الجزء الثامن والعشروون ..
مر اسبوع وهي على هالحال .. صعب عليها تروح الجامعه .. صعب عليها تروح اي مكان . جالسه في غرفتها وتتصفح البوم صورهم القديم ، اشتاقت لربعها حيل ، اشتاقت لندين ولما وسهر .. اشتاقت لهم كلهم ..
دخل الغرفة لقاها جالسه بالظلام واتشوف الالبوم القديم وتصيح بصمت .. أول ما قرب منها سكرته .. وناظرت فيه ..!
جاسم بعصبية : انتي لحد متى بتظلين على هالحاله !!
دانه تصارخ : مالك شغل فيني !
جاسم: دندونه جبيبتي .. الله يرحمها خلاص ..
دانه: ابي اروح لندن !
جاسم: لا انتي جنيتي .. شيوديك لندن هالوقت .. ودراستك !!
دانه: نو نو ابي اروح الحين .. ودراستي ممكن انقلها للندن النقل سهل لاني راح اكون بنفس الجامعه ..
جاسم: وانا ..!
دانه: وانت تعال معاي .. ترى تقدر ..!
جاسم: انتظري شهرين وراح نروح مع بعض .. أنا عندي شغل بعد شهرين !
دانه بعصبية : لا لا ابي اروح الحين ( وتبكي ) جاسم ارجوك .. احس نفسي وحيدة بهالمكان .. كرهت عمري والله !
جاسم: واحنا وش نسويلك اكثر من الي سويناه .. مخلينك على راحتك .. لدرجة صايرة ما تطلعين من الغرفة ومحد تكلم .. حتى انا ما صايرة معاي مثل أول وساكت وتاركك في حالك لكن والله ( وبدا صوته يعلى ) ان ما عقلتي لا تلومين الا نفسك .. فاهمه !
قامت عنه عشان تروح للغرفة الثانية لكنه مسك يدها بالقوه ..
جاسم : لما اتكلم توقفين وتسمعيني فاهمه !!
دانه : ان شاء الله .. اجهز لك الغدا !
جاسم جلس على طرف السرير وهو لحد الحين ماسك يدها ..
جاسم: لا تغديت براا .!
عصبت منه .. الحين يهاوشني على اني ما اهتم فيه ويروح يتغدى برا وما ينتظرني .. س انا صار لي اسبوع ما اكل الا عشا وعشى خفيف بعد .. احس نفسي مب قادرة اكل .. مب قادرة اروح للجامعه الي بدت من 4 ايام تقريبا .. اليوم اتصل فيني الاستاذ نايف ومشاعل بعد اتصلت بس ما رديت عليهم .. أمس كلمني نواف وقال انه يفضي البيت الي في قطر لانه راح يرجع للسعودية خلاص .. اذا كنت ابي اخذ شيء من كتبها او سوالفنا عشان اتذكرها اروح .. ودي اروح لكن انا عارفة اني لو رحت هناك راح انهار .. يس اكيد راح انهار هذة سهر مش اي وحدة .. هذة صديقتي ..! صديقه عمري !!
- ما بغينا انشوفك !!
دانه بابتسامه مجامله : هلا جوجو ..
الجوهرة: اخبارك حياتي ..
دانه: الحمد لله تمام ..
الجوهرة: دانوو ما ودك تروحين الجامعه .. خلاص يا عمري ما يصير تسوين بنفسك كذا
دانه: راح اروح اليوم المغرب .. عندي محاضرة المغرب .!
الجوهرة: اي اشوى !!
دانه: موجو .. ابي اروح مكان وابيك تجين معي ..!
الجوهرة: اووك لكن وين !
دانه: باروح بيت سهر ..
الجوهرة بصدمه : وش تسوين هناك !
دانه: نواف كلمني امس وقال اذا بغيت اخذ كتب او اي شيء متعلق بسهر اروح لان اغراضها هناك وانا اقرب وحدة لها ..
الجوهرة: وبعدين !!
دانه: دفاتي مالت الجامعه عندها لانها كانت تنسخهم بالاجازة .. هم دفترين ..! وغير كذا في البوم صور لنا في فترة الاعدادي .. مش كل الصور عندي لان كنا نحطهم في البوم واحد راح اخذة وبس !!
الدوهرة: قلتي لجاسم !!
دانه: انتي عارفة اني لو قلت له ما راح يوافق .. ارجوك جوجو ..! انا ما اقدر اروح بروحي لبيت رجال !!
الجوهرة: بس اتصلي فيه الاول وقولي انك راح تجين الساعه كذا عشان يطلع من البيت .. لان مافي رجال معانا !!
دانه: اي طبعا .. حتى هو قالي كذا !
الجوهرة: طيب وش رايك نقول لطلال يودينا !
دانه: لا لا جوجو ما ابغي اي احد يدري ارجوك !!
الجوهرة : اووك كلميه قولي له ..
دانه : كلميه انتي !!
الجوهرة وهي فاتحة عيونها : وشوووووووووووووووو !!
دانه وهي تبتسم : ادري انك تبين تسمعين صوته .. لو تبين كلميه !! بس من جوالي !!
الجوهرة: نعم نعم .. وانتي وش دراك .. وبعدين وش هالكلام الفاضي !!
دانه : ههههه ترا يبين والله .. ع العموم على راحتك بس لو تبين كلميه ما ارح اعلم حد اذا كانت مرة وحدة بس ..
الجوهرة: اساسا انا ما أكلم رجاجيل وانتي تعرفين هالشيء !! وبعدين ...
دانه تقاطعها : ترا بتفوتك الفرصة راح يرجع للسعودية !!
الجوهرة: نعم !! ..
دانه بحزن: امس قال ان البيت من دون سهر مب حلو وراح يرجع خلاص هو هنا عشان يصفي حساباته !!
الجوهرة: بس هو عنده شركه هني ..
دانه: يمكن راح يديرها من بلاده .. ما عرف والله !!
.................................................. ..................
كانوا ريم و شوق جالسين يطالعون التلفزيون و متحمسين صراخهم و ضحكهم واصل لآخر البيت..نزلت (آخذين راحتهم عشان نور و طلال مش في البيت)
وقف طلال عند الباب معصب من هالإزعاج اللي هم مسوينه..
طلال يصارخ: ريمووووو
ريم تفز: نعم
طلال يتريق: جيراننا في آخر الفريج " الحارة" يقولون ما نسمع زين ياليت تعلين الصوت
ريم تستهبل: جد بس كذا! ما طلبوا
و زادت أكثر على الصوت..وهو انقهر منها..و أخذ الريموت و قصر عليه..
شوق: لا طلووول مب مره كذا! ما أسمع
طلال بعصبية: اسكتي و أنتي تسمعين...ريمي وين أمي؟
ريم: بيت ابوي ابراهيم يمكن
شوق تتأفف: تقصر للصوت و تجلس تسولف فوق روسنا....أقول انا باروح فووق
طلال: وانتوا في بيتكم مافي تلفزيون ..
شوٌق: قاعدة على جبدك .. أمي وابوي في بيت جدي ابراهيم .. وانا جيت لكم !!
قامت شوق وطلعت فوق ..
ريم: شوووق ..
شوق: هلاا
ريم: روحي الصاله الفوقية لا تروحين الغرفة الي تحت لان فهد يلعب سوني هناك ..
شوق: صج ونااسه باشوف اذا يرضى العب معاه ..
طلال : احسن بس روحي !
راحت شوق وهي تتحرطم عليه أما طلال ما اهتم .. لف على ريم الي كانت مساكه التلفون وشكلها راح تتصل بحد ..
طلال: وش الأخبار؟
ريم: ما فيه جديد
طلال: اخبار بيت جدي .. من يوم ما رجعنا ما شفت حد ..
ريم: الحمد لله تمام !! امس رحت زرت جدتي العودة ..!
ضحك طلال على نفسه بإستهزاء..وش كان يبي يسمع عنها.. هو لحد الحين مب واثق من الي يبي .. ولا يعرف اذا صج الي يحس فيه ولا لاء .. لا يا رب .. يا رب ما يكون صج
مسكت التلفون واتصلت في موزة الي حفظت رقمها حفظ ..
- هلا وغلا هلا والله ..
ريم: هلا فيج .. اخبارك يا الدووبا ..
موزة: والله تمام .. وينك اليوم ما شفتك ويا أمل بالجامعه ..
ريم: اي محاضرتي كانت متخرعه .. كانت ع الساعه وحدة تقريبا ..
موزة : اها ..
ريم: افف بكرة عندي امتحان في الكيمياء ولا فاهمه شيء !!
موزة: لا سهل كيمياء لفل 1 .. من الدكتور
ريم: الدكتور عدنان !!
موزة: اها .. شوفي هذة امتحاناته ما تتغير
ريم: اشلون يعني ..
موزة: شوفي انا العام اخذت كيمياء لفل 1
ريم: وبعدين ..
موزة: صديقتي اخذته قبلي بكورس وكل اوراقها عطتني اياهم .. نفس الامتحان الي جابه لها جابه لي .. ويوم سئلنا وحده سنه رابعه قالت هو ما يغير امتحاناته .. بس يغير الي في السنه الاخيرة الي سنه اولى وثانية ما يهتم فيهم ..
ريم: عندك الاوراق الي قلتي عنها ..
موزة: يس يس انا ما احذف اوراقي لان اكيد راح احتاج لها !! باعطيك كل شيء .. عندي اوراقي واوراق صديقتي
ريم: اووك راح ارسل السايق .
موزة: لااااا عاااااد ريمي تعالي انتي .. بالمرة نسولف ونستانس
ريم: بس ابي ادرس
موزة: انا راح ادرسك .. انا فاضيه ..!
.................................................. ...................
القت نظرة اخيراه على شكلها .. وراحت تلبس عبايتها علشان تنزل تحت باقي نص ساعه على وصول المدرس واكيد الطريق زحمه .. نزلت تحت الا تسمع صوت ضحك مب غريب عليها وتسمع صوت جدتها كأنها جالسه تسولف مع احد ..
انتبهت له جالس احذى جدته .. وكان يسولف ويضحك معاها ..
- الســـــــــــــلا عليكم ..
ام محمد: هلا يمه عندل .. وعليكم السلام حبيبتي !!
العنود: يمه انا طالعه ..
ام محمد: ويـــــــن ..؟
انتبهت ان في عيون تراقبها بصدمت لكن سوت نفسها مب مهتمه وردت بكل هدوء ..
العنود: باروح بيت عمتي شريفه .. اليوم عندي حصة رياضيات وما باقي شيء ع المدرس .....
ام محمد بحنان : اي فديتك روحي .. ربي يوفقك .. بس ترا السايق مع أمل
العنود: يس يس كلمت سواق بيت عمي ابراهيم ..
طلال : عيل جدتي أنا اترخص ..
ام محمد: ويي يمه وين توو الناس ..
طلال: لا جدتي انا مشغوول ..! يله في امان الله !!
.................................................. ....
- أموول فهمي هي مرة وحدة بالعمر بس ..
أمل: نوفو انتي تستهبلين .. شنو اطلع معاج بقرة انتي ..
نوف: عااد امول بدون تجريح لو سمحتي ..
أمل: وانا الصادقة .. جد والله حد يسوي هالسوا ..
نوف: عادي والله .. أموول يله عااد ..
أمل: لا لا نوف ذيك المرة خالد كان موجود .. هلمرة من راح ينقذني ..
نوف: اموول اعقلي عاد لا تصيرين كانك ياهل .. عشان خاطري !!
أمل" اووف .. الصراحة انا ما انكر ان خاطري اروح معاها لكن والله خايفة .. افف وهقة هالبنت .. وش اسوي "
نوف: اموول ال تصيرين باردة .. كلها مرة وحدة راح نطلع من الجامعه نروح كوفي شووب .. وانتهى الموضوع صدقيني ما راح اطلب منك شيء المرة الجاية ..!
أمل: لا والله .. واذا طلبتي وش اسوي فيك ..
نوف: ولا شيء لا تكلميني وقتها لكن بليز هي مرة وحدة بس ..
أمل: خلاص .. ومتى تبينا نروح ..
نوف: انا اتفقت على عقب بكرة !!
أمل: والله اني خايفة بس عشان خاطرك .. راح اجرب مرة وحدة بس ..
نوف بحماس : يس يس بليز ..
أمل: ومتى نروح اي وقت ..
نوف: متى تخلص محاضراتك بعد بكرة ..
أمل : اممممم يوم الخميس نخلص مع بعض انا وانتي ,,
نوف وهي رايحة تشوف الجدول ..
نوف: يعني الساعه 11 .. تماام .. نروح الكوفي شوب الي في الانتر تحت وش رايك
أمل: لا لا عمي ابراهيم وابوي دووم يجلسون هناك .. مجنونه انتي
نوف: طيب لا تدفين .. بسم الله تخرعين الواحد .. عيل نروح الموفين بيك
أمل: لا لا فنادق ما ابي .. ابي مكان مستحيل حد اعرفة يروحه
نوف: طيب وش رايك بستار بكس الي بالاند
امل: انتي هالبله هالمكان كله شباب ..
نوف: حيرتيني معاك .. خلاص انتي اختاري مكان
أمل: والله ما ادري .. امممممم دامه بيكون مثل فطور متاخر وش رايك نروح مطعم صبح ومسا .. مكان هادي ومحد يروحة ..
نوف: اووك خلاص راح اقوله ..
امل" يا رب محد يشوفني .. شو اسوي لو شافوني .. نو نو اموول هالمكان بعيد عن بيوتنا .. ومحد يروح هالمحل .. ما اعتقد حد من الشباب او حتى البنات يروحون ذاك الصوب .. لا تصيرين معقدة .. عادي .. عادي "
.................................................. ..
طقت الجرس وكانت تدعي ربها ان ما يفتح الباب بكرة وراها امتحان وما لها خلق تتهاوش .. هي تحب موزة .. وتستانس لما تجي بيتهم ولا تتصل فيها لكن في شيء واحد يدمر سعادتها وهو اخوها .. وين ما تروح تلاقيه بوجها لدرجة انها خلاص عندها احساس ان حفظ شكلها من كثر ا تشوفه ويا ريتها حبته الا بالعكس تنقرف منه . لسانه طوويل ويحب يراددها أكيد مع كل البنات جي .. معقوله تكون هذه تصرفاته مع كل صديقات اخته .. أنا لازم اسئل أمل ولا العنود اليوم ضروري ..
انفتح الباب بهدوء .. انتهت الي فتح الباب رجال لكن ماهو عبدالعزيز ابتسمت وادخلت وهي تحمد ربها انها ما شافته .. كانت عارفة ان موزة منتظرتها داخل .. واساسا كانت موزة واقفة عند الباب لما طارق راح عشان يفتحه ..
- يا هلا بريم تو ما نور البيت ..
ريم: بابتسامه .. هلا فيج .. اخبارج !!
موزة: والله تمامووو ..
ريم: غريبة اليوم مب البايخ فتحلي الباب اسمحيلي يعني ...
موزة: خاكري اعرف بس انتي وهو وش فيكم على بعض .. محد فيكم يحب الثاني .!.
ريم: ما ادري .. بس كذا !! المهم في حد في البيت ولا !!
موزة: لا لا كلهم طالعين خذي راحتك ولا وش رايك نروح غرفتي فوق اريح !! عشان تقدرين تفصخين العبايه والشيله بعد ..
ريم: يس يس اريح !!
اشرتها على الدرج وقالت روحي أول باب تلقينه قدمك باب الغرفة مفتوح ولون الغرفة زهرية هي راح تروح دقيقة المطبخ وراجعه على طول ..
صعدت فوق واول ما بغت تدخل الغرفة شافت باب الغرفة الي جنبها يفتح ويكلع منه واحد ابتسم أول ما شافها .. وكان يبي يقول شيء .. لكنه فضل انه يسكت ويطلع بهدوء .. أما هي انقهرت انها شافته .. ما كان ودها تشوفه ..!
.........................................
كان جالس يطالع بالتلفزيون لكن ابد باله مو معه .. كل تفكيرة فيها وفي المشاكل الي جايه .. هو عارف كلها يوم ولا يومين والحقيقة راح تنكشف .. خلاص الوضع ما صار ينسكت عليه .. وغير هذا حال دانه صار ما يطمن .. يحس نفسه بدوامه .. من كل صوب .. مشاكله القديمه مع مشاكله الجديدة .. بس معقوله الي صار قبل يعتبر مشكله .. " عسى ان تكرهوا شيئا وهو خير لكم .. " ردد الايه كذا مرة وتسند على الكرسي الكبير الي جالس عليه .. لما سمع صوت الباب وهو يطق ..
- اتفضل !!
- اخبارج جاسم ..
جاسم: الحمد لله .. تمام وانتي
الجوهرة: بخير الله يسلمك .. الا جسووم ..
جاسم: هلا
الجوهرة: وين دوين
تنهد وطالعها بنظرة لها معاني كثيرة ..
جاسم: وين راح تكون يعني طبعا بالغرفة !!
الجوهرة: الله يهداها .. طيب انا بادخل ..
جاسم: اتفضلي ( وابتسم .. ) محتاجة عزيمه يعني
الجوهرة وهي تبتسم : ادري ان الغرفة غرفتي ..
ودخلت غرفة دانه على طول لقت الغرفة مظلمه وهي جالسه تطل من الشباك على الحديقة الكبيرة الي تجمع بيوتهم كلهم .. كانت شوق تلعب ويا فهد كورة ..
الجوهرة: شتسوين ..
دانه: تصدقين فلله اليهال ..
الجوهرة : يحليلك يا دن دن .. طيب الله يرزقج بمليون ياهل ..
دانه: ههههه بل مليون عاد .. حرام عليك .. وايد
الجوهرة: متى راح تروحين للجامعه ..
دانه وهي تشوف الساعه : بعد ربع ساعه .. ليش؟
الجوهرة: يعني ما راح نروح بيت شيسمونه ..
دانه: لا لا اليوم صعبة خليها بكرة ولا الي بعدة ..
الجوهرة: ليش ..
دانه: كلمتني مشاعل وقالت ان موعد المحاظرة قدموها
الجوهرة: اول مرة اسمع سيرة مشاعل هذة .. من هي
دانه: هي صديقة بس مو معاها مررة علاقتنا عادي يعني .. بس من يوم وفاه سهر وهي تكلمني يوميا ..
الجوهرة: يحليلها
دانه: تراها تقرب لخالد تصير بنت عمته ..
الجوهرة: جد
دانه: يس يس مررة يوم قلت لها عن اسمي وجي قالت لي ان ولد عمتها عنده اخو بالرضاعه وكذا يعني سالفه طويله ..
دانه " والله مترددة وش اسوي .. اخاف اروح واتوهق بروحي .. ! وجاسم مستحيل اقوله .. راح يذبحني مو بعيد يطلقني على هالعمله .. "
الجوهرة: اهاا .. فلله يعني طلعنا اهل ..! الا دودو حياتي فكري تقولين لنور ..
دانه: اقولها عن شنو
الجوهرة: عن بيت شيسمونه .
دانه: لا لا مستحيل نور ما راح تخليني .. اروح .. اقول موجو انا راح اروح الجامعه الحين حياتي ..!
الجوهرة: دانو انا مب متطمنه ..
دانه بعصبية : لو ما تبين تجين قولي .. خلاص راح اروح بروحي عادي ..!
الجوهرة: انتي تستهبلين مستحيل اخليج بروحك !!
دانه: خلاص عيل .. لما اروح راح اردلك خبر .. سوري جوجو بس لازم اطلع . اخذت عبايتها وطلعت بسرعه حتى ما قالت شيء لجاسم الي كان جالس بالصاله الي فوق مع امه وطلال يسولفون .. عصب من حركتها لكن ما حب يبين اي شيء قدام اهله .. !
..................................................
كـان منسدح ويتذكـر آخـر موقف مر عليهـ معها .. البنت هذي تعجبهـ شخصيتها وقوتها ..
جتهـ فكرهـ ان يخطبهـا بس خاف ترفضهـ .. يعرفهـا تكرهـه .. وما تحب تسمع سيرته .. كل ما يشوفها يتهاوشون .. وش الحـل .. مستحيل يفشل نفسهـ ويخطبها وتردهـ وتتشمت فيهـ ..!! وأكيد لو ردته علاقتها باخته راح تتاثر او حتى علاقتهم امل والعنود بنات المرحومه خالته .. وامل والعنود ما لهم سند ولا حد يوقف وراهم .. طول عمرهم يعتبرونه هو وطارق مثل اخوانهم الكبار ..
ناظر رقمهـا اللي خزنهـ عندهـ من فترهـ ..هو سمع من موة انها رجعت .. اساسا لازم ترجع هي وراها جامعه .. كان وده يشوفها أول يسمع صوتها على الاقل .. على كثر ما يتهاوشون على كثر ما يشتاق لها .. ويشتاق لشوفتها ..
ماودهـ يتهور بس مشتاق يسمع صوتهـا .. يحس ان ضروري يكلمها .. ضروري يقولها عن الي يحس فيه بس مو دون لا يلفت نظرها .. من دون لا يخليها تدري انه هو الي جالس يكلمها .. حتى لو تهاوشه .. صار هواشه معاها بمثابه اغنية يحبها .. يحب يسمعها .. ودون يتذكرها .. بس ياكثر هواشهم !!
أخذ جوال العمل حقهـ عشان حتى لو صار ماصار واختهـ درت .. ماتعرفهـ .. اساسا ذاك الرقم ما يعرفة الا الي يشتغلون معه .. الاهل ما يعرفونه ولا قالهم عنه .. والشيء الزين ان الرقم مش مسجل بإسمه عشان اذا حبت تعرف صاحب الرقم .. الرقم مسجل بإسم صديقة ..!
وفجاءهـ جاهـ صووت : أنتوا ما تعرفون متى تتصلون .. في انسان عاقل يتصل هالوقت .. ابي انااام .. ابي انناااام .. سمعتوا ولا أعيد ابي انااام !
حس قلبهـ يدق عليهـ صووت يخقق.. صحيح ان صوتها كان مليان نوم لكن هذا ما منع انه يكون مليان عذوبه
سكت وهو يسمع أنفاسهـا شكلها نامت .. كتم الضحكهـ على هبالها .. شكلها ردت بدوون ماتحس وعلى بالها صديقتها ..
نـعم صوتهـ قد مايقدر . صحيح ان صوته خشن بس حاول ينعمه انعم مما يمكن لدرجة ان الي يسمعه ممكن يقول انه بنت .. لكن فيها اشويه دفاشه. : . ريمااااا
ريم اللي كانت فعلاً نايمهـ وماشكت بالصوت لانهـ فعلاً صار صوته كنهـ بنت .. ما اهتمت اذا تعرف هالبنت ولا لاء .. ولا حتى فكرت انها تسال .. : هممممم ..
ابتسم إبتسامهـ كبيرهـ .. ما صدق انه سمع صوتها واول مرة يسمع صوتها وما تكون تصارخ ولا تتنرفز .. حس بفرحة كبيرة .. لكن كا طاوعه قلبه انه يسكر الخط نام والسماعه على وجهه يدري ان الوقت مبكر كثير كانت الساعه 10 وقتها لكن ما قدر .. صارت تآثر فيهـ ..!! مــاحـس بنفسهـ إلا وهو نايم ..
تكررت هالحركه يومين ورا بعض ..صار يتصل فيها قبل لا ينام يسمع صوتها وهي معصبة ومتضايقة وتكون نايمه ودووم تتحرطم عليه .. صار يعرف موعد نومها وغير موعد نومه عشان يكلمها .. يسالها اسئله ويضحك على كلامها الي مب مفهوم .. تكون نايمه وترد بالي على بالها من دوون اي تفكير .. كلامها كان يضحكه .. كان فرحان انه قدر يكلمها .. بس هو عارف انه راح يكون اسعد لو كان يكلمها وهي بوعيها مب ينتظر لحد ما تنام ويكلمها كلمتين ويسكر .. ودة ان هي تكون عارفة هي تكلم من !! تكون عارفة ان لي يكلمها هذا هو عبدالعزيز..!
.................................................. .......
- احم خلاص خلصتي محاضراتك ..
- يس يس خلاص .. الحين وين نروح المطعم ولا البيت ..
- املوو انا عارفة انك تبين تتهربين طبعا المطعم انا وعدت الرجال .!
أمل: انا ودي اعرف انتي ليه مصممه انك توديني معك
نوف: انتي الي خاطرك تجين معي انا ما ودي انك تاخذين فكرة خاطئة عني ابغي اوريك وش الي اسويه بالضبط !!
أمل" كل هذا وما اخذ فكرة عنك .. اخ بس والله احس نفسي اني اول مرة اعرفك يا نوف .. معقوله كل هذا يطلع من وراك بس لازم اروح .. اي نعم لازم اروح خاطري اشوف شالموضوع وما في شيء ممكن ينقذني من لقافتي ..!
نوف: وين رحتي ..!
أمل: ما رحت مكان .. خلاص انا قلت لجدتي اني راح اتاخر بالرجعه وراح اظطر اروح الصالون بعد الجامعه على اساس انها ما تحاتيني اذا تأخرت ..
نوف: حلو !! يله السواق ينتظر !!
أمل: اووك !!
راحت وراها وهي قلبها مش متطمن عندها احساس كبير ان اليوم راح تصير مصيبة لكن مع هاي هي خايفة .. اي نعم خايفة كثير من المموضوع ّ!!
.................................................. .....
- تصدقين ملل ..
- يس يس دارية .. الا مي وش رايك نروح لابله الكيمياء !!
مي: العنود نتي من جدك ولا تستهبلين .. اروح لابله الكيمياء شاسوي !!
العنود: في درس مش فاهمته !!
مي: افف انا عمري ما شفت وحدة تموت بالدراسه زيك ما شاء الله .. خلاص في الامتحان الاخير جبتي 95 % يعني ضمنتي الجامعه كفايه !!
العنود: اففف انتي ومريوم ذبحتوني !!
مريم وهي جايه اسمعت اسمها ..
مريم: اشفيها مريم !!
العنود: ذبحتوني !!
مي: ههههههه مريوم الشيخة عندل تبي تروح لابله الكيمياء ّّ!!
مريم بصدمه: شنو ليش !!
العنود: خلاص ثاانكس !!
مي: ههههههه نو عندل ويت !! تعالي راح نروحلها معك ما في مشكله !!
مريم: شالسالفه .. تراني ما ابي اروح لابله الكيمياء !!
مي وهي تتذكر شيء : يس يس تذكرت !!
العنود: شنو !
مي : في واحد يقربلكم اسمه خالد احمد ال ..!!
مريم: وانتي وش عرفك فيه ّ!!
مي: يقرب لكم !!
العنود: يس يصير اخو ولد عمي بالرضاعه .. يعني ولد عمي
مي: لانه يصير ولد عمي .. وامس يقوم امي شافت دفترك وقرت اسمك سالتني عنه !!
مريم: اها .. يعني انتو عيال عمه الحقيقين !!
مي وهي تضحك: يس يس
العنود وهي تمد يدها : تشرفنا !!
مي: اقول انتي وياها اذلفو عن وجهي .. روحي لابله الكيمياء عندل
مريم: ههههه اقول ميوو انا راح اجي معك ما لي بارض اقابل هالسودانية ..
العنود: حرام عليكم تراها طيبة وتعكي اسئله االاختبار !!
مريم:افف هذة الي يسمعها يقول هي ناويه تدرس في اكسفورد مصير جامعه قطر
العنود: نوو انا بدخل جامعه تاكسس ان شاء الله !!
مي: ادخلي عادي .. همه يقبلون جميع المستويات خصوصا لما تكوني قطرية .. بس انتي الصراحة زودتيها بدراستك هذة !!
.................................................. ...
دخل المطعم وهو حاب يغير جو اشوي .. تملل من المصانع كل يوم رايح لهناك .. حس انه يبي يغير .. وتملل في الكوفي شوبز الي دووم يروح لها .. كان حاب يغير .. تذكر انه من يومين راح مطعم هادي صحيح انه بعيد اشوي لك كان هادي وحلو .. ينفع الواحد يتفطر فيه .. خصوصا لانه اليوم طلع من البيت بدري ما كان له خلق ياكل اي شيء..
دخل المطعم وراح على الطاوله الي جلسوا فيها ذيك المرة على طول .. طلبله كوفي وجلس يقرا الجرايد الموجودة !!
سمع صوت مستحيل يخطأ فيه .. حافظة عدل .. لكن كذب عمره مستحيل تكون هنا اكيد راح تكون بالجامعه .. الجامعه بعيده عن هالكوفي شووب .. وش تسوي هنا ..! ل
رفع راسه بهدوء .. وشاف اخر وجه يتمنى يشوفه بهاللحضة .. معقوله احساس ما كان غلط وجايه مع صديقتها الي دووم اقولها ابتعدي عنها .. قام من الكرسي لكن قبل لا يقرب شاف واحد جاي وجلس معاهم على الطاوله وهو يبتسم ويضحك .. حس ان الدنيا تسود بوجهه وقرب بهدوء ..
................................
- دانه .. حرام الي تسوينه بنفسك مستواك ضعف كثير ..
دانه: نايف انا متضايقة صايرة ما حب اكم حد .. حتى جاسم يوم اشوفه اصارخ في وجهه ..
ضحك على بساطتها .. من اول ما شافها دخلت قلبه ..
نايف: خلصتي محاضرتك ..
دانه: يس يس ..
نايف: خلاص عيل نطلع مع بعض ..!
دانه: تفضل .. اووك !!
نايف وهو يمشى معاها للبوابه الرئيسية ..
نايف: الا انتي رحتي السعودية وقت العزا
دانه: لا لا ما رحت .. عرفت الخبر يوم كنت في مصر وانهرت وقتها هلي راحوا يعزون بس زوجي ما رضى قال اكيد راح انهار اذا رحت وشفت العزا \
نايف: اهاا ..
لفت بنظرها المكان الي دووم ينتظرها السايق فيه بس شافت سيارة جاسم .. من بعيد .. ابتسمت له واستاذنت من الاستاذ وراحت !!
جاسم بعصبية: من الي كان معاي !!
دانه : وييييي هذا نيووف !! ( ورجعت تتعبث في الراديو .. )
ناظرها بنظرة معني انطمي .. " اسكتي " .. وبدى يسوق بسرعه خياليه ..
دانه وهي تصاارخ : جااسم وقف . انت تبيني امووت تبينا نمووت .. وقف وقف
جاسم وقف السيارة على طرف الشارع لانه كان فاضي ..
جاسم: نتفاهم بالبيت افضل ..
دانه: لا هناا انت وش فيك !!
جاسم بعصبية : دانوو خلي كلامنا للبيت !!
دانه بعناد: ليش البيت ابي اعرف وش فيك .. ناقصة مزاجك المتغير كل اشوي ..!
جاسم:نعم اي مزاج متغير ..! مب انتي الي كل اشوي لك قصة .. عبالك تمثلين بفيلم انتي ..! انتي انسانه متقلبة .. مزاجية !!
دانه: اففففف ترا مالي مزاج !!
جاسم يصارخ : اقول ولا كلمه فاهمه ترا والله اوريج .. نروح البيت ونتفاهم !! ترا الحين يجيك طراق يسنعج !!
فضلت السكوت لما شافت عصبيته .. هي لحد الحين مب قادرة تستوعب انه صارخ عليها بهالطريقة ولا راضيه تفهم شالسالفه .. شلي صار بالضبط
لحد ما وصلوا للبيت ..
جاسم : تفضلي !!
طلعت من السيارة من دون ولا كلمه وراحت فوق على طول .. لحفها على طول من دون حتى لا يسلم على أمه وابوه وعبدالله الي كانو جالسين تحت في الصاله يتقهون !!
أم عبدالله : الله يستر شالسالفه ..
عبدالله: يمكن متهاوشين !!
أم عبدالله : هذا الي راح يفشلنا قدام عمك .. كل يوم متهاوشين !!
دخل لجناحهم وراها وسكر الباب بالقوه .. ولحقها لي الصله لانها كانت قاعدة هناك وكانها تنتظرة !!
جاسم: من الي كان معاك ..
دانه: اشفيك ..! قلت لك نايف .. نيوووف !!
جاسم: وبعد تقولينها ببرود .. ومنو نايف هذا اخوك .. ابوك .. زوجك .. خطيبك !! محرم من محارمك !!
دانه: استاذي بالجامعه
جاسم بتريقة : واووو
دانه: جاسم لا تتريق لو سمحت .. عادي هو استاذي وقفت اسولف معاه ووطلعت ما فيها شيء
جاسم بصراخ : هييييي مب عشانك كنتي عايشة برا تقولين هالكلام في شيء اسمه .. عادات .. تقاليد .. ديـــن !! دام الرجال مب من محارمك غلط .. فاااااااااهمه !!
دانه: جسووووم بلا تخلف انا في جامعه مختلطة وهالشيء عادي
..ما وعت الا بكف يجيها منه .. وطلع من الغرفة بهدوء .. أما هي جلست على الكرسي وصارت تبكي بصوت واطي اشوي .. دقايق الا يرجع لغرفة !!
جاسم: عندك رقمه !!
دانه وهي تصيح : من
جاسم: هذا ناايف !!
دانه: اي !!
جاسم: امسحية من الجوال .. لو شفتك مرة ثانية واقفة معاه او تحديتيني باي شكل من الاشكال .. دراستك انسيها .. انسي شييء اسمه جامعه ..!
وطلع من الغرفة .. ونزل تحت طلع مثل ما دخل من دون لا يسلم على اي حد .. لكن ما كان مهم .. لان صوتهم كان عالي وباب الجناح كان شبة مفتوحح يوم كانوا يتهاوشون يعني البيت كله درا عن سبب الهوشة !! لكن محد حب يعلق ..!
.................................................. ......................
الجزء ال تـــــــــــــــــــــاسع والعشروون ..
إذا حبيت أنا أقدر فـــي يـــــوم أحب
وإذا مليت مــــــــــا ينجبر هـــ القلب
خلاص ارحل وأنـا بختار بعدك درب
كفاية أعذار تــبـــرر غلطتك بأسباب
قرب لعند الطاوله .. ووقف وراها على طول .. ما انتهت له الا لما اسمعت صوته وشقت شهقه ولفت له ومليون علامه استفهام موجودة في وجهه !!
- ممكن تقولين من الي معك يمكن اكون ناسي اهلنا ولا حاجة ..!
- خاااااااااااااااااااااالـــــــــــــــــــــد ..
خالد : أمل .. ممكن تعرفينا .. قلت لك احتمال اكون ناسي الاهل ..!
أمل وهي تبكي : انا ما سويت شيء والله !!
خالد بعصبية: اركبي السيارة بسرعه !!
نوف: هيي انت على كيفك !!
خالد: اي على كيفي .. وانتي ولا كلمه ليكون لي تصرف ثاني معك !!
أما الي كان جالس معاهم على الطاوله .. أول ما شاف الموقف الي بين أمل وخالد حب يقوم ويمشي لكن خالد ما اعطاه اي مجال وراح وعطاه بووكس على وجهه .. ولا اعطى اي اهمية لنوف ولامل وللناس الي في المطعم الي وقفوا وهم متفاجأين من الي يصير .. جرها من يدها وودها للسيارة وهي تصيح وتصارخ لكن لا حياه لمن تنادي .. خالد كان في عالم ثاني ..!
خالد بعصبية: انتي مع من جايه !!
أمل: جيت مع كاني .. سايق بيت عمي محمد !!
التفت خالد وشاف كاني يطالعهم وهو متفاجأ .. واشر له انه يمشي ويلحقهم بالسيارة .. دخلها بالغصب وقعدها قدام ومشى بسرعه خياليه عشان يوصل للبيت !!
خالد يصارخ : انتي الاسلوب السنع ما ينفع معاك .. اجل تخونين ثقة عمي .. تطلعين مع واحد !!
امل تصيح: انا ما طلعت مع واحد
خالد: ولقائكم في مطعم شنو !! انتي تبين تضيعين سمعه العايله !!
أمل: وانت وش دخلك ! ولد عمي بالرضاعه .. حتى اسمك مختلف عن اسمنا !!
جاها كف خلاها تسكت وتزيد صياحها ..!
خالد: صحيح اني ولد عمك بالرضاعه .. لكن ما ارضى على عمي ان بنته تسوي فيه كذا .. انتي ما عندك اخوان يعني كلنا اخوانك !!
أمل: انت مالك دخل فاهم !!
خالد: اشلون ما لي دخل وانا اشوفك يوم عن يوم تغلطين .. صحيح ان اسمي مختلف .. واذا صار شيء ما يكون لي دخل .. لكني ما ارضى يصير كذا في الناس الي ربوني واعتبروني ولدهم فاهمه !!
طالعها بنظره خلتها تحس انها انسانه حقيرة .. تمنت الارض تنشق وتبلعها ولا تسمع هالكلام الي خالد جالس يقوله .. معقوله خالد يفكر بهذة الطريقة !!
رفعت راسها .. انتبهت انهم وصلوا للبيت لكن الغريب انه ما تكلم ولا قال شيء .. يشوف السكان وشكله كان معصب ..! ويفكر !! ضايع ما يعرف وش يسوي !!
تكلم بهدوء يميل للعصبية المكبوتة
خالد : اطلعي بسرعه .. وعلاقتك بنوف ابيها تنقطع فاهمه !!
دقايق ولا يشوف راشد عمهم جايهم يركض .. وشاف أمل وهي تعدل شيلتها وتصيح وواضح عليها ان في حد مد يدة عليها ولا ضربها !!
راشد يصارخ : انت شسويت !!
خالد: عمي ممكن ندخل نتفاهم !!
أمل تصيح : خالد لا !!
خالد يصارخ : انتي ادخلي داخل !! ( التفت لعمه الي كانت واضحه عليه العصبية ) عمي ممكن تدخل للمجلس افهمك شالسالفه .. لو سمحت !!
.................................................. .....
كانت راجعه البيت وما لها بارض تسوي اي شيء غير انها تنام .. اليوم كان عندها مختبر بعد الدوام ورجعت للبيت متأخر .. اول ما دخلت غرفتها رمت العباية والشنطة على السرير رن الجوال ناظرت الرقم الي كان مسجل بثلاث علامات استفهام .. ما تعرف من هالبنت بس يوم تناظر بسجل المكالمات تشوف انها تقريبا يوميا تتصل بالليل متاخر ويتكلمون لوقت طويل ساعتين او 3 .. هالمرة لازم اعرف من هذي .. ردت بهدوء ..!
- الووو !!
- هلا والله ريووم !!
ريم: هلا بك .. من معااي !!
- افااا نسيتيني .. معاج حصة
ريم باستغراب : حصـــــه
عبدالعزيز بصوته البناتي : يس يس حصة .. وش دعوه نسيتي !! بس ترا مب قايلت لك اي حصة انتي قولي هههه >> ترا تعب وايد وهو يحاول يضحك بصوته البناتي ..! بالغصب اطلعت
ريم : انا اعرف الف حصة انتي من فيهم
حصة: عااد ريما لازم بروحج تعرفين .. المهم ما قلتي وش سويتي بالاب اليوم !!
ريم: الدكتور الغبي اخرني لحد الساعه 5 ونص .. لاني لخبطت في المواد .. الله ياخذة
حصة: اهاا ..!
ريم: يختي طفشاانه .. وش تسوين لما تكونين متملله !!
حصة: املل خواني معاي لحد ما يطلعوني !!
ريم: خخخخخخخ يس يس والله احلى شيء .. خصوصا لما تكونين بنت وحيدة !!
حصة باستغراب: انتي بنت وحيدة
ريم: يس يس
عبدالعزيز" وانا اقول ليه لسانها متبري منها .. يعني عشانها متربية مع اولاد .."
جلست تسولف من دون لا تحس بنفسها اما هو هدفة الوحيد انه يسمعها لما تتكلم .. ضحك على هبالها ومغامراتها مع الاساتذة .. اشلون تحاول تتهرب من الامتحاانات .. حس ان قريب منها كثير .. كان دووم يسمع عنها من اخته بس عمره ما حس ان شخصيتها حلوة بهالشكل ..
ريم: تدرين حصوو .. ابي اشوفج !!
حصة " اففف من قلب وهقة .. وش اقولها هذة ": لا لا اخاف تصكيني عين !!
ريم: هههههه اما اصكج عيــن ..
حصة: قريب ان شاء الله راح تشوفيني !! ..
ريم: ان شاء الله !!
حصة: الا ريماا راح تروحين مكان اليوم !!
ريم: امممم ما ادري .. يمكن بيت جدي ولا بيت جدة ابوي مش متاكدة !!
حصة: ما شاء الله .. الله يخليك لهم !!
سكر الجوال وهو فرحان لان هذة أول مرة تكلمه وهي بكامل وعيها .. أول مرة تكلمه وهي عارفة انها جالسه تكلم من ولا مع من ّّ!! هالشيء خلاه يفرح كثير !!
.................................................. ...................................
بس يا خالد .. هاي مش سبب عشان تضربها !!
خالد : اسف يا عمي ,, انا عارف اني غلطت ,, لكن ما قدرت امنع نفسي يوم شفته يقرب منها وصديقتها كانت تسولف معاه .. حسيت بقهر !! مهما يكون هذة بنت عمي !!
راشد: يا ولدي انا فاهم عليك .. بس ترا مهما يكون انا ما ارضى يد اين كان تنمد على بنتي !!
خالد: اسف والله يا عمي .. بس صدقني .. كل الي سويته كان بالسيارة ما انمدت يدي عليها قدام الناس .. وعشان استفزتني !! قالت ان هي مالها اخونا وشيء من هالكلام !! عمي انا اسف !!
راشد " اخخ يا أمل .. اتسوين فيني كذا قدام ولد عمك معقول .. والله فشلتيني .. ليه ترافجين هالبنات يا أمل .. "
خالد: عمي ترا الذنب ذنب صديقتها !!
راشد: انا عارف .. وعارف ان بنتي تستاهل !! لكن عتبان انك مديت يدك عليها !!
خالد " هذا وانا ما قلت له الحقيقة وقال كذا .. أجل لو قلت له .. راح يجيبها ويكسر راسها قدامي .. "
خالد: عمي .. أنا عارف ان مب وقته .. وعارف ان المفروض ابوي يكون معاي .. او امي تكلم جدتي لكن حبيت اخذ رايك بالاول .. واذا امل وافقت نسوي الموضوع رسمي .. نعلم العائله ّّ!!
راشد وكأنه حاس شالسالفه : اتفضل خالد .. اسمعك يبة !!
خالد وهو يبتسم : عمي أنا عارف اني غلطت اليوم والمفروض أمسك اعصابي ولا أتصرف بهالطريقة !!
راشد: خالد انسى الموضوع خلاص ...
خالد: عمي !! انا ابي القرب منك !!
راشد وهو مو فاهم شالموضوع: بس انت قريب يا ولدي !!
خالد: هههه عمي ببساطه .. انا ابي اخطب أمل !!
راشد: انا خايف تكون خطبتك نتيجة تصرف اليوم !!
خالد: لا يا عمي انا قلت لك ان أمل ما لها خص ..
خالد" والله لا اوريك يا أموول ... اجل تلعبين من ورا ظهورنا وتقابلين رجاجيل .. والله خسارة ثقة عمي فيك .. خسارة هالمعامله الي يعاملك ايايها .. انتي ما تستاهلين "
راشد: شوف يا ولدي .. صحيح اني واثق ان ما اعتقد راح نلقى احسن منك لكن اسمحلي الراي مش رايي انا لحالي .. ولو كان رايي كان قلت لك مبرووووووووك !!
خالد: وانا عارف هالشيء .. وعشان كذا قلت لك ما ابي احد بالعائله يدري الا اذا وافقت !!
راشد: يعني انت عندك احساس انها ما راح توافق
خالد: والله بعد سالفه اليوم انا مستبعد الموضوع .. لكن نجرب !!
راشد " والله انا بعد يا ولدي .. بس اخ !! لازم أخذ راي أمل .. هذة حياتها .. "
خالد وهو يقوم : يله اجل عمي اشوفك عى خير !!!
راشد: وين يا ولدي توو الناس !!
خالد: والله رايح ارتاح . احس تعبت اليوم !!
راشد: مع السلامه يا ولدي ومشككوور !!
خالد: ولو يا عمي ... أنا المفروض اتشكرك اذا وافقت أمل ..
طلع من المجلس وصعد لغرفته على طول من دون لا يسلم على الي جالسين تحت !!
ام محمد: وش فيهم هالعيال !!
ابو محمد: والله ما ادري .. فجاه يجون ويصعدون وشكهم مستعجلين !!
أم محمد: الا جاسم رجع !!
ابو محمد: لا ما اعتقد!!
راح لغرفته وفتح الاب توب .. دخل على الايميل بسرعه وارسلها رساله على المسن ... هو يعرف انها ما تقرى رسايل الايميل !!
" ابيك توافقين ولا اعلم ابوك الحقيقة .. تراني ما علمته الصج .. "
احسن خل تدري .. لازم تدري !! أنا ودي اخطبها وغصبن عليها توفق !! لازم توافق !! لازم اتصرف !!
.................................................. ..................................
دخل البيت وهو عارف ومتوقع ان في هوشه قريب مستحيل دانه تسكت اذا احد ضربها .. ومب دانه الي تجلس تصيح من دون لا تتصرف .. دانه غير هو متوقع ان دانه غير .. لكن الي خلاه ينصدم انها كانت تشوف التلفزيون ولابسة فستان قصير بلون الاخصر وحاطه ميك اب خفيف وكأنها منتظرة أحد ..!
- الســـــــــــــــلام عليكم !!!!!
دانه بابتسامه : عليكم السلاااااااام !!
جاسم " يا انا المجنون يا هي .. معقوله !! اليوم الصبح متهاوشين والحين عادي وطبيعي .. لا وكاشخة وتبتسم بعد .. شالسالفه ..!"
جاسم بابتسامه : وش هالزين !!
انحرجت من نظرته .. بس ما حبت تبين بس على مين جاسم انتبه !!
دانه: الله يسلمك !!
جاسم: بتطلعين !!
دانه: نوووب !! بس كذا ملل !!!
جاسم: اهاا ( ونام ع الكرسي وحط راسه على حضنها .)
اشوي ويرن جوال دانه !!
ابتسمت له
دانه : برب !!
جاسم منصدم : بـــــــــــرب !!
دانه تضحك: عاد لا تصير شيبة !! اشوي وراجعه !!
جاسم: ههههههى اعرف يعني شنو برب ؟؟؟ تيــــــــــت !!
شافت ان المتصله مشاعل
دانه: هلا والله مش مش ..
مشاعل: هلا فيك
دانه: اخلصي وش عندك
مشاعل: بسم الله .. ما يسوى علي !!
دانه: هههههههه لا بس لاني جالسه اشوف فيلم !!
مشاعل: مع حبيب القلب
دانه : اي .. ( ولتفتت لجاسم الي كان يطالعها ويبتسم ..)
مشاعل: المهم راح تسجلين برحله الجامعه لروما
دانه: ممممممم متى راح تكون ..
مشاعل : بعد الاختبارات على طول .. لمدة اسبوع
دانه: من الاستاذ الي راح يروح معانا
مشاعل: مايكل .. وتريزا وناايف .. اساسا ثلاث ارباع البنات قرروا يروحون يوم عرفوا ان نايف !!
دانه: نااايف !!
التفت عليها جاسم وطالعها بعصبية !!
دانه: عيل مستحيل اروح .. ما اعتقد زوجي بيرضى ( وغمزت له .. أما هو ضحك وجلس يطالع التلفزيون ..)
مشاعل: خخخخخخخخ يا عيني .. الله يهنيكم ّ! اجل باشوف اذا حد من البنات راح يروح باسجل .. ما ابي اكون لحالي !!
جاسم: شالموضوع
دانه: يقولون ان في سفرا لروما بعد الاختبارات
جاسم: ومتى اختباراتكم .
دانه: الاسبوع الجاي .. وبعدها عطلت الربيع !!
جاسم: اهاا .. اساسا بعد شهر انا رايح لندن !!
دانه وكانها ما صدقت : نعم .. شنو
جاسم : بداا يضحك على شكلها .. راح اضطر اجلس هناك مدة طويله يمكن لحد نهاية السنه
دانه: ليش
جاسم: مب انا يوم رجعت قطر وكلت الشركه لحساام ..
دانه: يس يس
جاسم: في تظارب بالحسابات !! وسوالف .. شكلي راح ارجع اديرها
دانه: يعني باعيش بلندن !!
جاسم: ما ادري على مزاجك
دانه: وانا وش يقعدني هنا .. من بكرة اكلمهم انقل .. باكمل الاختبارات في قطر .. واجازتنا شهر ونص وبعد الاجازة على طول باروح معك !! والله فلله !!
جاسم: اشوفك تحمستي !!
دانه: يس يس . والله فلله !!
رن جواله .. ناظر الشاشه وتنهد .. انتبهت ع الشاشه وشافت اسم نادين ..! لفت وجها بسرعه وسوت نفسها مب مهتمه أما هو اخذ الجوال وطلع من الغرفة بسرعه !!
.................................................. .......
كان ناوي يروح للشباب .. من زمان ما راح المجلس .. نزل تحت وانتبه ان العنود زايرتهم أول ما شافته عدلت شيلتها وابتسمت . طول عمرها تعتبره اخوها الكبير !!
عبدالعزيز: هلااااااااا والله .. يا هلا بعندل
العنود: هلا فيك .. وينك ما تبين !!
عبدالعزيز: افاا انا الي ما ابين
العنود: يس يس قبل كنت تزورنا بيت جدتي وتقعد مع ابوي .. بذمتك متى اخر مرة سويتها !!
عبدالعزيز: والله من زمان !! بس تعرفين الوضع تغير !!
العنود: عشان امي توفت !!
استغرب من كلمتها توقع ان الموضوع يعد موضوع حساس بالنسبة لها وما تحب تجيب سيرته لكنه ابتسم .. افضل شيء انها تعتبر ان الموضوع صار عادي عشان ما تتاثر نفسيا ونفسيتها تتعب !!
عبدالعزيز ولا كأنه سمع شيء : خلاص ولا يهمك ان شاء الله بكرة ازوركم !!
العنود بفرح : جد والله !!
عبدالعزيز:اي جد واجيب موزة معي وش رايك !!
ام طارق: أجل قولولي اروح معكم من زمان ما شفت أم محمد !!
العنود: والله بيكون فلله أجل باعزم مريم عشان تجي ّّ!!
عبدالعزيز: وش معنه مريم !!
العنود: شتقصد !!
عبدالعزيز: اتذكر عندكم بنت عم اسمها ريم !!
ضحكت موزة يوم سمعته يسال عنها والكل لف لها متفاجاين !!
مموزة: اي اي .. ريم تجنن يمه وش رايك نخطبها لطارق !!
ناظر اخته بنظره .. خلتها تضحك .. صحيح ان هو ولا مرة قال لها شيء لكن هي كانت حاسه من تصرفاته معاها !!
أم عبدالرحمن : بنت من هذة بنت ابراهيم ولا بنت محمد ..
موزة: لا لا هي بنت عبدالله ولد محمد !!
ام عبدالرحمن: ويييييي بنت نور ,, يحليلها !! والله هالبنت حبوبه !! بس خل اشوفها بكرة بالاوول !!
عبدالعزيز وهو منصدم : يمه من جدك !!
العنود بهبل : وااي فلله بقول لريمي عشان تكشخ !!
عبدالعزيز: خلصوو بنات الدنيا يعني ... لا تخطبونها لطارق اخطبوها لي !!
العنود بصدمه : شنووووووو !!
عبدالعزيز توهق : اقصد .. اه
ام طارق بفرح : خلاص عيل .. اخطبها لك
عبدالعزيز " والله وهقة لو ما خطبتها الحين راح تروح من يدي .. ولو خطبتها اخاف ما توافق .. هي ما تحبني !! وش اسوي يعني !! اكيد راح ترفض .. اكيد "
عبدالعزيز : انزين انتظروا اشوي !!
ام طارق : لا يمه أنا ودي افرح فيك انت واخوك مرة وحدة !!
عبدالعزيز بفرح : اجل مطولين !!
موزة: اي مطولين يا شيخ .. فال الله ولا فالك .. طارق وافق انه ياخذ بنت صديقة امي !!
عبدالعزيز: والتمثليه الي صارت الحين !!
موزة بفرحة: عشاان تتحرك وتخطبها !!
عبدالعزيز بعصبية : اقوول انقلعوا !
العنود: اقوول عززوز لو تبيها تكلم .. ترا جد والله !!
عبدالعزيز " اقول للعنود ولا .. لا لا الافضل اخليها برا السالفه "
عبدالعزيز : لو تبين تساعديني لا تفتحين الموضوع معاها ولا تقولين لها عن الي سمعتيه .. وانا باتصرف
ام طارق: يعني اخطبها !
عبدالعزيز: وانتوا يا الحريم بس جاهزين .. لا يمه انتظري !!
وطلع من البيت من دون لا يسلم عليهم .. دخل للسيارة وهو معصب من اخته لهالدرجة كل شيء واضح لا والحين هالفضيحة عندل درت .. أنا رحت فيها خلاص .. كلها ايام وريم راح تدري وش راح يصير بعدين !!
بالعكس يمكن لو درت كل شيء راح يتحسن .. يمكن لو درت راح تحس فيني .!. يا ريت والله .. اتمنى !!
.................................................. ....................
جلست تكتب في الدفتر الي عندها .. هذا الدفتر خاص بمذكراتها معاه .. تكتب فيه كل شيء تعرفه عنه او تكتشفه عنه .. ما تكتب فيه اي شيء ثاني .. هالدفتر خاص فيهم همه وبس !!
جلست تشوف الصور الي صورتهم لما كانت في مصر معاه .. كانت تصورة من دون لا يحس .. تسوي نفسها تصور دانه ولا ريم .. بس تركز الكيمرا عليه هو وبس ..!
راحت بخيالها لمرة يوم راحوا لشرم ..! وقفت تصور المنظر !!
- هيووووون .. شتسوين !!
هيا : احمد !!
أحمد يضحك : اشفيك تخرعتي .. ليكون اخرع !!
هيا: بسم الله لا ما تخرع !!
أحمد: شتصورين !!
هيا: المكان يجنن !! وجلست تصور !!
أحمد:وانتي بس اتصورين أماكن !!
هيا تضحك بحيا: اجل وش اصور !!
أحمد باستهبال: صوريني انا مثلا !!
وراح ركض بعند الشجر .. ويسوي حركات عشان تصورة !! صورته صورين وابتسمت !!
تحس نفسها مش قادرة تنسى هاليوم . راح يظل بذكراها على طول .. هي تحبة .. معقوله يكون يحس فيها !!
جلست تكتب الكلمات الي حست فيها يوم انتبهت للصورة وجلست تتأملها !!
انت تدري اني أحبك
وفيك عمره ماخاب ظني
تدري هجرت الكون لاجلك
ايامي قبلك أتعبتني
ماعرفت العشق إلا باسمك
وبحروفه قمت أغني
وعن أحلامي .. لامابقولك
ولا العيون كيف افتنتني
صرت بالنهار محكوم بظلك
وفليلي قمرك مسهرني
ارفق بحالي .. طلبتك
حتى لو ماتدري عني
يكفيني أكون صورة بخيالك
دام نظراتك مقابلتني
يكفيني أسمع اسمي منك
يرتجف قلبي وينتفضني
والله ياعمري أحبك
يقلبي قلتها .. اقبلها مني ..
اغلقت الدفتر .. وطلعت لبرا .. لانها سمعت صوت امها وهي تلعب مع حســـن ..! يوم عن يوم تحب
هالولد اكثر .. وتستانس لما يجيبونه عندهم .. لدرجة انهم طلبوا من مها كل ما تطلع تجيب حسن لبيتهم لانها تخاف تتركه مع الخدامه .. وبيتهم اقرب بيت لبيت خليفة .. أقرب من بيوت الباقي !!
هيا: هلا والله .. يا هلا بحسووني !!
أم سعود : زين انك جيتي عشان تاخذينه !!
هيا: ليش يمه بتطلعين !!
أم سعود : اي يمه راح أودي اختك للصالون ازعجتني تبي تقص شعرها !!
هيا: اوك خليها تروح مع الشغاله !!
ام سعود: لا لازم بنفسي اوديها .. اعرف حركاتها ان خليتها تروح لحالها راح ترجع لي مقرعه !!
هيا: هههههههههههههههه !! ومهووي وين !!
أم سعود : مها راحت عند أمها رقدوها بالمستشفى المسكينه !!
هيا: يا عمري بعد .. توهم من اسبوع مطلعينها !!
أم سعود : اي والله ! معورة قلبي هالمرة !! ان شاء الله بكرة راح نزورها جميع !!
هيا: كلكم حتى البنات !!
أم سعود : احنا بنروح الصبح .. وريم قالت ان البنات بيروحون العصر .. روحي معاهم !!
هيا: يس يس باتصل في دانه عشان اقولها !!
أم سعود : انزين خذي الولد !
حسن : هنا >> يعني هياا !!
هيا: يا روح هيا انت !!
حسن: هواوو >> يعني حلااوه !!
هيا وهي تاخذة غرفتها ..
هيا : حلااوة .. لا لا ما في ..!
حسن: هواووة !! ( وراح لعند الدفتر يحطه في فمه )
هيا : لااااااا !!ى هذا مب حواوة !!" افف مشكله هاليهال .. كل شيء يحطونه في فمهم " !!
مسك الدفتر وقعد يلعب فيه !! حاولت تاخذة من عنده وتعطية دفتر ثاني لكن ما رضى وجلس يصيح في النهاية اعطته الدفتر وجلست على الاب توب !!
اشوي ولا يرن جوالها !!
هياا: الووو !!
أم سعود : هلاا يمه !! اخبار حسون !!
هيا: والله تمام .. بتتاخرون بالصالون !!
أم سعود: يس يس بنسوي اظافرنا انا ومريم !! الا ترا مها اتصلت تقول بتنام عند اهلها اليوم !!
هيا: واوو فلله يعني حسوون بينام عندنا
ام سعود: لا لا تقول ما تبي تتعبنا .. بيمر أحمد ياخذها لبيتهم !!
هيا : احمد !!
ام سعود : اي يمه !!
هيا: اووك باي ََ!!
لفت تدور حسن علشان تلبسه لبس ثقيل على حسب ما افهمت ان أحمد جاي بالطريق .. دورته بالغرفة ما لقته الشيخ طلع لان باب الغرفة كان مفتوح ..َ
دورته بالصاله الفوقية لكن ما حصلته نزلت تحت شافته يلعب بالدفتر وجاالس مع الخدامه .. أكيد الخدامه هي الي نزلته لتحت !! لانها كانت تلعب معاه .. قالت للخدامه تروح تسوي عشان لانها كانت جوعانه وجلست تحاول تاخذ من عنده الدفتر بهدوء لكنه ما رضى بالعكس جلس يصيح ويصارخ ..!
هيا: حسووون خلاص جيب الدفتر .!
حسن: ناااااااء !! << يعني لااااا
هيا بعصبية : حســــــــــــــــن !!
خاف من شكلها وبدا يركض .. راح للصاله الرئيسية في المجلس على دخلت أحمد !!
احمد وهو يطق باب الصاله لان باب البيت الكبير كان مفتووح ..!
أحمد : عمتي !! سعوووووووود .. يا عالم ! ( ويطالع حسن الي كان جالس ع الارض والدفتر في فمه ) حسن في حد بالبيت !!
حسن: اي اي .. هنا .. تتقكني ..>> اي اي .. هيا تطقني !!
أحمد : اكيد صاير شيطان ..! ليش تطقك !!
حسن: تبي .. هزا
أحمد : الله يفشلك قطري وتقول هزا ... انت وش يقربلك كاني ََ!!
ناظره حسن وهو مب فاهم وش يقول وبعدين ضحك .. أما أحمد استغرب من شكل الدفتر .. لونه احمر وشكله مرتب .. اقص ايدي اذا كان هالدفتر لحسن .. حسن وين هالاشياء وين .. بدا يسحب منه الدفتر بهدوء لكن بدا يصيح فطلع له مفاتيح السيارة والجوال عشان يلعب فيهم ... واخذ هو الدفتر !!
حسن : ابي هوهوا !!
أحمد: انتظر لين الخدامه تجيب اغراضك واوديك !!
حسن يصيح : ناا . اهين !! اهين !!
كان وده يفتح الدفتر ويشوف الي فيه بس بنفس الوقت ازعجه حسن بصياحة فتح الصفحة الاولى وقرى !!
إليك انت .. نعم انت ,,!
يا من ملكت قلبي بكلماتك !!
يا من لم تستطع مفارقة خيالي ..
مهماا حاولت !!
كلمات حلوة بس غامضة .. فتح الصفحة الثانية .. ولقى فيها وردة صفراء وصورة لشخصين مع وردة يوم دقق فيها اكتشف انها صورتهم من حوالي 7 سنين .. يوم سافروا الاهل كلهم مع بعض لبيروت ..! كانوا وقتها صغار .. حاول يتذكر مناسبة الصورة لكن ما قدر .. تردد اذا ياخذ الدفتر ولا لاء .. بس يا ترى هالدفتر لمين . لازم اعرف ... مسك يد حسن الي كان لحد الحين يصيح .. وشاله على اساس انه يوديه للسوبر ماركت القريب من البيت لكن قبل هاي جلس ينادي على وحدة من الخدامات !!
- yes sir
احمد : Where is saha
- inside i our room
احمد :tell her to pic hassan stuff, i'll take him to the supermarkrt and come back
- ok. Sir.
اخذ حسن والدفتر لحد الحين في يدة وطلعوا من البيت على اساس انهم يروحون لاقرب سوبر ماركت ..
ما انتبه ان في احد كان يراقبهم ومنقهر من الحركه .. انا الغبية الي اعطيت حسن الدفتر من البدايه .. لا والاخ اخذة معه ودي اعرف ليش .. ليش .. لقافة يا ناس والله لقافة .. الحين اكيد راح يقرا ..! اساسا شيء طبيعي يقرا الدفتر معاه .. اشلون ما يقراه .. هي من النوع الي ما تذكر اسامي كثير .. حاولت تتذكر اذا كانت حاطة صورة له ولا حاجة لكن ما اقدرت . راحت للطابق الثاني وهو تركض عشان تتفقد الصور واتشوف اذا في شيء ناقص ..!
.............................................
طلبت من السايق انه ما يوصلها لبيتها .. يروح يوصلها لبيت ريم .. لانها كانت متملله من قلب . ما كان لها بارض ترجع البيت .. أمل حابسة روحها في غرفتها وتصيح .. وجدتها اكيد بالمجلس لان اليوم الاربعاء والعادة الشباب يتجمعون عندها كل اربعاء .. وما كان ودها تروح من الباب الثاني عشان محد يشوفها .. فقررت انها تروح عند ريم .. عشان تقدر ترجع لاي وقت بما ان ريم بيتها جنبهم .. ومو مضطرة ترجع مع السايق في رجعتها !!
- ياهلاااااا تو ما نور البيت !!
العنود وهي تضحك على هباله
العنود : هلا فيك فهوود !! وين ريم .. لا تقول انها طالعه ولا نايمه !!
فهد : لا لا جالسه تشوف فيلم بالصاله ..! ليش انتي ما اتصلتي فيها !!
العنود : لا
فهد : نااس ما يستحوون !!
طالعته بنظرة خلته يظحك عليها !
العنود: انت طالع !!
فهد : يس راح امر على بيت ابوي ابراهيم وبعدين باروح لجدتي العودة .. امي عائشة هاوشتني لان صار لي فترة ما زايرها !!
العنود: يس يس حتى جدتي زعلانه منك
فهد : افاا
العنود: مهو كانك عايش فعالم لحالك ولا تزور حد
فهد: اقوول يا البايخة روحي لريموو !!
صحيح ان الفرق بينهم مش كبير سنتين بس لكن هي ما تحجبت عنه الا العام . لان طول عمرها تشوفه مثل ما يشوفونه باقي البنات اخوهم الصغير !! وحتى هو لحد الحين احياننا يلعب معاهم سوني ولا يوديهم السينما .. بما ان العادة ممنوع يروحون البنات للسينما لحالهم .. فاغلب الاحيان ياخذونه هو معاهم منعا للاحراج !!
العنود وهي تدخل البيت بازعلاج لأنها واثقة ان ما في اي حد موجود أكيد عبدالله وطلال بيت الجدة .. ونور يمكن عند اختها !!
العنود: بوووووووووووووو!!
ريم وهي تشهق: اعوذ بالله من الشيطان الرجيم !!
العنود : هيي انتي عبالك شايفة جني !!
ريم: ما ادري عنك في حد يدخل بيت الناس ويصارخ !!
العنود وهي تجلس على الكرسي المقابل لريم : اولا هذا مو بيت ناس .. هذا بيت ولد عمي .. ثانيا ما في حد غريب .. ثالثا .. حد يعامل بنت عمه الي متعنية وجايه لهم بهالطريقة
ريم: انتي ما وراك بكرة مدرسة
العنود: لا بكرة في رحله .. فقررت اني اليوم استمتع وبكرة ادرس
ريم: الله يوفقك حبوو .. والله احاتيج انتي ومريم !!
العنود: ان شاء الله خير
ريم: الا انتي من وين راجعه هالوقت
العنود : بيت خالي !( وابتسمت تتذكر كلام عبدالعزيز )
ريم: اوووووووووو بيت موزوو !!
العنود: يس يس
ريم: تجنن هالبنت احبها @
العنوود: اي حتى هي تحبك .. واخوانها يجننون !! ( وهي تشوف ريم تبي تعرف ردت فعلها )
ريم: وووووووووووووووووووووووع !!
العنود " بل وش فيها ذي قلبت .. معقوله تكون تكره عزوز الله لا يقول .. والله انه يجنن .. "
ريم: اففففف عندها أخوين واحد شفته مرة وحدة وواحد وين ما اروح القاه في وجهي !!
العنود : ههههه وبعدين !!
ريم: يختي هذا العبد العزيز ودي اذبحه قاهرني !!
العنود: افااا عاد هو اكثر واحد احبه .. طيووب .. حبوب .. محترم .. مسؤوليه !! كل شيء
ريم: دمه ثقيل .. بايخ .. يسوي نفسه يضحك .. عصبي !!
العنود: لا والله حرام عليك !! تراه يمكن يستهبل !!
ريم: عاد هو يعرفني عشان يسوي فيني كذا !! معقوله يسوي جي لكل صديقات موزة
العنود: لا لا مستحيل .. بالعكس تراه مو من النوع المغازل !!
ريم: ما في رجال ما يغازل دام طلال مرة سمعته يغازل !!
انصدمت يوم سمعت هالكلمه .. معقول .. لا لا مستحيل الا طلال .. طلال مب من هالنوع . !
ريم: هييييييي وين رحتي !!
انتبهت لنفسها وردت على ريم على طوول !!
العنود: ها لا ولا شيء !! المهم !!
ريم: ولا شيء اقولك أكيد على حركاته البايخة معاي يكون يغازل وتوقعني مثل باقي البنات !!
العنوود: الا عزوز .. عزوز من النوع الي ما يعطي وجه لأي احد .. وصعب اي حد يعجبة !! خاطري اعرف ليه تكرهينه !!
ريم: ما ادري كذاا ..
العنود : هبله هبله .. والله انه يجنن
ريم : والله انك هبله أجل لو اخطبك عزيز بتوافقين !!
العنود: انتي تعرفين ان ما عندي اخوان طول عمرنا انا وامل نعتبر عبدالعزيز وطارق خوانا !! ومستحيل علاقه الاخوه تنقلب لحب !!
ريم: انا بس ودي اعرف وش فيكم انتي وموزو على عزيز .. الكل يكلمني عنه اوووووووووف !!
العنود: اقول يا الدوبا انتي الكلام معك ضايع ابي جارج جوال مثل جوالي !!
ريم: انتي جوالك مثل مال طلال .. روحي فوق بتحصلين في غرفته !!
العنود بصدمه : شنوو !!
ريم: بسم الله وش فيج !! اقولك روحي غرفته .. وخذي الجارج !
العنود: اخا فيكون موجود !!
ريم: انتي من اشوي قايله ان كل اربعا الشباب يتجمعون عند جدتي نسيتي !!
العنود: لا ما نسيت بس !!
ريم: اقول روحي بلا هزرة زايدة .. انا ضايق خلقي باتصل على وحدة !!
رقت العنود لفوق .. أما ريم كانت حاسه ان ودها تكلم حصة !!
نروح لهيا الي راحت لغرفتها واكتشفت ان 3 من الصور لاحمد مش موجودين .. فتحت الدرج الي تحط فيه الحجابات الملونه .. وانتبهت انها لابسة بجامه يد طول وراحت للحوش تنتظر وهي لابسة الشيله !! لازم اخذ الدفتر .. واذا ما شفت لدفتر في يدة راح اسئل عنه واقول انه لصديقتي بس يا رب ما يكون فتحهه .. يا رب ما يكون فتححه !!
جلست تدعي ربها إن احمد ما عرف اي شي .. وكانت تسوي لفه في الحوش من القلق .. تحس انها راح تختنق اذا جلست داخل اكثر !! لازم تطلع لازم تشوف وش السالفه !!
اشوي ولا تسمع صوت السيارة جايه ..! لكن الي خرعها ان السيارة ما دخلت لداخل ..!
شافت حسن يركض ومعاه كيس مليا ن حلويات وأحمد وراه وفي يدة الدفتر الي لما شافته بغت تطلع عيونها !!
أما هو انتبه لها .. ولف وجهه عباله وحدة من الخدامات .. بس لما دقق في ولامحها اكتشف انها هي .. وحاول يمسك ضحكه على شكلها لكن ما قدر .. جلس يضحك بصوت عالي !!
هيا " وش فيه هذا عباله شايف مهرج .. وش فيه يناظرني ويضحك بصوت عالي .. والله انه شككني بعمري !! لا لا هي ما عليك منه .. هو انسان بايخ . انتي انسانه جميله .. يس يس انا انسانه جميله !! "
لكنه ما وقف ضحك .. جلس يضحك ويضحك ويضحك وهي ميته من القهر !! مشت عنه وراحت لورا البيت كان ودها تسال عن الدفتر لكن خلاص ما لها وجه بع ما شافته يضحك ..! اشوي وسمعت صوته الي وقفها !!
أحمد " والله لا اوريك يا هياا !! "
أحمد يحاول يسوي نفسه جدي بعد ما وقف ضحك :فرررررررررريدة !! فرريدة وين رحتي تعالي شوفي حسن !!
طلعت عيونها يوم شافته ينادي فريدة .. الحين هذا ما يستحي .. يشبهني انا بالخدامه !!
.................................................. ..............................
العنود كانت فوق ودخلت غرفه طلال الي كانت معروفة بالنسبة لها .. طول عمرها تتمنى تدخل غرفته لكن مع الاسف ما تقدر تدخل كذا ..! قعدت تدور الشاحن " الجارج "في الغرفه وكانت الغرفه معفووووسه ولا لقته قعدت تدوره يمين وشمال وسمعت احد يفتح الباب..
العنوود وهي ما طالعت اللي دخل: ريمووو يا الهبله .. ما لقيته تعالي دوريه معاي.. الغرفه مره معفوسه اخوك ما ادري وشلون عايش.. حشى في حد يقدر يعيش في غرفه زي كذا .. الحين عرفت انتي على من طلعتي غير نظاميه !!
طلال كان ساكت ويطالعها وفاتح فمه وبنفس الوقت منحرج من شكل الغرفة .. لو كان يدري ان العنود بتمر كان رتبها أكثر !! ولا طلب من الخدامه تجي تنظف .. " يحليلك يا العنووود .. اجل انا مب نظامي ..بس الصراحة معاها حق .. من الي ممكن يعيش بهالمكان .. اخخ بس فديتها هذة ثاني مرة اشوفها بهالحاله .. احلى شيء انها تستحي . >> وتذكر سالفه المزرعه "
العنوود بعصبيه: ريموووووو انتي ما تستحين !! يله بسرعه تعالي وش فيـــــــــ
لفت وانصدمت باللي واقف قدامها..
العنود شقت .. وهي ميته حيا: آآآآآآآآآآآآانا ...على...كنت.....الشاحن....موبايلي..
طلال حس انها مستحيه ولف وجهه عنها وهو يحاول يمسك ابتسامته .. حس ان ما له داعي يحرجها اكثر .. كفايه الي فيها !! :شوفيه على السرير..
العنوود طلعت ولا اخذت الشاحن ولا غيره..بعد ما طلعت لف طلال وما شافها وهي تطلع وناظر الشاحن في مكانه اخذه واخذ معه مفتاح السياره ونزل وراح لعند ريم في غرفة التلفزيوون .. الغرفة كان لها باب ..! طق الباب وانتظرها تجي تفتحه .. ما كان حاي يحرج العنود بمواقف زيادة .. كفايه الي صار لحد هنا !!
طلال:ريوومه تعالي...."وراحت عنده..
ريم: نعم وش تبي..
طلال: عطي الشاحن للعنود
ريم: وانت وش دراك انها تبي الشاحن...
طلال: بلا لقافه وعطيها الشاحن وانتي ساكته" وطلع"
أما رايم ما فهمت وش السالفه بس ما حبت تعلق مصيرها راح تفهم كل السالفه بيوم من الايام !!..
ريم: عندل .. خذي الشاحن جابه لك وليد..
العنود ارتبكت: طلوول ...جابه..الشاحن.. وبنفسه !!
ريم: أكيد بنفسه انتي وش عبالك ليكون ولد الامير ولا حاجة .. وبعدين وش سالفتكم انتم..!!
العنود تصرفها: لا انا كنت طالعه للغرفه وصادفته وقلت له اني ابي الشاحن ونزلت وما اخذته بس هذي السالفه.. ليش تناظريني بنظرات شك
ريم : لاني مش مصدقتك بس باحاول اخدع نفسي !!
.................................................. ..........
- فريداااااااااااااااااااا ..
توهقت وما عرفت وش تسوي .. كان ودها تصيح من الموقف الي انحطت الحين انا هيا يشبهني بخدامه .. ناظرت كانت واقفه قدام الشباك العاكس بالليل شافت شكلها وكان ودها تمووت بهاللحظة .. العادة هيا من النوع الي تحب شيء اسمه مكياج يعني يوم تتمكيج محد صار يعلق وكل شيء عادي .. كانت حاطة روج لون عنابي فاقع .. وكحلها سايح من دون اي ظل ولا حاجة .. شافت البجامه الي كانت ناسيه انها لابستها القميص كان لونه اخضر والبنطلون لونه برتقالي وعليه حركات .. كان ودها الارض تنشق وتبلعها ..
- فريدااااااااااااااااا تعالي ..
ما كان ودها ان احمد يدري ان هي هيا لان لبسها يفشل .. أكيد راح يضحك عليها على هاللبس .. اذا الخدامه جات راح تقوله ان هذة هيا مش فريدة !!
هيا وهي تتكلم مكسر : نئـــــــــــــم بابا
أحمد وهو يحاول يكتم الضحكه : الحين تاركه الولد وجالسه تركضين ..!
هيا: نو نو بابا .. انا في روه جيب شي
أحمد: إنزين يله روحي داخل ودي حسن .. انا لازم اطلع الحين !!
هيا: اوك بابا ( وناظرت الدفتر الي في يدة ..)
انتبه لها انها تبي الدفتر .. لكن سوا نفسة مب مهتم .. جلس في القعدة الموجودة بالحديقة وسوا نفسه يفتح الدفتر .. لكن قبل لا يفتحة حطه على الطاولة ودخل للبيت .. أما هي ما صدقت على طول ركض تاخذ الدفتر وما انتبهت انه كان يراقبها من ورا الستارة ويضحك على شكلها .. أساسا احمد ما كان محتاج للدفتر لأنه قبل لا يروح للسوبر ماركت راح للمكتبة وطلب منهم يصورون الدفتر كله ...! وهذا الي صار !!
دخلت للبيت من الباب الخلفي الي هو با ب المطبخ على اساس انها رقى لفوق من الدرج الثاني لكن شافته بالمطبخ جالس يشرب ماي
أحمد ويسوي نفه معصب : فريدة ليش ما خذيتي حسن ,. انا قلت لشغالته تاخذة
انتبهت ان الدفتربيدها على طول احذفته ورا ظهرها
هيا: بابا انا خدامه مال بيت ماما سريفه مب كدامه ما هسن
خلاص ما قدر يمسك شكله يوم شافها بالهطريقة .. هاللهبله عبالها اني ما كشفت لعبتها !!
أحمد وهو يضحك بصوت عالي : هيووووووووون والله انك ضابطه الدوور !!
انصمت انه عرف انها كانت تلعب عليه .. دموعها طاحت وركضت لغرفتها على طول أما هو حس ان الحركه الي سواها كبيرة وايد .. وحس انه غبي الحين معقوله يسوي نفسه ما عرفها وانه يضنها الخدامه بس الصراحة من اللبس الي كانت لابسته ما ينلام .. البيت كان شبة مظلم من براا .. ولبسها كان ما ادي اشلون وهالخرابيط الي على وجهاا مغيرة ملامحها ..!
أخذ الدفتر من على الارض وحطة في كيس واعطاه لوحدة من الخدامات .. وطلب منها تروح تعطية لهيا ضروري قبل لا حد يشوفه بالبيت .. إذا حد شافه موقفها ما راح يكون حلو قدامهم .. من يدري امها وش راح تسوي !! واخذ حسن وطلع معاه عشان يروحون بيتهم !!
قامت من النوم وهي متخرعه اليوم الخميس .. اليوم راح اروح بيت نواف ويا دانه .. كانت تحاتي هاليوم بشكل كبير .. لو حد عرف من أهلهم ممكن ذبحهم اهما الاثنين .. وخصوصا لو جاسم درى ممكن يطلقها على هالحركه .. كفايه المشاكل هالايام بينهم جالسه تزيد .. يوم عن يوم يتهاوشون اكثر .. بس دانه تحاول انها ما تبين ومتوقعه ان محد بالبيت يدري ..! بكن الكل يدري .. اي نعم الكل يدري الا ابوي ..! لانه لو درى ممكن يذبح جاسم ولا يهاوشه ولا يسوي فيه أي شيء,,!
انتبهت للساعه كانت الساعه 10 .. هس اليوم ما عندها غير محاظرة وحدة على الساعه 2 الظهر وتنتهي الساعه 3 .. يعني تو الناس الوقت قدامها طويل .. طلعت من الغرفة وشافت دانه جالسه بالصاله تسولف مع نور ..!
- السلاااااااااام عليكم !!
الكل: وعليكم السلااااااام .. صباح الخير !!
الجوهرة: صباح النور !!
نور: انتي ما وراك محاضرات اليوم !!
الجوهرة: لا بس عندي مختبر على الساعه 2 ..
دانه وشكلها تخرعت : يعني بتطولين !!
الجوهرة: نو نو ساعه ولا ساعه ونص بالكثير وتخلص !!
نور: ريم فديتها جدولها اليوم مب حلو .. وايد زحمه ن الساعه 8 وهي الجامعه لحد الساعه 4 العصر يمكن ..
دانه : اهااا .. الله يعينها ..
الجوهرة: اجل وين باقي الناس .. ما لهم حس !!
دانه: خالد في غرفته لان اشوف الخدامه من اشوي مطلعت له شااي .. جاسم طلع من الصبح .. خالتي طلعت .. وعمي هم طلع !!
الجوهرة وهي تجلس : اهااا !! حلو حلو !!
نور وهي تبتسم : اجل وش رايكم نطلع !
دانه: لا لا انا مالي مزاج .. وبعد نص ساعه باروح عندي محاظرة !!
الجوهرة: وانا احس جسمي متكسر ما اعتقد راح اروح لمكان !!
نور: انتوا ما تشجعون الواحد يسوي شيء ..!
دانه: ما قلتوا راح تزورون ام مها اليوم !!
نور: الاا راحوا العجايز كلهم .. وشكلي راح اروح معاكم العصر !!
الجوهرة: على الساعه كم بنروح !!
دانه: يمكن 5 المغرب احس حلو .. ولا بعد اذان المغرب وش رايكم !!
نور: خليها بعد الصلاه افضل ..!
الجوهرة: يس يس احسن ..
.................................................. .......
مع انها اليوم عندها تطبيق لكن ما كان ودها تروح للجامعه اذا راحت راح تشوف نوف.. وهي ما ودها تشوف اي أحد .. بعد الي صار أمس ما طلعت من غرفتها .. ما كان ودها تطلع وما تبي تشوي اي احد سواء يدري عن الموضوع ولا حتى ما يدري ..!
وصلها المسج الي ع المسن .. لكن ما كلفت على عمرها تعرف شلي طلبه خالد من أبوها .. كل الي كان يهمها انه ما علمه الحقيقة كامله .. بس معقوله خالد يكون حط الذنب على نفسه ..!
فتحت الجوال وشافت 5 مكالمات من نوف ومكالمه من ريم ومكالمه من مريم !! شالسالفه !!
معقوله أحد عرف عن الموضوع .. لا لا مستحيل !! الموضوع سري وراح يظل سري .. خالد مب من النوع الي يكشف اسرار لاي احد .. خالد انسان كتووم !!
ما عرفت وش تسوي .. ما عرفت مشاعرها كانت معصبة متضايقه مقهورة .. من هالانسان الي اسمه خالد .. اي نعم ..! معصبة ومتضايقة منه ومن حركته !!
ليش يعاملني بهالطريقة .. وليش يسوي لي كذا .. انا بنت عمه !! مب خطيبته ولا اخته !! بنت عمه يعني ما يقرب لي !!
فتحت المسن وشالت البلوك عنه .. شافته متواجد !! فتحت صفحة المحادثة وجلست تكتب ..!
.................................................. ..........................
كل ما يتذكر شكلها أمس يضحك .. وبنفس الوقت حاس بالذنب على الي سواه فيها .. صحيح انها ما تستاهل .. بس تصرف هالتصرف لا شعوريا ..! وصل للبيت واخذ الدفتر الي صوراه معاه لفوق .. وراقا لغرفته على طول .. طول اليوم كان مشغول مع الشغل ولا عنده وقت انه يقرى الدفتر .. وهو كان وده يقراه لما يكون فاضي !! وما وراه اي شيء على أساس انه يقراه على رواق !!
فتح الصفحات وبدا يقرى وكل صفحة يزيد استغرابه .. صحيح انه كان معجب فيها لكن عمرها ما توقع انها كانت تحبة من فترة طويله وتكتب عن كل شيء يصير بينهم .. مع العلم ان المواقف الي بينهم قليله جدا ..!
هو طلب من الرجال ان الصفحات الي فيهم صور ينسخها باالوان بعد ما تأكد إن في الدفتر ما في اي صوره لها
عمره ما توقع ان يكون عنده بنت عم شاعرة .. كلنت كل صفحة لا تخلو من الشعر أو الخواطر .. ههو عارف ان دانه تكتب
روايات ومقالات .. ونفس الشيء العنوود ..! وسعود كان ينشر مقالات بعد !! بس هيا أو مرة يسمع انها تكتب شيء !! فعلاً الادب موجود في دم العائله !!
كل صفحة يزيد اعجابه فيها !! ومع كل صفحة يحس بالذنب على الي امس سواه فيها .. أكيد الحين زعلانه ..!
وصل للصفحة الي كانت كاتبه فيها عن يوم العيد .. ضحك وهو يتذكر هالايام ..!
فعلا كانت ايام حلوة ..! سوالف واحداث حلوة الي صارت .. شاف الصورة الي صورته إياها .. بس الي ما كانت تعرفه إن حتى هو !! صورها صورة من دون لا تدري !! كان يلعب بالكيمرا وعلى اساس انه يبي يصور صورة لدانه مع حسن ... لكن صور هيا الي كانت وراهم من دوون لا تحس .. وبعدين صور دانه وحسن .. كان ودة يكون له ذكرى منها .. كان وده يكون عنده شيء منها !! كان وده يتذكرها على طول مع انها عمرها ما فارقت قلبه ..
كان متردد من مشاعر ة .. لكن أول ما قرى الكلام الي هي كاتبته تيقن ان مشاعرة حقيقية .. وتيقن إن الحب الي يجمعهم !!
.................................................. ..............................
ما صدقت لما شافته من المتواجدين .. فتحت صفحة المحادثات وجلست تكتب ..!
" أولا انت متوقع اني راح اشكرك لانك ما علمت أبوي .. لو تبي تعلمه اتفضل ... ثانيا شالسالفه أوافق على شنو .. تراني مب فاهمه اي شيء .. لكن تأكد من شيء واحد أنا ما لي ذنب .. أنا ما سويت شيء !! رحت مع نوف وفجأه جا واحد وجلس معانا .. قلت له قوم ما قام وش اسوي يعني .. "
كان بالدوام وجالس يقوع على أخر الاوراق لليوم .. ما راح الدوام الا لساعه عشان الاجتماع مع الشركه الهولندية .. ما كان له أي مزاج انه يطلع ..!
انتبه للمسن وشاف رساله منها .. قرر انه ما يفتحها ولا يقرى الي فيه .. سكر المسن على طول من دون لا يفتح الرساله أخذ اغراضه من المكتب وطلع !! أما هي انقهرت لما شافته انه طلع من المسن على طوول !!
هي انقهرت لما شافت انه ما رد عليها وطلع من المسن على طول ..! جلست تبكي بصمت ..! هي عارفة ان الي تسويه غلط !! لكن مش عارفة اشلون تتصرف .. ويوم عن يوم تحس انها بدت تكره زيادة وانه جالس يلعب بمشاعرها وبس !!
كان ودها تتصرف اي تصرف وتقهره .. كان ودها تسوي أي شيء عشان يحتر !! استغربت اشلون كانت تحبه في البدايه .. معقوله خالد تغير. هذا مب خالد الي كانت تكلمه ع المسن .. هذا خالد مختلف .. إي نعم خالد مختلف !!
اشوي ولا تسمع صوت طق على الباب !!
أمل: اتفضل !!
- أموول راح تروحين مع البنات للمستشفى
أمل باستغراب : مستشفى !! شالسالفه
العنود: اي نسيت طول الليل جالسه تبكين هنا .. أنا خاطري اعرف وش فيك !!
أمل : لا سلامتك ّّ!!
العنود بشك: أمل .. انا اختك الوحيدة .. من بعد وفاة أمي وحنا ما لنا غير بعض بالدنيا !! حبيبتي وش فيك !!
أمل وهي تمسح دموعها : بس متضايقة
العنود: وممكن اعرف شلي مضايقك !!
أمل : اخااف لو قلت لك اطيح من عينك !!
العنود وهي تضحك : لا تخافين انتي طايحة من عيني من زمان !!
أمل وهي فاتحة عيونها : نـــــــــــــــــعم !!
العنود تضحك : لا جد خيتو شالسالفه !!
جلست تحكي لها كل الي صار أمس .. أما العنود كانت منصدمه معقوله كل هذا يصير لامل ومحد يدري عن الموضوع .. فعلا حياه البنت من دون أم صعبة .. كانت أمهم تحس فيهم .. واذا فيهم ما تطلع من الغرفة قبل لا يقولون لها على كل شيء .. أما أمل صار لها 6 شهور تقريبا تعاني .. ومحد قادر يفهمها ولا حس ان فيها شيء ..!
.................................................. ....................................
- ما بغيتي تطلعين !!
- وش اسوي الدكتورة اخرتنا !!
- والله فرق جامعتكم عن جامعتنا !!
- هههههههه تقارنين قطر في المدينه التعليميه !
كاني: ماما وين في روه
دانه: روح بيت سهر !!
الجوهرة: دوين لحد الحين مصممه !!
دانه: يس يس !!! لازم اتصرف !!
الجوهرة: دانو على الاقل خل نعلم حد
دانه بعصبية : نعلم من مثلا !!
الجوهرة: نوور
دانه: نور لا .. نور لو درت بتسوي مصيبة يا تعلم طلال ولا عبدالله .. ومو بعيد تتصل في جاسم وتقول له كل شيء !!
الجوهرة: طيب قولي لاحمد ولا خليفة
دانه: انتي تبغين اخواني يذبحوني !!
الجوهرة: نقول حق من يعني !!
دانه : ولا حد .. نروح هناك وحنا ساكتين !! وبعدين عادي نواف برا البيت انا كلمته !!
الجوهرة: دانو ما تضمنين والله الواحد يخاف !!
دانه: تخافين لو شخص ما تعرفينه أما نواف مثل اخوي .. وهو قالي ان لمياء جات معاه بس ما عرف اذا هي بالبيت ولا لاء !!
دقايق ووصلو البيت .. ما كان في اي سيارة عند الباب .. ونواف كان قايل لدانه انه راح يخلي باب البيت مفتوح لها وفعلا هذا الي صار .. كأنها حافظة البيت على طول راحت لغرفة سهر !!
الجوهرة " الله يرحمك يا سهر .. فعلا مكانها يبين بالبيت صحيح اني ما جيت هنا الا مرتين تقريبا .. لكن البيت بحس سهر يكون مختلف .. "
أما دانه اول ما دخلت الغرفة التفتت للمكتب ..! لقت مثل برواو وفيه صورة لدانه ولما ولسهر وأماني ..!
شافت الصورة وضمتها !! فعلا كانت ايام ما تتنسى !!
اخذ اوراقها ودفترها !! وشافت الالبوم الي فيه صورها هي وصديقاتها موجود .. فتحت الصفحة الاولى وجلست تبكي !! كانت فعلا ذكريات حلوة .. وأيام محد ينساها .. الله يرحمك يا سهر !!
الجوهرة : دنو لا تسوين بنفسك كذا .. الله يرحمها !!
دانه: افففففف والله لحد الحين اتخيل انها مسافرة وراح تكلمني قريب تبلغني بموعد رجعتها !!
الجوهرة : دانوو ادعي لها بالرحمه .. لو جد تحبينها سوي لها عمل خيري ترتاح فيه .. سوي لها شيء يسعدها لا تبكين عليها ارجوك !!
دانه وهب تقلب في الصور ..
تاشر على صورة وتضحك
دانه : شوفي هالصورة .. هاي وحدة اسمها نادين .. كانت معانا بالثنوي .. تزوجت وابتعدت عنا من اسبوع اتصلت تقول فيها السرطان وقريب تمووت ... ( وتاشر على صورة ثانية ) شوفي هاي أماني .. تزوجت قبل لا ارجع قطر بشهرين وسافرت لفرنسا مع زوجها .. ظلت معاه 4 شهور وانفصلت !! تتوقيع مكتوب لنا الشقى !!
شافتها بنظرة خلتها تصيح اكثر!!
الجوهرة: بالله عليك هذا كلام يقولونه ناس عاقلين !! الحين في وحدة مؤمنه بربها تقول هالكلام !!
دانه وهي تبكي : موجو انا تعبت والله تعبت !!
أما الجوهرة ما استحملت تشوفها بهالحاله وراحت للصاله ..شافته جالس وشكله تعبان خافت في البدايه لكن عدلت شيلتها وكحت بصوت عالي عشان ينتبه ..! وفعلا انتبه ورفع راسه ..!
كان شكله فعلا يتغير .. كان مطول لحيته ومسوي ديرتي فيس !! وشكله تعبان مرةة !
نواف وهو يقوم : اسف ما توقعتكم موجودين .. ما شفت السايق عند الباب
الجوهرة: اي السايق راح المسجد يصلي ََ!! اخبارك نواف
نواف يبتسم باستهزاء : اخبااري ؟. وتهمك اخباري يا الجوهرة !! انا بخير !! تعبان .. متضايق بس بخير !
الجوهرة: وممكن اعرف ليش متضايق
نواف: عشان تشفقين علي .. لا مب ممكن !!
الجوهرة: نواف انا !!
نواف يقاطعها : جوجو انا ما حب اشوفك بمنظر الضعيف .. ولا احب نظرة الاشفاق .. انا تعبان وتعرفين شلي متعبني .. بتقلوين الله يرحمها .. راح اقول ما اقدر انساها لانها اختي !! احب اسشوفك قويه .. ولسانك طويل مثل ما عرفتك طول عمري .. هاي الشيء الي جذبني ليك !! فاهمه !!
التفت عشان يطلع .. لكن الجوهرة تكلمت بهالحظة بعد ما كان الصمت سيد الموقف !!
الجوهرة : وتضن اني احب اشوفك بصورة الضعيف .. أنا قويه لما تكون قوي !! وانا ضعيفة لما تكون ضعيف !! تراني معااك . وراح اضل معاكك مهما صار .. واضن ان الكلام الي قلته هو اجابتي على السؤال الي طرحته بمصر .. !
ابتسم وطلع من البيت وهو يضحك لاول مرة من اسبوعين !! اعترفت له لكن بطريقة غير مباشرة وهاي شيء حلو !! المهم انها اعترفت له !
الجزء الثـــــــلاثوون !!
ليه الوفا?
في دنيا مافيها وفا..؟
في دنيا ما فيها صفا
غير الخيانه والجفا..!!
وين العطا وين الحنان؟
وين المحبه والامان..؟
وينك يا ذاك المكان؟
ياللاسف انه أختفى..!
وين العيون ؟
راحت مع ذيك العيون..!
حتى الظنون..
خابت مع ذاك الجفا.
ليه الخيانه في النفوس...؟
ليه القوي دايم يدوس ..؟
وليه الفقر وجهه عبوووووووس!!
وما أعظمه اللي خفا
قام من النوم على صوت التلفون الي ما رضى يسكت .. لف جهه دانه وشافها حاظنه الاوراق ونايمه .. فعلا خلاص امتحاناتهم قربت .. مسك الجوال وطلع برا عشان ما يزعجها .. انتبه ان الرقم غريب وخارجي .. ركز في فتح الخط وعرف انه من بريطانيا ..
جاسم :hello
- MR. Jassim
جاسم : yes , who is it
- I am sonia .. Nadine Friend .. Shahad babysitter
راح وخذ الاوراق وحطهم على جنب .. هالايام صايرة كله تدرس .. تحاول تعوض بدرجاتها اشوي .. بدل ملابسة وطلع بسرعه .. حس نفسه مخنوق ووده يختلي بنفسه بعد الكلام الي سمعه من سونيا !!
معقوله !! هو لحد الحين مش مستوعب الي صاير ..َ
يحس انه بحلم وممكن يقوم منه بأي لحظة ..! لكن خايف .. اي نعم خايف من الايام الي جايه !! الخبر الي سمعه راح يفتح له مشاكل كثيرة وابواب كثيرة ..و أول المشاكل راح تكون مع دانه ومع أهله اكيد !!
فتح الجوال وقرر يتصل على رقمها على اساس انه يتاكد لكن الجوال كان مسكر .. قرر انه يتصل بالسفارة اللبنانية ويتأكد من كل شيء .. وهذا الي صار !!
..............................................
كانت جالسه في غرفتها تفكر في الموضوع .. من يومين ابوها جا وخبرها بإن خالد خطبها .. كان ودها ترفض في البدايه .. لكن قررت انها تفكر .. لازم تفكر ! صحيح ان خالد اهانها لكنها تعترف بينها وبين نفسها انها كانت غلطانه ..!
جزء منها يقول لازم توافق وجزء منها يقول العكس لازم ترفض .. محد درى على الموضوع مثل ما خالد طلب من عمه ..!
جلست تفتح محادثاتهم القديمه وتقرى .. تذكرت كيف اعتقدت ان اخر الدنيا خلاص يوم اكتشفت إن خالد يصير ولد عمها ..
رن جوالها وانتبهت انها نوف .. وللمرة السابعه سكرت في وجها ..! صايرة خلاص ما تطيق تسمع سيرتها .. صحيح انها هي الي طلبت .. بس كرهت كل شيء يوم عرفت ان خالد كرها .. ولحد الحين في شيء في بالها ليش خالد خطبها !!
اشوي ولا تسمع صوت طق ع الباب ,,!
- تدرين انك انسانه بايخة !!
- بسم الله الرحمن الرحيم ريـــــــم !!
ريم: لا عنتر !! طبعا ريم ..
أمل: وليش انا انسانه بايخة
ريم: لان اليوم جمعه والكل متجمع في بيتكم ومحد عبرنا .. لا انتي ولا اختج !! اختج نايمه وانتي جالسه في غرفتج .. جدتج تقول ان صار لك اسبوع على هالحاله .. حتى الاسبوع الي فاات ما شفناك !!
أمل وهي تبتسم : سووري والله بس مالي بارض !!
ريم: انزين يله انزلي الكل يسال عنك ..
أمل: بس
ريم: اقوول يله بلا هبل وكلام فاضي والله ما لي مزاج .. انزلي اشوي ويحطوون الغدا
أمل : اووف منك طيب منو تحت .
ريم: احنا البنات والعيايز والرجاجيل بالمجلس .. الكل موجود الا انتي واختج وجاسم !
أمل: اووك باكشخ وانزل !!
ريم: الي يسمع يقول بنخطبج
أمل " بلاك ما تدرين يا الريم ": لا لا ياا ريت .. بس كذا مزاج
نزلت تحت وحاولت قدر الامكان انها تكون طبيعية .. حمدت ربها ان محد يدري عن الموضوع ..لكن لحد الحين السالفه شاغلتها ..
ريم: اقوول بنات انا ودي اطلع ..
دانه: وين نروح
ريم: ما ادري وش رايكم الاند ولا الستي لانهم قراب
دانه : خلاص خلاص الستي عشان السينما ..! بنات حد ودة يجي !!
الجوهرة:انا باروح بيت صديقتي .. معزومه عندها .. واسااسا الاحد وراي امتحان !!
امل: انا مالي بارض
العنود: انا ابي ادرس ..!
مريم: ميي توو !
ريم: سبحاان الله مريم تدرس !!
دانه: وهيا قولي ان عندك عذر بعد ..
هيا تضحك : اليوم عرس بنت رفيجت امي وراح تروح معاها !!
ريم: ما له داعي!!
هيا: البنت عازمتني بنفسها والله فشله !!
دانه: يعني بس انا وانتي !!
ريم: احلى .. ( وتلف عليهم عشان تقهرهم .. )
أم خليفة وهي جايه : بناات وحدة فيكم تودي القهوة !!
الجوهرة: خلي الخدم يودونها خالتي !!
ام خليفة : لاء . يله وحدة تروح عند المجلس وباقول لفهد يطلعها .. أمل انتي روحي
أمل: خاااااااااالتي عااد !!
ام خليفة : امول يله حياتي انتي اقرب وحدة ..
أمل : خالتي ما حبك
أم خليفة تضحك : عادي انا امووت فيك
ريم: عااشت جدتي تعرف تغازل !!
أم خليفة : ودي اعرف ليش تقولون لي جدتي .. انا خالتكم والله !!
ريم: وامنا بالرضاعه لو سمحتي
دانه: لان نور تناديك يمه .. اهمه صاروا ينادون جدتي
الجوهرة : وش هالعائله المخربطه !!
قامت بسرعه على اساس انها تودي القهوة للمجلس لبست شيلتها على السريع ما اهتمت فيها عدل لان فهد هو الي راح ياخذ القهوة وفهد نصهم توهم متحجبين عنه ..
دخلت لغرفة الطعام الكبيرة الي قريبه من المجلس على اساس ان فهد ياخذ القهوة من هناك ولا تشوف حد ما عطيها ظهرة ..
أمل" معقوله هذا فهود لا مستحيل .. فهود اقصر ..! هذا شكله رجال كبير ..! بس منو يا ترى !! جاسم .. بس ريم قالت ان جاسم ما جاا اليوم .. مستحيل يكون هو ..!
- أمـــــــــــل ..!
- هلا هلا خالد !
ابتسم يوم شافها .. لكن لما دقق في ملامحها كان التعب واضح عليها .. صحيح انها حاولت تخفيه بالمكياج لكن مع هاي كان مبين ..!
حطت الدلال على الطاوله لكن وقفت لما نادي عليها !!
أمل: مو من حقك تناديني ولا توقف معااي !!
خالد : وش دعوه حلال ع الي كان في الكوفي شوب وحرام علي .. وبعدين اعتبريها شوفه شرعيه عادي
أمل بعصبية : تدري انك ما تستحي
خالد : ليش طولتي بالرد
أمل: لان بعدي ما قررت !!
خالد: يعني ما تخافين لو علمت ابوك !!
أمل: لا لانك لو كنت بتعلم كان علمت .. اعرفك يا خالد زين واعرف انك ما تسويها
خالد: وانا كنت اتوقع اني اعرفك زين .. لكن اكتشفت العكس ..! انتي اخر وحدة كنت اتوقع اشوفها مع واحد !!
أمل: خالد انت عارف ان نوف هي السبب !! وانت عارف كل شيء من البداية !!
خالد: ليش وايد مهتمه اني اصحح معلوماتي !!
امل من دون لا تحس : طبعا !! ( انتبهت للكلام الي قالته . وطلعت على طول .. )
أما هو اخذ الدلال ودخل داخل لهم !! وابتسم لعمه !! لانه كان متفق مع عمه انه يشوفها اليوم عشان الشوفه الشرعيه !!
.................................................
- لو سمحت انت متاكد من الي تقوله !!
- اي اي استاز .. الموضوع صار رسمي خلاص !!
- طيب مشكور !!
- استاز جاسم .. وكيف بالنسبة للبنت !!
جاسم: البنت بتعيش في قطر !! مع السلامه !!
سكر الجوال بسرعه من دون لا يسمع رد الرجال .. وجلس يفكر بالمصيبة الي عنده .. خلاص هو حجز تذاكر للبنت ومربيتها .. لانه مستحيل يقدر يهتم في البنت .. وهي اساسا محتاجة احد تعرفة في عالم غريب عنها كليا !!
شاف الجوال وانتبه انه دانه .. ابتسم .. لما شاف اسمها .. " جنوني " !!
- الوو
جاسم: هلا والله .. هلا بالصوت !!
دانه تسوي نفسها تستحي : يا ويل حالي ترا استحي .!.
جاسم يضحك : اي هين !!
دانه: وينك في
جاسم: اتمشى ليش
دانه" طيب ترا باروح الستي
جاسم: وش رايك اجي معك
دانه: لا باروح مع ريم !!
جاسم: وريم بنت اخوي ما يصير اجي
دانه: لا بنروح نتمشى وبعدين سينما ..
جاسم : واناا
دانه: انت روح نام .. امس ما نمت .. طول الليل تتقلب
جاسم: حسيتي فيني
دانه: يب يب ..! انت فيك شيء
جاسم : بتعرفينه في وقته افضل !!
استغربت من كلامه لكن ما حبت تعلق ..! راحت على طول تقول لريم عشان تستعد ..! لان ودها ترجع البيت بدري عشان الاختبارات ..! خلاص ما بقى الا كم يوم وما تبي تتعطل !!
.................................................. ...........
طلعت لغرفتها على طول كانت تبغي تختلي مع نفسها ,, لازم تفكر لازم تقرر .. ما يصير تاجل الموضوع اكثر من كذا .. حست نفسها مشتاقه لامها . بهالاوقات تكون محتجة امها معاها .. تكون جنبها وتحس فيها !
محتاجة حد يحس فيها ويساعدها على اختيار القرار ..!
تحس نفسها مترددة .. تسوي الخطة الي فكرت فيها ولا لاء ..!
توفق على خالد ولا لاء ..!
خالد يحبها ولا لاء ..!
مليون سؤال وسؤال في بالها !!
شافت شاشه الجوال واكتشفت انه مسج من عند موزة .. محد يدري عن خالد الا موزة والعنود !! موزة اكبر منها وأكيد راح تساعدها !!
موزة: ما بغيتي تتصلين !!
امل: اشتقت لج وش اسوي !!
موزة: كذابه
أمل: افاا !
موزة: وش تبين اعترفي
أمل: مشكله الي تعرفني عدل !!
موزة : ....................
أمل: موزو باقول شيء خطير
موزة: وشو ّ!
أمل: خالد خطبني !!
موزة تصارخ : وشوووووووووووووووووووووووووووووووووووووووووووووووو وووو !!
امل: بسم الله ..! عبالك تكلمين صمخة !
موزة: ويت ويت خطبج اي تقدم لج .. طلب يدج يعني !!
أمل: لا رجلي .. يس يس !!
موزة : فللللله أموول !!
أمل: فلله !! يا موزة انا خايفة !!
موزة: قولي السالفه من البدايه بليز !!
عمت لحظة سكوت على الثنتين بعدها بدت أمل تسرد تفاصيل كل الي صار خلال الايام الي فاتت !!
.................................................. .......
- واوو .. سوق ..! دانو تخيلي اشتقت لريحة السوق !!
دانه تضحك على شكلها : الحمد لله والشكر اجل اشتقتي لريحة السوق هاا 1!
ريم: شوفي ترا له ريحة مميزة .. واووووووو
دانه: طيب تبين تروح نحجز بعدين نتمشا ولا !!
ريم: اوك بنحجز فيلم على الساعه 3 او 4 العصر حلو !
دانه: يس حلو .. احلى شيء ان هالوقت كل مكان فاضي !!
راحو للسينما وحجزو تذكرتين لفيلم ع الساعه 4 العصر ..!
ريم : وين نروح الحين !!
دانه: ابي اروح مانغوو وماك !!
ريم: خلاص ننزل نروح ماك باالاول وبعدين مانجو !!
دانه: طيب ابي اشتري كريم اساس .. وبودرة وجلوساات و ...
ريم: بسم الله .. ويت ويت !! كل هذا ( شهقت )
دانه لفت عليها : شفيج
ريم: شوفي شوفي
دانه تلف: وين وين
ريم: يالهبله لا تلفين وايد ..!
دانه: ريم شفيج .. من هااي !!
ريم : عزيز !! هذا عبدالعزيز !!
دانه: من عبدالعزيز !!
دانه مو مستوعبة : مين ؟!
ريم وهي تلتفت لورا بخوف : عبدالعزيز الخبل .. ولد خال أمل
دانه : طيب ولد خال امل وش دخله فيك !
ريم: انتي ما تدرين عن شيء .. قاهرني .. ذابحني .. وين ما اشوفه يسوي لي حركات ..!
دانه عشان تستوعب التفتت لورا: وينه ؟!
ريم وهي تاشر باصبعها للخلف : شوفيه .. ورانا .. معه واحد ..
رجعت دانه تلتفت تبي تستوعب .. أما حمد انتبه للبنتين واستغرب من حركتهم وش فيهم ذوول ..
حمد : عزووووووز شوف ..
عبدالعزيز وهو منشغل بالجوال : هاا شنو .. وش تبي !!
حمد : شف هالبنتين .. كل شوي يلتفتون لنا مدري شقصتهم ..!!
عبدالعزيز وهو يرفع راسه : وينهم ؟!
حمد رفع يده يأشر بنفس اللحظة اللي التفتت فيها ريم : كاهم .. كاهم .. تتوقع معجبات ( قالها بضحكه .. )
ريم تخرعت لما شافت حمد ياشر عليهم .. أكيد انتبه .. خلاص انتبه .. : يا ربي يا دانو يأشر علينا .. وش اسوي الحين ..
دانه معصبة : وانتي غبية .. لو جالسين مكانا مب افضل ..! تغشى عشان ما يعرفك ..! امشي يله بسرعه ننزل لتحت .. ان شاء الله ما ينتبهون
ريم : مو مشكله .. ما تفرق صدقيني .. اهم شي نبعد عن هذا ..!!
دانه ضحكت على شكلها .. وابتعدوا بسرعه وراحوا لستار بكس الي موجود في الطابق التحتي !!
حمد وهو يراقب البنتين : مدري شسالفتهم .. !!
أما عزيز ركز ع البنتين وهيئتهم .. وانتبه على شكل البنت الاولى لان الغشا طاح لدقيقة لكن رفعته على طول .. وبعدين ضحك بصوت عالي !!!
حمد وهو يطالعه باستغراب :. فضحتنا يا شيخ ..!
عبدالعزيز وهو لحد الحين يضحك : يحليلها ..! عرفتني
حمد : من !!
عبدالعزيز وهو لحد الحين يراقب البنت : شاك انها وحدة .. بس تدري نلحقهم افضل .. اتأكد ..
حمد :من .. انا لحد الحين مب فاهم شيء
عبدالعزيز :.. بعدين بعدين .. بافهمك كل شيء .. بس تعال معاي الحين
مشى عبدالعزيز والحقة حمد على طول ..!
عبدالعزيز : شووف .. ابي نلحقهم من دون لا يعرفون ان قاصين نسوي هالشيء .. ابيهم يعتقدون ان الصدفة راح تلعب دورها !!
حمد : خلهم يروحون بحال سبيلهم ..
عبدالعزيز : الحقني .. وراح تفهم ..
دانه وريم .. ما وقفوا .. بالعكس استمروا يمشون .. أما حمد وعزيز كانوا يمشون وراهم بس مسوين نفسهم ما ينتبهون وهمه يضحكون ويسولفون ولا كأنهم يدرون عن شي ..
دانه " وش هالسخافة اساسا هو ما يدري عنها .. "
دانه: ريمي تراه ما يدري عنك ..!
ريم: لا لا ما ابي اشوفه ..!
دانه: طيب خل ندخل ستاربكس !!
ريم: يا رب يذلف .. يا رب يذلف
دخلو لستار بكس الي كان فاضي من الزباين . اخذو لهم طاوله وجلسوا دانه كانت تشوف المينيو ما تعرف وش تاخذ خاطرها تجرب نوع كوفي جديد وريم تراقب الطريق الي قدام ستار بكس ..
دانه: شرايج تطلبين
دقيقتين بالكثير ودخلو عبدالعزيز وحمد للكوفي شوب .. وكان المحل فاضي .. ما في غير همه الاربعا ..!
اما عبدالعزيز كان يحاول يخبي ضحكته .. أما حمد ابتسم على شكله الي كان فعلا يضحك ..
سلمان : ليش تضحك .. وبعدين شالسالفه
عبدالعزيز وهو يضحك : شوف شوف شكلها !!
حمد : تعرفها !!
عبدالعزيز بهمس محد يسمعه : تاكدت .. البيت هذة هي ريم . خات طلول !
حمد: الحين ما تستحي ..! جالس تلاحق اخت رفيجك !!..
عبدالعزيز " فعلا انا الي اسويه غلط بحق طلال .. لازم اتصرف ": انا ما الاحقها .. او أوهمها او اكلمها ,,, انت تدري اني شفتها كذا مرة في بيتنا بالصدفة واحب العوزها .. البنت تجنن !!
حمد وهو يضحك : والله انت ينخاف منك .. وفي شيء بعد تجنن !
عبدالعزيز: والله ودي اخطبها بس ادري ما راح توافق ..!
حمد: وانت تبي تغير فكرتها اليوم !!
عبدالعزيز وهو يضحك : لو اقدر يا ريت .. تدري راح احاول .. ( وضحك )
حمد : وش بتسوي الحين ؟
عبدالعزيز وهو يحاول يمسك نفسه عن الضحك عشان ما يفضح نفسه .. : انتظر راح تشوف الحين ( ورجع يضحك لكن بصوت واطي )
ما قدر يمسك نفسه أكثر وضحك هالمرة بصوت عالي اشوي .. التفتوا عليه دانه وريم وهمه مستغربين ..! اما دانه تغشت على طول مع ريم .. خافت منه !!
ريم وهي واضح من صوتها انها متخرعه ولا متفاجأه .. : نرفزني.. دوين اتا خايفة !! اكرهه !!
دانه: يوم نروح البيت ابي افهم الموضوع كله ..!
ريم: ما في سالفه .. بس شفته كذا مرة وحصلت مواقف !!
دانه: بعد ابي افهم كل شيء ..! بس تصرفي عادي .. خليه ما يشك بشيء !!
ريم من اول ما شافته وهي متخرعه منه..
ريم : تدرين دنو خل نمشي
دانه وهي تهمس : نعم .. انتي مب ما تبينه يحس بشيء .. اجل اجلسي وانتي ساكته !
ريم باستسلام : افف .. اووك بس بسرعه لو سمحتي
مرت ثواني قليله .. واشوي ولا سمعوا عزيز يصفق بصوت عالي للجرسون .. التفتوا عليه دانه وريم وهم مستغربين !
عزيز يصفق : اكس كيوووووز مي ... بلييييييز
الجرسون : يس ؟!..
بدر وهو يرفع يده بأربع اصابع : اربعه لاتيه .. ثنين هنا ( وهو يأشر على طاولته ) .. واثنين عند البنات الي هناك ( وهو يأشر على طاولة دانه وريم ويغمر لهم
أما دانه وريم من سمعوه توهقوا معقوله يسوي كذا ..!
ريم وهي تهمس : ابيييييه .. هذا قليل أدب ..! بليز دانه تكلمي قولي شيء تراه ما يعرفك !!
دانه " افف منك يا ريم .. دخلتيني بمشاكل " وهي تبلع ريقها وتحاول ترفع صوتها : تسلم .. ما يحتاج !
انتبه لها عبدالعزيز : بس الشيخة انا طلبت يا ريت ما تردوني ..!
ريم تهمس لها بعصبية : اففففففف .. قاهرني بليز قولي له مانبي شي ..
دانه : مو مشكله بس انت ما تعرفنا عشان تطلب لنا !!
عزيز وهو قاصد يستفز ريم : ما في مشاكل .. بنتعرف قريب .. ( يغمر لهم بخبث مصطنع ) كلها فنجان قهوة ونتعرف على بعض ..
انقهرت .. كان ودها تقول وتعطية كف يتسنع !!
دانه تسوي نفسها ما انتبهت له : لا لا شكرا اخوي .. @
عزيز وهو يلتفت لريم : والاخت ليش ساكته .. اكيد تبين قهوة .. اعرف حركات البنات انا !
دانه : لا لا ماتبي ..
التفت عزيز على حمد الي كان يحاول يكتم ضحكه بس مب قادر
حمد يهمس وهي ميت ضحك : ههههههههههههه .. الله ياخذ بليسك ..
عزيز وهو يهمس له : انتظري .. (التفت لريم ) .. طيب مب المفروض تتكلم وتعبر عن نفسها .. قلت لكم تبي قهوة ..! ..
ريم وصلت حدها .. من زين قهوتك .. قلت لك ما ابيها .. ما ابيها !! اووووووووف !
دانهـ سكتت ومعد ردت عليه .. ونادت الجرسون : بليز ..
الجرسون اللي كان بالأصل يضحك ويتبسم عاللي صار قدامه : يس مدام ؟
دانه: بليز اثنين تشيز كيك .. واثنين عصير ..
قاطعهم عزيز وهو يرفع يده : لو سمحت على حسابي بعد !!
دانه " وش سالفته هذا .. يتكلم من جده !! أما على حسابه ..! يا ريت رضيت ان جاسم يجي .. كان ما صار كل هذا .. "
دانه تهمس لريم : وش رايك اتصل بجاسم ..!
ريم التفتت عليها متخرعه : وشو جاسم !!
دانه: باقوله ان الجلسه من دونه مب حلوة .. وابيه يروح معانا السينما ! هو قالي جي الصبح .. بليز ريم !!
ريم بهمس : لا لا بليز ...! اخاف نتورط !!
دانه: ليش !!
ريم: لانه يصير صديق جاسم وطلال ..
دانه بعصبية : اجل ما يستحي !! يدري ان حنا اهله ويسوي هالسوا !!
ريم: دانه ترانا متغشين !!
كان جالس يسمعهم من دون لا يحسون وابتسم من موقف ريم الي كانت تدافع عنه . وبنفس الوقت متخرع من جاسم ..! لو درى راح يسوي له سالفه !!
دانه : مشكور اخوي ما يحتاج !!
عبدالعزيز ببرود : وانا مصر انه يكون على حسابي .. مصر يعني مصر ..
وصل الطلب وتوزع عالطاولتين .. فنجانين من الاتيه عند دانه وريم مثل ما طلب عزيز.. زيادة مع العصير والتشيز كيك ..
حمد وهي يضحك : شسويت فيهم ياخي .. ؟!
عبدالعزيز : اخاف تقول لجاسم ..!
حمد: توك تفكر بالموضوع .. وبعدين وين الي بيحسن العلاقة عشان ترضى فيه !!
عبدالعزيز : ريم عبالها اني ما اعرفها !!
حمد: يعني شبتسوي !!
عبدالعزيز : انتظر .. انا باوريهم !!
وبهاللحظة يدخلون بنتين للكوفي شوب وشكلهم كان ملفت الشيله طايحة والمكياج اوفر !!
عبدالعزيز بصوت اشوي عالي : شوف شوف البنتين !!
حمد يرد عليه : حلوين صح !!
طبعا محد كان يسمعه الا دانه وريم لان طاولاتهم قريبة وايد
عبدالعزيز بصوت عالي : وووووووووع !!
التفت عليه حمد مستغرب بس بعدين فهم اللعبة وضحك ..!
حمد: افااا يجننون صدقني ولا ام شفايف ورديه !!
عبدالعزيز : الله يفشلك اسمه روج !!
حمد : وانت شعرفك !!
عبدالعزيز :امس كانت اختي تشوف برنامج مكياج وجلست معاها من الملل .. تصدق صرت خبير !! تعرف شيسمون المشط مال الرموش
حمد: شنو
عبدالعزيز : مساكرة .. او مسكارة !! شي جي !
ضحكت دانه بصوت واطي على كلامه صج الاولاد اغبية ..! أما ريم كانت منصدمه انه ما عرفها لانها كانت حاسه انه يسوي هالحركات لانه عرف ان هي من !! بس طلع يسويها لكل البنات !!
حمد: طيب صدقني البيت حلوة !!
عبدالعزيز وهو يتكلم بصوت حالم : لا ريمي احلى !!
التفت له حمد وبطل عيونه بطريقة مثل الكرتون .. واما دانه وريم لفو له وهم منصدمين ..!
ريم ما استحملت وطلعت من المحل على طوول !! ودانه رمت مبلغ على الطاولة للحساب وطلعت وراها !!
التفت عليه حمد على طول وضحك بصوت عالي خلا كل الي في المحل يلتفتون ويضحكون على شكله .. أما عزيز كان شكله في عالم ثاني !!
حمد : اقول ياالاخو .. انت صدقت اللعبة ولا !!
عزيز: تتوقع زعلت !!
حمد: ما ادري شوف اختك خل تكلمها وتسحب منها كلام !!
عزيز وكأنه يتذكر شيء : لا عندي طريقة افضل !! اقول ما ودك نروح السينما !!
حمد وهو يطالع الساعه
حمد : لا والله صعبة .. قايل للوالدة اني راح اوصلها بيت وحدة اليوم العصر !!
عبدالعزيز : أجل اذلف ..!
.................................................. .............
- خالد شاسوي الحين !!
خالد : متى راح توصل الطيارة !!
جاسم : اليوم الساعه 5 المغرب .. انا عرفت عن الموضوع الفجر وحجزت لهم طيارة على طول .. ما حبيت ينظرون يوم واحد هناك !!
خالد : طيب والاوراق الرسمية .. أكيد لازم تسوي شيء !!
جاسم: اي اول شيء اطلعلها جواز قطري لحد الحين هي جنسيتها بريطانيا !! ما راح ياخذ وقت طويل يمكن اسبوع بالكثير !!
خالد بعصبية : انت انسان اهبل والله !!
جاسم بعصبية : لو سمحت من دون سب وتجريح !
خالد : وشبتسوي مع الاهل .
جاسم: باتصرف بس اذا ممكن تروح تجيبهم من المطار ع الساعه 5 !!
خالد : خلاص على راحتك !! اخيرا راح نفتك من هالحياتين الي تعيشها !!
ابتسم على كلمته .. والتفت لانه انتبه على الجرسون وهو جاي وجايب معاه طلباتهم !!
.................................................. ...
ريم بعصبية : حقير !!
دانه: تتوقعين كان يدري ان انتي الي جالسه قدامه !!
ريم : ما ادري .. في البدايه قلت اكيد يدري .. والحين أقول ما يدري !! ما عرف يا دانه ما عرف !!
دانه: اوصلك بيتكم !!
ريم: لا لا ابي اجي معاك .. ما ودي اجلس لحالي انا خايفة دانوو !!
دانه بقله صبر : شلي يخوف .. خلاص الرجال وراح .. بس الي ودي افهمه هو عرف ان انتي الي جالسه قدامه ولا ؟؟
ريم: ما اعتقد انه عرف .. لانه كل ما يشوفني يسبني عمرة ما مدحني وقال شيء جي !!
دانه بابتسامه جانبية : يعني يحبج @!
ريم وتغير وجها فجأه : لا لا مستحيل .. أكيد وحدة ثانية اسمها ريم .. وبعدين أنا ما حبة !! اكرهه
دانه تضحك وهم يدخلون للبيت : عادي .. مصيرج تحبينه .. كل القصص ابتدت كذا
ريم: اي نفسك انتي وجاسم !!
ضحكت وما عطتها وجه .. وكملت طريقها لجناحها .. أما ريم كانت فعلا محتارة .! ولا عارفة وش تسوي.. رقت لفوق على غرفة الجوهرة على طول ..! شافتها تتصفح النت على منتدى او شات .. ما اهتمت تعرف هي على وشو جالسه بالضبط .. انسدحت على السرير وقررت انها تنام ..
دخل الغرفة وشافها جالسه تتابع التلفزيون .. كان شكله البرنامج ممل .. وكان مبن عليها انها متملله بعد .. كل اوراقها كانوا طايحين حولها !! وشكلها ما لها بارض تدرس ..ّ
ابتسم وجلس جنبها !!
- مسااااااااء الخير !!
- مسااااااء النور !!
التفت للساعه كانت تشير للخامسة ونص .. لازم يفتح معاها الموضوع الحين .. لازم يقولها الحقيقة الحين !! لازم يتصرف الحين !!
جاسم : دندون !!
دانه تبتسم : عيونها !!
جاسم" ليش يا دانه ليش .. جالسه تذبحيني بهالكلام .. "
جاسم : لو قلت لك شيء عن الماضي راح تزعلين ..!
استغربت من كلامه ..! ماضي ..! عن اي ماضي يتكلم
دانه باستغراب : على حسب لو كان له خص بالمستقبل يمكن ازعل .. بس لو كان مجرد ماضي وانتهى ما أضن ..
جاسم : طيب لو قلت لك انك مب اول بنت في حياتي !!
كانت صدمه بالنسبة لها .. لكن حاولت تتالك نفسها وإبتسمت له .. ولفت عليه !!
دانه : راح اقول ان ماضيك ما يهمني . المهم انك معي الحين !! واني فرحانه انك علمتني الموضوع بنفسك وما خليتني اكتشفة تحت تأثير الظروف .. هاي يدل على حبك لي !!
كانت كلامتها له مثل الطعنات الي في قلبه .. مع كل كلمه يزيد حبها في قلبه .. كان وده يضمها !! ويقولها سامحيني لكن ما قدر !! ما قدر !!
جاسم بابتسامه : احبج !!
أما هي سبلت بعيونها بدلع خلته يضحك على حركتها ..!
جاسم وهو يتخذ موقف الجد : دونيه في شيء لازم تعرفيه .!
رن جواله بهاللحظة انتبه ان المتصل كان خالد .. تنهد بقوة ورد !!
جاسم: هلا خلوود
خالد: احنا عند الباب
جاسم: بهالسرعه !
خالد: اي سرعه يا شيخ من ساعه وانا بالمطار .. انت الي شكلك ما قلت لها !!
جاسم: طيب .. ممكن توديهم لجناحك من الباب الخلفي عشان محد يشوفهم !
خالد: الاثنين
جاسم: لا لا بس شغالتها ما ابيها تختلط بالشغالات .. لو الشغالات دروا العائله كلها راح تدري !! وشهد جيبها تحت بالصاله الي في طابقنا ..!
كانت تسمعه يتكلم وهي متستغربه شالسالفه ..
دانه " شالموضوع .. من شهد .. واي شغاله .. ليش جاسم فاتح السالفه الحين !! ليش يقولي عن ماضيه الحين .. خالد وش دخله .. وهالموضوع له علاقه بالماضي "
دانه: شالسالفه !!
جاسم: دانه باكلمك بكل صراحة ولا تقاطعيني ترا مافي وقت !!
كلامه كان غريب جدا لكن فضلت انها ما تقاطعه .. استغربت منه .. اشفيه .. ليه متخرع بهالشكل ..!
جاسم: قبل خمس سنين كنت متزوج !!
نزلت هالكلمه مثل الصاعقه عليها .. جاسم متزووج !!
جاسم يكمل وهو يحاول يتفحص ملامحها : ظليت معاها سنتين بعد فترة قاالت لي انها حامل ..! عصبت وزعلت ما كنت مستعد اكون اب .. خصوصا منها .. زواجنا محد كان يدري عنه الا اصدقائنا !!
دانه بعصبية : وبعدين
جاسم: طلقتها على طول .. ورجعت الدوحة لاني وقتها كنت توني مخلص دراستي .. عرف خالد بالموضوع وسافر عشان يشوفها ..! واقنعني ان الولد ولدي وما عرف شنو !! وبعد ولادتها سوينا ال DNA
انا كنت واثق انه ولدي .. بس خالد صمم نسويه عشان نتاكد .. البنت ما كنت اشوفها دووم .. تكفلت بمصاريفها كنت اعطيهم راتب شهري وبس .. خالد كان كل شهر يسافر يشوفها ..! عشان تعرف ان عندها أهل .. بالنسبة لي صحيح ان كنت عايش في بريطانيا بس ما كنت اشوفها الا كل اسبوعين مرة .. هي مع المربية وكانت نادين ترفض تشوفني ..! اساسا انا بعد كنت رافض !!
بعد زواجنا بفترة جربت تتصل علي كثير لكن ما كنت ارد عليها .. كلمت خالد وقالت له عن مرضها !!
دانه بصدمه : سرطاان !!
استغرب انها تعرف مرض نادين معقوله صدفة ..!
لكن ما حب يعلق وكمل ..!
جاسم: اي كان فيها سرطان الله يكفينا شرة .. كلمتها كذا مرة ووصتني ع البنت .. دانه صحيح ان البنت ما عشت معاها كثير .. وما كنت اشوفها بالاشهور والله من يوم ما رجعت من لندن ما شفتها .. يعني صار لي حوالي 6 شهور مو شايف بنتي .. بس تظل بنتي ..! ما اخليها تتربى عند غريب !!
أول مرة تشوف جاسم بهالشكل .. لدرجة تشك انها واقفة قدام جاسم .. معقوله هذا جاسم الي يتكلم .. مسكت وجهه تبي تتأكد من ملامحه ..!
حست نفسها ضايعه .. حست ان حياتها كانت وهم !! حست ان كل شيء راح ..!
دانه : وليش ما قلت لي من قبل ( وبدت تصارخ ) خمس شهور وانا معاك الحين فكرت انك تقول ,, الحين فكرت انك تتكلم !!
جاسم: دوين انا !.؟
دانه تقاطعه بصراخ : انت ولا شيء .. فاهم ..!!!! 5 شهور عايش حياه ما ادري عنها .. وانت الي تعرف كل شيء عني !! طيب ليه ما صارحتني .. تفتكر بازعل !! طيب بازعل فترة وبارضى لانك صرحتني .. حسستني ان لي دور بحياتك !! جاسم توقعتك تحبني .. توقعتك تكون صفحة شفافه قدامي .. اقدر اقرى كل الي فيك !! تطلع متزوج وعندك بنت !!
جاسم : اسف بس ....
دانه تقاطعه :اسف ... بعد ما خدعتني وخدعت هلي .. طيب ليه ما قلت شيء وقت الخطبة !! يمكن انا ما عندي استعداد اربي عيال غيري .. مب من حقي اختار اذا ابي واحد متزوج ولا مطلق ولا اعزب !! ليش انت يوم تقدمت اخترت قلت ما ابي وحدة مطلقة ولا ارمله !! ( بدت تصيح ) واليوم جاي وجايب البنت ومتوقع اني راح ارحب فيها واخذها بالاحضان !!
جاسم بعصصبية : يعني وش اسوي اقطها بالشارع !!
دانه: انت ما جبتها الا لانك محتاج لحد يربيها !! ولا لو نادين ما ففيها شيء ما كنت جبتها !!
جاسم : دندون لا تعذبيني ( وطاحت دمعه مسحها بسرعه )
دانه تصارخ : اعذبك وانت ما فكرت بمشاعر ي!! افرض اني جيت وقلت لك انا متزوجه وعندي بنت واووو بتاخذني بالاحضان .. الا بتذبحني ّّ
جاسم: انتي غير
دانه: ليش مب انسانه !! هذا مو موضوعنا !! الموضوع انك كذبت علي !! كذبت على هلك . خدعت زوجتك !!
جاسم وهو يحاول يمسح دموعها : وش رايك اجيب البنت تشوفينها !!
دانه تصارخ وتقوم : انت ودك تذبحني !! ودك تجنني !! اشوفهااااااااااا ! لا ما ابي اشوفها .. ما ابي اشوفها ( جلست تصارخ وتحاول تضربه لكن ما قدرت لانه كان اضخم منها . )
تذكرت شيء وراحت للغرفه الثانية بسرعه أما هو لحقها فتحت الالبوم وبدت تدور بين الصور مثل المجنونه .. وطلعت صورة لها مع وحدة ثانية وهمه ضامين بعض !!
دانه : هذة هي ندين !!
.......................................
طلعو من الغرفة على صوت صراخ .. أول مرة يتهاوشون والصراخ واصل لي عندهم . شكلها السالفه كبيرة هالمرة !! شافوا خالد جالس بالصاله ومعلي ع التلفزيون عشان محد يقدر يسمع شيقولون وبنت صغيرة جالسه تلعب بالالعاب !!
الجوهرة: من هالبنت !!
خالد: وين أمي !!
الجوهرة: راحت الصالون .. لانها بتروح عرس 1!
ريم: خلوود من هالبنت !! وليش دانه وجاسم يتهاوشون !!
خالد: هذة شهد !! ( والتفت يكلم شهد الي كانت تشوفه بتعجب ) شهد بابا قومي سلمي على عميمه جوجو وريم
قامت البنت بسرعه وراحت للجوهرة وضمتها من رجولها لانها ما توصل لها .. ونفس الشيء لريم والاثنين مستغربين من هالبنت !!
الجوهرة تشهق : بنتـــــــــــــــــكـ
ريم: لا لا مستحيل بنت خالد .. لو بنت خالد ما كانو دانه وجاسم يتهاوشون !!
التفت على ريم وابتسم ابتسامه صفراا .
خالد باسف: بنت جاسم .. بس ما تعرف ابوها عدل .. ما شافته الا 6 ولا 7 مرات طول عمرها !! أمها توفت امس بالليل .. ومربيتها فوق في جناحي ما حبيت اخليها تختلط مع اهل البيت !!
ريم بخرعه : يعني جاسم متزوج .. من ومتى .. واشلون توفت
خالد : ريمي والله مو فاضي لج .. اي متزوج وحدة لبنانيه .. كانت مريضة توفت
ريم : حرام يعني صغيرة بالعمر مو ..
خالد : اتوقع عمرها 22 او 23 اي صغيرة بالعمر
راحت الجوهرة للبنت وضمتها ولعبت معاها شوي .. في هاللحظة جاسم طلع من الغرفة وهو معصب أما دانه كانت ترمي الاغراض برا وتصارخ عليه .. طلع من البيت بسرعه ولحقة خالد بعد ما تطمن على البنت انها مع ريم والجوهرة ََ!!
أما الجوهرة اخذت شهد ودخلتها لغرفتها .. ما تضمن دانه لو شافتها وش راح تسوي فيها وريم راحت لدانه على طوول ..!
.................................................. ..............
طلعت من الغرفة وراحت لمكتب ابوها .. الحين الساعه 8 مستحيل .. سئلت الشغاله عنه وقالت انه موجود في المكتب .. طقت الباب ودخلت قبل لا تسمع الرد !!
راشد : هلا امووله .. تعالي بابا
أمل بقلق : يبة بغيت اكلمك بموضوع ..
اشر لها جلس على الكرسي المقابل المكتب .. واغلق الملف الي كان يتصفحة والتفت لها !!
راشد : بخصوص خالد .. عرفي يبة اني مستحيل اجبرك .. مستحيل اسوي شيء ما تبينه .. والموضوع مب رسمي عشان تكونين مجبورة توافقين .. احنا سوينا السالفه سرية عشان يكون لك حرية الاختيار !!
أمل بتردد : يبـــــــــــــــه انا موافقة !!
08-08-10, 02:03 PM
وأخيرا صرت مجنونك....للكاتبه مشاعر حزن
رد: أخيراً صرت مجنونك ، للكاتبة : مشاعر حزن
جديد مواضيع قسم القصص المكتمله
العرض العادي
