لمشاكل التسجيل ودخول المنتدى يرجى مراسلتنا على الايميل liilasvb3@gmail.com





العودة   منتديات ليلاس > القصص والروايات > المنتدى العام للقصص والروايات > القصص المكتمله
التسجيل مشاركات اليوم اجعل كافة الأقسام مقروءة

بحث بشبكة ليلاس الثقافية

القصص المكتمله خاص بالقصص المنقوله المكتمله


إضافة رد
نسخ الرابط
نسخ للمنتديات
 
LinkBack أدوات الموضوع انواع عرض الموضوع
قديم 13-03-10, 06:35 AM   المشاركة رقم: 16
المعلومات
الكاتب:
اللقب:

البيانات
التسجيل: Mar 2010
العضوية: 157074
المشاركات: 281
الجنس أنثى
معدل التقييم: راعية الفزعة عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
راعية الفزعة غير متواجد حالياً
وسائل الإتصال:

كاتب الموضوع : راعية الفزعة المنتدى : القصص المكتمله
افتراضي

 

خالد وهو يتنهد : لا ماشي يا روضه بس تذكرت الموقف اللي صار .. وايد مضايقني
روضه وهي تمسح بيدها ع راسه : انسى يا خالد موقف وصار يعني ضيجتك ما راح تقدم ولا تأخر شي
خالد : روضة إنتي ادرى وحده فيني عمري ما جرحت إنسان .. ما أدري ليش صارخت عليها بهالشكل
روضه بحزن : انا ما اقدر اقولك انه اللي سويته صح انته غلطان وعرفت غلطتك لا تكدر روحك ياخوي
خالد بضيج : بس هي ما تستاهل اللي سويته فيها !! سمعتي إختها شو قالت صار لها سنين حابسة نفسها في الغرفة .. يمكن كانت خايفه من إنها تواجه الناس .. وعقب ما قدروا يقنعوها جيت انا وخربت عليهم كل شي
روضه بابتسامه : حشا مب خوله هذي سوت فيك كل هذا .. إنته ليش تفكر فيها بهالشكل .. الموضوع إنتهى
خالد : ما ادري يا روضه ؟؟ يمكن لأني حاس بالذنب .. أو أني بدل لا امسح الحزن اللي ارتسم على ملامحها رجعت مره ثانية وحفرت عليه حزن بس من نوع ثاني .. انا خليت كل الناس يضحكون عليها بدون ما اقصد
روضة بحزن : بس انته شفت الناس عقب ما تكلمت اختها الكل تعاطف معها ولامك .. خلاص عاد إنسي
خالد بضيج وهو ياخذ نفس عميق ويشد شعر راسه على وراء : تعرفين بشو أفكر الحين
روضه وهي تتنهد : بشو تفكر يا خالد ؟؟!! الله يهداك إنسى خلاص كل واحد راح في حال سبيله
خالد : آبا أشوفها يا روضه ابا اعتذر منها واخبرها انه ما كان قصدي اجرحها بس لاني كنت متنرفز فريت عليها هالرمسه بدون ما حس والله ما قصدي شي تتوقعين لو شفتها مره ثانيه واعتذرت بتقبل اعتذاري
روضه بضيج : شوف يا خالد ع حسب ما خبرتني والرمسه اللي فريتها ما اعتقد بتبا تشوفك حتى .....
خالد يقاطعها وبألم : كافي ياروضه لاتزيدين همومي اكثر ابا ارد البيت ابا ارسم عسب انسى كل اللي صار
روضه : خالد بصراحه انا اتمنى انك ما تشوفها مره ثانيه
خالد بضيج : ليش ؟؟!!!!!!!!!!!!!! ما فهمت اشو قصدج ممكن توضحي اكثر
روضه : ما أدري .. أشوفك وايد متعاطف معها .. وأخاف تكدر نفسك بسبة هالموضوع
خالد وهو يتنهد : يمكن اللي فيني تأنيب ضمير .. الله يخليج سيري زقري محمد واحمد وخلينا نرد البيت
روضه بابتسامه : ان شاء الله .. خالد عشان خاطري لا تكدر خاطرك .. ما أبا البسمة تفارق شفاتك
خالد بابتسامة : الله لا يحرمني منج .. يالله انا بنتظركم في السياره لا تتأخرون
روضه : لا تخاف ما بتاخر لا تنسى ورايه مذاكره بعدني وولحين ما خلصت هالسالفه لخبطت كل امورنا
خالد: يالله فديتج سيري ازقريهم مابا نتأخر اكثر .. أبا أرد البيت وأريح راسي
روضه : ان شاء الله احين بسير .. ثواني واكون عندك
ركب خالد السيارة واسندر راسه على الكرسي واول ما حط راسه وغمض عيونه شاف خوله جدامة .. وكانت الدموع محفورة على خدها .. ووجها صاير لونه شاحب .. وع طول بطل عيونه وتم يشوف حواليه بس ما حصل حد وأبتسم ابتسامه خفيفة وهو يمسح على وجهه .. الظاهر انج ما راح تخليني في حالي .. ويمكن تكون قصتج وراها الف قصه .. الله يستر من الجاي .. نصبر ونشوف وين بتودينا الاقدار

اقتنع خالد بأن الحب : سماء صافية ، وبحراً هادئ ، وبسمة حانية
فالحب، يزلزل الروح والكيان ويفجر ثورة البركان
والحب : ناراً تضوينا، نبنيه بأيدينا فماءه يروينا وزاده يكفينا
الحب : لمسـة من الـوفــاء و العـطـــاء, لــذا يجب أن يُعطـى التقـديــر اللائق بـه ، الحب يجب أن يكـون وديعـة مهذبـة للغايـة ، وأن نأخـذه بجديـ
فبداء يؤمن بالحب وتناسى كل ما كان يجول في رأسة من مبادئ فرضها على نفسه
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

في بيــــــــــــــــــــــــــــــــت بو مشعـــــــــــل
ام مشعل وهي تزغرد : تو ما نور البيت يا مشعل
ميثا وهي تمثل اونها مضايجه : افا يا اميه وانا وين سرت
ام مشعل وهي تحضنها : انتي الغاليه يا ميثا بس مشعل سافر وجابلنا الشهاده العوده
ميثا وهي اطالع مشعل : صج مشعل وين شهادتك وجم معدلك هاه
مشعل بتوتر: هاه بعدين بعدين انا تعبان وابا ارقد
بو مشعل : مشعل شسالفه لا يكون ضيعت 4 سنين ع الفاضي
مشعل : ابويه الله يهداك انا ريال وعقب جمن يوم بتوصل الشهاده لا تحاتي شي انته
بو مشعل : ادريبك ريال عسب جي انا شاد فيك الظهر وماباك تخيبلي ظني
مشعل هو يبوس راس ابوه : اركد واطمن ابوووي انت جايب ريال
ام مشعل : ها يا ابو مشعل اخيرا فرحنا بمشعل عقبال ما نفرح بميثا فديتها
ميثا اول ما سمعت هالرمسه اضايجب وسارت حجرتها
مشعل وعلامات الاستغراب في وجهه : اميه شو بلاها ميثا شاله هموم الدنيا فوق راسها
ام مشعل : شو اقولك بس يا مشعل هذا كله من تحت راس خالد حبته وهو مطنشنها ولا على باله
مشعل بعصبيه : خالد وليش يسوي فيها جي هو يحمد ربه وحده تصد صوبه صج ما عنده سالفه وبعدين ميثا شعنه تفكر فيه لا يكون تتحسب اني بخليها تاحذ خالد الا على جثتي يا اميه \إلا على جثتي
بو مشعل : لا يا مشعل ميثا اذا ما خذت خالد نحن بنتورط وبنتم بلا بيت يعني تقدر تقول بنيلس فالشارع
مشعل : الشارع !!!!!!
ام مشعل بضيج : هيه يا ولدي بنيلس في الشارع
مشعل : اميه شو بلاكم خبروني اشو مستوي تراني مب فاهم شي من رمستكم !!؟؟
بو مشعل : مشعل بصراحه الشركه فلست وعطوني بس شهرين عسب ارجع لحقوق لا صحابها ولا بيحجزون على كل املاكي يعني بنطلع من المولد بلا حمص .. حتى بيتنا اللي لامنا راح نخسره
خسارة ذاك التعب لي تعبتة بهدلت ناس عسب اوصل هنيه عسب جذا مابا اخسر كل شي يا مشعل
مشعل : ابويه لا تخاف فديتك بس شهرين شوف انا عندي مبلغ حاليا ادفعه وعقب بنأجل الموضوع شوي لين انا اتصرف.. إنته بس عطني مهلة كم يوم وان شاء الله بدبرها
ام مشعل : مشعل انت من وين لك فلوس !!!!
مشعل : اميه شو يالس اقولكم من الصبح تراكم جايبين ريال
ام مشعل : ادري انك ريال بس احينه تخبرني من وين جبت لــ لفلوس
مشعل : لا تخافي يا اميه انا كنت اشتغل وادرس بالفلوس اللي جان يطرشها ابويه حقي كنت ادفعها اقساط الجامعه وفلوس الشغل ع طول اوديهم البنك .. يعني الواحد ما ضامن نفسه متى يكون فوق ومتى تحت
ام مشعل : الله يريح قلبك نفس ما ريحتني ترى ما ناقصين مشاكل اللي فينا مكفينا
مشعل : اميه شو بلاج قتلج لا تخافين علي تراني مب ياهل يالله اترخص احينه بسير اشوف ميثا شو بلاها
بو مشعل : خلاص يا ام مشعل لا تضغطي عليه
ام مشعل : سير يا مشعل ما بيدي غير ادعيلك الله يحفظك من كل شر
مشعل : يالله اترخص انا

في غـــــــرفة ميثا ...
ميثا كانت متخيسه من الصياح وفجأه سمعت احد يدق الباب
ميثا بعصبيه : مونيكا قتلج مابا عشا سيري عني
مشعل : افا يا ميثا عاد انا تخليني مونيكا
ميثا بضيج : هلا مشعل تفضل اتحسب مونيكا
مشعل با بتسامه : لا فديتج مب مونيكا انا مشعل بلحمه وشحمة احدر ولا اطلع بكرامتي
ميثا : تراك حدرت
مشعل : لا بعدني عند الباب فاذا تبيني اسير بسير
ميثا بابتسامه : مشعلوه تراه مب ناقصتنك قتلك احدر
مشعل وهو يجلس عدالها : افا يا ميثا من يوم صغار وانتي اسرارج ويايه شو ياج احينه انا اخر واحد يعرف انج تحبين هالخالد .. شو اللي تغير ما صرتي تأمنين فيني شرات أول
ميثا : شسوي يا اخويه انا اعرف انك تكره خالد وخفت اذا خبرتك تعتفس السالفه .. وتعصب علي
مشعل : انا صح اني اكره خالد بس في النهايه تاكدي مابا غير راحتج ..
ميثا بضيج : بس يا مشعل انا راحتي عند خالد وليته حاس فيني .. طول الوقت حاقرني ولا يحس بوجودي
مشعل وهو يبوس راسها : لا تخافين يالغاليه من احينه اضمني انه فمخباتج
ميثا وشوي بطير من الفرحه : صدق يا مشعل انزينه خبرني شو بتسوى
مشعل وهو يغمز بعينه : كل شي فوقته حلو يا حلو
ميثا وهي تحضنه : عساني لاخلا ولا اعدم منك يا اخويه
مشعل : يالله احينه بسير ارقد ترى حدي تعبان .. والنجوم محاوطه على راسي
ميثا : اوكي فديتك سير ارقد وباجر بنكمل رمستنا
مشعل : تصبحين على خير
ميثا وهي ترسله بوسه في الهواء: وانت من اهل الخير

اعتقد مشعل ان كل شي يمكن شرائه بالمال وتناسى بأن الحياه تحب من يحبها .. والتعاطف أساس الأخلاق .. والصدق هو اللغة الوحيده للتفاهم .. وليس المال كما يعتقد هو
في بيت بو هــــــــــــــــــلآل

 
 

 

عرض البوم صور راعية الفزعة   رد مع اقتباس
قديم 13-03-10, 06:35 AM   المشاركة رقم: 17
المعلومات
الكاتب:
اللقب:

البيانات
التسجيل: Mar 2010
العضوية: 157074
المشاركات: 281
الجنس أنثى
معدل التقييم: راعية الفزعة عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
راعية الفزعة غير متواجد حالياً
وسائل الإتصال:

كاتب الموضوع : راعية الفزعة المنتدى : القصص المكتمله
افتراضي

 

في بيت بو هــــــــــــــــــلآل
هلال هو يصارخ : اميه مريم وينكن نبا نسير تأخرنا ع الجماعه
ام هلال : حشا يا هلال انت ما تخلى الواحد ياخذ راحته في هالبيت
هلال بابتسامه : اميه شسوي مستعيل مواعد فهود اوصلكم وعقب نسير نرمس ويا الشباب
ام هلال : من زينهم عاد الشباب اللي بتسير ترمس وياهم
هلال وهو اونه معصب : اميه لو سمحتي لاا تغلطين على ربعي
ام هلال: الله والربع عاد
هلال يقاطعها : اميييييييييييييييييييييه
ام هلال: خلاص انزين بنسكت
و نزلت مريم وهي حاطه ميكب خفيف
هلال بعصبيه : حوه انتي وين تبين
مريم : هلال شو بلاك تقصدني انا !!
هلال: لا اقصد اميه هيه اقصدج انتي وين تبين وليش متكشخه جي
مريم : لا حول احينه لا تيلس تفتحلي تحقيق تراني مب ناقصه عوار راس
هلال: سمعيني حبيبتي تسيري تخوزين هذا اللي حاطنه فويهج
مريم تقاطعه وبعصبيه : هلال تراني انا اختك العوده ما حرام لو احترمتني شوي
هلال : شوفي انا مالي كلام عندج وانتي بهاشكل سيري خوزي اللي فويهج وعقب تعالي نتفاهم
مريم بعصبيه : هلال انا حاطه خفيف وبعدين مب سايره مكان غريب .. ها بيت عمي
هلال: زين عرفتي انج مب سايره مكان غريب عسب جي سيري خوزي هالخرابيط اللي فويهج
مريم : اميه شو بلاه ولدج معقد جي ابويه على كبر سنه اعقل وافهم منه
هلال: هذاك ابويه بس انا غير يالله سيري غسلي ويهج
ام هلال : هلال الله يهداك بس احينه هي وين سايره
هلال: اميه حتى ولو هناك رياييل يعني لو بيت عمي كله حريم قلنا ما عليه
مريم بعصبيه : هلال شوف تراك وايد مضختها انا محد يهمني هناك تفهم ولا لا واذا تباني اسير جي تراني بسير وياكم واذا لا بسير حجرتي وبيلس اذاكر .. انا مش مشتطة على السيرة
وكلها ثواني و دخل بو هلال
بو هلال : حشا شو بلاكم صوتكم ينسمع من برع
مريم بضيج : اسأل ولدك اللي يبا يتحكم فينا من احينه .. سوي هذا ولا تسوي ذاك .. صدق حاله
بو هلال : هلال شسالفه شو بلاها اختك
هلال : ابويه طالع وجها وانته بتعرف بروحك
بو هلال : الله يهداك يا هلال خلها تدلع من حقها وبعدين هي سايره بيت عمها .. وتحت عيونا
هلال: ابويه دلالك الزايد هذا اخاف ...
بو هلال يقاطعه وهو معصب : هلال طول ما راسي يشم الهواء مالك خص فخواتك عليك بنفسك فاهم ولا لا
هلال وهو منزل راسه الارض: ان شاء الله ابويه انا بسير السياره اترياكم هناك
مريم وهي تحضن ابوها : فديتك والله تعيبني كسرتله راسه
بو هلال بضيج : عيب يا مريم هذا مهما يكون تراه اخوج ولازم تحترميه
ام هلال: مريم ترا اللي فينا كافينا مب ناقصين خلي هالليله تعدي على خير
مريم : حشا احينه من شهرين ما سرت وياكم مكان ويوم بغيت اطلع كلكم خذيتوني بمشراع وميداف حشا مب رازيه عليه هالطلعه .. ترى الحين اهون وارجع حجرتي
ام هلال: مريم اكسري الشر وخلينا انروح
بو هلال : مريم فديتج لا تكابرين وايد وخلينا نسير لا نتأخر ع الجماعه
مريم : ابويه انا بسير وياكم هالمره بس المره الثانيه اذا يلستوا تعاملوني بهالطريقه وتتحكمون بمكياجي وملابسي والله ما بسير وياكم
بو هلال : يصير خير يالله خلينا انسير

هلال كان مؤمن بالعباره التي يرددها الكثيرون اافعل ما تشعر في أعماق قلبك بأنه صحيح . . لأنك لن تسلم من الانتقاد بأي حال
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فـــــــــــــــي بيــــــــت بو خالد
خالد بابتسامه : رواضي فديتج ودي احمد حجرتة وانا بودي محمد رقدوا في السياره ونحن ما عندنا خبر
روضه وهي ميته من الضحك : الحمد لله انه سمعنا شخير ولا لو ما سمعنا جان الحين ناسينهم ومب دارين عن هوى دارهم
خالد : الحمدلله هالمره جا ت سليمه .. بس المره اليايه ما ادري الصراحة ..
روضه : الله يقطع سوالفك يا خالد
بو خالد : هلا والله بعيالي هلا بالغاليين
سار خالد وروضه وباسوا راس ابوهم
روضه : هلا ابويه انت من متى هنيه متعودين عليك ما ترد البيت الا ع 11
بو خالد : شسوي يا روضه الاشغال ما تخلص
خالد : ابويه تراها مقيوله قبل ايام العمر اتخلص الا الشغل انتم نركض وراه بس ما يخلص
بوخالد : انته بس لو اطعيني يا خالد وتيا تمسك عني الشركه وتريحني عقب هالعمر
خالد بضيج : ابويه بس انا مخبرنك بخصوص هالموضوع خلني اثبت نفسي وعقب يصير خير
بو خالد: يا خالد انا مب دايملكم كلها كمن يوم او شهر والله ياخذ امانته
روضه ودمعه نازله : ابويه الله يخليك لا تيلس تقول جي يكفي خسرت اغلى انسانه وانحرمت من حنانها مب ناقصني غير اخسرك انته بعد .. والله راح اموت وراك .. ما بتحمل اعيش من غيرك
خالد : ابويه الله يهداك نحن ما صدقنا روضه تنسى هالموضوع لا تقلب المواجع احينه
بو خالد وهو يحضن روضه : شوفي يا بنتي ترى الموت حق وهاي قدرة ربج
روضه : بس ابويه انا ما ابا اخسر شخص ثاني يكفي خسرة اميه وانا ما شافيتها
خالد : روضه اذكري الله امي صارل لها سنين من توفت وانتي ...

 
 

 

عرض البوم صور راعية الفزعة   رد مع اقتباس
قديم 13-03-10, 06:36 AM   المشاركة رقم: 18
المعلومات
الكاتب:
اللقب:

البيانات
التسجيل: Mar 2010
العضوية: 157074
المشاركات: 281
الجنس أنثى
معدل التقييم: راعية الفزعة عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
راعية الفزعة غير متواجد حالياً
وسائل الإتصال:

كاتب الموضوع : راعية الفزعة المنتدى : القصص المكتمله
افتراضي

 

آلفصـــــــــــــل آلثـــــــــآني

خالد : روضه اذكري الله امي صارل لها سنين من توفت وانتي ...
روضه تقاطعه : يا خالد انته مب حاس باللي بداخلي البنت اللي فعمري محتاجه لامها اكثر من ابوها
خالد : الا حاس فيج يالغاليه بس شو فايدة الصياح اميه راحت يا روضه خلاص ماتت
بو خالد : بس يا عيالي الله يخليكم لا تذكروني ترى جرحي للحين ينزف
ام محمد بعصبيه : افا يا ابو خالد احينه انا من تزوجتك صارلي 15 سنه وحرمتك من توفت صارلها 18 سنه وللحين انا ماقدرت انسيك .. معقولة .. وانا اتحرى انك نسيتها من زمان
بو خالد : يا ام محمد ترى القلب احيانا ما يدخله الا شخص واحد حتى لو فيه اشخاص ثانييين يتم الغلا للغالي
ام محمد : شوفوا انا اقول لو تصكون هالموضوع احسن لانه ما وراه غير صدعت الراس
روضه ودموعها ع خدها : احينه اميه رحمة الله عليها ما وراها غير صدعة الراس .. ع الاقل احترمي ترابها
ام محمد : اوهوووو تراج حشرتينا انتي وامج من زينها عاد
خالد : الله يخليج خالتي مالها داعي هالرمسه
بو خالد بعصبيه : سمعي يام محمد كثر ما جلتي هالرمسه ما باج تعيدينها فاهمه ولا لا
ام محمد: اوف حشا ها مب حآله كل يوم يايبين سيرت امكم احس انها مشاركتني في كل شي حتى وهيه فقبرها
بو خالد: عاد والله ها شي يخصني انا وعيالي واذا ما عايبنج الباب يوسع ............
روضه تقاطعه : لا ابوي الله يخليك لا تكمل رمستك
بو خالد وهو يتنهد : لاحول ولا قوة الا بالله اسير ارقد ابركلي
ام محمد: شوف يا ابو خالد تتحسب اني بسكت عنك لا بويه انا من احيننه بسير بيت اهلى
خالد : الله يهداج خالتي ما صار الا كل خير .. امسحيها بوجهي
بو خالد : ام محمد تعالي بنكمل رمستنا فوق طوفي جدامي
ام محمد : انا ما عندي كلام حقك اليوم مب راقده هنيه سايره بيت اهلى وايلس عندهم معززه مكرمه
بو خالد بعصبيه : قتلج طوفي جدامي الله والأهل عاد
ام محمد : ........................
روضه وهي تتنهد : آوف اشوى انه السالفه انتهت على خير
خالد بضيج : روضه حبيبتي الله يخليج حاولي تتجنبين تذكرين اسم امي جدامها مب ناقصين مشاكل كافي الهموم اللي عايش فيها ابويه لا نزيده وعقب يصير فيه شي لا سمح الله
روضه بخوف : اسم الله على ابويه لا تفاول عليه يا خالد~
خالد بابتسامه : خلاص فديتج انسي السالفه وسيري ذاكري وراج امتحانات
روضه : الله لا حرمني طيبة قلبك يا خالد
خالد باسها فراسها وسار صوب غرفته ..
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

بيــــــــــــــــــــت بو حمـــــــــــــــــــــــــــوود

وصلن ساره ومها وخوله عقب ما عقمن جرح خوله ووقفن الدم ما قدر يحطن شاش عسب محد يلاحظ
بو حمود أول ما شاف خوله تصيح سار صوبها
بو حمود بخوف : خوله اسم الله عليج شو بلاج تصيحين
فجأه خوله يلست تتذكر كلام مها فالسياره

//////////////////////////////////

مها بضيج : خوله فديتج ما يحتاي ابويه واميه يعرفون عن هالسالفه انتي تشوفين ابويه بروحه حالته حاله
خوله وهي متخيسه صياا ح: لا تخافين يا مها انا عارفه انه ابويه اكثر واحد حاس باللي بداخلي
مها وهي تمسح دمعة خوله : ما ينلام يا خوله هو يتحسب انه هو السبب في كل اللي صارلج
خوله بضيج : مع انه طول الفترات الماضيه ما خليته يحس بالالم اللي ساكن بداخلي
مها : ما يحتاي تحسسيه هو فاهم وعارف
ساره : خوله فديتج اعتبري الموقف اللي صارلج تجربه وحاولي تكرريها مره ثانيه انتي ما سمعتي بالقاعده اللي تقول السقوط من علامات النجاح
خوله : ادري يا ساره سمعت بهالمثل وايد بس انا يا ما طحت وفكل طيحه ما احس اني قويه احس اني مجرد انسانه ضعيفه مب قادره تنجز ولو شي بسيط .. وكل طيحة كانت تضعفني ما تقويني مثلا يوم كنت صغيره كنت متوهمة ومغترة بالقوه اللي بداخلي وهالقوة هي اللي ودتني عند حنيفة وخسرتني اصعب شي ودمرتني
مها وهي تحضنها : خولة إنسي حبيبتي .. اللي فات مات .. حاولي تبني حياتج من يديد
خوله ودمعة ارتسمت على خدها : ابني حياتي .. كيف أبنيها وانا ما عندي اساس يخليني اقدر ابني
ساره : خولة حبيبي ترى التشائم مب زين .. وهو اللي مخلنج ضعيفة على فكرة
خوله : هذا اللي حاسه فيه يا ساره
مها : ها كله هلوسه يا خوله لا تخلي الشيطان يدخل قلبج ويزرع فيه اليأس
خوله : بس الكلمه اللي سمعتها اليوم كانت وايد قاسيه عليه وايد وللحين مب قادره استوعبها
مها بعصبيه : حسبي الله عليه ونعم الوكيل الله يبتليه ان شاء الله عسب يحس فالناس
خوله بضيج : لا يا مها ما توقعت هالرمسه تطلع منج دخيلج كثر ما جلتيها لا تقوليها مره ثانيه الله يخليج
مها : استغفر الله بس ... طلعني من طورة الله لا يسامحة
ساره : العني بليس يا مها لا ترد هالدعوه على راسج
خوله : خلاص صكروا ع الموضوع اللي فيني كافيني
مها : اللي يريحج يا خوله بس توعديني ما تحسسين ابويه بشي وحاولي انج ما تصيحين
خوله وادموعها اربع اربع: ما اقدر يا مها ما اقدر انتي عبالج الكلمه هاي سهله علي
مها : ادري انها مب سهله بس حاولي
خوله وهي منزله راسها على ريولها : بحاول يا مها بحاول
ساره وهي تصاصخ مها : مهاوي حرام عليج خفي عليها شوي ما تشوفي كيف صايرة حالتها
مها بضيج : والله حاسه فيها بس خايفه على ابويه كل ما يشوفها يضايج وهو بروحه عنده الضغط والسكر ..
ساره : حتى ولو يا مها هي مالها ذنب لا تضغطون عليها بهالطريقه
مها : والله اني احب خوله يا ساره وحازه علي حالتها بس شسوي خايفه على ابويه واميه
ساره : ادري فديتج بس انتي فهالفتره لازم تفكرين بخوله اكثر يعني اللي سمعته اليوم مب شويه
مها بعصبيه : والله لو اجوفه جدامي قسم بالله اقطعه قطعه قطعه ..
ساره بابتسامه : زين والله بيستوي فلم اكشن
مها ابتسمت وابتسامتها كانت مختلطه مع دموعها : الله يقطع سوالفج .. ضحكتيني وانا مالي خاطر اضحك

استطاعت مها ان تقنع خوله بأن تخفي حزنها في قلبها فليس شرطاً أن تكون دموعنا أمام من نحب . .
لكن من الضروري أن تكون من أجل من نحب
نرجع عند بيت بــــــــــــــو حمــــــــــــــــــــود
بو حمود بخوف : خوله شو بلاج يالغاليه ليش تصيحين
مها : ابويه لا تخاف بس حست برعب من الناس ها كل السالفه
خوله بابتسامه : ابويه فديتك انا اول مره اطلع وخفت ويلست اصيح بس مع الايام بتعود لا تخاف
ام حمود: خوله فديتج المره الثانيه ريلي ع ريلج ما بخليج تسيرين بروحج لين ما تتعودين ع الوضع
ساره بابتسامه : الله يهداج خالتيه ونحن وين سرنا
فهد وهو مب منتبه : انتي فالقلب يالغاليه فالقلب

 
 

 

عرض البوم صور راعية الفزعة   رد مع اقتباس
قديم 13-03-10, 06:37 AM   المشاركة رقم: 19
المعلومات
الكاتب:
اللقب:

البيانات
التسجيل: Mar 2010
العضوية: 157074
المشاركات: 281
الجنس أنثى
معدل التقييم: راعية الفزعة عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
راعية الفزعة غير متواجد حالياً
وسائل الإتصال:

كاتب الموضوع : راعية الفزعة المنتدى : القصص المكتمله
افتراضي

 

حمود وهو يدوسه ع رجلة : حوووه انته شو بلاك احينه بتسمع رمستك اثقل شويه ترى الثقل زين
فهد وهو مستحي: هاه حمود .. انزين انا شو قلت
فاطمه بابتسامه : والله ما قلت شي بس لو سمعتك ساره بتعرف انه حالتك مستعصيه
فهد وهومبطل عيونه : حشا لهالدرجه عاد
حمود : انا حذرتك وانته حر

خوله وهي تبوس راس ابوها : ابويه فديتك انا بسير اغير ملابسي وبنزل لا تحاتا شي
بو حمود: تبيني اوصلج
ام حمود : هههههههه الله يقطع سوالفك يا سعيد اللي يسمعك يقول ساكنه في الشارع الثاني
بو حمود : لا يا رايه خوله غير لو تبا عيوني حاظرين
خوله ضحكت لما سمعت رمسة ابوها : الله لا حرمني منك يالغالي حتى انا يوم اكون عدالك انسى كل همومي
بو حمود : سيري يا خوله سيري الله يحفظج بس لا تتأخرين الحين بيجوا عيال عمج ..
خوله : ان شاء الله ابويه
مها : سارونه شو رايج نسير وياها
سارونه : انا موافقه خاطري اطفربها شوي
خوله : لا فديتكن الدرب اندله وين قرن مكانكن مابا حد يسير ويايه
مها : مب عكيفج يالله سارونه خلينا انطلعها غصب عنها
خوله : ابويه فديتك اذا تاخرت عليكم اباك تعرف انه في جريمة قتل مستويه
فهد : خوله ابويه شيبه ما بيقدر عليهن شو رايج اجي انا واساعدج
حمود وهو يصاصخه : انت طول عمرك بتم جي قلنا لك اثقل اثقل
فاطمه وهي ميته ضحك : خله يا حمود يحبها ما ينلام خلنا نسير المطبخ لا تحترق علينا الطبخه
حمود : ان شاء الله الغاليه تامرين امر..
خوله وهي ميته ضحك ع فهد : فهود انا مالي غنى عن ابويه انت صح صغير بس فهالمواقف يبليها واحد شايب شرات ابويه فديته
فهد : خلاص انتي الخسرانه
وكلها لحظات وسمعوا احد يدق الباب وسارت البشكاره تبطله
بو هلال : بسم الله هووود هل البيت
بو حموود : هلا والله بالغالي تو مانور البيت احدر احدر وينك عاش من شافك
بو هلال : هلا والله باخويه العود سعيد شحالك شمسوي
بو حمود : بخير والله انته شحالك يا عبدالله عسى زين
بو هلال: يسرك الحال بس لاهيين بالتجاره
بو حمود: الله يوفقك ويسهل علينا وعليك

هلال : فهود طالع الشيوبه الظاهر نسوا انه حد واقف ع الباب وللحين محد قالهم تفضلوا
فهد وهو ميت ضحك: الله يقطع سوالفك هلول احدروا تو مانور المكان
هلال :: الحمدلله زين حد ثذكرنا
موزه: شحالك فهد ان شاء الله زين
فهد وهو يبوس راسها : الحمدلله خالتي انا صرت زين بشووفتكم شحالج مريم عاش من شافج
مريم بخجل: يسرك حالي انته شحالك
فهد : الحمدلله انا بخير دامج بخير
ام حمود : هلا والله بموزه يا حيالله وينكم من زمان عنا
موزه : شنسوي يا رايه اشغال شحالج انتي ان شاء الله مرتاحه
رايه : الحمدلله كلنا بخير وسهاله شحالج مريم عاش من شافج
مريم بخجل : بخير خالتيه انتي شحالج
رايه : الحمدلله انا زينه بشوفتج
مريم سارت نظراتها ع طول صوب حمود اللي جان ياي هو وفاطمه من صوب المطبخ
حمود اول ما شاف مريم وقف ويلس يقول فخاطره : ولييه احينه هاي شو يايبنها هنيه اكيد تبا تذبحني
فاطمه بتوتر: حمود شو بلاك وقفت خلنا نسير نسلم
حمود بتوتر: هاه لا ما فيني شي يالله سرينا
وساروا حمود وفاطمه وسلموا
فاطمه : شحالج مريم كيف الدراسه بشري ان شاء الله زينه
مريم بدون نفس: ماشي حالها
فاطمه اول ما شافت ردت فعل مريم نشت : عموه انا بسير ازقر خوله ومها وساره من فوق وعقب بجي
ام حمود: سيري فديتج ولاتنسي انتي ويايه تيبين عيالج ويااج .. انا بسير اخبر سناتا تحط فوالة
فاطمه : عموه أضنهم هم راقدين خليهم لين وقت العشاء
ام حمود : نششيهم ما عندنا نحن حد يرقد من احينه
فاطمه بابتسامه : ان شاء الله عموه تامرين امر\
مريم فخاطرها : سيره بلا رده

تناست مريم بتصرفاتها بأن السعادة والكراهية خيط من دخان .. قد ينقطع بنسمة هواء
فــــي غرفة خـــــوله
خوله كانت تتذكر الموقف ويالسه تصيح ..
خوله بضيج : اه يارب لين متى بتحمل ذل الناس لين متى بخليهم يستهزئون فيني اعرف انه كل اللي فيني فميزان حسناتي بس سامحني يارب احيانا الانسان يحس بلحظات ضعف ويكره الحال اللي اهوه فيها وانا عمري محد حسسني اني عميا كثر اليوم معقوله في ناس قاسيه معقولة يعقون ألرمسه قبل لا يحسبونها
آه بس دنيا غريبه بس انا ما لازم استسلم لازم اعتبر اللي صارلي هذا انتصار لازم اتعلم من اخطائي لازم ما اكون جبانه .... _ونزلت دمعه من عين خوله وتاهت مره ثانيه –
اكيد اقدر انا عارفه انه بداخلي قوه كبيره ولازم استغلها عسب محد يتطمش علي
ادركت خوله في النهاية بأنه ليس شقاؤك في أن تكون أعمى . . بل شقاؤك في أن تعجز عن احتمال العمى
وقطع حبل افكار خوله فاطمه : خوالي فديتج ممكن ادخل
خوله بابتسامه :حدري فديتج انتي تدخلين ع طول ما يحتاج تشاوريني
فاطمه : امممم فديت اللي يتغزلون فيني
خوله : فطامي عمي عبدالله وعياله يوا ولا بعدهم
فاطمه : هيه فديتج يوا واحينه يايه ازقرج عسب تنزلي تسلمين عليهم
خوله : افا عليج فديتج احينه بنزل انتي سيري زقري ساره ومها لين ما ابدل ملابسي
فاطمه : ان شاء الله الغاليه بس لا تتأخر ين
خوله : ان شاء الله كلها خمس دقايق وبنزل

طلعت فاطمه الا وتسمع صريخ ياي من صوب غرفة مها
فاطمه بخوف: مها بسم الله شو بلاج ليش تصارخي جي
مها وهي ميته ضحك : وليه فطوم ما صاير شي بس باجر عندنا مسابقه اصوات ويالسه اسنع صوتي
فاطمه بضيج : الله يهداج بس خرعتيني
مها : لاحول فطوم اقول سيري عند ريلج احسنلج بتحطميني من بدايتها
فاطمه : انزين سايره بس نصيحه انا اقول ما يحتاي تشاركين في المسابقه اول وحده تنطرد انتي
ساره وهي مييته ضحك : انا يالسه اقولها جي من فير الله بس هي مب راضيه تقتنع
مها عصبت وفرت المخده ع فاطمه : فطوم اقول فارجي
فاطمه : انزين حشا بس هم بعد حبيت ابلغكم انه الشعب الكريم وصل وينطروكن تنزلون عسب تسلمن
مها : ولييييييييه صج يوا يالله احينه بتكشخ وبنزل
فاطمه : اوك بس لا تتأخرين بسير اوعي اليهال يدوتهم تباهم
مها : خلاص عشر دقايق وبننزل
ساره وهي اطالعها بنص عين : حشا انتي ليش تبين تتكشخين
مها بتوتر : هاه لا ما شي بس تعرفين انا من زمان ما شفت عمي عسب جي اباه يقولي محلوه
ساره : انزين ودري عنج هالسوالف وخلصي ترى ميته يوع
مها : اوف انزينه احينه بسير ابدل

~ ~ ~ ~ ~ ~ ~ ~ ~ ~ ~ ~ ~ ~ ~ ~
في بيـــــــت بو مشعل
ميثا كانت يالسه اطالع فلم اكشن
مشعل : السلام عليج الشيخه
ميثا : هلا مشعل وينك انته صارلنا ساعه نترياك ع العشا

 
 

 

عرض البوم صور راعية الفزعة   رد مع اقتباس
قديم 13-03-10, 06:37 AM   المشاركة رقم: 20
المعلومات
الكاتب:
اللقب:

البيانات
التسجيل: Mar 2010
العضوية: 157074
المشاركات: 281
الجنس أنثى
معدل التقييم: راعية الفزعة عضو بحاجه الى تحسين وضعه
نقاط التقييم: 10

االدولة
البلدSaudiArabia
 
مدونتي

 

الإتصالات
الحالة:
راعية الفزعة غير متواجد حالياً
وسائل الإتصال:

كاتب الموضوع : راعية الفزعة المنتدى : القصص المكتمله
افتراضي

 

ميثا : هلا مشعل وينك انته صارلنا ساعه نترياك ع العشا
مشعل : شسوي بو سنيده عزم عليه الا اني اتعشى عنده وما قدرت ارده
ميثا : ما عليه فديتك حصل خير بس ابويه عصب شوي وعقبها رقد
مشعل بتوتر: ليش عصب جي شو انا ياهل عسب يحاتيني
ميثا : مش القصد انك ياهل بس انته اليوم راد من السفر ومحد شبع منك
مشعل بعصبيه : يا سلام تبيني اعطل شغلي على سوالف تافهه
ميثا بضيج : افا يا مشعل احينه صارت سوالفنا تافهه
مشعل : لا حول الله لا تلوميني يا ميثا تعبان والله تعبان
ميثا : افا يا مشعل وشو اللي متعبنك
مشعل : كنت مفكر افتتح مشروع عند ربيعي راشد بس ابويه الله يهديه دمر كل شي
ميثا : مشعل حرام عليك وابويه شو سوى مسجين انته اليوم بس شفته
مشعل : لعنبوه حشا شركه مب عارف يديرها قتله بمسكها عنك بس ما رضى
ميثا : مشعل الله يهديك ابويه ماله ذنب ترى التجاره شطاره وهو بغى يجرب حظه بس فشل
مشعل : انا كنت عارف من البدايه انها بتفشل
ميثا تقاطعه : مشعل هالموضوع حاول تصكره الله يخليك ابويه بيضايج لو سمعه
مشعل : اوف اسير ارقد ابرك ...
وفجأه وصل مشعل مسج ... ممكن تتصل
ميثا بابتسامه : حشا هالمسجات ما يوقفن شسالفه يا مشعل
مشعل : هههههه شسوي هاي بنت مصدقه روحها اني احبها
ميثا : مشعل مب حرام عليك تقص على بنات الناس
مشعل : انا ما قصيت على احد بروحها تبا تقص على نفسها انا مالي دخل
ميثا : يالله الله يهديها بس
مشعل : تصدقين عاد ميثا احلى شي لما تحسي انج تملكين كل بنات هالكون
ميثا : شو هالثقه يا مشعل
مشعل وهو يعدل يلسته : شو اسوي يوم اخوج حليو ورزه واي بنت تشوفه تحبه ع طول
ميثا : ههههههههههااي لا تكون واثق فيه بنات وايد مثلا روضه صعب انك تاخذ منها اللي تباه
مشعل : روضه !!! منور روضه !!!
ميثا: روضه اخت خالد لو تشوفها يا مشعل اطيح اطير من السماء
مشعل : حشا لهالدرجه يا ميثا
ميثا : هيه طالعه كشخه شرات اخوهآ
مشعل : اذا كانت شبه اخوها انا اعطيج اياها جرنتي انها لا حلوه ولا شياته ..
ميثا : مشعل خلنا نكون صريحين خالد حلو بس انته مب راضي تشوف هالشي
مشعل : سيري لاه انزين خلينا فروضه وصفيها حقي انا اخر مره شفتها كانت وايد صغيره عمرها 14 تقريبا
ميثا : هيه هيه يا مشعل خبرك عتيج احينه هي بثالث ثانوي وما شاء الله عليها كشخه ورزه
مشعل : اوف شوقتيني خاطري اشوفها عسب بس اثبتلج انه كل البنات واحد وما فيه حد احسن من حد
ميثا : وانا اقولك انك بتتعب عسب جي شلها من راسك
مشعل : ميثا شو بلاج تكسرين مياديفي
ميثا : مشعل انه يالسه اخبرك الصدق تباني اقص عليك يعني
مشعل : ما ادري بس ابا اشوفها
ميثا : خلاص ع نهاية هالاسبوع بتخلص امتحاناتها وبعزمها عندنا
مشعل : حرام عليج باجر الا السبت بتريا بعدني اربع ايام زياده
ميثا : ههههااي فديتك يا مشعل من احينه سحرتك ..
مشعل بكبرياء: يخسي الا هي وانا اتحداج انها بتبوس ريولي عسب بس اعطيها ويه
ميثا : قدها هالكلمه يا مشعل
مشعل يقاطعها بحماس: قدها ونص بعد وبتشوفين
وعقبها رن تلـــــفون ميثــــــــــــــــــــآ..
ميثا : حشا الطيب عند ذكره .. بس ليش داقه الحين معقولة ما رقدت متعوده تسع ترقد
مشعل بحماس : منو روضه ؟؟!!!!!!!!!!!!!!!!!!!!!!!!!!
ميثا : هيه روضه يا فالح يالله بسير ارمسها فحجرتي
مشعل : لا لا رمسيها هنيه ابا اسمع صوتها
ميثا : اوف توك مستوي ثقيل صج ما عندك سالفه
مشعل : وليه لا تذلينا عادي يالله ردي
ميثا : يالله اسكت احينه برد الو هلا رواضي
مشعل بصوت واطئ : خليه سبيكر
ميثا وهي تهز راسها بالإيجاب
روضه : هلا فديتج اشحالج
ميثا : انا بخير انتي شحالج شو مسويه
روضه : انا زينه نحمد الله ونشكره
ميثا : دايمه ان شاء الله هاه بشري عسى خلصتي بحوثج
روضه : لا فديتج بعدني اليوم استوت سالفه ولخبطت عليه كل اموري
ميثا : عسا ما شر
روضه : لا لا تخافين سالفه وعدت على خير بخبرج عنها باجر
ميثا : اها طمنتيني عبالي صاير فيكم شي
روضه : مشكوره فديتج فيج الخير بس انا داقه استسمح منج
ميثا : افا جي شو مستوي عسب تستسمحين مني
روضه : ههههااي لا تكابري يا ميثا انتي ربيعتي وانا عارفه انه تصرف خالد اليوم جرحج
ميثا : لا يا روضه من حق خالد يسوي اللي يباه ما بيني وبينه شي
روضه : حتي ولو ما كان بينكم شي جان لازم يحترم وجودج وانا فهمته وقالي اعتذر منج
ميثا وهي طايره من الفرح : صج خالد قالج تستسمحين مني
روضه بتوتر لانه عرفت انه ميثا صدقت لانها دايما ع نياتها : هيه فديتج هو قالي بس انتي ما باج تاخذين عليه او تتضايجي منه .. هو تعبان في هالفتره وخلقه طالع على الكل
ميثا : انا برضى بس بشرط
روضه : هاه فديتج امري شو فخاطرج
ميثا : اباج تيين تتعشين عندي بالاربعاء
روضه بتوتر : هاه الاربعاء ما اعتقد اني اقدر
ميثا : افا يا روضه بترديني حاولي فديتج انا دومني مطيحه عندج مع انه عندي اشغال بس أأجلها عشانج
روضه : خلاص فديتج بفكر وعقب بعطيج خبر
ميثا : روضه اتمنى ردج يكون بالايجاب
روضه : ان شاء الله فديتج يالله احينه بخليج
ميثا : اوكي الغاليه يحفظج ربي
روضه : فامان الله الغاليه
مشعل وهو يتنهد : حشا مب صوت عليها هذي طر طر
ميثا : قتلك بس انته ما صدقتني
مشعل : تصدقين صوتها حرك شي بداخلي
ميثا : مشعل الله يخليك الا روضه ابتعد عنها
مشعل : شوفي فديتج انا ما بضرها لانها بتييني بروحها
ميثا : الله يهديك يا مشعل ثقتك هذي بتوديك فستين داهيه
مشعل : ميثا فديتج من اليوم اباج تفكرين بطريقه تخليني اشوفها وهالمثاليه اللي انتي عايشه
فيها ودريها .. ترى ما منها فايدة
ميثا بعصبيه : مشعل شو ف انا بسوي اللي عليه وعقب ما بدخل فشي فاهم ولا لا وااذا رفضتك انا مالي دخل
مشعل فخاطره : ههه مسكينه يا ميثا بعدج ما تعرفين مشعل واذا روضه ما يات بالطيب بيبها بالغصب والايام بيني وبينج وبذكرج

اعمى الغرور قلب مشعل فلم يعد يميز بين الحقيقة والخيال فالمتكبر كالواقف على جبل يرى الناس صغاراً .. ويرونه صغيرآ ايضا .. ف للذكاء حدود لكن لا حدود للغباء..

 
 

 

عرض البوم صور راعية الفزعة   رد مع اقتباس
إضافة رد

مواقع النشر (المفضلة)

الكلمات الدلالية (Tags)
آخر لحظات العمر, آخر لحظات العمر بقلم kesat 3thab, kesat 3thab, رواية آخر لحظات العمر بقلم kesat 3thab, قصة آخر لحظات العمر بقلم kesat 3thab
facebook



جديد مواضيع قسم القصص المكتمله
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة



الساعة الآن 09:40 PM.


مجلة الاميرات 

 



Powered by vBulletin® Version 3.8.11
Copyright ©2000 - 2021, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية