|[ الحلقة الثانية ]|

في قسم الطواري كان يالس ويهز ريوله بعصبية،
شو سالفة هالعاشق الغبي ؟؟
ليكون صج يحبها وحبها مخلنه أعمى !!
بعد ساعات من الانتظار ياه الدكتور : لا حول ولا قوة الا بالله ..
سعيد طالع الدكتور بصدمة : مـات ؟؟
×
×
×
مشاعر متخبطة اللي حس فيها خاصة بعد ما حس ان اخوه راح عنه ..
حس بهزة ورجفة تسري فيه ..
سببها مجهول ..
لكنها واقعية وآثارها شبه دايمـة ..
تذكر واقع طفولته،
بدون أبـو .. أبوه مات عقب ولادته بسنين قليلة ..
وأمه اللي سارت وتزوجت واحد غريب ..
وهالغريب اللي رفض عيالها ففضلت تعيش وياه عن العيش مع عيالها ..
منو ربـاهم ؟؟
حارب كان شبه الأبـو مع مساعدات يدته أم أبوه من حين لآخر ..
وراحت اليدة ..
وراحوا الأهـل ..
وكبروا الاثنين ..
حارب كان أمـه وأبـوه وأخـوه وإختـه وكل شي ..
حارب كان يمثل مصدر العزوة في كل شي ..
كان دايماً يفتخر فيه أيام دراسته انه احسن عيال الفريج ..
حارب كان الأساس واللي عقبه ولا شي ..
أنيق وشهم ووسيم وخلوق وطموح ..
كانت الحلقة المبهمة في مخه هو عدم تفكيره بالزواج ...
عمره ما طرى حارب انه يفكر يتزوج ..
حتى يوم سعيد يقول له يوم بتتزوج انا بطلع عنك ..
لكن حارب يضحك ويقول بعدني .. قريب ..
لكن ما كانت في علامات موليـه ..
يوم كان سعيد ينسجن بسبة عنفه على عيال الناس ..
كان حارب يكفله ويطلعه ..
عمره ما هزبه ولا قال له شي..
وهالشي اللي كبر راس سعيد وخلاه يظن نفسه هو القوي ..
واللي حواليه .......... ولا شي !!
×
×
×
الدكتور : لا ياخي وين راحت افكارك .. اخوك دخل في غيبوبة ....
سعيد باستغراب : شو يعني ؟
الدكتور : يعني كل شي بقدرة الله .. واضح ان العملية مش بس مجرد حادث شكلها انتحار أو محاولة قتل ..
سعيد : يعني منو بيجتله ؟؟ اصلاً منو بيدخل هالخرابة ؟
الدكتور : عيل شكلها حالة انتحار !! ادعي له الله يعافيه ..
سعيد بعصبية : الله لا يعافيه ...
وفر الكرسي بغيظ ومشى ولا جنه عنده اخو ..
نسى أخوته في لحظة ومشى بقهر ..
كان والع ومعصب ومتنرفز من الخاطر ..
ظهر من المستشفى وخذ له ببسي ع الماشي ويلس يمشي في الدرب لين ما يحصل له تاكسي..
ما عنده سيـارة ..
آخر سيارة خذها حارب له دمّرها ودعم فيها واحد رفع له ضغطه في الشارع ..
عصب انه سيارة التاكسي ما وقفت له على طول ..
وبعد كم سيارة وقّف له واحد ..
ركبها وكمل شرب الببسي وهو مقهور ..
أفكاره كانت توديه واتيبه ..
اللي يجوفه يقول مستحيل هذا انسان عادي ..
اكيد شارب شي ..
نزل من السيارة وأشّر له راعي التاكسي : بابا وين فلوس ؟؟
طالعه سعيد باحتقار : تبا فلوس ؟؟
راعي التاكسي بعصبية : شنو هادا يركب تاكسي مافي فلوس ؟
سعيد زخ قوطي البيبسي وشربه بكبره ورد ظهره في ويه التاكسي ..
وفر عليه الغطا : هـاك هاي فلوسك يا الـ .........
راعي التاكسي عطاها شردة ومن الغيظ بعد ما ابتعد عن المكان هرّن بقوة ..
سعيد بصراخ : يعله الحرق ان شـا الله ..
مشى لين ما دخل الفريج ..
كان منظره بين شباب الفريج لو انه انسان عادي ما كان بيستدعي إلا الشفقة والاستهزاء ..
قوته اللي استمدها من جرأته وعصبيته كانت أكبر سبب يخلي كل الفريج يهابونه ..
معظم شباب الفريج ان ما حصلوا ضربة منه لازم مني مناك متلاسنين وياه وناوي لهم ..
جاف اثنينه ملقبنهم في الويه "الاصلع والأهبل" حميد وربيّع ..
كانوا يستهبلون عليه في محاولة لاستفزازه من بلكونة بيت واحد منهم ..
ما عطاهم ويه وكمل مشيه ..
حميد معلي صوته : وييييه حريموووه شكله زاااااغ ..
سعيد كان مفوّل already من موضوع حارب ..
جان يشل حصـا عودة وعلى طول يصد صوب حميد وربيّع ويفرهم بهـا ..
ما همّـه منو انفلع منهم دامه سمع صرخة قوية تبين ان واحد منهم انضرب ..
ومشى صوب البيت ..
كان يردد في ذاته : انا سعيد مب حارب اللي تتشمتون فيه ويضحك لكم !! ..
×

داخل حجرة حارب على طول بدون أي مجال ..
يبا يعرف شو سالفة انتحار حارب الاهبل هذا ؟؟
انتبه لكمبيوتره وضحك وسط غيظه : عايش فهالخرابة وعنده كمبيوتر !!!
ما عرف للكمبيوتر وكيف يفتحه ..
تقريبـاً هو ميـح في الكمبيوتر وجاهل بهالسوالف ..
ودّر الكمبيوتر وسار صوب كبت أخوه ..
الحجرة أصلاً صندقة ..
اول ما تدخلونها تحصلون الكمبيوتر على يمينكم موجود فيها مكتبة صغيرة تحتها كمن كتاب وبدون كرسي..
عقب المكتبة شبريته اللي ماخذة كل مساحة اليمين ..
عقب فراغ صغير جداً عشان يعطي مجال ان الكبت ينفتح ..
وعقب الكبت مساحة فاااضية اذا انفتح باب الحجرة كامل بيغطي المساحة ..
المساحة الفاضية كانت كلها صور الممثلة ريم اللي يسميها سعيد "ويه النحس" ..
يا بيطر الصور بس في لحظة غيّر رايه ..
يمكن يرد أخوه واكيد بيتضايج ان جاف الصور انشلت ..
رد للكبت اللي فتحه من شوي ..
كان الكبت عبارة عن 4 رفوف وسدّة .. والقسم الثاني للملابس المعلقة ..
الرف اللي فوق مافيه الا غترتين وعقال وبرواز فيه صورة سعيد وحارب وهم صغار ..
الرف الثاني كان فيه كم قحفية ع كم فانيلة ع كم وزار ..
الرف الثالث فيه كتاب صغير ..
والأخير فيه نعالين شكلهم يداد ومن الزين وما لبسهم ..
قسم الملابس المعلقة ما فيه الا 3 كنادير وبدلة رسمية وبدلة الجيش ...
كان الكتاب الصغير واللي شكله مليان خرابيط هو اللي لافت انتباهه ..
فتحـه ويلس يقرى اللي فيه ..
|[]|
ريمووووو نشي يلا عاد ..
بملل : سارووو ذلفي عن ويهي والله مدوخة..
سارة : أحمد "المخرج" حرق تليفونج وتوني رديت يقول تأخرتوا كالعادة ..
ريم : قوليله تعبانة اي شي والله مالي بارض ..
سارة : هي انتي رقدي ووهقيني وياج ..
ريم : عيل شو خانتج يوم انج اختي و.....
سارة قاطعتها : جب انزين .. ما عندها الا هالرمسة .. اختي واختي .. لو اختها صج مادري شو بتسوي ..
ريم : بنت خالي يعني شرات اختي ...
سارة : اوفففففف الله يعينني على حشرته اليوم ...
×
×
×
على الحشرة اللي سوتها لها سارة ..
نشت من رقادها ..
هي طبعها اذا حد خرب رقادها مستحيل ترقد مرة ثانية ..
نزلت تحت تدور لها شي تاكله ..
لقت أبوها يالس ويقرى المجلة ..
ركضت صوبه وهي مستانسة انه قام ييلس وياهم ..
ابتسمت وهي تحب راسه : شحالك ابويه ؟
ابتسم لها وأشر لها انه زين ...
×
×
×
أبو ريم يعاني من شلل في ريوله من حادث استوابه من اكثر من 10 سنين ..
كانوا سايرين العمرة كلهم هو وأم ريم وخواتها واخوانها ..
بس ريم وسارة اللي ما ودوهم لانهم كانوا صغار وايد ..
وكان ابو ريم هو اللي يسوق الباص ..
وكتب الله انهم يندعمون في الدرب ..
والوحيد اللي نجا هو أبو ريم ..
اللي جافهم كلهم داخل السيارة يعاصرون الموت ..
جافهم وهم يحاولون يستنجدون ..
وكيف كل الآمال حواليه انقطعت في انقاذهم ..
ومن بعد ما ماتوا كلهم حواليه ..
وعلى تقرير الأطباء النزيف اللي نزفه من الحادث سوى له شلل في ريوله ..
ومن الصدمة فقد حاسية الكلام وما قام يقدر يتكلم ...
على هذا حاول يعيش مع ريم وربّى سارة اللي لازال تأنيب الضمير معيشنه في ألم ..
حتى يوم بغت ريم تستوي ممثلة ما عارضها ..
ما كاان يبا يخسرها ..
ورضى باللي تباه حتى لو كان هالشي ضد مجتمع البلاد ..
ويعني بكل بساطة × انها بتم بدون حجاب × ..
×
×
×
حضنته بقوة : باباتي احبك انته تحبني ؟؟
حرك راسه بإيجاب وهو يحضنها بإيدينه ..
سارة : يااااا سلاااااااام ع الرومانسية وانا اللي كلت الهزبة ..
ريم بقلق : شو قال لج ؟؟
سارة : اونه اليوم بس وياريت اتيب لي تقرير طبي عشان ما أخصم لها ..
ريم : يولي جيه انا سايرة مدرسة .. مالت .. اففففففففف والله لوعة ..
سارة : يزاه الريال مهتم بج ..
ريم : سكتي الله يخليج هذا مهتم ؟؟ هذا يستمتع بتعذيب الخلق ..
سارة تظهر لسانها : يحبـج ..
ريم طالعتها بتأنيب خاصة انها رمست جدام ابوها : عن الحركات نحن في شغل وما يحتاي هالرمسة ..
سارة تلوّمت : عمييييه والله اتمصخر ..
ابتسم بو ريم وطالعهم بهدوء وشكله سرح في شي ثاني ..
ريم تحاول تفرفش : شو رايك ابويه نحوط في الفريج ؟؟
سارة بعدم اقتناع : ريمـو .. شو تحوطين في الفريج بعد ؟
ريم رفعت حاجب واحد : عادي شو فيها ؟؟ (مشت ويت بتدز كرسي ابوها المتحرك) ..يلا نشي ويايه ..
زخها أبوها من ايدها ويلس يأشر ع لبسها ...
ريم اعتفس ويهها : ابووويه !! مب فاهمة عليك ..
سارة : عن العبط ريمووه .. ابوج يقول غيري لبسج ..
ريم تغير ويهها : انزين عادي انا شو لابسة ؟
سارة : شكلج كـ ممثلة عيب انج تدورين في الفريج ببجامة .. افرضي حد صورج ..
كان ابوها يأشر لها انها تلبس عباة وشيلة ..
ريم بحيرة : ساروو ما عندي عبـاة انا ..
سارة : خلاص مب لازم تحوطين فهالفريج ..
ريم دزتها : حرام اكسر بخاطر ابويه .. عطيني عباتج واي شيلة عندج يلا ..
×
×
×
متبهدلة في العباة وكذا مرة كانت بتتخرطف بسبتها ..
والشيلة مع كم خطوة نزلت من راسها ..
كانت تدز أبوها وتدندن ..
سارة : تخيلي ايي أحمد الفريج ويجوفج .. بيقول هاي المريضة اللي ما تروم تتحرك ؟؟
ريم باحتقار : اقول جب .. وايد مهتمة لهالشخص انتي ...!!
سارة : مب اهتمام بس هالشخص وايد يخوّف وانتي مول مب مهتمة ..
ريم وهي تكمل مشي : ملّيت من تسلطه .. مليت من التمثيل بسبته .. خاطري أصبـح ولا أمسّي ع ويه مخرج غيره .. بس عاد كل مسلسلاتي من إخراجه ..
سارة : بس مع ذلك نجحتي وياه ..
ريم : اوكي بس اكيد بنجح اكثر ويا غيره ..
سارة : ليش يعني ؟
ريم : انا موهبة تحتاج لرعاية مب لتهزّيء ..
سارة : ما ينلام الريال انتي مول مب منظبطة في مواعيدج ..
ريم هزت جتفها : ولو .. أنا لو أتأخر يوم كامل لازم ما يقول لي شي لاني ممثلة مهمة ..
سارة باستخفاف : ريم لا تغترين بنفسج الغرور مب زين ..
ريم : مب غرور يا سارة بس انا مليت من تحكم هالانسان ...
سارة : يمكن قصده شريف ..
ريم دزتها وأشرت على ابوها وهمست لها : ابويه يتضايج من هالسوالف يلا صخي .. (طالعت أبوها وابتسمت) ابويه مستانس ؟؟
ابتسم لها ابوها بهدوء ...
×
×
×
...: ربييييع وصمخ !!
ربيّع نزل سماعة الآيبود من إذنه: ها ها بلاك انته ما تجوفني أسمع النغم الجميل أم كلثوم ..
حميد يسوي له مالت : عدال عدال .. اقص ايديه جان فاهم كلمة وحدة ..
ربيّع : فديتك انته ما تدري اني ابو المواهب السبع ؟
حميد : وععع لا تتفداني أجـزّ (تلوع جبدي) ..

ربيّع : ايه يا الأصلع ..
حميد : أصلع ولدك .. عندي شعر جوف ..
ربيّع : فيك خير افصخ الكاب وراوني شعرك ..
حميد : اوكي صح ان في النص ماشي شعر بس يكفي ان الاطراف فيها شعر .. يا الأهبل ..
ربيّع : جب جب .. شو فادك شعرك الناعم يوم انك أصلع ؟؟
حميد : اوووووه صخ انته وجوف هالثنتين ..
ربيّع : هاييل اللي يدزون الشيبة ؟
حميد : هيه .. يلا عليهم ..
ربيّع : ايه لا ما فيه هذا مب فريجنا اخاف ايي حد من هلهم ويضربنا ..
حميد زاغ : قول والله !!
ربيّع : هي يقولون هالفريج كله أقويـاء ..
حميد زخ ربيّع من ايديه : ابويه نش نش .. ما فينا ع الحشرة ..
وعطوهـا شردة محتـرمة ..
×
×
×
ريم : ابويه بلاك ؟
بو ريم كان يأشر ع البيت ..
ريم باستغراب تطالع سارة : فهمتي شو يبا ؟
سارة : يبا يرد البيت شكله طفر من ضرابتنا ..
ريم تنهدت : انزين ابويه يلا الحين رادين ..
سارة : الحمدلله يت منه .. انا هالسيرة بكبرها مب متطمنة لها ..
ريم : صخي بس الحين نحن صوب البيت وما استوابنا شي .. حشى هالوساوس مادري من وين اتيج !!! ..
|[]|
7 / 8 / 1987 م ..
ولادة أجمل قمر في هذا الكون،
ما يحتاي اقول لك منو هالقمر ..
لكن عشان أميز التاريخ لك ....... معنى اسمي "الغـزال" ...
×
×
×
"صـورة لطفلة ما يتعدى عمرها العشر سنين"
ما كنت اعرف اني بعد كم سنة بحب ..
ولا بعيش احلى قصة حب وياك ..
×
×
×
"صورة لمراهقة وواضح تغير الملامح"
لا تضحك ع الصورة ادريبه خشمي شوي عود ههههه
تدري عاد أثر المراهقة ..
اهم شي انك ما حبيتني وانا فهالعمـر ..
فهالصورة عمري 14 و 9 شهور ههههه ..
×
×
×
"صورة شخصية فنية، بينت الملامح الحقيقية"
أدري ان بعد كم سنة بفتشل من شكلي ..
بس لأن حبنا أقوى من أي شي ..
وهو كفيل بأنه يطوي كل شي ..
قررت اني أهديك كل ألبوم صوري ..
×
×
×
كان مذهول من خاطره وهو يقرى هالكلام ويجوف الصور....
تم يتـأمّل ويهها وشبّه عليها بقوة ..
مستحيل يكون غلطان لانه متأكد ..
نش من مكانه وسار صوب التلفزيون..
بطّل الـ DVD ..
رفع الصورة باتجاه صورة الممثلة ريم المنعكسة ع التلفزيون ...
تم مذهول بعد ما جاف نسخة طبق الأصـل ..
معنـاته ..
حارب كان يحب ريـم قبل وبعد ما تستوي ممثلة ؟!!!!!


|[ انتهت الحلقة الثانية ]|

شو هالزين

تسلمين حبيبتي

بس شو هالسعيد حشى ابليس.. هب امخلي حد في حاله

ولا حارب وريم ..شكلهم سالفتهم سالفه

نترياج