كاتب الموضوع :
احاسيس منسيه
المنتدى :
القصص المكتمله
البارت الواحد والعشرون
لفت له بسرعه ناظرته بقرف وصدت
مفلح بستهزاء :صراحه متردد مدري كلها حلوه بس انتي وش رايتس..؟؟
لمياء ببرود:والله والله يامفلح ماكرهتك بحياتي من عرفتك.. لفت له وناظرت بعيونه الهاديه..مثل ماكرهتك برمضان وفي ذالمكان انت انسان بغيض...
مفلح يحرك مسباحه بهدؤ :الافضل تكرهيني وتعيشين حياتس لنتس لوبقيتي تحبيني نفس اول وهذا شي متاكد منه بتضلين تعيسه لاانتي لي ولا انا لتس..
لمياء ترفع راسها لفوق وبجمود :تكذب على نفسك وتصدق كذبتك.. الحقيقه اني ماحبيتك بحياتي..رصت على اسنانها وبتاكيد.. اكرهك واكررررهك من كل قلبي ودوم ..وبقرف ..كريه ماتساوي مقدار ذره ..وبستهزاء..احبك مسكين
مفلح يتنهد:انا دكتور في نظرت اعيونتس الي بدت تكره وبغرور ..مد اصبعه السبابه لها ..تدرين وش الحقيقه حتى انا بديت اكرهتس وبقوه.. مادري ش الحظ السعيد الي افسخ خطبتي منتس الحمدالله على هالساعه..
نزلت نظرتها بشرود لعيون القز الي تشتعل بنيران
مفلح بتهكم :لا تنسين تحطين اصبعتس تحلينه احبه حالي ازياده..سلام
اطلع وهي نزلت على ركبها بسرعه ويدها على وجهها تصيح بقوه
ادخل عليهم الخيمه اجلس جنب محمد بسرحان وتعب شفته بعيونها الكره شفته بمطبخ الراشد ياليتني ماتمرجلت ووديت الصحن افضلي قعدت على نظرت الحب بعيونها الاولى ماقدرت تخفيه مني او على الاقل اقدر اسميه اعجاب..بس الان تكبرت على مشاعرها وابغضتني..
محمد بهدؤ:وش فيك عسى مابيت راعين الشاهي
مفلح يتنفس بقوه :بيتهم وبيتوني..
محمد ببتسامه وصراحه:طحت في حب ابنيه..
مفلح ببتسامه حزن هز راسه: ليته اول يامحمد ليته قبل تكرهني..
محمد برحمه:الكره ماجاء عبث صحح غلطتك وترجع الامور كما كانت..
مفلح بسخريه:لا مافيه مجال تتتصلح الامور انا نفسي عزيزه جدا اتعبتني...
اسكت محمد عقب ماصد مفلح لرجاجيل ملقي محمد جنب وجهه وساحب اشماغه
محمد في نفسه الله على الزمن مفلح تتعب نفسيته لذاالامر حكم الاقدار..
ارفعت راسها وطفت النار بعد مافار الشاهي عليه امسحت ادموعها وشالت الشاهي نادت منصور وعطته اياها
منصور :خاله وش فيها عيونتس حمر..
لمياء بتعب:عشان الدخان.. عطته اياها وراح.. ابتسمت ويدها على فمها ابكي عشانه بين مشاعره لي طيب واذا اكرهني بالطقاق الي يطقه مثل ماكرهته بيكرهني
اطلعت للحريم شافتهن قايمات يصلن العشاء اجلست جنب الهنوف وقعدت تسولف معها جاتها منيره واجلست جنبها
منيره تشاورها :ترى عمر ولد صبيحه اخطبتس من امي اليوم..!!
لمياء تحس بجليد بقبلها :وش قالت امي.. ؟؟
منيره :تقول بسالها وبرد لتس..
لمياء بهدؤ:شفته عمر مشالله شكله رجال وعاقل قولو لامي انا مواقفه مالله داعي تجي تسالني
الهنوف:اكيد بكل قناعاتس ..شفتيه..
لمياء تلف صوبها اجبرت نفسها ببتسامه : لمحته من بعيد ولاباس فيه صح انه سمين مهوب مهم الشكل ..وفي نفسها حبيت الشكل الجميل وماستفدت شي
منيره :زين اجل بعلمها تقول لها
لمياء :ايه تعلمها بكره مهوب اليوم تحسبنا مشافيح على ولدها
مفلح يفز ياخذ الشاهي من منصور خذاه واجلس على اركبه عند البيلات صب له ذاقها قبل ارتاح طعمها زين ومضبوط راح لمحمد وصب له
خذاها محمد وهو منفشل:والله اني منحرج منك..
مفلح بهدؤ:عين خير ...واجبك ولا قمنا في حقك بعد..
محمد :جعلك تسلم..
...........
ام سلطان :ماعليه اخلاف الرجال..اخطبتس وام بندر احرجتني كم مره وانا أأجلهم وانا ماعندي اعتراض مستانسه عليه
النايفه بتردد:مدري يمه بس ماقد شفته..
ام سلطان:طلعي صورته من النت وبتطلع.. وطبعه كلمت سلطان وعلمته وترى بيزعل عليتس لارفضتي مثل مارفضتي مشعل هو الي قاله لي بنفسه
النايفه ببتسامه:خلاص موافقه...
ام سلطان بفرحه:يابعد روحي الله يوفقكم والله ان امه تنحط على الجرح يبرى..
النايفه بخجل:ايه وهذا الي مريحني اكثر
دق تلفون البيت راحت له النايفه وشالته :الو مرحبا
محمد :السلام عليكم
النايفه بتنهد مخفي:وعليكم السلام
محمد :ام سلطان موجوده
النايفه:لحظه شوي ..نادت امها واجلست عللى الكنب قريب
ام سلطان :مرحبا
محمد :بتس اكثر وش العلوم
ام سلطان :كل شي زين ولله الحمد من صوبكم فديتك
محمد :تمام ..خاله زاهمن عليتس ان تفزعين لي
ام سلطان :ابشر بسعدك ولك حر مالي
محمد براحه :الله يخلي لتس سلطان واخوانه ابيتس تيسرين لي موضوع متعقد شوي
ام سلطان :الي بقدر عليها انشالله
محمد بحراج:انا احب لي بنت من جماعتنا واهلها رافضين اعيال عمها حاجزينها والبنت ماتبيهم ابيتس تكلمينهم وتقنعينهم كلن يحبتس وينفذ امرتس
ام سلطان بحنان:ابشر يامحمد ماعدك الا واحد من اعيالي الي اطلعو من بطني بروح لهم بكره مرني وودني لهم
محمد بفرحه :جلعني مابكيتس الله يسهل ماتعسر..
ام سلطان تضحك:عاشقها
محمد يتنهد :انشهد ياخاله اعيالهم درو اني ابيها وعقبه وقفو في طريقي..
ام سلطان تطمنه:لا انشالله بيوافقون
محمد :انشالله على يدتس ...مع السلامه
ام سلطان :مع السلامه ..صكته ولفت لنايفه السرحانه ..محمد يبيني اروح معها اخطب له بنت من جماعتهم
النايفه ببتسامه:الله يوفقهم..
ام سلطان :امين احليله حابها توى الناس في جهل حجران وماحجران
النايفه بدون شعور:انتو اول الناس مخلين السالفه حجران لعيال عمي ونا مابيهم
ام سلطان بستغراب:هذا موب حجران هذا شي طبيعي وبديهي ياحبيبتي.. بس لاتقولين ذالكلام قدام سلطان...
النايفه تقوم بسرعه وترقى فوق انزلت دموعها غصب بيعرس انا اصلن كيف حبيته مايبيني ولاحس فيني
..........
منسدح على سريره وباله منشغل من نظرتها بساحة المدرسه وهي طايحه على صدري اااه ليتها تنعاد
مضاوي بدفاشه :انت اهناه وندورك
سعود براعه :جعلش اتطيرين وش تبين بي
مضاوي :خخخخخ تحب السرحان ..طقت يد على يد .. ياحظي قمت تحب
سعود يعود ينسدح:وليه وش قوم ماحب
مضاوي:حب يانظر عيني بس لاتحلم واجد
سعود بتفكير:ظنش انها ازعلت من توصيلش السلام لها
مضاوي تجلس جنبه :صراحه هي انصدمت بس اسكتت وانا طلعت بسرعه ماشفتها زين
سعود يلف لها بقهر:وليش تطلعين بسرعه يعني بدنش في فلم ..
مضاوي:ويه انفشلت هذا عربن مهوب مثلنا..
سعود بتعب:ااه يامضاوي شفتها مره وحده وانا تفكيري فيها كل ليله صح اني ماعرفتها يوم كانت مع صيته بس فز قلبي لهيئتها ايه ايه انا احبها واحب بحة صوتها وعصبيتها يوم اتبعها اااه وتاكدت يوم شفتها رافعها برقعها.. انا وقعت في الحب
مضاوي تناظره يتكلم وسرحان تنهدت بهبال :الله يعينك على مابتلاك
سعود :يازين ذالبلوى .. تنهد بتعب بس عيت من خطبتها وش السواه اخطفها
مضاوي :صدق ياسعود ارجع اخطبها من اخوها يمكن فاطمه ماوصلت لها زين
سعود بالم :المشكله يامضاوي انه تقول ماناخذ من برى حتى هي بنفسها معارضه
مضاوي :لا خلها علي بخليها تحبك وعقب كرر الخطبه وتشوف فعلت ذيبه بنت الذيب
سعودد بتوتر:واذا ماحبتني
مضاوي :اصبر الى شهر 12 اجازة الثانيه ومن هنا الى هناك يزينها الله
.........
منسدحه على فراشها جنب راشد وبتعب:وش اخبار اخوي مفلح
راشد بستغراب :ليه وش فيه تسالين عنه
نوره بتردد:بس ابي اشوف نفسيته اخبر انه كان تعبان ابي اشوف انشالله انه استانس وتوسع خاطره
راشد يلف لها :نفسيته من جينا البر عاديه لنا تقريب يومين صح
نوره :صح
راشد :بس اليوم زفت لايكلمنا ولاحتى يوجه نظره لنا اللهم خويه ذالي جاء يسولف ومندمج معه..
نوره :يمكن عشان خويه جاء صار معه
راشد بتفكير:لا حتى خويه عقب العشاء كأنهم امسكتين اما عندهم مشكله ولاشي عقبها راحو لخيمة الرعيان بيرقدون فيها..
نوره بحزن غمضت عيونها وفي نفسها حتى لمياء اقعدت عندنا شوي وراحت ترقد وعيونها منزلتها مارفعتها فينا انا متاكده ان بينهم شي..
راشد يلمها في حظنه وبحنان :تعبانه
نوره بهم اخفته :شوي بالبر عشان الارض مب مستويه
راشد يقبل خدها :انتبهي لنفستس ولوافي
نوره بحزن والم:سميته
راشد :اكيييد وافي بن راشد
نوره بتردد:راشد انا بقول لك شي
راشد : قولي يابعد عمري
نوره خلاص باجلها لبعد البر اخرب نفسيته باجازته :خلاص نسيتها..
راشد:طيب ..عطيني اسم ؟.اقعدو يسولفون على فراشهم واصوات البزراين يلعبون غميضه بالظلام
ساااره تضم لها فروتها من البرد :راحت نوره لراشد ..واختتس ذي من جينا ماتسهر معنا
الهنوف :غريبه تحب شي اسمه سهر
سااره :مدري بكره تسهر معنا غصبن عنها
الهنوف :حتى مشاعل وفاء راحن يرقدن
سااره :عاد هم جاين اليوم عادي .. وبتردد ..بتوافق لمياء على عمر..؟؟
الهنوف: ايه خلاص وافقت
ساره تثاوب : الله يوفقها حسبتها بتعيي تحب المناظر..
الهنوف تضحك :وهذا وش فيه..
ساره :هههه مافيه شي عداه العيب بس انه دب وعادي ..ا نا فيني نوم روحي ارقدي تقومين بدري
الهنوف بملل:انتي روحي انا بجلس عند الضوء الى ان يدخلني النوم..
ساره ببتسامه :دقي لرجلتس اخذي علومه بيفرح صدقيني..
ارفعت الهنوف اعيونها له وابتمست وهي تهز راسها لها راحت ساره والهنوف تناظر بدخان الضوء الي بادي يخف نوره خذت جوالها ترددت ترسل حتى لو وش اخبارك افتحت قائمة الرسايل كم مره وصكرتها لا لا.. مايندرى خاف انه ذلحين يتقلب في حظن وحده من بنات جده خذت جوالها وراحت لفراشها بهدؤ يغلف مشاعرها
الساعه ست الصبح
محمد يزين فراشه من ورى الموتر ويدخله
مفلح بقهر :ياخي توك جاي منتب صاحي
محمد بصدق :قد علمتك قبل اجي بروح اخوي عبدالله في الرياض عنده دوره وبروح اقضي باقي الاجازه
مفلح بتفكير : اووو ..انا اجل بروح معك
محمد بفرحه :اسعده والله ..
مفلح :اجل اصبر علي خلنا لين نفطر واجهز اغراضي
محمد :ياالله استعجل افطر ذلحين يمدينا نروح اهناك ارقد امس مارقدت
مفلح :حسيتك بك ..لارقدت انت ولا انا رقدت..
راح للخيمه افطر بخيمتهم لقى امه الي عطاها خبر وضاقت عليه يروح ويخلي الجماعه مجتمعين اطلع لبوه
مفلح يجلس جنب ابوه :يبه انا بسرح مع محمد لرياض يمكن معاد ارجع لكم برجع معه لنعيريه لارجع
ابو مفلح :ليه عفت المكان
مفلح بهدؤ:محمد وراح والباقي ماتعودت عليهم الله يرضى عليك انا بمشي ذلحين..
ابو مفلح :الله يسهل دربك ..يعني انا الي ارجع اهلك
مفلح ببتسامه :ايه الله يعافيك..
ابو مفلح يهز راسه بالمواقفه
تكح بقوه وراكبتها حراره وعندها الهنوف تعطيها حبوب مضاد
ام فهد تنهد بتعب:امس مادفيتي نفستس زين
الهنوف تناظر لمياء التعبانه:بتاكل حبوبها وبتخف..
ام فهد تهز راسها بايه وتناظر الهنوف:وش اخبارتس مع رجلتس
الهنوف تنزل راسها بهدؤ وش اقولها مبسوطه بحبه.. وبعد كم شهر ولا يوم ارجع لها مطلقه ولا مروحني لهم تنهدت بهم وارفعت راسها
الهنوف ترطب شفايفها :موب مره بعض الاحيان ماقدر امنع نفسي وادعي عليه ..ماحبيته ولا ارتاحت معه..
ام فهد تهز راسها بخوف:من جيتي وانتي شكلتس مبسوطه ..ليش تقولين هالكلام
الهنوف بتوتر:مبسوطه بشوفكم بس ماقدرت اصبر معه
ام فهد بتحذير:اهم شي ماتسوين شي او تبدين انتي بالمشاكل..
الهنوف بملل:يمه توقعين انا بسوي شي..
ام فهد تنهد بهم وقفت البست جلالها بتطلع برى
الهنوف : وش فيتس ليكون من ترواشتس امس
لمياء بتعب:يمكن ادخلني برد
نوف ترفع فراشها :حطي شي على راستس ..
جاتهم غزيل مزينه حليب حطته عنهن وجلست :اخاف انه عشان ذالخطيب
لمياء بهدؤ:لو عشانه رفضت معلي من احد بس حسيت بالتعب
غزيل :شكل ماعندتس مناعه
لمياء بصراحه :ماعندي مناعه جسميه ونفسيه
ناظرت لها الهنوف ولمياء تغطي نفسها كله بالحاف
قامو العرب كلهم من النوم وتجمعن الحريم في خيمتهن
ام عمر بصوت واطي على ام فهد :ماعندتس خبر للحين
ام فهد : وافقت الله يتم
ام عمر بفرحه :امين جعله يبشرتس بالخير
قامت بتكلم ولدها والهنوف تكلم منيره :شكلها مستانسه من قلب
منيره :وليه ماتستانس احس لمياء ماتناسبه..
الهنوف :هذي حظوظ الناس يمكن لمياء تحب ذالي ماتحسين به مناسب لها
منيره :والله مدري يمكن
انتشر خبر خطبتها بين المخيم وعمر ميت من الفرحه..
كلمت نوف فهد يروح يجيب سياره للمياء زادت عليها الحراره وبيودونها لمستوصف ارماح
فهد :طيب احتروني شوي سيارة ابوي راح عليها لرماح وسيارتي مبنشره
نوف :معليه بسرعه
راح فهد لخيمة الرجاجيل ومفلح يطلع منها
فهد :مفلح مفتاح سيارتك انكنك ماتبيها الله لايهينك
مفلح :انا برجع مع محمد شفها مع الوالد ..مع السلامه
فهد يدخل للخيمه :مع السلامه
شافه محمد مقبل عليه اركب السياره وانحنى يفتح له باب المعاوني اركب مفلح وحركو لرياض
اشر لهم فهد قبل يروحون وقف محمد وافتح مفلح دريشته :هلا فهد
فهد :مفتاح السياره مهوب مع ابوك
مفلح يفتش مخابيه :ياليل وين حطيته
محمد :يمكن بالخيمة انزل دوره
انزل مفلح وادخل بخيمة الرجاجيل الفاضيه كلهم في الشرقه عشان الشمس
فهد يدق تلفونه :اصبرن شوي ..طيب المفتاح ضايع يدوره ..اخلفتوني حطو عليها قطعه مويه بارد تخفض حرارتها شوي
مفلح يمد المفتاح لفهد :سم
فهد بسرعه مد يده لمفلح ويكلم بالتلفون :عينته ودنها لسياره بجي ذلحين... صكه واطلع بسرعه
مفلح :عسى ماشر
فهد :لمياء تعبانه من امس اليل ركبت عليها الحراره.. ياله اترخص..
نزل نظره لتحت وتافف بقهر من حاله..
ادخل عليه محمد وهزه :بعد تبي شي المفتاح لقوه امشينا
اطلع معه مفلح برى واركبو السياره وومشو بطريقهم
مفلح بهدؤ:وقف وقف
وقف محمد بملل:وش ناسي بعد
مفلح يفتح الباب :لا هونت مابي المراح
محمد بنفعال :ليه حرام عليك وش تبي بالبر
مفلح يصك الباب ويكلمه مع الدريشه :ابي قلبي ابي احس به..ارفع يده بسلام وراح منه
ابتسم غصب عنه عاشق الرجال الله يعينه على مابتلاها حرك رايح لرياض ومفلح يرجع يدخل في خيمة اهله وينسدح
راحت لمياء لرماح ركبو عليها مغذي ساعه وارجعو على اذان الظهر
الهنوف تستقبلهم:وش اعلومتس..؟؟
لمياء براحه :الحمدالله زينه
فهد :اخر وحده تتعب مهوب لاجاء بكره تجي وحده تسندر علينا...
ادخلو في الخيمه ولمياء تدور الاكل ماكلت من امس جاءت امها وعلمتها انه علمت ام عمر بالموافقه
لمياء :مسرع
ام فهد برحمه:وش اسوي فرحه بموافقتس
الهنوف:كلنا موب بس امي
لمياء تجبر نفسها على القمه الي بفمها اطلعو كلهم برى احذفت الي في يدها وانسدحت على المخده
منصور :لمياء جيتي..؟؟
لمياء:ايه
منصور :يوه شكل كلن بيروح مفلح راح مع خويه.. وخويي حامد (اخو احمد ومشاعل ووفاء الصغير) بيروحن ذلحين لخوالهم بالخرج معاد باقي الاحنى
لفت عنه للجهه الثانيه اشوفه مستانس يتمشى بكل مكان ولا يهمه كلامه الى يجرحني وانا اتعب علشانه تاففت بقرف ..ابعدت شعرها عن وجهها وقامت بسرعه غسلت والبست لبس مرتب واطلعت لهم برى قاعدين يتغدون
ساره :وش اخبارتس..؟؟
لمياء ببتسامه :الحمدالله
نوره :فجاءه تعبتي
لمياء :يمكن عشان تروشت مدري ..بيروحون وفاء ومشاعل
ساره :ايه يرتبون عفشهم بيعيدون باقي العيد عند خوالهم
لمياء :حرام مابطو يومين
نوره :امهم تقول ان اختها تكلمها وتزهمها تجي عجله..
ادخلت عليهم وفاء ومشاعل يسلمون عليهم
مشاعل ببتسامه:حرام لمياء اسبقنا عليتس عمر..
ابتسمت ونزلت راسها بخجل..
نوره بصدمه :عمر خاطبتس..
لمياء ترفع راسها وبرفعة حاجب:ايه وواقفت..
نوره بهدؤ لفت لصحن الغداء وقعدت تناظره...
اطلعن البنات لسياره تنتظرهم برى والباقي بالخيمه جاؤهم شيبانهم وادخلو عليهم بما ان الناس قلو ومعهم عمر
لمياء بتوتر تكلم ساره :ليكون هذا عمر
ساره بضحكه :ايه وش عندتس
لمياء تمسك نفسها من الدموع صح انه موب شين بس مهوب في بالي..
ساره :شكلتس ندمتي ..لمياء الحب الحقيقي يجي بعد الزواج انا حاسه انه هو الي بتحبين صدق..
لمياء بهدؤ ابتسمت :يمكن.. الناس مخابر موب مظاهر..
ساره :يالله تمقلي في حركاته شكله رجال...
لمياء تناظره:مشالله مارفع عيونه فينا من اقعد..
ضجت الخيمه بالسوالف الرجاجيل والحريم مستمعات
ابو فهد :ها ياعمر انت منتب دكتور في الجامعه
عمر :الا طال عمرك ..بس الكلام الي يقوله راشد صح لازم يجيب معدل عالي يدخل الجامعه برهو
ابو مفلح :طيب جامعتكم وش نسبتها الي تطلب كون ذا الكسالى (ياشر على مساعد وفهد) تقبلهم
عمر يضحك :جامعتي جامعه ادبيه تبونه ياعيال
فهد :لا انا ابي ارمكو
مساعد يناظره بستهزا:تبي ارامكو لادخلتها فادرى انك بتدخلها
اضحكو وعمر يعلمهم بنسب الي تقبلها الجامعه وش مطلوب منهم ومعلومات عن كل تخصص
لمياء :مشالله مثقف..
ساره :ههههه هذي معلومه
راح لخيمة الرجاجيل مالقاهم تلفت برى الخيمة اسمع صوتهم بخيمة النسوان مشى صوبهم وادخل
مفلح :السلام عليكم
الجميع :وعليكم السلام
ابو مفلح بصدمه :وش فيك عودت...؟؟؟
مفلح يجلس جنب راشد :مارحت من البدايه هونت ..
ام مفلح بصوت واطي:عسى ماخلاف ..
مفلح يلف لها :ماخلاف جاني خبر عومسني وجلست..
ابو فهد :خيره انشالله..
مفلح :انشالله..
ازحفت الى ان تخبت من ورى البنات معاد شافته وتنهدت بالم خلاص انسي انتي لعمر الي قدام عينتس مافيه عيب وقلبه خالي لي بس..
قامو يتوضون لصلاة العصر عند الوايت توضو الشيبان وراحو
راشد يلف لعمر :مبروك الخطبه
عمر بفرحه ينزل اكمامه وهو قد بيروحه :الله يبارك فيك
مفلح يرفع راسه لراشد :مشالله عمر رجال ينعمد عليه
نهاية البارت الواحد والعشرون
....
البارت الثاني والعشرون
راشد :انشهد تستاهله ويستاهلها
مفلح :بيخليها تروح لمدرستها حتى عقب العرس
راشد : مدري عنه ..هي في الكليه ولا توها في الثانوي
مفلح بستغراب:ليه مهيب ساره
راشد يضحك :على وجهك ..لا مهيب ساره لمياء بنت خالتك..
ارفع ظهره من قدمه الي يغسلها للوضوء وبصدمه: لمياء الي مخطوبه لعمر
راشد :ايه اصغر وحده مدري عاد منهي..طفى الماء يصب.. لف للمويه ابتسم بستهزاء وشمئزاز من حاله ..طفاها والحق راشد رايحين للخيمة ناظر لعمر الي يضحك لفهد ويسولف معه
عمر :ههههه لا انا غير انحب بسرعه لاخذتني حبتني واجحدتكم
مفلح يناظر لقدام بغضب تخسي تحبك الدنيا سايبه مالقت الا انت...
عمر يضحك :يابو الشباب عطنا نظره
لف له مفلح ناظره بتكبر ورفعة حاجب ولف منه..
عمر بستغراب :وش فيك زعلان علي..
فهد يناظر مفلح ويبتسم:لا هذا طبعه شايف نفسه مايعجبه العجب
عمر:مهوب لازم اعجبه يزين طبعه مع الرجاجيل..
اسمعه مفلح ولف له وبقهر:وانت الي بتعدله!!..
عمر :نظرتك حسنها لرجال
مفلح بغيض يرص على اسنانه:تعقب.. انت تعلمني وش لازم اسوي...
فهد بصدمه :مفلح هد الوضع وش فيكم ..
عمر :شكله ماتعود يجلس مع الرجاجيل في مجالسهم..
مفلح بصدمه وعصبيه من كلامه ارفع يده وعطها كف على وجهه كله الى ان طاح
مفلح بهدؤ ممزوج بحقد:على هونك ياولد صبحه متى عرفتها مجالس الرجال من خالك مصطفى ..احترم كلمتك ومن الي يستحقها..
فهد بخوف:خلاص مفلح وش صار لك اهدؤ لاتكبرون السالفه
راشد يطلع ويشوف عمر الي يوقف ويمسح فمه :وش فيكم ..!!
ناظر مفلح عمر بغيره انت الي بتعيش معك طول عمرها انت الي بتضمها انت .. لف بسرعه لاتخونه يده ويمدها عليه مره ثانيه قدام راشد ادخل وكبر على طول يصلي بدون ذهن
جاب له مساعد الفاين وعطاه عمر خذاه وراح للوايت يغسل
مساعد :وش سالفتهم..!!
فهد لذلحين منصدم :مدري وش فيه مفلح هو الي بداء بالكلام ومد اليد
راشد بهدؤ:خلاص اعيال صلو ولا تكبرون السالفه..
ادخلو على الصلاه الي اقامة وبدؤ يصلون المخيم فاضي ماغير ام عمر وولدها والراشد والمفلح
في الرياض واقف محمد عند مكتبه يحط الاوارق
سلطان :تصرف فيهن انا وراي مشوار..
محمد:ابشر بسعدك..بعيد مشوارك..؟؟
سلطان يوقف ويتجه للباب:لا اقريب...
محمد بحراج:ماتقدر تاجله شوي..ابيك بموضوع صغير
سلطان ببتسامه هاديه:ماقدر والله يامحمد لازم امشي ...
محمد بتردد:فيه مشكله ولاشي..؟؟
سلطان :ابد ابد..في امان الله
محمد:في حفظه
العصر تقهوو البنات وراحن يمشن
غزيل :بنات تاخذون معكم صباء
الهنوف تلف لهم :هاتيها ..تعالي قلبي تعالي.. مشت لهم صباء باديه تمشي اوصلت لها شالتها وكملو طريقهم
منصور يركض صوبهم :انا بعد بروح ..
لمياء تمد يدها له:هذا عاد حبيبي.. امسكها مع يدها واقعدو يمشون ويسولفون اتعبن واجلسن
لمياء :الهنوف تعرفين مشاعل الي معنا بالباص
الهنوف:ايوا اذكرها ..ملسونه ذيك البنت
نوف :خلوها في حالها
ساره :لا اصبري خلي لمياء تكمل حاسه وراءها شي
لمياء :ههههههه يافاهمني
الهنوف:اها داريه بعد انتي..
ساره :مرسله ورقه مع لمياء بعد ماعرفة انها تعرف مفلح..صح نوره
نوره :صح ..هي تبي تزعل لمياء تدري انه اخوي ولمياء خاطبها اخوي فسوت كذا
لمياء انصدمت يوم اذكرت هالموضوع نست سالفة الرساله كانت تقصد سالفه ثانيه
الهنوف بستغراب :وش دخلها صدق ماتستحي..
ساره :ايام رحت قبل الدوام مع نوره تبي تسحب ملفها و لمياء جات معنا وهي كانت جايه مع وحده من خوياتها تاخذ جدول امتحان الاعاده
لمياء بتصريفه :لا السالفه هاذي مالها داعي ان اقصد سالفه ثانيه
نوف بلقافه :لا علمينا وش سويتي برساله
لمياء بتوتر:يعني كان اول خاطبني فطبيعي حذفتها..
نوف :وليش تنشرين خطبتس هذا شرعكن يالبنات
لمياء :بصراحه ماقلت لاحد الا خوياتي وطبعن ماراح ينشرن بس تعرفينهم بنات الكليه ومن كبرها النعيريه ياحسره..
الهنوف :وبعد عندها سالفه غير هاذي
لمياء تنهد:ايه تطاقت مع وحده من الامن مهيب هينه قوتها عطتها كف مع وجهها والامن تصاعق وهذ الي اقدرت عليه..
منصور :نفس مفلح والله عند الخيمه اسطر عمر كف لللللللين طاح عى وجهه...
البنات يلفن له بستغراب
ونوره بهدؤ :وليش يضربه متهاوشين
منصور يهز كتوفه :مدري يسولفون وبعدين مفلح طقه وجاء خالي فهد وانا نحشت عند خيمتنا
لمياء قلبها يدق بقوه.. شرير متسلط ليش يمد يده شايف الناس تحته
الهنوف:اخافهم يمزحون
نوره بزهق:ماظنيت مب ذاه مزح مفلح..
نوف :ماعليكم من كلامه بزر
منصور بضيقه :لا منيب بزر الاصدق طقه بعلم عليه ابوي ناصر عشان ثاني مره معاد يطق عمر وهو يلعب معنا.. لف لنوره وبقرف.. مالت على اخوتس يع منه كل شوي يمشي جنبنا ياخذ الكوره ويحذفها بعيد
الهنوف تضحك:يبيكم تلحقونها..
منصور يفهمها:لااا هو يقول العبو بعيد ازعجتونا وحامد عيا يبي يلعب قريب
نوف :خلاص منصور عيب ..ثاني مره طيعو كلامه
حاولت تبين طبيعيه معهم تبتسم بدون حياه والكلام يدخل ويطلع بدون فهم.. يبي يبين يعني ان عمر اقل منا وش فيها لو صارت امه اجنبيه متعلم ومتفهم اكثر منه ..ليش يمد يده عليه ..
وقفن البنات بيروحون والهنوف تلف لهم وتبتسم :بنلحقكم انا ولمياء
راحن البنات وخذو معهم صباء
الهنوف بهدؤ:انا متاكده انه مد يده عليه وانتي في السالفه..
لمياء بقهر:داريه يبي يقهرني يبيني افهم اني خذيت واحد اقل منه نسب..
الهنوف بستغراب :كم مره وانا افهمتس انتي وافكارتس الغلط ..ماقصدت كذا
لمياء تنفخ بغيض:وش تقصدين
الهنوف :ماقصدت الي فكرتي فيه وبعدين ليش مفلح بذالوقت يمد يدها على عمر الا عقب ماعرف انه خاطبتس.. مفلح انقهر من عمر لانه بياخذتس وهو توه يشيل في قلبه لتس اتوقع انتي مثله..
لمياء وتنفسها يسرع:لا لوه يبيني مارخصني لوه يحبني يشيل في قلبه لي شي اوثق فيني كلكم تحبونه وتوقفون معه ضدي انا اكرهه واكرهه من كل قلبي انسان مافيه احساس لا لا يالهنوف لاتقولين كذا انتي ماتدرين كيف عشتها ايام عصيبه علي ماتسمك فيني ولاوقف معي بالعكس خلاني كاني شي ملك له وبيملكه بس اصلن مارضى بالخطبه من البدايه الا عقب ماكلمته وانقهر..
الهنوف بستغراب:وش صاير لتس معه غير الي نعرفه
لمياء برتباك: ماصار شي بس عارفه انه كذا ..
الهنوف :ودي اصدق كلامتس فيه بس انتي منتب واضحه مشاعرتس له مهيب كره
لمياء تبكي:انتي توهمين كنت معجبه فيه بس مثلي مثل البنات جمال وشخصيه بس من عرفته وهو يكرهني ماحبه ماحبه
الهنوف تنهد بهم وتلف عنها تناظر غروب الشمس:انا قبلتس كرهت سلطان وحقدت عليه حتى بصلاتي ادعي عليه ماتوقعين كيف انا خايفه ان الله يستجيب دعواتي الي قد دعيتها عاشرته عرفت انه انسان مثل غيره يخطي ويعصب ولازم الي يحب يتحمل انتي مثلي بالضبط لو انا ماحسيت بسلطان يشيل لي مشاعر اشوفها بحنانه وكلامه وتغاضيت عن الباقي ماشفتيني قدامتس طبيعيه ابتسمت بستهزا ..حتى لو كانت نظراته وكلامه مجاملات صدقتها غصب عني
هدت لمياء تناظر الهنوف السرحانه راحت لها وضمتها من ورى وصاحت
الهنوف ببتسامه:يعني مازال فيه بقول اعجاب مهوب حب
لمياء ابتسمت تغير مودها:حتى لو فيه على قولتس بمحيه انا خلاص صرت لواحد غيره وهو الله يوفقه..
الهنوف تلف لها :امين اجمعين
راحن للمخيم شافو سيارة مشغله عند خيمتهم وقد صلو العرب ادخلن صلن واطلعن برى والسياره اتحرك
الهنوف: كانهم راجعين
ام مفلح بضيقه وحرج :الله يهديه وش يبي منه فشلنا عندهم
لمياء تكلم ساره :وش فيهم.؟؟
ساره :شكلهم عشان الهوشه ازعل عمر وامه بعد.. احليله علمها افزعت عند خالي سعد وقعدت تشره عليهم..
لمياء تنهد بتعب: ماله داعي ليش يمد يده وبعد عمر ..وناظرت ساره.. يعني عشان اصير منصفه ماله داعي يروح كان اجلس ولا علم امه..
في خيمة الرجاجيل
ابو مفلح ويده على راسه:بتجيب لي المرض مانتب صغير...
مفلح بهدؤ وفرحه من داخل ماتوقع انهم بيروحون ولكان تهاوش معه من زمان
ابوفهد:لا ذالي صار مايصلح منك يامفلح
مفلح يبعد من المركى المتراكي عليه: اخطيت وهو استفزني ومديت يدي..
راشد :لازوم تملك نفسك الرجال ضاق وراح...
مفلح :ياشيخ ابرك الساعات ..
ابو مفلح بقهر :انت وش صاير لك وش مسوي لك هو..
مساعد :والله يايوبه ماخبرت عمر يزعل احد تلقها بلى هاذا متفرغ ولاجاء في وجهه الاعمر..
مفلح بهدؤ:صادق مساعد..
ابو مفلح يناظره بعصبيه وبروده للموقف:علمن جاك ياما تصير رجال مع الرجاجيل وتكف اذاك منهم ولا فارقني لاتشوه سمعتي..
ابو فهد يهديه :هد نفسك هذا الشباب ومشاكلهم
ابو مفلح بغيض :هذا قده شايب متى بيحس بنفسه..!!
مفلح عاقد حواجبه ومنزل راسه ..
ابو فهد بعتب : لوك تحملت شوي عاد هذا نسيبنا وبياخذ بنتنا..
ناظره مفلح بسرعه وصد بغيض وألم..
ابو مفلح بفشله من اهل عمر:احرجتني قدامهم وقدام امه.. وش حادك تمد يدك عليه مصتصغره..
مفلح يتنفس بهدؤ وتراكى على المركى ملقيهم كلهم اظهره ويديه ورى راسه بدون اهميه ودندن بصوت واطي..
هي راس مالي والعرب مايدركون
اني على باب الممات وماحكيت
يقوى قلبي يوم قفنه اطعون
الي على ذاك الموادع مابكيت
وياصبر صبري والعواذل يحسبون
اني دلهت من الهوى ولا سليت
اسكت عساهم من اسكاتي يسكتون
وانا عن الي في ضميري مانتهيت
راشد يفتح عيونه في مفلح يبيه يحس بالي حوله ولا يسفهم كذا
غمض عيونه بقوه وافتحها:مساعد جبي لي مويه
ابو مفلح بغيض وقهر:لاااامنتب صاحي..
مفلح بالم :يبه الله يرضى عليك ويخليك لي انا اسف والسموحه منك..
ابو مفلح :انا وش ابي باسفك كان تاسفت منه وحبيت راسه يوم اشرت لك
مفلح بعتب : يبه انت خبرتني من الرجال الهواين تبيني احب راسه لا والله.. تاسفت منه رضى لك بس وشوف عينكم مارضى وراح
اسكت ابو مفلح عقب ماذكره بسالفة اخوه مفلح المتوفي طاق مفلح ولد سعد عشان المدرس جاي يتشكى منه مطول السانه على المدرس وعقب ماعلمهم مفلح بسبة المشكله ان المدرس هو الي ضاالمه مع قائمة طلبه متسربين وهو جالس في الصف بشهادة طلاب الصف طقه عمه قبل يدري ومفلح طول السانه عليه وتهدده... اطلب ابوه ذيك الحين يحب راس عمه ارفض واطلع من البيت ارقد عند خالته نوره عقب مادرو ببرائته تاسف منه عمه الله يرحمه
فهد يدخل عليهم :قومو على العشاء
قامو كلهم بهدؤ وكل واحد يسترق النظرات لمفلح راحو للعشاء ومفلح ماراح معهم
جالسه وراهم ماتبي العشاء وتفرج عليهم شافت نوره يوم قامت توها جالسه اطلعت وراحت لخيمة مجلس الرجاجيل محد انتبه لها
ادخلت على مفلح منسدح براسه على المركى ويرص بيده على راسه من الصداع
نوره :ليش ماتعشيت؟؟...
مفلح وهو على وضعه :مالي به ..وش الي جابتس لو فيه احد غيري..
نوره :شفتهم يوم ادخلو الخيمة وتباطيتك دريت انك بلحالك..
مفلح :وش بغيتي..
نوره تقرب منه وبرحمه :خلاص الايام كفيله تغير حياتك وتنسيك الي اصعب من كذا...
مفلح ساكت ولا قال شي
نوره :ياخوي ترى مظهرك كذا يزعلني ماصبرت اسكت ولاانت قدرت تخفي شعورك..
مفلح بالم :وش تبيني اسوي يانوره...
نوره تجلس على ركبها قدامه :ابيك تنساها انا داريه انك حبيتها من شفتها بمطبخهم وعارفه انها هي الي تبي وتدخل مزاجك بس الله يدبر اموره..
مفلح يستقعد ويديه على راسه وبضيقه:ليتني مادريت انها بريئه كان على الاقل بخلي السالفه عياف المشكله انها ..انها ..تحبني...
نوره بهدؤ:تحبك لمياء ؟؟!
مفلح :ايه انا اعرف عيونهن بس عقب ذا عمر ذالمخيس تغيرت
نوره بستغراب:لا تفكر كذا ماعمرها حبتك ..!!
مفلح بنزعاج:خلاص خليني راسي موجعني لاتزيديني..
اطلعت نوره منه ادخلت عليهم بالخيمه شافتها جالسه وتلعب بجوالها حسافه تعبان وهي تلعب ماهمها
حطت الجوال وراحت لامها الي تبيها تجي تشيل العشاء صلن الحريم الكبار وراحن يرقدن وغزيل معهم
نوف :مافيه لعبه
ساره :الافيه بيلوت تبون
الهنوف :بيلوت المعروف
ساره :المعروف بس المشكله ماعندي
منيره :معتس ولا مامعتس
لمياء :لا هي معها عيشه بس ماتعرف الى هي
ساره :ايه وعيشه احد يبي ههههههه
لمياء :هههههههه وريته شكله قام يماري به
ساره بنبهار :احلى تقولين امثال وحكم
الهنوف تضحك:بالله فسريه
لمياء :يعني مثلن فيه واحد خلونا نقول ساره تهايط يوم قلنا لها حقيقتها قامت تماري بها وهي مصدقه ونا نقوله نلعب عليها خخخخخخخ
ساره تكش عليها وتلف لضوء:خلونا نصير رومنسين ولو ليله وحده يعني لعبة الصمت
نوف برومنسيه : وكلن يذكر حبيبه
منيره :ويكلم رجله..
ساره براعه :اما ذي لا تكفن معاد الا انا ولمياء
اسمعن صوت رساله واصله لفن لجوالتهن
لمياء بفرحه :لي الرساله من الي متذكرني في ذالحزه
نوف بضحكه:استعدي لطيحة الوجه...
افتحت الرساله اقعدت تقراءها وهن يناظرنها
الهنوف:شكلها مهمه
لمياء بستغراب ارفعت حواجبها :لا رقم غريب
الهنوف:هاتي خليني اشوف
عطتها الجوال والهنوف تقرى
ساره :طولي صوتتس
الهنوف :خلوني اتحنحن شكلها موثره ...احم احم
روحي عسى درب مشيتي فيه لـك منـه خيـره ,,
ارخصتك وانتي مثل الذهب الصافي نقاوه وقيمه..
لعل كفن حوى كفك بدل كفي كسرن ماله جبيره,,
ولعل جسمن ضم جسمك موت ساعته قريـبه..
نوره تكلم بعد ماكانت معتزلتهم :عطيني اقراهء مره ثانيه
نوف :ياااه وش حلوه القصيده احساس عميق
ساره بستهزاء:حسيتي به وهو عميق
نوره متردده تمسح الرساله معقوله هو الي يرسل لها برقمه الاصلي يبيها تدري وش يقصد
نهاية البارت الثاني والعشرون
|
01-03-12, 02:39 PM
جديد مواضيع قسم القصص المكتمله
العرض العادي
