كاتب الموضوع :
♫ معزوفة حنين ♫
المنتدى :
القصص المكتمله
نساء ورجال اطفال وشيوخ يملئون هذا العالم فوضى وفي بعض الاحيان يزيدونه هدوء يزينون هذه الدنيا بالضحكات أو يزيدونها تشويهاً بصوت النحيب والبكاء
قلوب تحكمها العقول وعقول تحكمها القلوب وكلاً يغني على ليلاه منهم من يضحك لسعادته ومنهم من يبكي لكثرة همه
سأتجاهل كل هؤلاء ولن ألتفت لا لسعادتهم ولا لأحزانهم سألتفت فقط الى أبطال روايتي وكيف تقلبهم هذه الحروف بين سطوري
الفصل العاشر
((الجزء الأول))
الساعه 9:30مساءً بتوقيت السعوديه 12:30 ظهراً بتوقيت أمريكا
راح لها الصالون وهي جالسه تشوف التلفزيون وهو مبتسم على الاخر : نتغدا برا ؟
نجلاء تضحك : تو تقول مابي اكل الا لما اسأل المرشد
مشعل بلا مبالاه : قومي بس بعزمك على أكله تعجبك
نجلاء تفكر : وش اكلته
مشعل : باستا مع خضار
نجلاء بقهر : ياليل الخضار
مشعل بسرعه وهو مبسوط : اقول قومي بسرعه لاتخربين مزاجي انا احس اني مرووووووووووووق على الاخر
نجلاء مبتسمه : دوم يارب
مشعل يفتح محفظته ويناظر بالمحفظه مستغرب وبعدها يرفع عينه لنجلاء وعلامات الاستغراب واضحه بوجهه: انا متأكد كان فيه فوق الـ 500 دولار بالمحفظه
نجلاء تناظره : حبيبي انت ماتتذكر امس كيف كان العشا ولا وش صار تبي تتذكر كم كان بمحفظتك؟
مشعل يضحك : والله انك صادقه شكلي صرفتهم بشي
نجلاء تتبسم : بطلنا باستا مع خضار والا باقي العرض قائم؟
مشعل يضحك : لاباقي قومي بمر اقرب صرافه وبسحب فلوس
نجلاء تقوم بحماس : دقايق واكون جاهزه
:
:
:
الشرقيه الساعه 10 مساء ً ..
بيت ابو ناصر مجلس الرجال بالتحديد ..
فهد واللي كان جالس بجنب احمد : انا ماشفت بنت اختي من يوم انها صغيره بس انا اشهد ان الحظ ابتسم لك
احمد يضحك : ماعندي أي شك بكذا دامك خالها
فهد يعدل شماغه بغرور : كلك ذوق والله
احمد : بس ليه عاد ماشفتها من يوم انها صغيره
فهد : شسوي قبل الدراسه والحين الدوام ماخذ كل وقتي بس يعلم الله اني مو ناسيها
احمد : ليه وش تشتغل
فهد يبتسم : طبيب اطفال
احمد مبتسم على الاخر : والله حركات
فهد مبتسم اكثر منه : عشان تعرف انك مناسب ناس حركات
احمد ببرود : والله
فهد يضحك : لا حنا اللي مناسبين ناس حركات
احمد يضحك : حلفت عليك يارجال
سلمان وهو يقرب منهم بحماس : وش موضوع النقاش
احمد وفهد يناظرون في بعض متوهقين
سلمان يضحك : الظاهر ماعندكم سالفه
فهد فاطس : والله انك صادق
سلمان يرفع حاجب وهو يناظر فهد : عمي مستلم الرجال يوم ملكته سوالف سامجه ؟
فهد يضرب سلمان على رجله : ولد استحي
سلمان يناظر بنفسه : شككتني برجولتي كل هالطول والعرض وولد
احمد يضحك : هو قصده انك ولد بالنسبه له
فهد يلتفت لأحمد : يعني ينقالك تبي ترقعها وش قصدك انا شايب يعني
احمد توهق وبكل ارتباك : لا لا بس
فهد يحط يده على رجل احمد : ماعليك تمون يارجال
احمد ابتسم وبينه وبين نفسه : معقوله كل هالذوق وناسي بنت اخته مايسأل فيها يمكن صح كلامه مشاغل
قطع كلامه صوت ابو فارس : احمد تراك ماخذ اغلى بنات العايله حطها بعيونك
احمد مبتسم : بعيوني والله
ابو سلمان يناظره وباينه الجديه بكل ملامحه : ترى اغلى من بنت اختي ماعندنا والله من غلاتها مسمي بنتي على اسمها الله يرحمها
احمد بهدوء : الله يرحمها
ابو مشعل من الكنبه المقابله : حتى انا بوصيك عليها تراها غاليه على الاهل والغالي عليهم غالي علينا والله ام مشعل مايمر اسبوع ماتتذكرها وتوصيني فيها ودايم اقول لاتوصين حريص
ابو ناصر بأرتباك وهو يفرك بيدينه : ايه انا بعد مااوصيك عليها
احمد يبتسم ابتسامه باهته : والله بنتكم بعيوني والله يقدرني واسعدها ..وبينه وبين نفسه : معقوله كل هالحب وهالتوصيات نفاق مثل نفاق ابو ناصر بس لا باين عليهم عيال نعمه من لبسهم وطريقتهم بالكلام ابو مشعل لحاله حتى جزمته (وانتم بكرامه ) ماركه فرنسيه مو محتاج ينافقني اكيد فيه شي غلط بالموضوع لجين قالت لي انها ماتشوفهم الا من عيد لعيد ومرات حتى بالاعياد مايجونها
سلمان يهز احمد: وين وصلت ياعريس
فهد يغمز لأحمد : مستعجل على العروس يبي يشوفها اكيد
احمد إنحرج : لا كنت افكر
فارس من بعيد وبصوت عالي : ايه تفكر بالعروس
كل اللي بالمجلس يضحكون
فهد بصوت مسموع : اقول ابو ناصر ماتبي تخلينا نبارك لبنت اختنا ..وناظر احمد بطرف عين : ونخلي هالعريس المسكين يشوفها
ابو ناصر بأرتباك : بس
ابو مشعل بسرعه وهو يهز راسه بالايجاب : ادري ماعندك مجلس غير هذا خوالها عادي يشوفونها وانا باخذ هالعيال ..ومسك سلمان وفارس : وبروح معاهم برا
سلمان بسرعه : لحظه قبل نطلع خل فارس يغني لنا شي
فارس يناظر بسلمان : وانتم كل ماشفتوني قلتو غني
احمد يناظر بسلمان : ليه صوته حلو
سلمان بحماس: الا احلى من حلو صوته رهيب
احمد يعدل جلسته : والله ما أشوف عروستي الا لما تغني
فارس : ماجبت العود
سلمان يدفه : وقت عودك هالحين نبي شي يفرح ..جلس بسرعه وقرب الطاوله : انت غني وانا بستلم الايقاع
فارس يجلس بجنبه وهو مبتسم على الأخر : امحق ايقاع مدرس لغه انجليزيه وتخب بعد
سلمان يصفقه : ولد ترى اعفس درجاتك
فارس : ياليل التهديد اقول لك مشكله لاصار ولد عمك أستاذك
احمد فاطس ضحك : لاتمزح سلمان استاذك
فارس يضحك : ورب البيت
احمد يناظر سلمان : ماتوقعت ابد
سلمان يسوي معصب: وش قصدك مو شكل استاذ
احمد يناظره : لا الصراحه لو قلت معيد بالجامعه بصدق ماشاء الله عليك قمة الاناقه بس شكلك انت وفارس ماتوقعت انك استاذه
سلمان يسوي مسكين : شسوي ولد عمي وجمعتني فيه كذا مناسبه ويمون ابن اللذينه بس ماعليك اعجبك بالمدرسه ولاكأنه ولد عمي
فارس يضحك : ايه يتبرى مني يقول تجمعني فيه صلة قرابه اللي يسمعه نهائي مايتوقع انه ولد عمي
احمد فاطس : زين يسوي فيك عشان لاتصير كسول وتعتمد عليه
ابو فارس يناظرهم : اشوف مسكتو خط مع المدرسه وقته الحين وين الاغنيه
فارس يضحك :طيب طيب ..احم احم ..التفت لسلمان وش اغني ؟
سلمان يفكر : غني أنا الشاكي حق الجسمي ..حافظها ؟
فارس بسرعه وبكل حماس : أنا الشاكي أنا الباكي أنا الحساس أنا اللي بالمحبه رافعاً راسي أنا لولا المحبه ماخضعت الراس ...ألخ <<حلوه
سلمان كان يتبعه بصوت الضرب على الطاوله اللي كان متقن نوعاً ما
:
بنفس الوقت وبالصاله سمعت حور اللي متخذه حظن لجين كرسي لها صوت فارس وبكل حماسي: عروسه سمعتي ثوت اخوي يغني
لجين مبتسمه: ايه صوته حلو
العنود تناظر بنوره: نصفق ؟
نوره تصفق بحماس : ياللا
شاركتها العنود وعهود وشروق ..ام مشعل تحمست معاهم وصارت تصفق وام فارس شاركتهم ..ريم لما شافت الكل يصفق صارت تصفق معاهم
:
سلمان واللي سمع صوت الحريم : كمل كمل شف الحريم تحمسو
احمد يضحك وبينه وبين نفسه : والله عايله فله وينكم عن هالمسكينه اللي حاسه ان ماعندها احد الله يقطع المسافه يمكن هي السبب
:
:
:
الساعه مساءً10:30 بتوقيت السعوديه 1:30 ظهراً بتوقيت أمريكا
بعد ماسحب مبلغ من الصرافه ناظر فيها : ياربي صاير اصرف كثير
نجلاء : ويعني
مشعل : ابوي حاط لي مبلغ وقال كل شهر بحط لك مثله بس ان استمريت كذا ماراح يكفيني المبلغ
نجلاء منقهره وتحاول تخفي قهرها : قول له انك تحتاج اكثر
مشعل بعد تفكير: لا لا بخفف مصاريفي بابا متعود علي غير متكلف بحياتي وصرفياتي مو كثيره مابيه يلاحظ يوم جيت هنا تغيرت
نجلاء بضيقه : اها مدري كيفك
مشعل يحط الفلوس بمحفظته : مشينا
:
:
:
الساعه 11 مساءً
مجلس ابو ناصر ..
احمد بعد ماخلص فارس : ماشاء الله صوتك حلو جد
سلمان : ماسمعته وهو يغني حزين والله تدخل جو
احمد : انا احس نبي نلتقي كثير بعد ماناسبتكم واكيد بسمعه
سلمان : هو بنلتقي اكيد بس كثير اشك فيها وين الشرقيه والرياض وين
احمد يضحك : السيارات ماخلت شي
سلمان : والله انك صادق
فهد بسرعه : ماتبون تخلون الرجال يشوف حرمته تلاقيه متحمس ويقول وش ذي العايله النشبه اللي ناسبتها
احمد يبتسم : لا شدعوه
اخذ ابو مشعل فارس وسلمان وطلع معاهم برا ..
طق ابو ناصر الباب وبعد ماجاته ام ناصر : نادي لجين خوالها يبون يباركون لها
ام ناصر طيب
هناك وبالكنبه اللي جالسه عليها لجين كانت حور مستلمتها .
حور مستغربه : يعني وشلون ثرتي عروس انا ابي اكون العروس
لجين تتبسم لها : اذا كبرتي ان شاء الله
حور تبوسها : ماينفع الحين
لجين مبسوطه : لا ماينفع
حور: ابي اثير حلوه مثلك انتي مره حلوه
لجين تبوس حور: يابعد قلبي انتي بتصيرين احلى
ام ناصر قاطعتهم وهي توقف بدفاشه عندهم : قومي عمك يبيك
لجين تنزل حور وتوقف بأرتباك: ليه
العنود مبتسمه وتناغزها : ليه بعد بيشوفك سعيد الحظ
نوره: ايوه ياحركات والله انه بينهبل
لجين تتبسم لهم وتناظر بنفسها مستحيه : ابي شي احطه اغطي يديني المكشوفه
العنود تدفها : روحي بس خليه ينهبل
لجين مستحيه : لااستحي من عمي بعد يشوفني كذا
العنود راحت بسرعه جابت غطاها وجات : خذي حطيه عليك مثل الشال
لجين تتبسم : مشكوره عنوده
العنود تضحك : كم لجينه عندنا
ابتسمت لجين لها وراحت للمجلس وهي مستحيه هذي المره الثانيه اللي راح يشوفها احمد بدون عبايه بس هالمره غير لابسه فستان وحاطه مكياج ومره منحرجه مستغربه السبب اللي يخليها بكل مره تستحي من احمد اكثر اول مادخلت المجلس وهي منزله راسها جاها ابو ناصر مسرع وباس جبينها وابتسم بكل نفاق : مبروك يابنيتي
لجين بهدوء : الله يبارك فيك
ابو سلمان قرب منها وضمها بحنان : مبروك يابنت الغاليه
لجين : الله يبارك فيك خالي
ابو سلمان : انا وصيت احمد فيك وان جا يوم وزعلك ابد لايردك الا لسانك وانا اعلمك فيه
لجين تضحك : ان شاء الله
ابو سلمان يدخل يده بمخباته ويطلع علبه صغيره وياخذ يد لجين ويحطها فيها : معليه يابنتي خالك ماعنده ذوق بس حبيت اجيب لك شي على ذوقي
لجين تحب راسه : ياجعلك سالم
ابو فارس قرب منها وهو يناظر اخوه: عطنا مجال نبارك لبنت الغاليه
ابو سلمان يبعد عنها : بارك لها وأحد ماسكك
ابو فارس قرب منها وهو يضحك : انت ماسكني .. باس جبينها بكل حنان وناظر فيها : مبروك يالغاليه واي شي تحتاجينه تراي موجود ..ودخل يده بمخباته وطلع محفظته شال كل الفلوس اللي فيها كفسهم وحطهم بيدها : انا ماشريت لك هديه وتارك الهديه للعرس هذول بس عشان فرحتنا فيك
لجين تحب راسه : مشكور خالي
ابو فارس يتبسم لها : مايحتاج تشكريني انا بمقام ابوك الله يرحمه
قرب منها فهد مسك ابو فارس من كتوفه وبعده : لو سمحت ابي اشوفها انا حتى مااعرفها
ابو فارس : تفضل
فهد قرب منها ووقف مقابلها : انا خالك فهد
لجين :........
فهد ينزل راسه وجسمه شوي ويناظرها من تحت : ابي اشوف وجهك
لجين ساكته ومنحرجه
فهد يعدل وقفته ويحط يده تحت دقنها ويرفع وجهها له ..
لجين تنطاع له وترفع وجهها بشويش وهي منحرجه مره وخدودها بدت تحمر
فهد يناظرها : بسم الله ماشاء الله ..والله محظوظ فيك احمد يابنت اختي بس ليه الخدود حمر
لجين تنحرج وتنزل راسها بسرعه
فهد يضحك : اول شي الف مبروك
لجين بهدوء : الله يبارك فيك
فهد مبتسم على الاخر : ثاني شي صراحه ماجبت هديه ولامعي محفظه مليانه فلوس نفس بعض الناس محفظتي بالسياره بس مستعد اعالج عيالكم مدى الحياه مجاناً
ابو سلمان يضحك : بسم الله على عيالهم
ابو فارس بصوت مسموع وهو يضحك: وخر بس انت وهديتك ماعندك سالفه
احمد يحاول يشاركهم الكلام وهو ملاحظ خجل لجين : لا لا حلوه هديته بس بشرط حتى الدوا عليه
فهد فطس ضحك: وش هذا عريس استغلالي
احمد يضحك : عشان نحس ان هديتك لها قيمه
فهد يضحك : بالله عليك
احمد بهدوء : لا خيرك سابق
فهد يناظره : لا خلاص موافق الدوا علي
احمد بسرعه : لا لا بسم الله على عيالنا
ابو فارس وابو سلمان فطسو ضحك
فهد بتذمر : وش ذا ماعرفنا لك
احمد : تبي تعرف لي
فهد : ايوهـ
احمد : اطلعو 5 دقايق وتعرف لي زين
فهد فاطس : ايوه يبي يجلس معها لحاله
احمد يحط اصبعته تحت الشماغ ويحك شعره : وش رايك يعني
فهد يناظر الموجودين : تعالو نسولف برا شوي ..ويناظر احمد : بس 5 دقايق
احمد : لا خليهم 10 دقايق
فهد بعد تفكير : رغم انك طماع بس ماشي 10 دقايق
ابو سلمان يمسك فهد : اقول امشي بس خلي الرجال يشوف حرمته
بعد ماطلعو من المجلس اللي له باب خارجي وتقفل الباب جلس احمد وبصوت مسموع : تعالي اجلسي
لجين تجلس بعيده عنه شوي
احمد يقرب منها : وش عندها المستحيه لايكون مصدقه انك اول مره تشوفيني
لجين انقهرت من كلامه وبكل برود : لا مو مصدقه
احمد ناظر فيها وبجمالها بالفستان الاسود الساحر عليها واول ماحط عينه على وجهها يتأمله لاحظ دمعه نازله على خدها حط يده بسرعه تحت دقنها ولف وجهها له بسرعه : وراك تبكين ؟
لجين تبعد يده : ولاشي
احمد بقهر : مين مزعلك ..وبعد تفكير : لايكون زعلتي من كلامي تراي امزح
لجين بهدوء : لا مازعلت من كلمتك
احمد يوقف مقهور: احد زعلك علميني بروح اطربقها على راس اللي مزعلك انتي الحين على ذمتي واسوي اللي ابيه
لجين تسحبه : اجلس بعلمك
احمد يجلس ويركز معاها
لجين بعد مااخذت نفس : سحرني مشهد خوالي وكيف مهتمين لي صح يجوني بالاعياد ويعطوني فلوس وهدايا مرات بس هالمره غير حسيتهم فرحانين لي جد حسيت ان وراي احد
احمد يمسح دمعتها : لاعاد تبكين خرعتيني على بالي احد مزعلك ..بس تصدقين
لجين : وشو
احمد : حتى انا حسيتهم ناس مره حبوبين وذوق مستغرب وشلون هاملينك كذا
لجين تهز كتوفها : مدري
احمد : جا براسي اسألهم تصدقين
لجين بسرعه : لا لا تسألهم
احمد يناظر بيدها : افتحي العلبه شوفي شفيها
لجين تتبسم : طيب ..حطت الفلوس على جنب وفتحت العلبه وشافت فيها خاتم ذهب مره ناعم وحلوو
احمد يناظره : والله رهيب عنده ذوق صراحه
لجين وهي تاخذ الفلوس : ايه ..خلصت كلمتها وفرقت الفلوس عن بعضها شافتهم 4 من فئة الـ 500 ..ناظرت احمد بسرعه
احمد مبتسم : خوالك مقتدرين
لجين : ايه
احمد : وباين عليهم كرمه يمكن ظروفهم نونه او مشاغلهم منعتهم عنك
لجين تناظره بحزن : انت عذرت اهمال ابوك بمشاغله
احمد يتنهد ويلف وجهه عنها : لا لأن هذاك ابوي وماعنده غيري تفرق
لجين : الاهمال هو الاهمال ..وبسرعه وهي تبتسم : ايه صح
احمد تحمس معها : وشو وشو
لجين : بنت خالتي تقول تعالي معاي الرياض
احمد خف حماسه : وجدتك ؟
لجين تتبسم : باخذها معي تشوف جدتي الثاني ومنها اتعرف عليها انا ماشفتها بحياتي وقالت لي بتساعدني اجهز وحركات
احمد بعد تفكير : ومااشوفك طول الشهر ؟
لجين : عادي كثير من الاهل مايشوفون عيالهم
احمد مستغرب : الاهل؟
لجين : ايه انت مو بابا؟
احمد يضحك : ايه صح وبعد تفكير : تدرين انا بعد بهالوقت بصير مشغول بين الدوام وبيتنا الجديد روحي معاها عادي بس بشرط
لجين : وش الشرط ؟
احمد : بمرك الليله بعد ماتروحين بيتكم
لجين : وليه ؟
احمد يناظرها بقهر : وش اللي ليش لي اسبوع ماجلست معاك بسهر معاك الليله بما اني شهر ماراح اشوفك
لجين : طيب طيب اهم شي اروح تحمست صراحه بس احمد اخاف عمي مايرضى
احمد بقرف : ياكل تبن بس .. أمرك خلاص مو بيده وبعدين هو مو داري عنك انتي روحي وان صار ومر بيتكم ومحد فتح له ودق عليك يسأل قولي طالعه السوق او أي شي
لجين بعد تفكير : رايك كذا
احمد بثقه : ايه ولا عليك منه
فهد يطق على الباب وبصوت عالي : اقول يابو الشباب قريب تصير نص ساعه هذا مو اتفاق
احمد يضحك وبصوت عالي : عطني بس 3 دقايق
فهد : 3 دقايق وبقتحم المكان
احمد يضحك : طيب ..والتفت للجين : والله خوالك حركات
لجين تتبسم : زين يوم انك حبيتهم ..خلصت كلامها ووقفت
احمد يسحبها ويجلسها : انثبري ليه قلت له 3 دقايق عشاني انا بعد جايب لك هديه
لجين تتبسم : وش جايب لي
قام احمد بسرعه وراح عند الكنبه اللي كان جالس عليها وقت وجود الرياجيل واخذ كيس من هناك ورجع جلس بجنبها وطلع من الكيس علبه مربع فتحها وطلع منها عقد الماس
لجين تناظر العقد بأنبهار : واااااااااو شكله غالي
احمد وهو يقرب منها يلبسها : مايغلى عليك
بعد مالبسها حط يده بالكيس وطلع علبتين صغار
لجين تناظر : وش بعد ؟
احمد مبتسم على الاخر : جبت لنا محابس على ذوقي
لجين فاطسه : بذمتك
احمد بهدوء : والله ..ضحك بعدها : يوم السبت بروح الدوام وكل اخوياي بيباركون لي حفله
لجين : هذا بس للي مهتم له
احمد يطلع المحبس الذهبي : مالك دخل هاتي يدك بس ..بعد مالبسها محبسها طلع محبس فضي من العلبه الثانيه : لبسيني
لجين مفهيه : هاه
احمد : اقووووووول لبسيني
لجين تاخذ المحبس وتلبسه احمد ..
احمد يناظر يده: مبروك عليك انا
لجين تضحك : بالله عليك
فهد يفتح الباب ويدخل : انتهى الوقت عطيتك وجه بزياده
احمد فاطس : يارجال كنت اخطط ابوسها
فهد يسوي معصب : نعم نعم
احمد يضحك : والله امزح شدعوه بس كنت البسها المحبس ..ورفع يده لفهد وخليتها تلبسني
فهد يناظر : والله منت هين ماعندك وقت ابد
احمد يضحك : أي وقت خلاص يوم الملكه والتلبيسه وكل شي
فهد يضحك : احسن شي
لجين وقفت وبكل هدوء : استأذن
فهد مبتسم على الاخر : ودي اقول لك اجلسي بس ماينفع الرجال ماتو حر برا
احمد يضحك : لاتبالغ الجو معتدل
فهد بتذمر : امحق
طلعت لجين والألماس يبرق من بعيد ..عنود قربت منها تناظر : واااااااو هذا الماس اكيد
لجين : ماادري
نوره تناظر فيه : مررره حلو
حنان وهي تلوي فمها : جايب لها الماس بعد مالت من زينها
ام ناصر تدف حنان : اص اسكتي ..وتتبسم للموجودين مجامله ونفاق : تستاهل لجين
:
:
:يتبع,,
|
14-03-10, 06:44 PM
جديد مواضيع قسم القصص المكتمله
العرض العادي
