يسلمو احلامي كبيره و
Tbasms
على الرد
وهذا بارت طويل اختم فيه روايتي
&&&&&&&&&&&&&&&
شامخة وبنت رجال وجاء من يغلبني
&&&&&&&&&&&&&&
البارت العشرون و الأخير
&&&&&&&&&&&&&&&&&
لحظات حاسمه
&&&&&&&&&&&&&
توجه للمحكمه بعد ما مر مكتبه وخذا الأوراق اللازمه وقبل ما يطلع سمع السكرتير يناديه:أستاذ فيصل
فيصل:نعم في شي
السكرتير يمد أوراق
فيصل استغرب:وش ذا
السكرتير :هذي الأوراق عطتني إياها الانسه حنين اللي قضيتها اليوم وطلبت مني أعطيك إياها قبل ما تروح المحكمه
خذا فيصل الأوراق وفتحها وشافها تقارير من المستشفى تبين ان حنين تعرضت للضرب
تذكر مره لما طلب منها تروح مستشفى تسوي تقرير وهي رفضت
فيصل ابتسم:يعني سمعت الكلام زين سوت هذي راح تفيدني كثير
وراح المحكمه ودخل ولقى عساف موجود ومبين انه حاقد ونظراته كلها شر
واجهه فيصل بنظرات الجمود والشموخ وبدأت القضيه (ورفعت الجلسه)
واستمرت القضيه ساعتين تعرض فيها الدلائل والأوراق
&&&&&&&&&&&&&&&&&&
في مكان ثاني كانت اللحظات حاسمه بس لحظات بين القلوب
&&&&&&&&&&&&&&&
ظلت تطالع يده الممدوده وهي مو عارفه تصافحها وتبدأ من جديد ولا لا
تخاف تصافحه ويخذلها وتخاف ما تمد يدها وتخسره وهو اكبر فرصه لها
مسكت سلسالها وتذكرت كلام كانت تقولها لها أمها
ندى:كل شي ممكن يخون ويكذب إلا القلب ودقاته ولغة العيون عمر الواحد ما يقدر يكذبهم لأنها تفضح الواحد بدون ما يتكلم
طالعت الجوهره عيونه ما شافت إلا الصدق وسمعت لصوت قلبها اللي أول مره ينبض بها الشكل ومدت يدها وصافحته
طلال ضم يديها بين يديه:عمرك ما راح تندمين
الجوهره بهمس:اتمنى ما تخذلني
طلال:أموت ولا أخذلك ومن هاللحظه نبدأ من جديد
الجوهره هزت راسها وعلى وجهها ابتسامه خفيفه
بعدت عنه لما فتحت الباب ميري وركبت هي ونواف ونايف وريان
حركوا وانرسم في هالمكان بدايه جديده وان شاء الله تكون سعيده
&&&&&&&&&&&&&&&&
قاعد في مكانه ما يدري من متى وهو على هالوضع
حس ان في احد في المكان رفع رأسه وشاف عياله يطالعونه رجع نزل رأسه مره ثانيه
تقدمت منه ونزلت لرجوله وبهمس:يبه
ابو خالد رفع رأسه
سحر:يبه آسفين حقك علينا غلطنا بحقك كثير يبه السموحه ...وباست رأسه
ابو خالد باس رأس بنته:أنتوا اللي سامحوني بديت الغريبه عليكم بغيت أزوجكم ناس ما اعرف لهم أصل ولا فصل علشان أرضيها
سحر:يبه انا أسفه لاني زوجت
عبير من غير رضاك بس يبه...وسكتت ما عرفت وش تقول
ابو خالد يطالعها ويطالع خالد اللي واقف بعيد:مو وقته
سحر سكتت ولفت وجهها تطالع خالد وتأشر له يجي
خالد جاء ونزل لرجول ابوه :أسف يا يبه
ابو خالد:انا اللي اعذروني انا...وسكت
سحر برجاء:يبه رجع أمي وخلنا نبدأ من جديد
ابو خالد بعد صمت ثواني قليله:وتظنين أمك بترضى ترجع
سحر ابتسمت :أكيد يبه بترضى انا متأكده
ابو خالد هز رأسه وخالد وسحر طالعوا بعض بفرحه
&&&&&&&&&&&&&&&&
في بيت متواضع
أم حنين بقلق:أقول يمه ما كأن فيصل تأخر وما علمنا وش صار معاه
حنين:لا يمه الجلسه تأخذ وقت
حنان وهي ماسكه روئ:الله يعين والله إني خايفه
أم حنين بعد فتره:خلاص ما عاد فيني صبر
حنين:يايمه اصبري وان شاء لله احنا كسبانين وكل الأوراق تثبت هالشي
وسمعوا طق على الباب وقفت حنين:انا بفتح
راحت وفتحت الباب وأول ما فتحته ظلت تطالع الواقف عند الباب وما تدري وش هالشعور اللي اجتاحها إحساس أول مره تحسه ما تدري ليه خلال هاليومين اللي ما جاهم فيها حست بفقدان شي حست انها طولت وهي تطالع فيه نزلت عيونها وقالت بهمس:الحمد لله على السلامه
&&&&&&&&&&&&&&
وصل عن باب بيتهم وطق الباب وتمنى ان هي اللي تفتح الباب وفعلا هي اللي فتحت له الباب وظل يطالعها هو صحيح المفروض ما يبحلق فيها كذا بس ما ينلام هو مشتاق كثير لها و للهواش معاها بس أستغرب انها تطالعه عن غير العاده لأنه دائما تطالعه بكره بس هالمره غير ولما شافها تنزل عيونها سمعها تقول:الحمد لله على السلامه
فيصل بهدوء:الله يسلمك
حنين:وصلتك الأوراق اللي تركتها عند سكرتيرك
فيصل:ايه وزين ما سويتي
حنين بخوف:وش صار ان شاء الله كسبنا
فيصل بابتسامه:الحمد لله
حنين بعدم تصديق:يعني....
فيصل:كسبتوها
حنين من غير شعور صارت تناقز ودخلت جري وهي تصرخ:كسبناها ...كسبناها يا يمه
أم حنين وهي تمسح دموعها:الحمد لله اللهم لك الحمد
حنين وحنان يحضنون بعض والدموع في عيونهم:كسبناها افتكينا منه الحمد لله
أم حنين:يمه حنين وين فيصل
حنين توها تتذكر:يو يمه تركته برا
أم حنين:دخليه يايمه ما يصير يظل برا
حنين:ان شاء الله
راحت له والفرحه بعيونها :أسفه نسيتك تفضل
فيصل ابتسم لأنه أول مره يشوفها فرحانه دخل وباس رأس أم حنين: أخبارك يا خالتي وش علومك
أم حنين:بخير جعلك بخير والله يا وليدي ما ادري وشلون أشكرك والله ما نطلع من جزاك
فيصل:وش هالكلام احنا حسبت أهل والأهل ما بينهم جمايل ابد
أم حنين هزت راسها وسكتت
وظل يسولف مع أم حنين ويقول لها وش صار بالجلسه أما حنان وحنين طلعوا وتركوا امهم معاه
&&&&&&&&&&&&&&&
وصلت سياره من السيارات الثلاث إلى البيت الكبير
طلال:يله وصلنا
نزلت ميري ومعاها نوف وريان أما نايف كان نايم
الجوهره وهي تنزل شافت طلال يفتح الباب ويشيل نايف
الجوهره جاته:هاته انا بأخذه
خذت نايف ويدها لامست يده ارتعشت بس ما حبت تبين
وطلال ابتسم لأنه مستحيل تفوته رعشتها
الجوهره وهي تلف بتدخل البيت:يله مع السلامه
طلال:الجوهره
لفت له:نعم
طلال يمد يده بكرت فيه رقمه:أخذيه وخزني الرقم عندك وأتمنى مكالمتي لك ما تزعجك
الجوهره:لا ابد ماله داعي رقمك عندي
طلال وهو يبتسم لها:يعني ما مسحتيه
الجوهره وهي توخر عيونها عنه وتحس بإحراج:لا
طلال:ليه
الجوهره :احم...ما فضيت ولا كان مسحته
طلال وفيه الضحكه على عذرها:اوكي يله روحي ادخلي وانا بستنى لحد ما تدخلين البيت
الجوهره:طيب
وراحت وهو ظل واقف حتى بعدما دخلت لأنه سرح بخياله لبعيد لعالم ثاني عالم هو متشوق له ويتمنى يصير على ارض الواقع مع من ملك قلبه
&&&&&&&&&&&&&&
رجع لبيتهم وهو مبسط ومروق و يغني ودخل الصاله ولقى أمه وخواته
جلس جنب أمه وباس راسها:أخبارك يالغاليه
أم فيصل:بخير يا نظر عيوني انت متى رجعت من سفرتك
فيصل:اليوم ورحت المحكمه كان عندي قضيه
شهد بسرعه:شكلك كسبتها يعني بنشوفها
أم فيصل:من تقصدين
فيصل:هههه ما يفوتك شي ما شاء الله عليك
شهد:لا طبعا شي يخص فصفص ويفوتني
أم فيصل:والله أحس إني ماني فاهمه شي
شوق اللي توها تفهم:اها ..يمه يقصدون قضية البنت اللي بيخطبها فيصل
شهد طالعتها وتأشر لها وشوق صارت ترقع:قصدي هم يقصدون قضية صديقتي حنين اللي قلت لك عنها اللي فيصل يبغى يخطبها
أم فيصل تذكرت:ايه عسى بس ربحوا القضيه
فيصل:ايه ربحوها والحمد لله وآنا قلت لزوج امهم انه يطلقها
شهد بلقافه:وش رد عليك
فيصل:قال لي لا وآنا هددته لو ما طلقها راح أقدم أوراق تثبت انه كان يطق البنات وراح تزيد عقوبته فوافق يطلقها
شهد:عاش اخوي يا سلام أثريك بطل وإحنا ما ندري
شوق:فديت اخوي طول عمره تكانه
فيصل:ومن وين جايبه ذا الكلمه تكانه
شوق تفشلت:ها...من التلفزيون
شهد تطالع شوق بنص عين:من التلفزيون ها ولا من ....وتقلد شوق بحالميه:اسومي
شوق تأخذ المخده وتضربها
وفيصل وأمه يضحكون عليهم
فيصل بجديه:يمه بروحين تخطبينها
أم فيصل:أكيد يا وليدي وبكلم أبوك اليوم بالموضوع
فيصل:وأبوي بيوافق
أم فيصل:اتركه لي بس هي مالها أخوا ولا عم ولا خال ولا ولي أمر
فيصل:لها عم بحاول أجيب رقمه والله يسهل
أم فيصل:بإذن الله
&&&&&&&&&&&&
دخل الشركه وزي عادته بدون ما يطق الباب:السلام عليكم
حمد وهو يوقف له ويسلم عليه:هلا وغلا ومسهلا والله
طلال:يالله هالكثر مشتاق لي
حمد:أكيد لك وحشه ومشتاق لك أكثر وأنت قاعد وراء مكتبك وما خذ شوي من الشغل اللي كسر ظهري
طلال:ههههه ايه قول علشان أشيل عنك الشغل وحمله مو علشان خشتي
حمد:ههههه يعني ما تعرفني
طلال:قلي أخبارك
حمد:كل شي تمام انت اللي قلي وش صار معاك
طلال سكت والفرحه مبينه عليه
حمد:عسى قدرت تكسر القاعده عند بنت العم
طلال:كسرت جزء والجزء الثاني ان شاء الله قريب تدري يا حمد بها السفره قطعت شوط طويييييل
حمد:يعني الأمور تمام
طلال وهو يضحك:إلا عال العال
حمد:الحمد لله هذا أهم شي
وظلوا يسولفون وحمد كل شوي يذكر طلال ويتوعد فيه انه يأخذ أجازه ويرمي كل الشغل عليه ويرد له حركته وطلال يضحك
