كاتب الموضوع :
dali2000
المنتدى :
القصص المكتمله
________________________________________
عيسى: السلام عليكم
خلف: وعليكم ... شعندك ؟؟ .. شو إلي ذكرك فيني
عيسى: انا في عمري ما نسيتك
خلف: واضح .. الدليل انك ما سألت عني 4 سنوات
عيسى: بس هذا مب معناه اني نسيتك
خلف: عيل .. شو معناه ؟؟ استهبال؟؟
عيسى: لأ مب استهبال ... انا سويت الشي إلي انت سويته
خلف: شوو ؟
عيسى: انت تجاهلت ولدك ونسيته وانا بعد سويت شراتك
خلف: انا ما عندي ولد غير عبد الله
عيسى: وخليفة؟؟
خلف: ما اعرفه ..
عيسى: بس هو ولدك ؟؟ من صلبك ؟؟
خلف: قلتلك ما عندي ولد تفهم ؟؟ ... وبعدين ليش ييت ؟؟ شو عندك ؟
عيسى: ماشي .. حبيت اعزمك على عرسي
خلف: شووووو ؟؟؟ ... اخيرا بتعرس
عيسى: هيه بعرس
خلف: بالبركة ... منك المال ومنها العيال ... تتهنى ان شاء الله
عيسى: بس انا فرحتي ما بتكتمل إلا اذا اكتملوا خواني وكلهم حضروا
خلف: اعذرني ما بيي
عيسى: ليش؟؟
خلف: انت ادرى
عيسى: خلاص ماعليه ... انا بترك البطاقة هني واذا حبيت تعال انا فرحتي ما بتكتمل إلا بوجودك ... انت اخوي العود
خلف: مع السلامة
عيسى: مع السلامة
يلس خلف بوحه في الحجرة ... وتم يفكر .. اول مرة في حياته يرمس اخوه بهالطيبة ... تم يتسآءل ليش سوى جذي ... هو دومه يتهاوش وياه .. شو إلي غيره هالمرة ... قال في نفسه : مستحيل... لا مستحيل انزل هيبتي .. مستحيل ما ببتسم انا الاخو العود وما بسوي جذي ... واشوي دش حرمته
ام خليفة: خلف شو بلاك؟
خلف: ماشي ..
ام خليفة: شعنده اخوك ؟؟ .. توه تذكرك ؟
خلف: لا ماشي ... عزمني على عرسه
ام خليفة: والله ؟؟ ... اخيرا بيعرس وبيفكنا
خلف: شفتي عاد
ام خليفة: وان شاء الله انت بتسير ؟؟
خلف: ما ادري يمكن
ام خليفة: شو يمكن ... لازم ما تسير
خلف: ليش؟
ام خليفة: انت تبا تسير عشان خاطر اخوك لاو تبا تشوف ولدك ؟
خلف: اكيد عشان اخوي .. ما ابي اشوف خليفة
ام خليفة: الحين إلي يسمعك يقول انه ما بيحضر العرس .. اكيد بيحضر ترى هذا عرس عمه
خلف: ما ادري انا بسير بس عشان اخوي وخلاص
ام خليفة: واضح .. بتسير وبتشوفه هناك
خلف: اسكتي وسيري عند بنتج طفرتني بصوتها
ام خليفة: الحين صوتها قام يطفرك
خلف: هيه عندج مانع ؟
ام خليفة: خلاص بسير الحين
خلف: احسن قفلي الباب وراج
طلعت ام خليفة وهي معصبة من خلف ... وتم خلف يالس في الحجرة بروحه ويفكر في إلي صار اليوم ...
* * *
====
الجزء التاسع
========
في بيت بوخلف الكل هناك مستاانس ومب مصدق ان عيسى اخييرا قرر انه يعرس ... طلع خليفة الطابق الثاني وسار حجرة عمه
خليفة: عمي ... انت مشغول ؟؟
عيسى: لا حبيبي دش قول إلي تباه
خليفة: ههههه .. وكيف عرفت اني ابا اقول شي؟؟ ... يمكن اكون ياي عشان اساعدك
عيسى: يبه خبره .. خلاص
خليفة: هههههههههههه
عيسى: قلوي كل إلي ف يخاطرك ..
خليفة: عمي بسألك ... ابوي بيحضر العرس ؟؟
عيسى: والله .. ما ادري .. انا عزمته وعطيته البطاقة وكل شي
خليفة: هييه .. انزين عمي ... ابوي .. شحاله ؟؟
عيسى: والله الحمد لله بخيروصحته زينه ...
