كاتب الموضوع :
ام الجوجو
المنتدى :
القصص المكتمله
قلت بلوعة جبد ..
هناء : وووع ..بقرنا احلى ...
ضحك علي فقلت ..
هناء: اممممم ...اشرايك نروح اسبانيا ؟؟
قال وهو يطالع الرمل ..
سامي: رحتها ومليت منها ...
هناء: متى ؟؟
رفع راسه وقال وهو يطالع البحر ..
سامي : من سنتين ..تقريبا ..رحت مع عامر وامه عشان تزور اهلها ...
اهلها !!!!!
هناء : ليش ام عامر اسبانية ؟؟
سامي: ئي ...بس ماخذة الجنسية الأمريكية من زمان واسلمت بعدها تزوجت بو عامر ..
هزيت راسي اول مرة ادري ...
هناء:عاد شكلها مو اسبانية اصلا ...
سامي: ئي حيل مو مبين ...انا اصلا ما كنت ادري بس عامر اللي قالي ..
هناء: ما شاء الله بس لكنتها مو مكسورة بالأنجليزي ...
سامي: وانتي لما تسمعين امي تكلم ما تشوفين فيها لكنة مكسورة ؟؟
طالعته متفاجأة ..فقال ..
سامي: امي لبنانية اصلا ..بس ماخذة الجنسية من زمان ...
بققت عيوني ....لبنانية !!!
هناء: ما قلت لي من قبل ...
هز جتوفه ببساطة وقال..
سامي: مايت مناسبة ..
هناء: ماحسيت اصلا ..بس من متى ماخذة الجنسية الكويتية ؟؟
لف لي وقال بتعجب ..
سامي: ومنو قال انها ماخذة الجنسية الكويتية ؟؟؟ امي ماخذة الجنسية الأمريكية ...
ماشاء الله ...خليط ..امه لبنانية ماخذة جنسية وابوه كويتي ...صج شي عجيب !!! ...
هناء: وابوك وين شاف امك ؟؟
طالع السما وهو يمشي وانا نزلت راسي للارض ..
... شافها تصمم لمرت رفيجه في بيته ... as he said.. سامي : امممم ..
تصمم!!!
هناء: امك مصممة ؟؟
هز راسه وقال ..
سامي : امي فاتحة دار عرض للأزياء ...هني وبامريكا ..بس فرعها الرئيسي بأمريكا ...
هناء: واااو ...يعني مو من بعيد ماخذ موهبة الرسم ..
ابتسمت له بس هو ابتسم باستهزاء...
سامي: اهل ابوي عارضوا ان ابوي يتزوجها اول لانها مو من ثوبهم ثانيا ارملة ...بس ابوي اصر وتزوجها من ورا اهله ...ولما دروا قلبوا الدنيا فوق راسه ..وقاطعوه ...
استغربت من كل اللي قاعدة اسمعه ...بس استغرابي الأكبر انه استرسل بالكلام بدون ما اطلب منه اول اسأله وهذا شي حلو ..
وقفنا ...وهو تجتف وسحب نفس وكمل ..
سامي: مرت سنة بعدها تطلقوا لما يابوني ...سافر ابوي امريكا بعد ما خذاني يكمل دراسته للطب ..وامي ظلت سنة تحاول تردني بس ماكو فايدة ...وصلت بينهم للمحاكم ...وابوي رد مرة هني الديرة يطلب السماح من يدي ...بس ..
نزل راسه وكمل ..
سامي : يدي مارضى ..ومات وهو مو راضي عن ابوي ..
لاااا ...مات وهو مو راضي عن ولده ؟؟
بعد خصله عن عينه وقال ..
سامي : وكبرت بينهم هوشات ومناوشات...بس يدتي الوحيدة اللي كانت خايفة علي ...صج اني ما ذكرها بس على الأقل صوري وانا صغير كانت كلها معاها...
نزل نظره بحزن للأرض وقال ..
سامي: ماتت بعد ما كتبت كل شي باسمي .. ورث ابوي حتى خشته عنه وكتبته لي ..ويت الطامة اللي كسرت ظهر ابوي ..
وابتسم باستهزاء ويحط ايدينه بجيوب الجاكيت الأبيض ..
سامي: القشة اللي قسمت ظهر البعير مثل مايقولون ...ورفعت امي قضية على ابوي وكسبتها وخذتني عندها ...وتربيت بين حثالة ...عالية وعصام ..بس الحمدلله الله عصمني منهم ..وتعرفت على عامر اللي صداقته كسرت كل الحواجز اللي كانت محاوطتني ...امه اللي يخليها طلعت من الحزن اللي انا فيه وسجن اللي كانت امي معيشتني فيه ..سجن الظلم منها ومن ريلها ..بس ما تهنيت ابوي رد خذاني وعشت عنده سنتين ...وهني يت امي بكل غضب الدنيا وبطلت ابواب جهنم على ابوي ... وقلبت حياته حجيم ..حياة ابوي كانت كلها بين المحاكم والحضانات اللي كان يقطني فيها ...ليما تزوج مرته ..جنان ..
هناء: مرت ابوك اسمها جنان ؟؟
هز راسه بايجاب وقال وهو يوقف جدام البحر ويطالعه ..
سامي: وانقلبت حياتي انا حجيم ...مافي يوم مر إلا واكون حبيس غرفتي ...لين ما يت امي وانفذتني ..
وسكت ..
حسيته سرح ...انتبه على روحه جنه فمد ايده ومسح على عيونها وقال وهو يلف لي منزل راسه يخش المه ..
سامي : قطتني امي دار الأيتام بعد ما زهقت من شوفة ابوي عندها بالبيت ...وبعد ما قدرت تحصل فلس من فلوس يدتي اللي صارت فلوسي ...
مسكت ايده وقلت بحنان ..
هناء: إذا شي هذا بيضايقك لا تكمل ..
تنهد وقال وهو يهز راسه بالنفي ..
سامي: لا خليني اطلع كل اللي في قلبي ...مااقدر اخش اكثر من جذي ...شوفة امي ردت لي كل اللي صارلي ...
وتغيرت نبرة صوتها وصارت مبحوحة شوي ..وقال وهو يطالع البحر ..
سامي : امي ابوي خلوني لعبة بينهم ونسوا اني انسان احس ...عودوني اني اخش مشاعري وما اتكلم ...تخيلي ...
وطالعني وعيونها تحمل الهم الدنيا كله ..
سامي :من كثر مشاكلهم ما اعرف عماتي ولا عمامي ...
ومد نظره لبعيد وكمل ..
سامي: حتى خالاتي اعرفهم بس عمري ما حسيت انهم خالات ابد ...من اول ما اعرفوا اني عندي فلوس قاموا يتمصلحون معاي ومع امي ...
وسكت واعتقد انه سرح ...قال ..
سامي: طلعت من دار الأيتام ورجعت لام عامر وانا ابي انسى كل هذا .. والحمدلله قدرت ...دخلت الجامعة مع عامر ..دخلنا نفس التخصص ..ليما تعرفت على ريم ..
انصدمت ....هزني اسمها وزلزلني ...
طالعني سامي يدقق في ملامحي وقال ..
سامي: بقولج عنها عشان لا تاخذين فكرة شينة عني ...
وقعد وانا وراه ...
سامي: تعرفت عليها في ثاني سنة لي بالجامعة ..كانت عايشة بامريكا بحكم ان ابوها سفير ...
ولف لي وقال ..
سامي : ترى ريم اخت مرت ابوي ...
هناء: صج ؟؟
سامي: امممم.. بس هي فرق عنها ...بكل شي ...بالإخلاق والشكل ...
بديت السالفة تاخذ مجرى ثاني اشوف ...بس مسكت روحي وسمعته يكمل ..
سامي: ولأنها عايشة في امريكا كل شي عندها فري ...
هناء: اشلون ؟؟
سامي : صج انها تطلع من شباب عادي عندها بس كأنهم اصدقائها وبأدب تحاجيهم وهم بعد ...بس انا كنت رافض هالشي وما كنت احب هالشغلات ..يعني طلعة بنت مع شاب بروحهم ما كانت داخلة مخي ..
الحرام حرام... وام عامر كانت تشجعيني على هالشي ..
وابتسم على ذكراها وقال ..
سامي : الله يطول بعمرها ان شاء الله ..
يدعي لها اكثر من امه ...غريب هذا والله ..
سامي: ما كانت مغرورة ولا متسلطة لأن ابوها سفير ابدا ..كنت اشوفها بعض المرات في البيت عند ابوي ..
تزور اختها ... حتى مرة اذكر دعمتها بدون ما اقصد وطاحت من السلم وانكسرت ايدها ...
شهقت انا اما هو ضحك ..وقلت..
هناء:مجرم ..حرام عليك ..
ضحك اكثر وقال ..
سامي : والله محد قالها تدعمني ...
ابتست وقلت ..
هناء: ئي كمل ..
سامي: من هني بدت علاقتنا من منظورها هي ...
وطالعني يأكد لي ...
سامي : دزيت لها بوكيه ورد مرة ..وهي فهمتني غلط عبالها اني احبها ولا مايل لها .. ولما طلعت من المستشفى كانت تيي البيت وايد عشان تشوفني وانا ادري ..بس كنت اقعد شوي في البيت واطلع مرة ثانية وارد بيت ام عامر ...ومرت مواقف وايد تحاول تبين لي انها تحبني ..وانا كنت اتغاضى عنها وانخش لما اشوفها ..وعامر الخبل ما خلى كلمة ماقالها عني ..
وقلد عامر وقال ..
سامي: حرام عليك البنت تحبك ..ليش ما تعطيها ويه
ورد لطبيعته ..
سامي: ومن هالحجي .. بس انا كنت ارد عليه واقوله الريال عموما والشرقي خاصة يحب وما ينحب ..والمرأة تنحب وما تحب ...وكان هذا منطقي في الحياة ..لأن المرأة مثل الزجاج لو حبت وفشلت في حبها تنكسر وما رح تتصلح إلا بعد فترة ...والله حرم العلاقات قبل الزواج عشان لا تنعصر المرأة لأن قلبها ما يتحمل وهي تميل لعاطفتها اكثر من عقلها ...
طالعته بانبهار من كلامه ..وكمل وهويطالعني ..
سامي: ولا ما كان قال الرسول عليه الصلاة والسلام ناقصات عقل ودين ...صح ؟؟
هناء: عليه الصلاة والسلام ...بس الحب العذري وين راح ؟؟
سامي : انا معاج ..الحب العذري اللي قبل الزواج هذا انا اشجعه ..يعني لو الريال شاف مرأة وعجبته يصبر شوي ويعرف عنها معلومات الأول ..بس ما يروح ياخذ رقمها ولا يحاجيها ولا يتعمد يقط روحه عندها ويحسسها انه يبيها ..
هناء: يعني انت تقول ان الريال إذا شاف وحدة وعجبته يخطبها على طول ؟؟ انزين وين الحب هني ؟؟
سامي :الحب بعد الزواج ...حب اللي قبل جذي خرابيط ينكتب على الهوا ويتلاشى بسرعة ...
نط في بالي شؤال وسالته على طول ..
هناء: انزين انا طحت من عينك لما عرفت اني احب عصام ؟؟
وخفت من الإجابة ..
سامي: طبعا لأ ... المرأة من حقها تحب ...والريال بعد ..بس انا لما عرفت انصدمت شوي بس نسيت ..
لا صح واضح وطالعته بنص عين ...فقال .
سامي: اشفيج تطالعيني جذي ؟؟
قلت ..
هناء: انت ادرى ..
هني فهم وضحك ... وقال ..
سامي: مو بايدي ...
ابتسمت عليه وقلت ..
هناء: مو جنك طلعت برة الموضوع ؟؟ كمل يلا ..
سامي: وين وصلنا ؟؟ ئي ...واذكر مرة اني ماداومت ثلاثة ايام عشان امي وابوي تهاوشوا جدامي وفي الشارع والرايح والراد يطالعهم .. وكل واحد يطلع اللي قلبه ناحية الثاني ..
هناء: الله الله ..ليش كل هذا ؟؟
سامي : كان موعد زيارتي لابوي الأسبوعية ولما وصلت شفت امي وابوي قاعدين يتهاوشون وليومج هذا ما عرف السبب ومابي اعرفه .. انسدت نفسي عن العالم وعن الدراسة وصكيتها غياب ..لما داومت رابع بوم كانت نفسيتي احسن شوي ...استقبلتني بورد احمر ترد لي الحركة ..بس انا اختلف عنها لون الورد انا كان ابيض ...قبلته على اساس انه هدية والرسول عليه الصلاة والسلام ما يرد الهدية ...
ما انكر واقولج اني ما كنت افكر فيها ..بس يعني بشكل عادي ...وفي يوم زرت دلال في بيتها ودلال كنت اقولها كل شي ...حتى اكثر من عامر .. وكنت اقولها عن ريم ..بس ما حطيت في بالي انها بتخطبها لي ..فاجأتني مرة وقالت لي بخطبها لك ..بس انا ترددت لأني وقتها ماادري شنو مشاعري ناحيتها ..حسيت ان عادي تغيب عن عيني ...عادي حضورها بعد ...مااحس بمشاعر مختصة بالحب ابدا ...فعلمت دلال اني ماابيها ...
بس ...
وسكت ..قلت انا بلهفة المستمع ..
هناء: شنو ؟؟
سامي :اكتشفت بالصدفة ان عصام ولد خالتي الخبل يحبها ... ويحبها بجنون ... وهني عرفت سر ملاحقته لريم كل شوي ..لأنه كان يحبها ...صج ان انا وعصام متربيين مع بعض وكنا ربع بس مو ايد بس على الأقل بينا احترام ..بس لما اكتشف اني بخطب ريم وهذا مو صج ثار ..وقلب الكلية فوق راسي ..
وتهاوشنا ...علمته اني ما ابيها ولا افكر اخطبها اصلا بس ما صدقني ...يتني ريم بعدين وقالت لي عن عصام ومضايقته لها ...وطلبت مني اتدخل وبغبائي تدخلت وصارت مشكلة بين اهلي من ناحية امي ومن ناحية ابوي ..والكل عباله دفاعي عن ريم عشان اني احبها والعكس صحيح ...
تزاعلنا هني انا وعصام وما صرنا حتى نكلم بعض ..وتغير وصار شري يتعمد يفتعل الهوشات بينا ...
وياكثر ما تهاوشنا ...وصلت بينا للمخافر والشرطة ... اذكر مرة تهاوشنا هوشة جايدة كان سببها ريم طبعا ...مسك راسي وطقني بالطوفة حيل بلحظة ضعف مني ولأن الطوفة كانت مكسورة.. وتعورت لين الحين علامتها علي ..
رفع شعره عن يبهته عشان يورني الجرح ...
اح ..واااو ..
سامي : دخلت المستشفى وسويت عملية تقدرين تقولين تجميل ...وطلعت الحمدلله .. وبعدها ما قمت حتى ارد عليه ..انتبهت لدراستي وقلت كافيني مشاكل ...طبعا السالفة وصلت لأبوي وقام يمنع امي تيي تشوفني ...
هناء: اشلون انت كنت جبير حزتها ؟؟ كم كان عمرك بالعشرينات ؟؟
سامي: 22 تقريبا ..قصدي لما اطول عليها بالزيارة كانت تيي تسال عني عند ابوي وابوي كان يزفها ويطلب منها انها تبتعد عني ..
هناء: تبتعد عن ولدها ؟؟
قال باستهزاء..
سامي : شفتي .. هاذي حالي ..
كمل وقال ..
سامي: ابتعدت عن ريم ..كافي خيري شري .. وطلعت عالية هني ..يت من الكويت تدرس بامريكا ..
ولما عرفتني لزقت الأخت ..مثل ما يقولون حب من اول نظرة ..بس انا عمري ما كرهت احد قد ما كرهتها ..
هناء: ليش؟؟
سامي: بس اشوفها تلوع جبدي .. ماادري بس جذي ..ماارتحت لها .. وانا قلت لج قبل ما احب حركات الحب والبطيخ والعلاقات بين الشاب والبنت المحرمة .. كل ما ايي بيت امي ازورها القاها قاطة ويهها هناك ... حتى بعض المرات تعزمني في بيتهم بس انا مااروح ...خالتي حست وشافتني فرصة ما اتعوض
...بنك متنقل تضيعه من ايدها ؟؟ طبعا لأ .. لزقت بنتها فيني وتشجعها على اللي تسويه .. وكنت اتعرض ضغوط من كل الجوانب ..من عالية ..من عصام ..ومن ريم ..كان لازم انفجر ..وانفجرت بويه المسكينة ريم ...اذكر اليوم بالضبط ... كان يوم ربيع وحلو .. رحت الجامعة وشفت عصام وطبعا بس يشوفني يقعد يقط كلام ... دخلت محاضرتي ومارديت عليه ..ورحت اتمشى بالحديقة انطر عامر ..ونطت فوق راسي عالية الغثيثة ...وهذرتها اللي ما تخلص ... قمت عنها بعد ما استأذنت ..وشفت عصام مرة ثانية ...سالني عن ريم قلته مااعرف عصب وقام يقط كلام جارح ..ويهددني إذا سويت فيها شي بندم ومن هالكلام الفاضي قلت له اذلف عن ويهي انت وريم مالتك ...
ركبت سيارتي بروح البيت لأن عامر تأخر بالمحاضرة ...بس تفاجأت انها تنطرني هناك وساندة على سيارتي ..
قطيت السلام ودخلت سويج في مكانه عشان افتح السيارة ...قالت لي ليش تعاملني جذي انا ما سويت لك شي قلت لها ابعدي عني انا ماني ناقص ..انتي مالج شغل بس انا وانتي ما ننفع حق بعض ...وبجت وصارحتني انها تحبني ...طبعا انصدمت ..بس ما رديت عليها ...
اليوم الثاني وانا بطريقي للجامعة شفتها واقفة عند سيارتها وكأنها تحتاج مساعدة ... علمتني ان سيارتها خربت وعندها محاضرة بعد شوي ...ركبتها سيارتي وركبت جدام ..بس انا طلبت منها تركب ورا ...ركبت ورا وحركنا للجامعة وبالطريق صار لنا حادث قوي .. دعمت شيرة لاني ما كنت منتبه ويت الضربة ناحية ريم ... ما ادري شنو صار بالضبط لاني كنت بغيبوبة ...صحيت منها بعد ست شهور ..
قلت متفاجأة ..
هناء: ست شهور؟؟
سامي: ست شهور كاملة ماادري عن نفسي ...صحيت من الغيبوبة اخيرا والحمدلله كُتبت لي النجاة ..
تذكرت ان ريم كانت معاي سالت عنها وقالت لي دلال انها ماتت ...وكانت واقعة قوية علي ... طلعت من المستشفى بعد شهرين ..ورديت لدراستي ...بس طبعا كنت احس بتأنيب الضمير ...ماادري ليه ...والكل عباله اني زعلان عشان ريم ماتت وانا احبها ...بس محد يدري اني اتقطع من داخل لأني ما ريحتها واني جرحتها قبل ما تموت ...
تنهد ورفع راسه للسما وقال ..
سامي : طبعا اهل امي اتهموني اني انا السبب في موتها واولهم عصام ...ما احترم قرابة الدم اللي بينا وبدا يضايقني بطالعة والنازلة ...تهمهم كلها كانت ظالمة ...وعبالهم اني اخذت ريم من عصام بس عشان احره وانا مو في بالي شي مثل هذا ... هني انقطعت علاقتي باهلي نهائيا ...ما صرت اشوفهم ..ابتعدت عنهم ...وانتقلت لولاية ثانية لما تزوج عامر ورحت نيو جيرسي ... بس هاذي قصتي من طأطأ لسلام عليكم ...ارتحتي ؟؟
وطالعني وهو يبتسم ...هزيت راسي بالنفي وقلت ..
هناء : لأ لسة عندي اسئلة ...دلال وينها يوم كنت عايش عند امك زوج امك ما كان يضايقها ؟؟
سامي: دلال كانت عايشة عند اهل ابوها ...امي قطتها عندهم ..
حتى دلال ما سلمت منها ؟؟ لا إله إلا الله ...
هناء: انزين عالية ليش تكرهك ؟؟
سامي: عالية هاذي سالفة ثانية ....لما عرفت بالإشاعة االلي طلعت بين اهلي عني وعن ريم ..عصبت وحلفت ما تخليني ...قامت تضايقني هي بعد ..وانا وقفتها عند حدها ..
هناء: اشلون ؟؟
مد ريوله على الرمل وقال..
سامي: بينت لها اني اكرهها ...بس انا ما كنت ادري اني اتعامل مع لوح ..ما يحس .. ليما ياه اللحظة اللي انفجرت فيها وبويهها لأني ضقت ذرعا بتصرفاتها مثل ما يقولون ..وقلت لها وبصراخ ...انا اكرهج ...وهاذي حقيقة ما اقدر انكرها ....ومن بعدها تزوجت ...وبس ..
وطالعني كأنه يقولي هذا اللي عندي ...
ظليت ساكتة افكر بكل اللي سمعته ...حياته صج تعب ...هو ضحية مشاكل امه وابوه واهله ...تذكرت هني ونط في بالي سؤال بعد .
هناء: ئي صج ...يعني انت الحين عندك عمام ؟؟
ثنى ريوله اليمين وسند ايده عليها وقال ..
سامي: ابوي عنده ثلاث اخوان واخت ...
هناء: وينهم ؟؟
رفع راسه فوق وقال ..
سامي : مطشرين ..عندي عم بلندن ...وعم باستراليا ...وعم من سبع شهور متوفي ...وعمتي اللي هي عندج الحين ..ام عبدالله ...وهي الوحيدة اللي اعرفها من اهل ابوي ..
هناء: اسال سؤال بس ما تضحك ؟؟
طالعني بهدوء وقال ..
سامي: شنو ؟؟
هناء:من القصة الي قلت لها لي استنتجت انك ما ييت الكويت إلا بعد ما دخلت العشرين ...اشلون تعرف عربي عيل ؟؟
ابتسم وقال ..
سامي: الحسنة الوحيدة اللي سوتها امي انها كانت تحاجيني عربي وحتى ابوي ..
هزيت راسي متفهمة وقلت امازحه ..
هناء: وانا اقول من وين عارف اللهجة اللبنانية ؟؟؟
وهزيت راسي ابتسم ..اما هو ضحك وقال ..
سامي: ولو حبيبة البي ...انا سامي مو حيالله ...
وقالها بلبناني ...
سند ايده على الرمل وقال ..
سامي : امي ما كانت تحاجيني لبناني بس خالاتي كانوا يكلموني حتى يدي ...
يدك؟؟؟
هناء: ابو امك ؟؟
هز راسه بايجاب وقال ..
سامي: كان عايش معانا بس مات وانا عمري ست سنين ...بعدين امي مولودة هي الوحيدة بين خواتها مولودة بالكويت ...ودرست فيها ...وحزتها كانوا خواتها اللي اكبر منها عايشين بامريكا يدرسون ..خلصت ثانوية وسافرت عندهم ..وهناك استغلت موهبتها مثل ما يقولون ..وفتحت محل صغير وكبرت ..وابوي شافها وتزوجها ...
هناء: سؤال ثاني ..بس هالمرة رح تعصب ادري فيك ..
هز راسه وقال بهدوء ..
سامي: اخذي راحتج ...اليوم معطيج ويه زيادة ...
ضحكت وكفخته على جتفه ..وقلت ..
هناء: انت اللي ما تنعطى ويه ..
وقلت ..
هناء: شنو سبب طلاق امك وابوك ؟؟
طالعني شوي اخترعت انا وبغيت اسحب السؤال ...تعدل بقعدته وقال ...
سامي : تصدقين ماادري ...بس اللي اعرفه ان ابوي شايف على امي شي ماادري شنو هو ..وما تعب عمره ودور وسأل ريح عمره وطلقها ...
هناء: ما عرفت شنو هالشي ؟؟
هز جتوفه بلا مبالاة ..
سامي: لأ ولا يهمني اعرف ...
هناء: ولا سألت ابوك ولا احد عن السبب ؟؟
سامي: ما انكر واقول اني ودي اعرف بس كل هذا تساؤلات تطرا على مخي بس ..عمري ما طلعتها وترجمتها علنيا وسألت ...
هناء : ليش؟؟
سامي: إذا هم ما اهتموا برايي ومشاعري ليش اسأل ؟؟
وطالعني وقال ..
سامي : فخار يسكر بعضوا ..
وقالها باللبناني ...وطالع ساعتها وقال ..
سامي: واااو ...12 ونص الحين ترى ...موجنا تأخرنا ؟؟؟
ركبنا السيارة وانا افكر لسة بالقصة اللي سمعتها ...واستانست وايد يوم قالي كل شي عنه ...حسيت ان نفسيته صارت احسن ...بس ليش كل هالغموض في حياته ؟؟ ليش ما تكلم مع احد وفرغ اللي بداخله ؟؟
ابتسمت عليه وعلى طريقة كلامه ..بالأخير هو انسان وبتييه لحظة وبيضعف ويفصح عن كل شي ...
سمعته يغني مع اغنية اجنبية طلعت بالراديو ...
مالت باك ستريز بويز ....
I don’t care who you are …
where you ..what you did…as long as you love me
مديت ايدي ووطيت على صوت المسجل وهو مو حاس ويغني ...
every little thing you that have said and and done …
feel’s like it’s deep to me …doesn’t matter of you on the run
مو حاس بعمره مسكين ...قعدت اطالعه وهو يغني ..ولما خلصت الأغنية ...صفقت ...هو هني طالعني بعدين استغرب ...فقلت ..
هناء: وتقولي صوتك مو حلو ؟؟
ما فهم بس بعدين استوعب ان الراديو مقصرة عليه ..تفاجأ وشهق وهو يبتسم ..وقال ..
سامي: صج خبيثة انتي ...جكيتيني ...
ضحكت عليه وعلى شكله اللي قلب احمر مستحي...
وصلنا البيت وسيدة انخمدنا …
يوم الثاني رحت الجامعة وانا نعسانة ومافيني امشي … رديت البيت وتغدينا وام سامي ماادري عنها من امس ..وسامي طبعا ما سأل عنها اصلا …
نمت العصر وقعدت على صلاة المغرب …صليت وسامي لسة نايم قعدته وطلعت الصالة وتفاجأت من ريال داخل الصالة …وشافني ..
منو هذا ؟؟
بسرعة دخلت داخل بس دعمت سامي اللي مسكني بسرعة عن لا اطيح ..
سامي: شوي شوي …اشفيج طايرة ؟؟
قلت له وانا ااشر على الصالة ..
هناء: ريال برة …
طالعني مستغرب وقال ..
سامي: ريال ؟؟؟!!!!
هدني وراح الصالة …وسمعت صوته بعدين سمعت صوت امه …
امي : انا اللي يايبته هني …
سامي: واشحقة بالله ؟؟؟
دخلت داخل ولبست شيلتي ووقفت ورا سامي عند الستارة ..
سامي: اوكي مو مشكلة مو جذي يسرح ويمرح في البيت جنه مافي ريال هني …
لفت امه للريال الهندي وقالت ..
امي : روح انت الحين وتعال باجر ..
طلع الريال ولفت امه لسامي وقالت ..
خالتي : انا يبته عشان ياخذ قياسات الشقة عشان بعدل فيها شوي …
قال سامي بعصبية ..
سامي: ومنو قال ان الشقة تحتاج تعديل ؟؟؟
قالت امه وهي تقعد ريل على ريل ..
خالتي: انا قلت …
اشرت حوالينها وقالت ..
خالتي : عاجبك لون الشقة ؟؟ انا الصراحة مااقدر اعيش جذي ..
طالعن انا الشقة والصالة …مافيها شي …شقة يديدة ومصبوغة باللون الأبيض والأثاث ذهبي بأحمر والإضاءة صفرا ..تعطي الطوف لون ذهبي …كشخة الشقة مافيها شي …
سامي: بس انا عاجبني اللون ..ومابي اغيره ..
قلت انا ..
هناء: ما عليه خالتي بس الشقة يديدة ما صارلها شهرين من دخلناها…
طالعتني بطرف عينها وقالت ..
خالتي : طبعا وحدة مثلج عمرها ما شفت شي يديد اكيد بتشوفينها حلوة …
لا إله إلا الله …
قال سامي باستنكار ..
سامي : يمااا ..ما اسمح لج ترى ..
قلت انا بهدوء ..
هناء: لا عادي سامي …خالتي مثل امي ..
ودخلت داخل …
سمعت اصواتهم وهم يتكلمون ..بعدها تبطل الباب ودخل سامي ..تعدلت بقعدتي وقلت ..
هناء: تبي جاي حبيبي ؟؟
قعد على السرير وقال ..
سامي: لا تزعلين هناء من امي ترى ..
قاطعته وقلت وانا ابتسم ..
هناء : لا حبيبي ما زعلت …ووقفت وقلت ..
هناء: بروح اييب لك جاي ..
اليوم الثاني …وقفت جدام المنظرة اتجهز بروح عند امي من زمان ما زرتها من بعد اللي صار …وسامي هو اللي رح يوديني …طلعت من الغرفة وشفت خالتي قاعدة ..سلمت بس هي قالت ..
خالتي: وين رايحة ؟؟
هناء: بروح عند اهلي ..
خالتي : وسامي روح يوديج ؟؟
هزيت راسي بايجاب وقالت ..
خالتي :نطري ..
ودخلت داخل ونقعتني ساعة ماادري ليه…دق علي سامي لأنه ينطرني تحت فقلت له ..
هناء: بس امك ماادري قالت لي نطريني ..
سامي: انزين اشحقة ؟؟
هناء: ماادري والله ..
تأففف وصك عني ..
" يلا ..خلصت "
التفت وتفاجأت فيها …. بققت عيوني على وسع …ماخلت لون ما حطته ..ولبسه شوي ضيق لبس مو في عمرها ..بس الصراحة حلوة …
بعدت القذلة اللي على ويهها وقالت ..
خالتي : مشينا ..
ومشت جدامي بكبرياء وطلعت معاها وعطرها خانقني ..
بس مستغربة من شي هي بتيي وياي يعني ولا شنو ؟؟
ركبت جدام يم سامي اللي تفاجأ من شكلها ..بس ماباليد حيلة …سالها وقال ..
سامي : بتروحين معانا بيت نسايبي ؟؟
قالت بغرور ..
خالتي: لا طبعا ..انا بروح السوق .
سامي: بس حانا مو رايحيين السوق ..
خالتي : ادري ..قطني وروح ومرني لما تخلص ..
طالعها سامي بعدين ابتسم باستهزاء ..
سامي: يما من صجج ؟؟ طريق السوق مو طريقنا ..حنا وين والسوق وين ..
خالتي: يعني شنو مارح توديني ؟؟
قال بدبلوماسية ..
سامي: للاسف لأ ..
عبالي بتطلع زعلانة ..بس خزت سامي جنها بتذبحه ..بس قالت شي مو متوقع ..
خالتي : اوكي ودني عند اهلها ..نتسلى ..
وقالت الكلمة الأخيرة تبي تحرني ..
ليش شايفة الي مهرجين ؟؟
ولا رايحة ملاهي وانا ماادري ..
لفيت ويهي ناحية الدريشة وانا انافخ بقهر بس سكت …
حركنا لبيتنا ونزلت …ومعاي خالتي ..
" الحين هذا بيتكم ؟"
لفيت لها لقيتها تطالع البيت باحتقار ..فقلت وانا اتنهد واطالع سامي ..
هناء: ئي …حياج خالة ..
ودخلت قبلها ..سامي راح الديوانية وي يؤشر لي اهدى …
بطلت باب البيت ودخلت ..لقيت امي واسما وعالية ..
شنو هاذي ما عندها كرامة ؟؟
قلت وانا ااشر عليها بقرف ..
هناء: انتي موجودة ؟؟ اشتبين ياية ؟؟
طالعت عالية امي اللي قالت بدفاع عنها ..
امي : هناء…البنت في بيتي ..احترميها ..
انطميت وسكت …وطالعتها بحقد …
" بطول برة ؟"
انتبهت عليها …وفسحت لها المجال وقلت ..
هناء: حياج خالة …
ودخلتها …
هناء: يما هاذي ام سامي …
وقفت امي تسلم عليها ولو انها مستغربة …بس عالية سوت روحها فرحانة وقامت تسلم على خالتها جنها مو شايفتها من عشرين سنة …
على قولة اخوانا المصريين …اتلم المتعوس على خايب الرجا…اثنينهم العن من بعض ..
ودخلنا بسوالف بس طبعا كانت بالنسبة لي سوالف تقهر …طبعا عالية تجنبت الحجي معاي من بعد اللي خذته مني ..وام سامي ما تنازلت عن غرورها ونغراتها اللي ما تخلص …
لما خلصنا ..وصلتنا امي للسيارة …وقالت ..
امي: والله قعدتج ما تنمل يا ام سامي ..
قالت برسمية وبتعالي ..
خالتي: ان شاء الله نشوف بعض في مناسبة احسن …
بدينا …نزلت راسي انا بس لمحت سامي ماسك ايدي يهديني …
امي قالت ..
امي : ان شاء الله بعرس بنت اختج ..
لأ لأ …مو وقته هالكلام …وغطيت ايدي على راسي انطر المصيبة اللي بتيي ..
خالتي: عرس بنت اختي ؟؟ اي بنت اخت ؟؟
امي: صج ان الوقت مو مناسب والمكان بعد بس ..
قاطعتها انا وقلت ..
هناء: ئي ئي صح الوقت مو مناسب …خلوها وقت ثاني ..
يت عالية هني ورزت ويهها وقفت معانا …
كملت …
طالعتها خالتي وقالت باستغراب ..
خالتي: انتي بتتزوجين ؟؟
ابتسمت عالية يعني كلش مستحية …فتنهد سامي بلوعة جبد …وقال يساسرني ..
سامي : يعني مستحية ..
قصده على عالية … طالعتها وقالت ..
عالية : ئي خالة ما تدرين ان طلال وانا بنتزوج قريب ..
مالت عليج وعلى طلال اللي ميتةعليه …من زينج ولامن زين شيفتج حلايا الويه …لو مو امي موجودة ولاني احترمها كنت كملت عليها الحين …
تفاجأت خالتي وقالت …
خالتي : طلال ؟؟
ابتسمت امي وقالت ..
امي : ئي طلال ولدي ..ان شاء الله عاد نكون نسايب اكثر ..
سكتت خالتي …فاستغل سامي الموقف وقال ..
سامي: خلاص عيل نشوفكم على خير …مع السلامة عمة ..
امي قالت باقتضاب ..
امي : مع السلامة ..
للين الحين زعلانة منه …ركبنا السيارة ومشينا …والحمدلله عدا كل شي على خير …
" لا مو مواقفة ..انت من صجك راضي ان بنت خالتك تزوج هذا "
كان صوت خالتي واصلني الغرفة من بعد ما ردينا ..
سامي: يما هذا عنده اسم ترى … وبعدين انا مالي شغل ..كيفهم ينيازون ..
خالتي : مستحيل عالية تاخذ هذا …نو واي ..انا لازم اوقف هالشي لو اضطريت استخدم القوة …
سامي : وشنو بتسوين بالله ؟؟
خالتي : انا ما رح اسكت واشوف عايلتنا تنزل للحضيض مرة ثانية ..كافي انك نزلت روسنا وتزوجت هالحثالة هاذي ..
انا حثالة ؟؟؟!!!!!
عصب سامي وقال ..
سامي: يما …هناء مرتي ..وما اسمح لأحد يهينها ..
خالتي : انت لو طعتني واخذت عالية ..مو احسن لك من العلة اللي ماخذها ..
عصب سامي اكثر وقال ..
سامي: يمااااا..
انجرحت صج من كلماتها بس استانست ان سامي يدافع عني …
سمعت صوت الباب وعرفت انه ياي فانخدمت على السرير بسرعة وغطيت روحي اسوي روحي نايمة ..
نام يمي ..
الله يخليه لي …
وان شاء الله مارح يصير إلا اللي ابيه ..وعالية تبتعد عنا ..ونفتك من هالسالفة المملة …
|
25-04-11, 03:29 PM
جديد مواضيع قسم القصص المكتمله
العرض العادي
