كاتب الموضوع :
بياض الصبح
المنتدى :
القصص المكتمله
(الجزء السابع)
وحشتني سواليــفك ووحشـة شوفتك أكثـــر...
دخلت سارة بيت مشاعل الي كانت باستقبالها..
سارة اول ماشافت مشاعل انفجرت صياح...
مشاعل بخوف:سارة وش فيك؟
سارة ضمت مشاعل وهي للحين تصيح:انا...حامل..
مشاعل بعدت عن سارة شوي وسكتت سارة حامل ومالها الا شهرين وهي لها سنتين وماحملت...
مشاعل:تأكدتي؟
سارة:ايه..
مشاعل:وليش كل الصياح والمناحه الي مسويتها انا قلت البنت فيها شي والا زوجها جاه شي...تصيحين عشانك حامل!
سارة:مالي الا شهرين متزوجه واحمل..
مشاعل وهي تمسك سارة وتجلسها:سارة مايجوز كذا تسوين هذا امر الله..بعدين وش الي مزعلك لهدرجه يعني تحسين نفسك مو مستقرة مع فهد؟
مشاعل تحسب ان كل الناس مثلها او مثل تفكير خالد..
سارة:لاأبداً انا مبسوطه مع فهد...بس احس ان الحمل بدري عليه...ماكانت متوقعه ابداً
مشاعل:اكيد انك نسيتي مرة تاخذين حبوب..
سارة:اكيد..
مشاعل راحت افكارها لبعيد..تفكر بحياتها مع خالد..الي مالها طعم..تحس ان حياتهم تمثيل في تمثيل خالد يحاول انه يتأقلم بحياته يومين وبعدها يرجع خالد الاول...مشاعل حريصه على انها تاخذ الحبوب وماتتأخر ولا تنسى..لانها للحين تحس ان حياتهم مو مستقرة...او خالد يحسسها هالشي..
سارة:مشاعل وش اسوي؟
مشاعل:هاا؟
سارة:برمي نفسي من الدرج..
مشاعل:صاحيه انتي..ماتخافين الله..ترا في ناس تحمل مرة وحده وماتقدر تحمل بعدها يعني انتي بتظمنين انك تحملين مرة ثانيه!
ناس يتمنون انهم يحملون وانتي....
سارة:استغفر الله...
مشاعل:وفهد وش رايه؟
سارة:مايبي هو بعد..
مشاعل:ليش؟
سارة:يقول تونا نبي ننبسط والحمل انشالله بعدين..
مشاعل:يعني اذا جاكم عيال ماراح تنبسطون..وش هالتفكير..
سارة:طيب وراك ماتحملين انتي؟
مشاعل سكتت ودمعت عينها لاشعورياً..
سارة:مشاعل والله آسفه لا تزعلين..
مشاعل وهي تاخذ منديل:مازعلت...
سارة:ماابي ارجع البيت..بروح بيت اهلي..
مشاعل:سارة كبري عقلك..
سارة:ياربي ساعدني..
مشاعل:تبين قهوة؟
سارة:لا,ابي ماي..
مشاعل:طيب..
راحت مشاعل المطبخ وخالد كان جالس يسوي له ساندويش..
دخلت مشاعل بدون ماتنطق ولا بكلمه..
خالد:وش عندها سارة؟
مشاعل بدون ماتلف عليه:ماعندها شي..
خالد:الا عندها شي...الجيه المفأجاة فيها شي..
مشاعل:اييه في شي..
خالد ببرود:تبين ساندويش؟
مشاعل:شكراً..
خالد:ترا انا بطلع الحين..بروح امشي..
مشاعل:لوحدك؟
خالد:انا واحمد..
اخذت مشاعل كاس ماي لسارة ورجعت لصاله..
سارة:زوجك فيه؟
مشاعل وهي تمد لها الكاس:ايه..الحين بيطلع..
خالد بصوت عالي:ياولد..
مشاعل:تعال تعال..
تغطت سارة..
خالد:هلا سارة شخبارك؟
سارة:بخير..انت شخبارك؟
خالد:الحمدالله,شلون فهد؟
سارة:بخير الله يسلمك..
طلع خالد...
مشاعل:افصخي عبايتك..
وقفت سارة وفصخت عبايتها..
مشاعل:امشي نروح الصاله..
راحوا الصاله...انسدحت سارة على الكنبه ومشاعل جالسه على الطرف..
كانوا ساكتين وكل وحده تفكر...كلن على هما سرا..كل واحد يفكر بهمومه وبحياته وبمشاكله...
سارة بدا نفسها يطلع وينزل وتصيح بدون صوت...
مشاعل التفت على سارة:تصيحين؟
سارة:يا ليت امي في يامشاعل...
مشاعل سكتت شوي..وفجأة انفجرت صياح هي الثانيه..
سارة رفعت نفسها:ليش تصيحين؟
مشاعل:اصيح على امي..
سارة ضمت مشاعل وبدو يصيحون..
مشاعل:لو ان امي في كانت بتساعدني...كان وجهتني وفهمتني وعلمتني وش اسوي ووش مااسوي..
سارة:انا دايما اقول كذا...لو امي في كان تغيرت اشياء كثيرة بحياتنا...
مشاعل:لو جتك بنت سميها ناديه..
سارة ابتسمت:اكيد..
مشاعل:وانا بعد بسمي بنتي ناديه..
بوقتها رن جوال سارة وكنت انا...استغربت انها ماجت..وقلت اتصل اشوف وينها..
سارة:هاذي نورة..
مشاعل:ردي..
ردت سارة وصوتها ماكان طبيعي..
:هلا سوير وينك؟
سارة:ماراح اجي..
:ليييييييش..لا انتي ولا مشاعل يا سخفكم..
سارة:انا عند مشاعل..
:اهاا في اجتماع مغلق يعني؟
سارة:اييه..
:ما يصلح اجي؟
سارة:انثبري بس..
:طيب عطيني ميشو..
مدت سارة الجوال لمشاعل..
:ميشو ياسخفك انتي واختك..
مشاعل:لهدرجه تحبينا؟
:شفتي كيف..
مشاعل:سلميلي عليهم كلهم..,وبكلم عمتي اعتذر لها..
:طيب..يلا باي..
مشاعل:باي..
><><><><><><
بشارع الملك عبدالله بالممشى خالد واحمد يمشون بخطوات سريعه اقرب للركض...باجسام رياضيه ولياقه واضحه عليهم..
الممشى كان زحمه...بجميع الاعمار والاجناس..شباب وبنات وحريم ورجال واطفال وكل واحد وغرضه سواء كان رياضه او تمشيه او معاكسات ومضايقة الناس..
أحمد:ملكتي بعد اسبوع..
خالد يلتفت عليه:غيرت الموعد؟
احمد:اييه الصراحه بعد اجازة الصيف بعيد مرة..
خالد يناظر احمد وماهو عاجبه كلامه:يعني لهدرجه مستعجل على الشقا..
احمد يتريق:اييه مستعجل مرة..
خالد:بالشرقيه طبعا؟
احمد:اييه..
خالد:ومتى الزواج؟
احمد:ببداية الدراسه..
خالد:الله يوفقك..
احمد:امين..
خالد:وهي ماعندها مانع تجي تسكن هنا؟
احمد:طبعاً ماعندها مانع والا ماكان وافقت..
خالد:هههههههه...
احمد:وبتكمل دراستها هنا..
خالد:بتبدا من جديد؟
احمد:اييه...هي لسا في ثاني جامعه..
خالد:اهاا..
بعد سكوت شوي..
خالد:شفت لميس..
احمد مااستوعب ولارد على خالد..
خالد:اقولك شفت لميس..
احمد لف عليه:شلون؟
خالد:قبل شهر...لما رجعت من الصيد..انا ماقلت لمشاعل اني برجع بهاليوم..وشفتها..
احمد:ياسلام عالصدفه..
خالد:يعني مواعدها مثلا..
احمد:ماادري عنك..
خالد:بس تعرف وش سويت...لما شفتها صديت عنها وناديت على مشاعل...بهالموقف حسيت كاني طفل..يبي يقهر الي قدامه بالي معاه..
احمد ضحك باستهزاء..
خالد:طلعت بعد مااطمنت علي...
احمد:بعد!
خالد:غريبه قصتنا...والاغرب الي يصير معاي..
احمد:مالغريب الا الشيطان..انت لو تنسى وتستغفر ربك كان انت بخير..
خالد سكت ومارد وماحب يتكلم بذا الموضوع اكثر من كذا..
>>><<<
جالسه ومكتمه وضايق صدري ومنرفزة...ابي ارجع البيت..ابي اشوف سلطان قبل لايسافر بسلم عليه وبوصيه على أشياء.. عشان يكلمني...شفتو شلون انا ذكيه..
الساعه 11:15...
:عمتي...
مادرت علي..كانت تسولف وتضحك ومبسوطه..
:عمتي...عمتي فوزيه..
اخيراً ناظرتني:نعم ياعيوني..
:نرجع البيت..
عمتي حصه نطت علي:وش ترجعين البيت تونا.. دجاجه انتي...اليوم انشالله الى الفجر...
وبصوت اعلى..:شوفوا ياخواتي وياحريم اخواني اليوم ابيكم تسهرون عندي..
لا لا لا حرااام عليك..يعين وقته عزيمتك..ياربي وش اسوي...
بعد تفكير ومحاوله اني اقنع نفسي..هو ماقلي الا اليوم..يعني انا مو اكبر همه...احسسن مااراح اروح ليش اهتم بانسان مايهتم فيني..
منار بصوت واطي:انا بعد ابي اطلع..طفشت..
:انتي قولي لعمتي..
منار قامت وراحت جنب عمتي:عمتي ابي ارجع...لو سمحتي انا جيت عشانك الحين ابي ارجع..
عمتي بعد تررد:تروحين انتي ونورة وانا وريما بعدين..
منار:طيب..
رجعت منار:يلا امشي..
:والله؟
منار:اييه..
وقفت بسرعه..
منار بصوت عالي:يلا مع السلامه..
عمتي حصه:هو هو هو لا والله ماتروحون...
:عمتي معليش مرة ثانيه..
عمتي حصه:أبداً..انا قايله بتسهرون عندي وجيبوا بجايمكم بعد..
منار:والله اني تعبانه عمتي وماجيت الاعشانك..يلا اسمحيلنا هالمرة..
عمتي وبان عليها انها زعلانه:براحتكم..
:والله انا ودي اقعد بس عشان منار..
لازم المجاملات في حياتنا والا كان علوم..
عمتي حصه:اقعدي وانا اخلي السواق والشغاله يودونها..
ناظرت منار وكاني اطلب منها المساعده..
منار:لا اخاف اروح البيت بلحالي..
عمتي:بكيفكم اجل..
انا سلمت عليهم بسرعه واخذت عبايتي وطلعت قبل لاتجي عمتي وتمسك فيني بعد..
منصور كان عند الباب يابيطلع والا توه راجع..مو وقته أبداً..
منصور:رايحين؟
:اييه..
منصور:بدري..
:من عمرك..
منصور:ليش؟
:منار تعبانه وبنطلع..
منصور ناظر منار:سلامتك..
منار:الله يسلمك..
طلعت منار..على طول..
منصور:نشوفكم انشالله قريب..
:انشالله..
منصور:مع السلامه..
طلعت بسرعه بدون حتى ماارد عليه..ركبت السيارة وشفت ساعة يدي وكانت على 11:30...بعد نصف ساعه بيطلع المطار..
:طاهر الله يخليك بسرعه..
طاهر:بسرعه يعني كم تبغي امشي؟
:لا تقعد تتفسلف..بسرعه وبس..
:عمي موصيني ماامشي بسرعه حدي 100..
منار:تبين توصلين بسرعه عشان سلطان؟
ناظرتها:ايه..
منار:تحبينه؟
سؤال مو بوقته أبداً..
لفيت عليها:لا طبعاً...مستحيييل..ياجعلي مااحب الا رجلي..
منار:ترا بيت عمتي بحي الواحه..وحنا بالمحمديه..يعني مطولين..
:لا انشالله بيمدي..بيمدي..
الطريق كان زحمه بشكل..كل ما نوقف عند اشارة تصير حمرا...الطريق زحمه بمعني الكلمه..
الساعه 11:45...
:طاهر بسرررررعه الله يخليك..
طاهر:يابنت تبغي تموتينا..
:انت الحين على بالك تمشي بسرعه...انت تمشي على بيض..
طاهر:حياتنا ثمينه تبغي اضيع حياتي عشانك..
:شوف طريقك الله يرحم والديك..
منار:وش تبين فيه؟
ناظرتها وسكت...
منار:لا من جد وش تبين فيه؟
:ماادري..
منار:ياسلام..
وصلنا البيت 11:54 تقريبا...
:لا تدخل السيارة اصبر ابغى انزل اول..
فتحت باب السيارة بسرعه ونزلت اركض لجوا البيت...دخلت البيت وكان هادئ ومظلم..
رحت جناحه ولقيته مظلم ومايدل على وجود احد فيه..
خلاااااص راح لا هو قالي 12 والحين 12...يعني المفروض الحين يطلع...
منار:راح؟
:ايه..
منار:طيب ليش كذا ضايق صدرك؟
:كنت ابي اوصيه على شي..لو انه قالي من قبل انه بيسافر وش بيضره..يقهر
منار:كلميه..
:هاا..
عجبتني الفكرة بس لا ماراح اكلمه..
منار:والا ارسلي مسج وقولي له وش تبين...,بعدين حنا كلها شهر ونسافر يعني الي تبينه بتشترينه انشالله...
:ايه صح..
اصلاً ماكنت ابي اوصيه على شي..
طلعنا فوق رحت غرفتي ومنار راحت غرفتها...
بعد مابدلت ملابسي رحت عند منار..
منار قدام المرايا:اسود تحت عيوني مرة...وحبوب طالعه تقهر..
:نفسيتك هالايام اكيد بيصير لك كذا..
منار:شهر ماكلمني يانورة...
:منار هاذي علاقه محرمه وترا الي تسوينه غلط...الى متى حنا بنعيش بهالتخلف..
منار سكتت وماردت علي...ماادري اذا افسر سكوتها انها اقتنعت بالي قلته او انها ماتبي تتكلم بذا الموضوع...
منار:امشي ندخل نت نشوف طلعت درجاتنا والا لا..
:يلا...
جبت اللاب وشبكت نت..
منار:ادخلي ماسنجري..
:وش الباس حقك؟
منار:من واحد الى سبعه..
دخلنا موقع الجامعه ومابعد نزلت الدرجات..كالعاده...
منار:نورة..
:نعم..
منار:احس بيصير شي بينك وبين سلطان..
ناظرتها:لا ماراح يصير شي..
منار:الا..
:حتى لو صار بيصير من طرف واحد بس..الي هو انا..
منار:لا تحبينه يا نورة...
هو بيكفي مااحبه والا احبه..
ناظرتها وابتسمت...
><><><><><
دخل خالد بيته الساعة 12:00 تقريباً وسارة قد رجعت بيتها...
مشاعل كانت منسدحه على الكنبه ولامه نفسها...
خالد:السلام عليكم..
مشاعل بدون ماتقوم ولا تناظره:وعليكم السلام..
خالد:وش فيك؟
مشاعل:مافيني شي..
قام خالد ودخل غرفته واخذ له شاور تقريبا بنص ساعه خلص وطلع مرة ثانيه لصاله ومشاعل على حالها..
جلس خالد واخذ له سيجارة وبدا يدخن...
خالد:الخميس الجاي ملكة احمد..
مشاعل ببرود:ايه..
خالد:عاد اقوله لهدرجه مستعجل عالشقا..
مشاعل ماردت عليه...
خالد:وش تبي اختك؟
مشاعل:حامل..
خالد سكت شوي:مشالله..
بعد سكوت..
خالد:وش فيك زعلانه عشانها حامل؟
مشاعل رفعت نفسها ووجهت نظراتها لخالد:لا زعلانه على نفسي...زعلانه على حياتي..
خالد:رجعنا لنفس السالفه..انا ماصدقت الفترة الي فاتت هاجده وربي مطمنك باسمه...لو سمحتي مشاعل لا تصكين راسي بحكي ماله فايده..
مشاعل:يعني عشاني ساكته اكون راضيه والا مبسوطه...انا بشوف وتاليتها,خالد...
خالد يقاطعها:مشاعل اسكتي والا بروح انام..
مشاعل بعصبيه:ماراح اسكت وماراح تروح تنام...اذا انت ما بعد استقريت معاي ليش مستمرين بحياتنا..وش الي يحدك؟
خالد:مافي شي يحدني...وانا مبسوط بحياتي..
مشاعل:خالد لا تقنع نفسك وتقنعني..انا مااطلب منك حب انا ابي يصير بينا الفه ابي اشوف هالشي بعيونك...خالد حتى تصرفاتك معاي الفترة الي فاتت انا عارفه انك تقنع نفسك فيها...كل كلمه تطلع منك مااحسها من قلبك احسك قاعد تمثل..تتصنع..خالد انا مليت مليت...
خالد ببرود:والمطلوب؟
مشاعل تنرفزت من ردة فعله وبصوت عالي:ولا شي..ولا شي..
قامت مشاعل وراحت غرفتها...قام خالد وراها..
خالد:يعني تبين تحملين؟
مشاعل وهي تصيح:خالد...انا وياك لنا سنتين وبندخل بالثالثه..ماادري ليش احنا عايشين اصلا..انت لو رافض مبدا اني احمل عشان احنا مبسوطين مع بعض...انا موافقه وماعندي مانع..بس انت...انت ماتبي لان حسب وجهة نظرك اننا مااستقرينا بحياتنا..وبنجلس الى متى كذا؟
اربع سنوات خمسه سته سبعه!!
خالد:متى ما استقرينا انشالله عشرة..
مشاعل ماردت عليه وانسدحت وغطت نفسها باللحاف..
خالد:انا لو ابي اطلقك كان سويت هالشي من زمان..ترا مافي شي يمنعني..واكثر ماكثر ربي هالبنات ومليون وحده تتمناني..
مشاعل شالت الغطا عن وجهها:مخدوعيييين مخدوعييين كله ظاهر وبس..
مارد عليها وطلع من الغرفه..
مشاعل بوصت عالي:روح روح بيت اهلك وش وراك انت اصلا...
خالد ماقدر يمسك اكثر من كذا..رجع الغرفه وبعيونه شر..ماقدر يتكلم اكتفى بانه يناظرها نظرات تفسر كل الحكي الي بيقوله...
مشاعل رجعت وغطت نفسها باللحاف:اطلع برا وماابي اتكلم معاك..
مسك خالد اعصابه وطلع من الغرفه بهدؤ وبدون اي انفعال يبين انه معصب..
><><><
الساعه 5:00 الفجر منسدحه على سريري ماقدرت انام...اخذت جوالي واتصلت على مرام صديقتي ماردت اكيد انها نايمه..اتصلت على هاله..اول رنه ردت..
هاله:خير وش فيك؟
:مافيني شي بسم الله عليك..طفشانه ومافيني نوم..
هاله:وانا بعد..
:تعالي عندي..
هاله:الحين!
:اييه الحين وشفيها خلاص طلعت الشمس...
هاله:اقول بس..وشخبارك؟
:هاله انا صراحه كلمتك عشان ابيك تحسبين لي سلطان الساعه كم يوصل..
هاله:شايفتني آله حاسبه...,سلطان مسافر؟
:ايييييييه سااافر ماقلت لك...اليوم سافر وتخيلي ماقالي الا اليوم...
هاله:ترا مو زوجك هو..
:انا عايشه معاه بنفس البيت...وماادري..,المهم ما علينا يلا احسبي هو اقلاعه الساعه 1 وتقريبا بينا وبين باريس 6 ساعات...
هاله:وحده ثنتين ثلاث اربع خمس ست..الساعه 6 والا خمس ونص ماادري على حسب..
:يعني ماراح اعرف الا بكرة....
هاله:بيرجع؟
:اييه طبعاً تخيلي ما يرجع...بيروح اسبوع..
هاله:اييه تخيلي اليوم طارق حبيبي قعد يصيح ومات بعد من الصياح..
:ليش؟
هاله:ولد عمي قعد يقوله انك انت مو ولدهم وحكي بزران..
:ياحياتي..
هاله:سويت مناحه معاه..وطحت لك تهزئ بولد عمي..
هاله دايما تعرف توقت لسواليفها..
بوقتها دخلت عمتي علي...
:هاله شوي واكلمك..
عمتي:هاله بالفجور؟
:اييه..
ناظرتني نظرات شك..
:والله العظيم هاله تبين اكلم عليها عشان تتاكدين
عمتي:اختك مانومتني...
:حتى اليوم؟
عمتي:عرقانه مرة وبس تتقلب..
:طيب الحين نامت؟
عمتي:ايه..والله توها نايمه..
:طيب وديها دكتور..
عمتي:لا مايحتاج..هي هالايام طري امك وتسأل عنها فترة وتروح..
:طيب نامي الحين..
عمتي:بنتظر سلطان يكلمني...
:اييه صح..
عمتي:يلا انتي نامي ترا بكرة بقومك بدري.
:انشالله...
><><><><><
وصلت مطار باريس الساعه 6:00...
انا سلطان حبيت اساعد نورة في مواقف ماراح تقدر هي تكتبها....نورة ماراح تقدر توصف مشاعري وتبينها وعشان الصورة تكمل قلت أكتب بعض الاشياء...
وصلت لمطار باريس وكان باستقبالي زوجتي رانيا ايه زوجتي على سنة الله ورسوله...
لي شهرين ماشفتها كان كثير بالنسبه لها واكثر بالنسبه لي...رانيا لبنانيه وتعرفت عليها عن طريق الشغل كانت تشتغل بشركه من الي اتعامل معاهم..وهاذي بدايتنا وبعدها بسنه تزوجنا ولنا الحين سنه متزوجين...ابوي طبعاً كان رافض هالزواج وهذا السبب الي خلاني مااقول لاحد..
لمحت رانيا من بين زحمة الناس...صارت تمشي بخطوات سريعه..انا وقفت بمكاني وفتحت يدي لها..ركضت لي وضمتني..
رانياوهي تصيح:اشتئتلك...
:
me to
رانيا:شو اخبارك؟
:الحمدالله بخير...
رانيا:لاتحكي هيك..
ابتسمت لها...توقعت اني اكون اكثر تفاعل معها...ماادري هالمرة غير المرات الي قبل..
رانيا:سلطان حبيبي شوبك مش على بعضك..
:تعبان توي واصل من السفر وش تبيني اكون؟
رانيا:هههههههههههههههههههههههه..
:مابيضحك كلامي...انا هيك بحكي اصلاً..
رانيا:بيجنن عليك لو شو ما بتحكي..
ناظرتها وابتسمت:وحشتيني..
طلعت موبايلي واتصلت على امي اطمنها اني وصلت..
بعد ماخصلت طلعنا من المطار ورحنا الاوتيل وهذا طلب رانيا ماتبي تروح الشقه..وانا مااقدر ارد لها طلب..
><><><><><
صحيت من النوم قبل على العصر تقريباً...نزلت تحت وكان في ابوي وعمتي وريما..
:السلام عليكم..
كلهم:وعليكم السلام..
ابوي:تونا بادين اجازة يانورة على طول يبدا السهر..
:لا والله امس ماقدرت انام ماكنت ناويه اني اسهر..
ابوي:وين منار؟
:ماادري ما شفتها..
وقف ابوي من مكانه:نورة تعالي ابيك شوي..
ماادري اول مرة اخاف جت افكار كثيرة في بالي وش يبي مني...
:ليش؟
ابوي ابتسم:مافي شي تعالي معاي..
وقفت من مكاني والتفت على عمتي بعد ماابوي طلع من الصاله:وش يبي؟
عمتي:ماادري والله..
رحت لمكتبه وكان جالس على الكرسي..
ابوي:تعالي اجلسي..
جلست بالكرسي الي قدامه وصرنا متقابلين..
ابوي:نورة اختك وش فيها؟
ارتبكت ماعرفت وش ارد عليه ابتسمت بوجهه:ماادري...لا اقصد ما فيها شي..
ابوي ناظرني:تحب؟
انا طارت عيوني وجهي انقلب الوان..ماتوقعت هالسؤال ابداً وماقد تكلمنا بمواضيع مثل كذا...يمكن ابوي يحاول يصير مكان امي...
:شلون يعني؟
ابوي ناظرني بنظرات شك:الكلمه مالها تفسير ثاني هو سؤال وانا ابي جواب..
:لا ماتحب..,يعني تحب مين مثلاً؟
سؤالي هذا ابي اعرف قصد ابوي وش نوع الحب هذا...
ابوي:واحد من اقربانا من اهلنا..
انا بوثوق:لا لا ابداً بس ظغط الدراسه وهي تقول طفشت من الجامعه...
ابوي:الله يسهل عليكم..
:امين..
ابوي:ايوه نوير وش اخر ابداعتك من زمان ماورتينا شي..
:انت هالايام منشغل ومانشوفك مثل اول..
ابوي ابتسم:تعرفين الشغل,وبعدين انا مالاحظت على نفسي هالشي بالعكس انا مثل ماانا ماتغيرت..
انحرجت وتحسفت على الي قلته حتى لو اني كنت ملاحظه هالشي المفروض اني مااقوله بهالطريقه الي كني شاكه فيه..
:بوريك رسمه توي مخلصتها..
ابوي:يلا روحي جيبيها..انتظرك بالصاله..
رحت وجبت له اللوحه وورتيها ابوي وطلعت لمنار بغرفتها..
فتحت الباب بقوة:منار وينك؟
منار:كنت اتحمم..
:منار حزري ابوي تو وش سألني.؟
منار:وشو؟
:قالي منار وش فيها ليش كذا متغيرة...ماعلينا من هذا جا قالي منار تحب؟
منار وردة فعلها كانت طبيعيه ولااهتمت للي قلته:وش قلتي؟
:قلت لا طبعاً,منار انتي لازم ترجعين مثل اول..
منار:ارجع مثل اول يعني لازم ارجع لفيصل..
:منار انتي سلبيه لابعد درجه..
منار:انا مو على كيفهم ومو هم الي يمشوني,انا انسانه مثلي مثلهم وموكافي الي صار منهم..وش تبون بعد مني خلوني بحالي..
سكت ومارديت عليها وطلعت من الغرفه ونزلت تحت مرة ثانيه..
:ريما تبين من ماكدونالدز؟
ريما:لا..
عمتي:والله من قامت مااكلت شي..
ريما:ماابي مو جوعانه..
:ريما لازم تاكلين شوفي كيف انتي ضعفانه ووجهك اصفر..
ريما:ماابي ماابي..
:كلمك سلطان عمتي؟
عمتي:ايه..
دخلت علينا مشاعل ومبين على شكلها انها مو طبيعيه..
سلمت علينا وجلست وكانت ساكته..
وبعدها بشوي دخلت سارة وهي الثانيه نفسيتها اردى واردى..
بعد فترة تقريبا على المغرب وكان الوضع ممل كل وحده ساكته وحكي خفيف كان بينا بغير العاده..
عمتي:وراكم كذا انتم..متهاوشين مع رجالكم؟
:ههههههههههههههههههههههه...
ريما تناظرني وتضحك اشك انها فهمت انا على ايش اضحك...
عمتي:لا والله مو طبيعين..فيكم شي..
:هذا الزواج..
عمتي:مشاعل وسارة متزوجين بس منار ماعندها رجل وراها مبرطمه كذا..
سارة:مافينا شي...
سوت سارة حركه لمشاعل انهم يطلعون من الصاله..
طلعوا الثنتين من الصاله..
وبعد فترة قصيرة طلعت عمتي بعد من الصاله..
دخلت غرفة سارة الي كانوا قاعدين فيها..
مشاعل كانت تصيح..مشاعل اول مرة تصيح كذا قدام سارة...مشاعل هالمرة وصلت معها والانسان له صبر بس الصبر مايدوم لازم يجي اليوم الي ينفذ فيه...
عمتي:مشاعل وش فيك؟
مشاعل وهي تمسح دموعها:مافيني شي..
عمتي:بعيني اشوفك تصيحين وتقولين مافيني شي...
سارة:مشاكل مع خالد..
عمتي:عارفه انه مشاكل مع خالد,بس الي مااعرفه وش هالمشاكل؟
مااحد رد..
عمتي:انا مثل امكم وانتم وربي يعلم انكم بناتي مو مثل بناتي..,مشاعل لاتحسبين الايام الي راحت اني ماادري ان في مشاكل بينك وبين خالد...هاذي خصوصيتك وحياتك والحرمه لازم تحفظ اسرار بيتها,لكن في اشياء الواحد مايسكت عنها ولازم يستشير احد اكبر منه له خبرته بالحياة..انا قدامك حرمه مطلقه تزوجت وانا عمري 19 سنه ورحت لامريكا جلست سنتين وبعد ماحملت رجعت لاهلي ماقدرت استحمل اعيش هناك مع اني كنت احب عبدالرحمن وهو يحبني بس في اشياء ماقدرت استحملها...والوحده منا اذا ماجابت عيال وحست ان حياتها ماهي مستقرة او ماحبت زوجها..تنفصل عنه وربي يعوضها...
مشاعل رجعت تصيح بس ماتكلمت ولا كمله مشاعل ماكانت تقدر تحكي وتطلع الي بقلبها في اشياء كثيرة اتوقع ان حتى سارة ماتعرفها...
عمتي:براحتك يامشاعل...
سارة:عمتي بقولك شي..
عمتي لفت على سارة:خير..
سارة:انا حامل..
عمتي طارت عيونها:صادقه انتي؟
سارة خنقتها العبرة:اييه صادقه...
عمتي:هههههههههههههه,وراك تصيحين؟
سارة:ماكنت متوقعه,عمتي مرة ضايق صدري وخايفه..
عمتي:هذا امر الله والمفروض تفرحين مو تصيحين..
سارة:ودي افرح بس مااقدر...يعني ماادري بس خايفه..
عمتي:ياحليلك ياسارة..اجل حامل..
سارة:عمتي..
عمتي دمعت عينها:والله وبصير جده..
سارة ضمت عمتي وصاحت...مشاعل كانت ساكته وحست ان موقفها كان صعب...
عمتي:والله كنت ابي مشاعل تحمل قبلك.بس كلكم واحد..
مشاعل قامت وطلعت من الغرفه...
عمتي:سارة حلفتك تقولين لي مشاعل وشفيها؟
سارة:متهاوشه مع خالد..
عمتي:ادري وطبيعي الوحده تصير لها مشاكل بحياتها بس ماادري هالمرة غير..
سارة:يمكن مشكله كبيرة شوي...
عمتي:يعني ماتبين تقولين؟
سارة:مشاعل ماتبي تقول لاحد..
عمتي:بس انا عمتك..انا اخاف عليكم سارة ترا قلبي متقطع لا تزيدين الي فيني..
سارة:مشاكل عشان الحمل,خالد مايبي..
عمتي:بس؟
سارة:خالد ما يبيها تحمل لانه خايف ان حياتهم ماتستمر..ومايبي يصير بينهم عيال..
عمتي:خايف انها متستمر اجل ليش عايش معها..لهدرجه المشاكل بينهم؟
سارة:مشاعل تموت عليه والا لو وحده ثانيه مااستحملت يمكن...
عمتي:وهو؟
سارة:الي اشوفه انه ما يحبها..
عمتي:شوفي ياسارة البنت قبل لاتتزوج تحسب انها بتلقى الحب والسعاده الي كانت تتخيلها قبل لا تتزوج,بس اذا تزوجت يمكن تنصدم...وبيصير عكس ما تخيلته تماماً...انا الي ابيك تفهمينه مشاعل ان الحب مو شي اساسي اهم شي الاحترام والتفاهم والحب يمكن يصير مع العشرة والعيال...ترا نص الي تشوفينهم ما يحبون حريهم بس في بينهم احترام والفه ورحمة..وتلقينهم عايشين حياتهم مبسوطين ومرتاحين..
سارة سكتت وكانها تفكر بكلام عمتي اذا هو صح والا لا..كل انسان وله طريقة تفكيره وله مبادئ ومفهوميات تختلف عن الثاني...يمكن هالكلام يقنع عمتي ويقنع سارة بس ما يقنع مشاعل...
دخلت ريما وقطعت كلامهم وكانت ماسكه جوال عمتي
ريما:سلطان يبغى يكلمك..
اخذت عمتي الجوال وطلعت من الغرفه..
نزلوا سارة وريما عندنا بالصاله..انا ومنار
سارة:بنات بقولكم شي..
لفيت عليها اما منار مااعت اي اهتمام..
سارة:منار ياحمارة بقولكم شي..
منار وهي تلف:يعني لازم اشوفك..تراني اسمع..
سارة:احست ماراح اقولك..,نورة وريما تعالوا بقولكم باذنكم..
انا طبعاً اللقافه طلعت عندي وقمت من مكاني ورحت عند سارة..
سارة:قربوا عشان منار ماتسمع..
:سوير عاد يلا قولي..
سارة بصوت واطي ومو مسموع:انا حامل..
مااستوعبت الي قالته سكت شوي..
ريما ماكانت مبسوطه هي دلوعة البيت واذا سارة جابت بنت او ولد بياخذ مكان ريما وبيصير كل الحب له..
:نصااااااااااااااابه..
سارة وعلامات التعجب على وجهها:ليش يعني انصب...
ريما وهي تناظر بطن سارة وترجع تشوفها:يعني بيصير عندك بيبي؟
منار لفت علينا:سارة حاااااااااااامل؟
سارة:ايه..
منار:من جدك؟
سارة:ليش يعني اكذب؟
:مايليق لك تصيرين حامل...انتي كلك هالطول وش بتصيرين اذا حملتي..
سارة:ياسخفكم بس انا خلقه ضايق صدري وتجون انتم كذا تسون..
منار:ياحبيلك ياسارة مااصدق انك حامل..
سارة:شفتو شلون..
:يلا نروح نشتري له ملابس..
ريما كانت ساكته وراحت جلست بكنبه ثانيه..
مناروهي تجلس بينا:بعدي عني نورة..
حسيت ان منار مبسوطه بالي صار..
سارة:اذا جتني بنت بسميها ناديه..
:لا لا الاسم محجوز انا ابغى اصير اول وحده اسمي على امي...
سارة:قدامك ثلاثه تبين تسمين قبلهم لا مافي انا بصير اول وحده انشالله...
منار:قدامك ثنتين انا ماراح اتزوج بس يمكن اتبنى بنت واسميها ناديه...
سارة:الله يرحم حالك انتي..
دخل ابوي بوقتها وقالت له سارة انها حامل وطبعاً ردة فعل ابوي مثل ردة فعل اي أب يفرح لحمل بنته وخاص انه الحمل الاول في العايله...
ابوي:وين مشاعل؟
سارة:فوق..
ابوي قام من مكانه وطلع فوق لمشاعل...
:سارة بتنامين عندنا؟
سارة:ليش انام اعندكم؟
:مو انتي حامل ولازم تتوحمين وتجين عندنا..
سارة:لا تخافين بجي بس اول مااحس بشي..
على الساعه 1:00 الليل وحنا للحين على جلستنا..ابوي طلع فيها..ومشاعل يلا تقول كلمتين على بعضها...
رجعت سارة لبيتها ومشاعل بتنام عندنا..
على الساعه 2:00 طلعوا كلهم ينامون الا انا جلست اتفرج على التلفزيون...
لو في سلطان كان يمكن الحين جالس معاي وساكت كالعاده وانا اراقب حركاته...وفجأة يطلع مني سؤال ينرفزه ويطلع من الصاله ويروح ينام...ياليته في عالاقل يكون في احد يحكي معاي....
قطع حبل افكاري منار وهي نازله تركض ومعها جوالها..
منار:نورة لقيت مكالمه من فيصل...
:احللفي..
منار:والله العظيم..وش اسوي نورة؟
:عطيني موبايلك..
منار:لا والله اصلا المكالمه من الساعه 10:00...بعدين موبايلي مفصول..
:احسسسن..
منار:اخاف فيه شي..
:لو فيه شي ماكان كلم..لا تقنعين نفسك..
منار:عطيني موبايلك..
:لا انسي..انا مااساعد على نشر الفساد
منار:احسن بكلم من البيت..
:منار والله ماتكلمين..
سكتت منار..
:منار اذكري الله...
منار:ماراح اتصل خلاص..
:تعجبيني انتي كذا بديتي تفكرين صح..
منار بعد سكوت شوي:بس اخاف يزعل..
:ماراح يزعل والله ماراح يزعل,الحين انتي اجلسي عندي واذا خلاص استويتي اطلعي نامي..اخاف تسوين شي..
جلسنا الى الفجر وحنا نسولف شوي نتفرج على التلفزيون...وبعدها طلعنا لغرفنا...
><><><><><
أكيد البعض منكم يبيني اتكلم اكثر عن نفسي وعن علاقاتي مع رانيا والبعض الثاني اكيد انه كرهني ويمكن ما يبي يقرا عني بعد..
قدام المرايا حطيت عطري المفضل ومشطت شعري بحركه سريعه وظبطت
cravat..عندي اجتماع شغل...
لفيت على رانيا وكنت ابس اسالها عن شكلي:نورا..
استوعبت اني غلطت وارتبكت كنت افكر فيها لا تستغربون هالشي...يمكن انا بصورة الانسان الجامد نوعاً ما لكن كنت افكر بنورة بهالوقت ماادري ليش كنت افكر فيها...هالانسانه غيرت اشياء كثيرة فيني نورة غير اي بنت قابلتها في حياتي..انا عرفت بنات كثير من كل الجنسيات كل الاعمار علاقات شغل علاقات صداقه...عرفت سعودين كثير في امريكا السعودين مرتبطين في بعض وعلاقات قويه بين كل فرد فيهم سوا كان كبير او صغير...بس نورة غير...
رانيا ردت فعلها كانت سريعه وبعصبيه:ياحبيبي والله..انت هون معي مو بالسعوديه عند بنت خالك..
ناظرتها ومااهتميت للي قالته وجلست على الكرسي اعدل جزمتي..
بدت تتكلم فرنسي وبصوت عالي.. وانا طبعاً مو فاهم وش تقول..
انا عصبت منها واكره لما تتكلم كذا معاي وبصوت اعلى منها:ranya stopped..,there's no need to shout.
رانيا:ايه طبعاً ما الو لزمه اني اصرخ..
:وانا كم مرة قلت لك لا تحكين معي فرنسي..
رانيا:مو انتا تحكي معي بالانجلش,وانا مابفهم فيها كتير وماالتئلك شي وبعدين بحكي باللغه الي بتعجبني..
:اوكي احكي باللغه الي تعجبك انا طالع..
رانيا:امتا راجع؟
مارديت عليها وطلعت من الغرفه وجت وراي..
رانيا:سلطان مين المفروض الي بيزعل..لو ناديتك باسم واحد شو بدا تكون ردة فعلك؟
:اذا رجعت اتكلم معاك..
طلعت بدون ماانتظر ردها...ماادري وش فيني معقوله اتغير على رانيا مستحيل انا احبها ومقتنع في هالحب يمكن ظغط الشغل والظروف الي انا امر فيها...
بعد ماخلصت اجتماع رجعت الاوتيل وراضيت رانيا..رحنا تعشينا وتكلمنا عن اشياء كثيرة ومن ضمنهم نورة...تكلمت عنها كثير ويمكن بالغت بالكلام عنها..رانيا تضايقت انا ماادري ليش كل هالخوف منها..هي عارفه اني احبها...وخوفها يمكن هو الي نبهني على نورة اكثر...
><><><><><
مرت ثلاثه أيام مشاعل للحين عندنا وابوي طبعاً عرف بالسالفه مو بتفاصيلها لكن عرف ان في مشكله وحاول انه يساعد مشاعل وكان كثير ما يقعد معها ويتكلمون..وخالد ماكلمها من اول ماجت عندنا.. ومنار من بعد مكالمة فيصل لها احسها رجعت نفسيتها مثل اول يعني ماادري وش استفاد من هالمكالمه لو انه مكلمها يمكن احسن...انا ماصدقت انها بدت تتأقلم...
سلطان ماادري عنه ماكلمني مو المفروض انه يكلمني من سافر وانا ماادري عنه اسأل عمتي عنه تقول طيب وش بتقول لي يعني...
صدق ابو نورة باغنيته... لي ثلاث أيام ماجاني خبر.. وعنا قلب المولع وعنا..
نزلت مشاعل وحنا جالسين بالصاله وكانت لابسه عبايتها ومعها شنطتها..
مشاعل:انا بروح شوي وبرجع..
عمتي:وين؟
مشاعل:بروح بيتي...
عمتي فهمت قصد مشاعل انها بتروح بيتها تجيب اغراضها وترجع..
حنا كنا ساكتين وبدون تعليق ماكنت احب اتكلم مع مشاعل بمواضيع مثل كذا حساسه...
طلعت مشاعل من بيتنا وراحت بيتها...دخلت البيت وكان هادئ...فصخت عبايتها ودخلت الغرفه وكانت ظلمه وفي احد نايم طبعا خالد الي كان نايم...توه راجع من شغله وهذا وقت نومته...
دخلت الغرفه بهدؤ عشان ما يقوم..حس خالد بدخول احد الغرفه..رفع نفسه ولمح طيف مشاعل..
خالد:مشاعل..
قام خالد من السرير وفتح الستارة ونورت على الغرفه وصار يشوفها بوضوح اكثر..
كملت مشيها ولا عبرت خالد..
دخلت غرفة الملابس واخذت شنطه صغيرة من الدولاب تكفي ملابس لمدة اسبوع...
خالد وهو واقف عند الباب:جايه تاخذين اغراضك؟
مشاعل:ايه...قلت اخليك فترة تفكر وانا افكر فيها وكل واحد يرتاح شوي..
خالد:افكر بايش؟
مشاعل:اذا بنستمر بحياتنا والا لا..
خالد يقاطعها:من جدك تبيني افكر كذا..مستحيييل..
مشاعل:مو انت قلت ما في شي يمسكني اني مااطلقك ومليون بنت تتمناني..الله يوفقك وشوف طريقك بعيد عني..
خالد:مشاعل كان حكي بلحظة غضب ولا تاخذينه بمحمل جد..
مشاعل بدت تصيح:تقعد تجرح فيني وماتبيني اخذها بجد..ليش احنا قاعدين نلعب والا كل واحد يمزح عالثاني..
خالد:مو هذا قصدي بس..
مشاعل تقاطعه:الي انا اشوفه ان كل واحد يجلس يفكر والي ربي كاتبه بيصير انا ماعندي استعداد اعيش حياة بمشاكل وهموم.
خالد سكت شوي:اوكي اذا هذا الي يريحك سويه..بس تأكدي اني عند رأيي...
ماردت عليه مشاعل وكملت شغلها وبعد ماخصلت طلعت من بيتها ورجعت لبيتنا..
دخلت مشاعل البيت والشغاله شايله شنطتها..السكوت كانت ردة فعلنا مااحد حكى فينا استغربنا من هالشي...المشاكل وصلت لهدرجه..
عمتي ماكانت مستغربه وشكلها هي الي قالت على مشاعل هالفكرة..
عمتي:منار ترا مابقى على موعدك الا نصف ساعه..يلا تجهزي..
منار:ماابي اروح..مافيني شي..
عمتي بصرامه:انا بروح البس وبنـزل والقاك جاهزة..
منار:ياربي يعني غصب...
ماردت عمتي وطلعت من الصاله...وطلعت منار بعد وهي تتأفف ومو عاجبها انها تروح الدكتور تسوي تحاليل...
مابقى الا انا ومشاعل وريما...
ريما كانت منسدحه على الكنبه وشكلها تعبان...
مشاعل كانت ساكته واحسها تفكر بخالد هذا الي براسها الحين..
اما انا ادور لي شي افكر فيه غير سلطان...ماابي اخلي كل تفكيري فيه..
طلعوا عمتي ومنار راحوا وحنا على حالنا...
بالسيارة..
منار ساكته ولافه على الشباك كانت تتجنب نظرات عمتي لها...
بعد سكوت دام لدقايق..
عمتي:منار..
منار بدون ماتلف عليها:نعم..
عمتي:انا ماقد حكيت معاك بموضوع فيصل..ولا انتي قد جيتي وحكيتي...انا توقعت انك تجين تصيحين عندي وتطلبين مني اني اقنع ابوك..بس ماشفت هالشي...شوفي يامنار انا كنت اقدر اقول لابوك وانتي تعرفين وش اقل شي بيجيك منه...مايحتاج اوصف لك ردة فعله..
منار:.............
عمتي:انا خايفه عليك يامنار والي سويته ما يرضي الله...وانتي وحده كبيرة وعاقله وفاهمه..مو مراهقه عمرها 16 سنه..
انا بكلم فيصل واخلي يرجع يتقدم لك لو كان يبيك صدق..
منار وجهت نظراتها لعمتي باستغراب..
منار وهي تمسح دموعها:والله عمتي؟
عمتي:ايه..
منار:ياحبيلك والله اني احبك عمتي الحين كلميه الله يخليك..
عمتي ابتسمت من غير نفس:انشالله..
عمتي سوت هالشي بدون رغبتها...بس كانت تبي تصحح غلطه طاحت فيها منار..
منار:خلاص نرجع البيت ماابي اروح المستشفى..
عمتي ماردت عليها..
منار:خلاص نروح المستشفى ولو تبون بعد انام هناك..
عمتي لفت عليها:بسم الله عليك..
منار ابتسمت ابتسامه عريضه وكانت تعبر عن الفرحه الي فيها...معقوله بيرجع الامل لمنار وفيصل وبيتزوجون ليش لا كل شي جايز...
راحوا المستشفى وسوت منار التحاليل والدكتور بدون ما ينتظر النتايج عرف ان عندها فقر دم ونقص حديد...
رجعوا البيت ومنار الضحكه من هنا لهنا..انا شكيت انه صار شي...
منار:نورة تعالي بسرعه..
عمتي لفت على منار وهزت رقبتها..
رحت معها الغرفه وكانت تركض من الفرحه...
دخلنا الغرفه وسكرت الباب..
:يلا قولي وشو؟
منار:اقرصيني اول..بشوف اذا انا بحلم والا بعلم..
:بلا سخافه يلا قولي..
منار:تخيلي تخيلي يانورة عمتي قالت بكلمه يتقدم لك مرة ثانيه...,بس صح شلون تكلمه ماتعرف رقمه ولا اخذته مني..
سكت شوي:وانتي ليش مبسوطه؟
منار:بنتزوج يانورة انا مرات يجيني احساس انه في امل...انا الحين احس خلاص فيصل مكتوب لي وانا مكتوبه له..
:افرضي ابوي رفض؟
منار:عمتي ماقالت كذا الا انها بتقدر تقنع ابوي وخاصه ان الولد مافي شي يعيبه..
:يارب يارب انك تتزوجينه وتفكينا منك..
منار:آميييييييين..,وش رايك اكلمه؟
:مجنووونه انتي..لا طبعاً..
منار:ايه صح ما يحتاج احسن اذا جا وتقدم ووافقنا....
جلسنا نحكي شوي بعدين نزلنا تحت ومنار ماهي منار الي قبل ساعتين بس..انقلبت 180 درجه...
><><><><
سارة منسدحه على السرير وفهد قدام المرايا...
سارة:فهد..
فهد:عيون فهد..
سارة:يقولون ان الكعب العالي مو زين للحامل..
فهد:اجل لا تلبسينه..
سارة سكتت وكانت بتتكلم بس ماكملت..
فهد:سارة حبيبتي شيلي هالافكار الاجراميه من راسك..ترا مااسمح لك هذا ولدي..
سارة:ههههههههههههه..
فهد:سارة انتي حملتي وخلاص انتهى الامر...ولازم مانعترض على امر الله..
سارة:مااعترضت..
فهد:تراك حامل مني..الي في بطنك ولدنا..سوسو مستوعبه بيصير عندنا بنت والا ولد..يعني انتي بتصيرين ام..
سارة سكتت وابتسمت..
فهد وهو يحط كلونيا:انا بقول لاهلي..
سارة بصوت عالي:فهد وش حطيت ارمي هذا العطر في الزباله...
فهد:الحين على بالك تتوحمين..
سارة:بروح انام في بيت اهلي..
فهد:هههههههههههههههه...اعقلي بس..
سارة:ريحة عطرك خايسه...لا تحطها عندي..
فهد:وخري بس انتي وهالوحم..
سارة:ليييش..ترا كذا الوحم..
فهد:اعرف بس مو تقعدين تمثلين ولا ما تعرفين بعد..
سارة:والله ماامثل..
فهد قرب لسارة:من جدك؟
سارة:بعد عني ريحة عطرك تصك الراس..
فهد:الا والله هذا وحم..
سارة:لا تقعد تتريق..
فهد:ههههههههههههههههه..معليش يعني بس مو فجأة بعدين هم يقولون اذا مر شهر يبدا الوحم..
سارة:وش عرفك؟
فهد:اذكر يوم امي تتوحم فيني..
سارة:يالله عالسخافه..
فهد:ههههههههههههههههه..انا ادري عنك وش هالسؤال,عرفت وبس..
سارة:وين بتروح؟
فهد:بروح عند واحد من الشباب في مباراة اليوم..
سارة:يارب يفوز النصر..
فهد:ادعي ربك بس..
سارة:طيب توصلني؟
فهد:اوكي..بسرعه..
سارة:بروح بملابسي..
فهد:طيب...ترا بقول لامي وخواتي.
سارة:مو قدامي استحي...
فهد وهو يضحك:ياعيني على الي يستحون بس..
><><><><
عمتي بغرفتها خلصت من صلاة العشاء واخذت جوالها وقررت انها تتصل الحين على فيصل...قرار غريب اتخذته عمتي يمكن احساسها بتانيب الضمير..واحس ان الي صار لمشاعل يمكن هو الي خلاها تقرر هالقرار ماتبي تشوف وحده منا ماهي مبسوطه بحياتها...
طلعت رقم فيصل وكانت مخزنته برقم استفهام..
من الطرف الثاني...
بخيمه مليانه شباب..صراخ وضحك وتعليقات ومتحمسين مع المباراة...
فيصل كان جالس معهم...
بدا جواله يرن..ماحس فيه بالبدايه وبدت الرنة تعلى واخيراً حس فيه فيصل ودخل يده بجيبه وطلع الجوال الرقم ماكان مخزن عنده...كان حريص على انه يرد على اي رقم غريب يمكن تكون منار..
رد على طول..
فيصل:الو..
عمتي:السلام عليكم..
ماميز فيصل الصوت...طلع من الخيمه عشان يسمع بوضوح اكثر..
فيصل:وعليكم السلام..
عمتي:فيصل؟
فيصل:ايه نعم..
الحين بس ميز الصوت وعرف انها عمتي..الي هي عمة منار...جت افكار كثيرة براسه..
عمتي:انا ام سلطان عمة منار..
فيصل:هلا والله خالتي...
عمتي:كيف الحال؟
فيصل:بخير الله يسلمك..
عمتي سكتت وماعرفت وش تقول..
فيصل بخوف:منار فيها شي؟
عمتي:لا مافيها شي..بغيتك بموضوع..
فيصل:تفضلي..
عمتي:انت للحين تبي منار؟
فيصل استغرب هالسؤال:الى مااموت..
عمتي:تقدر تجي تخطبها..
فيصل سكت شوي..:خطبتها مرتين ورفضتوني لو اجي هالمرة بتوافقون؟
عمتي:انشالله..
فيصل:شلونها الحين؟
عمتي:الحمدالله..,فيصل انا قلت لك وماراح انتظر منك مكالمه ولاراح اكلم عليك مرة ثانيه..انا سويت الي علي والباقي عليك...
فيصل:انشالله..
عمتي:مع السلامه..
قفل فيصل وعلى ماكثر ماكان مبسوط تضايق من المكالمه..
دخلت عمتي الصاله وكان عندنا هاله وطارق..
عمتي جلست جنب منار وبهدؤ:كلمته..
منار نطت من مكانها:وش قال؟
عمتي:ماقال شي..
منار:شلون ماقال شي.؟
عمتي:قال انشالله..
منار:بس؟
عمتي:وانشالله يتقدم لك مرة ثانيه..
منار سكتت وماردت..
هاله كانت متحمسه تشوف المباراة وهي ماتدري وش السالفه..بس سارة حاطة تبي تشوف مين يفوز عشان فهد ماتبيه يضيق صدره..
:سارة عاد غيري حومتو كبدي..
سارة:وش عليك انتي..
هاله:لا لا تغيرين..
:الا غيري هاله انتي جايه عشان تجلسين معاي والا عشان تشوفين مباراة؟
هاله:والله تحمس مرة المباراة..
الجلسله تطفش..هاله وسارة يشوفون المباراة ومتحمسين على تفاهات..ومنار تتحمس معهم شوي وتبي الهلال يفوز عشان فيصل..
شفتوا شلون الناس..الله لايبلانا..
رن تيلفون البيت..مااحد رد قمت انا ورديت..
:الو..
سلطان:اهليين..
على طول عرفت صوته واخيراً اتصل..
:هلا والله..
سلطان:مين؟
:بنت الجيران..
سلطان:هههههههههههههههههه..,هلا هلا بنورا...
:امممممم.كويس عرفتني ما نسيت اسمي..
سلطان:صح كويس..
:كيفك؟
سلطان:الحمدالله..انتي كيفك؟
:كويسه..
سلطان:اقدر اكلم امي..كلمتها على موبايلها ماترد..
:اوكي ثواني بس..
مكلم عشان عمتي جاني احباط اكثر واكثر يعني ماكلم عشاني..وليش يكلم عشاني انا مين اصلاً..
طيب انا اوريك يا سلطان..اخذت السماعه وسكرت بوجهه...انقطع الخط انا مالي دخل انا بروح انادي عمتي بس انقطع الخط..
اتصل مرة ثانيه ومارديت عليه هالمرة...
الساعه 12:00 الليل للحين جالسين وطبعاً خلصت المباراة وسارة زعلانه عشان فهد اما هاله ومنار مبسوطين..
بعد ماراحت سارة وهاله وعلى الفجر تقريبا كنا انا ومنار نسولف وقالت لي ان عمتي كلمت فيصل..
طلع فيصل اول ما خلصت المباراة على طول باله ماكان معاه كان يفكر بمكالمة عمتي...معقوله بيرجع لهم الامل...
وصل البيت ودخل بهدؤ من الباب الخلفي للبيت في جمعة خالته في بيتهم وماكان له مزاج ان يسلم عليهم راح على غرفته على طول..وبدل ملابسه وانسدح على السرير...يكلم منار والا ما يكلمها هذا الي يدور في باله الحين...بس قرر انه ما يكلمها الا لما يصير بينهم شي...قرر انه بعد ثلاثه ايام بيفكر فيها بيقول لامه عشان تتصل مرة ثانيه وتخطب منار..انبسط فيصل للفكرة ورجع له الامل..
><><><
بالصاله جالسين بعد ما خلصنا غدا...
ابوي:فوزيه ابيك شوي..
عمتي ماعلقت ولا سألت ليش قامت وراه وطلعوا من الصاله ورحوا المكتب..مكتب ابوي..
وحنا جالسين انا ومنار ومشاعل..
توقعت الكلام الي بيصير بينهم عشان مشاعل..مو بس انا اتوقع حتى مشاعل نفسها جا في بالها هالشي..
قمت انا بعد ورحت مرسمي...من زمان مارسمت شي جديد..
مسكت الفرشه وانا ماادري وش ارسم مافي شي محدد في بالي...بجرب ارسم وجه..
بديت ارسم واول شخص جا في بالي ارسمه سلطان..بديت ارسم بسرعه وبدون تركيز...
جلست ساعه تقريباً وخلصت يمكن هاذي اسرع رسمه خلصتها بس لسا مالونتها..
بعدت شوي اناظر الرسمه بتمعن..وانفجرت ضحك الرسمه كانت تضحك..رسم طفل عمره اربع سنوات..كنت اضحك حسيت اني رديت اعتباري شوي..كان الرسمه انتقام من سلطان ولحركاته السخيفه...
حسيت بصوت وراي لفيت وكانت منار واقفه تناظرني ومستغربه..
منار:نوير وراك تضحكين؟
ماكنت ابيها تشوف الرسمه وقفت وغطيتها..
:تذكرت شي يضحك..
منار:من جدك؟
:ايه...اصور الماضي لنفسي واسليها..
منار:تخيلي عمتي وابوي للحين يحكون...شكله فيصل كلم على ابوي...تتوقعين بيوافقون؟
:يمكن..
قربت منار مني:ابي اشوف وش كنتي قاعده ترسمين..
:لا لا ماابيك تشوفينها..احسن اذا خلصت..
منار:الا الله يخليك..
:لا منار انقلعي خلاص..
منار جت مسكتني ودفتني...
:هيييييييي منار ياحمارة..
منار:هههههههههههههههههههههه وشو هالرسمه مين؟
:مالك دخل..
منار وهي تناظر زين وتبي تعرف مين الشخص..بعد سكوت لمنار فجأة انفجرت ضحك:هذا سلطان..
:لا..
منار وهي تضحك:الا والله سلطان..مجنونه وش هالرسم..
:مو حلوة؟
منار:وليش يعني هو بالذات..ها ها اعترفي...
:وخري عن وجهي بس..
منار:تحبينه؟
مارديت عليها واخذت اللوحه وحطيتها ورا ظهري:يلا اطعلي برا..
منار:خليني افضى لك بس..
رحنا فوق وعمتي للحين مابعد طلعت...
جلسنا شوي وبعد فترة قصيرة مرت عمتي من الصاله وطلعت فوق..وجهها كان منصفق ومكتمه...اما ابوي ما شفناه..
:وش فيها؟
منار:انا جالسه معاك..
مشاعل:غريبه والله..
الحين تأكدت ان الموضوع مايخص لا مشاعل ولا منار..
مانزلت عمتي الا المغرب اما ابوي طلع من البيت...عمتي كانت ساكته وماتكلمت ولا كلمه...
وطلعنا انا ومنار وهاله رحنا تعشينا في بيزا روما ورجعنا بعدها البيت ونامت عندنا هاله...
><><><><
جالس فيصل مع امه واخته..كان ساكت ويفكر اذا هذا الوقت المناسب انه يفاتح امه بموضوع منار..
بسمه:فيصل..
فيصل لف عليها:سمي..
بسمه:وين وصلت..
فيصل ابتسم..
ام فيصل:بسمه يلا تجهزي بنروح بيت جدتك..
فيصل:الحين بتروحون؟
ام فيصل:ايه..
فيصل:اهاا..
ام فيصل:عندك شي؟
فيصل:لا ماعندي شي...
رن جوال فيصل بوقتها وكان بدر..
فيصل:هلا والله..
بدر:هلا بك,شخبارك؟
فيصل:بخير,انت شخبارك؟
بدر:الحمدالله,وش عندك اليوم؟
فيصل:ماعندي شي.
بدر:كويس,وش رايك نطلع؟
فيصل:اوكي,تعال مرني..
بدر:ورا ما تجيب لك سواق.دامك ما تحب تسوق..
فيصل وهو يضحك:انشالله بجيب..
بدر:ربع ساعه وانا عندك..
فيصل:اوكي..
ربع ساعه تقريباً وبدر عند فيصل..
بالسيارة..
بدر:فيصل بغيت اسألك عن نورة..
فيصل باستغراب:نورة مين؟
بدر:نورة اخت منار..
فيصل:وش فيها؟
بدر:مضاوي وشيخه مدحوا لي البنت مرة..
فيصل:تخطبها؟
بدر:ماصار شي هم قالوا لي على كم بنت ولفتت انتباهي نورة من بينهم وقلت اسأل عنها..
فيصل:مااقدر اقولك الا ان نورة مافي مثلها..
بدر:شلون يعني؟
فيصل:والنعم فيها..
بدر:مدحوها لي مرة...
فيصل:ناخذ انا وياك خوات..
بدر باستغراب:صار شي؟
فيصل:بتقدم لها مرة ثانيه..
بدر:ثالث مرة قصدك..عندك امل لهدرجه؟
فيصل:مرة..
بدر:ترا قد قلت لي مرة انك بتخطب لي نورة..
فيصل:ولو تبي اروح معاك بعد اروح..
بدر:لا لا تجي انت بلاك لست عندهم..
فيصل ناظر بدر من طرف عينه ولف عنه...
بدر:هههههههههههههههههه..امزح يااخي..
فيصل:اسأل فهد عنها..
بدر:بناخذ انا وياك وفهد خوات...ياسلاااام والله حلو..
فيصل:نروح ونجي مع بعض وحريمنا مع بعض...
بدر:عجبتني الفكرة...بخلي مضاوي تقول لامي عنها..
فيصل:شكلك والله بتتزوج انت نورة وانا ومنار مابعد تزوجنا..
بدر وهو يضحك:ليش لا...
فيصل:والله فكر فيها يا بدر..البنت والنعم..
بدر:الله يكتب الي فيه الخير...
><<>><><
يوم الجمعه...
مر علي اسبوع وانا في باريس قررت اني ارجع اليوم على رحلة الساعه 12:00 الليل...رانيا ماعجبها هالشي ابداً وكانت تبيني اجلس معها وخاصه ان لنا فترة طويل ماشفنا بعض...بس بيني وبينكم انا مليت..بحياتي مااتوقعت اني بمل من رانيا او اني ابي اترك المكان الي هي فيه...
جت معاي المطار وصار بينا عناق طويل...ماادري متى بشوفها مرة ثانيه بس قريب لاني بعد فترة بروح أمريكا..
ماقلت لامي اني برجع الرياض اليوم لاني حسب ماخططت له اني برجع الاثنين...قبل لا اركب الطيارة اتصلت على امي وقلت لها لاني اكيد بوصل الفجر وماراح يكون في احد صاحي...
><><><><
انا اليوم بنام عند هاله الساعه 2:00 الفجر جالسين نتفرج على فلم..ومندمجين مرة معاه...
رن جوالي بوقتها..
هاله:ياحمارة مو قلت لك حطي جوالك سايلنت..
:ليش الالفاظ هاذي طيب..
كانت منار رديت عليها..
منار:هلا نورة..
:هلا وش تبين قاعدين نتفرج على فلم..خربتي علينا..
منار:بقولك شي بيقهرك..
:وشو؟
منار:سلطان قبل ساعتين تقريباً او اكثر اتصل على عمتي والحين بيركب الطيارة بيرجع الرياض..
:نصابه الاعيبك مو علي..
منار:وربي اني مااكذب اسألي عمتي بعد..
:طيب يلا مع السلامه..
منار:انا قلت لو بكلمك قبل بترجعين وبتكسرين بخاطر هاله..
:يانذله يامنار..انا دايما اساعدك..
منار:اجل تحبينه؟
منار تلف وتدور الى ماتوصل للي تبيه...ترا كل اللكاعه الي قاعده تسويها عشان تعرف..
:مالك دخل..
قفلت السماعه بوجها وش هالحركة السخيفه..الي سوتها
هاله:وشو؟
:ابرجع البيت..
هاله:انثبري بس...وش فيه؟
:تخيلي سلطان بيجي اليوم..
هاله:هههههههههههههههههه يااااي فللله..انتي عندي..
:برجع برجع مالي دخل..
هاله:مو تكرهينه وقفلتي السماعه بوجهه ورسمتي رسمه شينه وش تبين فيه بعد؟
:اسكتي بس..حظي سبحان الله دايما كذا..
هاله:وناسه وناسه...انتي الحين بتعذيب..
:اصلا ماراح يوصل الا الفجر او الصباح...واول مااقوم برجع البيت...
هاله:بحبسك بالغرفه...
:الحمدالله على العقل..
هاله:يارب اذا رجعتي البيت يكون طالع رايح يسلم على عمه...وعمه يلزم عليه انه يتغدى عندهم..وبعدين يجي ولد عمته ويقوله امش نطلع انا وياك..وبعدين يطلع..واذا طلعوا يجي يقوله ابدا لازم اعشيك...ومايرجعون البيت الا متأخر ويسهر عندهم وتقوله عمته نام عندنا...وينام عندهم وبنت عمته تصير تحكي معاه وتعجبه بعدين يجي يخطبها...
:مسكينه مسكينه وش على بالك انتي..
هاله:على بالي يااختي على بالي..
:اوص هاله..
هاله:ياسلااااااااام..والله فللله...
ماكملنا الفلم قعدنا نسولف وهاله بس تتوعد وتخطط وش بتسوي فيني بكرة..
نهاية الجزء...
..
..
..
|
13-09-11, 04:30 AM
جديد مواضيع قسم القصص المكتمله
العرض العادي
