المنتدى :
أريد حلا
خايف اقول الي ف قلبي
ازيكم
أخوكم محمد
مالقيتش عنوان للموضوع غير ده
لأني بقالي حوالي 3 سنين خايف فعلا اقول الي ف قلبي
انا ف ليلاس من 2008 كان طول عمره بيتي
وبعدين سبت البيت وتهت .. ومالقيتش مكان تاني ارتاح فيه غيره
مش عارف بصراحة أبدأ ازاي
يمكن زمان كنت باتكلم براحتي عشان كنت أعرف كل الناس تقريبا في المنتدى الي تقريبا معظمهم ان ماكانش كلهم مش موجود
بس هنا المشكلة برضو
المشكلة في ان الموضوع من كتر ماهو حساس مش عارف أتكلم فيه ازاي واعذروني اذا كنت باستخدم العامية المصرية .. بس كده أنا بحس اني على راحتي
الحكاية بدأت 2003
سنة تخرجي من فنون جميلة
يارب ساعدني
قابلت أجمل بنت في الكون
أصغر مني بأربع سنين .. جارتي وأخت صاحبي ومن كتر منا خايف أكلمها أو حتى ألمحلها بإعجابي بجمالها وبستايلها وبأدبها ما حاولتش أكلمها لمدة سنة كاملة .. خصوصا اني ماكنتش عايز أدخل معاها في علاقة مش قدام الناس .. المهم كنت بخليها تشوفني كل يوم .. حفظت مواعيد محاضراتها .. وكانت دايما بتختار شارعنا تمشي منه .. الأمر الي كنت باستغربه ان بيتنا في شارع أبعد من الطريق الأقصر للجامعة .. وعدت سنة كاملة كنت باتزلزل فيها كل مرة أشوفها .. واتلخبط واعرق لو عيني جات ف عينها .. الأمر الي أكدلي كل يوم اني أقل ما يوصف بيه حالتي .. إني دايب حتى النخاع مش بحب بس ..
لغاية ما جه يوم نتيجة سنة أولى .. كان معظم موظفى شئون الطلبة في الجامعة أعرفهم .. جبت رقم جلوسها والنتيجة بتاعتها قبل أي حد .. وفرحت أكتر منها لما جابت تقدير .. ويشاء القدر أشفها في اليوم ده وهي في كورس صيفي في الجامعة معرفتش أمنع نفسي من إني آخد حجة النتيجة وأفرحها قبل أي حد وتكون فرصة إني أكلمها ..
كانت المفاجأة
شفت رد ف عينيها من غير كلام
اتأخرت كل ده ليه
انا حاسه بيك من أول يوم شفتك
ومستنياك كل يوم تتكلم
وكنت أسعد إنسان على وجه الأرض
..........
ماكدبتش خبر
رحتلها البيت
كلمت أخوها وصارحته
وأخدت أهلى ورحنا لأمها عشان نخطبها " أبوها متوفي " كانت مرحبة جدا خصوصا لما شافت انطباع "ب" انها مبسوطة .. بس : ادونا وقت نفكر وبعدين لسه بدري البنت لسه صغيرة وناخد رأي جدها كبير العيلة وكده .. ماشي أوكي بس ما تتأخروش علينا
بقينا ف 2004
اسبوع اتنين تلاتة شهر اتنين .. مفيش حس ولا خبر
قررت للمرة الأولى أكلمها .. كان في ولد صغير ابن جارنا ف الشارع انا مربيه .. كتبت ورقة صغيرة فيها كلمتين 01000000000 رقم تلفيوني و مستني اتصالك
خد يا كوكو الورقة شايف طنط الي هناك دي اديها والورقة واطلع اجري على طول
ماكدبش خبر كوكو .. وراح : طنط طنط عمو محمد بيقولك خدي <-- الله يخرب بيتك يا كوكو
شايفها من بعيد بتقطع الورقة
صدمة !!
وبعديها بساعة رقم غريب
الو
انا "ب"
قلبي وقع
وكل ذرة في جسمي بترتعش .. استغربت نفسي واتضايقت اني عملت كده وكنت طاير م الفرح و...
الو الو
محمد
يااااااه ع اليوم ده
من غير ما اطول في الموضوع ده
اتكلمنا 5 دقايق عدواا خمس سنين فاكر كل همسة وكل حرف قلناه
بعدين بمنتهى السرعة
2005
2006
2007
محمد لازم تتقدملي تاني .. كل يوم بيتقدملي عريس
مش عارفة أعمل ايه
اتكلمي قوليلهم بحبه ومش هتجوز غيره
مقدرش
طيب أعمل ايه أعمل ايييييييه
أخدت أهلي تاني
ورحنا
المقابلة مختلفة المرة دي
حتى أخوها كان بارد جدا
طيب ادونا وقت نفكر وربنا يقدم الي فيه الخير
4 سنين تفكير مش كفاية !!!
سافرت
كنا بنتكلم كل يوم
وبعدين كل اسبوع
وبعدين مرة كل شهر
وبعدين ولاحس ولاخبر
لا تليفون شغال .. ولاحد يعرف غير صاحبتها
الي بدات أحس انها بتقرب مني وبتبعدها عني
او شايفه حاجة انا مش شايفها
انا مش فاهم حاجة
سنتين عدوا
20/5/2009
رجعت
كنت في الفترة دي عرفت ليلاس بالصدفة وانا بره
ولقيته بيتي
المهم
اتصلت
الو "ب"
ايوة .. مين ؟
!!!!!!!!!
مين ؟!!!!
اه... محمد معلش الشبكة
اتكسرت لأول مرة
مش هي !!
في ايه ؟؟؟؟
مفيش عادي !
هتعمل ايه
في عريس جايلي وماما موافقة عليه
جاي من ايطاليا معاه بتاع 10 مليون وامه شافتني وعجبتها ومش عارف اقولهم ايه
صدمات
صدمات ورا بعض في أول ساعة ليا ف اسكندرية بعد سنتين
طيب .. وبعدين ؟
مش عارفة بقى .. انت عامل ايه ............... لآخر المكالمة على تلفون البيت
ماسمعتهاش
والدنيا ضلمت ....
صاحبتها "ل"
انساها ما تستاهلكش
"ب" عمرها ما حبتك
4 سنين واكتر كنت مخدوع يعني وكان تمثيل ف تمثيل
مش ممكن .. انا بفهم وقبل ماكون بفهم باحس
باحس اوي
ودي المشكلة
سبت اسكندرية ورحت القاهرة
لغاية يوم
10/12/2009
جيت أجازة
ده فرح " ب " النهاردة
مابقيتش عارف أفكر
افرح
اعيط
انسى
أسكر
أعمل ايه
بابا : ماما في قاعة بيتي لامور هي وخالتو خد العربية وروح هاتها
حاضر
ماما وخالتي وواحدة صاحبة ماما ومزة القمر قاعدة معاهم
بتهييس : ماما مين الحتة ؟
ماما : ايه .. نخلصوا ؟
بتهييس أكتر : اساسي هو في كده
مساء الخير .. مساء الخير منورين الدنيا والله
صاحبة ماما : حمد الله ع السلامة ازيك .. ايه الحلاوة دي ماشوفتكش من وانت ف ابتدائي .. "ع" بنت أختي سلمي على محمد
بكسوف ووش أحمر زي القمر : ازيك حمد الله ع السلامة
الله يسلمك ازيك انتي
ماطولش : 5 ايام وكانت " ع " خطيبتي
1/1/2010
كانت المدام
1/11/2010
كانت ام بنتي
1/11/2011
كانت طليقتي
غلطت غلطة عمري
عاندت نفسي
اتجوزت .. من غير ماحب
صحيح قلبي اتقفل
غالطت نفسي لما قلت العشرة والايام هتخليك تتعود
وتيجي المودة والرحمة بعد الجواز والأطفال
زي ما بنسمع
كل ده غلط
مفيش حاجة من دي
معرفتش أحبها
كنت باكدب على نفسي وعليها وعلى كل الناس .. انا بحبها وعايشين أجمل ايام
وانا ماشفتش معاها يوم حلو من ايام الخطوبة لحد ما انفصلنا
مش عيب فيها لا سمح الله
عايز أقول .. انها واحدة فيها كل مميزات الزوجة المثالية
يعني متربية وبت ناس ومتدينة وحلوة - اوي - ومفروض انها حبتني
بس في قاعدة مؤمن بيها ف حياتي
الي بيطلع م القلب بيوصل القلب .. والعكس صحيح
كلكم هتقولولي غلطتك
وان كان
المشكلة بدأت
من اول يوم خطوبة
عرفت اننا مش هننفع لبعض
هي يمين
وانا شمال
بس اتصدرت
غير كده .. كنت باحس طول الوقت اني كنت معوض جزء كبير مفقود عندها وهو موت والدها .. المشكلة الي كانت مأثرة ف نفسيتها جدا .. لإحسساها بإنعا كانت أحد الأسباب .. وده مش صح .. فكانت على طول تناديني بابا
بس كانت فيها كمية مشاكل نفسية كتير .. الي حاولت أحلها واحدة واحدة .. ناهيك عن التربية الغلط .. وعدم المسئولية .. وحاجات غريبة زي موضوع العفاريت الي عايشين معاها طول الوقت " السبب الأساسي للإنفصال"
مش عارف .. كتير كنت بشوفها " ب " بس عمري ما غلطت ف اسمها وعمري ما حكيتلها عليها
طول الوقت كنت باكدب عليها " بحبك " وعمري ماحبيت غيرك
لغاية يوم 1/11/2010
رقية
بنتي
أجمل شيء حصلي من يوم ما اتولدت
آسف مش قادر أكمل
عشان مش عارف أمسك أعصابي ولا عارف أمنع دموعي من النزول
ليا عودة
|
04-05-12, 10:30 PM
جديد مواضيع قسم أريد حلا
العرض الشجري
