كاتب الموضوع :
#أنفاس_قطر#
المنتدى :
القصص المكتمله من وحي قلم الاعضاء
مساكم خير ياوجيه الخير
غبت.. وخير ياطير غبتي.. المهم أني غبت سافرت والحمدلله على سلامتي ورجعتي الميمونة.. ورجعت وانفجعت من بارتات بنت الخالة فاتني البارتات من 110 إلى 115 ست بارتات نارية مولعة حرب عالمية ثالثة على كل الجبهات...بارتات ولا أروع قذائف مباشرة وقذائف من تحت لتحت وقذائف ملتفة...وانا قلبي انعل.. هذا وأنا ماقريت أول مانزلت والحين حاسة رأسي مصدع والبنادول حقي البارت الجديد.. أشاون أصبر على الصداع إلى يوم الأربعاء يا أنفاسوه فديت عينج..
القذيفة الأولى والاهم.. سعود.. القلب.. فديت عينه.. أما على حركة فيلاجيو ذي قلبي وقف... شكلي بأروح أرقد في فيلاجيو لين أشوفك.... وانا أقول أتلفت على الفيكسارت الذهبية مافيها حلا... أثر أنفاسوه العلة خلتك تشتري مرسيدس فورويل سوداء والله أنك أبو الذوق كله... بس أنا خلني على الفيكسار.. محسوبتك بدوية مايدخل مزاجها إلا الفيكسارت حق المقانيص والطير على يمين راعيه
وأما الأهم ذا العلة دكتور السنون اللي اسمه سعد قشعوا سنونه كلها وخلوه أدقم.. ياشين اللقافة وش تبي بمرت سعود تروح تخطبها خلصوا النسوان في الدوحة يعني... وأنتي يادانوه العلة ماصدقتي يجيج أخوج العلة اللي مثلج خويلد بالعلم إلا أنتي ناطة تكلمين رفيقتج الخايسة اللي اسمها تهانيوه.....شكل الغباء مستفحل في كل دخاتر السنون الله يأخذهم... تصبري تركدي أخذي العلم الصحيح ياشين العجلة والتسرع.. الحين سعود بيموت من القهر ياجعلكم القهر كلكم.. القائد مارضى يطلعه.. ودانوه بتملك القرد اللي اسمه سعد..
توقعاتي سعود بيطلع أشلون ما أدري.. المخ قفل.. يمكن يقدم استقالته.. بس مستحيل يخلي دانة
فديتج أنفاسوه لا تطولين علينا وعلى سعود فديت روحه..
عبدالله البق بوس... كسر خاطري يوم تذكر أنه حرم جواهر من عيالها وقعد متسمت حزين... والله ما تستاهل حد يكسر خاطرك... الخواطر كلها تنكسر إلا خاطرك يابو عزوز.. خاطرك غالي يا الغالي... الله يتمم عليك أنت وجواهر . بس حرام تكسر بخاطر راشد أبو القلب الذهبي الرهيف.. صحيح نوفتي صغيرة.. بس كان قلت للولد حن موافقين عليك بس خل البنت لين تخلص.. ماعندك اوساط حلول طال عمرك
ثاني.. ياعلة الكيد ياه... ماتنصرط ولا تنبلع.. عمري ماشفت غرور كذا.. هيه دامه عاجبج يالعجوز زارا اشبعي فيه وابعدي عن سعودي.... المهم ثاني ذا أنا طالبتج يافطوم تأدبينه وتحرقين قلبه شوي.. طالبتج طلبة تكفين.. ياربي رباه يرفع الضغط بجدارة كنه قدر ملح على كبد مريض بالضغط وإلا قدر بصل مخلل أحسن
محمد جعلني فدا عينك ياخو القلب.. ماتستاهل من يحرق قلبك.. أكيد مزون غلطانة بس تراها عندها وجهة نظر هي من ناحيتها منطقية... بس أنا حاسة إنها عادها بتندم... ولو ماندمت موب لازم إن كل بنت عم لازم تأخذ ولد عمها.. السالفة موب حلاوة يعني..
بس كسر خطر وهو قاعد على البحر حزين رومانسي الولد.. بس عجبني يوم نسى الموضوع وكمل حياته... صح خل أبلة مزون تولي...إن شاء الله يفلعون البنات في مدرستها رأسها
خالد العلة اللي مالها حل.. أبو لسان يبي له قص.. زين أن أبوك مارضى يخطب لك الجويزي... دواك يالعلة العالمية... أنا اخبر البنات هم اللي لسانهم يلوط أذانهم... لكن أنت عديت على كل بنات الخليج والعالم العربي والعالم كله.. وبتدخل منافسات صاحبة أطول لسان.. وبتكون الولد الوحيد بين المتنافسات النهائيات على تاج لواطة اللسان
مبرووووووووووك حمل نورة... والله أني استانست لمطوعنا عبدالعزيز ولحبيبة قلبنا العسل سكر الرواية نوارة
حمد الوجه الجديد.... رجّال يابعدي.. الله الله في بنت جماعتك.. حط عينك عليها.. لا تخليها تفر هنا وإلا هنا.. خلها تدري وراها رجالة حمشة السوري ذي أم لسانين..
المهم الحين انقاذ حب سعود من براثن أنفاس العلة وسعد العلة الأكبر.. انتظر يوم الاربعاء على أحر أحر من الجمر... وقلبي يقول طربق طربق طربق..وش ذا دقات قلب وإلا ركيض حمار..
في الختام: ماشاء الله تبارك الله لاحول ولاقوة إلا بالله على أنفاس القلب
بنت الخالة
|
23-02-09, 04:22 AM
جديد مواضيع قسم القصص المكتمله من وحي قلم الاعضاء
العرض العادي
