كاتب الموضوع :
صديد الجروح
المنتدى :
القصص المكتمله
البارت الثالث والعشرون
&&&&&&&&&&&&&&&&&
دخلت الجناح بعد ما فتح لها الباب ودخلت وصارت عيونها تتفحص كل ركن في المكان والتفتت له بعد ما وصلها صوته:ها عسى عجبك الجناح يا روحي
ردت عليه بهمس:ايه حلو
قرب منها ومسك وجهها بيديه وبشك:فيك شي يا قلبي تعبانه
طالعته ونزلت عيونها بدون ما ترد
كرر سؤاله وهو يحس أن فيها شي:سموي فيك شي
سميه بابتسامه:ولاشي حبيبي
حصين بإصرار:كأني ما اعرفك قولي وش فيك
سميه بخوف:احس اني خايفه
حصين باستغراب:من ايش
سميه بتوتر:من اهلك وردت فعلهم خصوصا ابوك وجدك..نزلت عيونها وكملت بحزن:اخاف ما يتقبلوني او ما اعجبهم
حصين وهو ياخذها بحظنه ويمسح على شعرها:لا تخافين ولا تحاتين حصونتك مدبر كل شي يا روحي
رفعت راسها عن صدره وهي تطالعه وبحيره:وش تقصد
حصين وهو يبوس خدها:بعدين تعرفين الحين روحي اخذي لك شور يريحك من تعب السفر ولا تفكرين بشي طيب
سميه وهي تبتسم:طيب
تركته وتوجهت تدور غرفة النوم والحمام(اكرمكم الله)وتركت وراها حصين اللي يتنهد ويفكر وش ممكن تكون ردة فعل اهله اذا درو بموضوعه والطامه لما يدرون باللي سواها
&&&&&&&&&&&&&&&&&&&&
دخلوا البيت وطلعت لهم غدير اللي لما شافتهم ميلت فمها وبغرور:هذول انتم مره ثانيه وين اخوي صقر المفروض يكون هو اللي داخل من هالباب مو...كملت وهي تطالعهم من فوق لتحت:انتم
امجاد وهي تنزل شيلتها وترجع شعرها لوراء:اقول انطمي دام النفس عليك طيبه
غدير بعصبيه:انتي تقولين لي انطمي انا....
قاطعتها امجاد وهي ترفع يدها:انا ماني رايقه لعوار راس متى ما روقت جيت ارد عليك يا سفيهه
التفتت امجاد على بانه وسجيه اللي كانوا متفرجات:يله
صعدت امجاد الدرج وأخذت بانه شنطتها الصغيره وطالعت غدير بكره ولحقت بامجاد اما سجيه فاخذت اغراضها وطالعت غدير وبصوت ضاحك:يا شين طيحة الوجه شيناه ههههههههههههههههه
صعدت الدرج تلحق ببانه وامجاد وهي مستمره بالضحك تاركه وراها غدير اللي ضربت رجلها بقهر وبحقد:اويكم انا غدير الماجد تهينوني بها الشكل اوريكم يا بيئه يا حيوانات
دخلت للصاله الداخليه وهي تتحلطم وتتوعد في امجاد وسجيه وبانه
&&&&&&&&&&&&&&&&
وقف سيارته قدام بيت خاله ونزل وهو شايل ملف القضيه بين يديه والفرحه مو سايعته وده وخاطره يشوف ردة فعلها
وصل للباب ودق جرس وطلع له لافي :هلا يوسف
يوسف:هلا فيك
لافي وهو يفتح الباب:حياك
يوسف:الله يحيي مقدارك
دخل ووصلوا للمجلس الخارجي ودخلوا وجلس يوسف وجلس لافي جنبه وبخوف:ها وش صار على القضيه طمني عسى عندك اخبار تسر الحال
يوسف بهدوء عكس اللي داخله:ايه عندي اخبار بس لازم يكون خالي والاء موجودين اذا ما عليك امر نادهم
لافي الي حس أن في مصيبه:ليه صاير شي
يوسف باصرار:مقدر اقولك الا اذا جاء خالي والاء ابغى الكل يسمع
لافي بسرعه وهو يوقف:أن شاء الله
طلع بسرعه تارك يوسف على نار متشوف يشوف ردة فعلها كيف بتكون
بدا يتخيل ردة فعلها لما تسمع الخبر وصوتها وحتى نظرتها كيف بتكون من الفرحه
ثواني الا دخل خاله صافي ومعاها الاء ولافي وصحوه من سرحانه
صافي بخوف:ها وانا خالك وش الشي اللي تبغى تقوله صار شي مو زين
يوسف وقف وهو يشوف وجه خاله اللي مبين عليه الخوف:لا
التفت لألاء وفتح الملف ومد لها ايها :وقعي
الاء وهي تطالع ابوها والدموع بدت تتجمع يعيونها وترجع تطالع يوسف وبصوت مرتجف:ووش ااوقـ..ع علـ..يه
صافي وهو يمسك اعصابه:تكلم وش هالاوراق وش صاير
يوسف وهو يراقب ملامحهم وهي بالذات:هذي اوراق برائتك
الكل انصدم وطالعوا بعض
الاء بهمس:ايش
صافي بعدم تصديق:عرفتوا المجرم
يوسف وهو يبتسم بفرح:ايه عرفناه والله ظهر الحق
صافي وهو يضم الاء وبفرحه:الف الف مبروك يا بنيتي الحمد لله اللي بين الحق
لافي وهو يضم يوسف:مشكور يا يوسف ما قصرت
يوسف وهو يضحك:لا العفو والحمد لله وحده هو اللي يستحق الشكر
صافي وهو يترك الاء ويقرب من يوسف اللي بعد عن لافي وباس راس خاله:تسلم يا وليدي ما قصرت كفيت ووفيت
يوسف:لو ما اخدم اهلي من اخدم
شاف ردة فعل الكل الا هي
التفت الكل على صوت صياح وشافوها جالسه على الكنب ومغطيه وجهها بيديها
قرب منها صافي وجلسها جنبها وخذاها بحظنه وبضحكه:وش فيك تبكين المفروض تفرحين وانا ابوك
الاء بصوت باكي:كنت خايفه يا يبه تضيع حياتي وادخل السجن وينتهي كل شي
صافي:الحمد لله يا بنيتي
لافي وهو يجلس جنبها وبضحك:هههه يا شيخه حتى السجن عافك طايحه في كبودنا لا محاله
صافي وهو يضرب لافي:عيب تقول عن اختك كذا اختك بعيوني
اما الاء وهي من الفرحه صارت تضحك و تبكي بنفس الوقت وتحس كل شي ملخبط
تنهد براحه وهو يشوف الفرحه بعيونهم وحس أن وجوده ما عاد له داعي :انا اترخص واخليكم الحين..حط الملف على الطاوله الصغيره الموجوده بالمكان:وهذي الاوراق وقعيها وارجع اخذها بعدين
صافي :عسى عمرك طويل يا ولدي ما قصرت..التفت على لافي وكمل:قوم وصل ولد عمتك
لافي:تامر امر
وقف وهو يمشي مع يوسف اللي ودعهم ومشى مع لافي لحد ما وصل باب الشارع
لافي وهو يحط يده على كتف يوسف:جميلك ما انساه
يوسف:وشو جميله وش خرابيطه احنا اهل
لافي:هذا العشم فيك
ابتسم له يوسف وبهمس:مع السلامه
لافي:في امان الله
طلع يوسف وهو يحس وكأن جبل انزاح عن قلبه وارتاح بعد ما ظهرت برائتها وبدا يحس أن جسمه محتاج فترة راحه طويييييييييله
&&&&&&&&&&&&&&&&&&
وقفت السياره قدام البيت ونزلوا من السياره وشافوا راكان ينتظرهم
حسن وهو يبتسم لاخوه وتوجه له مسرع وراكان فتح يديه لاخوه وحظنه وهو يشد عليه
حسن وهو في حظن اخوه:اشتقت لكم
راكان:واحنا بعد اشتقنا لك
وخر عن اخوه والتفت لصقر اللي قرب وهو ماسك سمور ولما قرب منه حظنه
راكان:من زمان عنك يا اخوي
صقر وهو يشد عليه:الظروف والله اعلم بالحال
بعد عنه وهو يبتسم :ادخلو حياكم
حسن شال سمور اللي مخبيه وجهها عن راكان
دخلو واستقبلتهم ام راكان:هلا هلا كلوووووووووششش
حسن نزل سمور وراح لامه وخذاها بحظنه وام راكان تبكي:يا وليدي يا بعد قلبي
حسن وهو يمسح دموعها ويبوس يديها:اخبارك يالغاليه
ام راكان:بخير جعلك بخير وش احوالك تاكل زين صحتك زينه
حسن وهو يمسح دموعه اللي تجمعت بعيونه من شوفته لامه:الحمد لله بخير يالغاليه
ام راكان طالعت صقر اللي تقدم وباس راسها:اخبارك يا يمه
ام راكان وهي تمسح دموعها:بخير يا وليدي اهئ اهئ
راكان وهو يقرب:صلي على النبي يا يمه واذكري الله وش له البكاء الحين
ام راكان:لا تلومني يا وليدي تذكرت الغوالي
صقر تنهد بضيق ولف وجهه عنهم لا يشوفون دمعة انكساره لما تذكر امجد واخته
ام راكان:اعذروني حياكم تو ما نور البيت ونورت السعوديه
لمحت سمور اللي متخبيه وراء صقر:هذي سمر
صقر بابتسامه:ايه هذي هي
ام راكان:صرتي حرمه تعالي يا حبيبتي
سمر وهي تمسك رجل صقر وتتخبي وراه:لا ما ابعى
جاها حسن وشالها:تعالي يا حلوه
قرب من امه وهي مخبيه وجهها بصدره:سمور شوفي هذي امي
سمر وهي تطالع ام راكان:امك انت تيف انت كبيل
الكل:هههههههههه
ام راكان:بسم الله ما شاء الله سبحان الله صدق من قال من خلف ما مات نسخه من المرحوم رحمة الله عليه
الكل:رحمة الله عليهم
صقر تنهد:الله يرحمهم
ام راكان والفرحه مو سايعتها:اقلطوا ادخلو يا عيالي لا توقفون
دخلو الصاله الداخليه وجلسوا وبدت السوالف والسؤال عن الحال
وراح نخليهم يرون شوقهم من بعض
&&&&&&&&&&&&&
بعد ما تطمن على زوجته في الفندق توجه لبيتهم
دخل وشاف امه جالسه تتقهوى :السلام عليكم
ام حصين وهي توقف:هلا هلا بوليدي هلا
حصين وهو يبوس راس امه ويدها:اخبارك يا حلوة اللبن
ام حصين بفرحه:مدام اني شفتك انا بخير
دخل عليهم فواز:ايه ايه انا برا وغيري معشعش بالقلب
حصين:هههه اطلع منها يالسوسه
جلس جنب امه وجلس مقابلهم فواز
فواز:اقول يمه وين يزن ومازن من اول ما جيت ما شفتهم
ام حصين بتنهيده وقلب محروق:من يوم تهاوشو مع ابوك ما رجعو
فواز:الله من ذاك الوقت
ام حصين:ايه وزادوا الطين بله جاو لابوك وقالا له انهم بيشتغلون ويبغون يعرسون وهو غسل شراعهم زي عادته
حصين وفواز بتفاجا:يعرسون
ام حصين:ايه يا عيالي يبغون يعرسون
فواز بضحك:والله مو هينين ومن يبغون ياخذون
ام حصين:اللي فهمته انهم يبغون ياخذون من بناتنا بس من بالضبط والله ما دريت
فواز طالع حصين :والله هالتوام طلعوا خطيرين
حصين ابتسم بخفه وما علق
ام حصين:الا قولو لي يا عيالي وش اخباركم واحوال ذيك الديار
ابتسم فواز وحصين وبداو بسرد الاخبار لامهم
&&&&&&&&&&&&
نزلت وياه وهو ما رد ولا على أي استفسار ولا سؤال من اسئلتها ومسك يدها ودخلو المستشفى وتوجهوا للاصنصير وفتح الباب وركبوا وبعد ما صك الباب سحبت يدها وباستغراب:معاذ انت ليش جايبني المستشفى
ضغط على الزر ولا رد عليها
غصون بعصبيه:معاذ لا تحقرني ورد علي
معاذ وهو يطالعها:شوي وتعرفين
غصون زفرت بضيق وسكتت
انفتح باب الاصنصير ومسك يدها ومشوا لحد ما وقفوا عند باب الغرفه
التفتت عليه غصون باستغراب:انت جايبني لمن
معاذ:ادخلي وبعدها تعرفين
غصون بخوف:لا وين ادخل ما يصير ادخل غرفة احد ما اعرفه
معاذ بحزم:غصون قلت لك ادخلي
غصون تنهدت وفتحت الباب وهي تطل براسها ودخلت وبعد ثواني طلعت وقابلت عيون معاذ وبهمس:مافي احد
معاذ عقد حواجبه وهو مو فاهم:شلون يعني ما في احد
غصون رفعت كتوفها:مافي احد داخل
معاذ وخر غصون ودخل وصارت عيونه تدور بالمكان
لقى السرير مرتب والغرفه فاضيه وبهمس:وين راحت
غصون وهي تقرب:معاذ مين هنا انت كنت جايبني لمين
التفت عليها وبضيق:ما يهم
غصون:كيف ما يهم
معاذ بتصريفه:كنت كنت جايبك لحرمة انسان عزيز علي ابغاك تزورينها وبس
مشى وجلس على الكراسي وهو ينزل راسه
غصون وهي تجلس جنبه:طيب ليه كل هالحزن الحرمه طلعت يعني بخير
معاذ وهو يطالعها تنهد وهو يحس بضيق وقهر ووقف وبهمس:يله
مشى ووقفت غصون تلحقه وهو في باله شي بيسويه
&&&&&&&&&&&&&&
خلونا نسرع الاحداث ونحرك عقارب الساعه للحظه اللي ننتظرها
&&&&&&&&&&&&&
يوم عرس دانه وهبه
&&&&&&&&&&&&&&
دخل البيت والمكان هادي
شوي ويسمع صوت جدته:وانتم مهما اعلم فيكم ما تتغيرون متى تتسنعون وتعرفون تضبطون القهوه
دخل المطبخ ومرسوم على وجهه احلى ابتسامه
وقرب من جدته اللي تتحلطم على الخدم وباس راسها وهي انتفضت من الخوف والتفتت عليه:يوه سليطين حسبي الله على ابليسك
سلطان وهو يبوسها:ههههههههه هذا بدال ما تقولين حمد لله على السلامه
الجده:ايه صح تذكرت الحمد لله على السلامه وانا جدتك عساك ما تعبت بالسفره
سلطان:لا ابد
الجده وهي تضربه بخفه بالعصا:يا بعد عمري والله أن شافتك امك بتستخف
سلطان:هههه تراني غبت بس يومين مو اسبوع
شوي ويوصلهم صوتها:صباح الخ..
راحت جهة ولدها اللي باس راسها وهو يحظنها:انت جيت يا وليدي الحمد لله على سلامتك والله اني كنت احاتيك
سلطان:وشون ما اجي واليوم عرس الغاليه
الجده:يا حليلكم صرتوا تعرسون بسرعه ههههه
ام سلطان:ههههه كبروا يا يمه واحنا عجزنا
الجده وهي تمد عصاها على بنتها:انتي كبرتي اما انا توني قلبي شباب
سلطان وامه:ههههههههههههههههههه
&&&&&&&&&&&&&&&&&&
قامت من السرير على صوت شخير:اوووف سجيه بسك شخير والله صوت طياره حربيه مو شخير
التفتت بعصبيه وشافت بانه واقفه عند النافذه وسرحانه
قامت من سريرها وقربت من بانه وباستغراب:وش عندك مصحصحه بدري
بانه وهي تفيق من سرحانها وتلتف لها:مانمت
امجاد وهي تحك شعرها:وليه
بانه:افكر
امجاد وهي تشمر اكمام البجامه:في وشو
بانه وهي تطالع امجاد:في كل شي في امي وابوي واختي وفي حياتي والمستقبل والماضي
امجاد:الله الله كل ذا وليه عاد
بانه وهي تحس روحها مخنوقه :ما ادري افكر باللي يصير لنا
التفتت على النافذه وهي تكمل:ابوي وفى لامي وترك لنا كل خير قبل لا يموت وكانت امي تخونه وامي تخون ابوي مع واحد نجس و دانه طيبه وتنظلم وانا قويه واغامر احس كل حياتي ملخبطه مافيها لحظة سعاده دامت
امجاد قربت منها وبحنيه:بنبون
التفتت وسكتت تنتظرها تكمل
امجاد:كلنا حياتنا ملخبطه يعني انتي على الاقل عندك اهل وانا بعد حياتي ملخبطه وبعد عندي اهل بس سجيه شوفيها لا ام ولا اب ولا جده ولا اخت ولا حتى اخو شوفي بلوة غيرك تهون عليك بلوتك
بانه وهي تزفر:الحمد لله
امجاد وهي تعطي بانه ظهرها:انا بروح اخذ لي شور
بانه وقفتها:ابغى أسالك سؤال
امجاد وهي تلتفت لها وباستغراب:وشو
بانه وهي متوتره وبين هالشي على وجهها:ليش قلتي بتعب مع صقر
امجاد وهي ترجع شعرها لوراء:بس
بانه:شلون بس
امجاد وهي تعطي ظهرها لبانه:لما تعيشين معاه راح تعرفين
تركت بانه اللي زاد خوفه من كلام امجاد وطالعت النافذه وهي تسال نفسها:وش تقصدين يا امجاد
&&&&&&&&&&&&&&&&&
وصل للقهوه بعد ما اتصل فيه اخوه وشافه جالس وتوجه له
يزن وهو يوقف ويسلم عليه:الحمد لله على السلامه
حصين:الله يسلمك
يزن وهو يأشر له يجلس:تفضل
حصين وهو يجلس:وش صاير فيكم شي
يزن بتوتر: لا بس ابغاك تسمعني للاخر والموضوع يخصني انا ومازن
حصين باستغراب:تكلم انا اسمعك
جلس يسمع له وبعد ما خلص سكت وهو يشوف ملامح اخوه جامده وبعد دقايق صمت:ها وش قلت يا حصين
حصين وهو يرجع ويتسند على وراء:في وشو
يزن:في اللي قلته لك
حصين :يعني الحين الكل ضدكم
يزن بتنهيده:ايه
حصين طالع اخوه وعقد حواجبه:لها الدرجه تحبونهم
يزن:واكثر
حصين ابتسم بخفه
يزن وهو يوقف وبعصبيه:وش يضحك
حصين:ولاشي واترك الموضوع علي
يزن بشك:وش ناوي عليه
حصين بحزم:قلت لك اترك الموضوع علي وما لكم الا يكون خالص
يزن تنهد:ما راح نخسر شي يله انا بمشي تبغى شي
حصين بهدوء:لا
يزن:فمان الله
حصين:فمان الكريم
طلع يزن من المكان وترك حصين اللي يفكر أن جاء الوقت اللي فعلا لازم كل شي يتغير وهو اللي راح يبدأ بها التغير
&&&&&&&&&&&&&&&&&&
في البيت الكيبر انواع الحوسه والازعاج
مدى وهي تفتح الباب بقوه:يا فيله انتي وياها وين كعبي
رواء وهي تطالع مدى من تحت لفوق وتلف وجهها:ما ادري
رؤيه:شوفيه يمكن في الدرج حق الدولاب
مدى وهي تدور:ايه هذا هو
رواء وهي تطالع مدى:مره ثانيه لا تجين تدورين عندنا حافظي على اغراضك وبلا غباء
رؤيه اللي تفاجات من اسلوب رواء:رواء وش فيك ترى بس دورت كعبها وش هالاسلوب
رواء بعصبيه:وش قصدك مو متربيه ولا همجيه
دخلت عليهم روابي:خير خير وش هالصراخ
رواء:خواتك ما يعرفون الاحترام صدق قلة ادب
طلعت وتركت مدى ورؤيه يطالعون بعض
روابي باستغراب:وش صاير وش قلتوا لها
مدى:والله ما قلنا شي بس دورت كعبي وهي عصبت
روابي بعدم تصديق:بس
مدى:ايه والله
روابي بتطنيش:ما عليكم انتم كملو ولا تتاخرون اوكي
مدى ورؤيه:اوكي
طلعت وبعدها لحقتها مدى وتركو رؤيه اللي صارت تتحمد وتتشكرعلى تصرفات رواء
&&&&&&&&&&&&&&&&&&
كان الكل مسوي ازعاج وفوضى إلا هي كانت قمه في الهدوء
جالسه على سريرها والافكار ماخذتها من عالمها الحقيقي
دانه وهي ترفع يديها وتشوفها ترتجف:ياربي هذا وانا هنا وفي غرفتي وارتجف هجل لا صرت هناك وش بيصير فيني بموت لا لا يا دانه وش بيصير انتي عارفه انه ما راح يصير شي خلاص ليه الخوف
زفرت وهي ما هي عارفه ليش حاسه بخوف وتوتر
حطت يدها على قلبها وبدت تدعي وخطر على بالها شخص واحد وبهمس:ليتك هنا
لا تتاخرين علي
&&&&&&&&&&&&&&&&&&&&
لبس وتعطر ووقف قدام المرايه وصار يطالع نفسه يطالع شكله بعد ما حلق وكشخ زفر بضيق وفتح اول ازارير ثوبه وحاس انه مخنوق
جلس على اقرب كرسي وسمع طق وما يدري ليه ما رد على اللي يطق الباب
انفتح الباب بعد ماطق كذا مره ودخل صافي:نادر وانا ابوك تأخرنا الكل زهب وبعضهم سبقونا للصاله
نادر طالع ابوه وما رد
صافي تنهد لما عرف وش فيه ولده
قرب وجلس جمبه وحط يدها على يد نادر:وش بلاك يا وليدي
نادر زفر ووقف وببرود:ولاشي خلنا نمشي قبل لا نتأخر اكثر
صافي وهي يهز راسه بحزن على ولده:يله وانا ابوك
مسك نادر البشت وحطه على يده ومشى وصافي وراه
&&&&&&&&&&&&&&&&
دخلت عليها وهي تحاول تلبس حلقها ووقفت وبلمت وهي تشوفها قدامها وبصوت عالي وهي تقلد حركات شبابيه:يا هو علينا نموت على الحلوين
التفتت عليها وفيها الضحكه:يعني حلو يا سجيه
سجيه وهي تصفر:الا ذباح يا بنبون انا متاكده بيعنسون كل البنات اليوم
بانه:هههههه وش دخل العنوسه
سجيه:بتخربين عليهم الا بتغطين عليهم مره وحده
بانه:ههههههههه الله يقطع ابليسك
سجيه وهي تتمصلح:يالله بعد هالمدح ساعديني
بانه وهي تقرب وتاخذ الحلق:عطيني اشوف
سجيه:قطيعه صار لي ربع ساعه وانا احوس من حلق لسلسال اوف
بانه:هههه كان جيتي وانا بساعدك في لبسهم
سجيه وهي ترسل بوسه في الهواء:فديت الحنونين انا
بانه:ههههههه لو ما اعرفك كان قلت شاذه اللي يغربل ابليسك الا قولي لي وين امجاد
سجيه اللي تذكرت امجاد:هههههههههه لحد الحين تحوس في الفستان اللي حلفتي عليها تلبسه واعتقد انها حاقده علي وعليك
بانه وهي تاشر على نفسها ومتفاجاه:حاقده علي وعليك ليه
سجيه بضحك:لانك حلفتي عليها الا تلبس الفستان الاسود اللي اخترتيه لها ههههه وانا عاونتك عليها بس تخيلي شكلها ههههههههههه
بانه وهي ماسكه ضحكتها:هي وين الحين
سجيه:من يوم ما راحت الغرفه الثانيه تلبس ما طلعت
بانه وهي ترفع فستانها:بروح اشوفها
سجيه:وانا وراك
وصلوا لباب الغرفه وطقوا الباب وسمعوا صراخها:انقعلو ماني فاتحه
سجيه بطنازه:ههههه يله عاد اطلعي خستي داخل
بانه وهي تضرب سجيه وتأشر لها تسكت:امجاد حبيبتي تبغين مساعده ولا شي
امجاد بعصبيه:كله منك انتي اللي حلفتي على وورطتيني
بانه وهي تطق الباب وماسكه ضحكتها:امجاد يله عاد اطلعي ما أبغى نتأخر أبغى أكون أول الحاضرين
امجاد:مو رايحه خلاص هونت
سجيه بعصبيه:هي انتي وشو مو رايحه اطلعي لاكسر الباب واجرك من شعرك
امجاد:كان فيك خير سويها
بانه أشرت لسجيه تسكت وبهدوء:امجاد انا ما حلفت عليك تروحين الا وانا محتاجه لك انتي وسجيه ابغاكم تكونون معاي في هاليوم بالذات انا محتاجتكم جنبي يا امجاد
ثواني وسمعوا الباب يفتح وطلعت وهي منحرجه وتضغط على رقبتها وبهمس:بروح بس ما ادري الفستان كذا يلبس ولا انا غلطانه بشي
وقفوا مبهوتين وطالعوا بعض ورجعوا طالعوها
امجاد وهي منحرجه ووجها احمر:انا قايله شكلي غلط
بانه بسرعه:لا لا بالعكسي تهبلين
امجاد بعصبيه واحراج:هجل ليه مبققين عيونكم كذا
سجيه وهي مفهيه:ول غطيتي علينا الا صرنا احتياط قدامك توني ادري انك صاروخ الا قلنبله نوويه
امجاد وهي منحرجه:وجع وش هالمدح
بانه ما قدرت تمسك ضحكتها:هههههههههههههه
سجيه:والله صدق تاخذين العقل
امجاد وهي تمسح على شعرها:اذا ما سكتي بوريك شغلك
بانه:ههههههههههه يله لا نتاخر ابغى اكون عند اختي بدري
امجاد وهي تدخل الغرفه بسرعه منحاشه من تعليقات سجيه:يله
سجيه وهي تلتفت لبانه وبهمس:عز الله انخطبت اليوم ههههههههه
بانه وهي تطالع سجيه:بس مو أي احد يستاهلها
سجيه وهي مو فاهمه:وش قصدك
بانه مشت وخلت سجيه :يله بسرعه البسي عبايتك
سجيه وهي ترفع كتوفها ومو فاهمه:اوكي
ولحقت بانه بسرعه تلبس عبايتها علشان ما يتأخرون على العرس
&&&&&&&&&&&&&&&&&
واقف عند المرايه ويعدل شماغه وابتسم اول ما شافها وراه تعدل في فستانها
لف لها وقرب منها وحاوطها بيديه وهمس باذنها:يا ويل قلبك يا حصون ما ادري وشلون بخلي الناس يشوفون هالعسل كله
سميه نزلت عيونها بإحراج وما ردت
حصين:سموي
سميه بهمس يالله ينسمع:يا عيونها
حصين وهو يرفع وجهها:طالعيني
طالعته وهي تبتسم له بخجل وقرب هو منها وباسها بخفه
سميه وهي تبعد وبتوتر:حصوني المفروض ما نتأخر
حصين وهو يبتسم على تصريفها:ايه بس والله لو تقولين خلنا نكنسل والله لاكنسل لجل عيونك يا قمر
سميه وهي ترد له الابتسامه:لا خلنا نروح المفروض انك تكون مع اهلك بها المناسبه
حصين وهو يبوس خدها:ويلوموني يوم رحت فيها
سميه وهي تدفه بخفه:خلاص خلنا نروح
حصين وهو يوخر:ههههههههه يله
خذت عبايتها وبدت تلبسها ومسكت يده ولما وصلوا عند باب للجناح:حصوني
حصين وهو يطالعها:عيونه
سميه :انا خايفه
حصين باستغراب:من ايش
سميه وهي تنزل عيونها:من ردة فعل الكل بعدين انا مااعرف احد في العرس
حصين:ما عليك بتستقبلك اختي وبنات عماتي وعمي انا قلت لهم انك أخت صديقي علشان ما يخلونك لحالك طول العرس وبعدها بقول لهم
سميه بخوف:طيب
حصين وهو يضغط على يدها ويفتح الباب:لا تخافين مدبر كل شي
سميه بهمس:طيب
طلعوا وصكوا باب الجناح متوجهين للعرس
&&&&&&&&&&&&&&&&&
كللللللللووووووووووش ألف الصلاة والسلام عليك يا حبيب الله محمد
ام يوسف وهي بالبخور تسلم على الكل وجنبها اختها ام سلطان وفي مقدمتهم الجده
مدى وهي تطالع الموجودات:هههههههههههه
طالعتها اسير:وش فيك تضحكين
مدى وهي تأشر:شوفي ذيك العجوز حاطه كبوريا عجايز اخر زمن هههههه
اسير وهي تنزل يد مدى بسرعه:ما يصلح تاشرين على الناس
مدى:هههههههه ولا ذيك لابسه احمر تقولين عود كبريت عاد من البياض تلبس احمر هذي المفروض تلبس ابيض علشان تبين
اسير:استغفري ربك وبسك حش في خلق الله
مدى:ههههههههههههه عاد ذيك ما استشورت شعرها او يمكن الاستشوار انفجر وكش شعرها ههههههههههههههه
اسير وهي تضحك:استغفري ربك هههههههههههه
في غرفتين منفصلتين
هبه وعندها روابي ورواء والاء ورؤيه
ودانه وعندها لولوه واسير ومدى اللي جاو يونسونها
دانه تطالع يديها وهي متوتره وتحس بالخوف والرجفه واضحه على يديها
تحس انها مو قادره تسمع ولا شي من سوالفهم وتفكيرها غايب عنهم
دانه وهي تطالعهم:هم راح يرجعون لبيوتهم وينامون تحت فراشهم وانا راح اكون بمكان ثاني
تنهدت وهي تروح وترجع مع افكارها
مدى:ايه لو شفتوها هالمصخره كان فطستوا ضحك هههههههههه
سكتت وهي تشوف الداخله عليهم وعيونها على شبيهتها
مدى ابتسمت واشرت للولوه اللي التفتت وابتسمت واسير مثلهم وكلهم التفتوا لدانه اللي كانت سرحانه
بانه:مبروك يا اختي
دانه صحكت على صوتها وطالعت الباب وشافت اختها واقفه ودموعها في عيونها
دانه وهي توقف والعبره خانقتها:بببانه
بانه أسرعت لدانه وضمتها ودانه تمسكت في بانه وبهمس:ليه تاخرتي
بانه:اسفه يا روحي
لولوه وهي متاثره:خلاص تكفون ترى دافعه في الميك اب الشي الفلاني لا تخربونه علي
الكل:ههههههههه
بعدت عن اختها وهي تحط يدها على خدها:حبيبتي
دانه وهي تحط يدها على يد اختها:انتي اللي قلبي
مدى وهي تتلفت وراء بانه:لا تقولين جيتي لحالك لا تقولينها
بانه وهي تبتسم:لاتخافين حبيبتك جات معاي
عند البوابه
:بعصبيه:امجادوا فسخي عبايتك لا اذبحك
امجاد:جربي وانا اطلع عيونك
سجيه وهي تزفر:قولن من رب رحيم يا بنت الناس افسخي العبايه تكفين ابغى الحق على الجمعه
امجاد وهي منحرجه:اووف زين يا عله
فسخت عبايتها ولفتها وبعدها مشت سجيه ووراها امجاد
توجهوا لغرفة العرائس وقبل ما يدخلون
امجاد وهي تمسك يد سجيه :اقول سجوي
سجيه:ها
امجاد:مو كان الفستان شكله غلط
سجيه:لا
امجاد:مو كانه قصير
سجيه:لا
امحجاد:مو كانه ضيق
سجيه:اف منك قلنا لا عدل وزين ويهبل واكوس شي بالحياه بس يرحم امك خلينا ندخل اوف
امجاد بحقد:هين اوريك
طقو الباب وفتحت لهم مدى وبفرحه:هلا وغلا ومسهلا بسجوده بسجادة قلبي واشواقي
سجيه:يا بعد سبدتي يا مدت وبسطة روحي والله
البنات: هههههههههههه
دخلت سجيه وسلمت على البنات الموجودين وسلمت على دانه:اموت عليك يالابيضاني
دانه طالعت بانه وهي منحرجه
بانه وهي تضرب سجيه:لا تفكرين تغازلين اختي انسي
سجيه:هههه
بانه باستغراب:اقول سجوي وين امجاد
سجيه:ورا..سكتت لما ما لقت وراها احد
طلعت سجيه ولقت امجاد واقفه جنب الباب وتتحلطم:حسبي الله عليكم حسبي الله عليكم خليتوني مسخره للكل اوريكم يالكلبات اوريكم
سجيه باستغراب:وش تسوين
امجاد وهي تطالع سجيه:ها ولاشي
سجيه مسكتها من يدها وسحبتها:تعالي
دخلتها
البنات التفتوا لها وطالعوها وسكتوا وقعدوا يطالعون بعض وبانه مرسوم على وجهها ابتسامة رضى على مظهر امجاد لانها شافت في عيون البنات الاعجاب
مدى:من ذي
اسير بفرحه:امجاد هلا والله
راحت لها وسلمت على امجاد اللي ما طلع لها صوت
مدى وهي تطالع سجيه وتهز راسها بغباء:أي امجاد
سجيه:هههههههه امجاد اللي تسوي...وتقلد امجاد:هلا يا شباب
امجاد ضربت سجيه بكوعها:شغلك بالبيت
مدى وهي تطالعها:ااه عرفتك هلا والله اسفه ما عرفتك صايره عذاب وتهبلين
امجاد وهي منحرجه:شكرا
سجيه بهمس:عشتوا ونعرف نستحي هههههه
امجاد ضربت سجيه بكوعها وهي تعطيها نظره
سجيه بعصبيه:بس عاد انكسر جنبي من كثر الدقاق
البنات:هههههههههههه
عند هبه كانت الاوضاع هاديه وهبه كانت تحاول تكون هاديه ومتماسكه عكس الاعصار اللي بداخلها وخوفها من المجهول
روابي:هبه
هبه:نعم
روابي:وش فيك
هبه:ولاشي بس شوي متوتره
روابي:شي طبيعي لا تخافين كل البنات يحسون كذا
هبه وهي تزفر:ايه صح
وبعد ثواني التفتت على روابي:روابي ابغى منك طلب
روابي:امريني
هيه:طلبتك قولي لامي ابغى مقعد هو اللي يجيب الدفتر
روابي بابتسامه:من عيوني
سكتت هبه وهي تبتسم بخفه لروابي وترجع تحاول تهدي نفسها
تـــــابـعـ
عند الرجال كان الموضوع مختلف تماما
كان الجد جالس في النص وعلى يمينه يامن وجنبه مقعد وسلطان ويوسف وعلى يساره نادر وجنبه صافي ومعاذ وحصين والباقين
المكان امتلى بالمهنئين
عند يامن كان يطالع الموجودين كان اغلب اللي عزمهم رجال اعمال يعرفهم
وكان يبتسم ما بين وقت والثاني مو للمعازيم لا لانه كان يتخيل شكلها لما تشوفه
اما عند نادر كان مو حاسس باي شي من هالفرح كله
كان هادي وجامد وكأنه تمثال جالس
سمع ابوه يهمس:ابتسم يا ولدي لا تفضحنا بين العالم
نادر:أن شاء الله
ابتسم بخفه وسرعان ما اختفت ابتسامته بعد ما حس انه ما يقدر يمثل اكثر بأنه مبسوط
صافي طالع ولده وتنهد بيأس منه ولف وجهه يبتسم للموجودين
لحظات ودخل واغلب الموجودين التفتوا له البعض عرفه بسمعة عائلته اللي سبقته والبعض ناظروه للحرق البسيط الموجود في رقبته وجزء من وجهه
اول ما شافوه وقفوا
الجد وهو يطالعه وقف ووقف معاه الباقين
الجد طالعه بحقد كبير وصالح بعصبيه مكبوته:هذا وش جابه هنا
الجد وهو يمسك يد صالح:اهجد لا تفشلنا قدام الناس هذا دايس بساطنا
قرب صقر وسلم على يامن ونادر وبعدها التفت للجد ومد يده:على البركه
الجد وهو يطالعه بحقد مد يده :الله يبارك فيك
صقر بابتسامه جانبيه:عرفتني
الجد:وكيف ما اعرف ولد الماجد
صقر ترك يد الجد ولف على صافي يسلم وصافي سلم عليه بحراره ما ينسى فضل الماجد على اخوه اللي الكل تخلى عنه
وسلم بعدها حسن وراكان والمرافق لصقر واللي كانوا جايين مع صقر
صقر وقف عند حصين ومد يده:مبروك
حصين ضغط على يده وبعدها مدها وسلم عليه وكل واحد يضغط على يد الثاني اكثر وكأن بها السلام كل واحد يثبت قوته
حصين بهمس غاضب:لو ما كنت دايس بساطنا كان..
قاطعه صقر:ترى الضيف ما يتهدد ولا انا غلطان
حصين:لا مو غلطان حياك
جلس صقر وجنبه مرافقه وهو يلاحظ انظار الموجودين عليه بس طنش ولا كأنه يشوف
&&&&&&&&&&&&&&&
مر الوقت والبنات فلوها رقص ووناسه
جالسه وتراقبها من بعيد وبعدها التفتت على اختها:اقول يا ام يوسف
ام يوسف:نعم
ام سلطان:من ذيك ام فستان اسود تعرفينها
ام يوسف وهي تطالع البنات:لا والله مانيب اعرفها اول مره اشوفها
ام سلطان:ابغى اعرف من هي
ام يوسف:ليش
ام سلطان:تبين الصراحه دخلت مزاجي هالبنت شوفي عليها زين يقول قم يا قمر وانا اجلس مكانك
ام يوسف:ناويه تخطبينها
ام سلطان:ايه والله ودي بها لسلطان ولا لمقعد
ام يوسف:يا حسره هذي مبين عليها صغيره على سلطان ومقعد يعتبر كل البنات خواته
ام سلطان :شوفي شوفي بانه جلست معاهم وتسولف مع ام اسود
ام يوسف:تبغين تعرفينها
ام سلطان :ياليت
ام يوسف:قومي هجل
قاموا وتوجهوا لطاولة بانه والبنات
ام يوسف:سلام يا بنات
الكل:وعليكم السلام
بانه اللي لاحظت نظرات ام سلطان للي معاها ابتسمت والتفتت على سجيه وامجاد:اعرفكم هذول عماتي عمتي ام يوسف وعمتي ام سلطان
رفعت نظرها للحرمه اللي اشرت عليها ونزلت عيونها قبل لا يلاحظها احد
بانه:هذول زميلاتي في الجامعه سجيه وامجاد
امجاد وهي تسلم:مبروك
ام سلطان وهي تطالعها من فوق لتحت:الله يبارك فيك وعقبالك يا قمر
سجيه وهي توقف وتذكرت سلطان وحسن بقهر منه:الف الف مبروك الله يوفقهم
ام يوسف:الله يبارك فيك وعقبالك
جلسوا البنات وهي جلست بس تحس بحراره وقلبها يضرب بقوه اول مره تحسه يضرب بها القوه لدرجه أن صوته غطي على السمع عندها
بانه:عمه متى بتزفون دندون
ام يوسف:لا مابه زفه يا بنتي
بانه باستغراب:ليه
ام يوسف:والله وانا عمتك هذا طلب اختك
بانه:مدامه طلبها على راحتها
مدى:لو في زفه كان احلى
سجيه وهي تميل على بانه:اختك وش فيها ما تبغى زفه
بانه بكذب:مدري
وقفت وهي تأخذ عبايتها:نا بروح لها
البنات:اوكي
راحت لغرفة المعاريس تجلس مع اختها شوي علشان ما تحس بأنها لحالها في هالوقت
&&&&&&&&&&&&&&&&
دخلت على لاقاعه وهي تحس انها غريبه فسخت عبايتها وجاتها وحده وهي تبتسم:انتي سميه
التفتت لها وبابتسامه متوتره:ايه
مدت يدها:معاك غصون انا اخت حصين صديق اخوك
سميه والتوتر لحد الحين موجود:ايه اهلين مبروك الله يوفقهم
غصون:يبارك بعمرك امين يارب حياك
سميه:مشكوره يا قلبي
مشت معاها وتوجهت معاها للبنات تعرفهم عليها وتجلس معاهم وما يخلونها لحالها مثل ما وصالهم حصين
&&&&&&&&&&&&&&&&&&
عرف أن هذا طلب اخته
مسك الدفتر ودخل مع امه بعد ما تاكدت أن مافي احد بالمكان
دخل عليها وهو يبتسم:الله الله وش هالزين لو يلقون لي عروسه مثل اختي القمر من بكره اعرس
هبه:هههه
حط الدفتر على الطاوله وعطاها قلم:يله سمي ووقعي
هبه وهي تزفر:احس بخوف
مقعد وهو يجلس جنبها وبيمسك يدها:خوف وانا هنا يخسى الخوف والله
هبه:ربي ما يحرمني منك
وقعت وبعدها مقعد باسها على راسها وبهمس:مبروك يالغاليه
ام سلطان:كلووووووووووووووووش
جاتها وحظنتها:الف الف مبروك يا قلبي الف الصلاة والسلام يا حبيب الله محمد
كلللللووووووووش
مقعد بضحك:والله عندكم جو مو احنا حلا وكيك ويالله مع السلامه
ام سلطان:هههههههههههه يله يله اطلع لا تحلي لك القعده ورح ود لهم الدفتر
مقعد:قولي طرده
مسك الدفتر وقبل لا يطلع مسكته من يده:مقعد
مقعد وهو يطالعها:عيون مقعد
هبه برجاء:اذا جاء بيدخل ادخلوا انت وسلطان معاه
مقعد وهو يبوس راسها:من قال بنخليه يدخل اكيد بندخل معاه
هبه ابتسمت ومقعد رد لها الابتسامه وطلع
&&&&&&&&&&&&&&&&&&
:اهئ اهئ اهئ اااه يا يمه خلاص ابوي تزوج اااه ابغاك يا يمه اهئ اهئ
رفعت وجهها من مخدتها وهي تشهق وبحقد:والله لاسود عيشتك هجل تبغين تاخذين ابوي والله لاخليك تندمين على الساعه اللي دخلتي فيها بيتنا يا حقيره
وبصراخ:اوريك
كملت بكاء وهي تحط وجهها بالمخده وتغطي نفسها وتستمر بالبكاء وصوت بكائها يرتفع وينتشر بالمكان
&&&&&&&&&&&&&&&&&&&
دخلت عليها وهي لابسه عبايتها وهي وقفت:بانه
بانه قربت ومسكت يديها:وش فيك
دانه:مدري خايفه
بانه:اششش ما له داعي الخوف خليك قويه
دانه وهي تشد على يد اختها:طيب
شوي وانطق الباب وانفتح ودخل الجد ومعاه صافي ولمياء ونادر
لمياء:كلووووووش
بانه اول ما شافت الجد نزلت الغطا على عيونها وصدت وهي تدعي أن بابا نويل ما يحس فيها
اما دانه نزلت عيونها بس رفعتهم ناحية اختها لما لمحت جدها داخل
الجد وهو يبوس راس دانه:نادر ترى دانه برقبتك يا ويلك لو جاتني في يوم تشتكي والغلط منك ترى بزعل وتعرف زعلي شين
نادروهو يبوس راسها:ما يصير الا اللي يسرك ويسرها
شوي ودخلت الجده وقربت وحظنت دانه:ماله لزوم الحكي نادر تربية صافي ولمياء وتربيتهم ما عليهم كلام
صافي وهو يبوس راس امه:جعلني فدوه
الجد:جيبو عبايتها علشان تتوكل على الله
دانه شدت على يد جدتها وكأنها تفهمها بان بانه هنا
الجده بهمس:ما عليك ما راح يلاحظون
الجده بصوت عالي:جيبوا عبايه
جات لولوه بالعبايه ولبسوا دانه العبايه وباست راس جدتها والتفتت على اختها بشكل سريع علشان ما يلاحظ جدهم
ولفت ومشت مع جدتها اللي ماسكه يدها ومع نادر اللي ما يدري وين الله حاطه فيه وكأنه حاضر عزا مو عرس
طلعوا من الغرفه وتركوا بانه اللي جلست على الكرسي ونزلت الغطا عن وجهها وهي تبكي على حظ اختها وحظها
&&&&&&&&&&&&&&&&&&&
في داخل الصاله حقت الأفراح
مدى وهي تسحب سجيه:قومي نرقص ونهز شوي
سجيه:ايه نقوم ليه لا بس حطي يا هلي الروح تعبانه
مدى:يا قدمي بس
سجيه:قديمك نديمك
مدى:اوكي
وطلبت من الطقاقه هالاغنيه وبدت الطقاقه تطق والبنات يرقصون
ام راكان وهي تدقق شهقت وصارت تتلفت تدور الجده تبغى تقولها وش اللي شافته
ودقايق والجده تجلس جنب ام راكان وهي تمسح دموعها
ام راكان:وش بلاك
الحجده:راحت الله يستر عليها
ام راكان:الله يوفقها أن شاء الله
الجده:امين ياربي امين
ام راكان وهي تمسك يد الجده:شوفي يا وخيتي شوفي
الجده:وش اشوف
ام راكان:حفيدة المصريه
الجده التفتت محل ما تاشر ام راكان وبصدمه:هذي
ام راكان باستغراب:ايه ليه تعرفينها
الجده:هذي صديقة حفيدتي بانه اخت دانه
ام راكان وهي منصدمه:وشو
رجعوا يطالعونها وهي ترقص
الجده وقفت بعد ما خلصوا البنات رقص وتوجهت لهم
سجيه وهي تنزل من درج المسرح:نهله
التفتت سجيه وهي تطالع الجده:نعم وش قلتي
الجده:جدتك نهله ولا انا غلطانه
سجيه باستغراب:انتي تعرفين جدتي
الجده بحزم:لا ما اعرفها بس في واحد يعرفها وانا ابغاك بموضوع
سجيه باستغراب:انا تبغيني بموضوع
الجده:ايه والحين
سجيه وهي مو فاهمه:طيب
مشت ويا الجده لحد ما جلسوا على طاوله
الجده:اسمعي....
&&&&&&&&&&&&&&&&
طلعت من غرفة العروسه وهي تبكي وتشاهق حست بحرقه في قلبها
حست بأنها فقدت شي مهم ما تدري ليه جاها هالاحساس يمكن لانها ساعدت في انها تروح مع شخص هي حتى ما شافته الا مره او مرتين
مشت وقابلتها امجاد عند باب الصاله وركضت ورمت نفسها في حظن امجاد وبنحيب:راحت راحت يا امجاد حتى بدون ما اودعها
امجاد وهي تأخذها بحظنها وتشد عليها:الله يوفقها
بانه:اهئ اهئ راحت مثل ما راح ابوي خلتني مثل ماخلاني
امجاد وهي توخر بانه وتهديها وتمشيها بعيد عن باب القاعده وتأخذها بحظنها:اذكري الله ما راحت عنك ولا شي هي راحت لحياه أن شاء الله بتكون احسن من حياتها
بانه:ااااه يا امجاد احس أن نصي اختفي وخلاني لا اب ولا اخت اااه ساعدتهم في انهم يرمونها في يد واحد ما اعرف عنه شي
سكتت امجاد وهي مو عارفه وش تقول
بانه تكمل وهي تمسك امجاد وتشد عليها:انا ساعدتهم اني ارميها في يدين واحد ما شفته الا مرتين اهئ اهئ ليت ابوي هنا كان تغير كل شي كل شي يا امجاد كل شي
امجاد اللي دمعت عيونها:لو كل شي نتمناه يصير كان تمنيت ياخذون من عمري ويعطونه ويعيش بدالي
كملت وهي تشد على بانه:انتي ما خسرتيها انتي حاولتي تعوضينها ولو طلع رجال مو زين راح توقف عائلة الماجد معك مثل ما وقفت مع ابوك
بانه وهي توخر وتطالعها وبهمس:وش تقصدين
امجاد وهي تمسح دموع بانه:انا وصقر معاك ومع اختك انتي يا بانه بالنسبه لي اخت وصديقه واختك هي اختي
بانه وهي تبتسم:يعني لو جيت يوم وطلبت مساعدتك علشان اختي بتساعديني
امجاد بابتسامه على جنب:اكيد وبعدين ما اعتقد تحتاجين مساعدتي وانتي بتصيرين حرم صقر
بانه وهي تمسح دموعها:لها الدرجه
امجاد وهي تمسح دموعها: مثل ما لصقر عيوب له فوائد وراح تستفيدين كثير
بانه سكتت وهي تفكر وتحس وكان صقر صار بالنسبه لها باب وراها الكثير من الاشياء اللي راح تكسبها لو عبرته بس ما فاتها أن في اشياء تحس ان امجاد تعرفها ومخبيتها عنها
&&&&&&&&&&&&&&&&&&&
دخلت عليها امها وبهمس لها:بيدخلون
ضغطت على يدها يمكن يخف التوتر ووقفت وشافت مقعد يدخل وبعده سلطان ونزلت عيونها لما لمحت بشت اسود من عند الباب
مقعد وهو يتقدم ويمسك يد اخته:الله يوفقك يا اختي
سلطان وهو يبوس راسها:الف الف مبروك يا قلب اخوك والله يهنيك
وخروا اخوانها وتقدم منها وباس راسها بخفه وبصوت مبحوح:الف مبروك
عقدت حواجبه وكان الصوت مالوف لها ورفعت راسها وانرسمت الصدمه على وجهها وهي تشوفه مو مصدقه معقوله
تعلقت عيونها بعيونه والابتسامه انرسمت على وجهه لانه عرف انها عرفته وهي نزلت عيونها وهي مو مصدقه:لا لا انا غلطانه مو هو مو هو اللي شفته ذاك اليوم اكيد اتوهم
اما بالنسبه ليامن اول ما دخل وشافها قدامه حس وكانه قاعد يشوق القمر قدامه او فيه نسخه من هالقمر اللي ينور بالليل قدام عيونه
برائه ونعومه ورقه وبنفسه:يا ارض احفظي ما عليك
حس انه مخدر وقرب بعد ما بعدوا اخوانها وباس راسها وهو مغمض عيونه ويستنشق عطرها وبهمس:الف مبروك
شافها تعقد حواجبها وترفع عيونها له وتطالعه وعيونه تعلقت بعيونها وحس انه ذاب في هالعيون السود واللي زاد حلاهم الكحل المرسوم
من نظرتها له عرف انها عرفته وابتسم بنصر
انتبهت على مقعد اللي تكلم وهو يحاوطها من كتوفها:اسمع يا يمان احنا بنعطيك قطعه من قلوبنا فاتمنى تحافظ عليها لانك لو زعلتها في يوم او عرفت انك ضارها ما راح يصير خير
سلطان اللي تفاجا من اسلوب مقعد الهمجي:مقعد وش هالكلام انهبلت
مقعد اللي ما عطا سلطان أي بال كمل وهو يبوس راس هبه:لازم تعرف أن وراها ناس تسال وتاخذ بحقها مو يتيمه مثل ما قال لك الكل
التفت على هبه:هذي قطعه من قلبي واللي يزعلها يزعلني
هبه اللي ضمت مقعد وبهمس:ربي لا يحرمني منك ..وفي داخلها:ليت اقدر اقولك وش اكتشفت يا اخوي
بعدت عن مقعد ومسكت يده تضغط عليها وقابلها مقعد بابتسامه
سلطان قرب من يامن اللي كان متفرج على المشهد:امسحها في وجهي ترى مقعد ما يقصد
يامن بدون ما يلتفت:ولايهمك
سلطان تنهد براحه وطالع مقعد اللي يبتسم لهبه
ام سلطان ومعاها العبايه:يله يا بنتي
لبست هبه العبايه وهي خايفه وحاسه انها رايحه للجحيم وكان في شي راح يذبحها
طالعت مقعد وبتفكير:اقول لاخواني ويفكوني منه لا يا هبه الناس راح تتكلم وراح يجيبون سيرتكم بالعاطل طيب يمكن صدفه ومو اللي في بالي يمكن يا هبه يمكن
رفعت نظرها ليامن اللي لقته يطالعها بصمت ونزلتهم بسرعه وبهمس:يارب
&&&&&&&&&&&&&&&&&&&&&&&
خفوا المعازيم واغلبهم غادر المكان وما بقى إلا القريب من العائله
حصين بصوت عالي لاهله:طلبتك يا يبه ما تردني قدام الحاضرين
الجد بشك من طلب حصين قدام الحاضرين:جاك طلبك
حصين:طلبتك توافق على زواج يزن ومازن
التفتوا الكل ومن بينهم يزن ومازن مصدومين وصاروا يطالعون بعض
صالح بعصبيه:وشو معصي انا...
قاطعه الجد:جاك طلبك
صالح :بس يايبه
قاطعه الجد:الولد طلبني قدام الرجاجيل وانا ما ارد احد طلبني قدام الرجال
حصين وهو يطالع يوسف:نبغى نطلب اخت يوسف ..والتفت على عمه صافي وكمل:وبنت عمي صافي
الجد:ها يوسف تقبل بيزن
يوسف طالع يزن وهو مو عارف أي اخت من خواته يبغى وما رد
مال عليه حصين وبهمس:رواء
الجد:ها تقبل فيه ولا لا
يوسف بحزم:بس هو ما يشتغل
يزن بسرعه:ابشتغل واتوظف في شركة عمي صافي ومن بكره لو حبيت
الكل مسك ضحكته على شكل يزن المتسرع
يوسف سكت يفكر وبعدها:انا ما عندي مانع بس لازم اخذ شور اختي
الجد هز راسه علامة الموافقه
اما يزن شق الضحكه وحس أن روحه بتطير من الفرحه
التفت الجد على صافي وقبل لا يتكلم قاطعها صافي:انا ما عندي مانع وين القى احد احسن من مازن لبنتي بس بشرط مابه عرس الحين
قام مازن وباس راس عمه:لو بعد60 سنه موافق
الكل:ههههههههههههه
صالح وقف وما عجبه أي شي من اللي يصير وطالعهم بحقد وطلع من المكان
يزن وهو يهمس لحصين:لو ادري انك تقدر تحل السالفه بها السهوله كان جيناك من البدايه وارتحنا
حصين بابتسامه:الله يوفقكم
وصلهم صوته وهو يوقف قدامهم وجنبه حسن والمرافق:انا ابغى اتقدم واطلب يد بنت عبدالعزيز وقدام هالرجاجيل والوجيه الغانمه ها وش قلتوا ترضون تناسبون عائلة الماجد ولا بتردوني
الكل التفت لصقر اللي يطالعهم ببرود وحل الصمت في المكان وصاروا يطالعون بعضهم
الجد طالعه بحقد وهو ساكت للحظات ويحرك لحيته بيده وبعدها التفت على.....
&&&&&&&&&&&&&&&&&&&&
لهنا أوقف واترك لكم حرية التعليق
&&&&&&&&&&&&&&&&&&
..
..
..
|
15-01-12, 07:41 AM
جديد مواضيع قسم القصص المكتمله
العرض العادي
