كاتب الموضوع :
♫ معزوفة حنين ♫
المنتدى :
القصص المكتمله
,
بعدها اقترحوا عليّ العب وياهم كورة....بس رفضت بحجة مالي خلق..
لما ابتعدوا عنّي..
سرت عند الشلة الخربانة...سلّوم وخلّوف و ناصر وسيف..
وبعد السوالف وجي..
فتحت الموضوع .كتبت لهم : شبااب...شصار وياكم مع فهد والباقي.؟ بعدهم يتعاطون.؟ كلمتوهم .؟
سالم بجدية : لا...حاليا نحاول ناخذ المنشطات عنهم من دون لا يدرون..اول شي بنخليهم يخفّون من تعاطيها لين ما يتعودن...وعقبها بنمنعها منهم نهائياً...بس اذا ما نفع...بنضطر نواجهم..!
كتبت : هييه شباب الله يخليكم...هذيلا ربعنا..مهما يصير لازم نوقف وياهم...
سيف بموافقة : هيه...ترا الربع هم اللي وياك وقت الشدّة....وواجب علينا نساعدهم..حتى ولو ما يبون...غصبا عنهم.....
خلّوف : لمصلحتهم طبعا....
ناصر بحيرة : الشي الوحيد اللي ما ندري عنه..من ويين اييبونها هالمنشطات.؟ منو اللي يبيعها لهم ويعطيهم..؟
سالم : ياخوفي تكون من نوادي ثانية عسب يطيحون سمعتنا..!
طالعتهم بتفحص...الحين ببدا اسحّب الكلام منهم....
احم......بديت ادخل وياهم في الموضوع بطريقة غير مباشرة....
،
وو
بعد محاولات مني مناك وياهم......هالنتايج اللي ظهرت لي ..
//
• كلهم اتفقوا ان يوسف كان ويا قوم مايد...ولما سمعوا عن الحريقة..هو اول واحد توجّه للموقع..
• بعد انتهاء الاحتفال..الثلاثة كانوا يرقصون...وخليفة كان يجري احدى اللقاءات ..
• اما عن شلة فهد..عمر اول واحد ترك الملعب...وكان شكله تعبان..والباقي بعد الاحتفال محد جافهم في الملعب..
• و بعدها هالاربعه قابلوني عند غرفة التبديل وقالولي عن الحريقة اللي سمعوا عنها ولما ركضت...لحقوني كلهم....
,
يلست بعيد عنهم وعضيت ع شفاتي...
يااا انهم كلهم مشتركين في الجريمة....و يغطّون على يوسف..
او..
مجموعه منهم هم السبب في كل هذا..
انزين لو الاحتمال الثاني صح..؟
منوو هم..؟
تذكرت كلام حمد....والمشتبهين الثلاث....
عمر, يوسف , فهد..!
اذا شطبنا اسم يوسف...؟ بيكون المشتبه الثاني عمر...!!
اوك خلونا نفكّر بمنطقية....عمر اكيد كان يتعاطى اولا بسبب تحسّن اداءه بشكل كبير ومفاجىء وثانيا لانه دوم ويا فهد وحميد...وو يمكن....يمكن كان واحد من اللي جافهم علي.!؟
لحظة ..لحظة....في نقطة تخرّب..
لالا مب هوو...الكل قال انه كان تعباان..! واجتمعوا ع هالشي..
فـ كيف بيروح يقتل علي...وبعدها يحرق المستودع..؟
افف..
بس شو هي حجّة غيابه..؟
قالولي..انه اهله هذاك اليوم قالوا انه ما ردّ البيت..
وليش اختفى فجأة.؟
هاا كله صار ضده..
انا بتخببل....ماعرفت فـ منو اشك...يوسف ..؟ ولا عمر.؟
،
وقفت بسسرعه...مابي افكٍّر الحين...
عندي شي اهم..
شديت ع شنطتي...ووقفت..
استاذنت من الشباب بعد ما شكرتهم ع هالحفلة..
وظهرت من النادي..بروح لـ شقتي...
لحظة...!
نست اجيك ع شي..
رديت ركض لغرفة التبديل...
وفتشت ع السريع لوكرات الشباب..
بس مااافي شي...!
وين..وين بيحطوونها..؟
لصقت ويهي في الطووفة وانا اجوف ورا اللوكرات..يمكن خاشينها هني.؟
بعد ماشي..
لحظة...فيه شي تحت اللوكرات...
نزلت راسي اطالعه...
طلع جووتي....!
افف..مافي غير اني اطلب من سالم...
بس حمد ما بيرضى..!
يلست ع الارض افكّر..
.
مادري ليش مديت ايدي وسحبت الجوتي اللي تحت...لما لمحت شي داخله...
وو
وااااه.... حصلتهن....الابر...!!!
هذي هي المنشطات...
الحمدالله..!!!
شليتهن بكلينكس ولفيتهن...وحطيتهن في الشنطة....
وو ردييت الشقة بسرعه..
//
//
بعد اسبوع
،
ريم
،
ترقبت بخووف الشاحنة البيضاء......
انا ومريوم منخشات ورا وحده من هالسيارات..
ونراقب الشاحنة اللي بتطلع من الباركنات..
.
لما وقفها الحارس وقف قلبي..
همست برعب : مريووووووووم.....بيفتشووونها..!!!
مريم بتوتر : اششش....لا ان شاءالله.....سكتي خليني اجوف...
طالعت الحارس اللي يتكلم ويا سايق الشاحنه..
بعدها..رفع الحاجز...وظهرت الشااحنة..!!!!!!!!!!!
فرحت.....الحمدالله....الحمدالله...
اخيراُ ظهروا بأمااان...!!!
دزتني مريوم : يلااا خلينا نرد بسسرعه..
مشينا بين السيارات ونحن منزلين روسنا..لين وصلنا لـ اللفت..
وصعدنا فوق...
وو
ردينا غرفتنا بـ كل هدوء...
اول ما دخلناها..قفلنا الباب بسسرعه..
مريم بارتيااح كبير: وااااااااه..مب مصدقة...ابدن مب مصدقة..نجحناااا..!!!
ابتسمت بفرح : الحمدالله.....كذي...بنقدر نظهّرهم كلهم...
مريم : وان شاءالله محد يكتشفنا...
قلت بلا مبالاة : خلاااص يختي...منو اللي بيكشفنا....كلهم مآآآتووو..
عضيت لسااني لما جفت ويه مريوم اللي تغيّر...
حكيت راسي بارتباك لما جفتها راحت للسرير وانسدحت وهي معطتني ظهرها..
مريوم تغيّرت من عقب اللي صاار..
من عقب اللي صار كلله اسمعها تصييح بالليل...وو وايد صايرة خاايفة..
ضميرها مأنبها بالقوو...
اما انا...
بعد الحادثة اللي صارت....عشت بخووف فظيع..
اولا بسبب اللي ماتوا جداامي....!!
وثانيا بسبب محمد ومنصور اللي قتلوهم بدم بااااااااارد..
ندمت قد شعر رااسي لما كنت اقول عادي خلهم يقتلوني..
لا يممممه...مااابي اموووووووت.....واطيح ع الارض والدم حوولي..
وواحد واقف عند راسي يدووخ...والثاني ولا كأنه مسوي شي...!!!
لالا..ابدن ..هالمووته مااابييها...
،
ارتعبت اكثر لما قتلتهم مريووم..!!
كانت صدمة قوية...مريوم كانت مخططة لهالشي من قبل...!!
خفت واااااايد لما طاحوا جدامي.....ما قدرت اعبّر....ماقدرت انطق بشي..
و مادري كيف وصلنا فوق للطيارة بلمح البصر..
كنت خاايفة يلحقووونا ويقتلوونا..
ربي رحمنا هذاك اليوم!
،
اليوم الصبح قررت مريوم نظهّر المسجونين...ونشرد بأسرع قبل ما يكتشفون ان نحن السبب فـ موتهم..
عرفنا طريقة نهربّهم..وهي الشاحنات اللي واقفة في الباركنات...
قدرنا ناخذ المفاتيح..
وظهّرنا كم واحد...وسلّحناهم...احتياطا عسب اذا صار شي..
تريينا لين ما ياا سايق الشاحنة....
وبعد ما حطّ الاغراض في الشاحنة....
والحمدالله قدرنا نسللهم لداخلها..
ونفس ما جفتوا..
ظهروا بـ سلام...وياارب يقدرون يظهرون منها بدون لا يصير لهم شي..
اما عن كاميرات المراقبة..
وبما انا صرنا شريكين لـ محمد ومنصور...
فـ كنت انا النآهية والآمرة هني....
لعبت فـ راس كم حارس...وبـ كذي غرفة المراقبة تقفلت هالفترة ع الاقل..!
مع هذا...فـ هالمقر الكبير...وايدين لازم نحذر منهم...وما نقدر نلعب عليهم بسهولة..
.
نبي نظهره كل هالمسجونين بالكثير هاليومين...
خاايفة اييون هذيلاك اللي قال عنهم كابتن الطيارة...
بييون يحققون فـ السالفة...؟
بعدين ليش يحققون..؟ يعني احس شي طبيعي يموتون فـ هالمهمة الخطيرة ع قولتهم..
,
انسدحت عدّال مريوم....اللي جفت جسمها يهتزّ...دليل انها تصيح...
تنهّدت....
يارب احفظنا...ونطلع من هالمكان بسلام...
،
اليوم اللي بعده..
،
دخلنا غرفتنا بسرعه وقفلنا الباب...
تنهدت برااحه..
اليوم ظهّرنا مجموعه فـ 3 شآحنات..!!
باقي أممم.....3 مجموعات...ووياهم العم عزيز اللي رفض يظهر من دونا...
حبيبي والله عموو....
صح...اكيد تبون تعرفون شو اللي صار لـ هذيك شوو كان اسمها.؟ انجلينا..؟
افف..هذييك اللي سرقناها..وخذنا البطاقة واحتلينا غرفتها..؟
هييه..الله يسسلمكم..
هذي حصلوها داخله فـ غيبوبة..لها اسبوعين وهي معفنة في الزنزانة...ومحد درى عنها..
تخيلوا كيف عرفت..؟
تخيلوا ان محمد قال لمـريوم..؟!! لما كنّا في الطيارة..
وقال ان هالسبب شجعه يخلينا نشارك في مهمته..
ع قولته...اكتشف ان لنا عرق اجرامي....فقدته مسسوود الويه...ههه خلااص فقدناه..
وجان مريوم تعصصب...و تشجعت ع فكرة قتلهم..!!
الموهيم ماعلينا..ماحب اتذكر هذاك اليوم...
.
انسدحت ع السرير بريّح لين العصصر..
اليوم كاااان تعب...!!
،
فتحت عيوني ع صوت مريوم...
افففف مب وقتها...ابي ارقد..
مريوم : ريم...نششي....ريييم...!!
غطيت ويهي بالمخدة وقلت بكسسل : مريوووم خليني اررقد...!!
ماردّت عليّ...بس حسيت انها واقفة قريب مني...
ترييتها تتكلم...بس ما قالت شي..
اووه..برقد احسسن..
بس هاي من صدقها وااقفة وما تحركت....وما تكلمت بعد..
بعّدت المخدة عنّي....وفتحت عييني ببطىء..
جفت مريوم متكتفة وتطاالعني..
غمضت عيني بسرعه اوني راقدة...
؟
لحظة....في حد وراها...
لالا..مب حد....في اكثر من حد...
يلست بسرعه...وشهقت..
خييييير....نعم....لحـــــظة...شو يسوون هني...!!
فركت عيوني احاول استوعب....!!
قلت بصوت مبحوح من الرقاد وانا متفاجئة : خييير اخوااان..!! شو تسوون هني...!!! مريوم...هذيلاا شو....شو يبوون..!!
تكلم الريّال اللي ورا مريوم بنبرة خرعتني : نحن اعضاء من المقر الرئيسي..
هيييي.....!!!
يمـــــه....شوو يبووووووون...
طالعت مريوم بخووف..
بس جفتها تحاول تمثّل البرود جدامهم..
سويت روحي واااثقة...
تكلمت بحدة وثقة مصطنعه : واظنك تعرف ان نحن شركاء العميلين 7 و 8......! في شي اسمه باب تدق عليه....او تطرش حد من العاملين اذا تبانا...مب جي انش واحصلكم فـ ويهي...
طالعني بنظررررة....بلعت منها بلاااعيمي....
حكيت خشمي ودرت بنظري ع الغرفة..
اعووذ بالله...يخووف...!
رديت اطاالعه....بسم الله شفييه هذا بعده يطاالعني....
وربي خفت منه...شفيه.؟ شو يباني اسوي..؟
قلت : آآآمر.؟ بغيت شي.....
وشقيت الحلج...ههه طبعن بخوووف..
قال بأمر : امشي جدامي انتي واختج...لقاعه الاجتماعات..! موصيني ايييبكم..
هييييييييي...
موصيينه...!!
قااعه اجتماااعاات..
يعني كل المجرمييييييييين مجتمعييييييييين..!!
وقفت ولصقت فـ مريوم بخووف...
مسكت ايدي...وشدت عليها..
بدت الهواجس تدور فـ راسي..
طالبيينا..!!
الله يسسستر....الفترة الاخيرة وايد تهورنا..
ومااظن تعدي على خيير..
،
توجهنا لقاعه الاجتماعات..اللي توني اجوفها..
دخلوا..ودخلنا ورااهم..
ولما جفت الناس اللي يالسين حول الطااولة...شهقت...!!!!!!!!
هييييييي...كل هذيلاا شو يبوووونا..
لاااااااه....الله يرحمنا من الحين..
الظاهر يبون يحددون موعد إعدامنا..!!
تأملتهم واحد واحد.....بلعت ريجي..ولا وااحد يبين فـ ويهه الخير..
كلهم يخرعون ووحوووش..
هذيلا اللي يبيّن انهم مجرميين.وإراهبيين...ومن منظمّات....لكن محمد ومنصور كيف ييوا مادري..!
يلس اللي كان ويانا على واحد من الكراسي...
وجفت كرسيين في أخر الطاولة محد عليهم..
لما جفتهم بعدهم مركزين نظراتهم علينا..
سحبت مريوم..ورحت عند الكراسي..
يلّست مريوم عليه..ويلست عدالها..
صلبت ظهري..وشبكت ايدي ع الطاولة...وطالعتهم بثقة مصطنعه
همست وانا احاول ارسم ابتسامة : يالله حيّهم..!
ضربت ريول مريوم من تحت انبهها تسوي نفسي..
وقلّدتني..
عااااد انا شكلي صراحتن لا يُرى...!!
ياية لهم بـ كشّتي...
وعيون حمرا..
و ويه منتفخ ..!
،
اخيرن نطق الحجر...!
تكلم اللي مترأس الطاولة : انا بدخل في الموضع على طول......كنا نتكلم قبل شويه عن العميلين 7 و 8...اللي ولاول مرة تفششل مهمتهم..
طبعا هالشي ما فاتنا وخاصة انها قضت على ارواحهم....! فـ حققنا فـ طريقة موتهم..
ما تعمقنا في التحقيق وايد..لان المكان اللي ماتوا فيه حسّاس بالنسبة لنا...و الحراسة تشددت بشكل مكثف جدا..!
وما قدرنا نحصل على جثثهم..
المهم...من المعلومات اللي وصلت لنا..ان الضابطين فاجأوهم وقتلوهم..
والدليل اصاباتهم كانت من الخلف...
وبعد وصلني ان انتن الثنتين اللي نجيتوا من المهمة...! وقتلتوا الضابطين...!
مع انها اول واخطر مهمة لكم..!!
هزيت راسي بتفهم : صح كلامك يا ريّال....لا تذكرني فيها خلااص!...كانت وايد صعبة...ولو انها كانت سهله عليّ انا واختي...
كلام متناااااقض.! ههه لححد يلومني..ماحب الاجواء الجدّية..
تكلم واحد منهم شكله يخرع: الاهم من هذا....في التقرير ..انكتب ان المهمة فشلت....بس كان مكتوب قبل ان العميل 7 حصل ع الوثائق المطلوبة....واللي ضحّى بحياته هوو العميل 8 عشانها...
انتن..كـ شريكات لهم...ليش ما خذيتن الوثائق.؟
مريم نطقت اخيرن بجمود : ناخذهن..؟
قال بحدّة : هيه تاخذونها..!
قالت مريم ببرود : اولا...كانت اول مهمة لنا....وشي طبيعي نتفاجىء بموت العميلين اللي ياما تدربنا ع ايدهم...!! فـ مستحيل نفكّر بهالوثائق...!
كمّلت عنها : ثانيا..كأول جريمة نرتكبها اظن وقتها مستحيل نفكّر غير فـ حياتنا..!
تكلم واحد منهم وقال بنغزة : والله هذي مشكلتكم...! العميل7 و 8 ..مستحيل يرافقون ناس مستواهم اقل من الضعيف..! وو........اللي قريته فـ هالتقرير اللي جدامي...ان الاسلحة اللي كانت وياكم...الذخائر اللي فيها خاصّة بالتدريب...! يعني ممكن تفسير كيف قتلتوا الضابطين.؟
بطلت عيني...!
حشى..مايفوووته شي..
قلت بصوت واثق : عاد قلنا اول مهمة...بس ما قلنا نحن اغبياء لهدرجة..! " تحمحمت ورويت لهم القصة باختصار" بعد ما الضابطين قالوا لمحمدوه ومنصور يعقّون اسلحتهم ع الارض... لما عقّوا اول سلاحين...جان الانذال يقتلونهم......عاااد انا واختي هاي البطلة....بحركآتنا التكتيكية خذنا سلاح محمد ومنصور...و أطلقنا النار عليهم ليخرّوا صريعين ع الارض..
صح الجملة اللي قلتها..؟
.
آآآآآآآآآخ....!!
عضيت ع شفاايفي بألم لما داست مريوم ريولي بقوووة..
كشرت فـ ويهها : ياخي ليش تستحين....! عادي خليهم يعرفون عن بطولاتنا....يمكن يرقّونا...او يخلونا عميلات...بدل هالمصخرات اللي ماتوا فـ اسهل مهمة...
تكلّم اللي يترأس الطاولة بجدية أكبر : انتن الثنتين ما نعرف عنكن شي....! وها سبب الاجتماع..
"سكت شوي " كـ عضوات في المنظمة...لازم تخضعون لاجرءات مهمة...كـ تحديد مستوى القدرة...التحمّل...و مقابلة الرئيس..
مريوم قالت بسرعه : هاا كله سوينااه..
رفع حاجبه بتعجب : بس مب موجود عندنا فـ السستم..؟ " قال بلا مبالاة " عادي مب مشكلة تعيدون كل هالاجراءات...!!
جمييييل...!
ابتلشنا..!!
تكلموا واااايد بمواضيع تعور الراس ونصها ما فهمتها...
يعني ان في المنظمة صار يدخلون فيها اعضاء ما ينعرفون..ولازم يشددون على الامن..وو....الخ.
وانا طوال الوقت اراقب واحد وااحد....!
انا مب مصدقة انهم ما كشفوونا..!!
يمكن يبون يعرفون ردّة فعلنا..؟ او....مااادري...مادري...
تنهدت بارتياح لما قال انتهى الاجتمااااع..
وقفت وياهم...
حسيت بشعور جميل...يعني هجذا كأني شخصية مهمة..ههه....!
جفت مريوم بعدها ياالسة...وسرحااااااانه..
قلت : مريووم خلااص خلّصنا....
عطتني نظرة ووقفت....همست : انا مب مرتاااحه...!
قلت بصدق : ولا انا..!
مسكتني من ايدي....وردينا الغرفة..
اول مادخلنا..مسكتني وخلتني مجابلتها....
عضت شفايفها وقالت بصوت واطي : بنضطر نأجّل كل شي...
قلت باحبااط : ليييييش....!!!!! ترا ما كشفوونا...يعني هم تكلّموا عن اللي صار..
مريوم : ما سمعتيه شو قال..؟ انا متأكدة انه شاكّ فينا...واكيد بيراقبنا بشكل مكثّف..
تأففت : شو يعني نقلته عسب نرتاح...." قلت اقنعها " مريوم...هالمرة بنشرد مرة وححدة..!! حتى لو اكتشفونا ..بيكون فات كل شي..وبنقدر نوصل للشرطة وجي انتهت المشكلة..
مريوم تنرفزت مني : انا مادري انتي كيف متخيلة الامور....! حبيبتي..اذا اكتشفونا بيردونا حتى ولو كنّا فـ آخر العالم..
بعّدت ايده مني وتخصرت : سمعي انتي...اذا تمّينا هني بيكتشوفنا اكثر...هم ما يعرفون نحن منو..ومن وين يينا...و لو ظهرنا باسرع وقت..ما بيلحقون يعرفون عنّا شي..
تنهدت مريوم...وراحت تقعد ع السرير..
زفرت بضيق..
ورحت اغسل ويهي عل وعسى اقدر افكّر فـ حل لمشكلتنا..!
//
//
العصر
،
فجـــر
،
يالسة في الحديقة اللي قريبة من شقتي...
ومآسكة الجريدة وامثّل اني اقراها..
وشخص يالس وياي فـ نفس الكرسي عداله جريدته وتفصلني عنّه مسافة بسيطة..
لابس نظارة شمسية وكآب...وعنده شنب طويل شوي..
ويعااابل فوونه...ويطالع اليهّال اللي يلعبون..
ما عرفتوه..؟
هذا حمد...!
قررنا نتقابل قبل الموعد...
بسبب بعض الامور اللي لازم نناقشها..
قريت المسج اللي توه وصلني منه..
" فيه اساله بعدها تدور فـ راسي.. "
كتبت " وشوو هي..؟ اصلا حسيت من هالاجوبة ما نقدر نظهّر شي "
حمد " بالعكس...اشيااء واايد ظهّرنا منها....والاهم عرفنا ان يوسف مب هو القاتل وماله خص "
يوسف ماله خص..!!!؟
نععم..!!
لا له خص ونص..
كتبت بسرعه " لا متأكدة ان يوووسف له خص في السالفة....انا شاكّة ان الكل ويااه ويغطّون عليه "
حمد " فجر...فكري بمنطقية...يغطّون عليه ليش..؟ هو يخاف من شو.؟ منج يعني.؟ "
فكرت شوي..صح.؟ ليش بيغطّون عليه..؟
كتبت وانا مصرة " اوك ما يغطّون عليه...بس انا متأكدة انه هو...ويوسف ذكي..وعنده الف طريقة يقدر يقتل فيها علي من دون حد يشك فيه "
حمد " شو دليلج..؟ "
كتبت " تهديده والشفرات ..! "
سمعته يتنهّد " فجر..انتي رااسج ياااااااااابس...لازم توسعين تفكيرج عسب نوصل للنتيجة..!...اوك...خلينا من يوسف...نروح للاعبين....انا اقول القاتل واحد منهم.."
تنرفزت " جوف لا تقولي فهد ولا عمر...! ادري انهم يتعاطون...بس ما بتوصل فيه يقتلون ربيعهم...! عمر عنده حجة غياب ولو انها ضعيفة....وفهد كان ويا حميد وجاسم "
لمحته يمسح ويهه بنفاذ صبر " فجر...رجااء ً فـ شغلنا ابي العواطف تكون برااا...في التحقيق مافي شي اسمه لا هذا مب القاتل وهذا اكيد القاتل.....في التحقيق الموجود في مسرح الجريمة يُعتبر مشتبه به....حتى ولو كان أقرب واحد "
نزلت الجريدة وسندت راسي ع الكرسي اريّح اعصابي..
فجر...خلييج هاادية...وفكري عدل....
واسمعي كلام حمد..!
تنفست بعمق....وكتبت له " اوك...بعتبر ان القاتل مب يوسف...وانه من الشباب....!
ع كلام علي انه كان اكثر عن واحد اللي جافهم...! فـ ليش ما يكون اكثر عن شخص اللي قتله.؟ "
حمد " حلوو..كذي بنقدر نوصل للنتيجة بسرعه..جووفي....انا بعدني مارحت لموقع الحادث..بس انا شاكّ فـ شخص.. "
كتبت بسرعه " منووو..؟ "
حمد " مابقول لين ما احصّل دليل..واتأكد من صحة كلامه وكلام الكل ...ويمكن نفس ما تقولين يكون اكثر من شخص "
كتبت " اوك..عيل بيكون نفس الموعد...عقب باجر تعاال وبنحقق في الموقع.."
تعمّدت افرر الجريدة قريب منه وتخالططت بين جريدته ..
تمططت بملل..
حطيت السماعات فـ اذوني..وهزيت ريولي اوني مندمجة في اللي اسمعه
كتبت له " الاوراق اللي قلتلك عنها موجود في الجريدة....جوفها الحين وعطيني رايك بالصوت "
ظهرت من شنطتي السبورتيه مجموعه كلينكس ومسحت فيهم ويهي..وحطيتهم عدالي..
انا " داخلها ابر المنشطات اللي حصلتها "
دقيت عليه...وشبكنا الخط ويا بعض..
لمحته يفتح الجريدة ويقرا الموجود فيها..
وقفت ورحت اتمشى بعيد عنه..
حمد همس متفاجىء : هالاوراق من وين يااابها...!!!! تخيلي..! هذي شفرات سرية...
رفعت حاجبي مستغربة...شفرات شو..؟
حمد كمّل : مادري شفرات شوو...بس اكيد عن المنظمة...." قال بحماس " بتفييدنا واااااايد...!!!
حلوو..بس كيف بنفكها.؟
فاجأني حمد لما بدا يفكها : هذي..أأمممم....اعتقد ان اغلبها عن المهمّات ومواقعم..
كيييف عرف..؟
قال : في اشياء تدل ع هالشي.....وو من الارقام اللي موجودة اعتقد تواريخ...وو مممم...لحظة....اظن ان اغلب المهمات تمت...! هممم يبالي قعدة ويا هالاوراق...يمكن اعرف شي موقعم "
طالعت فـ الارض متعجبة...!!
بندت الخط...وطرشت له مسج...
انا " كيف عرفت..؟ "
حمد " مجرد تخمينات... "
كتبت " حمد..! "
جفته ينزّل الجريدة متعجّب..وحطّ ريل ع ريل...فهمت انه عرف شو بقوله...
كتبت " منو انت "
جفته يبتسم " انا شخص موظّف في الحكومة..وحالي حال اي مواطن عادي "
كتبت " حمد...اتكلم جد....منوو انت..! وكيف تعرف كل هالاشياء..! "
حمد " اهم شي تكونين واثقة فيني "
كتبت " انا واثقة فيك...لكن تصرفاتك احيانا تشككني "
حمد " مثال ع الشفرات "
كتبت " الشفرات والتنكّر والتفكير وكل شي فيك..! "
حمد " طرش فيس مطلّع لسانه "
رفعت راسي اطالعه بجمود..
حمد " طرشّ فيس يضحك...لا تطالعيني جي...بتفضحينا..."
ماردّيت عليه و علّقت نظري عليه..
حمد " ابوي محقق "
طالعت الكلام متفاجأة....محقق.؟
طرشت " ع فكرة....انت فااشل في الترقيع "
حمد " فيس يضحك...والله صدق..."
طرشت فيس متفاجىء
حمد " هههه..يعني الذكاء هذا مب ياي مني والدرب...."
كتبت متفاجأة " صدق ابوك محقق...!!! يعني يقدر يساعدنا "
حمد " اممم...انا فـ هالشي مابي اعتمد عليه..صح انه مايخصني في التحقيق و مب شغلي...بس لان المنظمة تعدّت حدودها الحمرا وياي....قررت اوقف فـ ويهها "
هزيت راسي متعجبة..!
كتب " خلينا نرد لموضوعنا الاساسي.....انا ماخذت رايج..!؟ "
كتبت باستغراب " رايي فـ شوو.؟ "
حمد " اقصد ما استجوبتج "
انا " عيل كل هاا وما استجوبتني..! واللي قلتله لك في المستشفى..؟ "
حمد " انا ما اقصد تقوليلي شو صار..! انا ابيج توصفين لي كل شي...منو كان هناك..؟ وكل واحد شو كان يسوي..؟ "
يلست ع المريحانة افكّر..
حمد " يمكن تفيدينا بشي..ع الاقل نعرف من اللي فـ دائرة الاشتباه ومن اللي خارجها.."
كتبت " بعد ما خلّصت المباراة..يلست ويا علي شوي..وبعد اللقاءات افترقنا..انا كنت ويا شهرزاد...وهو كان يالس بروحه...يوسف كان ويا " عضيت شفايفي.." مايد وشلته...وسالم اظن كان وياه سيف وناصر..جفتهم ع المنصّة..والباقي تفرقّوا يجرون مقابلات "
اوووه...اكيد بيعلّق ع يوسف..!
حمد " اهاا....اوك...وشو صار عقب..؟ "
كتبت " لما لمحت علي وقف بسرعه...استغربت...بس طنشت...بعدها لحقته...ولقيته منخش بين الاشجار..بعدها لما دخل المستودع وكنت انا اراقب...ما كان فيه اي احد دخله عقبه....ولما جفته تأخر...." تنهدت والمشهد ينعااااد جدااامي ببطىء " رحت وجفت اللي جفته....ورحت لغرفة التبديل ابي مفتاح سيارته "
وقبل ما اكمّل المسج ردّ عليّ " وانتي رايحه جفتي حد.؟ او كان في حد في الغرفة وكم استغرقتي في الغرفة"
انا " لا..ما كان فيه اي حد....اظن 5 دقايق او اكثر بشوي...لاني اضطريت اكسر خزانة علي..و.لما ظهرت..حصلت فـ ويهي شهرزاد....بعدها جفت خليفة وسالم وكم شخص ماذكرهم... ظاهرين من الملعب...وقالولي عن الحريقة..."
حمد " حلوو....وبعدين .؟ "
قلت " انا لما وصلت للموقع...مادري منو كان موجود...تركيزي كان كلله ع المستودع....ولما ركضت صوبه..رحت صوب الدريشة وجفت جزء من راس علي..صديت اطالع الباب...جفت خليفة يحاول يكسره...الباب كان حديدي...رحت اساعده...وقدرنا نفتحه انا وهووو..
ولما ظهرت الناار منه....كان سالم واظن سيف وناصر يطفّون النار بسطول الماي "
حمد " ايوااا...كملي "
كتبت " ماشي صار..غير لما دخلت سمعت صراخ ( عقدت حواجبي لما تذكرت اللي صرخ باسمي ) يوسف..!! "
حمد " وعقبها يوسف هو اللي ظهّرج من النار...."
تنهدت بغيض " هيه...وبعدها ماذكر شو صار بالضبط "
جفت حمد وقف وابتسم بارتياح...
كتب " وااايد افدتيني...قدرت اعرف منو الاشخاص اللي نقدر نستبعدهم ...المهم...بنتقابل عقب باجر...وبتأكد من كل شي "
وراااح...بعد ما اخذ الكلينكس والجريدة وياه..
،
بعد يومين
،
بعد التدريب....يلست اريّح...واتريا مسج يوصلني من حمد..
قال انه قريب من النادي..!
بنستغل فرصة غياب ابراهيم...اللي من رديت للنادي ما جفته ابدا...
،
بس وينه حمد. تأخر..؟
شربت ماي..وانا اطالع الشباب المنسدحين ع الارض..
فهد : يااربي شو هالحرررر....انشوييييييينا...!!
سالم متنرفز من الجو : انا مادري ليش ما يعطونا اجازة في الصيف.! مادي ع بالهم جونا يطيّح ثلوووج..!
تحمسوا باقي الشباب فـ هالموضوع...اللي يقول بيروح يشتكي..واللي يقول بيقترح عليهم يعطونهم اجاازة...ووو الخ..
انتبهت لـ شخص وقف يطالعنا..
طالعته شوي...بس ماعطيته اهتماام...
لحظة..!
رديت اطالعه عدل..
دبدوب شوي...لابس نظارات طبييه...شعره طويل ورابطنه ...مسوي سكسوكة..
خشمه شوي كبير...!
بس لما تكلم انصدمت فيه...وضحكت فـ داخلي عليه..!
قال : السلام عليكووم شبااااب..؟ كيفكوووم ؟!
حمممممد...!! ههههه...شكلله توووووحفه...
ما طالع فيني ولا شي...نظره مركز ع الشباب اللي مب معطينه ويه..!!
حمد يحاول ينبههم: عن ازنكووون...يا شبااااب....شبااااب....
سالم طفران : مب وقتك يالاخ...
حمد : أأأأ انا سآآمر حلفان...صحفي من جريدة اليوم..بدي اعمل معاكم مئابلة..!
فهد يسوي روحه راقد : انا رااااقد..
جاسم : رووح..روح....نفس ماقالك سلّووم..مب وقتك...لا تخلينا نطلّع حرّة هالحرر فيك...
خليفة انبطح ويهه وطالع فـ حمد....ضحك : انت جفت ويهك قبل لا اتيي..؟
سالم بسرعه التفت يجووفه : شو فيه ويهه....ههههههه...لا ما جافه ابدن..
حمد : لك شوفيه .؟ اسم الله عليّ مافيه إيشي..!
فهد من دون ما يطالعه : ابد يا حآآآفظ....!
حمد تكلم برسمية : أأ..انا استازنت من ادارتكم...وسمحوولي اجري مئابلة معااكم..طبعا بعد ازنكم...!
خليفة بكسل: تعاال وقت ثاني...
حمد : ماراح اطوول ...هي كلها كم سؤال على كم جواب وخلِصْــنا..!
سيف : لا يا شييخ..!
حمد هز راسه بسرعه : أأأه...عن جد بحكي...بسال عن ناديكم..وعن اللاعب علي الله يرحمو..بدي اعمل تقرير عنوو..
لما جافهم سوو طااف له...
قال : وينوو كابتن فريئكم أأأ " طالع دفتره " فاارس محمد..مو؟ بجري وياه المئابلة..وانتوا خلااص ازا ما بدكم بكيفكم..
تفاجات لما كلهم اشّروا عليّ...
ضحك ناصر بنذاله : وهّقنااك..! " قال لحمد " هيه ياابوك رووح اساله...كل اللي تباه بتحصله عنده...
حمد يا صوبي مبتسم...وصافحني وقال بحماس : اهلاا اهلا بالكاابتن البطل..!!
ترياا شوي يتريااني اردّ عليه....
عقد حواجبه...عقب قال وكأنه تذكر : اووووه...آآآسف....أأأ تزكرت انك ما بتئدر تحكي...أأ آآسف...آآسف...
ابتسمت له يعني عاادي...!
انتبهت للشباب ردّوا ينسدحون ويسولفون...
مشيت ويا حمد....وهو يمثّل انه يسالني عن النادي و عن اللاعبين..
بعد اللف والدوران والاسئلة والتمثيل
توجهّنا لورا المبنى..
عند المستودع المشئوم..!
تكلم بصوت عاالي....يسالني كيف كان شعوري لما عرفت بالحريق اللي صار..
ومدح شجاعتي..لما دخلت وسط الحريق.......الخ
طبعا هذا كله تمويه..
تأكدت ان مافي حد لحقنا...
همس حمد : خلييج مركزة معااي هني..!
تنهدت..وهزيت راسي موافقة...
.
بدا يصوّر المستودع من براا...
اقترب من الدريشة..وصوّرها..بالكاميرا اللي معلقها ع رقبته..
همس بصوت واطي :قلتي اول شي لمحتي راسه من هني...
هزيت راسي موافقة..
وأشّرت له ع المكان اللي جفته منه...
مشى ووقف عند الباب الحديدي..
قال : وهني قدرتي انتي و خليفة تفتحون الباب اللي لقيتوه مبند..
جفته يتفحص الباب عدل..
وبعدها دخل المستودع...
ظهّر دفتره وقلمه...وبدا يرسم المستودع..
وقفت وراه اراقبه..
مشى كم خطوة ووقف...
نزل شوي وتفحص الارض بدقة..
همس باستغراب : آثار عكّاز ع الرماد..؟
هييه عكّاز عليّ ..!
كتبت : هيه..كان هني عكّاز علي...لان في المباراة اللي قبل النهائية انكسرت ريوله..!
قال بتفكير: اهاااا.....! " وقف وأشّر ع مكان " انتي جفتي علي من الدريشة..يعني اممم كان طايح هني..!
هزيت راسي بـ هيه..
راح للمكان...و ظهّر فرشة صغيره...ومسح ع الارض بخفه يبعد الرمآد....
بعدها ظهّر عدسة مكبرة وتفحص المكان بدقة..
وانا اطالعه بتعجّب...!
عيل ليش ما صار شرات ابوه محقق اذا عنده كله هالخبره.؟
قال : هيه صح...في آثار..!
انتبهت عليه يوقف ويصوّر المكان..ورد عند الباب وصوّر الدريشة والباب والمستودع بشكل كامل..
.
راح لآخر المستودع....عند الدريشة المكسورة اللي توني اجوفها..!
همس : اعتقد من هني دخل القاتل ...وبعد ما ارتكب الجريمة ظهر من هني بعد..
هزيت راسي موافقة ع كلامه...لاني كنت اراقب المستودع من الباب..وما جفت حد دخل..
حطّ ايده ع ذقنه بتفكير...: لو بس احصّل دلييل وااحد ضده...!!
نزّل مستواه لـ تحت الدريشة ونفض الرماد من تحتها..وبدا يفحص المكان..
،
رديت ع ورا...ودوّرت بين الرماد..يمكن احصّل سلاح الجريمة ..!
بس مافي شي...!
يلست ع ركبي...ونفضت الرماد بخفّة...يمكن احصّل شي طااايح....او دليل صغير..
حمد بحمآس : حصلته..!!!!
ما انتبت عليه...!!
تأملت البقعه السوودا اللي ع البلاط...
مسحتها بايدي عددل...
يمكن ها السوااد من الدخآن...
بس لا..حسيته ياابس..وكأنه طبقه ثانية..!!
حمد همس متحمّس : تعاالي جووفي شو حصلت....
انتبهت عليه...ورحت له اجوووف..
لما دققت عدل......تحسسته بايدي....هييه...هذا نفس اللي هنااك..
قال : هذا دم..!
دم..!!
كتبت : دم..؟ دم علي..؟
قال بهمس : هيه...
كتبت بسرعه : كيف وصل هني.؟
سألني : علي كيف كان نزيفه..؟
نزيفه..؟
كتبت : ماجفت كيف كان ينزف لانه المكان كان مظلم...لكن حسيت بايدي ان نزيفه كان غزييييير...
هز راسه : هيه وها يفسّر وجود الدم فـ هالمكان... اعتقد ان دمه ياا ع القاتل..ولما هرب من الدريشة..وصل الدم هني...
وافقت ع تحليله...
سألني : انزين...انتي ما انتبهتي لحد من اللاعبين عليه دم .؟ اوو متخررس بالماي,.؟ يمكن غسل ملابسه او شي..
هزيت راسي بالرفض..
كتبت : ما جفت....الوقت كان بالليل...فما انتبهت...غير ان بدلاتنا لونها اسود...فما بيبيّن شي..!
وقف وهو يفكّر...
ماعطيته فرصة..وسحبته للمكان اللي جفت فيه الدم بعد...
حمد : القاتل شكله كان واقف هني...هممممم..؟
تحرك فجأة للمكان اللي حصلت فيه علي....ونفض الرماد عنه....
وقف بسرعه..وردّ عندي....وبدا ينفض الرمااد اكثر....
لين باانت بقعه كبيييييييرة سوودا...
حمد رفع حاجبه متفاجىء...
قالي بسرعه : انتي قلتي لما جفتي علي طايح...المستودع كان مظلّم.؟
هزيت راسي بـ هيه...
.
مسكني من ايدي..وظهّرني من المستودع...
همس لي : سمعي...ابيج تغمضين عيينج...وتدخلين المستودع نفس ما دخلتيه اوول مرة...وجفتي علي هناك طايح..
استغربت منه...
قال باستعجال : يلااا..وركزي...ابيج تتذكرين كل حركة سويتيها....و لا تبطلين عييينج...
دخلت المستودع وانا مغمضة...
واحاول اتذكر..واعيد مشهد هذاك اليوم...
مشيت كم خطوة وانا انادي علي....
وقفت...هني ضرب ريولي شي...وهو عكّازته..
قال حمد : هني جفتي العكّاز...
هزيت راسي بـ هيه..
كمّلت...ع اليسار......بعد خطوات....وقفت...
هني....!!! هني حصلته طاايح وغاااارق بدممه...
فتحت عيوني وتنهدت بعممممق..
جفت حمد يطالعني وهو رافع حواجبه....
؟؟
أشّر لي بعيونه ع الارض....
نزلت راااسي...وتفاجأت...
كيف جيي..!!
انا متأكدة اني جفت علي هنااك...!
لحظة...
يمكن علي كان يحاول يطلع ..!!
بس ماقدر..
يعني كااان حي لما رحت عنه....
لالا...بس ماشي هناك آثار دم...
يعني علي ماتحرك..!
حمد خذ عينه من الارض...وصوّر كل بقعه في المستودع...
.
جفته ظهر وراح لورا المستودع...
رحت وراه...
وانا احس قلبي بيتقطع....علي كان يترياااااني ايي اساااعده....!!
.
حمد بأمل : ان شاءالله نحصصل شي هنيي...
طالعت المكان....
كلله اغراض قديمة...
انتبهت للدريشة المكسورة..و اللي عدالها شجرة كبيييرة..
وعليها آثار حرق بسيط...
حمد اقترب من الدريشة اكثر...ودقق في اليدار اللي تحتها...
قال : هنيي فيه آثار دم بعد.." طالع فيني " دوري بين هالاغراض..يمكن نحصّل شي..
سويت اللي طلبه منّي...و الذكرى الحزينة تدوور فـ راسي...
حاولت اطردها من راااسي....
علي كان هذا يومه...
سواء تأخررت او لااا...مكتوب انه يموووت..
,
تمينا نبحث عن الدلييل ...
طالعت الساعه....خلّص الدوام من زمان....
اكيد الشباب ردّوا بيوتهم..!
.
رحت صوب الاشجار الكثيفة اللي ع شكل سوور صغير ...
وبديت ادوّر فيها...
التفت بجوف حمد شو يسوي..
شفف هذا..!
جفته يتسلق الشجرة الكبيرة..
ويدقق فيها بالعدسة المكبّرة..
ماظن نحصّل شي هني...
.
بعّدت هالاشجار الكثيييفة...وتفحصت داخلها...
...
أمممم خلوني افكّر نفس المجرم...اذا عندي سلاح جريمة..وين ممكن اخبييه.؟
اول شي بيي فـ بالي أخشه هني بين هالاشجار...لان مستحيل ايي فـ بال حد هالمكان..!!
تحمست...يمكن احصّل سلاااح او دليل هني...
..
طلعت رووحي من كثر ما أدوّر.....!
افف...كل اللي جفته قوااطي وكششرة..
بعّدت اغصان الشجرة.....
آآخخ...
طالعت ايدي اللي انجرحت..
أغصان هالشجر حاادة..
وقفت وانا ماسكة ظهري بتعب...
هفّيييت الهواا عليّ...احترررقت من الشمس
.
رديت ابعّد الاغصان بحذر...
لمحت شي مستطيل ازرق ..
دققت فيه ....وعرفت انها
بترووووول..!!
جفت الدبّه متوسطة الحجم..
فررحت....حصصصلت دلييييييييييييل...
ركضت لـ حمد...وجرييته من الشجرة..
حمد تفاجىء وحاول يتماسك : شفييييج...تريي....بطييييح.....اوك..ا...بيييي...اقو لج بنززززززل..لا تسحبيني جذي..
نزل...ونفض ايده....
ماعطيته فرصة....سحبته من ايده للمكان...
ولما جااااف الدبّة الزرقااااء...طالعني....وابتسسسم بنصصصر....!!
مديت ايدي بسحبها...بس مسكني بسرعه...
قال: لالا...هالاشياء لازم ما تلمسسينه...يمكن نحصل بصمات...او آثار..
بدا يتفحّص المكان....ويدوّر عدال الدبّه عن شي...
قال بهمهمة : السلاح مب هني....
رفع كاميرته و قرّب الصورة ع الدبة...وصوّرها..
وابتعد شوي..وصوّر الاشجار عن قرب..
طالعت الصورة من وراه...
ورديت اطالع الاشجار..
اقتربت اكثر من الشي اللي لمحته ع اغصانها...
قطعه سوداااا..!؟
نبّهت حمد عليها...
اقترب بسرعه منها....
وخذها بـ ملقط وبحذر..
حركّها جدام عيونه يتفحصها...
بعدها قال بشك : هممم انتي قلتي ان بدلة النادي لونها اسوود..؟
انصصدمت...هييه....صح...هذي لونها شرات بدلاتنا..!
خذتها منه بسرعه ودققت فيها...
حمد ابتسم بنصصر : الدليل القااطع حصصلته ضدده..!!!!! جوفي..! على القطعه جزء من حرف...!
فتحت عيوني....القطعه هي جزء الخلفي من البدلة...وو..اللي مكتوب عليها اسم اللاعب...!
بس ماعرفت شو الحرف...!؟
كتبت بسرعه : حمد انت عرفت منووو...!
قال بثقة : انا عرفته من البداية...بس كنت محتاج لدليل...!
كتبت بسرعه : منووو..!!
قال : ما بقول الحين...بعد ما اودّي الادلة المختبر...واتأكد من كم شغله بقولج...
حطّ الدليل فـ كيس بلاستيكي صغير...
ابتعدت عنه..وانا متفااجئة...
يوووسف ولا دلييييييييييييل حصلت ضدده...!!
انا ابصم بالعشر انه هوووو....!!
حسيت بـ حمد يحطّ ايده ع كتفي : ادري تفكرين فـ يوسف..؟
طالعته بحزن..وبعّدت ايده عنّي...
ومشيت لدآخل النآدي..
لحقني وهمس : فجر...! حطّي ببالج ان يوسف مب القاتل...وهالشي الوحيد اللي انا متأكد منه 100%....ما بقولج منوو الفاعل لين ما تستعدي نفسيا ....لانج..انتي اللي بتكشفين الحقيقة جدام الكل...!!!
نزلت راسي وانا اتنهد بألم..
بصرآحه...مابي اعرف منووو...اذا كان واحد من الشباب..!
ع الاقل ابي استعد للصدمة اللي بتييني...
لما وصلنا داخل....كمّل تمثييله جدام الاداريين...وشكرني ورااح...
،
خذت شنطتي ...وردّيت البيت..
فريت عمري ع السريير..وحضنت نفسي....
غمضت عيوني وانا اتذكر كلام حمد....!
قال انه عرف القاتل من البداية...!!
يعني....واحد من الاثنين....فهد...! او عمر..
يت فـ بالي مواقفي الاخيرة ويا فهد...!
حرااام..والله طيييب...!!
ادري انه متهّور و مبيّن انه طايش...ويحب الشهرة...ويمكن هالسبب اللي خلااه يتعاطى..
بس مستحييل يقتل...مستحييييل..
عيل عمر..؟
عمممر..لييش اختفى...!
اختفاءه هو اللي يخليه المشتبه الاول..!
بس حتى عمر...مستحيل يوصل للقتل..
طيب..خجووول.و.مرح...!
،
وبين هالافكااار...رقدت بتعب...
//
//
بعد اسبوع آخر..
،
ركبت السيّارة ..
تأمّلت الشخص اللي يسوق..
التفت لي وقال برسمية : مستعد..؟
هزيت راسي موافقة...
قال : الشرطة محاصرة المكان...بس ينتظرون إشارة منك..
خذت نفس عميييق....!
المواجهه الحين بتبدا...
،
أسبووع كآآمل ماقدرت اررقد من الصصدمة اللي صارت لي..
مع اني حااولت...حاولت اتقبّل اي صدمة ممكن تفاجأني...!
الادلة كلها موجودة وياي...
ممـ..مادري ازعل عليه.؟ او احقد لانه قتل علي..؟
نفضت افكآآآري...ما بشفق عليه...
لازم يتعآآآآآقب...!!
.
حمد تركني اواجههم بروحي....
وهاللي ابييه..
.
اللي وياي ربيع ابووه في الشرطة..
تنقّى لي الاشخااص بحذر...
وتأكد ان مالهم اي علاقة بـالمنظمة..
.
هالشخص بيكون مرافق لي..بما اني ما اقدر اتكلم..
وبعد ما تنكشف الحقيقة جدامهم....
بيتم القبض ع المجرم..
واذا صار شي طارىء...الشرطة محاصرة المكان كله..ومنتظرين إشارة مني..!
،
نزلنا من السيّارة...وتوجّهنا للنادي..
دخلنا الادارة...
و على طول للملعب..
سمعت شخص يوقّف " زيد " اللي وياي...
بس ما سواله سالفة..
.
وقفت لما وصلنا...
غمضت عيني..وخذت نفس عمييييييييق....
ولما فتحتها جفتهم كلهم جدآمي...
طالعتهم بتحدي...الحين كل شي بيووضح..
هه..!
مدّيت الملف لـ زيد...
عطيته نظرة يعني ابداا..
قال بأمر : الكل يتجمّع هني...
طالعوه كلهم باستغراب..
فهّود بفضول: فروووس ..منو هذا.؟ اوو....لايكون مدّرب يديد..!
ماردّيت عليه...
ياا كابتن ستيفن لين عندنا...
تكلم ويا زيد...يساله شو يباا...؟
ظهّر زيد هويته وقال بصوت عالي : انا محقق...وياي هني بطلب من فارس محمد الـ.....
سالم باستغراب..: فرووص انت يايبنه..؟ لييش..؟
زيد بجدية : ممكن تتفضلون تقعدون...عسب تسمعون شو اللي نبا نقوله...
جفتهم تربعوا ع الحشيش جدآمنا...
وو بعد ما الكل سكت..
تكتفت وطالعتهم واحد واحد...
زيد : انا بتكلم بالنيابة عن فارس...
طالعوني متستغربين...اولا..بسبب نظراتي لهم...ثانيا..لاني يايب المحقق وياي..
خلييفة : تفضّل يالمحقق..قول اللي عندك..!
زيد بجدية :ببدا في الموضوع الاساسي على طول.....احــم...انتوا تعرفون الاحداث الاخيرة اللي صارت قبل اكثر عن شهر..! مثل الحريق...واختفاء عمر..وموت اللاعب علي..!
سيف : وهالامور انتهينا منها من زمان..
زيد بجمود : اذا انتوا نسيتوها..او تناسيتوها...فـ " أشّر عليّ " فارس ما نساها..!
ناصر رفع حاجبه : انزين...وشو اللي ما نساه..؟
زيد خذ نفس وقال : موت علي..!
حميد تكلم بنرفزة : وهه...واكيد عمر هو السبب..!
زيد بحزم : ممكن محد يقآطعني...!
تحرطموا الشباب شوي..وعقبها سكتوا..
زيد : الكل يعتقد ان موت علي كان صدفة..! بس الحقيقة...تثبت....انه مات مقتول..!!!
جفت الصدمة ع ويووه الشباااااب...!!
ابتسمت بسخرية لما جفته يمثّل وياهم...
زيد كمّل بحدة : يعني فـ النادي صارت جريمة قتل...!!
الصمت عمّ الكلام...
ولين ما استوعبوا جملته الاخيرة...
سالم عصّب : انت شو تقووول..!! تستهبل.؟ تقول علي مات مقتول..وانا جفته جدام عيني مآت محروق.." طالع فيني " فااارس...شفيييك..!! جوفه شقآعد يخربط..! قول شي..!
زيد : يالمحترم انت....انا اتكلم بالنيابة عن فارس.!...يعني ما يبت شي من عندي..وكل ها هو كلام منه لكم...!
تنرفزز سالم : فاااارس....ياخي خلاااااص...لازم ترضى بالقضاء والقدر...انا..انا اللي ربيعه من الابتدائية ما سويت اللي سويته....! مب كل مارحنا وردّينا تذكرنا بسالفة علي...! بعدين اي جريمة اللي تتكلم عنها..!!
فهد : يااا فااارس..علي مات وهذاك كان يومه...ليش تكبّر الموضوع ..!!
سيف : وخليته جريمة قتل..!!! منو اللي بيتعمّد يحرقه..؟
هه..!
ماعطيتهم سالفة...وطالعت زيد ..يعني اعطيهم الجرعه الثانية..
زيد : علي مآت مقتول.....والمجرم " قالها بحدّة " واحد منكم....!
كلهم طالعووني باستنكآآر...!!
مآيد : شكلكم استخفيتوو.!
خلّوف باستنكآر : فرووص..! شفيك..! مب طبيعي اليوم.!
جآسم : تقول اللي قتل.! واحد منا.؟!!!!! تتهمنااااا..!
غمضت عيني...وابتسمت بـ سخرية وقهر..وألم..وغيييض....
رفعت ايدي ببطىء..
فتحت عيني...
و أشّرت بسبآبتي....
عليهم...
لا....مب علييهم.....علييه هووو...
قآتــــــــــــــل علي....!
//
~| نهآية الهمسة الثامنة و عشرون |~
|
15-09-11, 11:03 AM
جديد مواضيع قسم القصص المكتمله
العرض العادي
