قصي يقاطعها : ماما صارلنا ساعه انكلمج وانتي ما تردين
مهره : ما عليه حبايبي سامحوني بس اليوم اعصابي تعبانه شوي افكر في شغله واخاف ما تصير
غصن : ماما خبرينا يمكن نقدر نساعدج
مهره وهي تبوس خد غصن : لا فديتج شغله بسيطه وان شاء الله تنحل انتي لا تشغلين بالج وعقبها رن تلفونها
غصن بابتسامه : ماما تلفونج يرن يمكن باباتي يالس يتصل
مهره : هيه حياتي اكيد باباتج وانا بقالي حد غيره ..
مطر: هلا مهاري
مهره بتوتر : مطر حبيبي الله يخليك دش في الموضوع على طول اشو صار على موضوع عادل
مطر بابتسامه : انزين انتي ليش خايفه
مهره بضيج : ياربي مطر لا تيلس تلعب باعصابي احينه اللي فيني مكفيني
مطر : ههه فديت اللي اعصابه تالفه .. المهم حياتي انا كلمت الدكتور وقتله يقولهم المستشفى بيسفروه على حسابهم
مهره وهي تتنهد : الحمدلله .. بس طمني عسى ما شكوا انه ورى هالتسفيره شي
مطر : والله يالغاليه الدكتور قال اول ما يفاتحهم بيدقلي .. بس يا مهره انا من وجهة نظري لو انتي تزورينهم المستشفى وتخبريهم انج حابه تساعدي .. اكيد بيتقبلون هالشي برحابة صدر
مهره بضيج : برحابه صدر اتقص عليه والا على نفسك .. انته ما تعرف غاده هالبنت كبريائها ما يسمح لها تاخذ صدقه من اي احد .. هذا اذا رضت تقابلني من الاساس .. اللي سواه ابويه فيهم مب اشويه
مطر يقاطعها : بس انتي ما رضيتي بالظلم وقاطعتي اهلج والحين صارلج سنين ما شفتيهم
مهره : مطر انا عارفه عيال عمي عدل .. خصوصا غاده شو اللي بيثبتلها اني انا سويت كل هذا عشانهم .. الله يخليك يا مطر خلني اكون قريبه منهم بس من بعيد .. ولما تحين لحظة الحقيقه اكيد بواجهم
مطر : اتصدقين مهاري .. يوم عن يوم تصرفاتج اتخليني احبج اكثر .. الله لا يحرمني منج ومن طيبة قلبج
مهره بابتسامه : مطر لا تجاملني وايد هذيلا عيال عمي .. خلني ارد لهم ولو حق بسيط من حقوقهم
مطر : وانا اوعدج يالغاليه لو تطلبين روحي عسب تقدميها هديه حقهم انا موافق
مهره : لا عاد حبيبي كله ولا انته .. الناس اتهون بس انته لا .. الله يحفظك لي ولعيالك قول امين
مطر : امين يالغاليه .. يالله خبري ا اليهال يتزهبون بنتعشى في بيت يدهم
مهره : زين انك بتوداهم بيت يدوتهم .. غصن حاشرتني تبا تسير هناك متعلقه بعماتها بشكل غريب
مطر : خلاص عيل زهبيهم وكلها كمن ساعه وبكون عندكم ان شاء الله
مهره : خلاص حياتي ولا تنسى اول ما يدقلك الدكتور خبرني
مطر : على خير ان شاء الله
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~~ ~ ~ ~ ~ ~ ~ ~ ~ ~ ~ ~ ~ ~ ~
فـــــــي بيــــت بو هلال
ساره بابتسامه : ما شاء الله هلال ناش بدري اليوم اشو الطاري عسى ما شر
هلال بسخريه : هههه وانا متى نشيت متأخر طول عمري وانا انش بدري
ساره : هههه صدقتك
هلال : ساروه اقدر اتكلم معاج فموضوع
ساره بحماس : هلول حبيبي اكيد تقدر .. انا عارفه انه وراك شي
هلال بضيج : ساره الله يخليج ما وقت مصخرتج احينه .. ترى حدي مضايج
ساره بابتسامه : اسفه هلول بس حبيت اسوي جو .. خبرني اشو عندك .. وشو هذا الشي اللي مكدرك ومخليك مضايج
هلال بابتسامه : ساروه انا احب .. لا مو بس جذا الا غارق من راسي لريولي
ساره : تحب ؟؟!!! ومنو هذي تعيسة الحظ .. اسفه اقصد سعيدة الحظ اللي حبيتها على غفله
هلال وهو يتأمل : وحده سحرتني من اول ما شفتها وما قادر اعيش لحظة وانا بعيد عنها عسب جي انا قررت اتزوجها
ساره وهي فرحانه : ووناسه هلول من صدق تبا تتزوج .. هييييه اخويه بيتزوج .. وعقبها بييب عيال وبستوي عمه
هلال بابتسامه : حشا عدال على عمرج .. خليني اتزوج بالاول وعقب نفكر فالعيااال
ساره : انزين منو هذي اللي ناوي تخطبها
هلال : وحده من بنات عمي .. بس منو بالضبط اعفيني ما اقدر اخبرج ..
ساره تقاطعه : لا حبيبي ما يحتاي تخبرني بشي .. مدام انها وحده من بنات عمي فاكيد بتكون خوله
هلال بثقه : لا حبيبتي بعدج ما وصلتي ... يالله عن اذنج تاخرت على سعيد
ساره بتوتر : هاه سعيد ربيعك .. خلاص اوك ما بعطلك اكثر انا بعد تاخرت وراي كليه تعرف الامتحانات على اخرها
هلال : انزين ما قلنا شي .. بلاج قمتي تتلعثمين .. وويهج صار لونه اصفر
ساره : ما فيني شي هلول .. بس تعرف احينه امتحانات .. عسب كذا انا متوتره .. يالله ما بعطلك اكثر .. بايو
هلال بابتسامه : بلاها هذي .. كلنا درسنا واختبرنا .. بس ما توترنا بهالطريقه .. يحليلها ساروه طول عمرها خوافه .. الله يوفقها ويعدي اختباراتها على خير .. احسن شي اسير صوب سعيد
مريم بعصبيه : غادووووه وينج لعنبوه صارلج اسبوع مصكره تلفونج ؟؟ كل هذا لانه ضميرج ما يسمح لج اتسوين اللي قتلج عليه .. بس يوم اطردج انتي واهلج برع البيت ساعتها بتحسين بالخير اللي انا عيشتج فيه انا اراويج
~ ~ ~ ~ ~ ~ ~ ~ ~ ~ ~ ~ ~ ~~ ~ ~ ~ ~ ~ ~
فـــــي شركة بو خالد
بو خالد :طمني يا بو فيصل عسى الصفقه رست علينا
بو فيصل : تطمن يا بو خالد كل شي صار نفس ما خططناله واحسن بعد
بو خالد : الله يبشرك بالخير يا بو فيصل هذي الاخبار اللي تسر
بو فيصل : الحمدلله انه كل شي عدا على خير وهذا كله بفضل ولدك خالد .. ما شاء الله عليه عقليته تجاريه
بو خالد بثقه : طالع على ابوه .. ما يفوت شي
بو فيصل بابتسامه : وانته صادق يالله احينه بخليك .. عندي جم شغله ولازم اخلصها
بو خالد "حياك بو فيصل الله يسهل علينا وعليك .. بو خالد وهو يفكر .. والله وطلعت قدها يا خالد وبيضت ويهي جدام ربعي .. وقدرت تخلي هالصفقه ترسي علينا .. مع انه ما تعرف شي في التجاره .. لكنك طالع على ابوك يوم تحط شغله في راسك توصل لها .. حتى لو ما كنت تعرف عنها شي .. هي هي احين اقدر اموت وانا مرتاح
خالد وهو يقاطع حبل افكار ابوه .. صبحك الله بالخير ابويه
بو خالد وهو يحضن خالد : هلا والله يالغالي .. هلا بشبيه ابوه .. هلا بالنشمي
خالد باستغراب : ابويه اشو السالفه .. كل هذا حقي
بو خالد : اللي سويته يا خالد جميل ما راح انساه لك طول عمري .. وابشرك الصفقه رست علينا
خالد وهو فرحان : من صدجك ابويه الصفقه رست علينا .. الحمدلله .. توقعتهم ما يقتنعون بكلامي
بو خالد : لا الحمدلله كل شي صار لصالحنا
خالد : الحمدلله .. بس تصدق ابويه لو ما وافقوا كنت بنتحر تخيل طول الاسبوع اللي كنت مسافر فيه ما قدرت اطلع يالس احفظ في هالاوراق واحاول افهم شو اللي بيصير حوالي .. بس الحمدلله جات سليمه هالمره
بو خالد:والله وطلعت شاطر يا خالد..الا خبرني شسالفه ليش ياي صوبنا..توقعتك تسير تريح لك جمن ساعه توك واصل
خالد بتوتر : ابويه روضه خبرتني باللي صار امبينكم .. وبصراحه انا ياي عسب افاتحك في هالموضوع واخذ رايك
بو خالد : هيه موضوع خوله .. ايلس وخبرني اشو سالفتك .. واشو اللي ناوي عليه ... روضه ما طاعت تخبرني

فـــــــــي آلمستــــــــــــــــــشفى ..
ام غاده : عفيه عليك عدول .. كليت الصحن كله
عادل بابتسامه : اميه الله يهداج وانتي خليتني اكل براحتي .. يالسه ع راسي لين ما كليت الاكل كله
ام غاده : احسن اتم على راسك .. ولا تيلس تدلع هذا احبه وهذا لا
غاده وهي يالسه تفكر واطالع عادل وهو يالس يضحك : لين متى بتم متحمله اشوفك عاجز .. اليوم يالس تضحك .. لكن باجر الله العالم يمكن تتحول ابتسامتك هذي لزوبعة ينفتح فيها باب الاحزان فحياتك .. ههه وانا يالسه اقص على نفسي واقول اني بقدر اساعدك .. لكن من وين يا حسرة .. حتى البيت اللي لامنا وحاضننا نحن الثلاثه يالسه انذل عشانه ومخلي مريم تتحكم فيني .. اه ما قادره استحمل كل هذا .. ويلست اطالع تلفونها .. وليه نسيت اني مصكره تلفوني صارلي اسبوع .. ياربي اكيد بحصل مريم احينه شابه نار علي .. اللهم جيب العواقب سليمه
مريم وهي تتنهد : اووووووووووووف اخير رن .. يالله غاده ردي .. ردي كل يوم يمر مش من صالحي
غاده بتوتر : الو هلا مــــر يــ.......
مريم تقاطعها وهي اتصارخ : انتي وينج صارلي اسبوع ادق عليج وحظرتج مصكره تلفونج
غاده تقاطعها : بــــــ ... س
مريم ما خلتها تكمل كلامها : شوفي يا غاده الظاهر انج بديتي تتمادين بتصرفاتج .. ونسيتي اليد اللي تمدتلج .. ووقفت معاج يوم كنتي محتاجتلها .. بس الظاهر نسينا ما كلينا
غاده بضيج : خلصتي كلامج ..
مريم بدون نفس : هيه خلصت .. اذا عندج اضافات ياليت لو تتحفينا ..
غاده وهي تتنهد : شوفي مريم انا عمري ما راح انسى الجميل وبتم اذكره طول عمري وهذا دين فرقبتي .. فلا تضنين كوني مصكره تلفوني اني اتهرب منج .. لا حبيبتي مش عشان كذا .. بس لانه اخويه صارله حادث .. ومرقد فالمسشتفى صارله اسبوع .. وانتي اللي هامج مخططاتج وبس.. فكري بالناس اللي حواليج عسب تقدرين تعيشين.. بطلي انانيه .. وبخصوص الموضوع اللي بيني وبينج .. خلاص صااار .. والامانه اكيد وصلت
مريم وهي طايره من الفرح : صدق غاده سويتي اللي قتلج عليه
غاده بضيج : هيه يا مريم سويت اللي خبرتيني عليه ونفس ما اتفقنا بالضبط ..
مريم : مشكوووره غاده يالله حبيبتي باااااي
غاده وهي مستغربة من تصرفات مريم : حشا صكت التلفون في ويهي .. ولا سألت عن اخبار عادل .. معقوله الحب يعمي قلب الواحد .. لدرجة يوصل تفكيره انه عايش في هالكون بروحه ولا حد حواليه .. اه يا مريم صرتي مريضه يارب سامحني على كل اللي يالسه اسويه .. كل هذا عشان اهلي يار ب سامحني سامحني .. وانت ادرى بحالتي
الدكتور وهو يقطع تفكير غاده : مساء الخير اخت غاده
غاده وهي تمسح دمعتها : هلا دكتور طمني اخبار عادل احينه متى نقدر نطلعه
الدكتور : الحمدلله عادل بخير بس لازم يتم كم يوم هنيه عسب نطمن اكثر وعقب بنرخصه ان شاء الله
غاده بضيج : الحمدلله على كل حااااااال .. ما ادري كيف بيقدر يتأقلم على وضعه اليديد
الدكتور بابتسامه : غاده في خبر اكيد بيفرحج
غاده وهي تصطنع الابتسامه : ما اعتقد فيه شي يفرح دكتور .. اخويه الوحيد مب قادره اساعده وارجع له ابتساامته
وهو يتظاهر انه متقبل حالته ..بس انا حاسه انه من داخله يالس يموت وانا ما الومه صعب على الانسان يعيش وهو فاقد شي مهم من جسمه .. آآآه يا دكتور والله مب دارية شو اسوي .. الحمدلله ع كل حال
الدكتور : وانا بغيت اكلمج في هالموضوع
غاده : خير دكتور فيه شي يديد في حالة عادل
الدكتور : لا بس المستشفى قررت انها تسفره على حسابها
غاده وهي مب مصدقه : دكتور انته شو يالس تقول من صدقك يالس تتكلم .. يعني عادل ................ لا ما اصدق
الدكتور بابتسامه : غاده الله يهداج هالامور ما فيها مزح سيري بشري عادل وعقبها مري علي المكتب عسب نتفاهم
غاده : مشكوور دكتور والله فرحتني .. مب مصدقه معقوله عادل بيرجع يمشي مره ثانيه .. يارب لك الحمد والشكر
الدكتور : على خير ان شاء الله .. لا تنسين مري علي في مكتبي عشان نحدد متى تقدرون تسفرونه
غاده : خلاص دكتور اكيد ما بنسى .. ببشر امايه اكيد بتفرح وعقبها اكيد بمر عليك ..
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فاطمه : سناتا الباب يدق سيري شوفي من عند الباب
مها : فطامي فديتج انا بطلع فوق سويت شوربه حق خوله عسب تهداء اعصابها شوي وعقب بي اسولف معاج اوك
فاطمه بابتسامه : لا تشغلي بالج .. وياليت لوتيبيها عندج .. ترى عموتي شاكه انه خوله فيها شي ..
مها : اكيد بنزلها .. بعدين ابويه باقيله ساعتين وبيرد البيت .. واذا شاف حالتها تعبانه جذا اكيد بيعزم يوديها المستشفى .. وخوله مالها خلق مستشفيات .. إنتي لا تشغلين بالج الحين بخليها تنزل غصب عنها مش بالطيب
فاطمه بضيج : ما تنلام مهاوي .. مرضها لو خارجي كان سهل نعالجه مرضها مغروس داخل قلبها .. الله يهون عليها
مها : اوك انا بسير اشوفها الحين .. يمكن هدت شوي
سناتا : ماما فاطمه فيه واحد يقول يبا بابا حمود .. بعدين انا يخبر انه ما في موجود روح شغل .. هو يعطي هذا ورد
فاطمه بضيج : ورد وحق حمود ؟!!!! منو هذا اللي متفيج يطرش ورد ؟؟!! اوكي سناتا هاتي انا بعطيها حمود
سناتا : اوكي ماما خذي هذا كرت مال بوكيت..
فاطمه بطلت الكرت ويلست تقراء اللي انكتب فيه: ليس الحب ان تبقى دائما بجانب من تحب ولكن الحب ان تبقى في قلب من تحب .. حمود حياتي اشتقتلك .. للحين مب مصدقه انه البارحه كنا ويا بعض .. بس الايام يايه وان شاء الله انتم مع بعض على طول غصبا عن الحساد ومكتوب بين قوسين ( فـــآطمه ) تحياتي : اسيرة هواك ’m
فاطمه وهي تضغط ع الكرت : لا يا حمود انته مصختها الصراحه .. لين متى بتم مستحمله خيانتك لي .. بس لو زعلت وين اروح .. انا من لي غيرك حمود ليش تذبحني بهالطريقه ليش
مها كانت نازله ولمحت فاطمه تصيح : فطامي حياتي اشو صاير عليج ليش يالسه تصيحين
فاطمه وهي ما قادره تتكلم وادموعها اربع اربع: ما فيني شي خلوني في حالي .. انا تعبانه مب قادره استوعب اللي يالس يصير حوالي ليش يصير فيني جي ليش .. انا شو سويت عشان يصير فيني كل هذا
مها بخوف : فطامي ليش اشو استوى وشو سالفة بوكيت الورد اللي في ايدج
فاطمه وهي تفره ع الارض وادوس عليه : ما ادري .. ما ادري .. ما ادري ..وسارت تركض صوب غرفتها
مها بخوف : ياربي اشو استوى عليها اول مره اشوف فاطمه شكلها متبهدل جي وشو سالفة البوكيت ..
خوله بضيج : مها بلاها فاطمه تصارخ .. في احد ضايجها
مها : ما دري طلعت وحصلتها منهاره .. وماسكه في ايدها بوكيت ورد بسير اسأل سناتا يمكن تعرف شي
خوله : خذيني معاج .. انا بعد ابا افهم اشو صاير عليها .. صارلها كمن يوم وعلاقتها مع حمود متوتره
مها : سناتا من شوي دق الباب وكان فيه بوكيت ورد منو جان يايبنه وحق منو
سناتا : ماما ما فيه معلوم .. انا ياخذ البوكيت ويعطي ماما فاطمه
مها : انزين ما قالولج تعطيه منو .. ما كان عليه كرت
سناتا : لا ماما بس بوكيت ورد ما فيه كرت
مها : اوكي سناتا خوالي تعالي خلينا انروح انشوفها
سيلين بشكارتهم الثانيه : سناتا انته ليش ما في يخبر ماما مها انه هذا بوكيت مشان بابا حمود مع ماما مريم
سناتا : سيلين اسكت ماما مريم يخبر مافيه قول حق احد .. بعدين هيه يعطي فلوس عشان يعالج ولد ما ل انا .. انته ما فيه يخبر ماما مها اوك .. إذا إنته في يخبر ولد مال آنآ في موت
سيلين : اوك انا ما فيه خبر بس يريد فلوس مشان يشري تلفون جديد
فاطمه وهي تتأمل صورة حمود وحاضنتنها : ليش يا حمود انته وعدتني انك ما راح تحب وحده من بعدي .. ومحد بيكون فحياتك غيري واحينه يالس تطنز علي مع اللي تحبها .. كل كلامك جان جذب ف جذب ليش غدرت فيني ليش .. قولي بس انا فشو قصرت معاك عسب تسوى فيني كل هذا .. صنتك وحفظت كرامتك ليش تجازي احساني لك بالغدر والخيانه كنت دايما اشوفك مثال للريال اللي صاين بيته وزوجته وعياله حسافه بس حسافه
مها وهي اطق الباب : فطامي اقدر ادخل
فاطمه وهي تمسح دموعها : لازم ما احسس حد بكل اللي يالس يصير .. عمري ما كنت ضعيفه .. ولا راح اضعف تبا تخوني يا حمود وتتشمت فيني انت وحبيبتك اوك انا بعد بسايركم فلعبتكم الوصخه هذي وبنشوف اشو نهايتها
فاطمه بابتسامه : هلا مهاوي حدري فديتج بلاج واقفه عند الباب
مها وهي اطالع خوله : غريبه اشو استوى عليها توها كانت تصيح
خوله : انتي حدري احينه وعقب بنفهم اشو صاااااار
مها بابتسامه : بلاج حبيبتي ليش كنتي اتصيحين من اشوي

خوله : فطامي حياتي فيج شي .. مريضه انوديج المستشفى
فاطمه وهي تضحك : فديتكن والله مافيني الا كل خير ... بس انا عندي عقده من الورد عسب كذا اتشائمت وعصبت
مها : اها وانا اقول ليش حمود من يوم ما تزوجتوا ما فكر حتي يشتريلج ورده على عكس يوم جان يحب مريم
خوله وهي تضربها : مها اشو قلتي فضحتينا الله ييخسج
فاطمه باستغراب : مها اشو تقصدين .. اشو سالفة مريم .. حمود جان يحبها قبل
مها بتوتر : ياربي انا شو قلت .. فطامي لا فديتج بس يوم كنا صغار حمود جان وايد يحب يهدي مريم ورد لانها هي تحب الورد وايد عشان كذا ما فيه سبب ثاني صدقيني..
فاطمه وهي تصطنع الابتسامه : وليش افهم غلط انتي ما تقولين انهم كانوا صغار .. يعني خلاص ما عليهم شرهه كانوا صغار ولا فاهمين اللي يالس يصير حواليهم
فاطمة ما حبت تخبرهم انها تعرف هـ السر من أول يوم تزوجت فيه حمود لآنة في ليلة عرسها حصلت سلسله تحت مخدة حمود محفور عليها اسم مريم وحمود .. ومكتوب عبارة تحت ( احباب كنآ اثنين ) وعرفت انه حمود سواها عقب ما ودر مريم عسب جذا ما حطت في بالها وقررت انها تبداء حياه يديده عند حمود وتنسى كل ماضيه
~ ~ ~ ~~ ~ ~ ~ ~ ~ ~ ~ ~ ~~~~~~~~~~~
في الشـــــــــــــــــــــركه عن بو خالد
بو خالد وهو فرحان : وليش ما خبرتني من قبل عسب اروح اخطبها حقك
خالد : ابويه يعني كونها عميا هالشي ما ضايجك
بو خالد : يا وليدي خوله ما الها شغل بكل اللي صارلها هي ضحية طيش عامل
خالد باستغراب : ابويه انتو اشو يالس تقول ؟؟!!!!!!!!!!!!
بو خالد : ابوها سعيد هذا جان ربيع عمري وكانت بينا شراكه من زمان انا صار عندي خير ويلست اكون شركات وبيوت وشقق ولهيت ونسيت كل ربعي .. الشغل خلاني انسى اقرب الناس ويوم استوت سالفة خوله انا كنت عنده فالمستشفى وصدمته كانت كبيره لما عرف انه بنته ما راح تشوف ويمكن مالها علاج
خالد : ابويه انته تعرف ليش خوله صارت عميا
بو خالد : كيف ما اعرف ياوليدي وانا كنت هناك خوله يابوك دريولهم اعتدي عليها ولانه خاف تخبر عليه تم يهددها ورش لها ماده في عيونها بالغلط وصار اللي صار
خالد وهو منصدم : ابويه قصدك انه خوله كانت ضحية إغتصاب .. انا ضنيت انا عمياء بسبة حادث سياره بس اغتصاب ولا مره خطر في بالي هالموضوع .. بس اللي انا مستغرب منه ليش انا يوم شفتها ما سألتها عن حالتها
بو خالد : هيه يا وليدي اعتدى عليها.. عسب جذا انا تعلمت من سالفة خوله ورفضت انه روضه تركب عند دريول بروحها .. لين ما كبرت وصارت تتعتمد على نفسها عقب حطيت لها دريول وثقه بعد وما ينخاف منه
خالد وهو يصيح : مستحيييييييييييل ما اصدق ما اصدق .. إنزين ليش هذي طفلة
بو خالد : خالد هدي نفسك شوي .. لا تقولي عقب اللي سمعتها بتكنسل كل اللي ناوي عليه .. ترى محد بيلومك
خالد : لا ابويه انا احبها بس متحسف على كل اللي صارلها يعني طفله كيف قدرت تتحمل كل هالعذاب بروحها وانا وين عنها ليش ما كنت قربها .. ابوي خوله وايد تعذبت فحياتها وعقب اللي سمعته انا متمسك فيها اكثر عن أول
بو خالد : خالد انت كنت صغير وهالشي ما بتقدر تفهمه المهم عندك رقم ابوها تعرف انا كل ارقامي امتسحت
خالد : هيه ابويه عندي رقم اخوها فهد احينه بدقله وباخذ رقم ابوه
بو خالد : زين ما تسوي اول ما يعطيك اياه خبرني
فـــــــي بيــــــــــــــــت بو حمود ..
مها : فهود قولي ليش طالع بدري من دوامك
فهد : ليش يالس فوق راسج وانا ما عندي خبر
مها وهي تفر عليه المخده : مالت عليك ما تنعطى ويه .. اوني ابا تطمن عليه اتحسب شي يعوره
فهد : لا حبيبتي تطمني ما فيني شي
خوله كانت يالسه مع فاطمه فزاويه بروحهم : فطامي عمري خبريني اكيد وراء سالفة البوكيت شي
فاطمه : خوالي حياتي لا تشغلين بالج والله لو كان فيه شي كنت خبرتج .. مالي مصلحه اخبي عليج
خوله : تصدقين عقب ما سمعتج يالسه تصيحين وتصارخي هانت علي مصيبتي .. ما هنتي علي تميت طول الوقت افكر فيج وشو هالشي اللي خلاج تنهاري بهالشكل .. وموضوع انج متعقدة من الورد هذي ما دخلت راسي
فاطمه وهي تحضن خوله : خوله والله انا من غيرج ما اسوى شي .. انتي اقرب وحده .. واحس قربج بالامان .. وصدقيني اول ما اضايج بي صوبج ركض .. كل اللي اباه منج الحين اتمين معاي
خوله وهي تبوسها : وانا تحت امرج الغاليه .. اذا انا ما شلت همج منو بيشيله هاه
فهد : مها بسج من هالهذره ونشي يبيلي قلاص ماي
مها وهي تتمصخر : بنش بس عقب ما تعطاني فلوس .. ما ظنتي فهالكم يوم فيه شي ببلاش
فهد رن تلفونه : بنتفاهم عقب عندي مكالمه احينه .. هلا خالد اشحالك وين انت صارلك اسبوع ما معبرنا
خالد : ههههه فهود خلني اتنفس اشوي .. ما عطيتني فرصه حتى اسلم .. المهم يا طويل العمر كانت عنده سفريه صوب استراليا .. عسب كذا انا مطنشنك صارلي اسبوع
فهد : يا حظك ولا كنت فاستراليا .. جان خذيتنا معاك نتسلى .. ولا لانك ولد تاجر ما ينفع نروح معاك
خالد : هههه الله يقطع سوالفك فهوود .. المهم ما علينا بغيتك تعطاني رقم ابوك
فهد : خلود انته تنكت ولا شو .. اشو تبا فيه رقم ابويه
خالد : كل شي فوقته حلووو فهووودي .. يمكن طالبين القرب
فهد : والله نتشرف فيك خالد .. ولو علي انا جان زوجتك بدون مهر
مها سمعت كل المكالمه وعلى طول ركضت صوب خوله
مها وهي تنافخ : خوالي .. خوالي عندي لج بشاااااره تسوى مليون يالله عطيني المليون وعقب بخبرج
خوله : مها حبيبتي بلاج اتنافخين .. وشو هالبشاره .. ما اعتقد فيه شي يفرح عقب كل اللي صار
مها بابتسامه : هذا من وجهة نظرج .. تصدقين سمعت فهد يكلم خالد .. وقاله انه جان مسافر استراليا
خوله تقاطعها بعصبيه : انزين وانا شو يخصني .. مها قتلج الله يخليج اذا تبين مصلحتي صكري ع هالموضوع نهائي
مها : بس السالفه مب جذي .. خالد طلب ايدج.. وفهد عطاه موافقه مبدئية .. قتلج خالد يحبج ومستحيل يتخلى عنج
عطيه فرصه يمكن عنده ظروف اجبرته يسوي كل هذا .. والمهم انه يبا يكون قربج

آللــــــــــــــــــــحظة آلتــــآسعـــه

:

::


:



هلال كان في الكووووفي عند سعيـــــــد
هلال : سعيد خبرني شو هالشي اللي خلاك تصحيني من فير الله .. اليوم اجازتي وانت خربتها علي
بس يالله مو مشكله اذا هالشي وايد مهم .. راح اسامحك وطوفها حقك هالمره ..
سعيد بتوتر : يمكن الموضوع اللي بفاتحك فيه بيضايجك .. ويمكن تفكر فلحظتها اني خنتك .. او طعنت فشرفك .. بس بشو تباني احلف لك انه كل اللي صار جان بحسن نيه .. واتمنى انك تقدر تفهمني .. وتعذرني
هلال : سعيد الله يهداك ليش كل هالمقدمات .. اختصر وقولي شو اللي صاير وساعتها انا بحكم .. بصراحه خوفتني
سعيد : من حقك تخاف لآنة الموضوع اللي بفاتحك فيه متعلق بشرفك
هلال وهو اعصابه تالفه : سعيد يا تقولي شو عندك .. يا اخليك وارد البيت خوفتني بهالمقدمات شرف وما شرف اشو السالفه آنته خبرني وقتلك عقبها انا بحكم اذا الموضوع يستاهل او لا .. لا طفربي وتلعب باعصابي
سعيد : تذكر البنت اللي خبرتك عنها وقتلك اني احبها .. ومستعد اعطيها روحي
هلال باستغراب : هيه شفيها .. صار لها شي .. تقدمت واهلها رفضوك .. اذا السالفه جذي صراحه هم الخسرانين
سعيد : هلال الله يخليك افهمني البنت اللي احبها هي ........ اختك ساره قالها عقب تردد طويل
هلال بعصبيه : اشو .. اختي ساره .. سعود انته اشو يالس تقووول .. واختي ساره من وين تعرفها اصلا
سعيد : هيه يا هلال اختك ساره .. شفتها بالصدفه عند اختي عفراء وتعلقت فيها .. وكنت ناوي اتقدملها .. بس هي رفضت وقالت نتريا شوي .. لين ما تخلص هالكورس .. لانه جان عندها ضغط امتحانات
هلال : يا سلام وليش تقررون انته وياها هالشي .. هالشي مش متعلق فيك انت وساره بس.. ومش من حقكم تحددون اشو الصح واشو الغلط .. ولو كنت اتحبها شرات ما تقول .. ليش ما اتقدمت لها ليش سمعت كلامها .. يعني عايبنك حظرتك مستغفليني وعايشين في الغراميات .. فنظركم اللي سويتوه هو الصح
سعيد يقاطعه : ان سويت كل هذا بس لاني احبها .. وما حبيت اخسرها .. هلال انته تعرف اختك ساره عاقله ..
ومستحيل اتسوي شي غلط هذي تربيتكم هلال .. ولا تظن في يوم اني بطعن فيك او فشرف اختك .. انا فعلا حبيتها ومستعد اسوي المستحيل بس عسب ترضى علي .. وانا سويت اللي يرضيها ما كان قصدي أضرك او اجرح كبريائك
هلال بضيج وهو ياخذ نفس عميق : انزين ليش خبرتني الحين .. اشو ناوي عليه
سعيد : ناوي اتزوجها .. وقلت اعطيك خبر .. والليوم في الليل بنزوركم
هلال باقتناع: مع انه اللي سويته غلط .. بس انا واثق فيك سعود .. وعارف كل اللي سويته جان عن حسن نيه عسب كذا بعتبر ما صار شي .. وبنبداء صفحه يديده .. وموضوع الخطبه خله فيوم ثاني.. فبالي شغله ولازم اليوم اخلصها
سعيد : خلاص انته حدد ونحن حاظرين ..بالوقت اللي تامرنا عليه ..
هلال : على خير ان شاء الله .. يالله انا اترخص بسير صوب ابويه اباه فموضوع
سعيد : خلاص عيل بينا اتصال فحفظ الرحمن ..
~ ~ ~ ~ ~ ~ ~ ~ ~ ~ ~ ~~ ~ ~ ~ ~ ~~~~~~~~~~~~
مشعل : زين شفناك ضاري .. دومك فسفريات محد ملحق عليك
ضاري : يا شيخ خلني اغير جو واشوف الناس .. فهالبلاد ما محصل غير الهم والشقا
مشعل : واشو بلاها بلادنا يا زينها .. حتى طالع بناتها اشحلاتهن
ضاري وهو مبطل عيونه : طر .. طر .. ياربي اشحلاتها .. مشعل وقف شوي .. هدي .. هدي .. هدي
مشعل : اي بنت تقصد اللي ع الزاويه .. صج والله انه جمالها خيال وما فيه منه .. اشرايك نتغزل فيهن اشوي
ضاري : والله ما خساره فهالحلوين .. اركن ع الزاويه
شمايل : رواضي فديتج هذا اخويه وصل .. اشوفج باجر اوك
روضه : اوك حبيبتي وذاكري عدل ... عسب ما تيلسي تتحلطمين شرات اليوم
شمايل وهي تبوسها : اوك رواضي .. على امرج الغاليه .. وباجر بيستوي العكس انا بغششج مش انتي
روضه وهي ميته ضحك : عارفين ترى .. كلام النهار يمحوه الليل .. وانتي بتمي طول عمرج مش قد كلمتج
شمايل : رواضي باجر اراويج طالعي اخويه كلني بنظراته بيتحرونه يالس يغازلني شكلي وايد تأخرت عليه
روضه : اوكي حبيبتي سيري .. لا يفضحنا وينزل يكفخج .. وعاد نحن ما ناقصين فضايح
شما يل اوكي الغاليه .. بينا الووو اووكيك
روضه : اوك حبيبتي .. وانا تحت الخدمه .. روضه في خاطرها .. بلاه هـ الدريول وايد تأخر صارلي ساعه اترياه
مشعل قطع حبل افكارها : اوووووه يالحلو عطنا ويه .. تصدقين عاد ما شفت بنت بجمالج
روضه على طول غطت ويها وما علقت على كلامه
ضاري بمصخره : لا لا لا .. اشحقه خبيتي الشمس عن الارض .. طالعي الدنيا ظلمت
مشعل :والله صادق .. انا اقول الدنيا بلاها مظلمه .. اثرنه الحلو متغطي ..يالله يا حلو ارفق بحالنا وخلنا نشوف الشمس
نوف كانت طالعه عند وحده من ربيعاتها ... اسماء ..انا باخذ تكسي وبسير صوب المستشفى اشوفج باجر اوك
اسماء : اذا تبين انا بوصلج .. عسب ما تتأخرين
نوف : لا تشغلي بالج حياتي المستشفى قريبه من هنيه .. كلها خمس دقايق وبكون هناك
اسماء : خلاص حبيبتي اللي يريحج وطمنيني عليج
نووف وهي تطنز : خلاص ماما اسماء اول ما اوصل بخبرج
اسماء : هههههههه انتي ما تيوزين عن سوالفج بس مب مشكله انا اتشرف اكون امج ...
نوف : اكيد لج الشرف باااااااااي --- حياااااتو .. ولمحت روضه والشباب اللي يالسين ايضايقوها وسارت صوبهم
روضه بصوت واطئ : ياربي هالدريول وينه .. الظاهر هذيلا فاضيين وما بيخلوني في حالي .. اللهم سترك
نوف بابتسامه : بلاج واقفه هنيه بروحج .. وهذيلا بلاهم وراج
روضه بضيج: يالسه اتريا هالدريول ووللحين ما شرف .. وهذيلا لازقين فيني .. الظاهر ما عندهم شغل
نوف باسلوب فكاهي : تعرفين شي انا براويج شغلي فيهم .. وصدت صوبهم .. اي انتوا ما عندكم شغل يالسين ادوروا في هالشوارع .. واضايقون خلق الله .. الله يعين اهلكم الصراحة اللي مهيتينكم
ضاري : ياربي هالشينه احينه حد رمسها .. نحن يالسين نرمس الغزال اللي حذالج
نوف : بقولك شغله وافهمها .. فحياتك شفت غزال يطالع قرد .. لا صارت ولا عمرها بتصير
ضاري بعصبيه :اي انتي احترمي الفاظج.. محد قرد غيرج يالخايسه
نوف تقاطعه : لو سمحت ممكن تترجم كلامك .. لاني انا انسانه .. ولا افهم فكلام الحيوانات
مشعل : لا جد هذي مصختها
نوف تقاطعه : لا بعدنا تونا في البدايه احينه براويكم كيف بمصخها صدق .. وبطلت العصير وفرته عليهم
مشعل : حووووووووه انتي .. منو مفكره نفسج
نوف بثقه : عمتك وتاج راسك .. واذا ما سرتوا من هنيه بيلس اصارخ وبلم عليكم خلق الله
ضاري : حشا صدق انها قرده ودفشه .. مشعلوه حرك السياره خلنا انروح مالنا نصيب في هالغزال
نوف : خذها نصيحه القرد لازم يطالع قرده شراته وافهمها يا شاطر
مشعل حرك السياره ولا رد عليها
روضه وهي تتنهد : اوف اخيرا راحوا .. وربي خفت .. طالعي كيف اشكالهم عاد الصراحه انتي ما قصرتي
نوف : هالاشكال ما تخاف من شي .. ولازم انبينلهم انه نحن بعد مش خايفين منهم
روضه وهي ميته ضحك : بس حلوه الغزال ما يصد صوب القرد كثري منها وايد عيبتني
نوف: تصدقين عاد كنت خايفه بس تذكرت كلام اختي غاده .. وهي توصيني اذا صارلي شي ؟؟ !! لازم ما اكون اضعف من الموقف اللي يواجهني لازم اكون ا قوى منه عسب اقدر اواجهه وااتغلب عليه
روضه : بس والله طلعتي قويه .. لكن مش غريبه عليج دايما اشوفج في المدرسه.. والاحظ تصرفاتج.. اللسانج اطول منج .. ولا مدرسه سالمه من اللسانج الحلو ..
نوف وهي تغمزلها بعينها : بس هاللسان نفعنا اليوم .. ولو ما لساني الله العالم كنت بحصلج شرات المومياء
روضه : ههههههههههااي الله يقطع سوالفج نوف .. اشرايج اعزمج على شي .. عسب اشكرج على اللي سويتيه
نوف وهي اونها معصبه : اذا بسوي شي بسويه عن طيب خاطر ما يحتاي تشكريني
روضه : تصدقين عاد الظاهر عليج انج دفشه وما تفهمين عسب جي بجيبها من الاخر ابا اتعرف عليج اكثر
نوف وهي ميته ضحك : عارفه كل الدفاشه فيني وانا موافقه بس بشرط ما نتأخر
روضه : اوووووك ... والله حاله طرااااار ويتشرط
نوف تقاطعها : لا تغلطين ترى بخليج وبركب تكسي ...
روضه :ههههههههه خلاص اسفين .. توبه حشا خذيتينا بمشراع وميداف ..الله يصبرني عليج

روضه :ههههههههه خلاص اسفين .. توبه حشا خذيتينا بمشراع وميداف ..الله يصبرني عليج
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فــــــي آلشركه عند بو هــــــلآل
بو هلال : هلال بلاك يا بوك صارلك ساعه ساكت انته زايرني بس عسب اطالعني ؟؟!!
هلال بتوتر :ابويه المشكله ما عارف من وين ابداء
بو هلال : هلال تراني ابوك مش واحد غريب يعني ما يحتااي مقدمات .. وهاتها من الاخر ..
هلال بثقه : ابويه الصراحه نويت اتزوج !!!!
بو هلال وهو طاير من الفرحه : من صدقك هلال .. والله هذي الساعه المباركه .. اشرلي على اي بنت تباها .. والحين بسير اخطبها حقك من اهلها .. وما يصير خاطرك الا طيب
هلال : ابويه انا ما باخذ وحده غريبه .. ناوي اتزوج وحده منا وفينا
بو هلال : شقصدك منا وفينا قصدك وحده من عيال عمك سعيد
هلال بخجل : هيه ابويه بالضبط وياليت لو تكلمهم وتخبرهم انه اليوم بنزورهم
بو هلال : ان شاء الله ياوليدي ..والله يبشرك بالخير هذا احلى خبر سمعته فحياتي .. الله ما رزقني غير عمك سعيد ويوم بتاخذ وحده من بناته بيكون زين ما سويت بس ما خبرتني منو بتاخذ مها ولا خوله
هلال : ابويه بصراحه انا اللي بخطب البنت من ابوها فما يحتاي تعرف منو .. ومردك تعرف انا على منو راسم
بو هلال : هلال الله يهداك من صدقك انته هذا زواج ما فيه مفاجأت
هلال: ابويه هذا قراري واذا تباني اعرس ياليت تحترمه وفي الاول والاخير بتعرف منو باخذ
بو هلال : بس الزواج يا وليدي اذا تباه يتم في النور لازم تبداء حياتك وانت عارف اشو بتقرر
هلال : يعني ابويه الله يهداك احينه لا دقيت حق عمي بتقوله ابا اخذ بنتك مها او خوله خلني على راحتي ومصيركم تعرفون وخوله ومها واحد ما تفرق
بو هلال : الله يستر من خططك هلول .. بس يالله لازم اسايرك وبالبركه ان شاء الله
هلال وعيونه تتلألأ : ابويه انا ابا اسويها حقها مفاجأه بصراحه نحن نحب بعض من زمان واحب طريقة خطوبتي تكون كلاسيكيه عسب افرحها وارضيلها غرورها تعرف هي من صغرها رومنسيه
بو هلال : على راحتك يا وليدي .. اخلص شغلي وببلغه بزيارتنا
هلال يقاطعه : ابويه ياليت لو انخلص هالسالفه اليوم .. مابا الموضوع يطول .. ما قادر اعيش لحظه وانا بعيد عنها
بو هلال : هلال اول ما اخلص شغلي بدقله وبخبرك متى بنروح .. وما يحتاي تستعيل العمر جدامك .,.
هلال بابتسامه : ابويه صدقني الحب ما يباله لحظات انتظار .. احلى ما فيه انك ادق الحديد وهو حامي ..
بو هلال وهو يضحك : يحليلك هلول كبرت وحبيت .. والحين ناوي تتزوج .. صدق الايام تمضي .. عقبال ما نفرح في عيالك .. ويترسون البيت .. اسكت هذا واعصب على الثاني الله يعيشني لين ذاك اليوم
هلال : هههاي ابويه الله يهداك تونا في بداية الطريج لاحقين على خططك الجهنميه .. وان شاء الله تشوف عيال عيالي
~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~
فــــــــــي آلمستشفى
عادل : غاده بلاج ساكته .. مضايجه من شي
غاده : ما فيني شي بس عندي خبر بيفرحكم كلكم .. لكن اتريا نوف وايد تأخرت اباها اتشاركنا هاللحظه
ام غاده : معقوله عقب كل اللي صارلنا في خبر حلوو .. والله بديت اشك
غاده وهي تحضن امها : امايه الله يهداج اشو هالرمسه .. الله اذا ابتلاء العبد بس لانه يحبه مش عشان يضايجه
عسب جي لاتعيدي هالرمسه الله يخليج .. والله يصكر باب ويفتح بداله الف باااااب واحينه بثبتلج كلامي بهالخبر الحلو
عادل : غادوه لا يكون انخطبتي .. ترى انا ما شبعت منج فشي اكيد اني برفض اللي يتقدملج
غاده : هههههاااي الله يقطع سوالفك عدول .. انا وين والزواج وين .. بعدين خلاص راحت علي
نوف وهي تحضنها : يا سلام ومنو اللي اتجراء وقالج انها راحت عليج .. اصلا اللي يشوفج يقول انج اصغر مني
غاده : يا سلام ترى بصدق وبتخقق عليج .. بعدين تعالي انتي وينج من الصبح
نوف : حشا شوي شوي علي .. لا بس شفت شباب يالسين ايعاكسون وحده من ربيعاتي وعاد تعرفيني انا وحده متفيجه وتميت اسب فيهم .. لحد ما حوشتهم .. لو شفتي اشكالهم كيف صارت والله بتموتي عليهم ضحك
غاده : هههههه وانتي اشو اللي حادج .. هي تقدر ترد عن عمرها وانتي مالج شغل
نوف وهي تضحك بصوت عالي : يا شيخه روضه تخاف من ضلها .. فما بالج اذا شافت ريال غريب واقف جدامها .. الاكيد الاكيد انها بتنجلط او بتييها سكته قلبيه .. عاد انا قلت الحق عليها قبل لا تروح فيها
غاده : حشا لهالدرجه خوافه ..
نوف : هي من جهة خوافه تخاف وايد .. بس طيبه وقلبها ابيض .. انا بالاول كنت اعرفها معرفه سطحيه .. يعني اشوفها بس من بعيد .. وكان خاطري اتعرف عليها من زمان لكن للاسف ما كان لي نصيب .. بس اليوم يات الفرصه لحد عندي .. عسب اتقرب منها واستوي ربيعتها ..
عادل : ونقذتيها من الموقف اللي انحطت فيه .. واستويتن ربع
نوف : بالضبط .. عفيه عليك عدول .. يبتها من الاخر .. طلعت ذكي ما شاء الله
عادل : انا طول عمري اذكى منج .. بس انتي ما راضيه تعترفين
نوف : خلاص الحين بعلنها .. واذا تباني اسمع كل اللي في المستشفى حاظرين
غاده تقاطعها : حوووه انتي بلاج تخبلتي تبين تفضحينا والا اشو ..
نوف : هو يباني اعترف انا شو يخصني
عادل بابتسامه : غادوه ترى هذرة نوف ما تخلص .. ياليت لو تخبرينا اشو هالخبر الحلو
نوف وهي متحمسه : اكيد انخطبتي صح .. يا سلام
غاده : هههه الله يقطع سوالفج نوف .. انتوا ما عندكم طاري الا طاري الزواج .. لا انخطبت ولا شياته بس حبيت
ا خبركم انه المستشفى قررت اتسفر عدول على حسابها الخاص ..
ام غاده ودمعه على خدها : غاده تتكلمين من صدقج
غاده وهي تمسح دمعتها : هيه امايه الدكتور جان عندي وهو خبرني .. لانه تعاطف وايد مع حالة عادل
نوف : الحمدلله رب العالمين .. فعلا اللي يصبر ينال
غاده وهي اطالع امها : وهذا اللي كنت انا اقصده لج امايه .. الانسان مهمها بلغت مصيبته لازم يصبر ويحتسب والله بيفرجها .. والصبر مفتاح الفرج ..
عادل وهو يالس يصيح : غاده يعني بقدر امشي مره ثانيه
غاده وهي تحضنه : عدول ان شاء الله بتمشى شر ات الاول واحسن..
نوف : عدول هالمسأله يبالها بس شوية صبر وإيمان .. واذا غرست هالشي بداخلك تأكد انك بتتخطى كل شي بيواجهك
ام غاده : غاده نشي وصليني عند هالدكتور ابا اشوفه واتشكره على الوقفه اللي وقفها معانا
غاده : ان شاء الله مايه .. نوف حبيبتي انتي تمي عند عادل وانا بوصل اميه وعقب برجع
نوف : بس لا اطوولون ابا ارد البيت وراي مذاكره
غاده : ياربي يا نوف اسكتي شوي.. مسويه من الحبه قبه .. اللسانج بيشتكي منج
نوف : انزين غادوه خلاص بسكت .. سيرن بس لا تتاخرن
غاده اطالعها بابتسامه : بو طبيع ما يجوز عن طبعه .. الله يهديج بس
~ ~ ~ ~ ~ ~ ~ ~ ~ ~ ~ ~ ~ ~~~~~~~~~~~~~~~~~~
فـــــــــــي الشركه عند بو حمود
بو حمود : هلا بالغاليه هلا
ام حمود : هلا الغالي اشحالك
بو حمود : والله تعرفين ام حمود الشغل ما يخلص .. كل ما اخلص شغله تطلع غيرها
ام حمود : انا داقه بس عسب اعرف اشو فخاطرك تاكل اليوم