بسم الله الرحمن الرحيم

هذا البارت السابع نزلته مثل ماوعدتكم و اتمنالكم قراءة ممتعة

( الجــــزء الــســـــابـــع )

في السوق كانت سارة و أميرة و غدير يتمشون بين المحلات يدورون لأميرة لبس يناسب للشوفة , قرروا يرتاحون شوي بكوفي شوب

أميرة: اففففف مالقيت شي ياربي خلاص ما ابي اشوفه

سارة : اقول امشي بس تونا مالنا ساعة بالسوق تبي تلقى شي على طول

غدير : اصلا هي تتحجج خايفة من الشوفة

أميرة: اييه والله اني شايلة هم و خايفة و متروعة و كل شي

غدير: لا تخافين و لا شي كل شي ان شاء الله بيمشي اوكي

أميرة : ان شاء الله يارب - وقفت- المهم وش تبون بروح اطلب

سارة: انا ابي كابتشينو صغير

غدير: و انا عصير برتقال

أميرة: اوكي

لما راحت أميرة

سارة: امم غدير بسألك

غدير: هلا

سارة: وش اخبار عبدالرحمن؟؟

غدير: هههههههههه والله من يوم شفت وجهك اعتفس عرفت انك بتسألين عنه

سارة: يووه غدير لا تدققين عاد , بس جد صار له من يوم جيناكم للبيت اخر مرة ما سأل عني بالعادة كل يوم يرسل لي رسالة من جوالك وش معنى هالايام ما صار يسأل عني

غدير : تبين الصراحة يا سارة حتى انا و أمي ملاحظين عليه , حتى امي قلقانة عليه و تخيلي صار له ثلاث ايام ما يداوم

سارة: ثلاث ايام ما يداوم؟؟ لا اجل اكيد فيه شي قولي لي وش السالفة ؟ مريض هو او فيه شي لا تخبين علي؟؟

غدير: لا مو مريض بس والله مدري وش قصته حتى ما يجلس معنا ع الغدا و لا العشاء تدرين اليوم امي بالغصب خلته ينزل يتغدا معنا

سارة: خوفتيني يا غدير وش فيه عبدالرحمن

غدير: يمكن شايل هم مناقصة والا شي

سارة: شايل هم الشغل و مايداوم؟؟ لا اكيد شي برى الشغل مضايقه وش القصة انا عندي احساس انه فيه شي بس مدري وشو

غدير: والله مدري ان شاء الله مافي شي

سار: بليز غدير ابيك اليوم تقولين له ان سارة تسأل عنك و قلقانة عليك ليه ماصرت تسأل عني لك ثلاث ايام ما جيت ببالك؟ بليز خليه يقول وش فيه طمنيني

غدير: اوكي ان شاء الله و دام السالفة فيها انتي اكيد بيروق

سارة: مدري عنه اذا ما سأل عني من ثلاث ايام ما اتوقع بيروق اذا سألت عنه

غدير: لا بيروق و مافي شي ان شاء الله لا تخافين

سارة: ان شاء الله

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ

في مكان آخر

زياد: ايه ايه خلاص لا توصي حريص اكيد يوم الخميس و انا عندهم بعد المغرب ان شاء الله
اووكي اشوفك يالله مع السلامة

أم زياد: من مواعد يوم الخميس؟

زياد: ماني مواعد احد يمه نسيتي اننا بنروح نخطب

أم زياد: لا والله مانسيت وش دعوة ولدي بيخطب و أنسى بس استغربت ان صديقك يحرصك على الروحة

زياد: ايه يمه صديقي يصير ولد عمها

ام زياد: صدق؟؟

زياد: ايه يمه

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــ

في بيت العم أحمد , غدير كانت تطق باب غرفة عبدالرحمن: عبدالرحمن ممكن أدخل؟؟

عبدالرحمن: غدورة حبيبتي انا تعبان معليش بنام

غدير: عبدالرحمن بس كلمتين و بطلع

عبدالرحمن: طيب ادخلي

دخلت غدير: كيفك؟

عبدالرحمن: الحمدلله, ها قوليلي وش كنتي تبين؟ فيك شي غدورة؟

غدير: لاوالله مافيني شي بس انت قول لي وش فيك هاليومين

عبدالرحمن: وش فيني ابد ماعلي الا العافية و لله الحمد

غدير: طيب سارة تسلم عليك

عبدالرحمن تغير وجهه: الله يسلمها

غدير: و تقول انها فاقدتك و عتبانة عليك من زمان ما أرسلت لها مسج ولا شي و بعد تقول

قاطعها عبدالرحمن: غدير خلاص انا تعبان اطلعي برى من فضلك

غدير: انتظر بكمل لك

عبدالرحمن: خلاص لا تكملين شي قلتلك اطلعي برى تعبان بعدين نكمل كلامنا

غدير: عبدالرحمن قول لي وش فيك مو طبيعي أجل اتكلم لك عن سارة تقول لي اطلعي و ماتخليني أكمل, لا اكيد انت فيك شي جامد

عبدالرحمن: اووففف لاحول ولا قوة الا بالله , غدير الله يخليك اطلعي و سكري الباب

غدير متفاجأة من تصرفاته: طيب

طلعت غدير و هي مستغربة ليه جالس يتصرف كذا ؟؟
أما عبدالرحمن جلس وهو يفكر و يحس انه مخنوق و راسه مصدع من كثر التفكير بسارة

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــ

- إضحكي ماعليك من الحكي ....
انتي أجمل من وطى فوق الثرى ...
و انتي اجمل من نظر عين تشوف ...


يوم الخميس المغرب دخلت أم نواف على أميرة

ام نواف: ها امورة جاهزة؟؟

سارة: ايه يمه جاهزة شوفيها وش حلاتها طالعة ما شاء الله

أم نواف: أي بسم الله عليها, ربي يحفظك

أميرة: لا أكيد تقولون كذا عشان ترفعون معنوياتي

سارة: اقول بس شوفي شكلك والله يجنن , حولا انتي ما تشوفين؟ والا تقولين كذا عشان نمدحك اكثر

أم نواف: يالله تعالي معي تأخرنا عيب الحرمة وولدها تحت ينتظرون

أميرة دمعت عيونها: لا خلاص ما ابي انزل خايفة

أم نواف: أمورة وش هالحكي الناس تحت يالله حبيبتي لا تخافين يالله تعالي

سارة: سمي بالله و انزلي يا قمر

أميرة: ان شاء الله

نزلت أميرة و هي ميتة خوف و كانت أم زياد هي اللي بتجلس معهم بالشوفة الشرعية

أميرة: ماما خاايفه

ام نواف: يالله ادخلي حبيبتي لا تخافين

أميرة: طيب

دخلت أميرة و سلمت بصوت وااطي باليالله ينسمع بس عرفوا انها سلمت من حركة شفايفها

أم زياد و زياد: و عليكم السلام

جلست أميرة على اول كنبة عند الباب و منزلة راسها و شعرها كله على وجهها

أم زياد: وشلونك يا اميرة؟

أميرة و هي منزلة راسها: الحمدلله

سكتوا شوي و ام زياد التفتت على ولدها بتشوف ليه ما كلم البنت و لا قال لها وش اخبارك او أي سؤال مع انها تعرف ولدها انه مو من النوع اللي يستحي , لقته متكي ع الكنب و يطالع اميرة من فوق لتحت , اميرة كانت منزلة راسها و لما حست انهم سكتوا فكرت انها تقوم بس تذكرت امها قالت لها لا تطلعين على طول

شوي و يوقف زياد: يمه يالله مشينا

أميرة استغربت تصرفه و رفعت راسها له و طاحت عينها بعينه و يطالعها باحتقار و يكمل: بصراحة ما عجبتني البنت يقولون حلوة حلوة من وين لها الحلا و بصراحة حسيت انهم مو من مستوانا و انا ما يلزمني هالاشكال يمه

أم زياد من الفشلة قامت و هي عيونها طايرة من حركة ولدها و ما التفتت على اميرة من الاحراج بس قالت مع السلامة و تغطت و طلعت

أما اميرة كانت متصنمة بمكانها و منصدمة من اللي صار و عيونها تدمع و دموعها تنزل من غير ما تحس على نفسها و ما تدري ليه سوا كذا , جلست على هالحاله تقريبا عشر دقايق

امها استغربت انها تأخرت كل هالوقت داخل

نواف: طيب طقي عليهم الباب عشان تطلع

أم نواف: استحي

نواف: لا عادي يمه

أم نواف : طيب

راحت و طقت عليهم الباب بس ما طلعت اميرة و استغربوا , انتظروا شوي بعد و لسه اميرة ما طلعت

نواف: خلود روح شوف سيارته عند الباب و الا لا؟

خالد راح و رجع لهم بعد شوي : لا مو موجودة السيارة

ام نواف: أجل اكيد راحوا و يمكن أميرة مستحية تطلع و انتم موجودين بروح اشوفها, بس غريبة يطلعون بدون ما يتكلمون معنا ولا شي

راحت أم نواف و دخلت للمجلس لقت اميرة جالسة بمكانها و تصيح

أم نواف خافت: أمورة حبيبتي وش فيك؟؟

أميرة حضنت امها و صارت تبكي بصوت عالي و تشاهق

سمعوها نواف و سارة و خالد و ركضوا للمجلس

أم نواف: أمورة قولي لي وش صار خوفتيني

نواف: يمه وش فيها أميرة؟

كلهم يطالعونها و مصدومين و أميرة قامت و ركضت راحت لغرفتها و قفلت على نفسها أم نواف و سارة لحقوها

سارة: أميرة افتحي لي الباب , أميرة أميرة ردي علي

أميرة: خلاص روحي و اتركوني لحالي

و كملت صياحها

أم نواف: الله يستر وش اللي صار؟

سارة: مدري يمه وش فيها كذا فجأه طلعوا من البيت و أميرة تبكي ليه وش صار

أم نواف: شكلي بتصل على أمه اعرف وش اللي حاصل

سارة: لا يمه خلينا ننتظر أميرة تقول لنا احسن

أما اميرة فكانت غارقة بدموعها وتطالع الجوال و غدير تتصل عليها شوي و يجيها مسج من غدير( ليه ماتردين ياعروسه علميني وش صار ) , لما قرت المسج رمت الجوال و صارت تبكي اكثر , بعد ما هدت فتحت لسارة و امها الباب و حكت لهم كل اللي صار و انصدموا

سارة: حاصل له والله بالطقاق بداله الف واحد يتمنونك

أم نواف: معليش حبيبتي بالعكس احمدي ربك انك ما انبليتي فيه و بعدين خلاص تجربة و راحت

أميرة كانت تبكي بس بهدوء: ايه بس ليه يجرحني و يهينني بهالطريقة , انسان ما اعرفه و لا يعرفني ليه يسوي كذا ليه الاذية اذا هو لعاب ليه يخطب بنات خلق الله

نواف: اسمعيني يا أميرة الغلط مو فيك و العيب فيه مو فيك و عادي الهدف من الشوفة الشرعية هو ان كل واحد منكم يشوف اذا الطرف الآخر مناسب والا لا و اذا هو حس انك ما ناسبتيه و انك مو الانسانه اللي يفكر يرتبط فيها هذا ما يعني ان فيك شي هذا رايه هو و ذوقه هو و ارجع و اقول لك مو ذنبك انه ماعنده اسلوب و لا هو ذرب و متعود على تجريح الناس , و ان شاء الله ربي بيرزقك اللي احسن منه و انتي تستاهلين كل خير

خالد: اصلا المنه عليه حاصل له وحدة مثل اميرة

سارة: أي والله صادق

ام نواف: خلاص يا أمورة قومي الحين غسلي وجهك

نواف: يالله البسوا عشان نطلع نغير جو

خلودي: ليه وين بنروح

نواف: عازمكم ع العشاء

أميرة: لا انا ما ابي اروح

خلودي: أميرة بلييز نواف بكبره بيطلع معنا و عازمنا على العشاء هذي ما تصير الا بالسنة مرة

نواف: عاد وش اسوي والله الشغل ماكلني أكل , هاا يالله أمورة قومي البسي والا بنروح كلنا و نتركك بالبيت لحالك

أميرة: لا لا اجلوها بكرة والله احس مالي نفس اطلع

نواف: اوكي خلاص بكرة بكرة كم أميرة عندنا؟

ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ

بسيارة زياد

أم زياد: أبي افهم ليه سويت كذا حسبي الله على ابليسك فشلتني عند الناس قطعت وجهي ليه تحطني بهالموقف دامها ماعجبتك كان سكت و بعد ما نطلع من عندهم قلتلي وانا اعتذر من الناس

زياد: عاد تدرين يمه انا اصلا رايح اسوي هالمهمة و ارجع

ام زياد فتحت عيونها: وش جاك من البنية عشان تسوي فيها كذا ما تخاف من ربك انت, حوبتها بترجع لك

زياد: بالعكس يمه انا سويت هالشي من مصلحتها

ام زياد: مصلحتها انك تفشلها و تجرحها و تحرجها قدام اهلها؟ هذي مصلحتها؟

زياد: لا يمه انتي مو فاهمه الموضوع لو فاهمته كان عذرتيني

أم زياد: و ليه مافهمتني بس كذا احرجتني قدام الناس, يالله فهمني

زياد: يا يمه هالبنت ولد عمها يحبها و يموت فيها و خطبها كم مرة و رفضته و هو رجال ينشرى بفلوس , و سوا هالخطة عشان يخطبها و توافق عليه

أم زياد: والله دام هذي علومه يحب البنية و يدخل رجال ثاني يشوفها هذا معناته لا يغار عليها و لا يحبها صدق و لا هو كفو انها توافق عليه بالعكس البنية عندها نظر يوم ماوافقت عليه , مافي رجال سنع يسوي اللي سواه

زياد: والله مدري يمه بس احيانا الحب يعمي

ام زياد: مسيكينة كسرت بخاطرها عاد والله انها وش زينها وشكلها مؤدبة حتى ما رفعت راسها و حليوة

زياد: هي والله تبين الصدق من ناحية حلوة حلوة

أم زياد: اسكت بس لا تتكلم بالبنية و انت مابغيتها , شفت انه ماعنده تدبير يوم دخل واحد ثاني غيره يشوفها

زياد: عاد الصراحة والله عورني قلبي عليها , بس مدري شلون عرفت امثل الدور

أم زياد: الله اكبر , هذا و قلبك معورك عليها سويت كل ذا اجل لو قلبك قاسي وش سويت, ما اقول الا الله يغفرلنا بس

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــ

يوم السبت كانوا أميرة و ريم جالسين بالجامعة

ريم: انتي مضايقه نفسك بزيادة صح هو موقف مو حلو و محرج بس يا شيخه لا تعطين الموضوع اكبر من حجمه ياكثر الناس الحقيرين بالعالم تراه ما يستاهلك بكرة ربي يرزقك اللي احسن منه , امم يمكن تاخذين اخوي سلطان و تقولين الحمدلله ربي ما كتب لي ذاك زياد مدري يزيد ههههههههههههه

أميرة: هاهاها سامجة و مزاجي مو رايق لك و بعدين مين قال لك بتزوج اخوك

ريم: حاصل لك عاد اخوي , فيه بنت مجنونه بالعالم يجيها عرض تكون زوجة اخو ريم و تقول لا؟

أميرة: ههههههههه عاد انا بتزوجك و الا بتزوج اخوك

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ

- عســـى حـــكـــم القـــــدر يــــرفــــق بــقـــــلــب مـــا بــغــى فـــرقـــاك –


بالمكتب الرئيسي من مكاتب شركة الفهد كان العم احمد جالس و اتصل على عبدالرحمن

أحمد: ألو , هلا عبدالرحمن تعال ابيك بالمكتب

عبدالرحمن: طيب أخلص الاوراق اللي بيدي و اجيك

احمد: طيب انتظرك

بعد شوي عبدالرحمن راح لمكتب ابوه

عبدالرحمن: السلام عليكم

ابو عبدالرحمن: و عليكم السلام

عبدالرحمن: هلا يبه آمرني

ابو عبدالرحمن: ما يامر عليك ظالم , اجلس وراك واقف

جلس عبدالرحمن و انتظر ابوه يتكلم

أبو عبدالرحمن: ها كيف الشغل معك؟

عبدالرحمن: الحمدلله ماشي

ابو عبدالرحمن: الحين اكيد انت مزحوم و عارفك مشغول خصوصا انك ما داومت الاسبوع اللي فات كله و الحين متراكم عليك الشغل بس ما راح آخذ من وقتك كثير

عبدالرحمن: لا وش دعوة يبه خذ وقتك

ابو عبدالرحمن: كنت بسألك قررت بخصوص موضوع خطبتك؟؟

عبدالرحمن تغير وجهه و صار شاحب: ايه قررت

ابو عبدالرحمن: هاا بشر؟

عبدالرحمن: خلاص بتزوج بنت ابو عبدالمحسن

أبو عبدالرحمن: هذا العشم فيك اعرفك ولدي اختياراتك دايم صح مبرروك الف مبرووك

عبدالرحمن: ما بعد صار شي لا تبارك لي ما بعد ردوا البنت يمكن ماتوافق ( يقول بينه و بين نفسه: ياارب ما توافق )

ابو عبدالرحمن: لا انا متأكد ان شاء الله انهم بيوافقون ابو عبدالمحسن ما يردني و خصوصا انه يحبك و يثق فيك

عبدالرحمن وقف: يبه الحين انا بروح اكمل شغلي تامرني على شي ؟؟

ابو عبدالرحمن: سلاامتك

عبدالرحمن : الله يسلمك

طلع عبدالرحمن و هو يحس ان النار تحرق قلبه و حاس نفسه بينفجر , دخل مكتبه و صار يدور بالغرفة ومو قادر يسوي شي يحس نفسه كل شي فيه متصلب ( يا الله ياسارة سبحان الله كم صار لي انتظرك و انتظر اليوم اللي يجمعني فيك و آخرتها انا اخون العهد اللي بيننا؟كيف راح يحترق قلبك لما تسمعين خبر خطوبتي كيف بتكون ردة فعلك انا حتى ماعندي الجرأة اواجهها بهالخبر ااه بس يا ساارة كل احلامي معك ضاعت سامحيني لكن والله مو بيدي)

ــــــــــــــــــــــــــــــــــــــــــــــــــ ــــــــــــــــــــــــــــ

روان كانت جالسة بغرفتها ,دق جوالها

روان: الو

.....: الو مرحبا

روان: مرحبتين

.......: كيفك؟؟

روان: تمام , عفوا مين معي ماعرفتك

......: ايه اصلا انتي ماتعرفيني بس انا اعرفك كويس

روان: كيف ما اعرفك و تعرفيني قولي لي مين انتي و بلاش استهبال بليز انا مو فاضيتلك

.........: اوكي معك لمياء

روان: لمياء ؟؟مامر علي هالاسم من قبل

لمياء: صح ما مر عليك ومثل ما قلت لك انتي ما تعرفيني بس انا اعرفك كويس مو انتي روان مساعد العبدالمجيد تدرسين ثالث سنة بالجامعة و صاحباتك اسيل و هنادي و اماني صح والا في شي غلط من اللي ذكرته؟؟

روان: لا مو غلطانة بس أي وحدة بالجامعة معاي سهل انها تجيب اسمي و معلوماتي العامة, قولي لي انتي ليه متصلة علي؟

لمياء: ابيك بموضوع ضروري

روان: قولي ايش الموضوع

لمياء: لا ما ينفع بالتلفون لازم اشوفك

روان: بصراحة انا مو مهتمة كثير لا فيك و لا في موضوعك عشان كذا ما راح اتعنى عشان اشوفك فبتقولين لي ايش عندك والا باي

لمياء: أي مكان تبين نتقابل فيه راح نتقابل لو بالجامعة بس الموضوع يهمك كثير و راح تندمين بعد فترة لانك ما رضيتي تقابليني لان اللي بقوله راح يفيدك كثير

روان : اوكي نتقابل بالجامعة

لمياء: اوكي متى تكونين موجودة؟

روان: بكرة ما اقدر لان عندي اوف خليها بعد بكرة الساعة 11 عندي بريك

لمياء : اوكي بيننا ألو

روان: اوكي باي

لمياء: باي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــ

انتهى البارت السابع

انتظر توقعاتكم

يا ترى وش تبغى لمياء من روان؟؟

و أميرة هل راح يخطبها فيصل و توافق عليه؟؟

و سارة راح تدري بموضوع خطبة عبدالرحمن؟ وكيف راح تكون ردة فعلها لما تعرف؟؟

اتمنى هالبارت حاز على رضاكم
انتظر آرائكم و ردودكم و توقعاتكم بخصوص هالبارت

بسم الله الرحمن الرحيم
يا حلوين هذا البارت الثامن نزلته لكم وان شاء الله يعجبكم و ياليت القى منكم تفاعل لان البارت اللي فات ماحسيت فيه تفاعل مثل الاجزاء اللي قبلها ومثل ما سبق و قلت حتى لو نقد انا أرحب بكل ردودكم و آرائكم ..

والحين أتمنى لكم قراءة ممتعة..
( الجـــزء الـــثــــــامـــــــن )

ريم صديقة أميرة كانت جالسة المغرب مع أمها و اخواتها حنان- اختهم الكبيرة- , و يارا - آخر العنقود- , واخوهم سلطان, وريم كانت تحكي لهم عن السالفة اللي صارت لأميرة مع زياد

حنان: والله حقيرر ما يخاف ربه

يارا: حراام عاد ما لقى الا أميرة يسوي فيها كذا مسكينة

ريم: والله حزنت عليها بس ما كنت أبي أبين لها بصراحة مررة موقفها محرج لو انا صايرتلي هالحركة كان تأزمت نفسيا

أم سلطان: عاد حاصل له والله انها تهبل ما هقوتي انه بياخذ احسن منها , والله لو سلطان يوافق على طول اخطبها له ما افكر ببنية ثانية

حنان: وش رايك يا سلطان والله ترى البنت ما تتفوت

سلطان: من يوم ريم ما طلعت على الدنيا و انا اسمع بهالأميرة وش قصتكم معها مسوين لها دعم

يارا: والله حلوة ما شاء الله

سلطان: والله شوفوا الفكرة بدت تدخل مزاجي , تنصحوني فيها؟؟

كلهم: اييه

ريم: انصحك فيها و بقوة بعد

سلطان: هين عاد انتي ما اخذ منك شور بصديقتك اكيد بتفزعين لها

ام سلطان: لا والله يا سلطان بتدعي لنا لو تعرس عليها

سلطان: خلاص اخطبيها لي , بس ابوي مسافر

ام سلطان: ابوك بيرجع بعد اسبوع يعني على بين ما اتصل عليهم و اكلم امها والبنت تعطينا موافقة مبدأية يكون ابوك رجع ان شاء الله

سلطان: الله يكتب اللي فيه الخير

كلهم: اميين

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــ

زياد و ولد خاله عبدالعزيز كانوا بالسيارة , و عبدالعزيز ألح على زياد بالسؤال عن اللي بينه و بين فيصل و حازم , زياد علمه بكل القصة

عبدالعزيز عصب: من جدك انت؟؟ انت من كل عقلك سويت هالحركة؟؟

زياد: وش فيها صح انجرحت مني بس ما اعني لها شي انا هدفي اوفق راسين بالحلال

عبدالعزيز: لا حول و لا قوة الا بالله , انت وش عرفك بفيصل هاا انا وانا من شلتهم اللي مقابلهم اربع و عشرين ساعة ما تشوفني اجلس معه و لا احب اختلط فيه , تدري ليه ارسلك تسوي هالحركة يااافااالح؟؟

زياد مستغرب: ليه؟

عبدالعزيز: لانه ناوي يتزوج بنت عمه عشان الحلال و بيذلها و متى ما اخذ اللي يبيه بيطلقها

زياد: وانت وش دراك عن هالكلام؟

عبدالعزيز: حازم و فارس ما يخبون شي عن بعض و حازم قايل هالكلام لفارس و اشوف فارس يقول هالسالفة لواحد من الشباب و انا مافهمت وش يقصد يقول زياد و زياد

زياد: ياربي وش اللي انا سويته لو كان هالكلام جد معناته افتريت ببنت الناس صدق اني حمار وشلون صدقتهم انا اكيد ربي بيعاقبني على قولة امي حوبتها ماراح تتخطاني , ياويلي لو الحين يخطبها فيصل و يتزوجها بتروح فيها البنت و كله بسبتي لازم احل الموضوع بسرعة, عبدالعزيز شر علي وش المفروض اسوي كيف اصلح الوضع

و جلسوا عبدالعزيز و زياد يفكرون بحل يخلصون اميرة من فيصل و خططه الشريرة.

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــ

نواف كان جالس مع امه و خالد بالصالة

نواف: يمه اليوم فيصل جاني لمكتبي و خطب أميرة مني بعد ما درى بسالفة خطبة زياد و قال انه مو كفو يخطب بنتنا و انا اولى فيها

ام نواف: خطب أميرة؟؟ غريبة فيصل اللي اعرفه مو مثل عبدالرحمن لا يحبنا و لا يبي وصلنا

نواف: والله مدري يا يمه حتى انا مستغرب

ام نواف : يمكن عاجبته

خالد عصب: لا والله ما بقى الا فصيلوه يتزوج أميرة , نواف اسمع اذا جاك فيصل مرة ثانية اطرده

نواف: خالد مب اللي تآمرني كني اصغر منك و بعدين محد طلب رايك

خالد: لا هي اختي مثل ما هي اختك و انا ما ابيها تتزوج فيصل , هذا اللي ناقص نرميها عند واحد كلب

نواف: عيب عليك و استح على وجهك هذا ولد عمك اقضب لسانك و خلك رجال

خالد: والله ما اتشرف انه يكون ولد عمي

ام نواف: خلاص يا خالد

عصب خالد و قام من مكانه و هو يتحلطم و طلع من الصاله: والله ما اخليها تتزوجه ليه الدنيا فوضى هذا اللي ناقص بعد

نواف: ها يمه وش رايك بالموضوع؟

ام نواف: والله ما اعرف بس بالنهاية هذا رايها و انا ما ودي اننا نوقف بوجه نصيبها يمكن ربي كاتب لها الخير معه

نواف: والله تبين الصدق يمه انا رايي من راي خالد , فيصل واحد ما يتآمن عليه ببنتنا , صح هو ولد عمها والمفروض انه يصونها بس ينخاف منه , بس انا ما بغيت اوافق خالد الراي لاني ما ابيه يحس بعداوة من ناحية أي احد و خصوصا عمي و عياله بالنهاية هذولي مننا و فينا

دخلت أميرة: السلام عليكم

ام نواف و نواف: و عليكم السلام

نواف: الله جابك تونا بطاريك و يقولون الطيب عند ذكره

أميرة: وش كنتوا تقولون لا يكون تحشون فيني بس؟

نواف : وش دعوة نحش بأمورتنا , بس عندي شغله بقولها لك

أميرة: ايش

نواف: فيصل ولد عمي أحمد اليوم جاني للمكتب و قال لي انه يوم درى بسالفة خطبتك قرر يخطبك و هو يبي يتزوجك و نفسه فيك من زمان و انه اولى فيك من غيره

أميرة: ماااشاااء الله و من متى هالحب , و صاير قلبه علي بسم الله على قلبه الحنين, ما كـأنه يشوفني كأنه شايف جني و الحين يخطبني , خله يخلصنا و يقول من الآخر وش ناوي عليه

ام نواف: يمكن الولد كان يكابر

أميرة: يمه الله يعافيك وش يكابر يعني ما اعرف فيصل

نواف: المهم يا أميره انا ابيك تفكرين بالموضوع من كل النواحي و تفكرين و تستخيرين , هذي حياتك و لازم انتي اللي تقررين فيها

أميرة: لا لا معليش ما ابي اعيش باقي عمري مقابلة خشته , بكرة اذا شفته قول له أميرة تسلم عليك و تقول لك لا و ألف لا و بعدين لحظة هو وش عرفه بسالفة الشوفة الشرعية انت اللي قايل له؟؟

نواف: لا والله ما جبت له طاري لا له و لا لعمي انا قلت اذا تم الموضوع قبل الخطبة الرسمية اعلمهم بس يمكن سامع من غدير

أميرة : اييه صح اجل اكيد غدير قايله السالفة قدامه



ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ


- تدري وش معنى ( أ ف ق د ك )

و اتحلى بالسكوت

اختنق ما اتنفس

اتألم دون صوت

ما أتكلم بس من داخل

أمووووت


بعد اسبوع عند بيت ابو عبدالرحمن

غدير وجهها أحمر و معصبة: عبدالرحمن ليه سويت كذا بسارة؟؟ انا مو مصدقة انك انت عبدالرحمن , لو فيصل كان ممكن اتوقع منه أي شي بس انت يا عبدالرحمن؟؟

عبدالرحمن: غدير الموضوع صار خارج سيطرتي انا ما اقدر اسوي شي

غدير: و سارة؟؟ لو درت عن هالخبر تدري وش بيصير فيها؟يمكن تموت البنت

عبدالرحمن: بسم الله عليها

غدير: لا تقول بسم الله عليها و تسوي نفسك كأنك خايف عليها , لو كنت تحبها صدق و خايف عليها صدق كان ما سويت اللي جالس تسويه فيها

عبدالرحمن: غدير و الله اللي فيني مكفيني و الله اللي صار مو بيدي فاهمه مووو بيدي

غدير: انصدمت فيك يا عبدالرحمن

و طلعت من غرفته و صفقت الباب وراها بقوة , عبدالرحمن ما قال لغدير السبب الرئيسي انه ليه وافق يتزوج وحده غير سارة لانه ما يبي يشوه صورة ابوه قدامها

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ


الساعة 11 بالجامعة دق جوال روان طالعت جوالها شافت نفس رقم البنت اللي دقت عليها قبل امس

روان: الو

لمياء: مرحبا

روان: مرحبتين هلا

لمياء: روان فينك عشان اجيك

روان: انا جالسة قدام مبنى 16 , تعرفين شكلي؟

لمياء: طبعا و هل يخفى القمر؟

روان: امم اوكي انتظرك

بعد خمس دقايق أقبلت لمياء على روان و سلمت عليها

لمياء: و اخيرا شفتك وجها لوجه يااي ماتصورتك بالطبيعة تكونين احلى بكثير من الصور

روان انصدمت: صور؟ عن أي صور تتكلمين؟؟

لمياء: بعدين احكي لك عن كل شي

روان: انا اتسائل وش قصتك معي و من وين تعرفيني

لمياء: اوكي بحكي لك كل شي , انا اعرف بنات و بصراحة دايم يجيبون سيرتك و يحكون فيك كثير

روان: مين البنات؟

لمياء: سوري مو حابة اقول لك اعذريني

روان: اوكي كملي

لمياء: بصراحة انا ما اعرفك ولا شي و مع ذلك ما هنتي علي و باين ان هذولي البنات ما يحبونك و في بينكم شي مو حلو و يبون لك الشر عشان كذا حبيت اوصل لك و احذرك منهم

روان: وبس كذا؟ هذا اللي طلع معك , حابه تألفين لي قصة و تبين أصدقك أساساً انا مالي عداوات

لمياء: ما تبين تصدقيني براحتك بس انا حبيتا حذرك من جد لان صار لي هالموقف من قبل و ما احب أي بنت تمر بنفس المأساة اللي مريت فيها

روان: أصلا لو كنتي صادقة كان ع الاقل قلتي لي مين هذولي البنات

لمياء: لو قلتلك مين هم بأذي نفسي و انا بصراحة ابي اساعدك بس ما ابي أي شي يمسني , بس بقولك اشياء عنهم هم يقربون لك بس بالضبط ايش يقربون لك ماني عارفة اتوقع بنات خالك او عمك شي مثل كذا ( لمياء قالت كذا و هي ما تعرف أي شي بس تتذكر بدر انه كان يقول لها ان روان ما تحب بنات خالي و لا تحب تجلس معهم من يوم كانت صغيرة)

روان: اهاا طيب ايش اسمائهم

لمياء: هذا الشي بجد ما اقدر اقول لك عنه بس واضح انهم يبون يأذونك لاسبابهم الشخصية

روان جلست تفكر بينها و بين نفسها ( اكيد مافي غيرهم سارة و أميرة): طيب ايش قصة الصور

لمياء: عندهم صور لك و خلوني اشوفها و منها عرفت شكلك

روان: عندهم صور لي انا؟؟

لمياء: ايه و لسه في اشياء كثير انتي ما تعرفينها

روان: قولي لي عنها

لمياء: لا اخاف ما تصدقيني

روان: لا راح اصدقك لاني تقريبا عرفت البنات اللي تحكين عنهم

لمياء: الصراحة كانوا يبون ينشرون صورك و يورطونك بس انا لما عملوا كذا تفاجأت و قلت لهم لا اذا بتفضحونها مو بهذي الطريقة انا عندي طريقة افضل و طلبت منهم يعطوني صورك بحجة اني بخلي كل شي علي و انا عملت كذا عشان ما يضرونك و قلت اماطل بالموضوع لحد ما اقول لك و نلاقي حل

روان: الحقيرات سارة و أميرة انا اوريهم شغلهم

و قامت من مكانها و هي معصبه

لمياء: روان فين بتروحين يامجنونة

روان: بروح بيتهم انا اوريهم شغلهم

لمياء: لا يا ذكية تبين تقضين على مستقبلك انتي لو عملتي هالحركة راح ينكرون و انتي ايش يثبت ان كلامك صحيح و بعد كذا راح ينتقمون منك اكثر

روان: طيب ايش اسوي

لمياء: تطمني و حطي ايدينك بموية باردة انا بس احتجت انك تعطيني الضوء الاخضر عشان اعرف اتصرف معاهم و اخذ لك حقك منهم

روان: جد ثانكس ع اللي عملتيه بس ماقلتي لي ايش اسمك

لمياء: انا لمياء

روان: تشرفنا

لمياء : الشرف لي , ( لمياء تبي تعرف مين هم سارة و أميرة اللي قالت عنهم روان قبل شوي عشان تقدر تحبك خطتها صح و تشككها فيهم ): امم بس ما قلتي لي كيف عرفتي انهم سارة و أميرة

روان: اعرفهم مافي غيرهم بنات خالي محمد هم اللي يكرهوني

لمياء (بينها و بين نفسها: اوكي وصلت للي ابغاه , راح تشوف يا بدر بنتقم منك و راح احرق قلبك على اختك الغبية)

لمياء: على فكرة احب اقول لك انتي مررة ذكية وانا مرة معجبة بذكاءك

روان: ثانكس, بس أي مستجدات خبريني و ياليت ماتقدمين على خطوة الا تقولي لي قبلها

لمياء: اوكي

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــ

زياد خلا اخته تتصل على بيت ابو نواف عشان يكلم أميرة و يعتذر منها و يحذرها من فيصل

خالد ينادي أميرة: تعالي في وحدة تبيك ع التلفون

أميرة: تبيني انا؟؟ و ليه ما دقت على جوالي

خالد: عاد وش دراني عنها انا ماقلتلها تدق عليك

أميرة راحت و ردت: ألو

اخت زياد: هلا السلام عليكم

أميرة: و عليكم السلام, عفواً مين معي !!

أخت زياد: انا وحدة متصلة أأدي غرض عشان كذا لو سمحتي ابيك تسمعين الكلام اللي بينقال الحين و من فضلك لا تقفلين السماعة و حتى لو ماتبين تتكلمين لا تتكلمين بس اسمعي

أميرة و هي مفهية و ما تدري وش السالفة: اوكي

أخذ زياد السماعة و تكلم: ألو السلام عليكم , أميرة انا ما اطلبك تتكلمين و لا اطلبك أي شي يابنت الناس انا بس ابي اوضح لك شي مهم , انا زياد اللي خطبتك من قبل

أميرة لما سمعت اسمه تفاجأت بس بقت على صمتها

كمل زياد: و في اشياء كثير أبي اوضحها لك و ابيك تسمعيني للاخير, سامحيني الله يخليك انا والله سويت حركة الشوفه الشرعية عن عمد ومن مخطط مسبق و ماسويت هالشي لانك ما عجبتيني و الا لان فيك شي بالعكس والله انا اتشرف اتزوج وحدة مثلك بس انا نيتي ما كانت زواج انا مرسول من ولد عمك فيصل, هو اللي خلاني اسوي كذا لان هيبي يخطبك و يبيك توافقين عليه و هو فهمني انه يحبك و كم مرة خطبك بس انتي مارضيتي تتزوجينه عشان كذا والله نيتي كانت صافية و كنت ابي اجمع راسين بالحلال , بس دريت ان فيصل نيته نية سوء فيك و اعتبرني جسر لمخططاته السيئة و المسألة ما كانت مسألة حب و لا شي , الله يخليك حلليني

أميرة كانت مصدومة من الكلام اللي قاله زياد و تحاول تستوعبه حبه حبه

زياد: انا ما ابيك تتكلمين ابيك بس تقولين كلكة وحدة قولي مسامحتك محللتك الله يخليك قوليها

أميرة: أولا انت كنت طايح من عيني يوم سويت حركتك القذرة لكن بعد اتصالك هذا طحت من عيني ألف مرة و الحمدلله ان الموضوع كان لعبة و ماكنت من نصيبي و اذا انت مفكر انه بتصرفك هذا انك بتحل الموضوع فأنت غلطان و لو كنت رجال كان اتصلت على اخوي وواجهته بحقيقتك القذرة انت و فيصل مو جاي تدق على بنات الناس اذا انت متعود ع اللعب مع البنات العب بعيد عني انا مو تبع اتصالات و لعب فاهم

زياد: لو تبين اكلم نواف والله بتصل عليه الحين و اشرح له الموضوع و استسمح منه بس انا ابيك انتي تحلليني , لو ماحللتيني ربي ما راح يوفقني بحياتي

أميرة: لا ما ابيك تدق عليه و لا ابي منك شي اصلا انت اصغر من اني احط لك اعتبار و دامك تعرف ربك و داري ان التوفيق منه ليه تسوي بالبنات كذا , على العموم محللتك بس عشان نفسي و عشان اطوي صفحتك السودا

و قفلت السماعة بوجهه و راحت لغرفتها و بداخلها مشاعر مختلطة من الحزن بسبب حقيقة ولد عمها و مخططه الشرير و جزء من مشاعرها منتشي بالنصر ارضاء لغرورها و جزء من مشاعرها فرح ان ربي يحبها و بين لها حقيقة ولد عمها عشان تكون حذرة منه و ماتنخدع فيه هي و اهلها

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــ

انتهى الجزء الثامن

انتظر ردودكم و آرائكم حول البارت

دمتم بود

بارت رائع يالغلامع ان ودي ريومه تاخذ فيصل علشان ايصير فيه اكشن
وطق وطقيق يعني فيه اشويت تعذيب بس في الاخير بحبه وينصلح حاله
وستمري يالغلافي الرويهولم يكون يوم ورا يوم احسن اذا ماعندك مانع
وننتظرك على خير يوم الخميس

هلا و غلا الريم اللعوب

حياك الله و ان شاء الله تعجبك الرواية بالاجزاء القادمة اكثر و اكثر

و اعتذر منك صعب علي والله اخليها يوم ورا يوم لاني لسه جالسة اكتب فيها و كل بارت يبيلي وقت على بال ما اكتبه على الوورد

نورتيني

بسم الله الرحمن الرحيم

هذا البارت و نزلته اليوم بدري عشان أحلى أعضاء متحمسين مع الرواية وان شاء الله يعجبكم

قراءة طيبة ..

( الجــــزء الـــتــــاســـــع )

بيوم من الأيام في بيت أبو عادل دخلت الشغالة للصالة

الشغالة: بابا هادا خالد في عند الباب يبي عادل

أبو عادل: من خالد؟

الشغالة: ولد جيران

أبو عادل: طيب روحي دخليه للمجلس و نادي عادل

الشغالة دخلت خالد بعدين راحت لعادل و نادته , نزل عادل عند خلودي و سلم عليه

عادل: وشلونك ياخالد , زارتنا البركة

خلودي: الحمدلله بخير الله يسلمك

انت بشرنا عنك

عادل: والله انا بخير

خالد: عادل ابيك بموضوع

عادل: سم

خالد احتار كيف يفتح الموضوع : أأأ أنا في واحد من اخوياي طايح بمشكلة و جيتك قلت اكيد ان شاء الله بلقى عندك حل

عادل عرف ان خلودي هو اللي متورط بالمشكلة: طيب قول لي وش المشكلة

خالد: بس انا ابي هالشي يكون سر بيني و بينك لان خويي مايبي احد يدري

عادل: و لا يهمك انت و صديقك سركم ببير , هات وش المشكلة

خالد: خويي متهاوش مع واحد و ذاك يبي يتبلاه

عادل: يتبلاه بوشو؟؟

خالد: ذاك يبيع مخدرات للعيال ايام الاختبارات و كان يقنع خويي انه يتعاطى بس والله والله خويي مافكر يجرب ابد و خويي لانه كان صديق هذاك خويي ماعلم عليه و هذاك خلا خويي يوصل لبعض الشباب مخدرات كم مرة بس والله كان مغصوب لانه خاف يزعل منه صديقه , بس بعدين تهاوشوا و يوم خويي هدده يعلم عليه هذاك قال بورطك بالمشكلة , عاد صديقي الحين ضميره يأنبه لان هذاك قاعد يجبر العيال و يبتزهم عشان يشترون منه و الحين قاعد يقول حتى لو انت فكرت تعلم علي بتتورط مثلي لانك تعتبر بايع لهم , صدق خويي كذا بيتورط مثله؟؟

عادل: لا مادامك علمتني ماراح يتورط ان شاء الله و انا بساعده و لا يهمك و كل الامور بتتسهل ان شاء الله بس ابي اسألك سؤال و جاوبني بصراحة و أوعدك بخلي صديقك يطلع منها مثل الشعرة من العجين

خالد: وشو؟

عادل: خويك اللي تتكلم عنه هو انت صح؟؟

خالد سكت و ارتبك

عادل: قول لي الصدق والله هالكلام ماراح يوصل لاحد من اهلك بس علمني عشان اقدر اساعدك

خالد: ايه انا

عادل: خلاص اترك الموضوع علي و انا ان شاء الله بنهي الموضوع و مهما حارشك هذاك لا تقول له شي و لا تسوي أي تصرف صوبه الا اذا قلتلك

خالد: ان شاء الله

عادل: ها تبي أي شي ثاني تعال لي و لا تلجأ الا لنواف و الا لي تراك اخوي الصغير

خالد وقف: شكرا الله يعطيك العافية

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــ

أم سلطان اللي هي ام ريم صديقة أميرة اتصلت على ام نواف تخطب أميرة لسلطان

أميرة: مابي مابي تخيلوا يصير فيني مثل المرة اللي فاتت

أم نواف: هذيك المرة اكتشفنا انها لعبة من فيصل بس هالمرة جد

أميرة: تخبلوا لو انحط بنفس الموقف مرة ثانية

سارة: وشو يعني بتجلسين طول عمرك ما تتزوجين عشان صار لك كذا , و بعدين يا غبية قلنا لك هي خطة من فيصل , أصلا هو ما سوا كذا الا لانه متوقع انك بتتزوجينه بعد ما تتحطمين من هذاك الموقف

أم نواف: احنا ما نبي نضغط عليكي اذا انتي حاسة نفسك مو مستعدة لهذي التجربة ماراح نجبرك على شي بس أفضل لك صلي صلاة استخارة ترى الفرصة ما تجي مرتين

أميرة: اصلا انا عارفة كله من هالدبة ريم خلت اخوها يخطبني عشانها راحمتني بعد سالفة زياد

سارة: يا غبية لو بترحمك و مو مقتنعين فيك بتورط اخوها فيك يعني بس لانها راحمتك؟ خلي فيك مخ شوي و بعدين انتي تقولين ريم دايم تلمح لي على أخوها

أم نواف: انتي فكري و لا تضيعين الفرصة من يدك

أميرة: خلاص بفكر

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ

بعد فترة أميرة شافت سلطان و ارتاحت له و وافقت عليه و تمت الخطبة الرسمية , بس باقي الملكة بعد اسبوعين بعد ما تخلص أـميرة اختباراتها

و بيوم من الايام كانت شهد عند أميرة قبل ملكتها بأسبوعين و تبي تنام عندهم و اتصلت على عادل عشان يقنع أمها و ابوها انهم يوافقون

شهد: عادل الله يوفقك اقنعهم ابي انام عندهم بس هالمرره بس

عادل: انا ماعندي مانع تنامين عندهم مع اني مو عاجبني الموضوع بس بكيفك تبين تكلمين امي و ابوي و تقنعينهم على راحتك بس انا اقنعهم لا

شهد: عادل بلييز والله لو سويت هالمعروف ما راح انساه لك

عادل: شهد اعقلي خلاص قلتلك لا

شهد برطمت: ياربي ليه لا

أميرة سحبت الجوال من شهد : عاادل انا اميرة

عادل ابتسم لما سمع صوتها بس بقى على نفس نبرة صوته الجادة: هلا والله اميرة

أميرة: وش اخبارك؟

عادل: بخير انتي كيفك؟

أميرة: مو مبسوطة و زعلانة

عادل استغرب: ليه عسى ما شر ؟فيك شي أميرة؟

أميرة بصوت كأنها زعلانة: ايه فيني

عادل خاف : وش فيك؟؟

أميرة: عشان ابي شهد تنام عندنا و انت مو راضي تقنع عمي يخليها تنام عندنا

عادل تنهد بارتياح: الله يقطع ابليسك حسبت فيكم شي

أميرة: يالله عااادل اقنعهم طلبتك

عادل: لا انا قلت لشهد لا يعني لا

أميرة: طيب عشان خاطر العروسة

عادل ما استوعب: عروسة ايش؟

أميرة تضحك: ههههههههه عروسة باربي , وشو عروسة ايش اقصد نفسي انا

عادل تلخبطت عنده الامور: انتي عروسة؟

أميرة التفتت على شهد : شهد يالدبة ما قلتي لعادل ان ملكتي بعد اسبوعين؟؟

عادل لما سمع جملتها انصدم و حس ان الدنيا تدور فيه مو مستوعب اللي يسمعه

أميرة: طيب قول مبرووك قول شي اجبر بخاطرنا يا شيخ

عادل ما كان يرد على كلامها

أميرة: سبحان الله من يومي صغيرة و انت تعاملني كأني بزر انا و شهد مع انك راعي واجب مع كل الناس بس وشو حنا مو معبين عينك

عادل بصوت واطي نوعاً ما و الغصة بحلقه : مبروك
و قفل الخط

أميرة ماتدري انه قفل الخط: الله يبارك بعمرك و عقبااالك انت و شهد

أميرة حست ان فيه هدوء تام من الطرف الثاني طالعت الجوال لقته مقفل

أميرة: خيييييير وش هذا قفل الخط بوجهي كل هذا عشان ما نتوسل له تنامين عندنا

شهد كان وجهها متقلب الوان , هي خبت خبر خطوبة أميرة عن عادل عشان ما يتضايق لانها تدري انه يحب اميرة موت بس ما يبين لها , و لما أميرة علمته بالخبر ضاق صدرها و جلست تفكر بعادل أكيد انه متضايق الحين

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــ

- ياعسى غيري .. ما يتهنى بك ثواني

بالمستشفى و بوقت البريك كانت سارة و ثنتين من زميلاتها بالمستشفى تعرفت عليهم وحدة منهم اشتغلت بالمختبرات

هديل: صح سارة بسألك تعرفين واحد يقرب لك اسمه عبدالرحمن أحمد الفهد

سارة لما سمعت اسمه ارتبكت و حمرت خدودها : ايه هذا ولد عمي من وين عرفتي اسمه

هديل: شفت ملفه مسوي تحليل زواج

انصدمت سارة بس فكرت انه مسوي لها مفاجأة و حلل و بيقول لها عشان يخطبها: اها

هديل كملت: شكلك ماتدرين

سارة تصرفها و قلبها يدق بقوة فرحاانه : ايه ما ادري

هديل : بياخذ بنت الجابري

سارة ما استوعبت و عقدت حواجبها : من هو؟

هديل: ولد عمك

سارة: فيصل؟

هديل: وش فيصل اقول لك عبدالرحمن

سارة: لا اجل اكيد مو ولد عمي

هديل: الا مو انتي قبل شوي تقولين عندك ولد عم اسمه عبدالرحمن احمد قبل شوي

سارة: ايه بس اكيد مو هو يمكن في لخبطة او تشابه أسماء

هديل: و ليه متأكدة انه مو هو؟

سارة: لانه مستحيل يتزوج

هديل: والله مدري عنكم

سارة قامت تفكر مين هذا الي هديل تكلمت عنه , كان عندها احساس انه هو بس مو متصورة انه ممكن يخطب وحده غيرها مستبعدة الفكرة تماما , بعد ساعتين اتصلت على هديل

سارة: هلا هدولة بليز ابي منك شغلة ممكن؟

هديل: آمريني

سارة: ابي اعرف اسم عبدالرحمن بالكامل اللي قلتيلي عنه مسوي التحليل

هديل: قلتلك عبدالرحمن أحمد الفهد

سارة: لا ابي اسم جده بعد

هديل: والله بدور لك تحليله انتي و حظك اذا لقيته بدق عليك اوكي؟

سارة: اوكي مشكورة

قفلت سارة من هديل و هي حاطة ببالها انه اكيد ماراح يكون هو , بس حبت تتأكد لانه بقلبها خوف بنسبة واحد بالمية

بعد شوي دقت عليها هديل

سارة: هلا هديل ها لقيتيه؟

هديل: ايه شوفي مكتوب اسمه عبدالرحمن أحمد عبدالرحمن الفهد

سارة انصدمت لما سمعت اسمه : ايش قلتي لي اسمه؟؟

هديل: عبدالرحمن أحمد عبدالرحمن الفهد

سارة حست ان الدنيا صارت سودا بعينها و قفلت الخط بوجه هديل : لاا اكيد فيه لخبطة اكيد

دقت سارة ع السواق و طلعت من المستشفى, لما وصلوا لحارة بيتهم

سارة: وقف هنا عند باب بيت عمي

وقف السواق و نزلت سارة و هي لسه مشاعرها ملخبطة و لا حتى نزلت دمعة وحدة منها لانها حاسة ان اللي قاعد يصير اكيد غلط

دخلت بيت عمها و لقت بوجهها الشغالة

سارة: وين غدير؟

الشغالة: غدير نايمة

سارة: روحي صحيها قولي لها سارة تبيك ضروري

راحت الشغالة و صحت غدير من النوم , غدير خافت ان سارة وصلها خبر و كان احساسها بمحله , نزلت غدير و لما دخلت للمجلس سلمت على سارة , و سارة كانت كأنها قطعة خشب مافيها روح

سارة: غدير قولي لي عبدالرحمن خاطب؟؟

غدير سكتت و تغير لون وجهها و مو قادرة تحط عينها بعين سارة

سارة: ردي علي ايه والا لا هاا قولي

غدير: اا ايه

سارة لما سمعت جواب غدير ماحملتها رجلينها من الخبر اللي صدمها و جلست على الكنب شوي , و دموعها قامت تنزل و عيونها جحظت و قامت من مكانها

سارة: الله لا يوفقه الله ياخذه و يموت ولا اشوفه مع غيري , لعب علي لعب بمشاعري والله ما اسامحه الحقير

غدير تحاول تهديها: سارة حبيبتي اجلسي لا تعصبين اهدي شوي

سارة تصرخ: اهدا؟؟ تبيني اهدا و اخوك خاطب بنت غيري , وانتي بعد مثله خدعتوني والله ما اسامحكم بعدي عني لا تلمسيني بعدي

طلعت سارة من بيت عمها و راحت لبيتهم مشي , و دموعها تسيل على خدها و تشاهق

دخلت للبيت لقت بوجهها الخدامة

الشغالة: ليه تبكي سارة ايش فيكي؟

سارة: مالك دخل و راحت تركض لغرفتها و تبكي , دخلت و صفقت الباب بقوة و جلست على الارض و صارت تبكي و هي منهارة: ان شاء الله تموت قبل ما اشوفك مع غيري يااارب تموت و افتك منك و الا يارب خذني انا و ارتاح من هالعذاب , كيف بشوفها كيف بقدر اشوفها معه بيحترق قلبي بموت اذا شفت وحده غيري معه , حقيرر ليه كل هالسنين يخدعني لييه

غدير دقت على أميرة بسرعة و قالت لها ان سارة طلعت من عندهم و هي منهارة لان عبدالرحمن خطب, قفلت أميرة من غدير و بسرعة راحت لغرفة سارة , فتحت الباب لقتها ع الارض و ميتة من البكي , أميرة راحت لها و حضنتها

أميرة: بسم الله عليك بسم الله عليك سارة أهدي شوي , حبيبتي لا تسوين بنفسك كذا

سارة تبكي: عبدالرحمن خطب تخيلي خطب وحده غيري ليه يحرق قلبي الله يحرق قلبه

أميرة: معليش اهدي شوي و كل مشكلة و لها حل ان شاء الله

سارة: وش بيكون حلها؟ هو بيتزوج و انا اصفق له و ارقص له؟؟ ااه موتني ليه يسوي كذا , عبدالرحمن حبيبي اعرف انه يحبني و يموت فيني كيف قدر يخطب وحدة ثانية ليه يوعدني و يكذب علي ليه


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــ

- كاني سبب حزنك و همك و بلواك .. الله يبرد حرتك في وفاتي .

رجع عبدالرحمن من الشركة و هو تعبان و كاره نفسه و نفسيته بالحضيض , جا بيدخل غرفته و لحقته غدير

غدير: عبدالرحمن

عبدالرحمن: هلا غدورة

غدير: ابي اكلمك شوي

عبدالرحمن: طيب تعالي ادخلي

غدير: انا المفروض ما اتكلم معك لاني شايلة عليك بقلبي كثير بس ابيك تحس و تدري بالاشياء اللي تسويها و تدمر كل شي و ترمي الناس ورا ظهرك وانت مو داري عن شي و ماهمك احد , تدري ان سارة اليوم جتني للبيت؟؟ تدري انها كانت منهارة لانها درت عن خطبتك كانت شوي و تنجن

عبدالرحمن مسك راسه و غمض عيونه : ياا الله يااا الله كيف درت

غدير: وش عرفني بس بالنهاية كانت بتدري بالعكس احسن انها عرفت الحين مو يوم ملكتك تكفى عاد فرقت على يومين هالخميس ملكتك خلها تدري قبل ملكتك مو يوم ملكتك تنصدم , والا ماعاد تهمك ابد تموت تجيها جلطة بالطقاق يطقها هاا

عبدالرحمن دمعت عيونه و صار يفرك عيونه بعصبية : غدير والله مو بيدي انا احب سارة و أموت فيها اقسم بالله ما ابي احد غيرها و كاره هالخطبة و كل اللي قاعد يصير

غدير: صح والدليل انك بتتزوج وحدة ثانية صح معك حق

عبدالرحمن: غدير انتي اختي اللي تدرين عن كل شي بيني و بين سارة كيف تفكرين بهالطريقة , ما جا فبالك اني مغصوب على هالزواج؟؟

غدير بتهكم: ما شاء الله و مين غاصبك , امم مزاجك يمكن

عبدالرحمن بعصبية: غدير و بعدين معك؟؟ ابوووي ابووي غاصبني

غدير: حتى البنات بهالزمن ما صاروا ينغصبون على الزواج

عبدالرحمن عصب و صار يصرخ عليها من النار اللي بقلبه و كان كاتمها: تدرين ان ابوي غاصبني عليها تدرين اني اتمنى اموت و لا اتزوج وحدة غير سارة تدرين ان ابوي مهددني بشرف خالتي ام نواف اذا ماوافقت اتزوج هالبنت؟؟ وش رايك تبيني اصير نذل و اخلي سمعة عايلة كاملة تنهدم بس لاني ابي اتزوج هاا فهمتي الحين فهمتي ليه بتزوج ارتحتي

غدير كانت مصدومة من الكلام اللي قاله عبدالرحمن كيف ابوها يكون انسان منزوعة من قلبه الرحمة لهذي الدرجة, وصارت تبكي: ليه ابوي يسوي كذا اكره ابوي اكرهه – و صارت تبكي بقوة-

عبدالرحمن قرب من غدير و حضنها و صار يهديها و هو اصلا محتاج احد يواسيه: غدير اسف ماكنت ابي اعصب عليك و لا كنت ابيك تدرين بهالشي عشان ما تتخذين موقف من ابوي, بس فلتت اعصابي و طلع مني هالكلام

غدير: بالعكس انا ظلمتك كثير المفروض اعرف انك مستحيل تسوي بسارة كذا الا اكيد عندك سبب قاهر

بعد شوي طلعت غدير من غرفة عبدالرحمن و هي حاسة بالقهر من تصرف ابوها اللا انساني و دخلت غرفتها و كملت بكي .

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــ

انتهى البارت

انتظر ردودكم آرائكم انتقاداكم وتوقعاتكم

دمتم بخير