كاتب الموضوع :
عيون ابوها
المنتدى :
أريد حلا
حبايبي ماتتصورون والله كم اسعدتوني بتعليقاتكم وردودكم , للجميع اطيب تحيه  , واعتذر عن عدم الرد لأني فعلا" كنت مشغولة , والليلة راح اكمل لكم جزء من قصتي اللي أكتبها والله لإفادة الجميع , المهم وبعكس أغلب التوقعات أنا استشرت أختي الكبيره وطبعا" هي ما قصرت (بهذلتني على المستريح) واخيرا" سحبت جوالي واتصلت فيه وعن قناعه وبذوق اعتذرت منه ورفضت أخرج معه , وما تتخيلون قد ايش كنت أنا مرتبكة ومحرجه لا وخايفه يزعل وهو ولا على باله , كل اللي قاله أنا أصلا" ما كنت رايح اجيك كنت بشوف بس تخرجين معي ولا لا , والله كبرتي بعيني أكثر ( ما قلت لكم اختبار على قوله ) المهم تم زفافنا على خير وبعكس أغلب البنات وخاصة اللي بعمري أنا ما كنت خايفه لا من دخلة ولا من زوج , لاننا اتفقنا أنا وهو على كل شيْ وبصراحه كنا أصدقاء وحبايب ( او هذا اللي ظنيته أنا) وراح احكيكم عن ليلة فرحي , طبعا" بعد ما خلص الفرح هو قد خبرني أنه مجهز لي مفأجاة ركبت السيارة معه بفستان الفرح وأول ماحرك السيارة شغل شريط زفة خاص هو كان عامله , بعدين لما وصلنا لعشنا على قوله ونزلت من السياره شالني لحد باب الشقة ( يمكن فيه بنات راح يقولون أني ابالغ أو حلمانه بفلم أجنبي بس لا والله هذا الي صار ) المهم دخلت معاه الشقة وبدا هو يفرجيني اياها وبصراحه كانت اكثر من رائعه المهم بعدين صلينا ركعتين , ودعينا بالبركه , وأخيرا" جلسنا بالصالون وهنا سألني جيعانه ؟ طبعا" انا ماكذبت خبر وبديت اشتكي له اني على فطوري ...الخ قام عاد وجاب جزء من المفاجاة على قوله وحلف على ما أقوم عاد انا انبسطت وحطيت رجل على رجل ومادريت الا والأخ جايب قاتوه بمناسبة زواجنا وطلب مني اقطعه عاد أنا ماصدقت ودوبني برفع الشوكة لفمي الا وذا ساحبها وبالعها قبلي المهم و بالعافية ودوبني بكمل القطعه الا والحبيب يجيب طاري أهلي (عاد أنا كنت لحد الآن ناسيتهم ) وانه راح يعوضني عنهم وماراح اندم ...الخ وهنا طاحت أدموعي لا وزاد الطين بلة يوم يجي حبيبي ويضمني وااااااااي مادريت إلا وانا اصيح وابكي وأخيرا" وبعد طولت بال بصراحه أنا لازلت حاسدته عليها بلعت أدموعي وسكت هنا اذن الفجر , وهو وبكل ذوق قال أبخليك تأخذين راحتك وبروح أصلي دقايق وراجع والله يا بنات أني ما صدقت أنه خرج بسرعه دخلت غرفة النوم وأخلع الفستان اللي ذبحني حشى موب فستان كأني شايلة جبل المهم بسرعة غيرت ثوب الفرح والبس ذاك القميص رغم جميع توسلات زوجي وهذا أنا دوبني جايه اصلي إلا وذا جاي مدري الصلاة هي اللي خلصت بدري والا هو اللي خلصها بدري وجاء المهم ورغم جميع نظرات الاحتجاج إلا إن الليلة ذيك عدت على خير وبدون أي خسائر لا بالارواح ولا بالمشاعر وكتشفت الجزء الثاني من المفأجاة على طاولة التسريحة كان جايب لي عطر من ديور ادكت ( لأنه وبذكائه عرف إني أعشق هذا العطر) اللي بوصلة لكم إنو حبيبي كان جدا" رومانس وذوق وأنا بادلته هذي الرومانسية برومانسية وزيادة فوقها حبتين , وعشت معاه أروع ايامي لدرجة إني كنت أحيانا" والله أقرص نفسي أخاف لا أكون حلمانه , يوم يومين وشهر وشهرين , عاشرت أهله ورغم قوة بأسهم لكنهم وبالذات أمه كانوا في غاية الذوق والطيبه , وعدى علينا رمضان وفي يوم من الايام حسيت بأحد وأنا نايمه يضمني بشدة فتحت عيوني والا ذا زوجي يناظرني عاد انا رجعت نمت وفي نفس الليلة جلسنا انا وهو نسولف قام سألني ماحسيتي بشيء اليوم قلت لا قال لما ضميتك قلت لا ليش قال أنا اليوم حلمت أني جيت ادورك بالبيت وما لقيتك رحت أدورك عند أمي وسألها عنك قامت قالت لي خلاص وش تبى فيها بعد ماطلقتها , وكمل كلامه : والله يا... إني لاول مره بحياتي أقوم من نومي أنا ابكي معقولة ماسمعتيني قلت له : لا , قال : ومن شدة خوفي من هذا الحلم ظميتك والله يا.. ما اتخيل حياتي بعدك انا ما أعيش من دونك , وجلس يتكلم ويعبر لي عن حبه اللي ما يوازي شيء من اللي اشيله له بقلبي , وشوي شوي جلست اهديه واطيب خاطره وأطمنه إنه مجرد حلم ,,,, وأنه مافي شيء غير الله بيفرقنا وإني بظل معاه على الحلوه والمره ..الخ 
|
13-07-11, 04:04 PM
جديد مواضيع قسم أريد حلا
العرض العادي
