بسم الله الرحمن الرحيم .. السلآم عليكم ورحمة الله وبركاته
يالله يارب ان تسعد صبحهم .. وبذكرك تعطر سمعهم .. وبالتوفيق تجعله حليفهم
اسعد الله صبح جميع حبايبي وين ماكانوا او وين ماصاروا يارب .. وان تمر اختبارتهم
كالماء العذب الزلال
..
انا ابرحب في إنسانه عزيزه وغاليه علي .. وحتى هي ماتصدق معزتها في قلبي
إنسانه اروع من الروعه نفسها ربي يحفظخا لشبابها ويمتعه يارب ( معزوفة حنين )هالإنسانه اللي لها فضل علي من بعد الله سبحانه ,, ولحد يزعل مني اني ارحب
فيها وبإنضامها معنا ,, هاذي تستاهل التميز اللي خذته ويستاهلون المنتدى الجار اللي
هي مشرفه فيه ربي يحفظها يوفقها
..
( هالنقطه هاذي اللي مايبي يقراها ينزل الصفحه لأني وعدت حبيتي واختي الصغيرونهHHO q8 اتكلم عن نفسي في سطرين
انا حساسه واحب الكتابه كثير كثير فوق مافيه حد يتصور .. وحبيت الكتابه من سن صغير بالحيل قبل اعرف ان فيه روايات تنكتب في النت اصلآ قبل اعرف وش
هو النت اللي اشوفه بس في التلفزيون لان للأسف النت قبل فتره بسيطه بس دخل
بيتنا لانه صار من ضروريات الجامعات والأبحاث
عيبي هو الإنفجار لاني اكتم اكتم بعدين انفجر .. تخرجت من الثانويه وجلست في البيت .. ام دميعه حتى مواقف تمر علي وهي تخص غيري مدح وثناء فيهم تنزل دموعي فرح فيهم يسموني في البيت ام المواقف الصعبه .. لأني عشت دور اكبر من
سني وهو ترك امي المسؤوليه الكامله لي
..
عسى كان شرحي وافق وبسيط عن نفسي ونتنقل إلى عالم القسوه والظلم عند آل قاسي
بارت اليوم مشوق كثير وفيه احداث اكثر .. وعندي هديه بسيطه مره مني لكم
بينزل بارت صغنون هاه من الحين قلت صغنون يوم الأحد لكم ويتجدد عقبها الموعد
يوم الخميس
همسه في إذن اخوي قمم الأعالي ( مبروك الأشراف .. ومو على كيفك تمنع فيتامين
ومهاتي من حضور العرس لوصار .. ولو مصار ترى ممنوع تدخل عرس سياف
خخخخخخخ >> قلبت مخك بس ترى الحريم مو قليلات شر وانا وحده منهم


مع اطيب الأمنيات بقراءه ممتعه
.سهم المملكه
.
لإله إلا الله





( البــــــــــــــــــــارت الســــــــــــــــ 27 ـابع والعشرون )




مازال مو مستوعب اللي يسمعه – نعم وش قلت !!

هو ناظره بقهر – ترى بصكك بكس تفهم ,, انا مستعجل وليا رجعت يصير

خير ( ووقف )

وقف بسرعه .. ومسكه مع كم ثوبه – نايف قل الصدق انت اكيد تمزح

نايف وهو جدي ومعقد حواجبه وبقهر – لا شايف وجهي حق مزح اقلب

وجهك ( ودز يده )

رد ومسكه سياف بقوه وبوناسه – موافق موافق فيها بنت وفلوووووووس

ليش مانوافق إلا نبصم بالخمس بعد

نايف ناظره وناظر بهدلة حالته ,, وبشاعة وجهه .. ورائحته النتنه

وقال وهو يبعد بقرف منه – بس ارجع اعلمك ,, بس شرط !!

سياف وهو مبسوط ومو سايعته الوناسه – انت ماتشرط تأمر

نايف وهو يتوجهه للباب – لاتسكر خلك صاحي لين ارجع عشان اعرف

اتفاهم معك

أشر على خشمه اللي مفترش وجهه ببشاعه – على هالخشم












ماصدق يوم الدكتور خبره .. ألتفت يدور أمه .. تذكر انها راحت تصلي

الضحى في مصلى النساء .. واتجهه بسرعه للعنايه المركزه يتبع الدكتور

اللي دخل وشاف الممرضه تمنع المويه عن فارس وهو معقد حواجبه

ابتسم الطبيب وسعد يدخل وراه – المويه ممنوع ياأخ فارس انا عارف

إن الحلق عندك جاف وهاذا شي طبيعي بس خلال الساعات القادمه

وبتشرب مويه ( وابتسم ) يكفي المويه اللي شربتها بالدس عنا

ناظر للمرضه اللي ابتسمت ونزلت راسها

اتجهه له سعد وهو يهرول في مشيته ومسك يده وبفرحه – الحمدالله على

السلآمه ياابو سعد أخر الطيحات إن شاءالله

ابتسم على طرف وسكت

الدكتور – إذن انا تسمحولي مناوبتي خلصت والدكتور نايف بيتابع حالته


في هالإثناء دخل صقر عليهم .. سلم عليهم والدكتور طلع

ابتسم صقر وهو يشوف فارس صاحي – هاه بو الفوارس الحمدالله على

السلآمه

فارس وكأنه مو مصدق صقر موجود بينهم .. أشرله بوناسه وفي عيونه

دموع

ربت عليه صقر وحب جبهته – طول عمرك حساس ليتك جيت بنت

تساعد امي

ضحك سعد بقوه – تبي تستغل انه مايتكلم عارف لو انه صاحي مارضى

بهالكلام

ضحك صقر وهو يقول – نستغله

ابتسم فارس .. وسمعوا اصوات وضحك .. انفتح الباب بقوه

ودخلت منيره وهي بوناسه وبراسها كله – يالله يالله لك الحمد اللي بلغتني

اشوفه قدامي وصاحي يالله لك الحمد

اركضت له وحبت راسه .. وخده ويده .. واشتنشقت ريحته .. وضمته بقوه

وهم متأثرين ,, وفارس حاس بالدمعه قريبه .. وكانت دمعة امه ابلغ واحس

واوضح يوم طاحت على خده ,, وراسه في حضن امه .. مسح دمعة أمه

اللي حتى بالدمعه تبرعت له بها ,, ولو الروح فيها تبرع .. عطته روحها

بس الروح بيد الله رب العآلمين

صقر حب كتف امه – خلاص يمه خنقتيه

بعدته عن صدرها وهي تبكي – ياعين ابوي يازين هالشوفه ,, عسى ربي

يبلغني وارقص في عرسك وانا امك

ضحكوا اخوانه

سعد بعتب – هالحين زوجوني انا اللي صارلي سنين احتري الرضا وكل

يوم اقول بكره ينادوني ويقولون اعرس ياسعد وش تحتري مير اظاهر اني

بأخذ حرمتي مثل محمد واسافر بها

صقر ضحك – اجل يالله قواك الله بس وش يفكك من لسان عمشاء

محمد وموضي مطلقين ومجربين العرس بس ريم بنت وتبي عرس

سعد كشر – هاذا اللي قاهرني

منيره تكلم فارس – وشلونك يمه

غمض بعيونه وفتحها بمعنى بخير ,, دخل الخوف قلبها

قالت بتأكد – يمه فارس انت تكلم

أشر بيده لا

صرخت منيره بقوه – يمــــــــــــــــــــه ولـــــــــــــــــــدي

على هالصرخه دخل نايف وهو يركض – وش فيكم وش فيكم

شافه صقر بقهر ووقف

منيره ركضت لنايف وهزته مع كتوفه – اخوك مايهرج يانايف مايتكلم

زفر براحه وقال ,, وعينه طاحت بصقر ولف وجهه لأمه – يمه هاذا البنج

اصبري عليه شوي شوي بيتكلم بس البنج مخلي لسانه ثقيل ومايقدر يحركه

منيره بخوف – بنج لهالوقت من متى مسويله العمليه !!

صقر اتدخل وهالتدخل قهر نايف – يمه هاذا بنج عمليه كبيره مو أي عمليه

موضعيه لاتروعين الولد

منيره لفت له وشافته بدأ يرقد ,, وهو يحاول يقاوم النوم بس مايقدر

نايف اتجهه للملف ,, ومعها اتجهه له صقر ومسك كتفه – خلص شغلك

وتعال برى ابيك

منيره تذكرت سالفتهم وقالت بحزن – برضاي عليكم ياعيالي انتم اخوان

لاتفضحونا

صقر بقهر ( أشر عليه ) – وهالخايس اللي قدامتس مايعرف الأخوه

نايف عصب وصرخ بوجهه – اللي مايعرف الأخوه انت ولا تبي اذكرك

صقر زفر بقوه ونفخ في وجهه نايف – وعشان هالشي تعال برى ابيك

سعد يناظرهم بتوتر

نايف بعصبيه وهو يناظر الملف – ماعندي وقت اضيعه معك

بكسه صقر بقوه على خشمه اللي نزف وبعصبيه – بتسمعني غصبن عنك

نايف حذف الملف واتجهه له يبي يحاول يضربه ,, منيره قامت تبكي

وسعد حاول يدخل بينهم

صقر كتفه بقوه ونفخ على وجهه وبعصبيه – والله انك يالخايس اتفه إنسان

قابلته في حياتي

نايف اللي أستسلم له وهو يزفر بقوه – فكني ياتعباااان

سعد يحاول يبعد يدين صقر وهو يقول – صقر خلاص فكه

صقر بعصبيه – قل لأخوك الكلب بيسمعني غصبن من ورى خشمه هاللي

ينزف يروح ورى امه ويمشه ويعرف المراجل ماهب يحارش فيني عند

ابوي وجدي وعمي ويفضحني

نايف انقهر وفك يده بقوه ,, وباغته ابكس على خده .. وصب دم من فمه

منيره طلعت تركض وهي تصارخ – يانااااااااااااااس ياهييييييييييييه مافيه

احد يفزع لناااااااااااا ألحقوناااااااااااا

سعد ركض لأمه ودخلها وقفل الباب ,, وحذف شماغه ودخل بين اخوانه

اللي بصعوبه فرقهم

انضرب الباب عليهم .. وكان رجال الأمن صرخ نايف بقهر – هاه استانست

تبي تفضحني في شغلي الله لايوفقك .. تفووووووو على وجهك

دزه صقر بقوه من يده .. ودخل الحمام اللي في داخل الغرفه

نايف اخذ كلينكس وحطه بخشمه ,, وفتح الباب ومعصب – مافيه شي بس

سوء فهم

رجل الأمن – دكتور نايف صار فيك شي

نايف وهو يتجهه للمرضات اللي يناظرون في شكله وبهدلته ,, وطلب وحده

فيهم تعالج النزيف اللي بخشمه – لا مافيني شي آسفين إنا ازعجناك ومثلك

عارف يامساعد سوء الفهم يحصل في كل العائلات

هز مساعد راسه وطلع ,, دخل نايف للغرفه .. وشاف امه تبكي وسعد

جالس جنبها ويطبطب عليها .. طلع صقر من الحمام مقهور وناظره

والممرضه تمسح خشمه – عساه اول الكسور إن شاءالله

وطلع وخلاهم ,, ومنيره تضرب على فخوذها وتبكي – بيذبحوني بيذبحوني

ياسعد ناقصة عمر معاد اقدر عليهم آآآآآآآآآآه يويلي منهم يويلي آآآآآه ( وتبكي )

يوم شافه طلع ,, اخذ القطنه من الممرضه ,, وكلمها بالإنجليزي وأمرها

تروح ,, اتجهه لأمه وحب يدها – خلاص يمه بس ولدتس هذه يصبر علي

إن ماكف شره وأذاه عني إن بيني وبينه المحاكم

منيره مطت عيونها وصرخت بوجهه – بعد بتوصل للمحاكم ( وانتحبت )

بقوه – لالا انا فيه حدن داعين علي يويلي ويلاه اااااااااااااااااااااه

سعد غمز لنايف بقهر – يايمه اهدي لاتروعين فارس خلاص تراه مريض

اصلا حنا في العنايه وغلط صراخنا هذه .. لولا مركز نايف إن يطردونا برى

المستشفى

نايف وقف بقهر ,, واتجهه للملف اللي طايح على الأرض .. وبدأ يقراه

ويدون ملاحظاته

في الصاله وبقهر – لا ماهب على كيفه يفصل وانا ألبس

عمشاء معصبه – والله حقه اجل اللي سويتيه شوي تطلعين للرجال

وتقولين بس خلاص لاسحى ولاحشيمه وينا عايشين فيه

الجده وهي تمسك راسها – يالله التكله عليك يالله ( وناظرت ريم ) ازهميلي

على نايف ابي اشوف وشلون اخوه

موضي بقهر – وانا حد يعبرني هالأدمي غاثني من ظهرت على الدنيا وكل

مصيبه لي هو وراها

عمشاء وهي تناجي ربها وترفع يدينها – يالله إن تعطيها عقل يالله

موضي عصبت – ليه شايفتني مالي عقل هاه ,, علامتس علي يمه

عمشاء بحزن لحال بنتها – موضي وانا امتس روحي عني في السعه

ووسعي صدرتس اللي راح ماهب راجع

وكأنها تلقت صدمه ,, امها عرفت وش في خاطرها .. ماتنكر انها قلقه

على حال عيسى حبيبها اللي مازالت تحبه .. وفضلته على ولد عمها اللي

ألف بنت تتمناه .. بس هو مايبي هالألف هو مختار مغثتي ومحسس الجميع

إن اللي يسويه محبه إلي .. وانا اعرف اللي بالخاطر هو قصده يكسرني

ينحط راسي بالرمل ولاانسى سوياه

في الماضي البعيد

حذفها بالكتاب وهي تلعب مع صقر ونايف وضاحي وفهيد .. رفعت عينها له

وكان ذيك الأيام كبير عمره 14 سنه .. بينما هي عمرها ماتجاوز

السبع سنوات

وبعصبيه نفخ عليها – قومي يالدبه وهاتيلي مويه

انقهرت منه – ماابي اروح خل إخوانك يجيبون لك

مسكها مع إذنها وهي صرخت – وااااااااااااااااااااااااااااا

سمع صوت عمشاء وهي تقول علامتس وبسرعه ركض برى البيت


بعدها بفتره \ أخر سنه اولى ثانوي

تتذكر يوم تخبر ابوها عن مميزات الأدبي والعلمي .. وهي نفسها تدخل

علمي وتصير دكتوره وتفرح بالبالطو الأبيض .. وهي مجتهده في دراستها

وتحس ابوها مو مقتنع .. فجأه رفع السماعه ودق رقم .. انقهرت إن ابوها

طنشها وجت بتقوم بس سمعت ابوها وهو يسأل – ايهم احسن وانا ابوك

الأدبي ولا العلمي لموضي

سمعت ابوها وهو يضحك من كلام يقوله الطرف الثاني .. بعد فتره سوالف

وماخلت من الضحك .. سكر منه وهو يقول بطعنه لها – الأدبي احسن لتس

انقتلت الفرحه بعينها وبحزن – ليه يبه وراه

عشان يذبحها بالصميم ويقول – محمد يقول ازين لها الأدبي

انهارت وقامت تصارخ وتسب .. وتهاوش فيه .. وابوها عاد مايرضى على

محمد نص كلمه .. تتذكر يوم خذت كف لين هالحين ماانمسح من ذاكرتها

والسبب محمد الواطي والحقير واللي يفصل وكل العائله يلبسون على اختياره

وذوقه .. حتى ضاحي هو اللي دخله العسكريه وصقر اخوه وسعد هو اللي

شجعه على الطيران وحتى ريم هو اللي توسط لها في الجامعه .. إذا كل امور

العائله ماتمشي إلا بشوره .. بيأخذون شورها في مستقبلها !!

سمعت الباب تسكر بقوه ,, هزها من خيالها البعييييييييد ,, رفعت عينها

شافت فهيد وهو يضحك – حيالله هل البر ( ويطنز ) كم ضب مسكتوا

عسى اليوم غدانا ضبان

قمزت ريم بقرف – ياربي تكرم النعمه .. ياربي لك الحمد

فهيد ضربها مع راسها – صكي لسانتس ابرك

ريم صرخت فيه – آآآآآآآآآآآآي تراني ابي راسي

عمشاء تشرهه عليه – وراه جاي وساحبن شرك معك ,, ماتستحي على

وجهك لاسلام علي ولا على جدتك

جلس وحط رجل على رجل وقال بوقاحه – ماهب لازم سلام قبل يومين

وجهي في وجيهتسن ,, قوليلي وش صار على موضوعي

موضي انقهرت من إسلوبه – وش هالاسلوب الخايس ماتسلم على امك

وجدتك وينا عايشين فيه

الجده اللي وقفت وبتشرهه – انا مير غاسلتن يدي منه بروح اتسنن

عمشاء غمزت بعينها لولدها يعني سلم عليها ,, انجبر يوقف وراح يسلم

على راسها – وشلونتس يابنت خزام

الجده بزعل – رح عني في السعه بس ,, لابي لاحبك ولاسلامك

فهيد عطاها ظهره – بصرتس ماني بمجبور اراضيتس ,, ماسويت شي

الجده وبقهر – ولا ياخسارة البنيه اللي بتأخذها فيك بس

موضي وريم فتحن عيونهن وناظرنه بقوه

ريم – يمه خطبتوا لفهيد

فهيد يجلس ويحط رجل على رجل ويتسكب – إلا هي اللي ياحظها فيني بس

وياخسارتي ,, مير يالله العوض ولا القطيعه

عمشاء استانست وقربت منه وهمست في إذنه – ترى البنت وافقت

ضحك وقال – علمتس !!

عمشاء – لا بس راحت لمنيره وعلمتها ,, ومنيره علمتني

صفق بيدينه بوناسه – زين زين

ريم – فهمونا من هي البنت اللي خطبتوها ووافقت

فهيد ناظرها – اهبي ماهب إذن عليتس ردار لاقط

ريم كشت في وجهه – تف خمسه وخميسه بسم الله علي

عمشاء بفرحه – خطبناله وضحى

موضي ضربت على صدرها ,, وريم مطت عيونها – ايششششششششششش

موضي بقهر- يمه انتي من صدقتس تخطبين له وضحى

عمشاء انقهرت من ردة فعلهم ,, وشافت فهيد انتفخ غضب منهن

فهيد معصب – ليه وش فيني انا طايح من عيونتسن

ريم بعدم خوف منه – بلاك والله سكير ولاتصلي ولا وظيفه واكبر داشر

في السعـــ ( من قالت كلمتها .. شافت اللي ركض عليها .. وهي اطلقت

رجلينها لفوق لغرفتها .. ومن حسن حظها انها كانت بعيده منه واسرع

منه .. قفلت الباب عليها وهي تلهث .. وتسمع صراخه ولعنه وركله للباب

بقوه )











بقهر- ماهيب حاله يأخذ اختنا ويطلع بها برى

وضحى جلست وهي مستهمه – الله يعين وش في يدينا خلينا ساكتين ابرك

جلست جنبها – يعني يرضيتس هالشيبه يطردها ويصارخ عليها ويسب

ابونا وحنا نتسمع فيه وماقلنا شي

هند اللي مسنده ظهرها على الجدار قاطعتهم – بنات توقعون فارس سلم

ولا لا

ناظرتها وضحى بنظره طيحت قلبها .. وخلت عينها تنزل

نوره بقهر – هماتس تدعين عليه وتمنينه يموت خلاص وصل الفرج

بكت بشهيق بقوه وتحت صدمة خواتها – بس انا ماابيه يموت .. انا مااكرهه

ولا حتى احبه عادي بس ماابي ربي يستجيب دعوتي ,, انا خايفه إن اللي

فيه من دعاي

وقفت لها وضحى ومشت بإتجاهها – خلاص هاذا مقدر ومكتوب مكتوب عليه

من طاح من بطن امه ( وضمتها )

هند وهي تتنهد بألم – بس انا تعبانه وضحى مارقدت امس كله بس افكر إن

يمكن السبب مني

تسمع الأصوات برى ,, وتتمنى تجلس معهم وهي اللي قبل .. ساره

الطيبه الحنونه النظيفه .. مو ساره اللي هي الحين .. اللي نزلت راس

خواتها القاع

مسكت شهقاتها وهي تتمنى تكون مثل قوة شيخه ,, او حكمة وضحى

وتعرف تتصرف في هالمصيبه .. مسحت دموعها .. وفكره بدت تراود

بالها ولازم تسويها لو فيه موتها









من الطفش منسدحه على بطنها .. وتحاول تفهم الكلام المكتوب في المجله

اللي لقتها في درج الغرفه .. سمعت صوت باب الشقه وطنشته

سمعت هدوء فتره يوم دخل عليها وهو معصب – انتي هنيا وانا ادور عليتس

رفعت وجهها من المجله وناظرت فيه وهي تلعب برجلينها – وش تبي

بعصبيه وهو يأمرها – قومي عطيني قطن وديتول ابي امسح فمي

ناظرته بإستفهام فتره بعدين قالت - مافيه ديتول وقطن

ناظرها بعصبيه واتجهه على المنديل سحب الكرتون كله .. ودخل الحمام

وهو يسب ويلعن وهي ماهي فاهمه حرف من اللي يقوله

سمعت صوته يصرخ فيها – تعااااااااااااااااالي يابقره

وقفت ومشت له ووقفت عند باب الحمام وتكتفت – خير وش تبي

هو والشر يطاير من عيونه – ليه مكومه ملابس الغسيل هنا انا ماعندي بدله

لبكره

شيخه انقهرت منه – اللي اعرفه إن البدل تتودى عند المغسله ماعرف إن حد

يغسلها وامك دائم ترسل ملابسكم انت ومحمد مع السواق للمغسله والشغاله

تطق الباب وتطلبها

صقر وشره بعيونه صرخ فيها – انقلعي اغسليها بيدتس هذاك عند امي

تتدلعين الحين ماحنا بعندهم

عصبت منه وناظرت فيه بقهر

صرخ وارعبها – وش تحترين ليــــــــــــــــــــــش واقفه

ادخلت بعصبيه وشالت بدلته وطلعت فيها

صرخ بقوه وهي نقزت – خذيهم كلهم

ألتفتت عليه بعصبيه – خير وش شايفني ترى قاعده اغسلك بطيب نفس احمد

ربــــ

اتجهه لها وجرها مع شعرها .. واتجهه للبدال ولمهم كلهم وحطها بيدها

وحذفها برى الحمام وصرخ في وجهها – ابي اطلع وماغسلتيهم اقسم بعزة الله

وجلآله إن تعافين هاليوم بطوله ( وقرع الباب في وجهها )

انقهرت .. وقفت على حيلها بإستسلام غريب عليها .. ولمت الملابس واحد

واحد وهي تستنشق الريحه اللي حابتها بقوه .. مثل ريحة فانيلته اللي مخبيتها

في الدالوب .. انقهرت من نفسها انها كيف تمشيها على هواها وحبت ريحته

اللي متعلقه في ملابسه










يوم الخميس \ الصباح

اليوم خروج فارس من المستشفى .. واليوم عرس محمد على موضي .. واليوم

بدت نور ( الجازي ) تتعود على وجود ضاحي معها .. ووصار لغة النظرات

ابلغ واصدق من كلام اللسان .. بل المشكله والمصيبه العظيمه لو غادرها

لثواني تقلب المستشفى صياح وصراخ .. وكأنه بشوفته تتطمن وتستقر

وماتخاف ابد





دخل البيت .. وشاف امه في وجهه – السلآم عليكم

منيره – وعليكم السلآم والرحمه

سعد – يمه خلاااااااااااااااااص تعبان حدي نعنبوه من عرس ,, ذبحني ابوي

شغال طلبات اول مره اعرف قدر فارس

منيره اللي تمشي بالدخون وتدخن البيت وبسعاده – الحمدالله اللي بتقر عيني

فيه واشوفه بيطلع اليوم العيد عندي عيدين عرس محمد وطلعة فارس

بالسلآمه

سعد وهو يوقف بطفش – بغى مايطلع اسبوع وهو في المستشفى عفن هناك

منيره وهي تحط الدخون – الضعيف طفش ونايف مستلعن فيه بغى مايظهره











بتقطيبة حواجب – خلاص فهمت اللي قلت لك عليه

هز راسه – ايه ايه فهمت اسبوع وانت تحفظني ماهب عرس هذه تقديم

على وظيفه

ضربه على راسه – قم بس قم الشرهه على اللي بيضبطك

بعد عنه وقال – اففففففففف راسي ذبحني شغال وانت تطبقه يمين ويسار

صارلي ارتجاج في المخ

نايف ضحك – لاتخاف مافيك غير العافيه

يوم شافه ضحك تشجع يسأله – احم احم ابي اسألك

فك الضحكه من وجهه وناظره – خير

جلس جنبه وقال – هالحين ليش مهتم اخذ هاذي بنت عمك وتزوجني إياها

وتباني ألعب على هلك واقول إني دكتور اشتغل معك

انقهر من سؤاله ,, ومن المستحيل يعلمه الحقيقه قال – لانها ضعيفه خواتها

اعرسن وهي من تقعد عنده طفشتني من يوم رجعت من لندن ماقدرت اروح

بيت اهلي وهي هناك

سياف بغباء – طيب ورى ماتزوجها انت

ناظره بقهر وتمنى يعطيه سطار يخليه يسكت

وقف وقال وهو معطيه ظهره – ماابي العرس من عقب جيسي طابت نفسي

منه












( انتظروني بإذنه تعالى يوم الأحد .. زواج محمد وموضي ومافيها من احداث شيقه )

مرحبتين كبار كبار


بسهووومه اللي قطعت قلوبنا ببعد البارتات عن بعضهم ههههه

وعبووقه اللي قلبي ملكها وروحي بعد



بارت مشوق للبارت الجاي



شيووووووخ حااااااامل. وبها لريحة صقيران لانها حامل وأكيد حملها هو بداية حبها لصقووور



موضي ومحمد متحمسه الانفجارات اللي بتصير الأحد

ساره وبتعلم احد قبل لا يجي يخطبها سياف يمكن صقر او فارس



ننتظركم الأحد على ناااااار نبي نعرف وش الاحداااااااث بسرعه لاتبطين سهوومه


وبصراحه اسلوب حياتش حلووووو احسها قريبه لشخصيتي بس أنا إنسانه بارده عشان كذا غير معتمد علي هههههههههه


ياجعل يمناكم ما تعرض على النار