// × // // × // // × // // × //



"
قد نرسم لنا أحلام وطموحات ..
ولكن هناك من يسعى لتحقيقها
وهناك من يقف عند رسمها .. !!!
"




// × // // × // // × // // × //




بعد مرور ثلاث أيام ..


" الموقف صعب والألم كبير لكن تصبر وتذكر أن ربك مع الصابرين .. وأبومالك راح للرحمن الرحيم .. الله يرحمه ويسكنه فسيح جناته !! وأختك بإذن الله ترجع لك بأحسن حال .. !! "


كنت أحس بضيق لكن كلام أبوفيصل خفف علي التفت له وقلت" الله يخليك يا عمي .. أنت وعيالك ما قصرتم معي ووقفتكم ما راح أنساها أبد .. !! "
أبوفيصل بهدوء " أفى عليك أنت ولدنا منا وفينا ما يحتاج يا سعود وأنا أبيك ترجع لشغلك وتنسى اللي صار ما أقولك أنه شيء سهل لكن بإذن المجرمين بياخذون جزاتهم سواء في الدنيا ولا الآخره .. !! "


ابتسمت وقمت حبيت راس أبوفيصل لأن حسيت بشخص ممكن أسند نفسي عليه شخص قريب مني وبجد أبوفيصل دوم ما يقصر .. !!!!




// × // // × // // × // // × //




قلت بتردد " أنا موافقـ..ـه عمي " وأخذت نفس !! كنت خايفه متردده واستخرت وحسيت براحه شوي يمكن فيها خيره وبعد بالنهايه صعب أرفض طلب عمي خاصه مع اللي يسويه لي وأكيد وقتها بخسر عمي وأنا مب مستعد أخسر أحد من أهلي بعد ما لقيتهم .. !!!!


ابتسم لي عمي وقال " الله يسعدك يا نجد وربي يوم سعدي لما أزوج ولدي لبنتي وتأكدي محمد بشيلك بعيونه واذا ضايقك ولا زعلك في يوم ما يحتاج تعال لي لأني أعتبر نفسي أبوك وأبيك ما تعتبريني عمك بس إلا أبوك وأي شيء تحتاجينه آمري "


ابتسمت وقلت بهدوء " أنت ما تقصر يا عمي " وحبيت راس عمي واستآذنت منه .. !!!
الله يكتب اللي فيه الخير هذا المهم ومع أني مب مرتاحه لمحمد بعد الموقف اللي صار بيني وبينه لكن بالنهايه أنا ما أعرف خيره من شره .. !!!


لكن كنت خايفه من ردة فعل البقيه خاصه مرة عمي اللي شكلها مب متقبلتني مع أني أحاول أكسبها لكنها دائم أحسها تبي تجرحني !!! وخايفه بعد من ردة فعل مريم لأنها صارت بالنسبه لي مثل أختي وأعز وخايفه أخسرها لكن إن شاء الله ما يصير شيء من هذا واذا كان في خير في الموضوع الله يتممه .. !!





// × // // × // // × // // × //





كان واقف بغموضه يبتسم وهو يعلن مواقفته لإتمام ملكتهم !! وأنا كنت أقولها بإستسلام ايه استسلمت لأبوي لأنه صدمني أن الملكه بعد ثلاث أيام بس من خطبة تركي لي شافني أمس والملكه اليوم !!!


حاولت أعترض أصرخ لكن أبوي قال أنه ما عاد يقدر يدفع إيجار البيت وأنه صاحب البيت هدده يطرده خاصه بعد ما انطرد أبوي من شغله !!! لكن تركي خطبني ودفع مبلغ بساعدنا عشان كذا أبوي قبل فيه .. !!!


يعني باعني وأصلا مين يهتم فيني كلهم موافقين وكلهم ضغطوا علي عشان أقبل وأنا أستسلمت .. !!! لحظتها طلعت من أفكاري وقلت وأنا أحس بالألم وأنا أشوف نظرة أكثر انسان ممكن أكرهه " أنا موافقه !!! " حسيت أني لحظتها أعلنت الموت على نفسي أعلنت نهاية الحياه بس ايش الجديد في حياتي ما استانست وأبوي من يومه أصلا ما يهتم فيني وأكيد بوافق يبيعني لأي واحد يدفع .. !!!!!!!!!!!!!!!!!!!





// × // // × // // × // // × //





كنت أحس بعجز !! بضياع مب معقوله اللي يصير .. هذي العصابه تتلاعب فينا مثل ما تبي .. حاولت أمسكهم حاولت أوصل لشيء لكن ولا شيء هذا اللي وصلت له .... !!!


في البدايه توقعتها عصابة سطو على محلات وبديت أربط الأمور على هذي الفكره لكن ألحين كل شيء تغير الهجوم على شخص مثل أبومالك غريب ليش وايش ممكن يكون الدافع .. !!!


أول مره يهاجمون شخص في منزله والغريب وقتها زوجته مب في البيت هذا يعني أنهم يراقبون المكان كان يدرون أنه في هذا الوقت لحاله وحيد !! بس الغريب أبومالك مب غني عشان يهاجمونه إلا اذا كان في شيء ما فهمته .. !!!


معقوله يكون أبومالك شريك لهم !!!! مستحيييييل أبومالك معروفه سمعته الكل يمدحه .. وبعدين حسب ما شفت كل شيء ثمين ولا فلوس انسرقت من المكان يعني معقوله يكون هدفهم مال ؟!! بس مهما كان مو معقوله أبومالك يكون عنده فلوس كثيره في البيت لدرجه يقتلونه !!! أكيد في سر بالموضوع في شيء ما عرفته يمكن زوجته تساعدنا بس هي للحين ما صحت !! ما تنلام الله يعينها اللي صار شيء مب بسيط والله يسهل عليك يا سعود ... !!!!!




// × // // × // // × // // × //





كان كلام أبوي صدمه بالنسبه لي !! مب لأنها وافقت كنت متوقع أصلا توافق ولا يحصل لها تلقى الحلال والنعيم والعز هذا وترفض مستحيل !!! لكن ما توقعت أن الموضوع يصير بسرعه وخاصه أن أبوي ناوي بكره لما نروح الإستراحه ونجتمع مع أعمامي أنه يعلن خطوبتي لنجد والملكه بتكون الأسبوع الجاي وأما الزواج بعد شهر .. !!!!


كيف بتكون ردة فعل ندى لما تسمع بخطوبتي !!! يالله يا ما رسمت أحلامي وبنيت آمالي .. عندي طموحات وأفكار كثيره بس أحس كلها انتهت بسببها هذي الإنسانه دخلت حياتنا وهدمتها وهي أصلا لا هي منا ولا فينا .. !!!


كيف بتحملها ثلاث سنوات مدري .. !!! الله يعيين ويسهل خلاص هذا شيء وبصير ولازم أحمله وأرضى فيه وبالنهايه كلها ثلاث سنوات ويمكن أقل ويصير لي حلال ومال ووقتها كل اللي أتمناه راح يصير .... !!!!!!!




// × // // × // // × // // × //





كنت قاعد أقلب في الملفات أدور على سجل معين لكن ما قدرت أوصل له !!! من وصل هذا الإنسان وهو حاس علي المكتب ترتيبه للملفات سيء وكل شغله يرفع الضغط .. !!!


ما يحتاج أعرف أن هدفه يمسك رئاسة المصنع .. بس ما راح يحصلها أنا بقعد وبطول بس عشان ما يحصلها !!! شوي حسيت بشخص دخل للمكتب رفعت راسي ولقيته هو ما غيره " تركي " .. !!!!


قلت بعصبيه " وين السجلات تحطها أنا أدور على سجل مني محصله !!!!!!! ممكن أفهم كيف ترتب الملفات هنا ؟! "


قرب مني بغموض وقال " اليوم طلبني أبوفيصل وأحب أقولك أنك تلعب بعداد عمرك يا عبدالإله أنت تحاول تطردني من المكان لكن تأكد أسبوع واحد بس يكفيني عشان أبعدك من المصنع وأصير مدير .. !!! أنت تلعب معي وراح تخسر خساره كبيره ... !!!!!!!!!!!!!!! "


رمى هذا الكلام وطلع من المكتب انصدمت ايش يقول هذا المريض !!!!!!! يهددني لكن وربي ما راح أسكت ببلغ أبوفيصل وألحين .. وصدقني يا تركي أنت اللي راح تطلع من الشركه .. !!




// × // // × // // × // // × //




ضمتني مريم وهي تقول " أنا مستانسه أن أخوي بياخذك تدرين ليه !!! مب عشانه لكن أنتي أبيك تقعدين عندنا للأبد وربي يا نجوده أني مستانسه فيك كثيييييييييير وأحسك مثل أختي أنا من زمان وأتمنى تكون لي أخت مثلك !!!!! "


ابتسمت وقلت من قلب " وربي وأنا مريم !! ربي يسعدك أنتي بمثابة أختي وربي !!! "


ما توقعت هذي ردة فعل مريم هذي الإنسانه مختلفه عن أي شخص في هذا البيت أحسها قريبه مني بشكل خاص طيبتها تصرفاتها بجد أحس مثل أختي تذكرني بـ " بسمه " لكن بشكل أصغر .. !!!!


قاطعتني مريم من أفكاري وهي تقول " بس بصراحه ما توقعت أن أخوي معجبك لذي الدرجه ما صدقتي يخطبك وافقتي !!!!!! "
طالعتها بصدمه وقلت بسرعه " أنتي وش تخربطييييييييين !!!!! "


وقتها شفت مريم تضحك بقوه وهي تقول " وشو فيك نمزح !!! " ثم كملت " لذي الدرجه انحرجتي يلا مب مشكله منب قايله هالكلام مره ثانيه بس بيني وبينك ما ألومك محمد ينعجب وكذا فله و "


قاطعتها وقلت بعصبيه " هييييييييييه لا تألفين كلام لا معجبه ولا شيء بس يعني " سكتت ما لقيت تعبير أقوله
مريم تكمل عني بثقه " عارفه أنك قبلتي فيه لأنه أخوي .. من حبك لي قبلتي في أخوي عارفه ما يحتاج تشرحين !! "


ابتسمت عجبني كلامها وقلت " يسسسسسسسسلم لي عقلك يا شيييخه جبتيها !!! "



// × // // × // // × // // × //





كنت حاسه بالقهر بعد حفلة اليوم .. حسيت أن متعب ما يهمه إلا نفسه وصعب أني أحصل منه على شيء .. كان جالس يقلب في الملفات وكنت متردده أبي أكلمه أحاول معه يمكن أطلع بشيء .. !!!


قلت بتردد " متعب "
التفت لي وقال " نعم خير ؟! "
قلت بقهر " متعب أحسك مليت مني !!! متعب اذا ما تبيني خلاص مستعده أترك لك المكان !!! "


قال بسخريه " ليه في مكان ثاني يضفك ؟ "


حسيت لحظتها بمدى قيمتي حسيت بمعنى كلامه أني ولا شيء بالنسبه لي ولحظتها زاد كرهي لمتعب ولبسام ولكل رجال في الحياه !!!! عرفت أني رخيصه أنا خليت نفسي كذا .. !!!


قلت بعصبيه " رضيت أقعد عندك وفي النهايه ولا شيء طلعت منه !!! حسافه ليتني رحت عند غيرك كان أحسن !!!!!! "
التفت لي وقال " مب جديده عليك يا بنت الحرام تروحين للي يدفع أكثر !!!!!!!!! "


لحظتها حسيت بطعنه في داخلي ومديت ايدي كنت أبي أضربه .. !! مب هو بس لا !!! كنت أبي أضربه هو وبسام وكل شخص !!! حسيت الكل نهش فيني الكل قضى علي حسيت أني كنت بدون قيمه وصرت ألحين أقل من كذا ... !!!!!!!!!!!!!!!!!!


لكن متعب مسك ايدي وقال بعصبيه " يا حلوه لو تمدينها مره ثانيه أكسرها لك وأرميك مع هالباب لا تختبريني !!!!!!! تراك ما هميتيني وربي اللي جابك يجيب غيرك !!!!!! "


ودفني وترك المكان !!! ولحظتها أنا انهرت حسيت أني مو عايشه في حياه !!! عايشه في جحيم كيف كنت راضيه وساكته كيف خليتهم يدمروني !!! الله لا يسامحه !!! هو السبب النذل والله ما راح أسامحه !!!!!!!!!!!!!!!!!!!!!!!!




// × // // × // // × // // × //




أبوفيصل قال " ممكن تفسر لي المكتوب في هذي السجلات !!! أنا وثقت فيك يا عبدالإله لكن ما توقعت هذا الشيء يطلع منك ... أنت بالذات ما توقعت وثقت فيك وعطيتك مسئولية المصنع كامله !!! كنت تبي تتقاعد بعد ما شبعت في الفلوس اللي سرقتها كنت خايف تنكشف وأكيد جمعت اللي يكفيك !!! حسبي الله ونعم الوكيل .. اسمعني تاخذ أغراضك ومستحقاتك كامله وأنت مفصول من الشركه !!! "


كان عبدالإله واقف مصدوم من اللي يسمعه ما يقدر ينكر شيء السجلات تثبت أنه كان يسرق كان يطلب مبالغ كبيره لشراء أجهزه للمصنع لكنه في الحقيقه يشتري أجهزه بسعر أقل .. !!!!!


والباقي من الفلوس كان في جيبه هذا اللي ذكرته السجلات ما لقى كلمه يقولها ولا شيء ممكن يبرر حس أنه اللي حط نفسه هنا بهذا الموقف وعرف أن تركي سبب كل شيء !!!!!!!!!!!!!!!!!!!!!





// × // // × // // × // // × //





كان واقف بخبثه بدهائه وكان يرسم لهم الخطه يوضح لهم أسباب هجومهم على أبومالك والهدف الرئيسي والهدف الأكبر لهم كان الكل مصدوم لكن منبهر من تفكير البوس .. !!!


لحظتها ابتسم البوس بخبث وقام من مكانه وهو جالس يفكر كيف يبدء يغوص بشكل أكبر لازم يرسم لشيء كبير شيء مميز عشان يوصل للهدف اللي رسمه الهدف الأخير بالنسبه له ... !!!!!!!!!!!!!!!!!!!




// × // // × // // × // // × //

// × // // × // // × // // × //


"
كنت أقف بهدوء لأحدق في الظلام
لا أعلم ماذا كنت أنتظر ولكن ؟
نعم هناك رأيته وشعرت أنه الأمل المتبقي !!!
"



// × // // × // // × // // × //



يمكن افضل اللحظات هي اللي نقضيها في الإستراحه كل العيال يجتمعون ولكن هذي المره ما تمنيتها أبوي بعلن زواجي من نجد أنا خلاص رضخت للموضوع وصار عندي تقبل له لكن ؟!

كنت خايف من ردة الفعل اللي بتصير وندى ايش بتكون ردة فعلها أتمنى تفهم موقفي وأن اللي أسويه مب سهل بضحي بحياتي وسعادتي ألحين لكن بعدين بكسب كل شيء ووقتها بس راح أكسب ندى وأسعدها لأنها بتعيش بعز ونعيم .. !!!!!



// × // // × // // × // // × //



كانت الحفله اليوم استثنائيه وقررت أكون الملكه ايه قررت أسحقه بطريقتي !!! وهذا اللي صار صرت ملكة الحفله وهو كان ضايع معي وببساطه قدرت أخليه يشرب ويشرب حتى ما صار يستوعب شيء .. !!!

على ما يقولون " سكر حتى الثماله " ابتسمت وقربت منه وهو كان طايح في الأرض من التعب ويتكلم كلام غير مفهوم ابتسمت له وهمست بهدوء " اليوم أنت خسران يا متعب ولما تقوم لا تفكر تدورني لأني مستحيل أرجع لهذا المكان ".. !!!!

هذا كان قراري خلاص تجرأت وتركته !! وربي كرهت هذي الحياه حسيت أني رخيصه ما لي قيمه يوم أرضى أكون كل ليله مع رجال !!!! مهما صار مستحيل أسمح لأحد يوصلني لا متعب ولا غيره وأما بسام حسابي معه قريب .. !!!!!!!!!!!!!!!!!


// × // // × // // × // // × //



كنت مب مرتاحه للنظرات اللي أشوفها حسيت أني غريبه وما قدرت أتأقلم معهم يمكن وجود مريم ريحني شوي خاصه أن زوجة عمي ما اهتمت ولا التفت لي ولا كأني أصلا موجوده .. !!!

لكن مريم كانت تسولف وبجرأه وتحاول تدخلني الأجواء وشوي سحبتني للبنات وتعرفت عليهم بس ما أدري ما قدرت أرتاح لهم يمكن بس وحده حسيتها طيبه كان اسمها ندى ارتحت لها حسيتها تحكي اللي في قلبها ولا تجامل .. !!



// × // // × // // × // // × //



" ايش تقول يا عبدالإله كيف يطردك !!! مستحيييييييل أبوي يظلم أحد !!! "
عبدالإله " هذا اللي صار طول عمرك وبصراحه مدري وش أقول بس تركي هو السبب في كل شيء وصدقني هذا الإنسان ما وراه خير يا طويل العمر وأنا أتوقع أنه طماع ويبي يسرق حلالكم !!! "
قلت بعصبيه " يخسي هو وغيره ولا تهتم وربي ترجع لشغلك ومكانك !! وأبوي أكيد عنده سوء فهم ولا مستحيل يظلم أحد لكن هذا تركي حسابه عندي وربي !!! "

هذا كان آخر كلامي مع عبدالإله وبعدها رجعت للبيت وأنا مستغرب كيف ممكن الوالد يطرد عبدالإله أصلا كيف يشك فيه وهو اللي معنا من عمر وسنوات وعشان مين عشان هذا اللي ما يتسمى تركي !!!!!!!!

طلعت من أفكاري على صوت أبوي كان يسلم ابتسمت ورديت السلام وقلت " هلا والله يبا كيفك " .. !

ابتسم لي وقال " بخير ... بس حاس عندك سالفه وش بغيت ؟! "
ابتسمت لأبوي لأنه فاهمني وقلت بهدوء " بصراحه يبا اليوم جاني عبدالإله والرجال والله حالته لا تسر لا عدو ولا صديق .. يبا أنا أعرفك مستحيل تظلم أحد بس ما أدري وش صاير فيك من جاء تركي وأنت متغير ليه كذا يعني معقوله تصدق تركي وتكذب عبدالإله وهو اللي يشتغل عندنا من سنوات !!!!!!! "

طالعني أبوي وقال " يا فيصل مب الموضوع أكذب مين ولا اصدق مين !! عبدالإله كان بمثابة ولدي وكنت أحترمه لكن تركي ما جاء يقول شيء من راسه جاب لي أوراق وتأكدت منها أن عبدالإله كان يسرقنا !! أنا مسامحه ولا شايل بخاطري عليه بس فكرة أني أرجعه للشغل مستحيل وبعدين اترك عنك تركي لاغيرني ولا شيء بس أنت حاط نفسك فيه كأنك تبيه يغلط عشان أطرده !! قلت لك كم مره لا تخاف لا تركي ولا غيره يقدر يلعب علي .. !!! "

كلام أبوي ما كان بعده كلام بس بعد أنا مستحيل أرتاح لتركي وقررت أني من بكره أصير أراقب تركي عشان أعرف كل شيء عنه وأريح نفسي من هالتفكير .. !!!




// × // // × // // × // // × //



كانت أعصابه منتهيه كان مصدوم كيف طلعت من الشقه كيف تجرأت ولا وسرقت كل شيء يسوى في الشقه !! بكل جرأه تحدته واللي يتحداه يندم كثير كان يقول في نفسه " وربي غير أوصلك يا مرام ووقتها بتندميييييييييين كثييييييييييير !! "

ما كان همه الفلوس لأنه بدل الألف عنده عشرة وبدل العشره مية ألف بس ما يحب أن أحد يكسر كلامه كان متعود على الأمر والبقيه عليهم التنفيذ كيف تتجرأ مرام وتكسر هذي القاعده .. !!!!!!!!!!!!!!!!!!!!




// × // // × // // × // // × //




حسيت بضيقه التفت للساعه لقيتها 12 مب على العاده أقوم هذا الوقت !! بس للحين زواجي من تركي شاغلني وأفكاري كثيره تاخذني وتجيبني .. !!! قمت بهدوء وكنت أبي أروح أشرب لي مويه وأرجع .. !!

مشيت بهدوء للمطبخ وشربت لي مويه وبعدين جيت برجع لكن توقفت سمعت صراخ أبوي استغربت ايش اللي صاير !! قربت من الصاله وسمعت وقتها كلام تمنيت ما أسمعه أبد ... !!!!!!!!!!!!!!!!!!!

أمي " يا سالم وشو فيك تعصب علي خفف صوتك لا تقوم البنات !!! بعدين أنا وش قلت ما قلت شيء ياخي رجع البنت لأخوك أنا بصراحه خايفه من عقوبة الله !! وفلوس أخوك ما لنا حاجه فيها رجعها له خله يرجعها لأهلها "
أبوي بعصبيه " أقول اسمعي أنا مب ناقص ولا فاضي لك وتراني سكت لك وشكلك ما تفهمين الكلام لا تخليني أطلقك وأرميك وأخذ بناتك ولا عاد تشوفينهم !!! خلاص يكفي وعد بتتزوج من تركي وبنفتك منها بالعكس بنكسب من وراها كثير من تركي ومن أخوي بعد اللي ماراح أقوله أني بزوجها عشان يظل يرسل لي الفلوس .. !!! "

أمي هنا قالت بقهر " ياخي خف ربك في البنت تراها مب بنتنا مب بنتنا !!!!!!!!! كيف نزوجها وهي مب راضيه أصلا وربي أني خايفه من أن البنت تعرف كل شيء وقتها تدعي علينا دعوة مظلوم "

أنا سمعت مب بنتنا وحسيت الدنيا تقفل فيني انصدمت ايش تقول هذي مين تقصد معقوله أنا !!! مدري ربطت الكلام ولقيت أنه أنا أكيد تعاملهم معي غير كنت مستغربه ولا أعرف ليه !!!!!!!! هم مب أهلي مستحييييييييييل كيف أنا من أجل أمي مين أبوي !!!!!!!!!!

بقوه اندفعت للصاله وقلت وأنا حاسه نفسي بصيح " أنا مب بنتكم أجل بنت مييييييييييييييين بنت ميييييييييين !!!!!!!!!!!!!!!!!!!!! "

طالعتني أمي بصدمه وقالت " أنتي بنتنا وشو فيك وعد ايش تقولين !!! "

حسيت بقهر وقلت " سمعت كل شيء عرفت ليش ما تعاملوني مثل خواتي لأني مب بنتكم !!!!!!!! كنت أحس أني غير وأقول لا أكيد أنا أتخيل هذولي أهلي مستحيل يظلموني كنت أتمنى بس رضاكم أشوف تعاملك أنتي يما غيري معي ايه غير بس كنت أقول هذي أمي أمييييييييييي !!!! "

حسيت بالدنيا تسود في عيني وقلت من قلب " حسبي الله عليكم تعيشوني بكذبه طول عمري لييييييييييش طيب ليييييييييش أنا كنت أشوف نفسي بنتكم كنت أشوف فيكم أحسن الناس ماأرضى فيكم كنت بس أبي رضاكم بس ما طلعتم أهلي أنتم ما أعرفكم أنتم مب أهليييييييييييييييييييييييييييييييييييييييي !!! "

قاطعني أبوي بعصبيه وقال " ايه منت بنتنا أنتي بنت من الشارع ما ندري أصلها من فصلها !!! اسمعيني هالكلام ما يطلع لتركي منب مستعد يهون الرجال راح تتزوجينه وبتفكينا وما فرق سواء كنتي بنتنا ولا لا بالعكس استانسي أني ضافك في بيتي وأنتي مب بنتي !!!!!! "

قلت بقهر " حسبي الله عليك حسبي الله عليك وربي ما أسامحك وربيييييييييي ما أسامحك .. !!! عيشتني بكذبه " والتفت لأمي وقلت بقهر " تدرين أنا متحسفه على كل مره ناديتك فيها بأمي بيما بأي شيء لأنك ما تستاهلين !!!!!! حسبي الله عليكم وربي ما راح أسامحكم "

ورحت بقهر لغرفتي أخذت العبايه ولبستها وبقهر طلعت من البيت كنت أسمع صوت اللي اسمها أمي تناديني بخوف واللي اسمه أبوي يصرخ لكن ما اهتميت كنت أبي أطلع أبي أروح وبس الوقت متآخر ما يهمني .. !!!!!!!!!!!!!!!




// × // // × // // × // // × //




ما عرفت ردة فعلها حاولت أسأل ألمح لكن ما تجرأت خاصه أن أبوي محذرني أذكر ندى مهما صار وأني أنساها ألحين لين تنتهي فترة زواجي من " نجد " هالإسم اللي صار سبب في همي وضيقي صرت أنطقه كثير وفي كل مره أحس بالضيق يجي معه مب من الإسم لا بالله منها هي !!!!

تذكرت مكالمة فيصل وربي مرات أحسه إنسان فاضي يبي يراقب شخص يشتغل عندهم في الشركه ويقول أنه شاك فيه ومب مرتاح له .. !!! الله بس يعيين ويسهل .. !!!



// × // // × // // × // // × //



كنت جالس في المستشفى وأنتظر .. الوقت يمشي الدقائق تمشي الثواني تمشي ولا جديد .. تذكرت كلام أبوفيصل وأنا كنت مقرر من بكره أرجع الدوام وأبومالك الله يرحمه وأختي ربي يشفيها وتصحى وترجع .. !!

بس كنت أبي أقابل عبدالرحمن واسأله وش صار بالتحقيق وبعد عمر لي فتره عنه وهو من عرف اللي صار عزاني ولا عاد أتصل أكيد أنه ما يبي يزعجني بس أنا وعدته ولازم ألحين أوفي بوعدي له وأجيب شغل لخاله .. !!!



// × // // × // // × // // × //




رجعت وأنا حاسه بضيق .. بس درت في الحاره ورجعت ما أدري أحس أفكاري متشتته .. ما كنت عارفه أحس أني بحلم أكيييييييد أني بحلم مستحيل اللي يصير مستحيل أتقبله !!!

كيف أعيش طول هذي السنوات مع ناس مب أهلي ولا حسيت !!! مع كل تصرفاتهم وأنهم ما يعاملوني مثل خواتي بس ما جاء في بالي أنهم مب أهلي !!! يعني معقوله ساره والبتول ومها مب خواتي !!! اللي عشت معهم ونمت بينهم مب خواتي ما يصيرون لي .. !!!!

طلعت من أفكاري على صوته اللي يتسمى أبوي وهو معصب كان يطالعني ويقول " اسمعيني أنا هالمره بسكت لك لكن من اليوم ما لك طلعه من هذا البيت !!! انتي بتتزوجين تركي وبعدها خلاص ما لي دخل فيك !!! ولاتظنين لأنك مب بنتي بتتصرفين على كيفك لا أنتي شايله اسمي وأنا مسئول عنك ولا تفكرين تطلعين برا هذا البيت بدون أذني !!! "

سكت كان بخاطري أصرخ فيه وأقول " أنت وش دخلك مب أبوي !!! " بس سكت وباستسلام رحت لغرفتي رميت نفسي في الفراش وأنا أحس بالضيق كنت أبي أنام يمكن أقوم ويطلع حلم وكله كذب !!!!

بس حسيت في أحد دخل التفت ولقيتها البتول !!! حسيت بالخوف شلون أعاملها هي مب أختي خلاص معقوله كانت تعرف كل شيء وساكته وطلعتني من أفكاري وهي تقول " وعد وش صاير ليش أبوي معصب عليك أنا حاولت أعرف السالفه بس ما أحد قال لي !!! "

قلت بضيق " البتول أنتي تدرين أني مب أختك !!! "
البتول قالت بدون اهتمام " شكلك فاضيه وشو تحسين به !! كيف مب أختي "
قلت باستسلام " ايه يالبتول أنا من الشارع سمعت أبوي يقول كذا يقول ما أعرف أصلي من فصلي "

شفت البتول تطالعني وقالت " وعد وشو تحسين فيه تستهبلين كذا صدق أنك فاضيه !!! "
لكني قلت " وربي يالبتول ما أمزح هذا كلام أبوي " وكملت وأنا أحس الدموع بتنزل فيني " تخيلي يالبتول أنا مب أختكم أنا اللي عشت وفرحت معكم وكنا نلعب وحنا صغار وكل حياتنا كانت كذب !!!!!! أنا مب أختكم أنا ما لي أهل .. !!!!!!!!!!!!!!!!!!! "

طالعتني البتول ما عرفت ايش تفكر فيه ثم شوي طلعت من الغرفه بدون لا تكلمني مدري خسرتها خلاص انتهت حياتي هنا شكلي بتزوج تركي وخلاص أعيش معه وأنساهم واسمي بس يظل مرتبط فيهم ... !!!!!!!!!!!!!!!!!!!


// × // // × // // × // // × //