ياهلا والله ومسهلا بضمني وببعض العيون وبالاعضاء الغالين
والله اشتقنا لكم تعرفين اجاازه وسفر وبعدها العوده والحوسه والاجواء المغبره الله يعين بس
المهم بارتات روعه الصراحه شهادتي فيك مجروحه عندك حبكه للاحداث رهييب ماشاءالله تبارك الله
قاعده تعطين كل حدث وكل شخصيه حقها وتدخلين مواقف بالقصه بطريقه محبوكه ومدروسه
نجي للبارت اكثر شي حزني الغيوض والله انهم اجرموا بحقها كثير ومااظن فيه شي يبرر جريمتهم
طيب ياخي خذ ولدك بطريقة قانونيه من حقك بس ماتوصل للخطف وحرقة قلب ام على ولدها
ياليتها مافكت رعد لين يجي ابوه والا جده سطام وتدعي عليه بوجهه وتحط حرتها فيه وتشفي غليلها
جسار والظبي اكيد يبيله فتره لين يتاقلم معها ويعرف اطباعها او بالاحرى يتاكد من عفتها وطهارتها لانه لا يلدغ المؤمن من جحر مرتين
والظبي قدها وقدود بتوريه منهي الظبي اللي يثق فيها وفي اخلاقها وتربي بناته احسن تربيه
ياسر والله انك بايعها ياخي كان قلتلها انها طلعت من بالي خلاص بس ماعاد يفيد الكذب هي ماهي راضيه الا بالحقيقه مع انها تذبح الا انه مافي غيرها عشان يبدون من جديد بدايه صح واتوقع بعد الكلام اللي قالته رهف انه ماهو راجعلها الا بعد مايغسل حب ملوك من قلبه وان شاء الله قريب
فلك اظن انها بعد الكلام اللي قاله لها بتال وابوه مقرن انها بتروح معهم لبيت العاجي وهي مرفوع راسها معززه مكرمه
انا قلت من قبل ان عندي احساس ان ماهو باقي على ذمة بتال الا فلك وبس وهذي مناير بعد الكلام اللي قالته لرهف والمشكله اللي سببتها بينهم ماهوبمخليها ياسر الا وبتال مطلقها بالثلاث ومناهل بتلحقها بالطريق قريب ان شاءالله \ شفتي صح علي ابوك يالثقه والله اني ماني بهينه
عناد وملوك قاهرتني ورى ماقالتله على حملها خلته يفرح شوي
حرام عليك ضمضم وقفتي قلوبنا عند هالقفله والله ارحمينا شوي الله يعينا للسبت
هاليوسف هاذا حرام فيه هالاسم والله اني احبه غيري اسمه تكفين هالخاين قال اخرشي اتوقعه انك تخون بالرفيق
اقول ليتك تسكت اخر واحد يتكلم عن الخيانه انت واشكالك انت خنت دين ووطن وقياده وبيعه موبس رفيق الله يشيلك انت واشكالك
ملوك اتوقع اللي دخل عليها ياعناد ومااظن والا يوسف اواحد اعوانه بس غريبه وين الحراسه المشدده حرام عليهم عناد حاط ثقته فيهم لحمايه زوجته وولده الله يستر
اخيرا يعطيك العافيه حبيبتي واعذرينا على القصور والله يحرم يدينك على النار ويشفي امك ويخليها لك وتشوف احفاد احفادها بالصحه والعافيه وامهاتنا وامهات المسلمين يااارب

مساء كل شي حلو على ضمضم وكل من يدخل ها المتصفح

ابدعتي ضمضم ببارت جا متصاعد وقوي


لقاء السحاب بين جسار والظبي

جسارفي زواجه من سيوف داخل بحسن نيه وصفاء قلب ما مر عليه تجارب سابقه لكن بعد الصدمه طبيعي بيقارن ويفكر قبل كل خطوه يقدم عليها
تصرفه مع الظبي طبيعي وردت فعل الظبي طبيعيه لأنها ما تعرف عن سيوف الا فضيحة المشغل واتوقع لو تعرف سالفة سيوف مع عناد ما كان لامت جسار على تجاهله لها في بداية الامر

جسار والظبي بدو بدايه صحيحه رغم تخوف الاثنين من البدايه لكن قدرو يخطون الحاجز الاول
الظبي مصره على تلافي اخطاءها مع طارق

وجسار بيكون ذهنه شغال مع كل حركه تصدر من الظبي وخوفه انه يلدغ من نفس الجحر مرتين
وضع النقاط على الحروف من اول ليله تجمعهم بيكون الاحترام والتقدير سابق للعواطف بينهم لأنه لو انفقد الاحترام بين الزوجين مهما كانت درجة الحب لا يمكن يستمر ها الزواج .......


تحركت مشاعرهـ...لـتسبق عقله..

وهذي مصيبتك يا ياسر ان المشاعر تحركك قبل العقل والا لو كنت تحرك عقلك قبل مشاعرك ما كان صار الي صار لكن وش نسوي فيك من اول بارت والكل نازل نصايح بس ما ش عاجي ما ترضى تسمع الا صوت نفسك وبس

الحمدلله انك عطيت الغيوض راس الخيط والله مدري كيف نطقت ها الدره من فمك لا وعقبها

رجعت لرهف انت قلبك خايف من قرب عناد وجات رهف كملت الناقص

وانت عاد كنك مركب على زر على طول كريت الشريط الي انت مخبيه

الحين وش بيرضي الدلوعه مهنة الطب ما علمتك انك اول شي تفتح عيونك وتشوف المشتكي وبعدين تفتح اذانك تسمع شكواه وتبني عليه العلاج المناسب
والا عند ملوك توقف لا تقدر تطلع ولا تنزل

ماادري كيف بتحلها الا انك تثير زوبعه ثانيه من جهة مناير يمكن رهف تنثبر عنك اذا شافتك ثاير على ها المقروده الي ماراح يوديها بداهيه الا لسانها
لكن حلو انك بينت لرهف قدرها عندك يمكن اذا اخلت بنفسها بعد ها القنبله الي انت فجرتها تراجع حسابتها وتعرف ان ملوك ماضي قبل تعرفها ولو كل زوج وزوجه حاسبو بعضهم على ما ضيهم

اكثر البيوت بتطفح مشاكل لكن احيان كثير الجهل في بعض الامور نعمه ما يعرفها الا الي اخذه فضوله وصار ينبش با الماضي ...

يا حليلك يا ياسر تعال شف ملوك منخرش قلبها من عناد خافت انه سمع بطلعت رعد

وهذا هو ماهولدها بعد يعني لو حتى رفضت انها تكون مسؤله عنه محد يقدر يجبرها تهتم فيه

وانت بغيت تهدم بيتك على سراب

.
قاطعته ملوك ب ارتباك\عناد الـصوره الي شفتها والي تشبهك هي صورة احمد ولد الحرمه الي هي زوجة ابوك....عناد السالفه صحيحه بس اهلك يخبون حاجه كبيره...!

عناد مستحيل يكون كلام ملوك مر عليه مرور الكرام لكن الوضع الي هو فيه ما يسمح له انه يفكر واتوقع ان بداية الخيط ماهي من رعد للغيوض بتكون من عناد نفسه بعد انتهاء المهمه

تدرين ملوك احسن شي سويتيه انك ما خبرتي عناد بحملك خليه يطلع للمهمه وهو متطمن عليك لكن لو درى بحملك يمكن يأثر على نفسيته ويكشفونه جماعة يوسف

على غـرس اداة بارده بظهره وبهدوء تمتم الطرف الاخر\آخر شي اتوقع انك خون الرفيق..!

اكيد هذا يوسف الي يقول ها الكلام

لكن ماراح يقدر يصيب عناد بشي خطير حتى لو في اصابه بتكون طفيفه اجل وش فايدة فرقة الحمايه الي مع عناد

وعناد نفسه وين راح حس القناص وسرعة بديهته اكيد بيصرف نفسه تكفين ضمضم تعوذي من ابليس واتركي عناد لا تعطبين له جزء من الكبد ولا تحطين فيه عاهه مستديمه ادري موت ماراح تموتينه

لكن بعض الاصابات يكون الموت ارحم منها


.
وضعت أذنها ب قرب من الباب ..
لتسمع وقع خطوات عشوائيه..
وكأنه يتخبط على البحث عن شي ما...!

اكبر غلط ان عناديترك زوجته با الحالها على الاقل قال لمناف ينام عندها او انه اخذها لبيت ابوه او اخوها وكل شي ولا العرض
والله لو تحط مليارات الدنيا ما تعوض فاقده نعوذ با السميع العليم من انتهاك الاعراض

غلط ترك البيت خالي من رجال الدنيا ماعاد فيها امان الي دخل بيت عناد

اما مناف كلمه عناد يروح لملوك او انه فعلن لص مثل توقع ملوك

والرصاصه المنتظره بتكون من حظ واحد من ثلاثه اما مناف او اللص اويوسف نفسه برصاصه مفاجئه من عناد !


فلك وما ادراك ما فلك الحين يم لسان الي مدري من وين طلع لك بتال يترجى فيتس الضعيف ولا عاد كلمه حلوه حافظه الا وقالها لك

الحين هو تزوج حريمه عقب ما طلقك ترى انتي الي جايه عليهن وفوق هذا تدورين الزلات على بتال ترى لو ما يحبتس ما استحمل خبالتس ومزاجيتس الي مدري كيف جايه

ولا زدتيها يوم جاتس مقرن تعديتي الحدود يا زين مناير عندتس

بتال وتعذر منتس

ومقرن جاي لك وهو ماد يده وفاتح بيته وقلبه لتس

وانتي بردتي خاطرتس كل شي قلتيه له وهو قابلك بصدر رحب
وخصوص ان الظبي تركت وراها فراغ

استغلي الفرصه وخلي لك مكانه مشرفه عند مقرن ولا عاد تلاسنين

ابلعي العافيه وعودي مع زوجتس وشايبتس لبيتك وغيري من ها الاسطوانه المشروخه الي صدعتينا فيها
وانسي كلمة عازه ومالي عازه

احمدي ربك على حب بتال الي ذلل لك الصعاب

ترى الفرص ماتجي دايم على الكيف

لو ركبتي راسك ها المره بيكون خصيمك ياسر ماهو بتال ......


ابدعتي ضمضم وننتظرك السبت على احر من قلب ملوك وعناد للخروج من ها المأزق

واكثر من استعجال ياسر على عقاب مناير

مبدعه ام الـــــــــيزيــــــــد

مساااااء االخير
ضمضم الباااااااااارت خطير والله يعينا نصبر ليووم السبت
توقعاتي
يوسف يطعن عناااد ويدخل العناية المركزة وبكذا بيقولون للغيوض عن ولده وبتجي
ملوووك الي جاها اكيد من العصابة بتنجو لكن من الخوف يمكن تتعرض للاجهااض ويمكن السالفة ذي تقرب عناد وملووك اكثر
جسار والظبي لسى الظبي مسيطرة على الوضع لكن ننتظر المواجهة مع بنات جسار وخاصة درر
ياسر حاااس الدنيا تحت فوق لكن رهف بتعدل ضلعه الميال وبتمشية على الصراط المستقيم وياسر راح يطين عيشت مناير اذا درى انها وراى الي صار له
مقرن تصرف سليم لكسر الحاجز بينه وبين فلك قبل قدوم المولود
لكن مااتوقع فلك ترضى وخصوصا انها ماقدرت تصبر اياام العزاء على ضرايرها
ضمضم لاخلا ولاعدم مبدعة والف شكر ويعطيك العافية وبنتظارك السبت

صباح الاحداث الساخنه
صباح المشاكل المتجذرة
صباح الاصابات الخطيرة

رابطة عناد وامهم معهم بعد كلكم معزومين على حسابي بالكوفي الي تبونه
اختارو الي تبون قهوة ساده - قهوة عالريحه - قهوة دبل - قهوة تركيه -
قهوة سعوديه بالهيل والزعفران - شاي اسود صعيدي يفك الدماغ ... الي
تبونه اطلبوه ولاتستحو كله فداكم وفدا عنادكم لما يطلع من ورطته ويرجع
لكم ماقول سالم لااا اكيد فيه كم اصابه على كم شلخ على كم كسر على كم رض
يمكن تهدا اعصابكم ومخكم يروق شوي والتوتر يخف حدته اكثر
ايه نسيت اقول لكم هذي وصاة ياسر لي فديت قلبه الحنين يؤبشني هالرجال

البطة السوداء : الله يعوض صبرك خير ويجبر مصابك بابنك باللي افضل منه دنيا وآخره
وصدقيني فيه غيرك كثير وساكتين والانسان ماتهون عليه مصيبته الا لما يسمع
الي اكبر واعظم منها ولو اقولك على الي شفته بعيني مو سمعته بتهون عليك مصيبتك
فرددي دائما انا لله وانا اليه راجعون اللهم اجرني في مصيبتي واخلف لي خيرا منها

نرجع لضمضم وعيالها الي حايسينا من زمان ومارضي حالهم يتعدل قلت لك ياقلبي عطيني
اياهم يوم واحد وبخليهم يمشون على الصراط المستقيم ومايطالعون لا يمين ولا شمال

جسار والظبي : افضل شي هالمقارنات ومن اول ليله له مع الثنتين خصوصا انه صحفي
والمفترض فيه عنده سعة ذاكرة وشدة ملاحظه والتلقائيه والتصرفات الي بتنم عن الظبي
خير معين لها مع شخص مثل جسار مهزوز من الجنس الثاني وطبعا ماراح تتضح له الرؤيه
كويس الا مع مرور الزمن ومع اسلوبها الراقي والقوي والحنون بنفس الوقت مع تؤمه
لان حتى من هالناحيه كانت سيوف ماتعرف تتعامل مع بناتها بطريقه حنونه او تربويه صحيحه
فامامك ياجسار صدمات من عدة جهات عودة سيوف عشان تخرب عليك والتعرف على المراة
من منظور بنت العاجي وصدمتك بكبار الراسي وصدمتك باصابة اخوك وتعرضه للخطر من اجل
الوطن ووقتها بتحس بصغر مشكلتك امام الي يواجهه اخوك وفوق كذا بصغر عقلك انك مارضيت
تسامحه على شي هو سكت عنه وصبر على اذاه بحسن نيه عشان مايخرب بيتك وتسبب بخراب بيته

( يمه انا عندي احساس ان ها الولد هو بداية الخيط لـ ولدكـ..! )
يسلم لي ابو قلب ابيض زي البفته البيضاء
يالغيوض تكفين جمعي البقيه الباقيه من مخك واجلسي مع الخبله الثانيه بنتك
وجمعو الحروف وبتطلع لكم الجمله مفيده وفيها الحل للاحجيه الي مو راضيه تنحل


اتوقع رهف تطلع من عند ياسر لامها ولما تشوف انهيار امها وتقولها عن رعد
وان شاء الله تتذكر ان عناد زوج ملوك الي خذت منها الصورة هو شبيه احمد ويطلع
منها فايده مع اني شبه متاكده انها مالها فايده بهالناحيه دام ياسر فقع قلبها بالحقيقه
المرة فمخها خلاص طق وطار وماحولها الا ملوك والماضي الاغبر
اتمنى ان الغيوض تعقلها وتفهمها ان ملوك خلاص متزوجه وان دور رهف الحين بانها
تنسيه اياها خصوصا انه قالها انه يحبها يعني فيه لها امل ماقطعه منها

( آطراف ذيل الفستان الابيض...! )
يمكن ترسل لك رساله باللون الابيض انها مثال الطهارة والنقاء وياكثر ماحتشوف من هالرسائل

( آيمكن ان تكون مـتدينه ولم تأخذها حياة الثراء الذي تعيشها..؟ )
يعني ماينفع تجمع بين الاثنين ياسي جسار بيه الا بتشوف منها الي ماتتوقعه والي بيصدمك

(هل عبث ياسـر ب وجعي وآخبرها ب استغفالي من تلك الافعى...؟ )
لا من هالناحيه تطمن الاثنين هم الي مخططين لك ومنفذين

( وكأنه مجبراً على زواجه.. فلم تلمح بتقاسميه الا العبوس...و..قلة الذوق..! )
طبيعة الانثى مهما كانت قويه وواثقه تغلب عليها فرغم معرفتها بسالفة سيوف الا
انها ماخطرت ببالها انه مصدوم ومتوجس من هالناحيه لا خافت انه مجبور عليها
وبتتاكد عندها هالنظريه من سرعته بالتملك عليها ومن صده لها

( آه...! يبتسم...؟ لوهله اعتقدت ب انه تمثال من عقيق...لآيبتسمـ...! )
خخخخخخخخ ابوالهول على غفله اجل لو ماخذه اخوه كنت قلتي ايش ؟؟؟!!!!

جسار مازال الاب والام لتؤمه يمكن تفكيره بهالمنطق لانه كان دائما يعوض انشغال
امهم عنهم ويحاول مايحسسهم بالنقص رغم وجودها بس فعلا اهنيك ضمضم على
فكرتك بابعاد التؤم من هالليله ومن ترسخها ببالهم فحتى لو كانت الظبي طيبه معهم بيكون
شكلها بالفستان الابيض حاجز غير شفاف بينهم ولو كبرو بيظلو يذكروه دايم

( آوجعه قلبه لـ الغرق )
عساك يامناير تغرقين بتسونامي وماحد حولك وتتمنين احد يساعدك وماتلقين
والله اني مشتاقه لبارت السبت ابشوف شلون يادبها ياسر عاد مالقت تتحرش الا بياسر
خلها دواها وعلاجها عنده لا وبعد وقتها ان شاء الله يكون بدخول فلك عاد
فلك بتدخل بثقلها متسنده باليمين من بتال وباليسار من مقرن وقدامها ياسر ههههههههههه
شوفو حريقة جوفها وبطول لسانها عليها وعلى اصلها والي بيوقف لها ثلاثتهم واولهم
مقرن الي بيصدمها صدمة عمرها ووقتها الي مايشتري يتفرج

( شـعر ب ضيق... والحروف تتوقف ب رأس لسانه... لـتعلن اختناقها... )
الاكيد ان كلام ملوك ماحيمر مرور الكرام وانه بيدور براسه بدال المرة الف لكن اتوقع انه
لانشغاله بالعمليه اجل الموضوع حتى يخلصها ويمكن اثناء اصابته يرجع له الكلام ويفكر
بالحلم الي يحلمه ويراجع تصرفات اهله السابقه من سفرهم دونه ومن تعامل ساره معه
وبكذا بيربط الخيوط ببعض وهالصورة الي بسيارته بيكون لها دور بحل اللغز

( آخاف من كثـر حبـي لك...يصير بغيابك شي وتختنق انفاسـي فيكـ...! )
هو بتختنق بس بعدها بتنقلبين لكونداليزا رايس وبتجيك قوة العفاريت عشان تدافعين
عنه ومايجيه شي بس ياليت هالجمله توصل لياسر عشان يعرف قيمته عندها الي ماكانت
تخليه حتى يشوف عيونها ام رموش شطولها ووقتها يعرف فضل ربي عليه بالمدلعه الي
غرقانه لشوشتها بحبها له

( اذا مالي فيك عازهـ...فـ...الدنيا كلها مالها عازهـ عندي.. )
ياحليلك ياضمضم كانك كنت حاطه لغز واكمل البيت وبعد ماتكمل طلع من افضل مايكون


هالشي الي كان بتال وفلك من زمان محتاجينه جلسة مصارحه وتعبير عن كل مشاعرهم
ومشاكلهم ويافلك شوفي بعينك مو بقلبك واحكمي وبتعرفي ان قلبه افضل لك من الكلام
والسفر والهدايا وكل شي لان كل هالحاجات كانت عندهم العمر كله وعمرهم ماحسو بالسعادة
ولا ذاقو طعمها ويمكن الحين يكون وقت رجعتك للبيت العاجي الكبير هو افضل وقت حتى
تكوني مدعومه بمقرن وبتال بنفس الوقت ولان منايروه العله مابتحسب حساب تغيير مقرن
فبتهجم وبتطاول عليها بالكلام والي بيوقفها مقرن بنفسه وبيرد لها كرامتها امامهم كلهم
وان شاء الله تظل خبله زي دايم وتطول لسانها عليه ووقتها تجيها الطلقه الي تبرد قلب ياسر
وقلبي معه


الموقف بين مقرن وفلك قمة الطبيعيه فلو كان غير كذا فهو مصطنع والي يطالبوها تحترم
شيبته وتعدي هالموقف بكل سهوله هم الي غير منطقيين لاينسو الذل الي عاشته والطلاق
وهي بسن صغيرة بدون ذنب الا انها براقيه هذا غير نبذهم لولدهم لانه تزوج منهم وغير
اسلوبهم مع ياسر عشان يترك اهله وطلبهم طلاقه لملوك لانها منهم يعني قائمه طويله
عريضه ماتنتهي بكلمتين بس كان لازم يعتذر وهي تعاتب حتى القلوب يخف الي فيها وبرضه
لازم رجوعها الحين معه حتى تترسى على ارضيه ثابته وابنها اوبنتها يطلعو للدنيا واهله متصافين
ومابينهم الي كان بين ام ياسر واهل ابوه والشاطر الي يستفيد من تجارب غيره ومايطيح فيه

( آردف\تعالـي معي مالك الا كرامة محفوظه وقدر مرفوع...تعالي يا ابوك...! )
انتظر بس كيف بتثبت هالشي لام لسانين وكيف بتبلعها العافيه وكيف ياسر بينسيها اسمها

( آخر شي اتوقع انك تخون الرفيق..! )
عشتو والي تسويه انت شسمه بالله
ضمضم شكل الشي البارد الي على ظهره هو كاتم الصوت وطبعا لان نفسه دنيه وحاول كم مرة
يدخل البيت بوجود عناد ولانه سمع صوت ملوك فيمكن تكون داخله مزاجه غير انه يبي ينتقم منه
فيها فبيطلب منه انه يتحرك بهدوء للبيت ولا بيطلق عليه الرصاص والاكيد انه بيرفض حتى مايعرضهم
للخطر وهنا يوسف بيقوله انه مسلط عليهم احد واذا ماتحرك بيطلب منه انه يتخلص منهم وقتها
بيروح معه للبيت مع اعتماده على الفرقه المسانده بعد الله
وهنا عناد بيمشي بشكل متخبط حتى ينبهها لشي غلط وتنتبه وتاخذ حرصها وتمسك
المسدس للحمايه عاد بعدها ايش الي بيصير مااعرف بس اكيد بيكون فيه اشارات من عناد لملوك
بتحاول تنفذها لكن من خوفها عليه بيصير شي عكسي او اصابه لطرف مسالم وبعدها تتدخل الفرقه
او ممكن من غيرته انه احد يشوفها من فرقة الدعم يحاول يغطي عليها فتجيه الرصاصه بالغلط


ابدعتي ابدعتي ابدعتي ضمضم وقليله بحقك هالكلمات قدام التشويق والاثارة الي معيشتنا فيهم
ههههههههههه الله يصبركم ياجماعة عناد ليوم السبت باقي يوم يومين ثلاثه ويمكن يكون مقارب
للاربعه لو كان مسائي فصبر جميل والله المستعان ههههههههههههه

رابطــــ ياســـــــــــــــر ــــــــــة