسمه ..
الجوهرة / برررد .. " وهي تمسح بديها اليسار على يدها اليمين وبان لبسها من تحت " ..
نورة بسخرية / عووووووووووع يا جويهر وش اللي لبسته .. ما يليق السرج على البقر ..
الجوهرة فتحت عيونها للاخير / ..............
العنود بحدة / نورة ..
الكل متفاجأ و التفت على نورة والجوهرة .. الكل موجود .. الكل ..
ام عزام بقهر / الا والله صادقة يا شين السرج على البقر ..
الجوهرة بقهر / وايش سويت انا .. بس غيرت لبسي و شكلي قالبتوا الدنيا عليه .. وكاني اكفرت ..
نورة وهي تميل شفايفها بستهزاء / الله يرحمك يا الظبي لو هي فيه كان علمتك اكفرتي والا لا ..
العنود ام سند بفرحة مصطنعة وتبي تغير الموضوع / انتي تعرفين الظبي ...
نورة بفخر / اي والله اعرفها و شفته اكثر من مرة واكلت وجلست معاها .. والله يا هي زين و جه ومنطوق .. وافعال ..
ام سند باستغلال / تكفين يا نورة تكلمي عنها ودي اعرف عنها كل شي ..
نورة بصدق / والله انا ما اعرف الا شوي عنها .. لكن شوفي صديقاتها واللي قضوا عمرهم معاها ..
ام مطلق بمحبه / يا زين السوالف عن ام نايف .. الله يرحمها ويسكنها فسيح جناته ..
الكل انشد لـ ام مطلق وصار الكل يبي يسمع عن الظبي .. / امين ..
ام مطلق وهي تسولف وكانها تتذكر وتحرك يدها / انا والظبي بنات خاله ما هو لزم بس ها من الدم ..
كانت مزيونه بزين العنود .. " وقطع كلامها ام عبدالعزيز " ..
ام عبدالعزيز بتاكيد / لا بالله الا العنود زينها زايد ..
ام سطام / شوي ما هو بكثير .. بس بطبايع لا العنود عطوفه ..
العنود مستمعه وتطالعهم بشوق وحنين لحكايات جدتها برغم معرفتها كل التفاصيل / ...............
ام مطلق بضحكة / بذا صدقتي .. الله يرحمها الظبي قاسية و لا كرهت ولا عيبت على احد ما ترحمه .. تذكرون سلمى ..
ام مطلق تغطي فمها وهي تضحك .. / هههه والله يا سوت بها حال .. لا حول ولا قوة الا بالله .. الله يرحمها ويغفر لها ..
ام عبدالعزيز بضحكة / ولا .. لا اله الا الله له حكمته سبحانه .. دار الزمن وما اخذ بناتها الا عيال سلمى ..
ام سطام تفتح عيونها للاخير / تقولينه صادقة ..
ام عبدالعزيز / اي والله .. خلود وخديجة .. ماخذين عيال سلمى .. ولا سبحان من زرع غلاهم بقلبها ..
تحبهم ازود من بناتها .. ولا ترضاء عليهم ابد .. وتقول بهم هه هه .. (*_^) ..
ام عناد / الا الظبي عندها كم بنت كم ولد بس شيخة الله يرحمها وشريفة الله يرحمها و خلود وخديجة ..
ام عبدالعزيز / لالا .. الظبي جابت قبل شيخة و شمه .. لكن يموتون وهم صغار .. الظبي كانت مثل امها بالحمال ..
وبعد سنين جابت شيخة وشمه .. وبعدها كل ما تحمل يموتون عيالها بالاربعين .. اللين ما جات خديجة ..
او طلال باستغراب / خديجة اكبر من شريفه .. انا احسب شريفة هي الكبيرة ..
ام عبد العزيز / شريفة مي بنت الظبي من بطنها .. شريفة بنت الظبي رضاعه ..
بولادة لـ الظبي .. ماتت بنتها وهي عمرها عشرين يوم .. وقعده مغير تبكي والحمى ماسكتها ..
وغير الحليب اللي اتعبها بصدرها .. وكانت في هذك الزمان دواجه .. تبيع الثياب والمواعين واشياء ثانية ترزق ..
تعرف الظبي وتدخل عندها .. والدواجة توها والد .. وحاسة بالموت وخايفة على بنتها .. قامت وقالت لـ الظبي ..
خليها عندك .. انا ابي اروح وارجع .. ورمتها على الظبي و راحت ولا عاد رجعت .. وبعد سنين حول الست او السبع ..
عرفت الظبي ان ام البنت ماتت .. و خالتها جات من ديرتها تبي تاخذها .. واخذتها خالتها .. واخذت سنين ..
ورجعت شريفه .. بعدها .. كان عمرها حول 13 او 14 حولها .. ماني بمتوكده ..
ام سند / يعني شريفة مي بنتها اصل .. والله كنت شاكة .. لان ابد ماتشبه لهم .. طيب سلمى ايش قصتها ..
العجايز رجعوا يضحكون .. ام مطلق / سلمى بنت ابو راشد كان قصيرعندنا .. وام راشد قوية و خبيثة ..
الله يرحمهم ويسامحهم جميع .. بعد وفات ام نايف .. الظبي كان عمرها حول الـ 8 ما ادري اقل ..
كانوا الي تعبانه احوالهم المادية يجون يخدمون بيت احد الكبار بالقرية وياخذون من مونت البيت والا من الغداء ..
بهذاك الوقت ما به الا ثلاث مدري اربع بيوت اللي معروفين بانهم اهل مال .. ومنها بيت عمكم جابر ..
المهم .. ام راشد هذاك اليوم جات تنظف البيت وجابت سلمى معاها .. كان بعمر الـ13 سنه عروس ..
ونضفت البيت وزينته و بعدين بدات تحوس بالبيت وتفتش ولا انتبهت لنظرات الظبي .. تحسبها صغيرة ولا تفهم ..
والا ام راشد تقول لبنتها ها انا ابي اروح لبيت ام سند وعود لك .. انتي لرجع ابو نايف اغرفي " ضعي " ..
لهم الغداء .. وسلمى فرحت .. واطلعي يا ام راشد .. وتقعد سلمى تشبر البيت وتفتش .. والظبي تسوي نفسها تلعب ..
ولا هي يمها .. ويوم شافتها تدخل غرفة امها .. هذاك الزمان توه بيوت الطين مبتديه .. والعشاش ..
وبعضهم بخيام ساكنين .. قامت الظبي وراحت وراها .. ويوم دخلت والا سلمى تقلب بذهب امها .. وتقوم الظبي تضربها ..
ومن وين يوجعك .. واعطتها هذيك العضة بخدها .. الي بغت تقلع لها عينها .. وما فكوها من يدين الظبي الا امي ..
وام سند وجدتك ام شيخه .. الله يرحمهم جميع .. يقولون ان الظبي تطلع لحم سلمى من بين سنونها ..
وهي تقول اح خلوني اذبحها ما بردت حرتي ..
ام سند وام عناد / الله اكبر ,, ههههههههههه ..
ام عناد / وايش سوت ام سلمى ..
ام مطلق / راحت تصايح وتنادي وعرفوا الرياجيل .. و البنت طلعت من بيت ابو نايف عينها مفقوعه و الدم ..
والسالفه كبرت .. والامهات ارتعبت عارفين ان وصل العلم لجابر اليوم الظبي منحورة .. و وصل العلم لجابر ..
ويوم دخل بيته وهو ما يشوف غير ذبح الظبي .. لكن يوم دخل وهو يشوف ان اللي مضروبه بنته مو بنت ابو راشد ..
العنود ابتسمت / ................
ام طلال / من ظربها .. ام راشد والا عيالها ..
ام مطلق غطت وجهها وهي تضحك .. ام عبدالعزيز / الظبي ضربت نفسها .. جابت حبل مسويته بيدها من اليف ..
ودخلت الغرفة وسحبي على جسمك .. سحب يمين يسار واضربي نفسك .. والظبي بياضها مثل العنود على حمرة ..
والحبل حار .. وقطع جلدها .. ونزل الدم منها ... وقطعي ثوبك ونكشي شعرك وكتي التراب .. ويوم جاء ابوها ..
والا بنت تون ونين يقطع القلب .. والدم ملين ثيابها .. ويفزع نايف اخوها رحمة الله عليه ويروح لبيت ابو راشد ..
ويتوط في بطن ابو راشد وعياله .. واخوانه معاه زياد ومتعب .. و ما خلو احد فيهم سليم ..
ويوم جو الحريم الكبار يشفون من المضروبه اكثر .. والا حال الظبي يوجع .. جسمها كله مورم ..
وبعد كم يوم .. قام ابو راشد اخذ حرمته وعياله وهج من الديرة .. وراح .. ولا عاد سمعنا عنه شي ..
البنات بداو يتساسرون بعضهم ويضحكون .. ام سند تلتفت للبنات / هصصصصص ..
ام سند / وعمي جابر ذا .. كم ولد عنده وين هم .. وين راحوا .. تعرفون اخبارهم ..
ام مطلق / يا كاف البلا .. وايش بلاك مفجوعه .. جابر عنده 3 عيال .. نايف و زياد ومتعب .. وتوفوا وهم شباب ..
ام عبدالعزيز / الله يرحمهم .. شباب كانوا يوم بس ايش شباب .. صدورهم وزنودهم يا كبارها البعير يبرك عليها ..
نوال بشهقه / الله يا مكبرها .. البعيييييير .. " وكانها تقول كذبه " ..
ام سطام / الا والله .. ان زنودة اكبر من زنود سند ابو فهد ..
البنات التفتوا على رنيم وبصوت واحد / دوووووب ..
العنود ام سند بعصبية / دب يكسر عظامكم .. اسكتوا والا قوموا ادخلوا الفله ..
البنات / ....................
ام مطلق / لا اله الا الله .. كان الجو كتم شوي ..
الكل / هههههههههههههه
نورة / لا يمه من كثر ما ضحكتي وحكيتي من سوالف الظبي ..
ام سند وهي تقرب من ام مطلق / ايه .. طيب ليش ابعدت عنا .. وليش ما درينا ان زوجة سطام بنتها ..
ام مطلق / ما ادري .. يمكن ما تبي سند يعرف عنها ..
ام سند عقدت حواجبها / من سند .. " وبذهول " .. عممممممي ..
ام مطلق / ايه عمك .. هو كان محيرها ولد عمها ويبيها .. جابر اخو ابو سند من الاب .. وكل واحد له ام ..
جابر امه الكبيرة .. وهي صاحبة اموال ورثته لجابر .. و سند خطب الظبي ومحيرة من سنين .. بس المرض ..
والفجعه طيحت جابر .. والفتنه و نقل الكلام .. والغضب والتسرع هو اللي انهاء الظبي وسند ..
الهنوف / كيف .. ايش صار ..
ام مطلق تشرب ماي .. ام عبدالعزيز / بعد وفاة عيال جابر .. نايف ومتعب وزياد .. ماتوا ورا بعضهم ..
تصيبهم حمى ما تنزل لمدة شهر او اقل ويموت .. بنفس السنه و صاب احد غير عيال جابر .. وما قعدة الا الظبي ..
قام جابر باع امواله كلها .. حلاله وبيته ومعاد بقي عندة الا كم راس من الحلال والراعي .. وسكن بخيمة برا الديرة ..
و امتنع عن اهل الديرة .. لا يروح لاحد ولا يجي لاحد .. والظبي هي اللي تقضي مشاويرة .. ولا احد يقولها شي ..
كانت فتنه تمشي على الارض .. وسند من بعيد لبعيد يحميها .. و لدخلت عند ابوها بالخيمه يروح بيت ابوه ..
مريم / طيب عمامي ليه ما كلموه يسكن عندهم ..
ام مطلق / كلموه .. لكن هو رفض وحلف .. انه ما يطلع من خيمته .. المهم فيه كم بنت كانوا حاقدين على الظبي ..
وطلعوا هرج عنها .. و بيوم جاء واحد وقال كلمه قبال سند .. وهي اخر كلمه .. هفه سند بالخنجر اللي معاه والا هو ميت ..
وقاموا الناس قالت لسند توكد من بنت عمك قبل لا تذبح الرجال .. وكانت اعوذ بالله حزت مغرب والشيطان موجود ..
ويقوم ويروح جنب خيمة عمه ويقعد يراقب ويوم شاف النار قبال الخيمة قرت تطفي وعرف ان عمه نام ..
الا يشوف ضوء بجهة مرقد الظبي .. ويوم قرب من الخيمة اكثر والا يسمعها تدندن وتمدح وتغزل .. وهو يدخل الخيمة ..
وتصيح الظبي ويجي ابوها مفزوع .. سند ما سال الظبي عن الي تغني له وتنشد وضربها الكف اللي شق برقعها واوسم بخدها ..
ام سطام / انتم شفتوا اثاره ..
ام مطلق / اي والله .. كان هنا .. " وهي تاشر على خدها الايسار " .. بنص الخد .. بس ما زادها الا حلى ..
العنود ام سند بغضب / وهو من يومه ما يسمع ولا يرحم بس يحكم وينفذ ..
الهنوف / استغفري الله يا اختي .. الرجال مات الله يرحمه ..
الكل / الله يرحمه ..
ام عبد العزيز بهدوء / الله يرحمه .. هو كان حليم و طيب لكن الغضب اعوذ بالله منه اعمى عيونه ..
و جدك جابر الله يغفر له ويسامحه .. اعصى من سند بزود .. يوم صار اللي صار وعرف السالفه ..
ما طاحت الشمس الا الظبي تزوجت و روحت مع رجالها .. " تنهدت بحزن " .. الله يرحمهم ..
راحت مع رجالها بلا تودع احد .. ولا عرف احد بانها تزوجت الا بعد ما جاء واحد من الرعيان وقال انها تزوجت ..
مريم باستغراب / ليه وكيف ..؟
العنود كانت تطالع الكل وملتزمة الصمت ..
ام سطام / عمي رحمة الله عليه .. زوجها لراعي اللي عنده .. مانعرف عنه الا اسمه واسم ابوة ..
اللي كان يشتغل راعي عند ام عمي جابر .. كان يتيم ومقطوع من شجرة وحن عليه عمي جابر وشغله عنده ..
نوال باعجاب / الخدام تزوج الاميرة ..
ام سطام تنهدت / اميرة بزينها واخلاقها ..
نوال / وبالفلوس ..
ام سطام / من وين لها فلوس ..
نوال باستغراب / مو انتم قلتوا ان عمكم جابر غني .. وعياله ماتوا يعني الظبي هي اللي ورثته ..
ام عزام / عمي جابر باع كل اللي يملكه .. وسدد ديونه .. ما خلا الا كم راس من الحلال وقضى عليه الوبئ ..
نوال بحزن / يعني خسر كل شي .. حرام .. " بسرعة وهي تحط يدها على فمها " .. استغفر الله .. الله يرحمه ..
نورة / طيب كيف عرفتوا عنها ..
ام عبدالعزيز / يوم ولدت نايف .. ام متعب رحمة الله عليها كانت مريضة .. وكانت راقدة بالمستشفى ..
بعد ما ولدت متعب تو مالها ايام .. تعب نايف وخاف عليه سعد لانه هو الولد الوحيد .. وجابها للمستشفى ..
وسبحان الله .. صادفت منصور طالع من عند غرفة الصغار وهي بتدخل تكشف على ولدها .. ومن هناك تصادفوا ..
.......... من الخلف / السلام عليكم ... هذا عشاكم .. " البنات تغطوا .. و الشباب حطوا صحون العشاء وراحوا .. " ..






ــــــــــــــــــــــــــ




بعد العشاء ..



عند الشباب ..



سند / يعني كل اللي صار مخطط له ..
راكان وجهه اسود من القهر والغبن / مقهور من ذا التركي .. امنته على حلالي وصديق لي .. مو واضح عليه شي ..
نايف / انا كنت شاك فيه من البداية .. وكان دائما يحاول يشغلني معاه باحد محلاتها .. بس انا ارفض ..
عناد / وكيف عرفت وليه ما قلت لراكان ..
ماجد بسخرية / مو فاضي راكان عريس وعاشق ..
متعب ابتسم وبطريقة مضحكة / انك يا ولد يا المدعو ماجد ما انت باحسن منه ما ادري طالعين لمن رخوم ..
الكل / هههههههههههههههههههههه
طلال بابتسامه / ترا واحد ولد اختك والثاني و لد اخوك .. العرق دساس ..
متعب بضحكة / لمن يكون اصلي .. هذا ولد اخو من الاب .. و هذا ولد اختي بالرضاعة .. يعني ما في اصلي ..
الكل / هههههههههههههههههههه
نايف صد عن الكل وسرح بفكرة / .........................
عناد / ما جاوبت على سؤالي كيف عرفت ..
ماجد التفت على نايف ورجع طالع عناد / بصدفة .. كان جاي لـ الستراحة بعد ما راح راكان لشهر العسل ..
راح يشوف ايش فيها .. اذا محتاجة تنضيف شي .. كان اخر اليل .. شاف شاحنه تنزل صناديق والوضع مو مطمن ..
وبعد ماراحت الشاحنه راح هو من خلف الاستراحة وطب الجدار ودخل للاستراحة وشاف ايش بالصندوق ..
متعب / اتصل عليه قال لي كل الموضوع .. وانا بعدها بلغت الي اكبر مني وصار اللي صار بعدها ..
فارس / يعني تركي كان يشتغل مع المافيا ..
متعب / ومافيا كبيرة بعد .. لها ايادي بالعالم كله .. وللحين ترا القضية شغاله بس شغلة نايف وراكان انتهت ..
سند / اهم شي سلامتهم ..
سعود وهو يطقطق بجواله بضيق / يا شباب متى شفتوا بتال اخر مرة ..
سند / ليه .. ايش تبغى ..
سعود / ابوي يسال عنه ..
سند يوقف / انا رايح اشوفه ..
متعب بضحكة / سلم لي على الزعلان وقلة ترا المزرعة منورة بفرقاة ..
سند ابتسم .. / يوصل .. " وراح وتركهم "..






ـــــــــــــــــ







عند بتال ..



كان قاعد بالمزرعة القديمة ..
سند / طيب الحين وانت جالس هينا حليت المشكله ..
بتال بضيق / حسيت بضيق يكتم على صدري قلت خلني ابتعد ..
سند بهدوء / ترا هي غلطانه بعد .. المفروض تقولك انه خالها ..
بتال بعصبية / قولها هالكلام .. تدري يوم قابلتها وقلت لها ليش ما قلتي لي متعب خالك .. قالت وانت سالتني ..
ليه ما دافعتي .. ليه ماقلتي لي هذا خالي .. ليه .... ليه .. " وبغضب " .. والله كان ودي اذبحها على هالبرود اللي عليها ..
سند كان بيتكلم بس قاطعه رنين جواله .. فتحه و هو يوقف ويبتعد ... وبغموض / نعم .. ايه .. طيب .. الحين جايكم ..
بتال يطالعه باستغراب ... سند عاقد حواجبه / انا رايح مشوار مهم وراجع ..
بتال يوقف وبخوف / خير عسى ما شر ..
سند عاقد حواجبه / ولا شي .. بس مشوار صغير وراجع ان شاء الله .. المهم .. بكرة ابو محمد بيجيب ملف المزراعه ..
ايش ينقص وايش المحصول .. الي خابره .. انت شوفه وشوف اللي ناقص واللي يبيه ..
بتال يهز راسه / يصير خير .. بس طمني عليك ..
سند يتوجه لسيارته .. / انت ارجع للمزرعه .. لا تقعد هينا ..
بتال رفع راسه لسماء وشاف الغيم / انتبه لطريق .. شكله بينزل مطر .. وانا راجع للمزرعة الحين ..







ــــــــــــ





عند البنات ..
بعد ما تعشوا الحريم كلنا راح ينام ..
العنود نيمت اولادها وطلعت برا .. مشيرة نيمت منصور وطلعت مع العنود ..
الباقي قعدوا قبال التلفزيون يطالعون فلم ..


العنود و مشيرة جالسين على درجات الباب الخلفي ..

مشيرة وهي ماسكة كوب فيه شاي اخضر بين يدينها / ليه طول الجلسه ساكته .. اول مره تسمعين هالكلام عند جدتك ..
العنود تنهدت و ببرود / لا ..
مشيرة عقدة حواجبها / بس احس فيه شي مفقود ..
العنود ابتسمت / قصدك فيه تفاصيل مفقودة ..
مشيرة ابتسمت / ايه .. قولي لي ..
العنود بضحكة / لا .. مو قايله لك ..
مشيرة ابتسمت وهي ضربها على كتفها بمزح / نذله .. " مشيرة رفعت نظرها لسماء مثل ما العنود كانت تطالع " ..
العنود كانت سرحانه لبعيد .. وفجاة بدات تدندن ..


الأماكن كلها مشتاقة لك
والعيون اللي انرسم فيها خيالك
والحنين اللي سرى بروحي وجالك
ما هو بس أنا حبيبي
الأماكن كلها مشتاقة لك
كل شيء حولي يذكرني بشي
حتى صوتي وضحكتي لك فيها شي
لو تغيب الدنيا عمرك ما تغيب
شوف حالي آه من تطري علي
المشاعر في غيابك ذاب فيها ألف صوت
والليالي من عذابك عذبت فيني السكوت
وصرت خايف لا تجيني بلحظة يذبل فيها قلبي
وكل اوراقي تموت
آه لو تدري حبيبي
كيف أيامي بدونك تسرق العمر وتفوت
الأمان !
وين الامان ؟!
وأنا قلبي من رحلت
ماعرف طعم الأمان
وليه كل ما جيت أسأل هالمكان
أسمع الماضي يقول
ما هو بس أنا حبيبي
الأماكن كلها مشتاقة لك
الأماكن اللي مريت إنت فيها
عايشة بروحي وأبيها
بس لكن ما لقيتك
جيت قبل العطر يبرد
قبل حتى يذوب في صمتي الكلام
وإحتريتك
كنت أظن الريح جابت عطرك يسلم علي
كنت أظن الشوق جابك تجلس بجنبي شوي
كنت وكنت أظن وخاب ظني
و ما بقى بالعمر شي واحتريتك


العنود استنشقت هواء عمييييييق وهي مغمض عيونها وحاطه يدها على رقبتها ماسكه الشال ..
مشيرة كانت تدور بطرف اطباعها على الكوب .. والدمع بعيونها / ...........
العنود بصوت متعب / شكل المطر بينزل .. خلينا ندخل ..
ودخلت للفلة .. مشيرة رفعت راسها لفوق وغمضت عيونها بقوة ... وبهمس خافت / اشتقت لك ..
اعتدلت بوقفتها ومسحت وجهها بيدينها .. / استغفر الله ... استغفر الله .. " اخذت الكوب و دخلت للفلة " ..







ـــــــــــــــــ






..... بصراخ وصوت ثقيل / ياااا حيــ**** .. ااااننننتت لللليييش ممممااااا مممااااررررببببططططططططططططططني ..
حسني بضيق / استغفر الله العظيم .. استغفر الله العظيم .. استغفر الله العظيم ..
دخل بخطوات غاضبة .. وبصوت حاد / حسني ..
حسني بسرعة / ايو يا باشا ..
سند عاقد حواجبه .. وبحدة / صحي ..
حسني بضيق / عملت لو قهوة ثقيلة وبدا يصحصح شوي .. الجماعة ربطوة وا...
تركة سند ودخل بغضب للغرفة وقفل الباب .. وبحدة وهو يجلس قباله / متى تستحي على شيبتك ..
لمتى واحنا نطارد فيك .. ونكنس الوسخ اللي تسببه ..
راشد بضيق وهو ما زال اثار السكر فيه / اوووووووووه انت ايش تبي .. ماا يكفي سطام ..
سطام مااات خلاص .. اننت متى تموت .. متتتتتتتتتتتى ..
سند التفت يمين ويسار وشاف سطل ماي بارد .. اخذ السطل و صب الماي على راس عمه ..
راشد شهق بقوة وفتح عيونه ... سند بغضب / الشرطة تدور عليك .. انت خلاص انتهيت ..
راشد يضحك بثقل / ههههههههههه ما راح يسوون شي .. وانت موجود .. انا جد ولدك وعمك ..
سند ببرود يضحك / ههههه تؤتؤتؤ انت ما تدري ان خالي سلطان دري بسواياك ..
راشد فتح عيونه للاخير / .................
سند ببرود / و انا الي راح اسلمك بنفس لشرطة .. لانك ما عاد تهمنى بشي .. انت ميت بنسبة لـ الفارس ..
سند وقف .. وراشد تحرك بسرعة يبي يوقف بس يدينه ورجوله مربطه ما قدر يتحرك ..
راشد برجاء / سند .. سند .. انا عمك .. ما راح تتركني ..
سند فتح باب الغرفة ببرود وطلع .. وراشد يصارخ / سند .. سنننننننننننننند ..
سند يوقف قبال حسني .. بحزم / لا تفك رباطه ابد .. واذا طلب منك شي .. تكلم الشباب اللي برا وهم يتصرفون ..
حسني / حضر يا باشا .. " سند تركة وطلع من الشالية .. كان الوقت اذن الفجر " ..





ـــــــــــــــــ





يوم جديد ..



ابو عبد العزيز وابو سطام ومتعب جالسين عند الجلسة تحت النخل ..
ابو سطام / انت ما قلت كانت جارة لعبدالعزيز .. وعبدالعزيز يوم راح الرياض ولده طارق يمشي ..
وشلون الظبي ارضعت متعب .. " ابو عبد العزيز يعتدل بجلسته " .. " ومتعب يصب قهوة لابوة وابو سطام " ..
ابو عبد العزيز / يوم تعبت ام متعب .. واخذتها لرياض .. كانت توها والد بنايف .. وانا طالع من الدكتور ..
الا اسمع هذيك المره الي تنادي له بنيه .. يا شيخة يا شيخة .. والتفت عليها والله ان ذا العيون اعرفها ..
واقرب يمها .. واقول الظبي !! .. والا هي تلتفت عليه وعرفت انها هي .. وبعدها اصرت انها ترضع نايف ..
ابوسطام عاقد حواجبه ../ وليه ما قلت لنا عن مكانه .. وسند له سنين يدورها .. وانت تدري ليه ..
ابو عبدالعزيز تنهد / قلت لها .. بس هي رفضت .. و بعدها بكم شهر يمكن حول 6 شهور انقطعت عني اخبارها ..
واختفت .. ودورتها وما لقيت لها اثر .. طلع رجلها شافني وعرف انها ارضعت متعب ..
و ان حجت مواعيد المستشفى كذب ونايف عنده مراجعه كلها علشان تشوفني ..
ابو سطام بغضب / وهو كان مانعها ..
ابو عبدالعزيز بقهر / الله يسامحه .. الحين ما له الا الدعى بشفاء و الرحمة .. قهرها واوجعها ..
" وبنبرة موجعه " .. قلت لها ليه ما تجين عندنا .. قالت وجيعتي من سند اقوى من وجيعتي من سعد ..
ابو سطام بحزن / الله يرحمهم .. الله يرحمهم ..
ابو مطلق / السلام عليكم .. ليه ما قومتوني ..
ابو عبدالعزيز وابو منصور و متعب / وعليكم السلام ..
ابو عبدالعزيز / شفناك مانمت البارح وانت تقلب قلنا خله ينام شوي ..
ابو مطلق يلف الفروه على جسمة / لا اله الا الله .. اليوم البرد زايد ..
ابو سطام وهو يطالع لسماء / ايه .. من عقب رش المطر البارح ..
ابو عبد العزيز / الا يا متعب ويش سويت مع لطيم ..
متعب / امس مشوا .. وبكرة والا بعدة توصلني ملكية المزرعة ..
ابو عبدالعزيز / اكتبها بأسم الظبي ..
متعب بضحكة / يبه .. ترا انا ولدك مو الظبي .. وعندها جدها يكتب لها ..
ابو سطام وابو مطلق ابتسموا .. ابو عبدالعزيز ابتسم / جيب العيال وابشر بالمزارع واللي تبيه ..
متعب بضيق / اجل اكتب اللي تبي بأسم عيال بتيل .. وانا راضي ..
ابو مطلق بتاكيد / بعون الله .. بعون الله .. ان ماتنتهي السنه الا انت متزوج ..
متعب يوقف بسرعة .. / مع السلامه .. خلني انحاش قبل لا تكملون ..
وهو نازل سلطان وعبدالعزيز و خالد وفهد وصلوا الجلسه ..
سلطان يضحك لانه سمع اخر الحديث / ارجع ارجع .. محد مزوجك غصب .. هههههه ..
متعب يجلس / ها ان جاتني عروس .. بوجهك يا اخو سطام .. انا مالي دخل ..
سلطان بضحكة / وانا لها .. هههههههههههههههه ..
الكل / هههههههههههههههههههه ..
شوي شوي بدا الكل يتجمع على الجلسه وتناولوا الفطور .. وبعد الفطور والقهوة ..
الشباب راحوا يشفون الاسطبل و باقي المزرعة .. اذا اثر المطر عليها والا لا واذا فيه شي يبيله تصليح ..






ــــــــــ






عند الحريم ..



ام مطلق بصوت مبحوح / احم احححمم .. الظاهر البرد اتعب حلقي ..
نوره بضحكه / يمه البرد والا من كثر الهرج البارح ..
ام عبدالعزيز تضحك / هاك هاك اشربي هذا الحليب مسويته العنود ..
ام مطلق تمد يدها و تاخذ الكوب / ما شاء الله يا ريحته .. " وهي تشرب منه " .. تسم يدينك يا ام سلطان ..
العنود وهي ترتب شيلتها .. / عساه بالعافية .. " حملت الصينيه و وقفت متوجه لباب " ..
مشيرة / وين بتروحين ..
العنود التفت لها / رايحة اودي هذا لمتعب .. " وبابتسامه " .. الشيخ يتامر ..
الجوري بقهر / ايه يتامر طول ما هو عزابي .. بكرة يتزوج ونشوف يتامر على حرمته ..
مشيرة / ههههههههههه ما نست حركته البارح ..
العنود بضحكة / تعالي الجوري .. وان تكلم انا اوريه ..
البندري وقفت / الله يخليك عنودتي انا ابي اروح كمان ..
العنود بابتسامه / طيب وحدة تاخذ الظبي وحدة تاخذ سلطان والحقوني ..
الجوري و البندري بسرعة تحركوا وشالوا سلطان والظبي ومشيوا ورا العنود ..





ــــــــــــ





عند غرام وسمر ..



غرام / بتخلي شيخة عند جدتك ..
سمر / ايه .. " وهي تشل شيخة وتطلع من الغرفة " ..
غرام فجاة وقفت فتحت عيونه بصدمه .. وتحركة بعدها بسرعه ..
سمر و غرام دخلوا الصالة .. / السلام عليكم ..
غرام جلست بجنب خزامى وهي تفكر بالي شافته ..
خزامى تهز كتف غرام / غرااام .. وين رحتي ..
غرام تنتبه / همممم ..
خزامى بهدوء / مو رايحة معانا ..
غرام بشرود / هممم الا .. " وقفت " .. وين سمر ..
خزامى بنظرات تفحص لغرام / راحت تودي شيخة لجدتها .. انتي ايش فيك !!
غرام التفتت على الممر الي يودي لجناح البنات وشافت شجون طالعه وهي عاقده حواجبها ..
طالعت فيها من فوق لتحت بنظرات غريبة وصدت عنها ..
شجون واضح عليها الانزعاج والعصبية .. واقفه وتهز برجلها ..
غرام وقفت وهي تعدل شيلتها وعباتها / ولا شي .. ياله نطلع .. و تلحقنا سمر ..
شجون مشت قبلهم .. خزامى طالعت بغرام و طالعت بشجون .. رفعة حاجب باستغراب ومشيت وراء غرام ..





ــــــــــــــــــــ






عند الرجال ..




العنود نزلت صينية على طاولة قريبه من الجلسة و اتصلت على متعب ..
متعب نزل من الجلسة وتوجه للمكان اللي قالت عنه العنود ..
متعب بابتسامة / هلا هلا .. " التفت على الجوري والبندري .. وبحزم " .. انتم ايش عندكم ..
العنود بهدوء / جايين معاي وابي اروح امشيهم بالمزرعه .. عندك مانع ..
متعب رفع حاجب وهو يكتم ضحكته على عيون الجوري والبندري اللي ناطه تنتظر الحكم ..
اخذ الصينيه وراح للجلسه .. الجوري التفتت على البندري و العنود .. وهي تهز راسها " ايش يعني نروح و الا لا " ..
العنود تاخذ سلطان من يد البندري وتمشي متجه لـ اسطبلات الخيل ..
من الخلف بهدوء بارد / سلطان ..
العنود التفت باستغراب .. بتال بهدوء بارد / اعطيني سلطان ..
العنود بهدوء نزلت سلطان على الارض وهو واقف .. بتال كان لبس بنطلون اسود .. وبلوزه رمادية برقبة طويله ..
و عليه شال ابيض بخطوط سودا .. جلس نص جلسه على رجوله وفتح يدينه لسلطان ..
وجاه سلطان يخطي بخطوات سريعة و خايفه وهو يضحك .. بتال ضم سلطان و وقف وهو يبوس سلطان ويلعب معاه ..
العنود واقفه تطالع قفاه وهو رايح لجهة الجلسه تحت النخل .. وبداخلها احساس غريب ..
التفت على الجوري واخذت الظبي .. وبهدوء / يالله ..
الجوري وهي تمشي بجنب العنود وبارتباك / ااممم العنود ..
العنود بهدوء بارد / همممم ..
الجوري / امم ليه بتال ما ياخذ الظبي كثير .. اكثر من يطلب الظبي عمانها او جدها ..
العنود ببرود / لان سلطان يلعب و يضحك .. اما الظبي ضعيفه شوي .. ويخافون عليها ..
البندري / طيب الظبي ليش ضعيفة ..
العنود بهدوء / لانها من لمن جات وهي مريضة شوي ..
الجوري تذكرت / ايه صدق .. كيفها الحين ..
العنود وهي تبوس الظبي / الحمدالله .. طيبه .. وما عاد نروح لدكتور .. " وبابتسامة " .. بنوتي الحلوة بطله ..
متعب بابتسامه من وراهم / طالعها لابوها متعب ..
العنود ابتسمت / ايش جابك .. " ومتعب يمشي بجنبها .. وهو ياخذ الظبي "..
متعب بخبث / اللي يشوف المزايين قلبه ما يطاوعه يخليهم لحاله ..
العنود ابتسمت / امممممم .. عقبال ما نجيب لك مزيونه تلحقها مثل المجنون ..
متعب كشر بوجه / اعوذ بالله .. عنودي لا تفكرين بذا الموضوع ولا تحاولين ..
العنود بضحكة وخبث / هههههه ايه يصير خير ..
متعب بضيق / هووهووو عنووووود ..
العنود ابتسمت / ...............
الجوري بقهر / متعب ..!!
متعب / هااا ..
الجوري بقهر ممزوج بعصبية / هو عدوك ببير .. العنود لبيه .. امري .. وتضحك معاها وانا ..
متعب بخبث / لتكفيخ .. والتحطيم ..
الجوري فتحت عيونها للاخير / ...................
البندري بضحكة مع دلع / عمممي حرراااام عليك ..
متعب تذكر / ايه صح .. " وهو يجلس الظبي على سور الميدان .. والكاسر يركض قبالهم ".. وين ساره ..
العنود التفتت عليه وباستغراب / ايش تبي بها ..
متعب بخبث واستفزاز / ابي اعطيها هدية نجاحها .. وتفوقها ..
البندري انتفضت كان صابها التماس كهرباء / ياااااااااا سلااااااااااام .. وانا ..
متعب بحدة / قصري صوتك لـ اكتمه لك ..
الجوري بقهر / متعب .. انت عمرك ما حكرت علينا .. ايش معنا هالمره ..
العنود بضحكة / لانكم بمزرعة الفارس ..
الجوري والبندري يطالعونهم باستغراب / .................
متعب سمع رنين جواله .. دخل يده اليسار.. بجيبه واخذ جواله فتح المكالمة ..
وبيدة اليمين ماسمك بها الظبي وبهدوء / هلا .. وين .. امممم .. طيب ..
متعب بحزم / ياله مشينا .. " وهو يشيل الظبي " ..
العنود ترمي الشال على الظبي .. / الهواء زاد ..
الجوري والبندري صوروا الكاسر بجوالاتهم .. وبعض من المزرعة .. ويسلفون بهمس بيناتهم ..
العنود بهدوء / اليوم انا ونورة بنطبخ الغداء ..
متعب بابتسامه / اووووووه معناته بتغداء غداء مافي احلا منه ..
العنود ابتسمت / ان شاء الله .. المهم انت بلغ الشباب ..
متعب / صار ..





ــــــــــــــ





بالجلسة تحت النخل .. " دكة " ..
هي عبارة عن جلسه صغيرة .. مربعه .. مرتفعه عن الارض بمسافة ..
مفتوحة على جميع الجهات .. خلفها فيه اربع نخلات وكانه جدار .. تحيطها سور صغير جدا ..
بتال جالس متربع على ارضية الجلسه .. بيده ملف يتصفحة ويوقع على بعض الاوراق ..
ويحسب ويشخط .. ويكتب .. رفع عينه وابتسم بحب وهو يشوف سلطان يلعب بالكوره ومبسوط ..
سمع صوت سلام وترحيب .. التفت على الجهة اللي منها هالصوت وشاف طلال يرحب بطارق ..
رفع يده وطالع بساعة السوداء اللي بيده .. " سند تاخر " .. رجع يطالع بالملف ..
سمع صوت صرخ / الوووولــــــــــد ..
فز واقف وهو مفجوع .. شاف طارق رفع سلطان وصار يسمي عليه ..






ـــــــــــــ







وهم راجعين من اسطبل الكاسر ..



العنود بهدوء / اذبح وقطع الحم وجيبه على هالمكان .. " وهي تاشر على مكان مفتوح وقريب من العريش ..
متعب بابتسامه / ليه ما تذبحين انتي ..
العنود بضحكة وهي تلتفت عليه / طيب .. جيب الذبيحة .. وانا اذبحها .. " التفتت لصوت الصراخ ..
وشافت سلطان طايح تحت الجلسة .. وبدون وعي راحت تجري لجهته "..






بتال سحب سلطان من يدين طارق .. ضمه لصدرة وبحنان / يا حبيبي .. آآآآآآه .." وهو يشوف شفته فيها دم "..
حس بيدين تسحب سلطان .. التفت وشاف العنود وبعيونها لمعه خوف وحنان ..
العنود بقهر و جع والم / حبيبي .. يا عمري انته .. " وهي تضم سلطان لصدرها "..
سلطان يبكي بكاء قطع القلب .. ابو بتال من سمع صوت الصراخ طلع برا المجلس وهو خايف ..
ابو سطام وهو بالمجلس .. توهم داخلين .. الهواء اشتد والبرد اشتد فقرروا يدخلون المجلس ..
ابو سطام بحزم / ما تردون عليه وايش فيه ..
ابو بتال بقهر / سلطان الظاهر وهو يلعب تعور ..
ابو مطلق / عسى ماهو بالحيل ..
ابو بتال وهو يجلس جنب ابوه / والله ما شفته .. ابوه وامه خذوه ..
ابو مطلق تنهد بضيق / انتم ما كلمتوهم يرجعون لبعض ويلومن هالصغار بحضنهم ..
ابو سطام بضيق / الا والله .. بس العنود راسها يابس و بتال راسه يابس ..
" تنهد بوجع " .. وانا مو قادر اضغط على العنود .. لا تروح وتسوي سوات الظبي رحمة الله عليها ..
ابو عبد العزيز بقهر / بس بتال اوجعها وقهرها حيل .. وما ظنتي رجع له .. بنت سطام و ربتها الظبي ..
ابو مطلق / اوووووووه معناته تنشف عروق بتال وما نالها ..
ابو سند بهدوء / اذا الله كاتب يرجعون لبعض بيرجعون لو هم مايبون بعضهم ..
الكل باصوات متفرقه / صدقت .. الله يهديهم .. الله يسر امرهم .. امين ..






ــــــــــــــــــــ






برا المجلس ..



متعب جلس جنب طارق الي بعد ما ابعده بتال جلس بهدوء على الكرسي ..
متعب بهدوء وهو يحط يده على فخذ طارق / الحمدالله على السلامه ..
طارق ببرود / الله يسلمك .. الي طلبته بسيارة ..
متعب ابتسم يحاول يغير الجو / قبل شوي قهرت الجوري و البندري ..
طارق ابتسم بمسايرة / الا تعاندهم وتنرفزهم .. وبعدين انت اللي بتخسر ..
متعب ابتسم .. صد عنه وهو يطالع العنود بعد ما سحبت سلطان وتوجهة للفلة وبتال واقف ..
حاط يد على خصره ويد ثانية على فمة .. وبهمس / ما بترجع له ..
طارق بهمس وكانه متاكد / تحبه ..
متعب يهز راسه / لا .. هي قالت لي بنفسها .. تعزية ايه ..
طارق بهمس موجع / محد يعرفها كثري .. والله تحبه .. بس جرحها و كبريائها يردة عنها ..
متعب بنفي / لا .. انت ما تعرف العنود .. العنود لو تعذبها سنين .. و تكون سويت لها خدمة وحدة تمحي كل اغلاطك ..
بسبب ذا الخدمة وتحمله جميل على راسها ليوم الدين .. نسي عبدالله وافعاله .. وايش اللي ككان يشفع له ..
طارق يهز راسه وهو يتنهد / لانه ساعد نايف وهو صغير .. وانقذة من الغرق ..
متعب بهمس / بالضبط .. وعلشان هالشي .. كل اللي كان يسوي كانت تسامحه وتساعدة .. العنود شخصية غريبة ..
طارق هز راسه بـ " ايه " / ..........................
متعب التفت عليه وبضيق / راح اكلمها .. واشوف رايها ..
طارق التفت عليه وببرود خارجي / لا .. راح ترفض .. متاكد ..
متعب باصرار / راح اكلمها و ان شاء الله قريب راح تكون من نصيبك ..
طارق صد عنه وهو يحس قلبه بيطلع من مكانه من كثر ما يدق .. ما يبي يتامل .. وما يبي يفقد الامل ..







ــــــــــــ





عند باب الفله ..



هيفاء بهمس وهي ماسكه يد سمر / طيب ..
سمر بضياع تطالع خالتها / .................
هيفاء بهدوء / الحين انتي فاضيه .. اتصلي عليه و طلبي تمشون مع بعض .. اذا هو ابعد انتي قربيه ..
سمر بخجل / ايش اقول ..
هيفاء تنهدت بضيق .. وبداخلها " الله يسامحك يا الجوهرة " .. بهدوء / اللي حاسة فيه .. اللي انتي تبينه يحسه ..
سمر بارتباك هزت راسها .. وبتوتر / الحين اكلمها .. طيب البنات كنت ابي اروح معاهم ..
هيفاء بحزم / البنات راح يعذرونك لو قلتي زوجي طلبني ..
سمر هزت راسها / طيب .. " هيفاء ابتسمت لها .. وسمر راحت لزاوية بعيده و هادية واتصلت على راكان " ..











عند نايف وزياد وطلال وماجد وغيث وسيف و فارس ..





غيث / من البارح ما شفت لا صقر ولا سامر ولا ياسر .. بدر عنده دوام .. وسند طلعت له شغله يقضيها ويرجع ..
طيب هالثلاث وين اختفوا انشقت الارض وبلعتهم ..
فارس باستغراب / وياسر مايرد عليه ..
راكان حس باهتزاز جواله وقف وابتعد عنهم كم خطوة ورد بصوت خافت ..
سيف عاقد حواجبة و بعصبية / ياسر و الثنين اللي يدربون براسهم وراه ماهم عاجبيني يبغى لهم قرصة اذن ..
طلال بهدوء / امس شفت صقر يدخن ..
الكل التفت عليه باستغراب و صدمه .. زياد بارتباك / و مو هو لحاله .. حتى سامر و ياسر ..
غيث بحزم / ياسر .. سند يتصرف معاه .. اما سامر وصقر انا اتصرف معاهم ..
طلال التفت على راكان و شافه يبتسم و وجه متغير .. ابتسم على ملامح راكان اللي تغيرت للافضل ..






راكان بهدوء / هلا ..
سمر وهي تلعب بخيوط الخدادية بيدها اليسار .. واليد اليمين ماسكه فيها الجوال .. وبخجل / اممممم فاضي ..
راكان عقد حواجبة / ايه .. تبين شي ..
سمر بارتباك وتوتر وخجل وخوف مشاعر غريبة مختلطه مع بعض / ....................
راكان يسمع صوت تنفسها السريع اللي واضح بانها مرتبكة .. بصوت خافت / سمر ..
سمر غمضت عيونها وبهمس ممزوج ببحة شوق صادقة / وحشتني ..
راكان حس بحرارة تمشي بجسمه .. وهو اشتاق لها .. ابتسم و بصوت هامس / وانتي اكثر ..
سمر حطت يدها على جدها حاسه بحرارة ومو عارفة ايش تقول / ..........
راكان بهدوء / اطلعي لي عند باب الفله الخلفي .. دقايق وراح اكون عندك ..
سمر بابتسامه و هي وده تصرخ بفرح .. / طيب .. " طالعت بالشاشة وشافت انتهاء المكالمة " ..
وقفت بفرح وهي تاخذ نفس عميق .. توجهة لخالتها هيفاء و ابتسمت لها .. اخذت شيخة وطلعت بدون لا تقول كلمه ..
لطيفه تهمس لهيفاء / الله يهدي جوهرة .. لو تلتفت لبنتها افضل لها ..
هيفاء اخذت محمد الصغير وباست خده بهدوء / والله محد بيخسر بعنادها ذا غيرها ..






ـــــــــــــــــ






برا الفله ..
عند الباب الرئيسي ..
بتال بخوف / نوديه المستشفى ..
العنود بعصبية / ابعد عنا وحنا بالف خير .. " تركته ودخلت للفلة " ..
بتال وقف بقهر و خوف .. رفع يده اليمين ومسح بها شعره .. ويده اليسار على خصرة ..
وبقهر نزل يده اليمنى وعضا اصبعه قهر .. وبهمس / ليتها فيني ولا فيك يا روح ابوك ..










دخلت العنود للفلة بقهر وخوف .. وسلطان صوت بكاه ملء الفله ..
الكل التفت عليها .. العنود شافت زهرة جالسه مع ام محمد و نورة .../ زهرة ممكن تجيبين لي مطهر ..
زهرة وقفت بسرعة وحست بدوخه .. مسكتها ام محمد .. وبهدوء / خلك انتي .. انا اجيبه ..
العنود التفتت على سلطان و باست خده ومسحت دموعه ,, وبحنان / خلاص حبيبي انا ..
سلطان يتنهد و يبكي بين فترة والثانية .. والعنود تمسح اثار التراب و الدموع عن وجهه ..
وقفت وسحبت البرقع عن وجهاا والشيلة .. شالت سلطان وتوجهة للمغسلة ..
نورة عاقده حواجبها / ايش صار ..
الجوري ومعاها الظبي .. والبندري .. توهم يدخلون ...
البندري بالم / كيف سلطوني .. متعور حيل ..
ام عبدالعزيز باستفسار / هو ايش صار للولد ..
البندري / طاح من على الدكة ..
نورة بالم / آآآآآآآآآآآه يا امي انا .. على التراب ..
ام سطام توقف / ابغى اروح اشوفه ..










انتهى ..





لا اله الا الله .. محمد رسول الله ..


سبحان الله و الحمد الله و الله اكبر ..


اعذروني على القصور .. والاخطاء الاملائية ..


كنت ابغى هالبارت اطول من كذا ..
لكن تغير الجو .. وتعب بنتي .. ما ساعدني ..


لا تنسوني من صالح دعائكم ..

اختكم ... مشاعل السعودية ..

السلام عليكم ..


يسعد لي صباحكم ومسائكم و ايامكم بكل خير ..


متابعيني بـ ليلاس ..

اعتذر وبقوة .. عن قصوري معاكم ..
بس منتدى ليلاس ما يفتح من الاجهزة الذكية وما ادري ليه ..
وانا ما استخدم الاب توب الا لكتابة البارت .. وتنزيله ..
اعذروني ..
بس يسعدني جدا ردودكم وتواجدكم .. وتشجيكم لي ..

اتمنى ما تزعلون مني ..

يعطييك الف عافيه عالبارت الجميل تسلمين احلا ميشوو وماجا منك قصور ابد 😘😘والله يشافي بنتك يارب ويعينك حبيبتي