هلا وغلا حبايبي...قبل ما انزل البارت عندي عتاب بسيط ...لحد اللحين احنا واصلين بالبارت الرابع عشر ..ومب

ملاقيه ردود على الروايه ..الا من اشخاص معينين وعلشان خاطرهم يالسه اكمل

تنزيل اللاجزاء ... فما ادري يا ان الروايه مب ملاقيه استحسان ..او ان

الي يالسين يقرونها ما عندهم وقت يردون ...فياليت احصل تعقيب على

الروايه علشان يكون عندي دافع اني اكملها ...


الجزء الياي بيكون يوم الثلاثاء ...ان شاء الله



الجزء الرابع عشر:

ريم : اشقايل ما عرفتيهم...واحد منهم يوسف والثاني الخقاق سعود

جمان: خيبه ما عرفته يوسف متغير عن اخر مره جوفته...بس تصدقين اول مره

اجوف سعود ولا جنه يران

ريم: خلي عنج هل الخقاق اذا احنا ساكنين معاه ما نجوفه ..بس احسن مريحنا من
ويه

جمان :ثريج ضالمه الريال ...كنت اتوقعه لا يرى بالعين المجرده

ريم :لا تبدين ترى بفرج بره السياره

جمان:عافانا الله متوحشه...تصدقين سمر معذوره يوم جافت سعود وتخبلت

ريم: جي وانتي لابسه نظاره شمسيه ...بعدين هو عادي مافيه شي مميز غير عيونه

الرماديه

جمان: بعد عيونه رماديه

ريم : بتسكرين سالفته ولا افرج



فديتها ميعاد ...طالعه تخبل بفستانها الذهبي بس هي وايد مرتبكه ..ما اجوف

شي يخوف جي بعدها تعرفه وتحبه ...عيل لو ما كانت تعرفه شو كانت بتسوي

فينا ...تصدقون رحمتها سارونه ورحمت يدها الي زاختنها ميعاد ..ضاغطه على

يدها من ساعه ومب راضيه تودرها جنها وصيفتها...فاتكم تجوفون ويها لمن

قالوا المعرس بيدش ...انا وريم انبطنا ضحك عليها وانا اقول لريم دورج ياي

الاسبوع الياي لا تضحكين ...ودخل سيف طالع رزه صراحة وهم مره لايقين على

بعض ...وحليله سيف كنت ضالمته بس طلع وايد طيب واهم شي انه يحب ميعاد

...اتذكر ذاك اليوم الي مرضت فيه ميعاد وكانت تشتكي من بطنها ولمن

ودينها المستشفى قالوا عندها الزايده اتصلت بناصر علشان يحصلنا

بالمستشفى ولمن يى كان سيف معاه شكلهم كانوا متواعدين واتذكر نظره الخوف

الي بعيونه ..لكن ميعاد كانت تحفه ذاك اليوم فضحتنا يلست تصيح عند غرفة

العمليات تراوالنا انها خايفه من العمليه بس طلعت الاخت تصيح لانه جسمها

بيتشوه ..على قولتها ريلي بيشرد لمن يجوف بطني ...اعتقد ذاك اليوم سيف

خلص كل باقات الورود الي بالمحلات لدرجة انه ما كان في مكان بالغرفه تحطين

فيه ريولج



اخيج منها ربيعة اسوم تيب الجلطه للواحد ...ما ادري اشقايل اسوم

مستحملتنها ما تنبلع خير شر ...تصدقون صايرلها نص ساعه تتمدح بدكتورها

من كثر ماتمدحه حسيته هيرو زمانه دست على ريول اسوم يعني صرفيها ربيعتيج

قبل ما انتحر...واسوم يلست تلمحلها انها مشغوله وتبي تدرس بس الاخت ولا

بالدنيا يالسه تكمل مدح بالدكتور ...حشى لوح ما تحس تصدقون شويه واروح

اقول للدكتور ارحمها وتعال واخطبها ...

اسوم :بالله عليج مريوم انتي متاكده هذا بني ادم ولا ملاك

مريم:تراج ما جفتيه ولا تعاملتي معاه...ما ادري متى يحس فيني

جوري:خيبه ...مضيعه الحيا هذه البنت(طبعا قلته بخاطري)

اسوم :مريم فجيني ما حيدني جفت دكتور بمواصفاته بقسمنا ...شكلج تجوفين فارس

احلامج بالاوادم

مريم:يا الخبله وحد قالج انه بقسمنا

اسوم:ليش هو باي قسم

مريم :بالبزنس يا ماما ...نسيتي اني اخذ ماده ايليكتف بقسم البزنس

اول ما قالت قسم البزنس بلعت ريجي ...وكنت يايه اسالها شو اسمه بس اسوم

سبقتني

اسوم:شو اسمه

وياليتها ما سالت لاني ما جفت جدامي من كثر الدموع الي تيمعوا بعيوني

...اسوم على طول مسكت يدي وقومتني وقالت لمريوم بنروح عندنا

محاضره...مستحيل الي سمعته زياد ..من ساعه وهي تتمدح بزياد وانا ولا

بالدنيا ...تتمدح بريلي وتتغزل فيه وانا اشاركها ..اه يا حرقه قلبي ابى

اصرخ بصوت عالي واقول حرام عليك يا زياد ليش تسوي فيني جي انا ما سويتلك

شي انا حتى ما اعرفك ليش تحطني بها المواقف ..ليش تحرمني اني اكون شرا غيري

من البنات افتخر واقول هذا ريلي ...مالج حق تمدحينه ..مالج حق تتغزلين

فيه...حتى ها الشي حرمتني منه ...اكرهك...اكرهك يا زياد ..بنفس اللحضه

اتصلت فيني اسوم شكلها بعدها تحاتيني ...فديتها لو لفيت الدنيا كلها ما

راح احصل شراتها...الله يسامح اختها الي دمرت عايلتها علشان واحد ...خلني

اخبركم سالفتها ..اختها كانت تحب واحد معاها بالدوام ...وعلى كلام اسوم

انه ريال ما ينعاب وكان يموت على اختها ولمن يى يخطبها ابوها قاله ان

البنت محيره لولد عمها ...طبعا اختها احتشرت عليهم وقالتلهم انها ما

بتاخذ ولد عمها ولو كان اخر ريال بالدنيا...واختها ضلت سنه تحاول تقنع

ابوها وامها انهم يوافقوا بس ابوها كان مصر على رايه لا وقالها ملجتك راح

تكون بالشهر الياي ...وفي اليوم الثاني اختهم تاخرت بالدوام ..اخوها

وابوها راحوا يدورون عليها بس ما لقوها ... بس حصلوا رساله في غرفتها

كانت كاتبه فيه انها تزوجت عن طريق المحكمه من الريال الي معاها

بالدوام...ابوها ياه جلطه على طول ومات ...وعمها حشر الدنيا على

راسهم وما بقى حد ما عرف بالسالفه ...امها ماتت بعد اسبوع من وفاة

ابوها وصارت سالفة اختها على كل لسان ...وما بقى حد ما عايرهم وعلى

الطالعه والنازله كانوا يعقون عليهم رمسه لدرجة انهم ما كانوا ينادونها

باسمها كانوا يزقروها اخت الشارده...في النهايه اخوها قرر انه يسافر

وياخذها معاه ...واللحين صايرلهم بالندن حوالي 12 سنه...واخوها متزوج

وحده اجنبيه ولاهي بحياته ما يسال عنها بس يي من فتره لثانيه يجوفها اذا

ناقصنها شي ..حرمته وايد قويه ومسيطره عليه ومعودتنه على الشرب والسهر

...وفي يوم واحد من اللي يسهروا مع اخوها حاول يعتدي عليها واخوها

كان سكران ولا بالدنيا ...علشان جي هي ساكنه بروحها ...نصحتها ترد

البلاد وتعيش مع عمها وتستحمل كلامهم ولا تستحمل الغربه بروحها



سعود من ساعه يالس يقنعني اروح معاه اجوف جم نزلت ..لاني ما رضيت طول ها

الشهر اجيك وزني مع انه سعود يقول وايد ضعفان بس انا كنت ابى لمن اوقف

على الميزان اجوف تغير جذري تغير يعطيني الثقه باني سويت شي جبير...تصدقون

طول ها الشهر ما جفت جمان او خلني اقول اني كنت مستقصد ما اجوفها ...

سعود :حمد ..تراك ذليتني

حمد:شو تعطيني جان سرت وياك

سعود:وايد ماخذ على عمرك مقلب...

حمد:صراحة رحمتك ...يله نمشي

سعود:اونك رحمتني ...امشي جدامي بس

اول ما وقفت على الميزان وجفت وزني ...صرخت بصوت عالي يس يس ...

سعود :الحمد لله والشكر ..استخفيت

حمد :سعود ...تعرف جم كيلو نزلت

سعود: وانا اشقايل اعرف وانت موقفني عند الباب

حمد :نزلت 15 كيلو..انجاز صراحة ..باقي بس 5 كيلو واوصل للوزن المناسب

سعود :بسك جسمك مناسب جي

حمد: لالالالا..لازم اوصل للوزن المناسب وابد المعركه

سعود :اي معركه

فاتكم ويه سعود وانا اقوله معركه صاير مسبه ...قلته هذا سر وطبعا سعود

ما سال ..هذا احلى شي في سعود انه ما يدخل في امور احد ...انتظري يا

جمان بس اسبوعين زياده وراح تبدا معركتنا



كنت يالس العب مع يمان مب راضي يرقد على قولته سلطان ما يرقد من وقت

..محد مخرب ولدي غير سلطان وابوه ..خلني بس اجوفك يا سالم لاطلع حرة السهر

فيك...جفت ساره ميوده تلفوني وتقول من ساعه يرن جيكت عليه وجفت مس

كولين من المستشفى استغربت انا ما عندي مناوبه اليوم ...اتصلت عليهم

وبسرعه بدلت وسرت المستشفى يايبيلهم حالة طوارئ وعندهم نقص بالدكاتره

...يى على بالي صورة ساره وهي راده من ملجة ميعاد كانت لابسه فستان احمر

قصير فديتها من بعد ما تغيرت ..وانا صاير مب بس احبها الا اموت عليها

...صح اني احيانا افكر بجوري بس كل ما ييت افكر فيها اذكر نفسي انها

حرمة زياد وان شاء الله راح اعاملها شرا اختي وبس...على طاريها ما ادري

ليش لحد اللحين ما قالت لزياد انها بلندن حتى لمن كلمت خالي فيصل طلب مني ما

ادخل ولا اقول لزياد ...على قولتله اكيد جوري عندها اسبابها...

رن تلفوني ويلست اكلم سارونتي لمن جفت سيارتين يتسابقوا جيكت على ساعتي

وجفتها ساعه 12 هذوله ما وراهم دوامات باجر...كانوا وايد مسرعين انا

متاكد انهم يسوقون فوق 140 وكانوا وراي بالضبط الا واشوف واحد منهم

شاحت سيارته وما قدر يسيطر عليها وعلشان يتجنب انه يصطدم بالسياره

الثانيه لف صوبي ...ومن بعده ما حسيت ولا جفت شي

طفرني يمان من متى احاول ارقده وهو ولا بالدنيا يبى يلعب الاخ ...لا وناصر

يبى بيبي ثاني مستحيل انا اصلا مب متهيئه نفسيا ومن غير انا لحد اللحين ما

نسيت الولاده وهياستها ...فديته ناصر تصدقون اشتقتله اتصلت فيه ويلست

اسولف معاه وفجاه سمعته يصرخ ويقول استغفر الله وبعدين سمعت صوت اصطدام

سيارة ...طاح التلفون من يدي ...وصرخت بصوت عالي ناصر ...الا ناصر ما

اقدر اعيش من غيره



يادوبني سكرت تلفوني واول ما حطيت راسي على الوساده ...الا واسمع صوت

ساره تصرخ وتقول ناصر ..نقزت من مكاني وركض لجناحهم دقيت باب جناحهم

وانا اسمع صوت صياح سارة ..يلست اصرخ عليها سارة شو مستوي بطلي الباب

بطلت الباب وهي لابسه عبايتها وعيونها حمر وتشاهق ..

ميعاد:بسم الله ...سارة شو ياج

سارة:انا متاكده سوى حادث ..والله ...والله سمعت صوت اصطدام

ميعاد:ساره اهدي فهميني ..شو صوت ..وشو اصطدام

سارة: اكيد نقلوه المستشفى اللحين ..

ميعاد :شو مستشفى..ومنو بالمستشفى سارة فهميني..وكيف تسوقين السيارة وانتي

جي حالتج

سارة : ناصر

ميعاد :شو ناصر ...استغفر الله يارب استر ..يا رب استر

سارة :لا تمشين انتظريني بروح اييب عبايتي

ركضت غرفتي ..وانا ما اجوف الدرب جدامي ابى اوصل المستشفى ..فديتك ناصر لا

تخلينا بروحنا ...طول الدرب وانا استغفر وادعي ان ناصر بخير ...بس سارة

وترتني من كثر ما تصيح بصوت عالي ...شوي واسوي حادث لولا انه الله ستر

...دخلنا الطوارئ وسالنا الرسبشن عن الحادث ...يا الله سارة يالسه تصارخ

تبى تدخل غرفة العمليات والممرضه تقولها اختي ممنوع تدخلين وسارة تصارخ

وتقولها ما علي منكم ..غرفة العمليات ولا غيرها ابى اجوف ناصر واطمن عليه

..حاولت اهديها بس شكلها سارة هب بوعيها ...ما عرفت شو اسوي بروحي

احاتي ناصر يا رب قومه بالسلامه مالنا غيره بالهدنيا... اتصلت بسيف ما

قدرت اقول جمله مفيده على بعضها بسبة صراخ سارة .. وبعد ربع ساعه وصل

سيف ...ضلينا ننتظر عند غرفة العمليات مرت ساعه وهم بعدهم ما طلعوا

سيف طلب مني اهدي ساره يقول ليستوابها شي من كثر الصياح ...واول ما طلع

الدكتور سارة سارت ركض عنده ويلست تساله عن ناصر اصلا هي ما عطته مجال

انه يتكلم..سيف طلب منها تسكت شوي علشان نفهم شو يقول الدكتور

...الحمد لله الدكتور طمنا عليه وقال ماله داعي وجودنا لانه تحت تاثير المخدر

وما راح يصحى الا باجر الصبح...طبعا سارة رفضت ترد البيت وباتت

عنده..سيف وصلني البيت وقالي انه بيمر علي باجر الصبح نروح نجوف ناصر.



توني طالعه من محاضرتي وجفت مس كول من عندي خالي ...اتصلت فيه اجوفه شو

يبى ...قالي انه يبى يجوفني بالكوفي شوب ...استغربت شو وراه خالي مب من

عوايده...يا دوبني سرت الشقه وبدلت حتى ما كليت شي خفت لاتاخر على خالي

..وصلت الكوفي وجفت خالي يالس ينتظرني تسولفنا انا هو عن دراستي بعدين

سالته...

جوري :خالي انت مواعد حد

الخال فيصل : شخص مهم بالنسبه لج

جوري: اشقايل مهم بالنسبه لي .لحضه خالي لتكون تقصد زياد

الخال فيصل: يلسي ...ما عندنا حريم يهيتوا بالبلاد من غير ريايلهم



That’s all for today…….any questions

جفتهم كلهم ساكتين ..اشك اذا فاهمين شي كل واحد سارح بدنياه ما علي منهم

الي علي اشرح وخلاص ..يلست الم اوراقي وبعد ماخلصت …..رفعت راسي والا

:تاخرت علي ...قلت انا اييك

:جوان ...شو تسوين هنا

جوان:خطيبي ويايه اطمن عليه ..فيها شي

الجزء الخامس عشر:

مستحيل اصدق الي يالس يقوله خالي ...انا ما ييت لندن علشان يستوي جي ولا

كنت مخططه لها الشي ...مستحيل انا الي انتظره ..كلمة انتظره بروحها

قويه...ليش يا خالي .. ليش مب راضي تفهم اني ما ابى افرض نفسي عليه ما

اباه يحس في يوم من الايام اني نا الي ركضت وراه ...المشكله صارلي ربع

ساعه افهمه بس هب راضي يفهمني يقولي عطيتج وقت كفايه ولحد اللحين ما

تصرفتي..والله يا خالي صعبه ..صعبه انزل من كرامتي واركض وراه ...وهو يقولي

ما بين الريال وحرمته كرامه هذا لو كان وضعنا شرا وضع الازواج العاديين

..لكن فمنو يالسه اقنع خالي راكب راسه ويقول بتقابلينه يعني بتقابلينه

ما ادري ليش عندي احساس انه خالي وراه شي من ها الي يالس يسويه...انا

لازم اتصرف ما اباه يجوفله راس علي ويقول يايه لندن علشان تجوفني...ليش

احس بالحر ليش احس اديني يرتجفوا ..انا لازم اكون قويه ..ما ابى اكون

ضعيفه جدامه ..لازم اهدي نفسي شوي ..وخالي شكله مصر ..على الاقل يا خالي

قول من قبل كنت بستعد نفسيا ...لحضه جوري شكله لا مفر من المواجهه

..فلازم اتكيف مع الوضع واتصرف بحكمه واقلب الموضوع لصالحي.رفعت راسي

وجفت خالي يبتسم ..والله حاله انا اضرب اخماس باسداس وخالي يبتسم والله قهر

الخال فيصل:خلاص هديتي..نقدر نتفاهم

جوري :خالي ...ليش يالس تبتسم

الخال فيصل:جوري فاتج تجوفين ويهج اشقايل يتغير من العصبيه للهدوء..عجيبه

انتي صراحة المفروض اصورج واطرش الصور لزياد

بققت عيوني على خالي ادري عنه رايق بس ما توقعت جي ...لا بالله كديتي خير يا

جوري



الحمد لله.. توني سكرت من عند سارة وطمنتني على ناصر وتقول هم قدرو

يوقفوا النزيف ..واذا على الكسور ان شاء الله بينجبروا ..اهم شي انه عايش

ونجوفه ..كل ما اتذكر الحرمه الي كانت تصيح وتقول تيتموا عيالي ..تيني

الصيحه ..شكلها حرمة الريال الي شاحت سيارته ..الله يرحمه ..شو استفاد

اللحينه خسر حياته ويتم عياله ..لا حول ولا قوة الا بالله .. يا الله

حسن الخاتمه بس ...سمعت تلفوني يرن عرفته على طول سيفاني..رديت عليه

وقالي انه يتريانا تحت ..نزلنا انا وجمان سايرين المستشفى وطول الدرب

وسيف زاخ يدي ...اول ما نزلنا من السياره جمانو عقت رمستها وسارت قالت

عيب راعوا في عوانس معاكم..خيبه ما تستحي دخلنا الغرفه ..وجفنا

دكتوره يالسه تجيك على ناصر ...جمان على طول سارت وحضنته ويلست تصيح

..حشى ها البنيه دموعها ما يخلصوا ...سرت اسلم على سارة ..بس ويها ما

يبشر بالخير شكلها ناويه تتضارب مع حد ..خخخ مستويه شرانيه مؤخرا

ميعاد:ساروه لاينطق لج عرج ...شو بلاج معصبه (قلته بيني وبينها )

سارة :زولي عني ...يا بطلع حرتها عليج

ميعاد:خيبه تخيب العدو ..غاديه شرات اليهالوا ..احسنلي اشرد عنها ..

سرت صوب ناصر وبست يبهته ...سلامتك يا الغالي ..ربي يحفضك ويقومك بالسلامه

الدكتورة :رجاءا لا تطولون عنده ..هو بعده تحت تاثير

المخدر....وطلعت

سارة قالت بصوت واطى ..فلعينا بالنعال بالمره ...وابونا استخفت سارة

..شو بينها وبين الدكتوره ..ما احيدني ساروه راعيه مشاكل ..شكله مستوي

من بينهم شي..سيف استاذن وسار صوب الدكتوره يجوف وضع ناصر ...كنت ابى

اسال ساروه شو مستوي بينها وبين الدكتورة بس بروح اطمن على ناصر وعقب

بسالها



الجامعه صايره ممله من غير ريم ..متى بيمروا الاسبوعين وترد من شهر العسل

...اخاف بس تغير رايها وتأجل السمستر ..اعرفها ريم ما منها امان...جفت

ساعتي شكله بياذن بعد شوي ...بروح اصلي وايلس ادعي لناصر ان الله يقومه

بالسلامه ...اسميني كنت شويه واستخف لمن قالتلي ميعاد انه ناصر مسوي

حادث...ميعاد يلست تقولي اني لازم كون اقوى عن جي ...وان الواحد ما

يدري شو مكتوب له بالدنيا ... فلازم الواحد يرضى بالقضاء والقدر ويشكر

ربه على كل شي وان الرسول عليه السلام قال (انما الصبر عند الصدمه

الاولى)...ان شاء لله بحاول اكون اقوى عن جي واحط ببالي انه كله شي

مكتوب ...يا الله عندي محاضره بعد ساعه ..حياتي صارت روتينيه من البيت

للجامعه ومن الجامعه للبيت ...هب متعوده على هاي الشي حتى وانا بالمدرسه

ما خليت جماعه ما اشتركت فيها بس علشان اتسلى وانمي مواهبي ... جفت اعلان

لجماعة التصور الضوئي وتذكرت ايام ما كنا نخيم بالبر ...كنت دايما اتضارب

مع حمد لانه ما يرضى يعطيني الكاميرا ... وكنت انتظره يرقد واروح واخذ

كامرته ..وايلس اصور شروق الشمس ...شكلي باخذ بشور جوري قالتلي

حاولي تعيشي حياتج بالجامعه لا تحكرين عمرج بالدراسه..درسي ونمي مواهبج

بنفس الوقت ...شكلي بسجل بجماعه التصوير الضوئي



هايس من الصبح ...لازم نشد حيلنا الشهر الياي هو الشهر المنتظر راح

يعلنون عن اكثر الجماعات نشاطا والجماعه الي تفوز راح يرسلونهم كورس

بالخارج وبما اني رئيس جماعه التصوير احس كل المسؤليه فوق راسي صج الي

معاي هب مقصرين بس انا ها الشهر عندي شهر تنفيذ المستحيلات ...المستحيل

الاول حققته ونزلت وزني ..والمستحيل الثاني راح وصله ان شاء الله وبنفوز

بالمرتبه الاولى ... اما المستحيل الثالث والاهم جمان بس هب اللحينه

..خلني بس اخلص سالفة المسابقه وبنفضالج يا جمان ...بالرغم من كثر الشغل

الي بالجماعه بس عمري ما تعبت ولا مليت لاني اعشق التصوير من وانا صغير

كل ما كنا نخيم بالبر لازم اخذ الكاميرا معاي وايلس اصور الطبيع ...يلست

اضحك ..تذكرت جمانو كانت ملعوزتني من وهي صغيره كنت متعود اني احط

الكاميرا حذاي لمن ارقد بس لمن انش ما احصل كامرتي ..ومن غير حتى ما افكر

اعرف ها حركات جمان ...صدقيني انتي لي يا جمان وما راح تكونين لغيري .. بس

بعد ما اعطيج درس قوي عن الحياه



بذبحها ...صدقوني بذبحها ...في ناس جي بالدنيا ..فاصخه الحيا على الاخر ...

اقصد الدكتورة اول ما قرت الملف الي على السرير صرخت وقالت ناصر ..والله

اني تروعت صج انهم طمنوني اليوم الصبح وقالوا انهم قدروا يوقفوا النزيف

بس هي خوفتني بصرختها ...وراحت لعنده وقالت وانا اقول اني جايف ها

الويه بمكان ..ويلست تفحصه والله شوي وتحضنه ...وانا فاجه حلجي واطالع

عليها ...شو فيها هاي ..لفت صوبي وقالت اسفه ما انتبهت لج..حلفي انتي بس

شو لوح جدامج ..قالتلي انتي اخته ولمن قلتها انا حرمته ..ويها تغير

..لالالالالا.. السالفه فيها ان سالتها انتي تعرفيه ..قالتلي انهم كانوا

من نفس الدفعه... اللحين قطعت الشك باليقين تصرفاتها هب طبيعيه بس هي

تشبه حد ولا انا جايفتنها بمكان...لحضه هي تشبه شيخه الي معاي بنفس المكتب

ما كذبوا لمن قالوا انه الطيور على اشكالها تقع... طلعت اختها ...




توني راد من عند ناصر ...الا ويتصلوا من الروضه يبوني ضروري ...ما ادري

شو مسوي سلطان ها المره صاير عدواني ...وتصرفاته غريبه ..اللحين ها رابع

شكوى ييني بسبته ما اعرف اشقايل اتصرف معاه ...المشكله بعد اسبوعين من

وفاة امه وهو متغير ..اول كان يرمس معانا بس اللحينه صاير هادئ

بالبيت وما يسولف مع حد ....وملاحظ عليه تصرفات غريبه دايما يتغطى

بفراشه حتى وهو يالس معانا ... ومن غير صاير عنده عادة التبول اللاارادي

..ودايما يسال نفس السؤال متى ترد امي ..شكلي كل الكلام الي اقوله فوق

تصوره يبالي لمن افهمه انزل لمستواه الفكري ..جم مره قايله انه امك ماتت

يعني ما راح تشوفها مره ثانيه ...راحت عند الله ..وهو يرد ويسالني ..يعني

متى ترد ...دخلت غرفة الاخصائيه ويلست تشرحلي وضع سلطان واشقايل متغير

وصاير عدواني ..اصطدمت لمن يلست تقول انه يتكلم مع الالعاب ويقولهم انه

امه راح ترد وانه واعدنها ما راح يسوي فوضى وراح يسمع الكلام...وانه

دايما يتضارب مع الاطفال ويقولهم انه امه مسافره وراح ترد ...لا الوضع ما

ينسكت عليه انا لازم اتصرف...المشكله عندي سفره الاسبوع الياي




ما ادري خالي شو يبى ..من امس وهو يقولي لا تنسى موعدنا ...لا واللحينه

متصل يقول وينك تاخرت ...لا يكون خالي رفض طلبي ويبى يقولي اياها بطريقه

مبسطه علشان ما اخذ بخاطري ...وصلت الباركنجبس اول ما نزلت من السياره

جفت سياره لونها مميز...لونها طي وانا احب ها اللون ..ييت امشي بس

شدني شي بالسياره القلاده المعلقه لونها وتشكيلتها جد راقيه ...اول ما

اقتربت جفت شي صدمني .. صوره امي وابوي ..اقتربت من السياره ابى اتاكد

من الصوره ...سيارة منو هذه ..رحت ركض لداخل الكافيه كله حاط ببالي حد

من خواتي ولا ناصر يايين ويبون يسونها مفاجاه ..يا الله اني مشتاقلهم

حدي...جفت معضم الي بالكافيه لفوا صوبي بس ما اهتميت لاني كنت اركض ..بس

جفت خالي فيصل ومعاه وحده كانت واقفه بس هيئتها مب هيئه حد من

خواتي...سمعت خالي يقول

الخال فيصل :زياد ..واخيرا تشرفت

لفت صوبي راعيه الشيله التركوازيه ...يا ماشاء الله عليها عيون تذبح بس

شو هاي نظره التحدي الي بعيونها

الخال فيصل :زياد ...بتضل واقف

زياد :خالي سيارة منو عند المواقف

الخال فيصل :اي سيارة

زياد :السيارة الي فيها صورة امي وابوي

الخال فيصل:اشر عليها ...وقال :جوري

زياد: جو..جوري




هب كافي اني انتظره وبعد يتاخر ...قلت لخالي انا سايره والي يباني ييني

...طبعا خالي طنشني ..واول ما ييت اخذ نظارتي سمعت خالي يقول :زياد

..واخيرا تشرفت ..تصلبت بمكاني وبلعت ريجي ..اكيد خالي يقص علي يباني ايلس

وانتظر زياد بس انا اسمع انفاس حد واقف قريب مني بلعت ريجي مره ثانيه

...معقوله بها السرعه يت لحضة المواجهه ...اول ما قال خالي سيارة جوري

عرفت انه ساعه المواجه حانت وانه وقت الضعف انتهى ...وانه الكرة

اللحين بملعبي على الاقل انا اعرف انه ياي بس هو هب حاط بباله اني موجوده

هني..يعني انا الحلقه الاقوى هنا وراح ابدا اول خطوات رد الاعتبار ...بس

يا ليتني ما لفيت لاني الي جفته هب زياد الي جفته ابوي محمد ..نفس الشكل

نفس الطول نفس الملامح حتى نفس النظره ...ما قدرت استحمل كان لازم اهرب

قبل ما اهدم كل شئ...وعلى طول قلت

جوري:خالي ..انا بسري وراي امتحان باجر ومن غير ما انتظر رده...

طلعت.. بس طلعت وانا رافعه راسي طلعت بكل ثقه وبكل نظره تحدي طلعت

عكس الي بداخلي تماما ...اول ما ركبت سيارتي يلست اضحك بصوت عالي لمده خمس

دقايق اضحكعلى ويه زياد المصدوم ..وبعدين بديت اصيح ..غصب عني اصيح ..

اصيح لانه كوبي من ابوي محمد اصيح لاني اشتقت لابوي اباه يكون معاي

اللحينه ابى شخص استمد منه القوى علشات اواجه غصمي ...حسيت بغصه وانا

اقول كلمه غصمي ..اه غصمي الي المفروض يكون سندي بالدنيا المفروض يكون

سبب سعادتي سبب ضحكتي ..صاير سبب حزني ..سبب دموعي ..يلست اصرخ ليش

تشبه ابوي ليش ...ليش صعبت علي الوضع اكثر من ما هو صعب...



مستحيل ... شو مستحيل ..ها من سابع المستحيلات حتى ..جوري هنا بلندن ..ها

الشي حتى ما يى باحلامي ..فشقايل بالواقع ...ابى اوكسجين احس بالاختناق

والكتمه احس الدنيا ضيقه وما فيها غيري ... واحس السقف يالس يطبق علي

...ابى اتاكد الي يالس يصير حقيقه ...

الخال فيصل: زياد ...زياد تسمعني

زياد : ليش ما قلتلي يا خالي ..ليش

الخال فيصل :زياد اهدى ..قوم خل نرد البيت ونتفاهم..ويهك مخطوف

..ويالس ترتجف

زياد:ما بتحرك من مكاني لحد ما تفهمني..من متى هي هنا

الخال فيصل :على الاقل اشرب ماي ..وبفهمك كل شي ..بس ارجوك اهدى

شربت ماي يمكن اوقف الرعشه الي فيني ...يا الله اخر شي كنت اتوقعه

يصير..جوري هنا بلندن

الخال فيصل:صايرلها هنا اكثر من شهر

زياد:شو ..اكثر من شهر ..وانا اخر من يعلم

الخال فيصل :ليش انت مفتكرنها ..علشان تكون اخرمن يعلم

زياد:خالي ارجوك ...لا تزيدها علي

الخال فيصل :زياد اسمع ..لحد هنا مهمتي انتهت ..انت لي عليك تقرر وتحط

النقاط على الحروف ..بس صدقني ما بسمحلك تضلمها او حتى تضلم الجوهرة

...هي بنتي شرا ما الجوهرة بنتي

: افشتكم ...شو يالسين تسوا هنا

لفينا انا وخالي صوب الصوت ...

زياد:جوان

الخال فيصل :الجوهرة




ما صدقت اني وصلت ..وركض لشقتي ميوده نفسيبالغصب ما ابى حد يجوفني ولا ابى

اجوف حد لاني باقل من كلمه راح انهار ...يلست ادور على اي شي يهدي

الصداع الي فيني احس راسي بينفجر من كثر الصياح ..ما مداني ايلس الا

واسمع صوت الجرس منو الي ياي انا بروحي هب طايقه نفسي اشقايل اجابل

حد ...سرت اجوف من فتحة الباب منو الي ياي

وشهقت .......


موعدنا يوم الجمعه ...باذن الله

الجزء السادس عشر :

شو السالفه ..شكله اليوم هو اليوم العالمي للمصايب والصدمات...بروحي هب مستحمل نفسي وتظهر جوان...
الخال فيصل: الجوهرة شو تسوين هني
الجوهرة :بابا جم مره اقولك ازقرني جوان شو الجوهرة
الخال فيصل :انتي ما تعرفين شو معنى اسمج ولا ما قلتي ازقرني جوان ..هاي نهايه دلع امج
الجوهرة :فديت الطاري..لا تهرب من الجواب ...منو راعية الشيله التركوازيه ..ترى بخبر عليك امي
الخال فيصل : خفت تصدقين ...خل زياد يفهمج انا ساير وراي اشغال
طالعت على خالي اترجاه ياخذ جوان معاه ..شكله فهم علي ..
الجوهرة:زياد ليش ساكت ..وليش ويهك غادي اصفر
زياد:ما فيني شي لا تحاتي ..شويه ارهاق
الخال فيصل :قوم زياد اوصلك بدربي
زياد:ما يحتاي خالي ..بروح بسيارتي
قرب مني خالي وقال بصوت واطئ...زياد قوم لتشك الجوهرة ..سير ارتاح ورتب افكارك ...ولكل حادث حديث
سلمنا على جوان وطلعنا انا وخالي ..ييت اركب سيارتي بس تذكرت اني ما اعرف جوري وين ساكنه ولا عندي رقم موبايلها..خذيت رقمها من عند خالي ....الله يستر حانت لحظة المواجهه ...


جفت من فتحة الباب ..وشهقت سامي ..اكيد شارب ومضيع الشقة ..بالله عليكم ها اخو ..الله يعينج بس يا اسوم ...اتصلت عليها وقلتلها لحقي اخوج مضيع يدق جرس شقتي ..تعالي خذيه بيفضحني بالبنايه ولا تتاخري انتظرج...سمعت جرس الباب هذه اكيد اسوم ..يلست ربع ساعه وهي تستسمح مني ..
جوري:اسوم ..فديتج ما استوى شي ..وانتي مالج ذنب
اسوم وهي تصيح:ها اخو بالله عليكم ..وجوده مثل عدمه ..بالعكس بعد عدمه ارحم
لويت عليها :اسوم غناتي ...شو رايج لمن نخلص الماستر نرد انا وانتي للبلاد ..وش لج بالغربه حبيبتي
اسوم :ومنو لي بالبلاد ...على الاقل هنا اخوي
جوري :الله والاخو ...ها خليه يكون بالدنيا اول بعدين يكون اخو
اسوم :يصير خير لمن نخلص ..جدامنا سنه منو يدري شو بيستوي
جوري :اسوم انا جفت زياد اليوم
اسوم قامت تناقز وترقص ..الحمد لله والشكر ..استخفت اسوم ..قامت تحرك حواجبها وتقول :شو سويتوا
جوري:جليله الادب ...ما سوينا شي
اسوم:عيني بعينج...انزين شو قالج
جوري :ما قالي شي ...بس جفته وعلى طول استاذنت ...يلست اصيح واقولها انه يشبه ابوي محمد
اسوم:جوري غناتي ..اهدي ليش تصيحين ما استوى شي لحد اللحين ...بعدين يمكن خيره انه يشبه ابوج علشان تسامحيه وتتقبليه بسهوله
جوري:اسامحه ..اسامحه على شو ولا على شو
اسوم:جوري انتي بعدج ما سمعتيه ولا عرفتي اسبابه
جوري :ما ابى اجوفه ..اخاف اضعف ..اخاف ...
اسوم :وليش ما تقوليها ..تخافي تحبينه..جوري ما فيها شي اذا حبيتيه تراه ريلج ..وبعدين على كلام مريوم ..صراحة ما حد يستاهله غيرج..بس سمعي مبرراته
جوري :يصير خير



جفت مكتوب على باب الغرفه ..جماعه التصوير الضوئي دقيت الباب ودخلت جفتهم كلهم هايسين ...تحمحمت يمكن يجوفوني ...لفت علي وحده وقلتلها ابى اسجل بالجماعه
البنيه :يبالج تروحين عند رئيس الجماعه وتسجلين...سوري حبيبتي ...ما انتبهنالج تعرفين الاسبوع الياي اسبوع التصوير الضوئي
جمان:ما عليه حبيبتي الله يعينكم ..بس منو رئيس الجماعه
البنيه :انا ما جفته اليوم ...بس تجوفين ذيج الي لابسه شيله حمره هاي النائبه هي تقدر تسجل اسمج
سرت عندها ...طول ما هي تتكلم وانا اجوف عليها ما شاء الله عليها جميله بمعنى كلمة جميله ...سجلت اسمي بس قالتلي انه ما بيكون عندي شغل مستقل اللحين راح اكون مع وحده بسكشنها واساعدها لحد ما ينتهي اسبوع التصوير ..شو لحد ما ينتهي اسبوع التصوير الضوئي ...عاد انا منو ييود لساني ...يلست اقولها اشقايل ما يكون عندي سكشن بروحي
شكلها خذتني على قد عقلي وقالتلي بكلم رئيس الجماعه وبرد عليج .وانه عندهم اجتماع ساعه 4...ويش علينا بنكلم رئيس الجماعه



اكره يوم الاحد ....عندي 3 محاضرات متواصله ...هانت ذهب الكثير وا بقى الا القليل ...وافتك من الدراسه وسنين الدراسه ...بروح اجوف الجماعه قبل ما تبدا المحاضره ....
كل شي تمام ..باقي بس سالفة الامسيه يبالها يلسه معتبره ..سرت عند اميره اسالها عن ترتيب القاعه ..جروب البنات قرروا هم بروحهم ينظموا القاعه ...قالتلي عن وحده كانت يايه تبى تنظم للجماعه ..بس تقول انها تبى يكون عندها سكشن بروحها تعرض فيه اعمالها...شو صاحيه ها البنت ..قلتلها اني بروحي بكلمها ناقص انا ...ما عليه عندنا اجتماع بنهاية اليوم وبجوف شو وراها ...



توني يايه من المكتب سرت قدمت اجازه ..طبعا بعد طلوع الروح وافق المدير ...لا وقال بس اسبوع ..شو ها الانسان ما يفتهم اقوله ريلي مسوي حادث ابى اكون معاه ..يقولي انتي تعرف انه احنا بنهاية السنه وعندنا مراجعه وما ادري شو ...شو ارد عليه بس ..قلتله بخاطري سير ولي لاه..ناقصتك انت ..ما كافتني الدكتورة العله الي بالمستشفى تيي انت وتزيد علي ..سمعت حد يزقرني لفيت راسي وجفت شيخه ..يا حبيبي اكتملت..
شيخه:هلا والله سارة ...سلامات ..سمعت ريلج مسوي حادث
ساره :الله يسلمج ...انتي ما يتخبى عليج شي
شيخه :افا وانا شيخه..ها تقليل من قيمتي...بس بعديها لج..ترى اختي قالتلي
ساره : واختج مالها سالفه غيري
شيخه : طبعا ..طالعه علي ما يتخبى عليها شي ..ساره معقوله ناصر ما قالج شو كان من بينهم ايام الجامعه
طبعا انا عطيتها ابتسامه ...وهي اغتاظت ومشت ...ما يقولون الحقران يقطع المصران..اما انت يا ناصر بس قوم بالسلامه وبتجوف شو بسوي فيك ...



لبست غترتي ونزلت تحت ...وكالمعتاد سلطان يالس بروحه ومتلحف بفراشه والوالده يالسه تطالع التلفزيون....سرت عنده وبسته ويلست اسولف معاه بس هو بعالم غير عني ..
سالم:سلطان تبى تروح بيت يمان ...تلعب معاه انا بروح المستشفى اجوف ابوه وايي اخذك
هز راسه ...الوحيد الي ما يتضارب ولا يصير عدواني معاه هو يمان ..
طول الدرب وهو ساكت ويطالع بره السياره ....دقيت الجرس وبطلته الشغاله قلتلها تودي سلطان عند يمان ...متعود اخذه العصر عندهم او يمان ييي عندنا ويلعبوا مع بعض ...خلني امشي لناصر اطمن عليه ..



تاخرت ام ساره المفروض واصله من نص ساعه ...خلني انتظرها بالصاله نزلت تحت وجفت يمان يلعب مع سلطان ...قصدي يمان يتامر على سلطان احسن شي اطفر بيمان لحد ما تيي ام سارة ..وبالمره اطبق الي درسته بعلم النفس على يمانوا احب اطفربه لانه يعصب وتبان غمازاته ...
ميعاد: سلطان حبيبي اشحالك
سلطان:بخير
ميعاد:فديت الي يستحي
يمان:وانا ليش ما تساليني
ميعاد (بدينا اول خطوات تطفير يمان):تراني ما جفتك..انت ليش جي قصير
يمان بوز ورد عليها:اصلا انا مب قصير ...جوفي انا اطول عن سلطان
ميعاد:لازم تكون اطول عنه تراه اصغر عنك...بس هو باقيله شويه ويوصل طولك
يمان:اصلا هو ما يقدر يوصل طولي ..انا اشرب كل يوم حليب ..لكن سلطان ما يشرب ..سلطان قول لعمو ميعاد انك اقصر ترى ما بلعب معاك
ميعاد :ظهر عرق النذاله عنده ما ادري على منو ظاهر ها الولد..عادي لا تلعب معاه انا وسلطان بنلعب مع بعض ..
يمان وهو يقاوم الصياح:بخبر عليج ابوي خليه يضربج ..انتي اصلا مب حلوه واحنا كلنا ما نحبج..سلطان قول لعمو ميعاد انها مب حلوه
ميعاد :طاعوا يبى يخرب الولد علي ...رحمته صراحة شويه ويصيح ..رحت وحضنته اهم شي جفت غمازاته
يمان:عمو ميعاد..بابا متى بيي البيت
ميعاد:جريب ان شاء الله اشتقتله
يمان: وايد اشتقتله ..وبعد اشتقت لماما ...حتى سلطان اشتاق لماماته هي سافرت علشان سلطان يتضارب ويسوي فوضى
ميعاد:ومنو قالك انه ماماته سافرت علشان هو يتضارب
يمان:هو كله يقول جي
لفيت صوب سلطان وجفته يصيح ...فديته اكيد مفتقد امه ...رحت صوبه ولويت عليه
يمان:سلطان ..تبى عمو ميعاد تكون امك اليديده
بطلت عيوني على الاخر الله واكبر عليك يا يمان ..ما ادري من وين لك ذي الافكار ..جفت سلطان يهز راسه ويقوله ايوا ...
ميعاد:فديتك خلاص ازقرني ماما ميعاد
خذيتهم للحديقه الي بالحوش يلستهم ويبت ورده ذبلانه وثانيه متفتحه ويلست اشرحلهم معنى الموت ومثلته بالورده الذبلانه ...احسن طريقه علشان اوصلهم مفهوم الموت امثله بالحيوانات اعرفهم يحبوا الحيوانات تفاعل سلطان معناته انه بدى يفهم ..الحمد لله
سمعت صوت الجرس ..وصلت ام ساره ...ويمان احتشر يبى ياخذ سلطان معاه يا الله بالستر عاد ما صوت عليه طالع على عمته جمان ..عافانا الله
وصلت سلطان لبيتهم وسرت صوب المستشفى... جفت سالم وساره وجمان وحتى سيف كلهم بالغرفه .صرخت لمن جفت ناصر مبطل عيونه ..صج باين عليه التعب ..بس اهم شي مبطل عيونه...
ميعاد:فديتك ناصر ... الحمد لله على السلامه يا الغالي
ناصر:الله يسلمج ...
سيف :لا تتفدين غيري ... قالها بصوت عالي ..اسميني احترق ويهي
ناصر:شوي شوي على اختنا ..غدت شرا الطماط
سمعنا حد يدق الباب ..ودخلت نفس الدكتورة ..وي اول ما جافت ناصر مبطل عيونه ...الابتسامه شقت ويها شق ...شوي شوي على عمرج امي
الدكتورة:الحمد لله على السلامه دكتور ناصر ...ان شاء الله اخر الطيحات
ناصر : الله يسلمج يا دكتوره ...
الدكتورة :شكلك ما عرفتني ..انا ناديه كنا مع بعض بنفس الدفعه
جفت ناصر ملامحه تغيرت ..شكله كان من بينهم شي ..
الدكتورة :رجاءا لا تخلونه يرمس وايد ...ولا تطولون عنده ..والحمد لله عللى سلامتك مره ثانيه
طاعوا هاي مضيعه السنع ...سيري توكلي امي ...الله يعينج يا ساره عليها ..شكلها قوية عين ...
جمان استاذنت قالت عندها اجتماع لجماعة التصوير ...كنا ناويين نطلع انا وسيف بس وقفنا سالم ...
سالم :احم ...ميعاد ..سيف قالي انج دارسه علم نفس الاطفال ...وصراحة من فتره احس تصرفات سلطان مب طبيعيه ..فاذا ما عليج امر بغيت اعرف اشقايل اتعامل معاه ...
ميعاد:توني موصلتنه البيت ...هو يباله ها الفتره تعامل خاص يبالك تتعامل بطريقه يخليه يعبر عن الي بداخله ...شو رايك تخليه يبات عندي الليله...
سالم: العيوز بتبهدلنا بس بقنعها ... بس مب وراج دوام باجر
ميعاد: هههه...اما عن الدوام لا تحاتي ..ما عندي شي باجر



يا الله تاخرت على المحاضره..الله يسامج يا جوري ها بدايتها من كثر ما افكر بسالفتج صحيت متاخر ...وصلت الجامعه وطالعت صوب كلية جوري بينا لقاء اليوم يا جوري ..سرت مكتبي



خيبه تخيب العدوا ...انا منو الي قالي اقترح على اسوم انا بنروح الجامعه مع بعض ...ابى ارد الشقه وراي ريبورت لازم اسلمه ...اخيرا تشرفت
جوري:حلفي انتي بس ...جان ما يتي
اسوم :هدي يا امي اهدي ...ليصيبج شي ..بيذبحنا زياد
بطلت عيوني عليها ...صايره سخيفه مؤخرا ..ركضت وراها وين تروحين مني اليوم ...سمعت تلفوني يرن بس جفته رقم غريب وطنشته ..قلت لاسوم بسج ركبي السياره ورانا سوق بعد...

يا الله اني ما احس بريولي من كثر ما فرينا بالسوق ...
اسوم:جوري بحط اغراضي بالشقه وبييج
جوري:سيري امي ..جدامج الرحمن
اسوم:ان شاء الله ماما
حطيت الاغراض بالغرفه ....سمعت الجرس ..فاضيه اسوم بعدها تدق الجرس ما فيني البس شيلتي ...بطلت الباب وعلى طول عطيت الباب ظهري من غير ما اجوف منو كله حاطه ببالي انها اسوم....
زياد: وايد طول شعرج عن اخر مره جفته
يتني رعشه ..شو رعشه ...مسك كهربائي بكبره ..تصلبت بمكاني ما عرفت شو اسوي
زياد: شو بضل واقف عندالباب
جوري :احم ..تفضل ادخل
ما مداني اسكر الباب الا واجوف اسوم طالعه من باب شقتها ..اشرت عليها بيدي يعني عندي حد ...بغيت البس شيلتي بس قويه اذا لبستها اللحينه
زياد:جوري ..ممكن تيلسين اباج برمسه
احس عمري ربورت ...ويلست بكرسي بعيد عن كرسيه ..رفعت راسي اجوف عليه ..جفته ميود صورة العايله
زياد:تصدقين وايد مشتاق لهم ...
جوري:وليش ما تروح وتزورهم
زياد:والجامعه ...بعدين احس بالغربه لمن اروح البلاد
جوري:اول مره اسمع حد يحس بالغربه ببلاده
زياد:انا ...لي اسبابي يا جوري ..وانا هنا علشان اوضحلج كل شي...
وسكت ...وبعد فتره
زياد:جوري ...شو تدرسين
جوري:هندسة اتصالات
زياد:تخصص حلو ...ومطلوب كثير
ومره ثانيه سكتنا ...
زياد: تصدقي ..صدمت لمن جفتك ..صورتك ببالي ..ذيج البنيه الصغيره الي دوبها تشتكي من ميعاد وناصر الي يؤذونها...
جوري:وطلعت فرد من العصابه
يلس يضحك بصوت عالي ..شكله استخف
زياد:ليش تجوفين علي جي ...اشلون عرفتي اني فرد من العصابه على قولتج
جوري:جفت دفترك على الطاوله
زياد:ما كان عندي الجرئيه اني اخبرج ..او ما كنت ابى اخيب ظنج فيني وبنفس الوقت ما كنت ابى ميعاد تاخذ بخاطرها ..تعرفيها كانت وايد تغار منج تقول انتي خذيت حنان امي كله
رفع راسه ويلس يطالع علي ....اول ما يت عيني بعينه ..جفت عليه بنظره قويه
زياد:كل ها بقلبج صوبي..لدرجه انه الكره باين بعيونج


اول ما قال جي ..طلعت من طوري ...جني قنبله وانفجرت..جنه قلبي الي تعود على تحمل المصايب ما عاد فيه مساحه انه يتحمل زياده...
شو تتوقع يعني ..احبك مثلا ..ولا مشتاقتلك ... وعلى شو احبك ..على ترك لي كل السنوات الي الطافت ....على اني كنت بهامش حياتك ...على كلام الناس الي يقولوا حتى ريلها ما يبيها وماخذنها علشان يرضى ابوه على عمري الي راح وانا انتظرك ..على شو بالضبط... تعرف لمن كنت ايلس وي ربيعاتي وكل وحده تقول ريلي سوا جي وريلي قال جي ..ولمن ييي دوري ويسالوني..اتمنى الارض تنشق وتبلعني ولا اني احس بالنقص والحرمان ...اصلا انت واحد اناني ....واحد ما يحب الا نفسه ...
زياد:جوري ..جوري اهدي
جوري:ما ابى اهدى ...اطلع من حياتي ..ليش ياي ..شو تبى فيني اطلع حرام عليك ..حرام عليك الي سويته فيني ...



من بعد اتصالي بجوري ..قررت اروح اجوفها ...بما انها هنا ..فهي تحت مسؤليتي ..مستحيل اخليها تسكن بروحها ...بعد المغرب ركبت سيارتي وسرت صوب شقتها ...جفتها نازله هي ووحده شكلهم كانوا بالسوق ..حشى شاريين السوق بكبره...دقيت جرس الباب ..بطلت الباب ..وجفتها معطتني ظهرها ..شكلها على بالها اني ربيعتها ...اصطدمت لمن جفت شعرها ..صج انه كان طويل من وهي صغيره بس اللحين طولان زياده واصل لاخر ظهرها وكثيف بشكل غير طبيعي ..شكلها ورثته من امها ...ما عرفت شو اقول ولا اصلا كيف اشرحلها سبب غيبتي كل ها السنين ...يلست ادور اي موضوع معاها اباها تتفاعل معاي ...بس ما كانت ترد علي الا بكلمات بسيطه ...بس اول ما يت عينها بعيني ..تصدقون خفت من نظرة عيونها ..عليها عيون حاده ووسيعه ....بس نظرة الكره الي فيها تخلي الواحد يحسب حساب للكلمه الي ينطقها...هي جمله قلتها الا اجوفها شرا القنبله اللي انفجرت ....كانت تصارخ وتصيح ومن غير انها كانت تضرب صدري بقوة حاولت اهديها ..بس هي شكلها مب بوعيها ...حضنتها بقوة ...وبعد فتره جفتها هدت ..وشكلها استوعبت هي وين لانها يلست تحاول تقوم وتبتعد عني ...
زياد:جوري ...ممكن نتفاهم ..جفت ماي محطوط على الطاوله عطيتها تشرب شويه
زياد:ما اتذكر بالضبط جم كان عمري ...يمكن 4 او 5سنوات اوحتى اقل ما اذكر ..كان عندي صديق وايد قريب مني ..كان يبات ببيتنا ..و كنا دايما نلعب مع بعض .. ...حتى كنا بنفس الكلاس بالروضه ...وانا كنت متعود ابوي يردني البيت ..وهو كان اخوه يمر عليه ...وفي يوم تاخر ابوي وما بقى حد بالروضه الا انا ووحده من المدرسات ... يلسنا انا وهي ننتظره ..حسيت بالعطش فقلت للمدرسه اني بسير اشرب ماي وبيي ..هي قالتلي تباني اي معاك ..طبعا انا عملت فيها ريال واني جبير واقدر اسير بروحي ...سمعت اصوات داخل الروضه ...وطبعا بفضول طفل سرت اجوف شو السالفه...جفت اربعة شباب مكتفين ربيعي ويالسين يضربونه وجفتهم ماسكين سجاجين يهددونه...انا تخبيت خفت منهم بس صديقي جافني لحد اللحين مب قادر انسى نظرته وهو يطلب مني اساعده .. بس ما قدرت خفت كنت ابى اسير وانادي المدرسه بس ..سبق السيف العدل مثل ما يقولوا ...كل واحد من الاربعه طعنه بسجينه ..بكل مكان بجسمه ...وقبل ما يطعنونه سمعتهم يقولوا ..خل اخوك يتادب ويعرف انه بنات الناس مب لعبه بيده...ومن الصدمه ما قدرت اتكلم ...تصدقين انا لحد اللحين احلم بنظرة ربيعي وهو يطلب مني اساعده ...انا اول مره اقول لحد ها السالفه حتى خالي ما يدري .. ..



ما ادري شوا استوى فيني كل الي اتذكره اني كنت اصرخ واصيح..وفجاه حصلت نفسي بحضنه ..احترق ويهي حاولت ابتعد بس هو شدني لحضنه اكثر بدى يقولي قصته ..يا الله في ناس جي محذوف الرحمه من قلوبهم ...تبون تنتقمون من اخوه هو شو ذنبه ...والله اني رحمت زياد تخيلوا ياهل صغير ويجوف ربيعه ينذبح جدامه ويا ليت بعد طعنه وحده اربع طعنات ...رفعت راسي وجفته حاط ايدينه فوق راسه ...رفعت ايدينه وشبكتهم من بين ايديني ..ما ادري من وين يتني الجرئه بس وضعه مب طبيعي شكله يالس يتخيل المشهد جدامه...


المشهد كان ينعاد جدامي ...ضغطت على ايدينها بقوة حسيت عمري بعدني ياهل ابى احتمي بحد ابى المشهد يروح من بالي ..ضغطت على ايدينها اكثر سمعتها تتاوه قومت ايديني من على ايديها ...
زياد: تذكرين اليوم الي يتكم فيه وانا اصرخ وارتجف ....هو اليوم الي جفتهم هم الاربعه ...كانوا طالعين من السوبر ماركت ..واحد منهم لمن جافني قال لربعه ..ها الي يالسين ندور عليه ...شكلهم جافوني ذاك اليوم وانا ما كنت اعرف ...كانوا يركضون وراي ..ويقولوا بنسوي فيك شرا ما سوينا بربيعك ...كنت اركض ما ادري اشقايل وصلت البيت ..بس الي اعرفه اني كنت يالس اصرخ ابى اهرب منهم وكل شي يالس ينعاد جدامي وفجاه اغمى علي ...لمن صحيت كنت احس عمري رديت ياهل ابى اهرب من الاربعه كنت لمن اسكر عيوني اجوفهم... نسيت اني كبير واني اقدر ابلغ عنهم واني اقدر اخذ حق ربيعي ..بس ما قدرت ولا عرفت شو السبب كنت بس ابى اهرب من كل شي اهرب من البلاد بكبره ...


سمعنا جرس الباب ...استغربت منو الياي ...انا طرشت مسج لاسوم قلتلها انه زياد عندي ..فنمو الي ياي
زياد:تنتظرين حد..
هزيت راسي بمعنى لا ...بس لمن سمعت صوت الي يصرخ قلت رحتي فيها يا جوري ...


موعدنا يوم الثلاثاء.... باذن الله












 
 
 

هلا وغلا...بكل الي يتابعون قصتي ...بما اني راده البلاد يوم الثلاثاء ان شاء الله ...وطول النهار بكون بالطيارة وبالليل اكون مع اهلي ..عاد تعرفون صارلي 6 اشهر مب جايفتنهم يعني ولهانه عليهم ...فقلت احسن انزل بارت يوم الثلاثاء اليوم ولا اني اتاخر عليكم ...فاقدم ولا ااخر

موعدنا القادم سيكون يوم الجمعه .... كما اعتدنا ...وباذن الله



الجزء السابع عشر:


جيكت على ساعتي ...الساعه اللحين 4 ..باقي نص ساعه وراح يبدا الاجتماع ...ما ادري اذا يمداني ازور ناصر وارد ..احسن شي اتصل على سالم واجوفه ...سالم قالي بيرخصونه باجر ..عيل ما يحتاي اسير له المستشفى ..بالمره باجر اروح بيتهم...خلني اشرب لي كوفي واتيت راسي شوي ...



توني واصله البيت ..دخلت الصاله بس تذكرت سلطان ...طبعا خالتي ام سالم سوتلي سالفه طويله عريضه واشقايل تاخذين الولد وما ادري شو ..شكله سالم قص علي وما خبر امه ...نبح صوتي من كثر ما اقنعها وفي النهايه قلتلها خذي كلمي ولدج سالم وتفاهمي معاه ..الله يعينها الي بتاخذ حمد ..يبالها يكون عندها صبر ايوب ..ولا بتشيب ...واخيرا اقتنعت ام سالم بس قالتلي رديه البيت على العشاء ..عيل انا ليش اتصلت على سالم ..قلتلها ان شاء الله ...يلست اسولف مع سلطان ...فديته وايد صاير هادي ..على ايام سعاد الله يرحمها ...كان وايد يحب يسولف ويسال ...ان شاء الله اقدر ارجع البسمه لويهك ..واكسب فيك اجر ...خذيته لغرفتي وقلتله تبى ايبلك شبريه ولا بترقد بشبريتي..قالي ابى ارقد معاج...عطيته ورقه وقلم وقلتله ارسم لحد ما ابدل وننزل نتعشى مع بعض ...بعد ما بدلت يلست امشط شعري وانا اطالع على انعكاس صورة سلطان بالمرايه ..جفته وايد منغمس بالرسم شكله يعبر عن الي بداخله بالرسم..سرت عنده اجوفه شو يرسم وهو يبتسم ...سالته شو رسمت ..وراني الصورة وقالي ..ها باباتي ميود يدي ..والي بعيده ماماتي ..يالسه تودعنا وتقولنا بييكم باجر...فديتك يا سلطان شكله وايد مشتاق لامه ..لويت عليه ..وقلتله انا شو قلتلك امس ماما خلاص راحت الينه ..اللحين انا ماماتك اليديده ...جفته ضحك ولوى علي بقوة ...يودت يده ونزلنا تحت نتعشى ..جفت يمان يناقز ويقول باباتي بيرخصونه باجر ...ضحكت على خباله ..قلتله تعال نتعشى واخبركم قصة ...



دقيت باب الغرفه ودخلت ...لا حول ولا قوة الا بالله ..ها الدكتورة ما عندها مرضى غير ناصر ...يا رب الهمني الصبر بس...متى بيي باجر ..ونسير بيتنا ..اخاف يستوابي شي منها...اول ما دخلت سكتوا هم الاثنينه ...ما علينا يا ناصر دواك عندي ...سمعتها تقول ..بينا اتصال ..شو بعد بينكم اتصال ..طالعت على ناصر بنظرة شك..
ناصر :سارونه ..شو ها النظره اليديده
سارة :شو ذا المنكر بعد ..بيننا اتصال
ناصر :هاي غاويه تييب مشاكل من بينا ..خلها تولي
سارة :ناصر منو هاي
ناصر:هاي الله يسلمج..كانت معاي بنفس الدفعه ...ويالسه تقول سالفتها انها مطلقه ..وانه ريلها كان يشرب خمر وكان يضربها
سارة :وهي يالسه تفضفض لك..على منو تقص انت
ناصر:سوير ...شو يعني يالس اجذب عليج...الشرهه مب عليج ..على الي يالس يرمسج



حاولت اقنع زياد اني انا الي بفتح الباب ...بس هو يقول ما تسمعين صوت ريال اشقايل انتي الي تبطلينه ...يا ويل حالي شكلي بروح فيها اليوم ..الله يخس ابليسك يا سامي ..جان انك باليني بدنياي ...



شو ها الصراخ ومنو الريال الي يالس يصارخ جي ..سرت ابطل الباب ..ما ادري شو فيها جوري ..تبى بروحها تبطل الباب ..ها الناقص بعد...صج قبل كانت بروحها بس اللحينه خلاص ...فتحت الباب وجفت نفس البنيه الي كانت مع جوري من ساعه يالسه تزخ ريال وشكله سكران ...سالتها منو الي دق الجرس ..بس رد علي الريال السكران ...وقال انت شو تسوي بشقة اختي ....اي شقة اختي ..الحمد لله على نعمة العقل
زياد:يعني انت الي دقيت الجرس
سامي :ايوا انا ...
طاعوا شين وقوي عين .... مسكته من جيب قميصه ورصيته على اليدار ...
زياد:انت واحد ما تستحي ..ما تتخيل على ويهك ...خلني اجوفك بس جريب من باب ها الشقه لادفنك هني سامع...لفيت صوب البنيه وقلتلها ..الله يعينج على ما بلاج...شفت جوري عند باب الشقه تتطالع علينا ...عطيتها نظره يعني دخلي داخل ليي واذبحج انتي بعد



احلى خبر سمعته اليوم ...ريم بترد بعد 3 ايام ...تقول انهم قدموا رحلتهم ..وانها اشتاقت لاهلها ..والله انها مب صاحيه ..عيل حد يمل من شهر العسل ...لا والمشكله من متى انصحها واقولها ليش تسكنين مع اهل عمران ..سكنوا بشقه بروحكم ويش لج بعوار الراس ...الله يعينها على ضرابة خالتها وحرمة عمها...وي شكلي تاخرت على الاجتماع ..هذه بدايتها ...دخلت قاعه الاجتماعات وما حصلت حد شكله خلص الاجتماع وانا توني يايه ...جفت اميرة ومعاها بنيه يالسات يتناقشوا عن ترتيب القاعه ..جافت علي اميرة بنص عين وقالت هاي بدايتها جمان ...استحيت منها صراحة ..بس طنشت وسالتها عن سالفتي ...وقبل ما تتكلم دخل علينا حد انا كنت معطيه الباب ظهري ...
اميرة:وهذا رئيس الجماعه وشرف ..كلميه بروحج
قلت بخاطري ..بكلمه ..يعني شو اخاف منه مثلا ...لفيت راسي علشان اكلمه ..يا ربي ها الريال وايد يشبه حمد ...بس على اضعف ...تصدقون حتى صوته جريب من صوت حمد
حمد: جمان
بسم الله شو في ها جنه الا جايف يني ....
جمان :نعم اخوي ..انا جمان
حمد:شو تسوين هني
لحضه ...لحضه ..مستحيل ..ها حمد....شو استوى فيه ..تقلص على الاخر ..يا وطالع وسيم ...صاير طبق الاصل من ريم ..
جمان:حمد ..شو استوى بك ..تقلصت
اميرة:شكلكم تعرفون بعض
حمد:وعز المعرفة بعد...
اميرة: عيل هي الي قلتلك عنها تبى يكون عندها سكشن بروحها
حمد: جمان ..اشقايل يكون عندك سكشن ...وانتي الا اليوم انضميت للجماعة
جمان:وشو فيها اذا بس اليوم انضميت للجماعه...انت احكم على اعمالي وبعدين قرر
حمد: جوفي ..احنا عندنا لمن تنضمي للجماعه ..يعطونج كورس ..ومن ضمن الكورس حصص عملي ..وبعدين يكون عندج كامرتج الخاصه ..ويكون في رحلات وتصوير ...وبعدين احنا اسبوع التصوير نجهزله من شهرين حتى الصور المشاركه اخترناها من ضمن مجموعه صور ...حتى مب كل اعضاء الجماعه لهم سكشن خاص ...وهم منظمين من سنوات ..فاشقايل انتي اليديده يكون عندج سكشن خاص
جمان:وانا ويش لي بالاعضاء الجدامه ...وبعدين اذا على الكورس باخذه بعدين ...اهم شي اني ابى اشارك باسبوع التصوير
حمد:جمان عن العناد...انا رئيس الجماعه وانا الي اقرر اذا يكون عندج سكشن خاص او لا ..وانا اقولج انج بتكوني مع اميره بسكشنها ..واذا على اعمالج التصويريه يبيهم باجر وبجوفهم
تجمعوا الدموع بعيوني ..الزم ما فيني حد يفرض رايه علي ..وبعدين المفروض يجوف اعمالي وبعدين يقرر ...بس هو ما عطاني مجال اتكلم سار وقال عنده امتحان باجر...

ما صدقت خلص الاجتماع ..مصدع حدي ...وصلت عند السيارة واكتشفت اني ناسي المفتاح بالقاعة ..بروحي مب رايم امشي ...لا حول ولا قوة الا بالله ...برجع شو اسوي ...دخلت القاعه من غير ادق الباب على بالي كلهم روحوا ..سمعت اميره تقول وهذا رئيس الجماعه ...لفت صوبي الي كانت يالسه تكلمها
شكلي من كثر ما افكر بجمان صاير اتخيلها جدامي ...بس والله كوبي بيست منها ..بعدين قلبي مستحيل يضيع جمان ...انا متاكد انها هي ...زقرتها علشان اتاكد ...يتي بريولج لعندي يا جمان ...سهلتي علي المهمة كثير ...كل التعب الي فيني راح اول ما تاكدت انها جمان ...لازم اسيطر على عواطفي علشان اقدر العبها صح ...يا حلوج يا جمان بالشيله الورديه ....توني اقول بسيطر على عواطفي....



شو ها على باله بخاف منه ...دام اني واثقه من نفسي ..فبقدر اواجهه...لمن جفت عيونه والشرر الي يطاير منهم ...كل الكلام الي قلته بخاطري تبخر ...بسم الله الرحمن الرحيم ها يخوف وهو معصب ...

زياد:جوري لمي قشارج ...
جوري :اشلون يعني لمي قشارج
زياد:اعتقد اني اتكلم عربي...لمي اغراضج ..بنروح شقتي
جوري:شو...شقتك...انا ما بظهر من شقتي
زياد:جوري ..مالج يلسه بهاي الشقه....بروحج شفتي الي صار
جوري:ما صار شي ..انا بقفل باب شقتي واهو ما يقدر يدخل
زياد:حلفي انتي بس...من غير عناد..لاني ما بتحرك من هاي الشقه من غيرج...فلا تكبرينها وهي صغيره
جوري:لتكون تبى تمارس دور الريال الي يخاف على حرمته
زياد:وانا ريلج ..غصبنا عليج..وبتظهرين معاي وراسج فوق رقبتج
جوري:ريلي على ورق...
زياد:ما طلبتي تبين اوريج اشلون اكون ريلج فعليلا...
بطلت عيوني على الاخر ..صج انه ما يستحي...بس ما بتحرك من شقتي ..ها الناقص اسكن معاه
زياد:حشى مب عيون وساع عليج..وبعدج تفتحينهم زياده..رحميهم...ويله نمشي
جوري:مب متحركه من شقتي
زياد:شكلج تبين استخدم معج القوه....سمعي لا يروح تفكيرج لبعيد ..بتكونين بروج بغرفه وانا بغرفه
لالالالالالا استخف ها..انا الي تفكيري يروح بعيد..شو ما يحس ها الانسان..ياي من بعد 8 سنوات ويباني اعيش معاه بنفس الشقه...
زياد: جوري اعرف بشو يالسه تفكرين ...وانا ما خلصت كلامي ....واعرف مهما قلت انتي مب يايه تقبلين اعذاري لاني بنفسي مب لاقي عذر لنفسي ...فخل نمشي شقتي وبنكمل كلامنا اهناك
جوري: وبما انك تعرف انك مهما يبت اعذار مب يايه اسامحك على الي سويته فيني فما له داعي نروح شقتك...واذا تبى تتكلم محد ميودنك تكلم ...ولا شقتي مب قد مقامك
زياد:جوري بروحي مصدع مب راقد طول الليل ...فلا تجبريني استخدم القوة معاج ...
جوري:شو يعني ها تهديد
زياد:تبين تجوفين شو هو التهديد...



ابى افهم خالي اشقايل مخلي جوري تسكن بشقه بروحها ...ويارها واحد سكار منو يأمنه ها ...لا والاخت تقول بسكر الباب وما يقدر يدخل...من ساعه احاول اقنعها نمشي لشقتي وهي معانده وراكبه راسها بروحي مصدع ..شكلها يبالها استخدم معاها القوة...اقتربت منها جفتها غطت ويها بيدها شو قالولها عني همجي ..استخدم الضرب يعني ...بوستها بقوة على خدها لدرجة انه علم ...اما هي بطلت عيونها على الاخر ..بتخبلبي هاي بعيونها ...قلتلها تبين استخدم القوة مرة ثانيه ولا تمشي بالطيب...اسميني لمن جفتها تركض الغرفه وتلبس شيلتها يتني الضحكه ...خوافه
طول الدرب وهي ساكته ...سالتها اذا تعشيتي بس ما ردت علي ..مريت صوب المطعم وشريت عشاء ...قبل ما تنزل من السيارة قالت ..هذه اخر مرة اسمحلك تلمسني ...ضحكت عليها ..انا لو ابى اسوي فيج شي ما انتظر انك تسمحين لي ...مشت وراي لحد ما وصلنا عند الشقه ...جفتها تبى تركب فوق ..يلست على الصوفا وقلتلها...
زياد:جوري ...انا مب كنت ناوي استخدم القوه علشان تيين معاي ...وبنفس الوقت مب كنت قاصد شي لمن ...سكت كنت ابى اتاكد انها تسمعني لفيت راسي جفتها واقفه بنص الدري..

زياد:انتي تعرفي اني لمن ييت لندن كنت المفروض ابدى المرحله الثانويه ...بس انا تاخرت سنه ..ضليت اعالج عند طبيب نفسي ...انا ما كنت اجوف فيه فايده ..بس خالي فيصل اصر اني اكمل جلسات العلاج على قولتله مع الوقت ..راح تتجاوز المحنه..بالرغم انه خالي ما يعرف شو كان فيني اصلا هو لحد اللحين ما يعر ف..اصلا ما حد يعرف غيرج ...بالسنه الي بعدها بديت دراسه ...وكنت حاط ببالي اني اشغل نفسي بالدراسة وامحي صورة ربيعي من بالي ...وبالفعل هست بالدراسه لدرجه اني ما كنت اجوف خالي وعايلته بالرغم اني كنت معاهم بنفس البيت..حتى الاجازات كنت ادرس فيهم منهج السنة الي بعدها ..اهم شي ما احصل وقت ايلس فيه بروحي ...وكان ها حالي لحد ما تخرجت ودخلت الجامعه ..بنفس السنه ابوي اقترح علي انه ييبج هنا لندن تكملين دراستج وهو الي يوفر كل شي لنا ..بس انا رفضت لسببين ..السبب الاول انا وراي دراسه والثاني ابى اعتمد على نفسي وما ابى حد يصرف علي ...وبعد الدراسه انشغلت بالماستر ادري انه كل ها مب عذر واني مستحيل ما حصلت وقت اتصل عليج...جم مره يودت التلفون وكنت على وشك اني اتصل عليج بس ما ادري شو يستوي واسكر التلفون ....لفيت صوبها جفتها يالسه على الدري ومنزله راسها ...
زياد:جوري ...انا اسف على كل الي صار


انا لحد اللحينه مصدومه من حركة زياد..توقعته يضربني ولا ييرني من يدي..بس ابدا ما يي ببالي انه يسويها ويبوسني ...لميت اغراضي وسرت معاه ..طول الدرب وانا افكر اشلون بتكون حياتي معاه...شقته كانت عباره عن طابقين الطابق الارضي كان عبارة عن مطبخ وصالة ..اما الغرف فكانت كلها فوق ...وقفت لمن سمعته يقول انه مب كان قاصد للحركة الي سواها ...كنت يايه اطنشه وسير فوق بس ...لمن يلس يقولي سالفته ...غصبا عني يلست اسمع ..كنت ابى اعرف السبب الي خلاه ما يسال عني كل المدة الي طافت ...صج اني رحمته بس ابدا ما عذرته...اول ما قال كلمة اسف ..ما ادري يتني رعشه قويه ..ما ادري يمكن لاني ما توقعته ينطقها ..ولا لاني كنت حاطه ببالي انه صعب على الريال يقولها بسهولة ...كنت ابى انفرد بنفسي وافكر بوضعي مع زياد...



وصلت البيت وانا مفوله على الاخر ..كنت بس انتظر حد يرمسني علشان اطلع الي فيني عليه ....جفت ميعاد ميلسه سلطان ويمان حوالينها ويالسه تقولهم قصة وهي تمسح على شعر سلطان..ها ليش مب ببيتهم الساعة اللحين 9 مب من عوايد سالم يخليه لحد ها الوقت عندنا ...ييت اسال ميعاد بس سمعت جرس الباب ...كنت بعدني مب مسكره باب الصاله ...سمعت البشكاره تزقر ميعاد وتقلها مستر حمد عند الباب ...قلتلها سيري توكلي ..انا الي بروح اكلمه...جفت الاخ يكلم بالتلفون وشكله يكلم وحده ...وتاكدت لمن قال اكلمج بعدين اميرة ...مسود الويه ما يستحي يكلمها بالتلفون حتى ولو كان الموضوع يخص الجماعه لاني سمعته يتكلم عن القاعه ..ما استوت هذه قاعه الي حتى بالليل يتناقشوا عنها ..وانا ليش محتره وحارقه اعصابي ..يولي يكلم الي يكلمها ...
جمان:نعم ...بغيت شي
حمد:حشى..يسلموا الاوادم اول ..بعدين اعتقد اني قلت للبشكاره تزقر ميعاد...ولا ليكون بدلتوا اساميكم
جمان:المفروض اضحك اللحين يعني ..
حمد:اقول سيري زقري ميعاد
جمان:ميعاد مشغوله ...شو تبى فيها
حمد:ابى ولد اخوي ...سيري يبيه
جمان:وحد قالك اني بشكارة بيتكم ...جفت ميعاد يايه ..قلت لحمد قبل ما اسير ...هذه ميعاد تفاهم معاها ..وبعدين عيب تكلم بنات الناس بالليل ..اول ما انتبهت للي قلته ...اسميني خبله اللحين شو يفهم اني مهتمه فيه واغار عليه ...خلي يولي لاه يفهم الي يفهمه



شكله اليوم يوم سعدي ...اجوف جمان مرتين ..صارلي اكثر من شهر مب جايفنها ولمن اجوفها ...اجوفها مرتين باليوم ...شكلها معصبه هههه شوي وتفلعني بنعالها ...بعدج ما جفتي شي يا جمان ...لحضه ..لحضه ...هي قالت عيب تكلم بنات الناس بالليل ولا يخيل الي ...بس ارتباكها معناته ما يتخيل الي ....معقوله جمان تغار علي ....اذا تغارين يا جمان ..عيل بعدج ما جفتي شي
بس غريبه ميعاد تقول انها متفقه مع سالم انه سلطان يرقد عندها ...مب من عوايده سالم ..هو اصلا ما يرقد من غير سلطان ...بتصل فيه واجوف شو السالفه



كنت بسابع نومه لمن سمعت تلفوني يرن ...جفت على الساعه..ونقزت من مكاني ..يا الله الساعه 10 ..يعني راحت محاظرتي ...سمعت صوت زياد وهو يقول جوري بسج رقاد ..بتنفجرين ...ضحكت عليه
نزلت تحت وجفت الريوق جاهز وهو يالس يترياني نفطر مع بعض ..كشرت وقلتله ..
جوري:شكلك ناش من وقت
زياد:لا والله توني الا ناش من الرقاد
جوري:راحت علي محاظرتي
زياد:حتى انا ...شكلنا ما بنفلح ...
جوري:تكلم عن عمرك ..انا طالبه مجتهده
زياد:صدقتج ...جوري خالي فيصل عازمنا على الغداء ..قلتله بجوف جوري اذا ما عندها محاظرات
جوري: ما عندي اليوم محاظرات بعد الظهر
زياد:عيل لحد وقت الغدا شو رايج نطلع ندور بلندن
جوري:فكره مش بطاله ...ترياني اتزهب ونمشي
زياد:نترياج شو ورانا ..بس لا تتاخرين

نشيت من الرقاد ..وجفت سلطان بعده راقد ..سمعت صوت جمان وهي تكلم حد بالتلفون وشكلها مفوله على الاخر ..ما ادري شو سالفتها من امس وهي مب طبيعيه ...يبالي ايلس معاها يلسه معتبره لاني من زمان ما رمست معاها ..صحيت سلطان من الرقاد ..اول ما فتح عيونه على طول قال ...نروح الملاهي اليوم ...ضحكت عليه مب رايم يفتح عيونه ويقول نروح الملاهي ....واعدتنه اوديهم الملاهي هو ويمان


شكلي غلطت يوم سجلت بجماعة التصوير ..اللحين اميرة باي لغه افهمها ...من الصبح اقولها بكون بنفس سكشنك بس انا بعد بعرض اعمالي التصويريه ..وهي تقولي بس احنا ما اتفقنا على جي مع حمد....قلتلها وانتكل كلمة والثانية حمد ..مدخلتنه في كل رمسه...اف منك يا حمد شكلك بتيب لي الجلطه ....خلصت محاظرتي وسرت صوب الجماعه ..جفت الاخ مرتز بالكرسي ويكلم اميره...يا ذي القاعه الي مب راضيه تترتب...
جمان:صباح الخير
ردت علي اميره ..وجنه حد جابرنها ترد علي شوي وتكفخني
حمد:صباح النور والسرور...جمان شو مشكلتج بالحياة
جمان:انت مشكلتي بالحياة...مب راضي تفهم اني ابى اشارك باسبوع التصوير
حمد: ومنو الي قال اني ما اباج تشاركين باسبوع التصوير
جمان:اميرة تقول ما يصير اعرض اعمالي بسكشنها
حمد:واشقايل تعرضين اعمالج بسكشنها..شو الاوادم يجوفون على اعمالها ولا على اعمالج...
جمان:انت ليش تبى تعقد السالفه ..وهي بسيطه...يا اخي ابى سكشن ..واذا على اعمالي ..هذوله اعمالي التصويريه جوفهم واحكم عليهم
حمد:اولا انا مب اخوج...وثانيا ييبي اعمالج نجوفهم ...هلكتينا من كثر ما تقولي اعمالي واعمالي ...
تصدقون كنت ابا اطلع لساني شرا اليهالوا بس يودت روحي على اخر لحضه ...وشكله فهم علي لانه قال
حمد:عيب ..غديتي حرمه وانتي بعدج تبين تطلعين لسانج
خيبه اشقايل عرف ...لانه حتى اميرة استغربت وسالته
اميره: اي لسان..ما جفتها سوت شي
ضحكنا عليها انا وحمد..وحليلها شكلها شرا الاطرش بالزفه


وصلنا بيت خالي فيصل ...استقبلتنا حرمته هي انجليزيه ...كانت مره انيقه ولا جنها صاكه الابعين ...وبعد تتكلم عربي ...وكانت تجوف علي بنص عين..شو السالفه ما احيدها تعرفني ...ما علي منها ..يلسنا نسولف ...دخلت علينا وحده شكلها بنت خالي فيصل لانها تشبه امها كثير ...يعني شقره وعلى عيون خضره..تقولي انجليزيه بيور ...شكلها استغربت لمن جافتني ...لانها سالت زياد عني ..شو خالي ما قايلنهم اني يايه مع زياد ...في شي غريب يالس يستوي ..اول ما قالها خالي اني حرمة زياد...جفت الدموع تيمعوا بعيونها وركضت بره الغرفه


كنت يالسه اسولف مع ناصر ...سمعنا صوت مسج ...جيكت على تلفوني ..بطلت عيوني على الاخر وقلت ...ها الناقص بعد



موعدنا ..يوم الجمعه باذن الله

جوفوا يا حلوين ...يا متابعين للقصه ..سواء الي يردوا علي او الي خلف الكواليس...بما اني قدمت بارت يوم الثلاثاء ...شو رايكم بالمره اقدم بارت اليمعه....وعلى الاسبوع الياي بنزل البارتات مثل قبل يعني يوم الثلاثاء واليمعه...اهم شي اني كاتبه شو رايكم ..وفي النهايه نزلت البارت من غير انتظر رايكم...

الجزء الثامن عشر...


لا بالله ..هاي يبالها حد يسنعها ...اشقايل بتي وتزور ناصر بالبيت...ما تستحي تراج امس كنتي مرتزه عنده...ناس مضيعه السنع...لا والغم بتي هي واختها شيخه ..وانا ما صدقت افتك منها بتي عندي البيت ...شكلهم يبون يبولي الجلطه ...ويبون يخربون بيتي ...بس انا لكم


يالله بالستر ...كنت مرتاح من ويع الراس والحنه والونه ...بس بعد ما ظهرت نادية ...وسارة هالكتنا من كثر ما تسال شو الي بيني وبين الدكتورة ناديه ...والغم تقول انك صاير دكتور فضفضه على اخر عمرك...اللحين سارة اشقايل اقنعها ..مب راضيه تقتنع ..جي بعدني ما نفذت خطه سالم ..اسميني كنت بييب الشقى لنفسي ...من وصلها المسج وهي تدور في الغرفة جنها تبى تنفجر ...رحت فيها يا ناصر ...
ناصر:سارونتي ...شو ياج ...وشو المسج الي قلب حالج جي
سارة :احلف انك ما تعرف منو الي مطرش المسج
ناصر:ساروه تراج مصختيها من امس وانتي مجاوزه حدودج معاي ..تكلمي بادب ..واحترميني
سارة :ناصر انت تعرف اني احبك اكثر من روحي ...بس والله تصرفاتها مب طبيعيه ..اللحين قول اشقايل تي هي واختها بعد المغرب ويزوروك..تراها كانت معتكفه عندك وما كان عندها مرضى غيرك
ناصر:خل عنج ها الغيرة...انا مستحيل اجوف غيرج بالهدنيا ...اما اذا على الدكتورة خليها تيي وترتز بالميلس ...وتمشي ..مب ياي ادخل واسلم عليها
سارة :انا مستغربه ..في ناس جي مضيعه السنع ...عنبو دارها تركض ورا ريال متزوج وعنده ولد
ناصر:سارونتي فضيها سيره...تراني مليت من كثر ما اسمع اسمها ...تراج بتدخلينها براسي ..وبفكر فيها غصبنا عني
سارة : شو ...فكر فيها ..جان ما ذبحتك وذبحتها بنفس اليوم
ناصر:مستويه شرانيه ومجرمه ...سارونه شو الي غيرج ما احيدج كنتي جي
سارة :اشقايل ما كنت جي ...قصدك ما كنت اغير عليك ...
ناصر :تراج قلتيها بروحج
سارة : هذه اول مرة اجوف وحده تتغزل وتركض وراك جدامي ...بعدين تعال ليكون كنت تلعب بذيلك وانا ما كنت ادري
ناصر: سوير ...شكلج غاويه تمرضين نفسج ..وتيبين مشاكل من بينا
سارة : اف..تراك مب حاس بالنار الي والعه بيوفي ...بسبتها
ناصر:ردينا لسالفة الدكتورة ..اقول سارة..قلبي ويهج


تعبوني سلطان ويمان ما خلو لعبه ما لعبوها..اسميني انه الاطفال فيهم نشاط غير طبيعي ...يلست اشربلي كوفي ..وانا اجوف على سيف يالس يلعبهم ...شكله وايد يحب اليهال ...سمعت تلفوني وكانت سوسو ..وشكلها معصبه من الدكتورة نادية ...صج ناس مضيعه السنع ...الله يعينج يا سارة ..بس افا عليج بنادبها الليلة ..وبنخليها تلزم حدودها .



وايد اشتقت لسلطان..هاي اول واخر مره اخليه يرقد بعيد عني ...نزلت تحت وجفت حمد حاط راسه على ريول عيوزنا....
سالم:ها عيوزنا ...اجوفج بس ادلعين حمد..جنه بس هو ولدج
حمد:بدينا بالغيره ...روح دورلك حنان بمكان ثاني
ام سالم:منو حنان مسود الويه..وانا من متى احن واون على راسك تاخذ ميرة اخت سعاد الله يرحمها
ساسرت حمد:دواك عندي..اللحين منو ييود لسان عيوزنا ... يا عيوزنا اي حنان واي ميره...انا ريال مرتاح جي ..عندي ولد واخذت نصيبي من الدنيا ..
ام سالم:اذا انت مرتاح .. ولدك مب مرتاح ..بعدين مسود الويه اشقايل مخلي ولدك يرقد عند الغرب
سالم:خليه يغير جو ويلعب مع يمان ...يمكن يرد شرا قبل
حمد:اقول عيوزي ...ترى بيت بو ناصر مب غرب..منا وفينا
سالم:لازم يكونوا منا وفينا..مب القلب هناك
ام سالم:قوم ..لا بارك الله في عدوينك ... بعدك تركض ورا البنيه
حمد:افا وانا ولدج ..لخليها هي الي تركض وراي



اللحين حد يقولي ..هاي شو مشكلتها بالحياة ..من يينا وهي تعق علي نغزات ...جني ماكله حلالها ..يا امي انا حتى ما اعرفج ...وخالي طول الوقت يعطيها نظرات ...وبعدين شو قصدها بين سالفه وثانيه تعيد نفس الرمسه ...بنات ها الايام هم الي يركضون ورا الريايل ....وبعدين بنتها وين سارت .......شو مستوي بذا البيت ما حد يحشم حد ...ما صدقت لما قال زياد ..احنا نستاذن ..كنت ابى اقول اخيرا ما بغيت ...طول الدرب وزياد ساكت ..سالته عن الجوهرة حتى الاسم مب ياي عليها ...قالي انه هم الاثنين بنفس القسم ...وانهم درسوا مع بعض ...ليكون الاخت معجبه بزياد وانا ضيعت عليها ...سالت زياد اذا عائله خالي كانوا يعرفون اني حرمتك من 8 سنوات ...قالي كلهم يعرفون ..عيل شو بلاهم....وصلنا الشقه بس زياد ما نزل ..قال انه وراه اشغال يخلصهم وبيي كنت ابى اسير صوب شقتي وبالمرة اجوف اسوم ..اكيد اللحينه تلوم نفسها ...



ركبت سيارتي ..وانا اتحلطم...ما ارضى كلهم مب سايرين دواماتهم ..ليش انا الوحيده الي اروح الجامعه ...لفيت صوب بيت قوم ريم...جفت حمد راكب سيارته وسالم يالس يتوعدله بيده...سويتلهم هرن ...وكملت دربي ...كنت بالتخرين ويايه ادخل بالشارع العام ..وجفت شاحنه يايه بس كله حطيت ببالي انه راعي الشاحنه بيعطيني طريج ...دست على البترول بقوة ...بس اول ما دخلت الشارع الا اسمع صوت ارتطام سيارة ..واسمع صوت بريك قوي وصوت زجاج يتكسر ..صرخت بقوة ...وضربت بريك ...رفعت راسي للمرايه الاماميه ..جفت الشاحنه داعمه سيارة ...بس كيف جي...اصلا السيارة الي كانت وراي بعيده ...يعني المفروض الضربه تي على سيارتي ...ما قدرت احرك ريولي من على البريك من الرعب الي فيني اصلا انا تيني حاله لمن اخاف ..اتصلب وما اقدر احرك ريولي ...السيارات الي وراي كانوا يضربون هرنات ...سكرت سيارتي ويلست اهدي نفسي ..وبعد فترة بسيطه رجعت لطبيعتي ..بس ابى افهم الي صار ..رفعت راسي مرة ثانية للمرايه الاماميه ..بس انصدمت لمن جفت حمد وكندورته عليها دم وهويالس يكلم راعي الشاحنه ...زغت وعلى طول نزلت اجوف شو استوا بحمد...بس لمن جافني ..اشر علي بيده ردي سيارتج....لانه الشارع كله كان شباب وشرطه وربشه...يلست اجوف عليه والشرطي يساله ..شكله يبى يتاكد انه ما صابه شي ...شو الي ياب سيارة حمد وراي...



ربيعي خليفه متصل فيني ويبانا نذاكر مع بعض..لانه عندنا تيست باجر ...بس سالم زاخ كندورتي لا ويقول تطلعني من المصيبه الي دخلتني فيها ..لانه عيوزنا صدقت انه سالم يرمس وحده اسمها حنان ..عاد سالم ويرمس وحده ...ما تركب صراحة ..سمعنا صوت هرن لفينا راسنا انا وسالم ..جفت جمان شكلها سايره الجامعه ...وايد تسوق بسرعه ..جم مرة مهددنها بس ما ينفع معاها الكلام ...سويت باي لسالم وكملت دربي ..كنت وراها بمسافه ..المفروض انها من بعد التخزين تاخذ يسار الدوار ...وانا اخذ يمين الدوار ...جفت شاحنه يايه مسرعه ...يعني مستحيل السيارة الي بالتخزين تدخل عليها ..بس جفت جمان تحرك سيارتها ...صرخت هاي مينونه تبى تتنتحر..سويتلها هرن وبشكل متواصل ..بس هي ولا بالدنيا ..ومن غير حتى ما افكر ..دست على البترول علشان ادخل قبلها ..يعني الشاحنه تضرب سيارتي ...ولا انها تضرب سيارتها ...كله ولا جمان ...مستحيل اعيش من غيرها ...مستحيل اتخيل الدنيا من غيرها ...حبي لها مب من يوم او يومين ..من وانا صغير وانا احبها ...ما يهمني اذا ما تحبني...ما يهمني شي ..الي يهمني اني اجوفها جدامي ..ولا اني انحرم من جوفتها طول عمري ...الضربة يت قوية ..السيارة راحت فيها ..بس الحمد لله ما صابني شي مجرد رضوض ...طلعت من السيارة من الباب الثاني ...يلست اتفاهم مع راعي الشاحنه والشرطة لانه الغلطه غلطتي ...جفتها يايه ..مب صاحيه ما تجوف الشارع مليان شباب وشرطه ...اشرت عليها ردي دواج عندي ...جان ما سحبت الليسن من يدج ...



سلطان ويمان رقدوا بالسيارة ...من كثر اللعب ...سيف وصل سلطان بيتهم ..قلبي مب مطاوعني اوصله بيتهم ..تعودت عليه من يوم ..شكلي بتوله عليه ...جيكت على ساعتي باجي نص ساعه ويوصلوا ضيوف سارة ...دخلت البيت وجفت جمان حاطه راسها على ريل ناصر وتصيح ..بسم الله شو مستوي ..رحت ركض لعندها ولويت عليها ...يا الله جمان صايره وايد حساسه من بعد ما سافرت جوري ..كلنا مب عارفين اشقايل نتعامل معاها ..لازم نحاسب على الكلمه قبل ما ننطقها ...وما تبى حد يعارضها ...اشرت على ناصر شو فيها ...اما هي ركبت فوق ..وقالت محد يصحيني ابى ارقد...
ميعاد:شو فيها جمان
سارة :جافت حادث ..يعني جافته بث مباشر
ناصر :حمد هو الي مسوي الحادث..بس الحمد لله ما صابه شي مجرد رضوض
ميعاد:لا حول ولا قوة الا بالله ...عاد جمان ناقصه عقد


سمعنا صوت الجرس...شكله وصلوا ضيوفي ...بدت المعركه ..يبالي اشمر عن ساعدي ..سمعت ناصر يقول ..راحوا فيها الاوادم ..عطيته نظرة بمعنى شرا ما اتفقنا ..
فتحت الباب وجفت شيخه وناديه ومعاهم وحده اول مره اجوفها ..منو هذه بعد
بعد السلام ...الاخت نادية عرفتني على الي معاها ..او ما قالت هذه امي ..شويه وعيوني يطلعون من مكانهم..شو تسوي امها اهني ..يعني مب من قوة العلاقة بين العايلتين ..احنا اصلا ما نعرفكم ...لا شكلها الاخت راسمه على شي كبير..حتى امها باين عليها مب هينه....جفت على ميعاد الي كانت تطالعهم بنظرات ريبه ...وبعد القهوة ..امهم قالت انها تبى تسلم على ناصر..اول ما قالت جي انا شرقت بالجاي..حد يفهمني شو يخططون له هذول ...يلست تبرر ..انه شرا ولدها وتبى تطمن عليه ..جي منا والدرب صار شرا ولدج ...ميعاد استاذنت واشرتلي بيدها يعني تعالي وراي ..استاذنت منهم وطلعت ..
سارة :ميعاد شو اسوي ...شكلهم ناوين على نية
ميعاد:سارة انا بروحي مب مطمنه ...الله يستر بس
سارة:شوري علي شو اسوي ..اسير ازقره ...ولا اقولهم راقد
ميعاد: سيري زقريه ..احسن يكون اللقاء جدامنا ولا من ورانا
سارة:شو قصدج ..يعني ناصر يروح يلسم عليهم من وراي
ميعاد:ما يحتاي ناصر يروح..امهم شكلها مب هينه ...تقدر تروحله بدوامه..فاحسن زقريه ومن كلامها مع ناصر ..بينبان نيتها
سارة:قلبي ناقزني ...بس شو اسوي على قولتج ..على الاقل بنجوف اسلوبها معاه



سمعت حد يدق باب غرفتي ..فتحت الباب وكانت ميعاد تقول انه حمد بميلس الريايل يباك...سرت صوب الميلس وبعد جهد جهيد وصلت ...بسبة الكسر الي بريولي ...
ناصر:سلامات ..سلامات ..ها من كثر ما ضحكت علي وقلت اني ما اعرف اسوق..ترى يقولولك العيبه عند الباب
حمد:الله يسلمك...وبعدين متى ضحكت عليك
ناصر: ما علينا ..قول شو استوى ..تدخل على شاحنه مرة وحده..قويه ذي يا حمد..يبالنا نسحب منك الليسن وتعيد التراي
حمد:اسحب ليسن اختك احسن
ناصر:منو اختي ..وليش اسحب ليسنها
حمد:منو اختك ...في غير جمان ..الي شكلها بتموتني قبل اواني
ناصر:استغفر ربك ما حد يموت قبل اوانه..وبعدين شو دخل جمان بالسالفه
حمد:بخبرك بالسالفه ..بس استحلفك بالله انه ما حد يدرى بالسالفه غيرك..
ناصر:شو السالفه حمد...
حمد:لا تستهم..بس اباك تسحب ليسن جمان...وتخلي ميعاد توصلها وتيبها الجامعه
ناصر:وليش كل ها
حمد:لانه جمان هي الي كانت تبى تدخل جدام الشاحنه ...وانا
ناصر:وانت شو ...بعدين جمان ما ادري متى تعقل وتسوق شرا اللاوادم جم مره قايلها ركدي شويه وانتي تسوقين..الا تعلي على صوت الاغاني وتدوس بالسيارة جنه محد غيرها بالشارع..تقول ريال يسوق مب حرمه
حمد:ناصر ...ارجوك اسحب الليسن من عندها ...ها المره يت سليمه ...بس المره اليايه محد يعرف شو يصير
ناصر:بس انت اشقايل تدخل جدام الشاحنه بدالها ..بايع روحك انت
حمد:انا ولا هي يا ناصر...انا ولا هي ..ما اقدر اعيش بالدنيا وهي مب موجوده
ناصر:بعدك تحبها يا حمد
حمد:شو احبها بعد انت ..شو هاي الكلمه الصغيره ...انا اموت عليها ..انا اتنفس هواها يا ناصر..لو تعرف شو داخل ها القلب ..كنت بتفهم الي سويته كان تصرف طبيعي
ناصر:كل ها الحب لجمان..ويا ليتها تحس ..بس صدقني هي لك ..ومب راح اعطيها لغيرك...هي لو لفت الدنيا بكبرها ما راح تحصل حد يحبها شراك
حمد:كنت اباها برضاها ..بس اللحين باخذها غصبا عنها
ناصر:فالك طيب يا النسيب ...بس تخرج وبتكون لك



كنت يالسه اجوف التلفزيون ...لمن سمعت تلفوني يرن كانت اسوم ..كنت متاكده انها بتتصل ...يلست نص ساعه وهي تستسمح مني ...وتقولي مسحيه بويهي .وانتي تعرفين اخوي مب داري بالدنيا ...ويلست تصيح ..وتقول انه اخوها قالها انه بيسافر باجر امريكا محصل شغل اهناك ...وقايلها بعد ما تخلصي دراستج حصلينا هناك...وبعد نص ساعه اتصلت عليها حرمته ..ويلست تهددها وتقولها اذا تبين تهدمين حياة اخوج تعالي امريكا ...قلتلها اسوم مالج يلسه اهني بعد ما تخلصين الماستر ...كانت منهارة وهي تكلمني ..يا الله بالزور هدت ....الله يخس ابليسك يا سامي ..جانك مبهدل اختك ..ومحسسنها انها مالها سند بهاي الدنيا ...سمعت صوت الباب ..لفيت راسي جفت زياد ..وهو مبطل ازرار قميصه الاوليه وشكله مب طبيعي ...ويتخبط بمشيته ومسكر عيونه ..
زياد:جوري سكري التلفزيون...وطفي الاضاءة ...بسرعه
استغربت شو فيه زياد...وبسرعه طفيت التلفزيون ..وسكرت كل الاضاءه الي بالشقه ...لحضه ليكون فيه صداع نصفي ..ولمن سمعته يرجع ..تاكدت ...سرت عنده وسندته وخليته ييلس على الكرسي ...
زياد:جوري ... لو سمحتي في الثلاجه تحصلين حبوبي ...يبيهم
يبتله حبوبه ...وقالي انه مب قادر يجوف صوبه اليسار ...وانه لازم يرتاح لمده نص ساعه علشان الصداع يخف...سندته وركبنا الدرج ..وصلته لغرفته ...يلست اقرا عليه وامسح على راسه كنت يايه اساله شو سوا فيه جي ووين كان ..بس تذكرت انه الي عندهم صداع نصفي ما يتحملوا يسمعوا اي صوت ..جفته حط الوساده فوق راسه ويلس يضغط عليها ...ويقولي سكري الليت ...ونا اصلا كنت مسكره كل اليتات ..بس شكله مفعول الحبوب بعده ما بدى ..لانه بعده يالس يجوف وميض او اضاءه بالرغم من انه الليت مسكر ...الحمد لله على نعمة الصحة...يلست اقرا عليه بسري ...لحد ما ضلمت الدنيا جدامي ورحت بسابع نومه ...




من الصبح وانا هايسه بهاي القضايا الي جدامي ...حتى مب محصله وقت اشرب كوفي...يت السكرتيرة وقالتي في ريال يقول انه ياي لاستشاره قانونيه ...انفتح الباب ..وجفت اخر شخص ابى اجوفه بالدنيا...يوسف
ميعاد:نعم اخوي ...في شو اقدر اساعدك
يوسف:اخوي ..بدينا بالرسميات...
ميعاد:في شو اقدر اساعدك...
يوسف:ما عليه ...شو ورانا ..تبينها رسمي ..نخليها رسمي
ميعاد:في شو اقدر اساعدك
يوسف:ياي ارفع قضيه على وحده ...سرقت النوم من عيوني ..ياما ليالي سهرت افكر فيها ..اتخيلها لي ...قدمتلها قلبي على طبق من ذهب ..بس هي رفسته..وباعته برخيص...كنت في سنه تخرج وهي كانت باقلها سنة وتتخرج ...كنت ساير صوب عمادة القبول والتسجيل ...جفتها يايه وهي تضحك مع ربيعتها ..تراوالي في البدايه اني احلم ..لدرجة اني اصطدمت بالباب وطحت..بس ما اهتميت ..كنت ابى اتاكد انها كانت حلم ولا حقيقة...جفت ربيعتها تضحك على الموقف ..بس هي مشت وهي منزله راسها...عيبني تصرفها حطيتها ببالي ...يبت كل المعلومات عنها بطريقتي الخاصه..ولمن عرفت انه باقلها سنه تتخرج...اجلت سالفة تخرجي ..علشان اقدر اجوفها كل يوم...ومرة جفتها بالصدفه ببيتنا وطلعت ربيعة اختي ...حاولت اكلمها ..اتعرف عليها ..بس كانت تصدني ...وفي يوم من الايام ..يت اختي لعندي وطلبت مني اخليج بحالج..وما اتعرضلك...وعرفت انك انتي الي طلبتي ها الطلب...كنت مقرر اكلمج في اليوم الثاني ..بس بنفس اليوم سويت حادث ...ما قدرت اكمل فيه السمستر ...اما هي تخرجت ...واشتغلت...وفي السنه الي بعدها تخرجت ..وكنت مقرر اني اول ما اتخرج اتقدملها ...بعد ما تخرجت ..انشغلت بظروف خاصة ..ولمن قررت اخطبها اصطدمت انها تزوجت..
ميعاد:يوسف...شو تبى اللحين
يوسف:اباج
ميعاد:شو ...لو سمحت انا وحدة متزوجة...وهذا مكان شغل ...فاذا عندك شي يخص الشغل تفضل والا ..واشرت على الباب
يوسف:تطرديني يا ميعاد...
ومن غير حتى ما استوعب ..سحب يدي ورمى الدبله...
وقال:الاسم المكتوب بالدبله ما يناسب يدج

اول ما استوعبت الحركه الي سواها ...عيني يت على جلاس الماي الي جدامي ..ومن غير تفكير ..رشيت الماي فوقه
ميعاد:انت واحد ما تستحي ما تتخيل ...والله ان ما طلعت اللحين ليكون لي تصرف ثاني معاك
يوسف.انتي قد الحركة الي سويتيها ...والله لخليج تندمين يا ميعاد ..وتعرفين منو يوسف..
ميعاد:الي ما تطوله بيدك...طوله بريلك....اطلع ..اطلع
يلست على الكرسي وانا ارتجف...ما حد يعرف يوسف كثري ولمن يحط شي بباله بيسويه ..واحد تربى على الدلع ...تربى انه كل الي يباه يصير ..حتى من غير ما يتكلم...هو كان الريال الوحيد وسط خمس بنات ..امه وابوه كانوا مخلينه على راحته يسوي الي يباه من غير حسيب ولا رقيب...كان وايد مستقوي على خواته ...تعبت من كثر ما كنت اقول لسعاد..قولي لاخوج ما ينجبر قلب على قلب ...ما ابيه ..ما احب شخصيته ...ريال ما عنده راي بحياته ...مغازلجي رقم واحد ...ولمن رفضته حطني بباله ..توقعت نساني خلاص..بس شكلي نسيت انه هذا يوسف ...الله يستر .. .



توني ظاهرة من المحاضرة ..ويالسه انتظر اسوم تخلص محاضرتها...ماخذه مادة اختياري غير عن الي اخترتها..جفتها يايه ..وجنه هموم الدنيا فوق راسها ...بعد السلام..ما سولفنا ابدا لحد ما وصلنا شقتي ...
جوري:اسوم فديتج ليش ساكته ..رمسي علشان ترتاحي ..مب زين عليج تحطين كل شي بخاطرج..
اسوم:شو اقول يا جوري ..اقولج اخوي سندي عزوتي بالدنيا ...اخوي الي تركت بلادي علشان اكون معاه..اخوي الي عارضت عمي اني اسكن معاهم ...اخوي الي بعت الدنيا وما فيها علشان اكون معاه... بيسافر ويخليني بروحي بهالبلاد ...الله يسامحج يا ايمان جانك دمرتينا كلنا علشان تاخذين حبيب القلب ...شردتينا وحرمتينا نكون عايله شرا غيرنا من الناس...حرمتيني من امي وابوي ...حرمتينا من اهلنا ..دمرتي اخوي وخليتيه يسوي اي شي علشان ينسى ماضيج ...حتى انتي ما سلمتي من اذاه..حتى انتي يا جوري

جوري:فديتج اسوم اهدي حبيبتي ...اهدي ورددي وراي هذا الحديث.. صدقيني تحسين براحه غريبه بعد ما تقولينه ...تحسين مهما كثرت همومج ..ومهما اسودت الدنيا جدامج ..ومها تسكروا الابواب بويهج ..تحسين كل ها ما يسوا جدام رضى رب العالمين عليج...قوليه بتمعن ..وانت تستحضرين معنى كل كلمه تنطقيها ..ووقفي عند كل جمله ..واهم شي تذكري كيف كان وضع الرسول عليه السلام وهو يقول هذا الحديث ...وبتحسين بالفعل انه الدنيا ما تسوى شي ... " اللهم انى اشكو اليك ضعف قوتى و قلة حيلتى و هوانى على الناس انت رب المستضعفين و انت ربى الى من تكلنى؟ الى بعيد يتجهمنى ؟ ام الى عدو ملكته امرى؟! ان لم يكن بك على غضب فلا ابالى اعوذ بنور وجهك الذى اضاءت له الظلمات و صلح عليه امر الدنيا و الاخرة من ان تنزل بى غضبك او يحل على سخطك لك العتبى حتى ترضى و لا حول ولا قوة الا بك) ..وبعدين انا ما راح اخليج بروحج ...فديتج انسي كل شي وركزي على دراستج..وبعد الدراسه نرد البلاد كلنا ...صدقيني ظلم عمج ولا ظلم الغربه
اسوم: ربي ما يحرمني منج يا جوري ...
جوري: بروح اسويلج جاي كرك ..لكن جاي انما ايه ...تمصي اصابعك وراه
اسوم :حلوة تمصي اصابعك وراه...



وصلني مسج من حرمة خالي ..تقول انها تباني ضروري ...وكنت توني ساير صوب الجامعه..غيرت وجهتي وسرت صوب بيتهم..شو مستوي مب من عوايدها حرمة خالي ترسل مسجات...اول ما وصلت عند باب الصالة سمعت صراخ ..بسرعه دخلت وجفت جوان يالسه تصارخ ...سالتها شو ياج...بس هي ضلت تصارخ وتقول كلام غير مفهوم ...قلتها هدي علشان نتفاهم ..بس هي عصبت زياده ويلست تكمل كلامها ...صح انه كلامها مب مفهوم بس الكلمات الي تنطقها قويه ..كنت مكور يدي ومنزل راسي تحت يالس استغفر مابى اتهور ...بس خلاص لحد ها الكلمة وكفايه ...قمت من مكاني بس سمعت صوت...............طراخ



اسوم: جوري ..انتي مقتنعه بوجودك بشقة زياد...
جوري:جوفي اسوم..الموضوع تعدى الاقناع ..انا وحده يتيمه ومب بس يتيمه حتى اهل ما عندي ...عايشه مع ناس ما يمدولي بصله لا من قريب ولا من بعيد..عايشه وسطهم عى اساس اني زوجه اخوهم ...فلو اني تطلقت ..قوليلي وين اسير ..عند منو اعيش ...مستحيل ارد اعيش معاهم ...منو الي يسكت حلوج الناس ..وحتى وان قلت اني ما بهتم بكلامهم ...انا بنفسي ما راح احس بالراحه ..احس اني غريبه عنهم ..احس انه وجودي غلط وسطهم ...من بعد ما توفوا امي عايشه وابوي محمد وانا احس نفسي غلط بس كنت دايما اقول بخاطري اني حرمة اخوهم ...ما اقولج اني سامحت زياد...ولا انه وجودي معاه بنفس الشقه معناته اني نسيت 8 سنوات الي راحوا ..بس زياد قدري ..نصيبي... سواء شئت ام ابيت ...سواء اعترضت ..او صرخت ...هذا واقعي ..ولازم اتقبله ...لو كان وضعي شرا غيري ..لو كان عندي اهل ..جان يمكن افكر اني ابتعد ...بس بخلي الايام هي الي تصفي القلوب..وما حد داري شو بيصير
اسوم:فديتج جوري...قلبي يعورني عليج
جوري:وليش يعورج علي...بالعكس وضعي احسن عن وضع غيري..صح ربي خذ مني امي وابوي ..بس عوضني بأم وأب ...عمرهم ما قصروا معاي ..عمرهم ما حسسوني اني مب وحده منهم...عمري ما حسيت باليتم وانا بينهم...عمري ما حسيت بالوحده وانا معاهم ...حتى لمن حسوا انهم بيفارقوا الدنيا..امنوا لي مستقبلي على الاقل بوجهة نظرهم ...زوجوني ولدهم علشان ما اضيع من بعدهم ...علشان ما حد يقول اني وجودي غلط من بينهم ...شو ابى اكثر عن جي بالدنيا ...صدقيني ..ياما نا س عايشين وسط اهاليهم ووسط اخوانهم واخواتهم..بس بداخلهم حاسين بالوحده ..حاسين انهم غرباء ...وياما ازواج عايشين مع بعض وبوسط عيالهم...ويحسوا بالوحده ...
اسوم: جوري سوري على المقاطعه بس تلفونج يرن من ساعه ...اول ما ردت على التلفون ...تغير ويها يت اسالها بس هي اشرت علي اسكت وحطت التلفون على السبيكر ...وكان ها الاتصال ..القشه الي قسمت ظهر البعير

موعدنا يوم الثلاثاء ....باذن الواحد الاحد