ۆش ﭠبﯾن ﭬﯾ פﯾآﭠﯾ




لين كلمتني عن اللي صار بينها هي وسارا من كم يوم وسارا معصبة وزعلانه للحين حتى تسب في غالية !
: يا بنت الناس و الله ما راح آخذها وش فيك انت
سارا : وش يضمن لي بكرة خواتك يفرون مخك وتتزوجها
سعد : سارا خلك هاجده ولا ترى بنفسي بتزوجها
سارا : ما اقدر ما اقدر حس فيني
سعد : ما تثقين في كلامي
سارا : خايفة
سعد : خلي عنك الكلام الفاضي و تجهزي بنرجع اميركا
سارا : شلون ما فهمت
سعد : خلاص ما لي لزمة هنا الشغل ماشي وكل شي زين
سارا : وليش تبينا نسافر و لا هذي حيلة عشآن تبعدني وتآخذ غالية في الرياض ؟!
سعد : ربنا افرغ علينا صبرا و توفنا مسلمين
سارا : هذا الصدق
سعد : لا مو الصدق و تراي قلت غالية بس اللي ما راح اتزوجها يعني فيني اخليك هنا واروح اتزوج غيرها هناك
سارا : لا خلاص متى بنسافر ؟
نآس ما تفهم بالطيب !!


***



في فرع البرازيل الاوضاع هناك متلخطبة من كم يوم توصلنا شكاوي وطلب مساعدة الوالد رافض إن نواف يروح يقول أنا بعطيهم فرصة ، فرصة على وش الخسارة !!
كنا ببيته نتعشى سوا هند عند أهلها اليوم
سيف : ما سمعت خبر عن سعود !
هالاسم يجيب لي القرف من هو سعود ذا بعد ؟! تميت اناظر لهم اسمع كلامهم
نواف : يبه جدته وين ساكنه
عبد العزيز : صح جدته راح تفيدنا كثير
سيف : اسأل امك اكيد انها تعرف
نواف : أمي !! وش دخلها
سيف : وش اللي يمنع انها تدخل رح لها تعلمك
نواف : على طاري أمي العروس رفضتني
سيف : غيرها كثير
عبد العزيز : انت اصلا ما تبي العرس ولا احد يطلب بزر ؟!
نواف : مسوي كآشفني مع وجهك
عبد العزيز : تبي تقنعني إن وجهك أحلى مني
نواف : إيه ببساطة اقولها بعد شفت القمر اللي جالس بجنبك وجهي هو وجهه
عبد العزيز : هالمرة فزت
ابتسمت عليهم حتى هم يمزحون على بالي بس البنات ههههههههه
الكل سكت كان هدوء ، كسره جوال نواف اللي رن بمكالمة دولية
: يبه هذا الرقم من البرازيل
سيف : رد طيب ، بعد عنا شوي ورد ..
لفتتني طريقة كلامه كان يتكلم باللغة البرتغالية بطلاقة لو ما اعرفه كنت اقول اتحدى انه يعرف عربي كان واضح انه معصب كثير نواف كان هادئ و طيوب حيل في معاملته لنا ؛ صوته ارتفع حتى سيف خاف وقام يبكي التهيت اسكته انتبهت بعدها لنواف يقعد جنبي مسح على راس سيف ولدي
: آسف خوفتك
سيف : وش فيك نواف صاير شي
مسح على وجهه وتنهد : يبه لازم اسافر في اقرب لازم اعالج الوضع يكفي كذا !
سيف : اصبر بعد
نواف : يبه كل شي بيروح تكفينا خساير لا تقول اصبر مافيني
سيف : ما خسرنا شي ، لا تخرب خطتي
عبد العزيز : كيف ؟
سيف : كل شي بوقته
رجع الهدوء حبيت اغير الجو : نواف اسمع وش يقول ، حبيبي تكلم
ما تكلم كأنه اللي يكذبني !
نواف متعجب : نطق !!!!!
غالية : يعني تقدر تقول
دلال : قال بابا نواف !
هدأ على طول وابتسم : جد يا روح بابا انت تعال
دلال بنذاله : لا تفرح واجد اكيد مو واعي وش قال
نواف مبتسم : المهم إنه قالها ؛ بعد اذنكم
اخذه متجه بيطلع فيه برا البيت
عبد العزيز : ما راح تتعشى معنا يا قمر
نواف : لا تحسبوني معكم

***

فارس : يمه اصبري شوي علي واذا على وليد قلت لك زوجيه من قبل عادي انا راضي موافق
أم فارس : ...... < زعلانه
هنادي : فارس مالك داعي وربي هذي هند لقيتها وكلنا انا وهي وشروق متزوجات دانية طفلة وش تنتظر بعد
فارس : هنودي التهي بولدك خليني في حالي
شروق : سبحان الله كأنه حاس ما تمنيت احد لفارس الا هند بس كانت له نظرة يشوفك مثل اخته وفعلا انتِ اخته واختنا
ابتسمت ما قلت شي
هنادي : هند علميه قوليله يمكن ما يردك
هند : أنا ببالي وحده من زمان أتمناه يآخذها وكنت بصير اخته عشان بس اشور عليه
كان فارس اسرع واحد وجه نظره لي تم يناظر فترة حولت نظري لهنادي اللي قالت
: من هي ؟
أم فارس : تعرفينها وش هي أخلاقها بنت من وش وضعها ؟
وزعت نظري عليهم واستقريت فيه على فارس إللي كأنه حاس وش بقول
: غالية بنت عمي سيف
شروق : مرت رائد صديق فارس اللي مات !
فارس : يمه أبيها ؛ رضاك علي
ما عطيتها فرصة تتكلم ، قمت تركت لهم المجلس .. سآمحني رائد بس كذا اقدر انفذ وصيتك

***

سعود بحده : يا جده وش هاللي راسلته لي الف وش تسوي اطرك أنا ؟!
جدة سعود : ماعندي غيرها تبي شي تعال لي
سعود : مآبي منك شي يالعجوز من زينك حتى أجيك شرهتك على اللي داق عليك معتبرك آدميه يلا وخري
قفل بعد ..!
: وش القرف اللي أنا عايشه بس ما راح اتنازل هالحبوب بآخذها لعيونك يا .. يا دكتور فارس ، مرة ثانية مد ايدك علي و خذ مني حبيبتي
طلعت متجه للمكان اللي تواعدنا فيه ، أبي استلم طلبي


شۆﯾ آخلآق̮ـ̃ ؛ آلﮃنﯾآ ﭬآنﯾة


***

طلعت لغرفتي أبي ارتاح دق علي نواف
: ابو محمد تعال بسرعة
فارس : وينك أنت ؟
نواف : أنا عند بيتكم يلا بسرعة انتظرك
فارس : يلا يلا جآي
قفلت منه و اخذت مفاتيحي و نزلت بسرعه وش عنده ..!
: نواف ؛ خير وش فيك ؟
نواف مبتسم : هلا ابو محمد
فارس : خوفتني تكلم
نواف : ما في شي بس اوريك ولدي
كان يضحك وهو شآيله قربت منه : أهلا بالشيخ سيف أزعجك هالدب
نواف : لو ازعجته ما كان قال بابا نواف
فارس : وخر بس هالنقطة يتكلم لا يقول بابا و نواف بعد كثّر منها
نواف : براحتك
سكت خليته صرت ألعب الصغير
نواف : فارس هالولد أمانتنا
فارس : بالله عليك ! مسوي جبت شي جديد يعني !
نواف : و أمه ... أمانتك
أنا حاس من قبل جيته فيها إنَّ : نواف حياك تفضل
\
قعدنا بالمجلس ما عطاني فرصة ارتاح
: نواف بتتكلم ولا شلون ؟
نواف : فارس أنا بغيب عن البلد ظروفي اضطرتني لازم ارجع البرازيل ومدري متى برجع
فارس : متى بتروح ؟ وليش صاير شي ؟
نواف : مدري بس قريب عشان الشغل ! فارس مآبي اطلبك فوق طاقتك بس مضطر
غالية وسيف ، وأبوي سيف لا تتركهم أمانتك
دامه بدأ راح يسهل علي مدري لو هذا قصده او لا بس الحين وقته
: نواف اختك غالية ......

***

خلصت عشاي قبلهم طلعت لغرفتي ، شفت عبد العزيز وهو طالع وبعد نواف يومه يرجع سيف رحت لفرآشي خلاص بنآم لي كم يوم مارحت للمعهد طق بابا غرفتي
: حياك غلو ما بعد أنام
سيف : بس غلو اللي تدخل ولا عادي أنا
قمت وقفت : حياك يبه ليش ما طلبتني أنا اجيك
سيف : ماله داعي وبعدين ابي اشوف ديكور غرفتك الجديد
دلال : أعجبتك
سيف : مذوقه من يومك
دلال بفخر : طالعة على الذويق
سيف : ادري وراك دوام ، ما ودي أعطلك عن نومتك بس بغيت ردك الرجال ينتظر طولتي عليه
دلال : زعلتك مرة ما ودي اكررها
سيف : أنسي الماضي ما راح اتدخل في قرارك
دلال : رأيك يهمني
سيف : قلت لك من قبل محل ثقة و الشور لك
دلال : بابا أنا مو موافقة

***

عبد العزيز : وش قالت خالتك
هند : اكيد تبي لبكرها افضل من وضع غالية
عبد العزيز : معها حق ولاحد يقدر يقولها شي ولدها
هند : أقولك شي وما تزعل !
عبد العزيز : أزعل من قلبي
ابتسمت بخجل : أنا شفت رائد وهو يموت وقبله شفت شلون كان يوصي على غالية ، وصى نواف على اولاده بس وصى فارس على غالية كثير ثم وصااه على اولاده
عبد العزيز : اعرف بالوصية بس المفروض تكلميه بينك وبينك
هند : ما صدقت يوم سألتني هنادي على طول حكيت خصوصاً إن فارس يبي غالية
عبد العزيز : من جدك !
هند : ما امداني اخلص كلامي عنها الا وهو يقول اخطبيها لي يمه لو تدري كيف كان رافض الزواج كلهم يعانون منه
عبد العزيز ابتسم : الله يكتب الخير
بصراحة فارس و نعم الرجال ما ينرد ...
عبد العزيز : ليش ما طفيتي النور ؟ وراي دوام !

.
.
.
.

تم الجزء السادس و الثلاثون

الجزء السابع و الثلاثون ~


ﯾۆم̝̚ م̝̚عھَہّ .. آخۆﯾـ:
اليوم العصر قعدت مع معاذ وشروق وليد في الصالة احكي لهم اللي صار قبل كم يوم عند دانية معاذ غريب وهو يحكي
معاذ : يعني هي رفضت عشان كذا امها زعلانه منها
دانية : اتوقع ايه ما قالت لي كل شي امها دخلت وطردتني وجع ذي الام فديتك ميمتي
معاذ : زين
استغربت رده بس ما علقت
شروق : الله يعينها على ذي الام
دانية : شوشو ملاحظة انك ساكنة عندنا ابي افهم ليش عندك بيت بس ؟
عطتني وحده من نظراتها ما خفت : ترى ماعدتي تخوفيني لاني شفت وحده تخوف اكثر منك
سفهتني لفت على وليد : وليد دام فارس قرر يتزوج خلنا نفرح فيكم سوا
وليد : توني بدري
معاذ : لا تكفى وليد عجل انا بعدك
وليد : تقدر تتزوج قبلي
معاذ : لا ما يصير بس انت لاتبطي
حسيتهم يتعازمون : اقول انت وياه شكلي بعرس وانتم تتعازمون شروق من هي عروسك
شروق : وحده ما تعرفينها اضمنها لكم
قآم وقف يبي يطلع : اللي تشوفونه مناسب أنا موافقكم
ابتسمت من حركته شكله خجل !

***

لي مده خالد محاربني ما يحكي معي ولا يناظر لي ولا شي حاولت كذا مرة بس هو يصدني
شعور غبي انك تحس احد متجاهلك في الوقت اللي انت تبي رضاه من كم يوم تراودني فكرة اني اترك له البيت باللي فيه كرامتي فوق كل شي
شذى و رهف مو صغار كل وحده بعد تقدر تقوم بنفسها وابوهم عندهم مو ناقصهم شي اصلا هالشي المفروض من زمان اسويه
اختي رشا من بعد سالفة رهف ما كلمتها ، رفعت سماعتي دقيت عليها
: شلونك ام عبد العزيز عساك بخير
رشا : نقول الحمد لله
فايزة : سامحيني على رد بنتي الغبي ولا نواف ما ينرد
رشا : صار خير اصلا هي بزر انا كنت ابي له شذى بس هو قال رهف
فايزة : الاولاد بيفرقونا يا اختي
رشا : لا تقولين كذا وانا اختك ما عاش من يفرقنا
فايزة : أنا قررت و ما راح اتراجع بترك له البيت بس بالاول ابي ازوج متعب كاسر خاطري على انه نسخه من ابوه
رشا : وان شاء الله لقيتي له العروس
فايزة : و الله توني ابدور
رشا : زين قلتي لي لا تدورين ولا شي
فايزة : ليش عندك ؟
رشا : ايه بنت سيف دلال وهل يخفى القمر
فايزة : دامه شورك ما راح اتردد بكلمه وارد لك خبر
رشا : انتظرك حتى أكلمها

***


قاعدين أنا وياه في جلسة خارجية هادئة الجوو جداً جميل خصوصاً ان الفترة ربيع
نواف : يبه مقتنع
سيف : بس ما اقدر اكلمها من قلت لي وأنا افكر شلون احكي معها
نواف : خلاص خلها علي المهم انت موافق
سيف : أكيد موافق ولا فارس ما عليه كلام ، بس هو ليش ماطلبها مني
نواف : ما قال ليش على انه اعتذر مني اتوقع يبي موافقة غالية بالاول لان الوضع حساس لهم الاثنين
سيف : دلال بعد وافقت على متعب
نواف : يستاهلون بعض متعب رجال على انه شديد شوي
سيف : ما عليك بالظاهربس أما داخله كله حنيه ؛ مثلك !
نواف : تعرفه زين يبه ؟
سيف : تعاملت معه كثير هو وابوه
نواف : صح العم خالد كثير طيب
سيف : الله يكتب اللي فيه الخير و عقبال افرح فيك انت اللي بقيت
نواف : إن شاء الله قريب ، بعد إذنك

\

أخذني نواف لمشوار خارج البيت من زمان ما شفت الشوارع كذا ولا الناس أصلا حتى من قبل ماكنت اشوفهم كل وقتي بالبيت
كنا في السيارة اللي صرت اخاف منها
: وين تبينا نروح
غالية : مثل ما تبي
نواف : لا انتِ اختاري أنا بكيفك
غالية : آممممممم أنا مآعرف مكان يعني مافيه مكان شدني لا سوق و لا مركز ولا اي شي مآعرف شي في الرياض
نواف : من جدك ! عايشه فيها سنوات عمرك ماتعرفينها
غالية : رائد ما كان يطلعني هنا اعرف اوروبا بس هنا لا
ابتسم لي : الله يرحمه ، تصدقين غالية كنا انا وياه بس نجتمع بمكان تولع حرايق سبحان اللي يغير كنت كارهه وانعكست مشاعري بلحظة يوم مات بكيته
غالية : أنا مدري عن طبيعة علاقتكم بس رائد مافي منه ليتني رحت بداله
نواف : لهادرجة تحبينه ؟
غالية : ماشفت بحياتي الا هو ، في حياتي بس شد علي في موضوعين او ثلاث الباقي لا و الله شاهد كان معي رجال بكل معانيه
نواف : لاحظت هالشي الله يرحمه و يوسع عليه
غالية : آمين
الحين أنا طلعت معها عشان اكلمها في موضوع فارس اروح لها في موضوع رائد !!
غالية : نواف راح تسافر بدون ما تتزوج ؟
نواف : شوفت عينك بنت خالتي رفضتني وش اسوي ؟
غالية : البنات كثار
نواف : تعرفين لي عروس ؟
غالية : آممممم لا مآعرف
نواف : زين معك فرصة لين ارجع من السفر
غالية : اعفيني خل دلال تشوف لك أنا مقدر
نواف : بس تقدرين تكلمين ابوي عني
غالية : من عيوني
نواف : زين يلا انزلي ، اليوم بتتسوقين من الرياض ولا اوصيك في ولدي
غالية : إيه و الله يحتاج ثياب اكثر خصوصا انه مشاغب يزحف لكل مكان
نواف : الله يحفظه

***

على العشاء أنا وابوي و هند و دلال اللي بحضنها سيف الصغير ، غالية و نواف للحين برا
: هند و عزوز متى ناويين ان شاء الله تجيبون لنا نونو بعد
هند : تونا اسم لله علينا
عبد العزيز : ما صار لنا 3 شهور متزوجين لسى بعدين تونا صغار خل نعيش حياتنا ولا وش شورك يبه
سيف : لا تدخلوني بينكم أهم شي عندي هالصغير يكفيني
عبد العزيز : لا و الله زين علمتنا ما راح نجيب الولد لين يكبر هالمفعوص حتى أنا ابي ولدي يلقى شوي دلع من جده
دلال : سيف مو مفعوص
عبد العزيز : الا مفعوص و نص شوفي شلون جسمه رائد اصغر منه وصحته أحسن بفرق
هند : الله يهداك بس تقارن رائد اللي من انولد وهو بحضن امه بسيف
عبد العزيز : وش الفرق بتقولون لي نفسيات مثلا !!
دلال : أتمنى انك ما تفتح على نفسك باب سيد عبد العزيز ، النساء و الولادة و رعاية الطفولة تخصصي بس ما يمنع ان هند توضح لك
هند : ايه يطولي بعمرك النفسية تتأثر و تراه يعرف امه لو اقعد اعدد لك وش بعد صدقني بتسكتني
عبد العزيز بسخرية : لا من جدك انتِ ويآها
عطيته نظره يستهزأ بكلامنا الدب : على فكره له شهر يحبي ويزحف ولا مو شايف ؟
عبد العزيز : ما شاء الله
بعد صمت لثوآني ....
سيف : سعود لازم اشوفه ، بعطيك عنوانه جيبه لي بس انتبه منه
عبد العزيز : لقيته يبه
سيف : ايه جدته دلتني عليه ، بس وضعه ما يطمن
عبد العزيز : ما عليك يبه أنا لها اعتمد

***

ما قدرت امسك نفسي ما ادق عليها من خلصنا عشاء رحت لغرفة دانية اخذت جوآلها ودقيت على رهف
: هلا دانية
معاذ : رهف انا معاذ
ماتوقعت لهادرجة حاله معقوله داق علي : معاذ !! وش تبي
معاذ : مشكورة كثير دانية صدقيني ما راح اضيع اللي سويتيه وبتشوفين صدقي
رهف : معاذ يرحم والديك دور غيري أنا تعبت نفسيا وكل شي اساساً انت وش لقيت فيني مو رشيقة ولاني جميلة
معاذ : ما يهم قلبي اللي اختارك أنا حبيتك ولا تسألين ثاني
رهف : وصلت لحب بعد ! معاذ لازم اقفل
معاذ : انتبهي لنفسك و صدقيني ما راح تندمين
يا ناس معاذ توه 16 سنة وانا بعد صغيرة ... وش يحس به !!

***

طفشتني وصلتني حدي غالية قاعده تتسوق تقولون ماعمرها دخلت سوق كل مكان دخلته ؛ هي فعً ماعمرها دخلت سوق !
: غالية بتمشين ولا ترى بروح اخليك ترجعين بتاكسي
غالية : نواف الله يخليك بس هالمحل شكله جميل
نواف : تعالي الحين و مرة ثانية انا اجيبك
غالية : لا الحين هالبدلة معجبتني شكلها تنفع لسيف
نواف : امري لله
من يصدق غالية على هدوئها وقعدتها بالبيت ولا لها بالاسواق الحين ما تبي تمشي منه !
الاكيد ان موضوع فارس بيصبر يوم بعد ، بس وش وراي دام الوالد للحين ما صرح لي اسافر وشكله مطول
كنت واقف انتظرها عند الباب معي الاغراض اللي شرتهم ما شاء الله ما كأن من كم يوم وصلت لها ثيابها و اغراضها اللي هي طالبتها
: مشينا نواف
نواف : على البيت
ابتمست له : ايه على البيت

***

سِعٌوًدّ ... يِأَ أٌبِنِ أُلّعًمّ !




اليوم لي شهر بس من عرفت ان سعود ولد عمي ، اللي كان بابا يدور عليه هو نفسه سعود الممرض اللي كان معي في المستشفى اذآني
اول ما جابه بابا البيت عرفنا عليه انا من شفته عرفته شهقت باسمه هو قال انت غالية الممرضة ما قدرت اتكلم طلعت تركتهم
يحاول يكلمني انا ما تركت له مجال هربت خليته صرت اخاف مدري ليه دايم مآخذه ولدي بحضني وقاعدة بغرفتي ، من شوي طلبت مني دلال انزل معها المطبخ تبي تصلح حلى قهوة ما رفضت على اني خايفة لان سعود يجي بيت بابا كثير من عرف اني فيه


***


: تصدق بعمري ما توقعت ان سعود يقرب لك حتى يصير ولد عمك
نواف : محيرني سالفة انه كان بالمستشفى اللي فيها غالية وبعد معاملة غالية له وخوفها منه ؛؛ صارت دايم تسأل سعود موجود ولا لا نفسي افهم !
فارس : انا بقولك اللي اعرفه معذرة لان الكلام ما راح يعجبك بس لازم اقولك عشان تنتبه على خواتك
نواف : خوفتني تبي الجد
فارس : بقولك هذا يسلمك ربي كان معنا ممرض له سلوك غير طبيعي على انه شاطر في عمله بس عليه مزاج المهم انه يزعم انه يحب اختك وياما سوا اشياء غير اخلاقية اذكر مرة تهجم عليها في استراحتهم في المستشفى الله ستر و ارسلني لها كنت رايح اهاوشها ليش مداومة وهي حامل و تعبانة
نواف : الخسيس الواطي اوريك فيه
فارس : اهدأ نواف سالفة عدت ذكرتني برائد يومها قال بشرب من دمه هديتيه و قلت له غالية مالها ذنب
نواف : زين علمتني انا اقول ليش ابوي يقول وضعه ما يطمن ! فاتحين له بيتنا اجل
فارس : هذا ولد عمك ويمكن تغير يوم عرف انكم اهله
نواف : تتوقع ؟
و الله ما اظن ولا واحد بالميه بس وش اسوي لازم اهديك ، اعتدلت بقعدتي ثم قلت له : نواف غالية وش ردت


***


امس كانت ملكتي أنا وليد كل شي تم بسرعة ما بعد تحدد الزواج بس فرحانه كثير فيه واضح انه طيوب بس لاحظت انه حيوي شوي وهادي بعد
كانت معي الجازي
: متى نمتي امس
لين : مدري بالضبط بس كان بعد الفجر
الجازي : ومتى صحيتي
لين : قمت على اتصال فوز
الجازي : يالله من زمان عنها هالبنت كيفها وعلومها
لين : بخير أبشرك هي بعد بتتزوج ولد عمها اللي يموت عليها
الجازي : الله يتمم لكم جميع
لين : آمين


***



سعود : الحين يعني هذا دكتور العائلة ولا صديق ؟
عبد العزيز : لا صديق كان صديق رائد الله يرحمه و الحين صديق لنا ككل و اهم شي نسيب
سعود : آهااا تقولي .. طيب وش علاقة رائد فيكم
تعجبت من سؤاله وكأنه يعرفه من قبل : رائد يصير رجل غالية ابو سيف اللي تشوفه
معقول غالية زوجته وهذا ولده يعني مو ولد نواف ؟ أجل ليش يقول ولدي !
: شلون مات ؟
عبد العزيز : في حادث سيارة الصيف الماضي حتى واحد من اولاده مات بعده
سعود : ليش عنده ولد اكبر من ذا كان معه بالسيارة وقت الحادث ؟
عبد العزيز : لا كانت غالية معه لسى ما ولدت كان معها توأم اولاد واحد مات وهذا اللي بقى
تبون الجد استغربت تحقيق سعود حسيته مخبي شي خصوصا طريقة تلقي اجابات اسئلته مني نفسي افهم
ما اهتميت كثير توجهت معه لبيت الوالد

***

نزلت لدلال المطبخ وهي تصلح الحلى قاعده تسولف علي لين جينا لسالفة سعود
: نفسي افهم ليش انتِ كذا مع سعود ما شفت منه شي
غالية : دلال تذكرين سعود الممرض اللي اذاني في حياتي
دلال بصدمة : لا يكون هذا هو ؟!
هزيت راسي بالايجاب : دلال أنا خايفة منه اخاف هو قتل رائد كان يرسل لي رسايل يهددني نبهت رائد اكثر من مرة بس ما سمع لي
دلال بحده : لا غلو ما يصير تتهمين الرجال يعني ما توصل لهالمرحلة !
بكيت : انت ما شفتي وش كان يسوي ما شفتي الكره لرائد و فارس ولي بعد منه
دلال : ولو هذا ما يعطيك الحق انك تتهمينه باطل هذا حادث مقدر ومكتوب
سكت رجعت ذاكرتي لآخر مرة شفت رائد فيها اذكر كيف ضمني يحميني من الضربة القوية اللي استلمها عني راح بدالي ليتني انا اللي رحت مو انت
: دلال انت ماشفتي رائد وقت الحادث يوم شاف مافي مفر قدم نفسه للموت حماني
دلال : استغفري ربك لاتظلمين الرجال هذا يومه خلاص
ما اقتنعت بس سكت لازم اعرف الحقيقة و بطريقتي اتمنى تكون برئ يا ولد العم !
دخل عبد العزيز : بنات انتم هنا زين وين هند ؟
دلال : ما بعد رجعت من اهلها
ابتسمت من شفته الله يسعده له معزه خاصة بقلبي فديت اخواني : عزوز ورنا ابداعك تعال اطبخ معنا
عبد العزيز : ان شاء الله كم غالية عندي ؟

***

معاذ : متى بتخطبون له رسمي ؟
هند : وضع غالية الحين ملخبط شوي
معاذ : عجلوا علينا
شروق : وش عندك ليش مستعجل
دانية : واقع في الحب هالشخص
معاذ شآد على اسنانه : متعينا بسكوتك دودي
دانية بنفس نبرة معاذ : إن شاء الله مودي
أم فارس : بس انت وياها لا تبدون ، يمه هنادي تبين شي اسوي لتس شي
هنادي : لا يمه مو مشتهيه شي
أم فارس : ما يصير كذا ما تآكلين مو زين لتس و لولدتس
هنادي : شوي يمه بس اشتهي شي بقولك
أم فارس : استنى ، وانت يمه هند كيفتس مع رجلتس مرتاحه
هند : الحمد لله يمه مرتاحه
أم فارس : مو مخبيه لنا شي فرحينا انتِ الثانية
هند : تو الناس بدري حنا متفقين الحين ما نبي عيال
أم فارس : الله يرزقكم الذرية الصالحة
هند : آمين
أم فارس : وأنت يمه شروق
شروق : يمه وش فيتس قلت لتس من قبل
أم فارس : وتبين اعيد وش انا قآيلة من قبل
شروق : يمه خلاص يصير خير
أم فارس : الله يرزقتس العقل
لفت على البنات الكبار تتطمن وانا ولا عبرتني
: يمااااه وانا نسيتيني اشوف
أم فارس : أنت وش بتس مقابلتني وماغير هواش ومناقر مع معاذ
دانية : ترآي زعليت

