دخلت الخيط بالإبرة وبدية أخيط ترنق عابد ..ورجعت بذاكرتي لذاك اليوم الي اعتبره حلم
ـ شو تبين فطور
ناظرت السيارة مبين عليها جديدة وأي واحد يملك سيارة معناته عنده فلوس بس هو مب موظف.. يمكن أهله أغنياء.. كل هـ الأسئلة كانت تدور براسي أحس اني بعالم غريب أحس اني في حلم.. حلمت اني زوجته واني أتمشى وياها الحين
ـ هيييي شفيك
ـ هااا
ـ اشفيك تعبانه
ـ لا
ـ أجل شفيك صار لي سنه وأنا اكلمك
ـ خير أنت شو تريد.. [قلتها بنرفزه أحس أني زعلانه لانه قطع علي حلمي]
ـ لا أبد سلامتك عمتي .... هيييي لا تنافخين علي ترى ما اشتغل عندك
ـ أعوذ بالله وأنا شو قلت الحين أوفــــ
ـ لا دخيلك يالشيخه تعالي اضربيني لا لا تعالي اضربيني احسن
ـ لا حول ولا قوة إلا بالله الحين أنا قلت شي ولا جبت سيرت الضرب
ـ لا والله لك عين بعد تبين تجيبين سيره
ـ أقول ردني للمدرسه
ـ مني برادك مو انتي كنتي بتلعبين مع شاب قبلي خلاص اعتبريني أنا هذاك الشاب
صدمني ابد ما توقعت انه كذا.. بس دام انه من نفس النوعيه وشكله له معارف كثر قبلي فلازم أوافق بس بشروطي..
ـ عذاري يمه تعالي اقتلي الوزغه الي هني لا يروح للمطبخ
ـ حاضر يمه
تركت ترنق عابد ووقفت


......



أحلام: لأني مني براضية على الموضوع فربي ما تمملك
غسان: يمه والي يسلم عمرك ترى مني بناقص
أحلام: اشفيها بنت خالتك والله
قاطعها غسان بعصبيه: الله ياخذها هي وامها لاعد تجيبلي سيرتها ترى بذبحها
أحلام: غسان ترى ما اسمحلك تغلط على اختي
غسان: وانت شلون تسمحين لعمرك وتغلطين على اهل ابوي
أحلام: أنت تقولي هالكلام
غسان وهو يوقف: اف انا الغلطان الي جالس عندك
أحلام: روح الله لا يردك
لف غسان وهو معصب: كملي ليش سكتي بس اتمنى لو بتدعين علي تقولين الله ياخذ روحك لاجل ما اتعذب في الدنيا
أحلام وهي معصبه: غسان ابعد عني لا تطلعني عن طوري
غسان: قوليها ليش خايفه حذفته امه بعلبة المنديل وهي تقول: انقلع عن وجهي
خذ غسان جواله وطلع من البيت
[ ما أعرف هل أحزن ولا أضحك ولا أتشمت.. بس لاااا مب أنا الي أتشمت على غيري.. بس هذا جزاء لكل من يتشمت بغيره.. الله يهديك يا غسان وينسيك ريماس.. بديتوا بغلط وانتهت بماسه.. بس أنا المتضررة الوحيدة.. بيقعد غسان على قلبي المشكله أنه]
ـ ليان .. ليـــــــان وصمغ إن شاءالله
ركضت لأمي: نعم يمه
أحلام: وينك صار لي ساعه اناديك
ليان: كنت جالسه اغسل براد الشاي
أحلام: انزين روحي كوي لي الجيب كلوت الأزرق والبلوزه البيضاء
ليان: إن شاءالله يمه
[تركت امي وانا ابتسم ترى الوالدة ما كانت تعرف لمصطلحات اللبس..بس هي تبى تسوي مثل أهل ابوي.. وأنا علمتها لأجل تكون في الصورة إذا تكلموا عن شي .. الله يهديها تكره أهل ابوي.. محد فيهم ورث شي جدي مات وهو مطنفر مافي جيبه ريال.. مُآذن في مسجد راتبه 2000 ريال ومتزوج ثنتين والبيت إيجار والله المستعان.. بس أعمامي كلهم مستواهم راقي وعايشين في أحياء راقيه.. وهذا نصيبنا]



......



دخلت وشفته يناظر للسقف
ـ السلام عليكم ورحمة الله وبركاته
ـ وعليكم السلام ورحمة الله وبركاته
بوست راسها وأنا اقول: شلونك حبيبي اليوم
ـ أنا بخير دام انت بخير
ـ ياربي ترى أنا استحي لا تتغزل فيني
ـ ههههههههه وين ما اشوف اني تغزلت يا ماما انت تتوهمين وماخذه مقلب في عمرك
ـ امجد لا تحاول اعرف انك تمووووووووت فيني ولا تحاول تكذب
ـ ههههههه خلاص احبك واموت فيك تعالي ليش تأخرتي اليوم
ـ زحمة الطريق يالله ياني جايبه لك أشرطه تهبل
ـ سمعتيها
ـ لا
ـ الله يصلحك قولي آمين
ـ آمين



......



في قصر راقي ناعم هادئ.. نزل شاب وسيم قمحي اللون ..ولونه يهبل.. وشعره طويل لكتوفه مدرج.. والشنب والدقن مسويه مثل اللوك الإماراتي .. شكله الرجال معجب فيهم..
ـ هلا بالدكتور هلا والله بهالطله هلا والله بالي رافع الرأس
تقرب منها وباس راسها
صالح: هلا والله بالغالية
ـ هلا بنظر عيني هلا بالحلى كله
شهد: لا والله وتتغزلون ببعض قدامنا .. ماما تر مايصير تفرقين بين أبناءك
جمانه: صادقه اختي
صالح: كيفنا ولدها الوحيد وتتغزل فيني اوف من الغييييره
شهد: مالت اصلا انت الي تغار لانه بابا يحبنا اكثر
أم صالح(عبير): يالله بدت الهواشه
صالح: شلونك جمانه اليوم نمتي
جمانه: لا والله ما ادري شو فيني
شهد: يمكن فيها جني
أم صالح: اعوذ بالله من فالك
شهد: والله أنا شفت البرنامج إلى في قناة الرياضه اسمه 99 يقول أنه الواحد إلى يشوف ويتخيل أنه في طاغيه راح يهاجمه فيمكن يكون محسود
أم صالح : اش دخل الحسد في الكلام الي قلتيه
شهد: مو هو الواحد لما يتحدس يسلط عليه جني يعيش بداخله
جمانه بخوف: وجع لا تحوفيني صار لي شهر ما انام من الخوف والقلق
صالح وهو يقرب من اخته جمانه: تعالي برقيك
جمانه: هذه خبله انت تصدقها
ام صالح: خليه يرقيك انت شفيك

::لحظة تعريف::
أحمد (ابو صالح)::عمره 44 تاجر ثري وترتيبه الثالث بين أخوانه
عبير (أم صالح):: عمرها 40
صالح: عمره 24 سنه طالب في كلية الطب
جمانه: عمرها 17 ثاني علمي
شهد: عمرها 15
مسكها صالح وهو يضحك: أعوذ بالله من الشيطان الرجيم
شهد: مو كذا ترقيها يشترط التجويد والتلاوه في الرقيه
أم صالح: صالح الله يهديك أرقيه ما فادت المستشفيات يمكن صدق البنت حد ناظرها
صالح: ماعندهم سالفه والله ولا هذا شكل حد يناظره
جمانه: روح والله اني ماخذه حلاكم كلكم
شهد: بهذه صدقتي يمه ليش ماجبتيني مثلها
ام صالح: والله انكن حلوات
صالح: القرد بعين امه غزال
ضربته امه وهي تقول: شقصدك
صالح: ههههههه والله ما قصدت غير انهن قردات بس انت القمر
ام صالح: يالله ارقي اختك
صالح: اجل بنوديها للشيخ اذا بجد انتوا شاكين فيها انها محسوده
جمانه: لا مني برايحه وعياده نفسيه ودخلتوني والحين عند الشيخ لا أنا استحي بيكون قريب مني وبعدين انت ما تغار علي
صالح: بس هالشي لمصلحتك
جمانه: والله اول ما نزلت الرقيه الصحابه رضوان الله عليهم راحوا يرقون أهاليهم
شهد: ايه والله الرجال يرقي أهل بيته وكل والرقيه ما تختص بشخص معين أي حد يقدر يرقي
صالح: أفااااا السالفه دخلت فيها رجوله تعالي يمه برقيقك وارقي قبيلتك كلها
وحط يده على راسها وهي تضحك.. وبدأ يقراء وما حس غير بضربه قويه على وجهه..
لحظات غريبه عجيبه مريبه.. بدت بمزحه وانتهت بحقيقه مره..جمانه وقفت على طولها وهي ماسكه بطنها وتحاول تاخذ نفس..
ام صالح ..ما بين مصدقه ومكذبه ما بين دهشه وتعجب.. ما بين صرخه ودمعه.. ما بين رعشه وانتفاضه. مابين خوف وحزن..
شهد.. الخوف أرعش كل أوصالها
صالح حط يده على وجهه.. الصفعه كانت قويه ..وقف وهو محتار.. بدأ الموضوع بضحك وانتهى بصفعة ألم.. أخته تعاني لها شهر .. شهر ما ذاقت النوم فيها.. الخوف والرعب ملازمها..
تقرب منها ومسك أكتافها بس هي أبعدت يده بقوه.. هو مو متعود عليها هـ الاسلوب.. اخواته يحبونه..وهو يحبهن..
صالح: جمانه حبيبي تعالي اجلسي
ـ ابعد عني
..ألجمه الصوت..الصوت ما كان لجمانه.. الصوت كان صوت رجولي غليظ ظاهر من كهف..
دقائق مرعبه مرت عليهم.. جمانه تحاول تاخذ نفس وكأنه المكان تفرغ كليا من الهواء.. وصالح واقف مذهول.. خايف أول مره يمر بموقف كذا ولاااا هـ الموقف الصعب يمس اخته..
أم صالح.. حكمتها سيطرت على خوفها وقالت: صالح يمه اكمل الي بديته يمه انت الرجال لا تكون خايف
صالح ناظر امه عرف انها تشجعه انه يمسك جمانه.. تقرب منها ومسكها بس هي كانت تبعده عنها وحاولت تترك المكان..وهو متفاجئ من قوت اخته.. صار كانه يتعارك مع رجل قوي لا انثى رقيقه..
ـ صالح اترك اختك
كان ماسك فيها بقوه وهي تتقدم للدرج وهو مو قادر عليها
ـ حسبي الله عليك من ولد انت ما تسمع الكلام
وقفت ام صالح واتجهت لزوجها الي دخل البيت وهو مو فاهم شي: أحمد روح امسك بنتك صالح مو قادر عليها
ابو صالح وهو يتجه لصالح بغضب: اقولك اترك اختك
شهد وهي تصارخ: بابا جمانه فيها جني
تقدم ابو صالح بسرعه لبنته وهو يقراء المعوذات.. مو فاهم شي..بس هذه بنته وهذا الموضوع الي فهمه..صرخات رجوليه غليظها كانت تطلع من جمانه..
أبو صالح : اتركها
تركها صالح وابوه مسك يده وخلوها بالنص وهي تصارخ تجلس وتوقف وتحرك يديها كانها تطير.. وابوها يقراء عليها المعوذات وبدأ يقراء عليها سورة البقرة..
جلست جمانه وهي ماسكه بطنه وبدت ترجع شي اقرب من انه يكون براز
هدأ الصوت الي بداخلها وهي بدت تترنح.. مسكها ابوها
تقربت منهم ام صالح وجلست تغسل وجه بنتها بالماي
ابوصالح: هذا زمزم
أم صالح: ايه وقريت عليه خذ شربها
خذ الكاسه منها وحط الكاسه عند فمها وهو يقول: أسال الله رب العرش العظيم أن يشفيك
كان يرددها وهي تشرب..وغابت عن الوعي
ام صالح: احمد شفيها البنت
ابو صالح: صالح روح كلم امام المسجد وعلمه بالسالفه
صالح وهو يوقف: إن شاء الله



......

ـ خلخلت عظامه شنو يعني خال البنات ملاك يعني الواحد يتزوجه غضب
عادل[أبو ريماس]: أثير فكري بالموضوع
ـ رجاءً عادل لا تناقشني بالموضوع
[قلتها وظهرت من المكتب.. هـ اللي ناقص خال البنات بعد .. الله ياخذه..مريت من الصاله وشفت ريماس سرحانه.. أحلامها تبخرت بين يوم وليلة]
ـ لا تسرحين كثير عيشي يومك ترى الحياة مو مثل ما تتخيلين حب وأحلام ورديه.. الحياة صدمات
[ رميت جملتي عليها وكملت طريقي يمكن تفكر زين بكلامي..]

[انفتح الباب وشفتها قدامي .. خفت منها..حرام والله عليهم أنا ما سويت شي كبير لأجل اعاقب عليه كذا]
ـ رغد يمه ابوك كلم عمك والملكه بتكون يوم الخميس
[ما اعرف ليش تخبرني ولا اعرف سبب وجودها عندي كانت متوتره الله يستر شكله بابا مب راضي عني]

ظهرت من حجرة رغد وهي ما بين مصدقه ومكذبه مابين حيرة ودهشه


[الحين رغد الخبله هذا تصرفها.. والله بنات الزمن هذيل مفتحات.. الله يرحم زمنا لين تزوجنا وحنا نجهل امور كثيره.. عادل ماغير يلومني أجل هو وينه ليش ما يحط اللوم بعد عليه.. فتحت بابا حجرة ريناد خليني اراقبهم لا يكون بعد هي شارده]
ـ هلا يمه
قالتها ريناد وهي تقفل صفحات النت من الشاشه
ـ انت شو تسوين
ـ جالسه العب
ـ ايه العبي بس انتبي على عمرك
ـ إن شاءالله يمه
قالتها ام ريماس[لبنه] وظهرت
تنهدت ريناد بارتياح يوم ظهرت امها ووقفت تقفل الباب أول مره امها تدخل تقولها خافي على نفسك.. [يمكن موضوع رغد الخبله مأثر عليه] .. ردت للنت وفتحت الصفحات ويالي هول ما فتحته صور خليع رسلوها ليها أصدقاء السوء عبر الإيميل ومقاطع مثير.. ودردشه قمه في الدناءه

::لحظات تعريف اخرى::
::عائلة عادل::
عادل: عمره 42 مهندس في شركة أرامكوا حالته الماديه ممتازه.. ترتيبه الرابع
لبنه: عمرها 39
ريماس: عمرها 22 أخر سنه لها قسم نسيج
ريناد: عمرها 20 ثانويه عامه
رغد: 13

ـ يالله ما تبون تعشونا
قالها أحمد وهو يناظر زوجته عبير
عبير: إنزين نتعشى وين
أحمد: هنا بحجرتي لاجل جمانه أخاف تصحى وما تلاقينا
عبير: حلوه الفكره
أحمد: انزين يالله عشونا
عبير: يمه شهد روحي جيبي العشى
شهد: والله انا عن نفسي مو مشتهيه
عبير: انزين حنا ماسألناك رأيك
شهد: المثل يقول كل من يخدم نفسه اليوم
صالح وهو يدخل: هههههه ابوك يالنصب انا عارف علتكن
عبير: هههههه انزين تكرم انت وجيب العشى
صالح وهو يرفع يده: أحلى فلافل لأحلى أسره
أحمد: شو الموضوع
صالح: واضح يالحبيب ما يباله شرخ الإناث جبانات
أحمد: هههههه وانا اقول شفيهن يماطلن
عبير: خلص لا توضح اكثر أخاف يسمعنا ونروح فيها
أحمد: الله يهديكن ويحميكن

دخل حجرته وهو مصدوم كان يحلم بس الحلم سطر أحرفه على الواقع ليصدمه بقسوة الظروف.. ما يعرف شو الموضوع البنت ونامت عنده فيها شي.. ليش يجبرونه على الزواج
هو عمره مافكر بالزواج ولا بالرومنسيه كل الي في راسه انه يصير دكتور مثل صالح.. ويحب اللعب والحريه.. بس ابوها اجبره ياخذ رغد
ـ الله يلعنك يالنحيسه مالقيت غير حجرتي تنامين فيها
ـ اف انا اخذ رغد الخبله ليش بايع عمري
ـ بس ابوك بيطردك من البيت
ـ عادي انا رجال بدبر عمري
ـ وين تدبر عمرك انت تاخذ مصروفك من ابوك والسنه الجايه توجيهي
ـ يالله شلون أوفق بين دراستي وزواجي ياليت الي باخذها تفتح النفس والله انها ارجل مني
ـ لا شنو ارجل مني انا رجال.. بس هي مسترجله وخبله
ـ والله حرام ليش يعاملوني كذا وكاني بنيه انجبر على الزواج
قطع عليه خلوته فتح الباب وظهور امه قدامه
غالية: البراء ابوك يقولك الملكه يوم الخميس
انصدم البراء من الموضوع.. شنو ملكه وشنو خرابيط هو شو ذنبه يورطونه.. أصلا هو يفهم شي في عالم المتزوجين.. المشكله أبوه مب راضي يسمعله كلمه..
قالتها امه وظهرت..هو كان جالس يرتب الكلمات في رأسه لاجل تفهمه.. بس هي ظهرت قبل لا تسمعه..
ـ البنت وكل الدلايل تقول اني لمستها
ـ بس انا ما لمستها
ـ الحيوانه شكلها مسويه مصيبتها وجايه تستر عمرها فيني
ـ لكن هين يا رغد راح انسيك اسمك اما خليتك تعترفين قدامهم كلهم وأولهم امي وابوي بانه مو انا الي لمستك



::لحظات تعريف اخرى::
::عائلة عبدالله::
محمد: عمره 40 مهندس في شركة سابتكوا.. ترتيبه الخامس بين اخوانه وهو اصغر أولاد الجده مزنه
غاليه: عمرها 37 وهي اخت لبنه زوجة عادل
البراء: عمره 17 عقله طفولي.. وحيد امه ابوه.. بس زين انه ما يقول ماما وبابا مثل البنات
وهـ العائلتين عايشين في فلتين بحوش واحد

عابد: عذاري صالح جاء امي تقول لا تظهرين
انتفض قلبي من الفرح وقفت ورحت للشباك اناظره
أم عذاري وهي تقلطه: هلا بوليدي تفضل
صالح وهو يحط أكياس المقاضي على الأرض: لا الوالده انا مستعجل اسمحولي
أم عذاري: إذا مسعجل ما نقدر نلزم عليك واذا وقتك يسمح لك تشرب فنجال شاي فأنت غير
معذور
صالح: لا والله الولده مره ثاني
محمد وهو يمسح وجه: أفااا صالح يجي وما تصحوني
وراح للمغسله الي في زاويه في حوش البيت الشعبي وغسل وجهه ومسح وجهه بملابسه وتقدم بسرعه لصالح يواجهه
صالح: هلا بوحميد اشلونك شكلك سهران البارح
محمد: كنا نلعب اونو وغلبتهم كلهم
عابد وهو يقط راسه بالعرض: ولعبنا كيرم الي جبته لنا وامي وعذاري كل شي يطلعون لنا قرارات من روسهم
صالح: ههههه لا يضحكون عليك اللعبه مثل ما علمتك اياها خلك بطل واغلبهم
محمد: اصلا هذا ما يعرف يلعب ما غير يرمي المضرب يا تصيب ويا تخيب
صالح: يالله راح يتعلم وبيغلبكم
عابد: سمعت راح اغلبكم
صالح: انزين انا اترخص الحين توصين بشي يالوالده
ام عذاري: مشكوره يا وليد والله يوجهلك ويبعد عنك أولاد الحرام


جلست ام أثير على أعصابها بنتها راكبه رأسه مب راضيه تقتنع
لبنه: مها اشفيك أنا بحاول وياها بس خلينا نخلص من موضوع رغد
أم اثير: والله يا لبنه ما ادري شو اقولك أثير بنتي كاتمه على عمرها ما تشكيني همها ما تدخلني حياتها.. تعبتني وياها كل ما قربت منها اشوفها تبعد عني
لبنه: والله ما ادري شو اقلك بس انت حاولي وياها وتقربي منها اكثر
مها: والله تعبت

صحت من نومها وهي مستغربه وجودها في حجرة ابوها وأمها


ـ انت صحيتي حبيبي


ـ ايه بس أنا شلي جابني هنا


أم صالح: ماما جمانه شلونك الحين


جمانه: الحمدلله بس أنا شو الي جابني هنا


ابو صالح وهو يفتح عيونه: هلا حبيبي وأنا اقول صوت الكناري من وين


جمانه: هلا بابا


ابو صالح: اول مره احس اني نمت زين ولا كل يوم اتشوت واحيان احصل عمري طايح بالارض


ام صالح وهي تعض على شفايفها: لا والله انت الي تلاعبني كرتيه انا الي ارتحت


شهد: والله حرام عليكم من البارح وانا ساكته وكاتمه على عمري انا شو اقربلكم


أبو صالح: يقولون بنتنا صح عبير


عبير: لا انا اشك


شهد وهي تسوي عمرها تبكي: ما احبكم بدورلي اهل غيركم يحبوني


جمانه: شو الي جالس يصير ليش كلنا نايمين هنا


شهد وهي ترفع وتعدل شعرها: جمانه ما تذكرين شي


جمانه: مثل شو


ام صالح: حبيبي انت لك شهر ما نمتي عيونك ما تعرف طعم النوم


جمانه وهي تقاطعها: ايه والله انا نمت وااااااو اخيرا نمت والله احس اني ارتحت بس شلون نمت


ابوصالح: قرب الظهر بروح اصلي وانت حبيبي ما صليتي الفجر قومي خذيلك شاور وصلي الفجر والظهر



......



أثير[صليت الظهر وجالسه انتظر مباراة المنتخب بشوق.. خساره المواجه غير مرضيه كنت اتمنى لو انه البحرين تعادلت مع اندونيسيا كان خرجنا من المواجها الصعبه وصعد المنتخبين
الخليجيين.. رن تلفون الصاله.. غريبه منو الي يتصل علينا في ذا الوقت.. وقفت واتجهت للتلفون ما ادري وينهم اهل البيت اليوم]


ـ الو


ـ الــو


[هـ الصوت أرجفني من الداخل سكرت الخط بسرعه أنا شلي لقفني وخلاني ارد اليوم دوم أخليه يناحل وما ارد يوم رديت طلع لي هـ العله]


مزنه: منو الي كلم


جاوبتها بسرعه: ما ادري سمع صوتي وسكر


مزنه: زين انه سكر أقيس انه غلطان ولا حد يسمع هـ صوت المزايين ويقفل


أثير: يمه الله يخليك إلا صدق وينهن البقيات


مزنه: بالمطبخ محمد يريد الغدا أول ما يرد من المسجد لاجل يتابع المباراه


أثير: ممممم وانا اقول السالفه فيها شي


مزنه: الحين منو بيصعد


أثير: إن شاء الله السعوديه والبحرين يصعدون بس الأمل ضعيف


مزنه: ليش


أثير: لانه النقاط متقاربه


مزنه: أثير يمه ما شفتي رغد محتاجه شي ..هي ما تكلم أمها.. وأخواتها شايلات يدهن عنها.. كلمهيا انت وشوفي طلباتها خلها تفرح وتحس انها عروس والله حرام الي تسونه فيها.. اثير يمه انت عمتها لازم تكونين احن عليها من خواتها


