[قصة مكتملة] انكساري ، للكاتبة : أنشودة المطر .. - الصفحة 21

25-12-11, 05:54 PM

المشاركة رقم: 101

المعلومات
الكاتب:	♫ معزوفة حنين ♫
اللقب:	عضو فخري ♪ مُخْمَلٍيةُ آلعَطّآءْ ♦

البيانات
التسجيل:	Mar 2010
العضوية:	157123
المشاركات:	30,194
الجنس	أنثى
معدل التقييم:
نقاط التقييم:	13523

االدولة

مدونتي

الإتصالات
الحالة:
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله

كانت ماسكه سديم بيدها وقالت بقهر..وبحقد
ميساء:ايه مالها وجه تجلس عقب اللي سوته..تستاهل الطلاق..
حطت شنطتها على كتفها وقالت بمزح..تلطف الجو
سلمى:مادري شاللي طيحني فيكم..وحده زعول والثانيه حقود وحده شماته..
حررت ايدها من سديم وقالت وهي تلف الطرحه على وجهها وتلبس النقاب..
ميساء:الحقود اكيد عبيروه..ومنهي الزعول والشماته؟؟؟
سلمى:الزعول ليلى اللي للحين مقفله جوالها..
ميساء:يعني انا الشماته يا..طبقت شفايفها على بعض تحاول تستحث مخها يسعفها بصفه..
وابتسمت من ورى غطاها..يالعجووز يا..ياكوونااان..
ضحكت من كل قلبها
سلمى:هههههه..يعني لازم حركات التقليد..ولا فاقده المزيون
ميساء:مافقدت احد..
سلمى:وش دراك اني قصدت خالد ها؟؟؟..
ميساء:سلمى فكيني من سيرته مالي خلق طاريه...
مشو مع بعض وطلعو للصاله اللي الكل مجتمعين فيها وينتظرونهم
سلمى:الله يستر..من طلع ماندري وينه..حتى فيصل مادري وين راح ..وجوالاتهم واحد مقفل والثاني ناسيه..
ماتنكر ان خايفه عليه..حتى لو هي زعلانه منه..انسانيا بتخاف عليه...

دخل فيصل بثوبه الابيض المكرمش واكمام مفسره لتحت الكوع وشعره مبهذل ومفتاح السياره بيده..
فيصل:السلاام عليكم..
الكل وعليكم السلام...
وقفت ام فيصل على طول وراحت له وهي تحس انه بيبشرها
ام فيصل:الحمدالله على السلامه يايمه ليه تأخرت..ماشفت خالد؟؟؟
طالع بأبوه..
فيصل:هذا هو وراي..
طلعت وهي تهرول تبي تطمن على ضناها..
فيصل:يبه خذت علاجك؟؟؟
ابوفيصل:لا ماخذته..
طالع ابوه بذهول
محمد:يبه واللي توي معطيكياه بيديني الثنتين وشهو؟؟؟
ابوفيصل:اللي ماهو من يدين فيصل ماهو علاج..
هالكلمه خلته ينسى همومه...
فيصل:هههه..وراح لابوه يحب راسه
محمد:لاااا انا احـــــتج واعترض انا خابر ان اخر العنقود له الغلا كله...لا لا مايصير هالكلام..
فيصل:تحتج ولا ماتحتج محد سامعك...
ابوفيصل:الكبير غلااه غير...الكبير كبير..ويتفهم اللي اصغر منه..
فهم كلام ابوه وقال يغير الموضوع..
فيصل:ماشين؟؟
محمد:ايه واغراضك كلها خذتها..وترى جدتي وعمي وسليمان مشو قبلنا راحو بعد صلاة الظهر
فيصل:ايه قاللي سليمان..
محمد:وش لون قالك؟؟جوالك هنا
فيصل:انا دقيت عليه من جوال واحد...
قطع عليهم صوت سلمى وسديم اللي تركض وحضنت خالها
سلمى:واخييييرا جيييت..خوفتنا عليييك
حضن سديم وهو يلعب بشعرها
فيصل:اشوى فيه احد خاف عل...انبترت كلماته وهو يشوفها واقفه بجنب اخته..نزل عيونه بسرعه وتشاغل بسديم وبسواليفه معها..بس عقله وتفكيره كله لها..هي للحين زعلانه؟؟..شايله بقلبها علي؟؟..ولا تعتبرني مالي يد بالموضوع...
رفع عينه اجباريا لها وهو يسمعها تقول
ميساء:انا بدخل واذا طلعتو نادوني
والتفت وهو يشوف خالد داخل مع امه

حاط يده ورى ظهر امه وهي محاوطه يدينها على خصره وتلومه..على كل لحظة خوف عاشتها..
ام فيصل:حسبي الله على عدوك حسبي الله على عدوك..
خلاها تتركه وهو يقول بصوت حنون
خالد:يمااه مانقرفتي من هالدم..انتظريني بروح اغير واحضنيني على راحتك...
صقعته مع راسه بقهر
ام فيصل:وتنكت بعد..صدق شين وقواية عين
محمد:لااااا طاااالت وتشمخت...واحد يحضن ابوي والثاني امي..وانا؟؟؟؟ لا يكون ولد البطه السودااء
ضحكت سلمى وانبسطت يوم شافت خالد
سلمى:ولا تزعل احضني انا...
محمد:اعيش معقد بهالحياه ولا اني افقدها مره وحده
الكل ضحك على كلمته الا سلمى اللي بدت تسبه...
وانتبه لابوه اللي مطنشه...السلام عليكم يابو فيصل..
ابو فيصل:وعليكم السلام...روح غير لبسك حنا بنمشي...بسرعه..
عرف ان ابوه متضايق منه وزعلان..
خالد:ان شاء الله...
وقبل لايطلع من الصاله مر من عند اخته الواقفه...
حك راسه بيده..يبي يسأل عنها..
وهي فهمت عليه...
سلمى:تلقاها بغرفتها..راااضها يالشكاك..
ابتسم وبانت غمازته ...وكتب بالهوى
خالد:كونـــان...واشر لها اشارة مجنونه وطلع...كان فرحااان انها مااراحت..

شال سديم وقال لسلمى..
فيصل:يلا سلمى مشينا...طال عمرك حنا نبي نمشي قبلكم...
ابوفيصل:بحفظ الله..
ام فيصل:خلونا نمشي جميع
فيصل:لاودي امشي الحين...مع السلامه....وطلع ولحقته سلمى وعيالها...

وقف عند باب الغرفه وطق الباب...
سمعت طق الباب وتجاهلته..
انطق مره ثانيه..
قربت من عند الباب وقالت
ميساء:مييين؟؟؟؟..ميييين؟؟؟
انطق الباب مره ثالثه..
قررت تفتح واللي فيها فيها...
فتحت الباب وهي معطيته ظهرها..
ميساء:خيييرررررررر؟؟؟؟شتبي؟؟؟؟؟
دخل بسرعه وقفل الباب وراه واخذ المفتاح وحطاه بجيبه..
التفتت عليه اول ماسمعت صوت التقفيل..وطالعت بتيشرته المليان دم و المشقق وشكله المبهذل
ميساء:ولك وجه تجي...شتبي ها.؟؟؟فيه شيء ثاني بعد؟؟؟
حط يده ورى رقبته وهو يلعب بخصل شعره ..
خالد:اسف..
طالعت فيه من فوق لتحت..وراحت للسرير وجلست عليه..
تقدم ناحيتها وصار قبالها
خالد:اسف..
ماردت عليه..
خالد:اسف..
ماردت عليه
خالد:اسف..
ميساء:لا تحاااااول اسفك مو مقبول ولا هو مهم بالنسبه لي..صرخت عليه ودموعها تنزل بشكل فظيع...انا مابي اعيش مع انسان شكاك..طلقني..
خالد:طيب..بس اسف..
ميساء:قلتلك اسفك مو مقبول..ول
قاطعها
خالد:انا اقول اسسف..
ميساء:.....
رن جوالها اللي بيدها.. وردت على طول

ميساء:هلا فهد..بخير....لا مافيني شيء...لابس حنا بالمزرعه وتعرف الجو....متى؟؟...طيب طيب....لاخلاص بكلمه..ان شاء الله...مع السلامه...
وسكرت..

خالد:شيبي
ميساء:مالك دخل..

خالد:اوكيه مالي دخل مالي دخل...بس اسسسسف..

