...@@البارت الثالث والثلاثون@@...







وأنتي يا ريــما أمانه لأجل غاليك وعشانه..

هالله الله في فيصلنا لاحرمك الله حنانه..

وأنتي يا ريما أمانه لأجل غاليك وعشانه ..

هالله الله في فيصلنا لاحرمك الله حنانه ..



>>ههههههه للحين متأثره من العرس

نرجع لوين ما كنا !



....





سعود:ههههههههههه والله انك نشبه !..

طلال:احترم نفسك بعدين رايح رايح وبكيفك..

سعود وهو قاعد على الكرسي ويأكل ومايشوف الداخل مع الباب لانه وراه من اليسار

:طلوول فارق بأكل وبنوم وانت ما وراك والي ..

طلال:هههههه ما سمعتك امي ان توريك شغلك يالتيس..

سعود بعصبيه :تيييس في عينك تطوروا النااس ياخي تييييس وينا فيه ؟؟ ...

طلال:هههههههه لا حبيبي أنا معجبني نفسي ..

سعود:هههههههه والله أنك خبل شلون بالله عليك بس وشلوون معجبني نفسي ؟؟؟..

طلال:ههههههه حلها انت عاااد ..

سعود:مالك نيه تنوم ؟؟..

طلال:لا والله بعد مأخذين بنت أخوي ويتدلعوون ..دخلت العنود على كلمة سعود هاااذي ..

(((:مالت عليك وعلى بنت اخوك ..سمع شهقه ولف رأسه بسرعه ..

وقفت مكانها منصدمه ما قدرت تتحرك حتى من مكانها الصدمه شلتها ..

العنود وسعود مبلمين كل واحد يناظر منصدم ..

طلال:يااااااااااهووووو ابو الشباب لايكون نمت انت ووجهك ..

صحاه صوت طلال لف عنها رد بثقل :هااا لامعك طلال انا مشغول اللحين اكلمك بعدين ..وسكر السماعه ما عطاه حتى فرصه انه يرد ..

طلال:مااااالت عليك بعد خالك تخلخلت عظامك بلا ..

لف سعود بسرررعه بعد ما سكر السماعه ومالقى احد ..تتعوذ من الشيطااان ما يدري من وين طلعت جنيه وإلا وشوو ..

اما العنود وما ادرك ما العنود هجت بكامل سرعتها لفوق من سرعتها تتعكر على الدرج تطيح وترجع تقووم ..اول ما وصلت الدور الثاني خذت نفس وراحت غرفه ريهام ماتبي تشوف احد ودها تصييييييح

"ياااافشيلتي وواقفه بعد انااااظر وببجامتي والزفت اللي في وجهي (المكياج )ياخزياااه على قولة أمي وش بيقوول عني الله ياخذني وياخذ الساعه اللي جعت فيها يااااااربي ارحمني.."





دخلت ريهام المطبخ بعد ما طلت تشوف اذا سياره سعود فيه ولا لا وكانت جايه مسرعه ماتبي العنود تدخل بس بعد ما فات الاوان شافت سعود سرحاان ويناظر اكله ..

ريهام:سعووووووووود انته هناااا ؟؟؟..

سعود:وجع إن شاء الله بتسبهون بي اليوم ماتعرفين تتنحنحين ..

ريهااام :هههه شفيك؟؟ ..وبخوف ..ما جا أحد هنا من شوي ؟؟..

سعود بغباء:لا ..لييه عندكم احد..؟؟

ريهام تروح للثلاجه وتطلع لهم شي ياكلونه..:لا بس دلال بنت عمي وعنود بنت خالو عبد الرحمن ..

سعود:اهااا ..

ريهام وهي تشتغل ..:ليييه تسأل ؟؟..

سعود وهو يفكر "أكيد العنود دلال حافظ خشتها من زمان ههههههههه بس والله حلوووه كنها هنديه ما شاء الله عيب

يالأخ تراها من محارمك ..ههههههههههه طيب آسف أنتي ماتخليني أفرح بشي !>:الله يسامحه ما رديت عليه !"

ريهام:الحمد الله والشكر أحد يضحك مع نفسه ..

سعود:هلا ؟؟..

ريهام تاخذ السندوتشات وتحطها في صينيه :سلامتك ..

سعود:لين اللحين مانمتوا ؟؟..

ريهام :لانايمين من زماان ..

سعود:يا ملغي ..

ريهام :بلاه سؤال ذكي ..

سعود رمى عليها علبه الهمبرجر وهي تطلع من المطبخ مسرررعه ..







..............







عنود غسلت وجهها بعد الصياح وهي تسمع صوت ديما يقرب من الغرفه ..

:وييينك مود موزيل عنود ؟؟؟..

العنود:هههههه هنا ..

ديما :احلفي احسبك هناااك تعااالي يالله عندنا مشوووار ..

العنود مستغربه :مشووووار ويـــــــن ؟؟؟..

ديما تسحبها من يدها وتطلع من الغرفه :مالك دخل امشي وانتي سااااكته ..سمعوا صوت احد يتنحنح ..عنود ركضت لغرفه ديما وديما نادت سعود يطلع بعد ماسوت له طريق ..



دخلت العنود :ياااااربي ..

دلال:وش فيك ؟؟..

عنود:لا ولا شي بس وش عندكم مشوار مدري وشو على وين ؟؟ ..

ريهام وهي تأكل :مهبل يبون يرقون السطح يكشتووون ..

العنود:ههههههههههه

دلال:ما المهبل الا انتي ! ..

العنود:حلووه يكشتون ههههههههههه بر على غفله ..

دلال:أنتوا وش عرفكم بس ..ديمااااااااااا..

ريهام :هيييه انطمي ابوي نايم ..

دلال :اووووه نسيت ..وتصااارخ بصوت واااطي ديمااااااا..

العنود:هههههههه قالك سوت شي ..جت ديما وجهزت كل شي اخذوا فرشه (بساط صغير ) ورقوا السطح يرقبون الشرووق طالعين رومنسيات الخوات بعد العرس ههههههههههه ..



.............









مها:والمطلوب مني ..

أبو حمد :ولا شي انا خيرتك وانتي اختاري مع اني متأكد من اختيارك ..

مها احمرت خدودها :كيف يعني ؟؟؟؟

ابو حمد:ههههههه ولا شي عمك يبيك لولده وتركي يبيك من زمان وفي فرق بين الاثنين وانتي في خاطره

وانا ما ودي اكسر في خاطرهالمسيكين كافي ماشافه في حياته من موت ابووه لكفاحه ووظيفته واللحين عمله الخاص ..

مها :ههههههههه تحيز ماشاء الله !..

ابو حمد :هههههه ملاحظه مع أني هزئته على حركته في المزرعه ومفروض يتقدم لي أنا اذا هو يبيك بس الولد معجبني عصــامي كون نفسه بنفسه وبدون ما يحتاج لأحد لا ورث أبوه ولا فلوس أمــه يذكرني ببداياتي يوم كنت شاب ..

مها ساكته ما تدري وش تقوول ..عرفت وش اللي صار وليه تركي متغير عشان سالفة خطبة عمي لي لخالد ولده ..

بس هي مقرره وش تبي اصلا هي اصلا تحبه وتغليه كفايه مكابره والله يعين

بيهج الرجال وانا اتغلى ومن تغلى تخلى وانا ما أتغلى >>بس من تغلى لعيوون غالي ما تخلى وأنا أختك !!!..



قطعها أبوها يوم شافها سااارحه وغرقانه بالتفكيير ..:هااا وأنا أبوك وش قلتي ؟؟؟..



مها :موافقه !..

ابو حمد يستهبل :على من ؟؟

مها تنتظره بحاجب مرفوع :المسيكين !...

ضحك ابوها على ذكائها يعني ماقدر عليها :الله يكتب اللي فيه الخير ..

مها :الله يعين ان شاء الله >>وضحكت ههههههه للحين يامها خلاص وافقتي ليت من يبشر عمتي هي اللي بتفرح ما كلمتني من العيد اكيييد زعلانه على ولدها ..











..............











مها :رناااا الحقي علي ؟؟؟؟..

رنا بخوف :وش فيك خير ان شاء الله ؟؟ ..

مها وشوي تنطط:خطبني يا رنا خطبني ..تخيلي اتطاق مع عماني عشاااني والله فرحاااانه يا رنا فرحااااانه ..

رنا:هههههههههههههه يا عيني على روميوو ماصبر على الله يعين أجل ؟؟..

مها :هههههه اقول انطمي ..

رنا:من قدي جولييت ..

مها :ههههههههههههه ..تخيلي عرفت ليش زعل في العيد لاني عمي خطبني لخالد ولده وهو عارض قدام كل الرجااال ههههههههههههه تخيلي يقول مها لي تعرفين شلووون هالكلمه صحتني من اللي أنا فيه مهااااا لي

أنا له يا رنا له ههههههههههههه >>من الفرحه ياعمري ما تدري وش تقول !..

رنا:هههههههه ياحبي لك كل ذا فرحانه الله يوفقك يا ربي وتتغلين ماهقيت انك تحبينه لهالدرجه ؟!..

مها بعد ماحمرت خدودها :أنا مو بس أحبه أنا أموووت فيه ..

رنا:هههههههه الو متأكده انك مها ماغير ؟؟؟..

مها :ههههههه على سن ورمح ..بس خاااايفه ..

رنا :من ايش ياقلبي ؟؟..

مها:ما ادري احسه حاااقد علي تخيلي يوم زواج ريما شافني وماسلم علي هذاك اليوم اللي جا خطبني فيه من ابوي !..

رنا :ما الومه صراااحه أنا لوني منه كفختك في الزفه ..

مها :عمـــــــــــــــــى يعمي العدو بسم الله علي ..

رنا:هههههههههه ياليت والله يبرد تسبدي فيك ..>>تستهبل عليها ..

مها :رنــــا لاتخوفيني اكثر!! ..

رنا:عااادي يا قلبووو ترى ضرب الحبيب مثل اكل الزبيب ..

مها :فارقي بس..











.............













:خلصتي ..>>قالها فيصل وهو يشوف ريما واقفه بكامل اناقتها عند المرايه تعدل شعرها شوي ..وقعد يتأمل ..

ريما لفت :ايه يالله ..

فيصل :محلوووه ؟! ..

ريما بخجل :يالله نمشي ..

فيصل :ههههههه يالله لا أهون ..

ريما :لاتكفــى ..

سألته وهي تلبس عبايتها :فيصل ؟؟..

فيصل :عيونه ..

ريما :تسلم ..بس صدق مسافرين ؟؟؟..

فيصل:هههههه ايه والله العظيم ..

ريما:هههه طيب لا تحلف ..

فيصل :إن شاء الله بس بنمر أهلي اللحين وعمي ونمشي ! ..

ريما:اليووم ؟؟..

فيصل:اييه ماودك ..

ريما:لا عااادي بس .....

فيصل قاطعها وهو يشيل شنطتها الصغيره اللي جابتها معها للفندق ..:لابس ولا شي خليها مفاجأه يالله ..



طلعوا واتجهوا لبيت ابو فيصل ..البيت مرره هاااادي دلال في بيت عمها وبندر كالعاده هااايت مافيه الا

ابو فيصل ومرته يتقهوون العصر ..



دخل فيصل :ياااا أهل البيت ؟؟؟؟..

قامت امه فرحانه :ياااااهلاااا وغلااااا اقلط وانا امك وطلعت لهم وريما تفك نقابها ..

أم فيصل:هلا والله الف مبروك الف مبرو ك..

فيصل:الله يبارك فيك بس أمس العرس يمه هههههههه ..

ام فيصل :فرحااانه فيك جعلي ما ابكيك وهلا بالريم..وتلم الريم من كتفها بعد ماسلمت عليها وتدخلها ..

:أدخلي وأنا أمك البيت بيتك !..

ريما:تسلمين خالتي..

فيصل :هدوووء غريبه وين دلال ..؟؟

ام فيصل :في بيت عمها ..

ابو فيصل :حيييا الله الريم تو ما انور بيتنا يالغاليه ..ريما حمر وجهها من استقبال عمها ..

ريما:الله يحييك وحبت رأسه وبعد الاحوال والسؤال ..

ام فيصل :متى رحلتكم أجل ؟؟؟ ..

فيصل يقعد جنب ريما بالعمد بعد ماقااام يأخذ له تمره تموويه طبعاً ..

فيصل:اليوم العشا موعد رحلتنا !..ريما تسحب عبايتها وتعدل جلستها الأخ قاعد عليها..

ابو فيصل :تروحون وترجعون بالسلامه ..من بيوصلكم ؟؟..

فيصل:مكلم بندر بيمرني في بيت عمي ..

ابو فيصل :الله يوفقكم ..ياربي ياحبيبي الحمد الله الحمد الله ..

فيصل يضحك على ابوه ويمسك يد ريما :اييه والله الحمد الله..

ريما وجهها طماااطه >> فك يدي فصيل ووجع ..طبعا في نفسها لأن عمها ومرته موجودين ..

وأصلاً مستحيييل تقوله له ههههههههه ماله من عمرها تقوله !

فيصل :يالله ترى يالله يمديك تجهزين شنطتك مابقى على الرحله شي ..

ريما توقف :إن شاء الله ..وهمست ..بس وين ؟؟..

فيصل يوقف :فيه وحده ماتدل جناحها ههههههههه..ريما بتخنقه اللحين !..

ام فيصل :دلها وأنا أمك مابعد شافته !!

فيصل :إن شاء الله ..

طلعت معه ريما وشافت الجناح وانهبلت عليييييه مرره فخم شقه مصغره تقريباً كل شي عندها ..

فصخت عبايتها وجلست تجهز شنطتها هي وفيصل اللي يجهز شنطته ويعطيها تعليمات ترى يمكن برد خذي ثقيل وهكذا

وهي ما تدري وين الله حاطها فيه ووين بتروح ..لأنهم بيمرون اهلها بعد صلاه المغرب بعديين على المطااار ..









..............









:قووووموا يامااال الصلاح اذن العصر وبيذن المغرب وانتوا فاطسين وتفتح الستاااير ..

ديما:يمـــــــــه سكريها بنوووم !!!..

ساره:نعااااس إن شاء الله يالله قومي وجـــع ..

العنود:كم الساعه عمتي ؟؟؟

ساره:خمس وعشر يالله حبيبتي قومي أمي تحرج عليك ..

ديما:لا والله انا نعاااس وهي حبيبتي خوووش والله ؟! ..

ساره:ههههههه يالله دلووول قومي ..

دلال:هاااااه !!..>>ضحكوا عليها ماتدري وش السالفه ..

ساره:قوموا ريما بتجي اللحين كلهم طمروا مع بعض حتى ريهام اللي عند الباب مع بعض :والللللللللللله ؟؟؟...

ساره:ههههههه والله يالله بتمر وبيروحون المطار قوموا عشان تقعدون معها ..

كل وحده نقزت بما فيها من قووه >>هههههههه حلووه نقزت بما فيها من قوه هههه عساهم ع القــوه ..

لبسوا بسرعه ايه شي وطبعا ديما هي اللي مسويه فزعه وموزعه عليهم اللبس ههه متبرعه عليهم لأن من عندها ماجابوا

ملابس معهم أمس ..



خلصوا ونزلت ريهام تشوف طريق للصاله الجانبيه عشان ينزلون البنات ..



ونزلوا وريما ماجت ..



العنود:تأخرت ؟؟..

ديما:عسى ما اتنيجس عليها اخوتس وما جابها ؟!..

دلال:انا اشك صراااحه !..

انسدحت ديما عن التلفزيون ..:كم بقى على الجامعه ؟؟؟..

العنود:مدري يمكن اسبوع !..

دلال:وانتي لازم تذكريني يعني ؟!..

ريهام تدخل معصبه ..:انسه ديما ممكن تجين تأخذين معي الغدا لو سمحتي ..

ديما:يافضيك ..

دلال:شين وقواية عيين ضيوفها ومجوعتنا ..

ديما تقوم :يامن شرى له من حلاله عله ..

دلال مفتحه عيونها والعنود تضحك :ههههههههه تعجبني سكتك..

دلال :جعلها ما نيب قايله شينت الحلايا ..

العنود:ماسمعتك ..

ديما تصارخ :ساااامعتها بس خلني ارجع ..









...............









دخلت ريما عليهم بعد صلاه المغرب بعد ماخلصوا شناطهم وسلموا على عمها ومرته وجو بيتها دخل فيصل المجلس

اللي فيه ابو سعود وسعود والقهوه يستنونه ..



ريما :السلام عليكم ..

صرخوا كلهم وقاموا يسلمون عليها وديما فتحت مناحتها من جديد ..:يالدبا تأخرتي ؟! ..

ريما:هههههههه طيب ليه تصيحين ؟..

ديما :اشتقت لك ..

دلال:ما امداك لاسافرت وش بتسوين اجل ..؟؟

ريما :دلوول ممكن تسلفينا أخوك ؟؟!..

استغربوا بس ردت دلال :منهوو..؟؟

ريما:بلاغباء منهوو يعني بندر بزوجه ديماا وأجيبها عندي ما أقدرابعد عنها ..

قامت ديما معصبه :أحلفـــــــــــي بس الشرهه ميب عليك على اللي يشتاق لك ..

دلال:ههههههههههههههه بشاوره وبرد لكم خبر ..

ريما :ههههههه خلاص اجل ما ابي اجي الا الرد عندك ..

وضحكوا على ديما اللي تصارخ عليهم ووجهها احمر >>هههههه متحمسه شكلها..

وقعدوا سواليف وضحك ..

وتعليق على العرس امس وش صار وش لابسه فلانه وش لابسه علانه وحدث الساعه الزفه >>حريم

دخل سعود بمدخل اللي يدخل على الصاله ونادى ريم ريــــم ..

العنود وجعها قلبها يوم سمعت صوته ميب قادره تنسى فشيلتها امس ..

ريما طلعت لسعود بالسيب..:هلا والله ..

سعود:هلا بك حيا الله العروووس لا الوجه منور اليوم ههههههههههه..

ريما:ههههههههههههه اخلص بغيت شي ؟؟..

سعود:طرده محترمه بس فيصل يقولك اجهزي اللحين بتمشوون ..

ريما :طيب اذا جا بندر خليه يدق علي ..

سعود:من الصبح يدق وما تردين ..

ريما مرتاعه :أحلف ..؟؟

سعود:ههههههههه والله يالله لاتتاخرين ..

ريما ترجع بسرعه للصاله وتفتح شنطتها 6 مكالمات لم يرد عليها ياويلي ..



ريما:يالله اجل استأذن بنمشي اللحين ..ديما وقفت ..

ديما:وين بتروحون..؟؟

ريما تلبس عبايتها :علمي علمك !..

راحت لامها وسلمت عليها :مع السلامه ..

ساره:انتبهي لنفسك وكلميني لاوصلتي ..

ريما:ان شاء الله ..سلمت على البنات وحده وحده واخر شي ديما ..

ديما:لاتنسينا بالهدايا ..

ريما:هههههه اهم شي لاتصيحين واجيب لك عروسه..

ديما:لا خلاص كبرت ..ضحكوا على حركاتها اللي ماتخليها ..

دق بندر على دلال عشان تطلع معهم مرره وحده يوصلون فيصل للمطار ويروحون البيت ..

دلال:بروح معك ..

ريما وهي عند باب الصاله ..:يالله بنتظرك برى ..

طلعت ولقت ابوها في الحوش مع فيصل راحت له وسلمت عليه ودعها وهو يدعي لها ..

فيصل يهمس لها :مابغيتي عجبتك القعده داخل ؟؟..

ريما أخذتها ببساطه ماتبي حساسيات وهم توهم :هههههههه ماسمعته وبالطقاق خلوني اطلع !..

فيصل:كنت بتهور وبدخل أخذك !..

ريما مستغربه ومفتحه عيونها احلف بس بس أكتفت بضحكه خفيفه ممكن تكون جواب !..

فيصل:يالله اركبي ورى بركب الحين ..

ركبت بدون ماتناقشه لان سعود وبندر عند السياره ..شافته يتكلم معهم ويمزح وهم يضحكون عليه ..

"ياحبي له ياناس كل ماله يكبر في عيني >>شوي شوي على عيونك!.."

طلعت دلال وسلمت على سعود >>هههههه تمون ..

وركبت قدام متعمده ماتدري انها خطة فيصل من الأول ..ركب فيصل وهو يضحك ..

دلال:دوووم إن شاء الله مبروووك الف الصلاه والسلام عليك

ياحبيب الله محمد كلللللووووييييش كللللوووويييييييييش وقلبت السياره عرس وشوي وتطب عليهم ورى ههههه..

فيصل:الله يبارك فيك تدرين اني توني ادري انك سنعه !..

دلال:من يوم يومي سناااااعه ..

بندر وهو يركب ..:وش مركبتس قدام ماعجبتس ذا البعير اللي ورى ؟!..

فيصل خبط بندر بعلبه المنديل اللي جنبه..ريما ماتت عليه من الضحك أحسسن وش ركبه ورى ..

دلال:معرس يا اخي وش حارق رزك ..غاااير تراك محجوز ..ولا ريما ؟؟..

فيصل:مالك دخل في مرتي ..سامعه ؟؟..تراك خراب..

دلال:آآه بس !

بندر:ياعيني علي من ذا اللي حاجزني لهالدرجه مهم ..والتفت يسأل فيصل ..:أي مطااار ؟؟؟؟..

فيصل يستهبل :أقرب واحد لبيتنا ....كم مطار دولي في الرياض يعني الملك خالد..

دلال:هههههههههههههه قويه أقرب واحد لبيتنا ههههههه..

بندر يمشي:لاتضيعين السالفه من اللي حاجزني ؟؟ ..

دلال:تخرج وتوظف واعلمك ..

بندر:الله انطر يا حصان لين يجيك الربيع ..

دلال:حمار موب حصان ؟؟..

بندر:احلفي ؟؟..

دلال ببراءه :والله ..

فيصل وريما يضحكوون على كلامهم ..

مال لريما وسألها :تبين تعرفين وين بنروح ؟؟؟..

ريما بحماااس :ايــــه ..؟؟

فيصل :هههههه من قلب ..

ريما :لا عاااادي ..

فيصل :أصلاً منيب قايل لانها مفاجأه ..وانتبهوا ان صوت طقاق الكناااري هجد وشدهم الحوار العاطفي اللي ورى ..>>ههههههههه وشغلوا الحساسات ..



فيصل يناظرهم :وش فيكم هجدتوا ؟؟..

دلال:مانبي نزعجكم !!..

>>ايه وااااضح هههههه صدقتك آآه يا بطني بس !..













..................













مها:يبه وش ملكته ؟؟؟..

حمد:عاادي بس ملكه ماقال زواج ..مها في نفسها "وانت وش دراك .."

ابو حمد :الولد مصر يبي يملك والزواج عائلي اذا خلصتي لانه بيسافر انتداب ..

مها:وان شاء الله بروح معه ..

ابو حمد:ان شاء الله موب رجلك ..

مها :ما ادري ..؟؟

ام مها :وش ماتدري توكلي على الله وخلصينا من السالفه ..

مها توقف بعصبيه :بكيفكم !..

طلعت ورجعت ..:حمد وين نجلاااااء ؟؟..

حمد:مدري يمكن نايمه ..

مها تطلع وهي تتحرطم ..:وذي اربع وعشرين ساعه نايمه ماتشبع وجع يوجع العدو ان شاء الله ..

طلعت غرفتها وهجمت فتحت الستايروسكرت التكييف والاخت غرقانه بالنوووم ..

:هيييييه نجوووووووول نجييييييييييل وصمخ..

نجلاء:اممممممم حمد خلني انوم..

مها:انا مها وجع موب حمد يالله قومي خستي نوم حشى ماطلع نوم قومي بقولك شي ضروري..

نجلاء:مها والله فيني نوم راسي صاكني ..وكبدي ما اقدر..

مها:من زين اكلك ماتكملين لقمتين على بعض ..

قامت نجلاء بسرعه وراااحت الحمام ركض ..طلعت كل اللي ببطنها مع انها ماكانت ماكله شي يسوي ..

دخلت عليها مها عرضت مساعداتها بس شكرتها فطلعت تنتظرها برى .."شكلها تعبانه الله يستر "

طلعت نجلاء وهي يالله تمشي ببجامتها ..قامت لها مها:شوي شوي وش فيك ..؟؟؟تعبانه ..؟؟

نجلاء تقعد على الكنب :شوووي..غمضت عيونها عشان ترتاح ..

مها:قومي اوديك المستوصف ..

نجلاء:موب لازم تعالي انتي وش كنتي تبين ..؟؟

مها:سلامتك ..

طلعت مها للصاله ومسكت التلفيون ودقت على الخط الداخلي الصاله اللي تحت ..:حمد شل السماعه ..

قام حمد وشال السماعه :هلا ..

مها:حمد نجلاء تعبانه ومعييه تروح المستوصف تعااال شفها ..

حمد ارتاااع وصار يرجف من الربكه رمى السماعه وطلع مسررع ..دخل عليهم خاااايف ..

حمد :وينها ..؟؟وش فيها توها طيبه .؟؟

مها:شوي شوي ههههههه تعبانه شوي مدري وش فيها لاتخاف ..

دخل الغرفه وشافها على وضعها على الكنبه قعد جنبها وحط يده على راسها فتحت عيونها وابتسمت ..

حمد:وش فيك ..؟؟

نجلاء:مافيني شي تعب بسيط ..

حمد:قومي روحي المستشفى ..

نجلاء:موب لازم ..

حمد:الا لازم موب على كيفك انتي تعبانه ..

نجلاء:شوي وبطيب ..

حمد بحزن:نجلاء ..ما ابيك تروحين وتخليني زي امي انا احبك لاتروحين الله يخليك ..كان يكلمها وعيونه مدمعه ..نجلاء وجعها قلبها عليه ..الله يخليك لاتروحين وتخليني >>>كان يشوف نجلاء النور الوحيد له في هالدنيا والأمل المتعلق عليه <<..



نجلاء:حمد منيب رايحه انا هنا عندك وخلاص بروح المستشفى عشاانك بس..

يالله جهز الجمس عشان ماتروح مها معنا ههههههه

حمد يساعدها تقوم لغرفه الملابس :ان شاء الله ..



مها اللي كانت واقفه عن الباب تشوفهم خانتها دموعها وقعدت تصيح معقوله هذا حمد اللي الكل يعتبره مريض ومتخلف يكن هالمشاعر لاحد ومن هالاحد زوجته نجلاء وربي انها تستاهل ما احد ساعده ومسك بيده وعامله انه كامل والكامل وجه الله

الا هي كانت تشوفه رجاال وماتنظر لمرضه ولا شي لدرجه انها تقرى عن مرضه وطرق علاجه ..

والله انك بنت رجااال يالغاليه الله لايحرمه منك ولايحرمنا مسحت دموعها وطلعت تدق على السواق يجهز السياره لهم ..









..................









في المطار وصلوا ونزلوا معهم وصلوا اغراضهم وودعوهم وطلعوا والرحله السبرايز كانت لايطاليا لمده اسبوعين ..



((ملاحضه مدري تحذير المهم:في ايطاليا بمشي فيصل وريما على كيفي أماكن هنااااك مو هناااا اماكن هنااااا موهنااااااك

نو بروبلمز لاتتدققون اهم شي شهر عسل وخلصنا اوكيشن ^^ ))..





ريما:ايطاليااااا ؟؟؟..

فيصل:ايه نعم ..

ريما:حلوووه ؟؟..

فيصل:مارحت لها الا مره بس حلووه انتي اول مره تسافرين برى ولا ؟؟ ..

ريما:عدا الخليج يومني بزر اول مرره لطلع بره ..

فيصل:ههههه حلوه يومني ايام أول !..

ريما:ايه والله اذكر رحنا كل ابونا ..

فيصل :ههههههههههههههههه..

ريما تناظره خييير كل اللي في الطياره يناظرونه مستانس الأخ ..

ريما:في شي يضحك ..؟؟

فيصل :ههههههه كل ابونا آآآآه على ذيك الايام رااحت ..

ريماوودها تعرف عن ماضيه المجهول بالنسبه لها أي شي :لييه كنت تقولها ؟؟..

فيصل :ههههه هذي كلمتنا المشهوره كل ابونا يعني انا وسعود وبندر ورنا عصابه حتى رنا اذكرها عربجيه بما

انا كلنا اولاد ..

ريما:هههه بقووه اشوى ان جيلي بنات ! ..

فيصل:ههههه ايه والله وش خبارها اللحين ؟؟ ..

ريما:بخيير تنتظر ولي العهد ..

فيصل:الله يوفقها ان شاء الله ويرزقنا بعد ..

ريما احمر وجهها وسكتت يعني كل ما اندمجت في السوالف استخف دمه ..

فيصل:ههههههه خلاص موب لازم نرجع لمحور حديثنا ..

ريما:أصرف ..



فيصل:ما تلاحظين شي ..

ريما :لا ..

فيصل:صرنا بالجو حبيبتي !!..

ريما تتلفت فعلا الطياره اقلعت وهي ماحست فيها برغم انها كانت مرره خايفه منها ..

ريما:تصدق ما انتبهت !..

فيصل:فيصل معك بتنتبهين لأحد ..

ريما:هههههههههه >>وفي نفسها بتذبحني هالثقه ! ..







.................









زيد قاعد بالصاله عند التلفزيون دخلت رنا وهي تجر رجولها مع كرشتها اللي تدنن وه بس..

زيد:يا أهلا بالحامل والمحمول ..

رنا تقعد :هلابك ..

زيد:متى بيشرف ولي عهدي ؟..

رنا:يمكن ولية يعني كم شهر ..

زيد:متحمس يارب يطلع يشبه لي !..

رنا :لاحبيبي ان شاء الله يشبه لي !..

زيد:لا والله انا اخاف على مستقبل ولدي يشبه لك يارب يشبه لي >>يرفع ضغطها ..

رنا:لا والله وورى ماخفت على مستقبلك يوم خذتني ؟!..

زيد:ما دريت الا من تالي ..

رنا :بااااايخ ..خذت الريموت وجلست تغير في القنوات عناااد فيه ..

زيد:رنووو رنااااا الووووو قلبووووو..<<سافهته..

رنا بدون نفس :هااااه ؟!..

زيد :هااا مره وحده سم نعم هلا ..

رنا:أخاف على مستقبلك صراحه ..

زيد:هههههههههه ياحبي لك زعلتي ؟؟..

رنا:لا احاول ..

زيد ينسدح على رجلها :أمزح حياتي ..

رنا:مزحك زي وجهك ..

زيد:أشوى أنه زي وجهي يهبل ..

رنا تتنهد وزيد يضحك من حملت وهي كبريت شااابه وهي ينهبل على تجنينها طبعاً يأخذه بمزح موب عناد وهي تزعل

بس ماتقدر ترضى بكلمتين..



رنا:سافرت ريووم ماشفتها !..

زيد:وين راحوا اجل ؟؟..

رنا:اتوقع ايطاليا كان حلم فيصل يودي مرته ايطاليا إذا تزوج..

زيد:ماشاء الله صديق الطفوله عاااد !..

رنا:هههههههههه تغاااار ؟؟! ..

زيد:لا احااااول ..

رنا:والله مثل اخوي ترى واكثر ..نسيت قم عنــي بدق على مها ملكتها الخميس الخايسه معد دقت تاكد لي ولا لا ..

زيد:وش دخلني فيها أقوم أنا رجلك وإلا مها ؟؟!

رنا:طيب لا تقوم عطني التليفون !

زيد:مافيني حيل !

رنا خذت جواله من على الطاوله :تحمل الفاتوره أجل !

زيد:هههههه حلالك ..









................









طلعت مها ونجلاء من الدكتوره اللي خذت تحاليل وخرابيط بتطلع بعد ساعه لانه مستوصف خااص ..

قابلهم حمد مسك يدها :وش قالت ..؟؟

مها:خذت لها تحاليل تقول بعد ساعه ..

حمد:نستنى ..

مها:مشوار خلنا نطلع ابي محل في ذا الشارع لين يطلع ..

حمد:بس نجلاء تعبانه ..

نجلاء:لاعادي بجلس في السياره ..

مها :منيب مطوله ان لقيت فستان للملكه ولا طلعت ..

وصلوا السياره ركبت نجلا ومها ورى وحمد قدام ..

حمد:وين..؟؟

مها:شوف صلاح (السواق )هذا في محل عماره سيريكون معلووم ..

صلاح:معلوم مدام..

مها:خلاص روح هناااك ..



وصلوا للمحل اللي على الشارع نزلت مها لحالها وقعد حمد عند نجلاء اللي اقنعته ينزل بس رفض ..



.................







بعد ساااعه ...



وفي غرفه الدكتوره نجلاء على اعصابها لانها شاكه ..ومها متأكده وضامنه ان فقر دم لانها ما تاكل شي هالايام ..



حمد واقف فوق راس نجلاء((موب فوق راسها فوق راسها لا يعني وراها وهي جالسه هههههههه ))



الدكتوره ترفع عيونها :انت قوزها ؟؟؟..وتأشر على حمد ..

حمد:ايـــه ..

مها :بشري دكتوره ..

الدكتوره بابتسامه :مبروووك المدام حااامل ..

الصـــــــــــــــدمه على مها وحمد قوووويه قالوا مع بعض وبصراخ :حاااااااااااااااااااااامل ..

الدكتوره :ههههههه ايوه حااامل مش مسداين اهيه التحاليل اودامي بتووقل انها حااامل ..

نجلاء مبتسمه ومو مصدقه اللي تسمعه ..:والله انا حامل ؟؟؟؟؟..

الدكتوره:ايووه ياحبيبتي حااامل ..

حمد بعد ما استوعب الكلمه جلس على ركبه جنب نجلاء :نجلاء انتي حامل يعني بيصير عندي ولد بصير أبو وعندي عيااال

! ..

باسها على خدها :احبك نجلاء وربي احبك والتفت على مها ..

حمد:مها بيصير عندي ولد بصير ابووو ..

مها الى الان تحت تأثير الصدمه :مبرووك ..

نجلاء حست انه فيه شي غلط..:الله يبارك فيك ..وش فيك مها ؟؟؟..

مها توقف :ولا شي يتربى بعزك ان شاء الله ..

حمد موب قادر يسيطر على مشاعره وده يعلم العالم كله انه بيصير ابوو >>فديته مستانس يتربى بعزك إن شاء الله..



في السياره حمد مستانس ويسولف عن ولده ووش بيسوي ووش بيسميه ومها سااكته ..

مها :الأفضل نسكت على الموضوع ليين نتأكد !..

نجلاء:نتأكد ؟؟؟؟؟؟؟؟..

مها:الأفضل !..

حمد:وشلوون يعني ..؟؟

مها:يعني لاتقول لاحد ابد بكره بروح بنجلاء لمستشفى ثاني ونحلل ونتأكد ..

نجلاء موب فاهمه اي شي ..

حمد بروح طيبه :خلاص بكره نقوول ..

]..@@البارت الرابع والثلاثون @@...









انا ماقدر اكون الا انا وان جاز لي التعبير

.............باكون اكبر من طعون الغدر لو تنزف متوني

انا ماني بيدين الوقت لعبة تقبل التغيير

..............ولاني بايع العشرة مثل مانــــــاس باعوني

ولا تجبرني ظروفي اهين الورد بالتقصير

............ولا اجرح من هداني الورد لو هو سيد طعوني



ولو هو سيــد طعونـــي !!

ولو هو سيــد ..:طعـــونـــي:..!

...







مها مرره محتاره قررت توافق على الملكه آخر هالأسبوع يمكن تركي يقدر يساعدها مع أنه مالها وجهه تكلمه ..

ونجلاء محتاره بعد من ردة فعلها من رجعوا وهي تهوجس وتفكر ؟! ..





ريما وفيصل ..مستانسين وفالينها في ايطاليا اليوم بيروحون لفنينسيا (البندقيه)وبيقعدون يومين وبيرجون روما ..

البنات عاااايشين طلعوا مع بعض مره وحده ساره ومنيره يعني ديما والعنود وبس في البيت إلا من تسيرات الخميس لمنيره ..واليوم خميس عندها الكل ..

بيت ابو فيصل بندر هاديه الله ذا الأيام ويقعد بالبيت مع دلال شوي لأنها حامت كبدها في هالأجازه اللي بتنتهي بعد بكره لأن الدراسه يوم السبت ..



ديما:طيب تعالي وش فيها تعالي أنتي وخالتي !..

دلال:أحلفي والله فشيله وش يجيبنا !..

ديما:أنا عازمتك ..

دلال:لا والله ..دخلت منيره في الموضوع ..من تكلمين ؟؟..ديما تلتفت لها وتكلمها خطرت في بالها

فكره حطت انتظار ..

دسما:يمه منيره هذي دلال أقولها تعالي أنتي وخالتي تقول فشيله كلميها ..وهي تبتسم بخبث والعنود تضحك عليها ..

منيره :هووو وش فشيلته حنا أهل هااااتي اهوو..

منيره ردت وطلعت لها الموسيقى :دويم داقم وش ذا الأغاني ؟؟؟..

ديما:ههههههه يمه انتظار وش أغـاني الله يهديتس جت وشالت الأنتظار وناولتها السماعه ..

دلال على أعصابها من حركه ديما تحط انتظار الخايسه بدون ماتقول" لحظه "مالت عليها بعد ..

دلال بصراخ :لا والله مابغيتي يالدبا ساااعه لاطعتني على السماعه ..منيره ضحكت والبنات متحمسين وش تقول دلال ..

منيره:ههههههههه أمر الله بهون يا بنيتي !..

دلال اختفت من الفشيله الله يأخذ عمرك يا ديما استغفر الله خلتني أدعي الله يأخذ عمر العدو إن شاء الله ..

دلال:احم هلا خالتي ديما موجوده..

منيره:هههههه ديما فيذا ..وورى ماتسيرون علينا أنتي وأمتس عطله غيروا جو عطيني امتس اكلمها !..>>ههههههه ولا عطت دلال حتى فرصه أنها ترد ..

دلال نادت أمها ووجهها أحمر حاقده على ديما وفشيله أمهم منيره ..

ام فيصل:من يبيني ؟؟؟..

دلال:خالتي ام ساره ..

ام فيصل استغربت وبس ردت وعقب السلام والسؤال عن الأحوال ..

منيره:سيرووا علينا وانا امتس ساره عندي والبنات وسعوا صدوركم الناس عطله ..

ام فيصل:الله يسلمك يم عبد الرحمن ..إن شاء بنجيكم يوم !..

منيره:وورى موب اليوم مابقى شي على الدارسه ؟!..

ام فيصل :ههههههههه والله مدري عن ذا العيال ..

منيره:وش عياله فيصل وبسلامته ودلال ياعمري جيبيها توسع صدرها وإذا ماعندكم أحد ارسلت طلال لكم !>>محجره تجون يعني تجوون ههههههه فديتها..

ام فيصل :لا الله يعافيك ماتقصرين نشوف إن شاء الله ..

منيره:لاتشوفين ولا شي عشاكم عندي ..>>هههههههه قررت ..

ام فيصل:هههه إن شاء الله ..

منيره :يالله أجل فمان الله ..

ام فيصل:فحفظ الكريم ..ديما عندك تبيها دلال ..

منيره :ديما ..وديما تأشر لأمها لا لا موب فيه :راسلتها فوق لانزلت خليتها تكلمها >>وتعرف تصرف بعد ههههه..

ام فيصل :يالله أجل مع السلامه ..

منيره:مع السلامه ونحتريكم ..

ام فيصل :إن شاء الله ..



ديما :شقالوا ؟؟؟ ..

منيره وهي تسكر السماعه ..:كل خيير بيجون أن شاء الله ..

ساره:وش خليتي هدى ميب ترد الغريب ترد أمي !..

منيره:اي والله أنها حرمة سنعه تنحط على الجرح يبرى ما راحت الريم عند أحد غريب..

ساره:وهذا اللي مريحني ..

ديما والعنود قاموا بسرعه من المجلس فوق العنود بتلبس لأنها بلبس البيت ..ولحقتهم ريهام ..



دلال:لا وشوو يمه ؟!..

ام فيصل :مافيها شي الحرمه عانيه ومكلمتني واردها بعدين خميس روحي وسعي صدرك وتونا العصر ..

دلال في داخلها تسب ديما وتتوعد :بكيفك بس من بوديك ..؟؟

بندر:ليييه وين بتروحون ؟؟؟؟..

ام فيصل:جبنا سيرة القوط جانا ينط هذا أخوك يودينا ..

بندر يقعد وهو لابس وشكله طالع :وييييين..؟؟

ام فيصل :بيت أهل مرة عمك ..

بندر:بيت طلال ..

ام فيصل :ايه بيت طلال يالله نجهز ..

بندر:يالله خلاص استناكم بس اطلعوا قبل اذان المغرب ..

دلال قامت وهي تجر رجولها تحسها فشله بس كله من شينه الحلايا دووويم ..











...................









في أيطاليااا أهل البيتزا والمعكرونه >>ههههههه جايعه فديتني وبالتحديد

في فنينسيا عاصمه الحب >>ههههه على كيفها الأخت! المهم الجوو يجنن رووعه ومثل ما نعرف عن هالمدينه

اللي في شمال أيطاليا على حسب الخريطه اللي عندي ههههههه >سبق وحذرتكم! >مدينه راااائعه بمعنى الكلمه طبعا هي عباره عن مجموعه من الجزر كل جزيره تحوي مباني والتنقل بالقوارب الصغيره يعني روووووعه

في النهر >ذيك المويه حقتكهم الظاهر إنها نهر

من الخريطه اللي عندي ههههههه >>> الله يعين ذا الخريطه !





فيصل:هههههههههههههههههههه ..

ريما ووجهها يتغير :ليش تضحك ..؟؟

فيصل:ههههههه ليه خايفه هههههههه ترى عااادي ؟!..

ريما بخوف وماتبي تبين له مع أنه الحامي الوحيد لها ..:ما أحب البحر وشلون وأنا في وسطه !هئ..

كانوا طالعين رحله في القوارب المنتشره في فنينسيا لأن هذي هي وسيلة التنقل الوحيده هناك ..

فيصل :هههههه موب بحر هذا نهر ! ..

ريما بتوتر :اللي هو .. ! مال القارب شوي وانهبلت ريما تمسكت في فيصل بقووه :يــــمـــــه !!..

فيصل يضحك عليها من جد خايفه حط يده على كتفها يمكن تهدا شوي ..

ريما احترق وجهها من حركته ..

فيصل :افتشي مافيه أحد ؟!..

ريما:لا عادي ..

فيصل يتهزى :الدينا حر والا ؟؟ ...

ريما تحاول تبعد شوي بس هو موثقها ..: شوووي ..

فيصل :أنا بجمد وأنتي تقولين شوي والله برررررد >>ويهز جسمه علامه أنه مررره برد ..

ريما باهتمام:ليش ما لبست لك شي دافي ؟..أنا بعبايتي وأحس برد شلون أنت بتي شيرت ؟! ..

فيصل:موب تو حر ؟؟..

ريما :فيــــصـــل..

فيصل:ههههههههه لبيييييييييه ..بعدت عنه بالغصب وهو يتربع قدامها على الكرسي >فالها كنه ببيت أبوه الأخ!

يتربع بعد..

فيصل:نمشي اليوم ؟؟!..

ريما:وين ؟؟؟!

فيصل:نرجع روما ! ..

ريما:خلنا يوم هنـا الجوو روووعه ..

فيصل:أهم شي راحتك هنا هنا ..

ريما:تسلم ..

فيصل يناظر فيها :ممكــن ؟؟!

ريما بخوف :وشوو ؟؟؟

يأشر على رجلها يعني بينسدح على رجلها يمدد رجيلاته >> امي منيره على غفله !

ريما مبتسمه :عادي ..

ماصدق خبر الرجال على طول أنسدح وهو ينااظر السمــآ :تدرين وش نااقص الريــاض ؟؟؟!!

ريما مستحيه :وشو ؟؟

فيصلبحــــر) والله يطلـــع شـــي !

ريما:لا والله يازينه بغبـــااااره تخيل الرياض بحر ورطوبه لا لا ما يصلح أصلا ما يركب !

فيصل:بكيفك مايركب ما يركب يازينه بناااسه والله ..

ريما:ههههه هم اللي مزينينه ..وسكتت وفيصل يناظر في السما ويتكلم عن أول رحله له لأيطاليا كانت مغامره جريئه منهم رحله شبابيه كان يتذكر ويقص لريما وهو يضحك وريما مستانسه لأنه بس مستانس ...!

بعد دقايق شافت محلات ..

ريما:فيصل ودي اروح للمحلات اللي هناك ..!>>حريييم حتى بشهر العسل محلات مدري متى بنعقل ؟ !!!

وتأشر على المحلات المنتشره على الشاطي في الضفه المقابله اللي شوي ويوصلونها ..>بشتري هدايا للبنات ..

فيصل بهدوء:تصدقين ما أحس أن أسمي حلوو الا إذا قلتيه ؟؟!..

ريما بجديه:فيصــــل..

فيصل:ههههههه لبيه أي مكان تبينه نروحه عادي أنا حاااضر كم ريما عندي..

ابتسمت وهي تلتفت الحمد الله ياربي على نعمة الغطا وإلا كان أنا رحت بخبر كان الحمد الله !









................











رنا:وأنتي وش مزعلك..؟؟

مها :مدري كل شي ..أنا نفسي ما اقتنعت ..

رنا:أنتي وش دخلك تقتنعين !هي معرسه من 7 شهور تقريباً أكيد بتحمل ؟!..

مها:رنا افهميني أنتي موب عارفه شي ..أخوي مريـــ...

قطعتها رنا بعصبيه:والمريض ماله رب يعني ؟..اسمحيلي مها أنا صديقتك وعارفتك من زمااان

وعارفه كل شي ماتوقعت أنك تفكرين هالتفكير..بعدين البنت أنتي عارفتها وعارفه أخلاقها كيف من قبل لاتأخذونها ..

بعدين كيف تبيني أحكم وأنتي اللي معاشرتها موب أنا ؟..شايفه عليها شي ؟!لاتسيئين الظن بأحد لاتزعلين مني ومن كلامي

بس أنتي أختي وأنا أنصحك ..

مها بحزن:عااادي والله وربي يشهد أنها اخلاق وبنت نااس بس أنا ماني عارفه كيف فكرت كذا فيه كم شي يشغل بالي وجا هالموضوع وأنا مو ناقصه !..

رنا:وأنا وين رحت ليش ما تقولين لي ترى هالشي يزعلني مها أنا موجوده في كل وقت لاتخلين شي في نفسك! ..

مها بعبره:موجوده موجوده والله ..وما أدري وش بسوي بدونك ؟!..

رنا:خلاص لاتسوين لي فلم هندي وش بتسوين اللحين ؟؟..

مها :ههههههه مدري بس أنا غلطت بحقها حتى لو ما تكلمت بس حسستها بهالشي أصلاً مجرد تفكيري بهالتفكير

يحسسني بالذنب موقادره أحط عيني في عينها ..

رنا:حلوو..

مها:وشوو اللي حلووو..؟؟

رنا:أنك عارفه غلطتك ..ولازم تصلحينها وأحسن طريقه أنك تعلنين الخبر وبوجود الكل ..

ردي لها فرحتها قدام الكل ..

مها:أوكي هذا أحسن شي ..ماشفتي حمد شلوون فرحان بينهبل كنه ما صدق..

رنا:هههههههه ياحبي له الله يسهل عليها أن شاء الله الحمل غثا ..

مها:من واقع تجربه الأخت ..

رنا:ههههههه مررره متبهذله ..وش بتسوين بالملكه ؟؟؟..

مها:هئ هئ لاتذكريني بلييز خلاص قلت لأبوي موافقه طاح الفأس بالرأس الأربعاء الجاي أن شاء الله ..

رنا:كللللللللللللللللللووووووووووووييييييييييييييي يييييييش..مبرووووك ياقلبي..

مها:هههههههههههههههههه الله يبارك بعمرك ..

رنا:أخيراً مابغى المسيكين أحسه بيحبسك سنه هههههههههه..

مها:هههههههه هو يقدر..

رنا:أشك صراحه ..











...............











جو بيت أبو فيصل لبيت منيره وأول ماوصلوا مسك طلال بندر وحلف يدخل ومايطلع إلا متقهوي >رجال فديته

خصوصا أن سعود فيه دخلوه بالغصب وجابوا لهم القهوه والشاهي وقعدوا سواليف وفله ..



عند الحريم من دخلوا وام طلال منيره ترحب وتهلي..

:هذي الساعه المباركه اللي دخلتوا فيها بيتنا تو ما أنور بيتي يا ام فيصل ..

ام فيصل:منور بوجودك والله وش أخبار العيال عساهم بخييير ؟؟..

منيره:بصحه وسعاده ..هذي بنتي لطيفه..

ام فيصل بنفسها الطيبه :هلا والله من زمان عنك !..

لطيفه:هلابك أبد في هالدنيا عايشين بزران وغثا وش علومكم؟؟ ..

ام فيصل:بخييير والله جعلك بخيير ..

سلمت على الباقين ودلال وراها:الحمد الله بخيير وبس يوم وصلت لديما قبصتها على يدها صرخت ديما..

ديما:اااااااااااااااي هئ هئ هذا جزاي ..

دلال:ربعه ..

ديما:ياويلي حاقده بقوووه شفيك ياقلبي سوري وسعي صدرك..

دلال تسفهها وتسلم على العنود اللي تضحك..:خييير أن شاء الله ..

العنود:هههههه الخير بوجهك سلمي أول ..

دلال:انتوا تخلون أحد يسلم وربي متفشله ..

منيره:وش أخبارك يابنيتي وش علومك أنتي باي صف اللحين؟؟..>>>حركات حريمنا !

دلال:بخيير خالتي ..أنا موب في صف أنا مستوى ثاني في الجامعه مع ديما وريما..

منيره:اللي هو في ثاني جامعه يعني ؟..

ديما:ههههههههه لايمه أولى بس الفصل الثاني ما دخلت ترم..

منيره:والله مدري وش أنكم تقولون ..ضحكوا على كلام منيره..

ام فيصل :هذي ثاني سنه لها الله يوفق الجميع ..

كل من في المجلس: آآمييييييين ..دخلت عليهم رنا اللي كالعاده أخر وحده استغربت من وجود مرة عمها بس فرحت

وقعدتمع لطيفه من زمان عنها لهوو في عرس ريما ومن قبله رمضان ولطيفه مع عيالها في هالتقييم والدراسه..



...



العنود:قوموا نروح المجلس الثاني أحسن !..

ديما:أحسن فيذا مدري وش أقول من أصواتهم ماشاء الله ..

دلال:مافيه احد ..؟؟

العنود:لا عموو في الملحق موب داخل إذا عندنا احد ..

قاموا ريهام قعدت ماتبي تضيق عليهم >>عليها تفكييير هالبنت ودي أعطيها كف أحياناً!..

قطعت عليها العنود وهي تنادي..:ريهاااااااااام ريهااااااام ..

ريهام:هلا ..

العنود:تعالي ..

قامت ريهام يوم وصلتها ..:هلا..

العنود تسحبها:لازم عزيمه يعني تعالي ياختي..وطلعوا المجلس..









..............







في بيت ابو حمد نجلاء مانزلت من أمس نفسيتها زفت ومضيق صدرها مها وحركتها ماكلفت نفسها حتى تسأل أو تجي

دقت على أختها مالقتها كلهم في الديره تبي أحد تروح يمه تحكي له بس مالقت !!..

حتى حمد مستغرب ليش مانزلت سألها وش فيها وهي تتعذر بأنها تعبانه ..

تركها مايبي يضغط عليها زياده واي شي تبيه هو عندها ..





..............



كانوا قاعدين يتعشون لأنهم بيروحون الفندق خلاص ماعاد إلا خيــر ..



ريما:فيصل..؟؟

فيصل:هلا والله ..

ريما:ممكن طلب ؟؟ ..

شرب مويه ورد عليها ..:أمـــري ..

ريما:أبي جوالك أدق على أهلي جوالي مادولته ! >>يعني حطته دولي ..

فيصل يمسح يده ويمد الجوال :مره ثانيه لا تشاورين ..

ريما:مشكووور ياقلبي >>طلعت عفويه بس الأخ راح فيها ..

فيصل :خذيه لاترجعينه أبد إذا بتقولينها مره ثانيه ..

ريما:هههههههههه لاشكرا ..

فيصل يناظرها بإعجاب:الله لا يخليني من هالضحكــه قوولي آآمين ..

دقت ريما على جوال أختها ويدها ترتجف من الربكه ووجهها أحمر مررره من فصيل وحركاته..

تكــره هالنظرات تحس أنه برج مرااااقبه حس فيها وضحك ورجع يكمل أكله ..



ديما دق جوالها وجابته ساره بنت لطيفه..:ديما ديما ..

ديما:هلا..

ساره:دوالك !..

خذته ديما بدفاشه حتى ماشكرتها عطتها ساره نظره خلق وفرق بينها وبين ريما اللي تنهبل عليها ..

ديما:رقم غريب أرد ؟؟..ماكان في المجلس إلا بنات ..

العنود:اسفهيه !..

دلال:ردي وش اسفهيه إذا ماعرفتيه سكري..

ديما بدلع:اخاف ينشب لي لاسمع صوتي ..

دلال:يااااااااااعيني عالثقه اشك انه بينحاش !

ديما:ههههه وجع بس شكله دولي فيه فتح خط

دلال سحبت الجوال منها وصرخت: فيــــــــــــــــــــــــــصل..

ديما تسحبه منها :أكيييد ريما عطيني ..

دلال:أخوي أنا برد !>>ياااااربي تقول بزران وش بيفككهم اللحين كل وحده تسحب من جهه..

ديما:جووااالي شين وقوايه عين بعد ..

العنود:بتسكر البنت وأنتوا تتطاقون ردوا سبيكر يالدبش ..

ناظروا في بعضهم بغباء وردوا مع بعض ..

..:هلااااااااااااااااااااااااااااااااا..

ريما:هههههههههه أهلييين ..

العنود:ريموه اشتقنا لك ..

ريما تضحك :كم وحده معي ؟؟ عشان أركز ..

دلال:هلا وغلا الشله المحترمه في الخدمه يا البي ..

ريما:ياحبيلكم وش أخباركم؟؟ طيبين ؟؟؟..

ديما:وخروا شوي أخـــتــــــي..بخييير جعلك بخيير أنتي وش اخبارك ؟؟مستانسه مبسوطه؟؟ ايطاليا حلوووه؟؟..

وينك فيه ؟؟؟؟

ريما:هههههه واحد واحد ..الحمد الله بخييير ..

دلال:وش أخبار هتلر معك ؟؟؟..

ريما:عســــل وبعدين ما أسمح لك حبيبتي !..

البنات مع بعض..:ياااااااهووووووووووو حركات..

ريما:ههههههه شفتوا عاد..

ديما:غسل مخك في يومين أشك أنك بترجعين منتيب عارفتني!..

ريما:حرااام عليك..>>بعدين استوعبت ..وش مجمعكم خيااانه كان استنيتوني ؟؟..

دلال:أقوول انتي قابلي أخوي بس والجمعه دوييم الله لايجزاها خيير ..

ديما:وجع هذا جزاي عازمتك ببيت جدتي..

ريما:هههههه أنتوا ببيت أمي منيره ؟؟؟..

العنود:الجمل بما حمل >>أتوقع أنه مثل هههههه أنا بطلع كتاب أمثال من تأليفي !

ريما:ما شا ءالله سلموني عليهم كلهم وربي اشتقت لكم واحد واحد ما أقدر أطول لانه دولي ..

ديما:يبلغ ان شاء الله بس لاتقطعين ..

دلال:فيصل عندك ؟؟؟..

ريما:اييه لحظه ..فيصل دلال بتكلمك !..

فيصل:حطي سبيكر ايديني وصخه..

ريما:والناس ؟؟..

فيصل:طنشي حياتي حطي سبيكر عادي ..طنشت بالناس على قولته وحطت سبيكر ..

فيصل بصوته الرخيم..:نعـــم..

دلال :ههههههههه ينعم عليك يالدب علي أنا نعــم ولا ريما حياتك ؟!..>>ههههه أشتغلت الغيـــره !

فيصل:هههههههههه ريما غير يا حبيبتي ..

ريما وجهها أحمر ..

دلال:ودي بس أشوف وجهها اللحين ؟؟؟ فااااااااااتني !..

فيصل يرفع عيونه ويناظرها :يجننننننننننننننن..

دلال:لاه لا ه غرقان الأخ ..

فيصل:ههههههههه كيفي..

دلال:وش أخبارك إن شاء الله بخير؟؟ متوفق مييير ؟؟؟..

فيصل:هههههههه بخييير أنتي من وين تجيبين ذا الحكي إي متوفق !انتوا وش اخباركم ؟؟..

دلال:بخيير والله ..

فيصل:أمي عندك ؟؟؟ ..

دلال:لا بعيده..

فيصل:سلمي عليها وعلى ابوي ادق مقفل جواله ..

دلال:يبلغ ان شاء الله انتبهووا لنفسكم ..

فيصل:أن شاء اللله يالله فمان الله ..

دلال:في حفظ الكريم ..

سكرت وهي تتنهد :ياااشين العزوبيه !..

ضحكوا عليها ......

العنود:ما شاء الله يا دلال أخوك رومانسي..>>لأنه كان على السبيكر يعني يسمعون ..

دلال:من تالي والله ..

ديما:ههههههههه حلووه من تالي..

العنود:الله يوفقها تستاهل ريما ..

كلهم: اييه والله ..

ديما تنط:نسييييييييت عندي لكم شي ..

كلهم:وشوووو..

ديما:شريط زفة ريما طلع يالله على فوق نشوفه ..



قاموا كلهم وراحت ديما للحريم تاخذ الشريط من شنطتها ووقفت في النص..



ديما:الووووو جميعااااا هدووووء أحم ..



سكتوا وناظروها ..:احم ريما تسلم عليكم كلكم كلكم سلااااااااااامن كثير ..وبس..

تعالت الأصوات:الله يسلمها ويسلمك ..وش أخبارها .. وشلون كلمتيها ..وش تقول ؟؟؟

منيره :مكلمتك ..؟؟

ديما سفهتهم كلهم وهي بتطلع ..:ايه ..بعدين رجعت ..ايه نسيت خالتي ام فيصل فيصل بعد يسلم عليك وعلى عمي

يقول جوالاتكم مقفله ..

ام فيصل:الله يسلمك ويسلمه أن شاء الله ..

طلعت ديما ومنيره تكلم نفسها :شلون حاتساها ؟؟؟؟..

رنا:ههههههههههه يمه يمكن كلم دلال نسيتي أنها معهم ..

منيره:ايه والله نسيت..



والبنات في غرفة العنود يشوفون الزفه>>ديما منسدحه في الأرض وورى راسها مخده لزوم الراحه ودلال متربعه جنبها

ومخده في حضنها وعنود وراهم في الكرسي ووريهام وساره الصغينونه اللي قاطه معهم على السرير ..







...................





على العشا الكل مجتمع على طاوله الأكل إلا مها ونجلاء ..

ابو حمد:وين أختك ومرتك ياحمد ؟؟..

حمد:مها بتنزل ونجلاء تعبانه ..

ام مها بتهزئ:وش فيها ..؟؟

حمد كان بيقول بس تذكر كلام مها وانه مفروض محد يدري فتردد:تعبانه شوي..

مها دخلت وتراجعت يوم ماشافت نجلاء مسكت وحده من الخدم..:روحي غرفه مدام نجلاء وقولي بابا كبير ابو حمد

يقول انزلي عشا ضروري ..مفهوووم..

يار:يس مدام ..

مها:يالله بسرعه ..

وقعدت بالصاله اللي على جنب تستنى نجلاء ..والجميع داخل يستنونها ..



نجلاء بعد ما قالت لها يار احتارت "غريبه خالي اول مره يناديني يمكن العشا بس انا قايله لحمد تعبانه مابي وضربت خدها لايكون قال لهم هئ هئ لاااا..

نجلاء:أوكي شوي وانزل ..نزلت الخدامه وقالت لمها ومها على أعصابها تخاف ماتنزل ..

لبست نجلاء اقرب جلابيه وعدلت شعرها وناظرت وجهها الهلات السوداء على عيونها لأول مره بعد زواجها من حمد ..

مسحت على وجهها وطلعت ..

نزلت بتعب ومها تتابعها من مكان ما تشوفها فيه ..



اتلفتت في الصاله مافي أحد اكيد بصاله الطعام توجهت لها ..

سلمت ودخلت ..

ردوا السلام ..

ابو حمد:تعالي يا بنيتي..

حمد مبتسم لها قام ورجع الكرسي اللي جنبه لها ..

توها بتجلس ..سمعت صوت مها المرح اللي من زمان عنه ..

مها:اهلييييييين وسهلييييين ع الحلوين ..

ناظرت جهتها من ذاك اليوم ماشافتها أبتسمت لها مها ونجلاء جلست بدون أي تعابير ..

مها وهي تجلس :بما أن العايله الكريمه مجتمعه اليوووم عندي لكم خبررر إنما ايييه بمليووون ريال..

نجلاء وجعها قلبها "الله يستر "

ام مها:وش عندك ؟؟..ابو حمد ياكل وما رد عليها ..

مها:هااا يبه المليون جاااهز ..

ابو حمد:ههههههه على حسب الخبر إذا يسوى ابشري به هدية عرسك ..

مها:ماتقصر يالغالي بس أنـا متاكده يسوى أكثر ..

مها تناظر نجلاء اللي منزله راسها وساكته وحمد يأكل ما لقى لها بااال ..وام مها متحمسه على الخبر ..



مها:ابي ازف لكم خبر إني بكون عمه عن قريب ...وضحكت ..

ابو حمد شرق وقعد يكح ناولوه كأس مويه وشرب ..حمد للحين ما استوعب الموضوع ..

وام مها منصدمه أما نجلاء وجهها أحمر ..

ابو حمد بفرح:صدق وأنا ابوك مرتك حااامل ؟؟؟ ..

حمد منصدم :ايه صدق من قالك ؟؟؟..

مها :ههههههههههه انا حبيت اسويها سبرايز عشان كذا قلت ما ابي احد يعرف ..

ابو حمد :الف الف مبرووووك ودمعت عينه ..أخيراً بشوف عيالك يا حمد بشوفهم جعلي أشوف عيال عيالك ياربي .. وكأنه ما صدق ..صدق يا نجلاء وأنا ابوك الخبر ؟؟ ..

نجلاء ووجهها طماطه هزت راسها بدون ماتتكلم ..

ابو حمد :الحمد الله الحمد الله ..

ام مها:شلووون ؟؟؟..

ابو حمد: تمر ولوون وشلوون يعني..والله وجاك المليون يامها هذا أحسن خبر سمعته في حياتي..

مها:هههههههه عشان تدري أني مهمه بس..

حمد:والله ذكيه لاتعلمون لاتعلمون بس عشان تأخذ المليون !!!..

مها:هههههههههه وربي ماجت في بالي بس الرازق في السما والحاسد في الأرض <<مثل هههه طسي بس !..

ابو حمد:لك حلالي وأنا أبوك تأمر عليه أنت ومرتك ..

استحت نجلاء من خالها :الله يسلمك خالي ..

ام مها تأكل وهي مقهووره

"تبي تاكل الاولي والتالي بنت الفقر والا أحد يحمل من بزر والله منتيب سهله يا نجيييل بس هذا وجهي

أن شديتي قرش حمر..">>أنتي من جا حلالك ؟؟؟ ياشين اللي يقط !

برغم أن نجلاء فرحانه من حركه مها في اعلان الخبر الا أنها لازالت مأخذه في خاطرها من حركتها عشان كذا ماخذت

وعطت معها كملت عشاها رسمي أستأذنت وطلعت فوق ..وحمد طلع لتركي اللي جايه بره ..













..............













دلال:روووووعه ماتوقعته يطلع كذا مبدعه نيفان ..>>المصوره..

ديما:من زمان تصويرها يجنن تذكرين خلود اللي معنا بالثانوي مصوره زواج أختها عاد خذته احتياط لزواجي ومن حظ ريموه..

العنود:هههههههههههه مأخذته لعرسك من الثانوي ؟؟..

دلال:ههههههه تحسب لبعيد الأخت..

ديما :ايه والله وش فيها شوفوا استفدت في عرس توأمي وموزيه زفه لتوأم بعد بس خانت ريما وأعرست قبلي..

العنود:هههههههه فضيعه عليها حق صراحه بيطلع عرس أسطوري وانتوا مع بعض ..

ديما بحسره:ايه والله بس ما الله كتب..

ريهام :ننزل تلقينهم يدورونا ..

ديما توقف وتطلع الشريط..:يالله ..

دلال:عنود عادي ادخل دوره المياه ..>>اكرمكم الله..

العنود:عااادي ياقلبي ..

دخلت دلال الحمام ..وقالت لها ديما بعد ما طلعوا البنات وشالت أشيائها ..

ديما:دلوول الحقينا تحت ..

دلال:لا استنيني دقيقه ..

ديما:مانيب فاضيه تدلين اعتقد..

دلال:يالدباااااا هييين ..

ديما:هههههههه سمي تراك في الحمام ...

وراحت وخلتها ..

دلال طلعت بعد دقيقه ومالقت أحد عصبت عليهم بس زينت شعرها اللي مخليته على طبيعته كيرلي بس جنان لأنه لنص ظهرها تقريبا ..نافخه من قدام بسيط خصله بسيطه ورافعه اطرافه بشباصه وناثرته ..وتنوره جينز بموديل حلو من تحت لابسه عليها شبشب زهر ناعم لأنها ميدي..وبلوزه مموجه زهر وبني ناااعمه مرره ..>>من برى الله الله ومن جوا يعلم الله

>> الرجاء عدم اللمس هههههههه مادرت عني أن تذبحني الأخت مجرمه عاااد وأنا أشكك في نعومتها يعني أقترفت الأثم

في حقها ههههههه



طلعت من غرفة العنود وتلفتت فيه غرفتين على يمينها وحده مقفله ووحده مفتوحه من شكلها غرفه ولد نورها هادي ..

"اكيد غرفة الفارس المجهول وضحكت على التسميه !>>ههههههههههه والله أنك خبله تحبينه من كلام الناس عنه وأنتي يمكن ماشفتيه إلا مرتين بس وش أسوي الحب من الله بعدين أنا مو أحبه أنا معجبه بشخصيته مع ديما وريما >>أمحق..

قادتها رجولها من دون ماتحس للغرفه >>> اللقافه وماتسوي..

دخلت وشكل الغرفه حوسه مرررره..فوضوي >>أول صفه !..

دخلت وهي ترجف وصلت التسريحه لقت ورقه كبيره مكتوب عليه بأحمــر



((الرجاء عدم التلقف والتفتيش راعوو خصوصية الناس ..



وبعدين بخط صغير >>الكلام لك دوووويم

خالك الكبييييييييير

طلال .. ))



ضحكت على حركته موب صاحي خفيف دم بعد>>ثاني صفه! بس ريما ما تقصر دايم تحكي عن مغامراتها في غرفته ..

القت نظره سريعه على الغرفه وهي مبتسمه سمعت صوت فطلعت بسرعه وهي خاااايفه وقفت بالسيب ..الصوت من الدرج ياربي ان دخلت غرفته توهقت وغرفه العنود بعيده لمحت شي على جنب الدرج صاد شوي مع الجهه اللي ترقي لفوق على شكل زاويه دخلت فيها وهي ماخلت دعاء ماقالته ..



:نسيناكم نسيناكم ولا مدري وشو هههههههههه يومنك ماحفظتها وشوله تغنيها بس أثم!..كانت دلال تسمع وهي شوي ويغمى عليه لو لف بس شافها ..بس منشغل يسب في نفسه على الاغنيه ولا شافها..

دخل طلال بسرعه لغرفته أخذ كابه وبوكه ومفاتيح السياره لأنه نزل لسعود يوم جا بدون ولا شي غير ثوبه بثوب ثاني

وطلع من غرفته وهو يعدل الكاب ويمد بعمره وجمااااله ملح وقبله على قولته>>>>ثقة هالولد بتذبحني مدري من طالع عليه!..

ودلال تدعي أنـه ما يشوفها من خوفها غمضت عيونها وصارت تدعي..



طلال ما انتبه بس وهو يمشي قاعد يعدل في كابه ومنزل رأسه لمح طرف شي على جنب الدرج رفع رأسه وانصدم من البنت اللي وافقه ومغمضه عيونها كأنها خايفه من أنه ينتبه لها ..

دلال لما ماسمعت صوت خافت وفرحت بنفس الوقت خافت أنه شافها وفرحت إذا كان نزل أفراج ..

فتحت عيونها ببطء..شافته منصدم قدامها خلاص ماتقدر خنقتها العبره ..:هئ هئ هئ وصارت تشاهق..

طلال لف عنها :لاتصيحين يا بنت الناس آسف بس انصدمت انه فيه أحد بهالمكان سوري والله ما انتبهت ..

ونزل الدرج بسرعه وهو يحاول يربط وين شافها فيه هالوجه موب غريب عليه .. ؟؟وتذكر عزيمه سعود ..!

هي وربي هي هي بنت عمهم مدري وش تقرب لهم بس هي إلا بنت عمهم ..

دلال قعدت على الأرض في مكانها وهي تشاهق وتصيح ..نزل طلال وهو يسمع صوت صياحها

مالي الا ديما هي اللي بتساعدني ..

طلال:ديما دييييما ..

طلعت ريما بسرعه :هلا ناديتني ..

طلال:ايه ..عندكم احد ؟؟..

ديما:ايه مرة عمي بلا ذكى ..لييه ..؟؟

طلال:أطلب منك طلب وما يطلع لأحد مع أني أشك ؟؟..

ديما:هههههههه أفا عليك أطلب سرك في بير كم طلال عندي..

طلال:أدري واحد ؟؟ مسكها من يدها وسحبها للدرج..

طلال:ارقي فوق شفت وحده وشكلها خاااايفه وتصيح بس والله ما ادري ما توقعت أحد فوق سألت الشغاله قالت كلهم

نزلوا تحت !..

ديما بروعه :دلاااااااااااااال..والله ان تذبحني..

طلال بابتسامه:بنت عمك؟؟؟

ديما :وش سويت لها ؟؟؟؟..

طلال عصب عليها:وش سويت لها يعني قعدت أغازلها أقولك شفتها بالغلط أنا الغلطان أقولك أصلاً..

ديما :آسفه طلوول بس هذي دلال وغااليه علي تدري يعني ..ورقت وخلته يوم وصلت نص الدرج طلت عليه

:ولا تخاااف سرك في بير هههههههههه..



طلال هز راسه وطلع والله خبله..



انصدمت ديما من شكلها وهي تصيح معقوووله لهالدرجه تأثرت ..

ديما:دلال بسم الله عليك وش فيك..؟؟

دلال بصوت متقطع :كله ...منك...قلت لك ...استني...وضحكتي علي..

ديما تقومها وتمشي بها لغرفه العنود..:والله ماتوقعت أنه بيرقى والشغاله بنت اللذين قايله له انا كلنا تحت والا

هو اصلا ما يطلع اذا فيه احد عشان كذا قلت لك معليش أسحمي لي والله بالغلط يقول..

دلال تمسح دموعها:أدري وآسفه اذا غلطت عليك بس من حر ما بي..

ديما:هههههههههه جت العجير من حر مابي !..

دلال:لاتضحكين والله بغييت أمووت ..

ديما:فتنك خالي أجل أخبره مزيوون ؟؟!..

دلال تدخل الحمام :انطمي بس انتي وخالك..غسلت وجهها بمويه بارده يمكن تهدى ..

ديما متسنده على باب الحمام:تصدقين أول مره أشوفه كذا مرتبك ووجهه أحمر وحالته حالته صبتيه بسهامك يابنت العم ..

دلال تكب عليها مويه :فااااااااااارقي ديما ترى منيب فاضيه لك ..وسكتت ..

دلال :ديما امانه ما ابي احد يدري !!..

ديما:هههههههههه موصيني قبلك ..إلا تعالي شلوون شافك ..؟؟

دلال تعدل مكياجها وكحلها اللي ساااح من الصياح والمويه:الله يسلمك طلعت من غرفتة عنود بنزل وسمعت صوت وانا عل الدرج وما في مكان اقرب لي من ذيك الزاويه والله اني قاعده وانا بموووت يوم رقى ماشافني وهو نازل غمضت عيوني خلاص ما استحمل ..

ما سمعت صوت ابد فتحت لقيت عيني بعينه يااااويلي يا ديما احس جسمي ارتفعت فيه الحراره مليييون ..ديما تضحك..لاتضحكين ضحكتي بليا ضروس أنا خلاص كل قوتي خارت ..

ديما:ههههههه أحلى يا خارت هههههههه..

دلال:انطمي قعدت اصيح والله هو أصلاً شكله مرتاع تأسف وهي مدنق ونزل..



ديما:يااااعيني حب من أول نظره أكشــــن والله ههههه..

دلال بعصبيه:حبتك القراده قولي آمييين ..

ديما :والسامعييين هههههههه يالله ننزل لايفقدونا ..

دلال:هههه يالله ..



نزلوا وانضموا للجميع ..



أول ماقعدوا البنات مع بعض في جهه تكلمت ديما على طول >>>ما ينبأ بتمه فوله !..

ديما:شفت لكم اليوووم فلم هندي أنمااااا ايــــه شي ؟؟؟؟..

دلال بخوف:والله أخر مابيني وبينك !!!!!!..

ديما:وش دخلك انتي المهم ، البطله راحت بيت البطل ههههههه وو و.........











..................

...@@البارت الخامس والثلاثون@@...









فينــي ألم غربــه مع فرقى أعز الناس

............ســفــيـــنــه تااااايهه تبحــث عن موانيها

ذكرتك يوم ودعتك وضاقت فيني الانفاس

............بكت عيني على فرقاك ولكن من يواسيها









من طلعت نجلاء امس ما نزلت ابد احتارت مها تطلع تعتذر منها ولا تستناها تنزل >>انا الغلطانه وابيها تنزل طلعت لها فوق وطقت الباب..

نجلاء ببجامتها تحوس في الصاله ترتب وتمسح لانها ماتدخل شغالات لقسمها مع كثرهم الا نادراً:مييين..؟؟

مها:أنا مها..استغربت نجلاء..

نجلاء فتحت الباب بدون ماتناظرها ورجعت دخلت :تفضلي..

مها تدخل وتلحقها :زاد فضلك..قعدت على الكنبه في الصاله ونجلاء تشيل وتحط..

مها:نجلاء ؟؟..ردت بدون ماتلتفت..

نجلاء:هلا..

مها:آسفه ..

نجلاء بتريقه:لييه أنتي غلطتي ؟؟؟ ..

مها:نجلاء ناظريني لاتكلميني كذا !..

نجلاء التفتت بعصبيه وانفجرت فيها :وش تبيني أقولك يعني غلطت عليك شفتي على شي عشان تفكرين فيني هالتفكير

عمري ما أعتبرتك إلا أخت لي بس خاب ظني فــيـــك..قالتها وهي تقعد على كنبه ثانيه وهي تحاول تمسك دموعها ..

مها بتأثر:وربي آسفه أصلاً مدري كيف فكرت هالتفكير نجلاء سامحيني الله يخليك..

نجلاء:ما أقدر أنتي شكيتي فيني تعرفين وش معنى شكيتي فيني يعني الثقه معدومه وهذا أهم شي عندي..

مها تقوم وتحب رأسها :حقك علي والعذر والسموحه والله أنك غاليه علي وأخت ماجابتها أمي تدرين أني ما أنوم ؟..

نجلاء بقهر تحاول تخفيها :مشكلتك..

مها:هههههه وأهون ..

نجلاء مسويه زعلانه وماترد عليها ..

مها:خلاص استحمليني شهر هاااه شهر ونص وانا طاسه لبيت رجلي!..

التفت لها بسرعه:يعني قالك بفرح ؟؟؟..

مها:مدري والله بس آسفه والله آسفه ..

نجلاء:طيب خلاص ..

مها:وشوو خلاص؟؟..

نجلاء:خلاص ..

مها:طاح الحطب؟؟ ..

نجلاء: طاح..

مها قامت حبتها بقووووه على خدها ..:والله أنك أحلى مرة أخو شفتها بحياتي الله لايخليني منك..

نجلاء:فكيني ..ولا منك بعد بس للحين حاقده ترى ..

مها:ههههههه حلالك سوي اللي تبين أنا قدامك ..

خذت نجلاء المخده اللي جنبها ورمتها على مها اللي انحاشت قبل ماتوصلها ..

ومها بدورها خذت مخده ورمتها ومخده من هنا وثانيه من هنا تقول بزران الحمد الله والشكر دخل حمد وناظرهم

حمد:هيييييييييه أنتي ولدي وجع!!!>>>واقلبي يداااافع ..

مها:هههههههه مرتك اللي باديه !..

نجلاء بخبث:أحلفي بس ..؟؟

مها:هههههههه سوري أنا اللي باديه ..

نجلاء تروح لحمد بزعل ودلع :يرضيك حمودي تخيل تطقني وتقول ماتحبني الدباااا ولاتحب ولدي!..

حمد يناظرها >قالك عصب<:هي قالت لك كذا ؟؟؟؟؟..

نجلاء تهز رأسها :ايه والله العظــ...

حمد:لاتحلفين موب زين نسيتي ..والتفت لمها ..وأنتي يالدبا خير أن شاء الله ليش تضربين مرتي ؟؟..

مها:كــيــفـــي..

حمد:ايه كيفي بس إذا خذتي تركي والله بيوريك !!..

مها بخوف:هو قالك..؟؟؟؟؟؟

حمد:ايه ..

نجلاء:هههههههه أحسن يبرد تسبدي فيتس !..

مها:يمـــه ترى والله بصيح !!!..

نجلاء بنجااسه:هههههه صيحي عادي ..











...............













ديما:بكره الجامعه مالي خلق..

ريهام اللي منسدحه تذاكر بكره عليها امتحان وديما على النت..:ليييه أن شاء الله ..

ديما:كذا اشتقت لريما مادقت الدبا..

ريهام :قبل أمس داقه بترجع اخر هالاسبوع..

ديما:لازم عشان الجامعه الا كانها بتعتذر اشك فيها صراحه..

ريهام:ممكن تسكتين بذاكر ؟؟..

ديما تسفهها وترجع للمنتدى اللي متعلقه فيه بزياااده هالأيام..

جتها رساله خاصه وفتحتها !..

ريهام:أموت وأعرف وش تسوين على الكمبيوتر..

ديما:وين اللي بتذاكر..؟؟

ريهام :لا والله بس استغرب صايره 24 ساعه ..

ديما:أدور في المنتدى واحوس ..لييه؟؟؟؟..

ريهام:سؤال برئ ؟!..













................













فيصل:أبيييييي قهوووووووووه >>قالها وهو ماسك رأسه من الصداااع بس العله موب قهوه ما يقدر يستغني !..

ريما:هههههههه تذكرني بطاش ما طاش ابييي قهووووه..

فيصل:ههههههه رأسي بينفجر أنا مدمن قهووه ترى وعربي لازم يومياً وفقدتها..

ريما:أطلب لك اي قهووه من تحت اسبريسو كابتشينو إي شي ..

فيصل:ما تعجبني قهوتهم ....جاهزه بس نطلع ؟؟..

ريما:نطلع وأنت مصدع ؟؟؟.

فيصل يتحمل:عااادي شوي ويخف..

ريما :لا أقعد بصلح لك قهووه بطريقتي كني شايفه قهوه بالأوفيس..وقامت للأوفيس..

وفيصل يناظرها :ياحبي لك ..

ريما :وأنا أكثرررر >>بس في نفسها طبعاً لان ردة الفعل الوحيده احمرار الوجه وهذا يعبر عن أقصى درجات الحياء..

قام وقعد على البوفيه حق الاوفيس يشوفها وهي تحوس..

فيصل:إلا متى بتستحين ؟؟؟!

ريما بابتسامه:لين أمووت..

فيصل:بسم الله عليك إن شاء الله ..

ريما:هههههههههه وش فيك ارتعت ؟! ..

فيصل:اياني واياك تجيبين هالطاري مره ثانيه..

ريما :ههههه إن شاء الله..سكتت وشاف أنه الوقت المناسب يقولها هالوقت خصوصاً أن رأسه ممكن ينفجر في إي

لحظــه وصار ضعيف للأسف قدام هالشــي !..

فيصل:ريمــا ؟؟

ريما:ســــم!

فيصل:سم الله عدوك ..وشكله متردد بس اتشجع ..ريما تدرين أني أدخـــن ؟!

ريما طاح منها الكوب بس في المجلى يعني سليم شغلت نفسها في غسله وهي ترد

ريما:ايــه ...

فيصل:عـــــادي يعني ؟؟؟!

التفتت عليه وحطت عينها بعينه لأول مره موب أول مره بس نادراً

ريما:وتدري أنـي أكـــره ؟؟؟!!!

فيصل:لا !

ريما:موب بس أكرهه أكـــره حتــى ريحتــه!

فيصل:بس موب قادر أتركه !!

ريما:بتقدر أنت تبغاه وإلا تبغى ريمـا ؟؟؟!

حطه بين تسأول فيه كفه راجحه أكيد طالعها وفي عيونه نظره يمكن إعجـاب بحنـان:طبعــاً أكييييد أنتـــي ..

لفت عنه تشوف المويه !

ريما:خلااااص يعني بتتركه ..!..

فيصل يمكن يواجهها:بس ما أقدر أنا مدمن عليــه ..

ريما:بتتركه وخلاااااص ..ولفت عليه وهي مبتسمه.. مع ريما بتتركه إذا أنت ما تبيه ؟!

فيصل:ما أبيــه والله ما أبيــه بس الله يسامح اللي كان السبب !

ريما :الله يسامحه !ولفت تكمل قهوته ..إذا أنت صادق أنا بكون جنبك وأنا ما أقول أقطعه مره وحده بس خفف منه

لين تتركه إن شاء الله بالريــاض وإلا لييش الريـاض من هنــا !

كان يناظرها وما يدري وش يقول بس يقولون أحياناً .. الصمت .. هو أبلغ لغه للحديث وأنا أشهد فسكت ..

فيصل يستهبل عليها :ترى يمكن أعصب عليك وبتصير نفسي في خشمي ؟؟؟!

ريما لفت وتعابير وجهها معبسه بس طااالعه تجنن تــعــصــب) ؟؟؟ ... سكتت شوي بعدين غيرت تعابير وجهها لااماتقدر يا ألبي يعني تلعب علي >حشى كل ذي تعابير وجه !<ههههه

ريما بخبث :عاااادي عــصــب تهدى إن شاء الله ..

فيصل أبتسم :ياااحبي لك ..

ريما استحت وقعدت تكمل شغلها >>حشى ميب قهوه ذي ذبيحه !





>>>دقايق و خلصت القهووه اللي صلحتها بطريقتها اللي كانت تسويها في الرياض ..



بعد ما خلصت قعدت قباله على البوفيه..

ريما:تفضل ..

فيصل:آآآآه ريحتها تجنن .. بس بعد موب زي قهووتنا ..

ريما:هههههه أحمد ربك عاد..

فيصل يشرب :أصلاً عشانك مصلحتها بتطلع تجنن..

ريما:وهل في ذالك شك ؟؟..

فيصل:ههههههههه أبداً..

وقعد يشرب .. ريما كانت تطالع في وجهه كانت تحس أنه تعبااان بس يكابر أو يخفي عنها الألم خصوصاً

هالصــداع من هالزفت أتذكرت شي كانت قاريته في النت !طريقه سهله بخمس أيام ممكن يقلع عنه بس ما تتذكرها بالضبط !

ريما:عندهم هنـا نت ؟؟؟

فيصل:فيه أتوقع لاب توب بس تطلبه من عندهم من تحت !

ريما:ممكن تطلبه أبغااه ؟!

فيصل:لييييه ؟؟

ريما:في موضوع قاريته في موقع مكافحة التدخين من زماان لما كان عندي بحث في الجامعه كيف تترك التدخين في

خمسه أياام بس ناسيه الخطوات وودي أطلعها نطبقها وإحنا هنا خصوصاً أنك تحت نظري على طول .!

رفع نظره لها:يعني ما تظمنيني ؟؟؟

ريما مبتسمه :أظمنك بس ما أظمنه هـو ..!

فيصل مبتسم لها:طيب بسأل إذا فيه بخليهم يطلعونه لك والطلعه ؟؟مانتيب طالعه ؟؟؟

ريما:ومن قالك إني أبطلع وأنت تعبااان !

فيصل يكابر:مانيب تعباااان ..

ريما:معليش اليوم ما أبي أطلع خلها بكــره !

فيصل ما حب يناقشها لأنه أصلاً مافيه حيل على الطلعه !

خلص قهووته واخذ بندول وأتصل يسأل عن الاب توب ..



أخر شي رمى نفسه على الكنبه ونااااام وهو حاط يده على رأسه ويضغط يمكن مركز الألم ريما تطالع فيه وقلبها يوجعها

أكيد يوجعه مرره وميه بالميه مااانام أصلاً وشلوون ينام وهو مصدع ..

قربت وقعدت على طرف الكنبه من فوق يعني فوق راسه وهو ساكت مسحت على راسه يمكن تبي تقول له أني معك بطريقه ثااانيه ..قعدت تدلك رأسه بهدوء وهو ساكت ماعلق أبد ولا حتى فتح عينه لها ..... مرت يمكن خمس دقايق أو

عشر ما حسبتها لما حست أن انفاسه هدت وتراخت قبضة يده عن راسه عرفت أنه نام قامت وجابت شرشف من جوا وغطته

لأن الجو بارد وهي تدعي له يااااربي يشفيه ويصده عن هالزفت ... تركته ينوم وراحت للاب توب ...













..............













دلال:ما شاء الله عليكم مالقاها الا انتم..

بندر:انظلينا..

دلال:قلت ماشاء الله وجع..

بندر:اشوى بعد..

دلال:من بيروح معكم..؟؟

بندر :انا وسعود ولد عمي وخاله طلال وصديقه ياسر وو...بعد مافكر ..تعالي وش دخلك انتي؟؟؟..

دلال:هههههههه اسأل ..

بندر :ياشين اللقافه ..

دلال:تهبل والله وش بتسوون هناااك؟؟

بندر:اللهم طولك ياروح نقنص خلاص ..

دلال:الله وز لي ضب !!!..

بندر:هههههههههههههههههههههههههههههههههههههه حلووووه ضب رايحين نقنص حباري يالدبشه ما اقول الا مالت وش

عرفكم انتم ؟؟..وقام بيطلع..

دلال تصارخ :يكفــــــــــي أنتوووووا ..

ام فيصل:وش فيكم تصارخون ؟؟..

دلال:ولدك جلعه المر بيروح البر اليوم هو وأصدقائه..

ام فيصل:بسم الله على وليدي وانتي وذا الدعاوي خييير ان شاء الله ؟؟..

دلال:ومنكم نستفيد..

ام فيصل ذبت عليها اقرب شي عندها ..تتهزى بعد !..



دلال:ماااامي..

ام فيصل :وصمـــــــــه..

دلال:هههههه لا ما شاء الله ما تدعي !..

ام فيصل:دليل لاترفعين ضغطي حطي على العربيه نشوف الأسهم ..

دلال:قال اقلب الجره على فمها يطلع الولد لأمه >>امثااال ههههههه .

وانا اقول فيصل من طالع عليه..

ام فيصل:دلاااااااال ..

دلال:ان شاء الله قامت وحطت العربيه ومسكت التليفون ودقت على ديما مشغول شابكه النت الدبا ..

طلعت فووق ودخلت ولقتها على الماسنجر وقعدت تسولف لقت كم بنت من ايام الثانوي وهاااات يا سوالف..











...............









طلال:تصدقووون أني من زماااان عن البر ..

سعود:الله أكبر وذا البر طعوس طعس وارجع..

بندر اللي يسوق :احمد ربك ما صار للعوائل فقط والجوو شي صراااحه ..

طلال:هههههههه وأنت الصادق انا صار عندي حساسيه من هالكلمه ..

بندر:شي يقهر ..

طلال:ولا تعال شف البنات ياحظكم شباب تروحون وتجون على كيفكم ما لقاها الا انتوا وإنا الضعوف ..

بندر:ههههههههه ذكرتني بدلول قلبها بينقطع نفس الكلام..

سعود:ههههههه وش أخبارها للحين على خبالها >>طلال انصت لانه هالشي يهمه ..

بندربلهجه مأساويه:والله مدري وش أقولك وأنا أخوك كل ما لها تكبر وتنهبل ..

سعود:ههههههههههههههه فضيع ..عاااادي أخوي عندنا وعندكم خييير بنت عمك أطقع منها ..

بندربتعمد:ههههههههههههه الله يعين فيصل أجل ..

سعود:لا ديموووه هي الخبله ..

بندر ابتسم وجا دور طلال للتعليق :عااااد هذي حدث ولا حرج ..

سعود:ههههههههههههه وافق شن طبقه بس يعجبوني..

بندر:حلالك..

سعود:هههههههههههه لا تكفي خلها لك..

طلال بغى يتهور ويقول عادي أنا أبيها بس احترم نفسه أخوها وولد عمها وانطم ..



>>>>طبعاً بتقول خير يتكلمون عن محارمهم بما أنهم أهل فعادي هالحكي بينهم !











................











دلال:

آآآآآآه بس طفشاااااااانه..

ديما:

خير وش فيك ..؟؟>>يتكلمون في الماسنجر طبعا ..

دلال:

مدري متضايقه! ..

ديما:

اجل انا وش اقول ..

دلال:

والله احس بغلقه..

ديما:

هههههههههههه غلقه مره وحده عسى ما شر؟؟؟..

دلال:

تعالي ..

ديما:

هااااه..

دلال:

هويتي أن شاء الله قولي سمي..

ديما:

سمي طال عمري..

دلال:

هههههههههه والله انك نكته ..

دلال:

ابي اسألك خالك ماقال شي عني ؟؟؟؟..

ديما:

هههههههههههههههه غلقه وغلقه اثرك تهوجسين في خالي ..

دلال:

اهوجس في عينك اخاف ينقد علي بس ..

ديما:

لاتخافين موب ناقد ولا شي ..



طولت دلال ما ردت ..

ديما:

دلاااااااااااااااااااااااال الووو معي على الخط..

دلال:

هاااااه..

ديما:

هههههههه لا نصحتي ..

دلال:

هههههههه هلا..

ديما:

أنتي تحبين خالي ..؟؟؟ >>>كذااااا مااااعندها على بلااااطه !

دلال صنمت وهي تقرى المكتوب انهبلت ذي خيييييييير ..

عجزت يدينها تتحرك على الكيبورد سكرت النافذه والنت وقعدت تهوجس..



أما عند ديماا ماااااتت من الضحك الخبله تستحي أبصم بالعشره تحبه عاااد ما حبت الا طلول مااالت عليهم ..



أما دلال ..اللي ماتوقعت هالسؤال من ديما قعدت تراجع معلوماتها معقوله لهالدرجه واضح علي أصلاً احاول ما ابين ولا اسألهم عنه الا في السنه مرره ليش سكرت اللحين والله اني خبله هي دوويم توامي الثالث هههههههههههه خلني اشبك لاتشك..



شبكت وطلعت على ديما ..

دلال:

هااااااااااااي..

ديما:

ههههههههههههههههههههههههههههههه يا عيني على اللي يستحون ..

دلال:

يستحون بعينك ..انقطع الاتصال عشان الدي اس ال والخط بغرفة بندر وماده لي ..>>كذب

ديما:

ههههههههه صدقت ..

دلال:

ولاعمرك صدقتي ..

ديما:

أخوك يدخل نت ؟؟؟..

دلال:

يعني ماتدرين مدمن بس معيي يعطيني المنتدى اللي هو فيه أحس أنه مسوي بلاوي..

ديما:

أن بعض الظن اثم ..

دلال:

لا ذا الظن فيه حلال..

ديما:

هههههههههههه استغفر الله ..الا وش رايك في قصه الفلم الهندي يوم الخميس ؟؟؟..

ديما:

هههههههههههه

دلال:

والله بغيت أطب في بطنك بس مسكت نفسي يوم غيرتي النهايه ..

ديما:

ما غيرتها كملت لهم يوم رحتي..

دلال:

احلفــــــــــــــــــــــــــي ؟؟؟؟؟؟؟؟

ديما:

هههههههههههه والله..









...............







بعد ماصحت فيصل من النوم و خف رأسه شوي أصر أنهم يطلعون خصوصاً أن سفرتهم أسبوعين والوقت يمر سريع

برغم أن ريما معارضه بس هو أصر بعد ما طلعت اللي تبغى من النت طلعوا من البيت قصدي الفندق ..



بــرى ..



فيصل:فكيه مافي احد >>ميد نقابها !..

ريما:لا ماله داعي ..

فيصل:تعبتي ؟؟؟..

ريما:لا يعني..

فيصل:ههههههه شلون لا يعني ؟؟..

ريما:يعني شوي..

فيصل:نرجع الفندق..

ريما:بكيفك..

فيصل:بكيفك انتي ..

ريما:متى بنرجع الريــاض..؟؟

فيصل:طفشتي مني ..؟؟

ريما:لا والله بس دوامك والجامعه..

فيصل:دوامي لاحقن عليه عندي اجازه لين نهاية الاسبوع كان جامعتك ما ادري..

ريما:انا مقدمه اجازه زواج بس مدري اسبوع والا اسبوعين..

فيصل:رحلتنا على اخر الاسبوع تبين اقدمها عادي..

ريما:لا خلها..ريما خلاص تعبت من المشي طلعوا وهم دوره واسواق وحومات ..

ريما :فيصل..

فيصل:لبيييه..

ريما: نقعد خلاص تعبت ..

فيصل مسكها من يدها ومشى بها لكراسي على طرف الشارع:قايلك من زمان وتتعذرين ..

قعدوا وجلست ريما تطلع في الاغراض اللي شرتها طبعاً رفضت ان فيصل يدفع لها بس موب على كيفها يدفع غصب عنها

أصلاً مامعها فلوسهم بس تسوي يعني أني ! ..









....................









مر اول اسبوع من الدراسه بعد عطله عيد الفطر بهدووء اللي داوم واللي لسى واللي منشغل واللي فاضي اليوم الاربعاء ملكة

مها وبكره فيصل وريما راجعين من شهر العسل المختصر عشان الدواماات ..



:هااااااااا حلوووو..

نجلاء بكامل اناقتها ..:يجنن موب حلووو اقري المعوذات لايجيك شي..

مها:نجووول موب لهالدرجه عاد ؟..

نجلاء:واكثر يا قلبي ..

مها:من اللي جااا..؟؟؟

نجلا تقعد على سرير مها مقابلها وهي جالسه على كرسي تسريحتها ..

نجلاء :حريم عمانك وبناتهم وفي ناس ما اعرفهم الظاهر صديقات خالتي !..

مها:ما عرفتك امي عليهم ؟؟؟..

نجلاء:خليها تعترف بي بالاول ! ..

مها بحزن.:آسفه نجلاء..

نجلاء:لا والله عااادي بس انا تعبانه..

مها:سلامات..

نجلاء:ولد أخوك متعبني وهالكعب الله لايوريك ظهري بينقصم..

مها:ياحبي له انتي الخبله ليه لابسه كعب ؟؟؟..

نجلا تقوم:لزوم الكشخه..يالله اجهزي ما بقى شي وتنزلين عمتك اتوقع وصلت..

مها:خااايفه..

نجلاء تمسح على كتفها:وش منه خايفه ؟متوتره أصدق خوووف مامنه خوف أن شاء الله ادخلي كذا وبيخق وقولي

ما قالت نجلاء..

مها:ههههههه مدري والله أخافه للحين حاقد علي..

نجلاء:يحقد على ايش ماعنده سالفه..وين فستانك بس ؟؟..

مها:معلق في غرفه الملابس ..في كيس بيج حق المحل ..

راحت نجلاء تجيبه كان فستانها ألوان صارخه تقريبا مو صارخه صارخه لا قويه الاخضر الجرجيري والازرق الغامق والاحمر وكذا بتقولون وععععع وش هالالوان بس عليها تجنن كان عاري الاكتاف من فوق ومخصر عليها ويوصل لنص الساق ماخذه معه بوت طويل رووعه وشعرها الطويل مسويته كيرلي والوان فستانها مبرزه بياضها الناصع خصوصا مع الميك اب الروووعه والمناكير الاحمر..

>>ههههههههه تفاصيل الأخت !..

نجلاء:تصدقين يوم قلتي لي عن الالوان حامت تسبدي ؟؟..

مها:مااااالت عليك وش عرفك انتي ..

نجلاء:هههههههههه والله أحسها ما تتناسب بس عليك ماشاء الله يجنن ..أنا نازله أشوف كل شي وبرجع وإلا أقول برسل أحد مافيني أرقى ..

مها: هههههه طيب لاترقين عجزت الحرمه..

نجلاء:عجوز في عينك..بااااي..طلعت ونزلت ولقت ضيوف زياده رحبت بهم وهلت وسلمت على نوره اللي توها واصله ونوره تسلم وتسأل عن مرة ولدها >>ههههههه من اللحين..

نجلاء :هههههههه فوق تقول خايفه..

نوره:ما ألومها ياهوو متوعد فيها هههههههههه أخاف مايطلع من بيت أخوي اليوم..

نجلاء:ههههههههه لاتقولين لها شي والله أن تهون ..



على الساعه 10 نزلت مها على أغنيه اليوم طالع قمر ..اللي مختارتها نجلاء..

الكل انبهر من انوثتها وجمالها اللي نادرا ما تظهرهم واللي اكثر سعاده عمتها اللي تحقق حلمها أخييييراً تمشي وتسمي عليها..



نزلت وخدودها حمر من نظرات الحريم وحريم عمان تركي وبناتهم اللي كان تركي بالنسبه لهم زي الحلم لانه ملك وحده

مالكته اللي هي مها >>يالله يا مها أعتزي وهللي بين النساء فأنتي اليوم ملكت قلب رجل وقلب الرجل لا تمتلكه إلا رجولته !>>هههه متحمسه ترى عادي بس والله قلب (الرجل)نادر هالأيام إذا كان صدق وجاها صدق صدق لها الحق تفتخر فيه !!!..



سلمت على عمتها اللي استقبلتها وهي تزغرط من أسفل الدرج وجلست على الكرسي المخصص لها ..



والمسجل يردع واللي يرقص نوره اللي فرحانه في ولدها وبنتين من بنات عم تركي قد شافتهم مها

ونوف بنت عمها الوحيده اللي فرحت لها من بيت أبو خالد..



قالت نوره بصوت عالي تغطوا ياحريم المعرس بيدخل ..مها قامت تتنافض من الخوووف أم مها جت ووقفت عندها ونجلاء لبست عبايتها ووقفت بعيد شوي..

دخل ابو حمد وحمد والمعرس تركي اللي متزين ومتكشخ تقول معرس>>هههههههه أجل وش هو ؟؟..



جت نوره وهي تزغرط وهمست لمها توقف مها تحس انها سامنه 10 كيلوو موب قادره توقف واخيرا وقفت على وصلة ابوها سلم عليها وبارك لها وهي يالله ترد جا حمد اللي البنات كلههم انهبلوا عليه بالثوب ومرسم ونجلاء تبتسم لأنها هي اللي مزينته له وتسمي عليه وانقهرت وهي تسمع البنات يتناغزون عليه ..من ذا الزيييين..يااااااويلي ..ياحظ مررررته ..يجنن ..خياااال ..>>>وما ورد منها ما يستحن جعلهن الصلاااح ..





تركي أول ما وصل موب مصدق أن مها اللي يحلم بها سنين وسنين وسنين هذي هي اللي واقفه قدامه وأخيراً تحققت أغلى

أمنيه عنده إلا تحقق حلمه من يووم كان طفل ..

صحاه من تتنيحته كوع أمه اللي خبطته عشان يتحرك ..دنق على راسها وباس جبينها وهو يهمس

:الف الف مبروووووك..



مها لسانها ثقل هذيك اللحضه لدرجه أنها ماقدرت تنطق بكلمه ماتشوف الا طرف بشته وجزمته >>اكرمكم الله



جلست بعد ماطلع أبوها يوم بارك لهم مع حمد وجت عمتها بعلبه طقم كبيره..



جت وفتحتها ومها ما لمحت شي منها بس تسمع همسات الحريم في الصاله عطتها تركي اللي قرب شوي ومها انتفضت ..

نوره:قربي وأنا امك خليه يلبسك..كان طقم المااس بااين عليه غااااالي فيه من الاحجار الخضراء الغامقه ماشيه مع الفستان بقووه..

قرب ولف القعد على رقبتها وهي تتافض وشوي تطيح في حظنه من قربه الزايد صارت تتنفس بقووه من الارتباك..

يوم قفل العقد همس في اذنها :منيب مأكلك بذبحك بس هههههههه..

مها ودها تصكه بأي شي قريب بس ماقدرت لما سحب يدها ولبسها الدبله وفي اليد الثانيه خاتم الطقم والحلق تولت نوره

المهمه لانه قعد ساعه وماعرف ..





..............









ديما:وورى مارحتي ؟؟؟..

رنا:اقولك تعبانه من ذا الحمل قلق..

ديما:الله يعينك..كلمتك ريما..

رنا:لا بس امي تقول انها داقه بتوصل العشا بكره..

ديما:يرجعون بالسلامه..ياحبي لمها الله يوفقها ..

رنا:امييين وعقبالك ..

ديما سرحت وما ردت على رنا مع انه موب من عاده العاده تتحمس وترد بحراره..حتى رنا استغربت هدوئها الزايد اليوم..

العنود:ديماااااا ديمااااااااا هييييييه..

ديما:هاااا..

العنود:تعالي أبيك..

ديما قامت مع العنود وطلعوا من مجلس الحريم اللي يعمه الازعاج كالعاده في جمعاتهم ريهام كانت تذاكر فوق عندها اختبار رياضيات وشاده حيلها لأنها ثالث هالسنــه ..



ديما تقعد على طرف الثيل على الحجر:هلا وش عندك ؟؟؟..

العنود:أبد أبي اسولف وداخل إزعاج..

ديما:سولفي ..وقعدت تقطع في الثيل وسرحت ..

العنود استغربت موب ديما اللي اعرفها ..:ديما ..؟؟

ديما:هااا..

العنود:فيك شي ..؟؟

التفتت لها ديما:لييه ..؟؟

العنود:لابس يعني احس انك منتيب على بعضك..

ديما ترمي العشب :ابد هذا انا ما تغيرت ولا شي..

العنود:موب علي بس اذا حبيتي تحكين انا فيه..

التفتت لها ديما برسميه:مشكوووره..

العنود مفتحه عيونها من طريقتها >>هالبنت بتجنني كل يوم حال الله يستر منها اللحين ..







..............







وقف ومد يده لها ترددت بس وقفت وهو يأخذ يدها غصب >>والله النشبه..

نوره:هههه على وين ؟؟..

تركي:خابر أن فيذا مجلس على اليسار لاهنتوا..

نوره ضحكت على ولدها اللي طاير على رزقه..

تركي:خالتي مجلسكم فاضي ؟؟؟

ام مها :ههههههه تفضل وأنا أمك ..ودلتهم على المجلس اللي على جنب من جهة الرجال بس الرجال كانوا بالمجالس اللي برى يعني كانت له هالمجالس فاضيه وطب وتخير ياتركي ..

دخلت نوره معهم قعدت مها وما صدقت تسحب يدها ..

قعد الشيخ على نفس الكرسي اللي لثلاثه بس ما عجبه إلا اللي جنبها ..



تركي:كح كح كح احم اححح كح>>يكح هههههههه..يمه ما في مويه ؟؟؟..

نوره:ههههه إلا فيه دقيقه وراجعه..

تركي:خذي راحتك يام تركي..

نوره مبتسمه:لاتوصي..

مها تكلمت غصب وعمتها عن الباب:عادي عمتي دقي عليهم يجوون..

وهي تتلعثم في كلمتها لأن اللوح اللي جنبها متنح يتأمل ..

نوره:تعبكم راحه يالغاليه ..طلعت وسكرت الباب وراها..



تركي:مبروك..

مها بهمس:الله يبارك فيك..

تركي:وش فيك ؟؟؟..تتوقعين اني خالد ؟!!!>>مها انصدمت من كلمته وش دخل خااالد رفعت راسها شافته

يناظرها وبعينه تريقه او أستهزاء فيها..

تركي:أنا تركي يا مها تركي..>مسك نفسه على تعابير وجه مها اللي مدري وش أقول عنها غير الصدمه..



تركي:احلمي احلمي وإلا اقول حتى مجرد حلم ما ابيه أخر شي فكري فيه أنك تكونين له أو أني أحبك..!



مها وهي تطالعه منصدمه وتحاول تمسك عبرتها لأن عيونها مليانه دموع كلماته تطعنها طعن ليش خذاني يوم انه بيطالعني

كذا ومايحبني ..مها نزلت عيونها من عيونه وهي تحاول تتماسك....



تركي يضحك :لأني أمووووووووت فيك موب بس أحـــــبـــــك ..

مها قامت تصيح ماتدري ليه ارتاحت ..

تركي يضمها من كتفها لصدره :ههههههههههه وربي أمزح أبيك ترفعين رأسك تناظريني بس ههههههههه أشوف هالزين

وهو يضحك ومها تصيح انقهرت منه مررررررره وعلى حركته البايخه دفته بقوه وهي تأخذ كلينكس تمسح عيونها ومكياجها اللي بدا يسيل ..

تركي:مهااا..

مها:لاتــــكـــلــمــــنــــي بليييييز..

تركي:هههههههه آفا ياذا العلم ما أكلمك مره وحده وأهون ؟؟؟ ..>>جرأه والله ماعنده فأحد هالولد !

مها بعبره:مثل ماهنت أنا ..وتشاهق :،(

تركي وهي يقوم ويحب رأسها :حقك علي يالغلا بس حبيت أسوي أكشن شوي ههههه..

مها وهي تشاهق من الصياح:أكشن في عينك ..

تركي يستهبل :والله وين؟؟؟ هههههههههه..

مها رفعت عينها معصبه وهي ودها تطحنه..ضحك وجلس جنبها ومسك يدها وباسها على دخلة أمه ..

نوره:احم احم الثقل زين وأنا أمك ..!

تركي:ههههههه أحد يشوف هالزين ويقدر يقاووم..

نوره:استح على وجهك البنت بتحترق ..

تركي يشد على يدها :بكيفي حلالي..

نوره:يالله عاد فارق ترى ماتنعطى وجه الرجال بيتعشون وأنت فيذا ..

تركي :دقيقه يمـــــه..

نوره:خالك داق علي يقول طلعيه قم ولا حقـ ..ويوم قربت عندهم وانصدمت من شكل مها اللي باين انها صايحه..

:وش فيك يمه ؟؟؟..

تركي خاف تهب عليه أمه وتكوفنه في المجلس عاد كلش ولا مها قام بسرعه

تركي :يالله استأذن خالي بيعصب وصل الباب والتفتت لمها وهو يحوس بالبشت ويسفطه يحس أنه مربطه >موب كفو !

:بينا الووو يا قلبي..وطلع..

نوره مسكت مها تحقيق وش فيك وليه صحتي ومن هالحكي مها اعتذرت بشي دخل بعينها وصاحت..



ماتبي تطلع فضايح ولدها الماصخ من أول يوم >>مااالت على وجهه وعلى اللي توافق تعرس عليه !

بس من قرادة حظــي إني أحبــه حبــه برص لا تفكرين أني خالد وإلا أنا أحبك أناا أمووت فيك ههههههههههه..

ياختي خبــل >> قومي بس مع الحريم لاتنقلبين خبله !كان هالحوار بينها وبين نفسها وهي تعدل مكياجها عند المغاسل











................











على الساعه 7و نص نزلوا من الطياره وريما تستنشق هواء الريــــاض ياحبي للرياض ولاهلها وريحتها لاحرمنا الله منها ..

قطع عليها تفكيرها وانسجامها صوته ويهمس لها بتعب:الحمد الله على السلامه..

ريما:الله يسلمك ياربي..

فيصل يتلفت:مدري وين راح ذا الدبشه ؟؟..

ريما:ههههههه مين ؟؟

فيصل:هههه بندر من أي مطار تبون وأنا غاسل يدي خخخخ..

ريما:ههههه حرام هذا جزاه..

فيصل:وأكثر مسك شناطهم ومشوا يدورون بندر..

ريما حسته تعبان من يومهم في الطياره سألته :مصــدع ؟؟؟؟؟

فيصل:ههههههه على وشك !

ريما:كم لك اللحين عنه ؟؟!

فيصل: 3 أيـــام !

ريما:طيب هذا بحد ذاته إنجــاز ..وقف يطــالع في المستقبلين !

فيصل:البركـه فيك !



لمح بندر قاعد على كراسي الانتظار وعينه في جواله كنه يحتري شغااله الأخ هههههه

راحوا له وبيروحون لبيت ابو فيصل لانهم مجتمعين هناااك..









.....................

]...@@البارت السادس والثلاثون@@...











أكثر من أول أحبك بس ما أبغى أقول

أخــــاف لو قلت تتغلى علي مـــــره

أنا بصراحه أحبـك حب مو معقــــول

أكبر دليل لغلاتــك غيرتي ورضـــاك





...







دلال:هلا بالطش والرش والبيض المفقش تو ما أنورت الرياض والله ..

ديما:نصفي الثاااااني أهلااااااان وسهلااااان ..



ام فيصل:منتوب صاحين خلوا البنت تنفس !..



ضحكت ريما على خالتها اللي خايفه عليها سلمت على الكل تحمدوا لها بالسلامه وفيصل مادخل برى مع الرجال..

طبعا أهلها جايين بيت عمها عشان يسلمون عليهم وبيروحون لبيت منيره مايبون يثقلون عليهم وهو تعبانين سفر وحوووسه..



وأخيراً بعد السلامات والحبحبه قعدت على الكرسي تأخذ نفس..



ديما:لك فقده يالدبا !.. وش أخبار أيطاليا حلووه؟!..استانستي؟؟؟ >>سؤال في غير محله !

ريما:ههههههه واحد واحد بليييز ..

دلال:حيا الله الريم في بيتنا بتنورينا يا قلبي..

ديما:هذا اللي عاجبك يالخايسه..

ريما:ههههههه منور بأهله والله ..

دلال:أكيييد طبعاً ..

ديما:هههه ماتعرف تجامل أبد

دلال:هههههه وشوله ؟؟..



ام سعود :يالله يا بنات سعود برى الحمد على السلامه يابنيتي..

ريما قامت تحب رأس أمها:الله يسلمك يالغاليه أقعدوا تونا ..



ام سعود:لا والله أنتوا تعبانين ما نبي نثقل عليكم..

ديما تلبس عبايتها :من اللي جا ..؟؟؟

ام سعود:سعود وطلال يالله اخلصوا ..

ديما لفت على دلال وغمزت لها ..

دلال تهددها بنظره أن ما انطميتي بتشوفين !!..



حاولت فيهم أم فيصل يتعشون بس ساره رافضه ..



طلعت وبناتها ودخل فيصل على أمه اللي قامت تصيح يوم شافته ..

فيصل يضحك غصب:ههههههه سليييم وربي سليييم!..

ام فيصل:الحمد الله على السلامه وأنا أمك ..

جت دلال ورجت الجلسه تعلق وترحب وتهلي بأخوها ومرته

دخل أبو فيصل وقعدوا سواليف وضحك لوقت العشا ..



ام فيصل:تفضلوا على العشا ..

فيصل:الله يكثر خيركم بس تعشينا في الطياره أبي أنووووم بس ..

دلال:كلوا ولاحقين على النووووم..

وقف فيصل:إذا ريما تبي بكيفها أنا شبعان والله ..

ريما :لا والله شبعانه..

أبو فيصل :وش شبعانه وذا الخير من له تعشي معنا وأنا عمك !

ريما:الله يسلمك ..

قاموا كلهم للعشا قالها وهي بتطلع

فيصل:منتيب نايمه ؟؟..

ريما بابتسامه:إلا بس بأكل لقمتين عشان خاطر عمي وبطلع تعال كل !..

فيصل ماله خلق شي صدق: مالي خلق شي بطلع أنام إذا خلصتي تعالي ..

ريما :إن شاء الله ...

رقى فيصل الدرج وهو يالله يشوف يحس أن هالصدااااع مبهذل عيشته توه واصل وفاتح الباب والنور إلا جواله يرن ..

طلعه وهو يضحك كانت ريما يوم طلع دخلت المجلس ودقت عليه ...

فيصل :هلا ..

ريما:أهليين تعبااان ؟؟ تبيني أطلع ؟؟ ترى عادي شبعانه والله ..

فيصل: ههه لا يا بنت الحلال خذي راحتك أنا أدبر نفسي ..

ريما:ما أدري يالله طيب باي و سكرت وهي مقرره شي دخلت على عمها ومرته ودلال اللي قاعدين يتعشون وأستأذنت من عمها أنها متعشيه في الطييياره وشبعانه أذن لها ودلال تبتسم لها أشك أنه هتلر معي عليك !

شالت عبايتها وشنطتها وطلعت فوق ودخلت الجناح اللي مرتب ومبخر أكيد دلال أو ديما لأن مفتاحي مع ديما ..



شافته نايم ..فيصل ما صدق يحط رأسه على المخده إلا هو بسابع نومه..



ضحكت على شكله مرره مرهق وهالصداع اللي ذابحه هالأياااام نووووم العـــوافي ياربي ..

مسحت على راسه وهي تدعي ربي يتمم عليه ويفكه من هالشر ..

دخلت أخذت دش سريع طلعت ببجامه حرير تبي تنااااام حتى هي مرهقه من هالطياره ..

توها بتنسدح إلا جوالها يهز..دلووله تتصل بك..ههههههه من اللحين ..

ريما بعد ما دخلت جوا سريرها ردت بصوت واطي..

ريما:هلا ؟؟..

دلال:سوري على الإزعاج نمتي ؟؟؟..

ريما:مافيه إزعاج ولا شي .. بنااااام اللحين ليه تبين شي ؟؟..

دلال:خلاص نومي أحسبك بتقعدين وهتلر غاصبك..

ريما:ههههههه حرام عليك أصلا من رقى وهو غاااطس ..

دلال:هههه يا حليله أوكي يالله بااايووو ليله سعيده..

ريما:ههههههه أحلام مرعبه..

دلال:وجع بسم الله علي!..

ريما:هههههههههه يالله بنام ترى وأنا أكلم ..

دلال:هههههه يالله باي نوم العوافي..

ريما :الله يعافيك ! ما كملت كلمتها إلا هي بسابع نومه والجـوال جنبها ..











..............











مها:وجع ان شاء الله حوم كبدي ..

نجلاء:منهوو...؟؟؟

مها:تركي..

نجلاء:من اللحين ؟؟..

مها:ممتحني من أمس وهو يدق !..

نجلاء:طيب ردي وش عليك..

مها:زعلانه! ..

نجلاء:هههههههه أمداك ..

مها:ايه أمدى ..الا تعالي انتي باي شهر اللحين..

نجلاء:مدري يمكن بخلص الرابع بدخل الخامس !..

مها:بتروحين لأهلك اليوم ؟؟..

نجلاء:ايه مجتمعين عن أختي منيره ومن 15 يوم ما شفتهم ..

مها:الله يعين مدري وش أسوي ما ودي بسوق ؟!..

نجلاء:ههههههه ردي على العاشق الولهان وبتستانسين..

مها:أنطمي بس من زمان عن رنا بكلمها أصرف واللي ترد عليه ..









..............







يالله وقفت مرره ثاقله هالشهر الله يسهل بس..



رنا تهزه ..وهي قاعده عل طرف السرير ..

رنا:زيييد زييييد زيووود..

زيد:امممممم ..

رنا:قم يالله صلاة العصر من جيت من الدوام وأنت نايم ..

زيد:دقيقه..

رنا:بكيفك ترى والله مالي دخل..رن التليفون ..خير أن شاء الله ..

رنا:الووو..

مها:هلا وغلا وينك يالدباااا ؟!..

رنا تقعد بتعب:هلا والله فيه بس تعبانه هاليومين ..

مها:سلامتك ياقلبي ..وش أخبارك..؟؟

رنا:أزقح بخير وعافيه وأنتي هههههههه وش أخبارك و الملكه ؟؟..

مها:هههههه بخير محوم كبدي يدقق وسافهته !..

رنا:ههههههه منتيب صاحيه ليه ؟؟؟..

مها: خلييه يتأدب ماقلت لك وش سوى لي في الملكه ؟؟!..

رنا:ههههه وش سوى ياختي هالأنسان خطير أحبه ههههههه!

مها:أحلفي بس ..تخيلي لعب بأعصابي ..>>>وقالت لها حركته عن خالد ولد عمها واللي قاله ..

رنا:هههههههههههه يااااويلي رهيييييييب هههههههههههههههههههه

جنوبي آآآآه ههههههههههههههههههه حرام عليك ..

مها:شوي شوي على ولدك ..

رنا:ههههههههه ياختي ردي كم بتعيشين وسعي صدرك أنتي ووجهك ..

مها:بفكر خلينا من هالسالفه وش أخبار ريما مابعد رجعت من السفر ..؟؟

رنا:إلا رجعت أمس بس مابعد شفتها ..

مها:مارحتي لهم ..؟؟

رنا:بروح اليوم بس شق بي ذا الرجال ساعه وأنا اقوم وماعنده فيني ..

طلع لها زيد من الغرفه:أنا اللي شاق بك يالبطه ؟؟..

رنا:أخييييييييييرا مابغيت غسل وجهك والغدا في المطبخ تغدى بسرعه عشان نلحق على أهلي..

زيد:حاضـــر ماما !!..

رنا:هههههه شاطر حبيبي ..

مها:هههههههههه والله أنتي ورجلك النكته بالله عليكم هذا شكل متزوجين فقعتي أذني من صراخك ..

رنا:هههههههه عادي كلنا كذا ..

مها:هههه الحمد الله والشكر يالله أجل ماطول عليك وهو عندك إذا فضيتي دقي علي

رنا:خلاص إن شاء الله وسلمي على نجلاء ..

مها:يبلغ أن شاء الله مع السلامه



أول ماسكرت السماعه جاها مسج وسائط فتحته ..







اهمه لو كذب أني ماهمه...غلاه يجول في قلبه ودمه....يبان الحب في نظرة

عيونه... يقول الصدق ولا ولد عمه....

يغار وغيرته تفضح غرامه...وتكشف غيرته حتى كلامه..يغار ويقلب الدنيا

عليا...يبيني دوم في قربـــــــــــه ويمه....

يبيني دايم بجنبه يبيني...ولو انه تظاهر ما يبيني... انا ادري فيه...

وادري عن طباعه...يخفي الشوق في قلبه ويضمه...

يكابر وادري انه هو يكابر...وانا ادري بس...لكن دوم صابر...ابيه يبوح

عن حبه وشوقه...وانا اللي بين خلق الله اهمه...





>>هههههههههههههههههههههههه ياختي هالأنسان بيذبحني بس والله ما أرد قبل يومين أقعد !..



طبعا أكيد عرفتوا كانت من تركي ^^ ..







..................









كانت تكلم بنتها بالتليفون ومتحمسه معها ..



منيره :يا بنيتي أنتي تبينها لولدك وإلا بس كلام ترى البنت أرد عنها الناس عشانكم وموب عشانها يتيمه تسكتون عليها !..

ساره:يمه وش ذا الحتسي أنا ماقلته إلا وأنا أبيها له والعنود غلاها من غلا عبد الرحمن والله أني ما أعدها الا وحده من بناتي

بس مابعد فتحت الموضوع معه وأن كلمته قال أبي أكون نفسي وأنا أبيها تجــي منه ..

منيره:وأنا داريه بس بعد ما أبيها تروح عني تشوفين أمها تكر وتفر كل يوم راسله لنا واحد من ربعهم تبي ترجعها لها ..

وأنا ما اقوى على فراقها بعد ماجتني هذي ريحه عبد الرحمن ياساره ..وخنفتها العبره ..

ساره:وسعي صدرك يالغاليه ومايصير الا اللي يسرك أن شاء الله ..





انصدمت من اللي سمعته من جدتها ماتوقعت أنها ممكن تبيعها بهالطريقه أو تعرضها كذا حتى لو كان تبريرها أنها ماتبيها تبعد عنها

هالشي كرامه وأهم ماعليها كرامتها ..حاولت تتماسك ودخلت على جدتها مبتسمه..

العنود :أهلين يمه !..وحبت رأسها ..

منيره:هلا بالغاليه ..توك قايمه ..؟؟

العنود:ايــه ..من تكلمين ؟؟؟..

منيره:عمتك ساره وتسلم عليك ..

العنود:الله يسلمك ويسلمها ..وسرحت بالكلام اللي سمعته ..



منيره :العنود العنووووووود يا عنووود ..

العنود:هلا يمه ؟؟؟..



منيره:ساعه اناديتس !..

العنود:آسفه بس سهيت !..

منيره:قومي قَومِي عمك وحطي لكم غدى ماعاد الا خير ..

العنود:أن شاء الله ..



قامت وطلعت لعمها ..







دخلت الغرفه ثلــــج من التكييف والأخ مسكر كل شي ما تشوف حتى طريقها والغرفه مرتبه ما شاء الله لا اله الا الله ..

توها بتمشي الا تخبط من هالحوسه اللي في كل مكاااان !..

العنود:وجــــــــع إن شاء الله ..تلمست لين فتحت النور ..



العنود:عمي طلال طلال عمي..عمــــــي ..

ماينفع معه نعومه قربت عند اذنه :..عـــــــــــــــمـــــــــــــــــــــــــي



نط وقعد متربع وشكله يموت من الضحك ..



طلال:ها هلا وش فيكم وش صار أمي خواتي من اللي مااات ؟؟؟! ...

العنود:ههههههههههههههههههههههه هه هههههههههههههه ولاشي قم تغد ..

طلال:وجع يوجع العدو ان شاء الله وين الأنوثه وين الاخلاق ..والله ماخربك الا بنات سوووير بس انا اعرف شلوون

أأدبهم دويم الخايسه ..

العنود:هههههههههههه شفيك هيييييه حاااالم ؟؟؟..

طلال:حاااالم في عينك وهيييييه بعد قام ودفها من طريقه ..فااارقـــــي ..

العنود:آآآآي طلوووول ..

مسكها من شعرها يلعب :طلووول هاااا طلووول أصغر عيالك أنــا ؟؟؟..

العنود:هههههههه شعري توني مجعدته بفازلين ترى !..

فكه وهو يناظر يده :فاااااااااازلييييييييييين ..

العنود:هههههههه و4 كريمات متنوعه المصادر هههه >>وتحرك حواجبها !..

طلال يسفهها ويروح الحمام :حشى معد هوب شعر شعيريه..

العنود:هههههه مالك دخل ترى بحط الغدا بتجي الله يحييك منتب جاي بسلامتك ..

طلع من الحمام:استني يالدبااااا بس بصلي وانزل ..

العنود:أوكي بستنى وأمري لله ..









...................









ساره في الصاله تقهوي رجلها وراكان قاعد يحل واجباته على الأرض >>دخل أولى أبتدائي ونسى سلمى وطوايفه

هههههه اللحين صارت مطاقات بعد الطلعه هههه >>عندكم هالشي صح ؟؟؟!

دخل عليهم سعود..



سعود:مسا الخير ..

ابوه وامه:مسا النور ..

سعود:وش أحوالك يا بو سعود..؟؟

ابو سعود:بصحه وعافيه ..

ام سعود:وام سعود مالها رب ..؟؟

قام وحب رأسها وقعد جنبها :ام سعود الخير والبركه وش أخبارك الغاليه ؟؟>>ماقلت لكم لوقي ..

ام سعود:بخير بس ودي أشوفك معرس بس ..

سعود:ههههههه معرس مره وحـــده قووويه ..وين البنات أجل مالهم صوت والشاطر وش يسوي ؟؟..>>يصرف

ام سعود تعطيه فنجال قهووه:البنات فغرفهم ولاتضيع السالفه..

راكان :سعود ؟؟

سعود ينزل يقعد جنبه :هلا يابو خالد ..

راكان :لا أنا راكان ..

سعود:هااا يا راكان ..

راكان :لامايصلح تقول هاااا صح ماما ؟؟..

سعود:أقول أخلص وش تبي ؟؟؟..

ام سعود:ههههههه شوي شوي على وليدي..

راكان زعل:خلاص ما أبي شي ..

سعود: ههههههههههه تزعل بعد يالله أمر ..

راكان :ابي أروح محل الالعاب ..

سعود:لييه ناجح ؟؟!..

ديما:هههههههههههههه حلووووه سعود أحد ينجح ذا الحزه ؟!..

سعود:بسم الله من وين طلعتي ؟؟ ..

ديما:هههههههه من غرفتي ..هاااي دادي ..

ابو سعود:هلا والله ببناتي وينكم فيه؟؟..

ديما تروح تقعد جنبه:فيذا بس عندي بحث وقاعده اخلصه في النت ..

ام سعود:ياذا البحث اللي أربع وعشرين ساعه ..

ديما:هههههه خبرك لازم نحوط شوي..

سعود:وثقافه أماراتيه بعد ..

ديما:أفا عليك اللي تبي ..



العنود دقت على جوال ديما مررره وماردت لأن الأخت ناسيته فوق ..

اخر شي توكلت على الله ودقت على البيت ..سعود توه طالع من الصاله بيطلع يغير ويمر طلال متواعد معه ..

أول ماطلع رن التليفون اللي في طرف الصاله الثانيه لم الدرج ..

ورد عليه ..

سعود:مرحبـــا ..

العنود ارتبكت :الوو

سعود:هلا والله..

العنود:السلام عليكم ..

سعود:وعليكم السلام والرحمه ..

العنود :ديما موجوده ؟!..سعود استغرب الرقم رقم جدته والبنت تبي ديما >>نسى الفاهي بنت خاله ..

سعود :من اقولها ؟؟>>الله من اللقافه ..

العنود راصه على اسنانه من العصبيه:صديقتها ..

سعود:لحظه..ديماااااااا ديماااااااا ..

ديما من الصاله :هااااااااااااااااا..

ام سعود:هويتي قومي شوفي وش يبي أخوك ..

ديما بصراااخ :وش تبـــــــــــــــــــــي..؟؟

سعود:تعالي تليفون ..

طمرت لين بغت تخبط على وجهها هذي اللي تو متعيجزه !..



ديما:مييين ؟؟؟..

سعود يحط التليفون ويطلع الدرج :مدري بس من بيت أمي منيره..

ديما:العنود يالدلخ ..وردت

وقف سعود والتفت عليها ..

العنود:وأنتي ليه مطلعه جوال زينه إلا زينـــــه ؟؟؟..

ديما:هههههههههههه أمر الله بهوون ..

العنود:مالت عليك وعلى أخوك ..

ديما:وش دخل أخوي ؟؟؟..

العنود:يستخف دمه ..

ديما :عاد هو ثقيل دم خلقه ..

سعود:والله ما ثقالة الدم الا أنتي ..وطلع فوق..

ديما:ههههههههههه فاتك أول مره أشوفه معصب ..

ديما:وش عندك داقــه ..؟؟







...................









اليوم السبت صباح يوم جديد وبدايه لأسبوع جديد ..



ريما أول يوم تداوم بعد زواجها لها 3 أسابيع في البيت ولو طاوعته معد داومت أبد ..

البنات فرحانين فقدوها مررره في الجامعه مع أنها ماغابت كثيييير ..



ام سعود فاتحت ابو سعود في موضوع بنت اخوهاوانا تبيها لسعود وما تبيها تروح من يدها ..

ابو سعود رحب بالفكره وماعنده أي مانع ..وحتى لو بغى مساعده موب مقصر عليه ..

وهالشي ريح ساره خافت انه يعارض او شي عشان بنت أخــوه !..



طلال وسعود وفيصل وتركي وشباب قصتي جميع على دواماتهم وهم يالله يفتحون عيونهم اليوم سبت والاخوان

سهرانين أمس ..



رنا مرررره تعبانه هالأسبوع وخايفه أنها تولد وهي لسى اصلا ماتمت كل شهورها لأن هالماغص ملازمها من أياام ..



ديما في شي مشغلها عن الكل بس مخبيته عن الكل وحتى عنا ومارح اقول الا اذا هي قالت لكم >>ههههه مصدقه ..



العنود كلام جدتها في راسها وتخاف عمتها تخطب وماتعرف ترد عليها هي اوكي متقبله فكره الزواج وحتى سعود رجال

ونعم ودكتور وما شاء الله عليه زين وعلم ودين واخلاق ويكفي انه ولد عمتها بس كلام جدتها يخرب عليها كل افكارها

اللي ممكن تبنيها هالوقت ..

بـــاعتـــك يالعنود باعتــك !..>>أقول أعقلي وش هالأفكار مافي أم تبيع بنتها وما اغلى من الولد الا ولد

الولد أسألي أنــا ترى مجربه!!







................







ديما:أنورت الجامعه..

ريما:منوره بكم تصدقون فقدتها !!..

دلال:وش فقدتي الله يعافيك ذا الخضره والا الوجه الحسن ؟؟ ..

ديما:اكيد الوجه الحسن اللي هو أنــا ..

عنود شرقت بالعصير :كح كح ياعيني على الثقه ..

ديما:واثق الخطا يمشي ملكاً ..

دلال:هههههههههه لايفوتكم شوفوا هههههههههههههههه >>كانت تأشر على بنت قاصه شعرها مثل النخله من فوق

ومخليته كشه ومسيحه اللي تحت ومخلته طويل لنص الظهر وربي أنا شايفتها على الطبيعه تموت من الضحك تقول

نخله متحركه ههههههههههه



ديما:هههههههههههههههههههه الحمد الله والشكر ههههههههههههه

ريما :وجع اسكتوا والله أن تحقد عليكم..

ديما:هي ما حطتها إلا عشان ينضحك عليها ههههههههههههههه

العنود:ومطقمين مع بعض ههههههههههههه ثنتين ههه

دلال:هههههههههههه آآآي يا بطني ههههههههههه ..

ريما:خلاص عاد بلا هبال ديما من بيجي يأخذك اليوم ؟؟..

ديما:مدري والله كنت بروح معكم ليييه..؟؟

ريما:مدري فيصل ما ابي اخليه يطق مشوار وهو راجع راجع للبنك ..

دلال:يااااااويلي على الحنان والله اتطمنت على مستقبل أخوي هههههههههه..

ضحكوا عليها البنات ..

ديما:آآه بس متى بيجي رجلي والله لا أفصل وأقعد بالبيت عشان مايتعب نفسه في المشوار..

العنود:هههههههههههههههه قووويه ..روحوا معي بيجيني طلال وسيارته جيب تكفي ..

دلال وجعها قلبها من فكره أنه بتكوون معه في مكان واحد ولا سياره هذا الناقص أنا ماسلمت وأنا بعيده أركب معه بالسياره ..

دلال:لا بدق على بندر كوده قريب ؟؟ ..

ديما تحمست :يالله دقي شوفي ..

دقت دلال :الوو..

بندر:هلا ..

دلال:وينك.؟؟

بندرتوه قايم ومزاجه مقفل :وش دخلك ؟؟

دلال وجع ان شاء الله :لا بس اذا كنت قريب تجي تاخذنا من الجامعه ..

بندر:لا بعيد أنا عندي محاظره بعد ربع ساعه ومنيب فاضي أطق مشوار لعليشه >>الحي اللي فيه جامعه الملك سعود ..

باي وسكر السماعه في وجهها ..

دلال:يامال الضارب ..

ريما:استغفر الله وش ذا الدعى تقول عجيييز مأكلين حلالها ..

دلال بعصبيه :يســــــــــــكر في وجهي أجل ..

ديما :ههههههههههه لقطي وجهك ..

دلال:مستانسه الأخت ..

ريما:خلاص نروح مع خالي طلال وبس بدل هالحوسه..

دلال:ايه ورجلك مكيف في بيت أهله وتمشورين ولد الناس..

ديما بخبث:اعتـــرفي خايفه على خالي ؟؟؟..

دلال:ديـــما ..

ديما:سوري والله بس قصدي أنك ماتحبين تتعبين أحد ..

دلال:ايه أحسب ..

العنود موب معاهم ابد سرحانه ..

ريما:اللي ماخذ عقلك يتهنا به ؟!..

العنود:ههههه حلاله ..

ريما:هههههه وش فيك مررره موب معنا ..

العنود:ولاشي ..هااا بتروحون معي والا لا ؟؟..

ريما:الا مالنا الا انتي ..

العنود دقت على طلال وقالت له وجااااك طيران خصوصاً يوم درى أن فيه توصيله لبيت عمهم ..











..................

...@@البارت السابع والثلاثون @@...





نرجع لمحور حديثنا ..



وصل طلال بعد ربع ساعه تقريباً وأعطاهم رنه عشان يطلعون ..

العنود:هلا وينك ؟؟

طلال:عند الجيران ويني يعني بوابه 2 ..

العنود:طيب دقيقه طالعين ..

طلال:يالله وإلا بمشي ..

العنود :طيب ..وسكرت الحمد الله والشكر وين يمشي ؟..

ديما:جـــــا ؟؟..

العنود:ايه عند بوابه 2 ..

دخلوا كلهم بوابه 2 بيطلعون وصرخت دلال..

دلال:لااااااا عبايتي في بوابه 5 !!..

ديما:احلفي ياشيخه..

دلال:لا انا دلال !!..

ديما:انطــــــمي بس وروحي جيبيها بســــرعه تنكت بعد ..

دلال ارتاعت :طيب دقيقه..

العنود:حنا بنطلع عشان مايعصب ..

دلال ماسمعتها لانها راحت ركض لــ5 والله يعينها مشوااار وشمس آآه لا تذكروني ..



لبسوا البنات عباياتهم وطلعوا لقوه بالجيب كاشخ الأخ..

ديما ركبت قدام بدون ماتشاور أحد ..

ديما:هااااااااي..

طلال:هااايااات من معي ؟؟..

ديما:وجع طلال أنا ديما !..

طلال:وجع يوجعك أن شاء الله خالك طلال ..

ريما:السلام عليكم ..

طلال:وعليكم السلام هلا والله ويطالع ديما ..تعلمــــي ..

ديما تقلب في الأشرطه وتأخذ واحد توها بتدخله إلا يصقعها طلال في يدها

طلال:عن اللقافه واستأذني مايكفي مصادره كل شي تلقينه في غرفتي ..

ديما:حرااااام عليك انــــا .؟؟؟

طلال:لا بنت أم صويلح..

ديما:ههههههههههههه حلووووووه بس مخطوبه..

طلال:منهي ؟؟..

العنود:منيره بنت أم صويلح ..

طلال وديما مااااتوا عليها من الضحك مصدقه السالفه ..

العنود:خيييير..

طلال:هههههههه سلامتك ماكنكم ناقصين ..

ديما:من قصدك لا كاملين حرك ..

العنود:لا وش حرك أنتي نسيتي دلال أصبر شوي ..

طلال يناظر ديما بنظره وهي تضحك ..

ريما:تأخـــــرت ؟؟..

العنود:هذي هي ..

طلعت دلال مسرعه ماتدري شلون لبست عبايتها شوي وتخبط على وجهها ..

وقفت ماتدري وين سيارتهم تناظر فيهم بس ماعرفتهم واقفه وشكلها ينرحم ..

ديما:شف الدبشه ماعرفتنا ترى وترفع شنطتها هههه عشان تعرفها الوووو دلووول هههههه الحمد الله والشكر..

ريما طلعت جوالها بتدق عليها ..

ديما:أظرب أظرب بوووري..

طلال ما صدق وقام يظرب بواري دلال أخترشت ماتدري وين تروح تقدمت وردت على ريما ومشت لهم ركبت ورى ديما وجنبها ريما وبعدين العنود ..

دلال:السلام عليكم ..

ردوا عليها كلهم وهي ترتب عبايتها وغطا نقابها مالت لريما :تأخــــرت..

رد الشيخ (طلول):لا عـــادي ..

دلال بغت تنهبل شلون سمع وجـــع !وديما تضحك عليه..



طلال:أي وحــده أول ؟؟؟..

ديما:أنـــــا ..

طلال:سواق أبــوك أنـــا ..

ديما:وشوله تسأل أجل سق وأنت ساكت ..>>تمووون ههههههههههههه..

طلال اخذ شريط جنبه وخبطه في رأسها ..

ديما:ههههههه أأأأي يوووووجع ..

طلال:أحسن ..

دلال أول مره تشوفه عن قرب غيييير مره ملح وقبله ماشاء الله لا اله الا الله >>أحلفي بس عيييييييب !..



وصل ديما أول عشان يفتك من حشرتها وراح بيت أبو فيصل يوصل ريما ودلال >>يابعدي مشغلينه سواق ..



طلال:يالله وصلنا ..سيروا علينا عاد لاتقطعون ؟!..

دلال فهمت قصده نزلت وصقعت بالباب..

ريما:أن شاء الله سير علينا أنت أنا أن شاء الله بستقر هنا ..

طلال:ههههههه ليه مفكره تغيرين ؟؟؟..

ريما:هههههه فال الله ولا فالك ..يالله عنود باي وبينا اتصال اوكي اعرف كل شي !..

العنود:ههههه ان شاء الله ..



نزلت ريما وهي مستغربه من ردة فعل دلال حتى ماشكرت طلال بس طلال مستانس لأنه عرف أنها فهمت عليه ..



دخلت البيت ومالقت احد بالصاله راحت المطبخ وسلمت على خالتها وعرضت مساعداتها بس ام فيصل

رفضت كل شي جاهــز واستأذنت وطلعت لغرفتها وبعدين بتستفرد في دلال ..









...................









:يمـــــــــه ما ابي غدااااء خلوووووني أنااام بس لاأحد يقومني..

ام سعود:وراه ؟؟..

ديما:بس اذا قمت بتغدى مع سعود >>لانه مايطلع من المستشفى إلا بعد العصر ..

ام سعود:بكيفك بس نادي ريهام تتغدى ..>>كل هالكلام صراخ ام سعود بالمطبخ بعد ماجت من المدرسه

والأخت ديما على الدرج >>يعني سوت أعلان تسويقي أنها وصلت البيت ..











.....................









زيد مع رنــــا في المستشفى من قبل الظهر تعبت مررره ودقت عليه استأذن وجاها طيران

واللحين لهم فوق ال3 ساعات ماعطوه خبر ..



طلعت له الدكتوره:أنت زوجها ؟؟..

زيد:ايه ..

الدكتوره:ولاده مبكره ونبيك توقع على عمليه قيصريه إذا تعسرت الولاده لسلامه الجنين والأم ..

زيد زاد خوفه خوف :طيب بوقع بس أهم شي سلامة الأم الجنين بداله جنين..

الدكتوره:هههههه الله يخليهم لك الاثنين ..تفضل معي أخوي ..

راح معها ووقع الأوراق وقلبه مع رنا ويدعي من كل قلبه الله يسهل عليها ويخليها له..



مادق على أحد عشان مايقلقهم إذا ولدت بيدرون >>هي بالشهر الســابع اللحين يعني توها على الولاده بس الله يعين..









................









مها مشغوله مررره بالتجهيز لعرسها اللي بعد شهر ونص تقريباً ونجلاء موب مقصره معها مع ان هالحمل متعبها بس ماتقصر وغير المشروع اللي تخطط عليه هي وحمد يشغل وقته ويلقى له شي يشتغل فيه

بنظره نجلاء أنه بيكون أب فأكيد لازم يعتمد على نفسه قبل لايعتمدون عليه عياااله وثروه أبوه موب دايمةٍ له ..

عشان كذا منشغلين هاليومين في الموقع الالكتروني اللي يصممونه لحمد وهي تعلمه كيف يتحكم فيه والاشياء الرئيسيه

(فكره الموقع انه يقدم خدمات كثيره عقاريه تجاريه استثماريه بيع شراء وغيره عن طريق الانترنت يعني يمثل حلقة وصل سريعه في السنتين الأولى تسويق لأسم الموقع بعدين يبدى الشغل التجاري الله يوفقه ان شاء الله

>>فكره المشروع لي ترى وبسويها أنا ونجوده إن شاء الله بس على حريمي يعني حقوق النشر والطبع محفوظه

انتبهوا ^_*)...



نجلاء:يعني ؟؟..

مها:ولا شي خلاص بروح مع السواق وبشوف أمي ..

نجلاء:ورى ماتخلين تركي يوديك ؟؟..

مها:أحلفي بس أنا بالطقاق أكلمه أركب معه ما أطمنه صرااحه..

نجلاء:هههههههه لا بنكتب ممنوع اللمس ..

مها:ها ها ها ها ماتضحك انثبري وذبيني على طريقك وانتي رايحه المستشفى واذا طلعتي ارجعي لي وبأخذ معي سوما ..

نجلاء:بس ابي امر محل الكمبيوتر بشوف خلص الموقع والا لا ..

مها:من جدك انتي بتسوينه ؟؟!..

نجلاء:لا من عمي ايه من جدي خلاص بيطلع هاليومين بعدين نفعله على النت ..

مها:ياختي تجيبين أفكار خطييييره أبوي منهبل على الفكره يمدح فيك ليل ونهار..

نجلاء:ياحبي له بس أحس خالتي مضايقها الموضوع ؟!..

مها:ماعليك من أمي يومين وترضى ..

نجلاء:بس ما ودي تأخذ عني فكره موب زينه..

مها:ترى بصكك بذا العلبه وش فكرته والله عادي ..

نجلاء:وش اخبار رنا؟؟..

مها:طيبه من زمان عنها الله يسهل عليها تون وتطن ..

نجلاء:ههههههه وعلي بعد ادعي لي ..

مها:وين حمد أجل ..؟؟

نجلاء:اظنه طالع مع تركي ..

مها:وش عنده معرس عليه ..

نجلاء:ههههههههههه لامعرس على أخته..

مها توها بترد الا رن جوالها رقم تركي ماسجلته للحين ..

مها:جبنا سيره الاوط قانا ينط

نجلاء توقف:ما سمعك يوريك من الفاره يالله في امان الله بنزل تحت ..

مها:في حفظه اذا جيتي تروحين دقي على لاتسحبين..

نجلاء تسكر الباب :هههههه منيب ساحبه ردي لايسحب عليك ..

مها:ههههههه اتحداه ..



وردت وكالعاده بدأت معركه جديده بين تركي ومها بس معركه توسع الصدر ياحبي لهم اثنينهم ^_*

ومعاركــهم ..









.................











وصل على الساعه 5 كانت قايمه من نص ساعه..

ريما كانت توها مخلصه لبس دخل:السلام عليكم ..

ريما:وعليكم السلام ورحمة الله وبركاته ..يعطيك العافيه ..

فيصل بابتسامه وهي يقعد على الكنبه بتعب:الله يعافيك ..وش أخبارالجامعه اليوم ؟؟..

ريما:ههههه طيبه تسلم عليك..

فيصل:الله يسلمها ليه مادقيتي علي اجي اخذك ؟..

ريما:جيت مع خالي ماله داعي تتعب نفسك وارسلت لك رساله !..

فيصل:تعبك راحه وشفتها..

ريما:تسلم احط لك غداء ؟؟..

فيصل:تسوين فيني خييير ميت من الجوع ..

ريما وقفت:بسم الله عليك دقايق واحطه تبيه فوق والا تحت ..

فيصل:لا هنا ..

ريما:ان شاء الله ..جت بتطلع ..

فيصل:الريم ؟؟..

ريما:وقفت والتفتت عليه كان مرجع رأسه على الكنب وشماغه عقاله جنبه :هــــلا ؟؟..

فيصل يفتح عيونه ويرفع رأسه:محلـــوه اليوم ؟..

ريما وجهها شب حريقه ابتسمت :عيونك الحلوه ..

فيصل ضحك على شكلها ارتبكت من كلمه ياااربي:هههههه ياحبي لك ..

ريما مبتسمه :شربتـــه ؟؟؟!

فيصل يرجع رأسه :لا ما تشوفين رأسي بينفجر ..

ريما استغلت أنه مغمض عيونه يعني مارح يشوفها :معليــش حبيبي يومين وخلاااص

فيصل يوم أستوعب الكلمه فتح عيونه ههههههه وإلا ما أحد فيه :ريمـــا ؟؟؟



ههه سفهته ونزلت هههههبس عجبته الحركه والله لو ما اتركه إلا عشاااانك !

سوت له غداه تغدى وراح ينام شالت اللي عقبه ونزلته وطلعت من المطبخ بتروح لدلال من جت من الجامعه معد شافتها ..

توها طالعه (طبعاً بجلالها تخاف يطلع بندر بأي لحظه )



بندر توها داخل :يااااااااااا أهــــــــــــــــــــــــــل البيت >>ازعاج ..

ام فيصل :ادخل ما لمك أحد ..

دخل بندر وريما طلعت فوق ..

ذب نفسه على الكنب :آآآآآآآآآآآه..

ام فيصل:بسم الله عليك من الآآآآآآآه..

بندر:والله ياميمتي كــــرف موب صاحي مايسوى على أخر ترم ..

ابو فيصل اللي يقرى جريده:كلها شهر وتخلص ما ابيك تقول الترم الجاي ..

بندر:الله لايقوله أصلاً حامت كبدي منها ..ابي غدا جاااااايع ..

ام فيصل :شوي ونحطه لك قم غير وانزل ..

بندر:طيب سوي لي درب >>عشان يمر..

ام فيصل تروح للمطبخ:مالمك أحد مرت اخوك فوق ..





دخلت على دلال وهي للحين في سريرها موب عاده 5 وزيــاده بس مبين عليها قايمه موب نايمه لأنها تتقلب ..



فتحت الستاير :دلوووووووول دليييييل يالله حشـــــى الساعه بتجي 6 وأنتي خايسه ..

دلال:امممممممم خليني كسلانه والله ..

ريما:أجيب جيك مويه..

قامت دلال مرتاعه :خيييير ميب تبطي وين رجلك أجل ؟؟؟..

ريما:هههههه تغدى ونام يعني مافي فكه ..جت وجلست على السرير النفرين من الجهه الثانيه >>حاطين لها نفرين ميب سهله والله القعده ههههههه>غايره لا والله أنا ترى نفر ونص !..

ريما:وش فييييييييك؟؟؟؟....

دلال منسدحه وتطالع السقف :أنـــا ؟؟..

ريما:أجل أنا ؟؟..

دلال:مافيني شي ليه ملاحظه علي شي ؟؟..

ريما:ايــه أشياء ..

دلال التفتت لريما وتركت على يدها :وش شايفه لهالدرجه متغيره ؟؟..

ريما:ما ادري بس اليوم عصبتي على شيء تافه وموب من عادتك ..

دلال رجعت تنسدح:نرفزنـــي !..

ريما:ما ادري الموقف عادي جداً سيروا علينا لاتقطعون كلنا نقولها ..

دلال:بلاك ماتدرين وش صاير..

ريما:وهذا اللي ابيه اللي صاير ؟؟..

دلال:طحت ومحدش سمى علي يامرة أخوي ..

ريما تتربع :هههههههه اف اف طحتي مره وحده وش فيك فضفضي ياوخيتي ..



دلال يمكن تستنى هالفرصه من زمان ولقتها فقعدت تقص وتقص على ريما ..

وريما داخله جو ومتحمسه معها لأن الطرفين كلهم يهمونها !









...............









ديما:وجعتني جنوبي وأنا اتقلب عجزت أناام !..

ام سعود:ليه وش فيك ؟؟..

سعود:أرق ..

ديما:أرق في عينك مدري أحس أني حاسه بشي بيصير شي ..

ام سعود:الله يستر من أحساسك ..

ريهام:هههههه يمه تذكرين يوم تحس ذاك اليوم ماتت صديقة أمي منيره ..

سعود:ههههههه لاتحسين فيني تكفين ..

ديما:مااالت عليكم ..يمه كلمتك رنــــا اليوم ؟؟؟..

ام سعود:بسم الله على بنيتي ..

ديما:ههههههه وش قايله أنا قايله بتموت الأعمار بيد الله ترى ..مادقت ؟؟..

ام سعود:لا والله مادقت موب من عادتها !>>>ساره ما ارتاحت..

ام سعود:راكان حبيبي جب التليفون ..

سعود:شقيتي بأمي ؟!..

ديما:شفيكم علي حرام أحــــس والله ذا النااااااااس مشكله ..

دقت ساره كم مره على بيت رنا بس ماأحد يرد وجعها قلبها زياده ..

أخذت جوالها وتدقق عليها ومحد يرد بعد لأن رنا ناسيته بالبيت ..

دقت على زيــد ونفس الجواب لارد ..

قلقت زووود وكله من احساس ديمووووووه الخايس >>حرام عليكم خلوها تحس ههههه..









....................