ـ إن شاءالله يمه بروح لها الحين واذا بدت المباراة خبروني


ـ الله يوفقك ويزقك بالزوج الصالح


[صليت الظهر .. وظليت جالسه على السجاده.. الحين بالله انا عروس .. انزين ليش ما يجبون لي مثل العرايس .. شفت شي غريب بالسجاده..الله يلعنهم حاطين صليب بالسجاده]


ـ رغد خلصتي


ـ ايه .. عمه تعالي شوفي حاطين صليب في السجاده


تقربت عمتي مني وناظرت محل اصباعي


أثير: ايه والله حسبي الله ونعم الوكيل فيهم


رغد: شسوي ارمي السجاده


أثير: لا اعطيها ماما تخفيلك الصليب


رغد: شلون


أثير: تخيط عليه بالحرير


لحظه سكتنا فيها .. انتهت السوالف عندنا.. انا راح اموت من كثر السكوت.. حرام عليهم يعرفون اني احب اسولف والعب ليش يحرموني من هـ الشي


ـ رغد اليوم العصر بنروح السوق نتقضى لبكره


رغد بفرح: والله


أثير: ايه مو انت عروس ههههههههه


احرجتني عمتي بس تصدقون حلوه ضحكتها


أثير: رغد شو شعورك وبكره ملكتك


رغد: شلون يعني


أثير: يعني اوصفيلي شو أحساسك الحين


رغد: زعلانه وطفشانه وودي اظهر من حجرتي بس بابا مانعني


أثير: سكتي والي يرحم والدينك سكتي أنا توني تأكدت انه راسك متروس تبن




نهاية الجزء الثاني

 الــ ج ـــزء الثالث
طفولة بريئة ..جنون .. مشاعر متناقضة.. سطور مؤلمة.. قسوة وجبروت..ارتباكات..افراح مقتوله..صفحات رماديه واخرى صماء

رغد[تركتالقرآن.. تذكرت المدرسه بشترط عليهم اكمل دراستي..هو صحيح انا ما احب المدرسه ما أروح غير لأجل اخذ مصروفي والعب مع البنات..يعني من زينهن الأبلات.. بس ابلة الرسم تهبل تعطيني الميه كامله أصلا انا عيوني ما تجي غير على درجة الرسم والبقيه كلها ما اشوفها واهلي عكسي تماما..عجب المفروض يشجعوني يمكن اصير اشهر رسامه..بس بكمل دراستي اجل البراء يدرس وانا لا والله بصير اشطر منه غصب طيب .. غريبه عمتي اليوم بطوله ماشفتها ..وانا محتاجه اغراضي الشخصيه ضروري الي سرقتها من عمتي خلصن ما بقى غير واحد..مسكت ورقه وقلم..مني عارفه شو اكتب.. استحي والله..كل اصبع فيني يدز الثاني لأجل يكتب الكلمات حيييييييييييييييل مستحين مثلي.. تضاربت اصابعي مع بعض الإبهام يقدم السبابة.. والسبابة تقدم الوسطه ..والوسطه تقدم البنصر.. والبنصر يقدم الخنصر..ناظرت يدي ياحرااام اصباعي الصغير كل الأصابع فوقه وكل واحد فوق الثاني.. حزنت عليه ذكرني بحالي ليش انه صغير فالكل يعطيه على راسه..صرخت عليهم بس يالله اكتبوا الغرض احتاجه ضروري.. اتفقوا على انه اقصر اثنين هن الي يكتبون يعني الإبهام والخنصر بس شلون..يالله خليني اكتب طال ماهن اتفقوا اخاف عقب يضاربون ثاني وما اكتب شي..مسكت القلم وكتبت..عمه ممكن تجيبن لي مثل الي سرقته من درج صيدليتك.. سكرت الورقة.. الغريب هنا انه كل أصبع يحاشر الثاني على الورقه يبون يسكرونه هو دوم التعاون يكون في الأمور السهله اما المواقف الرجوليه الكل يشرد منها..]


......


ريناد وهي تساسر ام إثير: خالتي إشفيهن بيت عمي أحمد لبسهن كذا
أم أثير: الله هداهم
ريناد وهي ترفع حواجبها: مممممم ضاربتهن طواعه بس من متى الله يرحم أيام أول الشفاف والقصير والعاري
أم أثير: الحمدلله وإن شاء الله يجيكم الدور
ريناد: اصلا اتحدى يستمرون كلها يومين ويردون
أم أثير وهي توقف لاجل تسلم على أحلام وليان: قومي استعجلي أختك ريماس وقوليلها الكل حضر وهي بعدها ما نزلت

......

غسان: ياخي شوف بالله المهزله زواج بزارين
صالح: وانت شعليك براحتهم
غسان: دخيلك شوف ولد عمك كانه بنيه مغصوبه
صالح: انت شفيك على الرجال الله يهديك
غسان: أي رجال الله يهديك هذا بزر
صالح: انزين بزر ترى انا وانت سبب انه بزر كل واحد التم على اصحابه ونسى اقرب الناس له
غسان: يعني شسوي بعمري اخذه وياي اخاف يفضحني ويصيح علي قدام خوياني ردني لماما يسويها ولد عمك
صالح: ترى مايصير الي تقوله توه صغير عمره 18 ووحيد امه وابوه
غسان: انت الظاهر اليوم مستوي مصلح اجتماعي
......

ـ ريناد خلينا بروحنا
تركتنا ريناد وسكرت الباب ودخلت
أثيرـ ريماس لبسي بسرعه وانزلي
صرخت ريماس: ما اريد انتوا ليش ماتحسون فيني انزين رغد وغلطت مع البراء ليش بس حنا الي الله عاقبنا ليش هم يتزوجون وحنا لا
صرخت عليه: ريماس استغفري ربك حرام عليك الي تقولينه انت شنو انهبلتي
ريماس: عمتي رجاء اطلعي ما اريد اشوف احد
أخذت نفس هذه بتفضح عمرها الكل بيقول عنها انها حاسده اختها اذا مانزلت
تكلمت بهدوء لاجل تسمعني وتطيعني:ريماس الناس بتاكل وجهك بتقو
قاطعتني وهي تصارخ: خليها تقول الي تقوله انا شعلي من الناس انا علي بنفسي لو سمحت اطلعي لبره
أثير: انزين دام انك تحبين غسان ضحي وخذيه وانتوا حاملين للمرض وإن شاءالله خلفتكم كلها تجي سليمه
شفتها سكتت وهي تفكر.وعقب ناظرتني وقالت
ريماس: وبابا
أثير: انت معليك في ابوك انت الحين تبينه
حركة ريماس راسها بايه
اثير: انزين يالله بسرعه بدلي لانه الكل يسال عنك
ريماس: انزين شلون بتقنعي بابا
أثير: هو انت اصلا قلتي ايه في الاول ظليتي ساكته يوم رفض ابوك
[شفتها توقف وتروح لدولابها..الله يهديها امي مزنه هي الي ترسلني لفلان وعلان واضطر اتحمل غلاستهن بس زين انهن كلمه توديهن وكلمه تجيبهن..هذه ميزت بنات عادل ]

......

عذاري..[ جلست وقربت الطشت مني وبديت اشطف الملابس..ورجعت بي الوحده للذاكره الرماديه ]
ـ شو شرطك
ـ تعطيني الف ريال ..قلتها باستحياء
ـ كــــم؟؟!!
من طريقته حسيت انه المبلغ كبير فأنا اصلا بين يدينه قررت اخفظ المبلغ لاجل يرضى ويعطيني
ـ انزين سبعميه
ـ .......
ما قال شيء شكله المبلغ ناسبه بس ان شاءالله ما ينزل اكثر
ـ انزين ليش تبين الفلوس
ـ لاجل اشتري مقاضي لأهلي
بريك قوي وحسيت عمري ارتطم بالقزاز الأمامي
ـ هييي انت شفيك انهبلت تبى تموتني
مارد علي ظل يناظرني احرجني بنظراته صح انا متغطيه ومو مبين فيني شيء بس هذه اول مره اطلع مع شاب و أول مره رجل يناظرني كذا احس حفظ ملامح وجهي
ـ وجع شو قلت الادب هذه ابعد نظراتك عني
قلتها وانا ابعد وجه للجهه الثانية.. رديت يدي بين أحضاني وهو ظل مثل ما انا وجهت وجهه يناظر الجه الثانية.. حرك السيارة وظلينا فترة احسها دهر وهو يسوق وهو ساكت.. نزل ورد سريع وهو حامل فطور.. وصلنا للكورنيش يااااااااااه شفت البحر اخيرا .. خواني ودهم يجون للبحر ونشوف الطراطيع (الألعاب الناريه) والعالم ونعيش جو عائلي جمب الشاطى..وقف السياره
ـ انزلي خلينا نفطر
نزل ونزلت بعده ..جلس على كرسي خشبي وجلست على طرف الكرسي
ناولني العصير وهو ساكت اخذته واخذت السندوتشه
ـ بدا يشرب وياكل وهو ساكته الي يشوفه يقول حد ضاربه على وجهه .. ابد مو هو نفسه الي من شوي شفيه تغير لا يكون المبلغ كثير عليه بس انا احتاج المبلغ عابد راح يموت علينا من سوء التغذيه بعده صغير عمره 7 سنوات مايتحمل الجوع مثلنا..
ـ اشفيك ما تبين فطورك
ـ الا اباه
ـ انزين كلي
مسكت السندوتشه شميت ريحتها تهبل..اكلت منها لقمه حيييييييييل عجبتني
سالته
ـ شو هذا
ـ شو شو
ـ هالسندوتشه شو الي داخلها
ـ انت تستهبلين
ـ لا والله بجد اتكلم
رد يناظرني وشكله مصدوم..
ـ انت اول مره تاكلين فلافل
ـ ايه ليش
ـ دخيلك كلي وانت ساكته
اكلت لقمه ثانيه ورديت لفيتها لاجل اخذها لاهلي.. بديت اشرب بالعصير كان يهبل خفت اساله ويسكتني.. شربت شوي بس ضمأي اجبرني على اني اكمله للنهايه..وبعدين ما اقدر اخذ العصير لاهلي اخاف امي تسالني.. شفته رد سندوتشته وحطها داخل الكيس ما اكل منها غير كمن لقمه..ومد يده ياخذ حقتي وهو يقول
ـ تبينها
ـ إيه..انت ما تبي حقتك
ـ لا
ـ انزين اعطيني اياها
قلتها وانا خجلانه بالعاده انتظر صاحبة لنهاية الفسحه واجمع في السندوتشات والشبسات الي تركوها البنات لاني استحي اخذها قدامهن بس هذا انا بضيع حياتي وياه فعادي لو اخذت حقته
ـ ليش
كان هذا سواله..جاوبته
ـ لاجل اخذها لاهلي
ـ ليش
شرحت له تفاصيل حياتي باختصار..ومر علينا الوقت وسالته
ـ كم الساعه
ـ يوووه احدعش ونص تاخرنا
نزل للمخبز ورد بسرعه ووهو حامل كيس مليان بفات
ـ خذي هذه لأهلك
فتحت الكيس وبديت اقطع البف بشكل عشوائي
ـ انت شو تسوين
ـ انت ماتشوف
ـ اشوف ليش تقطعينها
ـ لاجل يبين اني ملقطتها من الأرض..الله يهديك انت جياب شي كثير

ريناد: اوووف ياربي الحين هذيل ما ضربت فيهن الطواعه غير اليوم..نبي نسمع طرب شو الديجه الأرف الي جابته خالتي عبير
أثير: هذا ديجي اسلامي اولا ..وثانيا اختكم اليوم ملكتها ولا وحده فيكم كلفت على عمرها تساعدها في غرض..إذا عجبكن اهلا وسهلا ما عجبكن دقن راسكن في الجدار
ريناد: وانت تعتبرين هذا فرح مثل العالم
أثير: ريناد سكتي ترى بتسمعين كلام ما يسرك
ليان[هذه النقاش كان داير بين عمتي وريناد.. غريبه ما اشوف اثر للسعاده على وجييهن..الي يشوفهن يظن السوء..الفرحه مقتوله هنا]
ليان: عمتي ممكن اشوف رغد
أثير: روحيلها بحجرتها ونسيه اكيد ملانه
جمانه وشهد: وحنا بعد بنروح لها

......

رغد: ما اريد انزل والله استحي ماما والي عافيك مااريد
ام ريماس: رغد الناس شو بتقول عنا
صرخت وانا محروقه شلي يصيرلي: تقول الي تقوله ما اريد
مسكتني ماما ووقفتني وهي تصارخ: اوقف رغد ترى والله لا تنضربين تحملي غلطاتك
سكت ونزلت راسي دموعي بدت تنزل
ام ريماس: كبفك ابكي وعدمي الميك اب وغصب راح تنزلين
أثير: لبنه لو سمحتي اظهري انا
أم ريماس: لو سمحتي لا تدخلين بيني وبين وبنتي
أثير: لا والله الحين عرفتي بنتك وينك عنها يوم نامت برا البيت وينك عنها يوم اجهزلها لملكتها وانت حت ماكلتفي على عمرك تحطين يدك..غلطت بس غلطتك انت اكبر يامدام
الجده: بسكن فضحتونا
لبنه: هين يا اثير أنا اعرف اشلون ارد عليك
أثير: اعلى مافخيلك اركبيه
ظهرت لبنه وهي معصبه
الجده: أثير يمه عيب ترها اكبر من امك
أثير: انت ماتسمعينها زوجة ولدك شو تقول اصلا هي متى اهتمت فيهن لأجل تعاقبهن خلها تفرفر في الاسواق ازينلها
الجدة: الله يهديكن قتلتوا الفرحه الباقيه
قالتها وظهرت
تقربت أثير من رغد وعدلت لها الميك آب الي يشوف يقول حد جابرها تعدل رغد
أثير: جدتك تقول قتلنا الفرحه الباقيه اريدك الحين تبتسمين وتصدميهن كلهن خصوصا خواتك وامك ..خلينا نضحك عليهن قبل لايضحكون علينا
أثير: ها شقلتي
رغد: بس انا ما أريد انزل
أثير: افرحي رغد الفرحه ما تنعاد وبعدين بتشوفين الحبيب
قالتها اثير وهي تغمز لرغد الي انحرجت

......


انتهت الملكة.. كانت مشهور بالنسبة للرياجيل (مجس ومعازيم) وعائلة بالنسبه للحريم...خرجت أحلام وبنتها الي كانوا اخر المعازيم وظلت غالية لانها بتدخل البراء غصب عنه يتصور مع رغد.. بس كانت رغد تحت يدين امها تناشد الرحمة..لبنه تضرب في رغد الي من شوي كانت تضحك وتبتسم لبنات عمها..
غالية وهي تحاول تسحب رغد من بين يدين امها: لبنه انت شفيك انهبلتي
ولبنه مافي ذاركتها غير الكلمات الي سمعتها وانتظرت خروج الكل لاجل تبرد قلبها وتطفي النار الي تشتعل بجوفها
أحلام: اقول ام صالح شكله ورى الزواجه هذه مصيبه
عبير: اذكري ربك يا ام غسان
أحلام: والله اقص يدي لو ما وراهم مصيبه أصلا غسان الأسوبع الي طاف مر يسلم على عمه وشافته متى لحقت تكبر ومتى لحقت تغطي
عبير: اشفيك البنت خلاص هذا وقتها
أحلام: قلتهيا بعظمة لسانك هذا وقتها يعني بعدها نونو أكيد صار شي وداسينه هذيل الاخوات
عبير: الله يهديك مالنا ومال الناس
أحلام: والله الناس بدت تاكل وجهي الكل من عرف بالملكه يسالني ليش زوجوا الصغيره والكبار بعدهن
الكل تجمع يفارع بينهن.. رغد الطفلة البريئة العروس الصغيرة السماوي لاعب فيها معطيها رونق خاص يصف فطره بريئة وسجايا نقيه..ذاب الميك آب واختلط ببكائها الطفولي الي كله صراخ ودموعها الي تشتكي ظلم ما تعرف سببه
الجده: اتركيها لا بارك الله فيك ولا في الشيطان
غالية وأثير ومها قدروا ياخذون رغد بالقوه
أثير وهي تضم رغد وتصارخ: انتِ شو انتِ ام انتوا ليش دوم تلومون عيالكم وينكم عنهم تتركوهم وبالاخير تعاقبوهم بذنب انتوا السبب فيه
لبنه وهي تصارخ: الله ياخذ روحها دام انها فضحتنا
أثير ما تحملت الدعوه.. امجد مر على ذاكرتها بشكل سريع والدعوه الي اخذها بذاك اليوم
الجده: الله لايبارك فيك كان دعيتي على بنتي انتوا ما تتبون يكفي خالد الي متعذب ويا ولده حسبي الله عليكم كان هذه تربيتكم
أثير وهي تصارخ: أصلا انت يالبنه احمدي ربك انه الله معطيك هذيل البنات وحافظهن لك ..ولا انتِ وين والتربيه
مها [أم أثير] وهي تصارخ: أثير لا تدخلين عمرك فيهن
أثير: يا ماما هذيل بنات اخوي تعرفين شو معني بنات اخوي
لبنه: شفناها العمومه ظهرت الحين أعرفك مثل امك تحبين تصيدين في الماي العكر
أثير: أنا ما ارد عليك لاني اعقل منك
لبنه: اظهري من بيتي ما اريد اشوفك فيه دقيقه وحده
ـ لــــــــــبنه
هزت المكان هز الكل التفت لصاحب الصوت..تغطت غاليه ودخل عادل وهو معصب..نظراته كانت قاتله لها: هذا بيتي وبيت اهلي انت ضيفه عليه اذا عاجبك الحال اهلا وسهلا مو عاجبك الباب يفوت جمل
تركة لبنه الصاله وطلعت حجرتها
أم أثير وهي تعاتب بنتها: هـ الي استفدتي منه الحين يالله اطلعي راضيها
عادل: خليك محلك بترد لعقلها

......
دخلت جمانه بيتهم وهي ترتعش من الخوف المسبح الماي قلب دم..عليه طاغيه..ما لحقت تشوفه لانها ذكرت الله ودخلت بسرعه..قلبها يرتعش من الخوف تحس انها راح تموت تنقتل اذا ظلت بروحها..لا اراديا ضمت امها الي صارت ظلها بعد ما اكتشفت المس الي فيها.
عبير: جمانه حبيبي اشفيك
تكلمت جمانه بحروف مرتبكه خايفه: ماما شفته على المسبح
أحمد وهو يقاطعها: تعالي بابا تعالي
ضم بنته وقال: شهد حبيبي روحي جيبي العسل والزمزم
شهد: ماما
عبير ابتسمت لـ شهد صاروا ظل بعض ثلاثهم وين ما يرحون ويا بعض..تركوا الصاله متجهين للمطبخ..وحطت جمانه يدها على وجهها وهي تصارخ.. عبير ماالتفت لبنتها صارت دخلت بسرعه للمطبخ تجيب العسل والزمزم..
احمد ابعد يد جمانه عن وجهها وبداء يقراء عليها بصوت مرتفع ..وجه جمانه لف فمها وصل لأذنها اليمنى .. تزامن وصول صالح وامه وشهد عند جمانه..
ومع الرقيه الشرعيه والحوار الي دار بين أحمد والجان وقبلها مشيئة الله قدروا يمنعون ظهور الجان من وجهها .. بس مازال موجود داخلها ..

......

ـ السلام عليكم ورحمة الله ..السلام عليكم ورحمة
أثير[صليت الظهر وشفت رغد واقفه عند الباب..صدق البنت هذه تحزن ابتسامتها اختفت شقواتها اندفنت بين يوم وليله]
تكلمت رغد بخوف: عمه ممكن ادخل
ـ تعالي
قلتها وأنا مستغربه حال رغد سبحان الله من حال لحال..بعد الرجه الي كانت تسويها وصلت لهدوء مجبوره عليه
رغد[كنت في صراع رجليني الثنتين يضاربن كل وحده تعزم الثانيه لاجل تتقدم ..وانا ما عندي شخصيه اقودهن..هن الي يقودوني..]
أثير[حسيت فيها متردده وقفت ورحت لها دخلتها حجرتي وسكرت الباب جلست على السرير وأشرت لها تجلس بس الظاهر انها ماتفهم لغة الاشاره]
أثير: اجلسي رغد
رغد[ظليت واقف لاني ما اقدر اجلس ..يااااااااااااه الصراع الي بين اعضاء جسمي متى ينتهي يديني يتعازمن من الي تعطيها الورقه]
أثير[شفت الورقه وشفت نظرات رغد للورقه ويدينها المرتبكه..مديت يدي وأخذت الورقة..فتحتها وشفت الخط حالته حاله..رغد خطها حلو بس شو الخط الي هنا خرابيش ..ما إن انتهيت من قرأت الخرابيش وعلت ابتسامه خفيفه على وجهي..وشفت رغد حاطه يدها على وجهها وتصيح بصمت.. تمرين بهـ المرحله وامك ماتعرف عنك شي.. بس انا شفتها تصلي الفجر..]
وقفت وكلمت رغد: خليك هني بروح أدور عند البنات وبرد
ظهرت من حجرتي وشفت امي مزنه قبالي
الجده[مزنه]: يمه أثير لبسي بسرعه وكلمي العم محمد[الكل يقوله العم محمد وهي بعد وياهم رغم انها بعمره تقريبا] يودينا لأحمد جمانه تعبانه
أثير: خير شو فيها البارح ماكان فيها شي

......

أحمد: الله يهديك يمه أنا قلت اني بمرك العصر
الجده وهي تمسك ذراعه: وينها جمانه ودني عندها
أحمد: نايمه الحين عند امها
الجده: وانتوا للحين نايمين
أحمد: يمه والله مانمنا الي من شوي جمانه ليله كله تصيح
أثير[ابتعدت عن أحمد ما احب احمد.. يذكرني بخالد..أكرهم ثنيناتهم.. جلست وأنا ساكته..العلاقه بيني وبين أحمد رسميه لأبعد الحدود ما كأن خوان عشر سنوات مانكلم فيها بعض ونضطر نسلم على بعض بس لأجل مانلفت انتبها انه في شي كايد بيننا.. ماجيت هنا غير لما عرفت حالة جمانه قلبي ماطاوعني اتركها بهالحاله..وأمجد باقي على زيارته ثلاث ساعات..يعني اقدر ازوره اليوم وأفاجئه بزيارتي..لاني ما ازوره الجمعه والخميس بسبب الويك اند ]

......

عذاري: يمه منو هـ الحرمه الي من تو ظاهره
ام عذاري وهي تكلم عياله وهي معصبه: لو جات هـ الحرمه مره ثاني لاتدخلونها البيت فاهمين
محمد وعابد: ايه فاهمين
::لحظات تعريف::
عائلة عذاري
أمها [مرزوقه عمرها 37]
ابوها عزروه بالقتل لانه هرب مخدرات
خلف عمره 15 سنه مطلوب في قائمة الإرهابيين
محمد: عمره 10 سنوات
عابد: عمره 7 سنوات
عذاري [ كنت عارفه منو الي جاتنا هذه وحده سمسارة جسد..حسبي الله عليها تدور على الناس الي ظروفهم صعبه مثل حالاتنا وتصيد في الضحايا..الحمدلله انه ربي حط في طريقي صالح..ولاكانت حياتي تدمرت..]

