لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 13-07-10, 07:29 AM   المشاركة رقم: 36
المعلومات
الكاتب:
اللقب:

البيانات
التسجيل: Apr 2010
العضوية: 160269
المشاركات: 7
الجنس أنثى
معدل التقييم: mis dl3 عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
mis dl3 غير متواجد حالياً
وسائل الإتصال:

كاتب الموضوع : retaj المنتدى : القصص المكتمله
افتراضي

 

السلام عليكم ورحمة الله وبركاته
انا سجلت في المنتدى هاااااذا علشان روايتك عجبتني بس تكفين كمليها
وانا بإذن الله اكون من متابعينك
بس لا تطولين علينا بالبارت

 
 

 

عرض البوم صور mis dl3   رد مع اقتباس
قديم 13-07-10, 01:32 PM   المشاركة رقم: 37
المعلومات
الكاتب:
اللقب:

البيانات
التسجيل: Aug 2007
العضوية: 36407
المشاركات: 56
الجنس أنثى
معدل التقييم: retaj عضو بحاجه الى تحسين وضعه
نقاط التقييم: 25

االدولة
البلدQatar
 
مدونتي

 

الإتصالات
الحالة:
retaj غير متواجد حالياً
وسائل الإتصال:

كاتب الموضوع : retaj المنتدى : القصص المكتمله
افتراضي

 

اقتباس :-   المشاركة الأصلية كتبت بواسطة mis dl3 مشاهدة المشاركة
  
السلام عليكم ورحمة الله وبركاته
انا سجلت في المنتدى هاااااذا علشان روايتك عجبتني بس تكفين كمليها
وانا بإذن الله اكون من متابعينك
بس لا تطولين علينا بالبارت


هلااااا وغلااااا
مس دلع

كلك ذوق وإن شاء الله ما راح اطول
البارتات اول باول تنزل

والروايه في آخر فصولهااا

 
 

 

عرض البوم صور retaj   رد مع اقتباس
قديم 13-07-10, 01:37 PM   المشاركة رقم: 38
المعلومات
الكاتب:
اللقب:

البيانات
التسجيل: Aug 2007
العضوية: 36407
المشاركات: 56
الجنس أنثى
معدل التقييم: retaj عضو بحاجه الى تحسين وضعه
نقاط التقييم: 25

االدولة
البلدQatar
 
مدونتي

 

الإتصالات
الحالة:
retaj غير متواجد حالياً
وسائل الإتصال:

كاتب الموضوع : retaj المنتدى : القصص المكتمله
افتراضي

 

الفصـل الثامن عشـر




طالعت له مب مصدقه .. مر شهر .. شهر .. وصالح كأنه انسان ثاني..انسان منطوي .. مايكلم احد الا للضرورة .. يروح للدوام ويرجع منه .. رجع لغرفته القديمه .. هجر البيت بكبره ..
خديجه ــ صالح تعال تغدى ..
ــ مااشتهي ..
وبس .. وسكت .. حست صالح اللي تعرفه تغير .. صار انسان ثاني .. كتمت غصتها ــانزل شوي..
ـ تعبان ..
وبس .. وهذي حالهم ؟؟ .. الحين بيروح وماتشوفه الا بكره الصبح مايدخل البيت ولا يتصل ..عايشين في بيت واحد صحيح لكنه بعيد واايد ولا كانه معاهم على نفس الكوكب ..هزت راسها وقالت ــ تحمل بعمرك ..
وانزلت وهي تسمعه يردد ــ مايسوى ..
ــ ترااك غالي والله ..
وانزلت دموعها بللت النقاب .. طالع لها يحاول يبتسم لكنه مانجح ..
ساق السياره وراح لزاويه يحب يحتمي فيها تحت شجره كبيره في طرف الشارع .. سند راسه للكرسي ..
مب قادر يستقر ..يحس بشي كاسره .. حاول يتذكر فاطمة لكنه حس انها قاعده تنسل من ذكرياته .. النسيان يجتاح ذااكرته بقوة .. مايبي ينساها ..
يبي يتذكر ضحكها و دموعها وروحها الطيبه .. لكنه ماعرفها .. مانبض قلبه لها .. ماتت قبل لايقول لها احبج .. ماتت قبل لا يكتشف مشاعره تجاهها ..ماتت قبل لايعرفها ..وهالوجع اكبر وجع .. حاسه انه مديون لها بشيء كبير.. يمكن حب ؟ .. لكن .. تنهد وهو حاس بالضياع ..شلون تكون مديون بالحب وانت للاسف ماجربته ؟ كان اعجاب .. للاسف .. مامداه الوقت يعرفها ..
ساق سيارته ورجع البيت بعد ماحس انه تأخر ..
دخل المجلس سلم على ابوه وطلع من دون كلا م ..دخل غرفته القديمه .. حط راسه وهو حاس بحزن .. حزن يغمره بقوة . نزلت دمعه ..

كانت خديجه في غرفتها لما دخلت جدتها ــ مابتتغدين ؟
ـ لا مشكورة ..
طلعت ..
طالعت جوالها لقت رساله وارده (( شلونه اليوم ) )
طرشت (( كل يوم اقول هانت اليوم احسن ... للاسف .. وزنه نزل وجهه شاحب نظره الحزن والضياع في عيونه صعبه ))
وصلها مسج ثاني (( تهقين كان يحبها ؟؟ هو ماعرفها ))
طرشت (( للاسف .. اخاف يكون هذا السبب .. انه ماعرفها ))
وصلها مسج ثالث (( سواء حبها ولا لاء ,,, انا متأكد انه مابيشفى من هالكسر بسهوله .. حاولي تجرينه لحياتكم رجعيه لحياته القديمه .. انا احاول لكن للاسف .. مب عارف وسيله ))

( ( مبــارك .. صالح يحس انه غريب .. . حاول انك تحسسه العكس ))
(( هو عمره ماكان غريب .. لكن لاتخافين بحاول ..))
وحطت جوالها بقربها .. من توفت فاطمه .. تقريبا كل يوم يتبادلون هالمسجات ..المسجات اللي بس عن صالح .. ماقد مرة تكلموا عن شي غير صالح .. كانت خديجه بتستعين براشد بس راشد مع سالم في مصر ..حمد للاسف ماتقدر .. مبارك الوحيد .,, مافي غيره ..
دخلت المها وهي تعبانه ــ اف اكره بااااص الجاااامعه ..
ــ وعليكم السلام ..
ــ والله تكسرت ..يسوق مسرع تقول داخلين سباق لوع جبدي الله يلوع جبده ولا يحاسب لا على مطبه ولا حفره ..اشك ان اللي مسوي هالحفر في شوارع الدوحه هو باص الجامعه !!!.
خديجه ــ وعليكم السلام ..
المها ــاف انزين السلام عليكم بتروش بسرعه واذلف اتغدى وارجع اسوي رفرش لمحاضرة اليوم عندي بعد بكره امتحان ..
ــ الله يعطيج العافيه ..
ــ ويعافيج ..
غمضت خديجه عيونها وحطت راسها وانزلت دمعه على حالهم . بعدين رددت ــ الحمدالله .. يارب احفظهم جمــيع جعلني فدااهم ..

_______________

رجع احمد من الشركه تعبان ...ولقى العنود في غرفتها ..حس بقلبه بينط من ضلوعه ــ لي متى هالجفا يالعنود ..
لكن العنود داخل .. حاسه بضياع . حاسه بشي غلط .. ماتدري شفيها ..تحس الدموع زوارها طول الوقت .. وبعدين .. بعدين ؟؟..
دخل احمد لعند ساره ــ السلام عليكم
ــ وعليكم السلام ..
ــ ماطلعت من غرفتها ؟؟..
ــ لا .. مدري شفيها ..هالبنت تغيرت امية وثمانين درجه ..شالعزله اللي هي فيها ..
ــ مادري ..قلبي معورني..كلما حاولت اقترب منها خطوة .. احس انهي تبعدني ميل الفجوة بيننا قاعده تزيد .. انا احبها .. بس ..
ــ يمكن الحمل وهرموناته ؟؟
ــ ماابي هالحمل دامه بياخذها مني ..
ــ لا اسم الله احمد لا تقول جي .. حرام عليك .. هذي رووح ..
ـ استغفر الله .. وبعدين ؟؟ ..,
ــاصبر عليها الصدمات قوية ..اولها سالم ..وبعدين مرت خالها .. حرام ..
احمد ــ انا صابر والله ...وبصبر للآخر العمر ماعندي مانع .. لكن خايف عليها ..
ساره ــ انا بحاو ل معاها .. والله يهديها ..
____________________

(( احبس دموعـي حبيبي من غلاك .. انت دمعه خايف ابكــيك وتطيح
ياحبيبي الجرح اتعبني عناك ... في يدينك قلـــــــــب لكنـــه جريــح
بنشدك قد صرت نجم في سماك ؟؟ او مشيت بدرب ماهو لي صحيح ؟
جابني يمــك حنيني مانساك ... قام يــــنشد عنك شــــــوق بي يصيح ..
من عذاب البرد جيت ابغى دفاك ..واثـــــرك بصادق حنينك لي شحيح
مايموت القلب لاصد وجفاك ... مايمـــــــــــــوت القلب لكن يستريــح
بحبسك مابين جفنين ولقاك لا التقـــــــــــــى بالعين ملتاع ومريح


حست بالجرح ..شهر ..شهر ولا سائل عنها ..شهر والكل يتكلم عن عرسها ..الكل .. وهي في نزيف مستمر ..دموع وتناهيد .. للاسف ياراشد ...
خيبت ظني ..
كانت في النشاط حاطه السماعه في اذنها ..تسمع هالأغنيه طول اليوم ..
ــ قومي ديووم بيصكرون النشاط ..
قامت ديمه مع عليا .. ــ وين نروح ؟؟..
ــ اي مكان المواقف ا و المكتبه ..
ـ مابي ..
ـ العلوم ..
ــ مابي ..
ــ ديوم لي متى ؟؟..
ــ ماادري ..
ــ من بيجيك اليوم ؟
ــ حمد بيمرني ..
ـــ انزين انتي الحين لي متى هذا حالج .. حتى زط ماقاعده تزطين .انا اعرفج كل شي ولا بطنج ..
ــ عليا الله يخليج .. خل نتكلم في شي ثاني ..
كانت الساعه ثلاث ونص ..
ــ خل نتمشى .. عليا لاتزعلين لكن صدق مزاجي مايسمح ..
وتموا يتمشون تحت المظلات رايحين رادين . ديمه في اذونها اغنية احبس دموعي وقلبها ينزف لابسه نظاره شمسية تخفي دموعها مع ان خشمها احمر .. .. وعليا ماسكه كتاب عن الابراج تقرأ فيه ..

عليا تنطر باص الساعه 5 ..,و ديمه تنطر حمد اللي بيخلص الساعه 4 ..
ــ لي متى بتهربين منهم ؟؟
ــ مادري .. بس مابي ارجع البيت لولا ان حمد مايرضى ارجع فالباص كان رجعت فالباص ..
ــ مارجعتي مع المها ؟
ــ المها قاعده في بيت جدي .. ماقدر اروح هنا ك ..امي حذرتني افتح الموضوع مال زواجي مع اي حد .. قاعده ترتب كل شي من تحت لتحت مع خالتي ..حتى ابوي مايدري..
ــ راشد ما رد ؟ .
ــ طرشت له مسج واحد .. مارد ..
ــ يمكن ماوصله ..
ــ عليا ارجووج لاتحاولين تحطين له العذر .. ..انا متأكده انه وصله ..
ــ شلون ..
صرخت ديمه بعصبيه !..
ــ لانه رد علي ..
طالعت لها عليا منصدمه ..ــ رد ؟ .
ــ مااسميه رد .بس .. رد ..
ــ بشنو رد .
ــ مسج فاضي ... ليته مارد اهون ..
ورجعت السماعات في اذونها وتمت تمشي بعصبيه ..
ــ ديمه وين ..
ــ الحين حمد بيجي ..بنطر في المواقف ..
واركضت وتركت عليا واقفه مصدوومه ..
__________________

قرب منه ــ صباح الخير ..
صالح ــ صباح النور ..
ــ شخبارك ؟؟
ــ الحمدالله ..
ــ تتريق؟ ...
ــ لا ..بس ابي اشرب نسكافيه ..
حس مبارك بحاجر بينه وبين صالح .. بس ماعبره
ــ اي ترا طارق يٍسأل وين بتروح نتعشى اليوم ..
كذب صالح ـ في بيتنا كالعاده ..
ــ لاا ..طارق خسر رهان معاي وعليه عشاا..وانا بما اني صديق صدووق ..ابي عمي معاي ..
ــ شالرهان ؟
ــ قلت له انه بيوافقون على الصيانه الجديده في اقل من شهر ..قال لي ان لها اجرااءات طويله مستحيل ..لكن ولد اخوك قدها ..
ـ والنعم ..انزين ليش تبي تكلف على طارق وتعزمني ..خل السالفه بينك وبينه ..
ــ لا يالعم .. آخر مره الاخ صار نذل معاي ..خست رهان وتواعدنا في الشيراتون لقيت الاخ جايب معاه اثنين من خويانه ..استحيت ودفعني الحساب دبلات ..عاد دووري الحين اطلعها من عيونه ..ها انت وحمد ..وافكر اجيب ابوي ..
ضحك صالح بهدوء ـ عاد ابوك بيشتط ويدفع الحساب هههه ...
ــ لا ابوي نكنسله .. لو بيدي اخذ ديموه هالهبله ..
ــ فديتها .للحينها على اكل المطاعم ؟
مبارك ــ لا .. للاسف ..صارت تكسر خاطري اجيب لها الاكل ماتاكل .. كله الاقيه على مكانه ..
ــ شفيها ؟
ــ مادري ..
استهم صالح على ديمه .. مب من عادتها ..
ـ انزين امرك الليله ؟
ــ ان شاء الله ..
ــ اي عرفت ..بجيب جااسم ..
تذكر صالح جاسم اللي ماشافه من زمان ..
ــ اي ترا ماشفته من زمان .
ــ ان شاء الله الليله نلتقي زهب عمرك .. سلام .
_______

في مصر ..
ان راشد يطالع التلفون ..وهو يحس بخنجر مطعون في ثناياه ..كل ماقرا المسج .. طالع لسالم اللي كان نايم استانس ان سالم صار يتنفس بدون جهاز من اول اسبوع .. .. فتح المسج ..وشاف رقمها ..و
تمتم ــ اعذريني ياديمه .. مااقدر .. اموت فيج لكن .. ماكون رجال ان تركت خويي وهو بأعز حاجته لي ..
فكر يتصل بعمه ..لكن .. مب قادر ..خيال صالح في عيونه ..شلون يخطب وعمه توه للاسف ترمل ..
اصلا مابيسوون شي حاليا احتراما لصالح . .. كان يقص على نفسه بهالكلام ..لكن .. قلبه يقول له ان مرت عمه مابتسكت ..

ــ روح لها ..
انصدم راشد...طالع لسالم اللي كان متظاهر انه نايم ..
ــ روح لها .. لاتخسرها ..
ــ مابتركك ..
ــ عادي اللي اقرب لي منك اتركوني .. روح لها ولاتحسسني بالذنب..
ــ لا ..مابروح ..انت اخوي .. مابتركك ...في غيرها ألــ.... ف..
ليش غص بهالكلمة ..كيانه رفض الفكره قبل لاينطقها ..
سالم ــ راشد .. انت اذا تحبها صدق ماترخصها ..
ـ انا مارخصتها ولا برخصها .. بنادي الممرض يجيب اكلك ..
ــرااشد ..رااشد ..راااااااااااااشد ..
لكن راشد طلع حاط يده وجواله على قلبه ..مابغى سالم يشوفه بهالانكسار ..ليش قلبه دق بسرعه . .. ديمه ..بموت ان صرتي لغيري ...
سالم كان حاس بالذنب ..بالكره ..بالعجز .. حاسس ان الدنيا ضده في كل شي ...لازم راشد مايخسر ديمه ..لازم .. بس شالحيله ؟؟..


______________

كانوا متحفظين ..شافوه للاسف مانخرط معاهم في جوهم .. حاول مبارك سر الحاجز ..
ــ ها حمد شناوي تطلب ؟؟سي فوود كالعاده ؟
حمدــ ايه صراحه يمدحوون السي فوود ..
طارق ــ اي بس يسوي مغص ..حاسب لاتكثر ...
ضحك حمد وجاسم على خفيف ..
حس صالح انه مخرب عليهم الجو ــ يقولون فيه مواد سميه ..
طارق ــ اسمع نصيحه عمك وانا اخوك ..
مبارك ــ خلاص اطلب سي فودد واطلب شي ثاني عشان يسدك داام انصحوووك ماتكثر من هالاكل ..
طارق ــلاااا ..خلاص ..نتحمل الزياده بس مانتحمل طلب ثاني ..
ضحك صالح واضحكوا معاه حسوا ان الحاجز خف ...وتموا يتناقشون في اشغل ولما اشافوا ان جاسم وحمد مالهم في الشغل غيروا الموضوع إلى الكورة وتم حمد وطارق في نزاع ازعج الكل حول احسن فريق اوروبي ...


طلع مبارك تلفونه وقعد يكتب مسج
(( اخيرا حسيت ان في امل صالح يقوم من هالطيحه ..الحين اشوفه يبتسم ويتكلم ..ويااكل ... والله اني مستانس ، ارتحت وااايد )) ..
..ولما رفع راسه تفاجأ الكل يطالعون له ..
ــ شنو ؟؟..
قال له طارق بخبث ـ ماعهدناك تمسج احد ..والغريب ان كل العرب اللي تعرفهم قاعدين على هالطاولة !..
حس مبارك ان وجهه قلب وردي ــ ليش مافي عرب غيركم فالديره ؟..
صالح اشر على طارق ــ انا نفس طارق ..مستغرب ..
رفع حمد يده ــ وانا بعد ..
جاسم ــ شفيكم كليتم الرجال ... يعني واذا طرش مسج ..
ابتسم حمد ــ مسج عن مسج يفرق .. يعني انت شفت حالته وهو يكتب المسج ..وجهه كأنه ليتات زينون .. والابتسامه شقاقية .. شوي ويطير ..
انحرج مبارك لكنه ابتسم وقال بثقه ــ انا انسان متفائل فالدنيا ..
طالعوا له منصدميــن رده أبدا ماله داعي ,,,
مبارك ــ شفيكم ..
حمد ــ لا والله يا اخوي انت اللي شفيك ..
مبارك ــ هههههههه والله مافيني الا العافيه ..
علق صالح بابتسامه خبيثه ــ دووووووم ان شاء الله ...
جاسم حس نفسه مثل الاطرش بالزفه ــ مادري العله فيكم ولا انا حمار ماألقط ..
صالح بدون وعي ــ طبعا الثانية
ضحكوا الكل ونزل جاسم رااسه وقال منحرج ــ مقبوله منك يالنسيب ..
ضحك صالح وقال ــ انا ماقلت شي ..انا اكدت النظريه وبس !
قال مبارك يغير الموضوع ــ تحلوون ؟؟
طالع له طارق بحقد ...لكن مبارك ابتسم بخبث ــ يمدحون التشيز كيك ...
وصله مسج (( الحمدلله )) طالع ربعه وقال يضيع السالفه ــ ترا راشد يسلم عليكم ..
واشر على الجوال .. وحطه في جيبه بلامبالاة ..
صالح ــ الله يسلمه ..شخبار سالم ؟؟
ــ يقول انه عالعلاج بتتسهل اموره ان شاء الله
كان مبارك مكلم راشد العصر وسأله .. وقال يضيع الموضوع ..
ــ هااا ..انا ابي تشيز كيك مانجوو ..وصالح ؟
ــ شوكلت ..
ــ وانت ياحمد ؟
ــ pass >>
ــ وجاسم شتبي ؟؟
ــ ولا شي سلامتك ..
ــ مايصير لازم تحلي ..
جاسم ــ لا مشكور ... احس اني متخم مب مشتهي شي ..
مبارك ــ براحتك وانت طارق ؟؟
طارق ــ باخذ تشيز كيك نسكافيه .
بعدين استأذنوا حمد وجاسم وراحو ... وتم مبارك وطارق وصالح ..بعدين قام صالح واستأذن .. وتم مبارك وطارق ..
ــ الحساب لو سمحت ..
طالع له طارق ــ خليني ادفعه انا ..
مبارك ــ شالسالفه ..ااحنا متفقين من البداية ..
طارق ــ تحسه غير جو ؟
مبارك ــ اتمنى ,,
طارق ــ ليش هالتمثيليه ..ماقلت له عزيمه شباب وعادي ..
مبارك ــ كان لازم اقنعه اني رابح رهان ..والا ماكان بيجي ..طول هالشهر امر عليه ابي يطلع معاي ..مايرضى دايم يتحجج ولا يطلع .حتى الاكل ..ماقاعد ياكل ..
طارق ــ الله يعينه مب سهل اللي صار له ..
ــ ويعين الجميع ...
دفع مبارك الحساب وطلع هو وطارق وافترقواعند سيياريهم .. ركب سيارته ,,,ومسك تلفونه ..وطرش مسج ..
(( قبل كنت احس بفراغ ..بوحده ..لكن من عرفت هالحروف ..وانا ..احس الدنيا صار لها طعم ثاني ))
طالعت خديجه المسج واستانست ..طرشت مسج (( سيم سيم ))
لازم ماتتمادى ..صج انه خطيبها ....بس يمكن مايصير بينهم نصيب .. لازم تحاسب على حروفها ..
في الناحيه الثانيه ..اول ماوصله المسج ضحك ..وبعدين ابتسم بحب ..لازم مايتمادى ..هي مااعطته الثقه علشان يستغلها .كان همهم صالح ..ومازال همهم صالح ..ولين يملجون ..بيهتمون في بعض .. حب الجووال وهمس
(( احبج ))
_________________

كان في دوامه ..مرهق..اليوم شفته .. طالع الساعه كان الوقت متأخر مسك تلفونه واتصل ..
ــ السلام ..
ــ هلا ..
ــ صاحيه ؟
ــ تعرفني مانام الا اذا رجعت ..
ــ تشتاقين لي ؟؟ . .
استحت نوف ــ احب اتطمن عليكـ.
منصور ـ اجابه دبلوماتيكيه ..
نوف ــ ومنكم نستفيد ..
ــ انزين انا بقول لها لج كااش .. اشتقت لج ..
حست نوف بنفسها تنتفض ــ .............. ,,, شوي ..
ــ لا والله كثيير ..احس مفارقج من سنه ..
ــ شالهياط توك مفارقني من ثلاث ساعات ونص ..
منصور ــ عادتهم !.
ــ .................................
ــ مابخليج بروحج بعد اليوم .. بوديج بيت اهلج قبل لااستلم الشفت ..
ــ عادي تعودت ..
ــ بس انا مب عادي عندي .. اخاف عليج ..
ــ صدق ؟؟..
ــ شوف هاي ..اي صدق .. ليش مادريتي؟؟..
ــ لا شنو ؟؟
ــ احبــــج ...
ــ ها ؟؟..
ــ احبج .. واذا قلتي لي ها بشرد من المستشفى واجي البيت اقولها لج ..
ــ لا خلاص سمعتك ..
ــ اعيدها ..
ــ شكلك فاضي مافي مرضى حولك ..
ــ في ..بس حاس بارهاق فقلت انتعش شوي ..
ــ شربت شي ؟؟
ــ ايه ..
ــ قهوة ولا عصير ؟؟..
ــ صوتج ..
انحرجت نوف بقوة .. مب متعوده بالمره ..
ــ شفيج سكتي ؟؟..
ــ مافي .. ....شي..
ــ انزين الغاليه .. مع اني ماسمعت منج الكلمة اللي ابيها ..واللي بترويني ....لكن بتركج الحين .. في مريض دخل ...
ــ منصور
ــ لبيه ..
ــ لبيت غالي .. احبك ..
وصكرت التلفون وهي مصدومه من جرأتها ..لكنه حبيبها وزوجها ودنيتها .. اي تحبه .. من زماان من زمااان سكن هالقلب ..
ــ دكتووور ..
كان منصور سرحان والتلفون على اذانه ..
ــ دكتوور ..
طالع للمريض وحس انه انتعش ــ نعم .. تفضل ..
وكمل شغله وهو آخر روااق .. ناطر اللحظه اللي يخلص فيها ..
_______________________

قامت العنود وهي حاسه بتعب ..وطلعت لقت احمد يقلب في الاوراق ..
ــ احمد ..
استانس انها كلمته ـ هلا حبي ..
ــ احمد ...تعبانه ...
وطاحت عند باب غرفتها انصدم احمد ركض لها ..وتم ينادي ساره تساعده
في المستشفى .. ..كان جالس برا حاس بالذنب ..
ــ كله مني ..
ساره ـ هونها وتهوون ياخوي .. مكتووب ..
ــ انا قلت مابي هالطفل ..
ساره ــ يعني تعتقد هالكلمه هي اللي خلتها تجهض ؟؟..
ــ لا بس..
ــ هالحمل اصلا من البدايه كان مصحوب بوايد مشاكل ..خير لها ان شاء الله .. قول الحمدالله ..واحمدالله ان صحتها زينه ..
ــ الحمدالله ..بيرقدونها ؟؟..
ــ يقولون الليله بيرقدونها خصوصا ان عندها فقر دم شديد ..
احمد ــ الله يشفيها ..
___________________
كانت العنود في الغرفه تصيح بقوة...
الممرضه ــ انادي زوجك ؟
ــ لا .. مابي احد ارجوج ..
ــ طيب امك ..
ــ ارجوج لاتدخلين احد ..
وتمت تصيح بقوة وهي حاسه انها فقدت جزء منها ..حاسه بالذنب ..هي ماكانت تبي هالطفل .ماكانت سعيده ..
طلعت الممرضه ومرت على احمد وساره اللي سألوها بلهفه ــ قامت ؟.. شلونها ؟؟
قالت الممرضه ــ لسه نايمه ..
وراحت بدون ماتعلق .. شسالفه هالبنت ؟..
___________

استغرب حمد .. هذي رابع مره هالاسبوع ..طالع لها بطرف عينه ..قاعده عالسفره تقلب في الاكل جدامها بس ماتاكل .. وبعد خمس دقايق قامت ..امه وابوه في عالم ثاني ..محد منتبه .ومبارك يطالع حمد ..مستغرب و حمد يهز راسه بمادري ..
طلع بعد الغدا مر مطعم وجبات سريعه ..خذ لها وجبه ومر باسن روبنز وخذ لها اللي تحبه ...ورجع البيت ..طق باب غرفتها ..
ــ ديووم ..
ــ هلا حمد ..
ــ شفيج ؟؟..
كانت عيونها تعبانه ووجهها مسود ..
ــ مافيني الا العافية ..
ــ شفتج ماكليتي عالسفره ..قلت اييب لج اللي تحبينه ..وجبت لج باسكن روبنز !..
ــ تسلم ياخوي ..
خذته من يده وحطته على الطاوله ..تم واقف وهو يشوف راحت عند المنظره ترتب شعرها .. .
ــ شالسالفه ؟؟.. مسويه رجيم ؟؟..
ــ هااا؟؟... لا ..
ــ اجل ضعفانه ..وماتاكلين ..شفيج ..
ــ ايه مسويه رجيم ..
ــ من متى تصبرين على بطنج ..
قالت بخفه تحاول تبين انها عادي ــ اووه .لو شفت بنات الجامعه ..عصااقل .. ابي اتعصقل ..
وقعدت وحطت رجل على رجل ومسكت مبرد اظافر وتمت تسوي في اظافرها .
قرب منها حمد ورفع راسها بيده وقال بجديه
ــ شفيج ؟؟.. تكلمي ..
انصمت ترقرت الدموع في عينها وقالت وهي تبعد راسها عنه ــ مافي شي ..
جلس بقربها ــ ماني متحرك من هنا لين تقولين ..
وحط رجل على رجل .. وتمت هي تسوي في اظافرها ..وهو جالس جنبها حاس بوجعها ..لكنها ماقاعده تتكلم .. مرت ربع ساعه ..كانت تلعب بالمبرد بين أصابعها . .
ــ وبعدين ؟؟ مابتتكلمين ؟؟
طالعت له بود ــ ماعندي شي اقوله ..
وقف على حيله ــ كيفج .. بروح اقيل ..
اول ماطلع انزلت دموعها بقوة وحطت راسها على يدينها وتم تصيح بقوة ..
ـــ ديمه ..
ارفعت راسها فجأه كان واقف فوق راسها .. مسحت دموعها بحركه طفوليه ولفت وجهها بعيد عنه .. ــ ها ...
ــ لا ..بس ...,,
حس انها ماتبي تتكلم .. قال ــ لا بس كنت باخذ الآيسكريم ..و ابيج تعرفين مهما كان المووضووع ..انا اخوج ..اذا حسيتي انج تبين تفضفضين ..تدلين الغرفه ..
اول مايبي يطلع ــ حمد ..
رد بلهفه ــ هااا ..
ــ خل الايسكريم ابي اكله ..
ابتسم ــ بل ماترخص زاد بطنها .. جايب لج ولي ..ماكليت حقج يالزطيه ..
ــ مشكوور ..
طلع حمد من الغرفه وطالعت الاكل ..ونزلت دمعه ..مسحتها ..وفجت السندويش علشان تاكل ..لكنها مااحست بجوع ..حطته على جنب ..مسكت الايسكريم ..ومع اول ملعقه ..ردت لها الذكريات مع راشد داخل المحل ..تمت تصيح وتاكل...
_______________
في مبنى الاداره كانت المها جالسه معصبه ..ماانصفتها الدكتورة في درجه البحث ..قربت منها سهى معاها في الكلاس ..
ــ كم اعطتج ؟؟..
المها ــ عطتني 7 من 15 مع اني تعبانه فالبحث ..
ــ بس انتي تعرفين انها ماتعطي درجات حلوة فالبحث ..
ــ عشان جي تعبت عمري طول الشهر اللي طاف منثبره فالمكتبه ..
سهى ـ انتي ليش قدمتيه بدري ؟؟..
المها ــ هذي سياستي ..اخلص من ابحاثي وشغلي دام عندي وقت .. بروح لها اناقشها ..مب حالة ..
اول ماتبي تدخل مسكتها سهى ــ لا تناقشينها ...ترا بنخسفج اكثر ..
ــ ان خسفتني بحذف الماده غير مأسوف عليها ماضاع حق وراءه مطالب ..
راحت لها المها وحاولت تناقشها لكن لاسف ماكانت متساهله ولا حتى رضت ان المها تناقشها بشي ...طلعت المها من عندها مقهورة ..
ــ شفيج ..
ــ اخسفتني الظالمه ... عطتني 5 من 15 ..
وحست فيها الصيحه ..
ــ شبتسوين ؟؟
ــ بحذف الماده ..البحث عليه 15 ..والماده صعبه ..وانا حاسه انها حطتني في راسها ..بحذف الماده واخذها الكورس اللي جاي عند غيرها ..
ــ الله يعينج ...بس حرام تعبج ..
ــ كله بأجره .. عن اذنج اروح اسأل عن آخر يوم حذف ..
وطلعت المها من مبنى الاداره كاتمة عبرتها وراحت للقبول والتسجيل ... وسألت عن الموعد
واتصلت بخديجه خبرتها كل اللي صار ..
ـ لاتتتسرعين بالحذف ..
ــ شسوي ..مافي مجال اخذ فيها درجات زينه ..وماساعدتنا فالبحث ..
خديجه ــ بس دايم الدكاتره يغيرون رايهم .. وبعدين بتقعدين تحذفين المواد اذا الدكتور ماساعدج ؟اجتهدي ولك مجتهد نصيب ..ارجعي لبحثج ضبطيه وناقشيها دام في وقت ..
ــ شناقشها ؟؟ ..
ــ روحي لها وقولي لها بتقدمينه من جديد ..بس خل تعطيج فكره شالخطأ أو شالمطلوب ..
ــ انزين ..
رجعت المها لمبنى الاداره ودخلت عند الدكتورة ..
الدكتورة ببرود ــ حذفتي الماده ..
ــ لا .. جيت اطالب باعاده البحث ..
طالعت لها الدكتور بدهشه ــ توقعتج بتحذفينها نفس هالبنات ..
ــ لا بس ..بعيد البحث . ممكن لو سمحتي اعرف نقاط الضعف في البحث ؟؟..
ابتسمت الدكتورة ــ تعرفين ..بعض الاحيان قليل من الطلاب يحسسون الدكتور انه مجرد مقرر يعديه والسلام ..اتمنى من الطلاب انهم يستفيدون .ليتهم يشيلون هم الاستفاده قبل هم الدرجات ....والاستفاده اغلب الوقت تكون في الاعتراف بالخطـأ اكثر شي .. تفضلي اجلسي وانا بعرض عليج اخطائج ..
جلست المها وتمت تراقب الدكتورة اللي مسكت بحثها وناقشته معاها واهم الاخطاء وانصدمت المها من اخطائها ..وماتوقعت انها مخرربطه الدنيا بهالطريقه ..
اخيرا اعترفت وقالت : دكتورة انا آسفه اني اتهمتج بانج غير منصفه ...
الدكتورة وعلامه الرضا مرسومه على ملامحها : الاعتراف بالحق فضيله ..وأيضا الاعتراف بالخطأ فضيـله ..بعض الناس يهملون هالجانب ..مايعرفون ان رضا النفس مايتحقق الا بالاعتراف بالخطـأ ..نحن بشر ..وكلنا نخطأ .. مافيها شي .. وذا ماعترفنا بأخطائنا ..نتوهم انا خالين من الاخطاء ..

طلعت المها ولقت سهى في طريقها ابتسمت لها ..
ــ عطتج درجه أعلى ؟ ؟؟
المها ــ لا ..
ــ ليش هالابتسامة ؟

ــ بعيد البحث ..
طالعت لها سهى بدهشه ــ خيبه ومستانسه ..
هزت المها رأسها بأي وتركت سهى واطلعت متوجهه للمكتبه ..

__________________________

 
 

 

عرض البوم صور retaj   رد مع اقتباس
قديم 13-07-10, 01:43 PM   المشاركة رقم: 39
المعلومات
الكاتب:
اللقب:

البيانات
التسجيل: Aug 2007
العضوية: 36407
المشاركات: 56
الجنس أنثى
معدل التقييم: retaj عضو بحاجه الى تحسين وضعه
نقاط التقييم: 25

االدولة
البلدQatar
 
مدونتي

 

الإتصالات
الحالة:
retaj غير متواجد حالياً
وسائل الإتصال:

كاتب الموضوع : retaj المنتدى : القصص المكتمله
افتراضي

 

الفصـل التاسع عشر





ــ راشد,,
طالع وراه منصدم ..كانت عمته طيبه ..
ــ عمه ؟..
ــ راشد شلون سالم ؟؟..
ــ عمتي هو بخير .. تعالي اخذج له .
ــ لا ..مااقدر ..قلبي مايطاوعني..
انصدم راشد ــ عمه شتقولين ..هذا ولدج ..
ــ سعيد هنا ؟..
ـ لا سافر .. عنده اشغال ..
ــ هو قاعد ؟؟..صاحي ؟؟..
استغرب راشد ..عمته من صار الحادث من شهر ماسألت عن سالم ..واليوم جايته ؟؟..نظره الانكسار في عيونها ..
ــ لا نايم ..تحت المهدئات ..تعالي شوفيه مابيحس فيج ..
كان يكذب ..لكن لمصلحه عمته وسالم مب لمصلحته .. دلها الغرفه وين واول مادخلت تم هو برا يطالع من الزجاج ..
كان سالم مغمض عيونه لما قربت منه طيبه .. مررت يدها على يده ..فتح عيونه بتثاقل وقال ــ راشد ماجابوا العـشـ...
ماتت الكلمات على شفاهه لما شاف امه واقفه عند راسه ..انصدمت طيبه ..اغرقت عيونها بالدموع .. ــ سالم ..
لكن سالم لف وجهه عنها وغمض عيونه ..
ــ سالم ...
مارد عليها ...
ــ .... سالم ..
ــ بدري .. ماتأخرتي شوي بعد .. يمكن اطلع واجيك ..
ــ يمه سالم لاتقول جي ..
ــ لاتمثلين ...خلاص شفتيني ؟؟..توكلي ..روحي لاعمالج اولى ..
سكتت طيبه وقعدت على الكرسي جنبه .. ..
وتمت قاعده لين دخل راشد مع صينيه الاكل ..
وكان يبي يوكله ..لكن طيبه قامت ومسكت الصينيه ..وفتحت الشوربه وكل شي وحطت منديل على صدره و وحطته جدامه الصينيه وورفعت الملعقه اللي فيها الشوربه لحلجه .. لكنه ماكان يطالعها ..
ــ كل ..
ــ ابي راشد ...
ـلكنها ماتحركت من مكانها تمت واقفه ماسكه الملعقه لاكثر من خمس دقايق ..راشد مصدوم يطالع سالم اللي مب طايع يعطيها وجه .
ــ سالم ..لاتعاند ....وعن حركات البزران ..
طالع سالم لراشد ..
نزل راسه مستحي ان ولد خاله يشوفه يسوي هالسواه مع امه ..فج حلقه وانصدم لما حطت امه الشوربه في حلجه ونزلت دمعه من عيونها في نفس الوقت ..تساءل .ندم ولا ..حرج ..ولا ..شنو بالضبط ؟؟
كان جسمه كله مجبس كسور في كتفه ظهره الحوض ...تقريبا جبرت نص الكسور لكن للحينه عاجز عن الحركه ..بيبدأ العلاج والتمرينات بعد وقت قصير ..
استأذن راشد عشان يصلي ...
ــ شخبار العنود ..
ـــ توه ريلها مكلمني ..فالمستشفى ..
ــ شفيها وشلون خليتيها بروحها ؟؟
قالت ببرود ــ عندها زوجها ..وبعدين هي بس اجهضت ..
طالع لها مصدوم ــ شالبرود اللي فيج ..اجهضت ؟؟ ببرود تنطقينها ؟؟ يعني الحين حالتها النفسية زفت ..
ــ قلت لك ريلها عندها ..
ـــ بس هي ماتبي ريلها .. تبي امها ...
ــ انا هنا لاجلك وجنبك ..
ــ انا عندي راشد مب مقصر معاي ..
حطت رز في الملعقه وقالت ببرود ــ يعني مستغني يعني ؟؟
حزت في خاطره نظرتها ـ انتي امي .مستحيل استغني عنج ..
ـ عيل شقصدك ؟؟..
ــ العنود احوج لج مني ..روحي لها ولي تطمنت عليها .... ارجعي لي ..نحن محتاجينج ..واايد ..
طالعت له مب مستوعبه ..هزت راسها وبعد ماخلص اكل طلعت ..
دخل راشد ــ وين عمتي ؟
ــ اتوقع بتسافر الدوحه ..
ـــ شنوو ..ليكون قلت لها شي ..
ــ لا ..بس العنود فالمستشفى ..وراحت لها ..
ــ شفيها ..
ــ اجهاض .
ــ لاحول ولا قوة الا بالله .. الله يعوضها ..صليت ؟؟..
سالم ــ لا للحين ناطرك تساعدني ..
ــ تامر أمر ..
وراح عنده راشد وساعده ..
_______________________

في قطر تحديدا في النشاط في جامعه قطر .. دخلت بنت النشاط وحذفت شيلتها على جنب ... وقامت تتمشى مع صديقتها فراغه حول النشاط ..
كانت المها ملانه تعبانه قاعده تتغدى من صب واي وناطره ديمه تجي تنضم لها ..وطلبت لديمه سندويش وبيبسي ..وطالعت الساعه كانت 11 ونص ..باي لحظة تجي د يمه لان كلاس التاسيسي يخلص هالحزه يوميا ..
طالعت المها البنت بس عادي ولاعبرتها .. لكن القطت اذونها الكلام فالطاولة اللي وراها ..
ــ اي اعرفها ..شايفه هاي اللي قاطه الشيله ..شعرها بني ؟.
ــ كل البنات فاطين الشيله ..اي وحده ..
ــ في شعرها فيونكه حمراا ..
ــ شفيها ؟؟
ــ شفتها واقفه مع الدكتور شوي وتطيح في حضنه من المياعه ..
ــ امبيه حاضنته !..
ــ وعله اقولج شوي وتطيح .. والدكتور متخبل عليها ..
ــ ابييييه ..ناس ماعندها شرف ..
قالت وحده ثالثه ــ ياكثر هالنوعيه ..تلاقين كم دكتور مغازلها ..
تكلمت الاولى ــ صدق ياما تحت السواهي دواهي ماتدرين اكيد بينهم غرااميات .. اقول لج تتدلع عليه بطريقه مااصخه قل ادب !..عاد ماسهل ماتطلع معاه .. دكتور وعنده ترخيص السياره ..
التفت المها لا اارديا وطالعت للشله وهي مبققة عيونها ..
ـــ انتم واعين للكلام اللي تقولونه ؟؟
انصدموا بنظرات المها وعصبيتها ..
ــ نعم شتبين ؟
طالعت لهم المها بعصبية ـ اتقوا الله ..قاعدين تقذفون بشرف البنت وتقولون عنها كلام !! حطيتي طوبه وربعج يكملون عليها جااهلين بالذنب اللي هم فيه .. قذف المحصنات ..
ــ وشدراج انها محصنه ؟؟
انصدمت المها ــ سواء محصنه ..ولا غيره .. مالكم اي حق تتكلمون في عرضها وتطلعون عليها اشاعات .. اذكروا الله واستغفروا قاعدين تاكلون في لحمها .. خافوا ربكم ..
قالت وحده منهم بكل وقاحه ــ اي ماتدافعين عن هالاشكال الا اذا كنتي وحده منهم !..
انصدمت المها ..طالعت لها باحتقار ..ماتخيلت الوقاحه توصل لهالدرجه ..قالت باشمئزاز ــ نعم ؟.. تتهميني ؟؟..انا ماعرف البنت ..ولا شكلي في يوم بعرفها . انا اتكلم عنكم انتم ..قاعده اوجهكم للفعل الصحيح ..الي تسوونه غيبه وقذف محصنات وافتراااء .. لكن للاسف ..انواعكم سهل عندهم الكلام باعراض الناس .. الله يهديكم ..
التفت المها وعافت السندويش وتمت تنطر ديمه ..معصبه ..تمنت لو عندها تلفون تكلمها فيه .. وتقول لها لاتجي ... بس للاسف .. اتفقوا امس يلتقون اليوم على هالطاوله وديمه بتقطع مشوار من تأسيسي لين هنا .... للاسف مافي مجال تغيير ..
رجعت اصوات البنات لاذونها وتمنت لو بيدها تصكر اذونها ومااتسمع .
ــ شوف الاخت ... مسويه عمرها شريفه روما .. العبايه والقفازات والنقاب ..الله يستر بس شتحت هالخرابيط ..
ــ فكينا منها .. صدقت عمرها الاخت ملتزمه امحق التزام ...الناس حرياات ..كلن حر في نفسه ..
حست المها بغيظ ..اكتمت غيظها ..مابترد على هالاشكال ..هم اصلا متعمدين يعلون صوتهم يبونها تسمع ..
دقايق وجت ديمه حذفت النظاره وجلست ..
ــ جووعااااااااااااااانه الله يخسه التيشر حاولنا فيه يطلعنا ماعطانا وجه ..
طالعت لها المها وقالت ــ قبل لاتفتحين الساندويش خل نغير المكان ..
ــ ليش ؟؟ مب شايفه النشاط زحمه مافي محط رجل !
ــ قومي .
انزلوا تحت وجلسوا فالكافتيريا اللي تحت .. وقالت ديمه
ــ بتبدأ امتحانات المد قريب الدكتور بدا يكثف المراجعات ..
المها ــ انتي شفيج ؟؟.. ضعفانه وجهج ماتردين على التلفونات ..ماتجيين .. ..فيج شي قولي ..
ــ لا ابد .. مافي ..
ــ ديمه ..
ـــ بس بعرس على محمد ولد خالتي قريب ..
قالت هالجمله ببساطه وتمت تاكل في السندويش وهي تمثل ..لكن ماقدرت حطت السندويش وانهارت بالصياح والبنات حولهم انتبهوا .. قربت منها المها وحضنتها وهي متفاجئة ....
البنات الفضوليات بدوا يسألون شفيها هزت المها راسها بعدم حيله
ــ ديوم الله يخليج هدي..الله يخليج ..كل شي بالتفاهم ..
ديمه ــ والله حاسه اني بموت .. من خطبتني خالتي ..وكلام هيا عن اتفاق ابوي وامي............. المها .. شسوي ؟
ــ ديوم مافي شي يصير بدون رضاج حتى لما يجي الشيخ يملج بكم يسألج رأييج ..
ديمه ــ والله احس انخه محكوم علي بالاعدام ..
ــ لاتخافين بكلم راشد واقوله ..
ــ طرشت له ..مارد علي .. حااسه بثقل في خااطري ..مارد علي ..
ــ ديووم يمكن مشغول مع سالم .. أو ..
ــ المها لاتقولين له .. ولا تفاتحينه في الموضوع .. انا بحاول اقنع ابوي ..لكن ابوي للحين ماعنده خبر عن جية خالتي والخطوبه ..
زفرت المها بعصبية ــ انزين ياقلبي قولي لخوانج ..
ــ ماقدر .. امي مسويه علي حصار ..ممنوع افتح الموضوع .. وقاعده هي وخالتي يجهزون وادفعوا عربون لصاله العرس من الحين علشان لعرس يكون شهر 4 اللي جاي .. واللي صج قهرني انها كل يوم جايبه لي المصممه حق فستان العرس ..
انصدمت المها ــ شفيها امج انجنت ؟؟لايكون جهزتي الفستان ؟؟
ــ لا ماجهزته ... كلله اشرد او ادخل الحمام ..هيا مسويه لي حصار نفسي ...تعبت يالمها تعبت .. ماقدر ..
ــ انزين .. انتي تحبين رااشد ؟؟..
ــ شالسؤال يالمها ..
ــ تحبينه ؟؟
ــ اعشقه ..
ــ قال لج انه يحبج ؟
هزت ديمه راسها وانزلت دموعها ..
ابتسمت المها ــ لاتخافين دام هالراس يشم الهوااا .. انتي الحين اهدي وتصرفي طبيعي ..وان شاء الله بحاول اخلصج من هالمصيبه ..
ديمه ــ تهقين افتك ؟
المها ــ لاتخافين دام الجهات العليا كلها تحت يديني ولا ايوها حد يقدر يستجرأ يسوي لج شي انتي ماتبينه ..
ديمه ــ بس راشد مارد علي ..ماقال يبني .او ..
المها ــ المهم الحين انج ماتتزوجين هالولد دام ماتبينه ..
ديمه ــ صحيح ..تعرفيني اكره بيت خوالي ..صج صله رحم وكل شي بس ..اره مشاكلهم ..ولدهم هذا حتى كبري يعني يبون يفرحون فيه ويزوجونه بدري .. مب حبا فيني ..تخيلي مراهق ..
المها ــ المهم نأجل السالفه ..اعتمدي علي .. صصج اني حاسه بالذنب لوضع صالح الحين ..
ديمه ــ ليش؟
المها ــ لاتنسين اني انا من اقنعته ياخذ فاطمه ..مب انا كدووج بس .. فكرتي ..والحين المسكين في عالم ثاني .. يالله ...حاسه بالذنب ...
ديمه ــ المها ... لاتقولين جي حرام ..مكتوب له ياخذها ومكتوب له يعاني ..الله يعينه ..شلون جدتي ؟؟
المها ــ مب مستوعبه المسكينه .. لولا اني وخديجه هالفتره مرابطين في بيت جدي كاان صار فيها شي الله يحفظها .. صاحت عليها مثل ماصاحت على ابوي الله يرحمه ..وانعزلت في غرفتها ..واكتأبت .. لكن خديجة ماقصرت معاها ..
ديمه ــ الله يرحمها كانت طيبه ..
المها ـ للاسف ..الطيبين مالهم مكان في هالدنيا ..
وقعدت المها تتكلم عن الي صار لها فوق علشان تغير الموضوع على ديمه .. الي هدت نفسها شوي ورجعت تاكل السندويش ..
______________

دخل جاسم مستغرب وشاف مبارك عند الباب ..
ـــ شالسالفه ؟؟
مبارك ــ ما أدري .. اتصل فيك ؟
ــ ايه ..شالموضوع الضروري ؟؟
ــ مادري ..
دخلوا لداخل المطعم دوروه لقوه اخيرا في زاويه ..
ــ السلام عليكم ..
ــ وعليكم السلام اجلسوا ..
طالع مبارك صالح ــ شفيك؟؟ شالموضوع الطاريء ؟...
جاسم ــ ايه .. شالسالفه ..
ابتسم صالح ــ ارتزعوا واجلسوا ..
جلسوا الاثنين .. سأل صالح جاسم ــ شخبار الاسهم هاليومين ؟؟
طالع له جاسم ــ تراك متفيق ..جارنا في هالجزه تسألنا عن الاسهم ؟؟
ابتسم صالح مارد عليه فاضطر جاسم ــ طايحه شالجديد ؟؟.. محد يبيع محد يشتري وحاله ركوود ..
صالح ــ وحالتنكم الماديه ؟
مبارك استغرب ــ شالسؤال ؟؟
صالح ــ جاوبوا ..
جاسم ــ الحمدالله كل واحد فينا يشتغل والحمدالله ..
صالح ــ انزين شناطرين ؟؟..
استغرب مبارك ــ ؟؟؟؟؟شتقصــ....
ــ متى ناوين تملجون وتجهزون للعرس ؟؟؟....
___________________

مسكت المها تلفون خديجه واتصلت في راشد ..
ــ هلا ..
ــ راشد انتي تدري ان ديمه بتروح منك وساكت ؟؟..
ــ وعليكم السلام ..
ــ راشد الله يخليك انا قلبي متقطع على ديمه ..
سكت راشد ..
ــ ياخي شفيك تحرك اتصل بعمي ..
همس راشد ــ المها .. مب حلوة تعرفين عمي صالح توه ....
ـــ انت مجنون ؟؟ بتطير البنت منك !.انا ماقول سو عرس ولا تزوج الحين على الاقل اخطبها ..
ــ شلونها ؟؟..
حست المها انها بتتنرفز من بروده ..
ــ راشد اصدقني القول .. انت بحت لها بمشاعرك ؟
حس راشد بخجل جدام المها ــ ها ؟.
ــ انت قلت لها عن مشاعرك ؟؟
ــ اي ..
ــ قلت لها انك تحبها ؟؟قلت احبك ؟
قال راشد في نفسه محرج (( اللهم طولك ياروح )) ــ اييي...
ــ ارجوك راشد .. كلمة الحب وعد ..مب لعب ..
ــ انتي شتخربطين ..
ــ ياراشد الناس ماتنطق هالكلمة الا وهي قدها .. الحب وعد .. اذا نطقت احبك لانسانه انت توعدها بالحياه معك وبمشاعرك .. .. كون قد وعدك واصدقه لديمه .. ..
ابتسم راشد ــ شكلج ماخذه مقرر علم نفس وتطبقينه علي..
ديمه ــ هذي علوم الدنيا والبشر .. مااطلب منك الا انك تكون قد وعدك ..انا بحاول بطريقتي افركش الخطبه ..دام ديمه ماتبيها ..
ــ ياليت .. انزين اكلمج بعدين ..
صكر التلفون في قلبه زفره طويييله ..بس حشم سالم اللي قاعد جنبه وابتسم ــ الهبله المها ..
سالم وهو يطالع له ــ شبلاها ؟؟..
ــ هبله ..
ضحك سالم لكن راشد ابتسم .. طالع جواله مقهور ... ماقدر يشرح للمها اسبابه بسبه ان سالم جنبه .. كان بيطلع لكن ماقدر يحسس سالم بشي ..
_________________
المها صكرت الجوال راحت لغرفه جدتها ..بغت تفتح الموضوع معاها لكنها لقتها نايمه .. رجعت للصاله ..
كانت الساعه متأخره .. تقريبا 1 وشي ... قعدت تدور في البيت لين حست بصوت سياره وشافت سيارة صالح من النوافذ العاليه .. وأول ماشافته صك باب الحوش طرت على بالها الفكرة ..
ــ صلوووح هو اللي بيحلها ..
وراحت ركض للغرفته وهي بجلابيتها البيتوتيه اللي كانت خفيفه عليها رسمة ام خماس كبيرة ونص كم .. ولابسه شحاطه ماخذتها من محل بو سته الصيني ((اللي صار بوسبعه مؤخرا )) ..
شكلها مبهدل وشعرها رافعته كله بكلبس والقصه رافعتها بمشبك فراشه احمر ..
دخلت غرفته صااااروخ بدون ماتطق الباب وقالت بسرعه
ــ صلوووح عندي موووضوووع حياة او موووت لااازم انــ.....
وماتت الكلمات على شفايفها وشهقت شهقه كبيره كانت بتصارخ وهي تشوف الرجال في الغرفه قاعد على سرير صالح يلتفت لها وركض بسرعه قرب منها و حط يده على حلجها ــ لاتصارخين .. انا جاسم ...
انتفضت ودزت يده بقوة وطلعت تركض لبرااا ... دموعها همايل ... لين اطلعت غرفتها واحمدت الله ان خديجه مب موجوده .. قعدت مذهوله .. هذا شيسوي في غرفه صالح ؟؟؟..
______________
كان صالح في المطبخ دخل من الباب الخارجي علشان مايقعد احد اخذ ماي ورجع لجاسم اللي كان واقف وقفه غريبه ..
ــ شفيك ؟..
لف جاسم عنه وهو يقول مغمض عيونه ــ ولاشي ... وين رحت ..
صالح ــ صكرت باب الحوش ورحت اجيب ماي لحضرتك .. افرش لك بالمجلس؟ ولاتنام عندي ؟؟..
طالع جاسم غرفه صالح ــ لا بالمجلس احسن .. اخاف حد من هلك يجي ومايدري فيني ..
صالح ــ ايه ..صحيح لان غرفتي هذي مطله على باب داخلي ..يستخدمونه بنات اخوي .. عيل قوم ..
جاسم وهو للحين معطي صالح ظهره ــ قلت لك اتصل بخليفه يجي ياخذني ..
صالح ــ لا مافي ... تنام عندي وخلاص والفجر روح بيبتكم ..
خربت سياره جاسم جدام المطعم ..حاول يشغلها لكنها مااشتغلت .. مايعرف شالسالفه ..اصر عليه صالح انه يركب معاه وبعدين يجون مع عامل ميكانيكي يشوفون وش فيها ..
طالع جاسم صالح وحس انه يبعد عنه . مايدري ليش ..يبي يخبي انفعالاته .. واول ماوصل للمجلس وين فرش له صالح ــ شوف ام خماس شتبي فيك ...
طالع له صالح مستغرب ..
ابتسم جاسم واشر فوق ..
تم صالح مستغرب ..
ـ ))Myهمس جاسم ـ ((
واشر على صبعه اليمين (البنصر )* ..
سكت صالح منحرج بعد مافهم انه يقصد المها .. فقال جاسم ببراءة
ــ اعتبرها شوفه شرعيه ..
قال صالح بخبث وهمس عن لايسمعه ابوه النايم ــ كم مره عاد ؟؟...
جاسم بهمس ــ للامانه العاليه فيني والذمه والضمير..لاول مره ..
صالح ــ انزين بنروح نشوف .. يله تصبح على خير ..
اول ماراح صالح تم جاسم يتأمل يده ... لمس شفايفها ..غمض عيونه ..يتذكر عيونها ..ريحتها .شعرها ...صوتها .. همس بقلبه يااااااااه ..((جنية مب انسية سحرتني ... سكنتي ..البستني .. اه مانسى ريحتها .. هالقرب كانت مني .. رموشها .. صج كانت لحظة ...بس .. لحظة عن عمر .. ))
______________________

كانت المها في غرفتها تتنافض مذهوله ..شالموقف البايخ ..دخل صالح ..ابتسم لااراديا وهو يشوفها ..
ــ ليش مكشف الضروس..
صالح لا اراديا بدون مايفكر
ــ طلعتي له بهالشكل معقووله !!...
بعدين توهق صالح ..طالعت له المها برعب وتمت تصييح ..
قرب منها وهو يهديها ــ شفييج..هو قالي ام خماس جت تسأل عنك .. وانا جيت لقيتج بالدراعه ام خماس وشكلج عبط ميه وثماتنين درجه ..
وهو كاتم ضحكته .. لفت المها وجهها عنه ..
ــ شفييج..شكنتي تبين ؟
ــ بعدين اقولك روح لرفيجك ..
ــ قصدج خطيبج ..الاخ نايم ..
ــ خطيبي ؟؟.. عمي .. مابيه ..
صالح ــ اي قلت لي من قبل ..
طالعت له المها بخوف ــ عمي ..صدق مابي هالانسان ..
طالع لها بثقه ــ قلت لج عطيني سبب مقنع ..
ــ لانه حقير وااطي خسيس ..
ــ المهـــــــــــــــــا ..اعرفي حدودج ..
نزلت دموع المها غصب عنها وقالت بخوف عمي بقول لك شي ..بس .. لا...تــ... عمي هالانسان ساومني على نفسي ..
طالع لها صالح منصدم ماتوقع انها تعترف له ..
ــ لاتبيعوني له ياعمي .. الله يخليك ..
تم صالح ساكت يطالعها بنظرة اقشعر جسمها لها ..
ــ عمي والله اني .. عمي ترا .. عمي الله يخليك ..
تم صالح ساكت ..
ــ يوم كنا في سيلين ..ايام الخيول .. كانت الخيل اجمحت واركضت بعيد .. ويوم صديت طارت شيلتي .. و....
تمت دموعها تنزل بقوة .. ــ كانت بين يدينه .. عمي تخيل الوقح .. يساومني على شيلتي .. شلون ؟.. شلونا تزوج بواحد يساوم بنات العرب على عرضهم ؟؟.. شلون توثق فيه ؟؟ عمي انت فاهم شأقول ؟؟
ـ اي فاهم ..
ــ وواقف جي ؟؟.. ماتنزل تذبحه ؟؟..تزنطه ..تطرده بره البيت ..
ــ مب اول مره اسمع هالكلام .. جاسم اعترف لي بكل شي .. حتى كرت المستشفى ..

فجتا لمها حلجها على كبر .. انصدمت .. طالع لها صالح بابتسامه
ــ سكري حلجج بانت احبالج الصوتيه ..
تأتأت المها ـ بس .ش ش ..لو..ن ؟..
صالح ــ ما انكر اني كنت بذبحه اول مااعترف لي..
تمت المها مصدوومه ــ ورضيت فيه يوم تقدم لي ؟؟.. لييييييييييييييش؟؟
ــ لاني اعرفه ..اعرف صديقي ..اعرفه مايلعب باعراض الناس ..اعرفه مايرفع عينه في عين الحريم دامهم مهب محارمه .. ماادري شاللي خلاه ينسى مبادئه في لحظه .. يمكن شيطان ..ماتوقع ابد انه ممكن انج تسوين سواتج .. وانا منصدم منج .. فخور بنفس اللحظة بس غاضب لاقصى درجه ..بدل لاتهربين منه .. بدل لاتصرخين وتجميعين خلق الله ..قررتي تواجهينه بروحج وتسرين راسج ..ماادري يابنت يوسف ..شجاعه ولا غباء ..كبرياء ولا ذل .. اللي سويتيه ماتسويه عاقل ..
انحرجت المها بقوة .. نزلت راسها بذل .. رفع راسها
ــ انا اعرف صديقي ..خاويته في سفر وخاواني في عمر .. اعرف اخلاقه اكثر منه .. واعرف انه رجال زين مصلي ..يمكن عيبه الوحيد انه يظهر مشاعره بشكل مفرط ..
ــ عمي لاتمدحه ..أنا مابيه ..
ــ هو شارييج ..
ــ وهذا اللي خايفه منه .. خايفه انه يبي يكسر راسي ..يبي يذلني ..يرد لي الصفعه ..
تمت المها ترجف بقوة حضنها صالح ــ لو غيره قلت لج ايه مايصلح ..بس هذا جاسم .. مخاوي عمج عمر .. مخاوي اخوج .. مخاوي المسجد .. اعرفه .. اعرف انه طيب ..انه حبج وكبرتي بعينه ..مهب من شباب هاليومين اللي يلعبون على بنات الناس . ويستفردون فيهم ولا من الشباب اللي مايرضى حرمه ترد له مطلب .. ااعرف انه بيعتز ببنت مثلج ..ماعرف شلون حبج ..انا لو اني منه .. اشرد .. بس اشوف طيفج هههه ..
ابتسمت المها وهي تبتعد عن حضن عمها وتضربه بخفه ..
ــ شكنتي تبين مني ..
فجأه تذكرت كل شي تذكرت راشد وديمه ..
ــ ديمه ..
ــ شفيها ؟؟
ــ انخطبت لولد خالتها ..
انصدم صالح ــ متى ؟؟..
ــ مادري ..بس عمي انت تعرف ان راشد يبي ديمه ..
ــ ادري ..
تنهد صالح .. ــ شسوي ؟ عبدالرحيم حتى ماشاورنا ..
ــ عمي مايدري ..مرته تخطط لكل شي من تحت لتحت .. حجزوا صاله وبروفات وفستان ..
انصدم صالح ــ من قالج ؟
ــ ديوم بنفسها ..المسكينه منهاره ماتبيه ..تراه هو مراهق للحينه ثمنطعش ..ديوم ماتبيه ..
ــ علشان كذا ..
ـ شنو ؟؟
ــ قالوا لي اخوانها انها متغيره .. بس مايعرفون السبب ..
ــ حتى اخوانها مايدروون .. مرت عمي قاعده تسوي كل شي من تحت لتحت ..علشان تحط عمي جدام الامر الواقع ..واتوقع هالاسبوع بيتقدمون ..
ــ وراشد وينه ..شنو مايبي البنت ؟؟
ــ يبيها والله يبيها .. بس هو عند سالم ..ومنحرج منك ..
ــ ليش ؟؟..
ــ اتوقع لانك توك مترمل ..فما ...
ــ خلاص .. مب عذر .. انا بدبرها ان شاء الله .. تصبحين على خير ..
وقف صالح وراح عند الباب ..وفجأه وقف وقال بابتسامه خبيثه ــ على فكره ..ترا الخميس ملجتج .. !.!.
انصدمت المها فجت حلجها على كبر وقال صالح ــ سكري هالمغاره لاتدخل ذبابه .. واختج بعد بتملج الخميس ..اتفقت مع عبدالرحمن وجاسم ومبارك ..مبرووك مقدما ..
وطلع وسكر الباب وتمت المها مصدومه !.
___________________

كان صالح في غرفته مقهور .. مايقدر يتخيل ديمه زوجه لاحد غير راشد .. مافي حل الا انه يسافر عند سالم ..ويجي راشد يمنع زواجها ..
حس بنفسه عبء عليهم ..فتح الانترنت ودخل ..محد اون لاين . . اذا جاسم بالمجلس نايم ومبارك اكيد نايم .. سكر من المسن دخل المنتدى ..مافي شي ملل روتين .. طالع الساعه ..شوي ويأذن .. صكر النت وقام لبس وراح المجلس .. تم واقف هناك يتمشى في الحوش ..الجو كان روعه ..الشتا على وشك ان يبدأ .. لين سمع الاذان ..دخل قوم جاسم وابوه .. وراحوا المسجد ..
وهم في الطريق ــ مانمت ؟
استغرب صالح ــ شدراك ..
جاسم ــ اسمعك تفر في الحوش ..
صالح ــ حتى انت مانمت ؟
جاسم بهمس ـ ماااقدرت ..
ابتسم صالح ــ مالومك .. يبه شربت دواك ؟
بو عبدالرحيم ــ بشربه لي رجعنا ..
صالح ـــ يبه ترا اتفق عبدالرحمن وجاسم ومبارك على موعد ملجتهم ..ان شاء الله الخميس..
بوعبدالرحيم يطالعه بريب ــ ليش العجله ؟؟...بدري..
صالح ــ بدري من عمر ك يبه .لاتنسى ....خير البر عاجله ..
كان صالح فاهم ان ابوه قصده ان توه صايره حالة وفاه في عايلتهم ..لكنهم ماحب يفتح الموضوع جدام جاسم قعد يتكلم عن نيته انه يروح لمصر عند سالم ..
______________
في مستشفى النساء والولاده .. احد الغرف الخاصه .. كان احمد واقف بره ينتظر ..
طلعت ساره ــ الدكتورة قالت ما بيطلعونها هاليومين .. فيها انهيار عصبي حاد .
سكت احمد .. ماقدر يقول شي ..ــ ابي اشوفها ..
ــ ماادري شالسبب لكن الدكتورة مانعه الزيارة ..
انقهر احمد هذا ثالث يوم ماشافها .. جلس جدام الغرفه على الارض ..
ــ احمد ياخوي قوم هذي مب حاله ..صار لك ثلاث ايام مرابط جدام الغرفه ..
ـــ ماروح لين اشوفها ..
ــ احمد ..الله يخليك ..قوم احلق لحيتك ..وروح الشركه ترى ابوي صار له اسبوع متوهق بالشغل .. والعنود ماعليها شر ان شاء الله تقوم بالسلامة ..
ــ شفيها العنود ؟؟..
انصدم احمد من الحرمه اللي تكلمه ..ماعرفها .. قالت ساره ــ هلا ام سالم ..
طالع احمد مستغرب لساره ــ ام العنود ..
قالت طيبه ــ انت احمد ؟...
هز راسه بأي .. لان قلبها لما شافت حالته .شكله تعبان ومستعم عيونه حمرا ..
ــ حد عند العنود ؟..
ــ الدكتورة توها طلعت ..
راحت عند الباب لماقالت سارة ــ الزيارة ممنوعه ..
لكن طيبه ما عبرتهم ودخلت .. كانت العنود مغمضه عيونها ومتكوره على نفسها ..قربت منها طيبه ..
ــ عنودي ...
فتحت العنود عيونها ..بدون مقدمات اول ماقربت منها طيبه رمت نفسها في حضن امها ..تمت تصيح بقووة ... واغمى عليها ..
كان احمد منصدم ... ماتخيل حالتها بهالسوء ..
كانت طيبه تحاول تصحيها ــ عنودي ..عنودي قومي يمه ..عنود ..
التفت لقت احمد عند الباب ــ احمد ناد الدكتورة ..
طلع احمد مايشوف طريقه ..
الدكتورة وبحزم ــ انا قلت ممنوعه الزياره ..
ــ انا امها !...
ــ ولو .. كان مفروض تنتظريني ..
انت العنود تفتح عيونها وهي تشوف الدكتورة تهاوش امها ..
ــ يمه ..
التفت لها طيبه وقربت مبتسمه ــ الحمدالله على السلامه ..
قرب احمد منها ومسك يدها ...عنود حبيبتي شلونج ..
طالعت له العنود منصدمه ..كانت عيونه تحمل داخلها خوف .. يطالعا بحب ..لحيته مبين انه ماحلقها من ايام ...
ــ احمد ..
مسكت يده بقوة .. حست طيبه انها ظلمت العنود.. لما شافت اهتمام احمد ..عرفت انه يحبها .
استأذن احمد .. وطلع برا ..
عرفت طيبه في داخلها ان قصتها مابتكرر مع العنود ..ابتسمت ..واركبت السرير وجلست وحضنت عنود
ــ عنودي ..اعرفج طول عمرج قوية .. والله يعوضج ان شاء الله ..ليش متشائمة ؟... شوفي شلون خوفتي احمد عليج .. سمعت ساره تقول له برا انه مرابط فالمستشفى من ثلاث ايام ..هاد شغله وكل شي علشانك .. يستاهل منج هالمعامله ؟.. ابيه لي رجع.. ترجعين العنود القويه ..
ــ يمه ..غلطتي انا ..انا ماكنت ابيه ..
طيبه ـ فديتج حبيبتي .. مكتوب له مايكمل هالحمل ..سواء كنتي تبينه ولا لاء .. وبعدين توج صغيره .. توج باول العمر .. بكره تكبرين وتترسين البيت يهال ..
العنود ــ ان شاء الله ..

_________________________
وصل راشد للدوحه يوم الخميس الظهر . دخل المجلس وكان جده وعمامه جالسين مع جد جاسم وابوه .. سلم عليهم واعتذر لانه تأخر .. جا الشيخ .. وبدت مراسم الملجه .. اول شي كان جاسم ..
دخل الشيخ مع راشد لين ال مقلط .. وكانت المها واقفه هناك مع نوف تصارع نفسها .. تقبل ..ولا .. لا ..
نوف ــ الشيخ يسألج موافقه ؟؟..
طالعت المها لنوف .. قلبها يدق بسرعه ..كلام صالح .. لا .. جاسم .. لا .. ولقت نفسها تقول بدون ماتحس ـ موافقه .
انصدمت من نفسها .. شلون انطقت بالموافقه .. لا ماتبيه شلون قالت موافقه ؟؟ لا ماتبيه ..ماتبيه .. .. تمت سرحانه طول الوقت .. ماحست بنفسها لما وقعت .. ماتذكر من سلم عليها ومن بارك لها .. بس تذكر فرحه راشد وهو يحب راسها وفي عيونه اشباه الدمع .. فرحة راشد ..خلته تلتزم الصمت طول الوقت .. الكل قال خجل ..الكل قال تستحي ..لكن محد يعرف انها عايشه صراع داخلي...
في المجلس ..جاسم لاول مره ساكت ..مب مصدق ..المها صارت له ؟..استقبل تهاني الكل ... وسلم عليهم .. واكثر شخص فرحان بعده هو جده ..اللي حضنه بقوه ...
جا دور مبارك ... دخل الشيخ وسأل خديجه اللي ردت موافقه براحه تامه . .. وخلصت الملجه ومبارك مستانس محد قده ... الكل بارك لخديجه ....جدها و اخوها عبدالرحمن اخوها راشد وجدتها وصالح اللي شوي ودموعه تخونه ...عمتها طيبه وبنتها عبير وولدها عامر ..نوف ..ومنصور .. اللي حست خديجه ان الحب عرف طريقه بينهم من طريقه مسكة منصور ليد نوف .. حتى المها طلعت من صمتها وباركت لها ..وبعدين راحت لغرفتها ...
_________________

 
 

 

عرض البوم صور retaj   رد مع اقتباس
قديم 14-07-10, 04:28 AM   المشاركة رقم: 40
المعلومات
الكاتب:
اللقب:

البيانات
التسجيل: Apr 2010
العضوية: 160269
المشاركات: 7
الجنس أنثى
معدل التقييم: mis dl3 عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
mis dl3 غير متواجد حالياً
وسائل الإتصال:

كاتب الموضوع : retaj المنتدى : القصص المكتمله
افتراضي

 

السلام عليكم ورحمة الله وبركاته
الله يعطيك العافية
غاليتي اشكرك ع البارت اللي اكثر من رائع
دمتي بود

 
 

 

عرض البوم صور mis dl3   رد مع اقتباس
إضافة رد

مواقع النشر (المفضلة)

الكلمات الدلالية (Tags)
للكاتبة غجريه, ليلاس, القسم العام للقصص و الروايات, روايات و قصص, روايه خليجيه, روايه على رمال سيلين كاملة, روايه قطريه مميزة, سيلين, على رمال, غجريه, قصه مكتملة
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 10:45 AM.


مجلة الاميرات 

 



Powered by vBulletin® Version 3.8.11
Copyright ©2000 - 2020, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية