كاتب الموضوع :
أسيرةبحرالأماني
المنتدى :
القصص المكتمله
--------------------------------------------------------------
في بيت أم سعد (في نفس الوقت)
سمعوا صوت جرس البيت يدق راحت الخدامة وفتحت الباب .. ودخلت أم عبدالرحمن وعيالها رغد وشوق وغرور وراحوا لصالة عند الحريم .. أما بو عبدالرحمن وعبدالرحمن (ابو و اخو رغد) للميلس
عند الحريم
اول ما جافتهم أم سعد فررحت وراحت على طول وسلمت عليهم وبعدها ام مصعب وام مشاري وام خليل
ام سعد : تفضلي حبيبتي.. شخبارج يا ام عبدالرحمن
ام عبد الرحمن: بخير دام فضلج ..انتي شخبارج وشعلومج
ام سعد : الحمدالله نسأل عنكم
ام عبدالرحمن: سألت عنج العافية
ام خليل: شخباركم يا عيال
شوق وغرور في نفس الوقت: الحمدالله
طالعوا شوق وغرور ببعض وضحكوا: ههههههه
الكل: ههههههههه
ام مصعب وهي تطالع رغد: وشخبارج يا العرووسة
رغد ابتسمت بخجل وقالت بصوت يالله ينسمع: الحمدالله خالتي
أم سعد: يا حيا الله من يانه زارتنا البركة
ام عبدالرحمن: الله يحيج ويبقيج
أم سعد حبة تحرج شوي رغد: حيا الله عروسة وام عيال ولدي
<<< رغد تعالوا دوروها ذابت من الاحراج خخخخخخخخخخخ
ام مشاري وهي تقوم: انا بروح انادي البنات
--------------------------------------------------------------
في الميلس الداخلي
كان مندمج بالسوالف لكن قطع عليه تلفونه كان الرقم خارجي أول ما شاف الرقم فرح وارتسمت أحلى ابتسامه على ملامح ويهه
سعد وبصوت فرحان: هلاااا والله
: هلاااا بيك يا خوووي شخبااارك
سعد وما زالت الإبتسامه على ويهه: أناا الحمدالله تمام التمااام أنت شخبارك شنو مسوي وحشتنا يا الدب
: هههههههه أنا الحمدالله بخير وصحة وعافية وأنتوا وحشتوني أكثر
سعد: متى ترد إن شاء الله لين ما أتزوج .. يا خي أبيك تكون معاي في العرس مو مثل الملجة
: ههههه لالا إن شاء الله راح أكون معاك هانت كلها إسبوعين و أكون عندكم في البحرين
سعد وبفرحة: قووول قسم
: هههههههه قسم بالله والله العظيم كلها إسبوعين و أكون عندكم وإلى الأبد
سعد: الله يبشرك بالخيييير .. الحين اذا الوالده درت بتستااانس
: آآآيه على أمي والله وحشتني شخبارها وشخبار أبوي
سعد: الحمدالله طيبين لا تحاتي
: أقوول هذا سلطانووو شوله عنده تلفوون أعنبوااا داره خذالي سنة وأنا أدق ما يرد
سعد وهو يخفض صوته: تلاااقي وحدة من البنات غلبلته فترك التلفون في غرفته علشان يفتك
: هههههه هذا للحين مغازلجي
سعد: و ليه باجر بعد
: ههههههههه طيب .. أخليك الحين بس ما أوصيك سلملي على الكل وبوس راس أمي و أبوي وقول لهم وحشتوني وإن شاء الله راح أرد لكم وأرفع راسكم
سعد: لا توصي حرييص يوصل إن شاء الله .. يلااا فمان الله
: مع السلااامة
سكر سعد وهو فرحان لف لجهت أبوه : يبه عندي لك بشارة
أبو سعد: اذا خير لك إلي تبي
قام سعد وباس راس أبوه: ما أبي إلا سلااامتك يا الغالي
أبو سعد: الله يرضه عليك دنيا وآخرة قولوا آمين
الكل:آآمين
سعد فرح لدعاء أبوه: يبه اتصل حمدان توه فيني وقال لي انه بعد إسبوعين راح يكون في البحرين
أبو سعد بفرح: الله يبشرك بالخير يا ولدي
سلطان وهو فرحان: يعني خلاااص أنتهت درااسته
سعد: إي .. وترى حمدان يقول لك روح جوف تلفونك وين قاطة متصل فيك فوق 10 مرات وأنت ما ترد عليه
سلطان وهو يبتسم لـ سعد: شاسوي تمللت من كثر ما يدق التلفون مو خبرك أنا إنسان وااايد مشغول Busy
سعد وهو يبتسم لـ سلطان : إي ما شاء الله عليك
سلطان وهو يقوم: أنا بروح أيب تلفوني
--------------------------------------------------------------
في الصالة عند النسوان (الساعة 6 ونص بعد صلاة المغرب )
بعد ما صلوا النسوان والبنات قعدوا يكملون سوالفهم << إلي ما تخلص
غرور: بنات شرايكم نلعب
جنان بحماااس: إي والله خل نلعب
مرام: أممممممم شنو نلعب
شوق وهي تفكر: أممممممم أممممممم .. إي عرفت
البنات: شنووووو
شوق وهي تبتسم لحماسهم: نلعب لعبة الأشياء الملمووسة
رغد وهي تصفق: ألآآآآآآآآآآي فن ونااسة
هيام: شلون نلعب هل اللعبة أول مرة أسمع عنها؟؟
هنادي: أنا بعد
مرام وهي ترفع يدها: أنا بعد
جنان وتقلد مرام: وأنا بعد
نورة هي تبتسم وتسوي مثل اليهال : وأنا بعد
غرور وهي تتربع: أنا بقول لكم .. الله يسلمكم ويخليكم حق أمكم و أبوكم و زوجكم وأخوكم و..
قاطعوها البنات: هههههه خلااااص درينااا
غرور وهي تضحك: ههههههههه طيب.. أحم أحم اللعبة هي إنه وحده تكون الحكم ويكون في فريقين أوكي
البنات: أوكي
غرور وهي تكمل: الحكم تطلب شي مثلااا تقول أبي شي جماد ويبتدي اسمه بحرف الفاء أو ممكن الحكم يطلب لون معين يعني يبي أشياء بلون الأزرق.. والفريقين يروحون يدورون على شي جماد ويبدأ بحرف الفاء أو بلون الأزرق اذا طلب الحكم اشياء بلون الازرق وأكثر عدد يحصله الفريق يكون هو الفائز وطبعا في وقت معين يعني بعد 5 دقايق تقريبا ما تتجاوز و أول ما يروح الفريق حق الحكم حتى لو ما خلصت 5 دقايق خلاااص تنتهي اللعبة والفريقين يكونون موجودين بعد سماع الإشارة .. هاا فهمتواا
البنات: yap yap
غرور وهي تبتسم: الحمدالله
جنان وبحمااس: أمممم طيب من الحكم
هيام وهي ترفع يدهاا: أناا لاني أكبر وحدة فيكم ولأني حاامل فــــــــ بكون أنا الحكم
رغد وهي ترفع يدها: أنا بعد أبي أكون الحكم يعني بتم مع هيام
البنات: طيب
غرور وجنان و شوق << فريق
نورة ومرام وهنادي << فريق
هيام: أنا أبي أي شي كان نبات جماد حيوان أي شي
رغد: ويبدأ بحرف الصاد
البنات: أوكو
نورة: شنو راح تكون الإشارة
مرام وهي تفكر: أمممممم أي الإشارة بتكوون إيييييييييهاااااااااااااااااا
البنات: هههههههههه اوكو
وتفرق كل فريق جهة.. غرور وجنان و شوق راحوا فوق في الطابق الثاني .. نورة ومرام وهنادي راحوا يدورون في الطابق الأول إلي هم فيه
--------------------------------------------------------------
الطابق الثاني
كل وحدة فيهم تفرقت عن الثانية .. غرور دخلت غرفة سعد << الأخت ماخذة راحتهااا .. و شوق دخلت غرفة سلطان<< هي ما تدري غرفة منو بل أساس .. و جنان راحت للمطبخ المفتوح
وكل وحدة منهم قاعدة تدور
--------------------------------------------------------------
في الطابق الأول
نورة ومرام وهنادي راحوا المطبخ العود وقاموا يحوسون ويدورون على أشياء تبدا بحرف الصاد وما خلوا مكان ما حاسوا فيه
--------------------------------------------------------------
في القسم الثاني
قاعدة تدور في الغرفة جافت صور عند المنظرة استانست واخيرا لقت شي يبدأ بحرف الصاد .. مدت يدها علشان تاخذهم بس سمعت صوت ما تدري ليش خافت وقررت إنها تنخش .. انخشت تحت السرير .. دخل الغرفة وجاف النور مفتوح توقع إنه أمه يوم رتبة غرفته وطلعت ونست النور مفتوح .. راح وقعد على السرير وقعد يدور تلفونه لقاه تحت مخدته وكان سايلنت وجاف كم مسكول من حمدان ابتسم وسوى التلفون عام وتوه بيطلع من الغرفة دق تلفونه جاف المتصل "خلووود" ابتسم بخبث ورد وسكر باب غرفته وقعد على السرير
سلطان وهو يسوي مشتاق: ألووو
خلود بصوت دلع: ألووو
سلطان: هلااا والله بصاحبة أحلى ألووو .. شخبارج عمري
خلود وهي تتصنع الضحكة: ههههه الحمدالله .. إنت شخبارك عمري
سلطان وهو يكتم ضحكته: أنا تمام أسأل عنج
خلود: سألت عنك العافية .. أمممم أقول حبي
سلطان: قولي فديتج
خلود: متى أقدر أشوفك ترااااني مشتاااااقة لك موووت
سلطان: أمممم شرايج بعد إسبوعين لأني مشغوووول واااايد هالإسبوعين
خلود: أوووكوو خلاااص صار بعد إسبوعين أشوفك
سلطان: إن شاء الله ..(سمع صوت إزعاج عندها) شنو الإزعاج إلي عندج
خلود: هذولي هلي وصلوا .. يلااا حبي الحين أنا مطرة أسكر باااي
سلطان: بااي حبي
سكر سلطان من خلود وهو يضحك: ههههههههه والله هالبنت غبية .. بسرعة ينقص عليهااا ..
قام من على السرير وطفى النور وطلع وقبل لا يسكر الباب سمع صوت لف يدور بعيونه بس مالقى شي حرك كتفى وطلع وسكر الباب .. بعد لحظات طلعت من تحت السرير وفتحت الباب بشويش وما جافت أحد .. ردت سكرت الباب وشغلت النور و راحت عند المنظرة وخذت الصور وقعدت تطالع فيهم ابتسمت بسخرية .. وبعدها طفت النور وطلعت وسكرت الباب
--------------------------------------------------------------
في المطبخ
خلصوا نورة ومرام وهنادي وقرروا يوقفون اللعبة.. راحت مرام بسرعة حق هيام ورغد وقالت بصوت عالي إييييييييييييييييييهااااااااااااااااا
هيام و رغد وهنادي ونورة: هههههههههههههه
بعد لحظات نزلوا غرور وجنان و شوق .. وكانت أكثر وحده فيهم عندها أشياء هي غرور
هيام وهي توقف: طيب أنا راح أحسب حق غرور وجنان و شوق .. ورغد راح تحسبين حق نورة ومرام وهنادي
رغد وهي تبتسم: طيب
هيام وهي تحسب حق البنات جافت أكثر الأغراض حق سعد ابتسمت وقالت: أي وحده فيكم كانت بغرفة سعد
غرور وهي تحط اصبعها على شفاتها وتقول بطفولية: أنااا
هيام وهي تطالع رغد المشغولة مع الباقي: رغد لحقي على أختج ما خلت شي في غرفة ريلج
رغد بخجل بس ما حبت تبين: ليش شسالفة؟؟
البنات عرفوا انها مستحية بس تسوي نفسها عاادي .. مرام كانت فرحاانه لأنه هي ونورة وهنادي فااازوا في اللعبة وسوت لهم حفلة قعدت تصاارخ وتناااقز<< الأخت مو مصدقة خخخخخخخ أمحق
--------------------------------------------------------------
في الميلس
يبي أي شي يخليه يطلع من الميلس ويدخل داخل البيت علشان يطالعهااا يحس إنه مشتااااق لهااا فقرر يدق على هيام وتدبره
رفع تلفونه ودق على هيام مرة ومرتين وثلاث <<< الأخت في خبر كان ولا تدري عنه
في النهاية مل وسكره.. سعد وهو يتهفهف: أفففف ما منها فايدة هيامووو
--------------------------------------------------------------
بعد اسبوع .. ما صارت أحداث تذكر غير انه حمد لقى بالصدفة صور خلود عند واحد من الربع كانت مابينهم علاااقة .. وقرر يستغل الفرصة وتصل في نفس اليوم حق نورة وطلب رقم خلود علشان يقابلها وينهي السالفه.. أما سلطان طول وقته مغازل التلفون على أذونه 24 ساعة...سعد ورغد ما بقى شي على زواجهم و ما يمر يوم ما يكلمون بعض ... مرام يوم درت عن جاسم وسارة صارت كل يوم تتصل على جاسم علشان تعرف كل الجديد أول بأول ... جاسم وسارة عايشين قصة حب وقرروا بعد ما يتخرجون على طول جاسم راح يتقدم لها ... اما مصعب يحس انه مخنوق لانه ما بقى شي على ملجته من هنادي ... أما هنادي ومرام كانوا حاطين بالهم على نفسهم وايد لانه أبتدت الإمتحانات النهائية ويبون نسب عدله لانهم آخر سنه ... أما مي فما زالت على نفس حالتها كل ليله تقفل على نفسها الغرفة وابوها وربعه الخمة يسكروون في البيت لين نص الليل وسعات يباتون في بيت ابو مي
-----------------------------------------------------------
في بيت بو مشاري (الساعة 6 المغرب)
في الصالة كان الكل قاعد ما عدا هنادي إلي كانت في غرفتها تدرس لأنه عندها امتحانات ..
أم مشاري وهي تسكر من عند أم مصعب: إن شاء الله بكرة الساعة 4 ونص العصر .. يلااا مع السلااامه بحفظ الرحمن
مشاري وهو يشرب عصير: من بكرة راح تبلشون التجهيزات
أم مشاري وهي تهز راسها: إي إن شاء الله
ابو مشاري: بس مو كأنه تو الناس
جنان: يبا الله يهداك .. شنو تو الناس ما بقى لها إلى 4 امتحانات وتخلص وبعدهاا بيومين راح تصير ملجتها
أم مشاري بتأيد : صح كلاام جنان .. و لأنها هي مشغوله بالامتحانات قررنا أنا و أم مصعب وجنان نسوي كل شي وما يبقى على هنادي غير الفستان والاكسسوارات و أعتقد 3 أيام تكفيها لانها يوم بتخلص الامتحانات على طول راح تكون في السوق تتجهز
ابو مشاري وهو يقوم: على بركة لله .. مشاري جاسم
مشاري و جاسم: سم يبه
ابو مشاري : سم الله عدوكم يلااا قوموا توضوا ولحقوني على المسجد
مشاري وجاسم وهم يقومون: إن شاء الله
ابو مشاري: و انتوا يلااا قوموا بعد وبلااا كلاام فاضي ترى لاحقين عليه
جنان و أم مشاري وهيام: هههههه إن شاء الله
--------------------------------------------------------------
في الشركة الـ... (في نفس الوقت)
غرقان في الشغل ولا هو يدري عن أحد .. يالس في مكتبه إلا مملوء بالأوراق المتناثرة على المكتب .. خذاله فترة وهو على هالحال يحاول يلهي عمره عن التفكير بالملجته .. إلي ما بقى لها غير إسبوع .. رن تلفون المكتب .. وهو ما كان له نفس .. بس إطر يرد
مصعب بدون نفس: نعم
يوسف السكرتير: أحم .. أنا متصل لك علشان أذكرك بموعد الإجتماع
مصعب رفع يده وضربها على الخفيف على جبينه بمعنى "نسيييييت": أي صح تذكر والله زين ذكرتني
يوسف السكرتير: حااظرين ..أفاا عيلك
مصعب: تسلم والله
يوسف: الله يسلمك .. يلااا OK مع السلامه
مصعب: مع السلامة
سكر مصعب ورد مرة ثانية لحوسة الأوراق .. دخل سعد المكتب وفي يده فايلات .. كان قاعد يقراها .. جلس على الكرسي وحط الفايلات على المكتب وقال بتنهيد من التعب: آآآه متى يخلص الشغل.. لف على جهة مصعب لقاه مندمج في الأوراق ابتسم وهو يقول: كل هل إندماج علشان تخلص الشغل قبل الملجه هااا .. علشان يحلالك الجو مع العروسة .. (غمز له وهو يضحك) .. يلااا أعترف هههههههه
مصعب ما حب يبين إنزعاجه من موضوع الملجة فإبتسم مجاملة ورد يطالع بالأوراق إلي بيده .. أما سعد فكان طفشان من كثر الشغل وقرر ياخذ له Braek ويسولف مع حبيبة القلب .. رفع تلفون المكتب ودق الرقم وهو يلهث من الشوق <<< إلي يقول خذاله سنة ما كلمها مو كأنه من صباح الله خير مقعدته ومسولفه معاه
--------------------------------------------------------------
اليوم الثاني في الجامعة الـ... (الساعة 3 العصر)
في canteen .. ماسك الصور في يده وهو يبتسم بخبث .. حمد في قلبه "هههههههههههه والله وطحتي يا خلود ومحد سما عليج هههههههههه" قطع عليه سرحانه صوت خلود إلي خذالها ربع ساعة تنتظر منه أي كلمة تعبرها
خلود: حمـــــــــــــــــــــد ؟؟
حمد وهو يطالعها ويهز راسه "يعني أعصابج": أقول استريحي خلود وهي تقعد وبكل ثقة: وهذا أنا قعت يلااا قول لي وخلصني شتبي
حمد "هههه واثقة هاا طيب صبرج علي" : هـــــه تدرين انج مسكينه
خلود وهي تهز راسه بعدم الرضى: لا لا لا أنا مو مسكينه انت المسكين وبعدين لايكون مناديني علشان تقعد تسب فيني تراني ما اسمح لك فاهم
حمد وهو يطالعها من فوقها لين تحتها بحتقار: طيب يا واثقة أنا ما أبي اطول في الموضوع لأني أبي افتك منج ومن ويهج .. جوفي هذي الصور إلي عندي هذي صورج مع حبيب القلب مـــــاجد (رمى الصور عليها وهو يترقب ردت فعلها)
خلود بصدمة وهي تطالع الصور: من وين لك هالصور
حمد وما زالت الإبتسامة على ويهه : من مـــــــــــاجد حبيب القلب السابق
خلود ما زالت بصدمة وهي تطالع بالصور:........
حمد وهو يقوم: سمعيني زين اذا ما وصلت لي صور بنت عمي نورة بكرة راح افضحج في الجامعة كلها راح اخلي فضيحتج على كل لسان سااامعه .. فكري عدل عن اذنج
طبعا حمد مشى عنها وهو يضحك ويحس بالإنتصار
--------------------------------------------------------------
ان شاء الله كان البارت طويل ونال اعجابكم يلااا ابي تفاعلكم وتوقعاتكم ^_^
|
19-04-10, 05:17 AM
جديد مواضيع قسم القصص المكتمله
العرض العادي
