جيتك أمانة أنقذيني / للكاتبة : شمعة الصداقة ..

[..جيتـك أمـانة انقذينـي..]

بقلم : شمعة الصداقة

[..مقـدمـة..]

طالعت ساعتها (12)التفتت حولها فهالشارع الفاضي..والجو البارد..الجوال على اذنها تنتظر.. ..وهو يرن..يرن..يرن!!..

تذكرت قبل شهور..ذيك الليلة..لما كانت في غرفتها،

طالعت الساعة (12) التفت حولي اتأمل غرفتي..راح تكون هالليلة آخر ليلة لي في هالغرفة..
ذكرياتي فيها راح آخذها معاي لــ لندن..انا رايحة ادرس على حساب شركة ارامكوا في لندن بعد ماخلصت سنة تحضيرية هنا
(اهم شي اخذنا تقوية للغتنا..واخذنا المواد العلمية بالانجليزي..الرياضيات والفيزياء والأحياء والكيمياء)..
رجعت اتأمل في جدران هالغرفة اللي سكنتها بعد وفاة ابوي بشهرين من 7 سنوات تقريباً (ابوي توفى "سكتة قلبية" لما كان عمري 12 سنة)
شخبطت على جدرانها كثير برسوماتي واخيراً صبغتها من ثلاث سنوات ورسمت عليها آخر رسمة..وهذا سريري اللي ياما كتم بؤسي والمي بين اغطيته ومسح دموعي بمخداته..بالزاوية مكتبتي اللي اخليتها من كتبي وقصصي المفضلة
(خاصةً قصص اجاثا كريستي..تفكيري اجرامي شوي..وقصص قماشة العليان اللي تحاكي فيها بؤس حياتي)..
وعلى جنبي نافذتي اللي ياما طليت منها عالشارع ابادل "عزيز" نظرات الشوق..وطاولتي اللي كتبت عليها رسايلي له..
واللي شهدت معاناتي مع ثالث ثانوي قبل سنة..فلتت مني دمعة وانا اسمع الاستريو يغني
>>افترقتوا مو هذا اللي تبونه ليه طيب كل واحد في الم..ماتعبتوا من شعور تكتمونه ولا هي مسألة عزة بأثم<<..
يمكن تكون يارابح يمكن!!..رجعت لسريري ورميت نفسي عليه طاحت بين ايديني "مخدتي الباسمة" (هاذي مخدة smile face بس عيونه قلوب "يحبني" وله ابتسامة كبيرة وايدين حنونة "تخيلات"هدية من اختي الكبيرة علياء)
ابتسمت هالمخدة في اسوأ الأوقات واحلكها تخليني ابتسم ضميت "نيمو" (تسميتي للمخدة) وغمضت عيوني
السـاعة 8:30 الصباح
..رن المنبه..رن..رن..ضربته بقوة وطفيته وكملت نومي..
انفتح الباب وفجاة حسيت بأحد "يدغدغني"فقمت معصبة..أكره احد يلمسني:هاي انتوا وشو هذا!!ماتخلون احد يرتاح بنومته؟؟
طلع صوت ضحكة صغيرة:لـيش تصرخين خالتي!!والله والله امي اللي قالت لي روحي صحيها!!
انا..التفت على الصوت:غرام؟!!انتي هنا؟؟وامج وش جابها عندنا من الصبح؟؟..وطالعت الساعة اتأكد..حشى من الساعة 9 صاحية ومعسكرة عندنا!!تكون مفكرة عمرها بالحسا امج المصون؟؟
غرام..ضحكت:أمي صحتنا من الساعة 8 وقالت يالله بنروح نشوف خالة الرزان قبل ماتسافر،انتي وين بتسافرين خالتي؟؟
انا..قمت بعصبية:للقمر،يالله اشوف خليني اغسل وجهي وابدل يـلا برا
غرام..مدت بوزها:انتي شريرة..وطلعت ركض
انا..ابتسمت وسكرت الباب:من زمان،بس توج تدرين!!..
ودخلت الحمام (وانتوا بكرامة) وغسلت وجهي وطلعت ولبست وطالعت المرايا بنكد..استغــفر الله يارب،اللهم بك اصبحنا وبك امسينا وبك نحيا وبك نموت وإليك النشور،اللهم حسن خُلقي كما حسنت خَلقي..
ورحت للصالة وتفاجأت بخواتي واخواني وخالاتي وخوالي كلهم موجودين!!..السـلام عليكم ،صبحكم الله بالخير وش مناسبة هالجمعةََ!!
علياء:صبحج الله بالنور،مجتمعين نودع سموج الكريم
نوف..تضحك:تقصد يقرفون سموج الكريم بالنصايح العشر قبل السفر
انا..رفعت حاجب وانا اتمصخر:من جد!!ياحظي،الفطور بليـز لأني مرة مرة مرة جوعانة
خالد..يضحك:بالثلاث بعد!!
انا..رحت وجلست جنب خالد:من شدة الجوع خالو،شلونك شخبارك؟؟
خالد..يبتسم:الحمدلله،بخير بشوفتج
انا..يوووه منه مايبطل وانا مالي خلق:شكـراً
عادل..يضحك:واحنا مالنا رب يعني!!بس هو اللي تسألين عنه؟؟
انا..روقان هالعلم من الصبح!!:شخباركم كلكم؟؟شلونكم كلكم؟؟عسى مافيكم خبيث؟؟
الكل قعدوا يضحكون
علياء:الله يقطع شرج،ذكرتيني بالحساوية
هند..تخز في علياء:اشفيهم الحساوية؟؟
طلال..يضحك:عاد ماتكلمتي علوي الا قدام الحساوية!!
نهلة..دخلت بصينية الفطور:ياحلاتهم الحساوية كل من يتمناهم،قوموا غسلوا يدينكم وسموا عالفطور،الرزان روحي جيبي بقية الصحون من المطبخ
انا..حتى بآخر يوم لي معاكم يا ماما!!:حتى بآخر يوم بيشغلوني!!
نوف..تضحك:بقوم أساعدج
انا:تعالي يكون أحد جاب معاه بزارينه!!علوش؟؟
علياء:كلهم اثنين يالدبة مابيأذونج
انا:غرامو بتأذيني،بس فارس عسل على قلبي، وينه؟؟
علياء:بالغرفة يلعبون
انا:حد جاب بزارين؟؟
أحمد:ماحد،روحي جيبي الفطور خلصينا!!
انا:اول شي قولها بأدب
أحمد:رزان خلصينا احسن لج
خالد:حمود!!تادب مع أختك
أحمد:طيب،لو سمحتي الرزان احنا جوعانين جيبي الصحون
انا..رحمته:ان شـاء الله
وبعد دقايق حطيت الصحون عالسفرة..واجتمع الكل عالسفرة وبدوا ياكلون
انا..خلصت وقمت:الحمـدلله
إبراهيم:وين ماأكلتي زي الناس!!
انا:الحمـدلله خالي شبعت
إبراهيم:قبل شوي جوعانة جوعانة!!
انا:أخذت كفايتي،وبعدين ماصدقت اعدل وزني عشان أرجع أخربه
علياء:صار هالوزن هاجس عندج!!
انا..مالي خلق هالمناقشات عالصبح:اقول خليني ساكتة احسن،عن اذنكم
عبدالرحمن:تعالي بس لاتزعلين من اختج تمزح معاج،احنا جايين عشان نقعد معاج
انا..ماحبيت ازعلهم:لا والله ياخالي مازعلت ادري فيها اختي دمها ثقيل،تسلم والله بس بروح اشيك على شنطي واغراضي،إلا ياجماعة البنات مو جايين؟؟
إيمان: إلا بيجيبهم السواق
انا:فكرت بعد،يـلا بروح أشيك على عفشي
ورحت لغرفتي وجلست اسكر الكراتين والملم آخر الأغراض اللي بقت لي..لما وصلت لكرتون عند النافذة وقفت وفتحت الستارة شوي..
غمضت وفتحت ثلاث مرات
وتأكدت انه موجود فعلاً وواقف عند باب بيتهم جالس على سيارته (في هالحرارة وش طلعك يالخبل!!..ودي ادعي عليك تحرقك هالشمس بس ماقدر بيننا عشرة سنين)..(اظن انه مازال على حبه)..ارتعت وتفاجأت بالصوت والتفت (خالي)
خالد:كريهة خالي هاذي احسها تكبرني،خليج على خالد بس
انا..ابتسمت له:خالد حاف يعني!!
خالد..يبتسم:ايوا خالد حاف بدون أي القاب..راح عند النافذة لما وخرت عنها..ياترى ياهل ترى ليش واقف هنا؟؟
انا..رفعت كتوفي:مادري!!!غريب مو!!
خالد:بالنسبة لي مو غريب مرة
انا..التفت عليه:شلـون؟؟
خالد:اكيد لما سمع خبر سفرج جا
انا:من مين بيسمع وهو في الرياض واهله هنا!!
خالد:مافي شي يسمونه تلفون يالذكية!!
انا:حتى لو شالمناسبة اللي تخليهم يقولون له!!
خالد:يمكن يمكن لأنج خطيبته سابقاً
انا:سابقاً شي صار وانتهى،عالعموم انا مايهمني فيه
خالد:على فكرة مازلت اسمي سفرتج هاذي هروب،انتي تدرين ان الكل مازال معارض صح!!
انا:يوه ياخالد،قلتها لك من قبل هي فعلاً هروب من امي ونظرات العتاب اللي في عيونها ومن حياتي اللي صارت جحيم في السعودية،وبعدين مرت سنة وهم لسه مو متقبلين الفكرة!!واذا معارضين مايهمني يبوني اتزوج يعني واجلس مقابلتهم لا طبعاً
خالد:ماحد قال كذا!!
انا:ماحد قال كذا!!،على مين تلعب ياخالد كلهم يبوني اتزوج واقعد (الزواج ستر) هذا اللي تردده امي عليّ من تخرجت من الثانوي انا ماجبت 97 بعد طلعة الروح عشان اتزوج واقعد بالبيت ،قولي اذا انا غلط وهم صح!!
خالد:شوفي هم معاهم حق في شي وانتي معاج حق في شي ثاني،مافي احد على حق تماماً
انا:وضح لي؟؟
خالد..سحبني من يدي:جلسي اول وهدي أعصابج!!،امج معاها حق في معارضتها لانها خايفة عليج من الغربة وخصوصاً ان طلال زي ماالكل يعرف اخلى مسؤوليته وقال (مالي شغل فيها) بصريح العبارة!!فشلون بتدبرين امورج بدون رجال!!
انا..قاطعته:اتفقنا انا وطلال اني اظل معاه لين ماالقى لي مكان انا والبنات اللي معاي،ماعلينا خوف واحنا بنات مع بعض
خالد:إذا كان هذا رايج!!،اما اخواني فما ادري ايش وجهة نظرهم بس الأكيد اني انا ومبارك مؤيدين لج وخالاتج بعد
انا:الا خالتي هند اللي تشوف اني لازم اتزوج واقعد ببيتي زي دعاء،الله يعين وعد ورغد بعد التخرج وش بتسوي فيهم!!
خالد..يبتسم:انتي متأكدة من قرارج؟!!
انا:انا متأكدة من اول ماقدمت على ارامكوا
خالد..باس راسي:الله يوفقج

* * * *

الأسم:الرزان محمد الـ.... ..
العمر: 19 سنة..
المهنة:طالبة جامعية(سنة اولى) مبتعثة ضمن برنامج الـ(CPC) من شركة ارامكوا السعودية..
الجامعة:University Collage London..
التخصص:Chemical Engineering "هندسة كيميائية"..
السكن:Londn-Marylebone..
الجنسية:سعودية (حساوية الأصل)..

[..الجـزء الأولــ ..]

رجعت الرزان للواقع..وهي تحاول تدفي نفسها لما ماحد رد..سمعت صوت وراها التفت..
لقت واحد تعرفه عدل يبتسم
:ليش طلعتي!!مااستانستي بحفلتنا!!
الرزان:لو سمحت اتركني بحالي،انا مااكلم امثالك
:امثالي!!،وانا من أي نوع برايج؟؟
الرزان..طالعته من فوق لتحت:انت تعرف مين امثالك،اللي مااتشرف بمعرفتهم يااستاذ تركي
تركي..يضحك:استاذ!!كذا عطيتي امثالي اكبر من حجمهم!!
الرزان..عصبت والتفت عليه:قلت لو سمحت اتركني،ياخي مابيك تقرب جنبي خليني في حالي
تركي:ماكنت ابي شي،بس حبيت اساعد
الرزان:روح ساعد حبيبتك وشوفها رامية نفسها على مين في هاللحظة!!
تركي..بابتسامة ماكرة:حبيبتي على قولتك ماتسوي كذا،عندها تموت ولا تروح لغيري وتموت ولا اقرب من غيرها
الرزان:اجل الله يخليك قبل لاتموت روح لها
تركي:بس انتي ماعندك احد يوصلك!!
الرزان..التفت عليه بعصبية:احد شكى لك الحال!!؟،ولا يكون انت اخوي ولا ابوي ولا تقرب لي وانا مادري
تركي:ابداً،بس حرام اخلي هالحلا واقف في هالبرد!!
الرزان..عصبت اكثر:احترم نفسك وبعد احسن لك
تركي..ضحك وماتحرك من مكانه
الرزان..طلعت جوالها بسرعة من شنطتها كانت مترددة تدق على هالرقم بس دقت بسرعة (هاللحظة مافيها تردد)..رد عليها صوت دافي يعاكس البرودة اللي تحس فيها..
:this is fars yes??
الرزان..بصوت واطي وتركي يراقبها من وراها:فارس انا الرزان
فارس..تفاجأ:لحظة..قطع اجتماعه وطلع..الرزان!!خير في مشكلة؟؟
الرزان..صوتها مبحوح:ممكن ممكن تجي تاخذني؟!
فارس:انتوا مو في الحفلة!!صار شي؟؟
الرزان:ماقدر اقول الحين ممكن تجي تاخذني الحين؟؟
فارس:اكيد،دقايق واكون عندج،انتبهي لنفسج
الرزان:مشكور
فارس:العفو
الرزان..سكرت الجوال..ورجعت للأنتظار بدون ماتهتم للي واقف..وتتذكر كيف التقت بفارس،
نزلنا من الطيارة يومها وراح طلال يجيب الشنط وانا على اساس الحقه لكني ضعت..قعدت اتلفت حولي ومانتبهت الا وانا صدمت في واحد طويل عريض التفت عليّ فبدأت اعتذاراتي تنهال على لساني وانا ارتجف وارتعش:أنا آسفة..أنا آسفة ما انتبهت آسفة
قاطعني..بابتسامة:حصل خير..انا كنت واقف في مكان غلط
انا كان الضيق يخنقني:آسفـة مرة ثانية
ابتسم وانا رجعت اتلفت وادور طلال!!"وين اختفى"
سمعت صوته للمرة الثانية:اساعدج بشي اختي؟؟
انا..التفت برد عليه لكن سمعت صوت ثاني من جنبي
:الرزان!!
انا..التفت لهالصوت المألوف:هنـادي!!
هنادي..ضمتني:هـلا والله،شخبارج؟؟
انا..تضايقت اكثر وارتحت شوي:الحمدلله،وانتي؟؟
هنادي..ابتعدت عني شوي ومسكت ايديني:تمام الحمدلله،وش جابج قبل الوقت بأسبوع؟؟
انا..ابتسمت:جيت مع طلال،قلت استغل الفرصة،انتي بعد جاية قبل!!البنات قالوا لي بيجون يوم الأثنين فكرتج بتجين معاهم؟!
هنادي..بابتسامة واسعة:اخوي اللي ساكن هنا قال بيجي الخميس قلت اجي معاه وش وراي!! واتعرف عالجامعة والمنطقة ككل مع اني اعرفها بس للأحتياط..طالعت وراي واشرت..هذا هو اخوي فارس
انا..التفت محل مااشرت:هذا اخوج!!..تداركت افكاري اللي طلعت بصوت عالي وهزيت راسي له باحترام ورجعت همست لهنادي..انا ضيعت اخوي مادري وينه؟؟
هنادي..ضحكت:ولايهمج الحين نلقاه،اشرايج نسوي له نداء طلال تعال استلم الرزان
انا..مع كل الخوف اللي بداخلي بس حسيت بطمأنينة:خوش فضيحة!!
وبمساعدة هنادي واخوها فارس لقيت طلال اللي قعد يضحك عليّ!!
،وتذكرت بمرارة كيف طنش اتصالاتها قبل شوي!!(وش هالأخو!!كفو والله ترمي اختك بعد شهر بس وتتخلى عنها!!)..
حست بألم كبير داخلها وألم ثاني من الكعب اللي لابسته ففصخته ورفعت ذيل فستانها لايتوصخ ورجعت لجو ذكريات كيف تعرفت على اللي واقف وراها،
بعد اسبوع استقرينا انا و البنات "غادة،سديم،أصيل" في شقة على قدنا وكان يوم الأثنين أول يوم دوام لنا بالجامعة مرينا احد مقاهي جامعتنا..طلبوا البنات وراحوا لمبنى الـWellcome Collection وبقت معاي غادة..العامل الذكي حط لي خمس اكواب (الخامس لهنادي) بدون أي شي اشيلهم فيه!!جات غادة وشالت اثنين وتركتني مع ثلاثة!!..اضطريت اشيلهم لأن العامل صفطني وانا انادي عليه عشان يجيب لي كيس او شي اشيل فيه!!لما لفيت وانا شايلة الثلاث اكواب فاجأني واحد وراي فانكب عليه الكوب الثالث..اعتذرت مايقارب مليون مرة وهو يطالع فيني بنظرات غريبة..فاضطريت امسح اللي كبيت واشيل الكوب بسرعة وسمعت صوت بنت وراي وشكلها تكلم اللي كبيت عليه الـ
Hot chocolate
:تركـي حبيبي!!ايش اللي سوا فيك كذا!!وش اللي انكب عليك؟؟
التفت اشوف المزيون (توني انتبهت انه مزيون) اللي كبيت عليه كوبي ومعاه وحدة تحطم (تحطيم بمعنى الكلمة..لابسة تنورة بنية فوق الركبة وجاكت برتقالي ويكفي ان عليها جسم ماشاء الله بس زيادة شعرها بني طويل وناعم..وجمالها من النوع الجذاب جداً جداً)بس طاحت من عيني لابسة هاللبس وهي سعودية..وطاح من عيني هو لانه (مخاويها..اذا فهمتوا عليّ!) عيب عليهم الصراحة لاتقولون اسأت الظن (الكتاب باين من عنوانه)..انا طنشتهم شلت الكوب ورميته بالزبالة (وانتوا بكرامة) وطلعت من المحـل (وعزمت مارجع ادخله ابداً)
،ورجعت للعالم لما سمعت صوته..
تركي:اعتقد ان اللي تنتظرينه ماراح يجي وشرايك اوصلك؟؟،احسن لك صدقيني
الرزان..بعصبية:استغفر الله،وشهالأشكال اللي ماعندها كرامة!!
تركي..يضحك:في الحب ياكل الحلا مافي كرامة ولا كلام فاضي!!
الرزان..التفت عليه وفي عيونها نظرة "غاضبة":حب أي حب اللي انت تتكلم عنه،أنت واحد منافق اصلاً بدون قلب واحساس،وماامداك تحب وحدة ثاني مرة تشوفها اليوم!!
تركي..تقدم لها:حب من أول نظرة
الرزان..حست بخوف لما تقدم:خلك مكانك،الظاهر تشوف افلام كثير وتقرا روايات كثير
سكت وظل واقف جنبها لكن بعيد وعلى وجهه ابتسامة لامبرر لها!!..ورجعت هي تتذكر الحفلة الفاشلة اللي كانت فيها!!،
وحدة من الطالبات السعوديات اللي معانا مسوية حفلة عيد ميلادها وعزمتنا و اصرت سديم اننا نروح تغيير جو..وكشخنا مع اننا صعب نكشخ لحفلة واحنا متحجبات!!.. وغصبتني هنادي اني البس واحد من الفساتين اللي عندها باكمام طويلة وساتر..وبعد عطتني معاه كعب!!وانا ماعمري لبست كعب الا بالاعراس وبالغصب بعد .. المهم تفاجأت بنوعية الحفلة (بسيطة وفي مطعم..عشا وكيكة بس!!)..بس المطعم غلط كله شباب وبنات (مزحوم فيهم) ورقص ومصاخة!!..والجو مخنوق بالدخان..طالعت بزاوية وانتبهت لتركي!! يدخن ومعاه صديقته تسولف مع واحد ثاني وهو ساكت يطالع بعيد ولما انتبه لي حرك لي يده وغمز!!..استغربت وبنفس الوقت اشمئزيت وحسيت بقرف وعصبت لأن المكان كله ينرفز فاستأذنت وطلعت ركض..وقفتني غادة بس اقنعتها تتركني
انا:مالي خلق قلت لكم من الأول،بعدين شوفي المكان شلون!!بختنق من هالدخان؟؟
غادة:خلاص براحتك،بس كيف حترجعي؟؟
انا:باخذ تاكسي او بتصل بطلال
غادة:انتبهي لنفسك اوكي؟؟
انا..ابتسمت لها بس بضيق:اوكـي
وطلعت ركض من المطعم إلى زاوية الشارع
،رفعت راسها لما سمعت صوت سيارة..شافت الرنج روفر الأسود يقرب بزاوية الشارع قدامها..
نزل منه فارس وهو يطالعها وفي عيونه تساؤل وفتح لها الباب..طالعت فيه واشرت بعيونها على اللي واقف جنبها..
فارس..طالع فيه:خير اخوي في شي!!
تركي..بابتسامته:أبداً سلامتك
فارس:ياليت توقف بعيد مرة ثانية،انا فاهمك ترا فرجاءً لا عاد تضايقها او تقرب منها،حدك 10 مترات
الرزان ركبت السيارة وسكر فارس الباب وراها..وحرك السيارة ومشا..انتظر دقايق وهو يلاحظ ان دموعها تتجمع بعيونها وبعدين تكلم..
فارس:الرزان اشصاير؟؟
الرزان..نزلت دموعها وقعدت تصيح وماقدرت تسكت اكثر:احس الدنيا تحطم فيني يوم بعد يوم،أمي بس تردد ارجعي ارجعي،
واخوي مايبيني هنا عشان ياخذ راحته ولما استقريت لحالي ماصدق ولا عاد سأل عني!!،
والدكتور يحب يستهبل عليّ انا بالذات!!ليـش ياربي ليـش!!
فارس..مد لها كرتون المناديل ووقف السيارة على جنب:ليش انتي مكبرة كل هذا؟!،عادي امج اقنعيها ان هذا مستقبلج وماتقدرين تضحين وتتراجعين الحين وذكريها ان الرجعة حالياً مستحيلة
لان ارامكوا بتخليهم يدفعون ثمن اللي ضيعتيه من وقتهم وفلوسهم،
اما عن اخوج فمادري بصراحة وش مشلكته عشان يتركج كذا!!،بس انتي لاتكبرين كل شي
واذا الدكتور يحب يستهبل عليج!!ترا مليون طالب غيرج يعانون من الدكاترة حول العالم..ابتسم..يمكن الدكتور معجب!!
الرزان..مسحت آخر دمعة وابتسمت:معـجـب!!،أنا آسفة لأني أشغلتك وازعجتك بـس...
فارس..قاطعها:ولايهمج،هذا الواجب

وصلها فارس للشقة ولما تطمن انها دخلت الشقة..رجع لشغله واجتماعه!!

