ريم : ممممم ماعرف والله .. بس يمكن حبيتك الحين انته اكثر.. لاني اكبر.. وفاهمة اكثر.. بس مشتاقة لحنيتك القبلية يوم اكون زعلانة .. تذكر سارو بنت خالي .. تخيل قالتلي اليوم اني ناقصة عقل لاني ممثلة ...
سكت سعيد لانه اساساً توهق .. منو سارة بعد ؟؟ هاللي ما حسب حسابه !!!
ريم بإحباط : أدريبك ما كنت تباني استوي ممثلة .. بس خلاص اللي استوى استوى .. وسارو روحها اصلاً كانت تشجعني استوي ممثلة .. بس فجأة جلبت كل شي عليّ.. انا ما حب هالنوعية اللي رايهم يتغير مع الايام ..
سعيد فرح لانه بيقدر يغير الموضوع : وانتي تحسين ان رايج ما بيتغير مع الايام ؟
ريم بإصرار : طبعاً لا ..
سعيد باستهزاء : طبعاً بعد ؟؟ متأكدة ان ما بيي اليوم اللي بتقوليلي فيه آسفة اكتشفت ان مب انته اللي احبه ..
شهقت ريم : مستحييييييل ..
سعيد بجمود وكأنه متأكد ان هالشي بيستوي : بنجوف !!!
|[]|
كان يالس ع الشبرية بوضعية تشبه وضعية يلسته قبل ما يظهر عنه سعيد ..
يلس يفكر في هالكم ساعة اللي مروا عليه ..
فكر بوايد اشيا ..
واولها سعيد ..
وريم ..
وامه ..
سعيد ....؟
شو الغرض من وجوده في حياته وتدخله ؟؟ مع انه دوم كان يستهزئ بطريقة حياته..
وما كان يعرف اصلاً انه يرمس أو حتى يحب ..
طيحته هاي خلت سعيد يفسر الأمور بالعكس ..
هو نفسه ما يدري سبب طيحته ..
بس لحظة ..
توه تذكر ليش...
توه تذكر انه كان معصب وبشدة ع اللقطة اللي ظهرت فيها ريم قريبة من المخرج احمد ..
والمذيعة تقول شكلكم حبايب ..
تذكر انه شل صورة من صورها في لحظة غيظ ..
ويا بيقصها بسجين ..
وانتهت السالفة انه ينجرح وينزف ويطيح ..
والنهاية يفتح عينه على صوت التلفزيون .!!!!
×
×
×
ريم ... ؟
الخاينة ولا اللي يوصفها بأبشع وصف في حياته ؟
لين الحين يتذكر كل كلمة قالتها فهالبرنامج ..
.
.
.
يمكن حبيت كل ريال يعطيني حلاوة وانا صغيرة ...
.
.
.
أكيد أقدس الحب .. ولو إني ما جرّبته لين الحين لكني متأكدة إني لو حبيت بقدسه
.
.
.
خله يتأكد هل أنا ريم اللي خنته ؟ ولا نسخة مصورة مني .. ما اظن اني حبيت واحد اسمه حارب في حيـاتي ........
.
.
.
الله يا ريـــم ؟؟
ما تظنين انج حبيتي فـ يوم واحد اسمه حارب ؟!!!
ما توقعها تكون في يوم خاينة ..
الفراق خلاها أقسى من الحجر ..
×
×
×
أمـه .. ؟
وأي قصة ممكن تخليه يغفر لأمه ..
حتى لو انه متأكد 100% انه بيسامحها لو شو كان عذرها ..
بس يتمنى لو ان عذرها مقنع ..
يتمنى ...
ويا ليت الأماني تفيد الإنسان ..
×
×
×
دخلت عليه حرمة عودة في السن،
تم يتأملها باستغراب بدون ما يعلّق ..
ما سمع الا همسة مب غريبة عليه : حـارب ؟!
×
×
×
هالهمسة ودته لماضي بعيد ..
بعيد وايد ..
ماضي عاش فيه شبه سعيد ..
لا هموم اخو عصبي ويكرهه الكل ..
ولا هموم الحياة كانت تمليه ..
لين ما يـا اليوم اللي ............
×
×
×
حـارب برجفة : امـايه ؟
دمعت عين ام حارب وهي تتقرب منه : يا عيون امايه .. يا عيوووون امايه ..
ومشت صوبه بخطوات سريعة ..
كانت حاسة ان كل خطوة تمشيها صوبه تمر ببطء،
وما صدقت لين ما وصلت له ..
انهالت عليه وحضنته بقوة مب طبيعية ..
قوة ما تدري من وين يتها ..
قوة الأم ..
قوة الحب ..
قوة رابط عجيب وغريب بين أم .. وولدها ..
رابط خلقه الله ومحد يدري به إلا أصحاب الرابطة روحهم ..
حضنته وهي تصيح بصوت مسموع ..
تصيح بصوت متألم ..
كأنه فاهمنها ..
وكمل السيمفونية الحزينة انه يحضنها ..
حضنها بقوة ...
وظهر صوته وهو يصيح ...
بصوت قوي مهزوز يلس يردد : امااااااااااااااايـــه ....
وكانت تحضنه بقوة أكبر ..
وهو يصارخ اكثر ويصيح : وين سرتي ؟؟ وييييييين ودرتيني ويييييين ؟؟
وهي تصيح بصوت مسموع ..
ما كان في لقاء أبشع من هاللقاء ..
بعد ما تصور ان لقاءه بأمه بيكون بحميمية أكبر ..
غرس نفسه فيها بالغصب ..
لانه مب قادر يتخيل انه فارجها في يوم ..
هاي أمه يا ناس ..
لو شو سوت تراها أمـه ..
×
×
×
وبعد دقايق من الهدوء ...
حارب والصوت المهزوز لازال موجود : وين سرتي ؟
ام حارب وهي تحاول تمسح آخر بقايا دموعها : تزوجت .. (طالعته باهتمام) شو هالحرق اللي فـ جسمك وويهك ؟؟
حارب : حادث بسيط ..خلنا في الاهم ..
ام حارب تقاطعه : سعيد اللي حرقك صح ؟؟
حارب بتهرب : لا مب سعيد .. بس يا امايه .. ليش ما سألتي عنا ؟؟ ليش ما تذكرتينا ؟
ام حارب بألم : ما كنت اقدر اييكم .. ريلي ما يرضى ..
حارب بضيج : ومنو هاللي تزوجتيه ؟
ام حارب : مطـر .. ربيع أبوك ...
حارب بتفكير : مطر ربيع ابويه ؟ (شهق بصدمة) مـطر ؟؟؟؟؟؟
ام حارب هزت راسها بإيجاب : مطر اللي قبل لا يتوفى ابوك وهو حاط عينه عليه ..
حارب بقهر : ما توقعته يخون العشرة ويتزوج مرت ربيعه ..
ام حارب بضيج : وليش يخون ربيعه ؟ هو ما سوى شي حرام ..
حارب : صح ... ما سوى شي حرام .. بس كفاية انه حرمنا منج و....
ام حارب تنفست بقوة : انا اللي تخليت عنكم .. مطر ما يخصه ..
حارب طالعها بعدم تصديق : انتي اللي تخليتي عنـا ؟؟
ام حارب هزت راسها بإيجاب : هي .. يدتك ما كانت تبا تتخلى عن سعيد .. وانا ما اقدر اتحمل العيشة وياها.. ومطر كان حزتها فرصة ..
حارب بندم : وليش ما خذتيني انا وياج ؟
ام حارب : ما بغيت افرقكم وانتوا اخوان بالام والابو ..
حارب : وليش ما زرتينا عيل يوم ان مطر كان عادي عنده انه يربينا ؟
ام حارب : ييت مرة وحدة عقب زواجي ويا مطر.. وعند الباب طردتنا يدتك قبل ما اجوفكم .. وحلف مطر ان إذا ييت صوب هالبيت بيطلقني ...
حارب بتهكم : والحين رضى ؟
ام حارب بتأثر : مطر مات ..
حارب بذهول : مـات ؟!!!
ام حارب هزت راسها بإيجاب : هيـه .. مات ..
حارب : من متى مات ؟
ام حارب : من سنة وكم شهر ..
حارب بألم : وما فكرتي تزورينا طول هالفترة ؟
ام حارب : ظروفي كانت عصيبة يا حارب .. انته تدري ان مطر كان متزوج قبل ..
حارب : وشو سوت لج ؟
ام حارب : رفعت قضية عليه وطول هاييج الفترة ونحن نراكض في المحاكم عشان حقوقنا ..
حارب : نحن ؟؟ منو انتوا !!
ام حارب تنفست بقوة : حارب .. انته عندك اخت اسمها ميثـا ..
حارب بصدمة : شووووووووه !!!
ام حارب : هيـه .. اختك امسات مكملة 18 سنة ..
حارب بذهول : اختي اصغر عني بـ 10 سنين !!!!!!!
ام حارب بحزن : هيه .. كان عندك اخو اسمه حمدان .. بس مات ويا ابوه في حادث ..
حارب بتأثر : الله يرحمهم...
ام حارب باندفاع : حارب .... اذا مت .. بتراعي اختك ؟؟
حارب تفاجئ : بسم الله عليج الله يطول بعمرج ..
ام حارب : تراها مالها غيركم .. انا ما عندي اهل .. وابوها هله كلهم متبرين منها وواقفين في صف حرمته الاولية .. انا كلمتها عنك وعن سعيد .. وكانت بتي ويايه .. بس انا قلتلها تتريى لين ما اجوفكم روحي .. ومع اني كنت متوقعة اني ما بحصلكم ..
توقعت انكم هجيتوا ولا سرتوا مكان ثاني ..
بس تفاجأت ان بعدكم في نفس البيت اللي شهدت فيه كل انواع الظلم ..
وطردني سعيد شر طردة ..
سعيد اللي يدتك غزت عقله بأفكارها ..
هز حارب راسه : لا لا يا اميه .. محد غزى عقل سعيد .. يدو توفت وسعيد صغير.. توفت عقب كم سنة بس من سرتي انتي وما لحقت تأثر عليه .. بس سعيد لان الحب والمشاعر الحلوة ما جافها وهو صغير حصلتيه جاسي جدامج ..
ام حارب بصدمة : بعد تدافع عنه ؟؟ انا متأكدة انه هو اللي حرقك ..
حارب : امايه انا احترقت وانا في نوبة حراسة في الدوام ..
ام حارب دمعت عينها : وليش ما تعالجت؟ ..
حارب : العلاج يكلف .. وانا ما عندي ..
ام حارب انهارت دموعها : وكيف كنتوا عايشين طول هالسنين ؟

حارب بضيج : بمعاش التقاعد .. بالزور يكفيني انا وسعيد ..
ام حارب بضيج : وسعيد ما يشتغل بعد ؟
حارب بنفي : لا ما يشتغل .. يالله يالله وبالغصب تخرج من الثنوية العامة ..
ام حارب بسخط : ما منه فايدة مول يعني ..
حارب : امايه سعيد اذكى عني وعنج ..وكان مبين عليه انه ذكي من زمان بس المشكلة ان الظروف خلته يستوي جي..
ام حارب : انته ما سمعته وهو يرمسني شرات البهيمة ولا جني امه ..
حارب : ما عليه يا امايه .. تراه عانى وايد ..
ام حارب : المفروض انته اللي تستوغد مب هو ..
حارب بهدوء : يا امايه انا اعرفج .. بس هو لا .. ما ينلام بعد .. امه وتخلت عنه وهو صغير.. شو معناته ؟ يحبها ؟؟
سكت ام حارب ..
بالأحرى ما لقت أي جواب مقنع يمكن يسكت حارب .
تنهدت بقوة ...
ومن بعدها تكلمت ببطء : بس لازم اتون وتسكنون عندي ..
حارب : ونودر هالبيت ؟
ام حارب باستنكار : اي بيت بذمتك هاللي ترمس عنه قول خرابة مب بيت !!
حارب : هالخرابة هي المكان الوحيد اللي حسينا فيه بالأمان ..
ام حارب : وما تبا الأمان ويا امك يعني ؟
حارب هز راسه بنفي : ما اقصد جيه يا امايه .. بس لازم افكر شويه قبل ما اقرر ..
ام حارب : وطبعاً اخوك ما بيصدق انه يظهر من هالبيت ..
حارب : ما اتوقع ..بس بعد خبريه ..
ام حارب : انته خبره ..
حارب : تضاربت وياه .. وماظني بيي مرة ثانية حتى ..
ام حارب : وليش تضاربتوا ؟
حارب : سالفة سخيفة بس كبرناها ..
ام حارب تنهدت : مب مشتهية اجوف ويهه ..
حارب : بس هو ولدج بعد ..
ام حارب : ما احس انه ولدي ..
حارب طالعها بمفاجأة ...
ام حارب تحاول تغير السالفة : ما اقصد انه مب ولدي..هو ولدي وأحس بهالشي.. بس يمكن على المعاملة اللي عاملني بها كرهته .. انزين متى بيظهرونك انته ؟
حارب وجنه تذكر شي كان ناسنه : والله مادري حتى ما سألتهم ..
ام حارب : خلاص انا سايرة الحين أسأل الدكتور ..
×
×
×
ردت امه بعد ربع ساعة تقريباً ..
حارب : ها شو قالوا لج ؟؟
ام حارب : يقول الدكتور ان عادي تطلع الحين .. بس بيي بيفحصك قبل ما يوقع ع الورقة ..
هز راسه حارب بإيجاب ..
ما علق ع الموضوع أبداً ..
يحس ان الموضوع ما يعنيه وايد بقدر ما يعني سعيد ..
سعيد ...؟
هالأخ الغريب اللي على كثر قسوته يحس ان الحياة بدونه ما تسوى ..
ما قدر يعترف له بكثر غلاته يوم جافه اليوم ..
حتى انه حاول يدعي العصبية جدامه بس عشان ما ياخذ سعيد مقلب في عمره ..
حميد روحه قال ان سعيد تغير من هو طاااح ..
وها ما يعني الا شي واحد ..
ان سعيد يعزه .. ويعزه بشكل كبير ...
ما يدري كيف بيتواجهون اليوم بعد ضرابتهم ..
الله يستر منك يا سعيد ومن عصبيتك ..
|[ انتهت الحلقة الثامنة ]|

|[ الحلقة التاسعة ]|
عند باب البيت ..
ام حارب وهي تطالع ولدها الغالي بشفقة : حارب لازم تتعالج من هالحروق اللي على ويهك ؟
ابتسم حارب بحزن : لايعة جبدج من ويهي ؟
ام حارب شهقت : انا تلوع جبدي من ولدي؟؟ ليش جي تقول ؟؟ اباك تعرس وتاخذ لك شيخة البنات ..و......
حارب بمقاطعة : امايه لا تستعيلين .. لين هالوقت انا راضي بشكلي ..
ام حارب صخت : كيفك ...
حارب تنفس : ما بتنزلين ؟
ام حارب : لا بنزل .. بس لحظة هاييل اللي واقفين ورا السيارة منو ؟
صد حارب يجوف : اوووه .. هاييل حميد وربيع .. من الربع ..
×
×
×
ظهروا من السيارة وشهق حميد بقوة : حـــــاااااارب .. الحمدلله ع السلاااااااامة ..
وسار ربيع وحميد بسرعة صوبه ..
يلسوا يسلمون عليه ..
ولاحظ ان كذا شخص من الفريج يا يسلم عليه ..
استانس ..
مع انه كان يتحسب نفسه مهمش قبل ..
بس لين الحين الناس تحبه ..
ضحك ع جملة واحد من الشباب : ياخي لا تتغلى والله افتقدنا اليلسة وياك ..
ابتسم له وما رد ..
ومع مرور الوقت انسحب بهدوء منهم ووراه حميد ..
همس له حميد : حـارب ؟
حارب صد له : خير ؟
حميد : منوه الحرمة ؟
حارب استغرب : اي وحدة ؟
حميد : اللي كانت تسوق السيارة .. هاي نفسها سعيد كان وياها اليوم ..
حارب استغرب اكثر: سعيد ؟؟
حميد : لا تقول لي حرمته ؟
ضحك حارب بقوة : ههههههههههههههه .. لا هاي امايه ..

حميد فج حلجه : امـك ؟
حارب ابتسم : هي .. يلا اسمح لي والله تعبااان ..
حميد شق الحلج : مسموووح !!
×
×
×
صك باب البيت ..
ووصل له الصوت العالي : لا حول ولا قوة الا بالله ... وبعدين يعني ؟!!!!
على طول مشى صوب الصوت ..
وجاف سعيد وامه ..
مجابلين بعض وكل واحد يطالع الثاني بتحدي ..
ابتسم لسعيد : شحالك سعيد ؟
سعيد طالعه بحدة : كملت بعد ؟؟ شو ياي تكمل ضرابتك هني ؟
حارب : سعيد مب جيه يتفاهمون الناس ..
سعيد بعصبية : الناس والناس .. جيه انته تعد عمرك من الناس .. ؟؟
حارب غيظ : ليش جايفني بهيمة جدامك ؟
سعيد باستخفاف : بالذمة منو يعرفك من الناس !!!
ام حارب يودت حارب عشان ما يتجرب من سعيد ويضربه : حـارب !!! اهدى شوي (طالعت سعيد بحدة) من شوي كل الفريج كانوا متيمعين حواليه يتحمدون له بالسلامة ..
طالعها سعيد باستخفاف وعدم تصديق ..
بس حارب كانت نظرته اقوى يوم قال : خل ضرايبك وشخصية الجلاب اللي فيك تنفعك ..
ومشى عن سعيد وأمه واتجه لحجرته ..
يا سعيد بيطوف صوب أمه عشان يتضارب ويا حارب بس زخته بعنف وصارخت : سعيـــد !!!
سعيد بعصبية : هديني ..
طالعت حارب اللي وصل حجرته وقفل الباب وهدته : انته مينون ؟؟
سعيد بعد ما تنرفز ان حارب غاب عن عينه : هي مينون .. ارتحتي ؟؟
ام حارب بحدة : تعال ايلس هني .. (وأشرت ع القنفة) ..
سعيد : مب فاضي بسير ..
ام حارب بأمر : بتيلس غصبن عنك .. يـلا !!
سعيد انصاع لها ويلس وبتذمر : شو ؟؟
ام حارب بحدة : ارمس عدل ويايه تراني امك وتحصل ذنب ان سبيتني ولا رمستني جي ..
سعيد وهو يتحرطم : الله والأم ..
ام حارب بمقاطعة : اسكت احسن لك ..!!!
سعيد بعصبية : انزين سكت .. استغفر الله !!! شو تبين يلا فكيني ..
ام حارب بهدوء : ريلي مات ...
سعيد بمقاطعة : وانتي كل ريل تتزوجينه يموت ؟
ام حارب عصبت : شو قصدك ؟
سعيد خف الغيظ عنه يوم جافها مغيظة : كملي كملي ..
ام حارب بحدة : ريلي مات وما تم لي فهالدنيا غيرك انته وحارب واخت لكم مني انا بس ..
سعيد باستغراب : اخت ؟؟
ام حارب: هي .. اسمها ميثا ..
سعيد ونسى شخصيته تقريباً : كم عمرها ؟
ام حارب وهي مستغربة من تغيره بس كملت كلامها : 18 سنة.. وابوها متوفي ما كمل له سنتين .. (تحاول تستعطفه) وانا كلمتها عنكم قبل فترة واستانست ان عندها اخوان .. و....
سعيد بمقاطعة : لحظة ... وهي وينها الحين ؟
ام حارب : في البيت ..
سعيد : روحها ؟!!
ام حارب : هي روحها ..
سعيد بحدة : المفروض ما تتم بروحها وهي فهالسن ..
ام حارب طالعته بتوتر جنه قاضي جدامها : عشان جي انا اقول لو اتي انته وحارب وتسكنون ويايه و....
سعيد بردة فعل عكسية للي توقعتها : وحارب رضى ؟
ام حارب : هي رضى .. بس قال بيفكر شوي و...
سعيد هز جتفه بلا مبالاة : اوكي انا موافق اسير هالبيت و...
ام حارب نشت من مكانها وركضت صوب حجرة حارب ودقتها وهي تردد : حارب اظهر .. سعيد طاع ان يسير البيت اليديد..
×
×
×
دقيقة وظهر حارب من الحجرة بعدم تصديق : بتسير ويا امي ..
سعيد وهو لازال يطالع امه : هي بسير ..
ام حارب بفرحة : الحمدلله اخيراً بيلتم شملنا ..
حارب : غريبـة !!
سعيد : بس عندي شرط ..
ام حارب انجلبت ابتسامتها : شو هالشرط !!؟
سعيد وهو يأشر ع البيت حواليه : ابا هالبيت لي ..
حارب وام حارب طالعوا بعض بغموض ..
سعيد : لا تقولون طمعان .. بس انا ابا هالبيت لي.. يتسجل باسمي انا روحي ..
حارب : بس ها البيت لي انا ولك ..
سعيد : يوم ان السالفة جي خلاص انا بتم هني ..
ام حارب بتوسل : حارب شو تبابه هالبيت .. بسجل لك فيلتي كلها باسمك ..
حارب صد على سعيد وهو يحاول يفهمه ..
سعيد رفع جتوفه : لا تخاف مابا الفيلا حقي.. بس ابا هالبيت ..
ام حارب : ها حارب شو قلت ؟؟
سعيد كان يصفر ومب مهتم بالسالفة كلها ..
حارب وهو جنه فهم جزء من مخطط سعيد : اول شي اباك تحلف انك بتسير تسكن ويانا ..
سعيد ابتسم بغموض : والله ..
حارب بإحباط وكأنه ما عرف شو مخطط سعيد : والله شو ؟
سعيد : والله اني بسير وبسكن في الفيلا مالتك ..
حارب : وعد ان لو استوت اي ضرابة في البيت انك ما بترد هالبيت ؟
سعيد : ما اوعدك بس اوعدك اني ما برد هالبيت الا يوم الحاية ..
ارتاح حارب جزئياً ولو انه حاس ان في شي غريب في السالفة : خلاص اذا جي انا موافق ..
استانست ام حارب : يلا عيل شلوا ثيابكم وبنسير الحين ..
حارب وسعيد مرة وحدة : لالالالالالالالالا مب الحين ..
ام حارب زاغت : متى عيل ؟

حارب طالع سعيد ولا جنهم تضاربوا من شوي : مادري ..
سعيد : ييبي ميثا هني .. وبنجوف متى ..
ام حارب تغير ويهها : مستحيل اييبها هني..
سعيد عقد حاجبه : ليش ؟
ام حارب : هي مب متعودة ع الحياة في .....(ماعرفت شو تقول) ..
سعيد ضحك : في فريج الوصخ والعمّال والزبالة و...
ام حارب قاطعته : بس عاد سعيد ..
حارب طالع امه : امايه خلها اتي .. ان بغتنا بنيها .. وان ما تقبلت حياتنا هني بنتم ولا جنه صابنا شي...
|[]|
بعد مرور "كم" يوم ..
المخرج بهدوء : ريـم ..
ريم وهي تحاول تشل القطن الميمع في شعرها بسبة المشهد : هممم ؟
أحمد ابتسم لها : ناوية تكملين ويايه ؟؟
ريم بتلقائية : لا ..
رفعت راسها وانصدمت بويهه ..
ريم بتدارك للي تقوله : اوه لا .. اممم اقصد لا بكمل عادي ليش لا ..
احمد بشك : متأكدة انج بتكملين ويايه ؟؟
ريم تنفست برعب : هي بكمل ..حتى .... حتى اسأل سارة ..
احمد بكراهية : ابا اعرف انتي ليش مدخلة سارة غصب في حياتج ؟!!! ما تملين؟؟ ...
ريم قاطعته : بس هاي بنت خالي وانا ماقدر اتخلى عنها عشان ......
احمد بمقاطعة اكبر : عرفت انها بنت خالج .. بس وجودها في كل عمل .. وانها تظهر في كل الصور ترى هالشي مب في صالحج ..
ريم بسخرية : شو قصدك ؟
احمد بمحاولة لتخويفها : يمكن تكون هي الويه اليديد في التمثيل ....SOON ..!!
ضحكت ريم بقوة : هههههههههههههههههههه ..... سارة .. ممثلة ؟؟؟ ههههههههههه لا بليييييز ..
سمعت صوت من وراها : وليش ما أكون ممثلة ؟؟؟
×
×
×
صدت ريم ع سارة اللي كانت وراها وتكلمت من شوي ..
تلاشت ابتسامتها تماماً وحلت محلها نظرة استغراب ممزوجة باستنكار ..
ما تكلمت وايد لانها ما تبا اي touch يستوي بينها وبين سارة جدام احمد ..
رفع احمد ايديه باستسلام : انا ظاهر ... تفاهموا بسرعة بس لا تطولون .. ورانا جلسة تصوير ..
×
×
×
لاحظت ان سارة فاصخة شيلتها .. ومتعدلة ..
تكلمت باستنكار : صج انج بتستوين ممثلة ؟
سارة طالعتها بتحدي : وليش ما أنفع اني اكون ممثلة يعني ؟
ريم : انا ما قلت جي بس ..
سارة قاطعتها : يكون بعلمج تراني ما اهتم لضحكتج واستهزائج فيه .. التمثيل مب بس (تأشر باستخفاف عليها) شكل حلو .. ودلع مصطنع .. التمثيل فوق اللي انتي بنيتيه في حياتج ...
ريم باستغراب : انا دلعي مصطنع ؟!!!
سارة : ما ركزتي في كلامي الا على هالكلمتين ؟
ريم بعدم تصديق : سارة بلاج .. انا ما سويت بج شي ..
سارة : وضحكج عليه جني ما استاهل ..
ريم : اوكي انا الحين ضحكت .. بس مبين انج من فترة تخططين انج تكونين ممثلة ..
سارة : ها شي راجع لي انا وانتي ما يخصج ..
ريم : اوكي اوكي ما يخصني انا ما قلت شي .. بس مب انتي اللي من فترة استهزأتي فيه كوني ممثلة ؟؟
سارة : من فترة .. وهـاك اول .. والاول تحول فديتج ......
ريم ببساطة : اوكي مبروك عليج دخول هالمجال الـ ......
سارة تقاطعها : الحـلو ... ولا اللي فشلتي فيه ؟؟ !!!
ريم ولا جنها سمعتها : وبتوقعين عقد احتكار ويا أحمد ؟؟
سارة ابتسمت : absolutely noooo ... جيه مغفلة انا مثلج ؟!!!
ريم تضايجت : سارة ليش تكلميني جي ؟
سارة هزت جتوفها : لين الحين انتي قاهرتني ع ضحكتج من شوي ..
ريم شهقت : سارة انا ما ضحكت ان مستحيل تكونين ممثلة .. بس كنت اتحرى ان مستحيل تخبرين احمد قبلي لان نحن ما نخش شي عن بعض ..
سارة قاطعتها : ما نخش شي ؟؟ وعلاقتج بحارب الغبي اللي ردت حتى بدون لا تخبريني ؟؟؟ وكلامج عني جدامه جني حشرة .. ريم انا احب التمثيل وبفلح فيه اكثر عنج .. والوقت اللي قلت لج فيه ان التمثيل ما يصلح لي كنت متشتته فيه واكتشفت اني اكثر وحدة للتمثيل ....و.... لا تجادلين ..
نشت ريم من مكانها : اوكي اوكي .. حبي التمثيل .. الله يوفقج وترتاحين في هالمجال ... وانا مب شالة شي في خاطري ..
سارة : قصورج بعد تشلين .. متحملتنج كل هالسنين .. بعد لج ويه تشلين شي فـ خاطرج ؟!! هـه ...
×
×
×
مع ان عندها جلسة تصوير الحين ..
بس شردت منه وعلى طول اتصلت في الدريول اييها ...
لأنهـا ........
جبانة دايماً فهالمواقف ...
قهرتها سارة بشكل فظيع ....
معناته حتى سارة ابتعدت عنها ....
تنهدت ...
حـارب ..
محد غير حارب بيسمعني ...
هو الوحيد اللي يسمعني بدون ما يقاطعني .....
هو الوحيد اللي ما ادور منه الحلول ..
بس اباه يسمع ..
يسمع وبس ............
×
×
×
المتصل : روحـي ...
كان حـارب الوهمي "سعيد" ..
ردت بشغف : توك ع بالي ..
سعيد : امبين ع بالج .. امبييييين !!!
ريم ضحكت : ههههههههه فديتك والله كنت ع بالي ..
سعيد : انزين بشو كنتي تفكرين ..
ريم : آااااه ..... خلها على الله ... (بفضول) آمر بغيت شي ؟
سعيد : مممم ماشي والله .. بس قلت بخبرج اني اليوم بجوف اختي ... ميثـا .. بتي بيتنا ..
ريم شهقت : بتجوفها بتجوفها خلاص ؟؟
سعيد : هي .. حارب اخويـ.........................................(ماتت الكلمات عنده) ...
ريم : حارب اخوك ؟؟ (باستغراب) كيف حارب اخوك وكيف ......
سعيد تدارك الموقف بسرعة : كله من سعيد اخويه .. هو اللي خربط مخي ..
ريم ابتسمت وهي ناسية جزئياً كل اللي ياها من سارة : هههههههههههه حياتي بسألك .. ليش قبل ما كنت تكلمني عنك ولا عن أهلك .. والحين ....
سعيد بسرعة : متضايجة اني اخبرج عنهم ؟
ريم : لالالالالا بالعكس والله .. كنت قبل احس اني الوحيدة اللي مالي اهل .. بس الحين دامه حبيبي يعيش شراتي فأنا راضية .. نحس ببعض ... و .... (تغير صوتها) حـارب تقدر تسويلي خدمة ؟
سعيد : خير ؟
ريم بوزت : اليوم بركب ويا الدريول روحي .. وانا أخاف منه .. ممكن ؟؟
سعيد فهم عليها : عطيه الموبايل وانا بتفاهم وياه ..
ريم : انزين .......
×
×
×
بعد دقايق زخت الموبايل وهي تضحك بهمس : ههههه شو قلت له تراه ميت من الزياغ ...
سعيد : قلت له اللي قلته .. ليش سارة مب وياج ؟
ريم بنرفزة : تبا تستوي ممثلة وقررت فجأة انها تتخلى عني وتتهمني بالفاشلة واللي دلعي مصطنع و ..... اففففف مابا اتذكر ..
سعيد بهدوء : وانتي راضية انها تستوي جي ؟

السلام عليكم ..

مرحبا أختي الغالية Emomsa

أهنيك على اختياراتك الموفقة بالنقل

وبصراحة هذي القصة شدتني وأنا ألفلف عالقصص

الأسلوووب قمة في السلاسة والانسياب .. ورسم الشخصيات بسيط وواضح وبنفس الوقت متقن ..

بصراحة الكاتبة مبدعة في الأسلوب .. بس في شي احس اني مستعجلة ابي اقوله وعشان كذا رديت مع إني مو متابعة للقصة حالياً ..
تدرين ؟؟ من أول اربعة أجزاء وأنا فهمت وش بيصير بالقصة كلها ...

مو ذكاء زايد بس الكاتبة بالرغم من أسلوبها المتقن والممتااااز إلا إنها مقتبسة معظم الفكرة من مسلسل مشهووور كوري اسمه A love To Kill ..

لما فكرت فيها بصراحة لقيت إنه عادي لو تاخذ فكرة وتحولها لمجتمع عربي .. يعني اصلا الموضوع مش سهل .. وهي باين إنها كاتبة متمرسة وعارفة وش تكتب بالظبط .. وطبعا في اختلاف شوي من جهة الشخصياات الثانية ... غير كذا أهنيها على اختيارها لأسماء الشخصيات مرررة لايقة .. وإن شاء الله إني برجع أتابع معها هنيي لأني متأكدة قصتها راح تكون غير شكل وكلها أكشن ..

شكراً غاليتي لنقلك للقصة المختلفة ... تحيييتي لك
و تقبلي فائق ودي واحترامي ...
في حفظ الرحمن