لمشاكل التسجيل ودخول المنتدى يرجى مراسلتنا على الايميل liilasvb3@gmail.com






العودة   منتديات ليلاس > القصص والروايات > قصص من وحي قلم الاعضاء > القصص المكتمله من وحي قلم الاعضاء
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله من وحي قلم الاعضاء القصص المكتمله من وحي قلم الاعضاء


إضافة رد
نسخ الرابط
نسخ للمنتديات
 
LinkBack (1) أدوات الموضوع انواع عرض الموضوع
قديم 20-02-11, 07:45 AM   المشاركة رقم: 101
المعلومات
الكاتب:
اللقب:

البيانات
التسجيل: Jul 2010
العضوية: 178488
المشاركات: 77
الجنس أنثى
معدل التقييم: جينان عضو بحاجه الى تحسين وضعه
نقاط التقييم: 31

االدولة
البلدSaudiArabia
 
مدونتي

 

الإتصالات
الحالة:
جينان غير متواجد حالياً
وسائل الإتصال:

كاتب الموضوع : جينان المنتدى : القصص المكتمله من وحي قلم الاعضاء
افتراضي

 


&&&&&&&&&&&&&&
شامخة وبنت رجال وجاء من يغلبني
&&&&&&&&&&&&&&&
البارت الثامن عشر
&&&&&&&&&&&&&&&&

سمعت صوت صراخ وهواش وضرب طلعت الصاله وتفاجات من المنظرشافت ساره تتصارع من ولد صغير و دبدوب ونوره قاعده قدام التلفزيون وتأكل فشار ولا همها
ساره:والله لأوريك يالخايس
الولد:انا أعلمك وآنا ولد أبوي
ووقف لما جات عيونه على سحر
الولد:من ذي
نوره اللي تتابع التلفزيون انتبهت لهم:صحيتي
ساره تركت الولد وبابتسامه:صح النوم يا قميل
سحر باستغراب:وش تسوون
الولد:يا ويلي من هالمزيونه
ساره تطقه على رأسه:وجع يوجعك يا قليل الحياء
الولد بلقافه:من أنتي
سحر:أكيد انت زيد
زيد وهو شاق الحلق ونص الضروس طايحه ونصحها مأكلها السوس من كثر البلع:يا ويلي ويلاه انا تعرف اسمي بنت صاروخ مثلس يالله توني ادري إني مشهور
نوره:الحمد لله والشكر من زين الوجه تنشهر
زيد:لا تكفين بموت عليس يا اليسا
ساره وهي تضربه على رأسه مره ثانيه:زويد احترم نفسك لا أدوس ببطنك
زيد:هذا اللي ناقص سوير تدوس ببطن زيد رجال البيت
سحر تجي وتجلس جنب نوره:وهذي كله تتهاوش
نوره:تعرفين سوير لو ما تهاوش احد تهاوش نفسها
ساره وهي تمسك زيد:انا أعلمك ان ما سويت لك حركت انترتيكر ما أكون سوير بنت مهاوش
زيد:روحي زين انا بعلمك والله لأربيك بحركة جون سينا...ويركب على الكنب
وصاروا يتصارعون ويتعافسون
سحر:شوفيهم بيذبحون بعض
نوره وهي تتابع التلفزيون:يا شيخه هذول قطاوه ما ينخاف عليهم كله دقايق وتلقينهم يضحكون ولا يسولفون أنتي بس تابعي الفلم واكلي فشار
وفعلا ما مر ربع ساعه إلا زيد و ساره قاعدين على الكنب وهم تعبانين من الهوشه مع بعض
زيد وهو يضحك بضروسه الطايحه:وش اسم القمر
سحر:اسمي سحر
زيد وهو يحرك حواجبه:والله اسم على مسمى سحر وأنتي والله سحر
سار:زويد لا تخليني أصفقك من جديد
زيد مطنش:انا اعرفس بنفسي معاس زيد مهاوش والرقم..... 050248
سحر:ههههههههههه
زيد:يا ويلي على الضحكه اللي تقول نغمه موسيقيه
نوره بعصبيه:زويد استح على وجهك لاجي أعلمك الأدب
زيد وهو يلف على التلفزيون:اووووف منكم حرام الواحد يعبر عن إعجابه يا ناس
سحر:الحين هو اخو من فيكم
نوره:اخو سوير بس انا اعتبره اخوي انا بعد
سحر:اها تصدقين فيه شبه من ساره
نوره:ايه صح في الهبال
سحر:ههههه حرام عليك والله يجنن
زيد اللي انتبه لأنه من البداية قاط إذنه:يا لبى قلبس والله أنتي اللي تجننين يا قمر
سحر:ههههههههه
نوره:زويد قاط إذنك جعلها القطع
ساره:هيه لا تدعين على اخوي بس انا ادعي عليه عادي بس غيري لا
زيد:ايه صح بس ساره تدعي علي لأنها أختي وتصير لي
سحر تحاول تكتم ضحكتها:ههههههههه
نوره:الحمد لله والشكر مالت عليس وعلى ذا الدب اللي معاس
زيد:انا دب بس اجنن...ويلتفت لسحر:صح
سحر بضحكه:صح
نوره: إلا دب قطبي ابو شعر تلوع الكبد
زيد:ذا الدب بيجي الحين يجلس عليس وتموتين
ساره:ههههههههههههههههه
زيد وهو مستغرب:وش يضحكس
ساره:تخيلت انك تقعد عليها ونوره تطلع عيونها
زيد: سخيفه وغبيه وتخيلس مثل وجهس
سحر ونوره :ههههه ههههههههه
ساره تفشلت وعصبت:انا أعلمك منو الغبي
ورجعوا يتعافسون ويتصارعون مره ثانيه

&&&&&&&&&&&&&&&

بعد ما ناموا إخوانها حست النوم مجافيها قامت ولفت الحجاب على راسها وحطت الشال على كتفها ونزلت تحت وطلعت للبحر وصارت تمشي وهي سرحانه وكانت في ثلاث عيون تطالعها
حست بحركه وراها لفت وتفاجات من اللي شافته
الجوهره وبعصبيه:انت

خالد :ليه متوقعه احد ثاني
الجوهره:وش جابك هنا
خالد :جاي اشوفك
الجوهره رجعت على وراء لا إراديا وكلها حذر:انت وشلون عرفت مكانا
خالد :أنتي نسيتي ان اخوك متزوج أختي وباتصال بسيط عرفت مكانكم
الجوهره بعصبيه وبصوت هادي:انقلع من هنا
خالد وهو يقرب:كلمة انقلع ما تنقال لي
الجوهره رجعت أكثر على وراء
خالد :خايفه
الجوهره:انت المفروض اللي تخاف مو انا
خالد:مو خالد اللي يخاف
وصلهم الصوت من وراء:معاها حق انت المفروض اللي تخاف على نفسك
التفتوا وشافوا طلال يمشي جهتهم لحد ما وقف جنب الجوهره ويكمل:تدري ليه لان لو ذبحتك الحين ودفنتك محد راح يدري عنك
خالد ابتسم بسخريه:تذبحني وتعب قلب بنت عمي علي
الجوهره ساكته وصارت تطالع طلال وكأنها تنتظر رده
طلا وهو ماسك نفسه وملامحه ما تدل على الخير ابد:فارق من هنا لا يجيك شي ما يعجبك
خالد و الابتسامه لحد الحين على وجهه:انا رايح واللي جيت علشانه تحقق
وصار يطالع الجوهره ومشى من المكان
بعد لحظات الجوهره حست ان سكوت طلال يعني شي وما تدري ليه خافت انه يفهم غلط وقررت تقطع الصمت وتبرر
الجوهره:انا....
طلال يقاطعها بنبرة غضب:اسكتي
لف لها والغضب مبين في عيونه :لو احد ثاني طلع وشاف منظرك وأنتي تكلمينه و بها الوقت وش راح يقول
الجوهره تفاجات من كلامه ومن تفكيره وبعصبيه:راح يقول خالد كلب وما راح يشك فيني
طلال بصراخ:شلون جاء هنا
الجوهره:ما ادري
طلال سحب نفس:ادخلي
الجوهره:بس......
طلال:قلت ادخلي يا الجوهره لاني ما اضمن إني اقدر امسك نفسي أكثر....وصار يضغط على يده بقوه
الجوهره هزت راسها مو مصدقه اللي تسمعه ومشت ودخلت وراحت الغرفه ودخلت بهدوء وانسدحت جنب أختها وهي مقهوره من طلال شلون يظن فيها كذا
الجوهره:صدق شي يقهر مو كافي اللي مسويه فيني والله انا الغلطانه اللي فكرت ابرر له المفروض أتجاهله ولا اهتم باللي يقوله ولا وش يفكر انا واثقه من نفسي وهو ما يهمني...وغمضت عيونها على هالفكره

&&&&&&&&&&&&&

قاعد ومو جايه نوم من بعد ما قرأ الرساله اللي وصلته من بنته وهو يحس نفسه مجنون راح لهم البيت بس قالوا له انهم سافروا وما في احد في البيت ..رفع جواله واتصل على ولده
في السياره وهو مبسوط من اللي سواه وهو جالس جنب صديقه سعد اللي يسوق
رن جواله شاف الرقم واستغرب انه داق عليه :الو
ابو خالد:وينك فيه يا زفت
خالد بكذب وهو حاس ان فيه مصيبه:انا مسافر ليه
ابو خالد:ابغى افهم شلون يا غبي يا ثور تروح وتملك لأختك وأنت عارف رأيي بها الموضوع من زمان وش قصدك من هالحركه تعاندني يعني
خالد عصب وصار يسب ويلعن على سحر في سره لان أكيد ما في أحد علم عليه غيرها:لا يبه لا عناد ولا غيره بس....
ابو خالد يقاطعه:لا تقول يبه ولدي ما يعصاني يالخاسي
خالد:يبه اسمعني.....
ابو خالد:لا تقول يبه اللي يوطي راسي ما هوب بولدي فاهم و هذاني اقولك أحسن لك لا توريني وجهك ابد
صك ابوه السماعه في وجهه وهو رمى الجوال بعصبيه وطاح عند رجوله وصار يسب ويتوعد
سعد:وش فيك
خالد:ما فيني شي
سعد:ما فيك شي وأنت شوي ويطق عرقك
خالد بعصبيه:أقول سق وأنت ساكت لاني ماني فايق لك
سعد سكت وهو يعرف خالد إذا عصب المفروض محد يكلمه
خالد في نفسه:هين يا سحير انا أعلمك شلون تروحين تعلمين علي أبوي انا اوريك
وصار يتنفس بضيق

&&&&&&&&&&&&&&

قاعد في البلكونه وحاس بقهر في قلبه هو ما يشك فيها لأنه عارفه بس حس انه مقهور علشان كذا قال اللي قاله ويحس وده يذبح هالخالد
لمح ظل احد واقف قريب من البلكونه
طلال وهو يوقف:من هناك
ميري :هزا انا
طلال باستغراب:ميري وش عندك ما نمتي لحد الحين
ميري:انا أول لازم قول هزا كلام عن جوهره بعدين انا روه نوم
طلال: تعالي اجلسي وقولي لي اللي تبغينه
راحت عنده وجلست على الكرسي وبدت تتكلم وطلال يسمع لها

&&&&&&&&&&&&&

قاعده في الغرفه وهي تفكر في حال اهلها وكيف أسرتها تفككت هي صحيح ما كانت أسره سعيده بس على الأقل كانوا مع بعض
رجعت بذاكرتها للوراء لامها وكيف قدرت تقنعها بزواج عبير وعدم طلاقها من أبوها
وصلت عند بيت خالها ودخلت وشافت أمها قاعده بالصاله
سحر:السلام عليكم
أم خالد وهي تلوي فمها:وعليكم السلام
سحر وهي تحب رأس أمها:أخبارك
أم خالد:بخير وإذا تظنين أبوك بيكسر راسي فما عاش من يكسره
سحر تنهدت: وش هالكلام اللي سمعته
أم خالد:وش سمعتي
سحر: انك تبغين تتطلقين
أم خالد:وش فيها لا انا أول وحده ولا أخر وحده
سحر:الصراحه انا لو مكانك ما أفكر ابد هالتفكير هجل اترك الجمل بما حمل لميسوه
أم خالد: وش قصدك
سحر وهي تطالع أمها من طرف عينها:لو تطلقتي راح تاكل ميساء كل الفلوس لحالها وأنتي يا يمه ما راح تذوقين ولا ريال وهي اللي بتطلع ربحانه
أم خالد:ها
سحر:ايه هذا اللي بيصير
أم خالد:انا شلون طافني هالشي
سحر:أنتي الله يهديك يا يمه خليتي الغضب يعميك ولا انا اخبر ما يطوفك شي
أم خالد:والله انك صادقه
سحر ابتسمت وقالت في نفسها:مثل ما توقعت الفلوس المرتبه الأولى عندها والله الحين عرفت خالد طالع على مين في سالفة حبه للفلوس والطمع
سحر :يمه انا الصراحه ما جيتك علشان هالموضوع
أم خالد:هجل علشان وشو
سحر:علشان عبور
أم خالد:وش فيها
سحر:راح تتزوج
أم خالد:نعم تتزوج وآنا أمها ما عندي خبر و بتأخذ من ان شاء الله
سحر:راح تتزوج عبدالمجيد ولد عمي
أم خالد:خير خير وش قلتي عيدي ما سمعت
سحر:راح تأخذ عبدالمجيد والملكه بكره
أم خالد:انا اخلي بنتي تتزوج ولد سالم هذا اللي ناقص
سحر:وش فيه ولد سالم يدير حلال إخوانه وعنده شركه
أم خالد بسخريه:تسمين اللي عنده شركه
سحر:يمه كل صغير يكبر وعبدالمجيد تعرفين انه خطب عبير كم مره بس أبوي كان دائما يرفض وأنتي إذا خليتيه يأخذ عبور ووقفتي معاهم راح تكبرين في عينه انت أم زوجته وخلينا صريحين أبوي وهذاك شفتي انه رماك وخالد تعرفينه ما يحب إلا نفسه وأكثر وحده تحبك عبير وتتمنى رضاك فلو جيتي لملكتها بكره بتفرح وعبدالمجيد اللي تقولين صغير راح يكبر وينعرف بكره في السوق وأنتي راح يعم عليك الخير
أم خالد سكتت وهي تفكر
سحر وقفت:انا حبيت افتح عيونك وأنتي احسبيها عدل
أم خالد طالعت بنتها وتفكر في كلامها
سحر:يله مع السلامه.....طلعت من بيت خالها وخلت أمها مع تفكيرها الجشع
رجعت للحاضر وهي تتنهد وتردد كلمه وحده:يارب ان شاء الله يمشي كل شي تمام

&&&&&&&&&&&&&&&&

أشرقت شمس الصباح بنور يضفي جمال على البحر
في المطبخ
أم عبد المجيد وام دلول يسولفون
أم عبدالمجيد:استغفر الله الناس تقول يالله صباح خير وأنتي تحشين في خلق الله
أم دلول:وآنا وش قايله غير الصدق هجل بالله عليك أم شوقي هالفيله أم 105كيلو تلبس هالملابس حقت الناس الرشيقين والله يوم جلست رحمت هالبنطلون اللي مات
أم عبدالمجيد تشرب شاهيها وهي تهز راسها بعدم رضى
دخلوا عليهم الجوهره ودلول:صباح الخير
أم عبدالمجيد وام دلول:صباح النور
الجوهره وهي تجلس:وشفيكم
دلول:زي العاده أكيد أمي قالت شي ما عجب خالتي
أم دلول:عشتوا الحين صرنا ما نعجب
دلول:من قال أصلا أنتي الغلا كله يا الغاليه أنتي حياتي وعمري....وتبوس راسها:فديتك راسك انا
أم دلول تدز بنتها:ايه العبي علي بهالكلمتين شفتيني مسكينه وقلبي رهيف صرتي تلعبين علي بها الكلام الحلو
أم عبدالمجيد بصوت هامس:لو أنتي مسكينه هجل احنا وش نطلع
الجوهره كاتمه ضحكتها وتطالع أم دلول
أم دلول:وش قلتي كأني سمعت احد يتكلم فيني
أم عبدالمجيد:الحمد لله من جاب طاريك
أم دلول تطالع أم عبدالمجيد بشك
أم عبدالمجيد:وش فيك تطالعيني كذا وكأنك مكذبتني
أم دلول وهي تلف وجهها:ولا شي
دلول و الجوهره يطالعون بعض وفيهم الضحكه

&&&&&&&&&&&&

في بيت متواضع مثل الحي اللي ساكنين فيه
حنين تبوس رأس أمها:صباح الخير
أم حنين:صباح النور والسرور
حنان وهي تبوس رأس أمها بعد:صباح الخير يمه
أم حنين:الله يرضى عليكم صباح الخير
أم حنين وهي تفطر:أقول يمه حنين
حنين:نعم يمه
أم حنين:ما قال لك فيصل متى الجلسه
حنين وهي تقلب وجهها:إلا يمه باقي عليها يومين
أم حنين بين عليها الخوف:الله يستر ويسهل
حنان:يمه وش فيك
أم حنين: والله يا بنيتي أحس بخوف
حنان باستغراب:من ايش
أم حنين:اخاف عساف يجي لنا البيت ولا يسوي لنا مشاكل من ذاك اليوم ما بين عسى هالغيبه ما وراها مصيبه ولا بلوى
حنين بعصبيه:عسى ربي يأخذه ان شاء الله ونفتك منه
أم حنين:ان شاء الله ربي بيفكنا منه ونرتاح
حنان وحنين:أمين
دخلت روئ اللي كانت تحك عينها وتوها صاحيه من النوم:ثباح الحيل (صباح الخير)
الكل:صباح النور
جلست بحضن حنان:ابعى حليب
حنان:أول حبيبتي تعالي معي اغسل وجهك بعدها نجي نشرب حليب
روئ:زين
قامت حنان مع روئ وبقت أم حنين وحنين
أم حنين:أقول يمه انا ملاحظه عليك شي
حنين باستغراب:علي انا وشو
أم حنين:ملاحظه ان كل ما جبنا طاري فيصل تضايقتي ولا تقولين أتوهم لان إحساسي عمره ما خدعني
حنين حست انها تورطت:يمه الله يهديك من قال
أم حنين:محد قال عيوني شافت
حنين تنهدت وبين على وجهها الضيقه
أم حنين:شفتي حتى الحين بين على وجهك انك متضايقه أنتي ما ودك بفيصل زوج لك
حنين:تبين الصراحه يمه والله ما ادري
أم حنين :شلون ما تدرين
حنين:انا ما أنكر في البداية قلت موافقه علشان فلوسه والخير اللي هو فيه بس بعد مواقفه وانه ما خلانا لحالنا ما ادري أحس إني مو قادره احدد ايش ابغى
أم حنين:غزا قلبك
حنين تطالع أمها باستغراب:وشو
أم حنين: الحب بديتي تحبينه
حنين بضحكه:لا يمه ما اعتقد
أم حنين:انا قلت لك وأنتي حره
حنين ابتسمت لامها وتفكر :هل معقوله ممكن أحبه لا ما اعتقد كل الي أحسه اتجاهه بسبب الأفضال اللي متفضل بها علينا مو أكثر ولا اقل
وصارت تطالع أمها اللي طالعتها وهزت راسها وكأنها تأكد لها اللي قالته نزلت عيونها ورجعت لفطورها

&&&&&&&&&&&&&

صحت من النوم غسلت وجهها وطلعت للمطبخ لقت ساره ونوره يفطرون وهم لابسين وخالصين
سحر :صباح الخير
نوره :صباح الخير
ساره:يأبشني هالوش يا صباح الفل
سحر ابتسمت لكلام ساره اللي تعودت تسمعه منها
نوره:سحور أنتي خذيتي أجازه
سحر:ايه خذيت أجازه حاسه ان ما لي خلق دوام و عوار رأس
ساره:والله حتى انا ودي اخذ أجازه بس ما اقدر
سحر :ليه
نوره: مخلينها لحد ما تجي العطله الكبيره للمدارس ونأخذها ونسافر الجنوب
سحر:اها...وتذكرت:إلا صدق ممكن اسالكم في شي
ساره ونوره:أكيد
سحر:ابغى اسالكم بخصوص مشعاب وذياب
نوره:وش فيهم
سحر:هم ما شافوكم من قبل
ساره ونوره طالعوا بعض وهزوا روسهم بلا
سحر:انا ما ادري انتم كيف تتزوجون ناس ما شفتوهم من قبل
ساره:ومن قال ما شفناهم
سحر:يعني شفتوهم
نوره:ايه
سحر:زين وش انطباعكم عنهم
ساره:عن من
سحر بملل:اووووووووف اقصد أزواج المستقبل طبعا
نوره:ما في انطباع
سحر:شلون ما في انطباع
ساره:وش الانطباع اللي مفروض نأخذها من صور لناس في ثالث متوسط
سحر بمفاجئه:ها وش قلتي
نوره:اللي سمعتيه
ساره:أخر صوره كانت لهم في ثالث متوسط ولا انا غلطانه
نور: لا مو غلطانه
سحر :انتم من جدكم تتكلمون
ساره ونوره:ايه
سحر :والله انتم ناس غريبين
ساره بهبل:زي سوبر مان يا حليلنا طلعنا خارقين وإحنا ما ندري
سحر ابتسمت على جملتها
نوره:أقول يالخبله تأخرنا على الشغل يله
ساره :ايه والله
قاموا وودعوها وراحوا على شغلهم
وهي بقت تكمل فطورها وتحمد ربها على صديقات مثل ساره ونوره

&&&&&&&&&&&&&&&

في الشاليه الكل يلعب بالدبابات
الجوهره واقفه مع دلول تتفرج عليهم
دلول بهمس للجوهره:وش فيك
الجوهره تلتفت لها:ما فيني شي
دلول:لا تفكرين تكذبين علي لان انا وأنتي ربع من عمر ولو تلعبين على الدنيا كلها ما لعبتي علي
الجوهره سكتت وما ردت
دلول:طلال
الجوهره تنهدت بضيق
دلول:يعني مثل ما توقعت هو اللي مضيقك
الجوهره:ما عاش من يضيقني بس.....
دلول:بس ايش
الجوهره:خالد كان هنا أمس
دلول شهقت:وشو
الجوهره:اللي سمعتيه جاء هنا أمس بالليل
دلول:وأنتي وش دراك
الجوهره:ما جاني نوم طلعت امشي شوي إلا شفته وفجاه طب طلال علينا
دلول:وأكيد تهاوشتي معاه علشان كذا أنتي معصبه ومتضايقه
الجوهره:لا لأنه ما يهمني
دلول:حسبي الله عليك يا خويلد يا وجه النحس يا معفن وأنتي لا تلومين طلال
الجوهره:نعم شلون ما ألومه
دلول:قبل لا تلومين أي شخص حطي نفسك مكانه يا الجوهره
الجوهره:دلول واللي يرحم والديك صكي الموضوع لاني ما ابغى أتكلم فيه
دلول:اوكي على راحتك
جاء ماجد وهو راكب على الدباب:دلول وش رايك تركبين معاي
تو دلول بتتكلم إلا جاي علي:حنا ما عندنا بنات يركبون دبابات
ماجد: وش دخلك يا شيخ زوجتي وآنا حر لو اركبها صاروخ كيفي
علي:لا لا مو كيفك من يقول
ماجد:خلني امشي قبل لا اخذ قصاص فيك
حرك دبابه ومشى
دلول:علوي وش فيك عليه من أمس وأنت مو صاحي كل شوي ناط لنا
علي:انا اخبر الولد يركض وراء البنت بس أنتي خربتي أم النظريه
دلول:أحسن لك تفارق لا أخليك تشوف النجوم تطير من حولك
علي حرك الدباب وهو خايف وراح جهة الشاليه وطلعت له ميري:ها كلو هاجه تمام
علي وهو يتلفت:ايه
ميري وهو تضحك:كويس والله انا جنن هزا مثل ما هو جنن انا
علي:ههههههه ان شاء الله يا ميري ما يجي يوم وتحقدين علي
ميري دخلت يدها في جيبها وطلعت 50 ريال وعطتها علي
علي:وشو ذا لا احنا اتفقنا على 50 ريال لليوم الواحد والحين احنا في اليوم الثاني وين 50 الثانيه
ميري:ايش هزا انت في سرقه فلوس انا
علي:ميريو والله لو ما تعطيني الخمسين الثانيه بعلم عليك ماجد اللي بيذبحك
ميري طالعت عيونها وحقدت على علي ودخلت يدها في جيبها وعطته الخمسين الثانيه وهي تتحلطم
علي:ايه الحين احنا متفاهمين يله سلام
حرك دبابه ومشى وميري تتحلطم عليه

&&&&&&&&&&&&&&&&&

في مكان ثاني بعيد عن جو اللعب و الوناسه
وقف معصب:وش قلت أبوي سوا كل هذا لا هذا من جد استخف
: اجلس وخله يكمل كلامه
صاروا يطالعونه بتركيز والغضب مبين بوجيهم
تركي:انتم قلتم لي أروح معاه مكان ما يروح وهذا اللي خلاني احضر معاه حفلاته وأبلغكم باي شي يصير وعلشان احنا أصدقاء من فتره طويله سويت اللي طلبتوه مني والشي اللي قاعد يسويه أبوكم الحين ما اعتقد ترضون فيه ولا انا غلطان يا شملان
شملان وهو معصب ومفور من تصرفات ابوه المراهقه:لا منت غلطان وآنا أسف يا تركي لاني طلبت منك من البداية تراقبه بس انت الوحيد اللي ما كان راح يشك فيك
تركي:لا تعتذر ما بينا هالسوالف
شملان:ما ادري وش أسوي معاه هو تعدى كل الحدود ولا وش رايك يا عدي
عدي:أمي لو درت ما ادري وش راح يصير لها هي ما عادت تتحمل حركات أبوي
شملان:ما لازم تدري
تركي وقف:انا بترك لكم سالفة أبوكم بس اتمنى توقفونه عند حده وبنات الناس مو لعبه
شملان هز رأسه وسكت
عدي:لا تخاف أبونا بنعرف كيف نتصرف معه
تركي:مع السلامه
طلع وترك شملان وعدي لحالهم
شملان ضرب الطاوله بأقوى ما عنده وعدي نقز من الضربه:هذا متى بيعقل لمتى بيظل مفشلنا ومسود وجيهنا بين الناس مو مستوعب ان اسم شركه شملان صار عالي وأي حركه محسوبه علينا
عدي:هد يا شملان الأمور ما تنحل بالعصبيه
شملان:اتصل فيه وخله يجي بسرعه
عدي:طيب طيب.... رفع جواله واتصل في ابوه ونظراته على أخوه اللي معصب وبينفجر
(شملان:ولد ابو شملان شديد لأبعد حد وراح اخلي الروايه هي تعرفكم عليه
عدي:ولد ابو شملان الثاني وهو بعد الأحداث راح تعرفكم عليهم)

&&&&&&&&&&&&&&&

 
 

 

عرض البوم صور جينان   رد مع اقتباس
قديم 20-02-11, 07:48 AM   المشاركة رقم: 102
المعلومات
الكاتب:
اللقب:

البيانات
التسجيل: Jul 2010
العضوية: 178488
المشاركات: 77
الجنس أنثى
معدل التقييم: جينان عضو بحاجه الى تحسين وضعه
نقاط التقييم: 31

االدولة
البلدSaudiArabia
 
مدونتي

 

الإتصالات
الحالة:
جينان غير متواجد حالياً
وسائل الإتصال:

كاتب الموضوع : جينان المنتدى : القصص المكتمله من وحي قلم الاعضاء
افتراضي

 


&&&&&&&&&&&&&&&

تـــابــــــــــــــــع

واقفه عند البلكونه لحالها سمعت صوت من وراها:ما كنت اعرف انك تحبين الوحده
ما ردت عليه وما كلفت نفسها أصلا انها تلتفت
جاء جنبها وظل يطالع البحر معاها وبعدها تنهد
التفت لها:ما كان المفروض أتكلم معاك بذيك الطريقه
الجوهره :لارد
طلال:كنت معصب من وجوده وهذا اللي خلاني أقول اللي قلته
الجوهره:مو مهم
طلال ظل يطالعها وبعدها:قصدك ما تهتمين
الجوهره ببرود:لا لأنك ما تعني لي شي...ولفت تطالع طلال ببرود
ظل يطالع عيونها بعدها ابتسم
الجوهره وهي مقهوره من ابتسامته:ما اعتقد ان في شي يضحك
طلال:اضحك على اللي يحاولون يكذبون بس ما يعرفون
الجوهره:وش قصدك
طلال:أنتي كذابه
الجوهره بعصبيه:انا كذابه
طلال ببرود:ايه أنتي ليه في احد غيرك هنا
الجوهره:وليه يا (دكتور فيل) تقول عني إني اكذب
طلال بضحكه على تشبيها:لأنك مهتمه فيني
الجوهره بسخريه:ههههاي انت أكيد تهلوس
طلال:انا ما جبت هالاشياء من عندي انا جبتها من عندك
الجوهره لفت له وهي مو فاهمه وش يقصد
طلال وهو يبتسم مسك يدها ورفعها:هذا وش يسوي لحد الحين في يدك
الجوهره صارت تطالع يدها وشافت الخاتم وحست بفشيله وحست ان ما في رد عندها على غير العاده
طلال نزل يدها ومسك السلسال اللي في رقبتها:وهذي ليش لحد الحين مو في الزباله مع الخاتم مثل ما قلتي لي
الجوهره ساكته وما ردت
طلال:شفتي إني أهمك
الجوهره وجها صار احمر وعصبت لأنها حست انه استهزئ فيها:لا تخاف راح يكون مصيرهم الزباله مثل ما قلت
طلال:أنتي ليش تبنين حواجز ليش حاطه حولك أسوار ليش
الجوهره لفت للبحر وما ردت عليه
طلال تنهد:اعتذر عن أمس
الجوهره:قل لك مو مهم
طلال:ما كنت ادري بكل اللي صار بينك وبين خالد
الجوهره لفت بسرعه له وشافته مبين عليه العصبيه
الجوهره بشك:انت عن ايش تتكلم
طلال:اقصد الإزعاج اللي كنتي تلاقينه وقت ما رحتي تعيشين عن عمك ابو خالد
الجوهره سكتت وهي تسترجع وحده من هالذكريات
سمعت صوت صراخ أم خالد:جويهر.. جويهر.. ووجع
الجوهره:نعم
أم خالد:نعامه ترفسك ان شاء الله ما تسمعين ساعه وآنا أناديك
الجوهره:ما سمعتك
أم خالد: روحي جيبي لعمك القهوه
ابو خالد:كان وصيتي الخدامه ابرك منها ما ظنتي يجي من بنت سالم خير ابد
الجوهره طالعتهم وراحت المطبخ وهي مقهوره وحضرت القهوه ورجعت وحطتها على الطاوله
وراحت تصعد فوق وهي صاعده قابلها خالد على الدرج
خالد:آهلين بالحلوين
الجوهره رجعت درجه وهي تطالعه بحذر
خالد:تو تو كذا ازعل تخافين من ولد عمك
الجوهره:انا ما اخاف بس انا أعرفك انت مثل الحيه
خالد:ههههههه حلو التشبيه مثلك ...نزل الدرجه وسمعوا صوت عبير اللي تعرف حركات أخوها وما يطوفها شي تنادي الجوهره
خالد وخر والتفت شاف عبير في اعلي الدرج:جوجو ممكن تجين شوي
الجوهره زفرت وبابتسامه:أكيد
وخر خالد وهي مرت ووصلت لعبير اللي سحبتها معاها لغرفتها وخلوا خالد تحت
دائما في بيت ابو خالد الوحيده اللي دائما تساعدها عبير
رجعت لحاضر على صوت طلال:وين رحتي
تنهدت بضيق :ما رحت مكان
سمعوا أصوات وجاهم نايف يبكي:ماما ريان مات في الماء
الجوهره بفجعه:ايش ...نزلت من الدرج بسرعه وما انتبهت لطلال اللي راح يركض جهة الصوت
وصلت لهم وهي تحس ان رجولها مو شايلتها وقلبها يدق لدرجه انها تسمع صوته في إذنها
شافت عبدالمجيد وماجد وطلال حول ريان المدد على الأرض وشوي جات دلول
الجوهره بصراخ هستيري:ريون ...ريون
عبدالمجيد يمسكها :الجوهره اذكري الله
شافت طلال يضغط على صدره ويسوي له تنفس صناعي
الجوهره وهي بدت تبكي وتردد بصوت عالي:مات ..مات..
شافت ريان يكح نزلت له على طول على ركبها
طلال يقلب ريان على جنبه علشان يطلع الماء والجوهره تأخذه في حظنها وبصراخ
:ريون ...حبيبي رد علي ريون
شافته يطالعهم ويكح
الجوهره وهي تمسح على راسها:ااااه يمه اخوي ....وصارت تبكي
ماجد:الجوهره خلاص الولد ما فيه شي شوفيه
الجوهره وهي ماسكته وكأنها خايفه تتركه وتفقده:اهئ...اهئ.. اهئ ... اخوي
طلال وهي يهديها:خلاص الجوهره خوفتي الباقين
عبدالمجيد :اتركيه خليني ادخله داخل
الجوهره تهز راسها علامة الرفض وهي تبكي وتشد عليه بقوه
دلول واقفه وتبكي ومو عارفه وش تسوي
جات أم عبدالمجيد وام دلول يركضون بعد ما قالت لهم ميري
طلال وهو يمسك يدها الملتفه حول ريان:حبيبتي اتركيه يله خلينا ندخله داخل
الجوهره: بيروح مني
طلال:ما في احد بيروح شوفينا كلنا هنا ...كرر وهو يشد على يدها :اتركيه
الجوهره وهي تطالع طلال بدت ترخي يديها وعبدالمجيد خذاه وهي صارت تبكي
أم عبدالمجيد تنزل لها وتأخذها بحضنها:بسم الله عليك يا بنيتي الولد ما فيه شي
الجوهره:اهئ ..كان بيروح مني...اهئ..
أم دلول:اذكري ربك والحمد لله ان ربي سلمه
الجوهره وهي تمسح دموعها:لا اله إلا الله
أم عبدالمجيد بحنيه:يله قومي خلينا ندخل داخل نشوفه
الجوهره وهي تتمسك في خالتها:خالتي حاسه رجولي ما تشيلني
حست باللي يمسك يدها:تسندي علي
ساعدها توقف وبدوا يمشون شوي شوي لحد ما وصلوا داخل وصعدوا له الغرفه والجوهره راحت له عند السرير وجلست وبدت تمسح على شعره وتبكي
أم عبدالمجيد أشرت للكل يطلعون
طلعوا وبقى طلال والجوهره
طلال وهو يحط يده على كتفها:الحمد لله ربي سلمه وما فيه إلا العافيه
الجوهره هزت راسها وعينها ما فارقت وجهه
طلال:الجوهره خلاص
الجوهره التفت له وحطت يدها على يده:مشكور طلال مشكور والله دينك برقبتي طول عمري
طلال رفع يدها وباسها وبابتسامه:العفو
الجوهره ابتسمت له بحزن وكانت هذي أول ابتسامه تبتسم له ورجعت تطالع ريان وتمسك يده
طلع وخلاها معاه بروحها ونزل تحت قابله ماجد وعبدالمجيد:ها أخبارها
طلال:هدت
ماجد:الحمد لله ان ربي سلمه من الشر
عبدالمجيد:الحمد لله ...وراح لامه وخالته والباقين
ماجد:مشكور طلال
طلال:العفو وبعدين ريان اعتبره مثل ولدي
ماجد ابتسم:كنت متأكد نظرتي فيك ما خابت
طلال:تسلم
طلع لحد ما وصل عند البحر ووقف وخذاه التفكير

&&&&&&&&&&&&

اتصلت في أمها وطلبت منها تقابلها في شقة خالد وعطتها العنوان وقالت لها الموضوع مهم ويخص أبوها وأمها رضت تجي طلعت هي من العماره وخذت سواق ساره ونوره وراحت على شقة أخوها
دخلت العماره ووصلت الشقه ورنت جرس فتح لها وهو معصب سحبها من يدها وصك الباب بقوه وعطاها كف قوي
سحر وهي طايحه على الأرض:انت مجنون
خالد:يا حيوانه اتفقتي معاي ما تقولين لأحد وتروحين وتعلمين أبوي
وقرب منها بيضربها مره ثانيه بس أمه وخرته عنها:وخر عن بنيتي
خالد:وخري يا يمه فيني قهر يا يمه ...وبصراخ :وخري
أم خالد:أقول اجلس وإحنا ما جينا هنا علشان نتهاوش
سحر قامت وهي مو حاسه بخدها :ايي حسبي الله عليك جعل ايدك الكسر
خالد هجم عليها:وتدعين بعد
أم خالد بحزم وهي توقف قدام سحر:خويلد والله ما تمد ايدك عليها وروح أنثبر أشوف
خالد جلس وجلست أمها وبعدها سحر
أم خالد:قولي وش عندك وش الموضوع اللي بغيتينا فيه
سحر:انا عندي فكره تخلي أبوي يطلق ميساء
أم خالد باهتمام:وش هي
سحر:بس ابغى مساعدة خالد
خالد اللي يطالعها بحقد:احلمي انا ما عاد لي دخل فيكم
سحر:يمه شوفيه بدونه ما راح تنجح فكرتي
أم خالد: ما عليك منه راح يساعدك وهو ما يشوف الطريق بس أنتي قولي وش عندك
سحر ابتسمت بخبث:اسمعوا

&&&&&&&&&&&&

في الشركه
جالس بين عياله اللي مبين عليهم انهم معصبين منه والشرر يتطاير من عيونهم
ابو شملان:كذب انا ما أسوي هالاشياء اللي تقولونها
عدي:يعني يا يبه احنا نكذب
ابو شملان:وش شايفيني مراهق أسوي هالاشياء
شملان ساكت ويطالع ابوه وهو عارفه عدل
عدي:يبه انت تلعب على نفسك ولا علينا
ابو شملان:يا ولد احترمني انا أبوك
عدي خذا نفس:أسف يبه بس بعد اللي تسويه مو معقول
ابو شملان:انا ما سويت شي
شملان بعصبيه:انا كل شي عندي إلا أمي يا يبه سامعني أمي
ابو شملان يطالع ولده وما رد وحاس انه تورط
شملان بصراخ:مو كافي انها صابره على حركات السهر والحفلات بعد صرت تلاحق بنات الناس خلاص اسم وسمعت الشركه وعيالك ما عاد له قيمه عندك
يكمل بعصبيه:يبه لا تخليني اضطر استخدم أسلوب ما أحبه
ابو شملان سكت وهو يعرف ولده عدل ما يرحم ولا يعرف يقدر احد لا كبير ولا صغير
شملان:انا أموت ولا أمي تنجرح ما ابغى اسمع يا يبه انك تلاحق احد ولا انت عارف وش راح يصير
ابو شملان ما رد وهو عارف وش يقدر يسوي لان كل شي مكتوب باسمه ومعاه توكيل
قام من مكانه والوضع مو عاجبه ابد وطلع
عدي:مو كأننا قسينا عليه شوي مهما كان هذا أبونا
شملان بحزم:لا ما قسينا عليه
عدي هز رأسه لأنه أحيانا يحس ان ابوه يكسر خاطره ويحس ان شملان يغلط بحقه وأحيانا يحس ان شملان معاه حق لان ابوه تمادى كثير
بعد ما طلع قابل تركي:السلام عليكم
ابو شملان:هلا وعليكم السلام
تركي:ابعد عنهم وابعد عن المشاكل يا ابو شملان
ابو شملان بعصبيه:من تقصد
تركي:احنا فاهمين بعض ابعد لا تخسر عيالك وتخسر شراكتك مع عمي ابو صالح
ابو شملان بين على وجهه الضيقه
تركي:انت تعرف عمي صالح يعني ما يحتاج أعلمك عنه وش راح يسوي لما يدري بعلومك مع اللي أهل اللي مناسبينا
ابو شملان لف وجهه بضيق
تركي ابتسم بسخريه ومشى وترك ابو شملان اللي يفور من العصبيه

&&&&&&&&&&&&
لهنا أوقف واترك لكم حرية التعليق
&&&&&&&&&&&&&&
شامخة وبنت رجال وجاء من يغلبني
&&&&&&&&&&&&&&&
ودي لكم
قلب أمي وروحها

 
 

 

عرض البوم صور جينان   رد مع اقتباس
قديم 20-02-11, 01:23 PM   المشاركة رقم: 103
المعلومات
الكاتب:
اللقب:

البيانات
التسجيل: Aug 2010
العضوية: 186543
المشاركات: 7
الجنس أنثى
معدل التقييم: نسيم الغروب عضو بحاجه الى تحسين وضعه
نقاط التقييم: 10

االدولة
البلدIraq
 
مدونتي

 

الإتصالات
الحالة:
نسيم الغروب غير متواجد حالياً
وسائل الإتصال:

كاتب الموضوع : جينان المنتدى : القصص المكتمله من وحي قلم الاعضاء
افتراضي

 

مساء الخير
شكراً جينان على البارت
ابو شملان يستحق اللي سواه ابنه يتصور نفسه شاب ومراهق
اما سحر دماغها يشتغل على طول وميتوقف عن التفكير
اما سارة وزيد والله ضحكوني من قلب
الجوهرة وطلال كر وفر

 
 

 

عرض البوم صور نسيم الغروب   رد مع اقتباس
قديم 20-02-11, 08:24 PM   المشاركة رقم: 104
المعلومات
الكاتب:
اللقب:

البيانات
التسجيل: Oct 2010
العضوية: 197412
المشاركات: 74
الجنس أنثى
معدل التقييم: Tbasma عضو بحاجه الى تحسين وضعه
نقاط التقييم: 10

االدولة
البلدMorocco
 
مدونتي

 

الإتصالات
الحالة:
Tbasma غير متواجد حالياً
وسائل الإتصال:

كاتب الموضوع : جينان المنتدى : القصص المكتمله من وحي قلم الاعضاء
افتراضي

 

:022iz:
هلا باحلا جينان البارت والله حلو كثييييييييييييييييييييييييييييييييييييييير
ميري والله منت بهينه هههههههههههه بس بصراحه عجبني المقلب الي عملت فدلول و ماجد ههههههههههههه رغم ان ماجد كسر خاطري
طلال و الجوهره الله يسعهم
:rdd17ns5::i03Rose_Yellow:

 
 

 

عرض البوم صور Tbasma   رد مع اقتباس
قديم 20-02-11, 09:34 PM   المشاركة رقم: 105
المعلومات
الكاتب:
اللقب:
ليلاس متالق


البيانات
التسجيل: Jun 2010
العضوية: 174870
المشاركات: 941
الجنس أنثى
معدل التقييم: loubana عضو على طريق الابداعloubana عضو على طريق الابداع
نقاط التقييم: 181

االدولة
البلدMorocco
 
مدونتي

 

الإتصالات
الحالة:
loubana غير متواجد حالياً
وسائل الإتصال:

كاتب الموضوع : جينان المنتدى : القصص المكتمله من وحي قلم الاعضاء
Flowers

 


:022iz:
يسلــمووووووووووو جنوو بــارت العجيــب خنفشــاري<< لا تسأليني عن معنــاهاخخخخخخ

نبدا بسم الله مع تعليقي المتواضع ^.^

*سـارة و نوورة / والله ونعـم الصداقة و صدق يدخلوو القلب بعفويــة خبالهم خخ

* خلوود/ الزفت الله يـاخدك يا لاغبي ماتفهــم البنت ماتباك و تزوجت خلاص ليش جـاي إنت و وجهك <<فيس معصب

*طلوول & جوجوو/( أمووت فيهم^^أحسهم لقـاء جبلين كل واحد عنده مميزاته ) والله ما هقيتها منك تشك فيهــا بس الحمد الله اعتذرت ..الله يهدي بـالكم

*ميري/ شنوو قلتي لطلال ؟؟؟؟ قولي الله يسلمك و أنـا أرجعلك 50 لي عطيتيها لعلووي أثاري الســالفة ينكد عليهم من عندك و الله مو هينة خخخ تقولي ولا أعلم مجوود !!!!!!!!!<<فيس يحرك حواجبه هعهع

*سحوورة./ الله يعطيك على قد نيتك و يجمعك مع لي بالي بالك خخخخ شنوو الخطة لي راح تسووها عشان تفتكو من الخـايسة مرة أبووكم مادري شنو إسمها؟!!!!!!!!!!؟؟؟

*أم دلوول و أم عبد المجييد/ يا حبي لها لعجوزات خخخ<< أنهــاش قبل ما تسمعني أم دلوول توريني شغلي قال عجووز خخ

*حنوون / الله يفك أزمتكم و تفتكوو من عســاف عسى لي ماني بقايلة ياخده ،، بس لا تحاتي فيصل قـايم بالواجب راح يلعب بحسبته مثل ما لعب بحسبتك ودخل قلبك ههه لا تكـابري يــابنت ترا واضح

*شملان و عدى / بردتوو قلبي فها الشايب لمخرف

جنوو لما جانـايف وقال ماما ريــان مــات قلبي وقف قلت شنو هالطلعة لي قلبت كوابيس الحمد الله على سلامة ريوون ..جوجو الله يكون بعوونك على الخرعة لي أكلتيها بس لا تخـافي دام القبضـاي طلوول معـاك

و بـسسسسسسسسسسسسسسس بسلامتكم << كل الهذرة لي قلتيها و تقولي بس خخخ يبيلهم بندول من بعد كلامك

**أختك لبنى**^ـــــ^

 
 

 

عرض البوم صور loubana   رد مع اقتباس
إضافة رد

مواقع النشر (المفضلة)

الكلمات الدلالية (Tags)
جديد الكاتبه ص 26 !!!!!!!!!!!!!!!!!!!!, جعلتني, رخام, شامخة, قصص من وحي قلم الأعضاء
facebook



جديد مواضيع قسم القصص المكتمله من وحي قلم الاعضاء
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


LinkBacks (?)
LinkBack to this Thread: https://www.liilas.com/vb3/t153391.html
أرسلت بواسطة For Type التاريخ
Untitled document This thread Refback 26-12-10 09:00 AM


الساعة الآن 01:46 PM.


 



Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية