وهم يالسين صوب الفالـة ..
ميثا : امايه هاي لطيفة اخت راشد ربيع سعيد ..
غصت لطيفة فـ اكلها وهي تردد فـ خاطرها ... هاي شو دراها ان راشد ربيع سعيد ؟؟ ليكون هو اللي قال ؟ ..
ابتسمت ام حارب مجاملة : حياج الله .. شكلج انتي وجمانة ربع وايد ..
لطيفة ارتبكت : هي ..
جمانة حبت تخفف من ربكتها : لطيفة دوم حليلها اتي تساعدني في شغل البيت لان امايه تعبانة وما عندنا خدامة ..
ام حارب طالعت ميثا : وتقولين الشغل تعب .. جوفي هالبنات السنعات مب انتي ..
ميثا بفشيلة : اماااايه يلا عاد .. فضحتيني حشى ..
جمانة : ههههههههه .. ما تشتغلين ميثا ؟
ميثا : دام ان هاي امي (تأشر على امها) وسعيد اخويه خلني أحلم .. هههههههه ..
×
×
×
في ميلس الرياييل ..
حميد : تنصحني أدخل الأسهم يا سعيد ؟
سعيد : اذا ناوي تشتري وتخليهم فترة .. انصحك .. بس انك تتداول يومياً ما انصحك ..
حميد : انته تتداول كل يوم صح ؟
سعيد : صح .. بس ما أنصحك تسوي شراتي ..
حميد : ليش يعني ؟
سعيد : الخسارة واردة .. وانا اصلاً كنت بايعنها .. ربحت ربحت .. خسرت خلاص كان بها ..
حميد بمفاجأة : وما خسرت مول ؟
سعيد : خسرت كم مرة .. بس تلاحقت على عمري ..
حارب باستغراب : ما جد طريت انك خسرت ..!!
سعيد : لاني شرات ما قلت تلاحقت على عمري ..
حارب : وبتم ع هالحال على طول ؟
سعيد لمعت عينه بإبتسامة : لا أكيد الحال بيتغير .. تطمن ...
×
×
×
ميثا : امايه شكلها عيبتها اليلسة ويا امج ..
جمانة ابتسمت : ما عليه في نفس السن وأكيد توالموا .. خبريني انزين عنج .. انتي ما كنتي في الفريج ويا هتلـ... (تداركت الوضع) اخوانـج ..
ميثا بحسن نية : لا انا اختهم من الأم بس .. تقريباً من اقل من سنة عرفت ان عندي اخوان بعد وفاة ابويه ..
لطيفة بمفاجأة : وطول هالوقت ما كنتي تعرفين ؟
ابتسمت ميثا : لا والله ما كنت اعرف ..
مريم برزة : اكيد تحبين اخوج حارب اكثر عن سعيد ؟
انفجرت ميثا من الضحك : هههههههههه ليش يعني ؟
مريم : لان سعيد عصبي و..
جمانة تلومت وقاطعتها : شو هالرمسة مريوم ..
ميثا : لا عادي فديتج شو فيها خل ترمس .. ادريبكم حاطين في بالكم ان سعيد هو سعيد القبلي اللي ما سلم حد منه .. بس صدقيني يا مريم سعيد غير في بيته .. اصلاً انا متوالمة ويا سعيد اكثر من حارب ..
جمانة طالعتها بفشيلة : الله يخليكم لبعض ان شـا الله ..
ميثا بحب : آمين يا رب .. وما يحتاي تفتشلين والله عادي .. نحن شرات الخوات وانا حبيتكم الصراحة .. ما يحتاي تلومون مريم ..
|[]|
راشد باستغراب : وهي شحقه سايرة ؟
دلال : تساعدها في فالة الضيوف .. ما عندها أحد يساعدها ..
راشد : ومنو ياينهم ؟
دلال : والله علمي علمك .. بس شكلها عزيمة مهمة لان رفيجتها كانت مرتبكة وايد ومو عارفة تتصرف ..
راشد بتفكير : خل ترد وبعرف شو السالفة ..
×
×
×
ام راشد يتهم بعد دقايق : ويديييه لطوف ما يت لين الحين ؟
راشد ودلال : لا لين الحين ..
ام راشد بعصبية : استوت ثمان الفليل .. هاي شو سايرة تسوي ؟
راشد : خلاص نتريا نص ساعة وان ما يت بسير بييبها روحي ..
ام راشد بتوتر : اموت واعرف منو هاللي ياينهم ..
طالعها راشد بغباء : هـا ؟!!
ام راشد : ما جفت صوب بيتهم السيايير الموقفة .. هاي هي السيايير ولا بلاش .. ؟؟
ضحكت دلال : يمكن قرايبهم ؟
ام راشد : لا لا .. هم ما عندهم اهل جراب .. اهل امهم في بلادهم .. واهل ابوهم متبرين منهم واولهم عمهم اللي عطاهم البيت وهج ..
راشد : يعني انتي تبين لطوف ترد عشان تعرفين منوو ..
ام راشد بفشيلة : هي شو فيها .. بجوف منو .. مب عيب ولا حرام ..
راشد : ههههههههههههههه ..
×
×
×
مع مرور الوقت ..
لطيفة بابتسامة : السلاااام عليكم يا اهل الداااااااار ..
الكل : عليكم السلاام والرحمة ..
ام راشد : وينج من الصبح سايرة عندهم ..
لطيفة بوزت : انا سرت الساعة 6 وضيوفهم بعد دقايق يوهم على طول .. اترييت لين ما يسيرون وييت ..
راشد يطالع الساعة : ولو بس مرة ثانية لا تتأخرين جي ..
لطيفة : ان شـا الله ..
ام راشد : منو ياينهم ؟
لطيفة : يايين يزورون ام جمانة ويتحمدون لها بالسلامة ..
ام راشد : انزين منو هاييل مالهم أسامي ؟
لطيفة : ههههههههههههه .. تحيدين سعيد اللي كان في فريجنا ؟
راشد دش في السالفة : سعيد سعيد ما غيره ؟؟

لطيفة هزت راسها بإيجاب : هي .. هو وامه واخوه واخته كانوا يايين عندهم ..
راشد بتعجب : غرييييبة .. حميد .. وسعيد توالموا ؟
لطيفة : والله مادري .. بس هذا اللي استوى ..
راشد : انزين .. بس الزيارة وايد غريبة ..!!
لطيفة : بصراحة هي .. بس انا حاسة انهم ناوين يخطبون جمانة ..
دلال ابتسمت : والله ؟؟ وشلون عرفتي ؟
لطيفة : مادري حسيت .. لان امه كانت تراقبها وتطالعها وتجوف كيف تسوي .. حتى اخته كانت نفس الشي تراقبها وايد ..
دلال : ان شـا الله خير ..
ام راشد : وانتي ما حطت عينها عليج ؟؟
راشد : هههههههههه الله يررررحم زمااان اول يوم تقولين لي لا ترابع سعيد .. والحين تبينه يخطبها ؟
لطيفة بإحراج : ايه ع كيفكم .. لا خطبني ولا شي بلا حركات بايخة ..
دلال : ههههههههه حرام احرجتوها ..
راشد : عادي عادي ان شا الله بييها نصيبها .. لا تحاتين بتعرسين ان شا الله ..
|[]|
في شقة ريم ..
فاطمة : يا حبيبتي والله ما يستوي اللي تسوينه بعمرج .. جوفي كيف ويهج استوى .. والله والله انه مب حلو ..
ريم : مالي نفس آكل والله مالي نفس ..
فاطمة : اجبري نفسج وشوي شوي بتاكلين .. انتي من كم يوم ما كلتي شي .. الا مطيحتلي فهالكاكاو ... يوم بييج السكر بترتاحين ..
ريم : خله اييني واموت وافتك ..
دمعت عين فاطمة : واهون عليج تخليني فهالدنيا بدون ربيعة ..
حضنتها ريم وهي تصيح : والله فطيم بدونج ما كنت اعرف شو بسوي .. والله ..!!
فاطمة بحنية : فديتج يلا عيل تعالي كلي بلا دلع بنات ..
طالعتها ريم وتنهدت : ان شـا الله ..
×
×
×
فاطمة : يلا اسمحيلي بخليج الحين .. جوفي هالصينية اللي في المطبخ فيها معكرونة مسوتنها لج .. كليها ع العشا.. هالكم فطيرة ما بيشبعونج انزين ؟؟
هزت ريم راسها بإيجاب : ان شـا الله .. مشكورة فطيم والله ان محد يسواج ..
فاطمة بكوميدية : أدري ههههه .. يلا جـااااو ..
×
×
×
سكرت باب الشقة بضيج ...
مالها خلق تسوي شي ..
روحها كارهة حياتها ومالها بارض تسوي اي شي ..
خلاص تعبت من هالدنيا ..
ياما فكرت في الانتحار بس تحس ان في شي ميودنها ..
شي مب عارفتله ..
بس يمكن هو خوفها من الله ..
الخوف اللي ما انوجد الا بعد ما انقطعت عن التمثيل نهائياً ....
×
×
×
اندق جرس الباب وابتسمت ريم براحة ..
فتحت الباب : اكيد تبين تشلين المعكـ................................(ضاع الكلام) ..
............... : مستغربـة اني هني ؟؟ تتحسبين اذا شردتي من العالم بترومين تشردين عني ؟!!
|[ انتهت الحلقة السابعة عشر ]|

|[ الحلقة الثامنة عشر ]|
-|[ الحب / لا يقتل أحد إنما يعلقه بين الحياة والموت ]|-
طالعتها وهي مب مصدقة !! ...
وما قدرت إلا تنطق هالجملة : كيف ... عـ ...رفـ ... تـي .. انـ...ـي ... هنـ ...ـي ..!!!
طالعتها سارة بكره : لو شو يستوي بيننا بس ما توقعت انج تبيعين البيت وتنخشين عني .. انا بنت خالج ولا نسيتي ؟؟
تنفست ريم بقوة : لا ما نسيت .. بس انتي فضلتي أحمد علي .. وانا مستحيل ارضى بوجوده في حياتي ..
سارة دزتها بهدوء بعد ما دخلت : والله انج غبية .. طوفي طوفي .. حتى اصول الضيافة ما تعرفينها ..
ما قدرت ريم تقول لها شي ..
قلبها كان يدق بقوة ..
صح كانت متوترة ..
بس في قلبها ابتسامة خفية فرحانة بردة سارة ...
×
×
×
منو هاي اللي ظهرت من شقتج من شوي ؟
ريم ردت لبرودها : وهذا بشو يخصج ؟
سارة رفعت حاجبها : بنت عمتي وابا اتطمن منو ترابع ؟؟
ريم : تطمني خايفة ربها وحتى ما كانت بتعرف اني كنت ممثلة لو اني مب مخبرتنها ..
سارة بشك : معقولة ؟
ريم : لا أجذب عليج ..
سارة تنهدت : ريم اذا بتيلسين ترمسيني جي ما بنستفيد شي ..
ريم : وكيف تبيني أرمسج ؟؟ انتي خنتي ثقتي فيج يا سارة ..
سارة : ما خنت شي .. كنت واضحة معاج من البداية ووضحت لج اني ابا امثل ..
ريم بكره : ستين داهية في التمثيل .. بس سواياج الشينة تجاهي .. حتى .. حتى ما فكرتي تعزيني في موت أبوي ..
سارة بفشيلة : عظم الله اجرج ..
ريم بهدوء : الدوام لله ..
سارة تغير ويهها : الله يرحمه .. انا اصلاً ما كنت أفكر أدورج لو ان ابوج الله يرحمه ما توفى .. وبعدين لا تمثلين دور المتأثرة .. من متى كنتي تهتمين بأبوج أصلاً ؟؟
ريم : والله حتى لو ما كنت مهتمة .. بس بعد ما ظهرت من هالمجال الزفت تميت وياه واهتميت فيه ..
سارة بشك : انتي كنتي المنقبة اللي تزوره صح ؟؟
ريم : وانتي لشو تبين توصلين ؟
سارة : ولا شي ..
ريم تذكرت : هي صح .. ليش كنتي اتين ويا أحمد عند ابويه ؟
سارة باستغراب : ليش ما تعرفين ان انا واحمد تزوجنا ؟؟
شهقت ريم بصدمة : شووووووووووووووووووووووووووووووووه ؟!!!!
سارة برعب : بلاج بسم الله .. تزوجنا هي شو فيها ؟؟ يعني وايد شي غريب ان نكون متزوجين ؟
ريم بعدم تصديق : ومن متى متزوجين ؟
سارة : يوم كنت وياج آخر مرة عرض علي الزواج والتمثيل .. فوافقت ورديت له .. بس أنا ما صدقته عشان جي ما خبرتج .. بس طلع جاد صج وتزوجنا ..
ريم بمفاجأة : وعادي وافق انج تمثلين ..
سارة بحيا : هي .. بس الحين لا ..
ريم باستنكار : اشمعنى الحين لا ؟
سارة : لأني حامل ..
يودت ريم عمرها بالغصب عن تضحك : ههههه .. صـج ؟؟
سارة ابتسمت : هي .. توني في شهوري الأولى .. واحمد طاير من الفرحة ..
ريم وهي تحاول قد ما تقدر تيود ضحكتها : ههههه اونه ؟؟ ههههه تتهنون هههه .. فرحت لج هههههههههههههههههههههههههههههههههههههههههههههههههههههههههههه هههههههههههههههههههههه
طالعتها سارة باستغراب : شو اللي يضحك في السالفة ؟؟
ريم طاحت ع ظهرها ويلست تضحك من خاطرها : هههههههههههههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههههههههههههه هههههههههههههههههههههههههههههههههههههههههههههههههههه...
عصبت سارة : الحين يالسة أرمسج وتضحكين ؟؟
ريم وهي تحاول تهدي عمرها : غصبن عني ههههههههههههههههههههههههههههههههه والله مب قادرة والله هههههههههههههههههههههه من زماااان ما ضحكت ههههههههههههههههههههههههههههه..
ضربتها سارة ع جتفها : هبلة ههههههههههههههههههههههههههههههههههههههههههههههههههههههه
×
×
×
وبعد ضحك متواصل ..
ريم : اخخخخ يا ربي والله ماجد ضحكت جيه ..
سارة : ههههههههههه حتى انا .. تعرفين ؟؟ احمد شخصية ثانية غير اللي تعرفينها ..
ريم باستنكار : بس كيف تزوجتيه ؟؟ يعني احس به كل يوم يقابل ممثلات وهالسوالف ..
سارة : ماعرف تزوجته باقتناع.. وهو فهمني ان الشغل ما يرتبط بالعواطف.. تعرفين ؟؟ .. احمد زين بس عيبه انه عصبي شوي ..
ريم : اعرف انه عصبي .. تسإليني عن اعصابه يوم كان يهزئني ايام التمثيل ؟؟
سارة : هههههههه .. بس والله يا ريم انا ما تزوجته الا بعد ما حلف لي انه ما يفكر فيج ولا يحبج ..
ابتسمت ريم ببرود : تطمني .. حتى لو فكر يتجرب مني أنا ما افكر فيه ..
سارة : لاااااازم .. ما في ويه للمقارنة بين احمد وسعيـــد ..!!
ريم باستنكار : لا والله ؟؟
سارة : اقولج تراج خبزة ايدي وفاهمتنج زين ما زين .. لا تتفلسفين عليه ..
ريم : ما بيني وبينه شي .. ولا حتى حارب .. اصلاً خلاص مسحتهم من بالي ..
سارة : ممممم ولو اني اشك.. بس يلا ما علي ..
ريم غيرت السالفة : المهم .. ريلج يدري انج هني ؟
سارة بتحفظ : ريم انا ياايتنج بالدسة لاني اعرف ان مشاريع احمد وايدة ومن مخططاته انه يردج للتمثيل .. فبتم زياراتي بالدسة لين ما اقنعه ان انتي تغيرتي ..
ريم بحزن : يعني ما بتعيشين ويايه ؟
سارة : ما تخافين أضرج مثل قبل ؟
ريم بجدية : أنا أباج تضريني عشان أتحطم واموت وافتك من هالدنيا ..
سارة رفعت حاجب واحد : صج ممثلة .. تحبين المشاهد الغبية هاي ..
ريم بعصبية : انا مب ممثلة .. خلاص انسي هالشي في حياتي ..
سارة : بحاول انسى .. وشو مسوية في دنياج بدون التمثيل ؟
|[]|
ميثا بمفاجأة : لا والله ؟
أم حارب : وليش مستغربة يعني ؟
ميثا بإصرار : أمايه ما يستوي انتي تختارين لسعيد . نسيتي عند الباب يوم قلنا لج انا وحارب اخطبي لسعيد وقلتي سعيد حر في قراراته ؟
ام حارب : هذا قبل ما أجوف لطيفة وتعيبني ..
ميثا بغموض : بس يمكن سعيد ما بيرضى ..
ام حارب : هو روحه قال لي ادور له بنت الحلال الزينة .. لا تكبرين السالفة ميثا وهي صغيرة ..
ميثا بضيج : امااايه خله يختار ع راحته شرات حارب ..
أم حارب عصبت : ميثا شبلاج انتي استخفيتي ؟؟؟ الحين اللي يسمع انا زاختنه من رقبته بالسجين وغصب ياخذها..
ميثا بحزن : خلاص خلاص ما برمس ...
×
×
×
دخل حارب عليهم بتفاؤل : ها امي عيبتج البنية ؟
ام حارب : زوينة ..
حارب بمفاجأة : زوينة بس ؟؟ افاا ليكون ذوقي ما عيبج ..
ام حارب : لا زينة ..
حارب يطالع ميثا : وانتي شو رايج ؟
ميثا : تهبل .. إن شااااااا الله تكون من نصيبك يا رب ..
حارب بفخر : عيل اعرف اختار ..
ميثا : ههههههههه هي ...
حارب طالع امه بابتسامة : قالتلج اميه انها ناوية تخطب لسعيد ؟
ميثا هزت راسها بإيجاب : هي قالتلي .. بس سعيد شو رايه ؟؟
ام حارب : اصلاً هو وينه ؟
ميثا : توه دش يسبح ..
حارب : صح وين وداج ؟
ميثا : ماشي حوطني في السيارة .. ولاننا كنا شبعانين خذنا لنا سويت وردينا ..
حارب : يا الزطوط انزين جان يبتوا لنا شي ..
ميثا : يبنا لكم بس حطينا الاسكريم في الفريزر لانه ذاب ..
ام حارب : متى تباني أسير أخطبها لك ؟
حارب : مادري والله .. الوقت اللي يناسبج ..
ميثا : بتملج يعني ؟؟
حارب ابتسم : طبعاً عيل ليش سرنا اليوم ؟؟
ام حارب : بس اول شي لازم تشتغل .. لو سئلوك عن شغلك شو بتقول لهم ؟
انحرج حارب : مادري والله ..!!
ام حارب : اذا جي عيل اباك تستثمر فلوسي.. انا هالشهر او اللي عقبه ناوية أتقاعد .. ولازم تجابل فلوسي ..
حارب باستغراب : ليش سعيد ما يستثمرها الحين ؟
ام حارب : كلمته يستثمر بس هو قال لي ان المبلغ عود وما يضمن انه يقدر يستثمره في شي زين ..
حارب : وانا بعد اخاف ما اقدر استثمره عدل ..
ام حارب : لا بتقدر .. انا بعطيك جزء من الفلوس بس ...استثمرها وان حسيت ان هالشغلة تناسبك أعطيك فلوسي وفلوس ميثا ..
ياهم صوت قوي : انا بستثمر فلوس ميثا ..
×
×
×
صدوا كلهم ع راعي الصوت ..
كان شكله عجيب وهو لابس بجامة سودة وشعره خرسان والفوطة ع جتفه ..
ميثا : مسرع خلصت ..
سعيد : ليش تبيني أرقد في الحمام ؟
ام حارب : هي لازم .. هاي يوم بتي تتسبح ما تاخذ أقل عن ساعة ..!!!
سعيد : اقري على عمرج قبل ما تدخلين الحمام عن يدخل فيج يني ..
ميثا تخصرت : لا والله ؟؟
حارب : هههههههههههههههه .... اقول ناوي تستثمر فلوس ميثا ؟
سعيد هز راسه بإيجاب : هي ... اذا تسمح لي يعني ..
ميثا بابتسامة : تفداااااك الفلوس وراعيتها ..
سعيد طالعها وهو يحرك حياته : بس المشروع قابل للخسارة .. يعني عادي فلوسج تضيع ..
ميثا بلا مبالاة : عادي .. جي ولا جي امايه تصرف عليه ...
ام حارب بلوم : وانا يوم قلت لك اشتغل في فلوسي ما رضيت ..
سعيد : يا اميه ميثا اروم اعوضها بس انتي ادريبج بتسكتين وانا بيلس متلوم فيج .. وبعدين حارب ما بيقصر تراه تخصص بزنس ..
ميثا ابتسمت : وانته سعيد ما بتكمل ؟؟
ضحك سعيد : انا اصلاً ادرس الحين ..
كلهم بمفاجأة : شـوه !!!
سعيد : ههههههههه في جامعة خاصة .. كورس واحد بس ..
ميثا باستغراب : وين كتبك ..؟؟ وأصلاً ما حسيت انك تروح مكان ..
سعيد : تراني من فترة ما قمت اسير دبي المالي كل يوم .. والكورس في الجامعة يومين في الاسبوع بس.. والكتب في لوكر الجامعة متفيج أشل الكتب ويايه ؟؟
حارب : ههههه كم مدة الكورس ؟
سعيد : باجي لي شهرين ..
ميثا : وشو نوع الكورس يعني ؟
سعيد : نبذة عن تخصص معين ..
ميثا ضحكت : لا والله ؟؟ هههههه ها جواب يعني ؟؟
سعيد حرك حواجبه : هي ...
ام حارب : وكم تدفع للكورس ؟
سعيد طالعها وهو عاقد حياته : مليون دولار ..
ام حارب بجدية : كم سعيد قول ؟
سعيد : شو ناوية تدفعين لي ؟
ام حارب : هي .. انته تدرس وبعدك شغلتك مب ثابتة .. لازم انا ادفع ..
سعيد بمكر : حارب يوم درس ما دفعتي له ..
ام حارب : الوضع اختلف .. حارب درس يوم ما كنت وياكم بس انته الحين تدرس وانا موجودة ..
سعيد نش بلا مبالاة : تطمني عندي مبلغ يسد ..
ام حارب : تعال وين ساير ؟؟
ميثا تذكرت : هي صح تعال (لوت بوزها) امايه حصلت لك حرمه ..
صد سعيد بعصبية صوب امه : نعـم ؟؟
×
×
×
طالعوا بعض باستغراب ..
ام حارب : انته قلت تبا حرمة و...

سعيد قاطعها : قلت لج يوم بنوي أعرس بقول لج تخطبين لي .. بس مب الحين .. (حس ان الجو توتر) ليكون ناوية تزوجيني انا وحارب في وقت واحد ؟؟ - قالها بأسلوب بسيط يغطي عصبيته - .
حارب : وليش مب ناوي الحين ؟؟
سعيد : بعدني ما كونت نفسي ..
حارب : انزين انا بعد ما كونت نفسي وناوي أخطب ..
سعيد مشى لبرع : انته شيبه غصبن عنك تعرس عقب محد بيرضى فيك ..
ظهر وام حارب وميثا يضحكون ع ويه حارب المفتشل ..
|[]|
يالسة تخم حوش البيت بابتسامة..
وهي مندمجة ياها صوت : اللي ماخذ عقلج ..
جمانة صدت ع مريم اختها : جب انزيـن .. منو بياخذ عقلي يعني ؟
مريم تحرك حواجبها : مادري .. انتي أدرى والله ..
جمانة باستنكار : اقول سيري خمي داخل البيت احسن لج .. ولا بخليج تخمين فهالحر ..
مريم : ههههههه شكلج شاعري وانتي جي واقفة .. بس باجي ايي فارس الأحلام ويجوف سندريلا ويخطفها..
جمانة باحتقار : مريوم والله بييج كف.. يلا جلبي ويهج ..
مريم : خلاص اف منج ..
×
×
×
ابتسمت بعد ما ابتعدت عنها مريم ..
كلام أم حارب لين الحين يرن في إذنها ..
ما خبرت مريم عن كلامها ..
وحاولت تتناسى شو قالت ..
بس لا زال قلبها ينتفض من تتذكر جملتها ..
" المرة الياية إن شا الله ما بنيكم إلا خاطبين " ..
تخطبها لـ منو ؟
حارب .... أو ..... هتلر ..
؟؟؟
اكيد هي المقصودة لان مريم بعدها صغيرة ..
و ........
لأول مرة تحس بأنوثتها ..
ما جد سمعت حد يطري انه يبا يخطبها لعياله ..
فكرت بتفاؤل ..
دام ان ام حارب ما جافتها الا مرة وحدة ..
فمعناته ان واحد من عيالها هو اللي حط عينه عليها ..
مممم شبه حب ؟؟
يمكن ..!!
بس منو ؟؟
حارب .. اللي خذ فرصته في المراقبة يوم وصلهم المستشفى ؟
ولا سعيد الهتلر .. اللي ابتسم لهم يوم كانوا يوايجون من الدريشة ؟
انتفضت بشكل غريب ..
وين القوة يا جمانة ؟
ظهرتي مثل باجي البنات اللي من يسمعون طاري الريل ينتفضون ؟؟
تنهدت بقوة ..
ورددت بصوت أقوى في خاطرها ...
" مستحيل أقص على عمري وأصلاً ما في شي استوى " ..
|[]|
ام راشد : وتتحسب قلبي ما حرقني يعني وانا اجوف خواتي يظهرن من بيتي ؟؟
راشد بهدوء : امايه الحين انتي كنتي راضية بناصر يبهدل بنتج ويجلب حياتها ؟؟
ام راشد : الزواج يعقّل ..
راشد بانفعال : جان غيره عقلوا بالزواج ..
ام راشد تطالعه : انته عقلت بالزواج .. منو اللي ما عقل بعد الزواج ؟
راشد : وايدين .. وما يحتاي أطري بالإسم ..
ام راشد تنهدت : والحين ياي تلومني ليش ؟ ترى ناصر ولد اختي خلاص مب ناوي يخطب ..
راشد : امايه انا ما طردته .. بس قلتله ماشي نصيب .. وبعدين كل شي قسمة ونصيب ..
ام راشد تلومت : ادري بس ما يهون عليه هالفراق .. هاييل خواتي ..
راشد : بيرضون يا اميه لا تحاتين .. انتي بس لا تكبرين السالفة .. كم يوم وبيردون لج.. مالهم غنى عنج ..
ام راشد : آمين يا رب ..
×
×
×
وفي نفس البيت ..
دلال : ما أدري شكو .. بس تعرفين في ناس تفكيرهم محدود ..
لطيفة : وابوج وافق عليه ؟
دلال ضحكت : هههههههههه اذا وافق ما كنتي بتلقيني اهني معاكم بهالبيت ..
لطيفة : هههههههههه قلت يمكن بعد ..
دلال : ولد عمي ما كان يبيني أصلاً ولا يعرف شنو أخلاقي وشنو شكلي ولا شي.. اهو يبغي يتزوج بس عشان الورث.. لأن أمي لما توفى أبوها تسجلت أراضي وأملاك بإسمها، ومن اهي ماتت الله يرحمها انتقل الخير لنا .. والكل كان يعرف انه يبي يتزوج طمع .. مو زواج أقارب حتى ..
لطيفة : وراشـد ؟
دلال : راشد شي مكتوب لي.. تعرفين لمن خطبني تحمست للفكرة.. حلو تتزوجين واحد من برع ديرتج وماكو تدخلات من العايلة تجاهج .. بس تعرفين .. لما ملجنا واهو سافر ارتعبت من فكرة الغربة .. وخوفتني المعاملة أول أيام زواج .. تعرفين شنو أقصد طبعاً.. بس الحمدلله بعد ما عرفت اني حامل تغير الوضع كله ..
لطيفة بابتسامة حنونة : اشتقتي لهلج صح ؟
دلال بحزن : ايه والله وايد .. بس حملي خرب كل شي.. لمن كلمت ابوي قال لي احتمال اهم ايون اهني جم يوم يطلون علي.. قلت لهم انطروا واتفقوا على إجازة طويلة وتعالوا كلكم كم اسبوع مو يوم ولا يومين بس ..
لطيفة : يلا ان شا الله بتقر عينج بهم .. شخباره البيبي الكريه ؟
دلال : ايه والله كريه .. قاعد يرافس ببطني جنه بملعب كورة ..
لطيفة : هههههههههههههه .. طالع على ابوه يحب كرة القدم ..
دلال : يا خوفي تطلع بنت وابتلش بشطانتها بس..
لطيفة : هههههههههههههه الله ييسر لج ان شا الله ...
|[]|
يـوم آخـ،,ـر ..
سارة باستغراب : بلاج ؟
ريم : ما فيه شي ..
سارة : ريم انتي فيج شي.. مب طبيعية ..
ريم بسخرية : ما فيه شي صدقيني.. اصلاً شو تغير في حياتي ؟؟ تعودت ع الهم والغم ..
سارة : بس قبل كنتي تعبرين .. بس الحين جامدة وفي عيونج نبرة تقهر..
ريم : تقهر ؟
سارة : مب بس تقهر إلا ترفع الضغط ..
ريم : ليش ؟
سارة : مادري .. تبين تتكلمين وكاتمة ع نفسج ..
ريم تنهدت : مافيه شي ..
سارة بشك : عشان ربيعتج ما يت اليوم ؟
ريم باستهزاء : انا قلتلها ما اتي .. اعرفكم ما بتتقبلون بعض ..
سارة بلا مبالاة : خلاص خلها اتي الثلاث ايام الباجية فهالاسبوع .. وانا لي يومين ..
ريم رفعت جتوفها : مثل ما تبين ..
سارة بشك : مثل ما أبا ؟؟ (شهقت) ريم ليكون كل ها اللي فيج بسبة ......... الـحب ؟!
ريم بنظرة مبهمة : الحب ؟؟ حب منو ؟؟ حبج انتي ؟؟
سارة : حب سعيـد يا غبية ..
ريم بعصبية : سارة مب ع كيفج تتفلسفين .. سعيد شي انتهى من حياتي.. ليش مصرة تدخلينه غصب ؟؟
سارة بإصرار : دامج عصبتي عيل سعيد هو سبب كل اللي انتي فيه .. ههههه سبحان الله استويتي جامدة مثله.. حبيتيه ما قلنا شي .. بس عاد لا تستوين جامدة شراته ..
ريم باحتقار : لا تحكمين ع الامور بدون ما تعرفين شي ..
سارة : ما بحكم بس واضحة السالفة .. انتي ما انتقلتي من البيت بس عشان التمثيل.. عشان سعيد ما يعرف بوجودج..
تنفست ريم بقوة : سارة اسكتي ..
سارة : وبعد غلقتي موبايلج لهالسبب بعد مع انه هو سوى هالحركة قبل.. واحتمال يكون مسوي هالحركة بسببج .. يبا ينساج ..
ريم انفجرت : اصلاً هو ما يدانيني ويكرهني .. شو ينساني ؟؟
سارة بنفي : لو يكرهج جان ما دافع عنج وضرب احمد هاك اليوم ..
ريم : والله ولج ويه ترمسين عن هالسالفة بعد سواتج ..
سارة : انا واقعية يا ريم مب شراتج .. جبانة ..
ريم بصوت مهزوز : انا مب جبانة ..
سارة بإيجاب : أعرف مب جبانة .. انتي ميتة ..
ريم نزلت راسها وهي تحس بقهر ..
سارة بهدوء : الحب ما يموّت .. بس يعطيج شعور انج لا حية ع هالأرض.. ولا ميتة ومفتكة من بلاوي الدنيـا ..
طالعتها ريم بعد ما نزلت دمعة حارة من خدها : سارة دخيل الله سكتي ..
سارة زخت ريم وحضنتها بقوة : نزلي دموعج يا ريم نزليها .. بسج كبت والله حرام ..
×
×
×
خذت وقت طويل وهي تشهق وتصيح بقهر ..
قهرها المكبوت لازم يطلع ..
حتى فاطمة ما تعرف انها تحب سعيد ..
الوحيدة سارة تعرف ..
سارة شهدت العلاقة بصورة معينة..
وحاسة بمشاعرها ..
لكن ليش ما تقدر تكره سارة ع اللي سوته ؟
والسؤال الأكبر ...
ليش ما كرهت سعيد ...... على قدر كرهه لها ؟؟
×
×
×
مع مرور الوقت لقتها سارة راقدة ..
تنهدت وهي ترفعها وتهمس : ريموو متنتي وايد اففففف ..
مشتها لين حجرتها ورقدتها بعد ما لحفتها ..
التفتت حواليها ..
واول هدف لها كان كبت ريم ..
ما حصلت شي مهم فيه ..
بس حصلت مفتاح بميدالية بقلب مكسور ومحدد بشكل جذاب ..
دورت في الحجرة بكبرها،
حصلت تجوري صغير ..
عرفت ان المفتاح هذا هو مفتاح التجوري ..
فتحت التجوري وحصلت مبلغ بسيط ..
على كم طقم ذهب ..
واوراق رسمية ..
وموبايل ..!!
مع ان الاوراق الرسمية اتيب الفضول ..
بس الفضول تجاه الموبايل كان اكبر ..
متأكدة هي انها جافت ريم زاخة موبايلها وكان في الصالة ..
بس هذا موبايلها الجديم .. شارية نفس الموبايل بس هذا مشرمخ أكيد جديم ..
فتحت الموبايل ..
وما كمل 5 دقايق الا والمسجات توصل ..
شكلها من فترة طويلة مب فاتحتنه ..
فكرت بخطة ..
ولقت ان مافي احسن من انها تاخذ رقم سعيد وتكلمه ..
اتصلت كتجربة من موبايلها وظهر موبايل سعيد مغلق ..
خذت رقم اخت سعيد وحارب ..
مثل ما هو مسجل سيفته ..
بتكلمها ..
ريم لازم تنهي معاناتها ...
لأن أحمد ناوي نية شينة صوبها ..
واقل شي انها تحميها ولو بالخفـــــآء ..!!

-|[ الحب الحقيقي / هو أن تحب الشخص الوحيد القادر على أن يجعلك تعيساً ]|-

فتحت عينها بتعب،
صح انها صاحت وايد جدام سارة ...
بس حاسة براحة نفسية ..
تنهدت في خاطرها .. اكيـد نسيت سعيد ..
ونسيت الحب ..
أصلاً وحدة مثلي ما لقت الحب في حياتها مستحيل تحب ..
ما جربت إن أمي تحضنني يوم تكون عندي مشكلة في المدرسة ..
ولا حسيت بمواساة أبويه لي إذا حد ضاربني ولا جرحني ..
ووجود حارب اللي حسسني بالحنان الأبوي خلاني أتحسب اني احبه ...
لكن سعيد هو اللي اختلفت مشاعري تجاهه ..
لان بوجوده عرفت شو يعني الحب ..
لأنه ما اهتم لي ؟
والله كـل شي جـايز ؟!!
المهم انا بنساه .... اكيد بنساه ..
×
×
×
سمعت صوت مسج ..
نـشت من فراشها بتعب وبعد ما تأكدت ان سارة ظهرت ..
راحت وجيكت ع موبايلها بس تفاجأت ان ماشي مسج ..!!!
استغربت صوت رنة المسج وهي متأكدة انها سمعت ..
ما ركزت وايد ع السالفة ..
لانها توجهت للحمام تتغسل وتتنشط شوي ...
|[]|
حميـد بفخـر : هي نعم طال عمرج ..
جمانة بفرحة : الله يرزقك الجنة ع هالخبر الروعة ..
حميد : الحمدلله .. ان شا الله بس أبيّض الويه ..
جمانة : ومنو هاللي حصل لك وظيفة ؟
حميد : ريال ..
جمانة بغباء : أدريبه ريال بس منو ؟
حميد بشك : وانتي شو يخصج ؟
جمانة : حشى حشى .. لا تضحكني وتقول انك تغـار ؟!!
حميد ضحك : هههههههه لا هذا عادي نسيت انج ما تدانينه .. هذا سعيد اللي يا بيتنا ..
جمانة حست ببرودة فجأة : معقولة ؟!
حميد باستغراب : شو ؟!!
جمانة : سعيد روحه عطالي بطالي.. كيف حصل لك وظيفة ؟
حميد باستهزاء : هههههههههههههههه والله انج مال اول ... سعيد تاجر في الاسهم الحينه ..
جمانة بامتعاض : وخلاك تشتغل في الاسهم يعني ؟
حميد : لا .. امه تشتغل في شركة من فترة طويلة .. وعلى حسب رمسته امه كانت تبا واحد منهم يشتغل فهالشركة نفسها لان لها منصب عود وجريب بتتقاعد بس ولا واحد منهم يحب عمل المكاتب .. فقال لي أقدم أوراقي وهو بيرمس امه تجدمني ..
جمانة : وشو مناسبة هالخدمة ؟
حميد : ليش لازم يبالها مناسبة ؟
جمانة : مب جي بس فهالدنيا مافي شي ببلاش ..
حميد باستهجان : شو يعني يتزوجج مثلاً مقابل انه يشغلني ؟؟
جمانة دق قلبها بعنف : شو هالرمسة بعد ؟
حميد طالعها بلا مبالاة : اتمصخر .. انزين ما علينا من هالسالفة .. انا كلمت سعيد ان بعد ابا اظهركم من بيت عمي...
قاطعته جمانة بعصبية : وليش مدخلنه في كل خصوصياتنا ؟؟
حميد بضيج : انا لو ما استشرته جان لين الحين يالس بدون أمل ..
جمانة : في حلول ثانية .. الحين الوظيفة سكتنا عنها بس انك تقول له اسرار بيتنا ..!!!
حميد باستهزاء : يالله ع الأسرار .. تراه هو اللي حايز امبيني وبين عمج الـ...... .. يعني يعرف كل شي ولا تستهبلين ؟؟
جمانة بنرفزة : ما استهبل .. بس حميد لا تعتمد عليه نهائياً .. عقب يمكن يذلك ..
ابتسم حميد بخبث وجنه يعرف شي : لا تحاتين مستحيل يذلني ..
جمانة عقدت حياتها : ليش الثقة يعني ؟!
حميد : لانه بيكون من نسايبنا ان شـا الله ..
جمانة حست انها بتطيح ع الارض .. بس بقوة تماسكت عمرها : يلا مناك مب فايجة اسمع مصخرتك البايخة ..
حميد : هههههههههههههههه ... المهم هو قال لي بعد شهرين من الوظيفة اقدر اقدم ع شقة من اي مشروع من المشاريع المحطوطة واللي بتخلص جريب وادفع عربون ..
جمانة ما ردت عليه .. دقات قلبها كانت اقوى من اي شي ثاني ......!!!
|[]|
دخلت الشقة بضيج ..
من حملت وهي تحس بكره تجاه هالمكان ..
ريحة الدخان ..
القلاصات المفرفرة ..
عادي تدخل و20 ريال في الصالة الوسيعة يالسين ..
وشقة مظلمة ..
ما تجوف النور مول ..
بس هالشي كان عادي عندها وشوي شوي قامت تتضايج منه ..
وصلت للصالة وانتبهت لأحمد اللي طايح ع الصوفا وشكله راقد ..
سوت له طاف ويت بتدخل الحجرة ..
ياها صوته الحاد : وقفي ..
تصنمت سارة برعب : نعم ..؟؟
بنبرة جاسية : سايرة عند منو في بناية ........ ؟؟
طالعته بصدمة : نعم ؟؟؟؟ تتجسس عليه ؟!!!
أحمد بنبرة متسلطة : اظني انا ريلج ومن حقي اعرف وين سايرة ومن وين ياية ..
سارة بعصبية : حتى ولو .. بس ما يحتاي تتجسس .. اسألني وانا بقول لك ..
احمد : منو هاللي زايرتنه ؟!
سارة : راعي الدكان ..
احمد طالعها وهو رافع حاجب واحد : انا كم مرة قلت لج لا ترمسيني بهالاسلوب الرخيص ؟
سارة طالعته بصدمة : رخيص ؟ ماشا الله كلمة يديدة ؟!!!
احمد : سارة لا تلعبين ع الحبلين واقصري الشر .. منو هالزفت اللي سايرتله ؟؟
سارة عصبت : ليش تتحسبني شراتك طايحة بين أحضان فلانة وعلانة كل يوم ؟
احمد وهو يرص بظروسه بعصبية : قلت ... لج .. لا .. تخلطين .. شغلي .. بحياتنا الخااااصـة ..
سارة طالعته بغيظ : شو تبا الحين مني ؟؟
احمد : كنتي سايرة عند منو ؟؟
سارة تنفست بقوة : كنت عند ريم ..
طالعها احمد وهو مب مصدق : عرفتي مكانها ؟؟
سارة : مب صعب اني اعرف لو بغيت ..
احمد رفع حاجب واحد : وع شو رسيتوا ؟
سارة : انا ما كلمتها اصلاً عن هالسالفة ..
احمد باندهاش : ما كلمتيها ؟!! عيل شو سرتي تسوين ؟
سارة بضيج : انته شو تبا بها ؟؟ خلاص البنية تابت لربها خلاص فج عنها ..
احمد بقهر : مب قادر انسى .. بعد ما الفلوس كانت تهل صوبي الحين بالحسرة احصلها ..
سارة : تروم تبدى من اول ويديد .. مب لازم ريم ترد تمثل ..
احمد بعصبية : وما خذت السافل بعده ؟
سارة : قطع علاقته بها .. اتوقع من يوم كنا في مركز الشرطة ..
احمد رفع حاجب واحد : عيل ليش ودرت التمثيل ؟
سارة بضيج : احمد انا حرمتك لا تنسى هالشي.. وانته قلت لي انك ما تحب ريــ...
قاطعها احمد : انا ما احبها .. اصلاً ما تهمني ... بس ابا انتقم من خطيبها النذل ..
سارة بعصبية : تراها قطعت علاقتها فيه .. شو تبا به ؟
احمد : ابا ارد له الصفعة مثل ما صفعني في يوم ..
سارة ضيجت بعينها بشك : بس عشان صفعة ؟؟
احمد بانفعال : انتي شو تقولين ؟؟ خرب سمعتي ... شركات الانتاج تخلت عني .. الممثلات يرفضون النصوص اللي اقدمها لهم ..كل ها بسبة فضيحة مركز الشرطة ...
سارة : اللي يسمع هم ماضيهم كلهم مشرف .. وبعدين ع الممثلات تراني انا قلت لك برد امثل ..
احمد : انتي حامل ما يستوي تمثلين ..
سارة : شو يخص الحمل الحين ؟
احمد : يخصه .. وبعدين انتي حرمتي .. كيف تستوين ممثلة ؟؟
سارة : اول ايام زواج ما كانت هالقاعدة الغبية في بالك ..
احمد : بس كل شي تغير الحين ..
تنهدت سارة : خلاص عيل تحمل الخساير اللي بتيك ..
احمد : بتحمل .. بس قبل ما اتحمل أبا انتقم من خطيب ريم ..
سارة يت بتتكلم .. بس سكتت بعد ما حست بتأنيب ضمير ..
احمد : شـو ؟!!
سارة : ماشي ماشي ..
احمد : لا شي .. شو مستوي ؟!
سارة بذنب : بس اوعدني ما تأذي ريم ..
احمد بخبث : شو ؟؟
سارة : اوعدني اول شي ..
احمد بحدة : تكلمي بسرعة ..
سارة بتأنيب ضمير : عندي رقم اخت سعيد ..
احمد : اسمه سعيد ؟
سارة بإيجاب : هي ..
احمد بشك : وليش خذتي رقمه ؟
سارة : كنت يعني مفكرة ارد العلاقات بينهم ..
احمد سحب شنطتها من ايدها : بس الحين ما اتوقع ..
سارة برعب : احمد ..
احمد وهو يظهر موبايلها ويفر الشنطة : شو اسمها ؟؟
سارة بعصبية سحبت موبايلها : بترمسها يعني ؟
احمد : عيل شو بسوي ؟؟
سارة وضربات قلبها تتزايد وتدعي ان احمد ما يكشف نواياها : انا بساعدك تنتقم ....
احمد : عطيني الرقم بالزين ..
سارة برفض : لا .. انا بدبر الخطة .. وانته عقب سو اللي تباه ..
|[]|
ميثا وهي تتثاوب من خاطرها : آااااااااه .. برقد وهالفلم شكله ما بيخلص ..
حارب ابتسم لها : روحي ارقدي انزين ..
ميثا : لا بتريى سعيد ..
حارب طالعها بغموض : انا شكلي بغار من سعيد ..
ميثا بغباء : ليش ؟
حارب : كل هالاهتمام حق سعيد وانا لا ؟؟
ميثا : ويييييه ما عندك سالفة .. امي تهتم فيك وانا اهتم في سعيد شو فيها .. ؟؟
حارب ضحك : ههههههه .. بس امايه تهتم فينا اثنيناتنا ..
ميثا ابتسمت : والله حارب احبك انا بعد .. بس يمكن لان سعيد يحب يغايظني وايد .. عشان جي ..
حارب : اتمصخر وياج لا تصدقين ..
ميثا : لا بصدق خخخخ ..
حارب : ههههههه ..
ميثا بقلق : سعيد طول وايد .. الساعة جريب الـ 1 ونص الحين ..
حارب : يمكن طالع ويا ربعه ..
ميثا : يا هالربع .. ترى انته بعد تظهر بس ما تطول اكثر عن 10 ..
حارب نزل راسه : ما عندي ربع شراته ..
ميثا باستهجان : ما عندك ؟
حارب : لا .. واحد اثنينه بس ..
ميثا : بس اللي انا حاطتنه في بالي ان انته الكل يحبك .. وسعيد الشرس اللي ما ينطاق ..
حارب : هذا قبل .. بس عقب ما عزلت عمري.. وظروف انتقالنا .. تغير كل شي ..
ميثا : انزين ليش ما تروح فريجكم الاولاني بين فترة وفترة ..
حارب : ما احس ان في شي يستاهل اسير له ..
ميثا تحرك حياتها : الخلان هناك ..
حارب ابتسم : الخلان جريب بيون هني ان شا الله..
ميثا باستغراب :ناوي تسكن هني ؟
حارب تغير ويهه : هي عيل وين ؟
ميثا : يعني .. تاخذ لك شقه لين ما تبني لك بيت او تحصل فيلا جاهزة ..
حارب : بس كبداية لازم اكون هني ..
ميثا ابتسمت له :ايوااا .. افففففف تعرف اني مسطلة ؟
حارب : ههههههه ارتاحي وسيري رقدي ..
ميثا : لا بتريى سعيد عقب ..
حارب : على راحتج .. يلا انا بسير .. تصبحين على خير ..
ميثا : وانته من اهله ..
×
×
×
وهو يمشي صوب باب حجرته فوق سمع حس سعيد ..
ما يدري ليش وقف عند طرف الدري يسمعهم ويجوفهم ...
ميثا : حيا الله شيخ دبي ..
سعيد بغرور : اهلاً ..
ميثا : عدال عدال بس عن تطيح ..
سعيد : شو موعنج لين هالوقت ؟؟
ميثا تطالعه بغيظ : قلت لك ما برقد الا يوم بتي ..
سعيد بمرح : والله ان حالتج صعبة ..
ميثا : سعيد لازم نناقش هالسالفة انا تعبت ..
سعيد : وليش تعبتي ؟؟ واي سالفة صح ؟؟
ميثا : السالفة اللي لين الحين ما خبرتني عنها ووعدتني تقول لي كل شي عنها ..
سعيد : سالفة ؟؟ متى ؟
ميثا : سالفة زواجك ..
سعيد بسخرية: زواجي ؟؟ زواجي من منو ؟؟
ميثا : بلاك يوم طرينا سالفة الزواج وانته اشتطيت .. بعدين يوم رمستك قلت بتقول لي عقب ..
سعيد ابتسم : انزين عقب بعده ما يا ..
ميثا : افففففف والله ابا اعرف يعني ليش عقب ..
سعيد : انتي اللي اف منج .. ليش حاشرتني تبيني أعرس ؟؟ ترى حارب بيعرس .. خلاص ..
ميثا : ربي يعينها بس ..
سعيد رفع حاجب واحد : منو ؟
ميثا : اللي بتاخذك ههههههه ..
وركضت بعيد عنه ..
وسعيد مشى صوبها بمرح : تعالي هني جان فيج خير ..
×
×
×
ابتسم حارب ..
بس ما يدري ليش ابتسامته كانت تخفي شي كامن في صدره ..
شي ....
ما يقدر يعبر عنه لأي مخلوق ....
|[]|
ومع مرور اكثـر من اسبوع ..
لطيفة : آااااخ دلول والله ريلي عورتني .. الله يخليج خلنا نريّح شوي ..
دلال : لا خلينا نكمل أخاف أولد إذا يلست ..
لطيفة : عن المنكر انتي بعدج لا تتفلسفين ..
دلال : بس عادي في أي وقت تكون ولادتي ..
لطيفة : اوكي بس خلنا نوقف شوي والله تعبت ..
دلال : زين نقعد شوي بس .. ورانا الطابق الثاني نبي ناخذ ملابس للبيبي ..
لطيفة بملل : الله يعينكم يا الأمهات ..
دلال : ههههههههه اي والله .. انزين يايج الرزق لا تحاتين ..
لطيفة : اذا كل عوار الراس ها مابا ..
دلال : هههههههههه بس لا تطولينها واهي قصيرة .. وين نقعد ؟؟
لطيفة : خلنا نسير صوب المطاعم باخذ لي شي أشربه ..
دلال : زين .. يلا امشي بسرعة .. آنا الحامل اسرع منج ..
لطيفة : اكره المشي ..
دلال : ههههههههههه ..
×
×
×
وهم يطلبون عصير رن موبايل لطيفة ..
لطيفة ترمس دلال : دلول حياتي انا برد ع التلفون وانتي ييبي الطلبية صوب هالطاولة ..
دلال : صج ما تستحين آنا حامل وتخليني أشل ؟؟
لطيفة : إلا عصير ما قلت لج شلي أثقال .. ههههههه امواح حبيبتي انتي (ردت ع التلفون) هلا جمانة ..
دلال : ان ما علمت راشد بوريج يا دبة ..

لطيفة : هههههههه ..
×
×
×
جمانة : وينج اسمع حشرة عندج ؟؟
لطيفة : مـوجـووودة .. في المول ويا دلول .. تتشرى حق الياهل ..
جمانة : ههههه ايواااا .. عيل الوقت مب مناسب ارمسج فيه ..
لطيفة : شو مستوي ؟؟
جمانة بحيا : ماشي الا كل خير ..
لطيفة : لا لا نبرة الصوت هاي فيها شي ..
جمانة : ههههه اليوم .. بيون .. يخطبوني ..
شهقت لطيفة بقوة : منـووووو ؟!!!
جمانة : اللي يونا هاك اليوم ..
لطيفة بصدمة : لا تقولين هتلرررررررررررررررر .. ؟؟
جمانة تفاجأت : ما عرف .. ياهو يا أخوه ..
لطيفة وقلبها يدق : مبروووك حبيبتي تستاهلين .
جمانة : ما بتين اليوم ؟
لطيفة بتردد : لا ما بيي .. بتعشى ويا دلول في المول ..
جمانة بتوسل : الله يخليج تعالي .. ابا حد يآزرني ..
لطيفة برفض : ماقدر جمانة .. انتي خبريني بكل يديد ماوصيج ..
جمانة تغيرت نبرتها : ما بتين يعني ؟؟
لطيفة بنبرة صلبة : آسفة جمانة .. يلا اسمحيلي بصك عنج .. باي ..
×
×
×
دلال تطالع لطيفة باستنكار : بلاج لطوف ؟
لطيفة ابتسمت بغصة : ما فيه شي ..
دلال : كنتي تكلمين جمانة ؟؟
لطيفة هزت راسها بإيجاب : هي ..
دلال : شنو تبيج تروحين لها ؟
لطيفة : هي ..
دلال باستغراب : شكو اهي ما تيي تزورج ؟ دايماً انتي تروحين لها ؟
لطيفة تنهدت : لا هالمرة عشان ناس يايين يخطبونها وتباني اكون وياها ..
دلال بفرحة : والله ؟؟ زين روحي مو لازم نقعد اهني .. اوصلج لبيتهم وارد انا بيتنا ..
لطيفة حركت راسها بنفي : لا ما يحتاي .. لازم تتعود تكون روحها .. انا فهالوضع ما بقدر اساعدها ..
دلال باستغراب : ليش ؟
لطيفة : بس جي .. (طالعتها وابتسمت) نشي يلا بنسير نتشرى ..
دلال : لما قعدت تقولين هالكلام ؟؟ نطري أخلص العصير اول ..
لطيفة : مصيبة من مصايب الزمن ..
دلال : شنو ؟؟
لطيفة : هههههههه ولا شي ,,
|[]|
في بيـت عم جمـانة ..
كانت أشكالهم في ميلس الرياييل تموت من الضحك ..
عم جمانة يالس صوب باب الميلس الخارجي ..
وحميد وسعيد ع الزاوية البعيدة منه ..
حارب كان حزتها ساير صوب غرفة الطعام يجوف جمانة عشان الرؤية الشرعية ..
×
×
×
حميد بخبث : اقول شو رايك نلعوزه ؟؟
سعيد : منو عمك ؟؟
حميد : دخيلك والله في خاطري جي أطلع حرتي ..
سعيد : وشحقه تيود في خاطرك .. قوم نش ولعوزه ..
حميد : ههههههههههه .. لا نتريا حارب ونكمل السالفة ..
سعيد : تعال وينه ربيع ما قام ينجاف ؟؟
حميد هز جتفه : سـافر .. وخلاني ..
سعيد : صيح بعد شو تتريى ..
حميد : هههههههههه لا بس يعني ربيعي اكيد بيحز في خاطري ..
×
×
×
دخل حارب ويلس جريب من عم جمانة ..
كان واضح ع ويهه الرضى ..
اكيد عيبته جمانة ..
هاللي ردده حميد في خاطره ..
قطع الصمت نظرة حارب المؤنبة لهم : تجدموا بلاكم انتوا تميت روحي فـ ويه المدفع ..
سعيد وحميد ضحكوا وتجدموا صوبه ..
حارب بفشيلة : والحين يا بـو ... (طالع حميد عشان ينقذه)
حميد بسخرية : بو محمد ..
حارب : بو محمد .. ا ... أأأ .. متى نحدد العرس ؟
عم جمانة بنظرة حادة : ليش ما تبا تملج بها ؟؟
افتشل حارب : هي ... بس يعني ... اقصد ..
سعيد ما عيبه اسلوب عم جمانة : اكيد بيملج .. بس قصده العرس والملجة ويا بعض ..
عم جمانة طالع سعيد برعب ..
حميد وهو ياود عمره : هههه خف ع الريال سعيد ..
سعيد : انته ما عليك .. المهم متى تبا العرس حميد ؟؟
حميد استانس : متى ما بغى حارب ..
سعيد : روح اسأل الأهل جان موافقين وعقب شاورهم عن موعد العرس وتعال .. (طالع عم جمانة بحدة ) ولا اسمحلنا الشيخ ما شاورناك ..
عم جمانة برعب : لا مسموح خذ راحتك ..
سعيد بصوت واطي مسموع لحارب : اتحرى بعد ..
×
×
×
تم تحديد العرس بـ ع ـد 3 شهور مبدأياً ..
على أساس ان مستحيل يحصلون حجز لـ قاعة أجرب من هالوقت ..
بس يوم ساروا يحجزون حصلوا حجز بعد شهرين تقريباً ويوم الجمعة ..
وعلى هالتاريخ تم الحجز ..
يوم ... عرس .. حـارب .. & .. جـمانة ..
|[]|
مع مـرور الأيـام ..
و...قبـل أيـام من العرس ..
×
×
×
ردت بخمول : ألـو ..
..... : السلام عليكم ..
ميثا فتحت عينها بالغصب : عليكم السلام والرحمة .. منوووه ؟؟
.... : أنـا سـارة .. بنت خال ريم..
ميثا حاولت تستوعب بس الرقاد عامنها : منو ريم ؟؟
سارة بنفاذ صبر : ريم الممثلة اللي كانت لها علاقة باخوج حارب ...
شهقت ميثا بصدمة وفتحت عيونها غصب : ريـــم ؟!!!
سارة : هي ريم .. انا بنت خالها ..
ميثا بشك : شو تبين فيه ؟
سارة : انزين شو اسمج .. ماخذة رقمج وانا ما عرف الا انج اخت سعيد ..
ميثا بعدم اقتناع : سعيـد ؟؟!! شو يخص سعيد الحين توج تطرين حارب ..
سارة : اباج في سالفة ضرورية ..
ميثا : قوليها ..
سارة : لازم نجوف بعض ..
ميثا : فهالقايلة وين أجوفج .. اصلاً ما بيخلوني ..
سارة بتوسل : الله يخليج في اي مكان عام بنتلاقى .. اباج في سالفة ضرورية ..
ميثا بشك : شو هالسالفة ؟؟
سارة : دخيلج تعالي وبخبرج ..
ميثا : اول شي اوعديني انج ما تجذبين شرات هاييج المرة .. تراني عرفت ..
سارة : والله والله ما اجذب السالفة مهمة .. واوعدج ان ما اسوي شي فيج ..
ميثا بتفكير : خلاص اوكي .. بس وين نتلاقى ؟؟
سارة : وين المكان اللي يناسبج ؟؟
ميثا : نتلاقى فـ امارات مول اوكي ؟
سارة : خلاص اوكي نص ساعة وبكون هناك ..انتي شو اسمج صح ؟
ميثا : ميـثا ..
×
×
×
صكت عن سارة وهي قلبها قابضنها ..
حارب .. وسعيد .. وريم ..
مسألة مصيرية دخلتها سارة فيها ..
سعيد حذرها تتدخل ..
بس لازم تعرف شو اللي يالس يستوي..
شو علاقة ريم فيهم بعد كل هالانقطاع ؟؟
لا إرادياً خشت بطاقة عرس حارب اللي عبارة عن بوكس خشبي صغير ينفتح من الجوانب وفيه الرمسة فـ شنطتها..
تحس انها لازم تقول لسارة ان ريم لازم تنسى حارب ..
حارب عرسه جريب والاثبات هالبطاقة ..
سرحت لأفكار غريبة ..
ريم تحضر العرس ؟؟
ويجوفها حارب ؟؟
نفضت هالفكرة من بالها ..
وسارت عند امها تستأذن بحجة انها بتوصل البطاقة لربيعتها ..
وألحت عليها توصلها المول ..
وامها استهجنت ان كيف تلتقي بربيعتها في المول .. جي ما عندها بيت ؟؟
بس ميثا تدبر جذبة انها ساكنة بعيد والمول اجرب فرصة يتلاقون فيها ...
اهم شي ..
انها ما تبا لا سعيد ولا حارب يعرفون السالفة ..
لبست عباتها وشيلتها ..
واتريت امها في السيارة ..
ومن بعدها توجهوا صوب المول ..
المكان اللي يمكن تعرف فيه بعض الأشيا الغامضة اللي عاشتها بين اخوانها