ووووووووووووووووواي روواية ولااروووع وربي
نووف انتظررررررررررررررررك بشوووق وابليز علمينا متى موعد نزول البارتات
ولكم ودي واحترامي..

لطوف وذكريات الماضي
مروركم عطر صفحاتي
اليكم الجزء الثالث يا احلى اعضاء
÷÷÷÷÷÷÷÷

بسم الله الرحمن الرحيم

]..مساء الخير

ابتسمت له بحب "وهو يقبل عليها من بعد الموقف الي صار بينهم بسبب يزيد ماشافته لانه مايحب زعلها ولاحتى عتبها ويكن لها من الاحترام بقدر ماعطته من الحب ويكن لها من الحب بقدر ماعطته من الحنان انتشلته من عالم النبذ لعالم الاحتواء

..مساء النور هلا والله


جلس على نفس الكنب الي تجلس عليه

.. ان شالله ارتاحت نفسيتك



توترها وضيقتها كانت واضحه والكل لاحظها ابتسمت رغم كل مافيها لانها ماتحب تزيد عليه وهي تعرف الشرخ الكبير الي بنفسه


.. مادمت اشوفكم بخير انا بخير


..تسلمين يمه


طبت على ظهر كفه وحطتها بباطن كفها نظرتها الغريبه تحب تخفيها وتحط بدالها نظره اكثر تفاؤل

.. انت الغالي ولد الغالي


بنوع من المداعبه وهو يتلفت

.. يمه تكفين قصري صوتك والله ان سمعوك يمكن يغتالوني


ضحكت عليه بصوت عالي

..ماعليك منهم خلهم يجربون يسوون لك شي وانا اوريك فيهم


..الله يخليك لي ولهم


<<ونزل راسه كانه يمهد لكلام يحب يقوله

..يمه انا جايك بموضوع ابي اذنك وابي شورك



ارتفعت بجسمها شوي مع لحن الجديه الي بدا فيه
.. خير وش عندك صاير شي


مازال ينظر للاراض ويفرك

.. خير يمه بس ودي اروح انا وماجد ويزيد نزور عمامي


عقدت حواجبها ونظره سارحه فيه وبكم الالم الي يبين بصوته من يجي طاريهم

.. هذا شي مايحتاج اذن هذولا عمامك وماجد ويزيد اخوانك


هنا رفع راسه وبهددوءه المعتاد

.. هذي الاذن بس الشور يمه



مدت جسمها قريب منه وضغطت كتفه

.. ماعاد فيه شور عمامك وصلهم واجب عليك انت واخوانك ولاتوقف وانا امك عند الي راح عشان ترتاح سير عليهم ولاتعاتبهم ولاتحاسبهم واعتبر كن ماصارشي


فرك ذقنه بتوتر ماحد يقدر يوصل لحجم الخلاذن الي يحسه من ناحيتهم كان الي سواه ابوه كثير ولابين فيهم وهو الي ماسوا لهم جزء بسيط راح يهتمون فيه يخاف يسمع منهم كلام الرد عليه اصعب من ابتلاعه يخاف يصير نقاش يقطع الوصل الى الابدا مايحب وصلهم لكن يكره قطيعتهم

.. واذا شفت منهم الي كان ابوي يشوفه منهم


غمضت عيونها من الوجع من ذكرى ابوه انسان تملا قلبه الطيبه عرفته رجال متعدي الاربعين لكن يشبه الطفل بنقاءه بصفائه لكن للاسف كان حظه من الدنيا قليل


.. قل عيوني كذبتني" هذولا اهلي ولايمكن يضروني" ادري انك ماتقدر تنسا لكن تناسا وتذكر ان ابوك كان يبيك تكون قريب منهم وانت الحمدلله ماانت محتاجهم و هذا الي يهمهم انك ماتبي منهم شي


هز راسه وقعد يحرك الساعه بيده

..خير ان شالله


غيرت مسار الكلام بعد ماحست انه انخنق من السيره لكن ماتحب تشجعه انه يكرههم

.. تصدق يوم قلت لي ابيك بموضوع قلت هذا جاي يبي ادور له عروس


ارتخت ملامح وجهه المنعقده وابتسم

..تو الوقت ولاتنسين راكان اكبر مني وبعدين هو جاهز



اظطربت من عناده وصراره على التنحي

..اولا الي بينك وبين راكان اقل من السنه "ثانيا حتى انت جاهز وماينقصك شي ماشالله عليك

كان يتعتقد انها فتحت الموضوع كنوع من تغيير الجو لكن بدا يحس انها جاده

.. يمه انا ماابي اتزوج قبل لااشتري بيت اامن نفسي فيه



تمللت منه مصر على تفكيره الصعب

.. انت ناسي ان عندك بيت " بيت ابوك موجود وايجاراته باالبنك واذا انت قررت تتزوج بيعه وحط سعره على إيجارته وزيده واشتر لك بيت على قدك


..بس يمه انتي واخواني لكم نصيب فيه وانا مارضا اخذ حقكم



بسماحة نفس وبصدق

..انا واخوانك متنازلين عن حقنا فيه حنا الحمدلله مانحتاجه ومدامك ماانت راضي اني اساعدك بيت ابوك انت اولى فيه "وبعدين ليه هالخوف وانت ماشالله وظيفتك ممتازه وراتبك زين وبكره تترقى وتشتري بدال البيت اثنين بس انت اترك هالعناد وهالتشاؤم عنك


حك راسه يتمنى انها تسكت سيره مايحبها ولايحب يفتحها مأجلها لوقتها

..خلاص يمه تكفين غيري هالسيره"ان شالله اذا جا وقتها انتي الي راح تختارينها


..ان شاءالله


..احيانا اقول لو ماطلعتي بحياتي وش كان مصيري "الله يخليك لنا


.. هذا شي بسيط من جميل ابوك على هو الي بدا بالطيب ويستاهل الي يرده


بالفعل ابو سلطان رجال نادر في كل اوصافه وانسان قليل ماينوجد مثله

تزوجته على غير رغبه ظغط عليها اخوها علشان تتزوجه مثل ماجبرها ابوها تتزوج ابو نجود لكن لكل واحد اسبابه ابوها زوجها صغيره ماتفهم من الحياه الا القليل صدمها بناس اشبه بالوحوش ارتاح من همها <هم البنات > يخاف تضيع بعده لكن هو الي ضيعها بحياته لكن ابو راكان زوجها انسان يعرفه علشان تنسا معه التفكير الي كان راح يموتها استسلمت وافقت بشرط انها تاخذ راكان معها وهو وافق عشان يأمن لولده من تهتم فيه بعد مارفضنه زوجات عمامه ربت ولده ومافرقت بينه وبين راكان وهو مثلها مافرق بينهم"قدرت فقره وخففت عنه الحمل وشوي شوي اتسعت تجارة اخوها ومن نصيبها كانت تصرف على بيته وولده بدون علمه لانه كان يرفض "وبمساعدتها قدر يشتري بيت صغير يرتاح فيه من الايجارات ورزقها الله منه بماجد ويزيد لكن ماامهله العمر انه يعيش الى ان يكبرون عياله وتوفى بعد وفاة اخوها بااربع وتركها تحمل مسؤلية اربع اولاد مالها معين الا الله


....................................





..حياك الله ياخاله

تحيه رسميه من امراءه رسميه في تعاملتها لمن لايعرفها
كان صوت عصاها يرن بصدا على رخام الصلاه الفاخر

..الله يحييك >>سلمت بشكل يبدو كانه مدروس


دخلت ام طلال كانت فرحتها بزيارة ام طلال اكثر من ام زوجها رمت السلام وتقدمت والبنات يتبعنها
شيخه <ام سعود>اكثر من اتعبت مزنه لان نفوذ اهلها هو الي فرض زواجها من ولدها لانه حبها وهم ناس مع انهم اغنياء مافكرو بالفوارق الطبقيه "مكانتها الاجتماعيه الرفيعه رفعت زوجها وعيالها ولانها عرفت نوعية ام زوجها قررت تستغل هذا لصالحها وان كانت ماتتبع هالاسلوب لكن لانها عرفت طريقة تفكير مزنه اظطرت تشهر اسلحتها عشان تحافظ على زوجها وبيتها وعيالها


.. وشلونك ياام طلال بشرينا عنك


ظغطت رجلها وهي تجلس

..بخير عساك بخير الحمدلله على كل حال


ام طلال ان لم يكن لها احباب فليس لها اعداء وهذي نوعيه تقدرها شيخه

..وش اخبارك مع وجع رجلينك ان شالله احسن


..والله مع هالادويه احسن لكن من اتعب شوي على طول تشب علي


بدت شيخه بكل ثقه وهي الي تعرف ان مزنه ماراح يعجبها الكلام لكن تصر انها تقوله المهم انها ماتغلط على احد


..طيب ليش تتعبينهم وانتي عندك حل "جيبي لك شغاله وارتاحي الحين ماتلقين فيه بيت مافيه شغاله على الاقل



تلخبطت لطيفه وهي تحس بغضب مزنه وثقة شيخه

.. مقضينها ياام سعود بهالادويه وان شالله تفرج



تلفتت مزنه بنواحي المكان

..وين بندر مااشوفه ؟؟


..بندر مع ابوه في المجلس




.. وبناتك وينهم ولامايعرفون السنع


حطت رجل على رجل واخذت ريموت التكييف ووجهته للمكيف


.. لا تطمني ياخاله بناتي كلهم سنع بس هم يجهزون قهوة الرجال وبيجون


منى عادتها السكوت تشبه امها بشخصيتها ماتحب النقاش ولا الجدال وتفضل تتعب جسمها ولاتتعب راسها

.. اقدر اروح لهم


بترحيب وابتسامه واسعه

..اكيد تقدرين انتي من اهل البيت


ابتسمت ونوت تمشي لكن وقفت مع كلمة مشاعل


.. كلنا رايحين لهم يالله يانجود


علت شيخها صوتها للبنات الداخلات للمطبخ


.. واستعجلن بالقهوه ماصارت يطبخن بعير

نظرات ناريه" نظرات عجز ترسلها مزنه لها لكن بدون جدوى

.. اقول ليه ماجيتي الاسبوع الي راح


..والله اخوي مسوي حفله لتخرج ولده وعازم ناس مهمين ومايصير مااجي

كل كلمات الحقد لاتوصف شعورها لكن يديها ولسانها مربطه


..ايه مبروك ان شالله


............................................................ ...............


..هاه عنود محتاجه شي قبل نوصل البيت ؟؟


كانت فاطمه تلتفت لوراها وتوجه سؤالها لعنود "انتشلتها من زوبعة خوفها ورجفتها

..لا


تكلم الرجل الي من هذه اللحظه تغيرت نظرتها له شخص تشوف فيه مثل مشرف للرجل "يحمل كل مقومات الرجل الناجح "ويتصف بصفات الانسان "تنظر له نظره اخويه "تعزه مثل ماتعز اخوانها
اضافه انها تدين له بالكثير رجل حكيم قدر بعد ان حرمها من ابوها من خالتها انه بسهوله يقنعه على صعوبة ابوها


.. عنود لاتستحين انا مثل اخوك


عرقها كان يتصبب وتحس النقاب كيس من بلاستك يحجب الهوا يدخل ويطلع لرائتها بصعوبه جاوبته

.. سلامتك ياابو ريان ماني محتاجه شي مشكور


كان يتحاور مع فاطمه لاول مره من سنتين تشوف نفسها دخيله وموضعها غلط " بدون شعور بدت تراقبه كانها بنظرتها تحاول تكتشف الي يدور براسه تتمنى تعرف كيف نظرته لها
على هذا الحال لين وصلوا البيت وجمل منيره وامها تدور براسها وتكررها بكل الطرق تحاول تخفف عن نفسها لكن للاسف الي سمعته وصل لاقصى روحها .

..................................



خلال ربع ساعه كانت واقفه قدام بيت ابوها سئلت سعد قبل تنزل


..ماراح تنزل تسلم عليهم


رد بأبتسامه

..لا اذا جيت اخذك راح اسلم عليهم


..طيب انت وين رايح اللحين ؟؟


تافف من اسئلتها

..منال انتي تبين اهلك وجبتك عندهم وانا بكيفي اروح وين ماابي




انكمشت من ثورته السريعه سرعان مايتغير مزاجه من اتفه سبب

..طيب وش فيك زعلت انا ماقلت شي


تملل وحرك جسمه

.. انتي تسئلين اسئلها مالها داعي




حطت يدها على فمها برعب

.. خلاص ماراح اسئلك ولاتزعل



اعاد على تهديه بصوت اكثر حده

..منال راح تنزلين والا ارجعك للبيت


بسرعه شالت بنتها ونزلت بعد ماضاقت من اسلوبه وطريقته مهما كانت درجة الرضا عنده الا انه اسرع شي عنده الزعل وعلى اتفه سبب

............................................


..الحمد لله على سلامتك "لاتعبت


جلس بتعب واضح على هيئته

.. الله يسلمك"لاندمتي

شالت صينية القهوه واقتربت منه

..وشلون خويك ؟؟

تنهد بضيقه

.. الله يعينه يمه نفسيته تعبانه والي زاد عليه الحمل ان زوجة ابوه وبنت عمه لحالهم ومحتار مايدري كيف يتصرف


..الله يعينه "بس ماقلت انه ملك على بنت عمه


شرب من فنجانه ونزله

..الا


استفسرت قصة فيصل معقده شوي

..يعني زوجته" خلاص ليش طيب شايل همهم يجيبهم ويرتاح!!


ماكان يحب يسولف بتفاصيل فيصل الي تقريبا مايعرفها غيره


.. الحين ماهو قادر يفكر اكيد بس يرتاح يرتب حياته وان شالله يقدر يوصل لحل



<<سئلها لانه اول ماوصل كانت لحالها

.. وين العيال اشوفك لحالك !!



.. يزيد نايم وماجد وسلطان طالعين



لف وتمدد وحط ظهره على زاوية الكرسي كان ناوي يسترخي لولا انها كلمته

.. سلطان اليوم متضايق


لف لها واستفسر ..ليش وش مضايقه ؟؟


حطت الفنجان من يدها وتكتفت

.. مدري وشلون اشرح لك الي حسيته بعيونه" اليوم جا يستئذن او يشاورني بروحته لعمامه "حاولت ابسط له الموضوع بس ماهو قادر ينسا


فتح له سلطان موضوع ثاني للدردشه كل الي يحيطون فيه تعاندهم الظروف او بمعنى اصح تعاندهم انفسهم

.. سلطان للحين حازه بنفسه موتة ابوه كاسرته يمه


تألمت بشده واحترق قلبها عاشت معاناة سلطان وابوه شافت كيف عاشوا الجحود لكن كان حزنها اكبر من انها تحس بصدمتهم

.. ابوه مات موتة ربه مالاحد ذنب


استقعد بكامل جسمه وحاول يحاورها ويوصل فكرة سلطان لها

.. هو يدري بكل هذا هو ماهو غبي ولاصغير ويعرف كل شي لكن الناس بطبايعهم يختلفون فيه من يتسامح مهما تأذى ومنهم للسماح نقطه محدده وسلطان كان ابوه خط احمر عنده ينتهي التسامح والعفو والحين محتار بين رغبة ابوه بقربه منهم وبين جرحه منهم


كانت تعتقد انه شخص ناسي العالم شغله الي تربى فيه ماحال بينه وبين مشاعر الي حوله يمكن كان شغله الي افنا طفولته ومراهقته وجزء من شبابه حائل بينه وبين نفسه

.. انا عرضت عليه انه يتزوج بس حاط البيت حجه


نفض يده واشر لها

..لا يمه سلطان مشكلته ماهي في البيت هو مايحتاج مساعده من احد لو يبي يتزوج سلطان مشكلته بنفسه متى ماحارب نفسه وهزمها بتروح كل عوالق الماضي متى ماتغلب على الخلل الي داخله راح تلاقين سلطان ثاني


تنفست بعمق بعد فتره مرعبه من الاستماع

.. تدري احيانا اخاف عليه ان حالته تصير مرض مدري وش اسوي انا لايمكن اشوفه يتعذب واسكت على الاقل علشان الرجال الي كرمني وعزني واعتبرك ولده يكفي جحود عمامه قاعد يتعذب منه انا ماراح اصير مثلهم واتركه بعز حاجته لي

....................................................



.. ايه الله يصلحها بس ترى الولد عزوه شدي حيلك وجيبي لها اخو
كان هذا كلام مزنه وهو شايله بنت منال وتحبها" ابتسمت منال على طريقة جدتها

..بس بنتي صغيره ياجده وانا ماني مستعجله


حركت يدها بأزدراء على تفكيرها

.. انتي ماانتي مستعجله بس الرجال مستعجل "يالخبله الرجال يتمنى يشوف له ولد يشيل اسمه وعشر بنات مايكفهن عن ولد واحد



فغرت فمها بكلام جدتها لكن تكلمت امها

.. البنت والولد نعمه من الله اشكريه عليها هالبنت ياخاله الي ماهي عاجبتك غيرها يتمناها والحمدلله خلقتها كامله وصحتها زينه اسم الله عليها مثل القمر قولي الله يصلحها بس والبطن الي يجيب البنت يجيب الولد


كانت تقول كلامها وهي ماده يدها لسديم الي صارت بين يدين امها "سكتت مزنه وابتسمت ام طلال بطيبه

.. آمين يارب "تشبهك يامنال


ضحكت لزوجة عمها ..يعني حلوه


..حلوه ماشالله عسى الله يزين حظها


الجلسه ماعجبتها والكلام ماعجبها تعكزت على عصاها

..انا رايحه لعيالي


في حضور شيخه مزنه شعله تنطفي تفرض كلمتها بدون ماتخلي مجال لها للكلام

"



"



..انا اقول لو نجتمع الاسبوع الجاي بمكان ثاني


ابو طلال الي يرفض هالافكار يمكن لانه تربى على ان حياته تكون بين بيته وبين شغله
.. وين يعني بالشارع !!


سعود هو الي فهم مقصد ابوه من الكلام ولانه تعود يروح مع خواله لااماكن كثيره

.. لا طال عمرك ابوي يقصد لو ناخذ لنا استراحه بدال خنقة البيوت


سكت يفكر فكره ماتعود عليها لكن لاضرر من التغيير

..وش قلت ياابو طلال


..والله بكيفكم بس يمكن امي ماتوافق


هنا طلال تكلم بثقه بالغه وبصوت حازم

..جدتي خلوها علي انا راح اقنعها


ابتسم سعود بمكر

.. خلاص ياحبيب جدتك انت اقنعها وحجز الاستراحه على


..خلاص اتكلوا على الله "سعود رح ناد جدتك خلها تقعد معنا شوي


قام سعود وهي تمشي بمنتصف الطريق متوجهه عندهم هروبا من جلسة لطيفه وشيخه وبناتهم





بجلسه ثانيه وبمكان ثاني

البنات جالسات منى ونجد المتقاربات في الاعمار على لاب توب نجد
ومشاعل ونجود ودانه سوالفهم ونقاشاتهم حول الجامعه والمحاضرات والدراسه

تركت نجد الي فـيدها والتفت لمشاعل

..اقول مشاعل غريبه جدتي غيرت خطتها الحربيه وخلت الجمعه عندنا


مطت شفتها وابتسمت

..شايفتني مستشارتها الخاصه "جدتك مااحد يعرف تفكيرها غير رب العالمين


حطت اصبعها عند فمها

.. مدري عندي شعور انها تخطط لشي جدتي ماهي خاليه "ماتدرين وش عندها يانجود


كانت تستحث الكل وماتحب تترك احد من تعليقتها
نجود فقط مستمعه استدارت براسها لها ببرود

..عاد مالقيتي غيري تسئلينه صدق انك فاضيه



بااسلوبها الماكر ولهجتها المازحه

.. لابس احس انتي وجدتي ارواحكم متقاربه وتقرين افكارها بدون ماتتكلم انا كثير شفت ناس يحبون بعضهم لكن مثلكم ماشافت عيني


دوت ضحكت البنات بصوت عالي اما نجود وبابتسامه تناولت علبة المناديل من جنبها وحذفتها عليها

.. جعل عينك للفقع "قولي آمين


دانه الي كانت تضحك على تهريج نجد وبرود نجود

.. ياختي وش فيك على البنت استلمتيها



نجود كانت تحاسب نفسها على الضحكه لكن بنت عمها كانت روح طاهره عفويه بريئه يحب الكل فيها خفة ظلها

.. يمكن لانها جزء مني نجد مفرد نجود
اعتدلت مشاعل بعد ماكانت مرتخيه


..اها وانا اقول وش سر هالعلاقه " اقول نجد منال ماجت !!


ملت فمها من الاكل قدامها

..الا سمعت صوتها عندهم بس طبعا لازام حركات السنع تجلس عند الحريم اول وبعدين تتذكرنا


بحماس ترجتها دانه

..خليها تولي بس روحي هاتي سديم مشتاقه لها


عفست وجهها ..يعني الحين انتي الي تشتاقين وانا الي اتعب "تبينها روحي هاتيها


مشاعل كانت ملتهيه بتسليتها بالمكسرات قدامها

.. خلاص الحين تلقين المدام منال جايه وجايبتها يعني شوفي اني متزوجه


اشرت عليهم وضحكت ضحكه مصطنعه

.. طلعتوا على حقيقتكم السالفه غيره يالعوانس "اسم الله على اختي لاتتطلق من عيونكم


اقتربت منها مشاعل بعد ماغمزت بعينها لدانه الي فهمت مقصدها وبعد ماانشغلت نجد فجهازها مع منى ماحست بنفسها الا ان مشاعل وراها ولافه يديها على صدرها ودانه تضربها بالمخده ونجد بين يديهم تصيح وتستنجد بمنى الغارقه بضحكها ونجود الي متراجعه ورا على الكرسي ومبتسمه ببرود

.. منـــــــى يالفاهيه "نجود تكفين ذبحوني



مضى وقت ممتع وخفيف بدون تحفظ وبدون رقابه بعد ماانضمت منال لهم واكتملت سهرتهم وقضو ليله حلوه

............................


طلع من بيت عمه متوجه لاخوياه الي ازعجوه بالاتصالات اجتماعهم كان باستراحه

<خالد>.. مابغيت تجي "الجلسه ماتحلى بدونك


حذف جواله ومفاتيحه على الاراض واتبعهم شماغه وجلس باريحيه

.. انا قلت لك معزومين ببيت عمي


..بس قلت ماراح تتاخر "شكل الجلسه اعجبتك؟؟


حط المركى ورا ظهره وشال الريموت بين يديه

.. يعني " وين باقي الشباب ؟؟


وقف خالد وهوطالع من المكان

.. راحو يجيبون عشا


نادا خالد من مكانه ..طيب خالد صلح لنا شاهي


دقايق واجتمع باقي الشباب وامتلت الغرفه بريحة الدخان والشيشه واصوات عاليه "عالم فارغ يزيد فراغ طلال وحياته الي يضيع فيها عمره "طلال شخصيه لم تظهر كل جوانبها " انسان يغطي شخصيته الحقيقه شي بدون مسمى
لعل الايام ترفع هذا الغطا عن عيونه وعن قلبه

.....................................................

بيت آخر وشخصيات مختلفه مكان التقارب والتباعد في وقتا واحد عائله مكونه من ثلاث اولاد واربع بنات اكبرهم شخصيه مرت في سياق الاحداث هم زاويه اخرى له " واصغرهم مراهقه في عمر الخمسة عشر عام وام واب "

" فتاة في المرحله الجامعيه "جميله ذات بشره بيضاء وجسم ريان وقوام متوسط وشعر اسود فاحم " تحب ان تبدوا دائما محط الانظار ناجحه "متالقه " فاتنه " تريد ان تكون في الصداره تحب ان تاخذ كل ماتتمنا حتى لو كلفها المستحيل " تطمح ان تكون دائما فائزه وبلامنافس



كتابها في يدها مشهد يتكرر على انظار الجميع الكل يعرف هوسها بالدراسه واحلامها التي تبلغ عنان السماء "دخلت بحذر للمطبخ "في بالها اسئله كثيره اثارها بعض ماسمعت من امها واخوها

<هند> .. يــمه !!


مسحت يديها اكثرعن البلل فيها والتفت<ام مشعل>

..نعم وش عندك نازله ؟؟


حطت زاوية الكتاب قريب من شفتها وبتردد

.. صدق عيال عمي راح يجون بكره ؟؟


ابتسمت بخبث وهي الي تحلم كل عمرها يكون لبنتها المستقبل الي خططته وبعد مافشلت مع بنتها الاولى رجعت تعيد المحاوله مع بنتها الثانيه

.. اي " ويقول مشعل ان عمامك كلهم راح يجون "ماتدرين يمكن يتصالح معهم وينتهي هالموضوع


رفعت عيونها وتاففت

..بس انا ماني شايفتهم زعلانين علشان يتصالحون " وجيته سلطان ماهي غريبه لكن الغريب ان اخوانه جايين معه


اسرعت لها وبصوت هامس

..عشان كذا انا اقول يمكن تكون فاتحة خير


ضمت كتابها اكثر وبهيام

.. ومشعل ماقالك وش الي صار بالضبط وش الي خلاه يجيبهم


.. تعرفين مشعل كتوم ومايحب يسولف واجد لكن ماعليك بكره نعرف كل شي


ناظرت من ورا امها

..وانتي وش قاعده تسوين


رجعت بحماس لشغلها

.. قاعده اجهز للعشا بكره "وانتي بدال ماتدورين تعالي ساعديني الشغاله ماتفهم علي ولا افهم عليها


قررت الهروب من المهمه الي طلبتها امها

.. لا انا عندي امتحانات "نادي امجاد خليها تساعدك شوفيها تلعب بلاستيشن مع فواز


ميلت فمها بشوق

.. أيـــــه الله يسعدك ياخلود ماكانت تخليني المس شي


كانت امها تستدر عطفها وهند كانت مدركه حركتها ابتسمت

..كان قعدتيها عندك وخليتيها تساعدك


.. والله يابنتي لو بكيفي تقعدون العمر كله عندي بس هذي سنة الحياه " البنت مصيرها لبيتها ولزوجها وعيالها " هذي خلود تزوجت وابعدت عني الله يوفقها بس ويهون عليها ولداتها



. ........................................................



..ادخلي الغرفه غيري ملابسك واستنيني


اومئت براسها بابتسامه موجوعه

.. طيب

استدارت بكل ارجاء الغرفه الي كان لها نصيب منها جزء من السرير وجزء من الدولاب "لكن الاكسجين مسحوب منها تماما
"ابتسمت لشوق بنت الــ 14سنه نايمه بين دببتها والعابها "الراحه النفسيه باينه حتى بانتظام انفاسها " تنهدت تنهيده كانها لهب

..الله لايغير عليك ياشوق


دخلت فاطمه ضحكتها تملا وجهها وباستعجال وشوق لها سحبتها من يدها وجلستها معها

..هاه قولي لي ان شالله مرتاحه


ميلت شفتها تحاول تبتسم .

. الحمدلله ماشيه الحال " بس ليش خليتي ابو ريان لحاله وجيتي عندي


فاطمه ماخطر في بالها أي تصور من الافكار الي انهكت العنود .. محمد راح يسهر مع اخوانه الليله خميس وماوراه دوام "خلينا منه وسولفي لي وش سويتي هالاسبوع بالجامعه


حركت راسها بعدم اهتمام .. ابد مثل كل اسبوع بس يوم الاحد عندي امتحان



مسكت يدها كانها تملاها امل وطاقه

.. ابيك تذاكرين وتتفوقين وتحققين امنيتك امك الله يرحمها


دموعها كانت قريبه وهي تحاربها ماتبي خالتها تحس بشي من المها

.. ان شالله "بس بغيت اطلب منك طلب



..ابشري بالي تبين انتي بس اشري



بحرج بالغ وضيقه تفوق الوصف

..ودي اذا جيت هنا ماتخلين زوجك علشاني "مابي الخبطكم بهاليومين الي اكون عندكم


اثارت استغراب خالتها العنود خجوله لكن الامر ماكان مجرد خجل كان شي اكبر بكثير

.. ليش من قال انك تخلبطين حياتنا حنا اكثر وقت نرتاح فيه الي تكونين فيه بيننا


..ادري بس انا احس احيانا ابو ريان يطلع من البيت عشاني موجوده


بالفعل لهجتها تغيرت كانت تشفق على الفضفضه لخالتها وتنتظر نهاية الاسبوع على احر من الجمر لان خالتها جزء مهم بحياتها

..عنود وش فيك اليوم ماانتي طبيعيه وش صاير


تهربت بوجهه عنها تومنت تكون لحالها

..لا ماصار شي "شوق نايمه وحنا قاعدين نسولف


هدت فاطمه رغم كمية الخوف والاستغراب عليها ورغم كمية الالم والتغيير الطارئ على العنود

.. طيب خلينا نطلع نكمل كلامنا برى


غمضت عيونها وقاومت شعور الموت بروحها

.. لا انا ودي انام اليوم مانمت بعد ماجيت من الجامعه

.................


انفض الاجتماع وسكن المكان والليل يجري الى نهايته توزع الكل بعد ليله حملت ماحملت
فكره كانت مزنه تنوي تنفيذها لكن تنتظر قرار طلال "خافت من اقتراب موضي منها وماكان فيه احد اقدر من طلال على قطع أي اتصال بينها وبين نجود "


طلال كانت بالنسبه له فكره غير مقبوله نهائيا لكن جدته قدرت على الاقل تفتح مجال للتفكير



سعود انسان ليلته انتهت بوحده من الي كانوا على بعد خطوات منه حلم كبر وكبر معه ومصمم انه يحققه



العنود ليله طويله قضتها مع وحدتها والمها وغصه بوحها وكتمانها متشابهان لااول مره تحس الوقت الي تقضيه في بيت خالتها طويل ولااول مره تتمنى ترجع لبيت ابوها


سلطان يتمنى هالليله تطول وتبعده عن لقاءه مع عمامه لحظات يقرر يتراجع ومايواجهم لكن لحظات ثانيه يشجع نفسه لانه يخاف يخونه صبره وحلمه عليهم


............................................................ ....



على نسمات الصبح الهواء كان بارد ومنعش بيوت قليله متفرقه
وصغيره لكن تحمل عظمة الالفه وفخامة الموده


يجلس على دكه صغيره في حوش بيتهم الصغير سعة المكان تطبق عليه مكان خالي بلا روح كان يحب يتردد عليه بحياة ابوه ويحب جمعة الرجال الكبار فـالعمر الي يجتمعون عند ابوه لكن كل هذا صار ذكرى "


طاحت عينه على صينية القهوه والشاي ارمش بسرعه وكأنه افاق سئل

..ام غاليه قايمه ؟؟


..لا بس غاليه قوم


سئل لانه اعتقد انها صحت من النوم لان الشغاله ماراح تجيب االقهوه والشاي بدون امر من احد كان ناوي يجلس عندها بدال هالملل القاتل لكن عرف ان غاليه الي ارسلتهم

"تثير استغرابه من صارت زوجته
من اكثر من ست سنوات مالاحظ ولا مره انها تحاول تقابله او تصطنع الصدف عشان تشوفه
"لحظات مرت لين وصلته صينيه ثانيه فيها الفطور "حركتها حسسته انها مافيها ميزه الا انها ربة بيت من الدرجه الاولى صفه يتمناها الكثير لكن ماتفيد اذا كانت مجرده من صفات ثانيه يتمناها بزوجته "لكن رغبة ابوه لازام يحقهها
وبالفعل كانت لفتتها في وقتها حس بالجوع وهو يسحب الاكل وياكل "خلص فطوره وتقهوى وقام يتجهز لصلاة الظهر

.........................


..كلمت فيصل اليوم ؟؟


كانوا مجتمعين اربعتهم على فطورهم رفع راكان راسه

.. كلمته واحتمال يوم الاحد يرجع


..الله يهداك لو قلت لي كنت رحت معك وعزيته


.. مدري انا من قال لي الرجال انه رايح قلت اكسب مشيته واروح "والعموم انت كلمته وعزيته وان شالله يوم السبت يجي وتقابله


الكل كان يعرفه ويعرف عمق علاقته براكان "وجه كلامه لماجد ويزيد الي مشغولين بالاكل

.. اليوم بعد المغرب تكونون موجودين عشان نطلع مشوار
ابتلع ماجد لقمته وبسرعه

.. وين بتودينا ؟؟


.. مشعل عازمنا عندهم في البيت



يزيد بنظرة استغراب

..طيب يعزمك انت وماجد كبار وتعرفون تتعاملون مع بعض انا وش تبون فيني


خلص اكله ووقف

.. الجمعه للعايله كلها واظن انك واحد منهم


سكت ماجد ويزيد وقام سلطان ولحقه راكان


جلس بعيد عنهم يشوفهم لكن مايسمعهم لاحظ حركته راكان ابتسم وهو يقترب منهم ويبتعد عن الباقين

..وش عندك لاحقني اكيد عندك كلام


جلس وضحك بهدوء

.. متى راح تروحون ؟؟


اختفت ابتسمت وهرب بوجهه

..امي قالت لك شي؟؟


دقق راكان النظر بعيونه لاحظ انزعاجه في ملامح وجهه

.. امي خايفه عليك انت صاير تعطيهم اكثر من حجمهم ترا كلها ساعه تروح وترجع يعني مايحتمل منك هالضيقه


فتح عيونه على وسعها وكانه سرح بشي غير موجود

.. انا عارف كل هذا بس انا اعرف عمامي ممكن يحملوني شي انا مااتحمله وبنفس الوقت اتمنى اني اروح لهم وماودي اخواني يروحون لهم


استنكر من سلطان تصرفه وانهزاميته

.. ليش من حقهم يشوفون بعض انت تدري انهم ودهم من زمان يعرفونه اكثر علاقتهم ماتستحق تكون علاقة اهل



تنهد بمراره

.. صدقني احسن لهم يتمنون يتعرفون عليهم من ان هالامنيه تصير حقيقه ماراح يتحملون قسوه هم ماتعودو عليها


ابتسم راكان والثاني يشوفه ويحس ان الموضوع راح يتغير

..وش شايف بوجهي يوم انك تضحك


اتسعت ابتسامته والريبه تظهر بوجه سلطان

.. زين خلنا من عمامك انا عارف انك راح تعرف تتصرف معاهم " انت ليش ماتتزوج ؟؟ امي ودها تفرح فيك



ضحك باستهزاء عليه

..ههه تصدق دمك خفيف "ليش انت ماتتزوج بعد انت ودها تفرح فيك


بثقه بالغه

.. انا عندي اسبابي ولي شروط في الي راح اتزوجها


مط شفته وميل راسه

.. وانا يعني الي مايحق لي اتشرط انا مثلك لي شروط وعندي اسبابي


تحول فجئه للجديه وبنظره ثابته .. تاكد ان هالكلام ماهو مجرد حجه اقولها ممكن شروطك تلقاها لكن انا صعب صعب "وثق اني ماراح اتزوج قبلك وماراح اقول لك السبب ولاتسئلني ليش لاني ماراح اقولك


قام وطلع لغرفته وسلطان مبهوت وصافن مثل التمثال بدون ولا كلمه


............................................................ .................



..انتي ليش زعلانه ؟؟


مازالت صاده بوجهها وكانها ماتسمعه

..اكلمك تسمعيني !!


ابتسمت بنفسها على اسلوبه وهو زعلان وهي حاطه رجل على رجل وتهتز

..اسمعك بس اخاف اذا تكلمت تعصب علي ونتهاوش وانا بصراحه مالي خلق خلنا كذا احسن


جلس بسرعه قريب منها وسحب الريموت وحذفه

..لاتكلميني كذا اذا كلمتك ناظريني



حطت يد على يد وقابلته بارتخاء

..هاه ناظرت فيك


بسرعه من نظرتها ماقدر يحبس ابتسامته بهدوء

.. خلاص منال انسي الموضوع مااحب اتكلم بشئ فايت


..وانا اكره فيك هالطبع حنا لازام نتكلم ونحط يدينا على المشكله يعني البارح لين الفجر اتصل عليك عشان تجي تاخذني وانت ماترد ويوم فكرت تجي جيت معصب كني طالبه منك المستحيل



بنغمة رجاء ..انتي وترتيني تتصلين وانا جالس ومستانس يعني شفتيني مارد كان نايمه انت فـبيت ابوك ومافيها شي اذا نمتى


مبرراته واهيه واعذاره غير مجديه

.. يــــــاسسسلام " يعني مستانس وانا ناسيني "ولعلمك انا لوكنت جايبه ملابس لسديم كان نمت عندهم وطنشتك مثل ماانت مطنشني


مسك يدها بحنان وحبها

.. خلينا نسكر الموضوع انا اليوم رايق لاتنكدين علي



ماتقدر تقاوم رجائه لو كان يتعبها نفسيا وتعتبر الي بينهم مشاكل عاديه ماراح توقف عندها وتخرب حياتها فيها قامت بسرعه وبدت تسوي الفطور



.........................................


حست بصوت على طرف سريرها فتحت عيونها تحس انها نايمه وقت طويل مع انها مانامت الابعد ماصلت الفجر "رفعت جسمها ابتسمت وهي تشوف شوق منبطحه وترسم وتلون بهدوء ضربتها على ظهرها

..صباح الخير شوشو


التفت بسرعه وعطتها وجهها وحظنتها بسرعه

.. صباح النور عنوده "اشتقت لك


ابعدتها عنها واعتدلت وهي تضحك

.. وخري خنقتيني يالدبه



ابتعدت عنها وقفت على ركبها بنص السرير


.. مابغيتي تقومين من الصبح استناك تقومين وامي قالت لي مااقومك



ناظرت للساعه على الكوميدينا كانت تسعه ونص وبااستغراب

.. ساعتك مضبوطه ؟؟


شوق بكل براءه وعفويه .. أي



ضربتها على راسها بكراستها.. وتقولين تاخرت بالنوم صدق انك ازعاج



حكت مكان ضربتها

.. انا قلت لك اذا جيتي هنا لاتنامين خلي النوم ببيت ابوك


رفعت الغطا عنها وهي تسمع كلام شوق

..يالله بسرعه خلينا نطلع نفطر انا ميته من الجوع وقاعده انتظرك



هنا تغير مزاج العنود وتضايقت وبحرج

..لاشوشو جيبي الفطور هنا "عشان ابوك ياخذ راحته


سحبتها مع يدها والعنود تقاومها


.. ابوي طلع من الصبح لاستراحة خويه واخذ ريان معاه



اخذت نفس عميق تبعد التوتر عنها وتجدد النفس بصدرها وتجاوبت مع شوق وغسلت وطلعت

.........................................








صباح السبت



..من سمح لك تعطينيها رقمي؟؟


منحرجه ماكان طبعها انها تتعدى على خصوصية احد الى الان ماتدري كيف اقنعتها واخذت الرقم منها


<ابتسام>..آسفه بس والله حلفت انها امك وانا بصراحه صدقتها



نزلت نظارتها على المكتب وسحبت الورق من داخل الدرج


.. وانتي أي وحده تقول لك انها امي تعطينها رقمي



جلست على الكرسي مقابلها


.. لا والله بس شكلها يدل انها محترمه ولو ماحسيت انها صادقه ماكنت عطيتها الرقم بس انا شبه متاكده انها صادقه



رفعت صوتها الكلام ماراق لها ماتحب احد يمتدحها حتى لوكان ظن

..ابتسام مو من حقك تتصرفين من نفسك سواء كانت صادقه اوكذابه




راحت لها ورا مكتبها بسرعه ومسكت كتفها

..خلاص نجوده واالله ماعيدها مره ثانيه لوتجي ماراح اقول لها
>>ترددت وحاولت تسكت لكن لسانها عجزها .. وراح امسح رقمها من جواالي



بسرعه ناظرت لها وفتحت عيونها باستغراب وبصوت هادي


..عطتك رقمها ؟؟؟؟؟




ردت بسرعه وبثقه ماتدري وش كثر كانت كلامتها معقده رغم بساطتها

.. أي "تبيني امسحه؟؟


التفت بسرعه وتشاغلت بالكمبيوتر قدامها


.. خلاص ابتسام روحي وخليني اخلص الي فـ ـيدي



نزلت لها وحطت يديها على كتفها

..سامحتيني ؟؟



حركت اكتافها بملل وضيقه

.. ابتسام لو سمحتي روحي وخليني



قاومت حركتها وضغطت كتفها وابتسمت .. ماراروح لين تقولين سامحتك


بدون ماتلتفت لها قلبها يوجعها ونفسها تسارع


..سامحتك بس روحي




ابتسام زميله او صديقه لنجود في عملها تمنت تستفر من نجود عن سر موضي لكن الآن تكتفي بسماح نجود وتترك الفضول لوقت ثاني
.................................



فــــي مبنى الجامعه


من بعيد وهي تجلس على المقاعد تنتظر وقت محاضرتها شافتها تسحب خطواتها وهي تمشي تحس ان رجلها تقودها بينما عقلها بسفره طويله ترخي شعرها الطويل على كتفها بجهه وحده وتحتضن ملازمها وشنطتها ادركت ان فيه ما يعكر حياتها رافقتها من اول سنه لها في الجامعه وعلى ان بينهم طبقات اجتماعيه كثيره لكن اخترقتها وشكلت معها صداقه حلوه "جلست على طول

..السلام عليكم


غمزت بعينها تمهيد لكشف سبب ضيقتها

<ندى>.. وعليكم السلام "وش عندك ماده البوز من صباح الله خير



ابتسمت كمجامله لها تراجعت ورا بظهرها ورفعت راسها وغمضت عيونها

.. تعبانه البارح مانمت





ابعدت اغراضها وجلست عندها

..ليش انتي متى نمتي زي الناس حسبي الله عليهم كانهم هادين حيلك



وهي تحط يدها على فمها ضحكت على اساليبها الي يسمع طريقة كلامها يعتقد انها مختلفه جدا عن حقيقتها


.. هههههه حسبي الله على شيطانك تقولين دعاوي مدري وين تسمعينها !!



وقفت وحطت شنطتها على كتفها

.. يالله انا رايحه " تطلعين معي ؟؟



مغطت عيونها بكسل

.. لازام اجلس لثلاث عشان منيره عندها محاضرات



لوت فمها بقرف

.. وليش ماتروحين معي اوصلك لحد باب بيتكم وخليها تتاخر براحتها




تمللت بجلستها تحس ان جسمها مهدود من السهر والتعب والارق

..لاتكفين والله ابوي يطين عيشتي




حطت يدها على خصرها


.. وانتي مربوطه يعني باام اربعه واربعين



ضحكت عليها بصوت عالي

.. هههههه انتي منين تجيبين هالتشبيهات ؟؟




بملامح ثابته وهي تتحرك

..اكيد من برامج عالم الحيوانات



..................................










نهاية البارت

يعطيك الف عافيه نوفا
احس اننا للحين بمرحله التعريف رغم ظهور بعض الحقائق لكن لسا الاكشن ما بداء وحياتهم هاديه للحين
ننتظر البارت الجاي ونتعرف اكثر
مشكوره نوفا