&&&&&&&&&&&&&&
في مكان النقاش فيه حاد
ابو فيصل:وش هالكلام يا أم فيصل انا اخذ لولدي ذي
أم فيصل:وشو ذي البنت بنت ناس وعالم
ابو فيصل:بس أبوها فقير و هم مو من مستوانا
أم فيصل:يا ابو فيصل الولد يبيها وهو مختارها بنفسه وبنتك شوق تعرفها وتمدح فيها وفي اهلها
ابو فيصل:ولو
أم فيصل:يا ابو فيصل لا تنسى انك كنت في يوم في مكانه تذكر يوم تجي وتبغى تخطبني وأبوك كان رافض وش سويت ذا الوقت ها
ابو فيصل:زمان أول غير عن زمان الحين
أم فيصل:زمان أول ما تغير
ابو فيصل سكت وما رد
أم فيصل :يا حبيبي احنا ما عندنا إلا فيصل هو ولدنا الوحيد على بنتين وهو يبغى البنت وشاريها وإحنا ما نبغى نكسر بخاطره وهو عمره ما كسر بخاطر احد منا
ابو فيصل:بس...
أم فيصل:لا بس ولا هم يحزنون إذا كان لي خاطر عندك قول تم وانك راضي وخلنا نفرح
ابو فيصل وهو يطالع أم فيصل:وش أقول بعد ما اقدر أقول لا واكسر بخاطرك وبخاطره خلاص اللي تشوفونه بس لو شفتي على البنت شي...
أم فيصل تقاطعه:من غير ما تقول على طول نهون عنها
ابو فيصل هز رأسه
أم فيصل:يا بعد عمري لا خلا وعدم ان شاء الله
&&&&&&&&&&&&&
طقت الباب وفتحت لها نوره ودخلت وشافت زيد و ساره قاعدين في الصاله
زيد وهو شاق الحلق:هلا والله
ساره تضربه على رأسه:وجع زويد بس انا اللي أرحب فيها....وتشق الحلق هي بعد:يا هلا وغلا حياس
سحر:انا جايه أقول لكم مشكورين على كل شي
الكل ساكت مستنينها تكمل
سحر:انا خلاص برجع بيتنا
نوره:اهلك رجعوا بيتهم
سحر:ايه
زيد:لا حرام توس جايه تروحين يوم عاد قلت لربعي ان في بنت مزيونه عندنا وتعرف اسمي تتركينا وتهجين
سحر ابتسمت له
ساره:والله ما بعد شبعنا من شوفتس
سحر:والله ما ادري وش أقول مشكورين انتم استضفتوني وما حسستوني إني غريبه ابد والله إني اعتبركم خواتي اللي ما جابتها أمي
نوره اللي حضنتها وهي متاثره:افا عليس لا تقولين عن نفسس غريبه تراك غاليه علينا
ساره تقوم وتحضنهم وتكمل الفلم الهندي:يا عمري عليس يا سحور والله استأنست يوم قلتي انس بتنامين عندنا
سحر بعدت عنهم:احنا راح نشوف بعض في الشغل كل يوم انا ألغيت إجازتي
سار:ايه كذا أحسن هجل بشوفس بكره
سحر:ان شاء الله
زيد:طيب انتم بتشوفون بعض بس انا وشلون أكحل عيني بشوفتس
ساره:لا يا شيخ شكلك اندمجت مع الفلم الهندي اللي نسويه
زيد بهبل:ايه حتى إني تخيلت نفسي شاروخان
الكل:ههههههههه هههه
ودعتهم وطلعت منهم وهي مقرره ما تتخلي عنهم مهما صار لأنه نادر في هالزمن تلقى صديقات مثلهم و خوات دنيا مثلهم
&&&&&&&&&&&&
في البيت المتواضع
أم حنين وهي قاعده مع بناتها وماسكه الورقه:أخيرا ارتحنا
حنين وحنان يطالون بعض ومبسوطين
حنان:افتكينا منه ومن الشحاذه و الطراره وما عاد له علاقه فينا اووووووووف
حنين:ايه والله خلاص ارتحنا منه للأبد ما راح نشوف خشته مره ثانيه
روئ:احثن عثاف يع
الكل:ههههههههه
أم حنين:حنين يمه ترى فيصل كلمني في موضوع خطبتكم وقال انه بيروح لعمك و يخطبك منه
حنين:ما لقى إلا عمي هذا أكيد بيخرب كل شي
حنان وام حنين:ههههههههههه
حنين باستغراب:وش فيكم تضحكون
أم حنين:مو مقتنعه
حنان:ما أطيقه وين كلامك
حنين انحرجت وبتبرير:هو ... أصلا
أم حنين:ما قلت لك غزاه الحب ههههههه
حنين ابتسمت لامها ونزلت عيونها من الإحراج
حنان بهمس:يعني ما تفكرين بفلوسه
حنين بجرأه وهي ترد بهمس:بعد كل اللي سواه معانا ما عاد أفكر إلا فيه هو وبس
حنان:يا عيني
حنين تضرب كتف أختها ووجها احمر
حنان:ههههه بس يمه مو المفروض كل شي بعد انتهاء عدتك
أم حنين :انا قلت يجيب أهله ويملكون وما عليهم مني
حنين:بس..
أم حنين تقاطعها:لا بس ولا غيره خلي الفرحه تدخل قلوبنا ونفرح من زمان ما فرحنا
حنان وهي تطالع حنين:ايه والله عاد فيه ناس من الحين بدو يرجفون ما ادري من الحماس ولا من الخوف
حنين تضربها:صدق انك نذله وراعية شماته
حنان:ههههههههههه
أم حنين:الله يديم علينا السعاده
الكل:اميييييين
&&&&&&&&&&&&&&&&
جاء وقت الاختبارات
&&&&&&&&&&&
الكل مشغول بمذاكره عدا دلول اللي مفحطه بالامتحان لأنها دائما تكلم ماجد اللي ينصحها تذاكر وهو اللي يكلمها ويشغلها عن المذاكره وبدل ما يصير عون صار فرعون
أما الجوهره فكانت تذاكر بجهد وصارت تكلم طلال اللي تعودت عليه وصارت ارق معاه وبدت تميل له وبدت تحس فعلا انها ممكن تعتمد عليه وهي معزمه فعلا تبدأ معاه من جديد
عائلة ابو فيصل خطبوا حنين وام فيصل وشوق وشهد عجبوهم أهل حنين لطيبتهم وحبوهم كثير وصارت الملكه بدون معازيم علشان أم حنين بالعده بعد طلاقها من عساف
سحر وأمها وخالد رجعوا البيت واجتمعوا مره ثانيه إلا عبير اللي ما رضى ابو خالد يسامحها لأنها متزوجه عبدالمجيد ولد سالم أخوه اللي يكرهه وطلب محد يفتح معاه موضوع عبير مره ثانيه
طلال مشغول مع حمد في الشغل بالشركه ويكلم الجوهره بس قليل علشان ما يشغلها عن مذاكرتها وكل ما يكلمها يغيب في عالم العشق الحب والهيام ويحس انه يملك الدنيا لأنه ملك قلب مو أي احد يقدر يملكه
تركي:تقدم لسحر ووافقوا وتملك بس سحر زعلانه لان عبير ما قدرت تحضر ولا الجوهره بس بنات عمها فيصل هم اللي حضروا ومع كذا مبسوطه لان تركي هو اللي ملك حياتها وعمرها صار زوجها سوو ملكه متواضعه وسووها أيام الامتحانات لان تركي رفض التأجيل على قولته خير البر عاجله
&&&&&&&&&&&&&&&
بعد أسبوعين خلصت الامتحانات اللي كانت سريعه وسهله على البعض ومقرفه وتجيب المرض للغير
جالسات على النت
دلول:ها رسبت..ولا نجحت..ولا حملت ماده
الجوهره بملل:أوف منك اصبري خليني أشوف
وبعد فتره:ايه هذي أنتي نجحتي بس بجيد
دلول بفرحه:جيد جيد أهم شي نجحنا
الجوهره وهي تدور اسمها:الجوهره سالم ..الجوهره سال..ايه لقيته ..و بصرخه:نجحت
دلول:وش تقديرك
الجوهره:ممتاز
دلول:ول عليك يالمصريه يا مفتحه باللبن مو انا المهويه ما ادري عن هواء الدراسه
الجوهره:يله ننزل نبشر اللي تحت
نزلوا
أم عبدالمجيد:ها بشروا
الجوهره:نجحنا وآنا جبت ممتاز
أم عبدالمجيد والكل:ألف مبروك
ماجد:ها دلول وش سويتي
أم دلول:أكيد مغرزه
دلول وهي شاقه الحلق:لا يمه نجحت
أم دلول:وش جبتي
دلول تورطت:ها...ايه ..جبت... وبصوت واطي:جيد
أم دلول:انا قايله
دلول:يمه أهم شي إني نجحت
ماجد:والله كان ودي تجيبين أحسن من كذا
أم دلول:وين تجيب أحسن وأنت مطيح معها مكالمات 24 ساعه
ماجد تفشل هو ودلول أما أم عبدالمجيد والجوهره ماتوا ضحك
رن جوالها شافت الاسم واستأذنت وقامت
الجوهره:الو
طلال:أحلى الو اسمعها بحياتي
الجوهره بابتسامه خجوله وإحساس التوتر اللي تعرفت عليه من يوم
عرفت طلال:تسلم
طلال:مبروووووووك
الجوهره:على ايش
طلال:على النجوح والله تستأهلين أحلى هديه
الجوهره هي متفاجاه:شلون عرفت
طلال:أي شي يخص قلبي لازم اعرفه
الجوهره سكتت وما كان عندها رد
طلال وهو يبتسم:هديتك موجوده
الجوهره وهي مبسوطه وتطالع الخاتم اللي بيدها والسلسال اللي برقبتها جنب سلسال أمها:وش هي
طلال:إذا شفتك عطيتك إياها
الجوهره:طيب
طلال:ما اشتقتي لي يا جوهرتي
الجوهره باستغراب:جوهرتك
طلال:ايه جوهرتي وأغلى ما في حياتي حتى أغلى من روحي علي
الجوهره ساكته
طلال وهو يتنهد:ما توقعت إني في يوم بقدر أكلمك أو أوصل لك
الجوهره:ليه
طلال:لأنك قافله على قلبك بصندوق من زجاج والمفتاح ما ادري وينه بس بعد ما لقيت المفتاح وفتحته قدرت أكسبك
الجوهره:لها الدرجه
طلال:وأكثر أنتي روحي يا جوهرتي روحي اللي لا غابت عني أموت
الجوهره بضيق:لا تجيب سيرت الموت
طلال حب يغير الموضوع لأنها تضايقت:طيب ما قلتي لي ما اشتقتي لي
الجوهره سكتت وما عرفت وش ترد
بس في داخلها كان قلبها يدق مع كل كلمه يقولها طلال ما تدري كيف بدت تحس بشي عمرها ما حست به من قبل إحساس حبته مع انها أنكرته في البداية بس حب طلال خلا كل فيها يتغير وتشوف أشياء كثير بطريقه مختلفه
&&&&&&&&&&&&&&
في مكان يصرخ بالفساد والموسيقى
جالس مع صديقه وسط الخمر والمنكرات
سعد:انت ما قلت انك تسامحت من أبوك
خالد:إلا
سعد:انا فكرتك تبت من هالاشياء
خالد:اترك كل شي إلا المزاج ما راح اتركه أصلا الحركتين اللي سويتهم لأبوي علشان فلوسه اللي قاعده على قلبه ما أنحرم منها
سعد:ههههههههه انا قايل خالد ما في من وراه رجاء
خالد وهو يطالع البنت اللي جايتهم:جاء القمر
سعد:لحد الحين حظك يكسر الصخر
خالد:لا تنظلني
سعد:هههه لا ما راح أنظلك عيني بارده
قا خالد مع البنت ودخل وحده من الغرف
&&&&
بعد ساعتين
&&&&&&
سمعوا صوت الباب ينكسر واختلط صوت الصراخ مع صوت الموسيقى
&&&&&&&&&&&&&&&
في البيت الكبير
قاعدين والضحك واصل لأخر بيت بشارعهم
رن جواله شاف الرقم غريب بس رد:الو – ايه معاك من معي – من
قام من مكانه وبعد عن الباقين:ايه اعرفه خير وش صاير
بتفاجأ:ايش – طيب مشكور...سكر وهو يردد:لا حول ولا قوة إلا بالله
سمع صوتها والتفت لها
عبير بابتسامه:حبيبي وين رحت
عبدالمجيد يطالعها بجمود وما رد
عبير وابتسامتها اختفت وبخوف:وش فيك صاير شي
عبدالمجيد وهو يمسك يديها بين يديه:عظم الله أجرك
عبير بخوف وصراخ:في مين....
&&&&&&&&&&&&&&&
قاعده مع أمها عند التلفزيون
رن جوالها وقامت ترد والابتسامة مرسومه على وجهها:هلا
تركي:آهلين حبي أخبارك
سحر:الحمد لله وأنت
تركي:زين
سحر حست ان في شي:تركي وش في صوتك مو عاجبني
تركي بتردد:سحر....وسكت
سحر بخوف:تركي وش صاير تراك خوفتني
تركي:عظم الله أجرك
سحر اللي جلست على الكرسي لان رجولها ما عاد قدرت تشيلها وهي ترجف وخايفه :في مين..
&&&&&&&&&&&&&&&
هذه الدنيا تأخذ ناس وتحضر ناس
نحن فيها كمن يسكن فندق نأتي وبعدها نرحل
لكن الفرق اننا لا نأخذ شي إلا أعمالنا
أعمالنا وما زرعت أيدينا
و كلا وزرعه سوف يحصده
&&&&&&&&&&&&&
خيم الحزن على الكل وانتشر خبر وفاة خالد
خالد الشاب اللي كان الكل يكرهه أو يبغض تصرفاته
خالد الشاب اللي ما لقى الاهتمام في صغره وصار من الصعب التعامل معاه في كبره
خالد الشاب اللي ضاع شبابه في الفساد وما جاب إلا السمعه السيئه لأهله
خالد الشاب اللي خسر كل شي من ضمنها الفلوس اللي كان دائما يركض لها والاهم من هذا كله خسر حياته اللي أفناها في الضياع ومعصية الخالق
مهما صار الدم ما يصير ماء حضر عزاه الكل الجوهره وام عبدالمجيد وام دلول والكل وعبير من ضمنهم الكل حزن عليه
أم خالد موت ولدها صحاها من غفلتها وعرفت ان البني ادم فاني والواحد ما يركض وراء وسخ الدنيا
ابو خالد سامح عبير واعتذر من عيال أخوه سالم بعد ما شاف وقفتهم معاه بالعزاء وقيامهم بكل أمور العزاء والدفن وبدا ابو خالد يحس بالندم والحسره على معاملته لآخوه سالم رحمة الله عليه ونكرانه له ولعياله
&&&&&&&&&&&&&&&
بعد شهر
المعاريس ما سوو عرس علشان حزن ابو خالد وام خالد واضطروا يسوون عرس بسيط في استراحه وفي البداية عارض اسامه بس علشان خاطر شوق رضى بالحفله البسيطه وعلشان مقدر حزن عايلتها
الجوهره – دلال – حنين – شوق - سحر
طلال – ماجد – فيصل – اسامه – تركي 
23-02-11, 11:15 PM
جديد مواضيع قسم القصص المكتمله من وحي قلم الاعضاء
العرض العادي