***

ﯾآ ق̮ـ̃آﭠلﯾ ۆآبن عم̝̚ﯾ ، ھَہّل لﯾ بگـلم̝̚ة

خلصت طبق الحلو اللي سويته ، شبعت ضحك على عزوز يهايط يقول اعرف خرب الاكله بس قلت بطلع اشوف ولدي له فترة لحاله تركته نايم دلال اخذت عزوز ما يطلع لين يضبط الحلى
مشيت في الصالة باتجاه الدرج طالعه فوق نبهني صوته
: غالية
اخترعت لفيت بسرعة : خير وش تبي
سعود : أبي اكلمك
فكرت هذي فرصتي انا بعد اعرف منه لو له دخل بالسالفة
: وانا بعد ابي احكي معك
ابتسم واشر لي اقعد قربت منه بس تميت واقفة بينا مسافة
: لا مرتاحة كذا
سعود : طيب انا بقعد
غالية : انت وش يجيبك هنا ؟
سعود : جيت مع اخوك عبد العزيز
غالية : سؤال واحد جاوبني بصراحة مو غيرها فهمت علي
سعود : تفضلي حبيبتي
غالية : لا تقول حبيبتي انا مو حبيبتك هذا اولا ثانياً حادث رائد لك فيه ولا لا
ابتسم ابتسامة جانبية وهمس : عرفت بالحادث الله يرحمه صح ماعزيتك عظم الله اجرك
غالية : سعود انا سألت ابي اجابة انطق خلصني ايه او لا
سعود : وش بتستفيدين لو عرفتي الحين انا ولد عمك ما تقدرين تأذيني على الاقل عشان ابوك
غالية : لآخر مرة اقولك جاوب
قام وقف قرب مني كثير مسك ذراعي : ما راح اكذب عليك ايه لي علاقة تبين تعرفين وشلون انا اقولك كنت مراقبه شفه يوم حط سيارته في المغسلة تسللت و لعبت فيها من داخل بحيث انه لو يبي يخفف السرعه تزيد و بكذا صار الحادث
كلامه كله طنعات بالسكين على قلبي حسيت واحساسي صح رائد مات بفعل فاعل
: انت انسان انت !
سعود : صدقيني ما دريت انك معه في السيارة ولا كنت اعرف انك زوجته توني بس اعرف فرحت يوم عرفت انك نجيتي و فرحت يوم مات بس اللي زعلني ولده باقي ليش واحد راح و الثاني لا
وجعني في ايدي وبعد قاعد يقول لي كلام مثل السم صرخت فيه
: بعد عني يا نذل يا شيطان اشك حتى ابليس يتعلم منك
سعود : ليه بس كذا بس دامك حبيبتي بمشيها لك
غالية : صدقني ما بتتهنى باقي عمرك برميك في السجن مثل الكلب لين اشوف نهايتك
سعود بوقاحة قعد حط رجل عل رجل : ما تقدرين أنا ولد عمك وبصير زوجك بعد وغصب عنك
غالية : ما راح يروح دم رائد هدر ، طلعت تركته
سعود : يمه ، خفت !
غالية : سعود بقول لك كلمة ؛ أنت حقير


***

طلعت من الشركة متأخر رحت لرشا مدري وش مآخذني لهناك بس حسيتني احتاج اشوفها
سيف : لمتى بتظلين كذا احكي وخلصيني
رشا : سيف والله ما اعرف قلت لك
سيف : نفسي اصدق
رشا : هالمرة صدق
تنهدت صعبة هالحرمه كثير : على فكرة ، دلال موافقة
رشا : زين الله يبشرك بالخير بكلم اختي
سكت خليتها ما رديت ....
رشا : سيف احسك تعبان فيك شي
سيف : لا ما فيني
رشا : لا تكذب علي اعرفك زين انا
سيف : جيبي لي بنادول بصير كويس بس مصدع
رشا : زين ، قمت رحت اجيبه له
عطيته اياه و قعدت اهمز راسه و اقرا عليه ما تحملت اشوفه متألم ..
كنت شبه منسدح عندها في الصالة مو حاس بنفسي وش هالصداع اعوذ بالله فجأة حسيه يخف لين راح تمام ما قدرت امنع نفسي اني انووم كنت احتاج اريح جسمي

***


فارس : طيب الحين انت بس خلك هادي و انتبه بس على خواتك منه
نواف : لازم اجل سفري على كذا ، الفلوس تتعوض بس خواتي لا
فارس : زين انا اشوفك بكرة ان شاء الله وانتبه على عروسي
نواف : لاتوصي ، الله معك
فارس كان موصلني لبيت امي ، دخلت لقيتها قاعدة بالصالة
: السلام عليكم
رشا : و عليكم السلام هلا يمه شلونك
نواف : بخير تعشيتي يمه
رشا : لا انتظرك وانتظر ابوك
نواف : ابوي بيجي للعشاء
رشا : ابوك هنا نايم شكله تعبان
تفاجأت ابوي عند امي بس ما اظهرت : خير يمه وش فيه تبين آخذه المستشفى
سيف : ما يحتاج انا صرت بخير
نواف : كيفك يبه طمني عنك
سيف : بس صداع لا تخاف ما فيه شي بس وصلني لبيتي
رشا : سيف اقعد انت ما قعدت بعدين نتعشى سوا
لأول مرة اشوفهم سوا بعد مدة طويلة حتى انا بغيت آكل بين ابوي وامي
: ايه يبه اقعد نتعشى و اوصلك من عيوني
سيف : طيب بقعد بس خواتك
نواف : عزوز و زوجته هناك و سعود بعد
سيف : سعود مع البنات ؟!
نواف : ايه
سيف : زين اسمحولي لازم اروح خلوها بوقت ثاني
طلع بسرعة كأنه خايف من شي !!
حركته اثارت جنوني بس مسكت نفسي ، أدركت إن سعود مو سهل أبداً

***

من طلعت لغرفتي قفلت علي الباب أنا اعرفه سعود حقير حسافة انه ولد عمي ، سبحت ولدي و لبسته وعطرته أنتظر بابا يجي بسلم عليه لي كم من يوم ما قعدت معه زين
طق علي باب غرفتي ....
: افتحي غلو أنا سيف
فتحت له وارميت بحضنه بكيت ادري انه خاف من ردة فعله اللي حسيتها فيه
: غالية بابا ليش تبكين أنا هنا معك
غالية : بابا الله يخليك اسمعني اللي بقوله صعب بس لازم تسمعني وتصدقني بعد
سيف : شوي شوي واهدأي خليني اسمعك
هديت أخذت نفس ثم قلت له : بابا سعود مجرم ، هو اللي قتل رائد

***

ما كذبت رشا يوم قالت ولد اخوك ضيع نفسه .. ليش كذا يا سعود ليش مو قادر اصدق
طلبت سعود يجيني أبي اتأكد منه ما طول علي جا
: خير ياعم طلبتني
سيف : وش بينك وبين غالية يا سعود
سعود : مابينا الا كل خير يا عم وبصراحة أنا أبي بنتك غالية على سنة الله ورسوله
سيف : تعرف ان الدكتور فارس خطبها و عطيناه كلمة
سعود : بس انا ولد عمها ، عمي سيف
سيف : سعود أنت مالك شغل بسالفة حادث رائد صح
سعود : معقولة يا عم تصدق فيني أنا ما كنت بقولك اعتبرته كلام فاضي منها بس الحين بوضح لك
سيف : اسمعك انا
سعود : أنا كنت زميل لغالية في المستشفى حبيتها كثير وبصدق بس هي كانت رافضتني صدتني و الحين يوم عرفت انها بنت عمي قلت انا اولى فيها بس هي طلعت لي بسالفة اني قتلت زوجها عشان آخذها اصلا انا وش يدريني انها بنت العم يا عم
كنت اسمع لهم ما قدرت اتحمل دخلت عليهم : انت ما تستحي على وجهك خسارة خسارة فيك دمنا انت شيطان على الارض
سيف : غالية ما يصير هذا ولد عمك له احترامه
غالية : اي احترام اللي تقوله هذا تعطيه للكلاب تنهشه ولا تسأل عنه ، بابا أنت واعي هذا قتل رائد قتل زوجي قتل حبيبي قتل ولدي فاهم علي
سعود : ماعندك دليل علي أنا بريء ما سويت شي
غالية : الا انت مجرم الله لايبارك لك
سيف : بس غالية اهدأي
غالية : بابا هو اعترف لي وأنا عندي دليل عندي رسايل تهديد منه كذا مرة توصلني منه من رقمه ومختومة باسمه سعود بابا كان يتوعدني انا و رائد و فارس
سيف : وش تقولين من جدك ؟
سعود : لا مو من جدها هذي كذابة مفتريه تبي تلبسني تهمه
غالية : بابا أنا ما راح ارتاح لين يدخل السجن و يآخذ جراه لو هو الموت
سعود : اللي تقدرين عليه لا تقصرين يا .. يا بنت العم
قال جملته الاخيرة وطلع ، أنا ما عدت اميز وش هالمصيبة !

***

فارس : من جدك تحكي عبد العزيز
عبد العزيز : والله ما اكذب عليكم هذا اللي قالته لي دلال بالحرف الواحد
نواف : معناه لازم نفتح تحقيق ولو ثبت كلام غالية وقتها ما راح ارحمه خلقتي ممتلي منه
فارس : بس لو طلع كلام غالية مو صحيح واللي صاير ان فعلا غالية وصلتها رسايل ترى رسايل الجوال مو دليل كافي
نواف : اجل وش نتركه كذا لو هو ولد عمي
فارس : خلاص انا بشوف لكم الوضع قبل تقدمون على شي ولد خالي شرطي وله خبره اهم شي غالية لا تتأذى تكفى يا نواف تكفى يا عبد العزيز
عبد العزيز : زين لا توصي اهم شي نعرف وش ينتظرنا
***
سارا و سعد مع ورعانها لهم اسبوع من سافروا و تركوني وحدي بهالبيت ما راح اروح لعند بابا مستحيل مابي اعيش لو يوم مع زوجة اب وغالية ما عادت مرت اخوي ما اقدر اقعد عندها مثل قبل خصوصا انها مو ببيتها ، وليد فديته طيب دوم يسأل عني بس ما يسولف يقهرني بروده وهدوئه بعد
على طاري البنات سمعت انهم انخطبوا سوا دلال وغالية الله يوفقهم عاد غالية بتآخذ فارس اخو وليد زين بشوفها كثير على اني بغيتها لسعد بس جميل جداً انها ما راحت بعيد
لازم اروح الحين ؛ الجازي تنتظرني تحت بنروح للسوق سوا عشان اتجهز لزواجي

.
.
.
.

تم الجزء السابع و الثلاثون

الجزء الثامن و الثلاثون و الأخير ~



آللھَہّ ﯾﭴآژﯾ م̝̚ن ﯾسۆﯾ سٌوِأُتَڳّـ
ۆبذنۆب م̝̚ن سۆآ سۆآﭠگــ يًجِأٌزّيٌڳُ


سيف اسم الله عليه كمل ثمانية أشهر له فترة يحاول يوقف بنفسه و اليوم امه مدري وش فيها حالفة تخليه يمشي لو خطوة
: وبعدين يا غالية خليه وتعالي ابحكي معك
غالية : تكفين دلال شوي بس شوفيه يبي يمشي
دلال : أي يمشي يسلم لي اياك و أنتِ تمشينه غصب
غالية : اف خلاص يلا
ضحكت من حركتها ، مدري وش تحس به
: غالية مقتنعه بفارس ؟
غالية : مقتنعه بمتعب ؟
دلال : أنتِ غير هذا صديق رجلك و عندك ولد أنا لا
غالية : اصلاً فارس يبيني عشان الولد
دلال : مو صحيح غالية
غالية : طيب وش يبيني عشان نفسي ؟ كنت مرت رائد يا دلال
دلال : طيب مقتنعه
غالية : الحمد لله مرتاحه
دلال : دوم يا رب
غالية : طيب ومتعب
: الزواج تقليدي وراح يتم كل شي بسرعة مدري ليش مستعجله أمه ، تعرفين انه اختيار خالتي رشا
غالية : هي تحبك ما راح تضرك ؛ الله يسعدك حبيبتي
دلال : ويسعدك مع فارس

