الجزء الـ 21
في ألمانيا ...
كم يوم ينعدّون ع الاصابع ... وهي برع البلاد ... ملّت ... تحس ان سفرتها ع الفاضي ... هي تبا كل شي بسرعه بسرعه ... وترد ... قالها ريلها ان السفره يمكن اطوّل ... وهي وافقت .. لكن يوم عاشت الوضع هذا ... ما تباه !! الحين ما تباه !!
حصه: اربع ايام من يينا .. سايرين رادين المستشفى ع الفاضي ... ولا بالمواعيد بعد ..
علي: عيل انتي شوه تبين ... كيف تبين تتعالجين هني والدرب !!
حصه: انا ما فيني شي عسب اتعالج
علي: ولا انا فيني شي عسب اتعالج بعد !!..
حصه: يعني ؟
علي: والله ما ادري اسألي عمرج ...
حصه: انا ابا ارد البلاد ....
علي: لا والله !! .. جيه هي لعبه
حصه: ما في فايده من سفرتنا هاي
علي: انتي شوه ؟ تبين تدخلين المستشفى اليوم وتطلعين باجر يقولون لج حامل ؟! والا شوه سالفتج بالضبط ..
حصه ( انصدمت ): لا ترمس وكأنك تعق اللوم كله عليه .. انا ما يخصني .. هاي حكمة الله ...
علي: ونعم بالله .. وراضين فيها من كم سنة ... لكن الحين .. مسافرين وهالسفرة تمّت برضاج ... تقولين لي نرد البلاد ... جيه شوه تتحسبيني ؟
حصه: ما اتحسبك شي .. بس انا مليت
علي: وانا مليت اكثر ... حصه كلتي فادي من اول ما وصلنا ... السفرة هاي كانت برضاج هذا اول شي .. ثاني شي قلت لج انا و لين المطار وانا اقولج ... جانج ما تبين .. نرد بيتنا احسن لنا ... وعقب من يوم ما وصلنا وانتي ما ابا وما بسير وكله عناد في عناد ... شوه انا يايب ياهل ويايه ! سفرة منها علاج ومنها نغير جو .. يا حرمة قومي نطلع نغير جو نسير نرد .. كل العالم برع ويا حريمهم يحوطون .. وانتي ابد ما شي ! والله العظيم لوعة جبد
ويلس علي فالصاله ... فتح التلفزيون .. وهو معصب .. تم يبدل فالقنوات ... الزفته ع قولته بعد ..
اما حصه .. فـ شلّت بعمرها وسارت الحجرة ...
في البلاد ..... تحديداً دار الحي ..
آمنة: علمها ع الدلع عقب تركب ع راسي انا
احمد: خل تركب فوق راسج
آمنة: لا والله !!
احمد: مب امها !
آمنة: والله تركب راسك انته انا ليش ؟انته ابوها وانته مدلعنها
احمد: يا قلبي كيف تظحك ... قولي بابا
بدت بنت احمد ترمس شويه ... وتظهر اصوات ... وتقول بابا !! وهالشي اللي قهر آمنة ..
آمنة: مالت عليها انا اللي تعبانه عليها تقول بابا ...
احمد: ههااااااااااي ... لازم ابوها ... مهتم فيها اكثر من امها المجرمه
آمنة: نعم نعم ؟ انا مجرمه
احمد: الحين بتقول لنا سالفة الحوض ...
آمنة: طبعا
احمد: بنسكت عيل .. مال العصر الحجري انتي امون
آمنة: اذا انا مال العصر الحجري انته بعد ويايه مال العصر الحجري .. لانك اكبر مني
احمد: منوه قال ؟
آمنة: عيل كم عمرك ؟
احمد: عمري انا ؟ مب لازم اقول انتي تعرفين عمريه ... انا اصغر عنج
آمنة: هيه انا عمريه 50 وانته 40
احمد: لا لا واااااااايد كبرتينا
آمنة: انته تقول ..
احمد: انا ما قلت ... صح بابااااااا
آمنة: غلط يا حياتي ....
احمد: ايوااااااااااااااااا ... هالكلام الحلو ... كوني
رومانسية ..
آمنة: احلف انته عاد .. قول والله
احمد: هههههههه مستويه عصبية هالايام ..
آمنة: انا اليوم مب متفيجة ...
ورن مبايل آمنة ..
احمد: هيه ومتفيجه حق التيلفونات .. خواتها يتصلون ويحشون ... ما عندهم غير الحش ..
آمنة: فذمتك متى سمعتني انا وخواتي نحش في حد
احمد: لا لا ما احطها فذمتيه
آمنة: عيل خلاص .. هاي حصه .......... ألو هلا حصه ... شوه فيج ؟ حصه رمسي بلاج ... انزين شوي شوي عسب افهم شوه السالفه ...
احمد يالس ع صوب .. ويسمع آمنة كيف ترمس ... لا اكيد في شي .. وشكلها اختها تصيح ... مأساة مستويه وهي برع البلاد ...
في مكان ثاني ..
في واحد مريض .. هذا ثاني واحد فالعايلة ما يليق عليه يكون مريض ع قولت .... الكل !!
وصل بيت يدته ... عقب ما رد من المستشفى ...
عفرا: مرحبا مرحبا
شمسة: سر داخل ارقد ..
عفرا: ويه ما يليق عليه والله
شمسة: حرام عليج عفاريييييي
عفرا: هههههه خلاص خلاص ... يليق عليه
شمسة: سخيفه
عفرا: شوه قالوا ؟ شوه فيه ؟ شوه عوقه
شمسة: ما فيه شي ... بس عطوه ادوية وجيه .. انا اللي لايعه جبدي الحين
عفرا: خير ؟ انتي وولدج لايعة جبودكم يايين عندنا
شمسة: كيفنا ... بيت ابويه
عفرا: لا حبيبتيه عرستي فما لج حق خلاص
شمسة: قومي زين ...
عفرا: هيه
شمسة: اقولج بسير ارقدانا ويا ولدي .... صالح يمكن بيتصل قولي له رقود
عفرا: نعم ؟ خيييييييير .. انا ارمس صالح
شمسة: وجيه ما ترمسينه حبيبتيه ؟
عفرا: وليش ارمسه اصلا
شمسة: اقولج قرّي مكانج .. بيتصل ع مبايلي انزين بنش وبرمسه ... باي
عفرا: مع السلااااااامه ....
سارت شمسة فالحجرة ... وقبل ما ترقد بتعطي ولدها الدوا ...
شمسة ( تزقر): عفرااااااا .. عفاري
عفرا: شوه ؟ مسرع ما دخلتي ورقدتي عسب تزقريني بعد
شمسة: عفاري ييبي ماي شويه بعطيه الدوا
عفرا: حبيبي والله ... اول مره اشوفه جذه
شمسة: الحين حبيبي
عفرا: جيه شوه قالوا لج ... خاله قلبها حجر
شمسة: انتي هيه
عفرا: مقبولة منج انتي وولدج اللي لايعه جبودكم
شمسة: سالم حبيبي قم اشرب الدوا
سالم: هاااا
شمسة: قم اشرب الدوا
سالم: ابا ارقد
شمسة: قم اشرب عقب ارقد
عفرا: خذي .. اشرب ما فينا بعد يستوي بك شي وانته هني
شمسة: بسم الله عليه ..
عفرا: في العدو ولا فيك يا سويلم ولد صويلح
شمسة: مب جنج مصختيها .. قومي طلعي برع يالله بنرقد نحن
عفرا: رقدوا تمسون ع خير ...
في بيت الشباب ...
تحديداً قسم سعيد ...
بدور: رمست عمر عن الحجرة ؟
سعيد: أي حجرة ؟
بدور: الحجرة اللي قلت لك عنها !
سعيد: لا .. ما قلت له للحين
بدور: متى بتقوله ؟
سعيد: عمر الحين مشغول .. باجر موعد سفره ...
بدور: اها
سعيد: عقب ما يرد ان شاء الله
بدور: وانا اتم لين ما يرد !
سعيد: خلاص عقب ان شاء الله .. اليوم عمر ما بيعبر ولا واحد فينا كثر عبدالعزيز
بدور: لازم حبيب القلب
سعيد: اكيد .. عمر كل شي عنده ولا عبدالعزيز
بدور: هيه سامعه هالرمسة مليون مره ..
سعيد: لازم نعيدها حق كل حد
بدور: مب لازم تعيدها حقي مصدقه هالشي وشايفتنه بعيني ...
سعيد: انزين انا بسير برع ..
بدور: سر الله وياك ... بس عقب بسير بيت هلي
سعيد: ان شاء الله ....
بدور .. ان شاء الله حتى قالها وكأنه مب مصدق قلت له بسير .. طبعا لازم .. بيجابل السيد عمر لين باجر ... هه ع الاقل بيسافر وبيفكنا ... اوووووووه نسيييييت .. اذا عمر بيفكنا اخوانه ما بيفكونه ... شوه هالأزمه اللي طحت فيها انااااااااا .. يعني اذا مب عمر اخوانه .. افففففف صدق سخافه ... ولوعة جبد ..
فوق .. في حجرة عمر وعبدالعزيز ...
عبدالعزيز: اييب باجي الاغراض ؟
عمر: اصبر شوي شوي ... اشوف كيف بحط الاغراض بالترتيب ..
عبدالعزيز: قلت لك عموه بتيي عقب شويه ... وبترتب كل شي
عمر: وانته جيه تتصل بها ؟
عبدالعزيز: والله اني ما اتصلت روحها اتصلت وقالت لي اقولك
عمر: صدقتك
عبدالعزيز: والله العظيييييييم
عمر: انزين لا تحلف هالكثر .. اقولك مصدقنك
ويا راشد ووياه سعيد ...
عبدالعزيز : حياكم الله حياكم .. اسمحوا لنا .. حجرتنا فوضى يعني بس ما عليه .... لان اخويه بيسافر فـ لازم يعني
سعيد: هههههه احلف عاد ...
