كاتب الموضوع :
النهى
المنتدى :
القصص المكتمله
الجزء الـ 40
علي: خليها عنج
حصه: خفيفة
علي: والله حصوه بتنظربين
حصه: حلوة هاي بنظرب .. يديده
علي: هيه يديده .. وبتستوي جديمة من اليوم ورايح لو تميتي ع هالحركات
حصه: والله خفيفة ما فيها شي .. شلها وشوف
علي: اوكيه خفيفة خليها ما عليه ...
حصه: عفاري اختيه خلاص ما بتيي
علي: احمد قال لا .. وانتي رمستيها .. بعد
حصه: هيه قالت لي .. تبا اتم ويا رملة حليلها
علي: بس احمد يقول بيردون الاسبوع الياي احتمال
حصه: صدق ؟
علي: هيه
حصه: يعني ما بيطولون
علي: لا لا ... لان العملية خلاص .. صح انها ما برت .. لكن فترة اسبوعين تكفيها يوقف الدم .. والخياطة طبعا مب في اسبويع نولا حتى شهر بتبرى ..
في صوب ثاني ...
محمد: ويهج منور ..
سهام ( ابتسمت): تطنز
محمد: لا والله .. ما شاء الله عليج .. صدق منوّر ..
سهام: وين حصيص ؟
محمد :الحين يايه ورايه
حصيص: طق طق طق من عند الباب .. انا حصيص
محمد: المشاغبة
حصيص: طالعة على ابويه
سهام: هههههه تعالي .. حياتي
حصيص: شخبااااااارج .. علوووووومج
سهام :الحمدلله بخير .. دام بنتي حبيبتيه بخير
حصيص: ويه ويه ويه .. والله اليوم امايه محلوة ..
سهام: شوه سالفتكم اليوم ؟
حصيص: ليش حد قالج من قبل ؟
سهام: ابوج
حصيص: هيه عاد ابويه يوم يطالعج انتي .. ينسى حريم الكون كلهن
محمد: يالطفسة وانا متى تذكرت حريم الكون عسب انساهن اليوم
سهام: ههههههه خلاص خلاص لا تظاربون
محمد: هاي بنتج والله راعية مشاكل
حصيص: امايه تعرفين ام عيون خضر
سهام:اممممم خليني اذكر اسمها
حصيص: نسيتي اسمها ؟
سهام: امممم لا .. لحظة .. هند
حصيص: هيييييه هند ..
سهام: بلاها ..
حصيص: متولهه عليها
سهام: وليش ما تزورينها
محمد: احيدج تفرين المستشفى فر .. تسيرين غرب وتردين شرق ..
حصيص: لا تدرون .. هذا اخوها الوسيم .. الحين ما بسميه وسيم .. بسميه الخقاق
محمد: عيب عليج .. ريال كبر ابوج
حصيص: هو كبرك
محمد: لا انا اكبر منه بسنة ..
حصيص: وايد عليك انزين
محمد: صدق ما تستحين
سهام: هههههههه انته معلمنها
محمد: انا معلمنها تقولي وايد عليك !
سهام: انزين خلها تكمل الحين
محمد: كملي .. امج مستانسة بسوالفج
حصيص: فديتها والله ... انزين يلعوز عفاري
سهام: كيف يعني يلعوزها ؟
حصيص: كله يوم يشوفها روحها فالممر .. يلعوزها ويقولها اشيا تزعلها وهي حليلها تصيح
محمد: اصلا هذا من شكله يبين عليه ما ادري كيف ..
سهام: محمد لا ترمس عن الناس جذه
محمد: لا بس صدق .. انا حسيت ان في شي من تصرفات ونظرات احمد له ..
حصيص: هيه حليلها وايد صاحت هذاك اليوم
محمد: وانتي ما تدخلين
حصيص: انا ما يخصني ..
محمد: هيه .. تادبي
حصيص: بابا بلااااااك والله ما يخصني ولا سويت شي
سهام: خلاص انزين ... عيب ترمسين ابوج جذه .. يوم يقولج شي تقولين ان شاء الله
حصيص: ان شاء الله
في مكان ثاني بعد ..
حزينة صدق ومن الخاطر .. وما تدري شوه السبب .. واخوها حس انها ردت لحالتها الجديمة ..
بدر: الاسبوع الياي رادين البلاد
هند: زين
بدر: بلاج مب مستانسة ؟
هند: بلى
بدر: انا اشوف العكس
هند: عفرا ما مرتني من هذاك اليوم
بدر: وانتي شوه تبين بها ؟
هند: انا ما صدقت اشوف حد ويايه هني
بدر: والله اللي ما يباك لا تصيح تباه
هند: بس انته حتى ما قلت لي شوه فيها ؟
بدر: ما فيها شي ..
هند: ولا حتى حصيص مرتني
بدر: CNN ..
هند: انا فيه رقاد
بدر: رقدي ...
نفس الوقت .. سمعوا صوت الباب ..
حصيص: السلام عليكم
هند: هلا وعليكم السلام .. والرحمه
بدر: مرحبا ام لسان
حصيص: هلا الخقاق اقصد الوسيم
اطالعها بدر بنظرة .. حصيص زاغت من نظرته ..
هند: حصيص حبيبتيه ..
حصيص: شوه ؟
هند: وين عفرا؟
حصيص: قبل ما اقولج وين عفرا يايه انا اصلا موصيني اقولج شي وعقب انتي اسأليني
بدر: وكالة CNN
حصيص: الحمدلله ع الاقل كل حد يحبني
بدر: شوه قصدج ؟
حصيص: ما شي ..
هند: قولي شوه فيج ؟
حصيص: انا ما فيه شي .. بس خالوه حصة حرمت عمي علي .. هي وعمي علي الليلة بيردون البلاد
هند: صدق ؟
حصيص: هيه .. ويالله بسرعه أسأليني شوه سؤالج ؟
هند: عفرا جيه ما تيي هني ؟
حصيص: ليش اخوج ما قالج شوه سوى بها ؟
هند ( اطالعت صوب اخوها) : جيه شوه مستوي
بدر: انتي ايه مب تظهرين عني اشاعات الحين
من طريقة بدر .. حصيص زاغت ..
حصيص: اقولكم انا بسير مع السلامه
وظهرت حصيص من الحجرة .. لكن ما لحقت تسير أي مكان . لان بدر ظهر وراها ع طول
بدر: انتي ايه ام لسان وقفي .. وتعالي هني
حصيص ( بخوف ): شوه تبا ؟
بدر: شوه قصدج بالرمسة اللي قلتيها ؟
حصيص: أي رمسة ؟
بدر : تقولين حق ( قلد حصيص) ام عيون خضر اخوج ما خبرج عن عفرا
حصيص: هيه جيه ما خبرتها
بدر: عن شوه ؟
حصيص: انك وايد تغايظها وانك تقهر بها وتزعلها وتصيحها
بدر: انا !!
حصيص: عيل منوه يدي !
بدر: لا تقلين ادبج
حصيص: آسفة
بدر: وينها هي الحين ؟
حصيص: شدراني ؟
بدر: حصيص ! ام لسان !
حصيص: والله ما اعرف وينها .. انا سلمت ع امايه وسرت صوب خالوه حصه وقالت لي ايي صوب هند واقولها جذه وبس
بدر: وهي جيه صاحت
حصيص: منوه ؟
بدر: عفرا
حصيص: ما ادري
بدر: قولي
حصيص: تقول انك انته وايد تلعوزها وتتعمد تفشلها وتجرحها برمستك ..
بدر: هي قالت جذه ؟
حصيص: هيه هي قالت .. واحمد وايد معصب
بدر: ليش معصب ؟
حصيص: لان عفرا يايه هني وياه .. يعني هو مسؤول عنها
بدر: انا ولد خالتها واجرب لها منه هو اللي ما ادري شوه يقرب لها
حصيص: ريل اختها
بدر: ويعني
حصيص: يعني جيه انته ما يبتها وياك ... وهو يابها .. والله اللي اييبها هو اللي يكون مسؤول عنها ..
بدر: جنج مصختيها ..
حصيص: لا خلاص .. بسير انا ..
بدر: سيري
حصيص: ما تباني اوصل شي حق حد
بدر: شكرا وكالة CNN
حصيص: عفوا .... يا خقاق
وسارت حصيص بسرعه عن تنجرح هي الحين برمسة بدر .. وهي ماشية دعمت لها واحد
حصيص: آسفه آسفه آسفه
احمد: عادي عادي عادي
حصيص: اوه .. عمي احمد
احمد: من وين يايه ؟
حصيص: من عند الخقاق
احمد: منوه بعد خقاق ؟ ... لقب يديد
حصيص: هذا اللي كان لقبه الوسيم
احمد: قصدج بدر ؟
حصيص: هيه
احمد: شوه فيه بعد ؟
حصيص: ما شي .. بس انا سرت اقول حق اخته عن خالوه حصه
احمد: وانتي لازم يعني !
حصيص: والله هي قالت لي
احمد: ههههههه انزين
حصيص: عمي احمد صدق انتوا بتسيرون الاسبوع الياي بعد ؟
احمد: منوه قالج ؟
حصيص: انا سمعت ...
احمد: من منوه ؟
حصيص: سمعت وخلاص
احمد: يمكن
حصيص: حظكم ..
احمد: انتوا متى بتسيرون ؟
حصيص: ما ادري .. امايه متى بتطيب
احمد: ان شاء الله جريب
حصيص: ان شاء الله .. بس عمي احمد
احمد: آمري ..
حصيص: الله يخليكم يوم بتردون عطوني ارقامكم بتصل بكم برمسكم .. و انتوا اتصلوا بي .. والله ملل بيستوي ..
احمد: تبيني اردج البلاد ويانا
حصيص: لا .. ما برد
احمد: ليش ؟
حصيص: ما بودر امايه وابويه رواحهم هني
احمد: تدرين شوه
حصيص: شوه ؟
احمد: ان شاء الله بنتي تكبر .. وتستوي شراتج
حصيص: انته عندك بنيه ؟
احمد: هيه .. توج تدرين
حصيص: هيه والله توني ادري
احمد: بنيه حلوة شراتج
حصيص: شوه اسمها ؟
احمد: ميثا
حصيص: الله حلو اسم ميثا .. كم عمرها ؟
احمد: بعدها صغيرة .. سنة وشوي
حصيص: الله حلووووو
احمد: تبين تشوفينها ؟
حصيص: وين ؟
احمد: اصبري
وظهر احمد بوكه من جيبه .. وفتحه .. وروى حصيص صورة بنته ..
حصيص: بنوته كتكوووووته حبيبتيه .. حلوة
احمد: هههههه طالعة ع امها ..
حصيص: امها حلوة ؟
احمد: هيه
حصيص: هيه صدق امها تستوي اخت عفاري وخالوه حصه
احمد: هيه .. بس بيني وبينج احلى عنهن لا تخبرينهن
حصيص:هههههههه انزين ابا اشوفها
احمد: هو انا ما اروي حد صورة حرمتيه
حصيص: يالله عاد انا بنيه مب ولد
احمد: قصورج بعد ولد وتسألين عن صورة حرمتيه
حصيص: انزين انا الحين بنيه ابا اشوفها
احمد: شوفيها ..
وظهر صورة آمنة من ورا صورته ..
حصيص: الللللله حلوة
احمد: احم احم
حصيص: وايد حاطه ميكب
احمد: لا لا.. هذا ميكب خفيف
حصيص: شوه خفيف !
احمد: والله ما حاطه شي غير قلوز .. وجحال .. وشوية بلشر
حصيص فاتحه ثمها من ألمانيا للامارات ..
احمد نقع من الظحك .. عرف ليش هي مستغربه ومنصدمه .. لانه يعرف اسامي الاشيا ...
احمد: هههههه بلاج ؟
حصيص: ابويه وايد عليه يعرف الروج ويقوله ديرم يوم يطنز
احمد: لا حبيبتيه خبرة .. لان حرمتيه تحب شي اسمه ميكب ..
حصيص: واقولك انها حاطه ميكب
احمد: والله حاطه خفيف .. هي حلوة بدون الميكب
حصيص: عيل جيه تحط ؟
احمد: بعد .. تحب الميكب ..
حصيص: بس والله حلوة
احمد: ادري ادري خلاص ييبي الصورة
وير الصورة عن حصيص ..
حصيص: عمي احمد ليش حاط صورة حرمتك فالبوك .. بيسرقونها
احمد: منوه بيسرقها .. اقص ايده
حصيص: حد القصاص هذا فالسعودية مب هني
احمد: لسانج !!
حصيص: والله انزين صدق .. انزين لو ضاع البوك
احمد: انا ما اشل صورتها اصلا .. بس لان هني وايد مشتاق لها .. فـ شليت صورتها فالبوك
حصيص: هيييييييييه
احمد: انزين الحين ما بتسيرين صوب ابوج ؟
حصيص: لا بيي وياكم ..
احمد: انا بسير عند رملة
حصيص: هيه بيي وياك ..
ومشن احمد وحصيص وعاد حصيص وسوالفها اللي ما تخلص وتظحك .. واحمد ممشي وياها
ثاني: وين انزين ؟
ام زايد: ما ادري ما ادري دور .....
ثاني: وجدته
ام زايد: زين عيل يالله انزل
ثاني: اوجكييييييه مام
نزلت ام زايد تحت ووراها ثاني .. المتفيج اليوم ..
ثاني: من متى هالمكسرات هني ؟
ام زايد: امس
ثاني: انا اقول .. ما تشترون شي في هالبيت
ام زايد: جديه انته تنزل تحت عسب تاكل
ثاني: انا انسان بزنس
زايد ( نازل من فوق): امايه وين ابويه ؟
ام زايد: طلع
ثاني: وين بتسيرون ؟
زايد: ولا مكان وين بنسير ؟
ثاني :ما ادري كاشخ ..
غاليه ( يايه من برع ): خللللللصت
ثاني: انتي شوه تسوين من الصبح ؟
ام زايد: حطيتيها فالثلاجه ؟
غاليه :هيه
زايد: شوه مسويه ؟
غاليه: شي تحبه
ثاني: جيز كيك
غاليه: هههههه هيه
ثاني: حلفي
غاليه: يبالها حلف
ثاني: والله احبج غلوي . تعرفين باللي في خاطريه
زايد: لا تصدق عمرك .. انا طالب منها امس
ثاني: بعد طلبات
ام زايد: اظاربوا الحين
ثاني: لا نظارب ولا شي .. انا اصلا معروف ولد البطة السوده في هالبيت
غاليه: محد يقولك تحبس عمرك فالحجرة 24 ساعه
زايد: وايد لا تتفلسف
ام زايد: وين البشكارة
غاليه: هناك
ام زايد: بسير اقولها تسوي بسكوت .. ابوج بيي عقب وقال اباه اليوم
ثاني: قايل انتي تسوينه
ام زايد: والله انا ما فيه .. خل هي تسوي وهو شدراه
ثاني: بخبر عليج
ام زايد: ما في حد يخبر عليك انته ( وسارت )
ثاني: والله عطتني فالويه
زايد: تستاهل
غاليه: اقول
ثاني: شوه تبين
غاليه: ما بطلب منك
زايد: ما عليج منه .. قولي شوه تبين ؟
غاليه: ابا اسير بيت عمي يوسف اليوم
زايد: واخيرا ً....
ثاني: هيه والله من زمان انا ما ساير له .. زين بيسوي بي بيقطعني
غاليه: بس بدون محد يكون هناك
زايد: اليوم محد بيكون هناك .. على ما اعتقد ..
غاليه: احسن ..
ثاني: متى بتسيرون ؟
غاليه: نسير من وقت .. عسب نرد من وقت
زايد: شوه عندج ؟
غاليه: ولا شي .. بس فيه رقاد من الحين
زايد: خلاص عيل سيري تزهبي ويالله بنسير
ثاني: لا اترييوا
زايد: شوه عندك ؟
ثاني: اسوي داونلود حق البرنامج
زايد: والله فاضي وانا قلت شي الحين
ثاني: اوكيه لاص بهد اللاب توب والنت جذه مفتوحين ..
زايد: اصلا ومنوه قالك ان بنترياك .. كيفك بتيي نش .. والا يلس مكانك
ثاني: بيييييييي ... بيييييييي
غاليه: تعقد ثاني هههههه
ثاني: من اخوج المعقد
غاليه: ما يخصك في اخويه ...
ثاني: اقولج قومي قومي .. عني خلني اسير اكشخ
زايد: ثاني ما بترياك اقولك من الحين .. بسرعه تخلص
ثاني: انزيييييييييين
في بيت ام هزاع ....
آمنة .. ردت بيت ابوها ... لان فيها حمّى .. وتعبانه ...
كانت طايحه ع الشبرية .. رن مبايلها ..
آمنة: الو
احمد: هلا والله
آمنة: السلام عيكم
احمد: وعليكم السلام ... شحالج ؟
آمنة: الحمدلله بخير .. انته شحالك ؟
احمد: الحمدلله ... اصبري خلينا نتحاسب
آمنة: على ..
احمد: انتي جيه ما تقولين لي انج في بيت ابوج ...
آمنة: منوه قالك ؟
احمد: ناعمه اختيه وبالغلط
آمنة: وشوه قالت لك بعد ؟
احمد: ما قالت شي .. لكن انا حاس ان في شي .. بلاج؟
آمنة: ما فيني شي ..
احمد: امون مب عليه
آمنة: انزين ما فيني شي
احمد: احلفي
آمنة: وانته ع كل شي احلف لك
احمد: احلفي انزين
آمنة: ما بحلف
احمد: يعني في شي
آمنة: تعب بسيط
أحمد: امون قولي شوه فيج ..
الله ياخذ عدوج يا ناعمه .. ما قدرتي تدسين عنه .. هاليومين اني رديت بيت ابويه .. لو قلت له ان فيه حمى بيحاتي الحين ... وبيحشرني بالاتصالات ... بس ما في مجال اقص عليه .. بيقص راسي يوم بيرد .. اقوله وامري لله ..
احمد: قولي ..
آمنة: حمى
احمد: فيج حمى ؟
آمنة: هيه
احمد: من شوه ؟
آمنة: ما ادري .. الجو شويه متغير
احمد: وتعبانه وايد ؟
آمنة :لا الحمدلله الحين احسن
احمد: شخبارج الحين ؟
آمنة: الحمدلله
احمد: وميثا اخبارها ؟
آمنة: الحمدلله
احمد: ما فيها شي ؟
آمنة: لا الحمدلله
احمد: سرتي العيادة او المستشفى
آمنة: هيه هزاع اخويه وداني
احمد: وشوه قالوا لج ؟
آمنة: ما شي ... بس ادوية وان شاء الله بطيب ..
احمد: وجيه ما خبرتيني .. تخليني ادري من برع ..
آمنة: ادري بك بتم تحاتي وتسوي .. انا هني فالبلاد .. كلهم حولي .. والله عادي ... وتعب خفيف
احمد: امون انا ادري بج انتي .. يوم الموضوع يكون صحتج ما تهتمين وايد
آمنة: لا هالمرة عند امايه وهي مهتمه
احمد: الله يخليج . لا تخليني احاتي زيادة
آمنة: احمد لا تحاتي والله .. عادي ..
احمد: انزين بخليج الحين ترتاحين.. وبتصل بج عقب ساعتين او ثلاث
آمنة: بديت الحين
احمد: ما يخصج فيه .. انا كيفي متى بتصل ...
آمنة: اوكيه خلا لا تعصب
احمد: مب معصب ... بس تعرفيني عدل
آمنة: هيه اوكيه .. عسب تطمن ... خلاص خذ راحتك حتى لو كل 5 دقايق بتتصل اتصل
احمد: هيه جيه اباج .. سلمي ع الكل
آمنة: الله يسلمك
احمد: فمان الله
آمنة: مع السلامه .. الله يحفظك ..
بند احمد عن آمنة ..
وسمعت آمنة صوت الباب ....
آمنة: تعال
بو هزاع: يقولون بنتي تعبانه
نشت آمنة ويلست .. واعتدلت ..
ىمنة: هلا ابويه
بو هزاع: خلج خلج والله ترقدين ..
آمنة: لا عادي
بو هزاع: شحالج الحين ؟
آمنة: الحمدلله احسن ..
بو هزاع: اشوف
ومد ايده حطها ع راس بنته ...
بو هزاع: افف .. ابويه ليش ما تهتمين في صحتج ..
آمنة: ابويه الجو متغير عسب جذه مرضت
بو هزاع: تاخذين الادوية
آمنة: هيه
بو هزاع: خلاص تمي هني لين احمد يرد
آمنة: لا .. بطيب ان شاء الله في يومين وبرد
بو هزاع: تكسرين كلامي .. طلب هذا اطلبه منج
آمنة: فديتك ابويه ... والله كلامك على راسي وعيني .. وع هالخشم
بو هزاع: يسلم لي هالخشم ..
آمنة ( أبتسمت ): بس تدري عموه روحها هناك .. بنتها برع البلاد وولدها .. فـ تضايق يوم ما تشوفني ولا تشوف ميثا بعد
بو هزاع: هيه حليلها
أمنة: عسب جذه لازم ارد
بو هزاع: خلاص بس متى ما صحتج تستوي زينه وشويه احسن
آمنة: ان شاء الله
بو هزاع: يالله حبيبتيه .. انا بسير تبين شي ؟
آمنة: سلامتك الغالي
بو هزاع: أي شي تبين خبريني
آمنة: ان شاء الله ..
ونش بو هزاع حب بنته ع راسها وظهر برع ...
ووصل هزاع نفس الوقت ..
هزاع: اختييييييي
آمنة: هلا
هزاع: شخبارج اليوم ؟
آمنة: الحمدلله
هزاع: الحمدلله والله احاتيج من امس .. كحتج كانت مش طبيعية
آمنة: كان ينسمع ؟
هزاع: انا كنت يالسه فالصاله اشوف فلم ..
آمنة: اويه اكيد عيل عسب جيه ابويه ياني توه
هزاع: انزعج من الصوت يعني ؟
آمنة: هيه حليله
هزاع: لا لا عاد من لهالدرجة ما يوصل لحجرتهم
آمنة: والله ما ادري .. انزين وين ميثا ؟
هزاع: ويا امايه برع
آمنة: وين برع ؟
هزاع : شدراني فالحديقة .. عند البشاجير .. عند ما ادري أي ياره .. المهم ويا يدتها
آمنة: بتلعوز امايه الحين
هزاع: كيفها هي ويدتها ينيازون ..
آمنة: اخباره ربيعك ؟
هزاع: منوه مروان ؟
آمنة: هيه
هزاع: تدرين اني مضايق
آمنة: ليش ؟ شوه فيك ؟
هزاع: مضايق عسب عيال خالي سيف
آمنة: بلاهم ؟ احيد ان اخوهم العود هني .. عمر .. فـ يعني كل شي ماشي تمام
هزاع: صح كلامج . عمر هني كل شي كان ماشي تمام.. سافر اسبوعين كل شي ادمر
آمنة: بسم الله شوه السالفه ؟
هزاع: سعيد اللي معرس
ىمنة: ماخذ بدور
هزاع: هيه
آمنة: بلاه ؟
هزاع: متغير وايد .. وايد وايد متغير نحن ويانا عادي يوم يشوفني هو سعيد وما تغير .. اللهم اني ما اشوفه كثر ما كنت اشوفه قبل
آمنة: انزين .....
هزاع: يوم عمر كان مسافر الحج .. اظارب ويا اخوانه يبا ياخذ حجرة ابوه وامه
آمنة: حجرة خالي سيف وحرمته ؟
هزاع: هيه تخيلي .. عاد مروان وعبدالعزيز نشوا عليه .. وكلمه من هذا وكلمة من هذاك .. واظاربوا
آمنة: اويه ..
هزاع: ومن فترة بعد مظارب وياهم عسب سالفة بعد
آمنة: معقوله ؟!
هزاع: والسبب في هذا كله حرمته
آمنة: حرمته شلها ؟
هزاع: هي سبب المشاكل كلها .. هي اللي تحن ع سعيد وتقوله جذه وجذه وجذه
آمنة: وانته شدراك ؟
هزاع: مروان يقول
آمنة: لا تحطون في ذمتكم .. يمكن سعيد روحه يقول
هزاع: مستحيل .. سعيد اصلا كان لو اخوانه يبون روحه يقول فداهم .. الحين مروان يقول كارهنا عفانا الله ولا يسأل عنا وخصوصا مروان وعبدالعزيز
آمنة: وعمر وينه ؟
هزاع: عمر ضايع بينهم ..
آمنة: انزين خبر امايه
هزاع: لا انتي مينونه ؟... لو امايه درت والله بتنجلب الدنيا اكثر
ىمنة: بس ما يستوي جذه .. يتمون مظاربين
هزاع: المشكلة اللي مستويه واللي بتفضحهم بعد ان حرمت اخوهم شلت اغراضها وسارت بيت اهلها
آمنة: هاي خبلة !
هزاع: المدام تبا بيت كامل تحت تصرفها
آمنة: تخبلت هاي .. نحن الحين من متى معرسين ولا وحده عندها بيت .. من وين اييب الولد ؟!
هزاع: ع حسب كلام مروان .. شكلها الا تبا تعيد السالفه الجديمة .. وتبا سعيد ياخذ نصيبه من خالي يوسف ..
انصدمت آمنة .. صدق خبلة ... ولو سوتها وسعيد مشى وراها .. والله لتنرد السالفة الجديمة من اول ويديد .. وما يندرى هالمرة شوه بيستوي بعد .... هم ما صدقوا السالفة الجديمة صكروا عليها رغم ان خوالها مظاربين للحين عسبها .. وخالها الثالث الله خذ امانته .. بعد ترد هاي وتفتحها وتدمر العايلة من اول ويديد ............!
طارق: وين وين
سلامة: يبا يسير برع الحين
طارق: ما في برع
ويلس عامر عند الباب وقام يصيح ..
سلامة: انته معودنه الحين انته توديه برع
طارق: تعالي انزين ويايه بنسير نيلس فالحديقة
سلامة: مب متفيجه
طارق: متى تفيجتي عسب الحين تتفيجين ..
سلامة: انزين انته سر وياه وانا يايه
طارق:نشي الحين ويايه
سلامة: في حد ؟
طارق: ما في حد ... واليوم محد بيي ....
سلامة: لاني ما بلبس شيلة صلاة .. بلبس سكارف
طارق: لبسي .. يالله نسير ..
ونشت سلامة .. وطارق وياها .. شل ولده وساروا صوب الحديقة .. يلسوا هناك ..
سلامة: ما تحس بهوا بارد
طارق: نسيم نسيم
سلامة: بر والا بحر
طارق: بر
سلامة: ما احيدك مسكنني ع البحر
طارق ( اطالع صوبها وابتسم )
سلامة: ليش تظحك ؟
طارق: ما اظحك ولا شي
سلامة: بلى
طارق: لا والله ما فيني شي ..
سلامة: لا لا تحطه ع الارض كله حشرات
طارق: خل يستوي ريال
سلامة: ريال بحشرات تقرصه والا ياكلهن
طارق: ههههههه لا لا
سلامة: شله يا طاااااارق
طارق: هههههه شليناه .. شليناه ..
سلامة: شو فوا شوفوا بدا يعاند
بدا عامر يصيح .. لانه شلوه من ع الارض
طارق: ط والله يظرب
سلامة: هذا محد غير سالم معلمنهم
طارق: من زمان ما شايفين ميثا بنت آمنة
سلامة: انته اتصلت في احمد ؟
طارق: انتي ترمسين اختج
سلامة: لكن انته لازم تتصل في ربيعك
طارق: امس مرمسنه ..
سلامة: شوه قال ؟
طارق: ما شي .. كلهم بخير
سلامة: انا عفاري اختيه اتصل بها ما ترد عليه .. سألت عنها ؟
طارق: هيه .. يقول بخير كلهم بخير .. يمكن هي ناسية المبايل والا شي
سلامة: ما ادري بها والله
طارق: من متى ما ترد عليج ؟
سلامة: اليوم ..
طارق: بس اليوم ؟
سلامة: هيه
طارق: وانا اتحسب من يومين ثلاث
سلامة: لا شوه تباني اموت
طارق: بسم الله عليج .. جيه تموتين عسب ما رمستي اختج ؟
سلامة: هيه والله ... تخيل ما ارمسها
طارق: عادي ..
سلامة: لا والله مب عادي ...
طارق: شوفي يعني انا وايد عادي
سلامة: انته مشكلتك
طارق: هههه شوه مشكلتي
سلامة: مشكلتك ما ترمس اخوانك خواتك وما ادري منوه
طارق: انزين بلاج معصبه هههههه
سلامة: انته تقهر وبعد تظحك عليه
طارق: ما اظحك عليج اظحك ع عمريه
سلامة: ليش ؟
طارق: لان مشكلتي
سلامة: فاضييييييييي .. والله مستوي احمد اليوم
طارق: ههههه زين .. ساد الفراغ
سلامة: الحين بتحسدنا .. انا وخواتي
طارق ( أبتسم): الله يخليكن حق بعض
سالم: انني قااااااااااااااااااادم
ام هزاع: بس بس يا سالم .. خالتك داخل راقده تعبانه
هزاع: شوف لو صاحت .. بتنظرب
سالم: ليش ؟
هزاع: لا تصيحها
سالم: ليش ؟
هزاع: استهبل زيادة ... وانا قلت لك .. والله حلفت الحين لو صاحت بتنظرب
شمسة: هد البنيه ..
سالم: ألاعبها
ام هزاع: تلعوزها
هزاع: بتير شعرك
ام هزاع: انته جيه ما ساير الحلاق ؟
سالم: اطول اطول شعري
شمسة: مستخف
هزاع: بوديك الحلاق المغرب
سالم: ما ابااااااااااااااااااااااااااااا ..
هزاع: مب ع كيفك
سالم: ابويه راضي ..
ام هزاع: مطول لسانك
سالم: انزين والله جذه شكلي احلى
ونش سالم سار وقف جدام المنظرة اللي حذال الباب .. ويشوف شعره واونه ويعدله .. ويرتبه
سالم: يدوه .. وين يدي ؟
ام هزاع: راقد
سالم: راقد الحين ؟
ام هزاع: بينش حق صلاة المغرب عقب
سالم: ملل انزين
شمسة: شوه تبا انته ؟
سالم: يعني خالوه آمنة تعبانه مريضة شوه فيها ؟
ام هزاع: حمى ؟
سالم: جيه ياهل تييها حمى
شمسة: جيه بس اليهال تييهم حمى ؟
سالم: هيه
هزاع: انزين .. لو تييك انته زين
ام هزاع: الله ينطب ابليسك يا هزاع .. لا ادعي ع الولد
هزاع: هو يسأل ويقول اشيا غبيه يعني
شمسة: هههههه هو فاضي
هزاع: واااااايد
سالم: انزين جيه ما عادت بنتها
ام هزاع: لا عاد هذا اللي عدلها .. وليش تعاديها تمرض بعض هي حليلها
سالم: تعالي تعالي
وبدت سالم ميثا تصارخ لان سالم رد يلعوزها
شمسة: خلها يا ساااااااالم
سالم: هههههه حلو يوم تصارخ
ام هزاع: امها تعبانه حرام عليك
هزاع: انا قلت لك بتصيح بظربك ..
سالم: شوفي عندي هذاااااا
كان في ايد سالم كاكاو يايبنه من الصينية اللي كانت محطوطه ع الطاولة ..
وميثا سارت عنده تباها ..
سالم: يالله يالله قومي ..
ام هزاع: شوفوا شوه يسوي فيها الحين
سالم: ما بعطيج يالله قومي
شمسة: تعالي حبيبتيه .. تعالي عند خالوه
هزاع: ميثاني تعالي ..
سالم: قومي ..
بصرخه من سالم السخيف ... يلست ميثا ع الارض وقامت تصيح ..
هزاع: والله بتشوف ..
ونش له هزاع .. لكن قبل ما يوصل له .. نش سالم ركظ برع وهو يظحك ...
هزاع: يالهرم
شمسة: هذا وايد سخيف
ام هزاع: تعالي عند يدوه تعالي .. انا بعطيج
زعلت .. ويوم تزعل .. ما تباهم .. تبا امها .. او .. ابوها .. فقط .. لا غير ...
ام هزاع: يالله الحين سكتوها .. تبا امها ..
شمسة: آمنة تعبانه ..
هزاع: ولدج صيحها انتي تسكتينها ..
نفس الوقت سمعوا صوت .. آمنة تزقر ..
ام هزاع: هذي امها نشت ودوها ..
شمسة: ودها هزاع
هزاع: هيه ولدج يصيحها وانتي طايحه هني .. وانا اوديها
شمسة: ههههههه ودها الحين لا تذلنا ..
نش هزاع شل ميثا وداها صوب امها ..
دق الباب وفتحه ...
آمنة: ييبها ... حبيتيه ط الدموع
هزاع: هذا سالم صيحها
آمنة: حرام عليكم
هزاع: والله ان سالم صيحها
آمنة: تعالي عند ماما ..
دفنت ميثا راسها في حضن امها ..
هزاع: ههههه ط الدلوعة
آمنة: مصيحينها
هزاع: بتعادينها
آمنة: انتوا ما فيكم خير
هزاع: نحن ما فينا خير !..... الله يسامحج .. من الصبح انا وامايه وابويه بعد ماسكينها
آمنة: ابويه وين ؟
هزاع: سار يرقد الشيبة وقته
آمنة: وامايه ؟
هزاع: يالسه ويا شمسة فالصاله
آمنة: شمسة هني
هزاع: وانا من الصبح شوه يالس اقولج .. سالم مصيحنها
آمنة: اتحسب سالم روحه ياي ..
هزاع: لا شمسة هني
آمنة: وصالح ؟
هزاع: ما ادري وين سار .. يمكن المغرب يرد هني
آمنة: انته بتطلع ؟
هزاع: ما ادري مروان ما اتصل بي للحين .. شكله بيي هني وما بنسير مكان
آمنة: هيه اتصل به قوله ايي هني ..
هزاع: ليش ؟
آمنة: هذا سالم ما بيخلي ميثا .. وانا تعبانه .. خل مروان ايي يأدبه .. ويشل هاي عني
هزاع: شوه ريلج يعطيه معاش
آمنة: هزاع والله تعبانه
هزاع: هههه انزين بتصل به .. بيي عقب شويه ..
ورن مبايل هزاع ..
هزاع: الطيب عند ذكره
مروان: تحشون فينيييي
هزاع: ما نحش فيك
مروان: اعترفوا .. بسرعه شوه كنتوا تقولون .. ومنوه وياك ؟
هزاع: انا وامون اختيه .. تقولك امون تعال بيتنا الحين
مروان: ليش ؟
هزاع: تمسك بنتها
مروان: جيه بيبي ستر وانا ما ادري
هزاع: ههههههههههههههههه
مروان :بعد رديت ظحكت
هزاع: ههههه قم زين ذليتني ما اظحك يعني
مروان: ههههه لا ظحكك يوديني في ستين ألف داهيه
هزاع: انته الحين تعال انزين آمنة تباك
مروان: شوه تبا بي اختك .. ما يخصني فيها
هزاع: هههه عسب بنتها
مروان: وينها هي ؟
هزاع: ىمنة تعبانه فيها حمى
مروان: اونه ؟
هزاع: والله
مروان: سلامات ما تشوف شر
هزاع: الله يسلمك
مروان: ليكون عادت بنتها
هزاع: لا لا... الحمدلله
مروان: اها
هزاع: يالله وينك ؟
نفس الوقت سمعوا صوت هرنات وحشرة .. جنه مسيرة
هزاع: هذا انته ؟
مروان: هيه مسوين مسيرة حق ميثاني ييبها يالله
هزاع: بس انزين ابويه راقد
مروان: اويه .. الحين بينش بيعصب علينا
هزاع: بس انزين لا ادق
مروان: خلاص وقفت يالله سو لي درب
هزاع: اوكيه لين ما تيي .. يالله فمان الله ...
آمنة: وصل ؟
هزاع: ما تسمعين مسوي مسيرة
آمنة: شلها
هزاع: يالله تعالي
وميثا مب طايعه
هزاع: ما تبا ..
آمنة: شلها شلها
هزاع: بتصيح
آمنة: ودها عند مروان بتسكت ..
شل هزاع .... ميثا بالغصب .. وصاحت بعد .. وسار الصاله ..
هزاع: سويت لك درب روحك
مروان: هيه انته ما تنفع
هزاع: هذو مروانيييييييي .... سيري عند مروان ..
مروان: تعالي حبيبة ألبيييي
سالم: تعالي عندي
مروان ( ظرب سالم ع ايده ): هدها بسرعه .. ظارب البنيه ويبا يشلها
وسارت ميثا عند مروان ..
سالم: ط السخيفه
مروان: محد غيرك سخيف .. يا سخيف .. جيه تلعوزها
سالم: ما لعوزتها هي تدلع
هزاع: لا تجذب .. صرخت عليها
مروان: ميثاني ظربيه .. ظربيه
سالم: اذا ظربت بظربها
شمسة: انته بس جرب
مروان: بدوسك في بطنك
سالم: خييييييييبه
ام هزاع: تخيبك .. قم عن البنيه
سالم: يدوه وايد تدعين عليه
مروان: لانك ما تتأدب ...
شمسة: عطه كف
مروان: تعطيني تصريح
سالم: هييييييه .. صدقت انته عاد
هزاع: قم قم من هنييييي
سالم: ما بقوم .. والله خلاص بيلس مؤدب
مروان: ولو لعوزتها
سالم: اظربني
مروان: بكفك بعد
ام هزاع: مروان اخوانك جيه ما يو ؟
مروان: ما ادري عنهم والله .. عمر طلع .. وعبدالعزيز فالبيت .. وراشد ما ادري وينه
ام هزاع: وسعيد ؟
مروان: ما ادري عنه
شمسة: صدق شحالها حرمت اخوك ؟
مروان ( بصوت واطي): يعلها من
وقبل ما يكمل .. داس هزاع ع ريله
مروان: بخير .. بخير الحمدلله
هزاع: اقول شرايكم نطلع
ام هزاع: هه سمعوا هذا .. ما يقدر يقر فالبيت دقيقة
هزاع: ههههههه بنطلع ميثا .. تستانس
سالم: انا بيي وياكم
مروان: ممنوع اصطحاب الاطفال
سالم: وميثا ؟
مروان: الا لحاملي البطاقات الخاصة
شمسة: ههههه وين سايرين عرس ؟
مروان: لا ملجة
سالم: سخيييييييييييف
مروان: شراتك يالسخيف ! ما تستحي ع ويهك
سالم: هههههه انزين ما يظحك
مروان: وانا ما جبرتك تظحك
هزاع: ههههه انزين قولوا بتسيرون ؟
مروان: والله انا عادي عندي
ام هزاع: انته كل شي عادي عندك
مروان: هيه .. حتى لو تقولين لي بيوزك اليوم عادي عندي
ام هزاع: والله صدق ؟ ...
مروان: هههههههه ما صدقت
ام هزاع: انا اقول انته وهزاع ما منكم فايده
هزاع: استغفر الله .. انا كم مره اقول ما يخصكم فينيييييي .. لا ادخلوني في اموركم .. لا توهقني يا اخ ويااااك
مروان: هههههه من زينك .. منوه يباك انته الحين
سالم: مب ع خالي هااااااااا
مروان: من زينك وزين خالك فوقك
شمسة: هههه يالله هزاع ومروان خذوا خوات .. عرسكم في يوم واحد
مروان: آسف .. انا شيخ .. ما يكون عرسي ويا مطازي في يوم واحد
هزاع: مطارزي في عييينك .. امايه تسمعين ولد اخوج
ام هزاع: ثرني قلت لكم . ما منكم فايده
سالم: اقول .. اجلوا العرس .. نطلع يالله ..
شمسة: وين بتسيرون ؟
مروان: ما ندري ... وولدج ما بنوديه بدون مشاورة ابوه ما فينا
سالم: لا لا شوه .. والله بيي
مروان: احلف ع كيفك ..
هزاع: اتصل في ابوك اسأله
سالم: فالموتر بسأله
مروان: موتر اونه . الحين اتصل ..
شمسة: ما يخصني .. خلوه يتصل ويشاوره
مروان: امش امش .. بس اذا قال لا بردك
سالم: ما بيقول
شمسة: اذا قال بيردونك
سالم: انزين انزين
ام هزاع: دام انه عبدالعزيز فالبيت مروا عليه حليله
مروان :لاااااااااااا
هزاع: شوه لا ؟
شمسة: حرام عليك مروان
مروان: عبدالعزيز يباله تصريح وموافقة من السلطات العليا
شمسة: انزين ما عليه . اطلعوا .. واتصل به قوله يخبر عمر اخوك
ام هزاع: انته حرامي
مروان :حرامي مره وحده
ام هزاع: هيه .. مر ع اخوك حليله
مروان: افففففف ..
هزاع: شوف بنتصل نحن في عمر ونحن طالعين
مروان: لا الله يخليك .. عمر بيسوي سين وجيم .. انا مب متفيج
شمسة: لا تبا هو ولا انته .. عيل شوه تبا ؟
مروان: اقولكم .. نسير ... وبتصل به بقوله اذا تبا اقنع عمر بسرعه
سالم: اوكيه ربيعي بيي
ام هزاع: عسب تدمرون الدنيا ..
سالم: هييييييلا هووووووووب .. وين كابي
شمسة: هذو هناك ..
ام هزاع: بدلوا البنيه هاي عقب ودوها
مروان: بعد تبديييييييييل
هزاع: من ساعه ىمنة مبدلتنها .. نظيفة ..
مروان: ثيابها اوكيه .. حلوة ..
شمسة: يا ويلكم من آمنة ما قلتوا لها بتودون بنتها
مروان: هي خلها أمانة عندنا .. يعني كيفنا وين نوديها
شمسة: ايه قولوا لها قبل
هزاع: يا بوي نحن مب فاضين .. امش امش مروان
ام هزاع: هذيل خبايل
شمسة: سيروا قولوا لها انزين . سالم سر خبر خالوه آمنة
سالم: ما يخصني ..بيودروني
مروان: جوتيها وين ؟
هزاع: هذو هذو .. هناك ..
مروان: ييبه ياله نسير
وظهروا ... هزاع ومروان شال ميثا .. وسالم .. بدون لا يخبرون آمنة ولا شي .. وسووا اكبر طاف !..... وام هزاع وشمسة .. قالن كيفهم والله .. يتفاهمون وياها يوم بيردون ....
في بيت يوسف ...
طايح في ثاني هزااااااااااااب .. وغاليه ناقعه من الظحك .. وزايد مبتسم .. متعود ع المحاظرات هاي ..
يوسف: ما تنفع والله العظيم ابداً.....
ثاني: عمي يعني شوه تباني اسوي ؟
يوسف: لا تسوي شي .. بس يلس وجابل هالكمبيوتر ليل ونهار
غاليه: عمي حرمته حرمته
زايد: لا ابويه يقوله ولده ..
يوسف: منوه حرمته وولده ؟
غاليه: اللاب توب ..
يوسف: حرمته وولده وهله وطوايفه كلهم ..
ثاني: الدنيااااااا
يوسف: الدنيا بلاها
ثاني: ما شي
سكت ثاني .. يعرف لو يتفلسف ... عمه بيحط عليه زيادة .. وكل شي يجلبه ضده . فـ يسكت احسن له ..
انفتح الباب ... دخل كمال ... دخل الشخص الثاني ....
ثاني: هلا والله
نش ثاني وسار لين عند عمر ...
عمر: شوه السالفه
ثاني ( بصوت واطي): عمك مقطعني
عمر: ههههه مب شي يديد
ثاني: لا والله هالمرة حاط عليه حط .. فشلني جدام .. غاليه
عمر: اختك هني ؟
ثاني: هيه
عمر: عيل انا بسلم وبظهر
ثاني: وين بتسير .. يلس يلس .. ما صدقت انته وصلت تنقذني
عمر: فشلة ثاني .. ما احب ..
ثاني: يا بوي عن الحركاااات
عمر: هههه شوه حركاته
ثاني: لو زايد بتساعده
عمر: انا ادري ان عمي ما يحط ع زايد وما يقدر لان زايد ماشي سيده
ثاني: شوه قصدك انا العوي
عمر: محشووووم .. والله ما قصدت جذه
ثاني: هههه اتغشمر وياك بس تعال
يوسف: وينكم واقفين عند الباب .. اقربوا .. اقرب يا عمر
عمر: هلا عمي شحالك ...
يوسف: الحمدلله بخير .. انته شحالك ؟ ... علومك ؟
عمر: الحمدلله تمام ( ولف صوب زايد ) شحالك زايد
زايد: الحمدلله ... يسرك حالي ..
عمر تفشل يوم شاف غاليه وكيف احمرت .. هو من اول مره شافها هني في بيت عمه وكيف كانت ترتجف وزايغه .. قال ما بيدخل البيت وهاي فيه .. بس هو الحين ما يدري ان غاليه موجوده..
غاليه .. الارتباك باين عليها .. وايدها ترتجف ... يعني الحاله في طور التطور !!!!!!
زايد .. انتبه لـ عمر كيف تفشل .. وشاف اخته .. ابتسم .. ومد ايده مسك ايدها عسب توقف الارتجاف ...
يوسف: يلس عمر اقرب ..
عمر: ها ..
يوسف: اقولك يلس ..
ويلس عمر وهو منزل راسه ولا رفعه ..
ثاني .. توه ينتبه .. فـ حب يغير الجو ويخليه ماشي .. لو جذه اخته بتم صدق عاد بيتوهق ويا عمه ... بيرد يفشله .. سار ويلس حذال عمر ..
ثاني ( بصوت واطي): عمر يالله ارمس
عمر: شقول ؟
ثاني: أي شي .. الل هيخليك قبل ما يبدأ فيني ..
يوسف: انته شوه عندك ؟
ثاني: منوه انا ؟
يوسف: هيه ... لان عمر تدري به ما يسوي هالحركات
ثاني: لا ما عندي شي بس اكلم عمر .. اسأله عن حال عبدالعزيز اخـو
صخ ثاني .. شوه يالس يقول .. وقته !...... وقته يذكر حد من اخوانه جدام عمه ..
والله نسيت .. نسيت .. يعل لساني القص .. نسيييييييييييت .. الله يعين .. الله يعين ...
يوسف: منوه العصقول ...
العيون .. والانظار .. بدت مرحلة التبادل من شخص لـ ثاني .. اقصد لـ آخر ...
زايد: اممم .. اقول .. غاليه انا سمعت امايه مساعه ترمس عن حصه ...
رفعت غاليه راسها .. وقته انته تسألني !..... روحي مب في حاله ..
غمز لها زايد .. وعطاها نظرة .. ان رمسي ..
وثاني يقول في قلبه .. يا رب .. يا رب غاليه تعرف تصرف ..
غاليه: ما ادري
زايد: بلى قبل ما نطلع ..
يوسف: عمر بلاك ساكت ؟
رد ع عمر !.... شكله لا مصر .. يعني بيرمس عنهم ... فـ لازم عمر يتصرف .. اوكيه .. عيال عمه .. وهزاع ولد عمته متعود انهم يحضرون هالجليات الجارحه .. لكن بنيه .. نو ويييي .. ولا بعد بنت عمه .. مستحيل .. ما يبا ينزل من مستواه ومستوى اخوانه جدام أي حد ...
عمر: عمي ممكن اسير الحجرة
يوسف: ليش بلاك ؟
عمر: بس فيني صداع خفيف
يوسف: بترقد يعني ؟
عمر: بحاول ..
يوسف: اقول حق كمال يطلب لك الدكتور
عمر: لا برقد .. وبرتاح وان شاء الله استوي اوكيه
يوسف: خلاص بقوله اييب لك حبتين بندول فوق
زايد: بنش وياك ..
عمر: لا عادي
زايد: ما عليه
يوسف: قم وده فوق .. قم يا زايد
نش زايد ويا عمر وساروا فوق ..
يوسف: غاليه بلاج ؟
غاليه: ما فيني شي عمي
يوسف: من تشوفين عمر جيه تستوين
غاليه: لا انا عاديه
يوسف: مرتين الحين ملتقية به وانتي جذه .. ايدج ترتجف ... وتحمرين .. هذا مب غريب ... ولد عمج
ثاني: غاليه تستحي
يوسف: من شوه بالله تستحي
ثاني: يعني عمي اول مره .. دايما هي جذه ومن كل حد .. حتى هزاع اللي 24 ساعه في بيتهم هي تستحي منه .. اقصد يعني يوم عفرا كانت هني
يوسف: صدق .. عفرا متى بترد ؟
ثاني: ما ادري هالسؤال موجه لـ غاليه
يوسف: طبعا لغالية انته وين تدري عن الدنيا
غاليه: هههههه ما ادري عمي .. بس قريب ان شاء الله .. بتصل بها اليوم وبتاكد وعقب بخبرك
يوسف: على خير ان شاء الله ... وحصه ؟
غاليه: حصه يمكن الليلة ترجع
يوسف: كيف الليلة ترجع وما مخبريني ..
غاليه: ما ادري ..
يوسف: عذيجة وايد مستويه حركات بعد ..
ونش يوسف سار عن عيال اخوه
ثاني: سويتي مشكلة
غاليه: شدراني ..
ثاني: وانتي كله ما تدرين
غاليه: اوووه والله انا قلت لكم .. لو في حد هناك ما بيي
ثاني :ونحن شدرانا ان عمر حاط في باله ايي اليوم
غاليه: وانا بعد شدراني ان عموه ما خبرت عمي يوسف
ثاني: كله منج لو استوى شي
غاليه: اسكت انزين ... لا تخوفني الحين
ثاني: قومي نتمشى فالحديقة
غاليه: ما في حد
ثاني: لا يعني منوه بعد يكون هني ...... بعدج ما عرستي عسب غريب يدخل فالعايلة
غاليه: ثاني يالسخييييييييييف
ثاني: هههههههه لا تصارخين بزقر لج عمر
غاليه: والله بتشوف ..
ونش ثاني يظحك ع اخته .. اللي نشت وراه .. بيسيرون الحديقة .. لكن وهي معصبه عليه من الخاطر ...
فوق ...
زايد: صدق تعبان ؟
عمر: مصدع
زايد: من شوه ؟
عمر: تعب خفيف..
رن مبايل عمر نفس الوقت ...
عمر: اكيد متصل يبا شي
زايد ( ابتسم ): عبدالعزيز ؟
عمر: في حد غيره .. الو
عبدالعزيز: عمور الله يخليك والله والله والله
عمر: هالكثر حلف ليش ؟
عبدالعزيز: انزين والله صدق
عمر: قول شوه قبل عقب احلف
عبدالعزيز: بظهر من البيت
عمر: وين بتسير ؟ ... ويا منوه ؟
عبدالعزيز: وين بسير ما ادري ... ويا منوه ؟ ويا مروان ..
عمر: وين انزين
عبدالعزيز: ما ادري والله بس قالي بسرعه .. تقنع عمر في دقيقتين
عمر: وين بتسيرون انزين
عبدالعزيز: ما ادري والله ما ادريييييي
عمر: انته ومروان بس ؟.... مستغرب انا
عبدالعزيز: لا لا .. انا ومروان وهزاع وميثا بنت آمنة
عمر: يعني لو قلت لك لا تسير جنك بتسمع رمستيه
عبدالعزيز: عمور حرام عليك .. خلصت الدقيقتين يالله قول اوكيه
عمر: سير سير ..
عبدالعزيز: من خاطرك .. ما فينا يستوي شي .. ننجلب .. نسير تحت شاحنه
عمر: اسكت ..
عبدالعزيز: آسف ..
عمر :يالله .. مع السلامه
عبدالعزيز: عمر لو مب راضي ما بسير
عمر: خلاص سير قلت لك
عبدالعزيز: صدق والله
عمر: وين راشد ؟
عبدالعزيز: في حجرته
عمر: سر قوله وعقب اظهر
عبدالعزيز: انزين انته يعني راضي صدق ؟ . لو مب راضي ما بسير ...
عمر: خلاص قلت لك سير .
عبدالعزيز: قول انك راضي
عمر: راضي
عبدالعزيز: انزين آسف
عمر: خلاص .. لا تعتذر .. وبسرعه اتصل به عن يهدك .. يسويها
عبدالعزيز: اوكيييييه يالله بااااااااااااي
بند عبدالعزيز بسرعه عن عمر ..
واتصل في مروان ..
مروان: هذا عبدالعزيز ..
سالم: رد عليه قوله تاخرت دقيقة مب يايين وراك
مروان: هيه بنزلك انته فالشارع مب اخويه
سالم: ط هذا ومن متى تحبه
مروان: هههههههه مينون ولد اختك
هزاع: من يومه
مروان: شوه بعد من متى تحبه
سالم: هيه دايما تحط عليه
مروان: يعني احط عليه .. يعني ما احبه ! .....
سالم: هيه
مروان: عيل انته كل حد يحط عليك كل حد ما يحبك
سالم: انا غير
مروان: لييش ؟ ولد السلطان وانا ما ادري
سالم: لا وانته الصادق .. اسم ابويه صالح .. مب سلطان ... ههاااااااي 1/0
مروان: اسكت اسكت
هزاع: ردوا ع الولللللللللللللللللد
مروان: الله ينطب ابليسك .. نستني من نحاستك ظاهر ع خالتك ..
ورد مروان ع عبدالعزيز عقب ما خبله سالم .. ونساه مبايله وانه يرن ...
في ألمانيا ...
رملة اليوم .. شكلها تبا تسوي شي .. ما يخطر ع البال .... وتبا تكمل سفرتها .. الى ان يشاء الله مثل ما يقولون ..
عفرا معصبه عليها من الخاطر .. لكن شوه تسوي في غضون هالظروف ...
مدام رملة وياها حصيص الخبلة .. اكيد هي بتتخبل زيادة ..
حنت .. وسوت ع راس عفرا .. انها تطلع تتمشى برع فالممرات .. وعفرا طبعا ما وافقت .. لكن سون اكبر طاف هي وحصيص وظهرن ..
وعفرا اضطرت تظهر وراهن .. لان ما شي الا هالحل ..
عفرا: خل احمد ايي
رملة: احمد وين ساير ؟
عفرا: ما ادري بس الحين بيي
حصيص: اووووه خل ايي ريل الحلوة
رملة: شوه هاللقب بعد !
حصيص: لا ريل الحلوة مب حلو .. امممم .. ريل ملكة الجمال ...
عفرا: انتي شوه تخربطين
حصيص: شفت اختج
عفرا: أي اخت ؟
حصيص: آمنة اسمها ؟ ..
رملة: هيه .. حرمت اخويه
حصيص: هييييييه ... حرمت عمي احمد
عفرا: وين ؟
حصيص: لا تخافين .. فالصورة .. رواني صورتها
رملة: اونه !
عفرا: احمد رواج صورة امون اختيه !
حصيص: هيييييييه وجيه مستغربات
رملة: اللي احيده احمد ما يروي صورة حرمته حق أي حد
عفرا: واللي انا احيده .. احمد مستحيل يشل صور حرمته .. فـ وين شفتيها ؟
حصيص: لا لا ... كان حاطنها في بوكه ورواني اياها
رملة: شرايج فيها حلوة صح ؟
حصيص: هيييييه .. احلى عن عفاري والله
عفرا: مالت عليج
ويلسن البنات ع الكراسي ..
حصيص: ههههههه انزين الحق ينقاااااال ... هي مب احلى عنج بواااااايد ... بس احلى عنج
عفرا: اوكيه .. شكرا ع الراي السديد
حصيص: عفرا كل يوم تعالي
عفرا: مب جنكن مصختوها الحين
حصيص: لا والله .. شوي بعد
رملة: انتي ما بتسيرين عند امج ؟
حصيص: هيه صدق بتون ويايه عندها ؟ ... انا دايما ايي عندكم وازوكم انتوا مول ما زرتوا امايه
عفرا: تبينا نحن نسير عند امج
حصيص: وليش ان شاء الله ما تسيرين ! ......
عفرا: لا مب لـ شي .. بس نحن نستحي
رملة: عادي عادي بنتعرف عليها
عفرا: ط هاي ...
رملة: حصيص
حصيص: هلاااااااااااااااا
رملة: امج ليش راقده هني ؟
حصيص: فيها السرطااااااااان
عفرا حست بقشعريرة تسري في كامل جسمها يوم سمعت رمسة حصيص .......
رملة: ما لها علاج ؟
حصيص: ما ادري ... بس من يوم انا شفت النووووور بعيوني ... ونحن سايرين رادين ألمانيا .. سايرين رادين .. لاعت جبدي ..
رملة: يعني من سبع سنوات
حصيص: الحين اكثر بعد
رملة: جذابه
حصيص: شوه اتمصخر وياج انا .. اقولج لاعت جبدي منها والله
رملة: انتي وابوج وامج بس اتون ؟
حصيص: مرات .. عمي عبدالرحمن ايي .. وعموه عاشه .. وساعات عمامي الباقين وعماتي .. وخالي مايد .. يوووووم يبون ألمانيا .. والا هم يسيرون بلاد ثانية .. لانهم رواحهم ملوا منها ..
رملة: ما تملين
حصيص: ما امل اونه ... اصيح من الملل بعد
رملة: وعععععع مب شي
حصيص: ابدا والله مب شي .. انا يوم امايه ان شاء الله بتشافى .. ورديت البلاد لو يعطوني مليون يقولون لي سيري ألمانيا والله ما اييها .. ما ابا اشوفها خلااااااص .. الا لو انتوا ييتوا عقب بيي
رملة: ههههههه ما شي شغل نيي بعد .. جذه رواحنا ملل لو حد ويانا عيسى وناعمه وشلة المزرعة حلو
يا محمد .. بس وقف بعيد .. وزقر بنته ...
حصيص: اوهوووو بنسير
عفرا: هيه احسن عسب هاي اردها الحجرة ...
حصيص: باجر اشوفكم الصبح ان شاء الله
عفرا: ان شاء الله
رملة: مع السلامه حلمي فيني
حصيص: هههههه انزين .. فالج طيب ..
وسارت حصيص صوب ابوها ...
محمد: ما شبعتي
حصيص: الصراحه لا
محمد: ولا بتشبعين
حصيص: بابا
محمد: عيونه
حصيص: ماما متى بتطلع ؟
سكت محمد ... روحه مب في حاله .. اليوم يحس اما اللي سواه في هالسبع سنين .. سار .. ذهب مع الريح مثل ما يقولون .. او ان بيهون عليه تعب سبع سنوات ولو كانوا عشر وعشرين بعد مب مشكلة عنده .. بس المهم ايي هاليوم ..
حصيص: بلاك سكت ؟
محمد: بتطلع جريب ان شاء الله
حصيص: هي شخبارها الحين ؟
محمد: الحمدلله بخير
حصيص: ابا عشا
محمد: من وين ؟
حصيص: ماكدونالدز ..
محمد: غريبة
حصيص: ليش عسب اني قلت لك ما احبه ؟
محمد: هيه ..
حصيص: لا .. لانك وايد اكلتني هذيج الفترة منه وانا مليت .. فـ الحين اشتقت له ..
محمد: ههههههه حلوة هاي اشتقت له ..
حصيص: هيه والله
محمد: اوكيه .. ان شاء الله ... بنسير الحين ونشتري لج ماكدونالدز ..
مشوا محمد وحصيص .. شويه ووصلوا ماكدونالدز .. المطاعم في دربهم وبعض المحلات في دربهم
وفندقهم جريب .. عن المستشفى ...
دخلوه ...
محمد: يلسي هناك شويه .. لين اخلص .. لان زحمة ..
حصيص: اوكيه ..
سارت حصيص ويلست ع احد الكراسي ...
وسار محمد يطلب .. وقف فالطابور ..
حصيص يالسه روحها ... يا ويلس ع الطاولة اللي مجابلتنها ... شلة من الشلل الكريهه بالنسبة لها خاصة .. وكريهه بالنسبة للاماراتيين وبعض الناس في بعض الدول عامة ....
ووحده في مثل سن حصيص تخاف من هالاشكال ..
كانت حاطه ريل ع ريل .. يوم شافتهم نزلت ريلها .. ويلست عدل ..
هي تطالعهم .. متروعة منهم .. مب لانها تبا تطالعهم .. ومب لان من زينهم !......
لكن واحد منهم انتبه انها وايد كانت تطالع .. ومركزه عليهم ...
غمز لها .. واشر لها تيي ..
ماتت حصيص.. بلعت ريجها .. وحولت نظرتها لـ للطوابير اللي واقفة هناك وتطلب .. وشهقت من الخاطر يوم شافت ان ابوها ما يبين ...
شوي وبتصيح .. وهذا ما يشل عينه عنها .. تخاف تنش .. وهي ما تشوف ابوها فـ يلاحظون هالشي .. ومثل ما مخوفنها ابوها يسرقونها ..
وتخاف تيلس .. و ايي هذا صوبها ..
فـ حصيص الحين ضايعه .. ولا تعرف شوه تسوي ...
النظرات مستمرة .. وحصيص كثر ما تقدر تجنبها ..
5 دقايق مرت وهي ع هالحال .. خلاص وصل حدها الدموع في عينها .. بس تغمضهن والدموع تنزل ...
بمجرد ان اللي يالس يطالعها شافته يقول حق ربيعه يقوم عسب هو يطلع يعني بيتحرك .. نشت بسرعه من مكانها ...
وسارت صوب اللي يطلبون ... وقفت هناك ع صوب جنها قطوة ميته ..........
هي ما ملاحظة اللي واقف جدامها .. لكن هو لاحظها ..
......... : اوه .. CNN هني ... صدفه سبحان الله ...
اكيد عرفتوه ... وحصيص عرفته .. رغم اسلوبه الغلج .. ورغم ثقل دمه لكنها يوم شافته ورمسها .. شهقت .. ولصقت فيه .. وصاحت ..
بدر مستغرب .. شوه السالفه ؟... بلاهن هالبنات اللي هني .. من رمست وحده صاحت .. كل ما رمست وحده فيهن صاحت !...... شوه هالدلع الفظيييييييييييييييييييييييع !!!!!!
لكن شكل حصيص كان صدق يكسر الخاطر .. شكلها كان مثل اللي يكبت يكبت .. ويفجر كل شي مره وحده بصياح متقطع .. وتنفس صعب ...
بدر: بلاج .. شوه فيج ؟
وحصيص ما ترمس ..
طنش بدر الطلبية .. ومسك ايدها وسار يلس ع طاولة من الطاولات .. ويلس حصيص وياه ..
بدر: زعلتي من رمستيه ؟
حصيص: لا
بدر: عيل شوه فيج ؟
حصيص: هذاك اللي هناك
بدر: منوه ؟
حصيص: الريال اللي هناك
بدر: انا مب فاهم عليج
حصيص: هذاك السخيف .. يغمز لي ويقولي تعالي
قوية ...... بنت في مثل سن حصيص تقول هالرمسة ..
بدر: أي واحد
سكتت حصيص
بدر ( راص ع ضروسه ): قولي أي واحد ؟ وينه ؟
حصيص ( علا صوتها ): خلاص خله يولي .. ادري بك معصب .. ما ابا تستوي مشكلة .. لكن انا والله ما سويت شي ..
صخ بدر .. شكل حصيص يكسر بالخاطر .. واللي ساير واللي راد يشوفها ...
حصيص: ابا ابويه .. وينه ؟ .. ودني عند بابا ..
وهي بعدها تصيح ... بدر في داخله نار ونفس الوقت .. منكسر قلبه ع حصيص.. اول مره يشوفها في هالحاله .. اول مره يشوف ام لسان تصيح جذه ..
بدر: بس سكتي
حصيص: ابا ابويه ..
بدر: الحين بيي .. شربي هالماي ..
حصيص: ما ابا
بدر: عشان خاطريه .. شربي شويه .. عسب نفسيتج تهدا ..
مد بدر ايده وعطى حصيص غرشة ماي .. خذتها وشربت منها شويه وحطتها ع الطاولة ....
واقف شوي بعيد . يدور بعينه .. وينها ؟ وينها ؟ ... وين اختفت .. توها هني .. انا هادنها هني وساير ... هذي ... هناك .. الحمدلله ..
مشى محمد صوبهم ..
محمد: حصيص ..
من سمعت حصيص الصوت .. بدت ترتجف ..
بدر يطالعها ويطالع ابوها ...
ومحمد واقف مستغرب ..
محمد: شوه فيج ؟ جيه تصيحين ؟
حصيص: بابا
ونشت حصيص وحضنت ابوها وصاحت ..
محمد ما رمس .. مجرد انه اطالع بدر من فوق لين تحت .. ومسك ايد بنته .. ومشوا ..
شوه السالفه ؟ .. وشوه الموضوع ... ؟
فالمستشفى ...
عفرا: ساروا يعني ؟
احمد: شكلهم جذه .. مبايلاتهم مغلقه
رملة: حظهم
احمد: ليش مستعيلة ؟ .. الاسبوع الياي .. ان شاء الله
رملة: صدق ؟
احمد: هيه الدكتور قال .. ان نقدر نرد ... لكن ترقدين فالمستشفى هناك
رملة: هيه والله ما رقدت
احمد: جيه ع كيفج
رملة: ما برقد
عفرا: من الحين تعاند وين يوم بنوصل
احمد: مب ع كيفها اصلا .. انا ما بمشي ع رمسة يهال ..
رملة: بخبر عيسى والله
احمد: اقولج ما تخوفيني بعيسى وناعمه وامايه وما ادري منوه
عفرا: ههههههه يهال تظاربون انتوا .....
رن مبايل احمد ..
احمد: جبنا سيرة الأط جانا ينط
رملة: عيسى ؟
احمد: هيه
رملة: ييب برمسه ..
وردت رملة ع عيسى ...
رملة: الو
عيسى: هلا والله بهالصوت .. هلا وغلا
رملة: اهلييين
عيسى: شحالج ؟
رملة: الحمدلله بخير
عيسى: وشحال راسج ؟
رملة: الحمدلله ..
عيسى: وبلاج تقولينها جذه ؟
رملة: انا بخير .. بس شعري مب بخير
عيسى ( ابتسم): ما عليه .. بيرد يطول ان شاء الله
رملة: انا قلت لكم .. والله بسير اقصه فالصالون
عيسى: اوكيه .. ان شاء الله ردي بالسلامة وقصيه ..
رملة: خسي ارد البلاد ويا هالشعر
عيسى: عيل ؟
رملة: بسير هني صالون
عيسى: خبله !
رملة: كيفكم
احمد: ييبي انتي ييبي .. الو
عيسى: هلا احمد
احمد: شحالكم ؟
عيسى: بخير الحمدلله .. انتوا اخباركم ؟
احمد: تمام والله ..
عيسى: شحال حرمتك وبنتك ؟
احمد: الحين انته فالبلاد ... وحرمتيه وبنتي في البلاد .. وانته ياي تسألني انا عنهن ؟
عيسى: هههههه والله هي سايرة بيت ابوها ... اشتقنا حق ميثاني
احمد: ما ادري والله ... انا عصبت عليها مساعه
عيسى: ط هذا !
احمد: والله يعني سايرة بيت اهلها وما مخبرتني .. اوكيه .. نطوفها .. بس مريضة وما تقول
عيسى: ما تباك تستهم عليها
احمد: هي تدري بي .. وتدري بطبعي
عيسى: يالله ما عليه ما عليهن شر ان شاء الله .. بس انته لا تنكد ع الحرمه
احمد: يوم برد الفندق بتصل بها
عيسى: اخبار رملة ؟
احمد: الحمدلله .. انته قولي اخبار امايه و ناعمه ؟
عيسى: الحمدلله .. كلنا بخير
احمد: الحمدلله
رملة: عفرا شرايج باجر الصبح نسير عند ام حصيص
عفرا :لاااااااا
رملة: ليش ؟ .. وبلاج جيه تقولينها ؟
عفرا: ما ابا اشوفها
رملة: ليش ؟ .. احس انها طيبه
عفرا: احس اذا شفتها ما ادري بصيح ... تكسر بخاطريه حصيص
رملة: هيه والله .. من سبع سنوات تقول
عفرا: الله يعينها ويعين امها وياها
رملة: آمين ..
احمد: يالله انا اترخص
عفرا: وين تو الناس
احمد: تتمصخرين
رملة: يالله يالله سر .. نحن تعبانين .. نبا نرقد .. ونسولف
احمد: ترقدين والا تسولفين
رملة: الاثنين
احمد: عفرا رشيها بكف تتخدر .. ولا خلينها تسهر
عفرا: هههههه ولا يهمك
رملة: ط هالاثنين
احمد: باجر من الصبح انا هني
رملة: ما تقدر .. بتتصل قبل ما تيي
احمد: الساعه 6 بيي
رملة: عيل جيه تسير بعد تم هني .. يوم انك الساعه 6 بتيي
احمد: لا بسير ارمس حرمتيه وعقب برقد شويه وبيي
عفرا: ايوا ايوااااااااااااااااااااااااااا
رملة: هييييييه .. قول جيه السالفه ...
احمد: هههههه ما صدقن
عفرا: اقول ..
خلاص عيل سير ..
رملة: سلم عليها
احمد :هههههههه الله يسلمكن .. فمان الله
رملة: الله يحفظك يا اخوي .. واتصالا هاتفيا هنيئا
عفرا: هههههه حلوة هاي اتصالا هنيئا ..
وظهر احمد ساير الفندق عقب ما اطمن ع اخته ... وتأكد ان اخته وعفرا بخير .. وهو يظحك ع خبالهن .. ولقافتهن ..
في صوب ثاني ...
خلصت صياح .. بدلت ثيابها .. وطلعت برع .. فالصاله .. شافت ابوها يالس ..
حصيص: السلام عليكم ..
محمد: خلصتي صياح
سكتت حصيص ..
محمد: شوه استوى هناك ؟
حصيص: وين ؟
محمد: جيه صحتي يوم سرت اطلب ؟
حصيص: بس جذه
محمد ( بصوت حاد ): حصيص
حصيص: شوه ؟
محمد: بدر سوى بج شي ؟
حصيص: لا ....
محمد: عيل جيه صحتي وهو كان يالس وياج ؟
حصيص: بس كنت زايغة انته محد .. و لقيته هو اجرب شي سرت صوبه
محمد: حصيص قولي الصدق ..
حصيص: بابا شوه فيك ؟
محمد: شوفي ... يايه تتعشين .. ادري .. ما بعكر لج مزاجج .. لكن انا مزاجي متعكر .. ابا اعرف شوه استوى
حصيص: ما شي
محمد: حصيص قولي
حصيص: بابا بلاك ؟
محمد: انتي بلاج ؟ .. حبيبتيه حصيص .. بابا قولي لي .. شوه استوى بج ؟ انا ابا افهم السالفه ... يعني ما يستوي انتي بنتي تصيحين وحد غريب وياج .. وانا ما ادري شوه السالفه .. تشوفينها عدله ؟ ..
سكتت حصيص
محمد: ردي
حصيص: بابا بقولك .. بس والله انا ما يخصني
محمد: قولي ..
حصيص: انته بتعصب
محمد: ما بعصب
حصيص: بلى
محمد: قولي يالله وخلصيني
حصيص: انته الحين عصبت ..
ونزلت دموعها
حصيص: وين يوم بتسمع ..
محمد: لا تصيحين
حصيص: انته تخوف
محمد: انا محمد .. ابوج ..
حصيص :ادري .. بس معصب عليه
محمد: انزين لا تطالعين في عيني ورمسي
حصيص: ما اقدر ..
محمد قرب من بنته ومسح ع راسها .. ومسح دموعها
محمد: يالله قولي .. قولي حبيبتيه شوه فيج ؟
حصيص: انا كنت يالسه روحي عالطاولة وانته تأخرت عليه
محمد: انزين .. كملي
حصيص: واحد من شلة سخيفه
محمد: شوه قصدج بـ شلة سخيفة
حصيص: من هالاجانب الخياس .. اللي ما احبهم ..
محمد فهم قصدها وعرف بنته عدل
محمد: شوه سوى ؟
سكتت
محمد: قولي
حصيص: بابا
محمد: قولي ... رمسي
حصيص: غمز لي وقالي تعالي .. بس والله انا ما يخصني .. ما سويت شي .. حتى ما ظحكت وياهم لا ابتسمت .. كنت يالسه روحي ...
ارتاح محمد .. ارتاح نفسيا .. بتفكير بنته هذا .. وبخوفها من هالشي البسيط .. يعني هي بخير .. وتربيتها ماشيه صح .. رباها ع الادب والاخلاق .. ع الرزانه .. ويشوف نتايج تربيته الحين جدام عيونه ..
محمد: وبدر جيه كان هناك ؟
حصيص: هو يوم نش الريال .. انا زغت وسرت وقفت ع صوب .. وصدفة بدر يا جدامي .. فـ كنت زايغة وحسيت ان ما في حد بيساعدني غيره
محمد: وليش زايغه تقولين لي ؟
حصيص: ما ادري .. اخاف تظربني
محمد: جد ظربتج من قبل ؟
حصيص: لا .. بس هالمرة خفت .. ما ادري ليش
محمد: حبيبتيه ... انته حصه بنت محمد .. انتي مربايه ع هالايد .. انا واثق منج ومن تربيتي لج .. لا تخافين ... مره ثانية وقولي لي اللي في قلبج ... ليش تبين تخربين علاقتيه بج ؟
حصيص: انا ما قصدت والله .. لكني خفت .. انك تزعل
محمد: بزعل يوم بعرف ان بنتي .. حبيبتيه .. تسير تشتكي عند حد ثاني .. وما تيي تقولي انا
حصيص: بابا والله اني دورتك وما لقيتك ..
محمد: انزين .. خلاص .. حصل خير ( وباسها على راسها) .. والحين تعالي تعشي
حصيص: احس نفسي انسدت
محمد: جذه صدق بزعل منج ....
حصيص: لا ..
محمد: خلاص عيل ... تعالي تعشي ..
حصيص: ان شاء الله
محمد: سيري غسلي ايدج .. وويهج وتعالي
حصيص: ان شاء الله ..
وسارت حصيص غسلت ايدها وويها وردت صوب ابوها ... اللي زهب لها كل شي ..
حصيص: بابا
محمد: هلا
حصيص: قوم عمي علي وصلوا ؟
محمد: والله ما ادري .. اتصلت به مغلق .. اكيد بعدهم فالطيارة
حصيص: بس هم من زمان سايرين
محمد: ما تدرين .. بالظروف
حصيص: ملل بدونهم .. الحين منوه بيدلعني
محمد: مب مكفنج انا
حصيص: بلى .. لكن هو بعد كان يدلعني وخالوه حصه .. الحين انته وعمي احمد بس
محمد: وامج
حصيص: امايه عاد ع صوووووووب فديت روحها ..
وتموا حصيص ومحمد يسولفون عقب سوء التفاهم اللي استوى بينهم ......
*******
|
20-07-09, 09:20 AM
جديد مواضيع قسم القصص المكتمله
العرض العادي