***

سعود : يا نواف عن الغلط احترم نفسك ونقي ألفاظك
نواف : مو أنت اللي تعلمني احترم نفسي واختار الفاظي !
سعود : لا اعلمك دامك محتاج شكلك ما تربيت
نواف : انت آخر واحد يتكلم عن التربية يا عديمها تتحرش في بنت عمك وقتلت زوجها بعد
سعود : أنا ما قتلت أحد طيب وبنت عمي أنا اولى فيها من الغريب
نواف : هذا اللي بقى ازوج اختي لمجرم !
سعود : والله لا تندم انت وفارس اللي شاد فيه ظهرك

***

عبد العزيز : يبه وبعدين لمتى راح نظل كذا ترآي خايف على البنات لو تبي الجد يعني
سيف : وش يقدر يسوي انا منعته يدخل بيتي و بظل مراقبه لين اعرف الحقيقة
عبد العزيز : أدري صعب عليك هالموقف ولد اخوك الوحيد طالع بهالشر
سيف : يعز علي كثير والله بس وش اسوي
تخيلت للحظة ان سعود طلع مجرم فعلاً وش هو رد ابوي سألته
: يبه لو طلع كل شي صحيح و سعود مذنب وش بتسوي
سيف : أنا ما ارضى الشوكه تمس غالية حتى يجيها كل هالشي وتتحمله وانا عارف وساكت لا بآخذ لها حقها و جزاه هو جزاه بيآخذه
عبد العزيز : حتى وهو ولد اخوك
سيف : حتى لو هو ولدي حتى لو هو انا محد يمس بناتي بسوء بحياتي و اسكت
اعجبني رده ، مو بس لآني كاره سعود و افعاله ، ابوي تفكيره عظيم يا حظي فيه

***

من تركت سعود رحت لفارس اللي اخذني ورحنا لولد خاله اسمه مشعل ببيته اللي هو بيت اخت فارس بعد ، عشان موضوع سعود نستشيره وش نقدر نطلع به
مشعل : أنا بحثت عن الرقم من تاريخ تشغيله ما طلع منه غير هالرسايل لنفس الرقم ما تم استخدامه لأي مكالمة او غرض ثاني
نواف : طيب !
مشعل : للأسف مو دليل كافي خصوصا انه مو باسمه ولا فيه شي يثبت انه كان يستخدمه
فارس : طيب وش تنصحنا
مشعل : عندكم شهود ؟
نواف : اختي الثانية سمعت كل شي
مشعل : غيرها
فارس : مافيه
مشعل : للأسف ما تكفي لحالها
فارس : طيب ؟
مشعل : لو ما توافرت ادلة ثانية انصح تسكتون تخلونه للعدالة الإلهية لأنه للأسف لعبها صح حتى السيارة ما كان فيها اي عطل حسب التقرير اللي طلبته عنها و موقع الحادث كان يسهّل حدوثه يمكن انه فعلا استدرجه لهناك ، وعلى فكرة لو صار و قدمتوا شكوى وطلع بريء فيه يقلب الطاولة عليكم و يصير هو صاحب الإدعاء
مسحت وجهي وشعري بقهر هين يا سعود بوريك
فارس : سمعت نواف زين انكم سمعتوا شوري
نواف : ليه وين العدالة الحين هو مجرم واعترف لها بلسانه
مشعل : عندكم تسجيل ذا يربحكم القضية بكل سهولة
نواف : للأسف
فارس : هونها ابو سيف الله ما يرضى بالظلم
نواف : ونعم بالله

***

لين كل يوم عندنا على نفس نظامنا القديم صح استجد فيه طلعات للسوق بس يظل اغلب وقتنا بالبيت
سيف ولدي هالايام مدري وش فيه احسه يتعب كثير نواف خذاه للمستشفى يقول ان الدكتور قال نظره ضعيف يعني لآ تحاولين تخلينه يمشي غصب و حطي عينك عليه اذا قام يتحرك ، الله يشفيك لي يا عيون ماما انت
دلال : وخلصتي كل اغراضك لين
لين : ايه على اني اشوفه بدري بس الجازي ما رضت الا كذا تقول احسن عشان لو تحدد ما تحتاسين
دلال : ايه هي صادقة شوفيني انا للحين ما خلصت
غالية : أنت بعد عليك ذوق مايعجبك شي
دلال : اقول اسكتي انت الله يرحم ايام اول يوم لبسك يوصلك لعندك وش زينة من رحتي السوق جبتي خرابيط مدري وش تبي
غالية : يعني انا ماعندي ذوق
دلال : اسألي دواليب ثيابك اللي عذبتيها
غالية : مايهم اهم شي معجبني
لين : لا تتهاوشون طيب ولا بروح اترككم
غالية : لا اقعدي خلاص بسكت
لين : ايه صح بنات وش صار على ولد عمكم الجديد
غالية : حريقه ان شاء الله
لين : ليش استجد شي
دلال : للأسف عايش حياته عادي
غالية : لا يقول بيآخذني العمى بعينه لوأنه آخر رجال بالدنيا
دلال : هدي حبيبتي ما يقدر يسوي شي
لين : ايه عاد اخوك ذاك شرير يطلع عينه من مكانها
دلال : اسم الله على اخوي مو شرير حقآني بس
لين : ما قلت شي لا تبدين هيآط ، وش صار على الكوافيرة حجزتي ؟
غالية تضحك : بابا طلبها لها من برا يبي ميكآب يركب على وجهها الاوروبي
رفعت حاجبي : حركات يا اوروبا انتِ

ما رديت عليهم يتمسخرون البشعات


***