خليفة: الحمد لله
عيسى: صح نسيت اقولك
خليفة: شوو ؟
عيسى: ياتك اخت
خليفة: والله ؟؟ ... شدراك جفتها ؟؟ ولا ابوي قالك ؟
عيسى: ما قالي ولا شي .. انا جفت صورتها وابوك كان شايلنها
خليفة: هييه ... وكيف كانت ؟؟
عيسى: تشبهك وااااااااايد
خليفة: ههههههههه ... زين والله ... وشخبارها امي وشخبار عبود ؟
عيسى: ما شفتهم والله بس ان شاء الله ما فيهم إلا العافية
خليفة: ان شاء الله ... عمي بسألك سؤال ثاني
عيسى: ههههه ... اسأل
خليفة: عمي انت بعد ما تعرس ... بتهتم فيني ولا خلاص ؟؟
عيسى: خلوف ... شو هالكلام ؟؟ ... انا مستحيل اتخلى عنك انت ولد اخوي ومقام ولدي
خليفة: الله يخليك يا عمي
عيسى: ما ابي اسمع هالكلام مرة ثانية
خليفة: ان شاء الله ... عمي انا بسير تامرني بشي ؟؟
عيسى: انا ما سمحت لك انك تسير .. تم وياي
خليفة: ان شاء الله
عيسى: حلييييلك خلوف ... طيوووب .. امزح وياك سير ما عليه
خليفة: لا ما عليه بتم وياك انا ما عندي شغله ثانية
عيسى: براحتك ..
* * *
وجاء اليوم الموعوود ...
يوم عرس عيسى ... طبعا عيسى كان مستاااااااااااانس والابتسامه شاقه حلجه ... بس كان يسوي عمره عادي انه مب متحمس واايد
محمد: يالله عالمعرس مستانس محد قده اليوم عرسه
عيسى: منو انا ؟؟ ... لا عادي
محمد : واضح عادي ...
عيسى: هههههههههه .. هيه والله مستانس
محمد: تتهنى يا اخوي ... انتم السابقون ونحن اللاحقون ...
عيسى: مستعيل على رزقك واايد
محمد : شسوي مليت من حياة العزوبية
عيسى: استح ع ويهك بعد ما كلمت 18 سنة
محمد: عادي
عيسى: قم من جدامي وسير ساعد ابوي حليله من الصبح وهو يكرف سير وساعده
محمد: انزين خلاص بسير
وفي بيت خلف....
ام خليفة: خلف وين ساير ؟
خلف: بسير عرس عيسى
ام خليفة: ليش؟
خلف: بسلم على اخوي وابارك له ليش يعني
ام خليفة: اخوك ولا بتسير تشوف ولدك
خلف وهو معصب: شوووو ؟؟ شو تخربطين ... انا ما عندي ولد غير عبد الله تفهمين واذا سمعتج تعيد هالكلمة ... سير بيت ابوج
ام خليفة: نعم ؟؟ ... بيت ابوي ...
خلف: هيه
ام خليفة: ما عليه يا خلف ... انا ما قلت شي بس هذا إلي احس فيه
خلف: لا تحسين ولاشي ... ولا تقولين كلام ما تعرفين اي شي عنه
ام خليفة: خلاص ... خلاص لا تزعل
وطلع خلف من البيت وسار بيت ابوه عشان يحضر العرس ... كان خاطره يجوف ولده يلمحه بس ... لكن كلام حرته كان يتردد في راسه وكان يقول: لا مستحيل انا ما عندي إلا عبد الله
واجتموا الناس وبدوا يهنون المعرس وابوه واخوانه ... وكان عيسى يدور على خلف ... لعل وعسى ... واشوي لمح واحد ... استانس واايد يوم جافه ... سار عنده بسرعة وسلم عليه وقاله: كنت واثق انك بتحضر
خلف: انا ييت عشان اسلم عليك وارد بس ما بطول
عيسى: المهم انك ييت
خلف: وينه الوالد ؟
عيسى: يالس مع ربعه
خلف: بسلم عليه
عيسى: اوكي تعال ...
وهم ماشين اشوي ويه خليفة وهو مستانس وقال: عمي جفت اليهال إلي هناك تعرف شو سووا ؟؟
عيسى: شوو ؟؟
خليفة: ...................... يبه ؟؟
عيسى: هيه ابوك
خلف: عيسى وينه الوالد ...
خليفة: يبه شحالك ؟
خلف: بسرعة عيسى ... ما ابي اتأخر
خليفة: يبه تولهت عليك
خلف: عيسى ... وبعدين وياك وبوديني ولا ارد البيت
عيسى: خلاص خلاص ... تعال وياي ... خليفة برد لك بعدين
خليفة وهو منزل راسه : ان شاء الله
عيسى: خلف... انت لين متى بتم جذي ؟؟
خلف: عيسى تعرف انا راسي يعورني ومالي خلق هواش
عيسى: بس هذا ولدك
خلف: عيسى وبعدين وياك ... انا برد البيت احسن لي وسلم ع الوالد بدالي
عيسى: خلف .. خلف اترى .. خلف تعال هني
طلع خلف وتجاهل اخوه وسار ويلس في سيارته وكان يفكر في كلام ولده ... لكن قوه شخصيته وقسوة قلبه منعته انه يرد عليه .... قال بينه وبين نفسه : الحمد لله انا نجحت في الامتحان وبينت اني ما اهتم فيه ابدا
نرد للعرس ...
عيسى: يبه خلف يه وسلم عليك
بوخلف: والله ؟؟؟؟ ... خلف كان هني ؟
عيسى: هيه بس ما قدر انه يسلم عليك تم يدور عليك بس ما لقاك وقالي اوصل سلامه
بوخلف: هيه .. الله يسلمه ويرضى عنه ... انا مسامحه والله ... وراضي عنه
عيسى: الله يخليك يا يبه ... ويحب راس ابوه
بوخلف: يالله شد الهمه ... يالمعرس ... ( قالها والدموع كانت في عينه ... ولده الغالي بيعرس )
عيسى: يبه .. لا لا لو سمحت ... تراني والله اصيح وياك
بوخلف: متى بتيوز عن سوالفك
عيسى: ههههههههه
بوخلف: منك المال ومنها العيال
عيسى يحب راس ابوه ويسير ....
ام خلف: اخيرا ما بغيت تعرس ومابغيت تفكنا من ويهك
عيسى: خلاص اليوم بفككم من ويهي وبترتاحون من حشرتي
ام خلف: لا والله بنتوله عليك واايد
عيسى: مسرع ما غيرت كلامج ... توج تقولين بتفتكين مني
ام خلف: ههههههه ... انت ما تطوف شي ؟
عيسى: لا ما اطوف
ام خلف: سير عند حرمتك تترياك
عيسى: لحظة اشوي
ام خلف: شو بعد ؟
عيسى: بتغلى ...
ام خلف: طع منو إلي لازم يتغلى
عيسى: هههههههههه ... لحظة برمس خليفة ... خلوف حبيبي هالله هالله بعمرك
خليفة: ان شاء الله عمي
عيسى: باجر ان شاء الله بيلس وياك وبنتسولف لين ما نشبع ... انا اخاطري اتم وياك بس شسوي حاشريني
خليفة: حاشرينك ولا ......... ما عليه مسامحينك
عيسى: ههههههههه
ام خلف: يالله يالمعرس بتدخل وياي الحين
عيسى: لا لا لا ... استحي ادش عند الحريم
ام خلف: عيسى عن هالحركات ... بسرعة يالله
عيسى: ان شاء الله ... ادعولي
خليفة: بالتوفيج عمي
عيسى: الله يستر
ام خلف: الي يسمعك يقول انها بتاكلك
عيسى: انا استحي
ام خلف: دش وانت ساكت .. خواتك وخالاتك وعماتك مب اي احد غريب
عيسى: بنجوف ..
وسمع عيسى الكلام ودش مع امه ما كان يبا يفك يدها بس هي سحبت يدها وخلته يطلع ع الكوشة ....
* * *
الجزء العاشر
===========
ثاني يوم سار عيسى عند ابوه عسب يسلم عليه ويتسولف وياه
عيسى: السلام عليكم يبه ... صباح الخير
بوخلف: وعليكم السلاااام يالمعرس ... صباح النور ... شحالك
عيسى: بخييييير والحمد لله
بوخلف: اكيييد بخير ... ويضحك بوخلف ويضحك عيسى وياه
عيسى: يبه خليفة وينه ؟؟
بوخلف: ما ادري والله ... كان يالس وياي وقبل لا تيي بشوي ما ادري وين سار
عيسى: هييه
بوخلف: إلا ... صج ان خلف يه البارحة ؟؟
عيسى: هيه صج ... وكان يبي يسلم عليك بس مالقاك
بوخلف: حليله اولدي ... والله اني راضي عنه بعد كل إلي سواه
عيسى: الله يخليك لنا يا يبه ..
ويدش خليفة ويشوف عمه
خليفة: هلاااااااااااااااااااا بالمعرس ... من متى انت هني ؟؟
عيسى: اهليييييين بولد اخو المعرس ... انا هني من زمان انت إلي وينك
بوخلف: اي زماان .. توك ياي
عيسى: ههههههههه .. .اعرف بس كنت اباه يتحسر لأنه طلع وما يلس وياي
خليفة: كشفتك .. توك واصل وتقول انك من زمان
عيسى: ههههههه صح النوم ... تو الناس
خليفة: ههههههه ... صح عمي ابي اقولك شي
عيسى: قول ..
بوخلف: شو سر ؟؟ .. ما تباني اسمعه ؟؟
خليفة: لا افااا عليك يدي .. انا ما قلت شي
بوخلف: لا ما عليه بخليك انت وعمك عشان ترمسون ع راحتكم
خليفة: لا والله يدي ما عندنا مانع عادي تم ويانا
بوخلف: لا ما عليه .. اصلا انا ساير الحين .. عندي شغل وبخلصه
خليفة: اسمحلي يدي ما كان قصدي
بوخلف: لا حبيبي ما صار شي انا اصلا كنت ساير
خليفة يقوم ويحب راس يده ... ويطلع بوخلف من الحجرة ويتمون عيسى وخليفة مع بعض وبرحهم
عيسى: خير خلوف قلت انك تبا تقولي شي
خليفة: عمي .. ابوي البارحة ليش سوى جذي ؟؟
عيسى: ما ادري والله
خليفة: عمي ... يعني لهدرجة ابوي يكرهني ؟؟
عيسى: حبيبي انا ما قلت انه يكرهك
خليفة: عيل ... إلي سواه يثبت انه يكرهني وانه ما يبا يرمسني
عيسى: لا خلوف لا تقول جذي ... ابوك بعده يحبك
خليفة: شوو ؟؟ بعده يحبني ؟؟ ... مستحيل .. اذا كان يحبني كان رد على سلامي وهذا اقل شي
عيسى: خلوف ابوك بعده يحبك .. والدليل انه حضر العرس البارحة
خليفة: حضر لأنك انت طلبت منه
عيسى: انت تعرف ابوك عدل ..لو كان بعده زعلان منك ما كان حضر العرس اصلا .. لأنه يعرف انك بتحضره ... واذا هو يكرهك ما كان بيحضر عشان ما يشوفك
خليفة: هييه .. بس ليش رمسني بذيج الطريقة؟؟
عيسى: لأنه ما بغى يظهر مشاعره لأحد ... وانت اكثر واحد تعرف ابوك .. ابوك جاد وما يحب يبتسم .. كيف تباه يقولك انا اشتقت لك بعد ... صح ولا نا غلطان
خليفة: هيه صح ... كلامك صح
عيسى: يالله عاد ما احب هالتعاسة والكآبه إلي على ويهك يالله ابتسم ... هيه جذي اباك مبتسم مب ما بوزك شبرين
خليفة: هههههه .. ان شاء الله عمي
عيسى: تعرف انا بسافر اليوم
خليفة: وين ؟؟
عيسى: وين يعني ... المعرس وين يسافر ؟؟
خليفة: هيه صح نسيت انك عرست وانك بتسير شهر العسل
عيسى: انت بعد علموك شهر العسل
خليفة: هههههههههه .. هيه طبعا الكل يقول جذي
عيسى: الكل ؟؟ ... ماشاء الله
خليفة: وين بتسيرون ؟؟
عيسى: ليش اللقافة ؟؟
خليفة: ابي اعرف ...... اشوي يدش محمد ويقول :
محمد : انا اعرف وين بتسير ..
عيسى: بسم الله الرحمن الرحيم ... انت متى يت ؟؟
محمد: من زمااااااااااااان
عيسى: قم قم من هني ... اقلب ويهك وسير
محمد : شو اقلب ويهك وسير ما بسير مب ع كيفك
عيسى: اشوف طال لسانك
محمد: لا قصر هيهيهيهيييي
عيسى:آه آه بموت من الضحك ... لا بطني بينقع الحين .. انت متى بتودر نكتك السخيفة؟
محمد: مب سخيفة الكل يحب يسمعها
عيسى:إلا انا
محمد: كيفك عاد
خليفة: صج عمي محمد تعرف وين بيسيرون ؟؟
محمد: هيه اعرف
خليفة: وين ؟؟
محمد: بيسيرون دبي ... عمك بيقص على حرمته وبيودها دبي اونه شهر العسل وبيردها
خليفة: ههههههههههههههههههههههههه ... وليش يعني ؟؟
محمد: انت ما تعرف عمك اكبر زطي على هذا الكوكب ... اقصد في المجرة كلها
عيسى: ترى انا بعدني ساكت ... واذا رمست بتشوف شغلك
محمد: لا حبيبي لا ترمس ولا شي تم ساكت احسن لي ولك
عيسى: هيه زين ... تم جذي شاطر ومؤدب
محمد: ان شاء الله
عيسى: الحين روينا عرض جتفك
محمد : من غير ما نرويكم .... عرضه 17 انج ..
عيسى: محمد ... فارقنا اطلع برع فكنا
محمد : افففف ... انزين خلاص بطلع الحين
عيسى: صك الباب وراك
ويطلع محمد من الحجرة ويصك الباب
خليفة: عمي يوم بتسير ... لا تنساني
عيسى: شو تقول انت ؟؟ ... انا انسى روحي ولا انساك
خليفة: الله يخليك يا عمي ... عمي في شي ثاني
عيسى: خير ؟؟
خليفة: انا خذيت صورتك ... قفلت بحطها عندي ... خذيتها من عند يدتي
عيسى: هيه
خليفة: بحتفظ فيها .. عشان اتذكرك دووم ... ممكن احتفظ فيها ؟؟
عيسى: اوكي ما عليه ... عادي احتفظ فيها
خليفة: مشكوووور يا عمي
عيسى: العفو ..
ام خلف: عيسووه ... انت هني ... شحالك اولدي وشخبارك تولهت عليك
عيسى: ماشاء الله ... غبت يوم واحد مب سنة
ام خلف: والله اليوم مر علي جنه سنه ... ما رقدت طول الليل ..
خليفة: هيه كانت تصيح طوول الليل ... ولدي عيسوه و ولدي عيسوه
عيسى: لا والله ؟؟ ... صج يمه ؟؟
ام خلف: انت ما تقدر تخبي شي في بطنك لازم تتطلع كل شي ؟؟
خليفة: شسوي ؟؟
ام خلف: شغلك بعدين في وقت ثاني
عيسى: هههههه ... صج يمه كنت تصيحين عشان خاطري ... ما كنت اعرف انج تحبيني لهدرجة ... يوم اقولج ما بعرس وانت كل يوم تقولين عرس وفكني من ويهك
ام خلف: ههههههه ... لا مع الايام بتعود على غيابك
عيسى: ومنو قال اني بغيب ؟؟ ... انا بيلس في هالبيت
ام خلف: لاااااا .... كل إلا هذا انا ما صدقت متى افتكيت من حشرتك
عيسى: يمه ما عرفنا لج مرة تصيحين لأني بسير ومرة تقولين لا ابي افتك منك
ام خلف: هههههههه ... امزح وياك حياك الله البيت بيتك
عيسى: اعرف
ام خلف: مالت عليك انزين جامل قو لشي
عيسى: يمه المجامله جذب وانا ما اجذب صح ولا لأ
ام خلف: خلاص خلا ص... انزل تحت حرمتك تترياك
عيسى: وييييي ... نسيتها ... قلتلها تمي في السيارة وانا بجوف امي وبرد
ام خلف: شاطر .... الحرمة نقعت في السيارة
عيسى: ههههههه ... بعدني مب متعود
ام خلف: الله يعينها
خليفة: هيه والله ... الله يعينها
عيسى: يالله بننزل كلنا تحت ...
ام خلف : هيه احسن ...
ونزلوا كلهم ويلسوا مع بعض ....
عيسى: يمه ... ترى نحن اليوم بنسافر..
ام خلف: هيه تروحون وتردون بالسلامة
عيسى: ان شاء الله
ام خلف: وين بتسيرون ؟؟
عيسى: سويسرا ان شاء الله
ام خلف: ان شاء الله
خليفة: اخييرا عرفت وين بتسير
عيسى: ارتحت خلاص
خليفة: هيه راحه نفسية
عيسى: ملقوووووف ... ما ادري على منو
خليفة: على عمي
عيسى يطالع خليفة بنظرة : اي عم ؟؟
خليفة: لا لا لا مب انت ... عمي الثاني
عيسى: تحريت بعد
ميثة ( حرمة عيسى) : ماشاء الله مسوي لهم رعب في البيت
عيسى: هيه عيل
و عقب صلاة العشا .... سار عيسى مع حرمته المطار وخلاص سافروا ..
* * *
==========
مر اسبوع على سفر عيسى ... وكان اطول اسبوع مر على ام خلف وبوخلف ...
ام خلف: والله البيت ماله معنى من غير عيسى
بوخلف: هيه والله ... تولهت عليه وااايد
ام خلف: تعرف عيسى كان يقول انه بيسكن عندنا
بوخلف: والله ؟؟ ... اصلا نا ما بخليه يسكن في مكان ثاني
ام خلف: بس اخاف ان حرمته ما توافق
بوخلف: ما اظن انها بترفض ... بالعكس هي بتستانس اكثر عنه ترى بيت اهلها جريب من بيتنا ... يعني متى ما بغت سارت عندهم
ام خلف: هييه ... احسن
بوخلف: الله يوفقه في حياته ان شاء الله
اشوي يدش خليفة يقول: الله يوفق منو ؟؟ ... يوفقني صح ؟؟
ام خلف: ههههههه ... تحريتك عيسووه .... سبحان الله شراته بالضبط
خليفة: ههههههههه ... شسوي من كثر ما ايلس وياه ... حليله عمي
بوخلف: هيه والله حليله عيسى ... الله يوفقه
ام خلف + خليفة: آمييين
وينش بوخلف من مكانه ويطلع صورة كان حاطنها في الكبت ويتم يتأمل فيها ... دمعت عيون بوخلف ... بس حاول انه يخش دعمه عن ام خلف وخليفة ... سار خليفه عند يده وسأله : يدي صورة منو ؟؟
بوخلف: هاي صورة اعمامك وعماتك كلهم يوم كانوا صغار
خليفة: والله ... اجوفها
بوخلف: جوف هذا الماسك غرش الماي ولابس شورت هذا عمك عيسى
خليفة: ههههههه ... من صغره وهو طول الوقت ماسك غرشة الماي
بوخلف: ههههه ... هيه ... وهذا الثاني إلي يصيح عمك محمد
خليفة: هههههههههههههههههههه شكله يضحك والله
بوخلف: خله يسمعك بيكفخك
خليفة: هههههه ... يدي ومنو هذا ؟؟
بوخلف: هذا المكشر ابوك ... اتذكر انه ما بغى يبتسم
خليفة: هيه ... من صغره وهو جذي
بوخلف: ههههههههههه ... الله يعين
خليفة: هيه .... يدي اسمحلي انا بسير حجرتي اشوي
بوخلف: مسموح يا اولدي ... ويحب خليفة راس يده ويطلع ... ويسير حجرة
في حجرة بوخلف ام خلف تقول : ليش قلتله جذي
بوخلف: تحريته بيضحك ... ما تعرفين اشكثر هو متعلق في عمه ومن يوم ما سافر وهو متضايج ... قلت افرحه اشوي
ام خلف: جان طلعت له صورة ثانية غير هذي الصورة
بوخلف: ما لقيت غيرها
ام خلف: الله يهداك بس
بوخلف: انا بسير بجوفه
ام خلف: لا اتركه وبعد اشوي سير عنده ...
في حجرة خليفة .... خليفة يالس بروحه ومطلع صورت عمه عيسى ويقول: وينك يا عمي ؟؟ طولت غيبتك ... تولهت عليك وااااااايد ... انا راحتي بشوفتك ... رد لنا بسرعة او اتصل ما اقدر على فراقك .... وطاحت دمعه من عينه وبعدين حضن صورت عمه وتم يصيح ويقول... عمي انا محتاج لك ... ومن كثر الصياح رقد في مكانه
في الليل ... كانوا كلهم يالسين في الصالة إلا خليفة اشوي رن التلفون ... نقز محمد من مكانه وسار يربع عشان يرد ... بس تفاجأ يوم جاف اخوه خالد بعد نش وقام يربع ... محمد يسرع وخالد يسرع ... لين ما مسكوا السماعة اثنيناتهم ورفعوها بس ما تكلموا مع إلي دق تموا يتهاوشون
محمد: فك السماعة انا شليتها قبلك
خالد: تحلم انا إلي شليتها قبلك
محمد: الصغار يسكتون يوم الكبار يرمسون
خالد: تحلم ... انا وصلت قبلك
محمد: قم يا الدب ... ويدز خالد ويقول: الوووو ؟؟
عيسى: الحمد لله والشكر ... انت ما بتكبر ابدا استحي ع ويهك عمرك 18 سنة
محمد: هلااااااااااااااااااااااااا عيسى شخبارك ؟؟
عيسى: تمااام الله يسلمك شحالك انت ؟؟ وشخبارك؟؟
محمد : بخييير والله
عيسى: شحالهم الوالد والوالدة ... شحال خلوف ؟؟
محمد: والله كلهم بخير
عيسى: وينهم ابي ارمسهم ...
محمد: لحظة .... يبه عيسى يباك
بوخلف: هلا عيسى شحالك
عيسى: بخير الحمد لله انت شحالك وشحال امي ؟
بوخلف: كلنا بخير دامك انت بخير ... شو الجو عندكم ؟؟
عيسى: والله تمام ... تذكرتكم وااايد ... كان خاطري ايبكم وياي
بوخلف: ههههههههه ... قص على واحد ثاني ... مب على ابوك ... انا اكثر واحد يعرفك
عيسى: ههههههههههههه ... اقول يبه خلوف وينه ؟؟
بوخلف: في حجرته ... بزقره الحين
بوخلف: خلوووووووف .... خليييييييفة .... تعاااال بسرعة
اول ما سمع خليفة صوت يده نزل بسرعة قال: خير يبه ؟؟
بوخلف: عمك يباك ..
خليفة: اي عم ؟؟ ... عندي واايد
بوخلف: هههه ... عمك عيسى
خليفة: والله ؟؟ .... ونزل بسرعة ومسك التلفون : الووووو
عيسى: خلوف ..... شحالك ؟؟
خليفة وهو مب قادر يمسك دموعه : تمااام ... انت شحالك ؟؟ متى بترد ؟؟؟ تولهت عليك
عيسى: حبيبي .... وانا بعد والله ...
وتموا يرمسون مع بعض وخليفة يمسح دموعه ... ويبتسم
عيسى: خلوف ... هالله هالله بعمرك .... ما اوصيك ...
خليفة: ان شاء الله عمي ... وانت بعد تحمل على نفسك
عيسى: ان شاء الله ... .سلم ع الكل
خليفة: وصل ... مع السلامة
عيسى: مع السلامة ...
قفل خليفة التلفون وكان طاير من الفرح ... ما يقدر يشيل عمره من كثر الفرح ... سار وحب راس يده ويدته وسار حجرته وتم يالس فيها بروحه
مرت الاسابيع وفي يوم كان خليفة يالس في الصالة اشوي وسمع صوت الجرس ... نش من مكانه عشان يفج الباب
و
اشوي جاف عمه عيسى .... ما صدق عيونه تم يفركهم ويقول: انت عمي صج ؟؟ والله ؟؟ ما اصدق
ابتسم عيسى وقال: هيه عمك شو نسيتني ؟؟
خليفة: افااا عليك ونقز على عمه وحضنه بقوووو
ميثة: شحالك خلوف ؟؟
خليفة: تمام الله يسلمج ... انتي شحالج ؟؟ ... وشخبارج ؟؟
ميثة: بخييير والله بشوفتكم
خليفة: ان شاء الله دووم
ميثة: شو عيبتكم الوقفة ع الباب ؟؟
خليفة: هههههه ... لا نسيت اقولكم دشوا
ميثة: متعودة والله ... عمك اكثر من مرة سوى نفس هالحركة فيني
عيسى: بس بس فضحتينا من عند الباب ... خلنا ندش اول شي وبعدين
ميثة: ههههههه ...
خليفة: يلسوا هني بسير وبزقر يدي ويدتي
عيسى: خذ راحتك ..
وينزل بوخلف: هلا هلا هلا بولدي عيسى نور البيت
عيسى: منور بصحابه شحالك يبه ؟
بوخلف: تمام والله انت شحالك وكيف كانت السفرة؟
عيسى: والله كشخة... وناااسة
بوخلف: الحمد لله ... المهم انكم استانستوا
عيسى: هيه واايد صح ميثة؟؟
ميثة: هيه والله ...
بوخلف: بغيت اقولك ... ان يوم الخميس ان شاء الله بنسوي عزيمة وبنعزم فيها كل العيلة
عيسى: شو المناسبة؟؟
بوخلف: لأنكم رديتوا بالسلامة
عيسى: هييه ... اوكي ما عليه
بوخلف: مب تقولي بعدين ما اقدر ..
عيسى: لا ان شاء الله بحضر
بوخلف: وبعدين بتلاقي مفاجأة بتعيبك وااايد
عيسى: والله ؟؟ شو هي ؟؟
بوخلف: اذا قلتلها ما بتكون مفاجأة
عيسى: هههههه هيه
بوخلف: بتعيبك انت وخليفة واايد انا واثق من هالشي
سكت عيسى وتم يطالع ابوه وهو مستغرب .... ابتسم بوخلف وقال: خلاص انتوا سيروا وارتاحوا وبتعرفون كل شي في وقته ...
* * *
الجزء ال 12
============
يلس بوخلف بورحه في الصالة ورجع بذاكرته لأيام قبل يوم كانوا عيالهم كلهم صغار تم يتذكر خلف قال: خلاص انا بنهي هالسالفة
مسك التلفون واتصل عند خلف ..
خلف: الوو
بوخلف: السلام عليكم .... ارتبك خلف يوم سمع صوت ابوه
خلف: وعليكم السلام ... شحالك يبه ؟؟
بوخلف: وييييي ... من زمااااان ما سمعت هالكلمة منك
خلف: .......
بوخلف: انت شحالك وشخبارك؟
خلف: تماام
بوخلف: الحمد لله ... شحاله عبود ؟؟
خلف: بخيير
بوخلف: الحمد لله .... عيسى قالي انك حضرت العرس
خلف: هيه حضرت بس ما قدرت ايي واسلم عليك ... ما لقيتك
بوخلف: هييه
خلف: دريت يبه ؟؟ ... ياتني بنية
بوخلف: والله ؟؟ بالبركة ... من متى؟؟
خلف: من خمس اشهر
بوخلف: جذي وما تقولي ... يالله ما عليه ... شو سميتها ؟؟
خلف: سميتها مهرة
بوخلف: عاشت الاسامي ... تتربى في عزك
خلف: الله يخليك يبه
بوخلف: اقول خلف ...
خلف: خير ..
بوخلف: يوم الاربعاء عندنا عزيمة ونباك تحضر
خلف: ليش؟
بوخلف: بحضورك بتكتمل فرحتنا
خلف: بحاول
بوخلف: لا لازم تيي
خلف: يبه بسألك ... انت بعدك زعلان مني ؟؟
بوخلف: لا والله ... انا راضي عليك وما بزعل منك ابد ... انت اولدي
خلف: الله يخليك يبه
بوخلف: خلاص عيل تعال يوم الابعاء عقب صلاة المغرب
خلف: يبه انا بيي بس بشرط
بوخلف: شو هو ؟
خلف: ما ابي اجوف خليفة
بوخلف: انت متى بتيوز عن سوالفك ؟
خلف: يبه هذا هو شرطي .... انا ما ابي ولدي يكون رقيق ومرهف الاحاسيس تقول بنية
بوخلف: انت ليش جذي ؟؟ ... اذا كان ولدك قاسي وصلب بشو بيفيدك
خلف: يبه انا هذا اسلوبي في التربية .... ابي اولادي يكونون اقوية
بوخلف: الله يعين .... انت إلي نيت على نفسك
خلف: يبه انت لو تشوف عبد الله كيف مستوي ريال والله
بوخلف: ان شاء الله بجوفه يوم الاربعاء
خلف: ان شاء الله
بوخلف: مع السلامة
خلف: مع السلامة
بوخلف: الله يعينك يا خليفة ويصبرك على ابوك ...ما اعرف شو بيكون موقفك يوم بتجوفه يوم الاربعاء...
في بيت خلف... كان خلف يالس بروحه اشوي دشت حرمته وسألته : كنت ترمس منو ؟؟
خلف: ارمس ابوي
ام خليفة: ابوك؟؟؟
خلف: هيه ابوي شو بلاج ؟؟
ام خليفة: لا ماشي بس شعنده ؟؟
خلف: ماشي يعزمني
ام خلفية: هييه الله اعلم شو ورى هالعزايم
خلف: الله يعين ... سيري وزهبي لي ملابسي بظهر الحين
ام خليفة: وين ؟؟
خلف: عند شغل
ام خليفة: دقايق وازهب لك كل شي
مر الاسبوع بسرعة ويا يوم الاربعاء ... بوخلف كان حاس بشي قابض ع قلبه بس ما حب انه يظهر لأحد انه متضايج ولا شي ...
في بيت خلف.. كان خلف راقد
ام خليفة: خلف ... خلف يالله قوم الساعة ست الحين بتتأخر
خلف نقز من مكانه .....: شوووووو ؟؟
ام خليفة: انا من متى اوعيك
خلف: انزين خلاص خلاص ... طلعي كندورتي وغترتي
ام خليفة: انزين لا تعصب ...
لبس خلف ثيابه بسرعة وطلع من البيت مسرع وساق سيارته شرى المينون ... هو ما صدق متى ابوه رضى عليه ... هو ما بغى انه يتأخر عليه وما انتبه ان الاشارة كانت حمرة تعدى الاشارة واشوي يت شاحنه جدامه ودعمته ....
تجمعوا الناس ويت الشرطة والاسعاف وطلعوا خلف من داخل السيارة كان الدم مغطي ويهه بالكامل ... دخلوه في سيارة الاسعاف وودوه المستشفى بسرعة ودخلوه غرفة العمليات ....
في بيت بوخلف...
رن التلفون ورد عيسى ..
عيسى: الوو
الشرطي: السلام عليكم
عيسى: وعليكم السلام ... منو وياي ؟
الشرطي: هذا بيت سيف الهاملي ؟؟
عيسى: هيه هو ..
الشرطي: نحن نرمسك من مخفر الشرطة
عيسى: الشرطة ؟؟؟ ... خير شو صار ؟
الشرطي: انت تقرب لخلف سيف ؟؟
عيسى: هيه انا اخوه
الشرطي: اخوك خلف صار له حادث وهو الحين في المستشفى
عيسى: في اي مستشفى ؟؟
الشرطي : في مستشفى الجزيرة
عيسى : الحين بيكم .... وسار عيسى عند ابوه بسرعة وقاله: يبه الحق ...
بوخلف: خير شو صار ؟
عيسى: يبه خلف في المستشفى .
بوخلف: شوووووو ؟؟ ... لييش ؟؟ شو صار ؟؟
خليفة: شو صار لأبوي ؟؟ ... عمي قولي ..
عيسى: صار له حادث وهو الحين في المستشفى
بوخلف: وانت شو تتريا قم يالله بسرعة بنسير هناك
عيسى : يالله .... وساروا كلهم بسرعة ... في المستشفى
عيسى: دكتور نحن اهل خلف سيف ... شخباره ؟؟
الدكتور : حالته مستقره الحين .. بس للأسف
عيسى: شووووو ؟؟
الدكتور : خلف انضرب ضربة قوية على راسه ... وهذا سبب له شلل
عيسى: لا لا ... لا تقول جذي ... قول انك تمزح
الدكتور : هذا قضاء الله وقدره
عيسى: ونعم بالله ... وسار عند ابوه والدموع مغرقه عينه
بوخلف: خير شو بلاك ؟؟ شو صار ؟؟ خلف فيه شي ؟؟
عيسى: يبه الدكتور قال ان خلف صابه شلل ... وحضن ابوه وتم يصيح
بوخلف: شووو ؟؟ كيف ؟؟ شو تقول انت
خليفة: عمي لا تمزح ويانا هذا مب وقت المزح ابوي ... لا ارجوكم لا تمزحون وياي وركض بسرعة وتم يدور على الحجرة إلي ابوه فيها لين ما لقاه ..
دش خليفة الحجرة بسرعة و وقف عند راس ابوه وكانت الدموع تتساقط من عينه اشوي فتح خلف عيونه وجاف ولده وهو يصيح ... كان بين وبين نفسه يبى يبتسم له بس تذكر عزت نفسه .. استجمع كل قوته وقال كلمتين
خلف: (( اطلع برع ))
بكى خليفة وتم يقول: ليش ؟؟ ... انا شو سويت ؟؟ يبه لا تسوي فيني جذي ... يبه ابتسم لي لو سمحت ... ابتسم ولو لمرة ..
خلف: قلت لك اطلع برع ما ابي اجوف ويهك
طلع خليفة بسرعة وسار سيارة عمه وتم يصيح هناك ... دش بوخلف الحجرة عند خلف قاله: شخبارك ؟؟
خلف: يبه انا كم مرة قلت لكم اني ما ابي اجوفه
بوخلف : استهدي بالله
خلف: يبه انا تعبان وابي ارقد
بوخلف: خلاص براحتك انا بتم وياك هني وعيسى بيسير مع خليفة البيت
خلف: كيفكم ..
=============
في السيارة ..
عيسى: خلوف ... ليش يالس هني ؟؟ ليش ما سرت وتطمنت على ابوك ؟؟
خليفة: سرت عنده ..
عيسى: وشو قالك ؟؟
خليفة: قالي اطلع برع
عيسى: شوووو ؟؟
خليفة وهو يصيح: ... هيه قالي اطلع برع ما بغى يجوفني ...
عيسى: هذا زودها ... لين متى بتم على هالحالة
خليفة: .........
عيسى: ابوي قالي اوديك البيت ... وبعدين برد وبجوفه
خليفة: يالله خلنا نسير
عيسى: حبيبي خلوف اسمح دموعك ... تعرف اني ما احب اجوفها
خليفة: ان شاء الله
وصل عيسى البيت واستقبلته امه عند الباب
ام خلف: خير شو صار ؟؟
عيسى: ماشي خلف صار له حادث
ام خلف: كيف ؟
عيسى: كان مسرع ودعمته سيارة
ام خلف: وهو شخباره الحين شو قال الطبيب
عيسى: للأسف ... ياته ضربه على راسه وهالشي سبب له شلل
ام خلف: شلل ؟؟ ... ولدي ... خلف ... ما اصدق ... واغمى عليها
|
07-01-09, 02:07 PM
يبه ابتسم لو سمحت للكاتب الرميثي
جديد مواضيع قسم القصص المكتمله
العرض العادي