راشد: الساعه كم طيارتكم ؟
عبدالعزيز :العصر
راشد: متى لازم تكون فالمطار ؟
عبدالعزيز: الساعه 4
راشد: الاخ هو اللي بيسافر وانا ما ادري !!
عمر: ههههههه متحمس
راشد: آه بيطلع روحي هالكم يوم
سعيد: عبدالعزيز انا برقد وياك فالحجرة
عبدالعزيز: ممنوع دخول المتزوجين
سعيد: احمد ربك .. عرض مغري
عبدالعزيز: هو انا ودي انته والا عمران .. لان مروان و راشد ما أأمن وياهم
راشد: صدق ما تستحي .. تبوس ايدك ورا وجدام .. بودر حجرتيه وبيي اجابلك ..
عمر: ايييييه مب ع اخويه ..
راشد: وانا منوه ؟ ولد اليران
سعيد: ولد الزراع
راشد: اخاف الا انا ولد فريد وانا ما ادري
عبدالعزيز: الحمدلله انك عرفت الحقيقة ...
وشرّف مروان ...
مروان: ما شاء الله بلاهم الاخوان متيمعين ؟
سعيد: يايين نشوف اخونا ..
مروان: يا اخونا باجر السفر ؟
عمر: ان شاء الله
راشد: يالله يالله شل الشنطة نزلها تحت
مروان: وايد يعني متحمسين ... من الحين تنزلون شنطته تحت
عمر: هذا راشد شكله وايد متحمس يبا الفكه
راشد: حشى عليه والله لا .. بس سوالف
سعيد: ههههههه حليلك يا راشد .. رمستك كلها ضدك
راشد: الا قول مروان يجلب الرمسة كلها ضدي
عمر: عمران وين ؟
مروان: فالتحفييييظ ... يقولون ربيعك زعلان
عبدالعزيز: منوه ؟
مروان: سالم
راشد: بلاه المشاغب ؟
مروان: بطنه يعوره ما ادري شوه سالفته
عبدالعزيز: خرّيييييط سالم
مروان: لا صدق تعبان امه مودتنه بعد اليوم المستشفى . مساعه مرمس هزاع .. يقولي مستوي هادييييييي
وهم فالحجرة سمعوا الصوت اللي من يسمعونه في بيتهم .. يرتاحون
مروان: سيروا وصلت
عبدالعزيز: فديييييييييت اللي وصلت والله
سعيد: بسير اسلم عليها وبيبها هني
ظهر سعيد من الحجرة وكانت عمته ع الدري ...
عذيجة: وينكم انتوا ؟
سعيد: هني
عذيجة: مرحبا فديتك ...
سعيد: اهلين .. شحالج عموه شخبارج ؟
عذيجة: الحمدلله بخير فديتك .. انته شحالك ؟ علومك ؟
سعيد: تمام
عذيجة: وحرمتك شحالها ؟
سعيد: الحمدلله بخير
عذيجة: وين اخوانك
سعيد: هني فالحجرة ..
عذيجة: خلني اسير اشوفهم ...
دخلت عذيجة الحجرة .. وسعيد وراها ...
عمر ( نش ع طول من مكانه ): هلا عموه ..
عبدالعزيز: عمتييه حبييبتيه
عذيجة: وينكم انتوا ؟ حشى يا عيال سيف .. الواحد لو ما يسأل عنكم . انتوا بعد ابدا ولا بتفتكرون
مروان: مرتاحين بدونكم ومن غير حشرتكم ..
عذيجة: استح ع ويهك .. والله
سعيد: ههه حليلك يا مروان .. دومك تاكلها
راشد: شحالج عموه
عذيجة: هلا فديتك انته شحالك ..
راشد: الحمدلله
مروان: عموه وين ربيعي ؟
عذيجة: تسالني انا عن ربيعك ؟ حشى ما شفته اليوم
مروان: افا .. كيف ما تصبحين وتمسين بويه هزاع
عذيجة: من زين ويهه والا ويهك الحين الواحد يتصبح بكم
سعيد: ههههههه عطتكم من الزين
راشد: اصلا انته كثر ما تشوف هزاع .. عموه ولا تدري به
عذيجة: هيه والله
مروان: محد يقول لها تهيت من بيت لين بيت الا ام مصبح اطلقت الا ام حمدان عرست الا ام منصور يابت ولد الا ام محمد ريلها ظربها
عذيجة: مالت عليك .. استح ع ويهك .. انا متى شايفني اهيت فالبيوت ها
عمر: ههههههه عموه ما عليج منه يحب يستهبل ... والا انتي والله شيخة كل حريم العالم
عبدالعزيز: انزين وربيعي انا وينه ؟
عذيجة: ربيعك ابويه اليوم هو وامه ما ادري بلاهم لايعه جبودهم . مرضى
مروان: هيه قالي هزاع . ولا يليق عليهم
عمر: حليله سالم .. سار المستشفى
مروان: باجر بعد بييكم صالح بيطيح عليكم
عذيجة: لا ابويه ما عندي مكان انا بعد .. يسير عند امه
مروان: ههاااااااااااااااااااي حلوة والله حلوة .. يالعيوز وقمتي تنكتين
عذيجة: عيز حيلك قول آمين
مروان: عيز حيل شارون قولي آمين
وتموا الشباب يسولفون ويا عمتهم .. لان من مان ما شايفينها ولا سايرين لها .. ولا هي لحقت تيي صوبهم ...
أحمد: بس حصه لازم بعد تحس في علي لازم ما تجرح مشاعره
آمنة: قلت لها انتي اللي اخترتي هالشي ..
أحمد: يعني السموحه أمون لكن الصراحه لو انا بعد من علي بسوي جذه وزياده
آمنة: انتوا الرياييل جذه ما يبين في عينكم
أحمد: في عينج انزين
آمنة: شفت .. شوف الفاظك
أحمد: اووووه امون
آمنة: والله انته قلت
أحمد: لا جد والله ارمس صدق
آمنة: شوه اللي جد ؟ في عيني ؟
احمد :لاااااااااااااااا .. اقصد اللي سواه علي في حصه .. يعني خارج عن ارادته
آمنة: هو صح اللي تقوله ... بس حصه بعد مضايجه
أحمد: والله مضايجه محد قالها تسافر
آمنة: انته شرير
أحمد: شوه يالسين رسوم نحن تقولين لي شرير !
آمنة: اقولك .. اييك شور
أحمد: آمري يا ام ميثا
آمنة: بنزل تحت اجابلهم احسن بوايد
وشلت آمنة بنتها وظهرت من الحجرة ....
أحمد: والله ما تستحين .. انا يالس وارمس ومتحمس واقولج آمري جذه تسوين لي
لكن لين أحمد خلص رمسته جد آمنة نازلة تحت هي وبنتها .
نش وسار صوب الدري عاد وقف فوق .. عناد ..
أحمد ( يصرخ ): أمون تعالي بسرعه
آمنة: ما بيي
ام احمد: سيري شوفيه شوه يبغي
آمنة: عموه والله انه سخيف ويستهبل .. عالفاضي مجابلتنه من الصبح
ناعمه : هههههههههه حليله اخويه
رملة: احسن يتأدب
أحمد: تعالييي
ام احمد: انته ايه تعال انزل تحت
احمد: منوه انا ؟
أم احمد : لا ابويه
أحمد: ابوج فالقبر سيري ظهريه
آمنة: شفتي عموه يوم اقولج انه سخيف مستوي
ام احمد: ياللي ما تستحي مستوي ما تحشم هالايام ..
احمد ( بصوت واطي ): ويه زعلت عيوزتنا يبنا طاري ابوها .. ذكرناها بطفولتها .. خل نسير نراضيها
ونزل احمد ..
رملة: نعم جيه ياي ؟ توك غالط ع يدي
احمد: اسكتي انتي اسكتي
ناعمه: عقب ما يحطون ع الواحد اييون يقردنونه
احمد: منوه قصدج بـ يغلطون .. شايفتني شوه ؟
ناعمه: انته واخوك
رملة: طبعا طبعا ... لا يأبهون لما يقولون
آمنة: ههههههههه ذكرتيني بـ سالم ولد اختيه والله
ام احمد: شحال خواتج وامج يا آمنة ؟
آمنة: الحمدلله كلهم بخير
ناعمه: شحال عفرا ؟
احمد: انا بقولج حال عفرا ... سهر لين نص الليل .. ورقاد الصبح ..واكل وشرب وطلعة ويا غاليه وتتناقر ويا مروان وهزاع وبس فمان الله
رملة: والله لو انا منج .. اعطيه كفففففف يحط ع اختيه جذه جدامي
احمد: تعطين منوه كف ؟
رملة : لا يعني اقول
آمنة: ههههههه بس وايد حطيت ع عفاري هي مب جذه
ناعمه: حليلها والله
احمد: يا بوي خل تعرّس وتفكنا
ام احمد: وانته شلك ؟ شيخصك فالبنيه ... بنت الناس
احمد: اخت حرمتييييييه
رملة: لين الحين تشوفون هالاثنين اللي كانوا يقهرون
احمد: انتي كل ما نيلس تسألين هالسؤال ... هيه هيه كيف ما تبينا نشوفهم
آمنة: سالم مريييييييض
رملة: احسن .. والا هو اصلا ما يليق عليهم يمرضون
احمد: شايفتنهم شوه ؟ عفاريت
رملة: عفاريت شويه بعد عليهم
ام احمد: انتي يا بنيه بس سكتي ... حاطه ع اهل الحرمه
آمنة: ههههه خليها عموه .. هم اصلا لعوزوها وايد يوم المزرعه
ناعمه: عاد رملة ما تنسى ابدا وبتاتا أي شي في حقها
آمنة: طالعه ع اخوها
احمد: الحمدلله ... حقنا ناخذه بايدنا
ام احمد: داخل حرب انته
احمد: وين ابو الحروب ؟ السيد عيسى
رملة: طاااااالع طبعا جيه يقر فالبيت
ناعمه: مب جنه امس مظهرنها !!
رملة: هيه طبعا تدافعين عنه يوديج ويردج متى ما انتي بغيتي .. اما انا حليلي لين ما اذل عمريه ما يودينييييي عفانا الله ..
آمنة: ناكرين للجميل ..
احمد: لو حد ناكر للجميل في هالبيت .. فما في غيرج وغير رملة
آمنة: بسم الله علينا
رملة: لان ما نسكت عن حقنا
آمنة: اصلا اخوج ما يبين في عينه
ام احمد: بسكم بسكم .. حشرتونا من الصبح وانتوا تتناقرون جنه ديج ودياي
رملة: وطبعا الديج العود احمدو
احمد: احمدو اصغر عيالج انا
رملة: اوه عادي اخويه اخويه ...
في بيت بو فهد ...
بدور: وجيه السالفه
وديمه: تستاهلين
بدور: شوه استاهل ؟
وديمة: جيه تحرجين ع الريال .. انتي يوم بعده سعيد مالج عليج وانا اسمع طاري هالفريد تسيرين انتي وتحرجين عليه وتهزبينه
بدور: صدق ما تنعطين ويه
وديمة: شكرا
بدور: عفوا ...
ومدت بدور ايدها وخذت مبايلها من ع الطاولة ....
وديمة: في منوه تتصلين
بدور: في ريلج
وديمة: بسم الله عليه .. بعدني ما عرست
بدور: عيل سكتي خلاص ... الو هلا سعيد
سعيد: اهلين
بدور: وينك ؟
سعيد: هني جريب
بدور: ياي
سعيد: انتي خلصتي
بدور: جيه انا شوه عندي عسب ما اخلص ؟
سعيد: انزين اطلعي برع
بدور: انته عند الباب ؟
سعيد: هيه .. لين تلبسين عباتج وشيلتج .. وتظهرين بكون عند الباب يالله
بدور: مع السلامه ,...
وديمة: بتسيرين ؟
بدور: ليش تبيني اتم
وديمة: والله كيفج
بدور: مستويه سخيفه
وديمة: شكرا
بدور: بلاج ع شكرا اليوم
وديمة: والله روحي ما ادري ...
بدور: يالله فمان الله ...
وديمة: بوصلج لين برع ...
نشت وديمة ويا بدور ..
بدور: توج تبين الفكه مني
وديمة: انا حشى عليه ؟ جيه شوه قلت لج
بدور: ابد سلااامتج ما قلتي لي شي ولا طريتيني
وديمة: الللللللله يسلمــ .......
سكتت من شافت اللي واقف حذال سيارة ريل اختها ...
وديمة: والا اقولج غيرت رايي ..
بدور: لا تعالي وين رايحه
وديمة: شكرا فمان الله .. سيري سيري ابويه بيتج ..
ودخلت وديمه داخل .... سارت بدور وركبت السيارة ...
فهد: حتى اختنا ما نشوفها
بدور: ما تكون فالبيت يوم انا ايي
فهد: تيين في اوقات مش مناسبة
بدور: جيه بكيفي اختار متى اييي !!
سعيد ( صد صوبها): عيل بكيف منوه ؟
بدور: انته ادرى
فهد: يالله توكلوا ع الله ...
سعيد: فمان الله .. سلم سلم
فهد: يبلغ .. مع السلامه ... الله يحفظكم ...
ساروا سعيد وبدور ....
اما فهد دخل داخل ... وشاف وديمة يالسه ...
فهد: للحين واعية ؟
وديمة: توها بدور سايرة .. كنت يالسه وياها
فهد: والحين ؟
وديمة: بسير ارقد
وسارت وديمة
فهد: حجرتج فوق ..
وديمة: برقد عند امايه الليلة ..
دخلت وديمة الحجرة ...
ام فهد: سارت اختج ؟
وديمة: هيه ( وسارت انسدحت حذال امها )
ام فهد: وين وين ؟
وديمة: برقد عندج الليلة عندج مانع ؟
ام فهد: لا .. بس شوه فيج ؟ شوه فيها حجرتج ؟
وديمة: حجرتيه ما فيها شي .. وانا ما فيني شي
ام فهد: ودّوم متأكده ؟
وديمة: هيه امايه والله ( وابتسمت )
ام فهد: شوه فيج حبيبتيه ؟
وديمة: والله ما فيني شي .. بس برقد هني
ام فهد: خلاص ع راحتج
وديمة: امايه
ام فهد: هلا
وديمة: فهد جيه ما يعرس ؟
ام فهد: وانتي شوه تبين به ؟
وديمة: لا بس جذه اسأل
ام فهد: كيفه متى ما بغى يقولي وانا ما بقصّر فيه بعد ..
وديمة: خطبي له خل يعرّس
ام فهد: انتي شلك فيه
وديمة: ما يخصني فيه بس نبا نفرح به
ام فهد: لا تستوين عيوز
وديمة: احس ان في شي
ام فهد: بسم الله ع ولديه ما فيه شي ... بس لانه قايل ما بيعرس لين ما خواته يعرسن .. انتي و بدور ..
وديمة: اوووووونه يا عيني .. ما يليق ع اخويه هالرومانسية والحنية كلها ...
نفس الوقت انفتح الباب ...
فهد: ما رقدتوا ؟
ام فهد: الحين بنرقد
فهد: وين ترقدين يا ام فهد .. ووديمة اليوم عندج
ام فهد: لا حليلها هي بترقد بس انا اسولف وياها
فهد: مع اني اشك الصراحه
وديمة: وليش تشك ... جيه شوه شايفني
فهد: لا ما شي .. اسمحي لنا آنسة وديمة
وديمة: مسموح
فهد: لاااا .. حلفي ! ..
ام فهد: وينك ابويه للحين ؟
فهد: كنت عند الربع شويه .. يالله بخليكم ترقدون وتسولفون .. تصبحون ع خير
ام فهد: وانته من اهله ..
سعيد: شوه تعشيتي ؟
بدور: معكرونه بالبشميل
سعيد: تدرين عاد خاطريه فيها
بدور: ما قلت لي والا جان يبت لك مسوين وايد
سعيد: لا .. نكرّش نص الليل ناكل
بدور: اللي يقول ابد ما مكرّش انته الحين
سعيد: الله يخلي فريييييييد
بدور( غيرت السالفه ): انزين باجر بسوي لك انا الغدا
سعيد: لا .. باجر اظن عموه بطرش لنا غدا
بدور: وشوه يعني اطرش ياكلونه اخوانك
سعيد: لا لا .. ما افوّت غدا عمووووووه
بدور: لا والله ؟
سعيد: صدق والله .. هاللي ما ياكل يوم عموه تطبخ واطرش مينون
بدور: انزين انته واخوانك كلوا
سعيد: بتشوفين شكلج ما مصدقتني
بدور: لا منوه قال ؟
سعيد: من كلامج ..
بدور: لا تفسر كل شي ع كيفك
سعيد: اوه عمر شكله راد من وقت اليوم
بدور: باجر بيسافر صح ؟
سعيد: هيه
بدور: الله وياه
سعيد: اكيد عسب عبدالعزيز .. ما بيهده اليوم ... واكيد من الصبح وياه
بدور: شي معروف ..
في بيت الشباب .. في حجرة عمر وعبدالعزيز
الاخوان اليوم آوين للفراش من وقت ع قولت مروان ...
بما انه عمر بيسافر العصر ............
عمر وعبدالعزيز منسدحين ع الشبرية ...
عبدالعزيز : عمّور
عمر: هلا
عبدالعزيز : قول حق راشد هو ايي يرقد عندي
عمر: شمعنى راشد ؟
عبدالعزيز: بس
عمر: وليش ما ترقد روحك ؟ تخاف ؟
عبدالعزيز: لا .. بس ابا راشد يرقد عندي
عمر: ان شاء الله
عبدالعزيز: باجر الساعه كم بتسير ؟
عمر: الساعه 3 اكون فالمطار
عبدالعزيز: وايد من وقت
عمر: عموه بتطبخ باجر وبتييب لنا الغدا ...
عبدالعزيز: انا بيي وياك المطار
عمر: ان شاء الله
عبدالعزيز: يالله ارقد عسب ما تتعب باجر ..
وبحركة عفوية من عبدالعزيز ... خلت عمر يشهق ..
مد ايده ومسك ايد اخوه .. وغمض عيونه انه بيرقد ..
بمجرد ما سوى عبدالعزيز هالحركة .. عمر حس بقشعريرة في كل جسمه ...
عمر: عبدالعزيز
عبدالعزيز ( فتح عينه ): شوه
عمر: انا ادري انك عود وما بتخذلني صح
عبدالعزيز: اكيد
عمر: أي شي راشد يقولك تسويه
عبدالعزيز: عسب خاطرك ... بسويه
عمر: وتسمع رمسة مروان وعمران وسعيد بعد .. ومثل ما قلت لك .. حرمة سعيد ما يخصك فيها
عبدالعزيز :اصلا انا مول ما مرمسنها
عمر: احسن ...
عبدالعزيز: وبعد ؟
عمر: ويوم تبا تسير بيت قوم عموه .. تقول حق واحد من اخوانك ما تسير جذه .. ويا فريد روحك ..
عبدالعزيز: ان شاء الله
عمر: ونحن اتفقنا انك ما بتسير ولا بيت ترقد فيه لين ما ارد .. فـ انتم ع عالاتفاق وما تقول يوم واحد بشل اغراضي وبسير هناك ..
عبدالعزيز: ان شاء الله
عمر: واذا بغيت تظهر ويا بنات عموه والا شي تخبر اخوانك
عبدالعزيز: انزين
عمر: وكون عبدالعزيز اللي اعرفه ( ابتسم )
عبدالعزيز: ان شاء الله ( ابتسم ) .. بس اباك تدعي بدعاء
عمر: بدون ما تقول بدعي .. بس قولي شوه هو ؟
عبدالعزيز: ان الله يرحم امايه وابويه .. وان شاء الله اشوفهم فالجنة ...
غمض عبدالعزيز عينه .. وهو مب حاس بثقل اللي قاله ... ما حس بـ ان اللي قاله .. يخلي عمر يرجع كم سنة ورا ... ويذكر اغلى اثنين في حياته كلها ...
و هالمرّة ما يدري ليش تذكّر هالموقف بالذّات ...
------------
فالمستشفى ...
انسمع صوت الباب.. انفتح ... اول شي استغربت من اللي داخل وعقب ارتسمت ع ويها ابتسامة ...
عمر: الحمدلله ع السلامه امايه
ساره: الله يسلمك حبيبي
سيف: هاي امك وشفتها واطمنت عليها ارتحت خلاص
عمر: طبعا
ساره: جيه ما مداوم انته اليوم ؟
سيف: ما طاع ولدج يداوم ...
سارة: جيه ما وديته
سيف: اسأليه .. والله لو اخوانه يدرون زين بيسوون
سارة: خبرت هلك ؟
سيف: هيه خبرت عذيجة .. و عبيد ويوسف ..
سارة: وجواهر ؟
سيف: مسافرة
سارة: اصلا انا رمست عذيجة الصبح .. وقلت لها
سيف: هههه انا يوم رمستها تقولي بعد ولد
سارة: هيه قالت لي .. قلت لها الحمدلله
سيف: انا قلت لها الحمدلله ولد بنت اللي ايي من الله حياه الله .. اونه انته اللي ماخذ عني الاولاد كلهم .. انا مصففه بنات وانته صفف الاولاد
عمر: امايه شوه سميتوه ؟
سارة: ما سميناه
سيف: شوه بتسمينه ؟
سارة: انته شوه تبا ؟
سيف: بندر
سارة: نعم ؟ شوه ؟ تسمي ولدي بندر !
سيف: هههههه خلصت الاسماء
سارة:والله ما سميته بندر .. بعدين شوه قصدك .. الا خمس اولاد .. يعني خلصت الاسامي ؟
سيف: خلاص خلاص يا ام عمر والله ما نقصد شي .. بنسميه يوسف
سارة: حلو اسم يوسف .. ويستاهل يوسف
عمر: لا لا لا .. انا بسمييييييييييييييه
سيف: شوه تبا ؟ سميناه خلاص
عمر: لا ما يخصني انا بختار
سارة: خل نسمع انزين
عمر: سموه عبدالعزيز
سيف: من وين يايب هالاسم
عمر: كيفي حلو الاسم عبدالعزيز
سارة: اتفاهم انته وابوك
سيف: بنسميه يوسف .. عسب عمي يوسف يستانس
عمر: لا عبدالعزيز ... احلى .. بعدين .. انا اخوهم العود وانا اللي اختار
سيف: يا سلام ؟ وانا ابووووه
عمر: انته من يوم سعيد وانته تختار
ساره: خلاص بس ... اتفاهموا ع هواكم ... بس لا تصدعوني .. سيروا البيت تفاهموا
---------------
يا ريتج يا امايه للحين عايشه .. تشوفين عبدالعزيز كيف كبر ... وكيف استوى .. و يا ريت لو تربّى مثل ما تربينا نحن ع ايدج و ايد ابويه .. الله يرحمكم ..
فالصّاله ...
مروان: والله لو اقول حق الشرطة انك من اعوان بن لادن ... تفنيش ع طول .. بيسفرونك
عمران: وين بيسفروني ... ان شاء الله ... ليكون انته مغلط فالعنوان
راشد: مضيع عمر الاخ .. يرمس بكل حماس
مروان: ويييييه عمر باجر بيسافر .. الله يعينا ع عبدالعزيز
عمران: انا ما بكون موجود .. يعني لا تشيلون همي
مروان: قم قم .. بعد نجابلك انته .. راشد مب فاضي .. كفاية عليه انا وعبدالعزيز
راشد: نعم نعم ؟ هاللي ناقص بعد
مروان: اخوك الصغير
راشد: صغير في عينك .. هيه صف كم حبيبي
عمران: هههههه اول ابتدائي
مروان: لا لا وايد صغرتني ... ثاني ابتدائي انا
راشد: يمكن ونحن ما ندري
مروان: جابلوا عماركم ما يخصكم فيه
راشد: ما بخليكم تسهرون ... وتردون من وقت البيت .. ويوم تطلعون تستأذنون مني
عمران: الحمدلله محد انا مححححد
مروان: هيه والله الحمدلله
عمران: شوه قصدك ؟
مروان: قصدي واضح
راشد: شوه مسلسل كويتي نحن يالسين هني ؟
مروان: لا مسلسل مصري
راشد: احلف عاد ؟
مروان: والا اقولك انا احيّي الدراما الاماراتية ...
ونفس الوقت ظهر سعيد من قسمه ..
سعيد: عاش ابو الدراما الاماراتية
عمران: تعال تعال اسمع اخوك
سعيد: شوه اسمع بعد اتحفونا
راشد: ايه اسكتوا والله .. من باجر بتبدأ المآسي عندي
سعيد: ليش بسم الله
مروان: ويتوالى مسلسل الاحزان
سعيد: اييه شوه مستوي ..؟ رمسوا قولوا
عمران: ما مستوي شي بس اخوانك يسخّفون لان عمر باجر بيسافر
سعيد: هيه والله .. الله يعينا ع عبدالعزيز
مروان: تدرون شوه .. تبون شوري ...
عمران: لا تشور علينا شكرا
مروان: اسكت انته ما يخصك ... اسمعوا .. شلوا عبدالعزيز وقشّه وفروه بيت عموه
راشد: اقول اكرمنا بسكوتك
عمران: قلت لك لا تشور علينا
سعيد: يعني لهالدرجة عبدالعزيز مسوي لكم مأساة حليله
راشد: بالعكس انا عادي عندي ... وهو صح انه بيضايج لان عمر محد بس كثر ما بقدر بستوي له عمر
مروان: الله يخليك ما يليق عليك تمثّل دور البريء والاخو العود ... وتسوي لنا هالفلم الهندي
عمران: تدرون .. شوه تذكرت ؟
مروان: لا تقول .. ولا تتحفنا
عمران: ما طلبت رايك
راشد: اوهو بس سكتوا
سعيد: هههههه حليلك يا راشد من الحين تعاني
راشد: انا شكلي مب لازم افكر في عبدالعزيز .. لازم افكر فيكم انتوا
مروان: لا لا.. لا تفكر فينا .. بنفتك من عمران بيسير
سعيد: متى بتسير عمران ؟
عمران: الاسبوع الياي بسير
راشد: انا نتيجة امتحاني الاسبوع الياي .. ادعوا لييي
مروان: الله يوفّأك يا ابني
عمران: انا مب مستعد احضر افلام مصرية زيادة بسير ارقد
سعيد: هههههههه يلس يلس بعدنا .. والله انه من وقت
مروان: انته جيه سهران ... حظر تجول بنسوي
راشد: حظر تجول اول شي بنطبقه عليك
مروان: سر سر ارقد يا سعيد وراك حرمة ودوام وخربطان
سعيد: باجر اجااااااااازة
مروان: ليش ان شاء الله ؟
سعيد: كيفي .... اخويه بيسافر
مروان: واخوك بيسافر متى الفير ؟... العصر بيسافر
سعيد: ما اظمن الشوارع الصراحه .. وبعدين عادي جدا يتصلون ويقولون حق عمر لا تعال من وقت .. لان هاي حملة .. ويا مجموعه بيسير .. وبعدين الحج ما تظمن المواعيد اللي يعطونك هي نفسها والا تتغير .. لان ما شاء الله وايد زحمة ...
سلامة: طارق
طارق: هلا
سلامة: شرايك نسافر
طارق:وان شاء الله وين تبين تسيرين ؟
سلامة: شوه تطنز؟
طارق: يعني بالله عليج .. هذا اقتراح تقترحينه ؟ ... انا من كم شهر ماخذ اجازة يوم يبتي عامر
سلامة: ويييييه من زمان هذا كان
طارق: طبعا من زمان بالنسبة لج .. ما اقدر .. ما بيعطوني اجازة
سلامة: اونه ّ
طارق: والله
سلامة: يعني الخطة اختربت
طارق: أي خطة ؟ في خطة بعد
سلامة: كنا انا وامون اختيه اونه بنقنعكم انتوا رياييلنا .. يعني انته واحمد ... عسب نسافر ..
طارق: وطبعا احمد وافق
سلامة: ما ادري .. هو ع اساس انا الحين برمسك وامون بترمس احمد الحين بعد
طارق: احمد ودّه انزين
سلامة: ههههههه عسب جذه ... قلنا السالفه سهله
طارق: وين يعني كنتن تبون تسيرن ؟
سلامة: اممممم ألمانيا
طارق: ألمانيا شوه فيها ؟
سلامة: هو تبا الصراحه يعني وبدون لف ودوران .. كنا نبا نسير عند حصه اختيه
طارق: بسم الله .. وحصه اختج جيه عايشه برع ؟ ثرها بترد
سلامة: امون تقول انها مضايجه
طارق: ع طاري حصه اختج وريلها .. متى بيردون ؟
سلامة: ما ادري .. وشكلهم بيطولون.. عسب جذه اقترحنا سالفة السفر .. ما ورانا شي
طارق: هيه ما وراج شي انتي .. انا اللي عندي شغل الدنيا
سلامة: يعني ابدا ما تقدر تاخذ اجازة
طارق: لا والله .. ما اقدر .. وانتي تعرفيني لو اقدر ... جان خذت وع طول سرنا ولا رفضت لج طلب ..
سلامة: تسلم يا بو عامر
طارق ( ابتسم ): الله يسلمج ...
فالطرف الثاني ..
عاد هني الاستهبال .. قلنا طارق صعب .. بس احمد ما ندري شوه داق في راسه اليوم !! اول مره .. فرصه تييه لين عنده .. عسب شوي يرتاح من الشغل .. لكنه يرفض العرض المغري !!
احمد: انا قلت لا يعني لا يعني لا
آمنة: انزين ليش ؟
احمد: انتن والله ما تستحن .. حرمة مسافرة ويا ريلها تبا تفتك من ويوهكن .. بعد تلحقونها ؟!
آمنة: ط هذا انتوا .. اقوله حصه اختيه يقولي حرمه
احمد: يعني حصه اختج شووه ما تقولين لي شوه
آمنة: انزين عطني سبب مقنع
احمد: لا والف لا
آمنة: اقوله سبب مقنع يقولي والف لا
احمد: انتي بلاج مستويه ببغاء اليوم ..
آمنة: الحييييين انا استويت ببغاء !! ..
احمد: هيه ببغاء ومتّو بعد
آمنة: اقولك .. صدق محد يطلب منك شي
احمد: امون حبيبتيه افهميني .. مب عسب شي .. بنتج اقصد بنتي صغيرة ... ما اقدر .. ولا افكّر ولا يهون عليه اركبها طياييير
آمنة: شرايك نسير عيل بالبحر
احمد ( يظحك باستهزاء ): هههه تنكتين حضرتج ؟ المانيا ما فيها بحر بحرها مجمّد
آمنة: عن الاستهبال
احمد: في وحده تقول حق ريلها عن الاستهبال
آمنة: لانك تستهبل
احمد : بعد !!
آمنة: انزين ما ورانا شي
احمد: طبعا انتي ما وراج شي .. لكن انا ورايه وجدامي ومن يميني ويساري ميت شي وشي بعد
آمنة: اقولك ارقد خلاص .. وانسى سالفة السفرة
أحمد: اصلا منوه قالج حطيتها في بالي عسب بعد ما اقدر انساها بصعوبة
آمنة: اصلا انته ما سفرتني يوم عرسنا
أحمد :اصلا انتي غبار يظهر منج انزين .. يوم عرسنا اونه ... يالعيوز الحين عندج بنيه
آمنة: ذليتني ع هالبنيه .. خذها ما اباها
احمد: وين اوديها ؟
آمنة: عرس وخل حرمتك تربي بنتك
احمد: لااااا ... وهي مب بنتج يعني ؟ لاقطنها من الشارع انا
آمنة: اقولك ارقد ارقد
احمد: اقولج .. انتي وايد تقولين اليوم اقولك .. لا تقولين لي ولا اقولج .. وو لا حد يقولنا ..
في بيت ام هزاع ...
هزاع:عفاري بدلي بسرعه
عفرا: شويه بس
هزاع: بدلي بدلي .. لاااااعت جبدي من هالفلم ...
عفرا: ابا اشوفه
هزاع: بدلي اقولج ..
عذيجة توها ظاهره من داخل ...
عذيجة: انتوا بلاكم ؟ سيروا رقدوا .. باجر ما وراكم دوامات
هزاع: طبعا نحن عندنا دوامات ... لكن بعض الناس .. ما يدرون وين الله حاطنهم
عفرا: هزاع تدري انك مستوي شرات العيايز ؟
هزاع: سمعيها امايه شوه تقول
عذيجة: قولي مروان رد البيت
هزاع: طبعا
عفرا: هو جيه يقدر يحوط والسيد هزاع يالس هني ...
عذيجة: عمر متى بيسافر ؟
هزاع: اظن العصر
عفرا: الحين خلاص بيسافر يعني ؟
هزاع: هيه بتسيرين وياه ؟
عفرا: يا ريت ودني .. ما بقول لا ..
هزاع: آسف ما اودي يهال
عفرا: اقولك ود عمرك قبل عقب ودني انا الياهل
هزاع: بسير ان شاء الله
عذيجة: بس فالحين حق المناقر .... غيره ما يعرفون ... محد والله يفكر في آخرته .. ويفكر في مستقبله ومستقبل اخوانه غير عمر .. فديت روحه
عفرا: بدا المديح
عذيجة: هيه اقول الصدق
عفرا: انزين .. ما قلت شي
هزاع: ع قولت مروان .. الله يعينهم ع عبدالعزيز
عذيجة: سرت اليوم وقلت حق عمر خل عبدالعزيز ايي عندي
عفرا: لااااااا مشكوره ع اقتراحج والله .. شكرا يا ام هزاع .. لو عبدالعزيز يا هني .. سالم 100 % بيي هني .. بيقول اللي بيودي عبدالعزيز الصبح المدرسة بيوديني واللي بيرده بيردني .. وبيقول خالوه عفاري بتذاكر ويايه ...
هزاع: هههههههههه زين استوي مدرسة خصوصية ..
عفرا: لا شكرا ع الاقتراح والعرض المغري ... لدرجة انه بيغمى عليه من كثر ما هو مغري
عذيجة: حشى .. مب لسان . عنبوج من بنيه من نحاستج اصلا عمر ما وافق .. وقال يتم عبدالعزيز عند اخوانه احسن .. وراشد بيجابله
عفرا: هيه صدقه احسن له
عذيجة: صدقه الولد يوم يقول عنج نحسه
عفرا: نحسه نحسه ... بس لا تيمعين عيال الفريج عندنا
هزاع: امايه رمستوا حصه ؟
عذيجة: هيه رمستها الصبح انا ..
عفرا: هاي حصه خبلة سايرة برع
هزاع: حليلها والله ...
قال هزاع الجملة .. وهي صدق ظاهره من خاطره .. يعني قلبه ع اخته حصه ... واللي حست بهالشي عفرا .. وامه اللي تمت ترمس وترمس .. وليش سارت واصلا ما كان له داعي .. الرمسة اللي متعودين عليها من يوم حصه سارت ..
في بيت بو زايد ... كلهم يالسين فالصاله . عدا ........
لا لحظة توه وصل ....
دخل والابتسامة شاقه الثم ...
من شافت ام زايد الشنطة اللي في ايده ...
ام زايد: الف الصلاة والسلام عليك يا حبيب الله محمد ... كلولولولولولولووللولولووووووييييي
زايد: هههههههههههه حلوة حلوة منج امايه
ام زايد: ما بغى .. مسوي لنا عزى فالبيت
بو زايد: ها .. حبيب القلب رد .. ردت لك الروح
ثاني: هيه والله ردت لي الروح يا بو زايد
غاليه: ما في أي رضوض ؟ او شروخ ؟ او كسور
ثاني: بسم الله ... ان شاء الله اللي يكرهونه
بو زايد: يعني نحن
ثاني: لا لا ما اقصدك انته ... والله ما قصدتك ابويه
زايد: انزين لا تحلف مصدقينك
ثاني: ابوك فهمني غلط
ام زايد: الحين عاد بيبدأ عنده الحبس الانفرادي فوق
ثاني: لا لا ... ما اقدر استغنى عنكم
غاليه: بس تعرف الرمسة الحلوة ... اما التطبيق فـ في خبر خير
ثاني: اسكتي انتييييييييييي
زايد: ابويه عمر ولد عمي سيف باجر بيسافر
ثاني: هيه صدق تعال . متى طيارته ؟
زايد: الساعه 4 ... لازم يكون في المطار ..
غاليه: انا بسير بيت عموووووه
ام زايد: عيل باجر نسير بيت عذيجة ...
ثاني: انزين وعقب ؟ ليكون ناوين تسيرن كلكن المطار
ام زايد: والله ما ادري
ثاني: اونه والله ما ادري !! .. لا حبيبتيه لا الغاليه ..
بو زايد: امسك الخيزرانة بعد واظربها
ثاني: بلاك يا بو زااااايد اليوم تفهمني غلط
غاليه: ههههه لانك ما تعرف ترمس
زايد: لا لا امايه ربيعه بيسير وياه .. لا تييون المطار
ام زايد: انا عن نفسي عادي ما بسير بس لازم ايي واسلم عليه .. اما عذيجة والله ما ادري
بو زايد: عذيجة انا بقول لها ما تسير المطار ... ما بتيي
ثاني: هيه ريحتوني
غاليه: عيل اكيد بنات عموه كلهن بيكونن هناك ..
ثاني: اكيد ..
ام زايد: بنات عذيجة من بونهن في بيتها 24 ساعه
غاليه: بسير باخذ العلوم الزينه من عفاري
ثاني: هه ... هذا انتن يالحريييم
غاليه: لو سمحت بعدنا آنسات
ثاني: محد يباكن عسب جذه
ام زايد: بسم الله ع بناتي والله يتمنووووووون غاليه والا عفاري .. فديتهن
بو زايد: انته اللي ولا وحده بترضى فيك والسبّه اللاب توب
زايد: ههههههههه ثاني الله يخليك لا تحط روحك في مواقف محرجه
ثاني: هيه والله ع قولت مروان مواقف تخدش بالحياء ...
بو زايد: وانته مب تتأخر والا تهيت والا تحبس روحك وما تيي تسلم ع ولد عمك
ثاني: لا لا ... هذا عمر الغالييي ولد الغالي
قال ثاني جملته .. وما حس ان هالجملة تخلي ابوه يذكر اخوه .. سيف اللي صدق محد يقدر ينساه فيهم ... ولا حد يقدر ينسى ابتسامته اللي كانت ملازمته .. واللي ورثها منه الحين عمر .. وعياله كلهم .. دايما مبتسمين .. دايما تلقاهم ايد وحده ... لو منوه ما يكون ما بيقدر يفرّق بينهم !!
في ألمانيا ....
علي كان راد من برّع ... حصه كانت مضايجه منه يوم صرّخ عليها .. وهو كان متوتر بزيادة . فـ ما حب يكمل وياها وشل بعمره وطلع .. ولا رد الا الحين ...
دخل شاف الشقه مرتبة .. وفي عشا من المطعم ومحد داقنه ومحطوط ع الطاولة ... ابتسم .. بنات ام هزاع حتى وهن معصبات يعرفن السنع ...
سار صوب الحجرة .. شاف حصه يالسه صوب البلكونه ..
علي: حصه ..
حصه: ييت ؟!
علي: هيه
حصه: عشاك محطوط ع الطاولة ..
علي: شفته ...
وسكتت حصه ...
علي: انتي تعشيتي ؟
حصه: الحمدلله
علي: يعني هيه ؟
حصه: لا ..
علي: عيل جيه قلتي الحمدلله؟
حصه: الانسان لازم يقول الحمدلله ع كل شي ...
علي: رمستي خواتج ؟
حصه: هيه
علي: رمستي امج ؟
حصه: هيه ...
علي: اخبارهم ؟
حصه: الحمدلله
علي: يقولون ... سالم ولد اختج مريض ..
حصه( فزت من مكانها ): شوه فيه ؟
علي: ما فيه شي بس .. بطنه يعوره .. ومسوي لهم مأساة اونه
حصه: منوه قالك؟
علي: رمست احمد انا .. وعقب اتصلت في اخوج هزاع ورمسته .. وكان يالسه حذال سالم ( ابتسم ). .. وتم يلعوزه حليله
حصه: فديت روحه .. ما خبروني
علي: يمكن ما اعتبروه ضروري .. والا مهم .. والحمدلله ما فيه شي ..
حصه: سر تعشّى
علي: ما بتيين تتعشين ويايه ؟
حصه: مب مشتهيه
علي: حصه آسف . .. ما كنت اقصد مساعه اصرّخ عليج او اقول شي يضايق بج
حصه: حصل خير ..
علي: نحن ليش يايين هني ؟
حصه: ما ادري
علي: منوه اختار ان نيي ؟
حصه: انا ..
علي: يعني مب ذنبي ولا اصرّيت عليج صح ؟
حصه: صح ..
علي: يعني انا متحمل اللي انتي متحملتنه صح
حصه: صح ... علي سير تعشّى .. لا ترمس عن السالفه خلاص
علي: لا شوفي ... انا مب مودّر هلي ولا انتي مودره هلج ونحن الاثنين مب مودرين بلادنا عسب نيي هني ونرد ولا جنّه سوينا شي ...
حصه: بس انا مضايجه
علي: انا بعد مضايج وياج ... انا مضايج .. لانج انتي مضايجه .. ومضايج لانج انتي وانا بعد مودرين البلاد ويايين هني .. العيشه هني ما تسوى .. وادري انها صعبه .. انا والله لو انتي ما شاورتي عليه اني اقص التذاكر ونيي هني جان ما قصيتهن .. ولا حجزت ... انا لو ابا ايي هني جان جبرتج من زمان من يوم شاورتج اول مره ..
حصه: انا آسفه لو مضايقتنك .. ومنكده عليك عيشتك هني ..
علي: ابلة حصه .. جانج مشتاقة يعني تدرسين انجليزي .. ومشتاقه حق بناتج .. عادي اعتبريني احد تلامذتج .. عطيني كورسات
حصه ( ابتسمت ): ليش ما تعرف ترمس انجليزي
علي: هيه ودج انتي .. حرمتيه مدرسة انجليزي .. وترمس انجليزي ... وانا مسافر برع ودارس برع .. تبيني ما ارمس انجليزي .. عقب تعايريني
حصه: والله كل واحد يثق في نفسه اكيد
علي: طبعا وانا اثق في قدراتي
حصه: الله ع الوثوق
علي( ابتسم ): والحين ما غيرتي رايج ولا تبين تتعشين
حصه: والله ما لي نفس
علي: شوفي حصه .. شرايج نعقد اتفاق
حصه: بخصوص ؟
علي: بخصوص حياتنا ...
حصه ( ارتبكت ): كيف يعني
علي: شوفي .. نحن يايين هني .. وبنسوي اللي علينا ... وبنسير وبنرد الميتشفى هاي مالتهم مليون مره ... اذا الله راد بيرزقنا بياهل ... واذا لا .. فـ عهدِ علي والله .. دام اني مرتاح وياج .. وانتي ما مقصره ويايه ... وحاطتني في عيونج .. اني ما افكر اودرج او اييب لج وحده تكون لج ضرّه .. لكن بـ مقابل انج تكونين حصه القوية .. حصه المرحه اللي كنت اعرفها .. لاني انا ماماخذنج عسب تمزرين لي البيت عيال ... ولا انكر الجميل ... واييب وحده تعكر مزاج اللي صدق حبتني انا لـ شخصي ولـ ذاتي .... شرايج ؟
ارتاحت حصه عقب رمسة علي ... ردت لها الروح .. صدق يا حظها بـ علي هذا ...
الفـيـــر ....
ما ياها رقاد .. مثل كل مره ...
يالسه تفكّر ... تفكّر في حالها .. في البيئة اللي هي عايشة فيها .. في الناس اللي حوليها ..
تتمنّى لو كانت بنت ناس عاديين .. او بنت خالتها عذيجة .. او بنت خالها عبيد .. او حتى يوسف ..
يمكن خالها يوسف على كثر العز اللي هو فيه .. كان بيخليها تعيش حياتها مل ما تبا .. ولا كان بيجبرها تعيش حياة الأثرياء ...
تذكر يوم كانت صغيرة .. عادي تسير وترد .. وتستانس بالسفرات .. والطلعات .. وحتى بالبدل الفخمة اللي كانت تلبسها .. وبالاشيا الغريبة والاستايلات العجيبة اللي كانت تييبها من برع ..
لكن الحين .. تشوف حالها .. تشوف ان هالحياة حلوة بس لو تكون بـ راحة البال .. تبا ترد صغيرة عسب تستانس بهالحياة .. اما يوم كبرت كرهت هالحياة ...
قبل .. كانت تشوف اهلها اكثر .. كان في رابط قوي بينها وبين عيال خوالها وخالتها .. تذكر كيف تلعب وياهم .. تسولف وياهم .. اما الحين فـ لا .. هذا كله انعدم .. ابوها حط علامة X على شي اسمه بيت خالي . او بيت خالتي . واللي يخليها تنقهر زيادة .. ان بيت خالها يوسف عادي سيري وتعالي كثر ما تبين .. حتى يمكن لو تقول حق ابوها بتبات هناك بيقول عادي .. اما بيت خالتها وخالها الثاني مستحيل .. هل لان هناك في اولاد .. والا لان يعتبرهم دون المستوى ؟!
هل فعلاً ابويه يكره خالتي عذيجة وخالي عبيد ؟ والا انه يخاف عليه انا بنته ؟!
ما ادري كيف افسّر والا كيف افكّر في طريقة ابويه .. وطريقة تربيته لي !!
يوم يديد .. واحداث يديدة .. والناس مرتبشين .. اقصد بيت الشباب مرتبش .. اخوهم العود اللي بحسبة ابوهم بيسافر .. اول مره بيجربون العيشة بدونه لـ مدة اسبوعين ...
في حجرة عمران ومروان ..
عمران ناش من الصبح .. ومروان اللي في نظر عمران سخيف ... ناش وما عنده سالفة .. يالس ع الشبرية .. ويرمس هزاع ..
مروان: ياخي ما ادري والله ما ادري
هزاع: انزين اسأله
مروان: انا توني ناش باتصالك البايخ هذا
هزاع: مروان قم سر اسأله
مروان: هو بعيد عني
هزاع: تستهبل حضرتك ؟
مروان: ما تدري ابويه الله يرحمه باني لنا قصر من بيزات اخوه اللي هو عمي يوسف
هزاع: هههههههههه وايد متفيج ع الصبح انته
مروان: اقولك بنسير المطار ويا عمر .. عقب ع طول بنسير صحارى .. بنتعشى وبندش السينما عقب بنرد البيت
هزاع: انته شوه ابا اعرف
عمران: خييبة .. عمر بيسافر العصر .. وانته تفكر وين بتسير وشوف بتشوف من الحين
مروان: هيه أأمن مستقبلي
عمران: يالله وتأمين المستقبل ما ادري ايمّع عسب يعرّس
مروان: والله بعرّس من بيزات ابويه المكوده عند عمك
عمران: لا اله الا الله
هزاع: انته ايييييييه ذليتنا .. ثرني بخبره عليك الحين
مروان: خبره والله ما اخاف ولا شي ... ط هذا انتوا
هزاع: انزين انزين . اسأل عمران اكيد يدري انزين
مروان: عمرانو .. عمر متى بيسير المطار؟
عمران: الساعه 4
مروان: سمعت ؟
هزاع: هيه .. اجلب ويهك الحين محد يعطيك فيس
مروان: انته اللي متصل ..
هزاع: غلطت يوم اتصلت
مروان: صدق ما تستحي عقب ما ساعدتك تقولي جذه
هزاع: هههههههه في شوه مساعدني بالله عليك .. الا هو سؤال .. اخوك متى بيسافر وذليتني .. وآخر شي بعد عمران قالي متى
مروان: اقولك فمان الله بسير انا اشوف عمر
هزاع: مع السلامه
في بيت ام هزاع ...
دام ان اليوم سفر عمر .... فـ الكل متيمع هني .... ومتغدين هني .. ويتريون متى عمر ايي ويسلم عليهم ... وعقب الشباب يسيرون وياه المطار ...
وتوقعوا ان اللي بيي الحين هو عمر واخوانه .. لكن انصدموا باللي ياي .. اقصد يايه ...
اول شي ... وطبعاً ... احمد و طارق وهزاع كانوا واقفين برع ...
بكل اناقتها .. وبكل ثقة هي وبنتها يمشون .... لين وصلوا حذال الشباب ...
جواهر: السلام عليكم
هزاع: وعليكم السلام .. هلا خالوه .. ( وسار حب راس خالته )
جواهر: اهلين .. شحالك هزاع ؟
هزاع: الحمدلله بخير ونعمه .. انتي شحالج ؟
جواهر: انا الحمدلله بخير .. والله وكبرت ( وابتسمت )
فقط هزاع ... واحمد كتم ظحكته شوي وبينفجر من الظحك .. وهند مدام انها يلست وياهم لمدة يومين ... فـ تعرفهم يوم شافت احمد هي الثانية كتمت ظحكتها هي الثانية ..
جواهر: شحالكم شباب ..
احمد: الحمدلله بخير ..
جواهر: ما شاء الله .. كبرتوا كل واحد فيكم عنده ولد وبنيه الحين
ابتسم طارق لان احمد شوي وبيظحك ع هزاع .. وبيظحك ع عمره بعد عقب هالرمسة ...
مشت جواهر ... ومشت هند .. بس صدت ورا تشوفهم كيف يتريون بس متى امها تدخل عسب كل واحد فيهم يظحك .. وخصوصا احمد ..
وفعلا اول ما داخلت جواهر وهند وياها الصاله ... احمد قص الشريط وظحك ...
طارق: اللي ياخذ العدو ههههه استح ع ويهك
احمد: هههههههههههههههه ،، والله والله ... قوية في حقك يا هزاع
هزاع: ط هذا .. ومب قوية يوم قال لكم انتوا والله كبرتوا .. وعندكم عيال
احمد: هههههه لا مب قوية .. قوية في حقك انته يوم قالت لك كبرت
طارق: والله انكم يهال ... وين وين سالم ؟
احمد: ويا ابوه داخل
هزاع: ويه الله يعين عبدالعزيز اليوم ...
احمد: هيه والله ...
طارق: انا انسان جدا حساس ما بيي وياكم المطار ..
احمد: لا لا ارجوك .. عن ينجرح احساسك
هزاع: ههاااااااااااي .. طالع ع حرمته
احمد: قصدك دلع مب جرح احساس
طارق: صدق ما تستحي ريال طول وعرض .. وعندي ولللللللللللللللد مب بنيه ولللللللد وتقولي جذه
احمد: ذليتنا ع الولد .. شوه يعني .. المره اليايه انتي بنيه وانا ولد
طارق: زيادة الخير خيرين
هزاع: هيه ييبوا عفاريت وفروهم علينا
احمد: فذمتك بنتي عفريته ؟
هزاع: فديتها والله .. بس لانها بنت امون ها .. مب عسب شي
طارق: شوه قصدك يعني حرمتيه بلاها ؟
هزاع: ما فيها شي .. بس ولدك ماخذ منها الجمال .. الحمدلله ما خذ منها الدلع
احمد: هههههههه بعد ريال ويدلع مشكلة
طارق: علقوا علقوا الله بيبليكم .. وانته بيبليك بحرمة وعيال بعد
هزاع: آمين ..
في الصاله ..
جواهر: واي شحلاتها ..
هند: طبعا بنت آمنة واحمد
شمسة: ههههههه خبلتوها البنيه حفظتكم
هند: والله تولهت ع سيرة المزرعه روعه كانت ههههههه
سلامة: شرايج نعيدها ؟
هند: يارييييييت
آمنة: ما عليج خل بس عمر ولد خالي يسافر .. نحن بنسير المزرعة
عفرا: عاد لازم خالوه تيين ويانا
جواهر: يا ريت والله حبيبتيه ..
عذيجة: ما تقدر تستغنى عن بو بدر
هند: لازم لازم .. سفيرها حتى فالمزرعة ..
نقعوا من الظحك الخوات ع رمسة هند .. خلاص تعودت عليهم .. واستوى بالنسبة لها عادي تيلس وترمس بكل عفوية جدامهم ..
فالميلس ..
سالم: والله ما يستوي
هزاع: اقولك مب تسوي لنا حشرة
صالح: يابوي ودوه .. نحن نبا نرقد
احمد: هيه ودوه ودوه
هزاع: هيه تبون ترقدون وتفرونه علينا .. ابا اعرف ما عندكم بيوت ترقدون فيها تييون هني
صالح: كيفنا بيت عمنا
احمد: هيه والله ..
هزاع: بيت ابويه
طارق: شلوه انزين حرام
هزاع: طارق والله هذا وعبدالعزيز مأساة بيسوون فالمطار
احمد: ودوه عسب يخفف ع ربيعه
هزاع: يبتلش فيهم راشد عقب
صالح: وليش راشد ؟
هزاع: هو المسؤول بيكون عن عبدالعزيز في غياب عمر
طارق: اهااااااا
سالم: خالي هزاع بيي يعني بيي
هزاع: ومن الصبح انا يالس اقول ما بوديك جنه يهمك
سالم: طبعا لا .. بس انا اقولك بعد بيي
صالح: ياك الجواب
احمد: ههههههههه بدون يعني ما تعور راسك وده
هزاع: بخليه يركب ويا زايد والا أي حد ثاني ..
ثاني : اهلا وسهلا سمعت اسمي ..
طارق: هلا والله
ثاني: اهلين ... كيف الحال
احمد: الحمدلله .. اخبارك ؟
ثاني: تمام والله
زايد: السلام عليكم
الكل: وعليكم السلام
هزاع: الكل وصل عدا اصحاب الشأن
زايد: توني مرمّس عمر يقول واصلين يالله
احمد: يعني نطلع برع
صالح: جيه استقبال
احمد: ياخي نبا نسلم ونرد نرقد
طارق: ايه لا ترقدون ما فيه رقاد
احمد: مشكلتك هاي .. ازقر حرمتك وولدك وسووا جو رومانسي برع يلسوا فالحديقة وسولف وياها
طارق: حرمتيه مب فاضيه حقي ... خالتها يايه اليوم
ثاني: أي خاله ؟
زايد: عموه جواهر ؟
احمد: يقولون
هزاع: شفتوا عاد
ثاني: اونه .. والله شي جميل ..
ووصلوا الشباب ....
ومروان مسوي حشرة وصدعة وع قولته مسيرة !! ... الناس حج وهذا مسيرة !! ..
وعاد الكل ظهر برع .... شياب وعيايز وبنات وشباب .........
مروان: يالله يالله بنسوي مسيرة ما بتون ؟
زايد: انته وايد متفيج
هزاع: مروان شوف يقولون عمتك يايه
مروان: اونه وينها ؟ خل اشوفها يقولون انها حلوة
هزاع: يا ويهك هذي هناك سر سلم عليها
راشد: عمر وقت الطيارة
عمر: يالله نسلم ونسير ..
نزلوا الشباب وبدوا يسلمون وخصوصا السلام الحار حق عمر لانه بيسير خلاص ...
عفرا: ويه وين عبدالعزيز ...
هند: ما نزل
غاليه: حليله والله
عفرا: الله يعينا .. هالكم اسبوع ما ادري كم يوم
غاليه: حرام عليج
عفرا: ما اقصد شي والله .. كل اللي اقصده ان يعني وايد بيضايج
هند: هو من اللي شفته فالمزرعة ان ما يقدر ييلس بدون اخوه
غاليه: اكيد
آمنة: شوه تقولن ؟
عفرا: نرمس عن عبدالعزيز
آمنة: انتي شلي هاي شويه .. بعدل شيلتي
سلامة: شمسة ولدج بيسير وياهم ؟
شمسة: ما ادري اعتقد
آمنة: ثر احمد قال هم ما بيسيرون المطار
سلامة: هيه ؟
شمسة: هيه صالح قالي ..
سلامة: وولدج كيف بطرشينه وياهم ؟
آمنة: عاد كلهم سايرين خل يسير حليله شوه بيسوي ... مب لهالدرجة صغير انه يشاغب
عفرا: هه .. تبا سالم وعبدالعزيز ما يشاغبون
غاليه: عبدالعزيز اكيد بيسير
هند:حرام خلوه يسير .. اوه تدرون منوه تذكرت ؟
عفرا: منوه ؟
هند: تراب ع قولت عبدالعزيز وسالم
آمنة: ههههههه رملوه فالبيت ... عقب شويه بتتصل بتقول ملانه
هند: ههههه اشتقت لها والله ...
بو زايد: ما اوصيك يا عمر ع عمرك ...
عمر: ان شاء الله عمي ..
بو هزاع: دير بالك ع عمرك ...
عمر: ان شاء الله ..
عاد وصل عمر عند عمته اللي بدت المناحه ... كل شي عندها ولا عمر ..
عمر: عموه عاد .. جذه تصيحين عبدالعزيز يشوفج ..
عذيجة: انته غالي وولد الغالي
مروان: جيه وين ساير ؟ الا هو الحج ..
عذيجة: وانته تتحسب الحج لعبة ... والا شي سهل ؟
مروان: والله العيايز لازم يجلبونها مناحه
عذيجة: عيز حيلك يالهرم
عمران: هههههه حتى وهي تصيح تعطيك فالصميم
راشد: عموه يالله سلمي عليه بنسير تأخرنا
عمر ( تجدم صوب عمته الثانية .. اللي من سنين ما شايفنها): مع السلامة عموه
جواهر: الله يحفظك الغالي .. فمان الله ..
زايد: يالله شباب
مروان: يالله يالله مسيرة
ثاني: هههههه اهبل هذا
احمد: فمان الله ... صوروا صوروا
هزاع: جيه فلم ؟
بو زايد: وين اخوكم سعيد؟
مروان: بيي المطار .. يالله يالله
احمد: مع السلامه فمان الله .. احسن بنفتك من حشرتكم اتأخروا شويه لين المغرب نبا نرقد
صالح: هههههههههههههه حلوة هاي
طارق: لا تييبون سالم لين المغرب
سالم: تتمنوني
احمد: ثرك وايد مصدق عمرك
سالم: يوم برد بتفاهم وياك ... مع السلااااااااااامه
ساروا الشباب متجهين لـ المطار ... في هالحشرة اللي ع السريع استوت لان عمر متأخر .. وفي هالوقت كله ... عبدالعزيز كان يالس فالسيارة ولا نزل ... ولا قال شي .. ولا رمس ويا أي حد من الموجودين ...
في بيت السفير ...
نزل بدر من فوق ...
بدر: غريبة لا امايه ولا هنّود فالبيت ...
يدوه غريسه: هلا والله
بدر ( صد وراه): انا ؟
يدوه غريسه: هيه انته
بدر: غريب ةاول مره .. ع العموم اهليييين وسهليييين بيدتيه
يدوه غريسه: مب من زين شيفتك اهلّي بك .. انته وين يا ولد ما تنشاف ولا ندري عن هوا دارك..
بدر: يعني مشتاقة لي وايد
يدوه غريسه: لا والله مب مشتاقه .. بس احاتي عن تخترب ..
بدر: وين امايه وهند ؟
يدوه غريسه: سايرين بيت خالتك
بدر: أي خاله ؟
يدوه غريسه: راس مالك خاله وحده
بدر: عذيجة ؟
يدوه غريسه: هيه خالتك عذيجة ..
بدر: ليش ؟ ما احيد رمسوا عن عزيمة والا شي .. او هنّود ظهرت السوق الفترة اللي طافت اشترت لها شي يديد لهالمناسبة
يدوه غريسه: لا والله يعني أي مكان تسير لازم لبس يديد وما تلبسه غير مره وحده بس ؟
بدر: طبعا .. بنت سفير ..
يدوه غريسه: صدق انك ما عندك سالفة
بدر: انزين قولي جيه سايرات هناك ؟
يدوه غريسه: ولد خالك بيسافر ؟
بدر: منوه فيهم ؟
يدوه غريسه: سر سر كمل رقادك
بدر: والله صدق قولي
يدوه غريسه: عمر
بدر: اونه .. كيف وانا ما ادري
يدوه غريسه: انته عن شوه والا شوه تدري؟ ..
بدر: لا والله غريبه يعني ما ادري !!
يدوه غريسه: لا مب غريبه .. انته اصلا ما تدري عن شي
ونفس الوقت ... دخل السفير ...
بو بدر :السلام عليكم
يدوه غريسه: وعليكم السلام والرحمه ..
بدر: هلا
بو بدر: اهلين .. شوه الاخبار ؟
بدر: تمام والله
يدوه غريسه: تبا تودي هندو عند اخوك ... ود هذا كندا خل نفتك منه
بو بدر: هذا مخلص دراسه .. هذيج اللي ما يدق راسها شي
يدوه غريسه: احسن لها فالبيت .. خل اييها نصيبها وتتوكل
بدر: ياها ما رضت
يدوه غريسه: متى ؟ ما قلتوا لي
بو بدر ( تدارك الموضوع .. امه ما تدري ان حفيدتها خطبوها ... وهي رفضت بتسويها مأساة وسالفة ): اقول بدر .. تعال شويه اباك
بدر: شوه تبا ؟
بو بدر: اقوكل تعال فالحجرة
بدر: يالله انزين سر وانا وراك
يدوه غريسه: سر سر انته وابوك ما تنفعون حق شي ..
مب جنها قوية في حق السفير !!!
فالمطار ..
احمد: ما شاء الله ما بغيت توصل
عمر: شسوي تشوف شكر يايين ويايه
احمد: ما شاء الله تبارك الرحمن
مروان: احمد تنفع تكون ربيع عمران
عمران: هاهاها ما تظحك
احمد: هههههههه مروان عن الحركات .. هذا بدل ما تكون شرات عمر الحين في غيابه .. تعود
مروان :لا حبيبي ... راشد اللي مبتلش مب انا ..
راشد: هيه انته استانس
احمد: الله يخليكم اظاربوا عقب ما نسير ..
زايد: عاد احمد ما نوصيك ع ولد عمنا ..
احمد: افا عليكم في عيوني والله
مروان: اقولك سلم ع الشيطان
عمر: استغفر الله ايييييه
عمران: ترا يستهبل
هزاع: ههههه عقب شويه بتتكفخ
ثاني: هههههه ابصم الصراحه ..
زايد: سعيد وايد تأخر ..
ثاني: اتصلوا به
عمر ( عينه ع الساعه ): ما ادري بلاه !! مع اني رمسته قبل ما اظهر .. وقالي بيي المطار
مروان: جان سلمت عليه فالبيت ..
راشد: لا اكيد بيي ..
هزاع: هذو الريال يزقر ...
ثاني: الثنائي المرح هادين اليوم ( يقصد عبدالعزيز وسالم )
احمد: يالله نسير ..
من قال احمد يالله نسير .. ع اساس ان راع الحملة زقرهم .. الشباب رغم انهم كبار .. ومعتمدين ع نفسهم .. بس اول مره اخوهم اللي متعودين عليه دايما وابدا يكون بمثابة الابو لهم .. فالبيت .. ما بيكون موجود !!
زايد: الله يحفظك
عمر: زايد اخواني ..
زايد: في عيونا
ثاني: ادعي لي
عمر ( ابتسم): الله يهديك وتودر اللاب توب
ثاني : والله ان دعيت لي بهالدعا امايه بتكثر من دعائها لك ليل ونهار
هزاع: ادعي لنا نعرّس
مروان: هذا همك وبسسسسس
هزاع: ياخي ما عندنا شي بعد .. خلاص
عمران: يالله فمان الله
عمر: عمران ما اوصيك ع دراستك .. والكلية ..
عمران : افا عليك .. انته بس دير بالك ع عمرك ...
مروان: حبيبي ما توصيني انا ع شي .. انا اللي اوصيك
عمر( ابتسم ): انته ما ينخاف عليك ...
راشد: تروح وترد بالسلام
عمر ( وهو حاضن راشد ويهمس في اذنه ): راشد عبدالعزيز
راشد: لا توصيني عليه ..
عمر: والبيت بكبره تحت مسؤوليتك
راشد: لا تشل هم أي شي ..
عمر: هكونا متاتا
سالم ( ابتسم ): رد بسرعه .. نبا نسير رحلة ثانية بعد
عمر: ان شاء الله .. ( ونزل بمستوى سالم وهمس في اذنه ) ربيعك تحطه في عيونك وانا محد
سالم: افا عليك ...
نفس الوقت .. وصل اللي يتريونه من الصبح ..
سعيد: اسمحوا لي ع التأخير
مروان: بسرعه ما شي وقت ..
سعيد: يالله تروح وترد بالسلامه يا بو عزوز
عمر: الله يسلمك ...
احمد: عمر خلصت ؟
عمر: روح ولاحقنك .. ود له الجوازات ..
سار احمد .. و عاد كلهم وقفوا ع صوب .. اكيد عمر بيرمس عبدالعزيز الهادي جدا اليوم .. ع صوب وبروحهم ..
عمر: يالله يا بو عمر ..
عبدالعزيز: تروح وترد بالسلامة ..
عمر: الله يسلمك .. ما اوصيك انته عاد ع راشد .. ومروان اللي فالبيت .. وفريد
عبدالعزيز: لا توصيني ( أبتسم )
عمر: يالله حبيبي ..
عبدالعزيز: اتصل بي كل ليلة ..
عمر: ان شاء الله كثر ما اقدر
عبدالعزيز: ولا تنسى الدعاء
عمر: ما بنساه
وتجدم عبدالعزيز وحضن عمر بالقو ... عمر ما يقدر يستحمل هالتصرفات وفي هالوقت خاصة من عبدالعزيز ...
نش عمر .... ومشى سار داخل عقب ما ودع الكل .. وخصوصا اخوانه ..
والباقين كل واحد فيهم .. سار المكان اللي حاطنه في باله عقب يطلع من المطار ...
بمعنى آخر .. كل واحد فيهم في درب ..
في بيت ام فهد ..
ام فهد: وينه سعيد ؟
بدور: ساير المطار .. اخوه بيسافر
وديمة: وانتي بلاج ؟
بدور: شوه سوى فيه عسب اني قلت له بسير بيت هلي وانته ساير نزلني .. وانتي وانتي وانتي وانتي
ام فهد: يمكن كان مستعيل
بدور: وشوه يعني .. شايف اخوه اليوم الصبح والظهر وقبل ما يظهرون الاخوان كلهم يسيرون المطار بعد شايفنه
وديمة: انزين الحين ما استوى شي
بدور: رمسة ع الفاظي .. ما ادري منوه مسافر
ام فهد: بدور !!
بدور: خلاص بسكت ..
وديمة: انا بعد اقول احسن
بدور: انا ما يمشوني يهال اوكيه
وديمة: بسم الله وانا شوه قلت ؟
بدور: ما قلتي شي ابدا .. بسير ارقد في حجرتيه شويه بريّح
ام فهد: قومي اميه سيري حجرتج رقدي وهدي اعصابج ...
بدور: وعوني ع المغرب ..
ام فهد: ان شاء الله
وسارت بدور فوق .. حجرتها .. وع قولتها بترقد
ام فهد: بلاج انتي ع اختج ؟
وديمة: افف مستويه تقهر وايد تقهر بعد مب شويه
ام فهد: خليها ع راحتها
وديمة: الله يعين هالراحه وين بتوصلها
ام فهد: لا ترمسين جذه عن اختج
وديمة: ما برمس ولا بقول شي .. بس هي بتندم آخر شي ع تصرفاتها هاي
ام فهد: أي تصرفات ؟
وديمة: ها ؟ لا ولا شي .. انا بعد فيه رقاد
ام فهد: سيري رقدي
وديمة: بنسدح هني ع الكرسي ... عسب انش بسرعه وبيلس اسولف وياج لين اهلك مول وارقد
ام فهد: احسن بعد ..
وتمت وديمة تسولف ويا امها .. عقب ما غيرت السالفة .. وبزلة لسان كانت بتستوي مصيبه .. لها ولـ بدور .. دام ان فهد اخوهم ...
**********
30-06-09, 01:08 PM
جديد مواضيع قسم القصص المكتمله
العرض العادي
