لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > قصص من وحي قلم الاعضاء > القصص المكتمله من وحي قلم الاعضاء
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله من وحي قلم الاعضاء القصص المكتمله من وحي قلم الاعضاء


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 02-12-11, 10:51 PM   المشاركة رقم: 31
المعلومات
الكاتب:
اللقب:

البيانات
التسجيل: Sep 2011
العضوية: 228987
المشاركات: 28
الجنس أنثى
معدل التقييم: b3thra had2a عضو بحاجه الى تحسين وضعه
نقاط التقييم: 23

االدولة
البلدUnited Arab Emirates
 
مدونتي

 

الإتصالات
الحالة:
b3thra had2a غير متواجد حالياً
وسائل الإتصال:

كاتب الموضوع : b3thra had2a المنتدى : القصص المكتمله من وحي قلم الاعضاء
افتراضي

 

البارت الحادي عشر
( صدمتني )

وعيت من نومي مفزوعه و خفت اكثر لما شفته راقد و معقد حواجبه .. طلعت نفس احاول اهدي عمري قمت رحت اغسل ويهي و افرشي اسناني و لما طلعت انتبهت انه الساعه 4 العصر رحت بدلت ملابسي لبست بنطلون سكيني رصاصي و قميص كم طويل لونه اصفر عليه شويه رسمات من جدام .. طالعته و هو راقد و حواجبه ارتخت يمكن لانه كان تعبان عشان جذا رمسني !! يعني انا مثلا لما امرض دوم يكون مزاجي معكر و معاملتي زفت اكيد هو جذا لما يتعب !! لازم ما احكم بسرعه ..

نزلت تحت و دخلت المطبخ كان فاظي تماما .. لا اكل و لا حتى صحن واحد اووف يعني لازم اتريا يقووم روحي يوعانه .. طلعت من المطبخ استكشف البيت اكثر لاحظت انه شي باب ثاني فالمطبخ فرجعت دخلت المطبخ بس الباب كان مقفول فطلعت و رحت صوب الصاله يلست ع الغنفه طالعت الجدران اللي مغطايه بورق جدران باللون الابيض ويا نقوش بالسماوي حبيت اللون حسيته يبعث الراحه .. تميت يالسه نص ساعه و انا ملانه لين ما حسيت بحركه و صوت خطواط نازله من الدري طلعت نفس لما شفته و قف عند عتبه الدري يطالعني و يطالع البيت حولينه .. تجدم و يلس جدامي ع الطاوله توترت لقربه و ملامحه الجديه ..

عبدالله ربع ايده : احب اوضح كل شي ما احب يكون شي بدون توضيح لاني صريح و عن طريق ها الصراحه بنبي حياتنا
بلعت ريجي اي صراحه يتكلم عنها !! و ليش يتكلم بها الطريقه حسيت اني مجرمه جدام قاضي ينتظر حكم الاعدام ..
عبدالله : تعرفين اني ياي عشان اكمل دراستي ..
هزيت راسي بهيه
عبدالله : خليني اكون صريح ما تزوجتج عشان سواد عينج و لا لانه لي نيه زواج
بطلت عيوني بوسعن و بدت ايدي ترتجف
عبدالله : تزوجت لاني قررت اكمل دراستي فالخارج و ما حبيت اكون بروحي و خصوصا اني ما اروم ادبر عمري بروحي فامور البيت و غيره من ها الخرابيط .. فبتكونين انتي العامل المهم فها الموضوع يعني شغلتج تتطبخين و تنظفين و الامور الثانيه اللي متعلقه فالبيت و بدون عناد و لا حتى مجادله مالها معنى و بالتالي بتحصلين مني كل الاحترام و بعطيج مجال تكملين دراستج ما عندي مانع فها الموضوع ..

تجمعت الدموع فعيني ما تصورته بها المستوى من التفكير .. الانسان اللي رسمت له صوره ثانيه فمخيلتي انسان هادي رائع متفاهم محترم خجول .. و اسوء شي انه يكون جدي و عصبي بس هب وقح لهدرجه هو يالس يعبر لي بصريح العباره اني بكون خدامه عنده ..

وقفت و اشر باصبعي عليه : هي انت تراني بنت ناس هب ماخذني خدامه
وقف وصار قريب مني نزل اصبعي باصبعه بشويش : احترمي نفسج اذا تبين كل شي يستمر بشكل طبيعي امسكي لسانج و تسوين اللي ابيه منج ترى طلباتي هب تعجيزيه

اعرف بس يمكن لو قالها بطريقه اللطف او حتى نبههني بطريقه غير مباشره : اسمع جانك تباني خدامه احسلك رجعني بيت اهلي
عبدالله طنشني و مشى .. و لما فظى المكان نزلت دموعي لا ياربي شو ها اللي عايشته معقوله يالسه احلم !! لا اصحي يا ميره هذا هب حلم انتي ويا عبدالله اللي تزوجته البارحه و كان عرسكم و سافرتوا لندن و احينه يهنيج بصريح العباره .. كيف بكمل حياتي مع انسان محطيلي قدر خدامه عنده .. هذا اللي خوالي ارتاحوا له هذا اللي رحت تزهبت له و عشت الخوف عشانه هذا اللي صار ها العرس و الحشد الكبير عشان يحضرون زواجنا هذا اللي منيره تحسدني عليه !!

مسحت دموعي بسرعه لما سمعت صوت خطواطه حطيت ريل ع ريل و سند ايدي ع مسند الغنفه و لفيت ويهي عنه ..
عبدالله بهدوء : قومي بدلي بنروح نشتري اغراض حق المطبخ
بدون ما اطالعه : اجله باجر انا تعبانه من السفر
عبدالله بهدوء : ما يصير من وين بناكل يلا قومي
: قلتلك خليها باجر انا تعبانه و اذا ع الاكل المطاعم تارسه المكان
سمعته يتنفس بغضب : انزين قومي نروح لاي داهيه ناكل فيها

قمت رحت صوب الحجره فتحت شنطتي طلعت لي بنطلون جينز اسود و قميص ابيض رسمي فوق جاكيت قطني خفيف لنص الفخذ فيه حركه لونه اسود .. بدلت و لبست لي سكارف اسود و تعطرت و لبست كعب متوسط بربري و خذت شنطته بربري و طلعت نزلت تحت .. حصلت سيارتي و سيارته فالقاراج و ظهرنا بسيارته [ porsche panamera 2011 ] لونها ابيض سواقته كانت متوازنه تمينا ساكتين فالسياره اصلن احس فيني صيحه بعدني ما فرغت يعني فوق اني فغربه يطلع ها الانسان شي ثاني !! استغفر الله .. بدا الخوف يدخل قلبي و انا اتخيل شو بيسوي فيني !! بيخليني خدامه !! بيضربني !! بيسبني !! و مافي حد يحميني منه ..

تغدينا خلاف وقفنا جدام سوبر ماركت كبير , قال : يلا انزلي
: شو نسوي هني !!
عبدالله : بنتشرى حق البيت المطبخ فاظي
: اظت قلتلك اني تعبانه ردني البيت
عبدالله : هب رادج شو بتسوين بترجعين مشي !! يلا نزلي بنتشرى و بنظهر
: انا تعبانه ردني البيت
عبدالله : انا كل ما قلتلج شي قلتي تعبانه !! انزلي يلا

نزل بس ما تحركت من مكاني لما نفذ صبره يا فتح الباب و نزلي غصب وبقوه فاستسلمت و دخلت السوبر ماركت كان كبير وفي كل شي نحتاجه خذنا عرباتين اول شي شرينا الصحون و الاطقم و الجدور و غيره و بعده الاغذيه خذ منا الفره تقريبا ثلاث ساعات لانه في اكل طريت اني اقرى مكوناته .. رجعنا البيت و امرني ارتب الاغراض احينه و رتبتهم فالمطبخ بدون اي جدال لانه ادري بيغصبني و بعد الترتيب رحت الحجره و رتبت ملابسي فالكتب و انا احس عمري هلكانه خلاف سرت تسبحت و رقدت ..

،

حست بأيد توعيني بقوه و صوت انين فزيت لما استوعبت اني ع السرير فالغرفه ويا عبدالله كشرت .. رجع صوت الانين لفيت راسي شفت عبدالله فاتح نص عينه و معقد حواجبه و معرق و ايده ع ايدي ماسكه بقوه و يأن بصوت خفيف

: شفيك !!
عبدالله : شش لا ترفعين صوتج راسي راسي بنفجر
همست : تبي بندول !!
عبدالله : هيه
قمت سويت لها ريوق و طلعت فوق خليته ياكل غصب بس اللي فجعني انه طلع كل اللي كله فالحمام و لما طلع كان يتمايل و يتضرب الاشياء رحت مسكت ايده و رقدت ع السرير و طلب مني بندول قلتله انه لازم ياكل لانه طلع كل الي فمعدته رفض ياكل و تم ع صداعه و هو يأن .. امبيه ليكون هذا مريض او في شي

سألته بهمس : اول مره ها الصداع !!
عبدالله : لا
همست : شو تبا اسويلك !! اهمزلك راسك !!
عبدالله : يمكن يخف
قمت يلست عنده و حط راسه فحضني بديت اهمز له راسه و اقرى قراءن يمكن يخف ألمه مبين انه يتالم رحمته .. تميت اهمز له نص ساعه احس ايديه تخدرن وقفت و طالعته فتح عينه لما وقفت كان مبين انه بعد الالم ما راح

: راح !!
عبدالله : لا هاتي بندول يرحملي والديج
: لازم تاكل شي بيب لك فواكه احسن !!
عبدالله : اي شي
قمت نزلت تحت يبت تفاح و صحن و سجين و طلعت فوق بس قبل ما ادخل الحجره سالت عمري ليش يالسه اساعده و اسوي كل هذا !! ترى هو نفسه اللي اهاني البارحه و اعتبرني خدامه .. اذا هو ما عنده ضمير فانا ضميري يأنبني اذا ما ساعدته دخلت الحجره و بديت اقص له التفاح و ما قدر ياكل الا نصه و عطيه حبتين بندول .. رحت تسدحت ع السرير وانا دايخه ابي ارقد و شوي شوي رقدت و هو بين فتره و فتره يأن من الالم ..

،

فتحت عيني حسيت اني شبعت رقاد تمغط .. شدي صوت الانين التفت حصلته ع حاله ياربي هذا شو بلاه شو سالفه ها الصداع !! سالته قالي انه بعد يعور و ما خف و يحس بغثيان و ما يشوف عدل و الاصوات تزعجه حتى الضوو .. خفت شو ها الاعراض ما يشوف !! اخاف ايه شي .. رديت سالته اذا هاذي اول مره قال لا بين فتره و فتره اتيله ها الاعراض بس ها الايام زادت عليه ..

: لازم اوديك الطبيب
عبدالله : متعود
: هب زين عبدالله خليهم يسون لك تخطيط للمخ
عبدالله : مافيني شي ..

سكت عنه سالته اذا يوعان قال يبا تفاح عشان ياخذ بندول عطيته و خذ البندول .. وانا رحت سويت لي شي بسيط كانت الساعه 6 المغرب رحت صليت الصلوات اللي فاتتني و تميت يالسه تحت احس قلبي يعورني لما اسمعه يأن و هب راضي نروح المستشفى هو اللي يتويع هب انا برايه خلي يتحمل .. طالعت التلفزيون بس مافي شي شدني تذكرت غرفه المكتب اللي فوق قمت ابي اشوف شو فيها اذكر اني شفت رفوف يمكن حط فيها كتب او اي شي ع اقل اروح ها الملل .. دخلت حصلت واحد من الرفوف مليان كتب رحت اشوفهم .. كانوا كتب عن القانون و اشياء تخص القانون و حصلت كتب لشعراء قدم بصراحه شدني رحت يلست ع الكرسي اللي ورى المكتب و فتحت ع اول صفحه و بديت اقرى سيره الشاعر و اشعاره و اكثر الاشعار غزل !! غزل !! عيل ليش جي يعاملني يمكن يحب وحده ثانيه !! انزين شحقى ما خذها ليكون وضعه مثل وضع ياسر معاي !!

،

ساعه 3 الفير بتوقيت الامارت فاحدى مستشفى دبي .. ماشي فالممر و بيده كوب قهوه و يمشي على مهله مل من القعده فالمكتب و الكفتيريا .. قعد يدور ع زميله ابراهيم بس ما حصله توقع عنده حاله او شي من ها القبيل سمع صوت الاسعاف كان عند البوابه حط كوبه عند الكاوتير و ركض ويا الممريضن لغرفه العمليات و طلب د. وائل .. ما قدرت يشوف شكل الشخص لانه ملطخ بالدم

الممرضه : ضربه قويه فالراس مسبب ارجاج فالمخ قوي و كتف الايسر مكسور و جروح طفيفه و بسطيه فالوجه
سلطان : في نزيف فالمخ لازم نوقف بسرعه وين د. وائل
بدا سلطان بالعمليه و دخل د. وائل و اهتم بكتف الشخص و جروحه الثاني و سلطان يحاول يوقف النزيف اللي زايد عن حده و طلب مساعده د. وائل خذ وقف منهم وايد لين ما وقفو النزيف و خيطوا الجرح بس اللي فاجأهم وقف نبض المريض و بسرعه يابوا جهاز الصدمات الكهربائيه و بدا يصدمونه بالكهربا عشان نبضه يرجع .. مره .. مرتين .. ثلاثه لين ما رجع .. حمدو ربهم انه ما مات و جبسوا كتفه و خيطوا جروحه .. لما خلص سلطان القى اخر نظره ع راسه لكن . . . انصدم من شاف المريض جدامه

د. وائل : سلطان بلاك يلا بننقل المرض للعنايه
سلطان همس : يـ .. ياسر !!
د. وائل : تعرفه !!

انربط لسانه لو كان يعرف انه المريض ولد عمه من الاول جان ما قدر يحط ايده عليه .. حالته صعبه بعد ما طلع من مرحله الخطر نقلوه للعنايه المشدده ولازم يتريون 24 ساعه .. و احتمال يطلع باضرار لانه الارتجاج اللي صار كان قوي احتمال يسبب له فقد فالذاكره او تشويش و فقد بعض من الذاكره .. شو بيقولهم كيف يواجهه عمه !! كان متعود يقول لاهالي المرضى عن حاله مريضهم بس المريض ولد عمه .. يلس ع الكرسي اللي فالممر بعد ما طلب منهم انه ما يخبرون اهله لمعرفته فيه

د. وائل : اذكر الله ان شالله ما عليه شر
سلطان : لا اله الا الله , بتقص عليه !! انا اللي خيط له راسه و وقفت النزيف وائل احتمال يفقد الذاكره
د . وائل : قلتها احتمال و ان شالله ما يصيير شي سئ ادعي ربك و خبر الاهل خليهم يدعوله ..

،

وعيت لصلاه الفير وصليت و هو بعده صاحي و يأن .. الشي اللي يصير يخوف و هب طبيعي خفت ليكون عنده ورم او الخبث استغفر الله بلاني افاول ع الريال .. ها المره لازم اوديه المستشفى هب عشانه عشاني مالي غيره هني بها الغربه .. رحت له و تميت معانده الا يقوم نروح الدكتور . ساعدته يبدل و انا ويههي صار علبه اللوان و هو دايخ و مافي حيل يسوي شي و انا بدلت بسرعه و مسكته شوي شوي و نزلنا تحت ركبته سيارتي و ركبت .. الوهقه اني ما اعرف وين اسير !! مشيت شويه الشارع و سالت و الحمدالله دلوني ع مستشفى كبير .. دخلت و انا ساحبته وياي حسيه صار يقدر يسندر عمره بس يقول انه نظره مشوش ..

تمينا نتريا لين ما اي دوره و هو ساند راسه ع اليدار .. فجأه ضرب راسه ع اليدار بشكل متكرر لدرجه اني خفت و حطيت ايدي ورى راسه .. قام يعصب من الالم انا لو بداله بفجر فعمري والله حاسه به الصداع شي يصرع .. لما وصل دورنا دخلنا عند الدكتور اللي بدا يوجه السؤال لعبدالله كان يجاوب بشكل مختصر فطر الدكتور يكلمني

: يشعر بالغثيان و تقيأ بالامس و اخذ مسكنات و لم تفد معه
الدكتور : هل لديه تشوش فالنظر و الاعصاب !!
: فالنظر نعم كررها عده مرات و الاعصاب !! " التفت له " كان ان يفقد اعصابه قبل قليل
الدكتور سأله : منذ متى و انت تشعر بهذا النوع من الصداع !!
عبدالله سكت شوي بعد قال : منذ خمست شهور
الدكتور : سأعطيك مسكن و ستتعرض لبعض الفحوصات و نتأكد
بلعت ريجي خايفه من الاجابه : دكتور ما الذي تتوقعه !
الدكتور : ربما صداع نصفي او شقيقه او ربما ورم سنتأكد عبر التحاليل

خفت لما قال ورم طالعته سالت عمري .. ليش خايفه عليك انا !! نافخت و قمنا ويا الدكتور اللي نقله لحجره و بدا التحاليل و سوا له اشعه و غيره و غيره .. و اخر شي عطو المسكن بعد ربع ساعه استرخى تماما و رقد .. قال الدكتور انه عادي نظهر بس رقد ففضلت انه يكمل نومه صارله يوم كامل يعاني .. طالعته كان انسان مسالم هادي جدا ابتسمت بألم ياريت تكون جذا معاي .. حاولت اتذكر يمكن عبدالله مر عليه فحياتي يمكن سويت له شي بدون قصد !! لكن ما فلحت عبدالله بعمري ما شفته فحياتي ليش حاقد علي ها الكثر !! تنهد بضيج ياربي شو اللي مخبتلي اياه الايام ويا عبدالله .. ضحكت بسخريه هذا اكبر غموض اكبر من غموض صقر و الهدايا و المجهول .. ها الغموض يخوف بشكل قاتل .. قطع عليه سرحاني رنه فوني طلعته من الشنطه و رديت بسرعه كان صقر .. قمت طلعت من الحجره

صقر : مشغوله !!
: لا
صقر : عيل شبلاج بلاه صوتج هب مطمني !!
: مافيني شي .. عبدالله فالمستشفى
صقر بدهشه : مستشفى !! شو ستوى به
تنهدت بضيج و علقت الدمعه فعيني : صقر خايفه انا بروحي
صقر : شو بروحج !! عبدالله شفيه
: مااعرف الدكتور يقول " صحت "
صقر تراجني : ارمسي الله يخليج شفيه شو يقول الدكتور !!
تكلمت بخنقه : مااعرف يمكن ورم او خبيث ماادري يمكن شي ثاني
صقر : اعوذ بالله .. يا بنتي فهميني شوي شوي
شهقت : راسه يعوره وديته المستشفى و يالسين نتريا الفحوصات ماادري شفيه " شهقت " خايفه اتم بروحي هني
صقر : تعوذي من بليس ان شالله ما عليه شر يمكن صداع و يروح
: لا هب صداع عادي
صقر : لا حول و لا قوه الا بالله .. تبيني احجز ايج !!
مسحت دموعي وانا اشوف الناس طالعني و يشفقون عليه : لا ماله داعي .. لما تتطلع النتيجه بخبرك
صقر : اتريا النتيجه طمنيني
: ان شالله .. شخبارها يدووه !!
صقر : بخير الحمدالله متولها عليج بس ماابيها ترمسج و انتي بها الحال بتخاف روحها كل شوي تردد انها متندمه خلتج تسافرين
: كل شي قسمه و نصيب و هذا نصيبي من الحياه
صقر : شها اللغز !! لا تحاتين عبدالله ما عليه شر ان شالله
تنهدت بضيج : ان شالله .. انا بسكر احينه
صقر : ع راحتج ربي يحفظج
: و يحفظك سلم
صقر : يبلغ ..

سكرت .. يتني حرمه يلست عندي رمستني سالتني ليش اصيح خبرتها انه ريلي تعبان .. فالبدايه انصدمت لاني متزوجه بس خبرتها اني من الامارات هب من هني .. خلاف قمت دخلت الحجره كان راقد و مرتخي تماما رحت يلست ع الكرسي و انا متوتره اتريا تحاليل ان شالله تكون سليمه و يكون صداع ما يخوف ..

تميت يالسه ساعتين و اكثر اتريا التحاليل .. تاخروا و قلبي يدق طبول شو بسوي اذا . . . استغفر الله .. تميت اتمشى فالحجره رايحه رداه و رداه رايحه و انقع اصابعي و اللعب فظفوري لدرجه اني كسرت واحد منهم شي يوتر .. و اخيرا دخل الدكتور طالعني وابتسم ارتحت لابتسامته ان شالله مافي شي جايد

الدكتور : لا تقلقي انه يعاني من الشقيقه
: الحمدالله اذا ليس شيئا خطيرا !
الدكتور : لا ابدا انه نوع من انواع الصداع يتولد من الارق و التعب ساكتب له بعض الادويه يتناولها عند بدا الصداع و عليه الاسترخاء اثناء نوبات الصداع انه يتسوى مع الصداعي النصفي تقريبا و مع العلاج تخف النوبات و لكن لن يتخلص منها للاسف
ابتسمت : شكرا دكتور
الدكتور ابتسم : هذا واجبي ياانسه

تميت يالسه اتريا قوم و طول نام له خمس ساعات و قام طالعني
عبدالله : ليش ما وعيتيني !!
وقفت : كنت تعبان مانمت يوم كامل ما حبيت اوعيك
عبدالله : خلينا نظهر
ستغربت ليش انه ما سال : ما تبي تعرف شو قال الدكتور !!
طالعني و سكت
: تعاني من الشقيقه مافي شي جايد و عطاك ادويه تاخذهم لما يبا الصداع
لبس جوتيه : يعني ما في شي يلا ييتنا اصلن ماله داعي

رفعت حواجبي ما يعرف يشكر !! ع اقل ييتنا خففت عنه الصداع و راح الالم .. مشى جدامي بدون ما يتاكد اذا كنت ورى و لا لا لما طلعت من المستشفى وقف يطالعني فمشيت صوب سيارتي طلعت مفتاح السياره لكن ايد عريضه سحبت عني المفتاح و ركبت مكان السايق صدق قليل ذوق .. لفيت حول السياره و ركبت ينبه و رجعنا البيت و اول ما دخلنا امرني

عبدالله : سوي الغدا يوعان
فصخت شيلتي و فريت شنطتي و كعبي ع الغنفه مشيت حافيه لين المطبخ و سكرت الباب عشان ما تتطلع الريحه .. بديت اسوي الغدا اللي كان عباره عن عيش و صالونه دياي خذت ساعه و نص تقريبا و قصيت السلطه .. لما خلصت طلعت شفته يالس فالصاله

: الغدا جاهز احطه احينه !!
عبدالله : هيه

رحت رتبت السفره و حطيت كل شي ع الطاوله و ناديته و يلست .. حسيت به واقف حذالي طالعته
عبدالله : منو طلب منج تسوين عيش و صالونه !!
رفعت حواجبي : محد طلب مني انا سويت
عبدالله : و ستأذنتي قبل ما تسوين !!
: ما اظن انه لازم استأذن
عبدالله حط ايده ع راسه و مسح ع شعري : ميره !!
: همم !!
فجاه شد شعري حسيت بجلع مخي وقال بصوت مستفز : ان سويتي شي بدون علمي يا ميره ياويلج
سكرت عيوني من شده لشعري : اذا ع الاكل كيفي اللي اشتيه بسوي ما عليه منك تبا كل ما تبا " حسيت به يشد اكثر " روح دق راسك بالطوفه

فجاه حط ايده ع جتفي و سحبني و وقفني جدام الجدار
قرب مني اكثر حسيت بانفاسه : شو رايج انتي دقين راسك بالطوفه
شهقت ليكون بيضرب راسي بالطوفه حاولت اني اشل ايده عندي لكنه اقوى
عبدالله : ميره لا تعاندين احسلج ترى والله ما بيردني شي عنج
صرخت : شو بتسوي بتضربني !! عادي ما يهمني اضرب سو اللي تبا هب خايفه منك ياي تعرض عضلاتك عليه

ما حسيت الا و هو فرني ع الجدار بقوه و طحت ع الارض حسيت بالم فراسي حطيت ايدي ع راسي من الالم .. نذل وقح ها مريض مريض شقايل يسوي بي جذا متخلف و الله ما اسكت له .. وقفت شفته واقف عند الثلاجه طلع ثلج رحت مشيت صوبه بخطواط سريعه مديت ايدي ع جتفه دزيته بس ما تحرك .. طالعني و ابتسم ابتسامه سخريه

عبدالله : احينه انتي تبين تضربيني !! شوفي نفسج و شوفيني يا مدام
: مينون انته مينون غبي كيف درني جذا ع الجدار و الله ما اسكت لك
حسيت بغضب كسحني و ما اشوف شي جدامي غيره هو رحت بكل جنون صوب الصحون اللي ع الطاوله مسكت واحد و فريته عليه بس شكله انتبه فنزل بسرعه و رديت خذت الصحن الثاني و فريته و تفاداه .. ها المره يبت الحواشيق و الشوك لكنه كان اسرع مسك ايدي

عبدالله : تخبلتي
تطالعته بتحدي : هيه تخبلت

سحبني بقوه و انا احاول افج ايدي عنه بس مع بنيه جسمه ما اقدر اسوي شي صعدني فوق لحجرتنا و فرني داخل و طلع و قفل الباب علي !! قفل الباب !! رحت صوب الباب تميت ادقه و اسبه و اطالبه يفتح الباب لكنه ما فتح تعبت و يلست عند الباب حسيت بألم فيبهتي قمت رحت صوب التسريحه شفت عمري فالمرايه كان محمر و منتفخ شوي الحقير شوهلي ويهي ..

تميت محبوسه فالحجره لين وقت العشا سمعت صوت المفتاح يدخل فقفل الباب ركضت صوب الابجوره الشي الوحيد اللي طرى فبالي اني افره عليه ان شالله اصوب عدل و اي ع جبهته و تنفخ و يتشوه الغبي .. من فتح الباب سحبت الابجور و بسبب غبائي حاولت اشده ما انشد لاني نسيت اظهر الفيش من الكهرربا فلحق عليه و مسك الابجوره

عبدالله : تخبلتي تكسرين اثاث البيت علي
: هيه هيه تخبلت تخبلت
حط الابجوره الطاوله و ايده لين احينه ماسكه ايدي بقوه .. حط ايده الثانيه ع ظهري ولصقني فيه : اووه انفخت كنت بحطليلج ثلج بس بديتي الحرب
قالها و هو يتمصخر : وخر عني
عبدالله : حلالي كيفي
: انا خدامتك مثل ما قلت فبعد عني
عبدالله : ههه كلام انتي الفتيه انا ما قلت خدامه بس ابيج تعتنين فيني
حطيت ايدي ع صدره احول ابعده عني : لااا مصدق بعد وخرررررر

وخر عندي لكنه سحبني من ايدي لتحت لين ما وصلنا المطبخ
عبدالله : سوي عشا انا يوعان بفضلج ما تغديت
تخصرت : ما بسوي روح كل فالمطعم
عبدالله طالع خصري فاعتدلت ابتسمت بسخريه : انتي بتسوين عشاي و ابي معكرونه
: ما اعرف اسوي
عبدالله وقف : ميره لا تحديني ع شي ماابي اسويه
: سوي اللي تبيه
عبدالله : متاكده !!
خفت بصراحه لكني ما ظهرت ها الشي له : هيه متاكده

تقدم خطوه و انا رجعت خطوتين و رجع تقدم خطوه و انا ارجع لورى لين ما ضربت بالجدار كنت بشرد لكنه كان اسرع مسكني و لصقني بالجدار و قرب بدت انفاسه تضرب فويهي : ميره اتقي شري احسلج سوي العشا و انتي ساكته صدقني ما ودي اضربج بس انتي تستفزيني بعمري ما مديت ايدي ع حرمه لكني شكلي كسرت ها القاعده بسبت عنادج و استفزازج

 
 

 

عرض البوم صور b3thra had2a   رد مع اقتباس
قديم 02-12-11, 10:52 PM   المشاركة رقم: 32
المعلومات
الكاتب:
اللقب:

البيانات
التسجيل: Sep 2011
العضوية: 228987
المشاركات: 28
الجنس أنثى
معدل التقييم: b3thra had2a عضو بحاجه الى تحسين وضعه
نقاط التقييم: 23

االدولة
البلدUnited Arab Emirates
 
مدونتي

 

الإتصالات
الحالة:
b3thra had2a غير متواجد حالياً
وسائل الإتصال:

كاتب الموضوع : b3thra had2a المنتدى : القصص المكتمله من وحي قلم الاعضاء
افتراضي

 

البارت الثاني عشر
( لعبه )

ها اليومين ما صارت حروب طاحنا مبينا بس نظرات الشرار ما اختفت من عيونا .. صار استفزازي اكثر و يتمضخر عليه كل شوي خصوصا ع لبسي .. الغبي يباني البس قصير و اتفنن جدامي و اتمخطر و الله نجوم السما اقرب له .. صرت البس كل شي طويل و وسيع حتى شعري ما افرده .. شفته واقف عند باب اللي فيه ملابسي يبي ييفتحه رحت بسرعه و رفست الباب بريلي

: هي انت وخري عن ملابسي
عبدالله رفع حاجب : حرام اشوفهم !! ابي البسج شي ع ذوقي بدال ها اللي لابسته
وقفت جدامه و لصقت ظهري لباب الكبت : ما يخصك فلبسي اللبس اللي ابيه البسه هب انا خدامتك شو تبا فزينتي
عبدالله : لا تقولين خدامتي انتي هب خدامه هني
: عيل شو تمسي طلبك و لا ما قدرت تمسك عمرك !! يلا خوز عن كبتي
عبدالله قرب انحنى عشان يتساوى طوله لطولي : لا تنسين يا مدام لي حقوق و باخذها
عصبت و انحرجت منه : مالك شي عندي
عبدالله ابتسم بخبث : تعرفين انه هذا ما يرضي ربي
عضيت ع شفايفي : عيل اللي تسوي يرضي ربي !!
عبدالله وقف عدل : ما سويت شي انتي لسانج طويل يباله قص

فجأه انهنى عليه و بسرعه البرق سوى اللي براسسه و انا متصنمه مثل الحجر طلعت عيوني من اللي سوى .. لما حسيت بالوضع دزيته بالقو عني كنت بسبه بلعنه لكن لساني انربط شلت بعمري و طلعت من الحجره احس ويهي صار ناااار من الاحراج .. ياربي ليش سوى جذا بس انا حلاله هيه يحق له ياخذ حقوقه كامله بس هب قبل ما يستسمح مني و يتاسف هيه و الله برويك بكون شي يمنع اللمس فقط للنظر هههه والله لعذبك يا عبود و بطلع عيونك ..

: ابي اغراضك حق الرسم اربع ايام و ببدا دراسه
عبدالله تنهد : اسمعي من يوم ساير انتي تقضين مشاويرج
: انزين ورني وين السوق و انتهى
عبدالله : باجر
بعناد : احين باجر هب فاظيه
عبدالله بسخريه : ليش شو عندج !!
ضحكت : عندي اشغال بيت و اهتمام بطفل بيصك الثلاثين
ضحك بصوت عالي : ضحكتيني بصراحه زين تعرفين شغلج بس انا من باجر ببدا دوام يعني نص اليوم ما بتشوفيني
: دوام شوه !! الجامعه بعدها ما بدت !!
عبدالله : الوالد عنده شركه هني و بمسك فرعها
: انزين يلا ظهرني
عبدالله : انا لله و انا اليه لراجعون صكيتي راسي شيلي سيارتج و سيري اسالي وين طرف الاسواق

قمت بتحدي رحت فوق و بدلت ملابسي لبست بنطلون جينز سكيني اسود و تيشرت احمر ساده نص كم و فوقه جاكيت رسمي لونه اسود سكرت فصمه وحده و لبست شيلتي و تعطرت و لبست كعب اسود و خذت شنطتي و مفتاح سيارتي نزلت تحت مشيت جدامه و انا العب بفتاح السياره .. بس حسيت الباب يبتعد عني و ايد قويه ماسكه ايدي فرني ع الغنفه بقوه

صرخت : انت شبلاك ع الضرب
عبدالله : بكيف ابوج تطلعين
: توك تقول انتي قضي مشاوريك و لا انت ما ترسى ع شور واحد !!
عبدالله : وانتي صدقتني !! يلسي مكانح قلتلج باجر
وقفت : و انا ابا اليوم من يوم من ينا و انت حابسني غير انه بارحه سرنا الجامعه و سجلتني
عبدالله : تعودي انا هب صاحب مشاوير فاظيه

،

وعده انه يودي الدكان بعد صلاه العصر .. غير ملابسه و راح يدور ع محمد عشان ياخذه و ياخذ واحد من التوأم وياها .. طلعوا من البيت و محمد متحمس و مستعيل من كم يوم يحن يبا الدكان و منصور مانعه من ها السوالف بس فالاسبوع مره .. شافه طلع من باب الحوي و يزاقر فيه يبا يركض وياه

منصور : حمود تعالي بنسير بالسياره
محمد : نا نا يلا يلا سرعه سرعه
منصور : انزين تعال خوز عن الشارع ياولد

عطى مفتاح السياره لسعيد عشان يشغل السياره و راح صوب محمد يشله لكن شد انتبه صوت سياره ماشيه التفت ع سياره كانت فمكانها .. على طول عقله اشتغل و ركض لمحمد و هو يصرخ فيه
منصور : خوز عن الشارع محممممد

و بسرعه حضن محمد و انحنى ع ارض و دفن محمد فحضنه .. حس بشي مثل الصخر ضرب ع جتبه طيحه ع الارض و محمد فحضنه حس بألم يقطع عروقه يحس بسجاجين فجتفه حاول ياخذ نفس و حاول و حاول و حاول .. سعيد تخبل و زقر نهيان اللي كان فالصاله و اتصلو فالاسعاف .. ماشي نزيف بس منصور يتويع و محمد يصيح فحضنه

محمد بصياح : بابا .. نا نا .. بابا
نهيان سحب محمد بالقو عن منصور و دخله الصاله
مهره : بلاه يصيح
نهيان يحاول يدخل محمد : وخري من هني
محمد يصيح : باااباااااا باابااااا
مهره : وين منصور ليش ودره
نهيان : حادث بسيط
مهره بفرع : شحادثه شو ستوى !!

نهيان ما عطاها مجال ظهر بسرعه يبي يطمن انه منصور لين احينه صاحي بس حصله راقد فنص الشارع و ايده ع جتفه مرتخيه و التوأم يحاول يوعونه و مهره واقفه عند باب الحوي تصيح و محمد بيدها يصيح ينادي ابوه .. يت الاسعاف و شلته و كان لين احينه عايش

،

فتح باب حجرتها و دخله و تسدح ع سريرها .. يحاول يقاوم و يقاوم يمكن ريحتها تقويه يمكن طيفها يزوره او حتى يسمع صوتها بس الوقت متاخر شد ع السرير بقوه و دفن ويهه فمخدتها و يشم ريحتها اكثر و اكثر و اكثر .. يأن بوجع ليش هو يتحمل اغلاط غيره ليش الناس حوله يغلطون و هو ينظف وراهم !! ليش كلن ما يتحمل ذنوبه لييشش !! ضرب بقوه ع السرير .. مره و مرتين و ثلاث يمكن يشفي غليله يمكن الوجع يروح ..

صقر :آآآآآآآآآآآآآآه

،

احس بيد تهزني بقوه و صوت غبي ينادي باسمي لفيت الصوب الثاني فيه رقاد بعدني ما شبعت لكنه مصر يوعيني .. علك الموت يا عبدالله اوووف

عبدالله : قومي حشى رقاد اهل الكهف قومي
: شو شو شو طفت بي شو تبا
عبدالله : قومي سويلي يروق بروح الشركه
لفيت الصوب الثاني : روح في حد زاخنك
عبدالله : قومي سويلي شي اكله يا بنت قومي
ما رديت عليه خله ياكل فالشركه يسوي اي شي انا تعبانه
حسيت به يلس ع السرير ملاصق ظهري توترت بس طنشت .. حسيت بانفاسه تضرب خدي اهني ما رمت اطنش فزيت و من توتري و خوفي طيحت عمري من السرير و ما سمعت الا صوت ضحكاته عاليه فالحجره

عبدالله غمز لي : عرفت نقطه ضعفج يا الفصعونه يلا قومي بيج شي اخس يلا
نافخت رحت غسلت ويهي و رحت اسوي له ريوق كامل و لما خلصت رحت فوق و خبرته انه الريوق جاهز و تسدحت ع السرير ابي ارقد مره ثانيه بس النوم طار بسبته .. سكرت عيني و غطيت عمري عدل ابي ارقد بس الرقاد طار خله يظهر من البيت و قبل ما ابتسم انرش عليه ماي بارد شهقت

عبدالله : قومي تريقي وياي حرمه ع الفاظي
طالعته بعصبيه : غبي انت غبي فها البرد تصب عليه ماي يا غبي
عبدالله مسك ايدي وسحبني : قومي يلا تريقي ويايه

سحبني وياه تحت و يلست ع الكرسي غصب و ويهي و نص شعري ماي احس بالبرد .. غصبني اكل و كلت اول ما حطيت لقمه فحلجي حسيت بيوع فكلت بشهيه و شربت الجاي و هو قام و طلع و قفل الباب ورى .. وقفت فجاه عطست ثلاث مرات ورى بعض سبيت عبدالله سب و رحت فوق تسبحت و بدلت لبست شي ثقيل حسيت برد .. مسكت فوني كنت بتصل فامايه مهره بس تذكرت الوقت بعده عندهم ليل فرق بينا و بينهم اربع ساعات .. تميت يالسه متملله قمت رحت المكتب اللي فوق دخلت حصلته مثل ما هو بس في شي زايد لاب توب .. رحت يلست ع الاب و فتحته و انا شاقه الحلج وناسه في شي يونس هني بس خابت كل ظنوني لما طلب الرقم السري .. همممم شو الرقم السري !! كتبت اسمه .. غلط .. كتبت رقم فونه .. غلط .. كتبت اسم عايلته .. غلط .. و بشكل غبي كتبت اسمي و المصيبه انه فتح !!!!!!!!!!

الف علامه استفهام ع راسي ليش حاط اسمي رقمه السري !! يلا هب مهم بديت اتصفح النت و انا مستانسه فتحت مواقع الازياء شفت شو عندهم من يديد معنه ملابسي يديه بعدني ما لبست ربعها حتى بس عيبني كم جاكيت شكله كيوت و حلوو كنت بطلبه بس ما عندي بريد هني !! بسال عبدالله اكيد الشركه عندها بريد بعطيهم اياه بعد ما اخذ العنوان و رقم البريد .. المهم كملت دواره فالنت لين الساعه 12 خلاف قمت سويت الغدا .. سويت سلطه رومانيه و ستيك لحم لما خلصت رحت تسبحت و بدلت حسيت بالبروده تزيد عليه و اعطس وايد ليكون بسخن كله من ها الغبي .. صدق بديت اتعب رحت تسدحت ع السرير ياني خمول من البرد تغطيت عدل و سكرت عيني و بدون ما احس رقدت ..

،

دخل البيت شم ريحه ستيك ابتسم لانها بدت تفهم الدرس .. حس بهدوء غريب بالعاده لما يكون موجود تبثت حضورها و عنادها يكون موجود لكن المكان هادي بدونها !! سيارتها برع كان شاك انها بتظهر بدون علمه لكن سيارتها فالقاراج !! صعد فوق و دخل الحجره شافها راقده و متغطيه عدل و شعرها مغطي ويها و المخده .. تجدم و فصخ جوتيه و ابتسم بخبث فصخ جاكيته و تسدح عندها يعررف انها ما بتصحى بسبت نومها الثقيل .. مد ايده و مسح ع شعرها و شم ريحته لصق فيها اكثر قرب شفاته لخدها و باسها بهدوء لكنه انلسع من حرارتها بعد عنها الغطى و حط ايده ع يبهتها و رقبتها و خدها يبي يتاكد ..

راح الحمام فتح الماي و ترس البانيو و طلع شلها بين ايدينه و دخل فيها الحمام يبي يخف حرارتها اول شي بغطسها فالماي البارد و بعده بيحط لها كمادات بارده و بعده دوا .. شوي شوي نزلها و من حط نص جسمها فالماي قامت و صرخت

ميره : شووو هااااااااااااااا
عبدالله داخل كلها فالماي
ميره صرخت : طلعني طلعني

مسكت رقبته عدل حس انها بخنقه لكن ما سمع منها سحب ايده منه و مسك ايدها و غطس راسها فالماي .. طلعها بعد ربع ساعه من الصراخ حتى شمخته و ضربته لف عليها روب الحمام و طلعها سدحها ع السرير

عبدالله : بدلي ملابسج بروح ايب كمادات بارده
ميره : ما لك خص فيني يا الغبي كله بسبتك يا متخلف

،

طلع بعد ما تهاوشتنا .. بغا يغرقني الغبي زين اني قمت اونه يبا يداويني هذا يبا حد يخدمه هب هو يخدمني .. بدلت ملابسي و نشفت شعري و نزلت تحت كان يالس يتغدا رحت يلست و تغديت و غسلت الصحون و خذت مسكن و رديت رقدت ..

،

وعيت ع ايد تهزني فتحت عيني كان الضو ياي من ورى الستاره ركزت عدل شفته يالس ع السرير و يوعيني بصوت هادي قمت تسبحت بماي بارد عشان الحراره و نزلت تحت سويت ريوق و تريقتنا عطاني ادويه قال انه الدكتور وصفهم لي !! بس انا ما رحت المستشفى !! يمكن وداني و انا راقده .. خذت الادويه و طلع راح الشركه تميت يالس متنحه مالي خلق لشي موول تميت جذا متنحه لين ما رن فوني كان خالي يوسف ..

: الوو
يوسف : اوه اوه ليكون اثر عليج جو لندن
: ههه هييييه اثر
يوسف : سلامات ما تشوفين شر
: الشر مايك .. شحالك !!
يوسف : بخير الحمدالله بس مشتاقين والله البيت بلياج ما يسوى شي
ابتسمت : حتى انا شتقتلكم شخباره صقر و يدووه !!
يوسف تنهد : صقر حالته ما تسر مول
: ليش بلاه !!
يوسف : ماادري عنه من خطب و هو قالب
: خطب متى !! و منو !!
يوسف : خطبنا له اول امس و منو بنت ناس و اوادم منو بعد !! بس هو يعرف عايلتهم و يقول ناس زينين
اكيد مييثاا ><" : انزين شرب !!
يوسف : هيه البارحه توقعت لما شفت حالته ما تسر ما ادري متى بودر حاولت اكلمه لكنه رفض يفتح الموضوع
: هو حوليك !!
يوسف : اول شي رمسي امايه خلاف رمسيه تري شوي

ثواني وياني صوتها : هلا بنيتيه شحالج اميه !!
: بخيييير يالغاليه انت شحالج طمنيني عن صحتج !!
بدووه : بخير الحمدالله .. بلاه صوتج فديتج
: مافيني شي بس سخونه مرضانه شوي
يدووه : اميه الله يخليج ديري بالج ع عمرج دفي عمرج زين البسي شي ثجيل و كلي عدل فديتج
: لا توصين يالغاليه
يدووه : و عبدالله شخباره !!
: بخير الحمدالله
يدووه : مرتاحه !!
: لا تحاتيني يدووه انا بخير .. صقر عندج يدووه !!
يدووه : هيه هاذو يا سلمي ع عبدالله
: يبلغ

و ثواني وصلني صوته تعبان : مرحبا
: مرحبيتن شحالك !!
صقر تنهد : خطبتها ميره
: ليش جذا تسوي بعمرك !! هي مستانسه و نافخه عمرها و انت هني مضايقج .. و شحقه تشرب
صقر : قاومت بس ما قدرت حسيت راسي عورني و محتاج اشرب
: محتاج !!! صقر انت مستوعب كلامك والله خايفه عليك من ها الشرب
صقر : اتفقنا انا وياها ست شهور و بطلقها
: اللي تبي سوي ما اظن لي اهميه عندك عشان تقولي بكل ها
صقر : منو قال !!
حسيت بغصه : لو لي اهميه عندك جان ما شربت و لا دمرت نفسك شرب و تدخين لين متى
صقر : انتي مريضه اعرف و ما بلومج ع اللي قلتيه
نزلن دموعي : لا هب مريضه مافيني شي انت المريض انت المفروض تتعالج هب انا

سكرت فويهه من غيضي منه خله يعرف اني هني خايفه عليه و هو و لا همه .. اللي يهمه يشرب و يفر راسه و ينسى لساعات شو بيستفيد ! تم يدق عليه كمن مره بس ما رديت حسيت بتعب فتسدحت ع الغنفه بس ما ياني نوم تميت اصيح اخاف صقر يضيع عمره باللي يسوي .. ودي اروح انهي ميثا من حياته و اقولها تبتعد و دور لها ع شخص ثاني يستر عليها ..

بعد فتره سمعت صوت الباب قمت رحت المطبخ بديت اسوي الغدا .. سويت معكرونه بالبشميل و سويت سلطه و خلال ساعه خلصت .. يلسنا تغدينا بدون كلمه و خذت دواي خلاف رحت فوق تسدحت ع السرير بتعب بس ما ياني رقاد .. تميت ع ها الحاله لساعتين و اكثر يمكن .. شفته دخل الحجره و طالعني

عبدالله : ما تبين تظهرين !!
قعدت حبيت فكره اني اظهر ابي اغير الجو هزيت راسي بهيه و قمت طلعت لي ثياب و رحت بدلت فالحمام و لبست جاكيت و لبست نعال مسطح و خذت شنطتي و طلعنا رحنا صوب الاسواق كنت قاصده محل يبع ادوات الرسم بعد ما سالنا حصلنا المحل .. اشتريت كل شي يخص الرسم .. اقترح نقعد فكوفي فرحنا يلسنا طلبت لي كيك جوكليت و قهوه سوده ..

ضحكت لما شفت الطلب نفس الطلب لما شفته و شردت منه
عبدالله : تهلوسين !!
طالعته : بسالك تذكر قبل العرس . . .
قاطعني : هيه اذكر شفتج تعرفين لو كان اللي ينبي اربيعي جان لعنتج
رفعت حاجب : ليش ان شالله !!
عبدالله : اسمعي اذا رحنا الامارات تتغشين بس هني لانه الجتمع غير فمسموح لج تشيلين الغشوه

ما سوتله سالفه و كلت من كيكتي و شربت القهوه و انا مستمعه حرارتي نازله احينه ماابيها ترتفع لين العشا عشان ما اسوي له عشا و ارقد بشوف النذل شو بيسوي .. طالعته ليكون بحرقني و لا بيرد يغرقني فالماي !! اعوذ بالله شها التفكير ليش يذبحني يعني !! لما خلصنا رجعنا البيت حطيت كل اغراضي فالصاله فزاويه فاظيه و رحت بدلت لما خلصت شفته دخل الحجره فصخ جاكيته و سحبني من ايدي و نزلني تحت و انا مستغربه من تصرفه !! وصلنا المطبخ

عبدالله : فاهمج عدل يلا سوي العشا قبل ما ترد ترتفع حرارتج ترى محد خسران غيرج
تخصرت : ما بسوي روح تعشا برع انا تعبانه اليوم حس ترى الحراره بسبتك
شفته ركز ع خصري مره ثانيه مشى صوبي و شل ايدي عن خصري و حط ايده و ابتسم : ميره
خفت بصراحه صوته يخوف جنه ثعلب بيلعب عليه لعبه عشان اسوي اللي يبه : خلاص وخر عني

ابتسم و طلع من المطبخ .. قلت بسوي فطاير عجنت العجين و تريت ساعه لين تخمرت و سويت فطاير بالجبن و الزعتر و اللبنه نوعت بين ها الثلاثه اصناف و حطيتهم فالفرن بديت اتعب حطيت ايدي ع يبهتي ردت حرارتي .. يلست ع الكرسي فالمطبخ اتريا الفطاير تستوي .. لما ستوت طلعتها و طلعت علبيتن ببسي من الثلاجه و ناديته ع العشا كان من النوع اللي يتعشا خفيف حتى اكله منتظم و قليل ماادري اذا هو يتعمد عشان ما يزيد وزنه و لا اكله جذا من الاساس !!

بعد العشا غسلت الصحون و رحت فوق بدلت لبست بجامتي الحرير و خذت ادويتي و هو دخل بدل و رقدت و انا تسدحت ع السرير و رقدت من التعب ..

،

طلعوا من المستشفى باضرار وخيمه فجتفه لين احينه حاس بالالم لكن كل ما شافت محمد بخير و يضحك جدامه نسى الالم كله و ابتسم وياه .. صعد الدري شوي شوي و نهيان ورى و محمد ماسك ايده السليمه ويمشي ينبه دخل حجرته و ساعده نهيان فلبس قميصه و سدحه ع السرير بشويش

نهيان : الحمدالله يت سليمه محتاج شي !!
منصور : سلامتك توكل انا برتاح شوي
نهيان : حمود تعال خلي بابا يرتاح
محمد تسدح عند منصور : نا نا انت روح
نهيان ابتسم : انزين بس لا تزعجه
طلع نهيان .. و منصور طالع محمد
محمد : انا افسسس
ضحك لكنه كتم ضحكته من الالم : حبيبي انا هب زعلان
محمد : بس سعود يقول ان زعلان
منصور مسح ع شعره : لا حبيبي هب زعلان انا بخير مافيني شي
محمد : يعورك صح !!!
منصور ابتسم : شوي بس احينه بنام و ما بيعورني
محمد : انزين يلا نااام

ابتسم لما بدا محمد يمسح ع شعره اونه يحاول يرقده عششان الالم يروح .. بس المه راح بوجوده يتكلم و يبتسم و يضحك جدامه .. المه راح لما ما جاسته السياره ولا حتى تسببت له باي ضرر .. المه راح لما سمعه يصرخ يباه يثبت انه هو بخير و ما جاسه شي ..

 
 

 

عرض البوم صور b3thra had2a   رد مع اقتباس
قديم 04-12-11, 11:07 PM   المشاركة رقم: 33
المعلومات
الكاتب:
اللقب:

البيانات
التسجيل: May 2010
العضوية: 164128
المشاركات: 229
الجنس أنثى
معدل التقييم: شموخ السلاطين عضو له عدد لاباس به من النقاطشموخ السلاطين عضو له عدد لاباس به من النقاط
نقاط التقييم: 103

االدولة
البلدKuwait
 
مدونتي

 

الإتصالات
الحالة:
شموخ السلاطين غير متواجد حالياً
وسائل الإتصال:

كاتب الموضوع : b3thra had2a المنتدى : القصص المكتمله من وحي قلم الاعضاء
افتراضي

 

تسلم الايادي على البارتين


عبدالله اتوقع انه سبب معاملته لميره بهذي الطريقه وهو ياسر
وانه قايل انها تحبه وهو يحبها


ميره الله يعينش على الغربه وفوقه عبدالله ونفسيته المتقلبه


صقر صادقه ميره ليمت بتخلي هذي الخبيثه ميثوه تتحكم في حياتك


ياسر ياخوفي انه يمكن يهذي باسم ميره

منصور سلامات متشوف الشر والله يخليك لحمود

في انتظار البارت القادم

 
 

 

عرض البوم صور شموخ السلاطين   رد مع اقتباس
قديم 05-12-11, 02:31 PM   المشاركة رقم: 34
المعلومات
الكاتب:
اللقب:
عضو فخري
♪ مُخْمَلٍيةُ آلعَطّآءْ ♦


البيانات
التسجيل: Mar 2010
العضوية: 157123
المشاركات: 30,194
الجنس أنثى
معدل التقييم: ♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع♫ معزوفة حنين ♫ عضو مشهور للجميع
نقاط التقييم: 13523

االدولة
البلدSaudiArabia
 
مدونتي

 

الإتصالات
الحالة:
♫ معزوفة حنين ♫ غير متواجد حالياً
وسائل الإتصال:

كاتب الموضوع : b3thra had2a المنتدى : القصص المكتمله من وحي قلم الاعضاء
افتراضي

 




غريبة !
اممم ليش حاط اسم ميرة باس وورد لابه ؟
على قولته ما يبي يعرس اصلا وشكله ما يحمل لها مشاعر ..

ميرة الله يعييينها عليه والله ..
متششششرك حضرته مرة ..

سللمتي يالغلا ..


 
 

 

عرض البوم صور ♫ معزوفة حنين ♫   رد مع اقتباس
قديم 06-12-11, 07:22 AM   المشاركة رقم: 35
المعلومات
الكاتب:
اللقب:

البيانات
التسجيل: Jun 2010
العضوية: 174132
المشاركات: 212
الجنس أنثى
معدل التقييم: halazona عضو على طريق الابداعhalazona عضو على طريق الابداعhalazona عضو على طريق الابداع
نقاط التقييم: 202

االدولة
البلدKuwait
 
مدونتي

 

الإتصالات
الحالة:
halazona غير متواجد حالياً
وسائل الإتصال:

كاتب الموضوع : b3thra had2a المنتدى : القصص المكتمله من وحي قلم الاعضاء
افتراضي

 

ميره الله يعينها على عبدالله يمكن معاملته معها سببها ياسر لكن شكله بيحبها ومايقدر على فرقاها الله يعينها عليه وعلى الغربه

 
 

 

عرض البوم صور halazona   رد مع اقتباس
إضافة رد

مواقع النشر (المفضلة)

الكلمات الدلالية (Tags)
المطر, الخيآم, الخوآفق, ختمة, يقلب, طريته
facebook



جديد مواضيع قسم القصص المكتمله من وحي قلم الاعضاء
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 10:10 PM.


 



Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية