كاتب الموضوع :
نسايم نجد
المنتدى :
القصص المكتمله من وحي قلم الاعضاء
اشكر الجميع على مراعاة ظروفي والحمدلله المانع كان خير ( اشكر ريوومه على تنفيذها لطلبي)
الثامن والاربعون
اليوم الثاني
عند هند
قامت بدري واخذت شور لبست تيور رسمي طلعت للمطبخ طلبت من الشغاله تجهز لها فطور خفيف مع كاس كبتشينو
نادت هنديانا وطلبت منها تقول لعمران يجهز السياره بداوم بشركه
وصلت لغرفة الضيوف الي ينام فيها خالد طقت الباب طلعت لها غاده
غاده نعسانه / تبين شي وش هالازعاج على الصبح
هند بجديه / قولي لخالد يلحقني لشركه الساعه عشر عندي اجتماع مع الموظفين الجدد
غاده / ا ن شاء الله
هند / لا تنسين وتروح عليكم نومه انتظره بشركه
غاده / ان شاء الله
طلعت هند من القصر مع عمران لشركه وغاده صحت خالد الي بالعزر قام لانه نايم متاخر
عند هند
وصلت لشركه دخلت مكتبها لقت باستقبالها السكرتيره الجديده نزلت عبايتها ونقابها انبهرت السكرتير بجمالها الساحر الطبيعي
جلست على مكتبها وطلبت من السكرتيره الاوراق الضروريه الخاصه بالشغل بتدرسها وطلبت منها تطلب من الموظفين ان عندها اجتماع الساعه عشر
في مكتب مطلق نائب المدير
كان جالس بمكتبه يراجع بعض الاوراق سمع صوت تلفون مكتبه رفعه كانت السكرتيره تقول له عن الاجتماع قفل منها وهو مستغرب وجود هند المفاجئ بالشركه
طلع من مكتبه بطريقه لمكتب مشعل ووليد الي اول دوام له اليوم
طق الباب وفتح / مشعل وليد مديره الشركه موجوده طالبتنا باجتماع الساعه عشر
مشعل باستغراب / متى جت وش عندها
وليد / الله يستر من الاجتماع شخصيتها مرعبه
مشعل / من وين تعرفها
وليد / مايحتاج سمعتها سابقتها انسانه يتشرف الواحد انه يشتغل عندها
مطلق / والله انك صادق لو اعد جمايلها علي مستحيل اوفيها
مشعل / لولاها كان الحين بديرتنا نصيد ذبان
مطلق ووليد / ههههههههههه
مطلق / يله عازمكم على فطور بمطعم الشركه ضيافه لوليد
وليد / ما تقصر يبو ضاوي
طلعو لمطعم الشركه ومطلق ومشعل مرتاحين لوليد لانه انسان ينحب واخذو عليه بسرعه وهو بادلهم نفس الشعور
عند خالد
طلع من البيت وصل لشركه دخل مكتب هند
شافها مشغوله بالاوراق قرب منها وجلس بالكرسي المقابل
خالد / السلام يالله صباح خير على طول دوام
هند وعيونها بالاوراق / وعليكم السلام يكفينا الايام الي فاتت اجازه جاء وقت الشغل
خالد يبتسم / على طول طالبه الموظفين باجتماع مايمديهم اشتغلو
هند رفعت عيونها من الاوراق / وانت وش مقعدتك عندي روح شوف شغلك تراك اشغلتني
خالد / اخو المديره يحق لي اتدلع
هند بعصبيه / من متى هالشي معترف فيه بالشغل الي ينطبق على غيرك ينطبق عليك ويله روح لشغلك وقبل الساعه عشر وانت مرتز بغرفة الاجتماعات
خالد / حاضر عمتي يمه منك تخوفين لعصبتي افردي العقده شوي
هند بعصبيه / خلوووووود
قام خالد من الكرسي / قمت اخاف تفصليني من الشغل
طلع من مكتب اخته وداخل مكتبه ماعنده شغل جلس شوي وطلع يبي يسوي جوله استطلاعيه للموظفين
دخل على مكتب مطلق وقف له مطلق احتراما وخالد طلب منه يجلس
خالد / لا جيت مره ثانيه رجاء خاص لا توقف لي احنا هنا مثل بعض وانت اعلى مني المدير بيدك تفنشني
مطلق يبتسم / ماعاش من يفنشك العين ما تعلى على الحاجب
خالد / المهم وصلكم ان فيه اجتماع
مطلق / ايه
خالد يبتسم / وش رايك اصير واحد من ربعك بذا الديره جالس وحيد
مطلق بابتسامه / اكيد وحنا نطول
خالد / وبالمناسبه مدامك عزابي تعال الليلة عازمك على عشاء بيتي
مطلق بحياء / مرتبط مع ولد خالتي ووليد اليوم بيسكن معنا بشقتنا
خالد باصرار/ ياهلا فيك وفيهم انتظركم الليله تجون بدري علشان تنامون بدري لا تذبحنا المديره
مطلق / الله يخليها لك
خالد / امين الله يعين اليوم شكلها معصبة طردتني من مكتبها شكلها بتفجرنا بالاجتماع
مطلق / ههههههههههههه
في الديره
صحى جاسم صلى الفجر وطلع من غرفته رايح لمكان المدرسه جالس على المرجيحه ينتظر موعد العمال ماله خلق يدخل داخل يحس المكان يكتم على انفاسه ونظرات امه له نيران تحرق قلبه كل الي هو فيه غصب عنه
وهو غارق باحزانه واوجاعه قطع عليه فيصل
فيصل بحزن / جاسم بروح لرياض تروح معي
جاسم / لا باخذ اجازه وبقضيها هنا وبشرف على المدرسه
فيصل بوجع / ياخوي وجودك بيقلب عليك المواجع كل شي هنا يذكرك فيها
جاسم بعصبيه / فيصل تسهل وروح بطريقك ترى نفسي بطرف خشمي
فيصل / تعال داخل بنفطر سوى ولا نفطر هنا
جاسم بحزن/ النفس عافت الاكل
فيصل / هذا انتحار ياخوي وين الي يقولي وينصحني مانبين لامي تعبنا ونصير بارين فيها
جاسم بوجع وحزن / وش تقول في اخوك ضعف ودمره حبه والله يافيصل الي فيني غصب عني ياليتني ماعرفتها ولا حبيتها
فيصل بحزن / تقول هالكلام لي ياخوي الي يشوفك يقول اني مبسوط ومرتاح تدري اني ما نمت طول ليلي وانا افكر في اختها من اول يوم شفتها لا خر يوم
وتفكيري وصل لبريطانيه وش تسوي من معها كيف حالتها تاثرت بوفاة ابوها ولا الامر عادي عندها
للحين تتذكر واحد مر بحياتها اسمه فيصل ولا اكون صفحة ونطوت بحياتها
كل تفاصيلها محفوره بقلبي وبعقلي
تدري اني نقلت فرع لشركتي لبريطانيا ابي اصير قريب منها لا تشكي لي ياخوي ابكي لك
جاسم بالم ودموعه متحجرة بعيونه / هند قالت ان قلبها اسود ابوها مات ما قدرت تسامحه
ضعفت وترجيتها ترجع لي طلعت ولا عبرتني هوايتها تعذيبي وتسليتها جرح كرامتي
ومع كل هذا والله اعشقها ومجنون فيها
لو ترجع لي بسامحها واغفر لها كل الي سوته فيني
فيصل يضحك بالم / هههههههههه بنات عمك فيهن سحر غريب سرقن قلوبنا وبدون ما يعطنا ريق حلو كل الي سونه فينا تجريح واهانات ومع كل هذا حبهن بقلوبنا يزود اكثر من قبل
سمعو صوت جرس الباب قام جاسم فتح الباب كانو العمال
في بريطانيا
قامت من النوم وهي كسلانه حاسة بصداع براسها حاسة بحزن وضيقه ماتدري السبب
طلعت لصاله جلست شوي بعده قامت للمطبخ يبي تجهز فطور فهد
جهزت سندويشات بيض وعصير لها ولفهد رتبتهم وطلعت بتصحيه طقت الباب ماسمعت رد فتحت ودخلت شافت سريره خالي وصوت الماء بالحمام طلعت سمعت صوت جرس الشقه وصلت للباب كان صلاح الي عند الباب متواعد مع فهد يجيه بدري ويفطرون سوى
غاده / منو عند الباب
صلاح / انا صلاح
غاده كشرت بوجهها / صلاح فهد بالحمام اذا طلع قلت له يتصل فيك
انقهر منها تكلمه من وراء الباب وشكلها تصرفه / عند فهد خبر بجيه بدري افتحي الباب ودخلي غرفتك
انقهرت منه ولا ردت وطنشته ودخلت المطبخ وجلست تفطر ولامهتمه فيه
وهو برا يغلي من القهر لانه سمع صوت رجولها تبعد وعرف انها تركته عند الباب
في هذي الحظة لو كانت بين ايدينه ذبحها من القهر رجع لشقته
طلع فهد من غرفته لقى غاده سابقته بالفطور
فهد / اشوف الخيانه مانتظرتيني
غاده طالعته بنص عين وكملت اكلها
فهد / ااااوه الحلوين زعلانين ماذكر اني زعلتهم
غاده بزعل / صلاح كان عند الباب وفهمته انك بالحمام وطلب افتح له ينتظرك بالصاله وانا طنشته وتركته يتنقع واقف ينتظرك
فهد بعصبيه / وبعدين معك غاده على الاقل احترميه من احترامك لي تحسبين ماشوف معاملتك له
غاده / انت وهو احرار لكن بعيد عني مستحيل تتغير معاملتي له بيعتبر بنظري رجال غريب
فهد بانفعال / تدرين انه خطبك وانا موافق وخالي لا درى بيوافق وهذا بيكون يوم المنى عند ابوي
غاده وقفت عن الكرسي بعصبيه / يخسى اكون زوجته لو انه اخر رجال بالكون ما تزوجته فهم هالكلام لصديقتك سديت نفسي عن الفطور
فهد بعصبية / من تنتظرين فيصل الي انحشتي عنه قطع كلامه كف قوي على وجهه من غاده
غاده وهي تبكي وتشاهق / يا خساره يا فهد اني اعتبرتك اخوي وفتحت لك قلبي صرت تعايرني بهمومي واوجاعي روح لصديقك الي فضلته علي
فهد منصدم من الكف واوجعه قلبه من كلامها هو كان منفعل وقال كل الكلام من غير وعي
غاده وصلت لغرفتها والتفتت عليه / داوم مع صديقك انا بغيب والبركه فيك يولد خالي
دخلت غرفتها و تركته وراها يتوجع من وجعها حس بتانيب الضمير
لانها اول مره تعصب و تقسى عليه هالكثر وتناديه بولد خالي لانه فتح جروحها واستهان بوجعها
نفسه يلحقها لغرفتها ويسحبها لحضنه ويعتذر منها وقفت معه يوم احتاجها يكون هذا رده عليها لازم يراضيها ويعلمها قدرها عنده بيتركها لين تهداء وبيراضيها بطريقته
دخل لبس ملابسه وطلع من الشقه مهموم و متضايق وهو طالع طلع صلاح
صلاح / السلام
فهد بدون نفس ماله خلق لاحد / وعليكم السلام
نزل من غير ما يتكلم معه لحقه وهو مستغرب حالة صديقة المعتفسه
صلاح / فهد وش فيك
فهد بعصبيه / امش وانت ساكت مالي خلق لك
صلاح / اختك وينها ليش ماداومت
فهد عصب / مالك شغل باختي خلها بحالها
صلاح مستغرب من اسلوبه قرر انه يسكت
وصلو للجامعه وهم ساكتين
فهد لمح ندى من بعيد واضح انها تنتظر غاده وصل لعندها وصلاح راح بطريقه
ندى لما شافت فهد جاي لها استحت وارتبكت
فهد / ندى شخبارك
ندى بحياء / بخير وينها غاده
فهد / هذا الي جابني لعندك
ندى بخوف / صاير لها شي
فهد / تقدرين تسحبين على محاضراتك وتطلعين لها
ندى / وش فيها مريضه
فهد بحزن / انا قسيت عليها من غير قصد دخل بينا الشيطان وزعلت علي انا اعترف اني غلطان ومتفشل منها مدري شلونا اراضيها قلبي موجعني اني تاركها وراي تبكي ومتضايقه لكنها ما تتقبل مني شي
ندى رحمته لما شافت الحزن والندم بعيونه ابتسمت ابتسامه موساة / بطلع لها الحين وتطمن غاده تحبك وانتم اخوان مستحيل تزعل عليك
فهد / ياليت يله لازم ادخل محاضرتي لا وصيك حاولي تغيرن من نفسيتها ومسموحه لو بطلعينها برا البيت
دخل محاضرته وندى كلمت امها وقالت لها ان غاده مريضه وستسمحت تروح لها ووافقت امها بعدها كلمت ابوها طلبت منه يطلعها من
لجامعه بعد ربع ساعه وهو عندها
طلعت له
ركبت السياره / السلام
ابوها / وعليكم السلام خير وش صاير مخليك تطلعين
ندى / اخوها قالي انها تعبانه وطلب مني اروح عندها خايف عليها لانه مضطر يتركها
ابوها / ومحاضرتك
ندى / بابا انا بنتك طالعه لك ذكيه وما ينخاف علي
ابوه يبتسم / كل فتاه بابيها معجبه
ندى بابتسامه / كل فتاة بابيها مغرمه ابي اتزوج واحد نسخه منك ولا اعنس ابرك
ابوها بحب / الله يفرحني فيك واشوفك ببيت زوج يخاف الله فيك
ندى / امين
ابوها / ههههههه دعوه من قلب مستعجله على الزواج
ندى بحياء حمر ت خدودها / يبببببببببببه
ابوها طالع فيها وهي مستحيه / هههههه وين ام لسان طويل كل ذا حياء
بالطائف
عند هند
هند بمكتبها تجهز اوراق الاجتماع جتها السكرتيره
السكرتيره / استاذه هند الكل بالاجتماع ينتظرونك
هند / دقائق البس واجي
لبست هند عباتها ونقابها وتسترت ودخلت غرفة الاجتماعات من باب مكتبها دخلت جلست على كرسيها بجانبها اخوها خالد
هند بهيبتها / السلام معكم هند الفهد صاحبة شركات الفهد هذا اول لقاء بينا ممكن تعرفوني باسمائكم
مطلق رفع راسه من الاوراق / معك مطلق ضاوي مدير الشركه
وليد / معك وليد مرزوق اليوم اول دوام لي ولا اعرف مكانتي بالشركه
مشعل / معك مشعل مبارك جيت الشركه مع مطلق واجهل مكانتي بالشركه
خالد ابتسم / معك خالد عبدالرحمن جاي من الديره مع المديره
هند مسكت ضحكتها من خالد / يشرفني التعامل معكم وثقتي فيكم كبيره انكم بتساهمون بتطور شركتنا
اهم شي عندي التعامل والحب بينكم لان مع الحب الي بينكم والاحترام بتزدهر الشركه
ياليت نبتعد عن الغيره والحقد والكره لاني مستحيل ارضى فيهم بشركتي
وفرت لكل واحد منكم فله وكتبتها باسمه تقدير من الشركه على جهودكم وغربتكم عن اهلكم لكني مستحيل ارضى ابعد الولد عن اهله
بعد سبوع باذن الله بتكون الفلل جاهزه وبتستلمونها ياليت تسرعون وتجيبون اهاليكم حطو عندهم خبر من الحين مراح اسمح الا بيومين تجيبونهم وتجون ما يحتاج يجيبون معهم شي الا ملابسهم المكان مجهز لهم بكل شي
الكل من داخل فرحان ومن قلب يدعي لهند لانها كاشفه الي بداخلهم الي منغص عليهم فرحتهم بعدهم عن اهاليهم وفرحو كثير بالفلل
مطلق / استاذه هند انا ما قدر اجيب اهالي حاليا
طالعته هند / ليش وش الي يمنعك
مطلق / ابوي عنده نياق متعلق فيها وشارط علي ما يجي الا معها وانا وعدته ادبر لها مكان وبعدين اجيبهم
هندبجديه / محلوله استاذ مطلق عندي استراحه فيها مجموعه من الخيول هات نياق ابوك المكان بعيد شوي عن الطايف والي عنده نياق او شي يجيبهم بالاستراحه مؤقت لين نوفر لهم مكان
مطلق فرحان / مشكوره والله يجزيك خير
كملت هند بجديه / لا تعتبرون الي سويته لكم صدقه مثل ما بعطيكم باخذ منكم لكل شي مقابل
انا بستمر معكم هنا بالشركه فتره بسيطه وبعدها بسافر واستقر بابريطانيا
مطلق مستغرب شلون بتسافر وتترك زوجها جاسم لكنه ماهتم لان فرحته تغطي عن كل تسائلاته
هند كملت / انت يامطلق بتكون بمكاني وبمكتبي لسافرت
وانت يامشعل نائب المدير وانت ياوليد مدير العلاقات العامه ومسئول عن الوفود الاجنبيه الي تجي لشركه أي احد عنده اعتراض
الكل ساكت راضين بقرار هند
كملت هند / قبل لا انهي اجتماعي حبيت ا قول اذا جبتو اهاليكم مسويه لهم عشاء استقبال بقصري
انتهى الاجتماع كلن يرجع لمكتبه
قامو وطلعو قام خالد بيلحقهم مسكته هند بيده ورجعته على الكرسي ونزلت نقابها
هند بحب / احبك ياخوي
خالد رفع حواجبه / خير اليوم المدير راضيه علي وتتغزل فيني وش عندك يا خوفي وراك مصيبه تبيني اسويها لك
هند / ههههههههه لا لكني اليوم قسيت عليك
خالد بابتسامه / طول عمرك قاسيه ومشيبه راسي والحنان ممنوع بالشغل شلي تغير
هند / مالت عليك الخبله الي جالسه تتغزل فيك
خالد بيقهرها / مستغني عن غزلك ربي يخلي لي غدويتي يحلوها ويحلو غزلها
هند بتقهره / لا تخليني اسفرك لشركتي برياض وبعدك عن غدويتك
خالد بخوف / لا والي يعافيك توبه اعرفك تسوينها
هند تذكرت انها ماكلمت جداتها ولا طمنتهن عن وصولها
هند / خالد عطني جوالك
خالد / ياذا الجوال اشوفه معك اكثر منه معي
هند بجديه / بطمن جداتي حرام نسيتهن وانا مواعدتهن او موصل اتصل فيهن
مدت خالد الجوال لها وقف / انا طالع متى ماخلصتي مكالمتك جيتك اخذ الجوال
هند / خالد اليوم اطلع لي جوال لمتى بعتمد على جوالك باتصالاتي
خالد بحب / هانت ياهند اصبري كله خوف عليك
هند / خوف ماله داعي
خالد بعصبيه / حياتك بغت تروح وتقولين ماله داعي اجل الي له داعي شنو عندك
هند / روح شوف شغلك لين اخلص مكالمتي
طلع خالد تركها وراه مسكت الجوال ادور على رقم جاسم لقته اتصلت عليه
في بريطانيا
وصلت ندى لشقة فهد طقت الباب كانت غاده بالصاله متضايقه وندمانه على على الكف الي اعطته فهد وندمانه على تجريحه متاكده انه متعذب اكثر منها وندمان وهي بتفكيرها سمعت صوت الجرس استغربت من بيجيها بالوقت هذا وصلت للباب
غاده / منو عند الباب
ندى بمزح / حرامي جاي اخطف وحده حلوه اسمها غاده
غاده عرفت صوت ندى وفرحت انها جت بوقتها ترحمها من تفكيره فتحت الباب واستقبلن بعض بالاحضان
ندى / سلامتك ليه زعلانه
غاده / من قال اني زعلانه شوي تعبانه
سحبتها ندى وجلستها على الكنبه
ندى / غاده فهد قال وطلب مني اجيك وقالي انك زعلانه منه وانه تطاول عليك ومعترف بغلطته وهو يحاتيك وخايف عليك وانت زعلانه شاف الي سواه شي كبير ماله وجه يعتذر منك على اني اجهل الي صار لكن ياغاده فهد يحبك وخايف عليك والزعل والهواش يصير بين الاخوان
غاده احمدي ربك عندك اخوان تتهاوشين معهم وانتي متاكده انهم يخافون عليك من الهواء الطاير سندك وعزوتك شوفي حالتي اتمنى اخو واخت لكن ربي ماراد
تدرين فهد وش قال
غاده رفعت عيونها لندى / اش قال
ندى / يقولي مسموحه طلعي غاده المكان الي تبيه
غاده زاد عندها تانيب الضمير / انا بعد قسيت عليه فوق ما تتصورين تخيلي مديت يدي عليه جعلها انكسرت ولا انمدت مجنونه لما ازعل تصرفاتي متهور تسبق تفكيري وهذا الي صار اليوم ولا وبعد يتوجع بسبب زعلي وموصيك علي
ندى / اشتري له هديه وفاجئية بعتذارك لجاء بطريقه عمليه
غاده / اجل يله بطلع اشتري له هديه وجهز له غداء محترم تعبير عن اعتذاري
دخلت غرفتها بدلت ولبست حجابها وطلعت مع ندى لسوق
دخلت لافخم المحلات لبيع الساعات اشترت له ساعه غاليه ودخلت محل عطور وشرت له عطر فخم
طلعت ندى بعيد عن غاده وكلمت امها وطلبت منها تجهز غداء لغاده وفهد مسويه مفاجئة لغاده
طلعن من السوق استغربت غاده ان الطريق يودي لبيت ندى
ندى انزلت / غاده شوي وجايه انتظريني
دخلت عند امها اخذت الغداء و طلبت من الشغاله توصلهم لسياره وتركب معها لانها بتنزل ندى وبترجع مع الشغاله للبيت
لما وصلت لسياره تفاجئت غاده من الاغراض
ندى ركبت جنب غاده / هذا غدى معتبر رضاوه لفهد
غاده / كل هذا كثير ندى
ندى / انتي اختي ليه كل هالحساسيه لو اني بالرياض وامي بعيد عني بتسوين معي اكثر من الي اسويه لك
غاده بحب / اكيد
وصلن لشقة فهد ورتبن الاغراض ورجعت ندى والشغاله لبيتهم
في الديره
كان يراقب العمال سمع صوت جواله طلعه من جيبه انتفضت يده وهو يشوف رقم خالد
رد بصوت مرتجف / الو
عند هند
اشتاقت تسمع صوته لكنها منعت نفسها من التعمق بالاحساس
تتكلمت برسميه / دكتور جاسم ممكن اكلم جدتي
اوجعه قلبه من طريقتها الرسميه بالكلام معه
بصوت عاشق/ اسئلي عن احوالي يا بنت العم اقولك من بعد غايبك ماني بطيب لاليلي ليل ولا نهاري نهار حتى الاكل عفته ردي لي قلبي الي اخذته معك وسافرتي ارحمي عزيزي قوم انذل
مايسمع الا صوت تنفسها السريع
هند ودموعها على خدها متاثره من كلامه حاسه بوجعه لكن مستحيل تخضع له فيه شي داخلها يمنعها
جاسم بصوت كله حب وعشق وبصوت ذايب / طمنيني عنك شلون جرحك ما تعبك السفر حلفتك بالله تهتمين بصحتك علشاني
لما سمعت صوته الي كله حب وعشق حست بقشعريره سرت بكل جسمها
هند بصوت مبحوح تحاول تكون طبيعيه / اذا جداتي مشغولات اكلمهم بيوم ثاني
جاسم دخل داخل وقرب من جدته واخذت ام راشد الجوال وكلمت هند الي كلامها مع جاسم عكر مزاجها وتتمنى المكالمه تخلص بسرعه
حلفت انها ماعاد تكلمهن من جوال جاسم بتحاول تاخذ رقم ام جاسم وتكلمهن منه
قبل لا تسكر كلمت ام جاسم وطلبت منها رقم جوالها وعطتها الرقم
وكل الي صار وجاسم مستمع تاكد ان مكالمته معها اليوم مكالمه وداعيه
جاسم في نفسه / ليش كل شي حلو ينتهي من حياتك ياجاسم
جاسم في نفسه / استغفر الله اللهم لا عتراض
عند هند
طوفان من المشاعر تجتاحها وهي تصراعهم بين قلبها وعقلها قلبها مستمتع بالاحاسيس الجديده وعقلها رافض خضوعها لها ويعتبرها ضعف ومصيرها لو استسلمت لمشاعرها نفس نهاية امها
استجابت لعقلعها وحاولت تدفن الي بقلبها عن الكل حتى عن نفسها وتحاول تبتعد قدر الامكان عن جاسم تخاف تخونها هالمشاعر المجنونه
مستحيل تسلم قلبها لاحد تدفنه بيدها ولا يكون ملك لغيرها يلعب فيه مثل ما يبي ويستغل هذا الضعف لاغراض دنيئة
جاسم وراشد وجهان لعمله واحده مستحيل يكون جاسم غير عن عمه كل الي يسويه تمثيلة لكنها كاشفتها لازم يفهمون اني غير عن ساره مستحيل ارضى اكون نهايتي نفس نهايتها مستحيل
بدت دموعها تنزل بحراره على خدها تحس دقات قلبها تخنقها كل ما تذكرت نبره صوته العاشقه لازم تدفن قلبها الي بيدمرها
هند بصوت عالي تقنع فيه نفسها / مافي بالدنيا شي اسمه حب انا مستحيل احب او انحب الا لاغراض دنيئة انا هند القويه مو ساره الي ضعفها حبها
على صوتها دخل خالد خاف يوم شاف حال هند وبالصدفه سمع كلامها مع نفسها
قرب منها وضمها / حنيتي له يالغاليه
هند تكابر / من
خالد / انا كاشفك حب جاسم يمشي بدمك ليه ما تعترفين وترجعين له والله هو غير عن عمه
هند بصراخ بانفعال موجع / خالد كم مره قلت لا تجيب لي هالسيره الي فيني شوقي لجداتي
ماله شغل هالجاسم الي غثيتوني فيه انا ماحبه ومستحيل احب واسلم قلبي لواحد يدوسه ويلعب فيك على كيفه
انا هند يا خالد تهتز لها المجالس لجاء طاريها هند الي شنبات تخافني وتحسب لي مليون حساب الحب ماله مكان بقاموسي اعتبره ضعف وانكسار انا مستحيل عقب كل الي سويته بحياتي و بلحظة ضعف قلبي يدمر كل الي بنيته قلبي اندفن مع امي
خالد عارف ومتاكد انها تكابر ومستحيل تعترف بحبها له
كل الي سوته بجاسم وتعذيبها له تثبت لنفسها انها تكرهه
خالد باس راسها / هدي اعصابك اليوم عازم شباب على العشاء
هند تبتسم وهي تخفي وجعها / ما يمديك تتعرف على شباب وتعزمهم
خالد / تعرفين ما قدر اعيش الحالي
هند / منهم الي عازمهم
خالد / الي حضرو الاجتماع
هند / هههههههه صير رزه مع الموظفين وخلك هيبه مثل خالي
خالد استانس لما شاف ضحكتها / انا هيبه من غير لا حط حواجز بيني وبين اكسبهم بالحب مو مثلكم كاسبينهم بالخوف الواحد لوقف قدامكم ينتفض كانه ورقه
هند ضربته على راسه / الهيبة من الله ما نتصنعتها انت تشوف كيف تعاملي معهم لكن هذي نعمة ربي انعمها علي
خالد / وانا اشهد هنوده وش رايك تطلعين ماتوقع عندك شغل ارتاحي امس جاين متاخر واكيد مانمتي
هند / كنت بطلع احس راسي مصدع ودي ارتاح عندي مشاوير بسويها علشان زواج هنديانا الا علي ماجاء
خالد / المعرس بيجي بالليل حطيت عنده خبر يقابلك بمكتبك بالبيت
هند / زين سويت مالي خلق اقابله الحين
خالد يبتسم / اخوك اعجبك
قربت منه وباست خده / فديت اخوي جعل يومي قبل يومه
خالد / لا والله جعل يومي انا الي قبل يومك حياتي تنعاف وانتي منتي فيها فقدتك كثيرر يوم تركتينا ورحتي لديره كنت اتصبر وحاط حرتي بضعيفه غاده
هند / وش رايك اعزمك على الغداء مدام ماعندنا شي والساعه للحين ماجت 12
خالد بحب / وانا اقدر مايرد الكريم الا الئيم
هند لبست نقابها ومسكت خالد بيده وطلعو برا الشركه
في بريطانيا
عند فهد
حاس بضيقه وحزن ماله خلق لصلاح الي طول الوقت يحاول يحتك فيه يبي يعرف وش مغيره عليه لكن فهد ملتزم الصمت مايبي ينفجر بصديقه
طلع من محاضرته وقرر يرجع لشقه ماله خلق يكمل محاضرته ونفسيته تعبانه طالع بساعته كانت الساعه وحده قرر يرجع ويعتذر منها
طلع من الجامعه ركب سيارته وهو يفكر بكلام يقوله اعتذار لها
وصل للعمار نزل من سيارته وصل لشقه وهو يفكر دخل مفتاحه بالباب
عند غاده
كانت بالصاله سمعت صوت المفتاح انخشت ورى الباب بتفاجئة
دخل فهد وتفاجى بالي راميها نفسها عليه وحاضنته ما توقع واحد بالميه هالشي
غاده رفعت راسها عن حضنه وعيونه تدمع
وباست خده / فهودي سامحني انت تعرفني مجنونه تصرفاتي تسبق افعالي جعل يدي للكسر لما مديته عليك
وبدت دموعها تنزل
فهد مسح دموعها / انا الي غلطان المفروض ماسوي الي سويته لكن الشيطان كان حاضر
غاده بحب / فهودي سكر عيونك عندي مفاجئة
سكر عيونه وسحبته للمطبخ شاف الغداء جلسته على الكرسي مقابلها
فهد يبتسم/ لاتقولين انك طابخته لاني مستحيل اصدقك
غاده بحب / هههههه لا ام حبيبة القلب لها الفضل اني اعتذر لك
فهد بحب / فديتها الله يعجل بجيتك يابوي
غاده / امين
مدت له كيس الهديه
فهد باستغراب / شنو ذا
غاده باعتذار / هديه رضاوه لك لكن لا تتعود وتزعل وتبيني اراضيك بهديه بتفلسني
فهد بحب اخذ الكيس وفتحه شاف الساعه والعطر
فهد / الله لو كل ما زعلت بتهديني كذا ابشري كل يوم وانا زعلان
غاده / كثر منها كل يوم بهديك تغد لا يبرد الغداء هذي غلطه مطبعية
فهد يرفع يدينه / يارب تكثر غلطاتك المطبعيه
تصافت نفوسهم وانزاح الهم والحزن من قلب فهد
عند زياد
منسدح على سريره حزين كئيب مامدها يفرح بحبه الا يروح منه
خلاص معاد يقدر يصبر اكثر من كذا لازم يسافر الليله ويصفي حساباته مع العصابه يمكن تنغفر ذنوبه
رفع جواله واتصل على عاصم
زياد / الو عاصم
عاصم / هلا فيك ياطويل العمر
زياد / ابي اسافر الحين لامريكيا
عاصم بصدمه / ليش طال عمرك السفره المفاجئة
زياد / نفذ الي اطلبه من دون اسئلة انا لابس وطالع المطار القاك قدامي
عاصم / حاضر طال عمرك
قفل المكالمه من عاصم ودخل لمكتبه اخذ شنطة اوراقه وطلع من البيت وصل للمطار
بالطائف
في مكتب مطلق
مطلق ومشعل وليد كلهم بعد الاجتماع دخلو مكتب مطلق يدرسون مع بعض المشاريع
مشعل بمزح / والله مديرتنا تخوف جتني نفضه منها كاني مسوي بلوه اخاف تنكشف
مطلق / سبحان الله حضورها وهيبتها ترعب
وليد / ترى على هيبتها وحضورها تملك اطيب قلب لكن تخفي هذا الشي بحضورها
مشعل / والله انك صادق من بيسوي الي سوته لنا وتفكر في غربتنا عن اهلنا كان قالت بطقاق وغصب عليهم يشتغلون
وليد / لها ديون كثيره برقبتي لو اقعد طول عمري اسددها بينتهي عمري ولا سدتها
مطلق / تقدر تقول لنا وش سوت اذا ماكانت خاصه
وليد / عالجة ابوي من مرض القلب وتكفلت بالمصاريف اهتمت باهلي بغياب ابوي وانا كنت بدراستي برا اشترت لنا فله واثثتها وشرت مشغل لاختي وجهزته وصار مشهور بفضلها
هذا غير رفضها ان ابوي يرجع لشغله خايفه عليه وراتبه يمشي بزود
هذا غير انها كانت ترسل لي على حسابي مصاريف كنت رافضها لكن قالت لي اني موظف عندها وراتبي بيمشي لين اتخرج واتوظف عندها وهذه قد وعدها وظفتي بوظيفه عمري ما حلم فيها
لو تدرون عن الحزن الي صابنا لما درينا انها ماتت وربي صار بيتنا عزا كلن بكاها من اكبر واحد لصغر واحد
تدري ان ابوي سوى لها سبيل صدقه لها
لما جانا خالد من كم يوم وقال لنا انها عايشه وكل الي صار تمثيليه لسلامتها ما تتخيل اش كثر فرحتنا ودموعنا نزلت
مشعل بستغراب / كل هذا
وليد / واكثر ربي يقدرني وارد جمايلها
مطلق سرح بتفكيره وتذكر شكلها الي سحره وفتنه وحسد جاسم عليها
الي شافه بالاجتماع عكس الي شافها بالطبيعه الي يشوفها بعباتها ونقابها يعطيها عمر ضعف عمرها
وهيبتها وحظورها عكس الي شافه انثى بقمة انوثتها ورقتها
مشعل غمز له / ليكون مديرتنا اخذت عقلك
مطلق / هاه لا افكر باهلي واحترم نفسك مديرتنا متزوجه الله يسعدها مع زوجها
وليد باستغراب / متزوجه كيف وشلون
مطلق / متزوجه جاسم ولد عمها كيف وشلون مدري لانهم جاو الديره متزوجين
وليد / شلون تتركه وتجي هنا وكيف يرضى انها تسافر لبريطانيا وتستقر هناك
مطلق / علمي علمك قلت لك الي اعرفه
مشعل / وش رايكم نطلع نتغداء برا مدام خلصنا شغلنا
مطلق تذكر عزيمة خالد
مطلق / ترى خالد عازمكم على العشاء وملزم على حضوركم حاولت افلت من العزيمه لكنه مصر
مشعل / زين على الاقل ناكل اكل بيت خاست بطونا من اكل المطاعم
و ليد بجديه / احمد ربك لاقي شي تاكله غيرك يتمنى
مشعل بمزح / الحمد لله الله يستر لا تكفرني
مطلق / يله مشينا ذبحني الجوع عاد انا جوعي حار زين ماكلكم
طلعو الثلاثه برا الشركه كلهم ركبو بسيارة مطلق لان وليد ومشعل ماعندهم سياره مشعل جاي مع مطلق من الديره بسياره وحده
ووليد جاي بالطياره وللحين ما نشحنت سيارته
وصلو للمطعم وجلسو طلبو المنيوم وختار كل واحد الاكل الي يحبه والحساب على مطلق لانه اصر انه يدفع لانه عازمهم
عند خالد وهند
بعد ماخلصو من المطعم رجعو للبيت دخل الصاله جلسو على الكنب وهند نزلت عباتها عطتها الشغاله توصلها لغرفتها دق جوال خالد كان المتصل عبدالرحمن
مدالجوال لهند يبيها ترد على ابوه
خالد / ابوي كلميه ابي ترد له روحه لسمع صوتك
هند اخذت الجوال مشتاقه موت له
عبدالرحمن / الو خالد
هند وهي تبكي / يا عيون ورح هند يا كثر شوقي لك يا خالي
عبدالرحمن نزلت دموعه وهو يسمع صوتها وتاثر ببكاها / شلونك طمنيني عن حالتك وربي الشوق ذابحني مصبرني اني اخذ اخبارك من جاسم
هند / انت الي طمني عنك وعن خالتي وغاده
عبدالرحمن / كلنا بخير و مشتاقين لك الله يجمع شملنا
هند بضعف / امين وربي ياخالي عاجزنه اصبر عنكم خالي طلبتك قول تم يالغالي
عبدالرحمن / تم
هند / انا بالطائف مع خالد وغاده تعالو صيفو عندي دخيلك يا خالي لا تردني واقنع معك خالي ابو بسام مشتاقه لجمعتنا
عبدالرحمن بحب اكبر / ابشري بعد ماجي من بريطانيا بجي عندك
هند مستغربه / وش عندك بابريطانيا
عبدالرحمن يبتسم / فهود كبر بيتزوج
هند بصدمه / شلون طاوعته ياخالي
عبدالرحمن / واسطته غاده وهي تعرف البنت وانا اعرف ابوها وشكله متعلق فيها لانها معه بالجامعه الحين ملكة والزواج لتخرجو
هند بحزن / الله يكتب له الي فيه خيره تمنيت اني معك ياخالي ووقف جنب فهد
عبدالرحمن حس بنبرة الحزن / هانت يابوك وانتي الي بتزفينه لعروسه
هند / ان شاء الله حلفتك يا خالي اذا احتجت لشي تطلبه مني
عبدالرحمن بحب / ابشري
هند / خالي عندك خالتي ذبحني الشوق لها
عبدالرحمن / انا برى البيت والله انها مشتاقه لك اكثر من شوقك لها
هند / خالي انتظركم على احر من الجمر اول ما تخلصون من فهد تجوني لا تتاخرون علي
عبدالرحمن / توصين على شي نجيبه معنا لجيناك
هند بحزن / ياليت تجيب كرسي امي وثوبها مشتاقه لهم
عبدالرحمن بوجع / ان شاء الله يله فمان الله
هند بحب / انتبه على نفسك فمان الله
سكرت الجوال من خالها مزاجها تحسن لما سمعت صوته
التفتت لخالد وهي تبتسم / دريت عن خبر الموسم
خالد / قولي
هند / خالي بيروح لبريطانيا يخطب لفهودي واذا وافقو اهلها بيملك على طول والزواج لا تخرجو
خالد / اشوفك معارضتي فكرت الملكه
هند بجديه / مدامه يبيها ليه نمنعه ونحرمه منها ونعانده ونعذبه وهو محتاج لراحه علشان دراسته مدامه راضي ان زواجه لتخرج مافيه مشكله
خالد / مع اني ضد الفكره لاني اخاف لتخرج يغير رايه ويفشلنا مع الناس
هند / فهد فديته عاقل ومستحيل يقدم على هالخطوة وهو شاك فيها ومتاكده مستحيل يفشل خالي قدام الناس فهد تربية ايدي
طلعت غاده من غرفتها وهي كسلانه بدت عليها علامات الحمل من كسل وحب النوم
غاده / اعوذ بالله صرت ماشبع نوم كل ما فتحت عيوني رجعت انام
هند / هههههه هذ علامات الوحم زي ما تتوحمين على خالد وتشمين فيه ريحه خياس وتعيفينه
خالد / فال الله ولا فالك خليها على النوم ابرك
غاده / خلودي مشتهيه فول
هند / هههههه بدينا نشتهي الله يعينك ياخلود العالم تشتهي شغلات غريبه وانتي فول
خالد / فديتها الحين طالع اجيب لها فول
هند / خبل الحين بعد الظهر من وين بتجيب لها الفول
خالد بحب / بجيبه الله لا يعوقني بشر ماني ناقص ولدي يطلع بخده حبة فول
هند / هههههههه خل الطباخه تطبخ لها فول بدال ما تجيبه جاهز تراى عليها فول خطيره
غاده / ايه احسن
خالد / اجل اطلبي منها تسوي لك فول انا تعبان ودايخ بنام
غاده ترى عندي عزيمة شباب الله بشغل العدل لو بعتمد على هند ما تعشو
هند / مالت انا طالعه لغرفتي دايخه من زمان ماداومت باخذ قيلوله ساعه وبقوم عندي موعد مع علي
دخل خالد غرفته ودخل الحمام اخذ شور ولبس بجامه ودخل بسريره من التعب نام
طلعت لغرفتها اخذت شور ولبست بجامتها وحطت راسها على المخده وصوت جاسم العاشق يرن باذنها حطت المخده على راسها تطرد صوته ما تبي تستسلم له حاولت تغير تفكير بشي ثاني فكرت بفهد وبملكته وناويه تسوي له مفاجئة اذا تملك وهي تفكر بالمفاجئة نامت
بالديره
عند جاسم
تعب من الصباح وهو واقف مع العمال دخل داخل لقى امه وجداته يسولف قرب منهن وجلس جنب امه
ام جاسم / يامك ماكلت شي اجيب لك اكل
جاسم / تسلمين يالغاليه اذا باكل ادل طريق المطبخ
ام راشد بحزن / يا بوي الي تسويه بنفسك مو زين شوف شكلك شلون صاير يامك منت باول ولا اخر واحد يطلق زوجته وهو يحبها يمكن مافيه خيره انه تبقى معك احسن كل واحد فيكم يشوف نصيبه
جاسم اوجعه كلام جدته / يصير خير ياجده انا نسيت موضوع الطلاق والي تشوفينه تعب من الصباح واقف انام وكل شي يصير احسن تطمني يالغاليه ولا تحاتيني انا بخير وللحين بقوتي
نزل فيصل ومعه شنطته قرب منهم وسلم على راس امه وجداته
ام جاسم / اشوف معك شنطتك
فيصل / ايه يالغاليه يكفيني اجازه مهيت شغلي وراي
ام جاسم / لاوصيك مر عند الجوهره وياليت تنام عندها مابيك تنام بالبيت بروحك
فيصل يبتسم / يمه الي قدامك رجال ماني بزر ابو خمس سنوات
ام جاسم بابتسامه / بتظل بعيني بزر لين يجون عيالك طولك
فيصل / يله فمان الله بسافر بدري ابي اوصل هناك قبل الليل توصون بشي
ام جاسم / جعلك سالم انتبه لطريق وطمني اول ما توصل
فيصل قرب من اخوه الي سارح بتفكير / جاسم منت براجع معي
جاسم صحى من سرحانه / لا عندي شغل وبغيب شهر حط خبر عند نواف يقدم لي اجازه مفتوحه
فيصل مركز نظره على اخوه وشايف الحزن مرسوم على وجهه والضيقه
فيصل / جاسم تعال ابيك بموضوع
قام جاسم ولحق فيصل وصل لسيارة
فيصل / هونها ياخوي ارحم حالك من الحزن والهم الي بيذبحك
جاسم بحزن / كلمت اليوم وياليتها ماكلمت ياكثر شوقي ولهفتي لها
اصدمتني وهي تقولي يا دكتور جاسم وطلبت جداتي من غير لا تسال عن احوالي
بيوم واحد نستني واكيد مبسوطه بحياتها من غيري كاني كنت شي ثقيل وانزاح عنها
كان نفسي اسمع صوت لهفتها علي وتبادلني اشواقي وحبي
لكن هذي هند قلبها قاسي اقسى من الحجر يمكن الحجر يلين وهي مستحيل تلين والله ياخوي لولا خوفي من ربك كان سحرتها وخليتها غصب عنها تتعلق فيني وتحبني لاني جربت الطيب معها ماجاب نتيجه
فيصل بحزن / الله يعينك ياخوي الي فينا من ايدينا سمحنا لنفسنا نحبهن واحنا ندري اش كثر يكرهنا وهذا الي جنيناه بالنهايه اللوم كله علينا هن ماعطنا وجه ولا عشمنا بشي ولا وافقن علينا الا بطرق ملتويه وعلى كذا نعاتبهن ونلومهن الملام حنا ياخوي
جاسم بوجع / تلومنا على حبنا لهن كل الي سويناه انا نبيهن بالحلال نبي نكمل عمرنا معهن نبيهن امهات لعيالنا هذا هو جرمنا الي للحين ندفع ثمنه
في بيت عبدالرحمن
دخل وهو فرحان بعد مكالمته لهند اش كثر يحبها ومشتاق دخل لقى نوره مع عدنان بالصاله
عبدالرحمن / السلام
نوره شافت السعاده والفرح بعيون زوجها فرحت
نوره / وعليكم السلام
قرب منهم عبدالرحمن وجلس على الكنب
عبدالرحمن / يااااه يانوره اليوم حسيت روحي ردت لي
نوره / عسى خير يالغالي شايفه الفرح بعيونك
عبدالرحمن / هند كلمتني سمعت صوتها
نور بلهفة وشوق / عبدالرحمن د خيلك كلمها ابي اسمع صوتها وربي مشتاقه لها
عبدالرحمن / ابشرك بنروح عندها باجازة المدارس
نوره بفرح ودمعت عيونها / يارب تجمع شملنا مثل اول
عبدالرحمن / امين وعندي لك خبر بيبسطك
نوره / قول يالغالي وابسطني
عبدالرحمن يبتسم / بروح بريطانيا وبنخطب لفهد
نوره انصدمت من الخبر / عبدالرحمن اش قاعد تقول ولا وبعد فرحان مستحيل اوافق يبلى نفسه بزواج من اجنبيه لا نعرف دينها ولا اخلاقها ماهقيتك كذا ياعبدالرحمن
عبدالرحمن بابتسامه / يحبك تسبقين الاحداث البنت سعودي وغاده معجبه فيها وهي الي ترجتني اخطبها لاخوها وابوها نعم الرجال
نوره ارتحت شوي / بدري على الزواج باقي له سنتين
عبدالرحمن / اذا اهلها وافقو يملك الحين والزواج لا تخرج مثل ماسوينا مع خالد اهم شي ترتاح نفسيته ويقدر يدرس زين موتشغل تفكير
نوره باستسلام / الله يكتب له الصالح
عبدالرحمن / امين جهزي اغراضك بالليل بنسافر عنده
عدنان كان مستمع نط لما سمع عن السفره
عندنا / يبه دخيلك بسافر معكم اليوم اخر يوم امتحانات
عبدالرحمن / جهز اغراضك
عدنان فرحان بموافقة ابوه / ان شاء الله بشتري هديه لغدويه كل ماسافرت جابت لي
عبد الرحمن / وش ناوي تشتري لها خذ الي تحتاج
في بريطانيا
شقة صلاح
منقهر من غاده من الي صار وتطنيشها له وتركته واقف عند الباب
وبنفس الوقت معجب فيها انها محافظه على نفسها قرر يكلم نواف يقوله عن غاده وانه يبي يتزوجها يبيه يساعده يقنع ابوه لان ابوه يقتنع بكلام نواف مسك جواله ودق على اخوه
عند نواف
كان في البيت جالس عند الجوهره وبنته شاف رقم اخوه
نواف / ياهلا بالغالي
صلاح / الله يحيك وش اخبارك واخبار البنوته وامها
نواف / كلنا بخير نسال عن احوالك
صلاح / متصل ابي اكلمك بموضوع ضروري
طالع نواف في الجوهره المشغوله مع بنتها
قام وطلع برا الغرفه ودخل الصاله
نواف / الحين جالس بالحالي قول وش عندك
صلاح بتردد / ابي اتزوج
نواف بانفعال / خير ما سمعت من الي لعبت براسك وقررت تتزوجها
صلاح / غاده بنت عمي عبد الرحمن ابو خالد
نزل الخبر على نواف مثل الصاعقه ماكان متوقع ولا واحد بالمية ان حبيبة صديقة يتزوجها اخوه مستحيل يرضى يحطم قلب فيصل
نواف بعصبية / قلو البنات ما لقيت الا غاده مستحيل اوافق تتزوجها لو اشوفك ميت قدامي بوقف ضد هالزواجه
صلاح بعصبيه / ليه وش فيها غاده تشك بتربية عمي ابو خالد
نواف بيكرهها بعين اخوه / تدري منهي غاده الي بتتزوجها هذي قويه
صلاح باعجاب / وهذا الي عاجبني فيها
نواف بجديه / وش تعرف عنها البنت ما تصلح لك ولو اخر بنت مستحيل اخليك تتزوجها
صلاح بعصبية / وش شايف عليها الي اشوفه محترمه وتخاف ربها
نواف بقوة / تدري انها منحاشه ليلة عرسها وتدري انها خالعة زوجها وتدري ان زوجها فيصل صديقي الي للحين يحبها ويشرق لنذكر اسمها
صلاح انفجع من اعترافات اخوه مستحيل يصدق ان البنت الي اجذبته بنعومتها ورقتها تسوي كل الي يقوله اخوه
نواف / ليه ساكت
صلاح بتشكيك / نواف مستحيل غاده تسوي كل ذا يمكن صديقك يتبلى عليها
نواف اوجعه قلبه وحس بنبرة الحب من اخوه / انا من حضر زوجها وانا من كان بالفندق يوم انحاشت وقريت رسايلها وهي تستخف فيه وانا الي موديه المستشفى وهو منهار بصباحيته وش تبي اكثر من كذا اثبات
صلاح باصرار / قول الي سوته مابي كلمات مشفره
نواف / قال له كل الي سوته غاده بفيصل وعن حب فيصل لها الي يعاني فيه للحين
صلاح اوجعه قلبه على فيصل
صلاح بصدمه / كل هذا مسويته
نواف / ايه ومستحيل ابوي يوافق عليها لانه داري بكل شي
صلاح بحزن / انا خلاص تراجعت عن الموضوع مستحيل اتزوج وحده فيها كل الي قلته
نواف اوجعه قلبه على اخوه / شيلها من عقلك ياخوي وانتبه لدراستك البنت بدالها مليون بنت
صلاح / فمان الله نواف
سكر من اخوه ورجع للجوهره وقلبه ماكله على صلاح
جلس عند الجوهره وهو باله مشغول ويسرح
الجوهره خافت / نواف وش فيه اخوك
نواف / مافيه شي عنده مشكله بالجامعه وبتنحل ان شاء الله
بريطانيا
عند صلاح
سكر من اخوه وهو مصدوم من كل الي قاله له معقوله الانسانه الناعمه الرقيقه تجرح بانسان وتهينه كل هالاهانه ومع كل ذا يحبها لو انها مسويه كل هذا فيه كان ما تردد انه يذبحها
بالديره
عند جاسم
يحاول يشغل نفسه من بعد مكالمتها له بمراقبة العمال وتنظيف الاسطبل والخيول مع العمال يبي يتعب علشان بالليل من الارهاق ينام ويريح عقله من التفكير فيها
على المغرب دخل على امه وجداته لقاهن جالسات على قهوة المغرب جلس وهو تعبان منهد حيله
طالعته امه ورحمته متاكده ان الي يسويه هروب من التفكير فيها
ام جاسم / يمه اجيب لك شي تاكله
جاسم رحم امه وهو مقرر جروحه له بروحه / ايه يالغاليه ذابحني الجوع
ام جاسم وهي فرحانه قامت وجابت له فطائر مشكله مع عصير
ام جاسم / اذا لي خاطرعندك تاكلهم كلهم
جاسم يبتسم بحزن / اكيد زين ماكل معهم الصحن
اخذ فطيره من الصحن وهو ياكلها يحس كانه يبتلع شوك بحلقه
التفت لامه / يمه اذا فيه اكل جهزيه بوديه للعمال
ام جاسم / أي يمك الخير واجد وفيهم اجر
تغصب جاسم على الاكل وهو يحس بمرارة الاكل خلص الصحن رضاء لامه
ام جاسم فرحت لما شافت مخلص صحنه ام جاسم / يجعله عافيه عليك
جاسم بابتسامه / تعافيك
قامت ام جاسم تطلب من الشغالة تجهز اكل للعمال ولحقها جاسم اخذه منها وطلع فيه
بالطائف
عند هند
نايمه بغرفتها قامت على طق الباب كانت الشغاله
الشغاله / مدام خالد يقول فيه ينزل تحت فيه رجال بالمكتب
هند رفعت نفسها على السرير / قول له نازله
طلعت من عندها الشغاله ودخلت الحمام اخذت شور ولبست عباتها ونقابها وانزلت تحت قابلتها غاده عند الدرج وكانت هنديان واقفه متوتره
قربت هند من هنديانا الي واضح عليها التوتر
هند تبتسم / هنو شكل حبيب القلب الموجود وقالب حالتك
هنديانا بادلتها الابتسامه / ايه خفي عليه
هند / ههههههه لا بخليه يعرف ا ن وراك ناس ما يتجرء يزعلك انت بمثابة غاده اختي وانا معتبره نفسي امك
قربت هنديانا وضمت هند وصارت تبكي / ربي يخليك ياهند ولا يحرمنا منك
هند / ههههههههه ما خبرك حساسه ورقيقه قلبك الحب
هنديانا بحيا / ادخلي عنده تاخرتي عليه
تركتها هند ودخلت المكتب شافت رجال اسود البشره نحيف وكان خالد موجود معه
اول ماشافها وقف احترام لها
هند بهيبتها / السلام
الكل / وعليكم السلام
قربت للمكتب وعلي باقي واقف اشرت بيدها تطلب منه الجلوس
هند / استاذ علي تعرف ليش طلبتك
علي بفرح واضح في وجهه / ايه بخصوص زواجي من هنديان بنت عمي حب طفولتي
هند بجديه / هنديانا غاليه عندي فوق ما تتصور لو يوم زعلتها انا الي بوقف بوجهك وبكون حسابك معي كبير
علي / الله لا يجيب زعل بينا ازعل روحي ولا ازعلها
هند / شوف استاذ علي انا ما قدر استغني على هنديانا بتقبى بوظيفتها عندي وانت بدور لك وظيفه تكون معها بديقارد
وشريت لكم فله ما ثثتها لكم وكل شي من تكاليف الزواج علي وحجزت لكم باغلى صاله وكل شي من احسن مايكون
علي دمعت عيونه مو مصدق / مدري وش اقول معندي كلام يوفي حقك
هند / عندك مانع الزواج والملكه بالاسبوع الجاي بعد ماتخلص تحاليلكم
علي بفرح والابتسامه مرسومه على وجهه / يوم المنى
هند / عطيتها اجازه شهرين وشهر عسلكم حجزته والتذاكر مع هنديانا بايطاليا
علي / استاذه هند والله الي تسوينه كثير
هند / كل هذا من غلى هنديانا عندي وهي مخلصه بشغلها وعرضت نفسها للخطر علشاني
علي / ان شاء الله اكون قد الي سويته علشاني
هند / ان شاء الله اتمنى تلحق تسوي التحاليل لان من بكره بتسوي هنديانا التحاليل وتتجهز لزواج وانت خذ هالظرف وجهز نفسك نبيك احلى معرس لحلى عروس
علي / لا مايحتاج خيرك سابق
هند بعصبيه / هدية هند ما تنرد واذا انردت اهانه لها واتوقع ماستاهل الاهانه منك
اخذ منها الظروف وهو يرتجف خوف من نبرة العصبيه
علي / ماعاش من يهينك ومقبولة هديتك
هند / يله انتهت الزياره شوف اشغالك
طلعت وتركته بالمكتب وهي طالعه استقبلتها هنديانا بارتباك
هنديانا بارتباك / طمنيني وش صار
هند بابتسامه / كل شي تمام تطمني الخبل يحبك اكثر من حبك له لو قلت له ارم نفسك بالبحر وازوجك هنديانا سواها
هنديانا بفرح / ههههههههههه حبنا كبر معنا يااااااااااه ياهند ما تتخيلين فرحتي وسعادتي ان حلم حياتي بيتحقق بفضلك ابوي كان رافضه على انه ولد اخوه لانه فقران ما يملك شي
هند / الفضل لربي وابشرك بيلزق فيك شغلته معك بديقارد
هنديانا دمعت عيونها من كثر السعاده الي تحس فيها / الله يسعدك ياهند وينولك الي في بالك
هند بجديهلا/ اطلعي مع غاده اشتري شغلات الزواج وملابس تلقيق بهنديانا ماعرف بشغلات هذي وكلت فيهم غاد بالنيابة عني ولا اوصيك بيضي وجهي مع علي
هنديانا / ابيض وجهك دايم
هند / بطلع افسخ عباتي وبمر على غاده اقول لها عن السوق
طلعت هند لغرفتها نزلت عباتها ونزلت تحت لقت صوت بالمطبخ شافت غاده تشتغل
هند بجديه / اموت وعرفك ما ترحمين نفسك من المطبخ تراك حامل وانا اخاف على ولد اخوي
غاده / قلت اسوي عشاء لضيوف خالد
هند / فيه طباخه قول لها الي مشتهيته وهي تطبخ
غاده / خلودي فديته يحب طباخي خفي علي لاتبلشيني مثل اخوك ما صدقت انه انشغل عني الي يشوف يقول اول وحده تحمل
هند / كله خوف عليك يالخبله الحين اتركي الي بيدينك وروحي مع هنديانا السوق واشتري الي تحتاجه
غاده / اتفقتي مع على على كل شي
هند / ان شاء الله بعد التحاليل بيملكون ويتزوجون على الاسبوع الجاي
غاده بفرح / وواو وناسه من زمان ماحضرنا زواجات
هند / بيكون خالي وخالتي واهلك فيه
غاده بفرح / ونااااااااسه هنوده وش رايك تجيبين جداتك وبيت اهل مطلق
هند / جداتي ناويه اجيبهن قبل الحج ناويه احج وحججهن معي واكسب اجرهن
غاده / زين تسوين الله يكتب لك الاجر
هند / اللهم امين
طلعت بالصاله لقت خالد جالس يتابع التلفزون قربت من عنده
هند / خالد ابي اعتمر متى تفضى
خالد / أي وقت تبين انا حاضر
هند / بكره بالليل باذن الله علشان الصباح نكون هنا
خالد / ان شاء الله وش صار بالعشاء
هند / غاده بالمطبخ تسويه لك تقول فديته خلود يحب طبخي عاد انا طردتها من المطبخ والطباخه تكمل الشغل
خالد / ياشين النحاسه انتي لا ترحمين ولا تخلين رحمة ربي تنزل
هند بجديه / انتبه عليها تراها حامل وتحتاج لراحه
خالد / ان شاء الله جدتي
توقعاتكم
نسايم نجد
|
17-12-10, 12:08 AM
جديد مواضيع قسم القصص المكتمله من وحي قلم الاعضاء
العرض العادي
