بسم الله الرحمن الرحيم .. السلام عليكم ورحمة الله وبركاته
والحمدالله والصلاة والسلام على رسول الله ( صلوا عليه وسلموا)
كيف حآل جميع حبايب سهم المملكه في كل مكان .. يارب ان الجميع في تمام الصحه والعافيه يارب .. وهاذا المهم عندي
..
كنت أقول لأختي قبل أنزل هالبارت لكم .. إذا ماأعجبكم هالبارت
ماأستحق كلمة كاتبه أبدآ .. لان هالبارت هو أقرب بارت لقلبي ويمكن يكون أقرب لقلبي من من نهايته .. لاني وانا أكتب مشاعرهم .. عشت كل شخصيه .. وتخيلت كل قرار .. ولو انجبرت وانحطيت موقف أي واحد او وحده فيهم .. بيكون هذا
تصرفي .. وهاذي شخصيتي .. انا ياسهم المملكه
..
اللي يضحك في الموضوع كله .. التهاديد اللي وصلتني لو طلقت ساره من نايف .. ياربي والله صدمه .. ياسبحان الله يابني آدم
بالأمس الجميع قال زوجيهم وعذبيه .. وهالحين يوم تعذب ماتبونه
يطلقها غريب أمركم !! بس أوعدكم اني أخلي هالقرار صعب تعرفونه لين البارت الأخير واللي هو البارت القادم
وعلى ذكر البارت القادم .. ياربي والله انكم يامتابعيني صعبين المزاج حد يقول سهم تمطمط في الروايه .. وحد قال استعجلتي
فيها .. بس اوعدكم وأوعد نفسي قبل .. اني ماأنتهي منها إلا وانا
راضيه تقريبا عن 95 % منها على الأقل
..
وبالنسبه للصلاة على النبي أشكر كل اللي نبهوني .. بس انا تأكدت
بنفسي وللأسف الأخطاء لابد منها .. وأعتذر من الجميع .. وجل من لاينسى


..
رحم الله الامير نايف بن عبدالعزيز رحمة الابرار
اللهم اسكنه فسيح جناتك وتجاوز عنه
يارب اجبر مصابنا في أبوي نايف
يااارب اجبر مصابي في اسد السنه نايف بن عبدالعزيز
ياااارب اجبر مصابنا في والدنا نايف بن عبدالعزيز
( اللهم أجرنا في مصيبتنا وأخلف لنا خيرا منها يارب )
وعزائي لنفسي وللسعوديين وللسنه كافه .. انه ان مات نايف انولد
وموجود ألف من نايف .. وهاذا اللي نقدر نقوله
ولاتفرحون كثير يالروافض وياتوابع إيران .. ترانا صقور نايف








مع اطيب الأمنيات بقراءه ممتعه
.
سهم المملكه
.
لاإله إلا الله



( البارت الرابع والسبعـ 74 ـون .. ماقبل الأخير )




ابتسمت لها وحنا نازلين من الدرج .. وهي واضح الحيا والخجل

في عيونها .. شفت امي في الصاله

حسيت بقبضتها القويه على يدي .. اعرف ان امي ماستلطفتها كثير

واعرف ان امي ماهب راضية عن عرسي لها

وقفت وقلت لامي اللي ناظرت فيني وفيها – يمه

حسيت بنظرات امي المصدومه وقفت وقالت – متى طلعت الجازي

من المستشفى !!

ابتسمت لأمي وحسيت بخجل نور – سلامتس يمه طلعت قبل يومين

وامس كله قضيناه في الفندق ( وغمزت لها )

ابتسمت امي وقربت منها – الحمدالله على السلامه .. هاه يابنتي

ماتكلمتي وين كنتي ( سلموا على بعض .. وحبت نور راس امي )

ناظرت فيني كنها تذكرني في كلامها .. اللي قالته في حضني وهي

منهاره .. والمصاعب اللي مرت عليها .. عشان تقدر تحصل هالملف

ناظرت في امي وانا اصرف – وينهي جدتي ؟؟

جلست امي وكأنها عرفت انه مانبي نتكلم – والله جدتك فارس عندها

ومدري وش عندهم اظاهر إجتماع مغلق

على هالكلام طلع فارس وهو يضحك ومبسوط .. ويعضد جدتي

قربنا منها انا والجازي .. سلمت عليها .. وسلمت الجازي بسرعه

وبخوف بس اللي استغربته ان جدتي تسألها عن أخبارها وصحتها

انصدمت من جدتي بس ماعلقت

عقب ماقعدنا تحنحت – احم احم جده يمه

ألتفتن علي وناظرن فيني بترقب .. وفارس معهن

ناظرت في نور وإبتسمت – انا ونور قررنا نسوي عرس !!

اللي قهرني في الموضوع الحيوان فارس جلس يضحك .. وجدتي

وأمي لاتعليق !!

حسيت حد كب علي مويه يوم قالت – اجل مانتم بمعرسين ياضاحي

مطيت عيني وقلت – لالالالا لاتفهمين غلط .. بس بنسوي عرس

عائلي ماهب قصر وفخفخه

بس امي ردت الروح فيني يوم قالت – وليش مانسويه في قاعه

ونسويه عرس حريم على الأقل ونتجمع فيه ونستانس

حسيت بإبتسامة نور الخجوله

بس جدتي توها تتذكر – إلا تعال مرتك اسمها نور ولا الجازي

قربتها لي بدون خجل من فارس اللي يناظرنا ويبتسم – اسمها

نور وهاذي نور حياتي

الكل ضحك علينا .. وماشفت إلا عجة نور تركض لفوق

على هالكلام ضحكت جدتي وهي تقول – الله على عيالنا حريمهم

سالبين عقيالتهم.. ماشفتوا فار.........

انقطع كلامها من هز فارس وهو يضحك – سكي فمتس يابنت

خزام

ألتفتت له جدتي – ولا شرايك نحط عرسك مع ولد عمك ؟؟

ماشفنا الأ كراعين صقر متعلق في جدتي ويحبحب راسها

ويضحك – ايه تكفين جده تكفيييييييييييييييييييين












بركنت سيارتي .. وانا انزل منها .. لقيت باب البيت مفتوح ودخلت


مشيت وانا اعرف مكان مجلس الريجيل .. لاني للأسفماأعرف


رقم أي واحد من العيال .. تحنحت فتره من الوقت .. بس ماسمعت


لاصوت ولا حس .. سميت بالله ومشيت .. بس سمعت صوتصراخ


ووحده قبت في وجهي .. بدون برقع ولا ساتر يستروجهها


ولا شعرها .. رفعت عينها في عيني .. وانا مصدوم .. وهي اشهقت

بقوه .. وحاولت بسرعه تنحاش .. بس انا كنت الأسرع وانا ألملم

بعضي .. وبسرعه ادخل لمجلس الريجيل .. وقلبي يضرب طبول

من ربكة الموقف اللي صار لي .. والحقيقه ان قلبي ضرب طبول

لان عيني ماشافت حسن مثل حسنها .. جلست على الأرض وانا

أفكر .. من تكون معقوله تكون حرمه من حريم عيال ضاحي

لاني اعرف ان ماعنده بنات !!

دخلت وصفعت بالباب وراي بقوه .. وقلبي وصل بطني من الخوف

ويلي ويلاه هاذا من يكون .. صفعت نفسي كف .. كيف طلعت برى

وانا كذا بدون عبايه .. تذكرت وضحى اللي مغمى عليها .. صفعت

نفسي كف ثاني ودموعي نزلت .. وارتبكت ماعرفت اسوي شي

بسرعه شفت جلال طايح جنب المركى .. خذيته وتلملمت فيه

ورحت اركض ادور على أي احد .. ودموعي تنزل من الخوف

وضحى اللي طاحت في حضني ولا قدرت اسوي لها شي .. كل

اللي فهمته منها انها دخلت علي وهي دايخه .. فزعت لها .. واغمى

عليها في حضني .. فتحت الباب ودخلت الصاله وانا اصيح

وابكي – تكفووووووووووون احد يفزعلـــــــــــــــــــــــــــي

طلعت عمتي منيره من المطبخ وهي مصدومه – وش فيتس وش

صاير

رحت لها اركض ودموعي تصب وحالتي حاله وقمت ألكلك في

الكلام من الخوف – عع عمه ووو وضحححى مغ ممم مغمي ععليها

مطت عمتي عينها .. وافزعت تركض لبرى وتصرخ علي – نادي

صقر وشيخه اركضي بسرعه

رحت اركض لفوق وانا اللي كنت حالفه مااشوف هالقسم .. لدرجة

اني اركض وماأحاول أناظر اتجاه غرفته .. ضربت باب صقر وشيخه

بكل قوتي .. سمعت صوت شيخه وصقر .. وانفتح الباب وطلعولي

من ملابسهم حسيت اني قليلة ذوق .. شيخه لابسه قميص قصير

وصقر بسروال البجامه بدون تي شرت صرخت – ألحقوني

عيون شيخه طلعت .. وقامت تهزني – ليش وش صايرررر

دموعي نزلت من الخوف – وضحى وضحى مغمي عليها وضحى

مادريت إلا شيخه تركض وانا ماكملت كلامي .. وصقر يركض وراها

تذكرت الرجال .. وصفعت نفسي كف – والرجااااااااااااااااال عيب

بس ماشفت أحد عبرني .. بسرعه دخلت لغرفتهم .. خذيت اول

جلابيه قابلتني .. وجلال .. وركضت لتحت طايره

لقيت شيخه تبكي .. وصقر يحاول يخليها تطلع فوق تلبس .. وكاني

عارفه وش بيصير .. عطيتها ملابسها .. وطلعت .. شفت في وجهي

سعد وعمي ومحمد

ركضت للملحق .. وشفت وضحى جالسه وهي دايخه .. وعمتي

معها كاس المويه وتشربها .. دخلت علينا شيخه وعيونها طايره

وصقر عند الباب يتنحنحن .. يوم شفت وضحى جالسه وتشرب

مويه ركضت لها وضميتها وقعدت ابكي .. لو بس انا وهي يويلي

كيف ابتصرف .. اخاف من هالمواقف

فجأه عمي دخل علينا وواضح فيه الخوف – وش فيها وضحى

طمنته عمتي – لالا تطمن هالحين بخير

جلس جنب وضحى اللي واضح انه غلاها غير عنا – علامتس يابنتي

تانسين شي .. فيتس شي

حست وضحى بخوف عمي – لالا ياعمي الحمدالله بخير .. بس

اظاهر اني دخت وطحت على هالمهبوله ( وتأشر علي ) اللي

ماصدقت خبر وروعتكم

سكت .. بس شيخه قربت منها – وهالحين تبين اوديتس انا وصقر

المستشفى

سمعنا صوت صقر من بعيد – وضحى وانا اختس يالله اجهزي

بنوديتس للمستشفى

قالت وضحى بفشيله – لالا اسمحلي ياصقر .. بس هبط دمي ودخت

شيخه تقيس حرارتها بخوف .. وكأن عليها حراره – متأكده

وضحى وهي توخر يدها عن راسها – ايه ايه شيخه متأكده

وقف عمي وهو يقول – الحمدالله .. بروح للرجال هناك في

المجلس

سألت عمتي وانا قلبي يرقص من الموقف اللي صار لي معه – من

جاينا حزة الغداء

قال عمي – طلال ولد مبارك .. ولد حصة عمة سلطان من الدمام

ياخال ابوي حك ظهري .. مافهمت وش يصير لسلطان ..

قلت لعمي – عمي اسأله عن سلطان ونوره .. نوره من راحت

ماكلمتنا

ناظرتني شيخه – لا كلمتني انا

جلست جنبها وصرت اسألها عنها .. وعمي طلع وتركنا .. بعد كذا

الحمدالله اطمنا على وضحى .. اللي شوي شوي صارت تسولف معنا

وتتجاوب .. ورحت ورى عمتي نجهز الغداء للرجال الغريب















فتحت الباب وشفتها جالسه مع عيالها .. ناظرت فيني وكانت

منصدمه بحضوري .. وعيالها وقفوا يسلمون علي واحد واحد

جلست وهي تحاول تتحاشني .. وقفت وناظرت فيها – وين رايحه

قابلني صمتها اللي قهرني .. وطلعت تاركتني مع العيال .. شفتهم

يرسمون وقربت منهم وطنشتها .. ماأكذب اني حنيت لها ولإيامي

معها .. بس حضور عيسى بينا في كل سالفه تقهر .. واللي قهرني

الرساله اللي شفتها معها .. ناظرت في عياله وعيالها .. نتاج حبهم

لبعض .. بس ماحسيت غير بالحنان يمهم .. آآآآآآآه ياخالد وانا ابوك

موتك كسرني .. ياليتك عاد شفت مني القبول .. غير الضرب والقهر

وانا ابوك .. رحت ومادريت اني مهما قسيت عليك .. تظل ولدي قطعة

مني .. وتحمل اسمي .. حسيت بالباب انفتح .. وطلت

علي ام عيون عسليه وواضح في عيونها القهر .. اعرف انها تغار

اني معطي عيال موضي اهتمام وهي لا .. بس ماتدري اني دخلت

غرفتها ولقيتها نايمه .. اظاهر حست فيني وانا ابوسها .. وصحت

عقب ماطلعت .. ابتسمت لها ووقفت وقربت لها .. حبيتها

قالت لي – متى جيت !!

ابتسمت لها – قبل شوي .. مشيتها معي وجلستها مع زايد ونواف

حسيتهم استانسوا فيها .. بس هي مازالت مكشره .. مدري ليش

لين هالحين مااندمجت معهم او بالأصح تكرهم .. تذكرت وانا اجلس

مع نفسي جلسة صراحه .. ان البنت تحتاج مني الحنان والرعايه

اللي فقدتها مني .. وماشفت مني غير القسوه والصد والكره

بس إن شاءالله وانا ابوتس شوي شوي وابخليتس تعدينهم اخوانتس

وتندمجين معهم وبحاول في هالأمر واسعى له .. لاني فكرت اني

معاد بجايب ضنا وربي بيحرمني منهم .. بس ( وناظرت فيهم )

هاللي حساب يتمان .. بربيهم واحسن فيهم

تركتهم وطلعت .. واللي قهرني خروج خلود طالعه لغرفتها

سألتها – وين رايحه

قالت تصرف – بروح اغير ملابسي واروح لجدتي تحت

هالبنت بتجنني ماتبي تحتك فيهم .. فتحت الغرفه .. وشفت موضي

جالسه تمشط شعرها .. جلست وراها بالضبط على السرير

وقلت – وش صار في غيابي ( وكنت اقصد سالفة هالرساله )

اللي قررت اني ياأنا ياهالعيسى في حياتها .. انا ماأبي اتعذب واشوفه

محتل تفكيرها .. او مخبى في ذكرياتها

تركت المشط وألتفتت علي – اعرف وش تقصد محمد .. ويقهرني

تفكيرك الوسخ عني .. ( حسيت دمعتها بتنزل ) لاني لو شكيت واحد

في المائه اني ماني ناسيه عيسى قبل أتزوجك ماتزوجتك .. عيسى

يعني في حياتي انه ابو عيالي فقط لاغير .. وانت ولد عمي وزوجي

وسكتت فتره ( كنت احتريها تقول وحبيبي .. بس اظاهر مخي

رومانسي شوي )

قلت لها استعجلها – وايش

صدت للمرايه – قلت لك زوجي وابوي عيالي

ناظرت فيها – وبس

ألتفتت علي وواضح الزعل في عيونها – وبس













بعد مرور اسبوعين

اليوم موعد خروجه من المستشفى .. وبكره موعد طلاقي منه في

المحكمه .. اما يطلقني ولا الخلع أخر حل .. لاني ماأبي الفضايح في

عائلتنا .. وبكل صراحه عمي اللي هامني في هالموضوع أكثر شي

استغربت موافقته وهدؤه .. توقعت انه ماهب مطلقني غير عقب

مشاكل وشيل وحط .. بس شكل الضربه اللي جته وكسرته

فادت شوي .. حتى رجلينه اللي ضغط عليها يوم نزعوا الغذايه

واللي استغربت انه مكسر وواقف عليها .. زاد عليه الوجع عقب

مارحت من عنده .. وهاذا سبب تأخيره في الخروج من المستشفى

ومادري ليش يخالجني شعور اني تمنيت موته .. بس لما أشوف

يدين أمه طول هالأسبوعين اللي راحت وهي تدعي ربي يخرجه

بالسلامه استغفر لعيونها .. هالمرأه الطيبه الحنونه .. اللي

في صفاتها تشبه حنان أمي اللي ماأنساه

دخلت علي هند اللي انخطبت لفارس .. ومن عقب خطبتهم اشوف

النظرات العاشقه في عيونهم .. كنت الوحيده اللي أدري عن

هالنظرات اللي متأكده انها برئيه وتشع منها حب وحنان لبعضهم

ولا ماخليت هند تغلط غلطتي

ضربتني على كتفي – وين رحتي .. كلهم ينشدون عنتس

ناظرت فيها – وليش إن شاءالله أكون معكم .. أستقبل حضرته

ولا أعزف له سلام وطني

انقهرت يوم ضحكت – والله انتس نكته

كشرت في وجهها – ليتس عند جدتي ريحتينا منتس

ابتسمت – تصدقين عاد قمت اليوم احسب اني عندها

لوما وجود نور هناك ماأطمنت عليها .. بس والنعم فيها قالت

بتنام عندها لين موعد العرس .. ولا تشوفين ضاحي منهبل هناك

ابتسمت بسعاده للجازي او نور .. لين هالحين ماتعودت على نطق

نور اللي أحلى وأكشخ من اسم الجازي .. تستاهل كنت حابتها هي

الشخصيه الوحيده اللي حسيتها تشبهني في طيبها وخجلها

قلت لهند – الله يسعدهم ويوفقهم .. تستاهل نور من يتعنى لها

ولد عمتس متصرقع عليها

فجأه ضحكت هند وقالتت – على طاري ولد العم .. فهيدان يقولون

بيجي مع نايف .. يقولون والعهده على الراوي أمه ام السعف والليف

انه مقدم على شركه كبيره وبيوظفونه .. هالله وهالشهاده ثانوي

ياحسره

ضحكت انا وإياها .. هند ماتجوز من تعاليقها – طيب وضحى درت

قالت بحماس – وضحى تقول لين يسوي بيت ولا يشتري ذيك

الساعه علموني في أخباره

قلت لها – وعمليتها

كنها تذكرت شي مهم – عمليتها وافق عمي سعد يتكفل فيها

بس هي رفضت .. الفلوس تطلع من مخبى فهيد

قلت بحماس - عافيه عليتس يابنت ناصر .. بيض الله وجهتس

ضحكت هند – طلعت قويه اختس ماهب هينه

انبسطت لتغيرها .. تستاهل وضحى .. خلنا نشوف وش بيسوي

لها ولد أمه على قولة وضحى














في الليل \ بيت ضاحي

الجميع ملتم بمناسبة خروج نايف من المستشفى .. ونايف

اللي كان جالس في الصاله وساكت وعيونه تأكلها أكل

لانهم مسوين عزيمه استثنائيه .. والجميع ملتم .. وساره اللي

كانت رافضه اغصبوها شيخه ووضحى تحضر .. لانها يجب انها

تعامله ولد عم .. بما انه بكره بيطلقون .. ومابيصير بينهم إلا رابط

العمومه .. والسكن اللي رفضن البنات يغيرنه .. لان هند بتتزوج

وبتسكن هنا هي وشيخه .. بينما وضحى متأكدين ان فهيد تغير

وقريب بترجع لبيتها .. ونوره في الدمام .. مابيبقى إلا ساره اللي

صعبه تطلع وتعيش بعيد عنهن .. لكن قرار في صدر ساره

مخبيته بتقوله لعمها في أخر السهره .. وماتبي تكدره

قالت منيره اللي مبسوطه بجمعتهم – ماناقصنا إلا عمتي اللي

يطلق حدادها بخير وسلامه

الجميع قال – آمين

غمزت لها ابيها تبعد عنها .. وانا طول الوقت احتري الفرصه اللي

اجي جنبها واهمس لها .. وأشم عطرها .. وأذوب في عيونها النجلاء

وآخيرا فهمت علي وانا طول السهره ألمح لها .. قمت من مكاني

وجلست جنبها .. حسيت الجميع منصدم بس ماأحد علق .. والغريب

انها حتى هي ماعلقت

قلت لها – لين هالحين مارضيتي علي

هزت راسها بالرفض بدلع – لاااا

حسيت كنها صبت علي ماء بارد – ومتى بترضين ؟؟

قالت لي بنبره استفزازيه – انت تعرف شروطي كلها .. تراك

ماطبقت إلا واحد بس منها

ناظرت في أمي – امي معاد تتحكم فيني .. بس ترى امي اللي تطلب

اطيح في النار بطيح .. بس اوعدك مشاكلنا بتكون بعيده عنها

اثلجت صدري وهي تقول – على عينك وعلى راسك .. امك ولها

حق عليك .. بس ترى مالها حق علي إلا انها أمك بس وجدة اللي

في بطني .. وانت تعرف أخلاقي وأطباعي .. وانت وأمك ماقصرتوا

علي

سكت فتره وانا أشوف الجميع يغرق في مواضيع بعيده عنا .. وكأنهم

يتركون لي المجال أخذ راحتي معها

مسكت يدها وهي قالت بعصبيه – ابعد وش اللي تسويه ابعد

لاتفضحني

قلت بنبرة كسر وحاجه – حني علي .. والله ماعمر عيني غفت

إلا يرادوني خيالتس وعيونتس ياوضحى .. وحتى في نومي

ماتهنيت في رقادي ولا نومي

قالت لي وهي تبعد يدها – مشكلتك ماهب مشكلتي

انقهرت منها – المشكله اظاهر ان بعدي عنتس عاجبتس

بس قريب ياوضحى بتكونين في يديني واعلمتس وش معنى

اللي سويتيه لي

قالت لي بعصبيه ومافهمت قصدي – بعد تهدد .. ترى الجميع

موجود وأقدر أطلب ورقتي

انقهرت منها – ياذا الورقه اللي جعلها للشق ناشبتلي فيها

لاعرفتي وش أقصد أهرجي ( وقمت معصب وعيوني تقدح شر )

قالت منيره – وين رايح يافهيد

حسيت بالفشيله .. الكل شك اني زعلت منها – هنا قريب بسوي

اتصال وبرجع لكم

وطلعت من البيت وانا مطنقر ... هين وضيح مردتس لي وين

بتروحين .. ماكفاتس اني أقوم من عز نومي الساعه سبع عشان

أروح لذا الدوام اللي نشب في حلقي .. هاذا ومدير الشركه صديق

ابوي لو ماهب صديق ابوي وش بيصير فيني .. صدق غثا

راقبت بطرف عيني .. نظرات الغزل في عيون العاشقين الجدد

ابتسمت من نظراتهم اللي فاضحتهم .. وحسيت بالوناسه لهند

تستاهل أكثر .. وفارس هو اللي يستاهلها .. الله يوفقهم

وقفت وأنا أهمس لعمتي منيره – بشوف وش صار على العشاء

خلتس جالسه ولاتتعبين عمرتس

ابتسمت لي – الله يعطيتس العافيه يايمه

طلعت للمطبخ .. وشفت الخدمات يحضرون كل شي .. كل شي

مشاءالله مجهز ومحضر .. بس ينتظرون إشاره من الطباخ اللي

يعلن عن انتهاء المندي .. وآآآآآآآآه يالمندي .. يمكن هاذا اقوى شي

شجعني أحضر هالعزيمه اللي حسيت بالملل فيها .. حسيت بطني

يصفر من الجوع .. قربت من عند الخدامه اللي تقطع السلطه

خذيت لي قطعة خياره .. تصبيره لين وقت العشا .. بس ماأمداني

أقضمها .. إلا انصدم فيه واقف عند الباب .. من الخوف خيارتي

طاحت في الأرض














شفته وهو واقف بيروح يتبعها .. حسيت بالقهر لها .. وقفت

بس صقر مسك يدي – وين رايحه

قلت له بقهر – شفت أخوك لاحقها

جلسني بعصبيه – مالتس دخل .. خليهم يمكن يتفاهمون ونخلص

من سالفة الطلاق اللي موترة أبوي .. وهمه يطفح من عيونه

ان مارحمتي نايف وهو هايم في ساره .. ارحمي أبوي وأمي اللي

متعذبين بصمت من اللي يصير

سكت وجلست .. وانا ماني مقتنعة في جلستي وسكوتي .. بس

حكم القوي على الضعيف .. (( تصدقون ))












جالس بينهم ولا كأني جالس .. مقهور منها وهي تقول ببرودة

أعصاب مثل الثلج – ماني برايحه معك بجلس عند جدتي

جيت ابسحبها بس وقفة جدتي بينا وهي تحول بيني وبينها .. كسرت

مجاديفي .. بكل صراحه مقهور منها .. ليتني بس ماقضيت ذيك الليله

معها في الفندق .. صدق انه قهر

ولا هالحين من وين طالعه لي بهالمنكر .. ليتني ماطلعت فكرة

هالعرس .. كله من تحت راسي .. ولا من صدقها بحتريها أربع

شهور .. أربع شهور .. رفعت اصابعي الأربع وناظرت فيها

بقهر .. بس ضربة سعد في كتفي .. طلعتني من واقعي المرير

وهو يضحك – وش فيك ترز اصابيعك الأربع !!

استحيت على وجهي وسكت .. ولا ناري ياناس من يقدر يطفيها

آآآآآآآآآآآخ يالقهر بس














شفتها جامده ويالله تتنفس .. وصدرها يهبط وينزل بقوه .. حشى

كنها شايفه وحش ماهب شايفتني .. وقفت عند وجهها – إذا

تبين الطلاق ترى انا لي شروطي

حسيت عيونها انمطت بقوه وواضح انها عصبت – وانا لمتى

عبده مأموره تحت رجلك .. وش هالشروط اللي حطيتها في أول

الزواج .. وتبي تحطها في الطلاق

يوم قالت الطلاق كنها صافعتني كف قوي قلت لها ببرود – إذا

تبين تسمعينها تعاليلي في المقلط .. انا جالس هناك

مشيت وأنا ماني متأكد بتلحقني ولا لا .. وفي قرارة نفسي متأكد

انها ماهب جايه .. هاذي حازمه أمرها ومنتهيه منه .. تبيني أطلقها

وغصب عني بعد















رفعت النعمه عن الأرض بعصبيه .. والخدم يناظروني .. مت

قهر من إسلوبه الخايس زي وجهه .. وقلدت صوته بدون

ماأدري عن نفسي – إذا تبين تسمعينها تراني في المقلط

قلتها بنبره تضحك .. خلت كل الخدم اللي خافوا علي وأنا

أشوفه .. وشكلي وموقفي .. والخياره اللي طاحت من يدي

يضحكون بقوه .. ألتفت عليهم بعصبيه .. ويوم شافوا وجهي

سكتن بخوف .. وعيونهن مليانه ضحك .. فجأه ضحكت معهم

وهالضحك عارفه نفسي ناتج عن توتري وأعصابي المشدوده

ضحكت لين دمعت عيوني .. لدرجة ان المقلط اللي قريب من

المطبخ ينسمع فيه كل شي .. خلت نويفان يجينا وهو معصب

ومقهور من ضحكي انا والخدمات

ناظر فيني وفيهن وعيونه تقدح شر – خيــــــــــــــــــــــر إن شاءالله

حاولت اسكت بس ماقدرت .. لين الجميع سكت .. وانا أضحك

بقوه .. حسيت انهم خافوا علي من ضحكي المتواصل .. حتى هو

قرب مني وأنا أضحك أضحك أضحك بجنون .. قربت مني الخدامه

بكوب المويه ومدتها علي .. حذفتها من يدها وضربت الجدار

وتكسرت إلى قطع .. وبديت أبكي وأقول كلام مستحيل يفهمونه

انا تعبانه تعبانه وبقوه .. طول الفتره اللي راحت وانا على أعصابي

مستحيل أحد يفهم شعوري .. أحس اني عجوز في جسد أنثى

أحس ان الشيب ملأ راسي .. وأحس ان طول خروجي من الدوادمي

لين هالحين وخواتي اللي أرتاحن في حياتهن .. وأنا أكثر وحده

كنت أبي أطلع من الدوادمي .. وياليتني ماطلعت .. حسيت بحضن

وحده من الخدمات .. حطيت راسي عليها ماأهتميت .. جلست

أبكي وأتذكر المره اللي راحت فيها نوره وشيخه مع ابو سعد وأم سعد

[FONT="Times New Roman"][SIZE="5"]ويوم رجعن وكنت أهاوش ومقهوره انهم شافوا الرياض

المدينه اللي ياما سمعت عنها ولا شفتها .. المدينه اللي من قصصها

تمنيت أسكن فيها ولا أشوفها .. لاني عارفه اني مستحيل أسكن

فيها .. لانها مثل الحلم الصعب .. وهالحين اتفأجا ان جميع خواتي

اللي كانت الرياض مو مهمه عندهم .. وماتعني لهم شي رفضن

يطلعن منها .. وانا الوحيده اللي بهرب من واقعي بعيد عنها

الرياض اللي شفت فيها أوجاعي .. اللي من وطت رجلي فيها

ولقاي المر فيه .. والليله اللي ماأنساها طول ماراسي يشم الهواء

والحياه التعيسه .. والأيام المريره .. والبكا .. والحزن .. والترجي

بأنه يستر فضيحتي ويتزوجني .. والليله المره اللي فضحت

نفسي فيها قدام خواتي وأبوه وأمه وأخوه .. الليله اللي ماراح

تنمحي أبد من ذاكرتي .. شروطه المره والقاسيه وهو يضعها

ويمليها علي .. ضربه لي في أول ليلة زواج .. وموقف الحريم

كبار السن .. ونظرات المقارنه بيني وبين حياة ريم وسعد

حسيت وانا أتذكر كل اللي أتذكره اني أتعس مخلوقه على وجهه

الأرض .. مسحت على راسي الخدامه وهمست لي – خلاص بس

رفعت وجهي بصدمه .. عشان اتفأجا فيه هو اللي ضامني .. هو

اللي محتضني .. هو اللي راسي على كتفه .. هو اللي يطبطب علي

ويحاول يهديني .. هو هو هو ماغيره

دزيته عني .. بس هو مقبض أحكامه علي بقوه .. قمت اضربه

مع صدره بقوه واصيح وأبكي – ابعد ابعد ابعد ابعد ابعد ابعد ابعد











( إنتظروني بإذنه تعالى .. في الجزء الأخير يوم الأثنين القادم .. من رواية لاصد قلبي

صد من دون رجعه )

...
اتمنى من كل قلبي اني اقنعت الجميع اني ماأستعجلت في الروايه

واني خدمت الروايه فقط لأكثر .. لان كثرة الطول في الروايه

يملل المتابعين .. بس أوعدكم بالمزيد في البارت القادم .. وان

كل شي بيسعدكم وهاذا الأهم عندي [/FON[/SIZE]T]