......

صالح[.. دخلت البيت وأنا شايل الغدا ..الوالده مانامت إلاه عقب صلاة الظهر ..وجدتي عندنا والأغرب انه عمتنا الي ماتطب بيتنا موجوده..سبحان الله مغير الأحوال يمكن عرفت واجبها كشخص في العائلة]
شهد وهي نازله: ياي جيت في وقتك انا ميته جوع
الجده: صلوا المغرب اول
صالح: والله ميتين جوع بأكل وعقب اصلي
الجده: دام انك ميت جوع فالأولى تأكل لاجل تخشع في صلاتك
وقفت عمتي أثير وخذت الأغراض مني وهي ساكته غريبه هـ الانسانه من دخلت بيتنا وهي ما تكلم غير الي يسألها

......
غاليه: عبدالله وين رايح
عبدالله: بروح لبيت أحمد اتطمن على جمانه
غاليه: انتظر ابدل ملابسي واروح وياك
عبدالله: لا البنت ما تبى تشوف احد ولا تبى أحد يزوهم بالبيت
غاليه: ليش
عبدالله: والله مدري بس أحمد يقول انه وجها التوه
غاليه: لايكون هذا مرض الوجه
عبدالله: ياليت بس احمد يقول كلم الي فيها والحمدلله انه قدر يمنعه من انه يظهر من وجهها
غاليه: انزين كان كلموه يظهر من يدها ولا رجلينها
عبدالله: ازرو [تعبوا] فيه وبعدين الشيخ قال بالتدريج لأجل البنت ما تتعب عليهم الله يكون بعونها ويساعدها

......

......

أثير[ صليت العشاء..وجلست على السجادة..تذكرت أمجد يوم كان رافض يشوفني وحالات الغضب والسب الي كنت اتعرض لها..وردت افكاري لجمانه الي رافضه وتصارخ ماتبي تشوف احد..امها وابوها وبس الي يجلسون وياها..يقول احمد شكلها يخوف من لف وجهها منعها تشوف نفسها وشال كل المرايات الي بالبيت بس ماقدر يمنع يدينها الي كل شوي تتحسس وجها..بس بحاول فيها مثل ما كسبت حب أمجد أكيد راح اكسب ثقة جمانه..طويت السجادة ودخلتها في الدرج..وظهرت من حجرة شهد..شفت شهد جالسه على زاويه الباب المسكر وهي تبكي..]
أثير:شفيك شهد
شهد: جمانه ماتبي تشوفني
أثير:منو داخل
شهد: ماما وجمانه
[ تقدمت بخوف..ما اعرف الشجاعه الي بقلبي تلاشت..حالة امجد مختلفه تماما عن حالة جمانه..جمانه عالمها مربوط بعالم الجان..وأنا اخاف من الجان..يالله اعطيني القوة والعزيمه ]
شهد: عمه شو تسوين
أثير: اريد اكلمها شوي
شهد: لا لا راح تصارخ خليها براحتها يكفي الي فيها
طنشتها وفتحت الباب..عبير ناظرتني متفاجئه وكانت تمنع دخولي بنظراتها..جمانه كانت مسدوحه ومغطيه وجهها باللحاف

[دخلت وأنا ادعي ربي بصالح اعمالي انه يوفقني ويساعدني]
أثير: صاحيه
عبير: ايه
أثير: انزين ممكن اكلمها على انفراد
[عبير ترددت كثير قبل لا توقف..أنا مالي علاقه قويه فيها ولافي عيالها بسبب أحمد بس الاحترام متواجد]
جمانه: ما اريد اشوف احد
أثير: انت اسمعيني وعقب قولي الي تبينه
[أشرت لعبير تظهر لاني ما احب اتكلم بوجود أحد اخاف الفشل العلني ..ظهرت عبير..جلست على السرير وأنا أشجع نفسي عرفت خجل جمانه الحين هو انها ملموسه وشكلها متشوه ..ارسم صورة امجد في ذاكرتي لاجل ابعد الخوف عني]
اثير: جمانه ممكن تسمعيني
صرخت جمانه: ما أريد أشوف احد انت ماتفهمي
[ خفت بنات احمد عاقلات وراسي بدأ يوسوس لايكون هذي مب جمانه ]
ـ أطلعي بره اريد ماما
بلعت ريقي وتشجعت: انت اسمعيني بالأول
ما ردت علي عرفت انه عندها رغبه تسمعني
[احترت شو اقولها مدخله عمري غلط في حياتها.. بس ما احب اشوف احد مريض ويأس بالذات انه حالتها لازم الكل يكون حولها ]
ـ عمه انت هني
قالتها بصوت مرتجف عرفت انها خايفه لاتكون بروحه..لحظات سريعه ارتفع اللحاف وارتمت علي ترتعش من الخوف.. لمحت وجهها المسحوب للجه اليمنى..كان شكله يرعب انفطر قلبي عليها اكيد متخيله شكلها شي خارج عن الطبيعه
جمانه: أريد ماما أنا خايفه
أثير: حبيبي أنا وياك
جمانه: ما ارديك اريد ماما
أثير: خطأ حبيبي الي تسوينه
جمانه: انت ماشفتي وجهي زين بتخافين بتتريقون علي
أثير: انزين بظهر بس بقولك كلمة حطيها حلقه في اذنك إذا مت لا تبكين علي ولا تقربين مني
جمانه: انت شو تقولين
أثير: وأنت شو تقولين
جمانه: انا وضعي مختلف انا
أثير: انت مثلك مثل أي مريض وتحت العلاج
جمانه: بس شكلي تشوه
أثير: والله نزل العلاج لمثل حالتك
جمانه: بس أنا شكلي تشوه
أثير: حبيبي اسمعيني كلها فتره بسيطه وبيخف عنك بس انت خليك قويه
جمانه: لا ما اريد احد يشوفني
أثير: انزين عندي حل البسي نقابك وبكذا تكوني قريبه من الي يحبونك والي كم ألمهم رفضك لشوفتهم
جمانه: بس شهد وصالح يراعون ظروفي
أثير: انت اليوم وبكره تقاومين رغبتك في انك تجلسين وياهم بس بعد كذا راح تملين وممكن يتعودون بعدك عنهم
جمانه: لا لا خواني يحبوني
أثير: انزين ليش تبنين الحواجز بيدينك
ابتعدت عني جمانه وخلتني اناظر وجهها ..ما غمضت عيوني لاجل ما تاخذ على خاطره..وعيونها اليسرى كانت مسحوبه لزويه جدا ضيقه لجهت اليمين وفمها اشعر انه وصل لاذنها كل معالم وجهها مالت لليمين..تقربت منها وبوست خدها وراسها
أثير: جمانه انت بنتنا لا يمكن احد يتشمت فيك او يشفق عليك هذا واجب انساني اخوي الدم يحكمنا ..والله راح يجازينا انت على صبرك وحنا على وقوفنا جمبك..حبيبي ترى البعيد عن العين بعيد عن القلب..وانت شوف الي حولك انا بعيده عنكم بس ما اعتقد انكم تحبوني تحترموني صح بس الحب هذا مو موجود بيننا
ردت لحضني وهي تقول: انت ليش تقولين كذا انت الي ماتزورينا حنا نزوركم كل اسبوع بس ما نشوفك على طول ملازمه حجرتك انت وريناد ..هي رغد وريماس الي نقابلهن
أثير: وعد حبيبي اظل وياك لين الله يقومك بالسلامه
جمانه: وعقب تريدن عند عمي عادل وتردين مثل قبل
[صدمني سوالها .. صح ليش انا اقحمت نفسي في جمانه وعالم جمانه.. وماادري شلون نطقت بالوعد الي من تو ..في اني اظل وياها.. بلعت ريقي توني استوعبت اني راح اشوف احمد كل يوم.. بصلح لها فكرتها في اني ماراح ابات عندهم بس دخلت عبير علينا]
جمانه: ماما عمتي بتبات عندنا لين اطيب..صح عمه
أثير: إن شاء الله
عبير بطيب خاطر: البيت بيتها وحنا ضيوف عليها
[ حطيت نفسي في معادله صعبه..أنا وأحمد وبيت أحمد..وكرهي لأحمد..واللحظات الي راح تجمعني باحمد..]

......

رغد[من سمعت الخبر وأنا ابكي جمانه حبوبه..ودي اروح لها بس اخاف اتكلم وافتح فمي واحصل نفسي بين يدين ماما ..تذكرت الضرب الي اخذته البارح وكرهت البراء كله بسببه الحقير..انا شو ذنبي هو الي ظل بحجرته لين نمت بالدولاب..هالنحيس الله ياخذه..ورديت اصيح وامسح دموعي عمتي الثانيه تركتني وظلت عند جمانه..بروح لهم..وقفت ومسحت دموعي بطرف كم البجامه وفتحت باب حجرتي بشويش وماشفت احد وبسرعه ظهرت وقفلت بابي ودخلت حجرت عمتي..سكرت الباب ورحت للتلفون..رفعت السماعه ودقيت على رقم جوال عمتي]
ـ هلا عمه وينك..وبدت عيوني تدمع وبديت اصيح..كنت اسمعها بس خفت وبسرعه تكلمت.. لا ماما ماضربتني.. لانك مو موجوده..الله يخليك ردي اخاف ماما تجي تضربني..وبعدين انا اريد اشوف جمانه أنا احبها
ـ انت تحبين كل البشر....... بسك دلع رغد ...يالله انت لا تنرفزين امك لاجل ما تضربك وبعدين خليك مع جدتك ..... خلاص انت صرت الحين بعصمة رجال خلك قويه..اوه تذكرت جدتك هني أجل خليك مع ماما..انزين رغد جهزلي كم غرض واهم شي بدلت الشغل ..ايه وارسلي مع عم محمد..اوه خلاص انا بكلم ماما انت لا تسوين اخاف امك تعشيك مثل البارح..يالله فمان الله
شهد: رغد ياحرام والله انهن نونو بس البارح طعلت تهبل
جمانه وهي لابسه برقعها: ايه والله توها نونو

......

أحمد: ياربي ما اقدر انام وبنتي بعيده عني
عبير: تبى تنام عند عمتها
أحمد: من متى عمتها اعتنت فيها لاجل تعتني فيها الحين
عبير: أحمد شهالكلام الي تقوله هذه وهي اختك حرص ولاتقول الي قلته قدام عيالك بتكون قدوتهم
أحمد: لا حول ولا قوة الا بالله اجل روحي ناديه اريدها شوي
عبير: روح لهن انت شفيك من جوا اهلك وانت معصب
أحمد: أنت روحي نادي جمانه الحين
قالها بنرفزه واضحه ..زرعة الشك في قلب عبير
عبير: انت ماتبي أهلك يبتون عندنا
ناظرها أحمد وهو فاتح فمه..وعقب علامات الأستفهام والتعجب من الطرفين..جاوبها
ـ انت صار لعقلك شي...بس انا خوفي ع لى جمانه مخليني متوتر
عبير: عادي حبيبي البنت وبتنام عند عمتها
أحمد: انا وصالح لما تجيها الحاله مانقدر عليها تبين أثير وامي يقدرون عليها
عبير: لو جاتها الحاله وهي عندهم اكيد بخبرونا لاتخاف حبيبي

......

ـ لا يبه خلاص الله مو رايد لنا نكون لبعض
ابو غسان: انزين شقول لعمك الحين هو الي كلمني
غسان: تصرف يبه أنا خلاص صرفت نظر عن الموضوع
أحلام: خلاص يمه بيكلمه ابوك لاتشيل هم.. أنا من البدايه قلت مني بموافقه
غسان وهو يوقف: يمه خلاص كل ما انفتح الموضوع رديتي لنفس الموال
قالها غسان بعصبيه وترك لهم المكان بكبره
ابو غسان: ارتحتي الحين زعلتيه
أحلام وهي مطنشته: ليـــان ليان وتبن
ابو غسان: الحين ليش تسبينها
أحلام: ترى انا كنت شايلتها ببطني ما اعتقد انك احن عليها مني
ليان[سمعت نقاشهم ..ابوي احن واحد علي وانا اموت عليه.. ترددت اروح ولا لا..اخاف اروح وامي تعاند ابوي وتهاوشني وابوي يدافع عني وتصير مشكله مثل دوم..سمعتها تناديني هالمره وشكلها حيييل معصبه..سميت بالله ورحت]
ـ نعم يمه
أحلام: وينك انت صار لي ساعه اناديك
محمد: وين ساعه توك ناديتيها
أحلام: يووووه وبعدين معاك انت حد مسلطك علي اف..ودت تكلم ليان..خالتك حصه بتجينا صلحي القهوه والبسبوسه
ليان: إن شاءالله يمه
أحلام: في شوكلاته اعتقد ولا قضيتي عليهم
فتحت فمي وأنا اناظر ابوي احتاج مساعدته الحين
محمد: الحين بروح اشتريلكم حلاوة جواهر تبين شي بعد
أحلام: ايه لو انا الي اقيله جيب ما تقوم لكن بنتك من نظره منها تكلمت وهزيت وسطك
هز محمد وسطه وهو يضحك: كذا يعني ما اذكر اني هزيت وسطي
أحلام وهي توقف: يووووووووه انت شفيك تخفف دمك
تركت لهم المكان وضحكوا عليها
محمد: لاتاخذيني على خاطرك يبه بس هي زعلانه لاجل غسان
ابتسمت لأبوي هو دوم الي يأخذ بخاطري

......

صالح [ جلست وأنا محتار..عذاري واهلها لازم يكون لهم وضع ثاني..مافي غير الوالد..وهو جالس قبالي وشكله بعد سرحان..غريبه الوالد من جات جدتي هي وعمتي وأحس انه مضايق.. ]
ـ صالح صالح
صالح: خير يبه
ـ شفيك اكلمك انا
صالح: سلامتك يبه بس كنت اسال العماره فيها شقه فاضيه
أبو صالح: ايه ليش لا يكون اخيرا عزمت تعرس
صالح: هههههه لا ابد بس في واحد يبيها وبيحط فيها حريم ماعندهن رجال
أبو صالح: لا يبه اخاف يكون ارهابي مثل شقة الخالديه الي بمكه
صالح: لا اعرفهن انا
ابوصالح: شلون
[ ترددت بس دام اني بسكنهن في عمارة ابوي لازم اخبره بالسالفه كلها..]
صالح: كنت رايح للجامعه وشفت سياره مسرعه ووراها دوريه وفجئه الباب انفتح وطاحت منه بنيه..وقفت ونزلت وشفت البنت حزنت عليها قلت شكلها تكسرت ولا ماتت..تقربت منها ووقفت وساعدتها خفت لا تجي الهيئه وتقبض عليها ما ادري بس احساسي كان يقول انه البنت محتاجه حد يساعدها..ركبت وياي بالسياره..وطلعت هذه اول مره تطلع مع شاب.. ولعب فيني الشيطان بعد ما اعترفت انها طالعه بارادتها بس صدمني شرطها..كانت تبى تبيع جسدها مقابل الف ريال وعقب خفضت المبلغ..سالتها ليش تبين الفلوس جاوبتني وليتها ما جاوبتني..يبه كانت تبى الفلوس لاجل تأكل اهلها الي مو محصلين اللقمه..يبه البنت هذه تجمع الي البنات يرمونه على الارض من فتافيت وتعطيه اهلها
أحمد: بسك يا صالح انا ناقص هم وانت تزيدني
صالح[سكت لاني بعد ما ودي اتكلم اكثر قلبي يتقطع من الداخل حنا عندنا بالسعوديه ناس هذا حالهم..يالله الفقر والغنى من عند الله..الحمدلله على نعمه علي ]
......
نهاية الجزء الثالث