بسم الله الرحمن الرحيم .. السلام عليكم ورحمة الله وبركاته
والصلاة والسلام على أشرف خلق الله محمد صلى الله عليه وسلم ( صلوا عليه )
..
ياحبيباتي يالغاليات يوم اقول انتظروني الإثنين او الخميس او او .. تراني ماحددت
وقت وفتح المجال لنفسي انزله في الوقت اللي أكون فيه فاضيه
والحمدالله لقيت لي فضوه في هالساعه .. وإن شاءالله ان البارت لهاليوم يعجبكم
مع اني استبعد هالشي عند البعض .. والشظايا والحروب والإحتجات بتقوم قيامتها
بس انا عند وعدي حال بنات ناصر بيتغير وهاذا المهم صحححححح
..
سامحوني على القفله القويه بس مضطرين نوقف عندها .. وبنتحمس للبارت الجاي
الإجرام في القفلات يجري في دمي
..
نجي لإسئلة حبايبي الله يعطيهم الصحه والعافيه
العضو الغاليه ( شكيت صمتك ) سألتني عن دراسة البنات واغلبكم فهم هم في اي
مراحل .. نوره في الجامعه .. هند وساره في الثانوي .. وشيخه ووضحى وقفت دراستهن من الإبتدائيه مثل حال اغلب بنات المحافظات المجاوره
ايضا في المنتدى المجاور .. وحده أمنت حبيبتي عبوقه عند موعد انتهاء الروايه
بس مدامنا متعمقين في الإحداث ونمشي ببطى ترى يبي لها وقت لين تنتهي .. بس
قريب وهاذا اللي أقدر اقوله

هذه رساله من سهومه لكم ياآآآآآآآآل ليلاس

مرحبا بآل ليلاس المبدعين .. رجعت لكم وقلبي مليان بشوق وحنين احمله لمنتداكم واهله الكرام

كنت ومازلت ارى ان المنتدى الذي ابصر النور لي لرؤية عبق اقلام كتباكم المبدعين .. وانتقاد

اعضاءه الطيبين .. وعمق رؤيتهم .. لازلت لاصدق وانا ارى ان اسمي احتضن مع اسماء كتاب

مبدعين وعرف عند هاذا المنتدى الرائع

ليلاس واعضاءه والجميع شكرن لكم من اعماق قلبي اقولها .. على حسن صبركم معي

واتمنى ان تحوز هذه الروايه على إعجابكم .. وكلامكم الكبير في حقي يعطيني دافع اني اواصل

نحو الإفضل

واشكر من كل قلبي عبق الرياحين .. واتمنى لها ولكم السعاده الدائمه

واعذروني وددت ان اكون بينكم لكن المنتدى معلق معي

مع اطيب الإمنيات بقراءه ممتعه
.
سهم المملكه
.
لإله إلا الله




( البارت الثامن والخمســــــــ 58 ـون )



الدمام

احس اني جالسه ومخنوقه .. فيني ملل ذابحني .. اففففففففف

قلتها وانا انسدح على ظهري في السرير .. حاولت ارقد بس

مافيني نوم سمعت صوت بطني .. الجوع ذابحني

حسيت دمعتي بتنزل بس قويت نفسي .. حاولت اوقف ادور حل

بس حسيت بدوخه في راسي .. رجعت انسدح وماسكه راسي بقوه

مدري كم مر من الوقت وهو يحط أكياس في الصاله .. من جوعي

دعيت ربي انه يكون غداء .. لاني شارفت على النهايه

ماسمعت له صوت .. اظاهر انه ذلف .. هالمره وقفت بقوه

وماسكه راسي .. وشعري متناثر على كتوفي بدون ترتيب

شفت الباب فاتح وفيه أكل على الطاوله .. بسرعه مشيت

للطاوله .. اناظر اللي داخلها .. اممممممممم احس الريحه

اخترقت خشمي .. اظاهر انه مندي .. نعنبو وجهه قلت

هالشي يوم ماشفت الإكل إلا لنفر واحد .. فكرت معقوله

يكون لي وهو زرط في المطعم .. سمعت باب جناحه يوم سكره

بسرعه ابتعدت عن الإكياس .. وشفت لي مجله على الطاوله

عند الكنبه .. اخذتها واتصفحها .. وانا مدري وش فيها .. اهم

شي يقول هالغداء لتس ويذلف عشان أكل براحتي

انفتح الباب .. حسيته دخل لانه سكر الباب .. بس ماألتفت عليه

ابد .. وكنت منزله راسي اناظر الحروف .. وأكذب ان قلت فاهمه

كلمه وحده

بنبره كريهه – اللي يشوفتس يقول ميته من الثقافه

ألتفت ناظرته وانا أبغض وجهه .. صديت ودخلت الغرفه

ياليت لها باب كان اقفله في وجهه يوم لحقني – يعني بتسوين

ماشفتي الغداء وتبين عزيمه

ناظرت فيه – اطلع برى

مط عيونه منصدم من كلامي .. بس مدري ليش طلع وهو ساكت

معقوله بيأخذ الغداء وأموت بجوعي .. بسرعه طلعت وراه

وفعلا مثل ماتوقعت – اذلففففففففففففففف اكررررررررهك

أخذ غداءه وقال – موتي بجوعتس الشرهه على اللي متذكرتس

ولا انتي وحده بايعه نفسها ( وقال كلمه ذبحتني ) فتاة هواء

وطلع مسكر الباب بقوه .. مطيت عيوني .. وواقفه ربع ساعه

استوعب الكلمه اللي قالها .. احس اني بنهاااااااااااااااار

مطيت شعري بيديني .. وبكيت بأعلى صوتي .. وكل شوي كلمته

تنعاد علي ( فتاة هواء .. فتاااااة هواء ... فتـــــــــــــــــــــاة هواء)

كسرت كل شي حولي .. انهرت بقوه .. ماني مصدقه اني وصلت

في عينه لهالمستوى .. كنت اقول انه يكرهني .. انه اغتصبني

انه مايحب يشوف وجهي عشان مايتذكر اللي سواه .. بس يوصل

انه يقول هالكلمه اللي تنهيني .. ويتهمني فيها اني اللي استغليته

بإبشع صوره .. واني بنت ماتربت .. وبايعه نفسي للهواء هالشي

هو اللي دمرني

حسيت ان يدي تنزف .. بس نزف يدي يهون مع نزف قلبي

بذلت مجهود .. راسي احس انه يتهاوى .. والرؤيه قدامي صارت

ضبابيه .. ماني قادره أميز أي شي حولي .. اخر عهدي بنفسي

لما سقطت وتحتي كومة زجاج من زجاج المزهريه







البر

حطيت الغداء .. وسكت لين تغدى الجميع .. غسلت يديني

عقب ماأكلت .. وحزمت أمري اني انفذ اللي خططت عليه

مشيت متجهه له له هـــــــــــــــــــــو

شفته يغسل وماحوله غير فارس يصب الماء على يدينه

وقفت في وجهه عقب ماخلص – يابن قاسي

حسيت اني شديته بكلامي ناظرني – انتي وش جايبتس هنا

مشيت لين قربت عنده – طلقني من صقر

مط عينه .. وفارس شهق

كل شوي رقبتي تلتفت .. همزتني هند – وضحى وش فيتس

لفيت لها وأنا ابلع ريقي همست لها – قومي تعالي معي

قالت وهي تناظر نوره – انادي نوره

هزيت راسي بلا – لالا امشي نوره لاهيه مع موضي اتركيهن

طلعت مع هند وقلبي مستهم على شيخه .. خوفتني خطتها اللي

قالتها .. ياخوفي يخيب ظنها ويطلقها صقر .. يويلي لنروح فيها

ضربتني هند – هييييييه جايبتني لخيمة المطبخ عشان تسرحين

قلت لها وودي اسمع وش بيقولون – امشي بنتمشى

مشت قبلي – يالله امشي انا بعد ودي اتمشى

طلعنا ومشيت فيها لجهة الريجيل .. وياليتنا مامشينا ولا سمعنا






في روما

مديت عليها الورده وانا اضحك .. اخذتها وأحذفتها على وجهي

وهي معصبه – اذلف عن وجهي

ماقدرت وانفجرت ضحك .. ناظرت فيني بعصبيه وبكت

يوم بكت ناظرتها بحزن .. وقربت منها – اها وراتس تبكين

بكت بقوه و حطت يدينها على وجهها – انا ماابي احمل ماابي

حسيت بخوفها – ريم حبيبتي

قاطعتني بشهاقها – ابي أكمل الجامعه ( طاحت علي ) ماابي

سعد ماابي

بديت اهديها وبنفس الوقت معصب من اللي تسويه – يعني

بتعترضين على كتبة ربي .. اللي مثلتس تستانس انها حملت

مافيها شي .. هاذي هديه من ربي ترفضينها

رفعت راسها وناظرت فيني – تونا بدري .. سعد انا خايفه

كنت متوقع وهالشي هو اللي مسكتني عن اللي تسويه – مو اول

ناس ولااخر ناس تحملين بهالسرعه شي طبيعي ياحبيبتي

رجعت راسها لحضني وبدت تشهق – خايفه أموت

ورجعت لموشحتها ودموعها .. وظليت طول اليوم اراضيها

وادلعها .. واحاول اخليها تتقبل اللي صار بسرعه .. صحيح

مصدومين انها حملت بهالسرعه .. بس كتبة الله بعد وش نسوي







البر

وقفت في وجهه وهو مصدوم .. وعلى صوته طلع الباقيين

فهيد بعصبيه – معاد بقى إلا هي يمال الماحي .. ابتس ماتستحين

خامة خميمتس وتقولين يطلقني .. اذلفــــــــي اذلفــــــــــي ماعندنا

بنـــــــــــــات يتطلقن اذلفــــــــــــــــــــي

قلت بتحدي – وانا ماأرضاها يعرس علي ياأنا ياهي

حسيت ملامح وجهه توقفت في اللحظه اللي قلت كلامي .. بس

مكفاه وصرخ – بلاه منتس الرجال عايفتس لسانتس اطول منتس

يابنت نويصر .. هذا ان كنتي بنته بعــــــــــــــــــد

سمعنا صرخة وضحى – لاااااااااااااااااااااااااااااااااا

ألتفت إلا أشوف خواتي واقفات .. هند ووضحى .. ياليتهن ماجن

ياليتهن ماسمعن اللي سمعته

صرخت وضحى بقهر – والله مانت برجال ياشيبة إبليس

انصدم وطلع نعاله وحذفها ابها .. شفت فهيد فزع لها

ووقف وخلاها في ظهره وقال – جــــــــــــــــدي بــــــــــــس

صرخ عليه وهو يسب ويشطن – تجددت حظايرك يالخايس يالمرمه

ياللي مره تدبرك ترفع حسها علي وتسكت عنها

دمي يغلي .. وحسيت الهواء ضاق في صدري

ناظرت في اللي ينقال لهم عمامي .. عيونهم مكسوره

الكلمه الأولى والإخيره لإبوهم

ناظرت فيهم وقلت – ياحسافة انكم تنعدون عماني

انكسرت عين عمي ابو محمد ودخل وهو ماسك قلبه .. اما

عمي ابو فهيد نادى ولده – فهيد امش جدك بيتفاهم معهن

مالك دخل

يعني وش هو .. شاكين في نسبنا .. ليش ساكتين في قذف

ابوهم لنا

ناظرت في الشايب جعله للنار – انت ماتخاف الله .. ماتذل

من ربي .. عجوز مكسح ماوراك غير القبر تتهم ابوي وتشكك

في نسبنا

ناظرني وهو معقد حواجبه المشيبه – ابوتس اخذله صلبيه

ماهب منا وش درانا بطهارتها .. من يضمن لي انتسن بناته

يويلي بحترق في مكاني حد يفزعلي صرخت عليه – والله

ان اشكيك في المحكمه تقذفنا وتتهم نسبنا الله لايسامحك

ولايبيحك .. جعلك للنااااااااااااااااااااار

حسيت بهند بكت وراحت .. ووضحى لحقتها .. هالإنسان

مستحيل اسامحه لو يموت

سمعت فارس – شيخه ماعليتس فيه شايب مخرف

يوم قال مخرف ألتفت عليه .. وضربه على ظهره بقوه بالعصى

انحاش فارس وهو يقول – اتق الله ياجدي

حسيت بناري قايده .. ليتني مافكرت في اللي فكرت فيه

قلعته يأخذ مليون عساه مايذوق طعم السعاده

وجعل جده لعلل الدنيا توريني إياها فيه .. عطيته ظهري

وانا اغلي كلامه قوي .. حسبي الله ونعم الوكيل .. رجعت

للمخيم .. وشفت خواتي في المطبخ

وضحى وهند ونوره جالسات يبكن .. مشكلة خواتي

عاطفيات أي كلمه يسمعنها صدقنها .. اظاهر انهن صدقن

انّا ماحنا ابنات ناصر صرخت عليهن – اظاهر صدقتن

كلام شيبة إبليس

وضحى وتمسح دموعها – الله لايبيحه يااااااااااااارب

نوره – سلطان دق يبينا نرجع ,, بنات ماأبي هالناس اكرهم

فيه حد يقذف ولده ويشكك في نسب بناته

جلست وانا وجهي محمر من القهر – يخرف لين يقول بس

والله ان اطلع حقي من عيونهم وتشوفن وش بسوي فيه

ناظرني خواتي وقالت وضحى – دخيلتس ياشيخه معاد نبي

مشاكل .. يكفينا اللي سمعناه من هالشيبه

هه توه مشاف شي .. بس اتمنى ارجع للرياض .. واكبر كبير

يوقف بوجهي على اللي بسويه

كتمناغيظنا طول اليوم .. فهيد نادى وضحى ورجع إبها

اظاهر انه خايف عليها .. الله يجمعهم على خير

حسيت بالملل .. شفت محمد خذى موضي وعيالها وبنته

يتمشون في النفود .. وهند رقدت من البكى

اما انا خذيت جلالي ورحت فوق راس عرقوب .. جلست

فيه شوي والذكرى تأخذني لمواقف حصلت لي مع ابوي وامي

ابوي اطيب واحن إنسان عرفته .. قلبه كبيرررررررررر

ومايخاف غير من اللي خلقه .. عكس إخوانه

تذكرت حبه لإمي اللي عمره مخف او هزه شي .. كانت علاقتهم

قويه .. امي طيبه بس اكرهه ضعفها .. ضعيفه بالحيل

حسيت دموعي تجمعت في عيوني .. وانا اتخيلهم واقفين عندي

ويؤاسني .. صقر باعني برخص التراب .. وجده قذفنا في

عرضنا وقذف امي الله لايسامحه يااااااااااااااارب

كنت دائم اشوف اني المسؤوله عن اللي يصير في خواتي

على اني كل ماتذكرت اللي صار فيني .. المفروض هالشي

يضعفني بس قويت .. كلام ابوي وبثه القوه داخلي

حسسني اني مانطوي لضعفي ابد .. لاتوصي ياابوي بنتك

حافظة الوصاه .. انا اللي بوقف بوجهه كل من تحدانا






في الليل

حسيت اني بايخ باللي سويته .. كنت متأكد انها بتطلب خدمة

الروم سيرفس .. سألت الرسبشن ان كان احد في الجناح اللي

ذكرته طلب طلب .. بس قالوا محد طلب من عندهم

غريبه لين هالحين ماأكلت .. انا دكتور واعرف تأثير قل الإكل

بسرعه ركبت الإصانصير .. فيه شي مو مطمني .. معقوله

انها عنيده لهدرجه .. انفتح الإصانصير .. وفتحت الجناح

شهقت وانا أشوف الجناح مقلوب فوق تحت .. بس اللي دهشني

أكثر اللي متمدده والدم ينزف تحتها .. ركضت لها وانا احس بخوف

ماني مصدق وانا أرفعها وأشوف كومة الزجاج اللي جارحها

والدم يصب مع جسمها ومغرق بلوزتها اللي كانت بيضاء

صارت حمراء .. رفعتها بسرعه وشلتها .. ركضت فيها

للغرفه .. حطيتها على بطنها .. مذهول بقوه .. هالمجنونه

وش سوت في نفسها

ركضت للحمام .. شفت فيه إسعافات بسرعه طلعتها

دورت على قفاز .. ولقيته في الدرج الثاني .. لبست القفاز

وأخذت العلبه راكض فيها .. شقيت بلوزتها .. وانصدمت

من اللي شفته






ضاحي

دخلت البيت كارهه شوفتها .. المشكله مدري وش أسوي معها

صرت اهرب منها .. ماعندي دليل ومدري وش أسوي .. اقتحمت

حياتي وخربطتها .. والإهم انها مجرمه ولازم اقدمها للمباحث

بس ماعندي دليل غير ان العصابه تطاردها .. ومتأكد ان فيه

شي مخبيته .. فتحت الجناح وانا مكشر .. انصدمت ان مالها أثر

فيه أبد .. مطيت عيني .. دورتها يمين يسار .. ابد مالها وجود

خبطت راسي – يويلي اظاهر انها انحاشت

جيت بطلع بس شفت ورقه محطوطه على الطاوله لفتتني

لانها واضحه انه منها لان الجوال فوقه حقها

بسرعه قريتها

للإسف انت لاتعرفني اتم المعرفه .. ضاحي انا ضحيه بتصدق

صدق بس اللي متأكده منه انك مستحيل تصدقني

انا مستحيل اعيش مع واحد كارهني .. انت ذليتني باللي توقعته

فيني .. اتهامك خطير .. وللإسف عرفت ليش ماوثقت علاقتنا

الزوجيه لانك متأكد اني اخدعك .. اوعدك ارجع لك يوم من الإيام

ومعي اللي يثبت برأتي .. بس مظهر الجلاد ماأحبه فيك

لما تعرف حقيقتي بتتأكد بصدق اللي أقوله .. ولاتخاف علي

هذا إذا كنت خايف .. انا في مكان آمن

لملمت الورقه وجعدتها بيديني .. وحذفتها بعيد .. جلست

منهار على الكنبه اللي كانت تجلس عليها .. هالمجنونه وين

راحت .. كلمت الشرطه وسجلت محضر بإختفائها .. ياخوفي

تلقاها العصابه ياخوفي









هاذي تنزف من كل شق في ظهرها .. وفيه زجاج .. لازم

مستشفى .. اخذت الجوال وطلبت الإسعاف .. حاولت اسعفها

لين يجون .. وانا اوقف النزيف .. ماعينا خير

فتحت الباب يوم الإسعاف جت .. وحاولت انا وإياهم نسعفها

ظهرها مليان شظايا زجاج .. قست ضغطها لقيت فيه هبوط

شفتهم مستغربين اني اشتغل بدقه .. وريتهم بطاقتي وحسيتهم

ارتبكوا يوم عرفوا مين انا .. شلتها بسرعه ومعي واحد حطينها

في السرير على وضعيتها .. مسدحينها على بطنها

ركضنا بسرعه فيها .. ركبنا الإسعاف .. غمضني حالها وحزنت

عليها .. مدري ليش سوت في نفسها اللي سوته







سكرت موضي جوالها وقالت – محمد يقول بنرجع الرياض

عمي تعبان

منيره والجده – وش فيه

موضي تطمنهم – مافيه إلا العافيه .. بس يقول رجعوني الرياض

اظاهر ماعرفوا وش صار .. مافيه أحد من الريجيل هرج وتكلم

استانست اني برجع وبفتك من وجيهم .. كنت انتظر اللحظه اللي

ارجع فيها للبيت واسوي اللي في بالي .. لازم اروح المحكمه

واشكيهم .. والله لإخذ حق ابوي من شيبة إبليس

صحت هند اللي كانت متظهره بالنوم .. اظاهر الي سمعته اعجبها

لانها لمت ملابسها .. ولبست عبايتها

عمشاء – علامهم مبسوطين هنا وش وراهم هناك

منيره وهي توقف – ضاحي تعيبان صحته ذا الإيام على قده

الجده وقفت وموضي اعضدتها – وديني لضاحي علامه

اندق جوال موضي وهن بيطلعن .. كلمت وقال محمد نطلع

بنروح مع فارس وابوه راجعين

ركبنا مغصوبات .. ولا همس ولا كلمه .. بس منيره هي

اللي تسولف والباقي صمت

منيره – ياابو محمد انت تعبان

كان منزل شماغه حول عينه وماعليه عقال .. وباين

إنكساره .. يوم انت جايبنا من الدوادمي ومتعني .. وابوك

كلمته هي اللي تمشي عليكم ليش جبتنا

فارس كان مشغل قران وصوت القارئ بكاني .. دموعي

تنزل بصمت .. احس وانا ابكي ان القران طلع الكبت والحقد

وكل شي في قلبي بإتجاهه الرجل الوقور اللي الطيبه ماليه قلبه

اللي هو عمي بو محمد .. مابيده شي .. ابوهم من زمان مسيطر

عليهم والدليل هروب ابوي .. اللي قاعد يعانيه هالحين يخليني

اعيد القرار اللي بتأخذه بروحتي للمحكمه .. انا انكسرت

وهالرجل هو اللي كسرني

وصلوا المستشفى

ركضوا فيها للطوارئ .. وكان نايف بينهم .. وهو اللي تولى

يسوي لها التنظيف اللي في ظهرها

بعد فتره

طلب منهم يحطون غذايه بيدها .. وهو يتذكر اللي سواه فيها

يوم أحرمها الغداء

طلع من الغرفه عقب ماانتهى التنظيف .. وجلس على الكرسي

اففففففف تتأفف من الشي اللي سواه .. ناظر ساعته

الليل شارف على الإنتهاء .. مايبي يقعد بهالشرقيه اللي جاها

مغصوب .. معاد يبي يضرها اكثر من ضررها

طلعت وحده من الممرضات – دكتور المريضه صحت

بسرعه وقف ودخل وراها .. شافها تناظر الغذايه اللي بيدها

وهي بوضعية الإنبطاح .. ماانتبهت عليه

سمع صوتها وهي تقول – من اللي جابني هنا

أشرت للنيرس تسكت .. وجلست في الكنبه اللي خلفها اناظر فيها

حزني صوتها المبحوح

عادت سؤالها – نيرس وينك

اقتربت منها الممرضه – نعم مدام

قالت – ابي اطلع .. ودوني الرياض ( بدت تبكي ) قبل يجي

لو عشت معه بموت رجعوني الرياض

حسيت الممرضه العربيه انصدمت .. وناظرت فيني

أشرت لها تطلع .. ويوم طلعت

صرخت فيها – طلعوني تعالي شيلي اللي في يديني تعااااالي

همست – اهدي

حسيتها صمتت فجأه .. تتأكد من صوتي – من

حاولت تلتفت بس قربت منها وناظرت في بحر عيونها – ليش

سويتي في نفستس هالشكل

صدت الجهه الثانيه وهي تعطيني ظهرها – اطلع برى

انقهرت من صدتها – ليش صاده .. منحرجه باللي سويتيه

فيه مره عاقل تسوي اللي سويتيه

علت صرختها – اطللللللللللللللع ماابي اشوفك

حسيت الدكاتره والممرضات بيجتمعون لو على صراخها بس

طلعت وطلبت ماأحد يتدخل .. وقفلت الباب

لقيتها تبكي .. قلت لها بلؤم – تبين تذبحين نفستس مجنونه انتي

ماسمعت لها صوت بس صوت بكاها .. مدري وش فيني ماهب

راضي اسكت عنها – ودتس تموتين هااااااااااه .. ماتخافين من

ربتس

قالت كلمه خدشت قلبي – ياليتني اموت وافتك انا منك

مدري ليش تألمت .. كلمتها وجعتني .. لهدرجه انا وصلت في

تعذيبها .. جلست على الكرسي – عموما اليوم بناوب معتس

وبنكره إن شاءالله بنطلع

ناظرت ساعتي – بروح اجيب لنا عشاء وابيتس تحاولين

تأكلينه كله

عصبت وصرخت بقوه – ماابي منك شـــــــــــــــــــــــي

سكت عنها .. لازم تأكل .. الهبوط اللي فيها من قل الإكل

طلعت تاركها .. ووصيت الممرضات عليها .. الله يستر هالمجنونه

لاتسوي في نفسها شي








نوره

من ركبت من السياره لين نزلت منها .. وحاسه اني اموت الف

مره .. كلام الشايب اوجعني .. هاذا وانا ماسمعته

بس المفروض مانستغرب .. ماهب هو طرد ابوي .. وامي

معه

حسيت بريحة عطره اخترقت خشمي .. ناظرت فيه

مسك يدي .. وكنت اناظر يده بصمت

قال كأنه يواسيني – جدي لسانه متبري منه .. شايب وخرف

الله يعينه

فكيت يدي من يده وقلت – ماهب جديد اللي صار فينا

من جينا من الدوادمي وننجرح ونبلع المر ونسكت

وش ضريناه فيه .. ولا طالبنا من حقوق ابوي ولا شي

اللي مثلهم خذولنا بيت نعيش فيه .. ماهب ملحق محذوفات فيه

حسيته سكت ( معلوم وش عنده يقوله )

قام وهو يقول – حكمك على خالي ضاحي ظالم

صرخت فيه – اكيد بتدافع عنه مدامك واحد منهم وفيهم

شفته انصدم من صرختي وعصبيتي – اهدي وش فيتس

وانا صادق خالي هاذا اللي يقدر عليه

قلت له وانا أشر على فمي – اصصصصصصص انت ماتعرف

كيف عايشين فا رجاء اصمت .. خالك اللي تقول عنه ليش

سحبنا ورجعنا مدامه مايقدر يدافع عنا للرياض .. ليش ماخلانا

نعيش في بيتنا ومسكرين علينا بابنا

قال بقهر – تراكم بنااااااااااات

قلت له وانا اغلي – عشنا خمس سنسن بدون رجال

وبنقدر نعيش بدونه ليش يبي رجعنا مدامه مايقدر يحمينا

اجل جدك يرمي في الكلام ويتهمنا ويقذف امي عشانها

ماهب من هالبلد .. ويتهمها في طهارتها

راح وهو يقول – انتي معصبه بروح اجيب عشاء واتمنى تهدين

كيف اهدئ واللي صار فينا ماهب قليل – حسبي الله عليه

حسبي الله عليه






بعد مرور اسبوع \ بيت ضاحي بن فهيد

شيخه

كنت جالسه في الصاله .. اليوم فيه عشاء .. بمناسبة رجعة

ريم وسعد .. شفت منيره تروح يمين ويسار .. وكل مسألتها

فيه شي اساعدتس فيه قالت لا

مدري احسها متغيره .. مدري وش فيها .. كل شوي تحاول

تهرب مني

كنت احسها تبيني اروح للملحق .. وكل شوي تالف قصه

ولا تدور عذر تروحني .. بس مدري ليش عاندت وجلست

جتني وهي تقول – شيخه يمه يالله بيجينا حريم غيري لبستس

ناظرت جلابيتي – جلابيتي زينه .. وبعدين ماهب تقولون عشاء

مختصر خلاص ماهب لازم اغير

راحت عني متجهه للمطبخ .. دخلوا الشغالات القهوه والطوافير

والقدوع .. وبخرن البيت وانا جالسه في مكاني .. كأني حاسه

بشي يصير حولي

فعلا صدق إحساسي .. الباب انفتح ودخل صقر .. ابتسمت

وانبسطت في خاطري .. المجرم له إسبوع مانع شوفته عني

وقفت وكنت بروح له واقول دخيلك صقر سامحني ولاتتركني

بس انصدمت في الحرمه اللي دخلت وراه .. يوم شافني

رحب فيها بقوه وهو يقول – حياتس ياقلبي حياتس البيت

بيتس ( مسك يدها وعينه علي ) تعالي وسميه هاذا بيتس






ميته قهر وانا اراكبه جنبه راجعين للرياض .. طول الفتره اللي

راحت وهو مايفارقني .. وغصب يغديني ويعشيني .. وتوصل

احيان يؤكلني بالملعقه غصب عني .. وكنت مرات ارجع عليه

ومرات اركض الحمام .. مااحبه يلبس قناع الطيبه ويمثل دور

المهتم وهو الجلاد .. اكرهه من كل قلبي اكرهه

كلم امه واسمعه يتكلم معها ويتظاهر بالحنان والمحبه والمؤده

لها .. مدري كيف العالم تصدق هالإشكال

اخذ فتره يتكلم معها .. سكر الجوال وناظرني – امي تسلم عليك

سكت مافتحت فمي بحرف .. طول الفتره اللي راحت من عقب

المستشفى وانا ماأتكلم إلا للضروره القصوى

سمعته – وين راح لسانتس

ساكته ماابي اتكلم .. اكرهه واكره إسلوب كلامه .. حقير وواطي

ومنحط






( إنتظروني يوم الخميس .. بإذنه تعالى )