حمود بضيج : اميه فاطمه غيرتها حطمتها .. طالعي كيف مسويه بجسم هالفقيره مريم ..
ام حمود : فاطمه بنت راكزه وما تسوي هالشي الا اذا شايفه شي بعينها
حمود بتوتر : هاه شايفه شي .. الله يهداج امايه شو هالرمسه عن اذنج تاخرت اخاف ابوي يشك فشي
ام حمود بصوت واطئ:شو اللي يالس يصير معقوله ماضي حمود اثر في فاطمه وخلاها مب قادره تركز وتتبلى ع مريم
مها وهي تتنهد : امايه بلاج يالسه تتكلمي مع نفسج
ام حمود : واللي صار اليوم تتوقعين انه يسر
مها بضيج : اميه انا وايد خايفه على فاطمه
ام حمود : خوله عندها والله يعدي هالليله ع خير الا مريم وين سارت
مها بضيج : اوف كله منها تمت تركض وراء حمود لين ما خلته يحن حق ماضيهم ويا بعض .. ما ادري وين تبا توصل هالبنت .. حاسه انه وراها سالفه جايده واليوم او باجر بينكشف المستور .. قووويه طالعه على امها
ام حمود بعصبيه : مهووووووووي
مها بتوتر : انزين امايه خلاص ... ومريوم روحت تتغسل ..هذي وحده قويه المفروض ما ينخاف عليها ينخاف منها
ام حمود : وليييييييه الظاهر انه السالفه معاج مطوله .. احسن شي اسير اقابل ام هلال لا تسوي سالفه جايده ونتورط مب ناقصين مشاكل وعوار رااااس نحن ما صدقنا الماضي يروح في حال سبيله نرجع نفتح لجروح مره ثانيه..
مها : امايه بلاج عصبتي ما قلنا شي .. حشا في هالبيت محد يقدر يقول رايه .. الا يعصبون عليه مب حاله هذي
ساره وهي اطالع مريم من فوق لتحت : قولي الصدق ..
مريم بطنازه : عفوا .. تكلميني .........؟؟؟؟
ساره بضيج : مريم انا اعرف فاطمه عدل .. وهي عاقله ومستحيل تسوي فيج كل هذا
مريم : لا حول .. ترى الكل مغتر بفاطمه .. لا يغركم انها ساكته هذي الشر بعينه .. وكل سكوتي لوتي
ساره بضيج : تصدقين كل اللي صار برع .. ما اقتنعت فيه .. واعتقد انج سويتي كل هذا عشان تغطي على شي ثاني
مريم : شوفي فاطمه سوت كل هذا لسبب واحد بس وانا بخبرج اشو صاار .. انا كنت يالسه اكلم حمود وانصحه انه يبتعد عني ومن عصبيتنا والمشاده اللي صارت امبينا ارتميت فحضنه بدون ما حس وفاطمه شافت كل هذا فانهارت وصار اللي صار .. ارتحتي احينه انا شو دخلني اذا حمود بيتم طول الوقت راكض ورايه .. الحين هذا جزاتي
ساره وهي مصدومه : اشوووووو .. فاطمه شافتج وانتي بحضنه
مريم بدون نفس : هيه انا شو ذنبي اذا هي شاكه فريلها .. وطول الوقت يالسه تراقبه ..
ساره بضيج : بصراحه عقب كل اللي قلتيه .. لو سوت فيج فاطمه اكثر من جذا ما بلومها لعنبوج انتي ما تحسين خافي الله..تراه يمهل ولا يهمل..ومن متى حظرتج تهتمين بمشاعر غيرج من يوم ما عرفتج وانتي وحده انانية
مريم بعصبيه : لا حوووووووول !! اقول فجي عني .. هذا اللي ناقص .. قتلج حياتي لا تدخلين فيها انا حره واسوي اللي اباه .. وانا مستعده اتحمل نتيجة افعالي .. عن اذنج يا حلوه قالتها بابتسامة عريضة
ساره بضيج : ما اقول غير الله يهديج .. لا اكيد هالبنت تخبلت .. فيه وحده عاقله تسوي اللي سوته
عنـــــد آلريـــــآييل ..
بو حمود اول ما دخل حمود شك انه وراء طلعته سالفه كايده : حمود ما خبرتني اشو صاير
حمود بتوتر : لا ابويه لا تشغل بالك .. امايه كانت تبا تستشيرني فشغله
بو حمود : الحمدلله خوفتنا لما طلعت .. اتحسب صاير شي في البيت
حمود : لا ابويه ما صاير الا كل خير .. عمي ام هلال تقول تأخر الوقت غاية السيرة
بو هلال وهو يطالع الساعه : وليه صارت الساعه 10 لازم نترخص
بو حمود : لا بوهلال تو الناس خلنا رامسين
بو هلال : الايام امبينا ان شاءالله بس الزياره المره الثانيه عليكم
بو حمود : ولا يهمك بو هلال ما يصير خاطرك الا طيب
بو هلال : على خير حمود ياليت لو تسير تخبرهم
فهد يقاطعهم : عمي حمود توه راد .. اسير انا افضل
بو هلال : قلنا ما نبيلك التعب .. بس بروحك يبته لنفسك
فهد بضحكه ممزوجه بحزن : اي تعب الله يهداك .. عمي انته طلباتك اوامر .. يالله استأذن
حمود وهو يلحقه للباب : فهد وقف وين تبا .. نسيت انه ساره موجوده داخل
فهد وهو يداري دمعته : لحد متى يعني بتم اتجاهلها .. خلني اداوي الجرح وهو طري .. وبعدين شسوي بقلبي وده بشوفتها دامها قريبه مني خلني اترس عيني واشبع منها باجر لا تزوجت راح انحرم من شوفها طول العمر..
حمود : بس انا خايف عليك يا فهد انته قاعد تأذي نفسك ومب حاس بهالشي
فهد : تصدق عاد كله عشان خاطر ساره يهوووون .. انا راضي بنصيبي
حمود وهو يتنهد : شوف يا فهد انا اقول لو تصارحها احسن
فهد بضيج : لو كنت عارف انه فيه ذرة امل صدقني ما بتأخر دقيقه وبصارحها وبخبرها باللي بداخلي
حمود باستغراب : ليش ما فهمت عليك ..
فهد ودمعه نازله على خده : ساره تحبه صارلها زمان .. خوله سمعتها ترمسه بالصدفه وخبرتني
حمود بضيج : فهد انا اسف ما جان قصدي ..
فهد يقاطعه وهو يمسح دمعته : حمود خلني اسير اكحل عيني بشوفتها .. ما يندرى يمكن ما اشوفها مره ثانيه
حمود بحزن : اللي يريحك اخويه .. اهم شي صحتك
فهد بضيج : عارفه انه في ايام صعبه بس لازم استحمل عسب اقدر اعيش واكمل انته لا تخاف علي بخليك الحينه
حمود وهو يتنهد : سير فهد عسى الله يوفقك وسرح ويلس يفكر في فاطمه ويتأمل ايده ويتسائل كيف تجراء وضربها
فـــــــــي حجــــــــــــرة فـــــآطمة
ميره واميره جانن يالسات يصيحن خايفات على امهن خوله وهي حاضنتهن : ميره اميره صدقني ماما ما فيها شي بس تعبانه شوي .. كلها خمس دقايق وبتهدى

ميره : لا عموه انتي تقصين علينا .. ماما ليش تصيح
اميره : عموه شو فيها ماما تبا تروح وتخلينا
خوله وعينها تدمع : ميره اميره كافي صياح خلني بروحي مع الماما
ميره : مابا بتم مع امايه
اميره : انا بعد بتم مع الماما ولا بخليها ولا لحظة
فاطمه اول ما طالعت بناتها سارت صوبهن وحضنتهن : ميره اميره خلني بروحي مع عموه واوعدكن اني اذا روحت باخذكن عندي انا ما اقدر اعيش بدونكم انتوا النبض اللي مخلني قادره اعيش ..
اميره وميره مع بعض : وعد ماما انج ما بتخلينا ..
فاطمه وهي تبوسهن : وعد حبايبي
اميره وهي تمسك ايد ميره : ميروه خلينا انروح نيلس مع مايد يمكن يخاف بروحه
ميره : يالله .. باااي ماما
فاطمه وهي اتسويلهن باي واتصيح : باااي حبيبتي
خوله بحزن : فطوم حياتي شو قررتي احينه
فاطمه وهي ترتمي فحضن خوله : ما قادره خوالي حاسه نفسي مخنوقه .. انتي ما شفتيه كيف كذبني وصدقها .. خبريني كيف بستحمل اعيش عند انسان يفظل وحده غيري تكون قربه ومد ايده علي بس عسب يرضيها
خوله تقاطعها : فطامي ادري انه حمود غلطان .. بس محد يدري شو السبب اللي خلاه يتصرف هالتصرف\
فاطمه وصوتها يتقطع : انا اقولج شو السبب !! حمود يحب مريم ومب قادر ينسى الحب اللي جمعهم طول هالسنين هذي حب طفولته خوواالي .. ويمكن هو كان مشتاق لهالشي من زمان واليوم جاته الفرصه لحد عنده وارتمى فحضنها
خوله بضيج : فطامي انتي شو يالسه تقولي
فاطمه : هذا اللي ما قدرت اقوله جدامهم .. شفتهم بعيني .. شفته هو مستانس ويضحك معاها .. خوله انا شو سويت عسب يسوي فيني كل هذا .. انا تميت طول عمري اصونه واحاول اكسب قلبه .. بس انا ضنيت اني بقدر انسيه جم مره حصلت رسايله حق مريم فاغراضه الخاصه وسكت .. قلت امبينا عيال ولازم اصبر.. تخيلي لما ياني البارحه وفصخ كندورته حصلت صورتها فمخباته .. اشو اسوي بنفسي .. خبريني خوالي كثر شو بستحمل حاسه نفسي بتخبل
خوله بضيج : يا قلبي عليج فطامي .. كل هالضيم بداخلج وساكته .. انزين جان خبرتيني
فاطمه بضيج : وياما شفت واستحملت بس تميت طول الوقت ساكته
خوله تقاطعها : انزين ليش
فاطمه وهي تتنهد : تبين تعرفين ليش لاني ما حبيت تطلع هالسالفه وعمي يعرف بكل هذا .. عمي طول عمره وهو مفتخر بحمود .. وانا ما حبيت ا خرب الصوره اللي سواها عمي حقه .. ما حبيت اشوفه صغير جدامكم .. تحملت كل هالضيم بس عسب ما اشوف راسه نازل الارض ومب قادر يحط عينه في عيونكم .. بس طالعي حمود كيف جازاني .. طعني في الظهر .. وانا اللي كنت افكر فيه قبل ما افكر فنفسي .. طالعي هو فلحظة استسلم لرغباته ولا فكر بمشاعري داس كرامتي واهاني جدام حبيبة القلب مريم .. خوله حمود تغير .. وتغير وايد من يوم ما دخلت مريم فحياتنا
خوله : حلاص فطامي انتي اصبري لا تنسين امبينكم عياااال وما يصير تخليهم وتسيري
فاطمه بضحكة سخرية : حتى لو بغيت اخلي البيت واروح .. وين اسير .. مالي مكان غير هذا .. مضطره استحمل الضيم اللي انا عايشه فيه .. بصبر بس عشان سبب واحد عيااالي
خوله : فطوم عمري وانا وين سرت .. صدقيني هالبيت واللي فيه حلال عليج بس لا تحسسيني انج مقطوعه من شجره
فاطمه وهي تحضنها : خوله تصدقين لما اشوفج واحس بالمعاناه اللي عايشه فيها انسى كل همومي .. لاني يالسه اشوف وحده مثابره رغم انها فقدت اهم حاسه الا انها تمت طول الوقت قويه .. خوالي انتي اختي وامي وابويه انتي كل اهلي .. انتي مصدر القوه اللي مخلني قادره اعيش .. انا محد بقالي فهالدنيا غيرج فلا تخليني
خوله بضيج : فطووم حياتي ان شاء الله ما بخليج .. واللي بيفرق بينا شي واحد هو الموت
فاطمه تقاطعها : لا تقولين جي .. عسى يومي قبل يومج.. انا مش مستعده اصحى فيوم واحس انج مش قربي ساعتها جد بنهااااار .. خوالي لا تخليني الله يخليج لا تخليني بروحي
خوله ودمعه نازله على خدها : فطوم حبيبتي لا تعورين قلبي .. قتلج مستحيل اخليج غناتي بس انتي هدي نفسج شوي
~ ~ ~ ~ ~ ~ ~ ~ ~ ~ ~~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فهد اول ما دش طاحت عينه فعيون ساره وسرح فيهن ويلس يردد في خاطره
قلي من اللي يحمل الهم عني؟؟
لاغبت لحظة عن عيوني واقفيت
ليه الصدود وليه كل التجني؟؟
اشهد انك في عذابي تماديت!!
ان كان قصدك بالغلا تمتحني
انت الوحيد بداخل القلب ( لك بيت)
==================
ساره فخاطرها : بلاه فهد يطالعني جي .. احس فنظراتة حزن .. لا يكون انا جرحته بدون ما اقصد .. لا مستحيل بعدين انا وفهد شرات للخوان ومستحيل يزعل مني يمكن مضايج من شغله
فهد وهو يطالعها وعينه دمعت بدون ما يحس :
تقول الناس عينك وش بلاها على
خدك تنثر كل ماها ..
صحيح الناس ما يدرون عني ولا
حسوا دموعي وش وراها
ولا يدرون ليه اسهر لحالي
ولا يدرون حالي وش براها
ولا عاشوا دقيقة في عذابي لأن
النار تحرق من وطاها
ولا اقدر على جور الليالي بكت
عيني وجاها ما كفاها
يقدر عبرتي من عاش مثلي ويبري
علتي رافع سماها
ساره بخوف : لا فهد اكيد شايف علي \شي .. بلاه يطالعني جي

ساره بخوف : لا فهد اكيد شايف علي \شي .. بلاه يطالعني جي
مها بضيج : الله يكون فعونك فهوود .. تشوف حبيبتك تروح من بين ايدينك وانته مب قادر اتسوي شي ..
ساره بضيج : مهوووي شوفي فهد صارله ساعه واقف جدام الباب يمكن يبا شي
مها : الحين بسير اشوفه .. فهود بلاك بغيت شي .. وبعدين امسج دمعتك الكل انتبه عليك ..
فهد بضيج : كل ما اشوفها احس انه سجاجين تنغرس فصدري مب قادر اعيش بلاها .. هذي ساروه حب طفولتي .. كيف تبيني اعيش من غير حسها .. الله يصبرني بس
مها بضيج : فهد حبيبي هذا نصيبك ولازم ترضى فيه .. يمكن الله بيعوضك بوحده احسن عنها
فهد : بس القلب ما يبي وحده غيرها وهذا اللي معذبني وذابحني .. يبا ساره يا مها يبا بس ساره ..
مها : ما ادري شو اقولك فهد .. عارفه وحاسه بالجرح وبالالم اللي معشش فصدرك .. بس لازم تتقبل هالشي
فهد : مجبور اتقبل هالشي .. المهم خبريهم انه عمي يترياهم
مها : فهد انته بتطلع ولا ؟؟؟!!!!!!!
فهد بضيج : مهوي تراني مب ياهل .. الكل خايف علي .. وبعدين تطمني اليوم بتم في البيت ومالي خلق اسير اي مكان
مها : انا ما قصدي شي وبعدين انته اخويه ولازم اخاف عليك .. وبعيد الشر اذا صار عليك شي انا مع منو بتضارب
فهد وضحكه خفيفه ارتسمت على شفايفه : فديت روحج مهااوي .. وبعدين انتي كل همج مضارب وبس
مها : فديت هالضحكه والله .. واذا علي انا ما ادري متى بتسنع وابطل حركات الخبلان
فهد : لا والله عاقله وغصبا عن الكل .. المهم سيري بلغيهم اخاف يتاخرون على عمي
مها وهي تتفلسف: اوووكي اخي الحبيب ساذهب الان استاذن
فهد بضحكه:هذي داخله هندسه وتتفلسف علينا لا وبالفصحى بعد .. اشو لو تدرس فلسفه؟!ضحكتيني مهوي وانا مالي خلق حتى اضحك ما اقول غير الله يصبرني وينشغل قلبي واخليه ما يتجراء فلحظة انه يفكر فيج ولا بشلعه من مكانه
مها بابتسامه :خالوتي عمي يترياكم برع
مريم بدلع : قومي امايه خلينا انروح مب قادر استحمل ايلس هنيه .. اخاف فاطمه اتيي وتتضايج و انا بصراحه مالي خلق ازعلها مني .. تراني اعزها شرات اختي
فاطمه سمعت رمست مريم وابتسمت : لا تخافي حبيتي بالعكس تنورينا في اي وقت
مريم في خاطرها : بل هذي عينها قويه .. الظاهر البهدله اللي تبهدلتها اليوم خلتها تتمرد عليه .. بس يالله مب مشكله المهم كسبت حمود لصفي .. وجريب فطوم انا بكون راعية البيت .. وانتي برع يا حلوه
خوله بابتسامه وصوت واطئ :شفتي قتلج انزلي وحريها .. مريم يبالها قلب قوي مب رهيف .. هالبنت تقول حق بليس وخر وانا بيلس بدالك .. الله يكافينا شرها
فاطمه : اهم شي بردت حرتي فيها .. واثبتلها انه الخصم اللي تتعامل معاه قوي وما يستسلم بسهوله ..
خوله : هيه جذي ااباج خليج قوووويه .. ولا تخلين هالاشكال تكدر خاطرج او تزعلج
ساره بضيج : هاه مهووي بلاه فهد حسيته مضاايج
مها بدون قصد وبعصبيه :ليش من متى يهمج امره
ساره باستغراب : مهووووي بلاج خذيتيني بمشراع وميداف انا شو قلت هذا يزاتي اني ابا اتطمن عليه
مها بضيج : سار ه انا ما قصدي شي بس الكلمه طلعت مني بعفويه اعذريني
ساره : مهوي ما يحتااي اتبررين لي اي شي .. انتي يمكن ماخذه فخاطرج ع الموقف اللي صار بين مريم وفاطمه .. بس حتى ولو مش من حقج اطلعين حرتج فيني عن اذنج
مها وهي تزاعج عليها : ساروه .... سارووووه وقفي الله يخليج والله ما قصدي شي
ساره من عصبيتها طنشت مها ولا صدت وراها
مها : ياربي انا شو قلت .. اوووف شو هالحاله بدال لا نفرح ونستانس قلبناها هم وغم .. والله هذي مب حاله
خوله وهي ميته ضحك : هوووود بلاها الاخت يالسه تتحلطم وعايشه فجو ثااااني
مها بخوف : بسم الله الرحمن الرحيم انتي من وين طلعتيلي
خوله : من وين بعد من هنااااك ؟؟! المهم خبريني اشو صاير عليج
مها وهي تتنهد : بصراحه احوال بيتنا ما تسر .. طالعي الاخت مريم بدال لا تخلينا نستانس بيوم خطوبتنا خربتها علينا
خوله بابتسامه : مهوووي انتي تحبين هلال صح
مها بخجل : هاه .. خوالي الله يهداج شو هالرمسه انا بروحي استغربت توقعته بيتقدملج انتي مش انا
خوله : ياشيخه بسج الجذب حراااااااام واللي يكذب يروح النار ..
مها بتوتر : خوالي بلاج انتي انا ما احب اكذب ومستحيل اسويها فيوم
خوله : بس كذبه صغنطوطه وعشان هلال ما ظنتي تأثر .. لانه الحب مبين عليج
مها : خوالي تصدقين اوقات .. تخليني اشك انج عمياء وما تشوفين .. يالله اعترفي
خوله بضيج : تصدقين اتمنى من خاطري يكون اللي في بالج صح .. بس تجري الرياح بما لا تشتهي السفن
مها : خوااالي انا اسفه لو ضايقتج
خوله بابتسامه وهي تحاول تخفي حزنها : مهاااوي لا ضايقتيني ولا شياته انا خلاص تقدري تقولين اتأقلمت .. وبعدين لا تغيرين الموضوع تحبين هلال ولااااا توقعاتي غلط ..
مها بخجل : خوااالي بخبرج بكل شي بس بشرط اتخبريني كيف عرفتي باللي بداخلي ..
خوله : وانا مواااااااااااااااااااااافقه .. مع اني انا واثقه من كلامي بس مب مشكله .. هذا ما يمنع اني اسمع منج وتأكد
مها بحزن : تصدقين لما خبروني انه هلال بيتقدم حق وحده فينا .. وربي خفت .. تحريته يمكن يباج انتيه .. خواالي كنت خايفه انه تكوني انتي .. حبي لهلال يمكن يخليني ............................. وسكتت
خوله : يخليج تحقدين عليه صح
مها بحزن :خوالي انا ما قصدي جي .. بس خفت يكون الشخص اللي احبه من نصيبج انتي .. كيف بستحمل اشوفكم مع بعض داخلين .. طالعين والله ما بقدر .. انا اتخيل هالشي واستخف !! شو لو اشوفه واقع حي .. والله بموت
خوله : اسم الله عليج من الموت حياتي .. وخلي الافكار السيئه بعيد عنج .. هلا يحبج انتي مش انا
مها وهي تحضنها : وهذا اللي مخلني طايره من الفرح .. مب مصدقه انه يحبني انا تحريته يباج انتي ..
خوله باستغراب : يباني انا؟؟؟؟؟؟؟!!!!!!!!! انزين ليش !!!!!!!!!! انتي سامعه او شايفه شي ..
مها : لا فديتج لا شايفه ولا سامعه شي .. بلاج خفتي جذا.. بس يمكن لانج انتي احلى مني والريال يعشق من عيوونه
خوله وهي تتحس وجها بايدينها: تصدقين عاد من كثر ما تمدحين شكلي .. خااطري اشوف ملامحي واتمعن فيها

من آحــــــدآث آللحظة آلثـــآنية عشـــر



::


ًً

::


فاطمه تقاطعه والحزن تارس عيونها : بس ما قدرت صح .. لعنبوك انته ما تستحي حاط عينك بعيني واتقول انك تحبها للحين .. معقوله مشاعري وكرامتي صارت شي عادي بالنسبه لك


::


::


هناادي : خايفه اذا احد شافني معااك يتموا يسبون فيني ويقولون هذي اهلها ما عرفوا يربوها عسب جذا خلنا في الشركه نتصرف برسميه وفي البيت بدلعك على راحتي
بو مشعل وهو يمسك ايد هناادي : هنادي حياتي انا فهالفتره محتاجلج وايد .. لا تخليني ويمكن هالاسبوع كله اتمم معاج


::



::


حمود بعصبيه : سمعيني يا فاطمه مابا اسمع حسج .. ولا ابا منج تبرير للموقف اعتقد كل شي جان واضح والرقم مخزن عندج فخلينا ابعاد عن بعض هالفتره لانه ما ظنتي بقدر اسامحج ومابا امايه وابويه يعرفون بهالشي اخاف ينجلطون لانهم راسمين لج صوره مغايره من اللي انا شفتها البارحه

اللحــظة آلثـــآنية عشــــره

::


::

الفصـــــــلـ آلآولـ

فــــــــي آلسيـــــــــــــــآره عند هلال
مريم وهي تتافف : اوووف امايه متى بنوصل .. جسمي يعورني
بو هلال باستغراب : مريم غناتي اشو صاير .. وشو اللي معورنج
مريم بحزن : باباتي هذي .............
ساره تقاطعها وبعصبية : يا ويلج لو تكلمتي مب ناقصين مشاكل
مريم بعصبيه : ساروه قتلج لا تهدديني .. وبعدين انا ما سويت شي غلط عسب اخاف
ساره : مريوم انتي اختي وانا عارفه البير وغطاااه .. فلا تمثلين علي
مريم وهي ترفع صوتها بدون ما تحس : سااروه احينه منو اختج انا ولا الدعله فاطمه
ام هلال بتوتر : بس اسكتي فضحتينا ..
بو هلال باستغراب : ام هلال اشو صاير ..
ام هلال :والله يا ابو هلال ام حمود قالت ما اخبرك شي .. بس انا ما اقدر اخبي عليك
ساره بضيج : امايه السالفه اتصكرت خلاص .. فالله يخليج لا تردين وتفتحينها
ام هلال وبصوت عالي : سمعيني ساااروه ابوج لازم يعرف بكل اللي صار!! وانا ما تعودت اخبي عليه
بو هلال : ام هلال بلاج تراج خرعتيني اشو صاااير ..
مريم بحماس : باباتي انا بخبرك السالفه وما فيها
ساره تقاطعها : ياليت لو تخبريه بالتفصيل .. مش اللي تبيه انتي ويخطر على بالج ..
مريم وهي اطالع ساره بنص عين : خلاص ما بتكلم بس اسكتي بتفضحينا
ام هلال : مريوم انتي على حق بلاج خايفه
مريم بتوتر : لا امايه مش خايفه ولا شياته .. انسي الموضوع خلاص
بو هلال : مريوم قولي اشو فخاطرج ولا تخافين من شي
مريم : باباتي اتهاوشت مع فاطمه وتضاربنا بس عقب اتصافينا
بوهلال باستغراب : فاااطمه !! هذي اللي طول عمرها وهي هاديه ولا تنسمع منها كلمه شينه
مريم : ابويه انته اشو دراك يقول المثل السكوووتي لووووتي
ساره بطنازه : بس اوقات القهر يخلي الواحد يطلع من طوره
ام هلال وهي اتصارخ على ساره : ساروه اشو عندج بلاج على اختج .. انتي شايفه عليها شي
ساره : لا اميه حشا عليه لا شفت ولا شياته .. بس انا اوضح وجهة نظر وما خصيت احد
ام هلال : اتحرى بعد .. ترى محد بيدوملج الا اختج .. وبسج من كثر ما تحاتين غيرج
ساره يلست اطالع هلال من المرايه وحست فعيونه نظرت حزن : هلااااال شي مكدر خاطرك
هلال جان فعالم ثاني ويردد في خاطره : ? ليــــــــه؟؟ ?
ليه يوم احتجت لك خيبت ظني ؟
ليه صاير قاســــي و ضيــِّـق طباع ؟!
كل ما آعاتب خفوقك صد عني
كن ما صــدق لقى فرصه و .. باع ..!
وفي وسط هلوساته طلع صرخه هزت كل اللي فالسياره : ليش ليش ليش وتم يضرب بايده على السكان ..
ساره على طول فهمت : هلال بلاك صاير عليك شي
بو هلال باستغراب : هلال معقوله كل هذي فرحه لانك بتاخذ بنت عمك
مريم : ابويه خله على راحته ... يتحرى مها رفضته .. بس تطمن ضحكتها واصله لاذونها من فرحتها
ام هلال : مريوم احينه ما وقت فلسفتج يمكن مريض ويالس يهذون :. هلول فيك شي غناتي
هلال استوعب اللي صار وحاول يخفي دموعه : لا تشغلون بالكم بس تذكرت موقف وضايجني
بو هلال : هلال لا يكون انته ما جان فخاطرك تخطب مها .. ونحن فهمنا الموضوع بالغلط
هلال حس ابوه وجهله سهم بصدره وحاول يدارك الموقف : ابويه قتلك انا احب مها وطلبتها من خاطر ..السالفه وما فيها واحد من الربع صار عليه حادث يقولون حالته خطيرة.. ويمكن ما يعيش لا سمح الله
بو هلال : اعوذ بالله .. لا حول ولا قوة الا بالله .. هـ الحوادث زايده فهـ اليومين ..الله يسلمنا بس.. الا ما قتلي من ولده
هلال بتوتر : هاه .. لا أبويه ما تعرفه ..
بو هلال : الله يقومه بالسلامه ان شاء الله عقبال ما تفرح بشوفته ..
هلال وهو يتنهد : مشكووور ابويه الله يسمع منك وصد ع المرايه وحصل ساره اطالعه ودمعتها فعينها .. فنزل راسه لانه عارف انه ساره حاسه فيه وفاهمه بكل اللي يالس يدور بداخله ..بس ما كان بيده يسوي شي غير يتجاهل نظراتها
ساره وهي سرحانه وتفكر : اشو اللي خلى خوله تتخلى عن اخويه فاخر لحظة .. اكيد في سبب وراء هـ الشي ..
انا لازم اخلي هلال يفهمني السالفه اليوم ولا ما بييني رقاد .. بس هلال مضايج وما ضنتي له خلق يتكلم مع احد
~ ~ ~ ~ ~ ~ ~ ~ ~ ~ ~ ~ ~ ~ ~ ~~ ~~ ~ ~ ~ ~ ~ ~ ~ ~ ~
فـــــــــــــــــــــــــــي بيت بو حمووووووووود
خوله كانت منسدحه ع الكرفايه وتفكر: معقوله خالد خطبني .. معقوله يحبني !!! ياربي انا مش مصدقه اللي قاعد يصير انا فحلم ولا فعلم .. اه يا خالد اللي مفرحني اني بصير حرمتك .. واللي مكدر خاطري الخوف اللي مسيطر عليه .. معقوله اني ما بقدر اخدمك .. معقوله كوني عمياء بيأثر فحياتي .. يالله اتمنى اتخلص من هالحاله اللي بداخلي ..
بعدين خالد يحبني وانا احبه .. ولازم انواجهه مشاكلنا مع بعض .. وهو ولا مره حسسني اني عميا .. معقوله في لحظة غضب يعايرني .. ويمن علي انه تزوج وحده شراتي .. لا خوالي انتي اشو يالسه تقولين .. انا قويه وقادره ااثر على خالد بطريقتي .. وخالد وعدني انه عقب زواجنا بيوديني اتعالج .. يالله هـ التفكير بيذبحني .. حتى وانا مستانسه الافكار السوداء والماضي اللي عشته يكدر حياتي .. انا لازم انسى .. لازم انسى الماضي .. لازم اعيش حياتي ..