[..الجـزء الثـانيــ ..]

يوم الأحد..العاشـرة صباحاً
هنادي:انا بمر عليكم مع فارس
الرزان:اول مرة ياخذ ويكند زي بقية العالم؟؟
هنادي..ضحكت:مو ويكند عنده شغل اليوم بعد في منطقة بعيدة شوي من هنا،بيوصلنا بعدين يروح
الرزان:وين تبين نروح أصلاً؟؟
هنادي:من الصبح شقول!!،بنروح نتمشى في البارك ونلعب شوي ونتنطط
الرزان:نتنطط!!قويـة هاذي!!
هنادي..ضحكت:عيشي حياتك رزونه!!
الرزان:الله يخليج بلاه هالدلع اللي يلوع الكبد
هنادي..ضحكت:من عيوني،نص ساعة وأمركم كونوا جاهزين
الرزان:ان شـاءالله
هنادي:ياويلك اذا ماكنتوا جاهزين!!
الرزان:خـلاص قلنا ان شـاء الله
هنادي:See u
الرزان:See u
سكرت الرزان وراحت تبلغ كل وحدة من البنات..غادة هي الأقرب لها كلهم تعرفت عليهم لما بدت دراسة في الـ CPC..
في كورس السنة التحضيرية تعرفت على غادة اول شي وصارت هي الأقرب بينما البقية مجرد زميلات شوي شوي صاروا صديقات لما دروا انهم بيسافرون مع بعض لنفس الدولة..
لبسوا البنات وصعدوا للصالة (الشقة عبارة عن دوبلكس صغير..شقة بطابقين..فوق صالة متوسطة الحجم..
والمطبخ صغير مفتوح وغرفة للغسيل اما تحت اربع غرف كل وحدة لها غرفة..وكل غرفة اصغر من الثانية!!..
طبعاً ايجار الشقة عالي لكنه مقسم على اربعتهم كل وحدة تدفع من مكافأتها..ومكافأة طلاب ارامكوا محترمة)..
جلسوا ينتظرون بالصالة..
سديم:تدرون انا يعجبني فارس،جنان هالرجال
ضحكوا..
غادة:يا شيخة ركزي في شي مهم،اتركي الرجال في حاله وارتاحي ماحياخدك
الرزان..ابتسمت:من جدها غادة ارتاحي،من جد ترا لاتعبين نفسج وتحطين عينج عليه لان عايلتهم ماياخذون من أي عايلة
سديم..ارتبكت بس حاولت تغطي بالاستهبال:ياسلام!!وش هالحالة ياربي،انا ماصدقت الاقي واحد مزيون!!
أصيل:أنتي هذا كل همج مزايين وبس!!،تعالي ماشفتي المزايين الأماراتيين
سديم:ياويل حالـي أي اماراتيين؟؟
اصيل:لا ماشفتيهم!!،فـاتج نص عمرج،خقـاق الصراحة هالأماراتيين خقـاق بالقووة
سديم:صج،صج!!
غادة:ايش بك انتوا كذا بتهبلوا في البنت!!،وربي انهم عاديين يعني مش حلوين قد كده؟؟
أصيل:لا عاد دودي مالج حق،كل ذاك الجمال ومش حلوين قد كده!!
الرزان:أسكتي، و طلعت دودي يبغالها نظارة
وضحكوا..
غادة:قليلات الحيا،بتضحكوا عليّا طيب انا حاوريكم
الرزان:ايش بك ياأمي هدي أعصابك،لاتتوتري قد كده!!
غادة:الرزان!!،انتي وحدة حمارة طيب
الرزان..ابتسمت:طيب تامرين امر،حمارة عشانج بس
ورجعوا يضحكون..رن الجرس فشالوا شنطهم وعفشهم وطلعوا كلهم ركبوا المصعد الا الرزان..
(ماتحب المصاعد الا في الضرورة) نزلت ركض بالدرج عشان تلحق عليهم وتأخرت دقايق..
ووصلت وهي تلهث..
هنادي..شافتها وضحكت:بالله ايش سر هالعقدة اللي عندك من المصاعد؟؟
الرزان..حست بحرارة من الفشلة:سالفة قديمة
هنادي:شاركينا فيها...
فارس:هنادي خلي البنت بحالها،يكفي اليوم شرك منتشر على القاصي والداني
هنادي:القاصي والداني!!،مين هذول؟؟
ضحكوا..
فارس..ابتسم:ذكاء طبيعي ماشاء الله عليج،ذكريني شلون نحجتي باختبارات الوزراة بنسبة 97%؟؟
هنادي..ضحكت:يقولون حـظ!!
غادة:أما عليكِ حظ يفلق الصخر!!
هنادي:وي قولي ماشاء الله!!
الكل:ماشـاء الله
فارس:الحين أي بارك تبون؟؟
هنادي:أي بارك كبير نقدر نلعب ونتنطط فيه على راحتنا
فارس:ياذا التنتنط اللي نازل عليج!!،لاتنسين انج طالبة جامعية وكبيرة ويفترض يفترض انج عاقلة!!
هنادي:يصيـر خير
كتموا ضحكاتهم..
الرزان:انا عني ابي بارك هادي ومناظره حلوة زي الروايات
هنادي:زي الروايات!!،لحظة وين عايشة انتي؟؟هاذي لندن مو احد الضواحي ولا الريف؟؟، عيوني شكلنا يبيلنا ناخذج يوم الريف تراكضين فيه براحتج
الرزان:اراكض؟!!
فارس..ابتسم:انا اشغالي بعيد شوي عن وسط لندن،هناك في parkكبير وفاضي وهادي اذا تبون وصلتكم هناك واذا خلصت شغلي رجعت لكم؟!!
هنادي:الرزان من جدج؟؟
الرزان:اذا ماتبون مو لازم،أي بارك والسلام
غادة:لا لاهنوده خلينا نروح بعيد عن كتمة لندن وخنقتها،الله يوفقك
هنادي:براحتكم وانا مالي!!
سديم:خلاص الريـف على قولتج مابوه مشكلة
هنادي:اشرايج اصوله؟؟
أصيل:الراي رايكم،والشور شوركم
هنادي:أهم شي،الأخت اصيل احد سألج اذا تبين العريس ولا لا؟؟سألناج وين تبين تروحين
أصيل:يوووه منج هناديوه،على قولة غادة وربي أنك غلسة
غادة:كم مرة اقولها،ثقالة دمك مالها حدووود
هنادي:كذا!!طيب نزلهم هنا يافارس هنا احذفهم الا الرزان طبعاً
الرزان ابتسمت..
سديم:ياسلام وانا يعني،انا ماقلت شي!!
هنادي:خلاص وسديم بعد،بس هالثنتين،اجحتهم برا
غادة:اشحتهم!!ايش هادي اشحتهم؟؟
أصيل:اجحتهم،معنى آخر لأطردهم
غادة:استريحي بس،قال اطردهم قال هيا انثبري
الرزان..همست لغادة:ياجداوي ياقوي انت!!
غادة..ضحكت وهمست لها:استريحي انتي بعد،ايش بك ساكتة كده؟؟
الرزان..بهمس:تبيني اصرخ يعني،ولا بس اسولف!!،السكوت من ذهب
غادة:والكلام من فضة والله ندري خلاص اسكتي طيب
وضحكوا ثنتينهم..
هنادي:همس و اسرار من ورانا؟؟،لايكون لايكون تحشون فينا؟؟
غادة:انتي ليه مشككه في نفسك،تكوني عاملة حاجة!!
هنادي:أبداً بس يعني،الشعب السعودي ماله امان
سديم:وانتي ايش الشعب الأمريكي،ولايكون حولتي للشعب البريطاني!!
ضحكوا عليهم..وصلوا للمنطقة اللي قالهم فارس عليها..وفرشوا سجادتهم في ظل شجرة وحطوا سلالهم وجلسوا..
سديم وهنادي واصيل قاموا يلعبون و (يتنططون)..اما غادة تسندت عالشجرة مع الرزان وقعدت تقرا قصة دانيال ستيل "المعجـزة"..
اما الرزان تقرا كتاب عن علم النفس!!كانت تطالع صفحات الكتاب ومو فاهمة شي ثاني لانها بعالم ثاني..تفكر بكلام سديم قبل عن فارس!!،
انا حسيت بشي غريب في كلام سديم عن فارس وكأنه كان في تلميح..أو كأنها تبي تعرف راينا فيه!!
،التفتت على غادة..
غادة..انتبهت للرزان والتفتت لها:خـيــر؟؟،اشبك؟؟..طالعتها وانتظرتها تتكلم بس ماتكلمت الرزان..فالتفتت تتأكد ان مافي احد قريب..اتكلمي مافي احد قريب!!
الرزان..التفتت حولها:سديــم...و...فــارس...
غادة..فهمت عليها:حسيتي؟؟،انا حسيت من قبل شهر انو بينهم شي!!
الرزان..هزت راسها موافقة على كلام غادة:بس هي ماقالت شي!!،مع اننا...
غادة..كملت عنها:عادي مع بعضنا!!،بس هذا مايعني اننا قريبين من بعضنا كفاية عشان تحكيلنا اشياء زي كده..سكتت شوي بعدين هزت كتوفها..والله ماعرف هم الاثنين كدا غريبين وغامضين!!
الرزان:بس مبين من نظراتهم معجبين ببعض،الا بينهم شي اكيد،وبعدين سديم نظراتها وتعابير وجهها كاشفتها بقوة
غادة..ابتسمت:هادي الاشياء اختصاصك انتي،تعابير الوجه نظرات العيون..ضحكت..
بس شكلك كده بتتكلمي عن خبرة..غمزت للرزان..عن جد حكيلي
الرزان..استغربت:عن ايش؟؟
غادة:تفاصيل قصتك مع عبدالعزيز
الرزان..ما استوعبت للحظة وبعد ثواني فهمت:تقصدين عـزيـز!!
غادة:هــو دا،يعني مرة اختلفت عن عبدالعزيز؟!
الرزان:انا مااعترف باسم عبدالعزيز،من وانا صغيرة ماعرفه الا عزيز فما تعودت على عبدالعزيز!! ،ايش تبين تعرفين؟؟
غادة:انتي قلتي انكم كنتوا مخطوبين بس!!،ابغى القصة كلها على بعضها
الرزان..سكرت الكتاب اللي بين ايدينها:راقبي الجو اذا احد قرب
غادة..ابتسمت:حاضر،هـيا اتكلمي
الرزان:امممممم،احنا نقرب لبعض ابوه يصير ولد عم جدي ابراهيم ابو ابوي طبعاً،وهم من القلة اللي نعرفهم من عيلة ابوي الله يرحمه
غادة:اوه عشان قصة جدك!!،قلتيلي من قبل،وبعدين كملي
الرزان:كانوا جيراننا بعد كنت مصاحبة اخوه الصغير شاكر هذا بنفس عمري وكنا التوأم المخرب، وقتها ماكنت العب مع بنات واجلس مع بنات اصلاً بس اقضي وقتي العب في الشارع كورة
مع الأولاد..سكتت لحظة (وغباء هذيك الأيام بظل اندم عليه العمر كله)..المهم تعرفين لما يجي الاخو الكبير ويستهبل عالصغار ويهبل فيهم كذا كان يسوي
عزيزوبس يستهبل عليّ انا وشاكر ومعانا فيصل ولد خالي،كنت اكرهه بقوة لانه دايماً يخرب علينا اللعب،ودايماً بس يسميني الساحرة!!،
آخر مرة كان يناديني فيها الساحرة كان عمري 8 سنوات بعدها انا اختفيت عن العالم وانعزلت لاسباب وماشفته مرة ثانية الا بعد سنين في عزا ابوي الله يرحمه،كنت طالعة للشارع اركض لاني حسيت الدنيا تخنقني داخل البيت ولما كنت اقطع الشارع كان في سيارة ماشية بسرعة وكانت بتصدمني
وتبين الصراحة هذا اللي كنت اتمناه عشان ارتاح..اخذت نفس..المهم البطل المغوار
عزيز انقذني لما سحبني بقوة بعيد عن الشارع عطاني تهزيئة محترمة،صحيح ماكان كبير
بس كبير بالنسبة لي كان عمره 16 سنة،وبعد التهزيئة جرني عالبيت وسلمني لخالي خالد
ومن بعدها صرنا نتصادف كثير في الشارع واحنا طالعين رايحين المدرسة ولا رايحين أي مكان،
الغريب اني ماكنت انتبه له قبل لهالدرجة بس صرت انتبه لوجوده اكثر واكثر ويوم بعد يوم اعجبت فيه
وبعد ما التقينا صدفة اكثر من مرة وسولفنا مع بعض سوالف سطحية احياناً واحياناً سوالف خاصة فينا
حبيته يوم ورا يوم،طبعاً ماكنت ذاك الوقت اتغطى بس بعد سنة وشي تغطيت ومن وقتها صرنا من بعيد لبعيد نطالع بعض ونتواصل عن طريق اخته افنان وهاذي اكبر مني بسنتين بس كانت مع شلتنا
انا وبنات خالتي،ظلينا على اتصال بالرسايل شهور بس بعدها سوينا ايميلات وتواصلنا بالايميل مو الماسنجر
لاحظي ايميلات بس،بعد فترة هو انشغل بالكلية اكثر واكثر وانا لما صرت باول ثانوي انشغلت كثير بالدراسة والمشاكل
اللي فجأة زادت بالبيت بيني وبين امي لانها بعد شهور اكتشفت اني على علاقة فيه مع اني مااسميها علاقة يعني بمعنى الكلمة!!
المهم حصل خلاف كبير بيني وبين امي انا كنت من قبل قايلتله عن المشاكل بيني وبين امي وبالنهاية قلتله اني اكتشفت سبب المشاكل واننا لازم نبتعد عن بعض ونقطع هالايميلات،
المهم بعد اسبوع من هالرسالة امه كلمت امي وقالت لها انهم يبون يحجزوني لعزيز طبعاً امي
كان ودها تزوجني وتفتك بس لما كلمت اخوي عادل وخوالي رفضوا سالفة "الحجز" هاذي
بالنهاية قرروا ان الرجال يجون ويخطبون رسمي ولما اخلص ثالث ثانوي نملك ونتزوج،
عم السلام سنتين بيني وبين امي لانها تطمنت اني مخطوبة وبالنهاية بتزوج طبعاً رجعنا انا وياه
نتواصل بالايميل وتطورنا للماسنجر..ضحكوا ثنتينهم..شفتي شلون!!،ماعلينا نهاية السنة بثالث ثانوي
بديت اطرح افكاري عن الجامعات للكل ولما تكلمت عن البعثات اللي سكت واللي نصحني انسى الموضوع
وامي طبعاً ماعندها الا تزوجي وقعدي ببيت زوجج احسن لج ولما تناقشت مع عزيز رفض فكرة السفر كلياً
غادة:لحظة لحظة،انتي ماقلتيلو من قبل انك تبغي تدرسي برا!!،ولا الفكرة نفسها طلعت معاكي فجأة!!
الرزان:تبين الصراحة انا من بداية ثالث ثانوي حطيت ببالي اني ابي اسافر ادرس برا بس ماقلت لأحد
إلا خالي و ريما بنت خالي المقربة،عشان كذا عزيز تفاجأ بس هو يدري ان طموحي اكمل دراستي الجامعية
غادة:المهم انك اكيد اكيد عناد في الكل رحتي وقدمتي!!
الرزان:مش سالفة عناد!!هذا طموحي اخوي عادل وافقني وخالي خالد بعد فرحت مع اخوي عادل وقدمت على وزارة التعليم،
بعدين نصحني عادل بارامكوا بس انا خفت كيف اروح بدون محرم!! بس اقنعوني هم الاثنين وقدمت طلعلي في ارامكوا
قبل وبعدين في الوزراة فنصحوني بارامكوا،رحت وسألت عزيز طبعاً عصب عليّ كيف اروح اقدم بدون مااقوله!!
وامي بعد سوت لي سالفة بس انا ماهتميت لان امي في النهاية بتتقبل الامر والواقع ،حاولت اتفاهم مع عزيز
بس ماقدرت راح وكلم اخواني وخوالي وسوا سالفة طويلة عريضة!!انقهرت بقوة لما تهزأت من خوالي بسببه
وتهاوشت معاه كيف ايدخلهم بينا،ظلينا شهر على هالحالة وانا مستمرة في الاجراءات وانسحبت من بعثة الوزراة
وقدمت باقي اوراقي لارامكوا،تفاجأت بعد يوم بس من تقديم بقية الاوراق بصراخ امي وهي تصحيني
..سكتت وبلعت ريقها..بالعصا وضربتني ضرب وكان ظهري بيتكسر على ايدها
وكانت تصرخ وتصرخ انا مافهمت شي من اللي قالته بعد نص ساعة من الضرب انا اغمى عليّ بس هي استمرت بالضرب

وبعد ساعة كان خالي الكبير مار علينا البيت وسمعها،المهم اخذني المستشفى وظليت اليوم كله مغمى عليّ
واليوم الثاني لما صحيت حكت لي ريما عن اللي صار لي لما سألتها عن السبب اللي خلى امي تسوي كذا انقلب وجهها
وحاولت تصرف الموضوع لكني اصريت بالنهاية اقرت..غيرت نظرها الى جهة هنادي والبنات وهم يلعبون..الأستاذ عزيز اتصل بأمي انا ماعدت ابي بنتج خلي بنتج الصايعة
عندج وقال ايش انا كنت اقابله بالسر واكلمه وارسل له رسايل مع افنان وانا اسوي واسوي واسوي،
كلام فاضي ماله آخر صدمة عمري كانت ذاك اليوم...
غادة..انصدمت:انتي تتكلمي من جد!!،هادا مجنون ولا...حقير ولا حمار ولا اش بالضبط!!،هادا اش نوعوه من البشر!!،ليه طيب!!ليه كذب كده!!ليه سوى كدا؟؟
الرزان..ابتسمت بمرارة:مادري،مافهمت ليش يومها ولا حاولت افهم ولا ابي افهم خلاص
قد ماكنت احبه قد ما كرهته مليون مرة
غادة:ممـكن تسامحيه؟؟
الرزان:ماطاب الجرح لسه،يمكن اقدر بعد سنة سنتين يمـكن...
غادة:هو ماحاول يكلمك مرة ثانية؟؟
الرزان:انا سويت له بلوك وديليت من الماسنجر ومن حياتي بعد رميت كل رسايله و هداياه،
هو ماحاول يكلمني مباشرةً واصلاً هو يشتغل بالرياض وكان يجي كل ويكند لكن بعد اللي صار ماصار يجي الا بالشهر مرة
..سكتت تتذكر..بس شفته يوم سفري واقف بالمكان اللي كان يوقف فيه كل مرة عند نافذتي،ماعرف ايش اللي خلاه يجي
ولا يوقف بذاك المكان!!بس مااهتميت...
غادة..مسكت وجهها وطالعت بعيونها:الرزان!!،عيني بعينك كده..سكتوا ثنتينهم وعم الصمت للحظة..مازلتي تحبيه!!
الرزان..التفتت الجهة الثانية:لا طبعاً،بس مشاعري اتجاهه مازالت مشتتة وفي حالة صدمة من فعلته،ماتخيلته
في يوم يصير لئيم لهالدرجة!!بس عشاني ماسمعت كلامه وعشاني اصريت عالسفر وهو رافض!!
غادة..حطت يدها على كتفها وضمتها:خلاص انسـي وسكري الموضوع،لو بعرف القصة كده ماكنت سألت عنها حتى،انســي وعيشي حياتك ياحبيبتي...
يالله..غادة ماتطلعين حنانج الا بالضم!!،تضايقت الرزان شوي من ضمتها..
:تؤ تؤ تؤ،وشو وشو هذا!!الصراحة عيب عليكم يعني عشان ماحد حواليكم ماخذين راحتكم!!
الرزان وغادة..تخرعوا والتفتوا جهة الصوت:فـــارس!!
غادة:والله رعبتنا،اللـه ياخـ...
فارس..قاطعها:استريحي ولا تدعين عليّ،لانج اذا دعيتي عليّ مافي احد بيرجعج.......
الرزان سرحت بعيد عنهم،
عزيز درس بكلية تابعة للحرس الوطني بالرياض شي بالعلاج التنفسي
واشتغل بمستشفى الحرس الوطني هناك..كان شغوف بتخصصه مع اني مافهمته كثير بس حسيت بحبه لهالتخصصوشكثر هو مستانس فيه..
هو اللي علمني احب الدراسة اكثر واكثر وللأسف هو اللي كان يبي يحطم طموحي!!..
مادري اذا مازلت احبه مادري!!..بس حب ست سنوات مش ممكن ينسي في يوم وليلة..
(كيف قدرت تسويها ياعزيز كيف!!هانت عليك العشرة!!هان عليك الحب اللي بينا؟؟..
ليــش سويت كذا؟؟ليتني افهم بس ليش!!..
تبي تقهرني!!تمنعني من السفر!!تبي تربطني جنبك ومعاك وبس؟!!)..
غباء اني اتعب نفسي وافكر فيه اصلاً ليش اتعب عمري على ناس ماتستاهل!!
،انقطعت أفكارها بـ صوت فـارس يناديها..
الرزان:سوري كنت سرحانة،ايش كنت تقول؟؟
فارس..ابتسم:لاسلامتج ولاشي..قام من مكانه وعينه على جهة البنات..انا بروح اتمشى شوي
غادة..اول مابعد عنهم شوي:لا تقوليلي مالا حظتي من سرحانك نظراته ليها!!
الرزان ابتسمت وهي تهز راسه ورجعت تقرا بالكتاب..تقلب في صفحات الكتاب بدون ماتقرا فعلاً!
غادة:انتي خليكي فعالمك احسن لك،وربي انا متأكدة انك بتقلبي في الصفحات بدون ماتقري!!
الرزان راحت بعيد مرة ثانية وهي تشوف هنادي تنطط ومعها اصيل بينما سديم شوي بعالم ثاني،
واضح وضوح الشمس من نظراتهم بينهم شي..لكن افعالهم كلامهم مافي شي يدل..
غامضين فعلاً وخصوصاً فارس متحفظ بمشاعره ومايبين عليه ابداً استغرب شلون يقدر يسطير على مشاعره لهالدرجة!!
،فارس راح يمشي قريب من هنادي واصيل وسديم ويكلمهم من بعيد،
مع اني ماقدر اسمع اللي يقولونه الا انه مليون بالمية يتحرش فيهم ويستهبل عليهم..هههههه مكشوفة..
الحين بيقولها (سديم شرايج تجين تمشين معاي وتتركين هالمخابيل!!)..
ياللـه شلون مكشوفين..افهم سر الاعجاب اللي بينهم شخصياتهم متناقضة صح..
بس هذا يجذبهم لبعض اكثر..سديم حلوة مو بس حلوة الا جميلة ومملوحة وهو طول بعرض و وسامة..
بس هو حساوي وهي قصيمية..لو كان هو من أي عيلة حساوية قلنا ماعليه بس هو من عيال اكبر عوايل الحسآ
(الهوامير على قولتهم) يعني مابيخلونه ياخذ أي وحدة وأظنه حاط بباله هالشي ويعرفه..
اما هي من عايلة عادية بسيطة صح ابوها منصب في ارامكوا بس العايلة مستواها الاجتماعي عادي
،التفتت عليهم مرة ثانية شافت فارس وسديم ماشين بعيد شوي و هنادي واصيل ومعهم غادة جالسين يركضون ويلعبون،
مسكينة غادة اكيد طفشت مني بس جالسة ساكتة..ريما بنت خالي عبد الرحمن متعودة عليّ كذا..
ريما هي اقرب بنات خوالي وخالاتي لي..شلتي هناك..وحشوني والله
(ريما عبدالرحمن الـ.... .. 20سنة.. تدرس بجامعة الملك فيصل سنة ثانية هندسة داخلية (تصميم ديكور))
و(اماني سامي الـ... ..21 سنة.. تدرس بجامعة البحرين سنة ثالثة تخصص صحافة)
و(وعد ورغد صالح الـ .... ..18 سنة.. ثالث ثانوي علمي>>بنات خالتي هند<<)..
بس طبعاً الاهم بالنسبة لي قدوتي و اخوي الكبير وكل الدنيا بالنسبة لي
خالي (خالد عبدالله الـ... ..33 سنة..طيار تبع القوات الجوية (أو اسمه الدفاع الجوي!!) ..مو متزوج)
رغم فارق السن بيننا الا اننا قريبين من بعض وهو اقرب لي من كل الناس الا ريمو طبعاً
(هاذي الآنسة غير ماكو في مثل غلاتها احد)..وما انسى طبعاً صديقتي
(نورة ناصر الـ.... ..19 سنة..تدرس بجامعة الملك فيصل سنة ثانية تخصص تسويق)
هاذي في قائمة حبايب الروح مع خالد وريمو..
انا وياها مع بعض من ثاني متوسط..طبعاً في شلة من المدرسة بس نوني (غـــلاتها بالقلب اكـــبر)..
ياللــــــه شلون مشتاقة لهم
،وتنهدت..
:عسـى ماشرقاعدة كنج قطو لحالج!!ولا بعد تنهدات وحركات!!
الرزان..نقزت مكانها:بسم الله الرحمن الرحيم،وجــع كل شوي تخرعني!!،استاذ فارس
ماتعرف شي اسمه احم احم او أي حركة تدل على دخولك للمكان!!
فارس..ابتسم:دخولي للمكان ها!،مادريت اني داخل بيتكم ولا غرفتج
الرزان..طالعته:صج صج،مايضحــك
فارس..ضحك:ماقلتيلي ليش قاعدة لحالج؟؟يالقطو
الرزان:مـالي خلق العب
فارس:ما مليتي من كلمة مالي خلق؟!مع اني بس اعرفج من اربع شهور الا اني سمعتها منج اكثر
من أي شخص أعرفه من سنين!!،كم مرة اقولج هونيها وتهون
الرزان..طالعته:طيــب طيــب
فارس..استغرب نظراتها:في شي؟؟نظراتج اليوم غريبة،تبين تقولين شي؟!
الرزان:انت تبي تقول شي؟؟
فارس:الرزان بتقعدين تلعبين معاي!!،بقولج مالي خلق العاب مالها داعي،قولي اشعندج؟؟
الرزان:الصراحة حلوة وانا خايفة على صديقتي،انت عارف عن مين اتكلم اكيد
..سكتت تنتظر رد هو بقى جامد..المهم انا مادري ستتوقع في النهاية بعد هاللقاءات والمكالمات شالنهاية ياترى!!
زواج؟؟انت تدري اهلك ماراح يوافقون وواثق بعد،من الحين اقولك واحذرك لاتلعب بمشاعرها
وانت اكبر من هالشي وهي صغيرة هبلة وغبية
فارس:انتي كبرها ماشوفج هبلة وغبية،بالعكس تفهمينها وهي طايرة،ليش ممكن تكون هي هبلة وغبية!!
الرزان:الفرق بينا كبير وكل انسان وله شخصيته،اكيد انت تعرف شلون شخصيتها بالضبط مو؟؟
..و بعد مارد وظل ساكت..هي كذا هبلة وعبيطة وعلى نياتها،لسه ما انضجت لسه فيها المراهقة اللي...
فارس..قاطعها:انا فاهمها عدل لاتتعبين نفسج في الشرح،
انا ماراح ارد عليج ولا بفسرلج تصرفاتي لانج مو امي ولا ابوي،انتي بعد مازلتي مراهقة زيها
لكن انتي المراهقة اللي تكره نفسها وكل اللي حولها،وهاذي مرحلة الاكتئاب
في المراهقة راح تستمرين فيها للأبد لو ماشفتي لج حل...
الرزان..بعد ماوصلت عندها قاطعته:رجاءً ياواعظ زمانك خل نصايحك لنفسك،
لاتنصحني في اشياء انت ماتدري عنها،لا تتجرأ حتى
فارس:وطــي صوتـــج
الرزان..قامت من مكانها بعصبية:مو موطيته انزين،انا نصحتك من باب الخوف على صديقتي،
من باب الأخوة اللي بينا،بس هذا مايسمح لك تتمدى وتتعدى حدودك وتتكلم
في اشياء ماتدري عنها
فارس:الرزان!
الرزان:اسمعني انت هالمرة،تبي تعيش وتستمتع بشبابك يااستاذ روح بعيد عنا،افرد عضلاتك بعيد يا بابا...
البنات سمعوا الصراخ وجاوا ركض..
غادة..سمعت الرزان فسحبتها بسرعة:الرزان!!،لاتخلي اعصابك تأثر عليكي!!
الرزان..طالعتها:ههه تمزحين!،هالجنس هذول كلهم واحد يبون يفردون عضلاتهم على أي احد والسلام
بدون مايفكرون شاللي بيصير بعدين،كأننا تسلية لهم الشهر هاذي بكرا هاذيــ...
قبل لاتكمل كان فارس بيعطيها كف بس..
سديم..مسكته:فـــارس!!
الرزان كانت عيونها بعيونه..اول مارفع ايده ارتجفت ورجعت على ورا..لما مسكته سديم غمضت عيونها وراحت تركض بعيد..
غادة..طالعت فيه وهي رايحة ورا الرزان:مهما قالت مالك حق ترفع يدك عليها،لاتنسى نفسك مرة تانية...
وراحت تركض ورا الرزان..
فارس..فك يده من سديم وراح للسيارة والتفت قبل:اذا رجعوا لحقوني عالسيارة
هنادي واصيل وسديم راحوا بعد يدورون مع غادة نص ساعة ومالقوا لها اثر!!فراحوا لفارس..
اللي رجع يدور عليها معاهم ومرت ساعة ورا ساعة بدون مايلقونها!!..
الرزان راحت تركض وتركض وتركض وبعد ماتعبت جلست عند شجرة،
عالأقل في نور والدنيا لسه نهار
،ارتجفت من البرد اللي حسته فجأة والخوف اللي كبر داخلها فجأة لأنها اكتشفت انها ضاعت،
شاللي خلاني اهرب زي الخبلة كذا!!..ياغبية ياالرزان ياغبية..الحين كيف ارجع بعد ماضعت!!..
كيف بيلقوني بعد ما ابتعدت هالمسافة!!
،ظلت ترتجف..سمعت صوت وراها والتفت بسرعة طلعت قطوة تركض..
الخوف صار يكبر بداخلها كل دقيقة..وتذكرت اللي صار لها قبل 12 او 13 سنة،
هاوشتني امي على اللعب بالشارع مع الأولاد وكيف انه مايصير العب مع الأولاد لانه عيب ومادري ايش..
انا استنكرت وعاندت جآت بتضربني (كالعادة مو شي جديد الضرب)..
كردة فعل هربت للشارع وكان الناس توها مخلصة صلاة المغرب وبعد آذان المغرب ماكان في احد يطلع يلعب بالشارع..
فظليت اركض بالشارع وتخبيت ورا عمود غريب ومكسر مادري تبع وشو!!قعدت نص ساعة جالسة عند هالعمود..
وبعدها شفت ظل طويل وراي فكرته خالي خالد ولا ابوي ولا عادل اخوي التفت..
طلع سواق بيت جدي الكريه مع اني اكرهه الا اني شفت فيه وقتها النجاة..
قلت له اني ابي اروح عند جدتي وقال (مافي مشكل)..
رحت وياه ومن تعب اللعب بالكورة في الشارع طول النهار والنحشة من امي نمت بالسيارة..
بعد مادري كم ساعة صحيت طالعت حولي ظلام ولا شي يبان مو السيارة!!ولا بيت جدي!!..
كنت بارجع اكمل نومي بس لما انتبهت لخيال فوق راسي وخيال قدام عيوني طار النوم..
كل واحد كان يفصخني ملابسي من جهة..صرخت وصرخت وهذا كل اللي قدرت اسويه..
رغم اني صاحية تماماً الا ان جسمي ماكان يتحرك ابداً كان زي اللعبة بين ايدينهم..
ظليت اصرخ لين مااختفى صوتي واكتفيت بالدموع وكأنها ممكن تهون العذاب اللي كنت اعيشه واغمض عيوني عشان مااشوف بس ماابي اشوف..
يومين كاملين ظليت في ذاك المكان المظلم وكل يوم كان في اثنين هم نفسهم غيرهم مادري!!الكلام نفسه مايتغير لكن الاصوات يمكن تتغير!!..
عشت الجحيم خلال هاليومين.. ألمي الأكبر كان اختفاء ابوي وخالي ليش ماسألوا عني!!..
ليش ماحد يدور عليّ!!يعني مايحبوني ومايبوني لهالدرجة!!عادي يقطون بنتهم للهنــود!!!..
بعد هاليومين رموني رمية الكلاب ملفوفة بشي يسمى فوطة(منشفة) عند اول الحارة..
وانا ماحسيت بشي بعدها لاني دخت ونمت..صحيت شفت ابوي فوق راسي ويصيح!!واخواني وخواتي كلهم وخالي بعد..
وشفت امي بزاوية تطالعني بنظرات (عمري ماراح اقدر افهمها)..
ابوي لما انتبه اني صحيت ضمني وبوسني انا صرخت وصيحت وضربته ماكنت ابي احد يقرب مني مابي احد يلمسني كافي اليومين اللي حسيت فيها بالايادي تمسح على جسمي..
كنت بالمستشفى لمدة اسبوع فحوصات ومهدئات ومادري وشو بالأخير طلعت وصرت لاصقة بجدار غرفتي ماتحرك من غرفتي الا للضرورة مرت الأيام ورجعت للمدرسة..
مرت سنة وسنتين وثلاث قربت ادخل بالـ 12 فلما جا عيدميلادي اصروا اننا نحتفل بمطعم..
رحت للحمام (الله يعزكم) مع اختي نوف وطلعت قبلها وانتظرتها عند الباب..
فجأة شفت وجه مألوف بالنسبة لي كان احد اسباب معاناتي خلال هالسنين (هم كانوا اربعة زي مااكتشفوا الشرطة..
منهم سواق بيت جدي اللي لقوه واسجنوه طبعاً واخذ مايستحقه بعدين..و واحد ثاني معاه..
والثالث لقوه بعد سنة ) فكان هذا هو الرابع صرخت لا ارادياً اول ماسمعت صوته وعرفته وهو بعد عرفني (وكيف يقدر ينسى) انقض عليّ رفسته لكمته سويت كل شي اقدر عليه لكنه كان اقوى واكبر حجماً بكثير..
مادري كيف ماحد انتبه " أي احد!!"..جرني وهو كاتم انفاسي بيده الكريهة..
انا تدريجياً اختنقت واغمى عليّ لكني ظليت احس بكل شي حولي لين صحيت وانا على سرير وعلى وجهي شي ساعدني اتنفس بس ريحته كريهة..
وجسمي على شراشف بيضاء ونوف على راسي تصيح وخالد ماسك ايدي غمضت عيوني وقتها..
وكأني كنت صاحية لما قرر ذاك الحقير انه ينتقم مني للمرة الأخيرة ويسرق آخر اللي بقى لي من جسمي بعد ما انتهكه للمرة الاولى ومزقه..
رجع يكرر فعلته قطع عبايتي وملابسي وقضى عليّ للمرة الأخيرة
،ارتجفــت وارتجفــت وكأن كل هذا صار اليوم..
صرخت بصوت عالي وصرخــت:بــــابــــا،بـــابـــا
فتحت عيونها بعد ماكنت مغمضتهم..الشمس خلاص غربت وبدت الدنيا تظلم..
ارتجفت وارتجفت ورجعت تصــرخ:بــــابــــا،خـــالـــد،بـــابـــا
سمعت صوت مألوف يناديها:الرزان،الرزان،الرزان انتي وين؟؟،الرزان تسمعيني؟؟
الرزان..صرخت بقوة وهي ودها تقوم تركض له بس رجولها ماتشيلها:طـــلال،طـــــلال
وخنقتها العبرة وقعدت تصيح..سمعت صوت يقترب..
طلال..كان يحاول يهتدي لصوتها وين مكانه:الرزان،الرزان وينــج؟؟
الرزان..حاولت تصرخ:طـــلال،طـــلال انا هنا ورا الشجرة
وسمعت صوت ركض ركض وكل شوي الصوت يقرب اكثر..
طلال..كان ينادي عالباقي:خـــلاص لقيتها،لقيتـــها..قرب وصار فوق راسها وبهمس..الرزان
رفعت راسها وشافت وجهه اتطمنت وتمسكت فيه بقـــوة واغمى عليها..شالها على طول..
خالد >>واحد من اصدقاء طلال<<..شافه وراح له يركض:اغمى عليها من وقت ولا توها؟؟
طلال:توها اول ماشافتني اغمى عليها،سرعة خلينا نروح للمستشفى
طلعوا ثلاثة من وراهم >>من اصدقاء طلال<<..
خالد:شباب احنا بنسبقكم في سيارة فارس
طلال ركض للسيارة فارس اللي كان مشغلها وينتظرهم..
ركب خالد قدام جنب فارس وطلال ورا مع الرزان..
غطاها خالد بجاكيته وحسب سرعة نبضها والتنفس >>طالب طب<<..
ودوها الطوارىء حطوا عليها مغذي وجهاز التنفس وحاولوا يدفونها.....
فارس لما مالقوها بعد ساعتين دور رقم اخوها ولقاه >>يشتغل بالسفارة<<..
طلال كان مسافر من اسبوع برا لندن >> هذا اللي نسته الرزان يوم دقت عليه ذاك اليوم<< وكان هو وربعه راجعين بالطريق لما دق عليه فارس..
طبعاً هزأ فارس وشرشحه وطبعاً فارس ماقصر ورد عليه وتهاوشوا وبعدين فرقوا بينهم ربع طلال وذكروهم بالبنت الضايعة......
بعد ساعات صحت وتطمنوا عليها وقرر الدكتور يخليها يوم عشان ترتاح وبعدين يطلعونها..
طلال:انا آسف ماكان قصدي والله ماكان قصدي اتركج لحالج..مسك يدها وباسها..آســف
الرزان:طـلال مااتصلت باحد صح!!
طلال:تقصدين اللي بالسعودية،لا لا ماحبيت اخرعهم بس لو مالقيناج كنت باتصل،فارس الزفت هذا شسوى لج؟؟
الرزان..طالعته:لايروح بالك لبعيد طلال!!،كانت هوشة عادية انا اللي كبرتها
و بكل غباء رحت اراكض كني خبلة
طلال:انتي يالخوافة سويتيها!!،مو معقولة لازم سوى شي خلاج تهربين كذا؟؟
الرزان..لفت وجهها الجهة الثانية:كان...كان بيعطيني كف لاني طولت لساني عليه،وكان من حقه انا اللي مصختها
طلال..طالعها بشك:مع اني مو مصدق،بس كنتي كسرتي له يده عشان يعرف شلون يمدها
الرزان..نزلت من عيونها دمعة:انا خفت من النظرة اللي كانت بعيونه،ذكرتني بنظرة أمي لما طالعت فيني ذاك اليوم و...
طلال..مسك ايدها بقوة:خلاص ياالرزان لاتفتحتين في الجروح،عطيها فرصة تلتئم وتطيب لاتصيرين انتي والزمن على نفسج!!
الرزان:لو يمـر دهر كامل مابتلتئم،أي شخص بيلمسها بترجع تنزفــ...
:احــم احــم
طلال:تفضلي!!
الرزان..التفتت:غــادة
غادة..قربت منها وضمتها:ياشيخة طاح قلبي عليكي من الخوف
الرزان..ابتسمت وفي عيونها الدموع:ولايهمج ماصار شي
غادة..جلست عالسرير:يابكاشة!!اش هو دا اللي ماصارشي!!،وكل الأزمة هادي ليه؟تكون عشاني يعني!
الرزان سكتت واكتفت انها تتبادل مع غادة نظرات..
غادة..فهمت فحاولت تخفف من الألم اللي بصديقتها:اتصلك الحين بخلودي وتنسي وجع العالم كلو اش رايك!!
الرزان..ابتسمت:أي والله..التفتت على طلال..اتصل على خالد ابي اكلمه
طلال..طالع ساعته:أي خالد في الساعة هاذي!!،الساعة وحدة الحين اكيد عندهم 3 ولا اربع كلميه بكرا لما تهدين وتروقين
..حبها على راسها..انا بانتظر برا وراح تطلعين وتظلين عندي بالشقة لين ماتشبعين اوكي
الرزان:وربعـك!!
طلال:مافي الا خالد بيطس مع الربع البقية،الا صحيح يتحمدون لج بالسلامة ويقولج جراح خطاج الشر،قسم إن هالكويتي تحفة
الرزان..ابتسمت:حرام عليك!!،خطاه اللاش والله يسلمهم
طلع طلال وترك غادة تعالج جروح الرزان..لكن الرزان تحفظت وماحبت احد يعالج جروحها..
فابتسمت لها بكل هدوء...

[..الجـزء الثالثــ ..]

طلعت الرزان من المستشفى وصار لها اسبوعين بشقة اخوها..
تصالحت مع فارس وصالحته مع اخوها وعرفتهم على بعض زي الناس..
التقت أكثر من مرة بصديق اخوها خالد >>الشقة حقتهم تبع السكن الجامعي..
و "شقة" طلال وخالد عبارة عن "استديو"..غرفتين وصالة ومطبخ صغير"بقوة" ..الرزان اخذت غرفة طلال..وطلال نام بغرفة خالد<< والتقت بـ جراح وسعود التحفة الثنائي ...
دق جرس الباب >>مع ان عنده مفتاح الباب<< أدب يقولك يعني!!..
وبعدين فتح الباب بمفتاحه ودخل..طالع يمين يسار مافي احد بالصالة!!،
وين راح طلول!! يكون طلع !!بس اليوم سبت وهو داري اني جاي؟؟،..
حط اغراضه على اول كنبة قدامه..شوي ورفع راسه توه ينتبه انهم مشغلين شي،
وشهالهم والغم..ساعات!!يا طلول ساعات!!..يعني مافي اغنية غيرها بسي دي راشد!!..وبعدين من متى تسمع هالنوع من الأغاني؟!
،راح وغير الأغنية بالاستريو وحط على سلامات،
ههههههههههه..وهاذي لك ياطلول..من جد سلامات ههههههههههه،
:طلـول وعمى ليش تغير الأغنية،قيس وليلى هــا،هذا كله تأثير غادة الدبة،رجعها احسن لك
خالد تجمد لما سمع صوت الرزان وظل معطيها ظهره ولاتحرك..مايبي يحرجها ويحرج نفسه..
وهي مااهتمت ولا لاحظت الفرق لان طلال بطول خالد ولهم نفس الجسم بس الشعر غير وخالد كان لابس قبعة..رجعت ودخلت الغرفة..،
معقولة ماانتبهت لصوت الجرس!!..ههههههه صج هبلة ..دائماً هالانسانة كئيبة اجل قلوا الاغاني الا ساعات..ســلامات!!هههههههه
،وظل يحوس بالاستريو وصل لعشان الحب سمع صوت ركض من وراه..
:لا لاتغير رجاءً لاتغير..فجأة صمت..هههه لاتخاف استوعبت انك خالد
خالد لف شوي شوي وهو ماسك ضحكته..
الرزان..ابتسمت:تقدر تضحك مافي مشاكل..ولفت راجعة للغرفة فقعد يضحك ويضحك.. طلال بالمطبخ يبي يسممك بأحدى طبخاته العجيبة
خالد قعد يضحك،
والله مادري مين العبيط و الخبل انا ولا انتي!!..بس الظاهر احنا الاثنين!!
،ورجع يضحك شال اغراضه وراح للمطبخ:مساء الابداع ياشيف طلال!!،شالدعوة الآنسة تقول تبي تسممني
طلال مارد ولا التفت..فانتبه انه حاط باذانه سماعات..
خالد..شال وحدة وصرخ بعيد عن اذن طلال: طـــلول وصمخ!!
طلال..تخرع وكب على نفسه من الخبيط اللي يسويه:الله ياخذ العدو،ياشيخ خرعتني خلك مؤدب وذوق ولو لمرة في حياتك،ابي اعرف
انت شلون دكتور وانت بتقتلني في يوم من الايام!!
خالد..ضحك وباسه على خده:ومن الحب ماقتل،شسوي اذا انا اموت عليك،اموووت عليك
طلال..دفـه بعيد عنه:بعد عني بلا قرف،ايش حركات البنات اللي انت طايح فيها!! يكون قلبت الى...
خالد..قاطعه وضربه على ظهره بقوة:عمى بعينك طلول والله لو كنت نطقتها كنت تبريت منك،قلة ادب صج!!
طلال..ضحك وهو يشوف خالد قعد على كرسي مقابله وهو يسوي نفسه معصب وزعلان:مادري عنك احياناً تتهور وتسوي حركات تنفهم غلط
..يبي يكحلها عماها مرة وحدة..لأن خالد عطاه نظرة.. آ،آ،آسف ياخي خلاص يمـا منك ماحد يمزح معاك!!
خالد..رفع حاجب:لما تبي تمزح امزح زي الناس،بعدين من فينا اللي قلب!!،
اشعندك جالس تطبخ ولا بعد مع اغاني وحركات مايسوونها الا...
طلال..ضحك:من الحب ماخسبق،ههههههههههههه
احبك ياخي وحبيت اسويلك شي من يديني الحلوين
خالد..ابتسم:سديت نفسي،حسيتك بقوة منهـم مع هالحركات البايخة!!
طلال:لا اعوذ بالله،اسكت وانا اخوك لاتقول هالكلام لاحد يسمعك ويصدق...
:يصدق وشو؟؟
خالد..ضحك:ان اخوك قلب لـ....
الرزان..انقلب وجهها:رجاءً لاتكمل،فهمت..وقفت لحظات تستوعب..عيـب عليكم اثنينكم وشهالكلام!!
طلال:اقول استريحي ياللي تبي تقلب ولد!
خالد..انصدم:ولــد!!!
الرزان..مااهتمت:بس اني ابي اكون ولد شي واللي تتكلمون عنه شي ثاني
طلال:بس هذا يعني انك...
الرزان..شهقت:لاتكمل وش مشكلتكم انتوا اليوم!!،مو صاحين اكيد،طبعاً مو كذا بس احس حياتي بتصير اسهل كولد
خالد..التفت عنهم:اللــه يعيــنك على نفســك
الرزان:ليش ان شاء الله!!
خالد:بـس
الرزان:Where ever,I don't care think as you like لان ببساطة هذا رايي،طلال
ابي اروح مكتبة الجامعة عندي اختبار بكرا
طلال:ماقدر الحين!!
الرزان:يوه لو انا اسوق كان اخذت مفاتيحك ورحت،شفتوا ان حياتي كولد اسهل
طلال:اللهم لك الحمد،روحي وخذي رخصة وسوقي السيارة براحتك،بس مالك حل الا تروحين مشي ماهي بعيدة!!
الرزان..تغير وجهها:اروح مشي لحالي!!
طلال:كنتي تبين تروحين بالسيارة لحالج شالفرق!!
الرزان:ا،خـ،خلاص امري لله
وطلعت من المطبخ..
خالد:حرام عليك،شكلها خايفة تروح لحالها
طلال:ادري بس لازم تتعود،انا مابظل دايماً لاصق فيها
خالد..ابتسم:بس هي شكلها خوافة!!ليش من اول فكرت تدرس برا؟؟
طلال:مادري عنها!!،احياناً احس عناد واحياناً احس تهرب وهرب
خالد:عناد في مين؟؟وتهرب وهرب من وشو؟؟
طلال:عناد في امي وفي الكل،وتهرب وهرب من امي ومن الزواج
خالد:غريــب فعلاً!!
طلال:اختي طول عمرها كذا غريبة
الرزان كانت تبدل ملابسها وقفت قدام المرايا تطالع بنفسها،
اكره المرايا ومازلت اكرهها..مادري ليش!!بس طول عمري كذا اطباعي دفشة (ولادية) على قولتهم..من صغري البس بس بنطلونات اكره التنانير(شي اكيد..
لانها ماتنفع للعب الكورة والمراكض)..واتكلم بصوت عالي واصرخ بدون مااهتم بالرقة والنعومة..
طبعاً بعد اللي صار زاد هالشي..كرهت اني بنت أساساً..ومازلت اكره هالشي
،طالعت بجسمها هالمرة..و كانت بعيونها نظرة شفقة على نفسها!!،
بعد ما توفى ابوي زاد وزني تدريجياً.. لاني صرت آكل وآكل واحط حرتي بالأكل..
بس لما وصلت ثالث ثانوي وقرب وزني للستين حسيت اني لازم اتدارك نفسي..
مو لشي بس اكره اصير دبة..مو كافي اكره نفسي وجسمي بعد زيادة اصير دبة لاماله داعي..
وهاذي انا صار وزني 45 نحيفة زيادة عن اللزوم لان طولي صار 158..
يعني يانحيفة يادبة يارزون!!
،ورجعت تكمل لبس..اللي صار لها اثر عليها كثير..كرهت انها تكون انثى فعلاً..
كرهت تظهر انوثتها..فكانت تلبس دائماً بنطلونات وتي شيرتات..
حتى في الأعياد مايهمها بتهزيء امها وتعليق خواتها تروح تشتري بنطلون و معاه أي بلوزة محترمة والسلام..
حتى لما جات تجهز للسفر اشترت جاكيتات طويلة وبلايز طويلة تلبسها مع البنطلونات وبالغصب اشترت لها ثلاث تنانير ومارضت الا بالجينز..
طبعاً هالقاعدة كانت تتغير في الأعراس فهي ماتبي تصير شاذة زيادة عن اللزوم فتلبس فستان وتلبس كعب وتستشور شعرها لكن ماتحط ذاك المكياج وتكتفي بشي خفيف جداً وكان هالشي يقهر خواتها..
صحيح اللي حولها يتفهمون ليش بس صعب انهم يتقبلون هالحالة..وخصوصاً لما انخطبت صار صعب انهم يتقبلون انها تكره انوثتها..
خلصت الرزان لبس وضبطت حجابها وطالعت في المرايا تتاكد من الحجاب وشالت شنطتها وكتبها وطلعت...
الزران..نادت بصوت عالي:طلال يــلا انا طالعة،اذا تبي شي دق عالجوال
طلال..طلع من المطبخ:مابي شي، بس دقي اذا وصلتي المكتبة
الزران.. فهمت عليه:ان شاء الله،يـلا مع السلامة
طلال:فمان الله
طلعت..وطلال سـرح بعيد،
مادري بتكون بخير ولا لا!!..ادري هي خايفة تروح لحالها..و للحين من جات لندن ماطلعت الا ومعاها احد من صديقاتها..
الله يحفظها من كل شر..احس بالذنب لاني انشغلت عنها بالجامعة..بعد مارجعنا بشهر كان عندي اختبارات لمدة شهر..
وبعدين اشغلتني الدنيا..بس والله مااستحي على وجهي اعرف حالتها واتركها لحالها بهالغربة..
دائماً كنا قراب من بعض هي اقرب وحدة من اخواني وخواتي لي وانا اقرب واحد لها طبعاً بعد خالي..
بس بعدنا بعد سالفتها مع عزيز..عزيز صح صديقي بس..بعد اللي طلع منه ما عدت اطيقه..
انا اعرف اختي كانت تحبه..بس ماني فاهم شلون وهي كانت تكره كل ذكر على وجه الكرة الأرضية(طبعا! غيرنا احنا)..
لما يبتسم لها أي واحد ولا يغمز لها تكره الدنيا بكبرها..مادري شلون حبته فعلاً!!كنت اقولها ماتحبينه هاذي اوهام..
بس ترجع تقول هو غير انا وياه كأننا ربع كأني واحد من اخوياه يضحك معاه ويسولف معاه مافي كلام حب ومافي هالكلام الفاضي..
وهالشي اكد لي دائماً ان اللي بينهم مو حب..ممكن يكون أي شي لكن ماهو حب اكيد..
عزيز مافكر في يوم من الأيام انها مو مستعدة تتزوج أبداً لانه مايدري باللي صار لها..
واللي انا متأكد منه انها مافكرت بالدراسة برا الا عشان تهرب من الزواج بأي طريقة..
كانت تظن انها تحب عزيز لكنها ماكانت مستعدة تتزوجه فعلاً لو ايش يصير!!
،قاطع افكاره...
خالد:انت ياخووووي،وين سرحان!!يكون تأثير غادة على قولت اختك؟!
طلال..ضحك:أي غادة يا خي روح منك،هي كذبت الكذبة وصدقتها
خالد:يعني من جد مانت معجب؟
طلال:أبداً والله ولا فكرت حتى!!
خالد:احسن كذا خلك عاقل
طلال..ضحك:ياسلام،يعني بس حلال عليك انت تخطب وتتزوج واحنا لا!!
خالد..طالع يده اليمين ودبلته:اكيـــد
طلال..ضحك عليه:رجاءً خلنا ناكل،مو وقت سرحانك بحبيبة القلب
خالد..ابتسم:طــس مناك،مالت عليــك
الرزان في الطريق للمكتبة..اخذتها تمشية وتطالع الناس حولها..ووقفت عند الأشارة تنتظر السيارات تمشي..
وكان بالزاوية اللي وراها مقهى..فالتفت تتفرج عالناس..كان في واحد جالس لحاله وقدامه كوب ويدخن،
متأكدة يشرب قهوة..بس ليش يدخن!!..أكره اللي يدخنون موت ..ريما المسكينة دايماً تختنق من الدخان لأن عندها ربو..
وانا بعد عندي حساسية بالصدر واختنق منه (هههه مكملينها احنا الثنتين!!)..
معظم اللي يدخنون احسهم يا ادمان وتعود على الدخان.. يا لأنه معصب ومقهور أو حزين ومهوم..
هذا احسه يسحب الدخان ببطء ويطلعه ببطء..كأن هم الدنيا كله فوق اكتافه..اووووه هونها وتهون..
توني احس بقيمة هالكلمة يافارس..هههه
،شافت وحدة ثانية جالسة ترضع ولدها!!..فشالت عيونها عنها بسرعة،
يعععععععع..وش هالقرف.. اكره اشوف وحدة ترضع ولدها ولا بنتها..ولا هاذي جالسة قدام العالم!!..صحيح مغطية بلحاف البيبي بس حتى لو!!..
انا ما اؤيد ان الوحدة ترضع قدام الخلق!!..يخب عليه رضاعة هالبيبي
،شافت واحد من الواقفين جنبها شايل بنت صغيرة و معاه ولدين جالسين يتهاوشون وهو جالس يصرخ عليهم ويحاول يمسكهم ،
يووووه ياكرهي للبزارين..هم على القلب استغفر الله..ومسؤولية كبيرة بعد..
مادري ليش بس اكره الأطفال مااحبهم وماعرف كلش اتعامل معاهم!!..مني مناك مافي يعني حتى عيال خواتي بالغصب بالعتهم..
بعض الناس يقولون وين الحنان اللي مفروض يكون طبيعي فيك؟؟..ياعمي روح مناك..
بس هذا اللي يؤكد اني ماني انثى بطبيعة الحال
،ابتسمت ولما شافت الناس بدت تعبر الطريق السيارات موقفة مشت و كملت طريقها..
وهي تطالع بالسما اللي كانت مغيمة..طالعت ساعتها،
الساعة 5 ونص!!..كأن الوقت متأخر..ياويلي عالبرد



،قعدت تفرك ايدينها ببعض عن البرد وتنفخ فيهم..ولفت جاكيتها عدل حولها..
مرت بجنب زجاج عاكس فطالعت بنفسها باستغراب شوي..
كانت لابسة كالعادة بنطلون جينز كحلي غامق بقصة واسعة و قميص احمر وفوقه كنزة سودا صوف ناعمة والجاكت طويل لونه رمادي مخطط بأسود قماشه الصوفي الثقيل..
و الجزمة بوت سبورتي اسود اما الحجاب رمادي وفيه خطوط حمرا عالأطراف..غير شنطتها السودا الكبيرة والكتب اللي بيدها ،
ملابسي دائماً بألوان كئيبة..تشبهني كثير..مادري اذا راح تتغير معاي بيوم!!
،رجعت تمشي وهي تطالع بالجينز،
دفعت فيك كل ماعندي..هههه ..شف الخراط!!..اول مكافأة استلمتها من ارامكوا رحت واشتريت فيها ثلاث جينزات كل واحد مايقل عن الـ150 ريال..
اذكر امي لما انفجعت وهاوشت وصرخت لاني صرفت 1500 على الفاضي..بالنسبة لها على الفاضي مو بالنسبة لي..
انحرمت من اني اشتري الغالي طول عمري وطبعاً لما تصير الفلوس عندي ومن حر مالي ماراح ابخل على عمري..اذكر بعد اني رحت مع ريما وخواتها غالية وهلا الظهران واشتريت لي من بيرشيكا و المحل اللي قدامه (اسمه صعب دايماً مااعرف انطقه)..
بس طبعاً كل شي شريته كان للسفر شي اقدر البسه هنا..عشان اكشخ..ظليت شهور وانا كل مااستلم المكافأة اشتري الأشياء اللي احتاجها..
وتهورت بمرة وطلبت من نوفي اختي 1000 زيادة ورحت واشتريت لي ساعتين من Guess وحدة بـ 750 والثانية بـ 975 فرحت شريت وحدة ثالثة من Dkny بـ 500 و اصرت عليّ اماني نشوف بعد وحدة رابعة مدام باقي فلوس!! فاشتريت وحدة من Swatch ب 370..
طبعاً ماتتصورون ردة فعل امي ولعت عصبت وبغت تاخذهم مني عشان ترجعهم..لكن انا مااهتميت لانها دايماً كذا طبعاً الشهر اللي بعده رجعت لنوفي فلوسها..
بس رجعت استلفت بعدين عشان اشتري شنط كبار كشخات للجامعة اشتريت من Guessاكيد..وحدة كبيرة بـ 700 و وحدة عادية بـ 480 ومن Dkny وحدة كبيرة بعد بـ 599 ومن ليزكليبورن كبيرة اكيد وبـ 789 و وحدة عادية من باريس غاليري ماركة هيرميس بـ 1200..
ههههه صج بنت فقر انا..بس فعلاً كنت محرومة سنين وانا ادري مافي امكانيات لا على حياة ابوي الله يرحمه ولابعد موته..
بحياته كان راتبه مايكفينا وهذا واحنا ست بس وعلياء تزوجت قبل وفاة ابوي وعادل كان يشتغل بس هذا ماخفف المصاريف مع ان البيت صغير..
(دور واحد باربع غرف..انا ونوفي وعلياء كنا بغرفة لكن ارتحنا منها بعد زواجها..طلال واحمد وعادل بغرفة..وابوي وامي بغرفة..والغرفة الرابعة كانت مكتبة وفيها طاولة وكراسي عشان نذاكر فيها..
وفي صالة صغيرة مفتوحة على مطبخ وغرفة غسيل..غير المخزن الصغير الضيق المزحوم بالأغراض والعفسة وكان مكان للصياح والتخفي احياناً لي..
وفي مجلس وغرفة صغيرة للحريم) بس للأسف هالبيت كان ايجار..طار راتب ابوي الله يرحمه عليه..
ومصروف لنا وللبيت!! ماكانت الـ 7 آلاف اللي ياخذها ابوي الله يرحمه كراتب تكفي اكيد!!..
اعترف دائماً كنت ابي البس مو ماركات عالمية وغالية لا عالأقل من zara,mango هالمحلات..بس كان هذا ممنوع..
اما في العيد كنت آخذ 700 لملابس العيد بس فكنت اشعر بالحرمان..ليش ماكنت مثل غيري..مثل ريما وخواتها مثل باقي بنات خوالي وخالاتي!!..
حتى بعد وفاة ابوي الله يرحمه انتقلنا لبيت جدي الله يرحمه وسكنا مع جدتي وخالي خالد وخالتي ايمان ماكان البيت يكفينا كلنا بس عادل اخذ شقة وتزوج بعد فترة..
بس الحمدلله تدبرنا امورنا..(البيت دورين فوق اربع غرف..وتحت غرفتين وحدة منهم مخلينها جلسة وصالة ومطبخ وصالة ثانية ومجلس كبير تقريباً..
امي كانت مع جدتي بغرفة..احمد وطلال استولوا على غرفة خالد الغرفة الكبيرةبس فضت بعد مااحمد تزوج وطلال سافر فرجع اخذها خالد وقط اغراض طلال بغرفة ثانية..
انا بغرفة.. ايمان ومعاها نوفي بغرفة..ماكان عندي مانع تكون معاي نوفي بس ايمان اصرت انها تكون معاها..
اذكر خالد قعد يضحك ويقول "الدنيا حظوظ انا انطرد من غرفتي وناس تاخذ غرفة لها لحالها!!"هههه..
بس بعد نوفي تزوجت وفضى الدور لنا انا وايمان وخالد وطلال كل واحد بغرفة) طبعاً البيت شارينه خوالي وخالاتي كلهم جمعوا واشتروه لما كان جدي الله يرحمه عايش لانه ماكان يشتغل..
ومازالو خوالي كل واحد منهم يعطي جدتي مصروف مع ان خالي خالد يصرف على اغراض البيت ويعطيها مصروف..
وايمان بعد تحط بمصروف البيت وتشتري اغراض للبيت احياناً كلهم مو مقصرين..كان يمشي لنا راتب من الشؤون الأجتماعية امي خلته مصروف لنا..
ومافي راتب من الشركة اللي اشتغل فيها ابوي الله يرحمه!!..وبعد خوالي كانوا يجمعون ويعطونها كل شهر 3آلاف (ماقصروا ربي يحفظهم لنا)..
وفي العيد لكل واحد منا 1500 غير العيديات 100 ريال من كل واحد (ببساطة اغرقونا بكرمهم..معنوياً بعد)..
يوووه انا شاللي ذكرني بهالغثا ولوعة الكبد!!
،هزت راسها تبعد هالأفكار ورجعت تطالع الغيوم ،
لندن مدينة الضباب!!هـه..احس هالمدينة تشبهني كثير كئيبة جداً عملية جداً روتينية جداً..
الناس كل يوم تلبس وتروح اشغالها وبيدها كوب قهوة مايضحكون ومايلعبون ومافي عندهم وقت دائماً..بعد هم يشبهوني..
لانهم كئيبي الوجوه مايبتسمون للغرباء مايحبون السوالف والضحك كثير يمشون لطريقهم ومايطالعون يمين او يسار..
بس في هالشي مايشبهوني هههه احب اتفرج عالناس كيف تعيش حياتها!!وأألف لهم مية قصة وقصة بناء على تصرفاتهم!!احس بفضول اتجاههم!!..
صحيح " من راقب الناس مات هماً" بس انا ماتنطبق عليّ هاذي المقولة لاني ماامل من مراقبتهم!!
،رجعت تطالع حولها الناس الماشية وعلى وجوههم نظرات جدية واغلبهم ماسك جوال ويتكلم فيه..واللي يركض مستعجل..
بالغلط طاحت عيونها على اثنين،
استغفر الله..يعني مافي مكان الا الشارع تعبرون فيه عن مشاعركم..الله يقرفكم..قلــة ادب والله
،وخرت عيونها بسرعة وارتباك وركضت لا ارادياً..تكره تشوف هالمناظر..
يمكن تقولون اشدعوى ماشافت افلام!!..البوسات اللي في الافلام تختلف وبعدين نص محطاتنا الحمدلله يقطعون..
البوسات اللي في الواقع تختلف لما تشوفون هالشي قدام عينكم!!..وقفت ركض وهي تلهث بعد ماحست بتعب وماقدرت تتحمل الركض اكثر..
الناس حولها تمشي مو مهتمة بأنها تطالعها حتى،
لو في السعودية كان الحين قالوا "اشفيها هالخبلة تراكض!!"حتى لو كان واحد يركض بالشارع بيقولون نفس الكلام..
إلا اذا كان يسوي رياضة ولابس لبس رياضي
،تفاجأت لما سمعت صوت...
: هاي،هـا يالخبلة شتسوين؟!
الرزان..التفت تطالع مصدر الصوت كان جاي من سيارة وقفت جنبها بالشارع وطلع صوتها همس:تــركي!!
تركي..ابتسم لما طالعت فيه مع انه ماسمعها واشر لها بأيده:هـاي،شلونج؟؟،تعالي اوصلج
الرزان..حست بخوف وبنفس الوقت استحقرته،
بكل ثقة يفكر اني بركب ببساطة واروح معاه صج بلاهة..وبنفس الوقت حقارة..والله خايفة وش بيصير لي من وراه
،وطنشته وعدلت نفسها وكملت طريقها..لكن هو مااستسلم وظل يمشي بالسيارة الدودج الحمرا جنبها..
عشر دقايق وفقدت اعصابها..
الرزان..التفت عليه:خير ايش المشكلة!!
تركي..بابتسامة:أي مشكلة؟!
الرزان:تدري انت المشكلة،لو سمحت تتركني بحالي مو ناقصتك
تركي..كان بيتكلم..فطنشته وبعدت ومشت بعيد عن جهة الشارع..بعد 5 دقايق كانت وسط الحرم الجامعي..
بدون ماتهتم اذا هو موجود وراها ولا لا كملت طريقها..راحت المكتبة وطالعت بساعتها،
الساعة 6 وثلث؟؟..قال مو بعيدة قال!!اوريك ياطلول..بس صج ماحسيت بالوقت ورجولي سليمة الحمدلله
،دخلت المكتبة رجعت الكتب اللي ماخذتهم من قبل واختارت كتبها اللي تحتاجهم وجلست على طاولة تطل على برا و في زاوية،
موقع ممتاز تماماً..للمذاكرة اقدر اراقب الناس اذا مليت ..وبنفس الوقت اكون بعيدة عن الازعاج
،ابتسمت وجلست...