منتديات ليلاس

منتديات ليلاس (https://www.liilas.com/vb3/)
-   القصص المكتمله (https://www.liilas.com/vb3/f717/)
-   -   سعوديات بعروق إيطالية باكر على الظالم تدور الدواير للكاتبة شوق ألماس (https://www.liilas.com/vb3/t95319.html)

ديمـــا 06-10-08 11:12 PM

سعوديات بعروق إيطالية باكر على الظالم تدور الدواير للكاتبة شوق ألماس
 
السلام عليكم

يسعد مساكم
:liilas:

انا قريت هالرواية وتابعتها مع الكاتبة اول بأول

وهي رووووعه صراحه طرح جديد وواقعي ....والاسلوب راقي ...

حبيت انزلها هنا و اتمنى ان ماحد قد نزلها هنا من قبل اتمنى اني السباقه لنشرها ....


تحياتي اختكم : دمدوم

ديمـــا 06-10-08 11:18 PM

بـــــاكر عــــلى الـــظـالم تـــدور الدوايـــر !!






عزاه ياقلبي من الهم عزاه ...من يواسي دمعتي قال خيره


وشلون خيره عقب فرقاه .. لا تقول خيره خيبة كبيرة



مقدمة الكاتبة

The longest day has an end

مع كل نور يطارد الظلام تشرق شمس الكون و تبعث الحب و الأمل بكل شعاع من اشعتها أهديكم تحياتي
هذه روايتي الأولى اقتطفتها من بستان الواقع و روض الخيال .. اقتطفتها زهرة يانعة ..أهديها مغلفة بدعوة صادقة لقبولها ... ولكم من الأعماق مشاعر رقيقة ...!
كثيراً ما تشعر قلوبنا بنبض الحب....الحنين ...فاجعة الرحيل ..! و ماأقسى من ذاك الإحساس ألا و هو النكران و الجحود ..... عندما يكون القهر سموفينة حزينة يعزفها الحظ على القلوب المرهفة
صورت لكم أحداث ومواقف متعدده لُمست في الواقع و عايش اصحابها ثنايا التجربة اياً كانت مؤلمة ، حزينة ، كوميديه ، عذبه .... فقد سمحت لخيالي بالتطفل وإضفاء بعض الأحداث لإحداث نوع من التوازن المطلوب ..
واجهت العديد من الأخوات الصديقات ، الزميلات القريبات وكل واحده قد يكون لها نصيب من روايتي ولكن غيرت بعض المواقف إحتراماً لمن عاشوا ثنايا هذه التجارب المؤلمة خصوصا ..
جمعت المواقف في طابع عامي محلي نجدي .... فمن" قلب الرياض " ولدت هذه الرواية و وصولاً لأيطاليا ... حيث تسطرت رحلة الدموع والحرمان !
في تلك اللحظة الحاسمة من العمر الذي يكتنفه غموض ... تولد القسوة من رحم المعاناة ..
و عندما تنبثق الشمس لتطل على المكان بعد غيبه تنثر فيض اشعتها على رياض جزيرة الأمل من جديد .... حب الحياة ..... الشعور بالثقة !
و عندما تدور الأفكار في مخيلتي. اجد نفسي تخوض في أعماق الواقع .. عندها أجد آهات مكلومة في مشاعر الشخصيات الرقيقة ..سطرتها... مثلتها لكم بدماء مشاعر بشريه .. أدرجت الدموع كثيراً و بللت كل المعاني والمواقف .....!
فالزمن سجل حافل بأحداث بشرية كثيراً ماتشعرنا بقيمة تصرفاتنا ... صورت الكثير من معاني الحب الأسرية ..العلاقات الزوجية المليئة بالحب ....! المغريات التي تواجه العديد منا ... قوة الصراع والتحدي ... حب السلطة و المال .... الطيبة السلبية .... التلاعب في لحظة الميلاد
هنا
عندما تحتدم نيران النكران و ترتقع ألسنة لهب لجشع و الغيره .. قد توصل بنا لطرق مهلكة من الممكن أن تضر بأحدنا .... ومالحل لو كان هذا الشخص مسالم ..طيب ...روحه اقل بكثير من أن تحفل بالشر او حتى يضمر لها الشر ...؟
الحظ دائماً يلعب دوره في الحياة ...... والكل منا يتذمر ويشتكي من الحظ .....! هل من المعقول أن الحظ يكون بالوراثة كما يقال ....؟ لربما افتضرنا ذلك .... فمن المؤكد بأن زينة " بطلتنا" للحظ قصة غريبة حافلة بالاساطير في حياتها .....؟
ادعكم لقراءه هذه الرواية عمرها سنتين .. وقد انتشرت سابقا ولكن اعدت صياغة بعض المواقف لانني قد لمست تشابه بعض الاسماء ....كيف لا وانا كتبتها في غضون شهرين او اقل ^_^ ...
تذكروا : اتمنى لكم جواً ملائماً لطيبة الشخصيات الطيبة المليئة بالحب والامل ..جواً مغلفاً ببراءة الطفولة .. وصفاء النفوس يخلو من براثن الحقد ..نقي من سموم الوشاية . بعيداً عن الخديعة .... شعاره الصدق والنية الحسنة منهاجه .. وفيه نكتب لصوت المحبة بلغة جميلة
إلا أننا لن نطفئ شموع الأمل بيننا ... نشعر بعمق عين الجرح في قلوب الشخصيات المرهفة .. فليتنا نبتلع شحوب الحزن .
. و فجاءة رفعت راسي للتقويم ....
عـــــــــــام يموت و يولد عاام
يمضي القارئين بذكريات الرواية و ألأمها و آمالها .
... إلى حيث .....؟
وجهات النظر المختلفة ...

واللي لديه نقد اتمنى انه ينقد ويتفضل مع الشكر أما أولئك الذين تعتلي اصواتهم لتحدث زمزمة عقيمة لمجرد إثبات الوجود لا اتشرف بقراءتهم لروايتي المتواضعة .. لان هناك مثل مشهور جدا يقول :
من ينتقد الزمّار عليه ان يفرض اللحن
He who pays the piper can call the tnue .
لذا نرحب في النقد البناّء الموّجه ...


نقلا عن الكاتبة المبدعة

ديمـــا 06-10-08 11:21 PM


الشخصيات.. (Characteres )


1. عائلة أبو خالد الأخ الكبير لخمس أخوان تتكون من خالد 35 سنه ، بدر 27 ، سعود 25 سنة , نواف 22 سنه ، نورة 30 ، إبتهال 23 سنة ، ريم 17 سنه ( شقيقات لبدر و سعود ) .. تغريد22 سنة والهنوف 18 ( شقيقات لخالد ونواف ) أبو خالد متوفي وكان متزوج ثلاث زوجات الأخيرة هبه عمرها 25 سنة
2. عائلة أبو تركي تتكون من تركي 33 سنة ، بندر 27( بطل القصة نقيب في هئية الادعاءات و التحقيقات ) و نايف ومحمد تؤام عمرهم 24 سنة .. نسرين 30 سنة ، أميرة 20 سنة و داليا 15 سنة....

3. عائلة أبو محمد تتكون من محمد 36 سنه ، وليد 32 ، هشام 27 سلمان 25 وأخيرا حجرف ( اللي متعقد من اسمه مره ) 22 سنه .. ، ورده 23 سنة ، ود 19 ، صوفيا 20 سنة ( أمها مغربية ) وعايشه حياتها بشكل أوفـر كثير ..

4. عائلة أبو بدر تتكون من بدر 32 سنه يكمل دراسة الماجستير في كندا بعنوان (رؤية تدارك انتحار الأمل في المجتمع ) ، زينة 20 سنة ..( بطلة القصة)

5. عائلة أبو عبدالله تتكون من عبدالله 25 سنه ، عبدالرحمن 23 سنة ،
6. عائلة ابو وليد .. وليد30 و ضي 22




(الجزء الاول ... The First Part )

(1)
" من ذاك المـــول الصاخب بالحركة المترفة الراقية و زحمة الوجوه "
نورة بصوت مكتوم من تحت البرقع تحكي بإمتعاض : إبتهال أنت و ريم خلاص صدعت من زود التنقل بها المولز ، هذا خامس مجمع ندخله مو معقول ما بعد جاز لكن شيء ، يعني تبن تقنعني أن ولا فستان جاز لكن ..!!
ريم : وجع قصري حسك فشلتينا كل أمة لا إله ألا الله تناظر فينا ..
إبتهال : نورة الله يهديك بس الله وها لمجمعات عاد اللي كل بنات الرياض حافظينهم ولا عندهم غير التنقع فيها كل نهاية أسبوع.وبعدين بالله عليك وش زين خشتني وأنا كاشخه بذاك الفستان اللي سويت لي مناحة إلا وآخذه ولقيت وحده ما تسوى كاشخة بواحد زيه بزواج مين ..! زواج اخوي بدر .. أمانه وش موقفك ترضينه يعني لأختك بتوووو ( طبعا إبتهال عندها قدرة مش طبيعيه للإقناع )
ريم تكمل على كلام إبتهال : ذا غير بنات عماني اللي كل وحده متعاملة مع دار أزياء راقية .
نورة كانت تشرب كافي شرقت واهي تشرب : الله وبنات عمانك عاد ... وراك أنت وأياهن بس أخبرهن زين حدهن بوتيك بالمملكة أو الفيصلية وإذا سألت الوحدة قامت تتفلسف عليك
(( لاحظوا أن نورة خبيرة بالماركات العالمية و دور الأزياء لأانها متعودة تزورهم في سفرياتها مع زوجها وليد )).
ريم وواضح أنها بدأت تدهن بالزبدة : نورة تصدقين أمس أميرة و زينه يسألوننا عنك يقولون وين مزينه النيو لوك ..؟ قلت لهم انك سويتيه في سفريتك الاخيرة في دبي ، والله ياهم مدحوك ياختي قطعوك بالمدح يقولون سووبرر..( نورة تموت وتسمع احد يمدح فيها تطير فووووق ) .
نورة تعرف حركات خواتها اذا بدأ شغل الدهن بالزبدة ( يعني المدح ) تدري ان عندهن غرض .
نورة عضت على شفتها اللي تحت وناظرت في إبتهال اللي كانت تغمز لريم ..
إبتهال تهمس لريم : يختي افتحي الموضوع وإلا انا بفتحه ترى كلها كلمتين ، بعدين تراها ما راح تقطع راسك ليش أنت خايفة هاه ..؟ ما توقعتك جبانة ..اسمحي لي انصدمت فيك 
ريم بصوت قصير : لا ياشيخه وليش ما تقولين لها أنتِ سبحان الله دايما تشوتيني في هالزنقات ...
نورة بصوت قاطع : ريمـــــــوت وش عندك تساسرين إبتهال وش فيكم ؟؟ هاتوا من الأخير وش عندكم خبز أيديني عارفتكن زين ..؟
إبتهال : ههههههه يختي ساعة ما بغت تطلع لنا ساعه نتهامس وأنت ما عندك نية تسألين وش نبي ..؟ ماش يختي نلمح لك من توو وانت خبر خير ..
نورة : اها يعني ماريني اخذيني من بيتي وصدعتوا براسي من مول لمول وآثاري عندكم نية كان قلتوا لي وخلصنا من حركات المبزرة .. خير أن شالله هاه أكيد ريم تهاوشت مع الهنوف و صارت سالفة ..
ريم : لا وش جاب طاري الهنوف الحين بعدين أنا قايلة لك أنك قديمة تسامحت انا والهنوف صرنا سمن على عسل حتى بالمدرسة نكون مع بعض تصدقين .. ((كانت تبتسم ريم)) احنا ياعنوني أنت يعني شوفي لك وحده من هالخيارين ملزومه بواحد الله لا يعوق بشر بس ..
نورة بسخرية : الاول ....
ريم : تقنعين رجلك يوديك بيروت عشان تجيبين لنا فساتين ، وأنا من ناحيتي بحجز عن طريق النت عند وليد عطا الله ...
ابتهال بحماس : وأنا عند إيلي صعب ... أو زهير مراد براحتك انت اختاري اللي يجوز لك ...
نورة بإستهزاء : أها و الخيار الثاني ...
ريم : تقنعين أمي وابوي وأخواني شوفي ترى ذا صعب وراح تنهكين عشان يتم إنا أنا و هاالهبله ا نطلع بيروت بنفسنا نشوف لنا بدل لفرح أخوي بدر ...
ابتهال : هاه النوري وش قلِت ؟
نورة : إن شالله ياحبيباتي إذا تزوجتن من عيوني اروح معاكن وأجهز لكن من بيروت يالله الحين ممكن نطلع من هنا .
ابتهال : يؤ يؤ يا بيخك خلاص عاد النوري لا تطينينها وتصيرين بايخة ...
ريم : حرام وربي ظلم اني في فرح أخوي افكر مجرد تفكير اصمم أو اشتري من هنا قهر يختي
نورة : لا والله انت واياها اقول ماتبون تانيا طرابلسي تسوي لكم المايك آب ..
ابتهال: النوري ياشينك ..
ريم : أتحداك يانورة اذا بتأخذين لك فستان من هنا ابد شرط يا ابتهال أذا نورة اشترت من السعودية أني ان شاءالله لآخذ اخس فستان هنا .
نورة : وجع يوجع العدو انا متزوجة ولا تقارنين نفسك فيني يا ماما ...عندي زوج يوديني لوين ماابي
ابتهال كشرت : خلاص مشكورة النوري ما نبي منك شيء اصلا تدرين احنا الغلطانات اللي قلنا لك لو احنا قايلات لسعود اخوي كان راح معنا بيروت وخلصت السالفة وبلاش منة خلق ربي..
نورة : هههههههههههههه أي بيروت بعد رماح عنا
ريم : أي والله انك صادقة يا ابتهال، ( ريم مسويه انها زعلانه ناظرت في نورة ..)
ريم : نورة بليز دقي على رجلك يجي يأخذك احنا ما راح نوصلك ...
نورة في هالوقت تبحلق عيونها ...
نورة : يؤ يؤ يؤ تسوونها عادي ولا شيء عندكم ... عموما أصلاً أنا كنت محضرة لكن مفاجأة بس أنتن سبحان الله دايم عجلات حرقتوها علي
ريم تناظر إبتهال : خير وش باقي بعد ..؟
نورة : يا ياعيني على العالم الزعلانة ... انا آخذه مقاستكم من جوليا وحجزت لكم تصميم من تصاميم عواطف الحاي ....
ريم بتقرف : يؤ لا يختي دفشة تصاميمها ماهنا نعومة الله يخلف عليها .. ابي وليد عطا الله يعني وليد عطا الله
نورة : احمدي ربك بعد مين قدك آخذه همك قبل تخلصين امتحاناتك .. وحاجزة لك بعد وليد عطا الله مفلل ماهنا تاريخ قريب تبين من تصاميمه الجاهزة روحي خريص بلازا وتلاقينهم معروضات كل العالم شايفينهم ...
ابتهال تطق ريم : ريموت انطمي خلاص نعمة يختي ، لا تهمك النوري ياعمري أنت عساني مابكيك ياكل الغلا أنت يأحلى واغلى أخت بهالكون ....
نورة : مصالح...يا . مصالح ههههه
"
"
رجعن ريم و ابتهال بعد مانزلوا نورة بيتها بعدما اكلوا خواتها علقة محترمة لأن وليد شرف البيت واهي مو فيه مع ان عنده علم أنها وياهم .
ابتهال: ما عذب أختك إلا هالرومانسية الفتاكة قالت ايش قالت لازم استقبله يعني ما ملت من مقابل خشته سنتين .
ريم :بالعكس لو أنا في مكانها كان سويت أكثر .
ابتهال: أحلى يالبزر عيب استحي على وجهك لا أقول لامي ههههههههههه
( طبعا ذالحكي كله كان في حديقة البيت قبل يدخلون القصر )
ريم : تصدقين برأسي قهوة بيت
ابتهال كانت تتفحص شنطة كشخة شاريتها من" لوي فويتون" وواضح ان فكرة القهوة ترقص براسها برضوا
ابتهال: : يامال العافية عسى الله يجيب لك عريس ان شالله هههههه روحي فزي يالشقردية اخبرك قرمة سوي لنا قهوة ..
((بــــــــــدري صدق بدري تونا الساعة 1 لو تأخرتوا شوي ترى أحسن))
إبتهال ذبت الشنطة وخافت...
إبتهال : اللهم سكنهم مساكنهم ..
طبعا هذا صوت سعود واقف على رؤوسهن ..
ريم : ياربي قلت لك رحنا السوق بعدين وصلنا نورة بيتها هذا غير زحمة الرياض في الإجازات ما يحتاج اشرح لك ...
سعود: لااا وطاري قهووة بعد مطولات الاخوات شكلهن ...
ريم :انت وش محرق رزك يعني نجاح وناجحات ... وش ورانا نبي نسهر ونسفهل ونفلها ..! يعني غصب إجباري النوم ..
سعود : هههههه ( انفجر ضحك ) إما ناجحات كثري منها على غيري يا ماما لا تنسين أنا اللي موقع على تقريرك حتى اذكر اني تفننت في توقيعي .
ابتهال: ههههههه الله يرجك بس.
سعود: لا يكثر أنت الثانيه روحي سوي لنا قهوة نبي نمخمخ .
ريم : اها ايووووه قول كذى من قبل شوي تلمح تبي نعزمك على قهوتنا ، أي مو اعرفك بدوي تموت بالعزايم قاط وجهك اربع و عشرين ساعة ماعندك فيها ..
سعود : تدرين عاد يالله قومي أنت بذوق قهوتك .... خلاص كيفي انا عزمت نفسي على قهوتك أي ادري أنها مويه تركض وتخلطين فيها حليب وخلطات من خرابيطكم بس عادي زيها زي قهوة أبو المياه متعودين نشربها في الاستراحة ما في مشكلة يلااا فزي
ريم راحت تسوي قهوة واهي مقرره انها تغير فكرة سعود عنها وتبي توريه القهوة على اصولها ....
دق جوال سعوود ..... سعود : هلا والله
بندر : السلام عليكم وشلونك ..؟
سعود : وعليكم السلام بخير نزقح انت كيفك غريبة ما عندك استلام ؟ ...
بندر: تمام لا ابشرك ماعندي صباحي بكرة المهم وينك ؟
سعود : في البيت مرني تقهو وما عندي احد وعندي قهوة يحبها قلبك..؟
بندر : لا مقدر عندي هشام وعبدالله والدحمي حنا في الاستراحه أنت تعال ..
سعود : خير ان شالله مسافة السكة ..
سعوود يناظر لريم اللي سوت القهوة وجابتها طايرة واهو يطبق شماغة
سعود : لحووووول ياحظي الظاهر قهوة ابو المياة صدق تقرقع برأسي في البيت وفي الإستراحة
ريم : عاد بإمانتك وش رأيك ..؟ مو محكورة القهوة .. زي قهوة امي صححح؟
سعود: اما ذي وربي انك وثقة .. قهوتك حليوووة بس عندي قهوة امي ولا شيء بس عموما يعني ( يقولها بترفع وبصوت رخيم ) ماهقيتها تطلع منك يا وجه العنز .
ابتهال: ههههههههه
ريم: هين يا سعووودوه الشرهه ميب عليك على اللي ناط يسوي لك قهوة وانت اصلا ما تستاهل رح لاخوياك بسسسس...
سعود : اتعب أنا .... اموت أنا ... احلى يالزعلانه شكلك طالعه مره كيوت وانت زعلانة يختي فعلا حسيت أنك أنثى ههههه
ابتهال: ههههههههههه يا حرام
ريم : هين هين مين زينك عاد انت وخشتك على بالك ....
وقفت ريم .....
سعود : افاا بس يا ابتهال شكل هالبزر صدق وأخذها بجدية .....
ريم: بعد...... بعد....... انا بزر هين يا سعوود تحتاجني ....
سعود يغني : والله احتاجك انا خلك بجنبي قريب ... وإن حصل شيء بيننا عن حياتي لا تغيب ...
ريم : وينك يا مسيو وديع ابي رعد تشوف هالنشاز وععع احد قالك ان صوتك وانت تغني خايس
ابتهال: اول نومنيشن لهاالاسبوع : سعود من السعودية ..... الله سعود من السعودية فيها سجع يخولك تصير ستار تصدق.
سعود : تهبين والله اقول ورى ما يجيك كف يعدل خشتك ... بس انا اوريكم لا اشفر ابو جد المسخرة ذي
سعود لاحظ صمت ريم ناظر فيها ....
سعود : ريم امزح معك هاه لا تجحديني صحيني لصلاة الظهر أن شالله بكرة اذا ربي كتب لنا عمر ...
وطلع الاستراحة ... عند اخوياه .

ديمـــا 06-10-08 11:23 PM

2)

_في بيت ابو تركي العم فهد ابو تركي

( طبعا هذا العم كان عصبي شديد بس رحيم بنفس الوقت وإذا عصب مايرحم لدرجه انه يتخذ اي قرار لو كان ذبح احد عياله)
0 0 0
..الهدوء يسكن البيت........
أميرة كانت تقرا راوية ومشغله سلو ميوزك خاشه جو..
فجاءه خشت داليا عليها خاطرها منكسر..
أميرة ما انتبهت وظلت تقرا فجاءه لمحت دمعة دلو
أميرة رمت الكتاب : حبيتي دلو وراك ؟ وش فيك ؟
دلو: مافي شي.
اميرة: يو يو ياساتر حتى البزارين صاروا يخبون .
دلو: بخجل وابتسامه ولا شي بس أنا متضايقه يختي أنت اربع وعشرين ساعه بهالروايات ونسرين قليل تزورنا ليه ؟ ياليت كل اخواني بنات عشان احس اني فعلا بجو حلو
اميرة: دلو هين أنا بكبري مش قد المقام...
دلو: انت تحبين تقرين بجنون الظاهر والله اعلم انك مومعنا بهالعالم.
اميرة: شوفي أنا عطيتك وجه لأني لمحتك تبكين بس الظاهر انك ماتنعطين وجه.. يلله قومي شرفي و..
.دلو :بس خلاص فهمنا بطس.. ((دلو واهي طالعه قالت بنفسها بستقعد لأميرة))
داليا : أميرة تبين اطلع .
اميرة: أيييه ياعلك العافية ياليت تسوين خير وانا ختك
داليا : بشر ط. اختاري يإما آخذ اللاب توب أو عطرك اللي اشتريتيه أمس من دولتشي آند جابانا
وهذي جلسة (وتتكي على الصوفه تتربع..)
اميرة أخذت كلبسه ولمت شعرها البني الناعم وقالت : لا ذا ولا ذا وش برأسك ؟ تبين تأخذين اللاب توب عشان تلعبين باام الملفات كالعادة
العم سعود واقف على الباب: عجـــــــــــيب ....... اميره شهقت وهي ترجع لوراء.
دلو : مساك سكر بابا..<< -- بايعتها
الوالد بهيبة وشموخ: وش ذا الفوضى وين حنا فيه بشارع أنت وأياها..
أميرة: آسفه يبه بس..
دلو قاطعت: بابا وش نسوي ماحد غيرنا وقلنا نتطاق مع بعض.
الوالد شد أذن دلو و قال : أنت ياشيطونة مصدر الفوضى.
((.دلو بكت لأنها دلوعه البيت))
الوالد : اميرة
أميره : سم يبه لبيه،
الوالد : وين أمك ؟
اميرة : في بيت خالتي يبه الدورية عندها اليوم.
الوالد ناظر لدلو وشافها تبكي بتصنع وينقال له بيجاريها
وقال: أعوذ بالله كأن ميت لها أحد..
أميرة: الدلع يبه مايروح هدر.
راح ابو تركي لدلو وضمها قال :يالله عاد هذا أنا بقول لأحد العيال يعشيكم برى...
دلو نطت بقوه : واااااااااو يحيا العدل كل يوم ببكي اذا الدعوه فيها طلعة برى وناسة
الله يخليك لنا يا بابا
الوالد يمسح دموعها بطرف شماغه خلاص : لا يالنصابة اثاريك تمثلين..( وعشان مايزعلها منه ) قال : عاد رضا وراضيتك يالله تجهزوا عشان تروحون ..
اميرة: يبه ليش ما تتعشى معنا ؟
الوالد : لا يمه ماقدر بنام .... (اميرة كلمه ،يمه، وقعت بنفسها كثير ودمعت خصوصا وأن اخوانها يسمونها دميعة لأان دموعها جاهزة في أي لحظة ..)
أميرة : نوم العافية يبه تبي شي قبل نطلع...؟
الوالد : ديري بالك لك ولأختك.
أميرة: ابشر يبه..
(طبعا سوء الحظ ينطر بندر كان توه جاي من الاستراحه شماغه على كتفه ويغني بينه وبين نفسه حبيتك تنسيت النوم ياخوفي تنساني حابسني ...)
فجاءه لمح ابوه ..
بندر انلخم : العذر والسموحة يبه ماشفتك مساك الله بالخير،
اميرة ودلو كاتمات الضحك شافهم بندر وعداها واهو يناظرهن بعيون حقد
قاله الوالد : يالله يابندر ابيك تعشي خواتك باي مطعم
دلو : بابا نبي الريف اللبناني او فور سيزونز او الضوء الخافت ،
بندر وجهه تغير : سم يبه على راسي بس بقولهن من الحين بكره عندي استلام بدري يعني حدهن الساعه١٢ الوالد: عين العقل توكلوا على الله. ..(الوالد راح لغرفه المكتب)
داليا : ايه يا بندر لو أنها زوجتك كان ما رجعت إلا متى بس الشكوى لله؟
بندر: أكيد وأنت بتحطين نفسك زي زوجتي هههههههه ما يبي لها شك يالنتفه أنت
أميرة تصفق بايدينها : اهي وين بس طلعوها أنت اخطب اول وبعدين تكلم..!
بندر : اقول بلا كثرة خرط بسرعه معكم عشر دقايق أنا بالسيارة..
--سيارته بي أم دبليو سوداء--
ركبت أميرة بعد معركه مع دلو قدام و قرر بندر يركبهم كلهم وراء بس حس إن شكله غلط و خلى اميره قدام ..
بندر يتمتع بجاذبية رائعة و عليه عيون تجنن تعذب سوداء وواسعه ، وطول مذهل وجسم خيالي (يعني جنتل) كثيرا مايسوي ديري فيس ... طلع النظارة السوداء من" جورجيو أرماني " وريحه عطره من"بورباري" وكان يسوق بروية ، شغل ابو نورة (سريت ليل الهوى ليل انبلج نوره..امشي مع الجدي و تسامرني القمرا..)

((3))

في بيت العم أبو محمد
كانت الاجواء صارخة و فوضوية نوعا ما و ذلك ببساطة يعود لــ:
هشام يلعب بلاي ستيشن مع اعيال اخوه الكبير محمد والبيت كله صراخ وفوضى لأن هشام فوضوي واهو مدرس تربية بدنية بنفس مدرسة سعود وسعد عيال محمد..
دخل سلمان وانهبل .....
سلمان يبتسم : يا كثركم ماشاءالله كل ها لبزران لنا ماشاءالله اللهم زد وبارك..
هشوم : هههههههههه على يدك يالله تزوج واشتغل وشد حيلك ....
سلمان : ههههههه يالمعفن ودي بس أنت وراسك عقبه هذا كبرها بوجهي تزوج فكنا منك عشان تفتح لنا الدرب
هشوم قصر صوته : أنا مابي سعودية السعوديات اكبر مابالوحده كرشتها قدام وفوق ذا كله ماتشوف احد شيء
سلمان: اخو العيال اقول تلايط يابن افليك عاد من زينك انت وخشيشتك ..
هشام: ههههههااي والله اني ابرك منه.
سلمان: ايه مايخالف اصلا من يوم اشوفك مدرس فنية غسلت يدي.
هشام: يا ليل الناس الجاهلة ياخي كم مرة قلت لك مدرس بدنية ههههههههه
دق جوال سلمان: اهلا عبدالله ازايك ..؟ تمام عندي هشام والله انا بجي ان شالله بس بطلبك فكنا من هشام لاتعزمه ..
هشام : ياقليبي أنا بسافر عندي سفره فري امبارتنت تو ايجبت
سلمان : صادق او تستهبل!
هشوم : صادق الواحد يبي يغير جو قبل الكتمه والقرف ..!
((طبعا كان حجرف موجود طول الوقت بس بصمت))
حجرف يقرا الجريدة : بإذن اللي ماتنام عينه قايل قايل لامي تزوجك
هشام : اخيرا نطقت احسبك على الصامت غريبه وراك مسكت مو عادتك !
حجرف : كركركر يامصلك ضحكتني ينقالك تخفف دمك...
هشام :آخ بس لو تعطيني خشتك بس وقت السفره.
سلمان : استغفر الله يارب لا تؤاخذنا على مايقول السفهاء منا ...
(( طبعا حجرف يشبه لـ تاراكان بس متعقد من اسمه)
(-- يشبه لـ تاركان اكيد ملك جمال وجاذبية ---)
-
-
في هالوقت دخلت وردة
وردة اول مالمحوها هشام و حجرف يستهبلون بصوت واحد يغنون :
مثل القمر دايم تغير وصوفه مره...قمر.... و مره...... بدر( بتركيز على اسم بدر) ومره.... هلال ويكررون الاغنية ..!
انحرجت مره حمرت خدودها
وردة : وينكم ماطليتوا اليوم؟
هشام الملكع: وردة وش فيك محلوة يلعن شكل ابليسك وش مسوية بعمرك.. بس تدرين عاد بدر مايستاهلك !
((وقعدوا ثلاثتهم يتريقون علي بدر)).
هشام: اما شخصيته يا وردة كنها ستارة مصاريه ساكنين بشقة بالنسيم .
حجرف: ههههلا ا وإلا بياضه بياض فلسطيني كاشت مو يم سالفة
سلمان : وش فيكم على الجالية العربية اخخخخخ
وعلى ذا الحال حتى زعلت وراحت
سلمان : تعالي خلاص بدر احسن واحد بالعالم
هشوم و حجرف : هههههه
وزعلت طلعت لغرفتها ولقت امها جالسة في الصالون
وردة : شوفي أعيالك ما يستحون ولا يعرفون الحياء بس يحرجوني !
امها : ههههه يمزحون معاك بس ماتتحملين شي..
-
-

سلمان طلع برى ركب سيارته ولبس نظارته فجاءه لمح صوفيا اخته بتطلع نزل من سيارته قال : على وين !
صوفيا و هي ماشيه : مالك شغل....
( هنا طارت جنون سلمان ) ...سلمان : ما في طلعه لو على جثتي هي فوضي البيت ما في رجال تأخذين إذنهم
صوفيا : أنا حره ....يا أخي كل إنسان حر ومسئول عن نفسه...
سلمان ارتفع ضغطة وشدها مع شعرها.
سلمان : ذا يا عيون أمك مش هنا فاهمة حنا نخاف الله وما بقى إلا أنت بآخر عمرنا تجين تشوهين سمعة العائلة كيف بتطلعين بهالشكل ...!
سلمان قال ماتروح يعني ماتروح خصوصا وإنها متبرجة للغاية تطلع في عباية مادري وش تبي
صوفيا راحت تبكي وتشكي لأمها المغربية اللي معروفه بمشاكساتها للعائلة...

(4)

-- في مكتبة العبيكان ---

كانت زينة ثاني سنه أدب انجليزي في المكتبه تشتري كتب Poetry ‎‎_ ‎‏
اهي بقسم الكتب الانجليزية اخذت الكتب المطلوبه باقي لها كتاب As you like it‏ لوليام شكسبير...
دورت ما لقت سألت المشرف.....
المشرف : باقي كتاب واحد على الرف الأيسر من "Sonnet Shakespeare"
راحت تسابق الخطى واهي تلوم نفسها وشلون ماشافت الكتاب واهي ماره من عنده صدق غبية فرحت لأنها ما تشوف احد قريب للمكان يعني محد آخذ المسرحية..
وأخيرا أخذت الكتاب مسكته بطرف إصبعها وارتاحت.......
قالت بينها وبين نفسها : اشوى الحمدلله.
فجاءه جاها صوت.... وصوت مش أي صوت قريب حيــــــــــــــــل عند اذنها
(( لو سمحت الكتاب محجوز لي من فترة !... ))
زينة ناظرت وراء وانصعقت مو معقول هااللي تشوف ياربي !
سكتت...... ثم .....نزلت الكتاب..... و......راحت لأن اهي بطبعها تخاف مره من هالحركات خصوصا وانه لوحدها لو امها معاها كان تشجعت وردت على ذاك الشخص واستردت الكتاب ،
طلعت وقلبها يرجف..( دق دق دق دق دق ) .
اول مره تشوف واحد جمال " تركي " بزي سعودي.... لا وقريب لها..!! وش البياض ّ وش الطول والرزة ..وش العيون الكحيلة ...؟
بعد كذا ضرب قلبها ذاك اليوم بشكل غريب من الخوف حتى انها زين اللي سيطرت على نفسها وحاسبت عن الكتب وطلعت
( اخذت تكلم نفسها أنا دايم قوية وش معنى هالمره احس بخوف ياما...و.... ياما رحت باريس ولندن وروما شفت ناس حلوين بس ماقد صارلي زي هالخوف..يمكن لانه سعودي..! أي يمكن
كل هالخرابيط محاولات من زينه لنفسها عشان تقنع ذاتها بخفقان قلبها )
و مازالت تواصل حبل أفكارها ..؟
سعودي حلو غريبه...! ذز از قريت ميراكل ..^_^ .
مزجت هالفكره بإبتسامة ريحتها شوي بعدين فكرت الشيطان ملعون حريص اعوذ بالله من الشيطان
استمرت تتعوذ من الشيطان..،
اعتقد عرفتوا من ذاك الشخص...
ايه اهو....؟؟؟؟
عرفتوه ..
اللي اخته أميرة تموت بشكسبير...
نعم هو........... الوسيم......الجذاب ....المزيون
بنــــــــــــــــــــــــــــــــــــــــدر
سبحان الله وشلون بس يازينة ماتعرفين شكل ولد عمك..؟
من الطـــــرف الآخـــــــــــــر
بندر شعر بإرتباك زينه اللي مايدري انها بنت عمه وزولها ماغاب عن باله يوم ناظرت ونزلت الكتاب بكل ادب وذوق
استغرب انها ما قالت شي خصوصا وانه تعود على حركات البنات دوم مناشبينه واهو مايحاكيهم ولا يقرب لهم استغرب هالبنت كلمها والكتاب معها ونزلته بثقل ولا حتى فكرت تقزه او تبين انه حلو مثل ماتعود من البنات ،
بندر قال بنفسه : مستحيل ماأعجبت فيني إلا بحاله وحده اكيد مرتبطه وتحب خطيبها و وافية له لكذا ماتهتم لاي شخص لو كان بجاذبية جورج كلوني.. اي بس الانثى بطبعها تحب القز لو انها عجوز..
ناظر الكتاب وحس انه يعني له شي هاي كلاس
مسكه شم بقايا عطرها من (فرساتشي).... وتغلغل جواته إحساس راقي..
بعدين ضحك على نفسه وتعوذ من الشيطان وقال انا اكبر من هالتفاهات ألف وحدة تتمناني البنات كثيرات ويركضون ورا ظلي ..
وقف عند اشارة التخصصي كان مشغل ( بين ايديه وأحس انك غريب ..ذوب بأحضاني مثل قطعه جليد)
ضغط بأصبعه.....( تك ) وطفى الأغنية...
وقال بنفسه صدق المهندس رائد الأغنية الرومانسية..!!
مشى وكانت دلو كل شوي توصيه هات لي برينقز أحمر طالع يمين يسار الحمدلله ذا هايبر بندة قدامه وقف ومشي باتجاه المدخل وكان لافت أنظار كل الموجودين خصوصا النساء برزته و طوله دخل بثقل واتجه واخذ لدلو اغراض
(( فجاءه))
واهو يشتري................ لمح زول ماغاب عن باله انصدم وقال وشذا الصدفه؟
معقوله هي صاحبه الكتاب عرف شنطتها من قوتشي جلد وردي ..ا
اتجه صوبها قال بتأكد اهي اولا.. دفعه الفضول الموجود في قلب كل شاب سعودي ... حس بقلبه سبحان الله ! فعلا طلعت زينة وكانت بقسم الحلويات (لانها تموت بالكنافة ) جاها صوت من الخلف وكان قريب لها حيل عند أذنها
بندر يبتسم برقة : (( عفوا الكنافة محجوزة من فترة؟ )))
شهقت زينة وناظرت و طاح غطاها من الصدمة
بندر كأن احد صفقه كف من اللي لمح انبهر بجمالها..... ( يعني صحيح لمحها بنظره خاطفه بس واضحه انها حلوة و موت بعد) ..
الخوف سيطر عليها المسكينة...اخذت تقرا اذكارها وترددهم..
وطاح من عينها وطنشته وراحت تقول بنفسها صدق سعودي زيه زي غيره سبحان خلفيتهم وحده تعبانين مدري متى بيتركون المغازل..!
واهي تمشي..... مشي الحمام بكل ثقل و رزة ..
(( كانت ماسكه خط تفكر....... في الموقف اللي تكرر معاها ..؟ معقولة الصدفة وحدها لعبت دور .. أو ذالشاب تتبعها ... عادي يسوونها بعض الشباب الاغبياء وبدأ الشيطان يلعب براسها ياويلك اكيد ناظر لوحة السيارة ومن هالوساوس ))
-----------------مفاجأة-----------------------
صدمت عربيتها بعربيته
زينة تلقائيا صرخت : خير ماتشو ف
انصدم لانه طلعها من مخه مو في باله يتبعها... عشان يبين لها انه مو قصده يغازلها تأفف و رفع حاجب وقال: اوووووف لحووول انت اللي ما تشوفين الظاهر انك عمياء من يوم اشوفك طاقة النظارة " نظارتها من شانيل " آسف أختي بس الظاهر بعد أن هالمكان محجوز لي من فترة ؟ ((قالها واهو يبتسم ))
ومر كمل طريقة..
زينة ( رومانسية وحساسه مره) خطر في بالها انها اهي بطلة المسرحية ( Rosalind) واهو البطل الرائع
( Orlando)
سرحت زينة تفكر كيف اورلاندو ساعد روزاليند يوم كانوا في غابة أردن .. وكيف قدرت روزاليند تخفي شكلها على انها ولد ... راحت وخشت جو مع شكسبير << -- معذبتها المشاعر اخخخ
"
"
راح بندر بكل ثقل ولا همه شي أخذ اغراضه وطلع طبعا كان وراءه كم هائل من المغازلجيات ولكنه يعجبنا بثقله وتطنيشه لهن..لأنه يدرك انهن يهتمن بالمظاهر فقط..
واهو ماشي كان موقف سيارته بعيد وقف بجنبه همر اسود كتم من كل الأطراف
انفتح الشباك الخلفي
إذا بوحده عيونها ذباحه طاقه لثمه
قال بندر واهو يناظرها : اي خدمه ؟
قالت بصوت مصطنع الغنج والدلع : اييييه ، أحنا كنا في الخبر ودوبنا ساكنين هنا ، أحنا ساكنين في البديعه وأنا ماادل ولا السايق كمان ممكن تدلينا.
بندر بدون نفس بدا يوصف للسايق مع انو لاحظ ان نظرات البنت ماقارقته ابد ..
قالت : اسمي مروه ، وأنت؟ قال : بندر
بندر بإبتسامة : هاه اختي وضح الوصف !
قالت : لا وش رايك تتفضل معايا بالسيارة اسهل للوصف؟
بندر : ( تحسف لأن عنده دوام اخخخ ) آسف يااخت مروة عن أذنك
. وراح..واهو يقول بنفسه مادري متى الاهالي بيحسون ببناتهم والله حرام كل ذا الحرية..
واللي يعجبنا في بندر انه مهما نشوف من تصرفاته آلا انه مرجعه الديني والاخلاقي اوكي...
فتح باب السيارة......... طلع صوت السيارة اول ما تفتح ( دن ن دن )
دخل المفتاح في السيارة ورفع راسه ( طبعا كان مشخص كاشخ الرجال )
وناظر قدامه شاف البنت اللي شافها اكثر من مرة هاليوم
بندر ابتسم لها : سبحان الله سبحانه من خلق وفرق في بنات يجبرون الشاب غصب يحترمهم و يغض البصر عنهم و في بنات أعوذ بالله يبلون الواحد غصب يكحل عيونه فيهم...
( زينة الرزينة كان في شي قابض على صدرها مضايقها بس ماتدري وش؟ يمكن المواقف اللي تكررت لها مع نفس الشخص )
( طول الطريق واهي كل ماسرحت تلقي صورته بعيونها... قالت بنفسها ماأقول إلا انه جريء بس بإحترام
زينة بينها وبين نفسها تضحك سبحان الله بجد حطم معنوياتي عز الله مانيب لاقيه زيه شكلي بضرب عن الزواج )
يوم وصلت البيت دخلت
زينة : السلام ياعباد الله ..! بيبول اوف ذا هاوس
بدر : ههههه وعليكم السلام..
زينة مدت البوز : يو يو وشذا على وين
بدر : وش تشوفين يعني ألعب مصاقيل انا هههه وش يعني آضبط شناطي الاجازة وخلصت..
زينة: صحيح ان دمك ثقيل .......
((بعدين قلبت جدية )) زينة : تكفى طنش استنسنا معك احس البيت في اكشن وانت هنا .
بدر : بس ذي مشكلتك حطي2 mbc‏ ويقولون فتحت اكشن بعد .
زينة: واهي تبكي الله يخليك تكفى لا تروح ..
بدر :مو بيدي ياوخيتي من ورا خشمي ذا مستقبلي يعني اربع سنين وانا ابني والحين ماقدر اطنش .
زينة : أمي مسافرة بكرة ايطاليا عند ابوي عندك خبر ؟
بدر: ابوي قالي ..اهم شي تجين عشان تطلعون لي كندا وامشيك زين..
زينة: بدر امنيتي نقعد بالسعودية مع بعض شهر واحد..
بدر : هذا واقعنا وهذا نصيبنا ولن يصيبنا إلا ماكتب الله لنا ابوي ذا شغله وخبرك منصبه صعب
زينة: الله يصبرنا بس... ويلم الشمل
دق جوال بدر.. ( نغمة نوكيا )...: . هلا بندر شلونك ؟ انا بخير أخبار الاهل يلا احتريك توصلني المطار..
زينة: خلاص يعني من غير شر بتروح .... دير بالك لنفسك والله الله بصلاتك امانة معك ..
بدر: ابشري يمه لاتوصين حريص..
طلعت زينة لغرفتها وكان قلبها مليان هموم...راحت تسترخي على الصوفة
واضغطت التلفزيون حطت ام بي سي اف ام وسمعت
((على خير أشوفك
..كان حنا من الحيين.
.مصير الليالي تجمع الحي مع حيه.))
.امتلات عيونها دمووووع ...
وطلعت الصيحه اللي كاتمتها من فترة...واللي كمل عليها دق جوالها وكانت نغمته
(( ودعتك الله يا نظر عيني ..بأمانة اللي ماغفت عينه.. ما ودي تترك يديك يديني ... فرقى الحبايب يابعدي شيني ))
طبعا ماردت على ابتهال لانها تبكي بحرقه لسفر اخوها الوحيد بدر...

ديمـــا 06-10-08 11:27 PM

(5)

-- في بيت ابو خالد ----


خالد الابن الاكبر للعم ابو خالد زوجته هي نسرين أخت اميره ودلو..
خالد يموت بزوجته بجنون بخبال واهي تحبه معاهم طفلين رامي و راما تؤام لهم خمس سنين
و هنا نشوف المشكله ...........!!!
نسرين مصره ماتحمل إلا إذا صاروا عيالها عشر سنوات وفوق
وخالد رافض هالشي وهنا الأزمه اللي ليليا تنعاد...
كانت نسرين عند اهلها لأن امها تعبانة و تأخرت وصلها اخوها نايف تؤام نواف..
دخلت ولقت خالتها ام خالد وعندها تغريد والهنوف سلمت واهي ماشية وطلعت فوق استغربت ام خالد
ام خالد : لا يكون أم تركي فيها شي لا سمح الله...
تغريد: لا إن شالله بس نسرين دايم قابسه مادري ليه؟ مسوية لي فيها تراها نسخه من أصالة وش شايفه نفسها علية اوف بس.. (((( الهنوف تبتسم طبعا مؤيدة...))))
ام خالد : مو عشانها طيب عشان خاطر خالد هالضعيف ياعزاه له بس مو عاجبني خير شر..
الهنوف : ان شالله بيتهم بيخلص ويستطفلون فيه مالنا شغل فيهم.
تغريد : اتعب انا على اللبناني يسطفلوووون... مااقول غير ياشين السرج على البقرة
ام خالد: ياهمي من ذا اليوم! الله يوفقهم و يستر عليهم...
في هذا الوقت.
.دخل نواف طبعا اهو ينشاف مره بس باليوم اول مايصحى بس بعدين يطلع
تغريد : غريبة بيجينا مطر نواف صاحي بالنهار
نواف : انطمي يا العنز ترى قافله معي اطلعي من مخي...
امه: اعوذ بالله اذكر الله بعدين وراك ماصليت امس الفجر الحين جالس وإذا سمعته اقام تنام هذا عقل او عصيان!!
نواف: يمه كنت تعبان حدي واصل وحطيت راسي ونمت ولا تخافين جاني خالد بعلبه مويه على راسي،
الهنوف : احسن تستاهل .
نواف: يمه سكتيها لاأقوم اسويها برحة..
.الهنوف: كركركر ماتضحك..

(((إلتفت لها وقال يلا طسي هاتي لي كوب ماء)))
. الهنوف : نكبه عليك او تشربه... --هنا قام نواف---
الهنوف : اخواني عسل كلهم حتى عيال خالتي نورة، اما أنت كارثه .
.قالت امها : انطمي لا تراددين اخوك !
نواف: شفت يمه تلوميني... يالله هنيف يالله هاتي مويا.. (راحت واهي تحلطم بينها وبين نفسها.).
إلتفت وقال اي بنت ماتجي إلا بالقوة، التفت لتغريد وقال: ما شاءالله هاتي الريموت بعد وأنا جالس..تفرفر بهالقنوات
صرخت تغريد : خذ على قلبك تهنى فيه..
//.راحت واهي زعلانة..//
الهنوف وهي داخلة الصاله : وش فيك تغريد..! سبحان الله يصير له شي إذا مازعل احد.. !
نواف: والله لو مانطميت لألحقك اختك بعدين حشى ذبيحه مو كأس مويا...
الهنوف نزلت الكأس وراحت......
واهي واقفه التفت لنواف
الهنوف : لا اوصيك شفر القنوات اترك لنا الخليجيات بس ..
نواف طير حواجبه بحركة تضحك : مايحتاج تذكريني لا تخافين و بترك لكم اليمن والسودان إكراماً مني
وطول الوقت يسولف على امه سواليف..
نواف :وين موسوعة حرف الراء .
ام خالد: من؟............. نواف : رامي وراما .
.ام خالد: لنا 3 ايام ماشفناهم بس على الفيديو،
نواف : يمه هم كبارين ورى مايجيبون لنا كتاكتيت جداد..
ام خالد: والله ياوليدي خبري خبرك...حتى امهم جالسة في البيت بالاجازة وأنا ودي أشوف البيت متروس عيال وحنا ماندري عنهم يمكن ظروفهم صعبه.
.فجاءه دخل خالد..
. خالد : مساك الله بالخير (خالد يشبه لحد قريب من رضا العبدالله واحلى بعد ) وجلس..
خالد : ماشاءالله أشوف في مطر اليوم اثاري النوفي متذكر ان له اهل يجلس معهم
ننواف بمزح : تعرف حنا المهمين وقتنا مو لنا "يقولها بترفع وبصوت رخيم "
خالد من قلب: هههههههههههه
خالد : ..أخبار الدراسة؟
نواف : تمام ابشرك.
خالد: لي عشر سنين كل ما انشدك عن دراستك قلت تمام والنتيجه العكس..
نواف: يابن الحلال تعرف لهجتي امريكية وعيال الذين يبون انجليزية بحت..
.ام خالد: يمه خالد وش رأيك نطلع للبر بكره دام الارض ممطورة، وبالمرة خواتك هالمسيكينات يغيرن جو..
نواف : يمه لا يغرك المسكين سكين...
خالد وأمه : هههههههههههه
..خالد: ابشري أنا ودي بعد اغير جو ،
نواف: خالد اتق الله وراك ناحف؟
.خالد بنظرة فيها حزن وشجن مغطى بإبتسامه مصطنعه : ياشيخ احسن عشان اصير احسن منك ، بعدين نسرين تقولي لا تسمن كذى احلى.
ام خالد: وامك تقولك اهم شي راحتك..
خالد: يمه يعلني ماابكيك أنا مرتاح دامي أصبح و أمسي عليك..
نسرين دخلت عند تغريد والهنوف كانت تغريد تحش فيها ،
والهنوف تغمز لتغريد إنها دخلت،
نسرين بأستكبار: خالد تحت؟
تغريد ارتبكت قالت وهي تضحك.... : اي لا اي اي اظنه تحت .
.نسرين: بإبتسامة ساخرة بليز ناديه قولي نسرين تبيك
تغريد بينها وبين نفسها تقوووول مالت عليك وعلى شكلك حشى مرسال لك انت وخشتك ...
تغريد: سوري روحي أنت..
نسرين: اوه نسيت ان نواف ماسح فيك الأرض تو.. (تغريد سفهتها وكتمت دمعتها)
. الهنوف : اخوان وكيفهم أنت وش حاشرك..!
صفقت نسرين وقالت: برافوا تعلمت من أمك اساليب الرد البدائية
هنا انجنت تغريد: احنا مش راح نرد عشان خالد اخوي ! وامي ابرك منك يانسرين النسرة..
هنا طلع خالد فوق وسمع آخر جملة قالتها تغريد زعل لأنها تشتم زوجته..
بس ماهاوش تغريد ولاحتى عاتبها الامر اللي جنن نسرين.. لان خالد مثل الابو لخواته لو يغلطن ما يناقشهن او يحسسهن بالغلط لانه يبي يعوضهن حنان الابوة اللي فقدوه
خالد اتجه صوب جناحه ولحقته نسرين معصبه دخلت... والنار تتطاير من راسها
نسرين : شفت اختك المحترمه كيف تحاكيني..!
خالد: بعدها بزر ومراهقة راعيها عاد.
.نسرين: بزر ومراهقة اللي بعمرها معها ثلاث اربع بزران ،
خالد بنظرة رجولية خالص (عيونه لونهم عسلي) : أنت أكبر منها وما معك إلا اثنين...
(((((هنا تلعثمت نسرين))))
وقالت بصراخ: هالموضوع خلصنا منه خلاص اثنين نعمة كريم...
خالد : لا بس عشان تراعين غيرك (وما عطاها اي اهمية والتفت) قال : اسمعي بكره ان شالله بنطلع مع امي وخواتي البر جهزي نفسك
نسرين : مانيب رايحه العالم تسافر تغير جو وأنت بتأخذني لربوع الرياض طالع نورة كل اجازة و وليد طاير فيها مكان لا وليت نطس للبر بلحالنا اهلك معنا
خالد بصوت اجش: ماعليش لازم تبين اقول لامي لاااا مايصيير عيوني
نسرين راحت تبكي من القهر واهو راح يشيك على رامي وراما،
جلس على صوفة بيضاء وراح يفرفر بهالقنوات حتى رسى على مسلسل "باب الحارة".
الساعة تشير الى الثانية والربع ليلا راح خالد بينام لقى نسرين مشغله اضاءة خفيفه ونايمه دخل وحط راسه ونام....
-
-
-
-

(6)

بكت زينة لين صفى رأسها من الهموم ..
صحت وناظرت وإلا الساعة ثلاث و نص وقامت تتوضأ وراحت تصلي قيام الليل وتدعي الله الجنة لها ولوالديها ولكل مسلم وان الله يلم الشمل...
يالله هذا صوت المؤذن صوت الحق يصدح في جميع الارجاء
...الله واكبر الله وأكبر ..لا إله الا الله محمد رسول الله ..أشهد ان لا اله الا الله وأشهد ان محمد رسول..حي على الصلاة..حي على الفلاح الصلاة خير من النوم
زينة:اللهم رب هذه الدعوة التامه و الصلاة القائمة آت محمد الوسيله والفضيله وابعثه اللهم المقام المحمود الذي وعدته).
قامت تصلي..
.بعد ماصلت جتها امها "مضاوي" ....
ام بدر : زينة ماما ترى اليوم احنا مسافرين ان شالله .
زينة: سمي يمه مجهزة نفسي.
راحت ام بدر تنام ،.....
زينة مسكت براسها فطور نزلت المطبخ طلعت توست مع شرائح جبن وقطع خيار وكأس عصير اورانج طازج..
واهي جالسة تأكل فجاءه انرسم في بالها صورة الشخص اللي شافته في المكتبه ،
زينه تفكر في : اوف وش جاب خياله بس اعوذ بالله..!
بعدين طلعت تنام و طول ماهي رايحه لغرفتها شموخ ذاك الشخص امامها..
راحت ودخلت غرفتها و نامت...
(((الساعه١١صباحا)))
ام بدر : زينة قومي باقي نص ساعه على رحلتنا ....
زينة صحت بفزع اوكي مام صاحية إن شالله..
ام بدر كانت نازله بالمصعد لتحت دق جوالها تناظر ماعرفت الرقم مع انه مميز ولا ردت، لاحظت إلحاح هالمتصل قالت برد أشوف وش يبي ،
ام بدر: نعم مساء النور..مين معي ؟ بندر مين! اها اهلين والنعم ياحياك الله شلونك اخبار الوالدة والاهل ؟ ابشرك احنا بخير ياعساك بخير..لا مانبي نكلف عليك السايق يوصلنا المطار...يابن الحلال دام بدر موصيك علينا مانبي نردك..خلاص خلال ربع ساعه حياك احنا جاهزين..
زينة لابسه جينز ازرق فاتح من شارليز كيث على تي شيرت وردي من جنيفر لمت شعرها الاسود بكلبسه...
ودخلت امها بسرعه..... ام بدر : يلا زينه بيجينا بندر يوصلنا مستحين نأخره ..
زينة بإمتعاض : بندر مين؟
امها : ولد عمك فهد بدر موصيه علينا..
زينة بتضجر: يا سبحان الله وش دخله يوصلنا مسوي لي فيها انسانية عندنا سايق ماشكينا لاحد،
امها : يلا تكثرين بربرة وبسرعه انجزي.
زينة معاها شنطتها والشغالة اخذت الشناط بالسيارة..
وبندر كان كاشخ مسوي لوك رائع.. << -- جنان طالع
لابس نظاراته ( ارماني ) والصدفه انه اشتري عطر من فرساتشي وكان اهو عطره..
طلعت ام بدر وزينة ركبوا بالسيارة....
ام بدر: مسااء الخير !
بندر: هلا مساك الله با لخير ..
زينه انصفقت صفقه عنيفه قوية تكهرب جلدها كأن دمها صار قطع ثلج ماعاد تحس
لدرجه انها ماسلمت ابد.....
معقـــــــــــــــــــــــــــــــــــــوله
( هذا اللي شفته بالصدفه بكذا محل.! أي والله اهو معقولة شبهه لا والله انه اهو... اعرفه زين )
امها تطقها من تحت يعنني سلمي وزينة خبر خير.
الدنيا مليانة صدف بس صدفه زي كذى فري امبسبول حتى الافلام الهندية على الرغم من خيالها الخصب ماصار فيها زي هالصدفة.!
ام بدر: بندر وشلون امك؟
بندر : بخير هاه ان شالله ماأنتم مطولين؟
ام بدر: اسبوع.
بندر: ترجعون بالسلامة. (.بندر لاحظ ثقل بنت عمه )
وصلوا المطار نزلوا كلهم زينة ما تحملت هالصدفه وراحت تحط الف سبب وسبب واللي حطم قلبها ان عطره عطر من فرساتشي.
اول مره زينة تغادر مطار الملك خالد وهي طايرة من الفرحة..
ام بدر استأذنت وراحت تتكلم في جوالها..
ألتفت بندر لزينة وقال : هاه يااختي عاد انتبهي للوالده ولنفسك اعتقد مؤكد يو هاف انجلش لانقوج..
زينة بصوت مروع مره وخايف : يس اي ستدي انفلش لايتلتشر..
بندر: نايس نايس.. ههههه
بندر: سلامي لعمي كثير وإن بغيتوا اي شي دقو علي ..
ام بدر : الله يعافيك
راحوا طلعوا الطيارة .. بندر راح راجع للبيت...

"في تلك اللحظه الخاطفه ولد إحساس غريب يشوبه الخوف ولكنه مغلف بأجمل صدفه بالعالم" هذا ماكتبته زينة بالطيارة بينما امها كانت تستفسر عن ذي لاست فايشن ان روما عشان تحضر .(ام بدر شخصيتها قوية لاترحم دكتاتورية مصلحتها اهم من اي شي حتى من بنتها زينة..وولدها بدر.. واهي دكتورة شاغلة وقتها بالندوات والمناسبات الاجتماعية ماتحب احد احسن منها واختلاطها بنساء العائلة محدود وحتى شكلها كثير ناس يغلطون بينها وبين زينة يقولون خوات ...مضاوي ام بدر شقراء جسمها نحيل مصقول..واللي نبت ريشها زود اطراء الحريم لبنتها زينة انها جميله وملكة بالجمال..).
ام بدر: زينة وش تشربين ؟
زينة : سلامتك مام بكتب بس.. (( يامحاسن الصدف يازينة اللي صورته من شفتيه مافارقتك بحزنك وفرحك يطلع ولد عمك آه يابندر ليتك تدري بشوقي ! كل ذا الشوق انولد اول ما تأكدت انه ولد عمها راحت تتخيل عيونه، شموخه، بسمته، وحتى يوم يوصيها على امها يازين مرجلته بعد..! طول وقت السفر واهي تتذكر ذاك الجمال مع انها بديار الجمال ايطاليا.. بس كلهم مايجون نقطه في بحر جاذبية بندر...))
بندر رجع البيت استقبلته الوالده هلا بابوي وامي بندر: يابعد قلب بندر انت يمه
ام تركي: وينك على الغداء ماشفناك .
بندر: يابعدي رحت اوصل ام بدر وبنتها للمطار دق بدر ووصاني عليهم..
امه: كفو يمه الصديق وقت الضيق الا وش اخبار مضاوي؟
بندر : منهي ام بدر وإلا بنتها..؟
اميرة: الله وأكبر يعني ماتعرف اسم بنتها .
بندر: لو اعرف ما كان قلت كذى...بعدين انت وش نطقك...
امه: خلك منها مضاوي ام بدر؟
بندر: ماعليها تسأل عنك..إلا وش اسم بنتها؟
دلو: زينة...
اميرة: ذا وأحنا نفكر نخطبها لك .
بندر: فكوني من شركم خطيبتي بإختياري وهي لسي ما بينت مو من هنا ابد مابي من بنات عمي (طبعا صورة البنت اللي شافها بالمكتبه تقرقع براسه)
طلع بندر غرفته ولقي اخوانة نايف ومحمد "طبعا يشبهون بندر قليل" يناظرون المباراة كانت بين الهلال والنصر..نايف هلالي، محمد نصراوي..( تؤام مختلف )
بندر: اول مره اشوف تؤام يختلفون محمد ياخي شجع الهلال ونفتك من ذا الفوضى!
محمد : اعوذ بالله من النيفيا فريق الرشوات وفريق البنات.((طبعا بندر هلالي ..))
نايف: بندر وش رأيك نعذبه بخليه يتذكر بث يقول النثر الحالمي ويتدلك بفازلين...
بندر: حرام لازم نرحمه عشان ماتفطس علينا أنت نسيت انك تؤام....
أم تركي: يالله ياعيال الصلاة صلوا بالمسجد...
بندر: سمي يمه ابشري.
*****
(7)

زينه مسترخية على الصوفة الاورانج ، ماسكه خط تفكر بالسعودية ، كانت لابسه بجامة موسلين بساتان وردي بأحمر ، وتسمع لابو نورة صاحب الإحساس المرهف ورائد الأخلاص بالعالم
..( أنا لك يا بريق ألماس وأنت لمعه ألماسة وحساسه..)
زينة كتبت خاطرة عابرة مرت في خيالها عبارة عن اسئلة ....
Where are you going?
Would not you like to know?
Can I follow you?
How far?
As far as forever
فجاءة دخل ابوها... ، زينة نطت وراحت تبوس رأس ابوها
زينة: مأجور يبه...
ابو بدر بحنية : الله يكتب لنا ولك الاجر ولسائر المسلمين..وين أمك ؟
زينة في براءة الاطفال : أمي راحت عندها موعد بالعيادة...
ابو بدر يتمسخر : لا تكون عادتها عيادات تجميل ومن هالخرابيط
زينة: تبتسم...لا يبه بوتكس خفيف ، بعدين وش دعوى ترى امي تكشخ لك ياحلو ..!
أبو بدرابتسم بسخرية : الله يرحم الحال...وأنت ورى مارحت تتفرجين ؟
زينة مسوية عاقلة خخخ : مليت أمس فريت كل شي بس عاد اكثر شي جاز لي ذا انترناشونل ميلودي في متحف روما..اللوحات عندهم غير شكل تطير العقل...!
ابو بدر بحماس : تدرين في واحد سعودي عارضين له لوحات..
زينة بكبرياء : اوف غريبه كيف وصل هنا مع إن الايطاليين مايحبون احد يشاركهم فنونهم...وأحنا يالعرب خبر خير ممشين خرابيطهم...
ابو بدر(كان يشغل منصب بالسفارة السعودية في ايطاليا)..: لا عاد يازينة ايطاليا تعني لي ذكريات وماضي وحلم...مرت سنين وأنا هنا اناظر نجومها وأعاني بليلها...
زينة:احم احم لا يكون حبيت لك وحده من هالإيطاليات عاد ملامحهم قريبه للعربيات يمكن حنينك ولهفتك للاوطان رسخت بذهنك تحب ايطالية...
ابو بدر( ذكرى النزف انجرحت و تجددت حالياً) : انت تدرين ان ابوك مو تبع هالشغلات وقتي لشغلي و ارتباطتي ( رفع راسها بحنية و انصدم من عيونها البريئة اللي تذكره في ماضيه العذب كل مايشوفها) انا آخر شخص يفكر في خرابيطكم ذي عواطف و مشاعر ههههه
.انفجرت زينة : ههههههههه
ابوبدر: اعوذ بالله مستحيل افكر اني اطالع غير امك ! خبلة انتِ تبينها تزنطني
(الحب إحساس دفين..يختلج خلجات القلب ويستوطنه.. والأصيل تميزه آصالته في مملكة الوفاء للأبد...هذه الكلمات مرت بخافق زينه..اكتشفت ان عندها موهبه كتابه خواطر عربية او انجليزية ولكن احساسها و شوقها للسعودية جعلها تبدع اكثر في خفايا العربية، اكثر من الانجليزية اللي تشوف انها خالية تماما من الاحاسيس ولاتعدو ان تكون لغه العصر للحديث والدراسة فقط، اما ما يتعلق بالاحاسيس والمشاعر فالعربية ارحب وارق بكثير..)
في ذلك الدفتر المخملي الكحلي الذي يزينه رمز شانيل كتبت " إليك يامن كنت كضوء ساطع انار على روحي بمصباح الحب، اعلم ان المسافات بعيدة وتفصلنا البحار والقارات.. ولكن اتوق لسماع سموفنية رقيقه تعزفها بأنامل مشاعرك على اوتار قلبي ، أنت انشودتي في كهوف المستحيل" كل ذي الخواطر توضح لنا انها طاحت ولا احد سمى عليها..


الساعة الآن 12:35 PM.

Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية