منتديات ليلاس - نصائح للوقاية من نزلات البرد

طبعا اليومين دول زي ما كلنا شايفين الجو مش باين له إذا كان صيف ولا شتاء.. علشان كده كلامنا النهارده هيكون عبارة عن نصائح للوقاية من نزلات البرد؛ لأن زي ما أنتم عارفين إن الوقاية خير من العلاج.. مش كده ولا إيه؟!

وعلى فكرة النصائح اللي هقولها دي مش بس مفيدة للوقاية من نزلات البرد.. دي كمان هتساعد الناس اللي عندهم برد بسيط إنه يروح منهم بسرعة..

أولاً: نتقل ملابسنا شوية
http://www.boswtol.com/mastaba/image...y/kamar_01.jpg

زي ما انتم شايفين الجو الصبح بيكون فيه لسعة برد، وبالليل كمان بيكون فيه لسعة برد لكن أثناء النهار بنلاقيه دافي.. علشان كده ياريت الناس اللي بتخرج الصبح بدري أو اللي بترجع بالليل يكون معاها جاكيت خفيف علشان تلبسه علشان تحمي نفسها من لسعة البرد دي..

وياريت كمان ملابسنا الفترة دي تكون ملابس قطنية؛ لأن الملابس القطنية زي ما كلنا عارفين بتساعد على امتصاص العرق، وكمان بتدي إحساس بالدفء وبتحمينا من أي إحساس بالبرد..

ثانياً: نشرب سوائل كتير

http://www.boswtol.com/mastaba/image...y/kamar_03.jpg
المعلومة اللي كتير مننا مش عارفها هي إن شرب السوائل الكتير بيحمي الجسم من الإصابة بالفيروسات.. فياريت إننا نكتر من شرب السوائل ولو على الأقل 8 كوبايات ميه في اليوم.. أو نشرب عصائر طبيعية فريش كتير ومن العصائر اللي ممكن إننا نشربها في الفترة دي وتفيدنا فعلاً "عصير الليمون" أو "البرتقال" أو "الجوافة"..

ثالثاً: نبعد عن المشروبات المثلجة
http://www.boswtol.com/mastaba/image...y/kamar_04.jpg

ياريت إننا نبعد في الفترة دي عن المشروبات المثلجة بجميع أنواعها، ونشرب المشروبات الدافية زي "الشاي بالليمون" أو "الكاموميل" أو "النعناع" أو "الليمون الساخن" أو "اليانسون" أو "الزنجبيل"..

رابعاً: نكتر من فيتامينات سي
http://www.boswtol.com/mastaba/image...y/kamar_02.jpg

ياريت إننا نكتر من الفواكه اللي بتحتوي على فيتامين "سي" زي "البرتقال"، و"اليوسفي"، و"الجريب فروت".. كمان فيه فوار "فيتامين سي" موجود في الصيدليات ياريت إننا نجيبه وناخد منه قرصين في اليوم.. واحد الصبح والتاني بالليل.

خامساً: نتناول غذاء متكامل

http://www.boswtol.com/mastaba/image...y/kamar_05.jpg
دايما بقول إن الغذاء المتكامل مفيد جداً لحماية الجسم من أي أمراض.. علشان كده ياريت نحرص دايما إن غذاءنا يكون غذاء بيحتوي على جميع العناصر الغذائية اللي الجسم محتاج لها زي "الخضروات" و"البروتينات" وده لتقوية الجهاز المناعي للجسم..

وعلى فكرة الدراسات أثبتت إن الخضروات اللي ليها أوراق خضراء من أكتر الحاجات اللي بتساعد على حماية الجسم من نزلات البرد.. فياريت إننا نهتم بيها.

سادساً: نجدد هواء المكان باستمرار
http://www.boswtol.com/mastaba/image...y/kamar_06.jpg

ياريت واحنا قاعدين في البيت أو المكتب نفتح الشبابيك علشان نجدد هواء المكان اللي احنا موجودين فيه.. وبكده نطرد أي فيروسات ممكن تكون إنها موجودة..

ونحاول على قد ما نقدر إننا نبعد عن أي مصدر هواء بارد مباشر زي هواء "التكييف" أو "المروحة" في الأيام دي لأنها بتزود البرد.

سابعاً: نبعد عن المصابين بالبرد
http://www.boswtol.com/mastaba/image...y/kamar_08.jpg

مش لازم لما يكون عندنا حد مصاب بالبرد أو الانفلونزا إننا نسلم عليه وناخده بالحضن؛ لأن بكده بنعرض نفسنا للعدوى بالبرد ده.. كمان ياريت إننا ما نستخدمش الأدوات الخاصة بالناس المصابين بالبرد زي الكوبايات والمعالق والشوك إلا بعد غسيلها بالماء الساخن والصابون كويس.

ثامناً: لو حسينا بالبرد نريح في البيت

http://www.boswtol.com/mastaba/image...y/kamar_07.jpg
ياريت لو حسينا بأعراض بسيطة للبرد زي "ارتفاع حرارة الجسم أو العطس" إننا نريح في البيت لمدة يوم علشان ندي لجسمنا فرصة إنه ياخد قسط من الراحة ويقدر إنه يقاوم البرد.

تاسعاً: مش أي دواء ناخده

http://www.boswtol.com/mastaba/image...y/kamar_09.jpg
النقطة دي خاصة للناس المصابين بالسكر أو ارتفاع في ضغط الدم أنهم ما ياخدوش أي دواء موجود عندهم في البيت إلا لما يروحوا لدكتور.. وهو اللي يحدد لهم العلاج المناسب لهم على حسب حالتهم وده لأن معظم أدوية البرد بترفع الضغط والسكر.. فبتلاقيهم محتاجين علاج محدد، الدكتور هو اللي يقول عليه..