الفصل الثالث عشر .. معاناة


وسيم حاول يقنع أهله..تارة بالكلام وتارة بالاعتصام...حتى قام واضرب عن الطعام وصار ما يكلم أهله..صار كل يوم يطلع للدوام ويرجع الى داره ومن داره الى الدوام...بس هو بدأ يحس اللين من جانبهم..بدأوا أهله يشفقون على حاله..لكن وسيم ما حب يخطب او يتزوج واهله مو راضيين عنه..فهو تربى على خلق ودين..تربى على ان رضا الله من رضا الوالدين فما شاف الا شهد..هي الوحيده الي راح تفهمه وتوقف بجنبه..وبعد ايام اتصل وسيم بشهد ودار بينهم هاي الحوار:
شهد:وينك؟قلقتني عليك
وسيم:كنت مشغول
وسيم ما قال لشهد عن محنته وعن صراعه مع اهله..لاني مثلما قلت الرجل عادة ما يحب يتكلم عن الامه واحزانه لحد..وخاصة للمرأه لانه يعتقد انه اذا تكلم واظهر جانب الالم والحزن معناته هو ضعيف..تعتقدون هذا تفكير سطحي ...يمكن بس هم هاي طبعهم.هم ما يدرون انهم اذا اظهروا هاي الجانب فيهم راح المرأه تحس بأنسانيتهم اكثر ..راح تحس ان الرجل الي حبته انسان له مشاعر وأحاسيس...انسان يفرح احيانا ويحزن احيانا
وسيم:ابيج في موضوع
شهد:خير..قول
وسيم:انتي تحبيني؟!اومستعده توقفين معاي؟
شهد:شو هاي سؤال الغريب؟!انت تعرف اني مستعده اوقف معاك..بس ليش هاي السؤال؟
وسيم:سمعيني يا روح وسيم..انا كلمت اهلي وهم يبونا نعيش معاهم..انتي شو رايج؟
شهد:شنو؟واحلامنا ووعدك لي انك راح تبني لي بيت؟شو صار فيهم؟
وسيم:صدقيني انا على وعدي بس كل الي ابيه منج انج تقبلين نعيش مع اهلي لفتره ..تقدرين تقولين كم من شهر وبعدها ننتقل لبيت بروحنا
شهد:وليش ما من اولها ننتقل؟
وسيم:لان هاي رغبتهم وهم مصرين على كلامهم...صدقيني انا ما ابي اعيش معاهم بس في نفس الوقت ما ابي أبدأ حياتي بعدم رضاهم
شهد:وانا شو يضمن لي انك راح تاخذ لي بيت بروحي بعد كم شهر من زواجنا؟
وسيم:انا اوعدج وهاي خذيها مني
شهد:وسيم انت تعرف شو قاعد تقول؟!حتى اذا انا قنعت اهلي وهم وافقوا..انا ما راح اوافق
وسيم انصدم وسألها:ليش؟
شهد:شنو ليش..وسيم انا قاعده اترك مكان الي تربيت وعشت فيه كل سنين عمري واجي اعيش معاك في منطقه انا ما اعرف شوارعها من سكيكها..اجي اعيش مع ناس انا عمري ما عشت معاهم ولا اعرفهم بس اجي عشان خاطرك وخاطر حبي لك...انت ما تعتقد هاي تضحيه كبيره من طرفي..فأنا ما طلبت منك تبني لي قصر او تعيشني في بيت فخم..كله الي بغيته منك شقه ضغيره نعيش فيها..وبعدين انت فكر فيها بالعقل..احنا اذا تزوجنا وعشنا مع اهلك ساعتها بيكون الوضع اصعب من الحين.لانه اذا بعدها طلعنا وعشنا في بيت بروحنا هم بيعتقدوا اني اخذت ولدهم منهم وراح تصير مشاكل وقطيعه وامور لا تحمد عقباها..هم بيعتقدوا ساعتهاانك خذلتهم وخدعتهم..واني انا الي شجعتك على هاي الشي وساعتها بيكون صعب عليك تتركهم..وسيم انت فاهم انا شنو اقصد؟
وسيم:يعني انتي مو موافقه على كلامي؟
شهد:صدقني يا وسيم انا اذا وافقت على اقتراحك ساعتها بظلم حبي وبظلمك وبظلم اهلك معاي..لاني بطبيعتي انسانه مستقله..انسانه لها احلامها وأمالها الي كبرت معاها..ولاني طول ما انا بعيش معاهم ما راح اكون مرتاحه واذا انا ما اكون مرتاحه ساعتها انت ما راح ترتاح واذا انت ما بتكون مرتاح معناتها مشاكل في الحياة الزوجيه..عيل أسألك احنا ليش قاعدين نتزوج؟ مو عشان نرتاح..مو عشان نحقق أمالنا واحلامنا..مو عشان نعيش حياتنا بحلوها ومرها؟..ارجوك وسيم حاول تشوف الصوره من عيوني مثلما قاعد تشوفها من عيون اهلك..حاول تفهم وتحس مقدار تضحياتي الي راح اقدمها لك يوم الي بنتزوج ...تخيل نفسك انك تعيش مع ناس هم غرب بالنسبة لك.. ساعتها لا اراديا بتعيش مثلما هم يعيشوا ويريدوا..وبتاكل الي هم ياكلون..بتتحول مع مرور الزمن لأله تحب تراضي ناس الي عايش معاهم بس على حساب نفسك..انت تتمنى لي هاي شيء؟
وسيم:انتي سويتيها سالفه وكبرتيها اكثر من لازم..كل الي أبيه منج بس كم شهر تعيشين معاهم
شهد:ما أقدر صدقني ما أقدر..انت تقول كم شهر بس تعتقد ان في هاي كم شهر امورك مع اهلك راح تتغير..راح تنحل؟ما اعتقد..سامحني يا وسيم..انت اطلب مني حياتي وانا اعطيك بس الا هاي شي انا ما اقدر عليه
وسيم:انتي تعرفين شو معنى كلامج؟
شهد:اي اعرف..انا ما ابيك تعاني من الالم والحزن ومشاكل مع أهلك بسببي..لاني دائما تمنيت لك الخير
وسيم:شو تقصدين بكلامج هذا؟
شهد:انت تذكر مره قلت لي ان أهلك كانوا دائما يقترحون عليك تخطب وحده من اهلك..يعني وحده من بنات عمك او خالك؟
وسيم:انتي صج جنيتي..شو هاي الكلام الي قاعده تقولينه..بس تدرين يمكن اسويها
شهد:عيل الف مبروك مقدما
وسيم:لا..انتي صج جنيتي بصحيح ولا اقولج بديتي تهلوسين
شهد:انت تعتقد ان يهون علي اقولك روح اخطب وحده من اهلك؟.بس اذا كانت هاي خاتمة الامك وصراعك مع اهلك..ما اقول غير الله يوفقك

تدرون وسيم عانى من صوبين..صوب رضى اهله..وصوب حبه لشهد....وسيم عمره ما ترجى حد في حياته مثلما ترجى اهله وترجى شهد..هو عمره ما عانى وتألم وكافح مثل الحين ...تدرون وانا قاعده اكتب هاي العباره حسيت بألم ومحنة وسيم..حسيت ان مو هين على الرجل يترجى ويتوسل لحد عشان شي يتعلق بحياته هو...لان هاي مو من شيمته..بس وسيم عشان حبه لاهله ولشهد ترجى وحاول واحيانا توسل..وسيم لاول مره في حياته حس بالقهر والحرمان..ومن منو؟ من اقرب الناس له ..اهله..اوحبيبته...وما اقول غير الله يساعده في ذيك اللحظه..ولا يجيبها على حد مثلما جابها على وسيم

فهو شو كان ذنبه؟..ذنبه انه حب يراضيهم كلهم...فمن جانب شهد ..هي ما حست بمعاناة وسيم مع اهله وصراعه معاهم..ومن جانب اخر اهل وسيم في غمرة انشغالاتهم بأمالهم وبمصالح عيالهم نسوا ان وسيم بعد له اماله واحلامه..هم ما حسوا بمحنته فكل واحد فيهم كان يشوف معاناته والامه

بس شهد ما تنلام..هي حبت وسيم ولانها حبته حست ان قرارها في صالحهم هم الاثنين ..فوسيم جاي من بيئه يعتقد فيها ان مكان الزوجه عند زوجها سواء كانوا بروحهم او مع اهله..وهاي شي معظم رجال الشرق تربوا عليه...بس شهد تربت في مناخ غير مناخه..هي تربت على الاستقلاليه..تربت على انه تظل مع زوجها وتروح معاه وين ما راح ومستعده تتحمل الغربه والفقر وحتى المرض بس يعيشون بروحهم....وسيم ما قدر يشوف تضحيات شهد له اذا تزوجها..هو ما قدر يشوف محنة بعادها عن اهلها وناسها ومكانها..ما قدر يشوف معاناتها الي راح تعانيها في غربتها ولي راح تكون للأبد
فلا هو قدر يفهمها ولا هي قدرت تفهمه

وسيم ما طلب من اهله الا حياته...وما طلب من شهد الا حبه....بس يا ترى هل راح يحصل على اثنينهم..او واحد منهم؟؟تابعوني

الفصل الرابع عشر .. الظرف


وسيم بعد ما سكر تليفونه..انصدم من كلام شهد..ومن زود صدمته ما قدر يفكر بشيء..حتى بكلام شهد

وشهد من ناحيه ثانيه ما عرفت شو تسوي..كيف تخفف عن وسيم ألامه وكيف توقف معاه في محنته..هي كانت صادقه معاه..وما قدرت توعده بشي وهي ما قادره على وفاءه...كانت تدري انها على حق بس كيف تحل مشكلة وسيم مع أهله؟
كيف تخليهم يغيرون رايهم؟
شهد من صميم قلبها كانت تدري بأن وسيم قادر يحل هاي المشكله بس كيف تقوله؟
هي كانت تثق بوسيم وتعرف انه اذا حب شي يظل يكافح ويناضل من أجله حتى يحصل عليه...جلست على سريرها وقعدت تتذكر جيت وسيم الى أهلها لاول مره وهو حتى ما كان يدري شو راح يكون رد فعل أهلها..بس هو جا لانه حس ان شهد تستاهل واحد يخاطر عشانها كل غالي وثمين.. قعدت تتذكر كيف قنع أهله وجاب اخته فاطمه عندهم للبيت ووفى بوعده لابوها..هي بأختصار كانت تثق بحبيبها وكانت تدري انه ما راح يخيب ظنونها..بس كيف توقف معاه وتخفف عنه محنته؟
كيف تقول له انها معاه وهي بعيده عنه؟
قعدت تفكر وتفكر وتضرب اخماسها بأسداسها الى ان جات في بالها فكره!تدرون شو هي؟
راحت شهدنا وفتحت صندوق ذكرياتها واحلامها..الصندوق الي كانت حاطه فيها قميص نومها وقصان الي اشترتهم من لندن وكل اشيائها الي تخص بعرسها وبحياتها مع وسيم...وطلعت منه دفتر خواطر وسيم وقعدت تقرأها من دفة الى دفة..قعدت تقرأ خواطره وكلامه الي كانت نابعه من قلبه ومن حبه لشهد..وبعد ما قرتهم كلهم قامت وفسخت قلادتها الي وسيم عطاها اوقامت تتأمل حروف واسم محبوبها.. لاانها نوت ترسل قلادتها ودفتر خواطره لوسيم عشان تحسسه انها معاه..هي اعتقدت انها اذا رسلت دفتره وهو قعد يقرأها ساعتها راح تقوى عزيمته..واذا شاف القلادة راح يحس بدفئها لان هاي القلاده ظلت على صدرها وسمعت دقات قلبها ..راح يحس انها معاه وواقفه بجنبه...بس في اللحظه الاخيره شهد ترددت لان ما هان عليها تفارق قلادتها و دفتر وسيم الي ظل يصبرها عن بعاد حبيبها..بس بعدين غيرت رايها وواست نفسها بأنها قاعده تسوي هاي شي عشان وسيمها..قعدت تلامس حروف الخواطر بعيون دامعه وقبلت القلادة وخاطبتها وقالت لها:روحي يا اعز شي املكه في الوجود..دخيلج روحي قولي له شهد باعثتني عشان اكون بجنبك..قولي له تذكر هاي القلادة وصاحبتها؟روح كافح عشانها..عشان حبك لها..هي قاعده تنتظرك بس هاي المره يوم تجيبني عندها لا تعطيها بأيدها..قوم انت لبسها بأيدك لان ساعتها راح تكون حلالك..يقولون ان الرجل عادة يعطي لعروسته هديه في ليلة زفافها..روحي قولي له شهد ما تريد منك الا قلادتها تلبسها انت في ليلة عمرها معاك..اترجاج قولي له انج مرسال من عندي..قولي له عن دقات قلبي الي سمعتيها وهي تنادي بأسمه وعن انفاسي وهي تردد حروفه..قولي له لا يتأخر علي لاني ما اقدر افارق قلادتي
وبعدها قامت حطت القلاده والدفتر في ظرف كبير بروحهم وسكرت الظرف....بس كيف راح توصل هاذا الظرف الى وسيم؟..
تبيهم يوصلون له بسرعه..وقعدت تفكر وتفكر الى ان تذكرت صديقتها طفول!الي معاها في الجامعه..هي من نفس منطقة وسيم وأخوها يشتغل في نفس الشركه الي وسيم يشتغل فيها..وظلت شهد حاضنه ظرفها ونامت معاها لانها ما قدرت تفارق أعز شي هي تمتلكه..الى ان اصبح الصباح وراحت شهد الى كليتها وهناك قعدت تدور على طفول وهي قاعدة تدور عليها شافت صديقتها نور..تتذكرونها خطيبة اخوها خليل..
نور:هلا بشهد الي ناسيتنا هاي الايام
شهد:شفتي طفول
نور:اقول لج هلا تقولين لي شفتي طفول...لا ما شفتها خير
شهد:ابيها ضروري
نور:خير
شهد:ابيها توصل لي أمانه
نور:امانة شو؟
شهد:اوه بعدين اخبرج
وفي هاي اثناء شافوا طفول تمشي صوبهم وسلمت عليهم
طفول:هلا والله بالحبايب
شهد:كيفج طفول شخبارج؟
طفول:والله اموري وعلومي ودرجاتي زفته والحمدلله..وانتي شو اخبارج وعلومج واجتماعياتج؟
شهد:وينج فيه قاعده ادور عليج
طفول:خير شنو حصلتي لي على معجب؟تراني ما فاضيه هاي الايام تدرين اللين طويل خلي ينتظر ههها
شهد:اوه صج انج فاضيه ودمك خفيف
طفول: شنو فيج اليوم مو على بعضك؟
نور:ما ادري فيها داخله الكليه وهي مزاجها مكركب
شهد:احم احم هاي انا جدامكم وانتوا قاعدين تحشون فيني عيل شنو لو انا مو وياكم؟بس تدرين ما راح ارد عليج لاني ابيج في خدمه
طفول:أمري خير
شهد:انتي متي راجعه لاهلك؟
طفول:بكره ليش تبين تفتكين مني؟
شهد:عن البياخه ...بس تدرين الحمدلله..ظنيت بتقولي بعد اسبوع
طفول:حرام عليج..صار لي اسبوعين ما شايفه اهلي بس ليش تسألين؟
شهد:تتذكرين مره قلتي لي ان اخوج حمد يشتغل في شركة اتصالات
طفول:اي بس خير شو جاب حمد الحين في بالج؟لا تكوني سامعه عنه شي ولا صار له شي وانا ما ادري
شهد:لا لا لا أطمني..بس حبيت ابعث شي لحد هناك يشتغل معاه..يعني امانه توصلين لحد
طفول:من عيوني
شهد:طفول..الله يخليج خلي بالج على الامانه مو تضيعينها او تنسين تعطين لاخوج
طفول:ولا يهمك فأنا ساعي البريد طفول رقم واحد والكل في سكن يشهد لي..لا تحاتين اول ما بوصل بعطي اخوي يوصلها في نفس اليوم..بس قولي لي لمنو يعطي؟
شهد:واحد اسمه وسيم يشتغل في قسم المحاسبه..راح اعطيج رقم تلفونه..اذا ما حصل عليه في المكتب يتصل فيه وهو راح يجي ياخذ أمانته
هنا استغربت نور وكانت تريد تسأل شهد هي شو قاعده تسوي بس انتظرت تخلص ويا طفول وبعدين تستجوبها
طفول:اعتبري شغلك تم بس وين الامانه؟
شهد:عندي في سياره الحين راح اجيبها لج
راحت نور مع شهد الى سيارتها عشان تجيب الامانه واول ما اخذت شهد الظرف قامت تبكي لان ما هان عليها تفارق القلاده والدفتر..حست انها مثل ذيج الام الي تفارق وليدها...بس هي واست نفسها وقالت في داخلها :انا قاعدة استقرض وسيم حياتي واحلامي حتى يرجعها لي يوم الي بنلتقي..
بس نور ما قدرت تتحمل منظرها وسألتها:خير شهد شنو في هاي الظرف وليش قاعدة تصيحين؟
شهد خبرتها بالموضوع كله
نور:انتي متأكده ان وسيم راح يفهم انتي ليش باعثه له هاي الاغراض؟
شهد:اي لانه هو يعرف معزة هاي الاغراض عندي
ودخلوا الكليه وعطت شهد الظرف لطفول وهي قاعده تعطيها..اترددت شوي حتى طفول سألتها:خير يا شهد شو فيج..بتعطيني الظرف ولا لا لاني لازم الحين اروح السكن عشان اجهز اغراضي لان بكره عمي راح يجي ياخذني وما ابي اتأخر عليه
شهد:هاج في حفظ الرحمان..بس مثل ما وصيتج خلي بالج على الظرف
طفول:ان شا الله عمتي..بس اموت واعرف شنو فيها
شهد:فيها حياتي كلها
طفول:الله ..الله..عيل بمسكها في ايدي طول الطريق ولا تحاتين
شهد:اشكرج يا اعز صديقه عندي
نور:احم احم..نحنوا هنا
طفول ما كانت تعرف بعلاقة شهد مع وسيم..بس حست ان في سالفه شي اسمه الحب..ودعت من قلبها ان الله يوفقهم لبعض
بس يا ترى شو راح يصير بعدين..تابعوني

الفصل الخامس عشر .. الامانة


وصلت طفول عند أهلها وهي حامله ظرف شهد في ايدها..سلمت عليهم وانتظرت أخوها ..وبعد فتره من الوقت شافته وراحت تسلم عليه:هلا حمد كيفك وحشتني
حمد:الحمدلله وانتي كيفج والله انج صرتي دبه من اكل السكن
طفول:ياالله عاد أصلا انت تحسدني على جمالي ورشاقتي..المهم ما علينا..ابيك في خدمة
حمد ضحك:خير..ترى فلوس ما عندي
طفول:ومنو قال لك ابي فلوس الله يخلي لي ابوي تاج راسي
حمد:عيل امري
طفول:عندي أمانه من وحده من صحباتي وابيك توصلها لشخص يشتغل معاك في شركة
حمد:منو هو؟و في اي قسم؟
طفول:اسمه وسيم وهو في قسم المحاسبه وهاي الظرف مكتوب عليه رقم تلفونه..قوله هاي من شهد..سمعتني قوله من شهد
حمد:ولايهمك بوصله بكره
طفول:شنو بكره..اقول لك اليوم يعني الحين بعد ما تخلص الغدا
حمد:و ليش كذا مستعجله عليه؟
طفول:هاي أمانه وابيها توصل اليوم..ارجوك يا حمد عشان خاطري..الحين بعد لانش بريك بترجع للشركه ودي هاي الامانه وياك واعطيها لصاحبه
حمد:ان شاالله عمتي بعد في شي؟
طفول:سلامت راسك يا الغالي
وبالفعل رجع حمد الى عمله وراح لقسم المحاسبه وسأل صديقه جاسم :تعرف حد يشتغل معاك في القسم اسمه وسيم؟
جاسم:لا ما عندنا حد بهاي الاسم
حمد:انت متأكد؟
جاسم:اي ليش؟
حمد:عندي أمانه له..عيل خليني اتصل فيه احسن
واتصل حمد بوسيم على الرقم الي موجود عنده..ورن تليفون
وسيم:هلا
حمد:هلا والله..عفوا انت الاخ وسيم؟
وسيم استغرب:اي معاك وسيم منو معاي؟
حمد:معاك حمد انا عندي امانة لك..وقالوا لي انك تشتغل في قسم المحاسبه وسألت عنك قالوا ما عندنا حد بهاي الاسم
وسيم ضحك:اي لاني معروف بأسمي الرسمي أحمد اوبس أهلي الي ينادوني بوسيم
ضحك حمد:والله عاشت الاسامي يا أحمد
وسيم:عاشت ايامك يا خوي ... ما عرفتك
حمد:انا اشتغل في نفس الشركة في قسم الصيانه وعندي لك أمانه أختي معطيتني من وحده صديقتها اسمها شهد
انصدم وسيم:شهد؟
حمد:اي تعرف حد بهاي الاسم؟
وسيم:اي..طيب انا الحين جاي لك
حمد:حياك ياخوي
وراح وسيم الى قسم حمد وهناك اتعرف عليه وسلمه حمد الظرف
وسيم اخذه وهو متحير وما يدري شو فيه..واستغرب وسأل نفسه شوفي داخل هاذا الظرف وليش شهد ما اتصلت فيه وخبرته عنه..انتظر وسيم الى ان خلص دوامه..واول ما ركب السياره فتح الظرف وشاف دفتر خواطره وفي داخلها قلادة ..قلادة شهد!!
وسيم انصدم وحس الدنيا أظلمت في عينه..ليش شهد بعثت له أغراضه؟
وليش القلادة بذات؟
هو يعرف شهد زين وهي تعرف غلاة القلادة على قلب وسيم..وهي تعرف انه شو ما صار تظل هاي القلادة معاها ..ليش شهد بعثتهم من دون ما تقوله شي..ليش؟
قام يخاطب شهد في داخله ويقول لها:ليش ياشهد بعثتي لي أغراضي هان عليج تتنازلين عنهم بهاي السهوله؟
وانتي تدرين معزتهم عندي؟
كيف هان عليج تردين علي دفتري الي كتبت لج فيها عن احلامي وحبي وشوقي لج؟كيف ترجعين لي قلادة الي صممتها خصيصا لج؟..كيف هان عليج ؟مادريت عنج عديمة احساس ومشاعر..يعني ما قدرتي تقولينها في وجهي انج ما تحبيني وتبين تنفصلين عني..ما كانت عندج شجاعه كافيه تقولين لي روح عني ما ابيك؟..انا ناقص الحين تزيدين علي هم فوق هموم..بغيتج عون وسند لي صرتي لي....اه يا شهد هذه أخرتها معاج..هاي الوسام الي قلدتيني مقابل حبي وتضحياتي لج؟..انج تردين علي أغلى شي املكه في حياتي..ليش يا شهد ليش
وهنا لاول مره دمعت عيون وسيم..وحس بالقهر والغضب لاول مره من شهد.... كان وده يكسر اي شي يشوفه قدامه..حس ان شهد حطمت كبريائه وداست على حبه..وهدمت كل احلامه الي بناه طول هاذي الفترة...
ظل وسيم معصب ولما رجع للبيت ما كلم احد ولا حب يشوف احد..هو لو الود وده يصرخ ويطلع كل الي في داخله من القهر والغضب..بس ما قدر فهو مازال مصدوم من حركة شهد..
وفي غمرة انفعاله وغضبه قال:هين يا شهد انا اوريج..انتي تعتقدين انج الوحيده موجوده في هاي الكون وما في حد مثلج؟ان ما كسرت غرورج ما انا وسيم
وسيم في غمرة غضبه وانفعاله.ما جا في باله يتصل بشهد اويسألها سبب ارسالها لهاي الاغراض..فهو يدري معزتهم عند شهد طالما كانت دوم تتفاخر بيهم..وهنا المشكلة الانسان بشكل عام سواء كان رجل او امرأه..فنحن لما نسيء الظن نعصب وتتقفل عقولنا لا اراديا ونتوقف عن التفكير لان الغضب يكون مسيطر علينا..ساعتها ما نقدر نميز الصح من الخطأ....فأذا غضب الانسان يغلي دم قلبه وتصير عنده شهوة الانتقام وتمتلأ شرايينه ودماغه بدخان مظلم يسوء منه حال العقل ويضعف.. فكثير ما يؤدي الغضب المستعر في دقيقة واحده الى القاء الانسان في هاوية الهلاك والعدم..صدقوني ياما وقعت افظع الفتن وارتكبت افجع الاعمال في تاريخ بسبب الغضب وسوء الظن...ولان سوء الظن عادة يخلي الواحد يغضب على الاخرين..واحنا للاسف الكل مبتلين بيها بس القليل منا يعرفون كيف يتغلبون عليها
كثير ما نقع في حالة الغضب وسوء الظن سواء في العمل او الدراسه او في حياتنا الاجتماعيه حتى مع اقرب الناس لنا..فأذا سألنا حد اسئله عنه من باب حرصنا وحبنا له يعتقد الشخص ان احنا قاعدين نستجوبه!!واذا قلنا له انا ماراح ابعث لك الشي الفلاني.هو ساعتها يعتقد اننا قاعدين نمن عليه!!واذا ما سلم علينا احد او ما عزمنا في عرس اهله نظن به الظنون ....فمثلااحيانا الزوجه تقول لزوجها:ما حد قاعد يسمعني..او انت صرت ما تحبني..فهي واقعا تقصد من هاي الكلام اني ابي اليوم تمنحني انتباها خاصا..ابيك اليوم تسمعني فأنا ادري انك تحبني بس اليوم اشعر بشي من عدم الامان فهي تقصد من واء هاي الكلام ان الزوج يمهس لها بكلمتين سحريتين وهما انا احبج..بس تعالوا نشوف الزوج كيف يفسرها..فهو يعتقد ان زوجته تقصد من كلامها انه اصبح شخصا مملا واناني ومخيب لظنونها ويقصد انها تقوله:انا اعطيتك افضل ايام عمري وانت ما عطيتني شي انت اناني وبارد وما تهتم بأحد غيرك
والعكس ايضا موجودفلما يكون الزوج متضايق ويستخدم جمله"سالفه مو بتلك الاهميه"او لما يقول انا على ما يرام..فهو يقصدمنها انه بخير ويستطيع ان يتعامل مع ما يزعجه وما يحتاج الى اية مساعده..فهو يقصد ان الامر مو بتلك الاهميه لاني اقدر ان اصلحها...بس خلونا نشوف الزوجه كيف تحلل..فهي تقصد من كلامه ان زوجها قاعد يقول لها:انا ما مستعد اشاركج شعوري بالضيق فأنا ما اعتقد انج راح تفهميني و بتهتمي من اجلي وانج تجعلين من الحبه قبه
شوفو كيف تفسر الجمل بطريقة مختلفه فكل يغني بليلاه ..ولكن الى متى؟ واللائحة تطول وما تقصرفأحنا صرنا نسيء الظن بالناس وندينهم ونصدر عليهم أحكام من دون ما نسمع منهم..والغرابه والمضحك المبكي في سالفه ان احنا ننتهي في الاخر بأن احنا المظلومين!!
صدقوني لو كل واحد فينا يحسن الظن بالاخر ويبدأ يسأل الطرف الاخر هو شو كان يقصد بكلامه او بفعله لكان حالنا اليوم غير عن الحين..ففي حديث الشريف يقول:"أنما يهلك الناس لانهم لا يسألون"..جمله من ستة كلمات بس لو اخذناها بعين الاعتبار لسهلت علينا حياتنا وعواقب امورنا
وسيم غضب على شهد بسبب لانه اساء الظن فيها.. لو قعد مع نفسه شوي وسأل روحه عن سبب أرسال شهد لهاي الاغراض بهدوء وتعقل.. صدقوني ساعتها كان بيسمع مناجاتها..لو كان يسمع صوتها ما بين حروف اسمه في قلادتها..ولو كان يشوف معاناتها وحبها ودموعها ما بين سطور كلامه..لو قبل ما يسيء الظن فيها اتصل بشهد...بس في نهاية ننحصر بكلمة (لو)..لكن خلونا نشوف شو راح يصير فهل وسيم بيظل يسيء الظن في حبيبته ولا لا..تابعوني

الفصل السادس عشر .. الصدمة

شهد كانت جالسه في مكتبة الجامعه عشان تكتب بحثها..لكن تركيزها ما كان معاها..كانت سرحانه الى ان كلمتها نور :شهد..شهد وينج قاعده اكلمج
شهد:هه..خير نور شنو تبين؟
طفول:لا..البنت مو معانا
نور:انا من ساعه قاعده اكلمج عن البحث..وين رحتي؟
طفول:اكيد عند صاحب الظرف
شهد:طفول انتي متأكده انج سلمتي الظرف لوسيم؟
طفول:تراج طحنتي لي كبدي..هاي عاشر مره تسأليني نفس السؤال..كم مره اقول لج اي وصلته في نفس اليوم
نور:خير شهد..شو فيج اشوفج قلقانه ومو على بعضك؟
شهد:كيف ما تبيني اقلق ووسيم ما اتصل فيني من 10أيام من ارسالي للظرف
نور:اكيد مشغول وقاعد يقنع أهله..يمكن ما يبي يتصل فيج الا وهو مصفي اموره مع أهله
شهد:تعتقدين ؟
نور:ليش انتي مو واثقه منه؟
شهد:الا واثقه و زود..انا ادري انه ماراح يخيب ظني
طفول:زين ليش ما تتصلين فيه وتشوفين شو سالفه؟
شهد:خليني انتظر الليله واذا ما اتصل ساعتها بتصل فيه بكره..تصدقون وحشني صوته وضحكته..وحشني كل شي فيه
طفول:اوه..اوه..الله يخليج يا نور مسكيني حاسه نفسي بذوب من كلام شهد
شهد:ياالله عن طنازه..يوم الي بتحبين راح تحسي بمعاناتي
طفول:الله لا يجيب ذاك اليوم..اذا الحب يسوي في الوحده كذا ما ابيه
وظلت شهد قلقه مو من عادة وسيم يتأخر عليها..قامت وصلت صلاة العشاء وطلبت من ربها انه يسمعها صوت وسيم الليله..وكأن الباري استجاب دعائها.. وبالفعل رن تلفونها
شهد:ألو
وسيم:هلا كيفج؟
شهد ارتبكت وفرحت :الحمدلله.وانت شو أخبارك؟عاش من سمع صوتك
وسيم:عاشت أيامج
شهد حست من نبرة وسيم ان في شي في الموضوع..فهي مثلما قلت لكم كانت تحس فيه حتى وهو بعيد عنها
وسيم:عندي لج خبر
شهد قفز قلبها من بين ضلوعها وحست ان وسيم راح يقول لها شي هي تنتظره من فتره طويله..راح يقول لها عن خطوبتها و منو يدري يمكن عن زواجهم
شهد:خير
وسيم:باركي لي
شهد:مبروك..بس على شو؟
وسيم:أنا خطبت بنت عمتي
أنصدمتوا!!اوطلعت أه من فمكم؟؟..عيل شنو راح تقولون لشهد...شهد الي انتظرت طول هاي المدةعشان تسمع من وسيم عبارة طالما حلمت فيها..وانتظرتها..عباره(انا جاي أخطبج).. حست ان سماء انطبقت عليها وتمنت لو الارض انشقت وبلعتها..المسكينه حست ان في شي انكسر في داخلها بس ما عرفت شنو..شهد لاول مره في حياتها حست بالالم لدرجة انها شعرت ان ضلوع صدرها قاعده تصطك في بعضها..صدقوني وانا قاعده اكتب هاي العباره حسيت بهاي ألم..فالمشاعر الي انتابت شهد ما كانت هينه..كانت مؤلمه وموجعه بأختصار هدت حيل شهد لدرجه انها كانت واقفه جلست على الارض من هول الصدمه وحست ان رجولها ما قادره تشيلها
كل انسان يعاني معاناة في حياته..بس هاي معاناتها كانت فريده من نوعها..هاي المعاناة ألمها كان مختلف ..أهتها كانت غير..حتى دموعها طعمها كان شي اخر....شهد كانت عايشه على أمل... على ثقه ان وسيم ماراح يخيب ظنها..راح يحقق لها احلامها وامالها..صدقوني مو هين ان واحد يثق بحد وبعدين يكتشف انه ما كان أهل لها..وتمنيت وانا قاعده اكتب هاي العبارات ان الله لا يبتلي حد بهاي ألام والمعاناة مث لما ابتلت فيه شهد
تدرون وسيم كيف راح خطب بنت عمته؟خلونا نشوف
بعد ما رجع وسيم الى داره في يوم الي استلم ظرف شهد..صارت عنده ردة فعل قويه ..صار ما ياكل ولا يكلم حد لمدة يومين تقريبا..حتى أهله حاولوا يعرفوا السبب بس ما قدروا..الى ان راح وسيم مع أخته فاطمه يزورون عمتهم مريم ودار بينهم هاي الحوار:
عمة وسيم:ها وسيم انت الحين ما شاء الله خلصت الدراسه وقاعد تشتغل ما ناوي تخطب؟
وسيم:ليش في حد في بالج؟
عمة وسيم:شو رايك في بناتي؟عندي منى ومنال وانت بحسبت ولدي يعني مو غريب علي..وانت اولى من غيرك
وسيم بدون تردد وكأنه انسان ألي رد:ابي منال شو رايج؟
عمة وسيم:هاي الساعه المباركه..انا ما عندي مانع ..ومنال ماراح تحصل احسن من ولد خالها
انصدمت اخته فاطمه..بس ما علقت على شي
وسيم:عيل انا راح اكلم اهلي اليوم
وبالفعل رجع وسيم الى البيت وقال لاهله:ابيكم بكره تروحون تخطبون لي منال بنت عمتي مريم
طبعا أهله استغربوا فهو قبل أيام كان قاعد يحاول يقنعهم بشهد ..شو صار؟..هم ظنوا ان وسيم رجل مزاجي..هم ما كانوا يعرفون شو قاعد يصير بين وسيم وشهد
أهله ما ترددوا..منال اولى من شهد هي منهم وفيهم..فراحوا خطبوا له منال بنت عمته
خلوني اخبركم عن منال:
منال كانت في الصف ثاني ثانوي يوم وسيم خطبها..يعني كانت أصغر من شهد..ومافي بينها وبين شهد اي عامل مشترك ..لا في شكل ولا حتى اللون..منال كانت بشرتها اكثر بياضا من شهد وكانت أحلى منها ..وهي طيبه ومرحه بس بسيطه في تفكيرها وفي ثقافتها..منال كانت تملك كل مقومات الجمال والاخلاق يمكن اكثر من شهد لكن هي كانت تفتقر الى عفرتت شهد والى مزاحها وحتى بطريقة تفكيرها..بأختصار كانوا مختلفات عن بعض..وكأن وسيم لا اراديا حب يخطب وحده ما تذكره بشهد
خلونا نرجع بحوارنا مع وسيم وشهد
شهد:متى؟ وكيف؟ وليش؟
وسيم ابتسم..صج لو شو ما صار بتظل شهد تسأل 3أسئله في سؤال واحد لكن بعد ما اتذكر أغراضه الي بعثتهم شهد له..قال لها:قبل اسبوع خطبت وليش..كأنج ما تعرفين ليش..أبي أسألج سؤال..كيف هان عليج تبعثين دفتر خواطري وقلادتي بدون ما تقولين لي شي؟..يعني ما راعيتي مشاعري ولا اهتميتي بأحاسيسي؟انتي شنو قلبج من حجر ما يحس؟انا عمري ما قصرت معاج في شي ولا رديت لج طلب..عمري ما بخلت عليج في أحاسيسي ولا في مشاعري..هاي جزاي انج ترفضيني وترفضي حبي بهاي طريقه؟ودي اعرف كيف هان عليج؟
وظل وسيم يأنبها ويقرعها على فعلتها
شهد حست كل كلمه من وسيم كأنها سهام تنغرس في قلبها المجروح..هي في البدايه ما استوعبت كلامه..بس بعدين حست كأن حد صب ماي بارد على وجهها.. فهمت ان وسيم فسر أرسالها لاغراضه بطريقه تماما عكس الي كانت تقصده..هي كانت تبي تقوله انه غلطان وانها ما رسلت له الا عشان تحسسه انها معاه وواقفه بجنبه..كانت تبي توضح له كل شي..كانت تبي تقوله(انا أحبك) بس كلماتها ماتت على شفايفها وما شافت النور
فلا هي بررت عن تصرفاتها لوسيم ولا عن معاناتها ومحنتها له..كل الي قدرت عليه ان عيونها دمعت بس وسيم ما كان موجود عشان يشوفهم
وسيم:ليش ساكته وما تردين؟قولي شي
شهد:مبروك..ومتى الساعه المباركه؟
وسيم انقهر من برودة شهد.. كان يظن انها راح تبرر له عن تصرفاتها..وسيم كان وده شهد تقول له: انا غلطانه سامحني..ما كنت اقصد..بس كل الي حصل منها برود لا غير
وسيم وهو مقهور منها قال:خلال سنه بتزوجها وهي اسمها منال
شهد كانت تبي تسأله وتقول له:راح تحبها مثل ما حبيتني؟راح تشوف الدنيا بعيونها مثل ما كنت تشوفه بعيوني؟..وشو راح تناديها؟ بأسمها؟..كانت تبي تسأله شو راح يسوي بالارض الي اشتراها...هل راح يبني لمنال شقه مثل شقتها الي وعدها.. شهد كان في بالها مليون سؤال تسأله..وأول سؤال كان على طرف لسانها تسأله هو(كيف هان عليك؟)بس هاي السؤال ظل في داخلها وانقبر في قلبها المجروح
تتسألون ليش شهد ما وضحت له..ليش ما قالت الحقيقه لوسيم؟تدرون ليش؟لان شهد حست ان خطوبة وسيم لمنال في صالحه وراح تكون نهاية لمعاناته مع أهله..منال بنت عمته وهي مرحبه في عيلته وراح تقبل تعيش مع اهله في نفس البيت..شهد ظنت ان وسيم مع مرور الايام راح ينسى شهد..راح ينسى حب حياته..ومن طرف أخر شهد عندها كبريائها وعزة نفسها .. ظنت ان كل هاي الحب الي وسيم حبها مستحيل يفكر في وحده غيرها فما بال يخطب وحده وقريبا بيتزوجها
بس شهد ما كانت تعتقد انها راح تقدم قربان كبير عشان تنهي معاناة حبيبها..فقربانها كان قلادتها الي كانت سلوتها ودفتر حبيبها الي كان انيسها في لياليها المظلمه والموحشه
شفتو سوء الظن شو يسوي بالناس؟شفتوا كيف عدم سؤال يؤدي الواحد الى الهلاك؟...لكن انتوا تعتقدوا ان وسيم بيظل خاطب منال؟بيهون عليه يتكلم ويرتبط مع وحده غير شهد؟اوشو راح يصير في شهد ؟؟
تابعوني

الفصل السابع عشر .. اختيارنا

ظلت شهد جالسه على الارض لفتره وكلما كانت تحاول تقوم من مكانها ما قدرت..شهد منذو ارتباطها مع وسيم وهي كل يوم كانت تبني لها حلم حتى صارت عندها مدينة احلام بكاملها..تصوروا مدينه كانت تشتغل في بنائها لمدة سنه ونص..ليل نهار..صيف وشتا وفي لحظه اوفي طرفة عين ينهدم ويتحول الى ركام..صدقوني ما اعرف كيف اصف لكم حالها..بس كل الي اقدر اقوله ان قلمي عجز ان يكتب عن معاناة شهد..حاسه ان قلمي لاول مره يخوني وعباراتي ماتت قبل ما تشوف نور حبر قلمي..هي صارت تفكر في كلام وسيم لها كل كلمه من كلاماته انحفر في قلبها وظل محفور حتى بعد مرور 16سنه عليه..مو هين على شهد تسمع من وسيم عن خطوبته..انا أعتقد ما بيكون هين على اي وحده تسمع من حبيبها عن ارتباطه بشخص اخر سواء كانت خطوبه او زواج..هي تألمت واكثر شي الي خلاها تتألم أنها ما راح تسمع صوته..ما راح تسمع ضحكاته وسوالفه عن عمله وأهله..عن احلامه وطموحاته.. راح تحن لدلاله لحبه لكلماته..واكثر شي راح تحن لدفتر خواطره ولقلادته
حست انها تبي تكلم حد..تخبر حد عن الي صار معاها..بس منو؟..شوي شوي حاولت تقوم من مكانها وراحت لمكتبة ابوها..شافته لابس نظارته وقاعد يطالع كتابه.. شافها تدخل بهدوء وعيونها منتفخه وحمرا..وقفت قدامه وقالت لابوها:انا اووسيم انفصلنا
ابوخليل انصدم بس تمالك نفسه ورد:خير..ليش؟
شهد:ما اتفقنا..وهو خطب بنت عمته
ابوها حس بألم بنته وما سألها عن سبب خطبت وسيم.. راح لها وقعدها على كرسي وقعد قبالها :وانتي ليش حزينه..لانكم انفصلتوا ولا لانه خطب وحده غيرج؟
شهد:الاثنين..بس صدقني يا بوي انا فرحانه له
ابوخليل:المفروض تفرحين لنفسج بعد
شهد:ليش افرح لنفسي؟
ابوخليل:لانج خضتي تجربه علمتج معنى الحب..علمتج كيف تحبي وتعطي..شهد الحب خلاج انسانه قويه ..انسانه متمسكه بمبادئها وبالقيم والافكار الي تؤمن فيها..ما ابيج تشوفين من منظار مظلم..من منظار ان وسيم راح عنج واخذ وحده غيرج..ابيج تشوفين من منظار اخر..منظار الحياة والعطاء..انا كل الي ابيه منج الحين انج ما تضعفي ولا تنهاري لان الحياه حلوه فليش نعيش في خرامة ابره والحياه اكبر من هاي الخرامه
شهد ارتاحت من كلام ابوها..بس ظل الالم والحزن مسيطر عليها وبصراحه ما تنلام..فعلى الحب الي حبوا بعض ما كان هين عليها..وما اقول غير الله يصبرها على بلائها
وسيم لما سكر التلفون عنها حس بألم في ضلوعه.. ظن انه لما بيقول لشهد عن خطبته راح يشفي غليله..راح يحس بطعم الانتصار..لكن كل الي حسه ألم وحزن.. صدقوني الى الان مستغرب حتى بعد مرور سنين من عمره انه كيف قدر يقول لها انه خطب بنت عمته بهاي سهوله ..كيف هان عليه يقول لحبيبته انه راح ياخذ وحده غيرها..كيف؟
وفي نفس الليله ابوخليل خبر زوجته عن سالفة شهد مع وسيم..ام خليل استغربت:ليش انفصلوا؟هي ما قالت لك؟
ابوخليل:لا وانا ما سألتها
ام خليل:ليش ما سألتها؟
ابوخليل:لانها لو كانت تبي تقوله لي جان قالت..انا خليتها على راحتها بس والله البنت عورت لي قلبي
ام خليل:بصراحه انا فرحانه..لاني كنت احاتي بعاد شهد عنا كنت افكر في غربتها وعيشتها مع ناس احنا ما نعرفهم
ابوخليل:شوفي يا ام خليل ما ابيج تجيبين ذكر وسيم قدامها..ولا اقولج ما ابي اسم وسيم ينذكر في بيتي بعد الحين..ابي شهد تعيش حياه طبيعيه خاليه من العقد..سمعتيني؟
ام خليل:ان شاالله من عيني هاي قبل هاي
وفي يوم الثاني راحت شهد للجامعه..وشافت نور وطفول يتناقشون في موضوع البحث..:هلا بطالبات العلم
نور:هلا فيش..وينج تأخرت اليوم عن المحاضره
طفول:أكيد كانت تحلم بحبيب القلب وسيم
ولما سمعت شهد اسم وسيم دمعت عيونها
نور:شهد خير شو فيج؟
ظلت شهد ساكته ودامعة العين
طفول:شو صار لج تراج بدموعج طيحتي قلبي في رجولي وما قادره امشي شوفي
وسوت نفسها عرجه
هني شهد ضحكت ما بين دموعها وقالت لطفول:والله انج سخيفه وبايخه بس احب حركاتج..وسكتت شوي واخذت نفس طويل وقالت لهم:وسيم خطب بنت عمته
نور وطفول في نفس الوقت:شو؟؟
شهد ما قدرت تكرر هاي العباره مره ثانيه لانها اذا كررتها راح تنفجر من الصياح فقالت لهم:مثل ما قلت لكم
نور:انتي متأكده؟يمكن الي قال لج غلطان ويبي يمزح معاج
طفول حطت ايدها على جبين شهد وقالت:و يمكن قاعده تحلمين
ابتسمت شهد ابتسامة الحزن وقالت لهم:صدقوني اتمنى اني كنت نايمه أو قاعد حد يمزح معاي بس هاي هي الحقيقه
نور:وانتي شو دراج منو قال لج؟
شهد:امس بالليل وسيم اتصل فيني وخبرني واسمها منال
طفول:بس ليش؟والله خليني أرجع لاهلي ان ما رحت عنده بالمكتب وشرشحته مب انا طفول..شو بنات الناس عنده لعبه
شهد:لا تلوميه..أنا السبب
نور:كيف؟
شهد:تتذكرون الاغراض الي بعثت له؟هو على باله اني بعثتهم عشان ابي أنفصل عنه هو ظن اني ما أحبه وما ابي ارتبط بيه..هو اعتقد اني حطمت كبريائه ودست على كرامته وحبه
طفول:وانتي يالغبيه ليش ما قلتي له الحقيقه؟
شهد دمعت عيونها وقالت:كيف اقول له؟..بالله عليكم قولوا لي كيف اقول له؟وهو اول ما اتصل فيني قال لي عن خطوبته وطاح فيني يأنبني على فعلتي..حسيت في ذيج اللحظه ان لساني انعقد من زود الصدمه..ما قدرت اشرح له..حسيت ان ارسالي لاغراضه في نهايه طلع لصالحه فأهله ارتاحوا لفكرة خطوبته لبنت عمته ومثل ما يقولون القريب أولى من الغريب
طفول وهي تقلد شهد:القريب أولى من الغريب..سمعيني عاد ياشهد انا ما كنت اتصور أني راح بصادق وحده غبيه مثلج..ليش ما قلتي له الحقيقه..كيف تقبلين واحد ياخذ عنج فكره انج انسانه مستهتره وغير مباليه؟..وأنا استغرب من المعتوه هذا الي أسمه وسيم..كيف يستعجل ويروح يخطب وحده خلال اسبوع من دون ما يتصل فيج..بصراحه أنتوا كنتوا ملائمين لبعض فأثنينكم أغبيه وما تعرفون كيف تتصرفون
نور:تدرين لاول مره اتفق مع طفول..انتي كان مفروض عليج توضحي له وتخبريه بالحقيقه وتخليه ساعتها هو يحكم ويختار
شهد:كيف اخبره يا نور؟انا اذا قلت له الحقيقه ساعتها أنا متأكده انه راح يفسخ خطبته مع بنت عمته..وانتو تعرفون شو معنى هذا؟..معناته راح تصير له مشاكل مع أهله و يمكن قطيعه بسبة منو؟طبعا انا..أنا ما صدقت الامور مشت في صالحه تبوني الحين اجي أخرب عليه كل الي سواه؟
طفول:بس انتي منو حتى ترسمين له حياته؟انتي منو حتى تحكمين شو في صالحه؟!انتي منو أصلا حتى تعرفين شو زين له؟شو هو ولد صغير ما يعرف كيف يدبر أموره؟..لا يا شهد أنا أعتقد انج ظلمتيه مثلما هو ظلمج..وبعدين اموت بس أعرف هو كيف هان عليه يروح يخطب غيرج..وحده هو حتى ما يحبها..صج انه غبي مثل ما انتي غبيه
نور: والله يا طفول طلعتي مب هينه..صرتي ترمسين مثل دكتور فيل الي يجي بتلفزيون
طفول:منو فيل هذا...أصلا انتو ما تعرفون قيمتي..انا دكتوره طفول النفسانيه الي ضايعه ما بين ناس امثالكم
نور:ياالله عاد مصختيها..خلاص يا شهد انسي الموضوع والي فات مات..وكل واحد ياخذ نصيبه
طفول: اي نصيب و اي خرابيط..انا اعتقد في السالفه ان وأخواتها
شهد:ما فهمت
طفول:معقوله واحد يحب وحده بهاي الشكل ويكافح عشانها وفي نهايه يروح بكل سهوله يخطب بنت عمته؟..بصراحه السالفه ما تدش العقل..انا أعتقد ان حد مسوي له شي
ضحكت نور:والله انج رجعتي لأصلج يا طفول صج انج بدويه وتفكيرج رجعي..شو حد مسوي له شي
طفول:ليش مو وارد؟
شهد:لا مو وارد ولا أنا أؤمن بهاي الخرافات وبصراحه انا ما أؤمن ان هاي نصيبي وقدري
نور:ما فهمت عليج
شهد:مثل ما قلت لج..أحنا صرنا نرمي فشلنا في الحياه اما على نصيب وقدر واما على خرابيط طفول..وكأنهم شماعه نعلق عليهم فشلنا..أنا ووسيم كل الي سويناه كان بأرادتنا ومحد جبرنا عليه

تدرون شهد معاها حق في هاي الكلام..فالمولى تعالى اعطانا كل شي..أعطانا نعمة العقل والبصر والسمع والكلام..فهل من المنطق يجي يسلب منا نعمة الاختيار؟..صحيح الانسان في امور هو مسير فيها بس في امور وايد هو مخير فيها ..الانسان عادة يكون مسير في اشياء خارجه عن ارادته مثل العمر والمرض والرزق..بس بقية امور حياتنا اعطانا الزمام بأيدنا..الله عزوجل فتح لنا ابواب الدنيا على مصرعيها بس احنا الي ما قاعدين نشوفه..العجب بينا احنا بني البشر لما نتوفق في حياتنا واختياراتنا نقول احنا تعبنا وكافحنا عشان كذا نجحنا..بس لما نفشل في محطه من محطات حياتنا ما نجي ندور سبب ما نجي نحاسب انفسنا فكل الي نقوله والله هاي نصيب وقدر!!أحنا اذا ما جبنا درجات عاليه واخترنا تخصص ما يعجبنا نرمي السبب على القدر!!واذا تغيرت احوالنا الى اسوء نقول اكيد حد حسدنا ومسوي لنا شي..قله القليله منا الي يعترفون بتقصيرهم..بخطأهم لحسابات حياتهم...مثلا احيانا واحد يكون متزوج وحده وما مرتاح معاها بس متحملها عشان اولاده او العكس صحيح..هاي الشخص ما يقدر يجي يقول هاي نصيبي لانه هو اختار انه يكمل معاها ويتحملها..صحيح ان اختياره في محله بس في نهايه كان اختياره..فمو كل اختياراتنا لازم تسعدنا..في عوامل تلعب وتخلينا نختار اشياء احنا ما مقتنعين بيها بس في نهايه مثل ما قلت كان(اختيارنا)وكل من هاي الاختيارات لها ثمن لازم ندفعها لان دنيا واقفه على معايير تبادل وعلى اسس المحاسبه والثمن(فمن يعمل مثقال ذرة خيرا يره ومن يعمل مثقال ذرة شرا يره)...فحتى الله تعالى ما جبرنا ان نعبده وانما عطانا حرية الاختيار ولكن لكل شيء ثمنه(فأما شاكرا واما كفورا)..ف هو جلا وعلا جمع بين قلبين وسيم وشهد وسهل عليهم امور كثيره من موافقة شهد لوسيم الى رضى ابوها على حبهم..بس اول معضله حطه قدامهم وهم ما قدروا يتجاوزوه..وسيم محد ضربه على ايده عشان يروح يخطب منال فهو اختارها بأرادته وبرضاه..وشهد محد قال لها ترسل الاغراض وبعدين ما تشرح له...كل ما في سالفه انهم اختاروا واخطئوا في حساباتهم..او تقدروا تقولوا ان وسيم غلبه عناده...وشهد غلبها كبرياءها
بس تعتقدون ان وسيم وشهد بيظلوا يمشون بدون ما يحاسبون نفسهم؟...تابعوني