كاتب الموضوع :
غموض
المنتدى :
القصص المكتمله
الجزء الســـــــــادس
كانو البنات جالسين يسولفون
و العنود راحت تفتح الباب لسحر
العنود فتحت الباب ودخلت سحر
العنود : هلا ااااا ( وتسلم عليه ) أخيرا كل الوقت جالسه على أعصابي
سحر : وش أسوي زحمة الشوارع وش أخبارك ؟؟
العنود : الله يسلمك تمام وش ها لزين سحر طلعت حلوه وحنا ما ندري
سحر : الله يسلمك عيونك الحلوين
العنود : يالله اخلصي خليهم يشوفونك صديقتي الحلوه
سحر : خخخخخخخ طيب عنوده شوي أزين شعري
ومشو وهم يسولفون
دخلت العنود ووراها سحر
العنود : بنات أخيرا شرفت أميرتكم سحر
سحر ضربتها على كتفها <<< مستحيه
قامو البنات وسلمو عليها وجلست العنود تعرفها عليهم
العنود قالت لسحر في اذنها تعالي بنروح أنا ومنى وانتي لغرفتي أحس أحسن فيه أشياء بوريكم اياها
سحر : خلاص يالله
العنود قامت : بنات اسمحولنا بنطلع أنا وسحر ومنى
منيره : مسمحوين روحو بس لاتتأخرون انزلو بسرعه
العنود : طيب يالله تعالو
قامو سحر ومنى
وهم في الطريق
العنود : من هنا تعالو
منى وسحر يسولفون ولا عطوها وجه
منى : ياحليلك متى دخلتيه المنتدى ؟؟
سحر : من زمان وأنا فيه مسجله
العنود : أصلا موب حلو المنتدى اللي مسجله فيه
سحر: بالعكس مرره حلو وتعرفت على بنات فيه كثير
العنود : أنا ما أحب أتعرف من المنتدى وش يضمن لي
منى : أقوووووول بالعكس عادي وش فيها وانتي يالكذابه متعرفه على وحده تذكرين يوم تقولين لي أنك عرفتي وحده اسمها شهد
العنود : عاد شهد غير ياحبيلها من زماااان أعرفها من يوم سجلت المنتدى وهي حبيبه
سحر : حرام علينا وحلال عليك انتي ياأميرتنا
العنود : على طاري أميرتنا وش رايك تو يوم قال ( شرفت أميرتكم )
خخخخخخخخخخخخخخخ
سحر : سخيييييييفه أصلا مايضحك أحرجتيني بس توني داخله بسلم باتعرف عليهم وانتي تتهزين فيني
منى : هههههه ياحبيلك تراها هذي دايم كذا حتى تو تقولي قدام الحريم أنا وعععع يوم قالو اني اشبها
العنود : ههههههههههههههههه ياحليلكم وانتم معصبين تعالو من هنا غرفتي بس
وفتحت الباب ودخلو
العنود : هلا وغلا نورت الغرفه واعتذر عن هذي الحوسه ترى دايم انا نظيفه بس اليوم مالقيت وقت أنظف
سحر : لا صدقناك يالنظيفه
وتقوم العنود تطلع دفتر لونه أحمر وشكله يجنن
العنود : سحر تعرفين هذا الدفتر
سحر : الللللللللله من وين طلعتيه هذا ذكرياااات حلوه
منى : لا تقولين هذا دفترك اللي من أولى ابتدائي
العنود تضحك : ايه وأتوقع انتي مخربطه علي فيه
منى : ههههههه جيبيه نشوفه بس
وجلسو يتفرجون عليه وكان ذكريات حلوه ضحكوعليها ضحك
من جهه أبعد شوي عبد العزيز جالس بين أربع جدران وكل هموم الدنيا فيه حتى الأكل ياكل عشان مايموت بس طق الباب الضابط
الضابط : السلام عليكم
بدون نفس وحتى مارفع راسه : وعليكم السلام
الضابط : ابوك عند الباب
رفع راسه بسرعه وناظر بعيونه اللي تحتها سواد من السهر والهم : ابوي ؟؟؟؟؟؟
( عبد العزيز ما احد زاره ولا فكر فيه من دخوله السجن غير أمه مره جته وأبوه كان مره معصب عليه ولا فكر يزوره بس هالمره ما يدري وش عنده )
الضابط : تفضل معنا
قام بثقل ويوم قام حس بدوخه فضيعه وقف شوي الين صفا الجو عليه
ومشى مع الضابط وشاف ابوه من بعيد اقشعر جسمه من زمااااان ماشافه ويشوفه في هالموقف وش بيكون ردة فعله مني كان مره خايف
الضابط مشى عنهم بعيد عشان ياخذون راحتهم
عبد العزيز : السلام عليكم يبه وحب راسه
أبو عبد العزيز : وعليكم السلام مع اني ما اتشرف اني ابوك بس شي سحبني اليوم لك
عبد العزيز : يبه سامحني ادري غلطتي كبيره وصعب تغفر لي بس أنا ندمان ( دمعت عينه في هاللحظه ما تحمل هالنظره من ابوه )
أبو عبد العزيز : ندمان ؟؟؟ بعد ايش ياعبد العزيز بعد ما نزلت راسي أنا وأمك وصارت الناس كلها تحكي فينا الله يسامحك ..
عبد العزيز : يبه أرجووووك كلنا نخطي وأنا أبشر لا طلعت من السجن بارفع راسك وتفتخر فيني
ابو عبد العزيز : ماندري والله وش بيصير هل بيسمحون لك ولا لا ؟؟ يالله توصي بشي بس حبيت اطمن عليك
عبد العزيز : سلامتك يبه وسلم على الوالده وخواتي
ورجع يسحب رجوله حس انه فقد كل اللي حوله حتى ابوه أغلى ماعنده راحت الثقه اللي كان حاطها فيه عقب هالموقف
منيره جالسه مع حنان والجوهره
منيره : أي سوق اللي اشتريته منه؟؟
حنان : من صحارى بس مررره يجنن بس نوره الى الحين تدور فستان
منيره : وش رايكم طقمو انتي وياها
حنان : لا لا أنا ما احب هالحركه خليك ساكته
الجوهره : مع انكم تتشابهون مره حتى ما قدرت أفرق بينكم ولا منيره ؟؟
منيره : بعذرك اللي يشوفهم اول مره مايفرق أبد بس أنا خواتي اكيد بعرفهم ههههههه
نوره وليلى مندمجين مع بعض وكل وحده توري الثانيه صور من جوالها ومقاطع
ليلى : ههههههه نوره الله يرجك من وين جبتي المقطع هذا يموت من الضحك يعجب واحد من اخواني لو يشوفه ارسليه
نوره : هذا ما خذته من جوال ناصر أخوي
عند الرجال سلمان بعد ماسمع ان فهد يبغى ياخذ منيره وهو متنكد وضايقه الدنيا عنده
<<< مسكينه منيره لو تدري بس أنا راح أوقف معها وأقنع أبوي قدر الإمكان ..
سعود لاحظ هالشرود عليه وعارف السبب اللي خلاه كذا
سعود : سلمان وش فيك قلبت الدنيا
سلمان : سعود ماتزعل إذا قلت لك أني مابي أخوك ياخذ منيره اختي
سعود سكت وفي خاطره ( معذور من يبغاه هذا )
سعود : طيب مافيه شي بالغصب شاوروها وبيصير خير
سلمان : أكيد ماراح نغصبها بس أبوي لادخلت الفكره مزاجه بيحاول الين توافق
سعود مايدري وش يقول في البدايه هو أخوه ما يقدر يتكلم ويقول لا توافقون
العنود فتحت لهم النت وجالسه توريهم مواضيعها ورجتها في المنتدى
العنود : والله قهر لو شهوده داخله الحين
سحر : طيب انتي ما اخذت رقمها ولا شي
العنود : لا ما وصلنا لهدرجه
منى : عادي لا دخلت قولي لها وأكيد ماراح تمانع من متى وأنتو صديقات
سحر : أقول العنود شو أخبار رقم أ ـ ابتسام ؟؟
العنود : آه ياقلبي هي والله وحشتني
سحر : هالعاشقه هذي مادريتي منى عنها
منى : وش فيها بنت عمي عسى ما طاحت في شباك الحب
سحر : ههههههههههههههههه إلا طاحت وصادوها
العنود : انقلعي سحر والله عادي الوحده تحب استاذتها
سحر : ايه عادي وش قلنا حنا وش صار وش رايك ترسلين لها رساله عشان تعرف رقمك
العنود : اممممم ما ادري مستحيه وش ارسل ذاك اليوم انقلب راسي وأنا أدور رساله حلوه ومؤدبه
سحر : أقول أي رساله بلا تعقيد
العنود : لا لا لازم رساله حللللللوه ومنمقه وكلماتها تصير
قاطعتها منى : خلاص اسكتي وانتي وحبيبه قلبك هذي
العنود أعجبتها الفكره : خلاص لا تزعلون عندك رساله تحسين يعني انها أسلوب
منى : شوفي جوالي مع اني أتوقع رسايلي كلها رجه وسواليف
هي ماسكه الجوال
دخلت الماسنجر شهد
العنود : شهوووووووووووووده
سحر : بسم الله علينا خليني أكلمها وخري
العنود : يالله وقولي لها أنا سحر ترى تعرفك مسولفه لها عنك
شهد بدت تكلم
( حبيب الروح ونورالعيون انت وبس )
هلااااا عنوده الحلوه
( ما أجمل أن تبتسم وفي عينيك ألف دمعه )
هلا وغلا فيك
( حبيب الروح ونورالعيون انت وبس )
كيفك ياقمر ؟؟
( ما أجمل أن تبتسم وفي عينيك ألف دمعه )
تمام وأنتي أخبارك وعلومك ؟؟
( حبيب الروح ونورالعيون انت وبس )
الحمد لله أقول وش هالموضوع الرجه اللي منزلته على المنتدى ؟؟
سحر : أقول العنود وش سالفه الموضوع ؟؟
العنود : والحين ليش ما تقولين لها انك سحر
سحر : خليني شوي العب عليها يلا وش أقولها ؟
العنود : ما ادري انتي ورطتي عمرك كملي معها
سحر تضربها على راسها : عنيده
( حبيب الروح ونورالعيون انت وبس )
ألووووووووو وين رحتي ؟؟
( ما أجمل أن تبتسم وفي عينيك ألف دمعه )
هلا هاه وش رايك في الموضوع حلو ؟؟
( حبيب الروح ونورالعيون انت وبس )
مره يجنن بس من هي اللي ضاربتك في القصه ؟؟
سحر : العنووود تعالي قولي شي
العنود سافهتها تسولف هي ومنى ويدورون رساله حلوه يرسلونها
( ما أجمل أن تبتسم وفي عينيك ألف دمعه )
ههههههههههههههههههه
( حبيب الروح ونورالعيون انت وبس )
خير وش فيك تضحكين عسى ماشر ؟؟؟
( ما أجمل أن تبتسم وفي عينيك ألف دمعه )
انا لست العنود خخخخخخخ
( حبيب الروح ونورالعيون انت وبس )
ايش ؟؟؟؟؟؟؟؟ أجل مين ؟؟
( ما أجمل أن تبتسم وفي عينيك ألف دمعه )
لا تخافين هههه أنا سحر قد مره سمعتي هالاسم ؟؟
( حبيب الروح ونورالعيون انت وبس )
سحر انتي الللي غاثتنا العنود عشانك
( ما أجمل أن تبتسم وفي عينيك ألف دمعه )
هههههههههه ايه أنا حتى هي كل سواليفها شهد
( حبيب الروح ونورالعيون انت وبس )
خخخخ وش أخبارك من زمان ودي أتعرف عليك وش عندك سارقه الايميل اليوم ؟؟
( ما أجمل أن تبتسم وفي عينيك ألف دمعه )
الله يسلمك أخجلتيني بهالكلام الحلو لا اليوم متجمعين عند العنود وهي جنبي هي وبنت عمها منى
( حبيب الروح ونورالعيون انت وبس )
شكلكم ونااااسه وفلله ليتني عندكم
منى يدق جوالها
العنود : خوذي الجوهره تدق
منى : ألو
الجوهره : يالله بنروح انزلي
منى : خلاص طيب الحين نازلين
منى : يالله العنود بنمشي
العنود : شخيفين تونا شوي وبعدين شوي أبي الرساله هذ أعجبتني ..
سحر : لقيتي رساله ؟؟؟
العنود : ايه تعالي أوريك مرره رايقه بس انتي قفلي النت الحين
سحر : طيب بقولها مع السلامه وأجي
ونزلو الثلاثه
العنود : خاله لبش كذا مبكرين بتروحون ؟
أم فهد : والله ما ادري عنه عمك أكيد عنده شغل المرات الثانيه أكثر ان شاء الله يالله مع السلامه
أم ناصر : مع السلامه والله اللي تشرفنا يوم عرفناكم
أم فهد : الله يسلمك وتجون المره الثانيه عندي ان شاء الله
منى كانت جالسه تلبس عبايتها وبجنبها سحر
منى : ياحليلكم ماودي أروح بسرعه مشى الوقت
سحر : أكيد بيمشي بسرعه معي احم احم
منى : انتي وش تقرب لك العنود يا فيكم ثقه
سحر : هههههههههه امزح والله نجتمع مره ثانيه أكثر والله من جد حبيتك
منى : ووووووه استحي ترى هههههه
وسمعت العنود تناديها
العنود : مننننننننننننى
منى : طيب جايه يالله مع السلامه سحر ( وسلمت عليها وطلعت )
سحر راحت وجلست مع حنان ونوره وليلى كانت واقفه مع منيره بتطلع
منيره : ياحليلها لازم أكلمها ملكتها بعد اسبوعين
ليلى : ايه أنا داقه على لمياء وقالت لي تقول انها يقالها مستحيه ما علمت أحد
منيره : ههههههه تعرف تستحي صارت
ليلى : يالله مع السلامه منور ( وسلمت عليها )
سحر يوم شافت الناس بدت تروح راحت دقت على أهلها بدون ماتدري العنود لأن العنود لو تدري ياويلها ماتبيها تروح بس هي حست انه فشييله مابقى الاهي
حنان : وش أخبارك سحر ؟؟
سحر : الحمد لله وانتو ؟؟
نوره : بخير
سحر : صراحه أهلكم شلون يعرفونكم مره تتشابهون ؟؟
حنان : ههههههه لا عادي تعودو على خششنا أكيد بيحفظونا
سحر : انتو الحين أي سنه ؟؟
نوره : ثالث ثانوي وننتظر النسبه
سحر : واااااو شلون شعوركم ؟؟
حنان : تصدقين بديت اصير باارده أحس طولت ههههه
العنود دخلت معصبه : سحر ليش قايله لاهلك يجون ؟؟
سحر تسوي نفسها ما تدري وش السالفه : غريبه جو ما قلت لهم
العنود : بلا كذب أخوك داخل يقول هي داقه علينا
سحر : هههههههه كشفتيني يالله بنات مع السلامه
نوره وحنان : مع السلامه
في المجلس كان قاعد سلمان مع ابوه وعبد الله
سلمان : عبد الله ممكن تطلع شوي ابي أبوي في موضوع
عبد الله عرف وش وراه سلمان فقام بسرعه
سلمان : يبه
أبو سلمان : ادري وش بتقول منيره
سلمان : يبه حرام عليك تظلمها
أبو سلمان : استح على وجهك وش ظلم أنا ماعطيتها غريب ولد عمها
سلمان : وإذا صار ولد عمها يمكن الغريب أحيانا يكون أفضل منه
أبو سلمان عصب منه : وانت وش لك بنتي وعارف مصلحتها والحين قل لي وش دراك يمكن توافق ؟؟
سلمان : واحد مثل فهد سمعته شينه تبغاها توافق يبه والله في يوم من الأيام بتندم
أبو سلمان : خلاص سلمان قفل الموضوع الحين بكره يصير خير
سلمان : بس أرجوك لا تغصبها يبه
مسك جواله دق على أم سلمان يبي يسأل كان راحو الضيوف
أم سلمان : ايه توها طالعه أم ناصر وبناتها ..
منيره والعنود في غرفهم يتلبسون
منيره رمت نفسها على السرير تحس بتعب فضيييييع ومع كل هالتعب اليوم عندها غييير أول يوم تحس بوناسه بين أخواتها وأغلى صديقه ..
العنود جالسه في الغرفه ماجاها النوم قالت بمر على سلمان من زمان ماسولفت معه ومادرت ان سلمان مقفله معه ولا له خلق يكلم أحد
راحت لغرفته طقت الباب
سلمان : مين
العنود : أنا العنود
سلمان : ادخلي
العنود فتحت الباب وهو جالس يقرا: سلام يا أحلى أخو في الدنيا
سلمان يبتسم ابتسامه بارده : هلا وعليكم السلام وين منيره ؟؟
العنود : ما ادري عنها شكلها نامت
سلمان : أها وش رايك باليوم حلو مع البنات ؟؟
العنود : مررره يجنن وناسه وسكتت شوي سلمان وش فيه وجهك كذا ؟؟
سلمان : ولاشي بس تعبان شوي
العنود : وش رايك أطلع وأنت ارتاح نام
سلمان : بنام بس أقرا هالكتاب شوي
العنود : يالله أخليك أجل تصبح على خير
سلمان : وانتي من اهله
العنود حست ان فيه شي ولا حبت تضغط عليه وتنرفزه قالت تطلع احسن
عند منى والجوهره كانو جالسين ساكتين
منى : وش رايك باجمعه اليوم حلوه صح ؟؟
الجوهره : مره حلوه الا ملل وطفش ما صدقت اهلي يقولون يالله المشكله اني اليوم مواعده وحده من صديقاتي في السوق خربتو علي
منى : طيب أعصابك بكره اطلعي معاها
الجوهره : السالفه مو كذا السالفه اني أكره بيت عمي فاهمه ..
منى سكتت لأن أختها ماينفع معها الحكي أبد
مرت الليله هذي وعلى الصباح كان سلمان أول من قام وجالس تحت في الصاله ينتظر أحد يقوم طفشان وضايق صدره ومعه الجريده يقرا
البنات كانو تعبانات عقب أمس ونايمين وعبد الله نفس الشي ماقام
دخل عليه عمر توه قايم
سلمان : صباح الخير حبيبي
عمر ساكت ماتكلم
سلمان : تعال حبيبي وش فيك عمور
عمر : مافيني شي بس أبغى ماما
سلمان : ماما نايمه الحين تقوم تعال أوريك عندي لعبه في الجوال
عمر جلس جنبه وعطاه الجوال يلعب فيه
عمر يرفع راسه : سلمان مابي الجوال طفش أبغى نروح البقاله
سلمان يناظر الساعه : الساعه 10 ونص يلا مشينا ياحلو
سلمان كان وده يلهي نفسه بأي شي فطلع هو وعمر للبقاله وقال بيتمشى شوي هو وياه عشان يروح عن نفسه
أبو سلمان شاور أم سلمان اللي أبدت تعارض في البدايه لكن هو أقنعها أن فهد صح طايش بس هو فترة شباب لا أعرس بيتعدل حاله وبيعقل قالت له شاور البنت وماله داعي تغصبها ..
كان أبو سلمان وده يقول لها هالوقت بيكون الكل لاهي وهي بغرفتها لحالها طق الباب عليها
منيره : ادخلي العنود
أبو سلمان : أنا أبوك
منيره يوم سمعت صوت أبوها خافت وش عنده أول مره يجي على الصبح غرفتي أكيد عنده شي الله يستر قامت من مكانها بسرعه
منيره : هلا أبوي وحبته على راسه
أبو سلمان وهو يبتسم : وش أخبارك اليوم ؟؟
منيره منزله راسها : الحمد لله
جلس يتلفت في الغرفه : ممكن أجلس عندي موضوع ابغى أتكلم فيه
منيره تسحب الكرسي حقها : تفضل هنا
وهي جلست على السرير
أبو سلمان : منيره انتي الحين ماشاء الله كبرتي وصرتي حرمه وألف من يتمناك
منيره وجعها قلبها عرفت وش وراه أبوها ..
أبو سلمان : وانا يابنتب ما أبغى لك وقطع كلامه صوت الجوال
منيره قامت بسرعه وحطته صامت
أبو سلمان يناظرها بنظره قويه : والجوال حتى على الصبح يرن
منيره سكتت وش تقول المشكله ان اللي داق ناصر
أبو سلمان ياخذ نفس : وولد عمك جاي يطلبك مني
منيره بدون ماتحس : لا أبوي
أبو سلمان : مافيه شي اسمه لا فكري هذي حياتك
منيره : أبوي إلا فهد ما أبغاه
أبو سلمان : طيب قولي لي أي عيب عشان أقتنع
منيره : قل وش مافيه من العيوب
أبو سلمان : منيره ترى عطيتك وجه أكثر من اللازم عيب هذا ولد عمك من دمك
منيره جتها الصيحه : واذا صار ولد عمي لازم آخذه يبه لا تغصبني على شي ما ابيه
أبو سلمان : أصلا انتي طايل لسانك عيب تكلمين أبوك بهالطريقه
منيره جلست تصيح : لا ما أبيه بيعيشني بتعاسه
أبو سلمان : أصلا البنت دايم على شور أبوها وانا بعطيك مهله تفكرين
منيره : ماااااااابي وجلست تصيح من قلب
سلمان كان توه جاي هو وعمر وسمع صوتها لأن البيت كان هدوء فباين الصوت صار يركض مع الدرج بسرعه
وشاف أبوها طالع
سلمان : يبه وش فيه
أبو سلمان : بنات آخر زمن دلع أقولها فكري بالموضوع تجلس تصيح
سلمان مشى بسرعه على غرفتها شافها منزله راسها ودموعها على خدها يوم شافت سلمان قامت ومسكت يده : سلمان الله يعافيك مابي فهد
هو مسك يدها وجلسها
سلمان : الحين اهدي وعمر الصياح مايفيد
منيره : طيب ليش يرغمني عليه
سلمان : منيره أنا بقولك هالكلام وخليك بنت فاهمه واعرفي وش مقصودي من الكلام
منيره تسحب المنديل وتمسح وجهها : طيب سلمان
سلمان : شوفي منيره من عندي وافقي وصدقيني أبوي بيجي اليوم اللي يندم ويجيك بكبره يقول ( سامحيني )
منيره : وأنا أضيع حياتي عشان بعدين يندم
سلمان : أبد ليش تضيعين حياتك وهذا فهد ليش ما تجذبينها وتغيرينه بنفسك
منيره كانت ساكته ولا تكلمت
سلمان : الحين اعتبري اللي خاطبك غير فهد ولا تحطين في بالك انه فهد الطايش اللي سمعتي عنه
( سلمان قال هالكلام يبغاها توافق قبل ماأبوها يغصبها وتكره نفسها )
منيره : سلمان الموضوع كبير ويبيله تفكير خلوني على راحتي
سلمان : والله ما قلت هالكلام الا لمصلحتك فكري ولا تتردين اذا احتجتي شي
منيره : مشكور سلمان ما تقصر
طلع سلمان وهو كل الدنيا ضايقه عنده يفكر وش بيكون حالها أخته
العنود كانت توها قايمه ولا درت وش يصير فتحت النت على الصبح وتلقى شهد جلست تسولف معها
( حبيب الروح ونورالعيون انت وبس )
متى نتايجكم ؟؟؟
( ما أجمل أن تبتسم وفي عينيك ألف دمعه )
بكره والله مرررره خايفه احس انب برسب
( حبيب الروح ونورالعيون انت وبس )
لا ان شاء الله تنجحين بتفوق
في هاللحظه العنود تذكرت أـ ابتسام والرساله توها ما بعد ارسلتها
جلست تقراها مره ثانيه كانت تقول :
جسور تمتد لتصل كل الأرجاء ..
تجمعنا بمن نحب وقت ما نشاء ..
ألا وهي جسور الدعاء لمن سكنوا قلوبنا ..
فيارب احفظهم وأكرمهم وجنان الخلد أسكنهم ..
قالت ما راح أرسلها على الصبح خليها العصر ولا المغرب
( ما أجمل أن تبتسم وفي عينيك ألف دمعه )
أقول شهوده بقولك شي بس لا تزعلين
( حبيب الروح ونورالعيون انت وبس )
لا وش دعوا أزعل قولي
( ما أجمل أن تبتسم وفي عينيك ألف دمعه )
اممممممممممم ابي رقمك ودي أسمع صوتك لنا يمكن سنتين متعرفين على بعض ولا عمرنا سمعنا صوتك ولا شفناك
....................... طولت ما ردت بعدين قالت
( حبيب الروح ونورالعيون انت وبس )
خلاص هذا رقمي ............. وإذا بغيتي نتواعد ما عندي مشكله
( ما أجمل أن تبتسم وفي عينيك ألف دمعه )
من زمااااااااااااان ودي أشوفك والله ممكن أدق الحين هههههه
( حبيب الروح ونورالعيون انت وبس )
لحظه شوي بروح أجيب الجوال مو عندي
وطولت شوي
هنا راح نكشف نقطه العنود ما تدري عنها اللي قاعده تكلمها مو شهد هذا واحد اسمه سامي بس هو لاعب عليها وهي المسكينه مصدقه وهو راح ينادي أخته تكلمها عشان ماتشك وكان بيموت من الحماس عشان يسمع صوتها
سامي يفتح الغرفه على أخته غاده لقاها جالسه تمشط شعرها عند المرايه
سامي : بسرعه غدو تعالي أبغاك ضرووري
هي قامت تحسب عنده شي : وش فيك ؟؟
( وقالها السالفه من أولها لآخرها )
غاده : انت ما تتوب عن حركاتك شف بكلمها بس ياويلك لو يوم من الأيام انت كلمتها
سامي : اصلا هي بنيه مؤدبه مستحيييل تكلمني يالله بسرعه مشتاق أسمع صوتها
غاده : وش قلت مشتاق ؟؟
سامي : خلاص ماقلنا شي امشي بسرعه وسحبها مع يدها
العنود شافته تأخر جلست على المنتدى ترد على المواضيع
( حبيب الروح ونورالعيون انت وبس )
أهلين آسفه ع التأخير يالله دقي
العنود مسكينه استانست ودقت
دق الجوال عنده وهو فز قلبه : خوذي غاده حطي على السبيكر
مسكته غاده : الو
العنود : هلا وغلا أخبارك ؟؟
غاده : تمام ياحلوه
سامي يأشر لها يقول ( قولي صوتك حلو )
العنود : ما توقعت صوتك كذا انتي قلتي لي بأي صف
غاده تناظر سامي يعني وش أقول هو يتكلم بصوت خفيف ثالث ثانوي
العنود : الو وينك
غاده : لا بس يقطع ما عندي ارسال هنا
العنود : ايه وش قلتي أي سنه ؟؟
غاده : ثالث ثانوي
العنود : أها يالعجوز أكبر مني ههههه
سامي مستانس على سواليفها وده هو اللي كلمها وكل شوي يقول لغاده قوليلها ( صوتك حلو )
غاده : بصراحه صوتك نعومي
العنود : احم احم ترى استحي أنا ماتعرفيني
سامي في قلبه ( فديت اللي يستحون)
العنود حست أن أحد بيدخل غرفتها
العنود : خلاص شهوده أخليك الحين في وقت ثاني أكلمك
غاده : خلاص حبيبتي مع السلامه
العنود : مع السلامه
سامي بغى ينجن راح على الكمبيوتر بيشوف إذا هي موجوده ولا طلعت لقاها موجوده
كتب لها (أتوقع إن أمك نحلة .. تدري ليش ؟؟ لأنها جابت عسل مثلك . )
العنود قرتها جلست تضحك عليها وقالت : ياليتني من زمان ماخذه رقمك
كتبت لها ( فديت الكلام الحلو يالله شهودتي بطلع مع السلامه )
هو استانس يوم شاف الرد
كتب ( الله يسلم قلبك وترى بشتاق لك لا تطولين )
سامي هالمره بس حس انه يحبها ما يدري ليه ووده يشوفها وفكر أنه يوم يواعدها ويخلي غاده بداله وهو يراقب من بعيد بس
أعرفكم عليهم : سامي وغاده هم الوحيدين في العايله امهم كل وقتهم برا البيت ومهملينهم
سامي بثالث ثانوي وكل همه النت والخربطه بس هو أول مره يلعب على بنت ويحس انه يحبها
وغاده أكبر بسنه أول سنه بالجامعه وكل وقتها طلعات مع صديقاتها ولا حد يسأل وين راحت وين جت ؟؟
العنود بعد ما قفلت النت شافت منيره داخله عندها ووجهها باين ضايقه
العنود : منور وش فيك حبيبتي
منيره لقت نفسها تمشي لغرفة العنود بدون شعور
منيره كان ودها تتكلم بس كل اللي قدرت تعبر عنه دموعها
العنود حست أن اختها فيها شي كبير: منيره وش فيك ؟؟؟
منيره : العنود ما ادري تفهميني ولا لا ؟؟
العنود عصبت : انتو كلكم في البيت معتبريني صغيره ولا تشاوروني بشي
منيره : العنود أنا جايه عشان تعصبين علي
العنود : خلاص آسفه منيره بس قولي وفضفضي كل اللي فيك
منيره : العنود تدرين أن فهد خاطبني
العنود فتحت عيونها : فهد ولد عمي ؟؟؟؟؟؟؟؟
منيره : من غيره
العنود : طيب انتي استخيري يمكن ترتاحين له وصح حنا سمعنا عنه كلام موب زين بس صدقيني بيتغير وما اختارك انتي الا لأخلاقك وسمعتك الزينه
منيره : بس أنا خايفه يعيشني بضنك وتعاسه
العنود : طيب انتي استخرتي
منيره : لا
العنود : أجل لا تتكلمين الحين روحي صلي وادعي ربك وان شاء الله ما ينكتب لك إلا الخير
منيره فهمت مقصود أهلها يبغونها توافق من نفسها بدون ما أبوها يفرض هذ الشي ..
منيره : خلاص العنود انا بروح لغرفتي وإذا أحد سألك قولي لهم نايمه تعبانه اليوم نفسيتي زفت ما بي أنزل
العنود : لا تكبرين المسأله ربك بيهونها
منيره قامت وهي ما تدري هاللي اسمه فهد وش يبي ؟؟
العنود ضاق صدرها على أختها وهالحزن اللي معميها ..
سلمان كان يكلم سعود
سعود : سلمان بقولك شي يمكن أبوي وفهد ما قالوه
سلمان : ليه وش فيه ؟؟
سعود : انت تدري ان فهد تعين في الجنوب
سلمان : وش قلت ؟؟
سعود : هذا اللي صار وهو يحاول يسوس نقل بس ما أتوقع
سلمان غصب عنه قال : والله ما ادري وش بقى فيها ذاقت كل ألوان الحزن
سعود : سلمان حاس فيك شي عادي قل لي واعتبر فهد مو أخوي
سلمان : تدري أني جالس أقنعها تاخذه وأنا لو الود ودي والله ما يحصل اليوم اللي ياخذها فيه .
سعود : طيب ليش تقنعها خلها ترفض
سلمان : ما تدري عن أبوي انت مابيه يغصبها
سعود : ماتدري سلمان الدنيا تتغير يمكن يعيشون أسعد اثنين
سلمان : الله يسمع منك يالله تامر بشي
سعود : سلامتك
وسكر منه ونزلت دموعه غصب عليه يعني منيره بتروح بعيد عنهم شلون بتتحمل مسكينه
نزلت العنود وشافت سلمان حاط راسه على الوساده وفي عالم ثاني
العنود تناظر له بس هو ما انتبه : سلمان
وهو ماحس ان فيه أحد يناديه
العنود تهزه من كتفه : سلمان وش فيك ؟؟
هو نقز قلبه خاف : العنود شلون جيتي
العنود تبتسم : من زمان بس انت في عالم ثاني
سلمان : ايه يالعنود حرام اللي يصير في منيره
العنود : حتى أنا ما توقعت أن فيها كل الهموم
سلمان : انتي توك تطلعين على الدنيا العنود في اللحظات الأخيره اللي منيره بتعيشها بيننا خليك حولها لا تبتعدين عنها
العنود : انت وش قاعد تخربط يعني إذا أعرست ماراح نشوفها يمكن أشوفها أكثر لا تضيق صدري
سلمان : شوفي بقولك شي بس ما تدري منيره
العنود حست انه شي كبير : وشو ؟؟؟؟؟
سلمان : منيره ماراح تسكن عندنا فهد تعين في الجنوب
العنود : سلمان تتكلم من جد
سلمان خذا نفس : ايه من جد
العنود نزلت راسها وجلست تصيح : لا إلا منيره ما عندي أخت غيرها وتبعد عني
سلمان : العنود خلاص بلا صياح ما بي أحد يدري
العنود قامت وطلعت الدرج وهي تقول وش هالهموم اللي حلت علينا دخلت غرفتها وطاحت على السرير وجلست تصيح كانها طفل صغير
صارت تسمع صوت يدق الباب بس هي ما قامت تفتح وبعد وقت قامت فتحت هي كانت تتوقعه سلمان ولا منيره بس يوم شافت عبد الله
عبد الله شاف وجهها اللي ليان دموع وعيونها الحمر مسك مع ايدها ودخلها الغرفه هي كانت محتاجه احد تشكي له حطت راسه على رجوله وجلست تبكي بصمت
عبدالله مسح على راسه وهو عارف انها جاها خبر خطبة منيره
عبد الله : العنود حبيبتي الدنيا مو على كيفنا
العنود تتكلم بصوت متقطع : عادي تتزوج بس لا تبعد عنا
عبد الله : ومن قال لك أنها راح تبعد انتي حاطه هالشي في بالك
العنود :إلا بتسافر ماراح تسكن عندنا
عبد الله : من قالك ؟؟؟؟؟؟؟؟؟
العنود : سلمان
في هاللحظه رفعو روسهم وتفاجأو من اللي كان داخل
العنود : منيره
منيره راحت لأختها وضمتها لصدرها لأنها سمعت صوتها وصياحها
منيره : والله بتصيرين أغلى أخت لو ابعدت
العنود : انتي تدرين انك ما راح تسكنين عندنا
منيره قالت بقوه : أيه أدري وأنا موافقه
العنود : موافقه ؟؟؟
منيره تبتسم : العنود روحي غسلي وجهك يالله الحين
العنود قامت تغسل وجهها
عبد الله يلتفت على اخته : منيره أنتي موافقه جد ولا تسكتينا
منيره : لا موافقه وباقول لأبوي موافقتي اليوم ان شاء الله
منيره شافت الحزن بعيون الكل وقالت مابي أكون سبب لتعاستهم أنا كيفي ما دام أني راح أعيش حزن كل حياتي أوافق ويسعدون كلهم ويرتاحون ومنيره خلت هالموافقه أنها هي تبغاها ومرتاحه لها
على أذان المغرب
العنود كانت تضغط في الجوال وكانت ودها تسولف مع احد دقت على منى بس ماترد عليها وراحت دقت على بيتهم
رد عليها حمد
حمد : نعم
العنود : السلام عليكم
حمد : وعليكم السلام مين العنود ؟؟ <<< وده يسولف
العنود : ايه وينها منى ؟؟
حمد : لحظه أشوفها
راح شوي ورجع
حمد : امممم ما ادري طالعه مع الجوهره شكلها لا جت قلت لها تكلم
العنود : طيب خلاص
حمد : لحظه لحظه وينه عبد الله ؟؟
العنود : ما ادري دق على جواله
حمد : مقفل جواله هو في البيت
العنود : ما ادري ماشفته يمكن في غرفته
حمد : المهم إذا شفتيه قولي حمد يبيك ضروري
العنود : طيب
العنود ماتحب حمد ولا تحب تكلمه وهو كم مره حاول يخلي الأمر بينهم عادي بس هي ماتعطيه وجه فيحترم نفسه
يوم سكرت منه فكرت ترسل الرساله ل أ ـ ابتسام وكانت ماتدري ليه خايفه ؟؟؟
بس ما حست إلا تشوف ( تم إرسال الرساله )
( يوم النتايــــــــــــــــــــــــــــــــــــــج )
العنود كان عبد الله بيوديها لأنه هو بياخذ نتيجته بعد
حطها في مدرستها وراح
العنود دخلت وما لقت أحد قبالها تعرفه قالت بانتظر سحر تجي وأدخل معها جلست على الكراسي تتفرج على البنات وحده ضايق صدرها على النتيجه ووحده تصيح والثانيه موسعه صدرها ماخذه من الأوائل وهي تقول والله ما ادري وش بيكون وجهي إذا طلعت
: أهلييييييييييييين العنود
العنود : هلا مرام وسلمت عليها
مرام : ألف مبروك
العنود : توني مابعد نجحت خخخخخخخ ألف مبروك لك ..
مرام : الله يبارك والله ماصدقت نجحت
العنود : الحمدلله
سحر توها داخله : هلا بنات وجالسه تسلم عليهم
سحر : هاه العنود راسبه ؟؟
العنود : وش هالتشاؤم يالدوبا ما ادري مين اللي راسبه ؟؟
سحر : لا أنا ماعلي خوف
العنود : لا تكثرين هرج امشي الحين بيجي عبد الله وأنا ما خذت النتيجه
سحر : فديت عنوده ما تمشي إلا معي
العنود مشت معها وقدام باب الأستاذات
العنود : تخيلي أقابل أ ـ ابتسام
سحر تضربها على راسها : الحين فكري بالنتيجه بعدين أـ ابتسام
العنود : يالله ادخلي
سحر دخلت ووراها العنود
وشافت قدامها أ ـ ابتسام تبتسم لهم وقامت من مكتبها عشانهم والعنود بتطير من الفرحه
أ ـ ابتسام : هلا والله
العنود وسحر : هلا أستاذه وسلمو عليها
أ ـ ابتسام : وش اخباركم وش مسوين
العنود : الحمدلله
أ ـ ابتسام : هذي نتايجكم ( وطلعت أساميهم ) وألف مبروووك تستاهلون
العنود : الله يبارك فيك
سحر : وااااو ناجحه ما توقعت
أ ـ ابتسام : ليش محطمه نفسك عاد انتي مو كسلانه لهالدرجه بالعكس حريصه
العنود : أستاذه وش رايك بإجاباتي ؟؟
أ ـ ابتسام : بالعكس مررره باين عليك مذاكره
سحر : ايه بلاها مقطعه الكتاب من المذاكره
العنود ودها تضربها على راسها من كلامها هذا اللي ما يدري وش يبي
وسمعت صوت عبد الله ينادي عليها
العنود : يالله أخوي جا مع السلامه أستاذه
أ ـ ابتسام : يالله مع السلامه و زورونا بعدين
العنود : ان شاء الله إذا حصل
وبعد ماسلمو عليها طلعو
في السياره العنود توها داخله
عبد الله : هاه بشري ؟؟
العنود : نجحت الحمد لله والله مرررره فرحانه
عبد الله : على البركه
العنود : انت شو صار من عندي الأول
عبد الله : الحمد لله
العنود : الف مبرووووووووووووك عبود
عبد الله : الله يبارك فيك
ورجعت العنود البيت والكل كان مبسوط من نجاحهم لأنهم راح يسافرون هالسنه
كانو قاعدين كلهم حتى منيره كانت جالسه معهم
سلمان : يعني في سفره السنه هذي
أبو سلمان : ان شاء الله
عبد الله : وش دراكم هالخبل حمد تلقونه راسب خلني أدق عليه
ودق عليه
حمد : هلااااااااااااا والله اني ناجح مو مصدق عبد الله
عبد الله : ههههههههههه ألف مبرووووك ياولد عمي تستاهل
حمد : الله يبارك فيك تصدق اني شكيت رجعت أقرا اسمي مره ثانيه هل هو صدق حمد ولا لا
عبد الله : الله يرجك بس قلت بتأكد منه هل بنسافر هالسنه ولا لا ؟؟
حمد : لا هالمره أنا رافع روسكم صح نسيت أبارك لك على البركه
عبد الله : من الفرحه نسيت العالم ههههه الله يبارك فيك
وبعد سواليف ورجه سكر منه
أبو سلمان قام من مكانه والتفت على منيره : منيره أبغاك عندي في مكتبي
منيره : ان شاءالله يبه جايه
يوم طلع أبوها
سلمان : منيره انتي موافقه
منيره : ايه سلمان
سلمان : عن اقتناع ولا لا ؟؟
منيره : لا عن اقتناع ليش تسأل ؟؟
سلمان : لا بس كذا الله يوفقكم يارب
قامت منيره
ودخلت على أبوها
أبو سلمان : تعالي اجلسي ..
منيره : هلا أبوي
أبو سلمان : هاه فكرتي بالموضوع ؟؟؟
منيره : ايه فكرت بس قبل ما أقول أني موافقه عندي شروط
أبو سلمان يهز راسه يعني كملي
منيره : أمي وأخوي ما خذتو رايهم لازم يكون عندهم علم
هنا أبوها تنرفز في كل سالفه أهلها بيدخلون
أبو سلمان : طيب عندك شي ثاني
منيره : لا وان كنت آخر من يدري اني بسكن في الجنوب
أبو سلمان : ومن قالك يمكن يسوي نقل
منيره : على العموم يبه هذي موافقتي وانا تراني أمانه بين يديك وإن ضيعتني فربي بيحاسبك
أبو سلمان : أبد ما دامك عند ولد عمك فأبشري بسعادتك وأهلك راح نشاورهم في الموضوع ما قلتي وش صار على نتيجتك ؟؟؟
منيره : لا الحمد لله ناجحه
أبو سلمان : الف مبروك والله يوفقك بحياتك كلها
منيره تقول في نفسها ( ما جا الكلام الحلو إلا يوم وافقت يااااارب حط لي في هالموافقه خير لي )
أبو سلمان كان مكلم أبوفهد على أساس انهم يرتبون للسفر وقررو يروحون بالسياره لأن السفر ما يحلى إلا بالطريق وكان أبو سلمان مايبي يقوله عن موافقة بنته إلا بعد مايشاور أهلها عشان ترضى ...
الضحك ماهو علامة مستريح
والبكى احيان مايوحي بحزن
خذ مثل مني انا قلبي جريح
وابتسملك من غرابيل وشجن
وان بكيت يجوز ابكي من صحيح
من جرح,من ظلم ,من صدمة زمن
او يجوز ابكي على شان استريح
او نتيجة شوق او حزن وندم
انتهى الجزء،،،
|
17-05-10, 05:57 PM
جديد مواضيع قسم القصص المكتمله
العرض العادي
