لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 31-10-10, 05:37 PM   المشاركة رقم: 21
المعلومات
الكاتب:
اللقب:

البيانات
التسجيل: Jun 2010
العضوية: 172638
المشاركات: 50
الجنس أنثى
معدل التقييم: بنت قابوس عضو بحاجه الى تحسين وضعه
نقاط التقييم: 10

االدولة
البلدOman
 
مدونتي

 

الإتصالات
الحالة:
بنت قابوس غير متواجد حالياً
وسائل الإتصال:

كاتب الموضوع : بنت قابوس المنتدى : القصص المكتمله
افتراضي

 

وبكــذا تنتــهي الفصــول الــي عنــدي واول ما بترسلي الكــاتبة فصــل جــديد بنــزلة .. بس اتــوقع انــها ممــكن تتــأخر بســبب انشــغالها هالايـــام ... لنا لقاااء

 
 

 

عرض البوم صور بنت قابوس   رد مع اقتباس
قديم 21-11-10, 01:12 PM   المشاركة رقم: 22
المعلومات
الكاتب:
اللقب:

البيانات
التسجيل: Jun 2010
العضوية: 172638
المشاركات: 50
الجنس أنثى
معدل التقييم: بنت قابوس عضو بحاجه الى تحسين وضعه
نقاط التقييم: 10

االدولة
البلدOman
 
مدونتي

 

الإتصالات
الحالة:
بنت قابوس غير متواجد حالياً
وسائل الإتصال:

كاتب الموضوع : بنت قابوس المنتدى : القصص المكتمله
افتراضي

 

الفصل الثامن عشر ..

مرت الايام واسابيع..تقدرون تقولون مر تقريبا شهرين على انفصال وسيم وشهد..وفي هاذي الفترة شهد كانت تخبي حزنها تحت غطاء الضحك والدراسة .. حاولت تحسس الناس الي حواليها انها طبيعيه وما فيها شي بس أبوها كان دائما يشوف الحزن في عيونها ... حاولت تنسى وسيم..صدقوني حاولت وايد لكن في حد ينسى نفسه؟ في حد ينسى مدينة أحلامه وأماله؟ بس منو يدري يمكن الزمن كفيل بأن يخليها تنسى وتبدأ حياة جديده وحلوه ...
وأهل شهد كانوا مشغولين بترتيبات عرس ولدهم خليل من نور...الكل كان مربوش ألي مشغول بالديكور والي مشغوله عند المصمم حق الفستان والي عند المجوهرات وألي وألي...ولائحة تطول وما راضيه تخلص...وفي هاذي الفترة صديقتنا طفول انخطب!
تدرون منو خطبها؟
أخو نور..واسمه محمد دارس في استراليا..
بس كيف خطبها ..؟ تعالوا نشوف
مرة طفول كانت واقفة عند باب كليتها تنتظر نور وشهد وكانت متضايقه لان اليوم عبايتها اطرطرت في الكلية وانكب العصير على أوراق بحثها والامتحان كان صعب..
وهي قاعده تكلم نفسها :اوه شو هاليوم الزفت الي انا فيه...
وهي مشغوله بنفسها شافت شخص يسألها وطبعا هالشخص كان محمد اخو نور بس هي ما كانت تعرفه:عفوا اي صوب كلية أدارة الاعمال؟
طفول من زود ضيقها ردت:من صوب جهنم
محمد قال في داخله:حشى مو بنت هاذي كبريت
ودخل محمد الكليه عشان يدور على اخته وفي نفس الوقت طلعوا شهد ونور وشافوا طفول متعصبه
شهد:شو فيج كأن حد مسكر باب في ويهج
طفول:لا قولي بوابة مو باب
نور تضحك:خير شو صار لج؟
طفول:بصراحه شباب هاي الزمن ما فيهم حشيمه ولا أدب من يشوفون بنت واقفه بروحها يتحرشون فيها..صحيح جمالي ما يقاوم بس الحشيمه زينه
شهد:ياالله عاد دوم هاي البنت تمدح عمرها ..اكيد حد اتحرش فيج..ياالله قولي شو سوا فيج روميو الخليج؟
طفول:واحد شكله مو من طلاب الجامعه المعفوسين الي عندنا ..سألني عن باب كليتنا..قلت له صوب جهنم..قال لي اذا من صوب جهنم يطلعون بنات حلوات كذا عيل نعم الكليه
شهد:اووف اووف صج طلع اخونا روميو الخليج
نور:وانتي شو رديتي عليه؟
من وراهم سمعوا واحد يرد عليهم ويقول:قالت له روح حطب نار جهنم تاكلك
كلهم لفوا ونور شافت اخوها محمد وسألته:شو جابك اليوم وين السائق؟
محمد:امي ماخذته حق مشاوير عرسج
شهد سلمت عليه:هلا محمد كيفك؟
محمد:الحمدلله ..كيفج شهد وشو اخبار معرسنا؟
شهد:مخبوص ما يعرف ليله من نهاره
وهنا انصدمت طفول وتيبست في مكانها اومن زود الحيا ما عرفت وين تخبي روحها.. محمد اعجب بطفول وسأل عنها وخلال شهر راح خطبها
شهد كانت عايشه الفرحة فرحتين.. فرحة عرس اخوها الغالي خليل من نور..ومن طرف الثاني فرحة خطوبة محمد وطفول....وشهد مع انشغالها في دراستها وبترتيبات عرس اخوها كانت كل يوم تتذكر وسيم..وتتذكر كلامه وضحكاته وسوالفه عن شغله واهله..وفي مره حنت لدفترها الي كانت تكتب فيها خواطرها ومشاعرها لوسيم... هذا شي الوحيد المتبقي من حبها..وبعد تفكير قامت واتصلت بوسيم
وسيم:ألو
شهد:هلا..كيفك وسيم؟
وسيم لما سمع صوت شهد وهي تناديه بأسمه غمض عيونه.. حن لصوتها..شهد كانت اذا تكلمت تسحر قلبه واذا تحدثت تلهب مشاعره
وسيم:هلا والله..الحمدلله وانتي كيفج؟ وكيف الامتحانات معاج؟
شهد:ماشيه..وانت شو اخبارك؟
وسيم:عايش..مشغول وايد بالشغل
شهد:شو اخبار منال؟
وسيم:زينه..مشغوله بترتيبات عرسها
انقبض قلب شهد وسألته:متى الساعه المباركه؟
وسيم:تقريبا على نهاية العام
شهد:ابي منك طلب
وسيم:أمري
شهد:تسلم..ابيك تبعث لي دفتر خواطري وصورتي..دخيلك ارسلهم لي
وسيم حس وكأنه تلقى ضربه قويه في بطنه..ما قدر يتنفس ولا يتحرك ..كل الي قدر عليه هو وقوفه في مكانه
وسيم:ليش؟
شهد:لانها مو ملكك ولانك الحين خاطب وحده ثانيه وراح تتزوجها بعد 3شهور..شو بتسوي فيهم؟
وسيم: اخذتي كل شي مني..احلامي وامالي وحتى حبي الحين جايا تاخذين مني دفترج وصورتج
شهد:وسيم ارجوك طرش لي اغراضي وابني حياتك الجديدة مع منال..وشكلي على نهاية السنه بتكون عندي بدل فرحة فرحتين
وسيم:ما فهمت
شهد:على نهاية العام مو بس انت الي بتعرس احنا بعد عندنا عرس
وسيم وقف قلبه لا يكون شهد انخطبت وراح تتزوج
وسيم:مبروك عرس منو؟
شهد:عرس خليل اونور
اتنفس وسيم وحس براحه
شهد:دفتري كانت أمانة عندك وانا اليوم جايه اطلب امانتي
وسيم:ما بيصير في خاطرج الا طيب..عمري ما رفضت لج طلب
شهد:ادري فيك نشمي وصاحب اصول
شهد بعد ما سكرت تليفون حست بالغضب لان وسيم خان حبها..ودمر مدينة احلامها الي كانت مقدسه بالنسبة لها.. كان من المفترض يشكلوا زوج و زوجة..تقدرون تقولون ثنائيا سعيدا.. ما ظنت ان وسيم بعد 3شهور راح يعرس..وبهاي السرعه وكأن ما كان بينهم شي.. راحت لا اراديا فتحت صندوق ذكرياتها وطلعت منه قميص نومها وحطت في بالها تعطيه لنور هدية عرسها أذا هي ما تهنت بالقميص خلي غيرها يتهنى وهي قاعدة تطلع اغراضها طاحت بطاقة من بين قمصانها ولما شافتها تذكرت هاي البطاقة وسيم كان معطيها مع القلادة..قعدت تقرأ خاطرته
حبيبتي ممكن طلب
ممكن تعيشين معاي نص ساعه
بس لا تحسبين الوقت والساعه
لاني برسم حلم انتي تدلينه
ما ابي منج اكثر
ما ابي كلامي يكثر
ابيج تحسين بلمسة ايدي
وشفتي وشلون ترجف
ابيج تناظري في عيني
وشلون غيرج ما تعرف
ابيج الحين بيدج تمسحي دموعي
الي جرفها قسوة بعدج
ابيج تحظنيني الين تلمسين ضلوعي
الي في دمي يسري حبج
وان قلت لج ضميان اسقيني بكلمة أحبك
وان قلت لج بردان دفيني في ساعة قربك
ممكن اخر طلب..قربي اذنج
ابيج تعيشين معاي على طول
ما باقي غير ثواني وتخلص نص ساعة
وش رايج انطولها ليوم قيام الساعة
وهذا طلبي وهاي مناي
ابي اعيش معاج حياتي لمماتي
وش قلتي يالغالي؟
دمعت عيون شهد واخذت ورقة وقلم..كانت تبي تعاتب وسيم..تعاتبه على عناده وعلى استعجاله لخطوبته...كانت مصدومه ومجروحه منه.. كتبت له
وش تبيني اقول لك؟
اقول لك عن ايامي الي راحت من بعدك
راحت بسبة عنادك
وش تبيني اقول لك؟
اقول لك عن دموعي الي جفت من بعد رحيلك
جفت بسبة كبريائك
وش تبيني اقول لك؟
اقول لك عن احلامي الي ما شافت نور شمسك
ماتت بسبة استعجالك
وش تبيني اقول لك
اقول لك عن رحيلك من زهرة لزهرة اومن وردة لوردة
رحلت ويبست بسبة غرورك
تدري شو كان ودي؟
كان ودي اسقيك بكلمة أحبك وادفيك وادفي أضلاعك
كان ودي امسح دمع عينك والمس رجفت شفايفك
كان ودي أداويك واشفي جراحك
كان ودي اطولها معاك الى مماتي ومماتك
هاي كان ودي اوكان في خاطري وفي احلامي
انت سألتني وش قلتي
اسأل عنادك وغرورك وكبريائك..وحتى استعجالك
اسألهم وهم راح يقولون لك وش ابي اقوله
ولا انت وش رايك؟


ومن هنا يخلص الفصل بس انتو تعتقدون ان وسيم بيهون عليه يتزوج وحده غير شهد؟
بيهون عليه اسمه يقترن بأسم غير اسم شهد؟
بيهون عليه يرفع الطرحه ويشوف وجه غير وجه شهد؟
او يخلف ولد من غير شهد؟

وهنا انا اطلب منكم كلكم طلب وارجوكم ما تردوني وطلبي هو انكم تصوتون
هل وسيم راح يتزوج شهد .. والا لاا ؟؟
ابيكم تصوتون لانكم جزء من هاذي القصة الي حبيتوها وحبيتكم..انتظر ردودكم على احر من الجمر ...ودمتم احبتي اينما حللت

 
 

 

عرض البوم صور بنت قابوس   رد مع اقتباس
قديم 04-12-10, 08:49 PM   المشاركة رقم: 23
المعلومات
الكاتب:
اللقب:

البيانات
التسجيل: Jun 2010
العضوية: 172638
المشاركات: 50
الجنس أنثى
معدل التقييم: بنت قابوس عضو بحاجه الى تحسين وضعه
نقاط التقييم: 10

االدولة
البلدOman
 
مدونتي

 

الإتصالات
الحالة:
بنت قابوس غير متواجد حالياً
وسائل الإتصال:

كاتب الموضوع : بنت قابوس المنتدى : القصص المكتمله
افتراضي

 

الفصل التاسع عشر .. والاخير


هلا..وأخيرا وصلنا للفصل الاخير..فصل الي الكل يترياه يمكن حتى انا كنت اترياه...تصدقون كنت متحيره هل أعرسهم واكلل حبهم بالوصال؟ ولا لا ما اعرسهم وأخلي كل واحد يروح لحال سبيله؟ وتميت فترة متحيره فقلبي كان يقول لي شي وعقلي يقول لي شي ثاني..وبالمناسبة حابه اشكر كل الي صوت في فصل18سواء بنعم او لا..تبون تعرفون شو صار في حبايبنا وسيم وشهد؟..تعالوا نشوف

تمت شهد تنتظر وصول دفتر خواطرها وفي خلال هاذي الفترة نور كانت متوترة لان عرسها ما باقي له الا شهر وبصراحة مو بس نور الي كانت متوترة حتى شهد وأهلها كانوا متوترين..الكل كان مشغول وصار بيت ابوخليل ولا خلية نحل الي طالع والي داخل حتى نوف وعيالها وجدتها وعمتها اتحولوا لبيت ابوخليل عشان يكونوا قريبين منهم وحتى يعيشوا لحظة بلحظة فرحة خليل..وما ننسى أخوهم الصغير صالح كأنه هو الي قاعد يعرس مو أخوه فكل حين وساعه يجيب كندورته(دشداشته)ويراوي أهله ومره يغير رايه ويجيب بدلته..الشيخ ما عارف شو يلبس في عرس اخوه..وشمه أختهم الصغيرة صارت في أخر لحظة عارضة أزياء..كل حين والساعه تبدل فساتينها..ويحليلها أم خليل مربوشه ما بين بطاقات الدعوة والمعازيم وترتيبات عرس ولدها الغالي..ومسكين ابوخليل رايح وجاي يعق بيزاته يمين وشمال..اما المعرس فمحد يكلمه مشغول ومو عارف ليله من نهاره..وفي وسط هاي المعمعه كانت شهد الي هي نور بيتهم ومدللة عيلتهم تعيش أجواء الفرحة لدرجة انها نست همومها لفترة الى ان مره دخل أبوها غرفتها وشافها قاعدة ترتب اغراضها
شهد:هلا يابوي
ابوخليل:هلا بالغاليه..كيفيج؟خلصتي امورج كلها؟
شهد:هي بس باقي استلم فستاني..الله يعطيك العافيه يابوي ما قصرت..أشوفك تعبان اليوم خير
ضحك ابوخليل:وكيف ما تبيني اتعب وكل وحده فيكم صاعده ونازله تبي فلوس مره امج ومره انتو وجدتكم حتى هاي العصعوص صالح صاير يبي فلوس..وكأن ابوي ورثني بنك وانا ما ادري عنه
ضحكت شهد:يا الله عاد احنا كم خليل عندنا والله يخليك ذخر لنا يابوي يا تاج راسي
ابوخليل:ياالله عاد عن المكر الزايد..ابيج في موضوع
شهد:خير
ابوخليل:بسألج سؤال وابيج تردين علي بكل صراحه وبدون لف ولا دوران
شهد:أمر
ابوخليل:شهد انتي ما زلتي تحبين وسيم؟
شهد انصدمت:وليش تسألني هاي السؤال يابوي؟
ابوخليل:ابيج تردين علي بنعم او لا
شهد ما عرفت شو ترد على ابوها .. انصدمت من سؤاله وبصراحه اخذها الحيا من ابوها..وظلت ساكتة ما عارفه شو ترد عليه
ابوخليل بكل حنيه:ها يا شهد ما رديتي علي؟
شهد:تقدر تقول اني ما نسيته
ابوخليل:انا ما سألتج انج نسيتيه ولا لا سؤالي واضح اتحبينه ولا لا؟
شهد دمعت عيونها وطالعت في ويه ابوها وبعدين نزلت راسها وسكتت
ابوخليل:اقدر افهم من سكوتج انج ما زلتي تحبينه؟
شهد:ليش تسأل؟
ابوخليل:لاني دايما اشوف الحزن في عيونج وهاي الحزن يقلقني..انا ابيج تعيشين سعيدة في حياتج ابي اشوف الفرحة في عيونج
شهد:لا تحاتي يابوي عطيني فرصة الزمن كفيل انه يخليني انساه وأبدأ بحياة جديدة

وفي اليوم الثاني رجعت شهد من عند المصمم وشافت عدال بيتها سيارات..:اكيد هاي اولاد عمي وخالي جايين يركبون الزينه في البيت..
صعدت لغرفتها وبعدها بشوي دخل ابوها :اخيرا وصلتي وينج تأخرتي
شهد استغربت:رحت عند نور عشان اساعدها في ترتيب اغراضها وبعدها رحت اشوف فستاني عند المصمم..خير
ابوخليل:تعالي ابيج في حجرة مكتبي..والبسي عباتج
شهد:ان شا الله
شهد راحت لمكتبة ابوها وشافت نوف قاعدة تسولف مع شخص..شخص هي تعرفه زين وطالعت في ابوها ومليون سؤال في بالها
ابوخليل:هاي وسيم حاب يكلمج في موضوع..ابيج تسمعيه زين وانا الحين اخليج معاه ونوف بتكون موجودة معاكم
شهد ظلت وافقه ومصدومه وما قادره تنطق حتى بحرف وهنا وسيم تكلم :كيفج؟
شهد ظلت ساكته وتطالع في ويه نوف
نوف:ردي على الريال قاعد يسألج
شهد كانت متوتره ومتألمه وبصراحه كانت معاتبه عليه
وسيم:ما بتسلمين علي
تكلمت شهد واول كلمه طلعت من فمها :هنت عليك؟
وسيم غمض عيونه لفتره ..هو تمنى شهد تقوله اي شي الا هالعباره..وظلت في قلبه الى يومنا هذا
وسيم:لا والله ما هنتي علي عشان كذي انا جايلج اليوم
شهد:ما فهمت
وسيم:انا اليوم جاي وجايب اهلي معاي مو عشان يخطبونج حقي..انا جاي عشان املج مره وحده
شهد انصدمت:شو..كيف وليش ومتي؟
وسيم ابتسم وكلم نوف :اختج دوم هاي طبعها تسأل 3اسئله في سؤال واحد؟
نوف:هاي طبعها من وهي صغيره
شهد:بس انت خاطب منال
وسيم:كنت خاطبها..احنا انفصلنا تقريبا من اسبوعين
شهد:شو سبب؟
وسيم:السبب هو انتي...لاني ما قدرت اتأقلم معاها كنت كلما اكلمها تجين في بالي..لدرجه اني وصلت لمرحلة شوي واناديها بأسمج..و حسيت اني اذا تزوجتها راح اظلمها وباظلم نفسي معاها فصارحتها بالموضوع ..وهي طلعت بنت حلال واتقبلت الواقع وهي اصلا ما كانت وايد متشجعه على الزواج لانها تبي تكمل دراستها..فأتفقنا انها هي الي تفسخ الخطبه بحجة انها تبي تكمل دراستها وانها ما مستعدة حق الزواج والمسؤليات
شهد:لكن اهلك كيف وافقوا انهم يجون معاك اليوم؟
وسيم:اقترحت عليهم الحل الوسط..وهو اني ابني لي شقه صغيره في حوش اهلي واعيش معاهم لفترة وبهاي الطريقه انتي بيكون لج شقتج وبظل عايش معاهم قريب منهم..شو رايج؟
شهد:انا ما فاهمه شي..فسخ خطوبه..ملجه
وسيم:انا افهمج أحنا ما نحتاج لمرحلة الخطوبه لان بصراحه عديناها وانتي باقي لج سنه على الدراسه وفي هاي الفترة ببني شقتنا في بيت اهلي..واقترحت على ابوج الملجه
شهد:واذا قلت لك مو موافقه
وسيم:مو كيفج انا اليوم جاي ابلغج بالملجه مو أخذ رايج
شهد:شو السالفه غصب؟
وسيم ابتسم:لا مو غصب بس أن اوان ان واحد فينا يتحرك..وانا ادري انج ما نسيتيني
شهد:شو دراك؟
وسيم:الله يخلي ابوخليل
شهد:ما فهمت
وسيم:قبل اسبوع اتصلت فيه وخبرته اني ناوي اجيب اهلي عشان الخطبه..طبعا هو في البدايه ما وافق وتميت احاول وياه الى ان وصلنا الى حل وسط..انه يسألج اذا كنتي ما زلتي تحبيني او لا واذا قلتي لا ساعتها كل واحد يروح لطريقه واذا قلتي اي ساعتها في يوم الثاني اجيب اهلي وتميت انتظر اتصاله..واليوم انا هني على وعدي
الحين عرفت شهد ليش امس ابوها كان يسألها هاذا السؤال
نوف:والله قصتكم ولا فيلم هندي
وسيم ناول شهد دفتر خواطرها وقال لها:هاي امانتج وسامحيني لاني في أخر الصفحه كتبت لج شي فيه..ويالله جهزي حق الملجه لانها راح تكون في نفس يوم عرس خليل
شهد انصدمت:شو؟ مستحيل انا ما مجهزه حالي
نوف:الا مجهزه ونص نسيتي فستانج الي راح تلبسينه في عرس خليل والله انه يجنن
وسيم:افهم من كلامج انج موافقه؟
شهد:عطيني فرصه افكر
وسيم:مستحيل ما عندج خيار
استحت شهد وقالت له:طيب على شرط
وسيم مسك قلبه:أمري
شهد:انك تناديني بأسمي ولو لمره وحده
ابتسم وسيم:ما طلبتي شي..انا رايح اكلم اهلي واقول حق ابوج يجهز روحه حق ملجة بنته
وبعد ما طلع وسيم عنهن قامت نوف وحضنت اختها:مبروووك يالغاليه تستاهلين كل الخير
شهد ما زالت مصدومه وما مصدقه:انا نازله تحت وبقول لابوي اني ما مستعده حق الملجه
نوف:انتي اكيد جنيتي ليش ما مستعده؟ فستان وبتستلمينه بعد اسبوع وكوافير حاجزه..شو ناقصج..يكفي ريال فسخ خطبته مع بنت عمته عشانج واليوم جاي وجايب اهله معاه عشان يخطبونج..شو تبين اكثر؟احمدي ربج انه رجع لج وسيم مره ثانيه في حياتج..وسيم الي حبج وحبيتيه..هو برهن حبه لج والحين دورج انج توقفين معاه اوتقبلين بالملجه
وطلعت نوف عنها وجلست شهد على كرسي وفتحت دفتر خواطرها وشافت وسيم كاتب فيها:
مجنون انا وزدتني بجنون
واول جنوني يوم اني عرفتج
أقول ما احبج وانا فيج مفتون
وان قلت بانسى غصب عني ذكرتج
سألت قلبي وأحسبه لي انا عون
فرعون قلبي ما نصحني بعدج
ودي اخونج لكن القلب ما يخون
وان جيت اخونج زاد حبي وصنتج
حتى عيوني ما تبي غيرج عيون
قلي شسوي دام كلي عشقتج
طبعا ام شهد ما كانت مرتاحه من السالفه بس لما شافت الفرحة في عيون بنتها تغير مزاجها الى180درجه
خليل:مبرووك يالعروسه..واخيرا
شهد وهي يحليلها مستحيه:الله يبارك فيك ياخوي
وبعدها بشوي رن تليفونها
شهد:ألو
طفول:مبروووووك يالبايخه
شهد تضحك:وانتي شو دراج حشي مركبه كاميرا في بيتنا
طفول:يا الله عاد..تعالي احنا نترياج
شهد:وين؟
طفول:تحت في سياره يالهبله
شهد:الحين؟
طفول:هي الحين عندج مانع؟
شهد:نطروني الحين جايا
طفول:اوكي
وركبت شهد سياره..واستقبلتها نور بالاحضان والقبلات
نور: الف الف مبروك يالغاليه صج انج تستاهلين كل الخير
شهد تضحك من الفرح:الله يبارك في حياتج
طفول:احم احم نحنو هنا..وحضنت شهد وقالت لها:مبروك يالعروسه واخير الخبل بياخذ الخبله
شهد:بس انتو كيف عرفتوا بالسالفه؟
طفول:الله يخلي مراسلنا في بي بي سي اخوج خليل
شهد:نور انتي ما عندج مانع تكون ملجتي في يوم عرسج؟
نور:ابدا يالغاليه بالعكس احس الفرحه بتصيير فرحتين
شهد:طفول شو رايج تملجين انتي بعد في نفس الليله
نور:والله فكره وهاي الساعه المباركه..خليني اتصل بأمي واكلمها
طفول:مستحيييل ولا والف لا
شهد:ليش؟
طفول :شو قالوا لكم عرس جماعي..انا شخصيا ما ابي حد يزاحمني في ليلة عرسي..وبصراحه هاي في صالحكم لاني اذا ملجت معاكم في نفس الليله ترى والله بصك عليكم بجمالي ..وما تنسون انا توني مخطوبه ما صار لي الا4 اشهر..خلوني اعرفه زين
شهد:دوم هاي البنت تحب تمدح عمرها

وفي يوم28ديسمبر تجملت قاعة العرس بالورد والياسمين...شهد كانت لابسه فستان بتدرجات البنفسجي وفيها نجوم صغيره منثوره على فستانها..وكانت حاطه مكياج خفيف ومنزله شعرها بتسريحه حلوه..كانت طالعه حلوه وايد كأنها حوريه نازله من السما..وكل الاهل كانوا موجودين لان الليله الغالي بياخذ غاليه
وشوي سكرت الاضواء الا ضوء واحد ودخلت نور بفستانها الابيض وبطرحه طويله تتمختر على الارض..كانت طالعه حلوه ولا ملاك..وبعدها بشوي دخل خليل مع ابوه والكل كان يهلل وينثر الورد عليه..حتى ام خليل صاحت من الفرحه وتمو يقصون الكيك ويصورون مع الاهل وف هالوقت رن تليفون فاطمه اخت وسيم
وسيم:هلا فاطمه
فاطمه:هلا بالغالي هلا بالمعرس..الف الف مبروك
وسيم:الله يبارك فيج وفي عيالج..ابي اشوف حرمتي
فاطمه:بعدين مو الحين
وسيم:شو بعدين..اقولج الحين تقولين لي بعدين
فاطمه:اسكت تراك بتفضحنا قدام الناس..انطر شوي توه خليل داخل القاعه
وسي:شو توه داخل حرام عليج صار له نص ساعه اوتقولين لي توه داخل..يالله ابي اشوف شهد
فاطمه تضحك:انزين عطيني 10دقايق وارد عليك
وسيم:صار بس مو اكثر من 10دقايق

خليل اخذ نور وراحوا لغرفة التصوير عشان يصوروا بروحهم...
وفاطمه راحت لعند شهد وقالت لها:شهد حبيبتي زهبي حالج ترى اخوي يبي يدخل
شهد وقف قلبها:ليش؟
فاطمه تغمز لها:يبي يشوف حلاله
شهد هني ماتت من الحيا:الله يسلمج يا فاطمه قولي له موالحين خليها لبكره
فاطمه تضحك:والله ان قلت له جي راح يذبحني
طفول قاعده تسمع حوارهم وقالت:يالله يا شهد قومي صعدي المسرح خلي روميو وسيم يدخل
وقامن نوف وطفول صعدوا شهد على المسرح وغطوا وجهها بطرحه لونها بنفسجي فاتح
شهد لطفول:تمي وياي ولا تخليني بروحي
طفول:ان شا الله عمتي بس خليني البس عباتي واجي لج
شهد:لا تتأخرين
فاطمه اتصلت بوسيم:هلا وغلا
وسيم:ها شو الوضع
فاطمه:حياك ادخل نترياك
وبعدها بخمس دقايق دخل وسيم وعينه على المسرح بس ما قدر يشوف شهد لان وجهها كان مغطاي ولان اهله كانوا محاوطينه..هاي تبوسه وهاي تنثر الورود والفلوس..هاي تجبل اوهاي تهلل..الى ان صعد المسرح
ادري فيكم قاعدين تبتسمون وفيكم فضول تبون تعرفون شو صار بينهم...شو رايكم اوقف هني؟..هاهاها قاعده امزح يا الله خلونا نشوف شو صار
شهد تهمس لطفول:والله حاسه اني بموت روحي قولي له يسلم من بعيد ويطلع
طفول تضحك على خبال ربيعتها:يالله عاد مصختيها خليج قويه ولا تفشلينا جدام الريال واهله
وسيم صعد المسرح وبصراحه كان مرتبك .. ما متعود يشوف شهد بهاي الطريقه وغير الاهل ما شاءالله الكل قاعد يشوفه..لما وصل لعند شهد..قامت طفول ساعدت شهد ووقفتها عشان تستقبل وسيم
فاطمه قالت لاخوها:ارفع عنها طرحتها اوبوس جبينها
وسيم رفع عن شهد طرحتها البنفسجيه اوشافها...شاف حب عمره الي تعب وكافح عشانه...شافها وهي متحنيه ومتجمله عشانه.. شم ريحة العود والبخور...بأختصار شاف حلاله....وسيم كان لو ود وده تتوقف عقارب الساعه...هو لو ود وده يتم يناظر فيها طول ليله..
شهد كانت منزله راسها من الحيا ..حست ان قلبها راح يطلع من بين ضلوعها...وسيم قبل ما يسوي شي او يقول لها شي..دخل ايده في جيبه وطلع قلادتها..تتذكرون قلادتها الي كان كاتب اسمه عليه...وقام امام الكل لبسها وهو قاعد يلبسها همس في اذنها :احبج يا شهد.. وباس جبينها
هنا شهد وقف قلبها..معقوله وسيم لبسها قلادتها...معقوله ناداها بأسمها..معقوله؟..ورفعت عيونها وطالعت فيه..واخيرا تحقق حلمها بعد كل هاي المحن.. ابتسم وقال لها:هاي اول واخر مره اناديج بأسمج عشان تعرفين اني ما ارد لج طلب
فاطمه:يالله لبسها شبكتها
بس شهد رفضت تلبس شبكتها لان اي شبكه ما راح تكون احلى واقرب الى قلبها من هاي القلادة..لكنها وافقت انه يلبسها الدبله ومسك وسيم ايدها وحس انها باردة مثل الثلج وشافها ترتجف من الحيا..والله انه خاف عليها ....وبعدها راح عنها لان خليل ونور خلصوا من التصوير
نزلت شهد من على المسرح والكل كان يطالع في قلادتها بس محد يدري شو سالفه الا طفول اونور..وبعدها بشوي جات فاطمه وقالت لشهد:هاي اخوي يبي يكلمج
اخذت شهد تليفون وكانت مستحيه كأنها اول مره تتكلم معاه
شهد:هلا
وسيم:هلا وغلا بالحبيب
شهد ساكته وما قادره ترد عليه
وسيم:ابيج تلبسين عباتج وتغطين عمرج وتطلعين لي برع
شهد انصدمت:ليش؟
وسيم:ابا اطلع مع حرمتي عندج مانع؟
شهد:و شو بقول حق اهلي؟
وسيم:ما يحتاج تقولين لهم شي انا ماخذ الاذن من ابوج..كلها نص ساعه وبنرجع
شهد:وين بنروح؟
وسيم:بتعرفين..بس غطي عمرج عدل وتعالي
راحت ودعت نور وباست اخوها خليل ولبست عباتها وغطت عمرها وطلعت من قاعة العرس الا وتشوف وسيم واقف لها عند الباب
حست بقشعريرة في جسمها..وركبت معاه السياره ولانها كانت مغطيه عمرها ما قدرت تشوف بوضوح
هم وين رايحين وطول الطريق هم ساكتين..الى ان وصلوا
وسيم:بأمكانج تشيلين الشيله عن ويهج
شالت شهد الشيله عن وجهها وشافت البحر...وسيم يعرف ان شهد تحب البحر
وسيم:مبروك
شهد ساكته وما ترد
وسيم:ليش ساكته
شهد:شو اقول؟
وسيم:اي شي يخطر على بالج
شهد:شكرا على القلاده
وسيم:انتي تعرفين اني سويتها حقج ومحد غيرج راح يلبسها...تدرين كنت انتظر اليوم الي البسج ياها
و مسك ايدها وقال:تعرفين انا لو ود ودي اشيلج دوم على صدري اوما اخليج تمشين...انا احبج
وسيم:دخيلج ردي قولي شي
شهد:حتى انا
وسيم:حتى انتي شو؟
شهد:الي قلته
وسيم:انا ما قلت شي
شهد اتحيرت:بس انت قلت
وسيم:شو قلت اظاهر المكياج اوريحة العود والبخور مأثره عليج
شهد:انت قلت لي انا متأكده
وسيم:انزين قولي شو قلت لج
شهد بكل براءة:انت قلت لي احبج وانا قلت لك حتى انا احبك
وسيم ابتسم:فديتج وفديت هاي الكلمه الي طالعه منج..عسى ما احرم منها
شهد انتبهت وحست ان وسيم سوا وياها مقلب شهد:صج ما تستحي
وسيم ضحك:وليش استحي
وشد على ايدها اوقال لها:اوعديني انج دوم بتظلين وياي لاخر عمري..و لو شو ما صار لانج توأم روحي..انتي عيوني الي اشوف الدنيا بيها..انتي حياتي الي ابي اعيشها بحلوها ومرها
شهد دمعت عيونها وقالت:وعد مني اني دوم بظل جنبك..بس ابيك توعدني بشي
وسيم:أمري
شهد:انك طول عمرك ما تناديني بأسمي ودوم تكون بجنبي..اوعدني انك عمرك ما بتخليني وما تحب حد غيري..اوعدني يا وسيم انك ما تبيعني وتشتري ثاني
وسيم حضنها وقال:وعد يا بعد عمر وسيم..تراج ما طلبتي شي

وتوتة توته اوخلصت الحتوته

 
 

 

عرض البوم صور بنت قابوس   رد مع اقتباس
إضافة رد

مواقع النشر (المفضلة)
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 01:37 AM.


مجلة الاميرات 

 



Powered by vBulletin® Version 3.8.11
Copyright ©2000 - 2021, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية