المنتدى :
الارشيف
رواية ليه يا ناس تذبحوني وأنا حيه
السلام عليكم
أخباركم إن شاء الله أموركم طيبه
طبعا هذي أول روايه لي وأتمنى من كل قلبي إنها تعجبكم
أنا خفت وترددت كثير بس تشجيع أختي نيران لي ومدحها لمنتداكم خلاني أتشجع وانزلها
على العموم ما راح أطول بالكلام
أتقبل النقد البناء وما احلل نقلها بدون ذكر اسمي عليها(ورده من نار)
بسم الله
^^^^^^^^^^^^^^^^^^^^^^^^^^^^^^^^^^^
ليه يا ناس تذبحوني وانا حيه
^^^^^^^^^^^^^^^^^^^^^^^^^^^^^^^^^
ليه يا ناس تذبحوني وأنا حيه؟ليه تقتلون قلبي المسكين ولحد الحين يدق وأنا أحس بدقاته؟ليه تغرقوني في الظلام وأنا أبغى من يمد يده ويسحبني؟ليه تبعدون عني وأنا محتاجه لوجودكم حولي
ليه؟
ليه؟
ليه؟
جالسه في زواية الغرفه وحاضنه رجولها وحاطه رأسها على رجولها وصوت أنين يصدر منها
صوت أنين تعودت الجدران على سماعه
صوت أنين تعودوا أصحاب المكان على سماعه
رفعت رأسها وعيونها مورمه وخشمها احمر ودموعها تنزل
دموع قهر
دموع حقد
دموع خوف
دموع تنزل وكأنها تهرب من عيونها اللي ما تقارقها الكوابيس
تهيئ لها صورته وكأن اللي صار لها فلم وقاعد ينعرض لها
حطت يديها على أذانيها وعيونها باين فيها الخوف والفزع
هزت رأسها وبصوت باكي ومنبح من كثر البكاء:بس الله يخليك ..خلاص مو قادره...خلاص الله يخليك اتركي بحالي...خلني مرتاحه لو ليله...علا صوتها وبصراخ:قلت لك خلاص ...خلاص....خلااااااااص
غمضت عيونها على أمل إن الشريط يختفي مع اختفاء النور عن عيونها بس انرسمت لها صورت أمها
حطت رأسها على رجليها وهي تشد يديها على رجولها وبصوت مثل صوت الطفله الضايعه:يمه ...يمه اهئ اهئ يمه تعالي شوفي بنتك تعالي لا تتركيني لحالي
رفعت رأسها علو صوت امها وعقدة حواجبها وهي تشوف صورة امها قدامها صورت أمها وهي جالسه على السرير قدامها وجالسه تأشر لها تجلس جنبها وقفت والضحكه بدت تنرسم على وجهها وبصوت مبحوح ممزوج بفرحه:يمه
قربت وبصوت اقرب لصوت طفله لقت ألعابها:يمه أنتي هنا ...
أمها وهي تأشر برأسها:إيه أنا هنا معاك يا حبيبتي
قربت وجلست مكان ما تأشر أمها:يمه أنا كله أناديك..بس انتي ما تردين علي...أنا...انا احبك ...مسحت دوعها بطرف كم ملابسها:أنتي ما كنتي تسمعيني
أمها سكتت وما ردت عليها
كملت وضحكتها تتحول لبكاء:يممممممه أنا قاعده أموت ..يمه أنا بنجن..يمه مو قادره أنا ابغاك ...كملت وهي تطالع الفراغ قدامها وصارت تتكلم بهدوء وكأنها جثه بلا روح:يمه كلهم خلوني...يمه أنا مذبوحه وأنا حيه ...يمه أنا مو قادره أتحمل أحس إني بنجن
التفتت على مكان أمها لقت أمها اختفت
وقفت وبصوت عالي وعيونها تدور في أرجاء الغرفه:يمه وينك...يمه وين رحتي..علا صوتها وصار أشبه بصراخ ومليان عتاب:يمه...تعالي ..يمه لا تتركيني لحالي..اهئ اهئ يمممممممممم تعالي ..حرااام عليك
هزت رأسها برفض:لا يمه لا تتركيني أنا ما أبغى أظل لحالي يمممممه...هزت رأسها بهستيريه:راح يجي يمه يمه الله يخليك لا تتركيني لحالي راح يجيييييني
انفتح الباب ودخلوا ثنتين وقربوا ومسكوا يدها وهي بدت تسحب يدها بعنف:اتركوني لا أبغى أمي...لا اتركوني ابغاها أبغى حضنها أبغى قلبي يرجع يعيش أبغى الامان بعدوا بعدووووووووا
حطوها الممرضتين على السرير وثبتوها ودخلت الثالثه ومعاها ابره
شافت الابره وصارت تقاوم:لا ما ابغى انام لااااااا ما ابغى الكوابيس حرااااام اهئ اهئ والله حرام اااااااااااااه يارب ما لي سواك ياربي
بد صوتها بخف :لا ما أبغى الظلمه ....لا ما أبغى أنام ...لا الله يخليكم..الله يخلـــ..واختفى صوتها وغطت في نوم عميق وظلام يلفها مثل الظلام اللي اقتحم حياتها من فتره طويله
^^^^^^^^^^^^^^^^^^^^^^^^^^^^^^^^
بعد ما لبس وتكشخ وتعطر طلع من غرفته
نزل الدرج ودخل الصاله:صباح الخير
أمه واخته:صباح النور
جلس على الأرض بين امه واخته
أخته وهي تمسك البريق:اصب لك شاهي يا حمد
حمد:يا ليت والله
أم حمد:وش هالنشاط يا حبيب أمك أنا توقعت بعد ما رجعت أمس متأخر انك بتصحى متأخر
حمد:ههههه لا توقعك غلط وهذا يسمونه نشاط حب العمل
أخته وهي تمد الشاهي له:دوم هالنشاط
حمد وهو يأشر على الفطور:اكلي بسرعه علشان أوصلك مدرستك وأروح لدوامي بدري
أخته:طيب
أم حمد:أقول يا وليدي
حمد:أمريني يا لغاليه
أم حمد:ما يأمر عليك عدوا بغيت أنا وبيان نروح السوق ففض نفسك اليوم علشان تودينا
حمد وهو يأشر على خشمه:على هالخشم ما طلبتي شي يا حلوة اللبن
أم حمد:الله يرضى عليك دنيا وآخره ويفكك من ربع السوء
حمد تجاهل أخر كلام قالته أمه وهو يتنهد
بيان وهي تميل على أخوها وتحرك يدها قدام وجهها:نق يا خيو
طالعها وبعد يدها وهو مستغرب:انق وشو
بيان وهي ترجع ترفع يدها:نق القروش مو معقوله أروح السوق خالية اليدين
حمد:هههههه يرحم أمك لا تحكي فصحى مع احد وإذا على القريشات على قولتك إن شاء الله ما تنزلين السوق إلا وهم بجيبك
بيان:يا لبى قلبك يا اخوي قلت لك من قبل إني احبك
حمد:أقول اتركي عنك التميلح ويله قومي لا نتأخر
بيان:ههههه دائما كاشفني
وقف حمد:خبز يدي كيف ما أكشفك..التفت على أمه وباس يدها ورأسها:يله فمان الله يا حلوة اللبن
أم حمد:بحفظ الله
بيان وهي تبوس رأس أمها:باي
أمها:بحفظ الله
طلعوا وخلوا أمهم وراهم اللي رفعت يدها ومن قلب:الله يفرحك يا حمد ويرضيك أنت وأختك مثل ما انتم مرضيني يا رب....كملت بعد ما تذكرت ربع حمد:ويفكك من شلة السوء اللي ما ادري وش معلقك فيهم يا رب
^^^^^^^^^^^^^^^^^^^^^^^^^^^^^^^^^^^^
نزل من سيارته وبالطوه في يده
دخل المستشفى والأغلب يصبحون عليه:صباح الخير – صبحك الله بالخير
في كل مره يلقون عليه السلام ويصبحون عليه يرد عليهم بهمس وباشاره من رأسه
وصل المكتب اللي يضمه هو وزميل له ودخل وهو يحس انه ما له مزاج لأي شي
جلس على مكتبه وحط البالطوا على طرف كرسيه
أما زميله شافه كيف دخل وباين عليه إن مزاجه مقفل:ترى السلام لله يا باسم
باسم وهو يطالع صالح:ترى مو فايق لك و زين مني تحملت هاللي يصبحون علي
صالح وهو يوقف:الهك يعينك على نفسك أنا بفهم أنت كيف دكتور أمراض نفسيه وأنت حتى نفسك مو قادر تتحملها
باسم وهو يتأفف:اوووووف يا كثر ما تحب تسولف
صالح وهو يرفع يديه:خلاص يا أخي ..أنا بطلع وراي كم حاله بروح اطل عليها
باسم:يكون أحسن
طلع صالح وبعد ربع ساعه وقف ولبس بالطوه وخذا الملف اللي على مكتبه وطلع يتفقد الحالات المسئول عنها
طلع يطل على الحالات وهو مو عارف كيف بيتحملهم وهو مو قادر حتى يتحمل نفسه بسبب الصداع بعد سهرته مع ربعه ليلة أمس
^^^^^^^^^^^^^^^^^^^^^^^^^^^
جالسين حول الطاوله والهدوء يعم المكان
وبعد ما خلصوا فطور وقفت:الحمد لله شبعت
لما شاف أخته وقفت وقف هو بعد:الحمد لله أنا بعد شبعت
الأم:يله البسي عبايتك وقولي للخدامه تروح معك توصلك أنتي وأخوك
طالعت أمها وبابتسامه وهي تلبس عبايتها اللي حاطتها على الكرسي:إن شاء الله
الأم:اسمعي يا زينه خليهم يوصلون ريان أول علشان الروضه يدخلون بدري بعدها أنتي
زينه:إن شاء الله
رفع يده وهو يأشر على أخته:لا يمه خلي السواق يوصل زينه أول وأنا بعدها
زينه:لا أنت أول
ريان اللي خذا الشغله عناد:لا أنتي أول وأنا بعدك
لما شاف نقاشهم احتد قرر يتكلم قبل لا ينقلب هواش:خلصنا عاد ..أنت أول يا ريان وبعدها أختك
ريان:وليه مو هي أول
أم زينه:لان الكل بيدخل الصف ويخلونك برا لانك متاخر
ريان اللي ما يبغى يكون أخر الواصلين:لا اجل غيرت رأيي هي أول
زينه :هههههه
التفتت على أبوها وباست رأسه:يله يبه باي
أبو زينه:مع السلامه ولا تتهاوشين مع أخوك
زينه: إن شاء الله
ريان وهو يبوس رأس أبوه:باي يبه
أبو زينه:باي
باسوا أمهم وطلعوا وأول ما وصلوا للباب لقوا الخدامه تنتظرهم وأول ما شافتهم طلعت معاهم وركبوا مع السواق يوصلهم
بعد ما راحوا عيالهم طالعت زوجها اللي حس إنها تبى تقول شي:وش عندك يا حنان
أم زينه:أنا أبغى أسالك عن الريم
تنهد أول ما سمع اسمها:وش فيها
أم زينه:ما في أي تطور يا محمد
أبو زينه هز رأسه وبهمس:لا والله كل ما لها حالتها تسوء
أم زينه وقلبها يعورها: إخوانك ما يزورونها
أبو زينه وهو يهز رأسه:لا وأنتي تدرين إنهم تبروا منها
أم زينه:والله حرام بس والله ما ألومها يوم تستخف اللي صار معاها مو شوي
أبو زينه بقهر:ااااه لو بس ادري من المسئول كان ذبحته ودفنته بأرضه
أم زينه وهي تحط يدها على يد زوجها وتحاول تواسيه:هد نفسك الله راح يأخذ حقها منه
أبو زينه بعجز:مالنا غير ندعي عليه حسبي الله عليه دنيا وأخره
أم زينه سكتت وما عارفه وش تقول
أبو زينه وهو يوقف:أنا رايح الشركه توصين بشي
أم زينه :سلامتك
خذا شنطته وقبل لا يطلع:مع السلامه
أم زينه:بحفظ الله
بقت أنظارها على زوجها لحد ما اختفى عن نظرها وبهمس ممزوج بحزن:الله يعينها والله يرجعها سالمه لنا ويرجع صوتها يملى هالبيت فرحه وضحك
^^^^^^^^^^^^^^^^^^^^^^^
بعد ما مر على كل الحالات بقت عنده أخر حاله وكانت جديده عليه
فتح الملف وهو يقرا:الريم عبدالله(.....)....عقد حواجبه وهو يشوف أخر تقرير وصل عنها:انهيار ...تنهد وهو يشوف تقرير الدكتور من أول ما دخلت عندهم :إشارة سالب يعني هذي ما في تحسن ابد ...يله ما بقى إلا هي خلني أروح أشوف وش سالفتها
مشى لحد ما وصل لغرفتها ولقى الممرضه توها طالعه من غرفتها:ها كيف هي اليوم
الممرضه:من أمس بالليل وهي صراخ وما غير نهديها بها الابر
باسم بتعجب:وهذي ما في أي تحسن بصحتها
الممرضه وهي تهز رأسها:للأسف لا
باسم وهو يفتح الباب:أنا بدخل اكشف على حالتها
الممرضه:أنا توني عطيتها مهدي ونامت
باسم :طيب بس بعد لازم اكشف عليها
الممرضه وهي تدخل:طيب بس دقيقه
وقف باسم ينتظر الممرضه لحد ما تضبط وضع الريم وبعد ثواني فتحت الباب:تفضل يا دكتور
دخل باسم الغرفه وعيونه على السرير وأول ماجات عيونه عليها بلم من اللي يشوفه وبعد ثواني بسيطه قدر الشيطان بالتعاون مع نفس باسم الضعيفه انه يرسل له أفكار خبيثه وانرسمت ابتسامه خبيثه وعيونه أعلنت عن الكثير من الأشياء اللي الريم تهرب منها
^^^^^^^^^^^^^^^^^^^^^^^^^^^^^^^
جالس وراء مكتبه ويدقق بالأوراق ويوقع البريد والسكرتير واقف جنبه
دخل أخوه :السلام
بدون ما يرفع رأسه:وعليكم السلام ما تعرف تطق الباب يا خالد
خالد اللي أنحرج من كلمة أخوه بوجود السكرتير :إذا فضيت لي جاوبتك
رفع رأسه وصك البريد وعطاه للسكرتير
السكرتير:تأمرني شي ثاني أستاذ سالم
سالم:لا
طلع السكرتير وصك الباب وراه
خالد بقهر: وأنت لازم تفشلني عند اللي يسوى وما يسوى
سالم وهو يفتح ملف مشروع وبعدم اهتمام:أنت اللي تفشل نفسك لو طاق الباب زي الخلق كان ما فشلتك
خالد بقهر:لو تدري وش اللي صاير كان عرفت ليه ما فكرت بطق الباب
سالم وهو يرفع رأسه من الملف:وش صاير
خالد وهو يوقف:ما وافقوا على طلب الوصايه
سالم وهو يوقف وملامح وجهه تتحول لصدمه:وشو
خالد بقهر:اللي سمعته يعني ما لنا سلطه على شي
سالم وهو يضرب المكتب:كيف مو هي مجنونه والمجنون ما له سلطه على شي المفروض إحنا نكون الوصيين ونتحكم بكل شي مثل ما نبغى
خالد:عارف بس التقارير ما ثبتت إنها مجنونه ولا جابت النتايج اللي كنا متوقعينها
سالم وهو يرفع السماعه:جيبوا لي هالمحامي الزفت
صك السماعه وهو يجلس ويفك أول زرين ويتنفس بقهر
خالد وهو يجلس:وش نسوي الحين
سالم وهو يطالع خالد:بالقانون ولا بالحيله لازم نحط يدينا على هالفلوس لازم إحنا وعيالنا أولى منها هالفاجره إحنا أولى
خالد هز رأسه مؤيد لكلام اخوه والقهر والحقد يأكلون قلبه على هالفلوس وصاحبة الفلوس اللي ظلموها وذبحوها وهي حيه
^^^^^^^^^^^^^^^^^^^^^^^^^^^^^^^^^
انتهى البارت الاول
^^^^^^^^^^^^^^^^^^^^^^^^^^^^^^^^^^
طبعا هذا بارت بسيط ولو عجبكم راح أطوله وطول البارت على حسب تشجيعكم
ولو ما عجبكم أقول لنفسي باي باي
دمتم بود
|
27-05-12, 05:32 PM
جديد مواضيع قسم الارشيف
العرض الشجري