زهقت منه..زمت شفايفها
ميساء:انت شتبي؟؟؟
خالد:ابيك تسامحيني..
قالت بقهر وبعصبيه
ميساء:مو مسامحتك..ارتحت..وجلسه عندك موووجالسه انا مممادري شاللي مصبرني لهالوقت والله لو ماعمي ابوفيصل كان دقيت على عمي ياااخذني...
عصب عليها ومسكها مع ايدها بقوه..
خالد:غصصصصصصصب عليييييييك تسااااامحيني ساااااااامعه..مو على كيفك غصب بتسامحين...انا مايمشي علي دلعك..وطلعه مع عمك مافيه..لو تموتين قدامي..فاهمه..

نفضت يده وكأنه شيء مقرف وميلت بظهرها ودفنت راسها بالوساده وهي تنتحب..
ميساء:اكرررهههك..وخخخررر عني..مااااابيك...طلللللقني طلللللقني...

سكت وجلس بجنبها على السرير...كان يبيها تفضي شحنة الغضب اللي فيها...

رن الجوال بهالاثناء..واستمر بالرنين..
طالع بالجوال اللي بيد ميساء..
خالد:من جواله اللي يرن..
وهي دافنه وجهها بالمخده..
ميساء:جوال الحقيييييرررره..<<تقصد عبير ماقدرت تاخذه لان ميساء مارضت تفتحلها..
مايدري ليه جته رغبه عارمه بالضحك..كانت طالعه من كل قلبه..
خالد:ههههههههههههه ههههههههههههههه
رفعت راسها وسحبت المخده وضربته فيه وهي تصرخ
ميساء:وانت احقررررر احقررررررر..بررررررررى بررررى مابي اشوف رقعة وجهك بررررىىىىىىىى
رمى المخده ومسك يدينها وثبتهم وسط محاولاتها بتركه..بس كان اقوى منها..
قال بصوت خشن وعالي ارعبها وخلاها تستمع لكل كلامه
خالد:بسسسسسس...ترى عطيتك وجه...اسمعيييني مو على طول تحكمين...انا ماااااااشكييييت..اصلا اذا بشك فيك..مستحيل اشك بفيصل...اللي صارلي شيء طبيعي..كنت مصدوم..يعني انتي وفيصل بالمطبخ لحالكم وعبير معصبه..يعني شبتتوقعين اسوي...اكيد بصدقها..بس اناااا متأكد هالتصديق حتى لو فيصل وانتي ماانكرتوه انا مارح اصدق..تدرين ليه..لاني عارفك وعارف تربيتك..اذا بشكك فيك بشكك بخالتي ..وانا واااثق فيك...فاهمتني..قدري موقفي شوي ..حسي فيني..

سحبها غصبا عنها لصدره وضمها وحب راسها..

ميساء انا مااعرف اصف كلام رومانسي..انا ودي اصير زي ماتتمنين..بس مااعرف..يعني اقصى ماعندي اللي طلع بالمزرعه..تذكرين ولا نسيتي..ميساء انا احبك..ادري انك تحبين فيصل..واخذتك وانا داري..بس شسوي..مااقدر اتخيل نفسي اخذ وحده غيرك...قدري موقفي شوي..
حست بالاهانه...هي تحب فيصل وتركها..رفعت راسها وقالت باصرار
ميساء:ومن قاااال انني احبه؟؟؟؟ اصلللااااا طول عمري احسه مفروض فرض علي..انتم اللي لزقتوه فيني..هو اللي يحبني مووو اناااا..
كان يبي كلمه زي كيذا تطمن قلبه..حتى لو كانت كذب..
وهمس وهو يطالع بعيونها..
خالد:مصدقك..وحب جبهتها...ميساء سامحيني...
سحبت نفسها منه وقالت وهي تمسح دموعها
ميساء:مارح اسامحك..اللي سويته فيني مو شوي..
حس بصدره يضيق..هي ليه ماتبي تسامحه ولاتبي تصدق كلامه..
قال واليأس والالم متمكن من قلبه..
خالد:يمكن لو كنتي تحبيني سامحتيني..الحب يشفع شوي..ادري ان زواجنا ماكمل شهر..كنت اتمنى نتم مع بعض طول العمر..بس انا الزم ماعلي كرامتي..كنت داري انك ماخذتني مو علشاني..ماخذتني تقهرين فيصل..بس اوهمت نفسي..وكذبت عليها وقلت بتحبيني..
التفت عليها..خلاص اللي تبينه بيصير..اذا تبيني اوصلك للشرقيه او لعمك انا ماعندي مانع..واسف على كل شيء..
كانت كلماته تطعن بقلبها طعن..كانت تحس بالالم وهو يتكلم..هي ماتكرهه هي تحبه..بس فيصل اكثر..وفيصل باعني..وخالد شراني..خذي اللي يحبك ياميساء..
مسكت ايده وهي تطالع بعيونه
ميساء:ومن قال اني مااحبك..خالد لو مااحبك كان مازعلت عليك..كان شكيت فيني ولا ماشكيت بالطقاق..بس انا تهمني نظرتك فيني..
ابتسم وهو يحط يده الثانيه فوق يدها
خالد:ونظرتي فيك زي ماهي ماتغيرت..انا واثق فيك..
هي سامحته..بس ماتبيه يعيد هالشيء..
ميساء:ولو..انا للحين زعلانه..
خالد:امري باللي تبين..انا مستعد اسوي اللي يرضيك..
ميساء:ابيك تحجزلي الحين للشرقيه...
خالد:ليه بتروحين..انتي ماقلتي انك تبيني..وتحبيني..وانا اعتذرت..ليه ماتبين تسامحيني؟؟؟
ميساء:محتاجه وقت..علشان اقدر اسامح..اللي سويته فيني مو سهل..
خالد:طيب..اللي تبينه يصير..
ميساء:طيب..الحين اتصل احجزلي....
وقف..
خالد:المطار مو طاير واكيد فيه حجز..لا تخافين....بس بروح اغير هدومي..

********************

الســـاعه الثانيه بعد منتصف الليل...

الحمدالله هي الحين احسن بكثير...لبست عبايتها وتغطت وطلعت مع الممرضه...
ووصلت لجناحه..حطت ايدها على الكولون وقلبها يخفق بشده...
خايفه تلقاه ميت..وان اللي هي فيه مجرد اوهام...مشتاااقه له وودها تتطمن...
تشجعت وفتحت الباب وهي تسمي...

فتح عيونه غصب عنه بسبة قطرات المويه الدافيه اللي انسكبت عليها..
ورجع غمضهم وهو يتحسس الشيء اللي فوق راسه وملاصق لجبهته..
كان يسمع ابتهالاتها ودعائها..ومستمتع بدموعها اللي غرقت وجهه..
فرح..وبسرعه جته الضيقه..فتح عيونه..
زياد:ليلى...
رفعت راسها بسرعه وقالت قبل لاتحضنه
ليلى:عيوون ليلى وحيااتها..وتهجد صووتها..لييه لييييه..وراحت بنوبة بكاء..
رفع ايده بصعوبه ومسح على راسها اللي نصه مغطى بالطرحه ..
زياد:وشو اللي ليه..
رفعت نفسها منه وصرخت فيه
ليلى:كنت بترووووح مني وتقول ليييه..قلتلك خلنا نتصل بالشرطه بس انت تعاااااند..مايهمك الا نفسك وانا بالطقاااااق
مااافكرت الا بنفسك ..لو صارلك شيء
قاطعها
زياد:لو تفتح عمل الشيطاان..استغفري ربك..
رجعت حضنته متجاهله عمليته
ليلى:انت خليييت فيييني عقل..حررررااااااام والله حرررااام عليييك..
وبدت تنتحب على صدره وهو يمسح على شعرها..

مرت نص ساعه وهم على هالحاله..

حس انها هدت بشكل فظيع وتنفسها انتظم...
قال بصوت حنون وعتبان
زياد:وشلون اهلك..وفيصل..ومن جابك بهالوقت...
ماردت عليه..
استغرب..كان يبي يشوف وجهها بس مايقدر هي على صدره
نادى عليها بصوت هادي..
زياد:ليلى..
ماردت..
دخلت الممرضه علشان تشوف المغذي...وانهبلت يوم شافت ليلى نايمه على صدر زياد..
الممرضه الفلبينيه..
اوو ماي قاااااد...دكتور زياد انتي يبي يمرررض مره تااني...
زياد:اووووش...مافي مشكله..
الممرضه:دكتور مدام ليلى كمان تعبان...هذا دكتور جلال يبي يسوي جلسه تاني...
عقد حواجبه..جلال الدكتور النفسي؟؟..وش دخله بليلى؟؟؟ وش السالفه؟؟؟
زياد:ليه..وش فيها ليلى؟؟؟؟
الممرضه:مادري بس هي كل اليوم تعبانه...جازي هي تعرف ..((ممرضه))
خاف فيه شيء مو مفهوم...فيصل مازاره..وليلى تجي بنص هالليل..لايكون اهلها مانعينها وصاير مشكله..
زياد:ناديلي الجازي..وبعدين تعالي جددي المغذي بسرعه..
الممرضه:اوكيه....

********************

25-12-11, 05:55 PM

المشاركة رقم: 102

المعلومات
الكاتب:	♫ معزوفة حنين ♫
اللقب:	عضو فخري ♪ مُخْمَلٍيةُ آلعَطّآءْ ♦

البيانات
التسجيل:	Mar 2010
العضوية:	157123
المشاركات:	30,194
الجنس	أنثى
معدل التقييم:
نقاط التقييم:	13523

االدولة

مدونتي

الإتصالات
الحالة:
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله

هههههههه ياحبيلك..بغيتي تنجنين اجل..قالتها وهي تاخذ رشفه من الكابتشينو ..
نوال:اسكتي لاتذكريني..مرره مصدومه..انتي لو بمكاني شبتسوين..زياد وعاليه وغيوض ..اااه الحمد الله ماصار فيهم شيء..من جد كنت بنهبل..
شموخ:غريبه..ماتوقعت ان غيوض بتوصل معها تذبح ابوها..
نوال:بليز شموخ لا تجيبين طاريها كل يوم انصدم فيها..مادري ليه تغيرت..
شموخ:لا تلومينها كان بيحرق اختها ويموتها..
نوال:لا مو علشان كذا بس..انتي ماشفتي وجهها..مو هي ابدا..انا حاسه ان فيها شيء..مو طبيعيه..
شموخ:الحين انتي تقولين لا تجيبين سيرتها وانتي تجيبينها..
نوال:غصب عني
شموخ:اقول لايكون ليلى راحت لاهلها من الرووعه؟؟؟
كشرت ورفعت حاجب تستهزيء..
نوال:تكفين بس ..قال اهل قال...انتي ماشفتي شسوو امس..تخيلي طردوني وطردو زياد حتى هي هاوشوها...
شموخ:هههههه تمزحين؟؟
نوال:والله العظيم مااكذب حتى اسالو زياد..صدق مايستحوون ولا بنت عمهم الحيوانه تخيلي تقول عني شغاله..
شموخ:شغاله..لا لا تكذبين..
نوال:شمصلحتي اسب نفسي يالمتخلفه..حتى زياد اغسلو شراعه..خوش منسب..
شموخ:غريبه يعني صاير بينهم شيء..
نوال:مادري عنهم بس سبووووو لين قالو امين..ماخلو كلمه ماقالوها..الحقيره مالك خاتمه..زياد بيكشفك على حقيقتك..وزياد بيطلقك..وبترجعين ذليله..اووو كلااام كثيرر..شكلها مسويه مصيبه..
شموخ:شمسووويه....حنا..لازم نقول لماما..
نوال:انا حتى لعمي بقوله..حتى عمي ماسلم من شرهم سبوه وقالو كلام ماينقال عنه..
شموخ:جعل لسانهم للقطع..وش قالو عنه؟؟؟
مدت ايدها لاذنها وبدت تلعب فيها..
نوال:امم..مادري بس زياد حلف انه مايقول وش قالو..

*******************

ياسلااااااام..الشرهه مو عليك الشرهه علي اللي صدقتك..اقولك ودني الشرقيه تروح تحجزلنا على جده..
فتح السويت بفندق جده هيلتون وقال بطريقه استفزازيه
خالد:اقول ادخلي ادخلي تسوين نفسك مو مبسوطه..وانتي طاير عقلك من الفرح..اعرفك زين انا..
انقهرررت منه..
ميساء:مانيب داخله لو تنقز..على هالكلمه لو تموت مادخلت..وطلعت جوالها..الحين ادق على فهد اقوله انك خاطفني..
يموت على نرفزتها..ابتسم وهو يتلفت حوالينه..ماشاف احد..
شالها بخفه ودف الباب برجله..ونزلها على السرير
شالت نقابها وهي تخفي ابتسامتها..مستحيل تبينله انها مبسوطه..
ميساء:والحين شلون ماعندي ملابس..
خالد:حتى انا ماعندي ملابس...
ميساء:ومبسووط؟؟؟
خالد:الحين انتي ليش معصبه؟؟ اكثر ماخلق الله الاسواق نروح السوق العصر واشتري اللي تبينه..ترى ماهي صعبه..
ميساء:لا صعبه و
خالد:ميساااااااااااااء خلاص لا تتدلعين ترى عطيتك وجه..
اففف رجع لحركاته..طيب انا اوريك ياخويلد..
ميساء:طفشان مني رجعني للشرقيه
خالد:باتسر العصر ان شاء الله
ميساء:تتمصخر علي انت انا اتكلم جد
خالد:اعوذ بالله وانا احسبتتس تتكلمين عم..
هذا بيجيب اجلي..
ميلت بنص جسمها على السرير ورجلينها بالارض..
ميساء:اللهم طولك ياروووووووووح..افففف
رمى نفسه بجنبها وقلدها
خالد:اللهم طولك ياروووووووووح..افففف
ميساء:ثقيل دم
خالد:ثقيل دم
غمضت عيونها
ميساء:انت ليش تعاملني كيذا..؟؟؟
خالد:مادري احب اشوفك متنرفزه..اموت عليك..
فتحت عيونها
ميساء:وانا اكرررررهك لما تسوي معي كذا..

فترة صمت

التفت عليها وانتبه لدموعها اللي تنزل..عدل جلسته
خالد:ميساء شفيك..؟؟؟..
مسحت دموعها بظاهر كفها
ميساء:مافيني شيء
سحبها من يدها وخلاها تتعدل بجلستها
خالد:لا ميساء صدق شفيك..ضايقتك بشيء؟؟..ماتبين جده..
طبقت شفايفها على بعض تمنع اي احتمال للبكاء..بس ماقدرت..انفجرت تبكي ..خاف عليها ودفن راسها بصدره
خالد:حبيتي تعبانه..تبين شيء..تبيني احجزلك للشرقيه..ميساء خوفتيني شفيك..ميساء ..ميساء..
ميساء:انا متضايقه..
خالد:شاللي مضايقك قوليلي
ميساء:انت اللي مضايقني..رفعت راسها وطالعت بعيونه...خالد والله تعبت تعبت..انت ليش تعاملني كذا..انت تدري اننا للحين ماكملنا شهر مع بعض..انا اسمع البنات يقولون احلى ايام الزواج شهر العسل..وانا تعبت معااااك..ماحسستني ابد انك تحبني..دفش مررره..ماتراعي شعوري..ترفع ضغطي علشان تنبسط انت وانا بالطقاق..اهم شيء تمشي كلمتك..اترجاك بس علشان تجلس معي..حتى اذا جيت بزعل مو منحقي ازعل ..تتحكم في كل شيء..افففف
ضحك على طريقتها وهي تقول افف
خالد:هههههه يااااااربيه من هالدلوووعه..
ميساء:هذي حقوووووقي ..مو دلع..
خالد:طيب يام الحقوق..خلاص لاتزعلين مارح اضايقك..ولا بطفشك..رضيتي
ميساء:الكلام سهل
خالد:وانا ابن ابوي..هيه تراني خالد ماتراجع عن كلمتي..
ميساء:نشوف...

*****************************

عض على شفته السفليه مقهوور...وهو يمسح على شعرها بحنان...وهي نايمه ولا حاسه بشيء...
زياد:واسألهم وينهي يقولون عند اهلها...تاركينها لحالها..وهي خايفه..
يابعد قلبي..سامحيني..مادريت انك تحبيني كل هالحب..
فتحت عيونها بشويش ورفعت راسها بسرعه ..
وابتسمت وهي تقول
ليلى:الحمد الله...وصارت تفرك عيونهاباصابع يدينها...وفجأه كانها تذكرت شيء ومدت يدينها تتحسس وجهه...زيااد
زياد:عيونه..وش فيك
تنفست بارتياح
ليلى:الحمدالله..لا بس خفت يكون حلم..ربي لك الحمد اللي خلاك لي..
زياد:انتي شلونك الحين..ليه ماقلتيلي انك تعبانه..وليه فيصل ماجاك؟؟؟؟
ليلى:مافيني شيء..بس ارهاق عادي..وفيصل دقيت عليه جواله مقفل حتى خالد ..والحمد الله انا زينه...الساعه كم ..ورفعت يدها..تشوف الساعه..
اعووذ بالله..خمس الفجر...راحت علينا صلاة الفجر...
زياد:مادري ماعندي ساعه..الغرفه ظلام..ومااسمع الاذان...
ليلى:ان شاء الله ربي يغفرلنا...الحين وشلون تتوضى؟؟؟ تبيني اجيبلك طشت
زياد:ايه اذا ماعليك كلافه ولا قولي للمرضه..
وقفت وفصخت عبايتها وهي متضايقه من طقم التايير المنقاوي اللي عليها..
ليلى:وانا وين علشان تطلب من الممرضه..وبعدين اذا احتجت شيء انا مااقدر عليه اطلب من ممرض مو ممرضه...
حتى غيرتها يموت عليها..
زياد:من عيوني..واسفين على الخطأ المطبعي....

**********************************

الا يـــــــام تمر وتمر...والحال زي ماهو...
طالعت بوجهها بالمرايه...وانسابت من عينها دمعه حاارقه...
للحين اثار الكدمات معلمه بوجهي...صارلي اسبوعين وللحين مااراحت...افف
وهو ماعبرني ولاحتى كلف نفسه يعتذر مني...ااااه
الحين شيسوي...وانا شبي فيه مايستاهل اللي يفكر فيه حتى...

رن تلفون غرفتها..وراحت ترد..
عبير:هلا جدتي
الجده:انتي وينتتس تاركتن لحااالي..انزلي بسرعه
عبير:ان شاء الله..الحين نازله...
راحت لغرفة الملابس تغير بجامتها ولبست قميص قطني وردي اكمامه طويله...
رن تلفون غرفتها وراحت بسرعه ترد
عبير:طيب ياجدتي الحين بنزل
وليه تاركتها لحالها؟؟؟
عبير:سليمااان...
سليمان:ايه سليمااان..امسكي ابوي يبي يكلمك
عبير:ابوي يكفي ويوفي..ماني بحاجة غيره..
سليمان:بس لو اعرف هالعوابه منين جااايتك...امسكي..
ابوسليمان:هلا عبووره وش لونك
عبير:بخير يبه انت وشلونك وبشرني عن ناصر..وتهجد صوتها...يبااه ودي اكلمه مشتاقتله
ابوسليمان:هو بخير ويسأل عنك..ان شاء الله بجيبك تشوفينه...
عبير:ياااارب تفك اسره ويرجعلنا ساااالم...
ابو سليمان:اميييين...حنا بكره او بعد بالكثير راجعين...محمد يجيكم
عبير:ايه من الدوام لعندنا على طول...ماقصر...
ابو سليمان:زين الله يعافيه...يالله تامرين على شيء
عبير:انتبه لنفسك
ابو سليمان:مع السلامه....

سكر من ليلى وزياد وهو طفشان...الشعور بالملل قاتل...يحس ان حياته مافيها شيء له معنى...
زياد ببيته..وسليمان صاير رسمي بزياده معي...وعمي من يوم اللي صار ماشفته...
ومؤيد لاهي مع اهله وقضيتهم...
تحسس ذقنه اللي مهمله وزاد من وسامته...وطلع برى مكتبه...

دخل عليها وهي تبكي...وراحت له بسرعه
ام صالح:ها بشر ضصار قدرت تشوفها؟؟؟ طمني ياااخوي..
ابو عبدالعزيز:بدري على البكاء..انتي وين كنتي عنها؟؟؟؟حسبي الله عليك..انتي بالله ام...
ام صالح:ياخوووي اللي فيني مكفيني..طمني وقوللي شاللي صااار ووش دخل سلطاان بالمووضوع...
ابوعبدالعزيز:لاتجيبين طاااريه ببيتي...وتسألين عنه وهو سبب اللي ببنتك...ضاعت البنت بسببكم...الام تاركتها على راحتها والاب مو داري عن هوى دارها..وخال امنتوه عليها..وغدر فيكم....
ام صالح:وش صار يااخوي تراك تعبت قلبي؟؟؟
ابو عبدالعزيز:تأخرتي كثيييير....احمدي ربك اللي ماضيع باقي بناتك وعيالك..وقدرتي تعالجين صالح...وتركها..

******************************

جالس بكنب جلدي اسود وكتفه ملفوفه بشاشا باين من تحت ثوبه الابيض...
دخل عليه والعسكري ماسك يديه بكلبش..
اشر له الضابط يطلع...وقال قبل لا يطلع هو بعد...
الظابط:انا اخليكم على راحتكم....

ضغط خده من داخل بلسانه وهو رافع حاجب وقال قبل لايبتسم ابتسامة سخرية وتشفي..
سلطان:انت للحين عااايش....
ابو صالح:ولك وجه تتكلم يالحقييير...
صار يتمايل بمشيته لين استقر على كنب قباله وضحك وهو يشوف التعصيب طغى على ملامح عيسى
سلطان:قلتلك من قبل..اناااا افعـــل مااتكلم...وغمز له..بس شرايك فيني ؟؟؟
ابو صالح:س#### م#####
سلطان:انتبه تغلط..تراني حذرتك من قبل وانت ماسمعتني...
ابوصالح:وانا شسويتلك علشان كل هذا ..غيوووض وش دخلها
قال بغرور وعنجهيه بانت على صوته
سلطان:قلتلك قبل بجيييب راسك...وهذا انا جبته ..مو بس جبته لااااا..انا جبته ودست عليييه...
ابوصالح:تشب يالواااااطي يالخسسيييييس..
ضحك بسخريه وهو يطالع بساعته الرياضيه..
سلطان:ههههه..ماعندي وقت ولا كان سمعت اطرائك...اسمعني زين ياعيسى...كل رياااااال اخذته مني بيرجع مدبول ثلاث اضعاااااااف..
لاتسوي نفسك شريف وبريء على حسابي...صدقني ياعيسى خلال هالاسبوع اذا ماشفت بحسابي شيء...هالصور بتنتشر بكل مكااااان...
صر على سنونه مقهور
ابوصالح:ماتقدرررر تنشرها..
بلل شفايفه وزادت توهج..
سلطان:مشكلتك ماتتأدب...تذكر يوم علمت ابوي عني وقلتله اني استقبل بنات بالبيت...خربت علاقتي ببوي وخليته يموت وهو زعلان مني...
وقلتلك يومها..بجيب بنتك عندي بالبيت..وجبتها ووريتك الصور....تذكر يوم جيتني وتطلب مني مبلغ ضخم ولا بتعلم الشرطه اني تاجر مخدرات..انا سلمتك المبلغ بس وعدتك اني برجعه منك اضعااااف..وبترجعها لي غصبا على خشمك...اسمعني زييين ياعيسى لاتحاول تلعب بذيلك من هنا ولا من هناك...لاني بطربقها فوق راسك...
والقضية بطلع منها وبرضااااك سااامع ولا صدقني بنشر الصور انت تدري اني باااايعها...
ابو صالح:ماتقدر تسوي شيء...غيوض اعترفت عليك
سلطان:ههههههه ياحليلك..مادري انت غبي ولا تتغيبا؟؟؟...انا بعد مسكين ومدمن...وقضيتي سهله لانه ماعلي شيء ولاحد قادر يثبت علي شيء....نفذ اللي قلته لك ومعاك اسبوع وانا موصي اخوياي يشيكون على الحساب وان مااالقيت شيء صور بنتك مو بس بالسعوديه ..بالعالم كله تبي تنتشر...استر عليها..اووه نسيت انه مايهمك سمعة بنتك...اعذرني..كنت اقصد استر على نفسك...يا عيسى ..ههههههههههههه

*************************

شافها واقفه وتتكلم مع وحده من الممرضات...
اخذ نفس وهو يرتب الكلام اللي يبي يقوله...واقترب منها
السلااام عليكم...
التفتت عليه وهي مستغربه...صارله ايام متغير علي...
فيصل:شخبارك نسرين؟؟؟
نسرين:انا بخير...وانت
ابتسم ابتسامه خلت قلبها يوقف..
فيصل:انا بخيير...فااضيه
نسرين:لييش؟؟؟
فيصل:لا بس قلت خلنا ناخذلنا كوفي ونسولف بالحديقه..الجو حلو ..وانا طفشان...
هي بحلم ولا بعلم...
نسرين:لا مااقدر..عندي شغل
فيصل:اوو خساره..خلاص اسف على ازعاجك
تداركت خطأها
نسرين:لا لا خلاص اسبقني وانا الحين اخلص شغلي اصلا مافي شيء مهم..
فيصل:خلاص بشربك على ذوقي....وراح
نسرين:لا هذا مو طبيعي..شفيه كذا..معقوله بدى يميل لي...يااااارب...

سبحانك اللهم وبحمدك اشهد ان لا اله الا انت استغفرك واتوب اليك
سبحان الله وبحمده سبحان الله العظيم

25-12-11, 05:55 PM

المشاركة رقم: 103

المعلومات
الكاتب:	♫ معزوفة حنين ♫
اللقب:	عضو فخري ♪ مُخْمَلٍيةُ آلعَطّآءْ ♦

البيانات
التسجيل:	Mar 2010
العضوية:	157123
المشاركات:	30,194
الجنس	أنثى
معدل التقييم:
نقاط التقييم:	13523

االدولة

مدونتي

الإتصالات
الحالة:
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله

بسم الله الرحمن الرحيم

الجزء السادس والعشرون

((حتـــــــى التجمـــــد...))

عندما اشعر انك كقطرة دم..
قدر لها ان لا تتجاوز جدران القلب..
أكون مجبرا على التجمد..

عندما افكر فيك..
وكل خليه في راسي تتوسلني الانشغال بك..
فيصيبني الشلل..
وافقد الاحساس بكل شيء
في الوقت الذي احتاج فيه لان اشعر بك..
اكون مجبرا على التجمد..

عندما يصبح الضحك مؤلما..
والابتسامه اشد ايلاما..
واشعر انني كقطرة ماء تتغلغل بكبرياء..
في جراح الصخر..
اكون مجبرا على التجمد..

عندما يدفن الحزن مشاعرك..
ويصبح البكاء منجل..
ولا املك ان اضمك..
اكون مجبرا على التجمد..

عندما يصبح الفرح مؤلما..
والتعبير عنه اكثر الما
فلا املك الا التنفس بعمق..
اكون مجبرا على التجمد..

عندما اشتاق البوح..
وتستبد لغة الصمت..
وتتضائل نبضات القلب..
اكون مجبرا على التجمد..

عندما يطول غيابك..وانام كثيرا حتى تعود..
لا حبا في النوم ولكن..
رغبة في ان يشعر من حولي
بمدى المي..
فيحترمون جرحي
عندما لايحصل هذا ولا ذاك..
اكون مجبرا على التجمد..

عندما يزداد الحب الما..
واحتاج الى رؤيتك..
وابحث عنك في عيون الاخرين ولا اراك..
تشتد رجفة القلب..
واكون مجبرا على التجمد..

عندما تتجاوز الدموع حدود وسادتي..
وتنتحر على اعتاب سريري..
وتعجز الرياح ان تدفع ستائر النافذه..
لتجفف الارضيه..
اكون مجبرا على التجمد..

عندما يكون للكرم معنى اخر..
غير الذي الفناه..
معنى تكرهه النفس..
كتلك المضغه التي تنبض بكرم..
اكون مجبرا على التجمد...

عندما اشعر بان كل مافي الدنيا مؤلم
ولا استطيع ان احقق مااريد
واعيش كما تريد
واحلم بمانريد
اكون مجبرا على التجمد...
منقول....

نزلت جوالها على الطاوله بعد ماكلمتها سلمى..وراحت تاخذ جلال انيق علشان تلبسه فوق جلابيتها..
طالعها وهو يلعب بسبحه من العقيق مهديها له فيصل..
زياد:على وين...؟؟
ابتسمت على شكله المعصب والزهقان..
ليلى :بنزل اجيب جيك مويه...ترى موعد علاجك باقيله خمس دقايق بس..
والتفتت على صوت نوال وشموخ اللي دخلو بدون استئذان...
شموخ:هااااي...
قال بعد مازفر ..
زياد:كملت..هااي شموخ..
طالعت بليلى باحتقار وتقدمت للسرير وجلست على طرفه
نوال:شلوونك اليووم...
زياد:بخير..
مسكت الجيك بيدها وقالت وهي مبتسمه..متجاهله نظرات نوال الاستفزازيه..
ليلى:زين انكم جيتو..انا بنزل اجيب مويه..
عقدت حواجبها..
شموخ:لا تتعبين نفسك دقي على المطبخ وهم يجيبون المويه..
نوال:اتركيها القرويه تلقينها مكروفه ببيت أهلها...
ماعترض مثل العاده وسكت نوال..بالعكس سوى نفسه ملتهي بالسبحه...هي طول اليوم ياعلى التلفون ياعلى كتابها وتاركته...
خلها تستاهل..
ليلى: صدق العقل نعمه...
لاا انا ينداسلي على طرف
وقفت وهي تلتفت عليها وترفع يدها السبابه لها
نوال:احتررررمي نفسك واعرفي من تكلمين....
شموخ:نوااال هدّي..
نوال:مو سامعتها وشتقوووول..هالزفته...
عصّب بعد ماكان مستمتع بالحواار..
زياد:نواااااااااااااااال..
التفتت عليه وهي مقهووره
نوال:اييه داافع عنها انت مو احسن من اخوااانك ..وطلعت
تجاهلت شموخ وراحتله بسرعه وهي تشوفه منفعل ..جلست على السرير بجنبه ونزلت الجيك بالارض
ليلى:الله يهديك ليه تعصب والتعصيب مو زين لك...قولي تحس بشيء الحين..
زياد:هالزفته هذي لسانها متبري منها..يبيله قص..استغفر الله العظيم..
هزت راسها بملل
ليلى:ياقلبي خلاص قلتلك صرت متعوده على حركاتها..وبعدين لو بغيت ارد رديت عليها..انت ماتسمع بالمثل اللي يقول الحقران يقطع المصراان...
قال بعصبيه ممزوجه بقهر..
زياد:الا سامعه وانتي قاعده تجربينه علي..
ركّت ايد على ايد وسندت خدها على كفها..
ليلى:وش انا مجربه عليك ؟؟؟
زياد:اليووم كله حاقرتني..وتسألين بعد..
ليلى:اناااا...ياربي منك تكذب على الطاير...متى حقرتك؟؟؟
زياد:وتنكرين بعد..بالله فارقتي كتابك اليوم..والا التلفووون اللي ماسكت..اليوم اليوم سولفتي علي..جلسنا لحالنا.؟؟؟
استحت يوم قال جلسنا لحالنا وحست انها غلط بينهم..
شموخ:عن اذنكم...وطلعت بسرعه متجاهله نداء ليلى..
طالعت فيه وهي تهز راسها..
ليلى:زين كذا فشلت اختك..هذا جزاها اللي جايه تتطمن عليك وتونسك...
زياد:ايه اهربي عن الموضوع الاساسي..
ليلى:انت اليوم معصب واخلاقك مش ولابد...وتبي تخلق مشكله من لاشيء...هذا بدل ماتقولي الله يوفقك وان شاء الله تتخرجين وتفتكين ..جالس تحاسبني..
زياد:طيب خلاص روحي ذاكري...
وقفت واخذت الجيك وقبل ماتطلع قلدت صوته...
ليلى:طيب خلاص روحي ذاكري...
زياد:بنت اللذين هين..

*********************

دخل الشاليه اللي اخذه بالموفنبيك بناء على طلبها...
مالقاها داخل..طلع برى للمسبح..وشافها معطيته ظهرها وتطالع بالبحر...
عصب وهو خلقه معصب..
هرول لها بسرعه ولفها بقوه
خالد:ياااسلااااام وين حنا عايشين؟؟؟
ارمشت بعيونها
ميساء:بسم الله..وشفيه؟؟ خوفتني
خالد:وتسأل بعد وشفيه هذي اللي تبيني افقع وجهها..
شالت ايده منها
ميساء:وشسويت؟؟؟ ترى مو فاضيه لالغازك...
خالد:ليه كاشفه...
هزت راسها وكأنها تقول الحمد الله والشكر وقالت تستهزيء
ميساء:ولماذا أتغطى...بين شاليه وشاليه حااائط.....وخلفي شاليهي وامامي البحر الاحمر ولا يوووجد الا البواااخر اللي انا ياااااالله أشوفها..
يعني مثلا يااستاذ خالد اتغطى عن البحر الاحمر؟؟؟؟ولا عن الجدااار؟؟؟؟
خالد:وتتمصخرين علي بعد..انا قايل هالشاليه انا مااابيه
ميساء:لانك مووو وجه رومااانسيه..انت المفرووض تعيش بالصحراااء تنفعلك...اااففف
ودخلت

زفر وطلع جواله يحاول علّ وعسى يرد عليه...

**********************

25-12-11, 05:55 PM

المشاركة رقم: 104

المعلومات
الكاتب:	♫ معزوفة حنين ♫
اللقب:	عضو فخري ♪ مُخْمَلٍيةُ آلعَطّآءْ ♦

البيانات
التسجيل:	Mar 2010
العضوية:	157123
المشاركات:	30,194
الجنس	أنثى
معدل التقييم:
نقاط التقييم:	13523

االدولة

مدونتي

الإتصالات
الحالة:
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله

رشف رشفه من القهوه الساده والمره..
وطلّع جواله من جيبه..
فيصل:اذا يضايقك هالشيء...ترى عاادي
نزلت كوب الكابتشينو من فمها والتفتت عليه
نسرين:لا بالعكس...وهذا رقمي...
سجل الرقم بسرعه..وحفظه..
رن جواله..وزفر
فيصل:اففف..وحطه عالصامت
نسرين:مين..سوري ماكنت اقصد..
ابتسم وهو يدخل الجوال بجيبه..
فيصل:هذي الغثيثه..اقصد المداام..
نسرين:طيب رد عليها يمكن تبي شيء مهم
فيصل:خليها تولي ماعندها سالفه..اليوم اليوم دقت علي ولا اربع مراات..وحده فاضيه..
نسرين:اقول فيصل..انت مو مرتاح معها..
شرب القهوه وهو يطالع بالبعيد..
فيصل:لا مرتاااااااحين مررره..وسعييد معها ..
رن جواله ..نزل قهوته وطلّع الجوال..تنهد وحطه عالصامت..
فيصل:نشبه...
قالت مستغربه
نسرين:وشلون سعيد معها ..ونشبه..
فيصل:انا ماالي خلقها اليوم..وبعدين مو كل الايام انا سعيد...خلينا من سيرتها..
والتفت على الصوت اللي يناديه...
:دكتور فيصل دكتور خير الله يبيك ضروري
فيصل:الحين جااي....عن اذنك نسرين...
طالعت فيه وهو يمشي لين دخل المستشفى..
نسرين:مين يصدق فيصل اللي يتحاشاني يقولي اسراره...

*****************

بعــــد المغرب..

دخل وشماغه الاحمر على كتفه وبيده كيس ويدندن..

يالله اني طالبك حمرا هوى بالي
لاروح الجيش طفاح جنايبها
لاروح الجيش حاديه اشهب اللالي
لاهي تورد وسيع صدر راكبها...

سمعت صوته وعدلت جلستها بعد ماكنت متمدده على الكنب..
محمد:السلاااااااااام عليكم...
عبير:وعليكم..
قال وهو يجلس على الكنب
محمد:ردوها بأحسن منها او مثلها...وين جدتي
عبير:دخلت غرفتها تصلي المغرب والظاهر نامت..
محمد:انتي الظاهر لو يصير فيها شيء مادريتي...امسكي جايبلك حتّت ايسكريم انما ايييه ..
فكت الكلبس من شعرها ورجعت تعدله
عبير:مشكور مو مشتهيه
محمد:انتي وشفييك...تبين فيصل كلميه واعتذري منه وبيرجعك..
عبير:وشوووو خير خير لايكون تحسبني ميته عليه خله ينقلع اصلا انا مااابيه..
محمد:بااين مرره..عبير اسمعي كلامي...
عبير:اففف محمد تراك صجيييتني خلاااص لاتجيب طاري هالمووضوع..ورن جوالها بنغمة مسج..
محمد:مطلعه جواال؟؟؟متى
مسكت الجوال وقالت وهي تناظر بالمسج اللي جاها
عبير:ماطلّعت..خالتي جابته تقول ان عامل المزرعه جايهم اليوم وجابه معه..
محمد:امي جتكم اليوم
عبير:ايه جت ولا هي راضيه ترجع تعاملني زي اول..وعقدت حواجبها وهي تقرى المسج..

((نااامي بالعسل ولا تردين علي...اليووم جالس مع وحده من الممرضات وانتي تدقين عليه وهو مايرد متعمد ويقول عنك انك نشبه..محول المستشفى لغراميات..وقفيه عند حده..وانتي ادرى بمصلحتك..واتمنى تدقين علي))

25-12-11, 07:24 PM

المشاركة رقم: 105

المعلومات
الكاتب:	♫ معزوفة حنين ♫
اللقب:	عضو فخري ♪ مُخْمَلٍيةُ آلعَطّآءْ ♦

البيانات
التسجيل:	Mar 2010
العضوية:	157123
المشاركات:	30,194
الجنس	أنثى
معدل التقييم:
نقاط التقييم:	13523

االدولة

مدونتي

الإتصالات
الحالة:
وسائل الإتصال:

كاتب الموضوع : ♫ معزوفة حنين ♫ المنتدى : القصص المكتمله

رفعت عيونها لمكان محمد الخالي مستغربه..وشتقصد دقيت عليه؟؟؟ورجعت تفتش بجوالها على المكالمات..مافيه اي اتصال..
شالسالفه؟؟؟؟ضغطت على رقم نسرين ...وجاها صوتها
نسرين:مووووو مصدقه انا بحلم ولا بعلم..اخيييرررا تكرمتي ورديتي علي يالظالمه ولا كأني صديقتك..أسبوووووعين اسبوعين ياعبير ولا تردييين...
عبير:سوري يانسرين بس الجوال ماكان عندي كنت ناسيته بالمزرعه وماجبته الا اليوم...اااه بس يانسرين لو تدرين باللي صارلي كان عذرتيني..اووه صح وش قصة النشبه مافهمت عليك..؟؟
ماسألت عن اللي صارلها لانه فيه شيء اهم بالنسبه لها..
نسرين:بلاك ماتدرين عن زووجك..الحقير جالس مع الدكتوره فداء اللي تطلقت تذكرينها..وماهمه احد وماسك يدها..
عبير:حقيير..ح##..
نسرين:وانتي المسكينه تدقين عليه وهو مطنشك..ولا يقول عنك نشبه
عبير:أناااا..متى
نسرين:قبل نص ساعه واليوم كله اصلا مارد عليك مطنشك لعانه..
عبير:مطنشني وداقه عليه..انتي شدرااك
نسرين:حبيبته هي اللي قالتلي..وبعد جانا قبل شوي قاط وجهه معنا ودق جواله وكنت قريبه منه وشفت اسمك وحطك سايلنت ويضحك مع فداء ويقول زووجتي نشبه ..اسمعي كلامي هذا مامنه فايده اتركيه وتطلقي منه..شيحدك على واحد زيه..
عبير:نسرين انا مو مصدقه..انتي شفتي اسمي اكييييد
نسرين:يوووه ياعبير اقوولك والله..اسمعي لاتقولين له اني قلتلك..تراه شافني وانا اقرى اسمك ومافي غيري يدق عليك انتبهي تقولين له..قولي ليش يطنش مكالماتك وبس..مو تنسين وتقولين ليه تقول نشبه..
عبير:نسرين مع السلامه...سكرت بوجهها ورجعت تفتش بمكالماتها..مافيه اي اتصااال..وشلون تقول انها تكلمني طول هالمده وانا مو موجود عندي مكالمات لم يرد عليها؟؟؟
وشلون شافت اسمي؟؟؟...لايكوون بس متزوج علي بالسر..ولا يعرف وحده باسمي...ااااه ياربي

*********************

عدلت المخدات اللي ورى ظهره وامه جالسه على طرف السرير..
طالعها من فوق لتحت وميل فمه زعلان...طنشته وجلست على الكرسي قبالهم..
ام فراس:هايمه مشتهي شيء على العشاء...
زياد:ايه ابي سلطة سيزر..
ام فراس:السلطه مو عشاء تبي شيء ثاني معها
زياد:ماني مشتهي غيرها
ام فراس:خلاص بقولهم يسوولك معها شوربة خضار...ووقفت بتطلع
ليلى:خالتي لا تتعبين نفسك انا بنزل اسويها له
ام فراس:والطباخ وش حضرته..
ليلى:اللي تشوفينه خالتي...
اخفت ابتسامتها وطلعت..وهي تحس بالانتصار...زوجة ابن مطيعه ولاترفع صوتها ابدا علي...
جلست مكان خالتها
ليلى:وش فيك ماد البوز؟؟؟؟
زياد:اسكتي مابي اسمع صوتك...
ليلى:طيب اخر كلمه بس..قريت المعوذات بعد ماصليت المغرب..
زياد:مالك دخل..وش يهمك..
ليلى:وشو اللي مايهمني...زوجي وحبيبي وبعد عمري ودنيتي كلها مايهمني...
زياد:روحي ذاكري بس ولا كلمي وحده من خوياتك...وناديلي نووال وشموخ...
تنهدت
ليلى:تبيهم دق عليهم...ومسكت راسها بأطراف اصابعها وضغطت عليه...رن جوالها
زياد:قومي ردي لاينتحر المتصل...
رسمت على وجهها ابتسامه وراحت للتسريحه تاخذ جوالها...
ترددت ترد ولا لأ...ورفعت عيونها له تلقائيا ورنين الجوال يوترها...
ليلى:زياد هذي عبير..
زياد:طيب ردي...واذا ماعجبك كلامها سكري بوجهها...يلا ردي قبل لاتسكر..
توكلت على الله وردت..
ليلى:..آلو
عبير:احم..مساء الخير..
ليلى:مساء النور...
تنهدت قبل لاتقول
عبير:ليلى شخبارك...واخبار زوجك
ليلى:بخير الحمد الله...انتي شلونك..
عبير:ليلى...انا...انتي مسامحتني صح..مو..
طالعت بزياد مستغربه...وراحت له وجلست بجنبه على السرير...
عبير:آلوو..ليلى سامعتني
ليلى:معك...
عبير:ليلى والله كنت مو بوعيي...مقهوره على ناصر وحطيت حرتي فيك..انتي تعرفين طبعي صح..وتدرين اني
قاطعتها
ليلى:عبير انتي اختي ولايمكن اشيل بقلبي عليك..وانتي قلتيها اعرفك واعرف اطباعك زين...خلاص انسي وحنا عيال اليوم
عبير:استغفر الله العظيم..حنا بناااااات مو عيال
ليلى:ههههه لازم تعلقين ولاماتصيرين عبير...انتي شخبارك..واحشتني يالدبا
عبير:انا بخير الحمدالله..ودي ازورك بس مستحيه من اهل زوجك..لو انتي ببيت لحالك كان جيتك...اقول
ليلى:قولي
عبير:ودي..ادق على ميساء...مادري شرايك..ادق ولا لأ
ليلى:دقي وحاولي..وحتى على خالد..وفيصل..عبير لازم تدقين على فيصل
عبير:خلاص بدق على ميساء وخالد...وانتي بعد توسطيلي عندهم..
ليلى:دقي على فيصل ياعبير
عبير:مع السلامه ليلى...
ليلى:الله يسلمك...
سحب الجوال على طول من يدها وقفله وحطه تحت الوساده...
زياد:تعتذر منك؟؟؟
ليلى:ايه...ليه خذت جوالي؟؟؟
زياد:افف بكيفي حر...روحي جيبيلي العشاء
ليلى:العشاء توه اذا جوعان اسويلك شيء خفيف
زياد:لا خلاص..بس بتجلسين كذا مارح تتحركين سامعه
ليلى:طيب بجلس بس بجيب كتابي بذاكر..حراام اخر اختبار بكره..
زياد:ايه مو متحملتني علشاني مريض..روحي روحي..
صرت على سنونها مقهوره..من يوم ماجاء من المستشفى وهو قاعدلها على الوحده..اخلاقه شانت مع الكل...متى يطيب ويفكنا...

****************************

غير طريقه ولف للشارع الثاني اللي فيه قصر عمه..
فيصل:الله يهديها ليه ماخذت علاجها..
محمد:تقول نست...تعال بس بسرعه والله وجهها مو عاجبني
فيصل:يالله هذا انا دخلت البوابه..اسمع
محمد:وشو
فيصل:خلاص خلاص
محمد:خلاص فهمت قصدك..عبير فوق نايمه لاتخاف ...
سكر الجوال وراح لقسم الحريم..وقف السياره عند الباب وترك جواله بالسياره
اخذ نفس ونزل...

كورت ايد وصارت تضربها باليد الثانيه
عبير:افف ماردو علي...مايبون يكلموني ولا ماسمعوه....كيفهم بحاول بكره...
تركت جوالها على السرير واخذت سماعة التلفون ودقت على بيت خالتها..
عبير:الووو
ام مؤيد:ياااهلا براعية الالوو هلا بحبيبة قلبي شخبارك يمه
عبير:بخير الحمد الله انتي شخبارك وش مسويه
ام مؤيد:ابد والله مو مسويه شيء...جدتك شلونها
عبير:زينه..
ام مؤيد:وانتي ماصار شيء على موضوعك
عبير:خالتي دقيت على خالد ومو راضي يرد علي...
ام مؤيد:معليش حاولي..وبعدين احمدي ربك ان ميساء رجعتله
عبير:الحمدالله على كل حال...
ام مؤيد:مالك نيه تزورينا..
عبير:لا خالتي مقدر..تدرين جدتي مو راعية طلعات ولا اقدر اخليها لحالها..انتم تعالو الليله او بكره
ام مؤيد:قبل يومين حنا عندك..
عبير:والله طفش لحالي..طيب عهود وينهي؟؟
ام مؤيد:عهود مشغوله تسوي العشاء
عبير:ههههه والله اتذكر كلامها قبل عن الطبخ واضحك...
ام مؤيد:الوحده الزم ماعليها رضى زوجها...واسمعي كلامي يابنتي الله يرضى عليك
عبير:خالتي رجاء ابي انساه..شبي فيه ..كل يوم جالسلي مع وحده ويغازلها ..خلاص بقلعته مايستاهل
ام مؤيد:يابنيتي قلتلك هالكلام كذب..هذي تبي تخرب بيتك...وعلشان اطمنك اكثر سألت مؤيد عنه وقال بحياته ماشافه جالس او حتى يعطي وجه لوحده..
عبير:هــيء..خالتي انا ماحلفتك ان الموضوع هذا مايطلع ماقلتلك خليه سر بيني وبينك؟؟؟الحين بتصير مشكله لنسرين..
ام مؤيد:لاتخافين ماقلتله شيء انا جبته كموضوع عام..يعني جرجرته بالكلام..بس..
عبير:زين اشوا طمنتيني مابي ادخل نسرين بمشاكل..
ام مؤيد:انتي مو مبهذلك الا هالنسرين..صدقيني يابنتي تكذب عليك..طيب ليش ماتسألينه وتواجهينه ..
وبتعرفين منهو الكذاب منهم...يابنيتي الطلاق شين ..وانتي توك صغيره وفيصل ولد عمك ومافي مثله..
عبير:الطلاق احسن مع عيشه مع واحد كل يوم مع وحده شكل...خالتي اذا خلصت عهود خليها تكلمني
ام مؤيد:ان شاء الله..انتبهي لنفسك يمه
عبير:مع السلامه...
سكرت التلفون ونزلت...

ساعدها تتمدد على السرير وفسر اكمام يدها علشان يقيس ضغطها
فيصل:لو انتس منتبهه على علاجتس
قاطعته
الجده:لو تفتح عمل الشيطان استغفر ربك وتعوذ من ابليس
محمد:ياويلي من هالعجوز ماتبي احد يلومه..
الجده:عجز العدو ان شاء الله الحين افتك من اخوك الموذي وتجيني انت..
حط السماعات على اذنه وصار يضغط هوى لين بدى يضيق على يد جدته...
الجده:محمد وين عبير
محمد:مادري يمكن نيمه...
الجده:رح رح صوتله ماشفته كل اليوم..مسيكينه
ضحك من كل قلبه وهو يشوف فيصل عاقد حواجبه..
محمد:هههه صادقن ابو خشم يوم سمّاتتس الذيبه...اجل ماشفتي عبير كل اليوم؟؟؟؟
شال ايده من جدته اللي رفعت ايدها وخذت العصا وحذفته بقوه على جبهة محمد...
الجده:ذيابتن تاكلك مع اخوك ياملا##...صدق انكم ماتستحوون
تحسس جبهته وكتم الالم اللي يحسه وميل بظهره وتناول العصى
محمد:انا امدحتتس الحين وفلقتيني لو اسبتتس الظاهر تكفنيني...
رجّع جهاز الضغط لمكانه وهو يقول
فيصل:تستاهل ...يلا عن اذنكم..تبين شيء يمه
الجده:وين تبي تروح حلفت الا تجلس تعشى معنا
فيصل:لاتحلفين علي تعبان وودي انام...
الجده:والله ماترووح خلاص حلفت...وصارت تطالع بمحمد بحقد...وانت قووم لعبير خله (ها)تحط لرجله(ها) العشاء..
خاف من نظراتها
محمد:ان شاء الله انتي آمري وتدللي...وقام بسرعه
راح للجهه الثانيه من السرير وتمدد عليه...
فيصل:جدتي بنام شوي واذا خلص العشاء قوموني...
الجده:مافيه نومه ..ماتدري شصار على ناصر
فيصل:دقيت اليوم على سليمان..ويقول الشيخ مو منفذين الحكم الا بعد ثلاث سنين..
الجده:يارب سترك..وليه ماخلوه بعد خمس سنين كود ان ابو محمد يمل ويعفو
فيصل:الله كريم وان شاء الله ناصر يطلع قبل هالثلاث السنين..الله يحنن قلب ابو محمد عليه...
الجده:يااااالله ياارب تحنن قلبه عليه...انا بروح ازور ام محمد
مرر اصابعه على شعره
فيصل:مو الحين خليها لين تنسى شوي وتبرد حرتها..وفتح فمه يتثاوب
الجده:سكر فمك جعلك الصلاااح...تبي الشيطان يضحك عليك
فيصل:يخسي الا هو الله يلعنه..خلاص جدتي بنام ولا خليني ارجع البيت
الجده:طيب خذ مريتك وارجع البيت
فيصل:انا مالي مره..وعدل جلسته...جدتي عشاكم مطول وانا راسي صااكن تصبحين على خير ....وطلع بسرعه...

ماسكه الريموت بيدها وحاطه رجل على رجل
خليه يتعشى وانا شعلي...
جلس بجنبها..
محمد:جدتي تقول روحي حطيله عشى..وبالمره تسامحي منه..
عبير:والله اظن فيه طباخات وفيه شغالات يقدرون يحطون له العشى ..وهو المفروض اللي يتسامح مني..مو انا
محمد:ايه اركبي راسك..اصلا يكون بعلمك هو مايبي تنفتح سيرتك قدامه ولاعنده نيه يرجعك..بس حنا بنحاول..
رمت الريموت بعصبيه والتفتت عليه
عبير:هي هي هو حاسب نفسه مييين ..من زييييييينه يحسبني ميته عليه..مالت عليه وعلى اللي رضت تتزوجه..اساسا هو اللي كان يتلززق فيني بس انا ماعطيته وجه..فكه منه ومن غثاااااه...

كان قلتيلي من قبل ماله داعي تسببين مشاكل بين ميساء وخالد..
التفتو كلهم عليه منصدمين..
فيصل:عن اذنكم....
التفت عليها وهو معصب
محمد:عاجبك ياانسه عبير..
ماقدرت تستحمل وطلعت بسرعه لغرفتها...

*********************

الســــــاعه الثانيه صباحا..

قامت من النوم مفزوعه..سمت بالرحمن وتعوذت من ابليس..
شافته نايم وباين عليه الراحه...مدت ايدها لجبهته ..حرارته طبيعيه..
بعدت الحاف عنها بهدوء.. ومشت بشويش..فتحت البلكونه وطلعت..
كل شيء حولها ظلاام...مافيه ولا صوت ..رفعت عيونها للسماء..
وحست بوحشه..جلست على كرسي خوص فيه خداديات بيضاء..
وجمعت رجلينها لصدرها وركت ذقنها على ركبها..ونزل شعرها على وجهها..
وبدى صوت الدكتور جلال يتردد بأذنها..
جلال:نصيحه..لاتتعلقين بأحد..
لاتتعلقين بأحد
لاتتعلقين بأحد
لاتتعلقين بأحد
رفعت وجهها للسماء وهي تتذكر الحلم...
كانت تمشي بسرعه ..صقعت حجر برجلها وطار صندلها بعييد..
وقفت بمكانها وهي تراقب وين ممكن يروح الصندل..ورجعت تطالع برجولها وشافته بجنبها..لبسته وكملت طريقها...
ليلى:لييه خايفه..ليه الاحساس دايما يجيني...اعوذ بالله يارب سترك...
سمعت صوت وبسرعه دخلت...
ولّعت الاباجوره وراحتله..كان يئن...حطت ايدها على جبهته وكانت ناار..
خافت..لايكون بس بيموت قبل شوي مااافيه شيء...
ليلى:زياد ..زياااااد...زيااااااااااااد..
زياد:همم..
نزلت دموعها غصب عنها وتركته وطلعت تستنجد بأحد...

كانت تكلم زوجها على المسن..سمعت طق الباب..
تماضر:نوال ادخلي...
فتحت الباب بسرعه
ليلى:تماااضر الحقييينيي
رمت السماعات من اذنها
تماضر:ليلى!!!وش فييييييييه
ليلى: زياد تعالي تعالي....

***********************

صفطت السجاده بعد ماخلصت من صلاة التهجد...
شافت الحاف طايح على الارض كالعاده..شالته وغطت خالد..
وطلعت للصاله..كانت الاناره خافته ومعطيه جو حلو مع الرخام السكري والكنب السكري..
وواجهه زجاجيه تطل على المسبح وعلى البحر...وبالنص فيه طاولة طعام كبيره...
جلست على اطول كنبه ومددت رجلينها...اليوم هي زعلانه من خالد..ولا كلمته..يستاهل..
كل شيء عنده ممنوع...امسك ايده برى ممنوع..افتح عن عيوني ممنوع...حتى اللعب بالملاهي ممنوع موديني للملاهي اتفرج بس..
خذت مجله مرميه بجنبها عن صيف جده العام الماضي...تفرجت على الفعاليات اللي كانت..ورمتها..
ميساء:ياربي شفيني متضايقه؟؟..حاسه ان فيه شيء..؟؟ لايكون بس امي ولا ابوي فيهم شيء؟؟؟ او فهد..يااربي..
ليه مارجعتي تنامين؟؟؟
التفتت عليه ورجعت تطالع بالواجهه
ميساء:مو جاييني نووم...
جلس بكنبه بجنبها...وهي استحت وعدلت جلستها...
خالد:ماتعشيتي...تبين اطلبلك عشى..؟؟
ميساء:مو مشتهييه..
رتب حاجبه اليمين بيده
خالد:طيب..زعلانه..
ميساء:ويهمك..انت اصلا زعلت ولا مازعلت بالطقاق..
خالد:مو طقاق واحد..طقاقين..
طالعت فيه ببرود وهو راسم ابتسامة غرور..
ميساء:شكرا..
خالد:لا شكر على واجب حنا بالخدمة...
وقفت بتطلع للمسبح
خالد:على ويين؟؟؟
ميساء:بروووح اتنفس هنا ماافيه هوى
خالد:مشاء الله وبتطلعين بلبسك هذا؟؟؟
كانت لابسه بجامه حرير لحمي منقطه باللون الليلكي وبدي قطن لحمي وعلى اطرافه كلفه دانتيل ليلكي
رجعت للغرفه واخذت لها روب ولبسته فوقه وطلعت
كان بنفس مكانه وبنفس جلسته
خالد:على وييين على وييين
ميساء:وش باقي بعد البسه..تبيني اتغطى والبس عباتي مرره وحده..يمكن الهوى بعد رجال..
اشر بيده
خالد:ارجعي ارجعي وبلا كثرة كلاام..انا الظاهر بطلع من هالشاليه احسن واريح...
ميساء:اطلع وفكني من وجهك بالمررره..
خالد:وانتي معي ياحلوه..مقدر استغني
حقرته وطلعت للمسبح ولحقها...
جلست على الحاجز اللي يفصل البحر عن الشاليه والامواج تضرب بقوه على الصخور
جلس بجنبها
خالد:حلو الجو..
سكتت ماتبي تتكلم...هي تحس بضيقه وهو جاء كمل عليها...
خالد:تراني اتكلم..ردي علي..
ميساء:كلّم الرجال اللي حولك..اللي تشوفهم وانا ماشوفهم..ومخليني اتغطى عنهم
ماقدر يمسك نفسه
خالد:هههههههههه..ياااحلوووك وانتي متنرفزه...
التفتت عليه وقالت بجديه
ميساء:خالد ممكن تتركني لحالي..
خالد:زعلتي
ميساء:وليش ازعل قايل شيء يزعل...بلييز خالد ابي اجلس لحالي
خالد:واذا قلت لأ
ميساء:عادي ..مو غريبه عليك..
افتشل وتركها لحالها
ميساء:يااربي ليه قلبي يدق بسرعه..ليه احس انه فيه شيء...

***********************

مسح دمعه وحيده خالفت الاعراف والتقاليد الرجوليه
ودفن راسه بين يدينه..قهر ان دمعته نزلت..وكبريائه انجرح..
يسمع عن الطلاق بس عمره ماتوقع انه بيجربه...يسمع عن معاناة المطلقين..بس ماتخيل انه بيوم بيعاني معاناتهم...
فيصل:وهذا انا شعوري معها عاادي..اعاني ..شلون ناصر؟؟
ليلى شلون عدت من هالمرحله..غير معاناة الطلاق والخيبه كان الكل ضدها...اااه..
ليه مالي حظ؟؟..شمعنى انا؟؟..ليه يصيرلي كذا؟؟...كنت احسبها تحبني واللي صار بسبب نسرين وطلعت تكرهني..
واللي احبها نستني وعاشت مع غيري وخلتني اتعذب...افف ليتني ماتزوجت..ليتني ماتزوجت...
سمع صوت آذان الفجر
الله اكبر الله اكبر
الله اكبر الله اكبر
اشهد ان لا اله الا الله
اشهد ان لا اله الا الله
اشهد ان محمد رسول الله
اشهد ان محمد رسول الله
حي على الصلاة حي على الصلاة
حي على الفلاح حي على الفلاح
الله اكبر الله اكبر
لا اله الا الله..
مسح وجهه بيدينه بعد ماردد مع المؤذن..وقام يتوضى...

*************************

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري