البارت الواحد والثلآثون
سرت صوب المنظره وأطالعت ويهي فيها
إبتسمت وأنا أحرف عيوني
يخسي , والله ما أحط شيء على ويهي وأتجمل له
بس!!
عضيت شفتي السفليه وحطيت يداي على خدودي
وأنا أهز جتوفي وأرقص في الغرفه وأدور فيها
أحرك يداي فوق وتحت وأصفق لين قفزت فوق الشبريه ويلست أصارخ وأنط وبدون ما أحس يايه بنزل من الشبريه وتعلق جلابيتي في حد الشبريه
ماحسيت الآ بويهي صاك الارض وخشمي من الآلم أحسه ينزف
وريولي فوق الشبريه مرتفعه
توووبه , تووبه
يارب تووبه
عدلت عمري عقب مووت ويلست أشهق من الآلم إلي فويهي وجسمي
الله يخسك يامنصور , الكريهه الخايس , يعلني بلاك
يالزفت ما أدانننيك كله منننك
ماعليه بنتقم من كل تصرفاتك إلي سويتها لي
قمت وانا أهوس على كل منطقه من جسمي وفي الآماكن إلي تعورني
وسرت صوب الكومدينه ونزلت للأدراج الي تحت وفتحت واحد منهن
وظهرت الاي شدو المائي إلي عندي
زادت أبتسامتي وانا أحسر عن ريلي
وأحط الفرشاه في ألون الاسود وأرسم على ريلي علامه
وبعدها أحددها باللون البني
ما ابا اطولها ووايد عيب أحسر عن ريلي جدامه بس شو أسوي علشان أخليه يطفر مني
ويشوف أن في جسمي علامة وحمه كريهه وبعدين يكنسل العرس
رفعت رآسي لفوق ويلست أضحك من كل قلبي لأفكاري العبقريه
بدلت ثيابي بكندورة مخورة وحطيت الشيلة فوق رآسي
طلعت متحمسة بإبتسامة خبيثه , شفت أبوية يالس مع أمي وشموه
زادت إبتسامتي , رفعت أمي حواجبها وهي تقول: ماشاء الله وليش ماتحطين شيء على ويهج..
حركة خصلت شعري إلي طاحت على ويهي وأنا أقول: أمبوني جميلة ما أخرب ومب لزم أحط شيء على ويهي~
أرتسمت علامات الاستغراب على ويه أمي وشموه , وأبويه إبتسم وهو يمسك يدي
حسيت بدقات قلبي يخترقن صدري
توني أستوعب أني بشوف منصور البغيض
مابضعف له بخليه يعرف حده ويايه بخليه يبغضني
مشيت بكل ثقة ورأسي لفوق ~
وقفت ويا أبويه وأنا أشوفه واقف , مانزلت عيوني عنه بل يلست أطالعه بكل ثقة
شوي وبطييح , ياااربي ماحلاااااه ناوي يجتلني بالسفره والعقال ~
ما اقدر والله ما اقدر
تمسكت بيد أبويه وأنا ذايبه في شكلة
قلبي أحسه يدق بسرعة , بلعت ريجي أحاول أقوي عمري وهزيت رآسي أحاول ما أتأثر بشكله ... حاولت أرسم نظرت أحتقار على ويهي مع أني بموت
مادري شو فيني بسرعة أتاثر بالشكل الخارجي ما أقدر أقاوم الجمال ~
يلست على الغنفه إلي عدال منصور من جهة اليمين وأبويه يلس عدالي بس أقرب لمنصور
ويلسوا يسولفون بس أنا ما كنت وياهم , منزله عيوني وأضغط على صبوعي بتوتر
مسك أبويه يدي وهو يقول بهمس: فديتج بنتي لاتستحين هذا ريلج , الحين انا بطلع وأنتوا يلسوا تعارفوا ~
طلع أبويه من الباب
وأنا أحاول أكتم ضحكتي , هذا مجرد تمثيل جدام أبويه , انا اصلا يالسه اخطط لشو بسوي~
رفعت رآسي له بعد ما طلع أبويه, بإبتسامه كلها أحتقار ورفعت حواجبي بأزدراء
بلعت ريجي بسرعة وتحولت ملامح ويهي لجمود وأنا أشوفه يسوي نفس حركتي بالضبط
أبعدت عيوني عنه بتوتر , نظراته وشكله يوترني ~
خذيت أنفاسي بالقوة , لزم أمشي على خططي ولا أفشل , لزم أخليه يكنسل غصبن عنه
صديت صوبه وأنا إبتسم بغباء وهو تغيرت ملامحه وهو يرد لي الإبتسامه
وقفت وأنا أسوي بيدي قبضه يارب رحماك, ما أقدر أحس عمري أضعف جدامه بقوة
مشيت صوب الفواله إلي مسوينها
حطيت فروت في الطاسه , وغمضت عيوني وهزيت رآسي مايهمني شو ياخذ عني لان أبا أطفر به وأباه يكنسل العرس
ومشيت وأنا شاله الطاسه ورديت يالسه على الكرسي وحطيت ريل على ريل ومسكت الخاشوقه وحطيتها في الفروت وبعدين حطيتها في فمي وأنا أطلع صوت وكأني اتلذذ
رفعت عيوني صوبه وأنا اطالعه ببراءه وأبعد الخاشوقه عني وأحطها في الطاسه
كان يطالعني وحواجبه مرفوعه وشبه إبتسامه على شفايفه
رفعت يدي بدلع لخدي وأنا اقول: اووه سوري نسيت ما احط لك !!
وحركة رموشي مكمله: الحين بقوم أحط لك.
بس هو تقرب صوبي بسرعة وير الطاسه من يدي
فتحت عيوني مب مستوعبة سرعته هاي
قال وحواجبه مرفوعه مع إبتسامه خبيثه : خلي عنج , خليني بكمل مالتج ودي أشوف كيف طعمها بعد ماكلتي منها ~
طلعت مني شهقه وفتحت عيوني وأنا أحس بالدم وصل لويهي من الآحراج
حسيت أني أرتجف من الغيض بسبب حركته والتفشيله القوية الي لقيتها
ماعليه يامنصور بردها لك بشوف .
قمت واقفه وسرت صوب الصحون ويلست أحط من كل شي كان في الحرارات
ويبت صحن صحن وحطيته جدام منصور , وبعدها يلست عداله ومديت له بالخاشوقة بكل دفاشة , وخذيت لي خاشوقة ويلست أكل وكأني مب شايفه خير..
كل ثانية أحس عمري بنفجر من الضحك على شكلي وأنا أكل
بس وهو ماكان ياكل !!
حطيت لقمه كبيره في فمي وأنا صد صوبه وأقول بصوت ياله يطلع: ليش ما تاكل؟
كان معقد حواجبه , وبعدها ارتسمت إبتسامه على شفايفه وأنفجر يضحك
حست بوزي بقهر وأنا ابلع اللقمه , كتم ضحكته بالغصب وهو يقول: أشوف الحلوين كيف ياكلون ماشاء الله عندج شهيه مفتوحة ...
وبعدها نزل عيونه يطالع جسمي بنظرات خلتني أعق إلي بيدي بسرعة وأحط يدي جدام جسمي تفادي لنظراته ... رفع حاجب واحد وهو يقول: بس شكله مب باين ووايد فجسمج ~
عضيت شفتي السفليه بقهر ~
خايس مايستحي !!
وخذيت أنفاسي بالقوة ونفسي طابت من الآكل إلي كنت اكله بالغصب
أحراج وقهر حسيته تسلسل لويهي , ماعليه يامنصور !!
بقهر وغضب رفعت ريلي اليمين فوق ريلي اليسار وخليت قدمي فوق ريلي وأنا أهزها لين أنحسرت شوي ...
أباه الحين تلوع جبده , أباه يحس أن فيني شي مشوهه ويكنسل كل شيء
رفعت عيوني بشوي شوي صوبه ..
أنقهرت وانا اشوفه يمد يده بالخاشوقة صوب الصحون وياكل منهن ومسوي لي طاف مايطالعني ... زدت هز ريلي بقهر ... الخايس , ليش مايطالعني ؟؟
عضيت على شفتي السفليه بقهر لاستمتاعه بالاكل ونظراته المرتاحه , وبقوة ضربته على ريله بريلي .. فز وأطالع صوبي
فتحت عيوني وأنا أرص على ضروسي وأقول : سبال ~
حسيت بعصبيه أفقدتني التحكم فعمري ورفعت يدي وغرست ظفوري في زنده وطلع صوتي فيه غضب : أنته ليش تقهرني وتنرفزني !! ليش ما أطالعني !!
غمضت عيوني للغباء إلي فيني , كيف أني قلت له ليش ما أطالعني ؟!
أرتسمت إبتسامه خبيثه على شفايفه وهو يطالع في عيوني مباشرةً , بلعت ريجي لآنه خربطني , وخلاني أرتجف أكثر من نظراته الجذابه
وقفت بسرعة وأنا أرتجف بقوه , وصدري يرتفع وينزل من التوتر ~
وسرت أمشي لصوب المغاسل ~
وصلت هناك وحطيت يدي الثنتين على الرخام وانا اخذ أنفاسي بالقوة , رفعت ويهي أشوف عمري في المنظره , ويهي أحمممر ~
لالا , ليش يستوي بي جييه , ليش أتفشل بالقوة
ليش أفشل دوم ويا منصور , كل شي يفشل
رصيت على ضروسي وصرخت وبعدها على حطيت يدي على فمي بسرعه
بس ما اقدر لزم اطلع القهر والغضب إلي بداخلي
خذيت كم نفس ورى بعض لزم أراويه هالمره صدق ولفيت بروح
بس وقفت وأنا كاتمه أنفاسي بشوفته جدامي , أطالعته بحتقار ونزلت أعيوني بخطف عنه
بس هو مسك يدي , رفعت عيوني له بتعقيدت حواجبي
نظراته كانت مركزه على ويهي وإبتسامته أرسلت الرجفة لجسمي
حاولت أبعد يدي عنه بس ماقدرت وهو تقرب مني
خذيت أنفاسي بالقوة وأنا أرد على ورى ... وقفني بيده وهو يحاوط خصري بها
تقرب مني أكثر وهو يقول: ومنو قال أني مب يالس أطالعج , أنا من يتي يالس اتابعج وأحفظ كل شيء فيج ~
فتحت عيوني وأنا أعض على شفتي السفليه وأحس بالحراره تتصاعد لويهي
تحركة عيونه على ويهي
عيونه لمعت وشفايفه أرتسمت عليها شبه إبتسامه حركهن بشوي
وهو ينفخ ويقول: ناويه عليه أنتي بها الحركة , ناوية تخليني ...
سكت وهو يقترب مني بهدوء ويعطني قبله
أرسلت القشعريره لجسمي وقطعت أنفاسي ~
غمضت عيوني ناسيه عمري وناسيه كل شيء
رفعت يداي وأنا أستوعب إلي يستوي بعقل شبه مايكون واعي
حطيت يداي على صدره أحاول أني أدفره عني
وبقوة دفرته عني وأنا أرفع يدي لفمي مب مستوعبه إني بدالته القبله بدون عقل
وبسرعة بدون ما أشوفه طلعت من الميلس
*****
نوره
مرن أسبوعين على مواجهتي لمحمد
آستويت أتصرف بشكل غريب أستغربت بنفسي منه
بديت أقلل أهتمامي في محمد , ما أعطي حق وجوده أي أعتبار
ولا كأني مهتمه به أبداً
و بدون شعور مني أستويت أصد محمد , أصد إبتسامته إلي ترتسم من يشوفني
و نظراته إلي تلاحقني لكل مكان
مجرد أني أحسسه بعدم الاهتمام أو أنه حتى ولا كأنه موجود فعالمي
أصد عنه ولا كأني شفته
حتى أتصالاته أرد عليهن بكل برود
و مسجاته ما أرد عليهن
بس الشيء الوحيد إلي أسويه أني أمسك التلفون بيدي وصبوعي تمر على كل مسج برتجاف وعيوني تقرآهن وكأنها تحفظهن , وأنفاسي ترتفع وتنخفض أشتياق له
المسجات~
ماكانن عتاب , كانن عباره عن قصايد حب
ومرات يكونن قصايد أهتمام وأعتذار
وكأنهن يقولن عن حاله!!
وكأن محمد هو إلي يكتبهن
أرفع يدي لصدري وكأني أمسك قلبي لكل مسج فيه أعتذار أوكلمات حب يحركن مشاعري المكبوته
ماأقدر أسيطر على عمري , مادري شو فيني ؟!
أستويت غربيه ما أقدر أتحكم في ها التغير المفاجئ إلي يمنعني من أظهار مشاعري لمحمد
يمكن يكون خوف وعدم أستقرار في مشاعري بعد المواجهه إلي حسيتها أستنزفت كل طاقتي وغيرتني
أحس أني أستويت أعيش في تردد بمشاعري صوب محمد ودي أعدل الآوضاع إلي أمبينا بس أخربها بجمودي وصدي وأني ماأعطيه حتى المجال ... أصلا ما حصلنا الوقت علشان نرمس
بعد المواجهه
وبعد قرار خالي أني أنزل للطابق الآرضي وأيلس في وحده من الغرف إلي هناك
خلاني أبتعد عنه ووايد , وقلت أمبينا اللقائات بشكل كبير
أنا أنشغلت وحاولت أركز على شغلي بكل جهد
بس في هناك شيء حسيته تغير فداخلي
أحساس بالراحه ,والثقه
مواجهة محمد عطتني الثقة بنفسي أني أقدر أتقلب على كل الصعاب إلي ممكن تواجهني
وأني أنسانه عندها القوة
أحس أني حطيت ها الشيء فبالي وأحس فكل يوم يقوى فيني ..
حتى أني أستويت أتكلم بثقة وأني قد كل شيء
وأني ناجحه في شغلي
إبتسمت وأنا اشوف أسوم إلي أستوت حماسيه أكثر عن اللزم ها الآيام وليلي إلي مختبصه وياها
علاقتي تحسنت ويا ليلي , أستويت أحس أني بعد إنسانه حالي مثل حال ليلي
لآن أهتمامي بنفسي زاد , وثقتي خلتني أحس أني مب أقل عن حد ثاني
حطيت يدي على شفايفي وأنا أكتم ضحكتي , ياربي ليلي وأسوم فضحية عوده
حرام شرشحن العامل , مادري شو يبنه؟!
جدمت راسي صوب أسوم وأنا اقولها : شو تبينه ؟؟
كشرت أسوم : الخاايس يايبلي الملح بدال الشكر الحمدالله أني شفته قبل ما أحطه!!
الهرم ماعليه أن ما أشتكيت عليه!!
فتحت عيوني وأختفت الضحكه وأنا اطالع ليلي إلي فاتحه فمها هي الثانيه وتتحرطم وقلت وانا أنقل نظري أمبينهن : أسوم , ليلي شو ها!! العامل حليله مع انه ماله دخل في الكوفي ومطرشينه أيب لكن شكر والحين بتشتكن عليه هذي يزاته ؟؟
بس أسوم ماعليها مني يلست تتحرطم أكثر , دقايق بس وأسمع ضحك ياربي يامغير الاحوال توهن معصبات
فجأة سمعت صريخ أسوم وهي تنقز وتلعن : الله يأخذه , آآآآآآآآه شوو ها !!
جبت عليها الكوفي من كثر الضحك , كتمت ضحكتي وأنا اقول: تستاهلين !!
اطالعتني بنظراتها الغاضبه وهي تقول: نوره بللليز لاتعصبين بي !!
شوي وقمنا رايحين صوب غرفة التبديل علشان تبدل أسوم, وصلنا عند الغرفة
دخلن أسوم وليلي قبلي بس أنا وقفت !!
أطالع طيفه إلي كان واقف !!
أعرفه حتى لو كان من ورى , أعرف وقفته وكل شيء فيه
حسيت بدقات قلبي تتسارع وأنفاسي تتسابق
ياربي لين متى بتم الحال جيه !! أحس أني تعبت !!
صح أنه مجرد أسبوعين مرن
بس اللقائات كانت بالنسبه لنا معدومه يمكن بسبب أنشغالي وأنشغاله إلي ماعطنا المجال
هزيت رآسي ولفيت صوب الغرفة قبل مايصد صوبي ويشوفني
دخلت غرفة التبديل وصكيت الباب وعقدت حواجبي وأنا اسمع الأصوات العاليه والضحك
حطيت يدي بسرعه على فمي وأنا أشوف ليلى وأسوم يرقصن
والآغاني شبه ماتكون عاليه
تحولت صدمتي لضحكه لآنهن يلسات يرقصن رقصة الصالونات أونهن
كل وحده توطى على ريل الثانيه والمشكله الغنيه مب راكبه مع رقصهن إلي يحاولن يسرعن به , تقربت أسوم مني ومسكتني من يدي تبا ترقصني وياها , رديت رآسي على ورى أضحك وانا أجاري اسوم إلي ترقص بحتراف يشبه تقربيا التخربيط بس بحركات رشيقه
سمعنا صوت دق على الباب وصوت ريال , عدلت شيلتي بسرعه وبسرعه فجن أسوم وليلي الشيل من عند الخصر وبندت أسوم الآغاني بسرعه , وبخوف وبدون وعي انخشينا في المساحه أمبين الخزانات متروعات
مرن خمس دقايق ونحنا متزاحمات وانفاسنا تلهث
وفجأة أنفجرت ليلي تضحك وهي تدفرنا
أختل توازني و ليلي أدزني لجدام , صرخت وأنا أحس عمري أطيح على الارض
حطيت يدي جدام جسمي علشان ما أصطدم بالآرض واطيح أجسام بقوة فوقي وخلتني أطيح على الارض
صرخت وأنا أحاول اتنفس وأرفع عمري بس ماقدرت
أبا أقول شيء بس الي فوقي كاتمات نفسي
انطلقت الضحكات من اسوم وليلي إلي طايحات فوقي وشكلهن مايقدرن يقومن من الضحك
انفجرت أضحك من الكم الهائل إلي فوقي من الاوزان
ودي اصارخ عليهن بس ماقدر , فما كان عندي غير أني أواصل الضحك
حسيت أني خلاص تعبت وأنفاسي أخنقت
صرخت بصوت مكتوم: قوومن بمووت !!
قامن عني أسوم وليلي بعد وقت طويل , آآآه والله حرام عليهن
يلست وأنا أمسح على جسمي إلي أحسه تكسر بسببهن وأكيد بتظهر لي الكدمات
بوزت وأنا أطالعهن بقهر , حركة جتوفي مافيهن أمل~
يلست ليلي شوي ويانا وبعدين راحت لان خلص البريك , وأنا حوالي ربع ساعه وبيخلص
طلعنا من الغرفه أنا وأسوم , إبتسمت أسوم لي وهي أطالعني
وحرفت عيونها بطريقة وكأنها تفكر وقالت: نوره تدرين أحسج ووايد تغيرتي عن قبل
طلعت لساني شوي وأنا اعضه مع إبتسامه كبيره رسمتها بسهوله : والله ~
هزت رآسها وهي تكمل: هيه أحس أنج أستويتي أجتماعيه أكثر وحسيت بجرائه قليله فيج
رفعت حواجبها وهي تقول: الحلو صار حلو أكثر حتى الويه أستوى أجمل وأجمل
حسيت بالحراره تتصاعد لويهي وأنا أدز جتف أسوم , وقفت أسوم ووقفتني وياها
وهي تأشر بعيونها لجدام .. اطالعت وين تتطالع .. كان الدكتور منصور
زادت إبتسامتي وأنا أصد صوبها وأطالع ملامح ويها
أسوم تخفي مشاعرها صوبه بكل قوة , أنا متأكده أنها تشل مشاعر انجذاب أو يمكن حب بعد فقلبها لمنصور
لانها تغيرت من فتره , كانت حالتها فضيعه من بعد الملجه ولين ماخبرتني حسيت انها صارت ترد اسوم القبليه بشوي شوي ..
طريقة كلامها عن منصور وأنها منقهره منه مع أنها كله تسبه بس أحس من نظرات عيونها
والتوتر القليل إلي يجتاحها من تشوفه أو حتى تتكلم عنه فهالآيام فيها شيء متغير
هي تتكلم عنه بكل حماس لدرجة ماودها تسكت عن شيء اسمه منصور يوم تكون ويايه
فتحت عيوني وأنا أشوفها
تغمز لي وتتجدم صوبه وهو يصد ويكمل مشي لجدام
الحمدالله أنه ماشفنا
تجدمت أسوم لجدام وانا أسرعت وراها
عضيت شفتي السفليه هاي شو تبا تسوي ياربي ماتفضحنا!!
أطالعت أسوم في الممر إلي نمشي فيه وبعدين صدت صوبي وهي تسوي ورى منصور حركات
مثل بعطيه بكس , وتعيب !!
أنا قلبي صار يدق طبول من الخوف , يارب منصور ما يشوفها صح أنها مب قريبه منه ووايد
بس ها الحركه ووايد جريئه وفضضيعه وقوية
رفعت أسوم ريلها وهي تأشر لي وتكتم ضحكتها وحركتها لفوق وكأنها تبا تضربه
بس
مسكت ريلها الثانيه بتنورتها
حركة يديها وصرخت صرخه شبه ماتكون قويه وهي تطيح على الإرض بكل قوة
بسرعة حطيت يداي على ويهي وأنا أشهق بكل قوتي
خوزت يداي عن ويهي أطالع حالها , جمدت وأنا أشوف منصور وقف ولف صوبها
ياربي رحماك!!
مشى صوبها ونظرت الخوف إلي مرتسمه على ويهه تحولت لشبه ماتكون إبتسامه يوم شاف أسوم قامت يالسه وهي تعدل شيلتها وتمسح على يديها
وتغمض عيونها وتفتحهن بألم واضح ~
نزل منصور لمستوها وهو يقول بصوت يالله يوصلني : أنتي بخير؟
رفعت أسوم ويها صوبه بسرعه وهي وتفتح عيونها وفمها بصدمه ..
مد يده صوبها ومسك يديها وكأنه يحاول يقومها بس فلحظه تقرب من ويهها وهمس بشيء ماسمعته , مما خلى أسوم تفتح عيونها أكثر وتعض شفتها السفلية بقوة وتخلي يده بكل قوتها وكأنها شوي وبتدفره بس قامت بسرعه وعيونها مختلفه فيها توتر وغضب ظاهر
نفخت بقهر وهي تمشي صوبي , اطالعتني بعيون متوتره وهي تقرب ..
غمضت عيوني من الفشله أني شفت ها الموقف ومنصور شاف أني شفته
كمل منصور دربه بعد ما عطنا نظرة , أكيد كان يطالع أسوم وبنظرات غير بعد
كأنه يطمن أن ما أصابها شيء ..
حسيت أنه ودي اضحك بس كتمت ضحكتي علشان اسوم الغاضبه .. ولي يلست تسبه وتدعي عليه كالعادة ... سكت وماسألتها عن إلي قالها إياه صح أني فضوليه بس أسوم معصبه الحين بقوة وادري بها إذا تبا بتقول لي بدون ما أسأل ^^"
*****
أستوت عندي عادة , في الطابق الآرضي كانت هناك بلكونه عدال غرفتي اليديده
في الليل هي المكان إلي أروح له , حتى في النهار بس في الليل تكون مكان ثاني محد فيه
مع برودة الليل وأطللها على الحديقة ومنظر القمر الي يكون مكتمل في منتصف الشهر يعطي شكل جميل ورومنسي
جحمها شبه مايكون صغير , مزخرفه برسومات بنيه , فيها طاوله خشبيه كلاسيكه مع كراسيها , مع أضواء شبه ماتكون خفيفه...أحب ايلس فيها مع اني من قبل ماكنت أعطيها أي أهتمام~
أمسك بكراس ذو أوراق بيضه مع ألوان مائية وأبدء في الرسم , الرسم من هوياتي إلي خليتها من بعد مادخلت التمريض , صح أن رسمي مب لين هناك بس أحب أرسم الطبيعه ..
رفعت لعيوني للسماء وإبتسمت~
القمر اليوم مكتمل ولونه مايل للأحمر وغريب ...
بديت أرسم ها القمر مع الضوء الي يشع من حواليه
خليت الفرشاه ويلست اتأمل القمر بسرحان , القمر عطاني شوق , حنين , رومنسية
وذكرني بمحمد , آآآه يامحمد
حسيت بالحراره ترتفع لجسمي وأنا أتنهد بعمق , هزيت رآسي أبا أبعد ها الشوق الي بدء يتسلسل لي بقوة مودني لعالم ثاني ~
همست : أحبك!!
أشتاق لك بشكل ماتتصوره ~
أشتاق لكل شيء فيك
لاتسألني ليش أحبك بروحي ما أدري ليش !!
حبك تسلسل لقلبي بدون شعور مني
وخربط حياتي لفوق وتحت
هزيت رآسي وهمست : صدق أني تخبلت أرمس عمري الحين !!
أحس بالحر مع برودة الجو الشديدة
فجيت الشيلة عن رآسي وفجيت شعري , وبديت أدخل صبوعي أمبين شعري
في محاولة أني أتحرر من الجنون إلي أنا فيه ~
أحس ان أفكار سخيفة بدت تدفق لرآسي
مشتاقة انه يحضني بقوة , وودي بعد بوحده من قبلاته إلي على .....
هزيت رآسي أحاول أطرد ها الآفكار من رآسي
أنا سخيفة !!
بس عادي هو ريلي
حسيت بالحراره تسلسل أكثر لجسمي وويهي , كلمة ريلي حلوه , محمد ريلي أنا!!
أحلى شي أستوى لي فحياتي , أن محمد حبيبي هو ريلي
رفعت يدي لشعري ودخلت صبوعي فيه بشكل عابث :همف!!
خلاص ما أبا أفكر أحسن لي أكمل رسمي , مسكت الفرشاه ويلست أرسم
حركة يدي وانا أبعد خصلات شعري إلي كل ساعه تتناثر على ويهي
صوت خطوات وصوت فتح لباب البلكونه جمدني ~
فتحت عيوني بخوف ودقات قلبي بدن يتسارعن
يارب أني أتوهم , يارب مايكون لا علي ولا عبدالله وحتى حد ثاني
توقفت صوت خطوات والباب تبند , فترة من الزمن مرت وأنا حاطه يدي على قلبي بخوف
غمضت عيوني وأنا اقوي عمري ولفيت صوب إلي فتحه !!
تعلقت عيوني بعيونه لفترة من الزمن
ودقات قلبي بدن يعلناً وجودهن بصوت حسيته وصل له
نزلت عيوني عنه بإرتجاف , ورفعتهن مره ثانيه أطالعه
كان واقف ويطالعني بصمت عيونه معلقه فيني , وتلمع بشكل أرسل لي مشاعر متضاربة
مشتاقة , يخفق لها القلب ~
شكله بروحه كتم أنفاسي وهو لآبس بدلة عبارة عن قميص بنفسجي غامج مع بنطلون رمادي غامج وشعره إلي طايح بشكل جذاب وريحة عطره إلي ملئت المكان وأسكرتني
همس : نوره !!
بسرعه وقفت بتوتر , وأنا أعق الفرشاه من يدي وعيوني عليه
من التوتر حركة الطاولة وطاحن الألوان وواحد طاح على الارض بس ماكان مفتوح
بسرعه نزلت وشليته من على الإرض بتوتر .. وقمت صوب الألوان وبندت المفتوحات ويمعتهن مع الدفتر بعشوائية وحطيتهن في الكيس ومسكته بروح ...
تقرب مني بسرعة ومسك يدي وهو يقول: وين!!
تنفست بقوة وانا أقول بتوتر : بروح !!
تحركة يديه ومسكت جتوفي ونظراته مثبته على ويهي
طاح الكيس من يدي إلى الآرض
وأنفاسي بدءت تطلع مني بكل قوة
رفعت عيوني أطالع عيونه وويهه بتوتر
انصدمت بنظراته , هذا مب محمد !! نظراته حزينه , متوتره , كلها خوف
خوز يده اليمين عني وهو يدخل أصبوعه أمبين شعره بأرتجاف
كان يرتجف بقوة ~
الخوف بدء يزحف لقلبي ,ففتحت عيوني أطالع كل حركاته
همس وأنفاسه تطلع بصعوبة : لين متى نوره؟
غمض عيونه وهو يهمس بصوت فيه تعب , ألم , وأرتجاف: تعبت والله تعبت !!
فتح عيونه وهو يركزهن على عيوني : مستحيل أخسرج , مستحيل بعد ماخذتج بكل قوة !! بعد ماحصلتج وكنت أتوقع أني قدرت لقلبج ~
حرك يديه إلي أرتفعت لويهي ومسكته بكل رقه وأرسلت القشعريره لجسمي وأنا أرفع عيوني لعيونه وكمل : ماتدرين كم كنت أفكر بج !!
صح أني انصدمت يوم عرفت أنج كنتي تحبيني يوم كنا صغار , وماعرفت غير أني أقولج أسف!! لآني سببت لج الحزن , وأني أخر من يعلم ~
أرتفعت حواجبه , وأرتسمت إبتسامه صغيره وهو ينزل يده عن ويهي , فتحت عيوني أكثر وصدري يتحرك في هبوط ونزول وهو كمل:
بس تعرفين أنج ماخزتي عن بالي كنت مصدوم صدمه كبيرة , بس مع الوقت حسيت أني تقبلت فكرة أنج تحبيني , نوره الكتكوته إلي أغلى من روحي حتى, تحبني !!
تغيرت نظرت عيونه بمشاعر حب طالعه بكل وضوح خلتني أكتم أنفاسي:
يمكن من هذاك الوقت بديتي تحتلين أفكاري او بلآصح بديت أكن لج المشاعر
إبتسم أكثر بشكل أنه ضحكه صغيره طلعت منه خلتني أرتجف بقوة :
وبعد ها السنين وصعوبة التواصل أمبيني وأمبينج ألتقيتج بطريقة غريبة
وبعد ما جبيتي عليه الكوفي , حسيت أن ها البنت أثارت فضولي بشكلها وخاصه عيونها كانت تذكرني بحد لدرجة أنه قلبي ينبض لها ~
تنفس بعمق وعيونه إلي تركزت على عيوني بلمعان خلت دقات قلبي يتسارعاً مع أنفاسي وهو يكمل: وأول ماشفتج في بيتنا ويا يدتج أنصدمت كيف أني ماعرفتج !! كيف ما عرفت أنج نوره مع أني كنت مشبهه عليج ..ماتدرين كيف كانت فرحتي , هذي نوره يوم كبرت وتغيرت لهذي الدرجة
أبتعد عني شوي وهو يمشي في المساحة الصغيرة إلي أمبيني وأمبين الباب وأنا مسكت بالكرسي أحاول اتماسك بكل قوتي به وأسمعه يكمل :
كل يوم يمر أحس بمشاعري تقوى ناحيتج , دوم عيوني تدورج !!
ما كنت أدري فهذاك الوقت شو فيني بس حسيت أنج بديتي تستعمرين قلبي
..سكت وهو يحرك رآسه..
ومشى لين وصل للجزء إلي يطل على الحديقة من البلكونه ووقف وهو يطالعني بألم ارتسم في عيونه خلاني أفتح عيونه لمنظره واشهق بقوة وكمل:
وبعد وفات يدتج وعمج الله يرحمهم , والحالة إلي وصلتي لها
كان قلبي يتقطع و ما أعرف شو أسوي أو كيف أواسيج !!
طلعت أنفاسه بالقوة وهو يحط يده على حد يدار البلكونه ويضغط عليه , نزلت عيوني مب مستوعبه ورفعتهن صوبه بسرعه يوم سمعت صوته : ويوم أبوية أختارج حق علي , حسيت بالغضب , مشاعري تخربطت تضاربت , ماعرفت شو أسوي لاني أكتشفت أني ما أقدر أخليج , ما اقدر أتقبل أنج ممكن تكونين لحد غيري ..
ضرب بغضب على حد اليدار مما خلاني أرتجف أكثر وكمل: سرت رمسة أبويه أطلبج منه و تضاربة ويا علي وسويت مشكله خلت علي لآيام زعلان عليه , بس في الأخير خلاج لي
طلعت إبتسامه صغيرة مع نظره فيها إلم وهو يحط يده على صدره , زادت من تسارع دقات قلبي : ماتصدقين كيف أرتحت لآن هذيج الآيام كنت أعيش فيها جحيم وخوف من فقدانج ~
أرتسمت علامات الحزن على ويهه وهو يدخل صبوعه في شعره ويديه ترتجف بوضوح خلآني أرتجف معاها: ويوم الملجة وبعد ماوقعتي , كنت حاس بفرحه ماتنوصف كان ودي أضمج وأبارك لج , بس يوم شفتج طالعه من حجرج بهذاك الويه , أختفت الابتسامه إلى كانت على ويهي
وأختفى كل الشعور إلي كنت أحس به~
زادت نبرت صوته إلم , وعمق وهو يكمل :
ويهج صدمني ونظراتج حطمت كل شيء
ويوم دخلت غرفتي , وقفت قبل ما أسكر الباب أفكر, وقررت أرد لج
يمكن تكونين مرضيه ولا شيء
ومب إلي في بالي " أني ممكن أكون مرفوض بسبب هذيج النظره "
بس!!
سكت هو يصد بويهه عني ويحط يده على رقبته ويكمل بصوت مهتز خلاني أرفع يدي لشفايفي ودموعي تسلسل لعيوني :
يوم شفتج أتصيحن , أنصدمت
حسيت أني صدق مرفوض وأنج ماتبيني ويمكن أنغصبتي عليه ~
حسيت بأن كل شيء تلاشى جدام عيوني
رفع يده مره ثانيه لشعره وألتفت صوبي بويهه حزين وعيون تلمع بألم عميق مزق قلبي :
تعبت وأنا أفكر فيج وليش تغيرت مشاعرج صوبي؟ أحلامي أستوت أغلبها عنج
ما أريد أغصبج عليه , بس أبا أحاول أني أخليج تحبيني مثل ما آحبج !!
أبا أعلقج فيني مثل ما أنا متعلق فيج
رفع ويهه لفوق هو يزم شفايفه ويعقد حواجبه بمشاعر متألمه خلتني أحط يدي على صدري إلي بدء يعورني:
وبعدها يوم ياء علي وهو معصب عليه أني صيحتج او أني آذيتج بشي
ما قدرت غير أني أسير لج في الغرفة
ضميتج لصدري كان ودي أحسسج أني أحبج , أني ما أقدر أعيش بدونج
وأنج كل شي بالنسبه لي ~
ورقدتي فحضني فهذاك الوقت ..
هز رآسه وشبه إبتسامه طلعت على شفايفه بالقوة:
بس فكل مره أشوف فيها نظراتج لي هي عدم تقبل وأنج ماتبيني
وأكد لي ها الشيء يوم خوزت الشيلة عنج , حسيت برفضج لي وأنج مستحيل تتقبليني
ما قدرت غير أني أطلع لج البرودة والقهر إلي فيني
أباج تحسين فيني شوي !!
وأني تعبت منج , أحاول أني أبين لج بس أنتي فكل مره تحطميني أكثر وتخرين من عزيمتي وأنا ماودي أغصبج على شيء ماتبينه !!
أرتسمت على ويهه علامات الغضب والقهر والتوتر وهو يرص على قبضت يده اليمين إلي خلتني أرد على ورى أبا اتقبض في شيء من الصدمه : نظراتج لعلي , تصرفاتج وياي , ويوم شفتج مع هذاك الطالب ما قدرت أكبح الغيرة الي تسللت لي بشكل أفقدتني السيطره على عمري وأسلوبج وياي كان يقهر أكثر ويدل على انج تكرهيني وماتبيني... سكت وهو ياخذ أنفاسه والتوتر باين في حركاته ~
رفعت يدي لفمي وكلماته تردد في عقلي والصدمه خلتني أرتجف وأفتح عيوني أكثر ..
كمل بصوت عميق فيه عاطفة قوية وعيونه كانت أطالعني بنظرات خلتني أرتجف بقوة : ويوم مرضت طلع طيفج جدامي وكأنج خيال, بهذيج العيون إلي فيها عاطفه , وخوف , وحب .. كنت أظن أني أحلم .. بس يوم شفتج راقده عدالي عرفت أنه ماكان حلم ... ماصدقت عيوني ماقدرت أكتم أشتياقي لج وأني ما ألمسج لانج في هذاك الوقت حركتي فيني مشاعر , بصعوبة قدرت أسيطر عليها , لآ أرتكب حماقه
بس ماقدرت أني ما أضمج لصدري وأستلذ بعسل ريقج وأروي الضمىء إلي فيني
بس يوم حطيتي يدج على صدري تمنعني , حسيت أني رديت لوعيي وقمت عنج بسرعة والقهر والغضب وصل عندي لآخر حد ومزاجي إلي تعكر
فتح عيونه وهو يرفع حواجبه وياهن ويتنفس بعمق وشبة إبتسامه أرتسمت على شفايفه خلتني أترجف وأنا ارفع يدي لفمي وأسمعه يكمل : بس بعد موقف الشفت الليلي تجدد الأمل يوم قلتي
" أنج ماتقدرين تعيشين بدوني"
حرك يديه بتوتر :
ها الجملة ماتعرفين كيف غيرت مجرى حياتي والأحداث , وعطتني الأمل بأنج " تحبيني"
عطتني الآمل أن نوره تحبني مثل ما أحبها
ماقدرت أسيطر على عمري فهذاك الوقت كان ودي أسعدج بأي طريقة وأمتلكج أكثر وأكثر
أرتسمت علامات الحزن والقهر على ويهه هو يمشي صوبي وأنا رفعت عيوني اطالعه بأرتباك وخوف وألم وعدم تصديق ,إبتسم بألم وهو يكمل : بس يوم خبرتي أبويه ولا قلتي لي
و لا حتى صارحتني بالي في قلبج !!
زادت نبرت صوته :
أنا كنت أقترح عليج مجرد أقتراح يمكن أنتي تبينه وأحسن لج , يمكن تستقرين فيه أكثر وتخلصين أمور العرس بدون ماترهقين عمرج ..
وقف جدامي وعيونه مرتخيه بحزن وألم وهو حاط يده على راسه:
أنصدمت كيف قالي أبويه وحسيت أني أصلا ماعرفج زين , وأني مب مهم عندج أبداً
وكلامج هذاك اليوم في السيارة صدمني وحسسني أني أنا الغلطان بكل شيء
أنا السبب بكل شيء
سكت وخذ نفس طويل
لمعت عيونه وهو يبطلهن ويطالعني بكل حزن وقال بصوت فيه ألم كبير: تعبت نوره !!
أنا أحبج , أعششقج !!
ما أقدر أعيش بدونج , ما أقدر أعيش يوم بدون ماأشوفج
ما اقدر أتحمل ها الصد منج
بسوي كل الي تبينه حتى لو أفديج بعمري
شغلج أصلا أنا ماكنت أبا أمنعج منه , إذا تبينه تمي فيه وكيفج متى تبين تخلينه أو لا~
نزل يده عن رآسه ومدها صوبي وصوب يدي , مسك طرف صبوعي وبعدها ضم يدي بيده وهو يمسكها ويجدمها صوبه , رفعت عيوني صوبه بأنفاس منعدمه , رفع يدي وحطها على صدره وعلى جهة اليسار ودقات قلبه بدت توصل لمسامعي بصوت مسموع
تنفس بقوة وهو يهمس:
أرحميني يانوره !!
وأرحمي قلبي إلي ينبض لج !!
صغر عيونه بألم وكمل:
ما أتحمل كرهج لي وصدج إلي أرهقني وأتعبني وخربط كل شيء فيني
وحطم كل شي كنت مخطط له
أنا أحبببج يانوره !!
دقات قلبي بدن يوصلن لمسامعي مثل الطبول
ما أقدر أصدق كل إلي قاله , معقولة محمد لهالدرجة يحبني
يعني يحبني مثل ما أحبه!!
حسيت بفرحه وسعادة لاول مره احس فيها , دموعي بدن يتسللن لعيوني بعدم تصديق
إبتسمت من بين مجموعة من المشاعر المتصارعة وانا أهمس ويدي إلي أرتخت عن صدره : محمد !!
تنهد بقوة : ياروح محمد !!
خذيت أنفاسي بالقوة وأنا أهمس: أنا ماأكرهك أنا ....
عضيت شفايفي أقوي عمري أبا أقول هذيج الكلمه ,لزم أقولها !!
رفعت عيوني لعيونه بحب , بمشاعر كلها عشق , والحراره إلي بدت تسلل لويهي مع أحمرار همست: أنا أحبك !!
عيونه أنفتحن يطالعني , بمشاعر أشتعلن فيهن ونظراته تغيرن وإبتسامه غير مصدقه إرتسمت على شفايفه وهو يقول: شو قلتي حبيبي عيدي!!
غمضت عيوني بمستحى وأنا أرتجف وهمست: أحبك!
سمعت تنهيده قويه طلعت منه فتحت عيوني ورفعت ويهي صوبه
شفته قريب مني ما أمبينا ألا خطوه وحده ~
صغر عيونه إلي أرتخن بلمعان وهو يرسم على شفايفه إبتسامه صغيرة ويهمس: ضميني !!
ضميني خلي قلبي يرد لي
خلي دقاته تتناغم مع دقات قلبج
تحركت ببطىء ورفعت يداي وحاوطت خصره بهن ~
حطيت رآسي على صدره , أشم ريحته إلي أشتقت لها
نزلت يديه على جتوفي وإلى خصري وهو يضمني له بكل قوة
غمضت عيوني وأنا أسمع دقات قلبه وصوت تنفسه وأرتجافه
محمد كان يرتجف بقوة وهو يضغط عليه ~
خلاني معاه أتوتر وأرتجف , وهو يزيد ضمه لي ويهمس بكلمات كلها حب وعشق وأشتياق
أبتعد عني شوي ويديه تمر برقبتي وصبوعة تدخل أمبين خصلات شعري
وترسل لي القشعريره ~
خذ نفس بقوة وهو يطالعني ويقول: ناويه تجتلني بشكلج
وعيونج هاي إلي أطالعني بنظرات تخبل بي ~
تقرب ويهه مني أكثر وأنفاسه تصدم بويهي
غمضت عيوني وأنا أحسه يقبلني بكل رقة
قبلني بعمق ولطف
بشوي شوي خف من قوة قبلته وهو يبتعد ببطئ عني وأنفاسه إلي تلهث بصوت مسموع متناغمه مع أنفاسي ~
غمضت عيوني وأنا أحس بيديه إلي تتحرك على خصري وهو يحاول يبعدهن عني
قال بصوت مبحوح : حبيبي !!
فتحت عيوني بشوي شوي , وأنا أحس بالأرتجاف
والحراره إلي فجسمي وويهي بعدها تحرقني
خلا خصري ومسك ويهي بيدين ترتجف وهو يقول بعيون تتراقص فيهن اللمعه : حبيبي شو رآيج نجدم العرس , ما أقدر أتحمل!!
حسيت بالحراره تتصاعد لويهي أكثر وأنا أفهم قصده , نزلت عيوني ~
أقترب مني أكثر وهو يمد يديه لخصري ويضمني له ويقول: خلاص جانج ماتبين بصبر
إبتسمت وأنا أحط ذقني على جتفه وأهمس : بس مب باقي شيء اصلا عن شهر سته
قال بصوت هامس: خلاص, ما أبا أضغط عليج وإلي يريحج بس بسويه
وعلشان خاطر عيونج بس!!
*****
آسوم
غمضت عيوني بقوة وأنا أهز رآسي بقهر , منصور زودها
الحين يهددني ؟؟
ويهددني بشو بعد !!
أنه يعطني .. رفعت يدي أتلمس شفايفي بقهر لو أغلسهن بكلوركس أحسن بعد يععععع
وربي زودها , بس أنا ما أقدر ما أقدر أقاومه
لآني بصعوبه أقدر أتحمل الآغراء إلي يسويه لي
بعد ماخلصت شغلي في قسم الآطفال , سرت أطالع نوره وين؟ ... وطلع أنها بعدها ماخلصت
لآن اليوم هي ساعاتها أكثر عن ساعاتي بشوي
يلست في الكوفي إلي شبه مايكون فاضي وأنا حاطه يدي على خدي , ها الكوفي عاف ويهي من كثر ما أيلس فيه
وأنا حاليا ما أشتهي أكل شيء أبدا
رفعت عيوني وأنا أشوف منصور داخل من البوابه وساير ياخذ له ماي وهو يتكلم بالتلفون
كشرت بويهي بقهر , وأنا احس بقلبي ينبض بقوة
حطيت يدي على قلبي أحاول أخفف من خفقانه إلي وصل لذني
لا تنبض !!
لا , أنتي أصلا ماتحبينه ومستحيل تكنين له المشاعر
انتي لزم تخلين منصور يكنسل العرس وتفتكين منه
بس !!
هزيت راسي مستحيل أضعف لمجرد ها الاغراءت الحقيره إلي يسويها لي
تلاقت عيوني بعيونه وأنا أطالعه بلا وعي مني , بسرعة تدراكت عمري ولفيت ويهي عنه
تنفست بعمق وأنا احاول تنظيم دقات قلبي
رفعت عيوني وأنا اشوفه ياي صوبي ويلس عندي ونزل السماعة عن أذنه بهدوء
إبتسم إبتسامته الجذابه إلي حفظتها وهو يقول: مساء الخير
بلعت ريجي وأنا اطالعه بنظرات ناريه حاولت أرسمها على ويهي وحست بوزي
وأنا أقول : مساء النور~
حل الهدوء أمبينا , الصمت كان مضجر وموتر ومتعب وأنا شاده على عمري
اتمناه يروح ويفكني من ويهه مادري ليش يالس أصلآ ..
رفعت عيوني صوبه , شفته يطالعني
حسيت بعمري أختبصت فوق تحت , بس أطالعته بنظرات حقيره وانا أهز راسي وكأني أقوله ليش أطالع ... إبتسم إبتسامته الخبيثه المعهوده
وهو يمد يده اليمين صوب يدي اليسار ويمسكها .. حاولت أير يدي عن يده
بس هو مسكها بقوة ~
أطالعته وأنا معفسه ويهي , بس هو يلس يلمس صبوعي بتأمل
وبعدها رفع عيونه لي وقال: متى تخلصين الدوام ؟؟
إستغربت سؤاله وأنا أرفع حواجبي وأقول: خلصت
زمر شفايفه وهو يوقف ويقول: بدلي ملابسج وخلينا نطلع أبا أوديج مكان لحايه ؟!
وقفت بسرعه وأنا أحط يداي على خصري : لا والله وين بتوديني!!
رفع حواجبه وهو يقول: بخطفج!!
هزيت براسي أعيب عليه واقلده : بخطفج .
وبعدها كملت بصوتي : سير لاا هذا الي ناقص أصلا مابروح وياك
إبتسم بخبث أكثر : ترا أنتي الخسرانه بس أنا قايل لعمي وهو عطاني الموافقه , تبين تفشلين أبوج لا تروحين..
عضيت شفتي السفليه بقوة وانا أطالعه بعيون غاضبه
تغيرت نظراته وهو يقول : أنا كم مره أقولج لاتسوين ها الحركه!!
فتحت عيوني وتجمدت ملامحي وأنا أتذكر تهديده بغضب يتصاعد فيني
هزيت رآسي وأنا أسير لغرفة تبديل الملابس واحساس بالقهر والغضب ذابحني!!
بسير وياه وبطالع شو سالفته ولان توه ياني أتصل من أبويه علشان اروح وياه
يعني صدق السالفه ~
وبعد
بشل ويايه سجين تفادي لآي شيء يمكن يستوي
أو أحسن شي اشل بترول وأحرقه وأحرق السيارة بكبرها ويستوي انفجار عظيم
هاها رفعت راسي اضحك بفتك منه ومن ويهه النحس , البغيض, المعفن
أتخيل لو أسوي جيه لمنصور واحقق أنتصاري العظيم
تنهدت , مادري وين عايشه أنا بروحي الحين بديت أميل له بكل غباء
بس لزم أوقف ها المصخره إلي يالسه أسويها
شكل ما أنجبرت على شيء ما اباه, لزم اتخلص منه, أنا مب وحده تنجبر على شيء ماتباه
لبست عباتي وأنا أمشي لصوب مواقف السيارات
وأفكر بشو ها الشيء المهم إلي يباني فيه منصور؟!
فحوص وسوينا شو بعد نسوي لزم ؟
ركبت السيارة بهدوء مصطنع وأنا عابسه بويهي..
طول الدرب الهدوء أمبيني وأمبينه سايد لان يوم يحاول يتكلم ويايه أنا ماأعطيه سالفه
متفيج , أنا بروحي متوتره وأرتجف بخوف أني وياه في السيارة يعني ويا ريال غريب
صح هو ريلي الحين , بس ما احب ها الشعور ~
رفعت عيوني وأنا أشوف أننا وقفنا عند مول كبير
أطالعته مستغربة , بس هو إبتسم بهدوء وهو يقول :نزلي !!
لبست اللثامه إلي كنت يايبتنه وياي ونزلت , مشينا بهدوء مع بعض
احس بالتوتر أكثر وانا مستغربة ليش يايبني المول
معقولة !!!
يااااااااااااااااااااي ياي يسوقني , الله أحلى فرصه بفلسه
هزيت راسي مش معقوله ووايد عليه ها المنصور يمكن على شيء تافهه , بايخ مثله
حدرنا محل , أطالعته بستغراب كان محل راقي جدا
وهو محل للذهب
أستغربت وجودي هناك واطالعت منصور بسرعة أستفسر
بس هو إبتسم إبتسامه ذوبتني وهو يمسك يدي , مشيت وياه لين وصلنا للبايع اللبناني إلي هناك , فتحت عيوني على البايع من جماله , الله ماحلاااااااه يخبل
بس توقفت أفكاري وأنا اسمع صوت منصور: أخوي نبا خواتم الدبله بالذهب الآبيض لو سمحت ؟
فتحت عيوني أكثر
وأنا أشوفه يطلع الخواتم ويقول: هادول هن أخر الصيحات عنا !!
عضيت شفايفي وأنا أحس دموعي بتنزل يااااربي معقوله , منصور يايبني هنيه علشان اتنقى الدبله؟؟
ياااااااااااربي شو ها الرومنسيه حتى ما كنت أتخليها في أحلامي
إبتسمت بفرحه وسعاده وأنا مب مصدقه ~
وصار يراويني خاتم , خاتم وهو يجربه على صبعي مادري بس حسيت أني تلقائيا يلست أرمس وياه والدم يتصاعد لويهي , وأقوله رايي فكل واحد بخجل لآول مره أحسه
لين أختارنا واحد فخم وراقي وبسيط بنفس الوقت
لبسني أياه وهو يقول: أن شاء الله عيبج هو أكثر شيء
هزيت رآسي بمستحى وأنا احس قلبي يدق طبوول
نهاية البارت الواحد والثلاثون
02-03-12, 08:39 PM
جديد مواضيع قسم القصص المكتمله من وحي قلم الاعضاء
العرض العادي
